VOA News: ព័ត៌មាន: “ព្រះសង្ឃមេដឹកនាំសកម្មជនភូមាត្រូវបានដោះលែង។” plus 2 more |
- ព្រះសង្ឃមេដឹកនាំសកម្មជនភូមាត្រូវបានដោះលែង។
- គ្រាប់បែកផ្ទុះនៅស៊ីរីសម្លាប់មនុស្ស២៨នាក់និងរបួសជាង២០០នាក់
- ចៅក្រមខ្មែរបន្ទោសចៅក្រមបរទេស
| ព្រះសង្ឃមេដឹកនាំសកម្មជនភូមាត្រូវបានដោះលែង។ Posted: 11 Feb 2012 08:33 AM PST បើតាមសេចក្ដីថ្លែងការរបស់ព្រះវិហារមូយនៅក្នុងប្រទេសភូមា អាជ្ញាធរភូមាបានដោះលែងព្រះសង្ឃមេដឹកនាំសកម្មជនពីការឃុំឃំាងរយៈខ្លី ក្រោយពីមានសេចក្ដីអំពាវនាវពី ស.រ.អ. ឲ្យដោះលែងព្រះសង្ឃនោះ។ ព្រះសង្ឃព្រះនាម ហ្កាប៊ីរ៉ា (Gambira) បានត្រូវអាជ្ញាធរចាប់ឃុំកាលពីថ្ងៃសុក្រ ហើយដោះលែងនៅពេលយប់ថ្ងៃដដែល។ រឿងនេះកើតឡើងតិចជាងមូយខែក្រោយពីការរំដោះចេញពីគុករបស់ព្រះអង្គ ដោយសារមុខងារក្នុងការបដិវត្ដព្រះសង្ឃ កាលពីឆ្នាំ២០០៧ ដែលបានត្រូវកំទិចដោយអតីតរបបគ្រប់គ្រងយោធា។ ព្រះអង្គបានត្រូវដោះលែងក្នុងចំណោមអ្នកទោសនយោបាយកាលពីខែមករា ហើយរួចពីទោសជាប់គុក៦៨ឆ្នាំ។ ចាប់តាំងពីពេលនោះ ព្រះអង្គបានបំពានលើបទបញ្ជា ហើយទៅដឹកនាំបាតុកម្ម។ ព័ត៌មានអន្តរជាតិសំខាន់ៗផ្សេងទៀត៖ ហ្វីលីពីន៖ យោងតាមយោធាហ្វីលីពីន ជនជាតិហ្វីលីពីនម្នាក់បានរងរបួសកាលពីថ្ងៃសៅរ៍នេះ នៅពេលដែលជនប្រដាប់អាវុធបានវាយប្រហារមកលើគម្រោងកសាងផ្លូវឧបត្ថមថវិកាដោយ ស.រ.អ. នៅតំបន់ភាគខាងត្បូង ដែលជាទីកន្លែងសំបុករបស់ជនសកម្មប្រយុទ្ធ។ អេហ្ស៊ីប៖ សកម្មជនក្នុងប្រទេសអេហ្ស៊ីបបានរៀបចំគម្រោងការធ្វើកិប្បកម្មមួយថ្ងៃ ដើម្បីកត់សំគាល់ខួបឆ្នាំទីមួយ នៃការទម្លាក់អំណាចរបស់ប្រធានាធិបតី ហុសនី មូបារ៉ាក់។ ស.រ.អ.៖ គេមិនអាចចូលទៅក្នុងគេហទំព័រទីភ្នាក់ងារស៊ើបការសម្ងាត់របស់ ស.រ.អ. (cia.gov) បានទេកាលពីថ្ងៃសុក្រ ហើយអ្នកពូកែខាងអ៊ីនធឺណិតមិនចេញឈ្មោះមូយក្រុម (Hackers) បានអះអាងថាខ្លួនជាអ្នកទទួលខុសត្រូវ។ ជប៉ុន៖ ព្រះចៅរាជាធិរាជជប៉ុន អាគីហ៊ីតូ បានចូលទៅមន្ទីរពេទ្យ ដើម្បីឲ្យវេជ្ជបណ្ឌិតពិនិត្យមើលបេះដូងកាលពីថ្ងៃសៅរ៍ ក្រោយពីព្រះអង្គបង្ហាញសញ្ញានៃឈាមហូរយឺតចូលទៅក្នុងបេះដូង ដែលបណ្ដាលឲ្យមានការព្រួយបារម្ភអំពីសុខភាពរបស់ព្រះអង្គ។ ឥណ្ឌា៖ ក្រុមហ៊ុនអចលនាវត្ថុនៅក្នុងប្រទេសឥណ្ឌារាយការណ៍ថា ប្រាក់ចំណេញរបស់ខ្លួនបានដាំក្បាលចុះរហូតដល់៤៥% ដោយសារតែមិនមានតម្រូវការទិញដូរផ្ទះ និងអាគារពាណិជ្ជកម្មផ្សេងៗ ខណៈពេលសេដ្ឋកិច្ចឥណ្ឌាលូតលាស់យឺតៗ។ អេស្ប៉ាញ៖ រដ្ឋាភិបាលប្រទសអេស្ប៉ាញបានយល់ព្រមលើការកែទម្រង់ដ៏ធំធេង នៃទីផ្សារការងារ ក្នុងកិច្ចប្រឹងប្រែងមួយដើម្បីធ្វើឲ្យសកម្មភាពសេដ្ឋកិច្ចនឹងនរ ហើយកាត់បន្ថយអត្រាខ្ពស់នៃមនុស្សគ្មានការងារធ្វើ។ <!--AV--> This posting includes an audio/video/photo media file: Download Now |
| គ្រាប់បែកផ្ទុះនៅស៊ីរីសម្លាប់មនុស្ស២៨នាក់និងរបួសជាង២០០នាក់ Posted: 10 Feb 2012 10:57 PM PST ស៊ីរី៖ ទូរទស្សន៍រដ្ឋរបស់ស៊ីរីបានផ្សាយថាមានការផ្ទុះចំនួនពីរនៅក្នុងបរិវេណអាគារសន្តិសុខក្នុងផ្នែកខាងជើងនៃប្រទេសកាលពីថ្ងៃសុក្រ ដែលបានបណ្តាលឱ្យមនុស្សយ៉ាងតិចណាស់២៨នាក់ស្លាប់និងធ្វើឱ្យមនុស្ស២៣៥នាក់ទៀតត្រូវរបួស នៅពេលដែលការបង្ក្រាបរបស់រដ្ឋាភិបាលលើបាតុកម្មរបស់ក្រុមប្រឆាំងបានកើនខ្លាំងទ្បើងៗនៅទូទាំងប្រទេស។ ការផ្ទុះនេះបានដៅទៅលើអាគារមួយរបស់ក្រុមស៊ើបការសម្ងាត់យោធានិងមូលដ្ឋានមួយរបស់កងកម្លាំងសន្តិសុខនៅក្នុងក្រុង អាឡេផូ (Aleppo) នាប៉ែកខាងជើងនៃប្រទេស។ ទូរទស្សន៍រដ្ឋក៏បានបន្ទោសនូវអ្វីដែលខ្លួនហៅថា «ពួកភេរវជនប្រដាប់អាវុធ» ចំពោះការវាយប្រហារដោយបង្ហាញរូបសាកសពដាច់ប្រកបដោយឈាមពាសពេញនៅតាមចិញ្ចើមថ្នល់ខាងក្រៅអាគារដែលមានការខូចខាត។ ចិន៖ លោកនាយករដ្ឋមន្ត្រី វេ ជាបាវ (Wen Jiabao) បានសុំឲ្យបព្វជិតទីបេត៍ម្នាក់ គឺ សម្តេច ផានឆិន ឡាម៉ា(Panchen Lama) ឱ្យប្រើប្រាស់ឥទ្ធិពលរបស់ព្រះអង្គក្នុងទ្រឹស្តីព្រះពុទ្ធសាសនាទីបេត៍ដើម្បីបំពាក់បំប៉នគំនិតស្នេហាជាតិនិងការគាំទ្រដល់រដ្ឋាភិបាលក្រុងប៉េកាំងក្នុងចំណោមជនជាតិទីបេត៍ក្នុងផ្នែកនិរតីនៃប្រទេសចិន។ កូរ៉េខាងត្បូង៖ កាលពីថ្ងៃសុក្រគណៈប្រតិភូមួយនៃពួកអ្នកតាក់តែងច្បាប់កូរ៉េខាងត្បូងបានឆ្លងកាត់ព្រំដែនមានកិច្ចការពារមាំទាំជាមួយប្រទេសកូរ៉េខាងជើងដើម្បីបំពេញទស្សនកិច្ចកម្រិតខ្ពស់មួយដែលមិនសូវមានធ្វើនៅឯមជ្ឈមណ្ឌលរោងចក្រ កៀសុង (Kaesong) ដែលចាត់ការរួមគ្នាដោយប្រទេសកូរ៉េទាំងពីរ។ ភូមា៖ ព្រះសង្ឃព្រះពុទ្ធសាសនាមួយអង្គ ដែលត្រូវដោះលែងកាលពីពេលថ្មីៗនេះពីគុក ព្រះនាម យូ ហ្កាប៊ីរ៉ា (U Gambiya) ត្រូវបានអាជ្ញាធរភូមាចាប់ខ្លួនពីវត្តឡេទី ក្នុងក្រុង រ៉ាងហ្គូនដោយមិនបានប្រាប់ពីសេចកី្តលំអិតអំពីការចាប់ខ្លួននេះ។ ប៉ាគីស្ថាន៖ តុលាការជាន់ខ្ពស់បំផុតនៃប្រទេសបានច្រានចោលបណ្តឹងឧទ្ធរណ៍មួយដោយលោកនាយករដ្ឋមន្ត្រី យូសូហ្វ ហ្គីឡានី អំពីការចោទប្រកាន់ពីបទប្រមាថតុលាការ។ លោកហ្គីឡានី នឹងត្រូវបង្ហាញខ្លួនក្នុងតុលាការនៅថ្ងៃច័ន្ទ ហើយនិងប្រឈមនឹងការចេញពីតំណែង នឹងត្រូវជាប់ពន្ធនាគារ បើរូបលោកត្រូវបានរកឃើញថាមានទោស។ ឥណ្ឌា៖ នៅក្នុងសន្និសីទកំពូលមួយរវាងសហភាពអឺរ៉ុបនិងឥណ្ឌានៅក្នុងក្រុង ញូវដែលី (New Delhi) សហភាពអឺរ៉ុបបានសុំដល់ប្រទេសឥណ្ឌាឱ្យប្រើប្រាស់ឥទ្ធិពលរបស់ខ្លួនឱ្យអ៊ីរ៉ង់ធ្វើការចរចាជាថ្មីអំពីកម្មវិធីបរមាណូរបស់ខ្លួនដែលមានជម្លោះ។ <!--AV--> This posting includes an audio/video/photo media file: Download Now |
| ចៅក្រមខ្មែរបន្ទោសចៅក្រមបរទេស Posted: 10 Feb 2012 06:06 PM PST សហចៅក្រមស៊ើបអង្កេតកម្ពុជាលោក យូ ប៊ុនឡេង នៅរសៀលថ្ងៃសុក្រនេះបានធ្វើការវាយបកទៅលើសហចៅក្រមស៊ើបអង្កេតបម្រុងអន្ដរជាតិលោក ឡូរ៉ង់ កាស្ពែ អង់ស៊ែម៉េ (Laurent Kaspert-Ansermet) ដោយចាត់ទុកថាសហចៅក្រមស៊ើបអង្កេតអន្ដរជាតិមាន «ចេតនាបំភ័ន្ដ» មតិសាធារណជន និងធ្វើការវាយប្រហារលើរូបលោកពីខាងក្រោយខ្នង។ កាលពីថ្ងៃព្រហស្បតិ៍សប្តាហ៍នេះ លោក ឡូរ៉ង់ កាស្ពែ អង់ស៊ែម៉េ បានថ្លែងថា លោកបានចាប់ផ្ដើមរៀបចំធ្វើការស៊ើបអង្កេតសំណុំរឿង ០០៣ និងសំណុំរឿង ០០៤។ ជាពិសេសចាប់ផ្ដើមស៊ើបអង្កេតឡើងវិញនូវ សំណុំរឿង ០០៣។ សំណុំរឿង ០០៣ សហចៅក្រមស៊ើបអង្គេតមុន គឺលោក ស៊ីហ្គហ្វ្រ៊ីដ ប៊្លុង្គ(Siegfried Blunk) បានប្រកាសរួមជាមួយលោក យូ ប៊ុនឡេង កាលពីខែមេសាថាបានបញ្ចប់ការស៊ើបអង្កេតរួចហើយ។ ក៏ប៉ុន្ដែរហូតមកទល់ពេលនេះ គេនៅមិនទាន់ដឹងអំពីអត្តសញ្ញាណជនជាប់សង្ស័យជាផ្លូវការនៅឡើយ។ សហចៅក្រមស៊ើបអង្កេតបម្រុងសញ្ជាតិស៊្វីសក៏បានបង្ហាញផងដែរថា អង្គបុរេជំនុំជម្រះបានប្រព្រឹត្តិខុសដោយមិនចាត់ការលើកំណត់ហេតុស្ដីពីការខ្វែងគំនិតគ្នារវាងរូបលោក ជាមួយ និងលោកយូ ប៊ុនឡេង នៅក្នុងការស៊ើបអង្កេតសំណុំរឿងទាំងពីរខាងលើដែលរដ្ឋាភិបាលប្រកាន់ជំហប្រឆាំងជំទាស់នោះ។ លោក ឡូរ៉ង់ កាស្ពែ អង់ស៊ែម៉េ បានស្នើរឲ្យលោកចៅក្រម ប្រាក់ គឹមសាន ប្រធានអង្គបុរេជំនុំជម្រះលាលែងពីការងាររបស់ខ្លួន។ ឆ្លើយតបនៅល្ងាចនេះ លោកសហចៅក្រមស៊ើបអង្កេតកម្ពុជា យូ ប៊ុនឡេង ចាត់ទុកថា ការលើកឡើងខាងលើនេះរបស់សហចៅក្រមអន្ដរជាតិគឺជាការ «បំភន្ដ័» ហើយការពិតលោកមិនមានការខ្វែងគំនិត ឬការជជែកពិភាក្សាគ្នាទាក់ទងនឹងការស៊ើបអង្កេតទាំងនោះទេ។ លោកយូ ប៊ុនឡេង ក៏បានរំលឹកឡើងវិញថា គ្មានវិធានណាមួយនៃវិធានផ្ទៃក្នុងរបស់សាលាក្ដីខ្មែរក្រហម ឬកិច្ចព្រមព្រៀងរវាងរដ្ឋាភិបាលកម្ពុជា ជាមួយអង្គការសហប្រជាជាតិដែលចែងពីសិទ្ធិរបស់សហចៅក្រមស៊ើបអង្កេតបម្រុងអន្ដរជាតិ នៅក្នុងការបំពេញកិច្ចការស៊ើបអង្កេតនៅពេលមិនទាន់មានការតែងតាំងជាចៅក្រមស៊ើបអង្កេតពេញសិទ្ធិនោះ។ ការបកស្រាយរបស់លោកយូ ប៊ុនឡេង ធ្វើឡើងបន្ទាប់ពីលោក ឡូរ៉ង់ កាស្ពែ អង់ស៊ែម៉េ បានលើកឡើងវិញថា យោងតាមកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិនៅឆ្នាំ២០០៣ ចៅក្រមស៊ើបអង្កេតបម្រុងមានសិទ្ធិគ្រប់គ្រាប់ក្នុងការចាត់នីតិវិធីតាមផ្លូវច្បាប់នៅពេលដែលកៅអីសហចៅក្រមស៊ើបអង្កេតអន្ដរជាតិនៅទំនេរ។ នេះជាលើកទី៣ហើយដែលភាគីអង្គការសហប្រជាជាតិ និងភាគីកម្ពុជានៅក្នុងការិយាល័យសហចៅក្រមស៊ើបអង្កេតមានការខ្វែងគំនិតទាស់ទែងគ្នាយ៉ាងតឹងសរសៃកបែបនេះលើសំណុំរឿងបន្ថែម ដែលធ្វើឲ្យរដ្ឋាភិបាលមិនសប្បាយចិត្តនោះ។ ក៏ប៉ុន្ដែលោក នេត្រ ភក្ដ្រា អ្នកនាំពាក្យសាលាក្ដីខ្មែរក្រហមខាងភាគីកម្ពុជា បានហៅជម្លោះនេះថា គឺគ្រាន់តែជាការបង្ហាញជំហរបកស្រាយច្បាប់រៀងៗខ្លួនតែប៉ុណ្ណោះ។ «ជាការឆ្លើយតបមួយដែល យើងគិតទៅគឺជារបៀបមួយនៃការបកស្រាយច្បាប់រៀងៗខ្លួនទេ គឺវាមិនប៉ះពាល់ដល់ការិយាល័យសហចៅក្រមស៊ើបអង្កេតឡើយ»។ លោក នេត្រ ភត្រា ក៏បានបញ្ជាក់ន្ថែមទៀតថា លោក ប្រាក់ គឹមសាន ប្រធានអង្គបុរេជំនុំជម្រះបានទាត់ចោលសំណើរឲ្យលោកលាលែងពីការងារពីសំណាក់ចៅក្រមស៊ើបអង្កេតបម្រុងលោកឡូរ៉ង់ កាស្ពែ អង់ស៊ែម៉េ ។ ដោយឡែកលោក ឡាស អលសិន អ្នកនាំពាក្យសាលាក្ដីខ្មែរក្រហមខាងភាគីអង្គការសហប្រជាជាតិមិនធ្វើអត្ថាធិប្បាយទៅលើសេចក្ដីថ្លែងការណ៍របស់ក្រុមចៅក្រមនោះទេ។ លោក ឡូរ៉ង់ កាស្ពែ អង់ស៊ែម៉េ ត្រូវបានស្នើដោយអង្គការសហប្រជាជាតិដល់ភាគីកម្ពុជាដើម្បីតែងតាំងជំនួសលោកចៅក្រមអាល្លឺម៉ង់ ស៊ីហ្គហ្វ្រ៊ីដ ប៊្លុង្គ ដែលបានលាលែងពីដំណែងក្នុងភាពចម្រូងចម្រាស់ក្នុងការស៊ើបអង្កេតសំណុំរឿងខាងលើ។ ក៏ប៉ុន្ដែឧត្តមក្រុមប្រឹក្សាអង្គចៅក្រមបានបដិសេធការតែងតាំងរូបលោកជាចៅក្រមស៊ើបអង្កេតពេញសិទ្ធិដោយស្ដីបន្ទោសលើក្រមសីលធម៌របស់លោកក្នុងវិជ្ជាជីវៈ។ ក៏ប៉ុន្ដែមតិជាច្រើនបានស្ដីបន្ទោសស្ថាប័នច្បាប់កំពូលមួយនេះថា ទទួលរងឥទ្ធិពលជ្រៀតជ្រែកផ្នែកនយោបាយ។ លោកស្រី គ្លែ ដាហ៊្វី អ្នកឃ្លាំមើលដំណើរការសាលាក្ដីខ្មែរក្រហមរបស់អង្គការគំនិតផ្ដួចផ្ដើមយុត្តិធម៌សង្គមសេរី (OSJI) របស់សហរដ្ឋអាមេរិកមានប្រសាសន៍នៅថ្ងៃនេះថា ជំហរខ្វែងគ្នា ទៅលើការបកស្រាយច្បាប់នៃភាគីទាំងពីរក្នុងសាលាក្ដីខ្មែរក្រហមគឺជាកង្វល់យ៉ាងធំសម្រាប់ដំណើរការទៅមុខនៃសំណុំរឿង ០០៣ និងសំណុំរឿង ០០៤។ លោកស្រី គ្លែ ដាហ៊្វី អធិប្បាយថាវាជារឿងគួរឲ្យលើកទឹកចិត្តណាស់ដែលលោកចៅក្រមកាស្ពែ អង់ស៊េម៉េ បានធ្វើការសម្រេចចិត្តគួរឲ្យជឿជាក់សម្រាប់ធ្វើឲ្យមានតម្លាភាពក្នុងសំណុំរឿង០០៣ និង០០៤ នៅពេលដែលសាលាក្ដីទាំងមូលទទួលរងការប៉ះពាល់ដោយបញ្ហាជឿជាក់ និងតម្លាភាពនេះ។ ជាក់ស្ដែងបុគ្គលិកខ្មែររាប់រយនាក់នៅក្នុងសាលាក្តីខ្មែរក្រហមមិនបានទទួលប្រាក់ខែចាប់តាំងពីខែតុលាឆ្នាំមុនមកម្លេះ ដែលជាការឆ្លុះបញ្ចាំងពីការទាក់ទងនឹងការចំណាយរបស់ប្រទេសផ្តល់ជំនួយលើតុលាការយុត្តិធម៌អន្ដរជាតិ។ អ្នកឃ្លាំមើលដំណើរការសាលាក្ដីខ្មែរក្រហមដដែលមានប្រសាសន៍ថា គួរតែបញ្ចប់ជម្លោះនយោបាយនៅក្នុងសាលាក្ដីខ្មែរក្រហមនៅក្នុងពេលនេះ។ «ខ្ញុំសូមទទូចដល់រដ្ឋាភិបាល និងលោកចៅក្រម យូ ប៊ុនឡេង អនុញ្ញាតឲ្យលោកចៅក្រម កាស្ពែ អង់ស៊ែម៉េ បំពេញការងាររបស់ខ្លួនមិនត្រឹមតែសម្រាប់ប្រយោជន៍របស់តុលាការទេ ប៉ុន្ដែក៏ជាប្រយោន៍សម្រាប់ជនរងគ្រោះដោយអំពើឃោរឃៅរបស់ពួកខ្មែរក្រហមផងដែរ។ ពួកគេគួរតែជាអ្នកទទួលផលចំណេញពីអ្វីដែលតុលាការកំពុងធ្វើ។ ហើយសូមអំពាវនាវឲ្យបញ្ចប់ជម្លោះនយោបាយ ដែលគំរាមគំហែងដល់តុលាការទាំងមូល»។ សាលាក្ដីខ្មែរក្រហមកាលពីថ្ងៃទី៣ ខែកុម្ភៈនេះ ទើបតែបានផ្ដន្ទាទោស ឌុច អតីតប្រធានគុកទួលស្លែងឲ្យជាប់ពន្ធនាគារអស់មួយជីវិតចំពោះឧក្រិដ្ឋកម្មនៅក្នុងការសម្លាប់អ្នកទោសយ៉ាងតិច ១២.៣៨០ នាក់។ ហើយនេះគឺជាផ្នែកមួយនៃការផ្ដល់យុត្តិធម៌ដល់ជនរងគ្រោះកម្ពុជាជាង ១,៧ លាននាក់ដែលបានស្លាប់ក្រោមការគ្រប់គ្រងរបស់ពួកខ្មែរក្រហម។ មេដឹកនាំកំពូលខ្មែរក្រហមចំនួនបីនាក់ទៀត កំពុងតែស្ថិតនៅក្រោមការកាត់ទោសបន្ដទៀត។ ក៏ប៉ុន្ដែរដ្ឋាភិបាលខ្មែរមិនចង់ឲ្យមានការតាមចាប់ខ្លួនជនជាប់សង្ស័យចំនួនប្រាំនាក់បន្ថែមនៅក្នុងសំណុំរឿង០០៣ និង០០៤នោះទេ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
