VOA News: ព័ត៌មាន: “ទឹកជំនន់ទន្លេប៉ះពាល់ខេត្តនៃភូមិភាគឦសាន” plus 2 more |
- ទឹកជំនន់ទន្លេប៉ះពាល់ខេត្តនៃភូមិភាគឦសាន
- ជនជាប់ចោទជរានឹងត្រូវចូលសវនាការអំពីរឿងសុខភាព
- ព័ត៌មានអន្តរជាតិសង្ខេប៖ ១២ សីហា
| ទឹកជំនន់ទន្លេប៉ះពាល់ខេត្តនៃភូមិភាគឦសាន Posted: 12 Aug 2011 12:47 PM PDT មន្ត្រីខេត្តបាននិយាយនៅថ្ងៃសុក្រនេះថា ផ្ទះសម្បែងរបស់ប្រជាពលរដ្ឋប្រមាណ៥.០០០ខ្នងនៅភាគឦសានប្រទេស ត្រូវបានទឹកជំនន់ទន្លេមេគង្គជន់លិច ហើយក្រុមសង្គ្រោះច្រើនរាប់រយនាក់កំពុងត្រៀមកម្លាំងជួយសង្គ្រោះប្រជាពលរដ្ឋ ខណៈដែលទឹកទន្លេមេគង្គនៅតែបន្តឡើង។ កម្ពស់ទឹកទន្លេមេគង្គនៅក្នុងខេត្តស្ទឹងត្រែងបានឡើងដល់១០,៨៨ម៉ែត្រនៅថ្ងៃសុក្រនេះដោយហួសកម្រិតកំណត់ចំនួន០,១៨ម៉ែត្រពីកំពស់ទឹក១០,៧៥ម៉ែត្រកាលពីថ្ងៃព្រហស្បតិ៍ ហើយកម្ពស់ទឹកនៅក្នុងខេត្តក្រចេះបានឡើងដល់២១,៧១ម៉ែត្រនៅថ្ងៃសុក្រនេះពីកម្ពស់ទឹក ២១,៦២ម៉ែត្រកាលពីថ្ងៃព្រហស្បតិ៍។ នេះបើតាមការអះអាងរបស់មន្ត្រីខេត្ត។ លោកឡូយ សុផាត អភិបាលខេត្តស្ទឹងត្រែង បានថ្លែងថាភូមិចំនួន៣៧ដែលមានប្រជាពលរដ្ឋជាង៥០០គ្រួសារ និងផ្លូវថ្នល់តាមដង ទន្លេមេគង្គប្រវែងជាង៤០គីឡូម៉ែត្រនៅក្នុងស្រុកថាឡាបរិវាត់ ក្រុងស្ទឹងត្រែង និងសៀមបូក ត្រូវបានទឹកទន្លេមេគង្គជន់លិច។ លោកឡូយ សុផាត បានបញ្ជាក់ថា អ្នកភូមិចំនួន៥០គ្រួសារត្រូវបានជន្លៀសទៅកាន់ទីទួលសុវត្ថិភាព។ «យើងបានដាក់ពង្រាយកម្លាំងសង្គ្រោះជាង១៥០នាក់រួមមានកងនគរបាល កងយោធា និងកងរាជអាវុធហស្ថ ព្រមទាំងអ្នកស្ម័គ្រចិត្តកាកបាទក្រហម ដើម្បីចុះទៅតាមស្រុកនីមួយៗដែលទទួលរងគ្រោះនៃទឹកជំនន់នេះ ដើម្បីជួយជន្លៀសពួកគាត់ និងគោក្របីសត្វផ្សេងៗទៀតរបស់ពួកគាត់ទៅកាន់ទីកន្លែងសុវត្ថិភាព។ ស្ថានភាពទឹកជំនន់នៅក្នុងខេត្តស្ទឹងត្រែងនៅតែជាកង្វល់។ និយាយរួមទៅ ទឹកនៅតែបន្តឡើងនៅឡើយ និងនៅតែជាកង្វល់នៅឡើយ»។ លោក ខាំ ភឿន អភិបាលខេត្តក្រចេះ បានបញ្ជាក់ថា ឃុំចំនួនជាង៣០ ផ្ទះសម្បែងរបស់ប្រជាពលរដ្ឋប្រមាណ៤.០០០ខ្នង វត្តអារាមចំនួនប្រាំ សាលារៀនចំនួន២៦កន្លែង ផ្លូវថ្នល់ប្រមាណ៤០គីឡូម៉ែត្រ ព្រមទាំងសន្ទូង និងសំណាបជាង៥.០០០ហិកតា និងដំណាំផ្សេងៗ ជាង១៤០ហិកតានៅក្នុងស្រុកសម្បូណ៌ ស្រុកព្រែកប្រសប់ ស្រុកឆ្លូង ស្រុកចិត្របូរី និងក្រុងក្រចេះត្រូវបានទឹកជំនន់ទន្លេមេគង្គជន់លិច។ លោកឧត្តមសេនីយ៍ត្រី ជួង ស៊ាងហាក់ ស្នងការនគរបាលខេត្តក្រចេះបានបញ្ជាក់ថាប្រជាពលរដ្ឋមិនទាន់ចាកចេញពីលំនៅដ្ឋានរបស់ពួកគាត់នៅឡើយទេរហូតមកដល់ម៉ោងនេះ ថ្វីត្បិតតែទឹកឡើងលិចក្រោមផ្ទះរបស់ពួកគាត់រហូតដល់ជាងមួយម៉ែត្រក៏ដោយ។ «យើងគិតថា ទឹកនៅតែមានកម្លាំងបន្តឡើងនៅឡើយទេ។ សរុបទៅ កម្លាំងនគរបាលក្នុងក្របខណ្ឌទូទាំងខេត្តមានប្រមាណ៥០០នាក់សរុបទាំងក្រុងទាំងស្រុកដែលយើងត្រៀមធ្វើអន្តរាគមន៍សម្រាប់ពេលដែលមានសំណូមពរចាំបាច់។ យើងបារម្ភខ្លាច នៅពេលដែលមានខ្យល់ព្យុះមក វាអាចធ្វើឱ្យមានបញ្ហាប៉ះពាល់ដល់ប្រជាពលរដ្ឋ។ យើងបារម្ភខ្លាចទឹកវាលិចទៅហើយ ច្រាំងទន្លេបាក់ស្រុតដែលយើងត្រូវមានគ្រោងការទុកជាមុន»។ ក្រុមមន្ត្រីខេត្តទាំងពីរ បាននិយាយថាគ្មានរបាយការណ៍អំពីគ្រោះថ្នាក់ស្លាប់ដោយសារទឹកជំនន់ទន្លេមេគង្គនេះទេ។ លោកចាន់ យុត្ថា នាយកឧទ្ទកាល័យក្រសួងធនធានទឹក និងឧត្តុនិយម បានថ្លែងថានៅម៉ោង៥រសៀលនេះ ខេត្តស្ទឹងត្រែងមានកម្ពស់ ទឹក១០,៨៨ម៉ែត្រដែលស្ថិតនៅនឹងថ្កល់តាំងពីម៉ោង១០ព្រឹកមក ហើយកម្ពស់ទឹកនេះនឹងចាប់ផ្តើមស្រកនៅថ្ងៃសៅរ៍ស្អែក។ ខេត្តក្រចេះមានកម្ពស់ទឹក២១,៧១ម៉ែត្រនៅម៉ោង៥រសៀល បើប្រៀបធៀបនឹងកម្ពស់ទឹកនៅម៉ោង៧ព្រឹកមានការកើនឡើង០,០៧ម៉ែត្រ ហើយកម្ពស់ទឹកនេះនឹងចាប់ផ្តើមស្រកចុះវិញនៅថ្ងៃទី១៤។ ខេត្តកំពង់ចាម មកដល់ម៉ោង៤រសៀលមានកម្ពស់ទឹក១៥,០០ម៉ែត្រ ហើយកម្ពស់ទឹកនេះអាចនឹងស្រក់ចុះវិញនៅថ្ងៃទី១៥៕ This posting includes an audio/video/photo media file: Download Now |
| ជនជាប់ចោទជរានឹងត្រូវចូលសវនាការអំពីរឿងសុខភាព Posted: 12 Aug 2011 12:23 PM PDT អតីតមេដឹកនាំកំពូលខ្មែរក្រហមចាស់ជរាចំនួនពីររូបនឹងត្រូវបាននាំខ្លួនចូលសវនាការថ្មីមួយទៀតក្នុងអង្គជំនុំជម្រះសាលាដំបូងនៅចុងខែសីហានេះដើម្បីជជែកដេញដោលពីស្ថានភាពសុខភាពរបស់ពួកគេថាតើពួកគេមានកាយសម្បទាគ្រប់គ្រាន់ដើម្បីចូលរួមដំណើរការកាត់ទោសពួកគេបានដែរឬយ៉ាងណា។ នេះបើយោងតាមដីកាដែលត្រូវបានចេញដោយលោកចៅក្រម និល ណុន ប្រធានអង្គជំនុំជម្រះសាលាដំបូងរបស់សាលាក្ដីខ្មែរក្រហមនៅថ្ងៃសុក្រនេះ។ លោក នួន ជា អតីតប្រធានសភាខ្មែរក្រហម អាយុ ៨៥ ឆ្នាំ និងលោកស្រីអៀង ធីរិទ្ធ អាយុ៧៩ ឆ្នាំនិងជាអតីតរដ្ឋមន្ដ្រីក្រសួងសង្គមកិច្ចនឹងត្រូវចូលសវនាការរយៈពេលបីថ្ងៃចាប់ពីថ្ងៃទី ២៩ ដល់៣១ ខែសីហានេះ ខណៈដែលជនជាប់ចោទពីរនាក់ទៀតគឺអៀង សារី អតីតរដ្ឋមន្ដ្រីការបរទេស និងខៀវ សំផន អតីតប្រមុខរដ្ឋខែ្មរក្រហមមិនបានប្ដឹងតវ៉ាឲ្យមានការជំនុំជម្រះសម្រេចសេចក្ដីពីភាពអាចចូលរួមសវនាការបានដោយបញ្ហាសុខភាពនោះទេ។ នេះគឺជាសវនាការលើកទី២ក្នុងសំណុំរឿង០០២ មុននឹងអង្គជំនុំជម្រះសាលាដំបូងអាចបើកសវនាការពេញអង្គសេចក្ដីនៅក្នុងអំឡុងចុងឆ្នាំ២០១១ នេះ។ កាលពីចុងខែមិថុនាសាលាដំបូងបានបើកសវនាការបឋមមួយដែលជាសវនាការលើកដំបូងសម្រាប់សំណុំរឿងដ៏មានសារសំខាន់នេះ។ សវនាការនោះដែលត្រូវចាត់ទុកថា គឺដំណើរឆ្ពោះទៅរកការកាត់ទោសលើអតីតមេដឹកនាំកំពូលខ្មែរក្រហមចំនួនបួននាក់ដែលនៅមានជីវិតក្នុងភាពជរានេះ។ លោក នេត ភក្ដ្រា អ្នកនាំពាក្យសាលាក្ដីខ្មែរក្រហមបញ្ជាក់ថា សវនាការលើកនេះនឹងជួយឲ្យចៅក្រមសាលាដំបូងធ្វើការកំណត់កាលវិភាគការកាត់ទោសពេញអង្គឲ្យបានត្រឹមត្រូវយោងតាមស្ថានភាពសុខភាពរបស់ជនជាប់ចោទ។ «កាយសម្បទានេះសំខាន់ពីព្រោះយើងឃើញថា ការអង្គុយឬការចូលរួមក្នុងសវនាការរយៈពេលយូរដូច្នេះអង្គជំនុំជម្រះសាលាដំបូងគាត់ត្រូវការដឹង។ ពេលដែលទទួលបានការវាយតម្លៃរួចហើយគឺអង្គជំនុំជម្រះអាចនឹងឈានដល់ការកំណត់លើកាលវិភាគរៀបចំសវនាការលើអង្គសេចក្ដី»។ នួន ជា អៀង សារី ខៀវ សំផន និងអៀង ធីរិទ្ធ ត្រូវចោទប្រកាន់ពីបទឧក្រិដ្ឋកម្មសង្គ្រាម ឧក្រិដ្ឋកម្ម ប្រឆាំងមនុស្សជាតិ និងបទប្រល័យពូជសាសន៍ទាក់ទងទៅនឹងការស្លាប់របស់ប្រជាពលរដ្ឋកម្ពុជាអស់ជិតពីរលាននាក់ចន្លោះពីឆ្នាំ ១៩៧៥ ដល់ឆ្នាំ ១៩៧៩ ដែលពួកគេកាន់កាប់អំណាច។ ក្រុមមេធាវីធ្លាប់បានឲ្យដឹងថា អៀង ធីរិទ្ធ មានជំងឺជង្គង់ ជំងឺភ្នែក និងមានជំងឺគេងមិនលក់។ អៀង សារី មានជំងឺបេះដូង និងជំងឺឆ្អឹងខ្នង រីឯនួន ជា មានជំងឺលើសឈាម និងបញ្ហាភ្នែកខ្លាំង។ រីឯខៀវ សំផន ហាក់ដូចជាមិនមានរបាយការណ៍ពីបញ្ហាសុខភាពគួរកត់សម្គាល់ឡើយក្រៅពីគាត់ធ្លាប់មានជម្ងឺលើសឈាមមុននឹងគាត់ត្រូវចាប់ខ្លួន។ សាលាក្ដីខ្មែរក្រហមបានប្រគល់ភារកិច្ចជូនលោកសាស្ដ្រាចារ្យចន ខាំបែល្ល (John Campbell )វេជ្ជបណ្ឌិតជំនាញខាងផ្នែកថែទាំជំងឺមនុស្សចាស់មកពីប្រទេសនូវ៉ែលហ្ស៊េឡង់ ធ្វើការពិនិត្យ និងវាយតម្លៃលើកាយសម្បទាជនជាប់ចោទទាំងបួន។ នៅក្នុងដីកាកំណត់ថ្ងៃសវនាការលើកាយសម្បទាជនជាប់ចោទនៅថ្ងៃនេះ លោកចៅក្រមនិល ណុន បានឲ្យដឹងថា លោកខៀវ សំផន មិនទទួលយកការត្រួតពិនិត្យ និងវាយតម្លៃលើកាយសម្បទារបស់គាត់ទេ។ រីឯអតីតបងធំទី៣ អៀង សារី ក៏មិនបដិសេធនូវអ្វីដែលវេជ្ជបណ្ឌិតរូបនេះបានរកឃើញនោះដែរ។ លោក សុន អារុណ សហមេធាវីកម្ពុជារបស់នួន ជា មានប្រសាសន៍ថា លោកវេជ្ជបណ្ឌិត ចន ខាំបែល្ល បានសរសេរក្នុងរបាយការណ៍ថា កូនក្ដីរបស់លោកមានសុខភាពមាំទាំអាចចូលរួមសវនាការបាន ក៏ប៉ុន្ដែលោកចាត់ទុកថា នោះគឺជារបាយការណ៍ដែលមិនឆ្លើយតបនឹងស្ថានភាពពិតនៃសុខភាពកូនក្ដីរបស់លោក។ លោកមានប្រសាសន៍ថា៖ «គេថាគាត់មានសុខភាពល្អ។ ចំណែកយើងៗមើលកូនក្ដីរាល់ថ្ងៃយើងដឹងថាកូនក្ដីមានសុខភាពមិនល្អ។ យើងជំទាស់ការពិនិត្យរបស់វេជ្ជបណ្ឌិតនេះ»។ ដោយឡែកសហមេធាវីកម្ពុជាលោក ផាត់ ពៅសៀង ការពារក្ដីឲ្យលោកស្រីអៀង ធីរិទ្ធ មិនផ្ដល់សេចក្ដីអត្ថាធិប្បាយណាមួយនោះទេ ដោយលោកអះអាងថា លោកកំពុងជាប់រវល់៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ១២ សីហា Posted: 11 Aug 2011 07:50 PM PDT This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
