VOA News: ព័ត៌មាន: “ខេត្តតាមទន្លេមេគង្គឈានដល់ចំណុចប្រកាសអាសន្ន” plus 2 more |
- ខេត្តតាមទន្លេមេគង្គឈានដល់ចំណុចប្រកាសអាសន្ន
- ចៅក្រមចេញផ្សាយទីតាំងស៊ើបអង្កេតក្នុងករណីដ៏ចម្រូងចម្រាស
- ព័ត៌មានអន្តរជាតិសង្ខេប៖ ៨ សីហា
| ខេត្តតាមទន្លេមេគង្គឈានដល់ចំណុចប្រកាសអាសន្ន Posted: 08 Aug 2011 02:15 PM PDT លោក ម៉ៅ ហាក់ អគ្គនាយករងទទួលបន្ទុកកិច្ចការបច្ចេកទេស និងជាប្រធាននាយកដ្ឋានជលសាស្រ្តរបស់ក្រសួងធនធានទឹក បានមានប្រសាសន៍នៅថ្ងៃច័ន្ទនេះថា ក្នុងរយៈពេល២ទៅ៣ថ្ងៃខាងមុខទៀត ខេត្តចំនួន២ ដែលនៅជាប់ដងទន្លេមេគង្គ គឺខេត្តស្ទឹងត្រែង និងខេត្តក្រចេះនឹងឈានទៅដល់ចំណុចប្រកាសអាសន្ន ដោយសារតែទឹកជំនន់កើនឡើងខ្ពស់ខុសពីធម្មតា។ «បើយោងតាមការព្យាករណ៍របស់យើងឃើញថា ថ្ងៃទី១២ សីហា ទឹកទន្លេមេគង្គនៅស្ទឹងត្រែងអាចឡើងដល់១១,៣០ម៉ែត្រ ហើយថ្ងៃបន្ទាប់មកទៀតគឺថ្ងៃ ១៣ ហ្នឹង នៅក្រចេះអាចឡើងដល់២១,៩០ម៉ែត្រ អញ្ចឹងកម្រិតទឹកហ្នឹងវាដល់កម្រិតមួយដែលយើងមានត្រូវប្រុងប្រយ័ត្ន»។ លោក ម៉ៅ ហាក់ បានបញ្ជាក់ទៀតថា មូលហេតុដែលបណ្តាលឲ្យមានទឹកជំនន់កើនឡើងនេះ ដោយសារតែកម្ពុជាទទួលឥទ្ធិពលព្យុះ ណុក ថិន ពីប្រទេសវៀតណាម ថៃ និងប្រទេសឡាវ ដែលបានបណ្តាលឲ្យមានភ្លៀងធ្លាក់យ៉ាងច្រើននៅតាមបណ្តាខេត្តមួយចំនួនក្នុងប្រទេសកម្ពុជា។ មកដល់ថ្ងៃច័ន្ទ នេះកម្ពស់ទឹកក្នុងខេត្តស្ទឹងត្រែង មានកម្ពស់ ១០ម៉ែត្រគឺទាបជាងកម្រិតដែលត្រូវប្រុងប្រយ័ត្ន 0,៧ ម៉ែត្រ។ ខេត្កក្រចេះ កម្ពស់ទឹក ២០,១៧ ម៉ែត្រទាបជាងកម្រិតដែលត្រូវប្រុងប្រយ័ត្ន ១,៨៨ ម៉ែត្រ។ លោក ម៉ៅ ហាក់ បានមានប្រសាសន៍ទៀតថា នៅខេត្តស្ទឹងត្រែង កម្ពស់ទឹកអាចកើនឡើងដល់ ១១,៣០ ម៉ែត្រ ហើយនៅក្នុងខេត្តក្រចេះអាចកើនឡើងដល់ ២១,៩០ ម៉ែត្រ។ «ក្រៅពីនេះ ខេត្តកំពង់ចាម និងខេត្ដដទៃទៀតដែលស្ថិតនៅតាមដងទន្លេមេគង្គហ្នឹង គឺទឹកវានៅបន្តឡើង ប៉ុន្តែមិនមានទាន់ជាអ្វីដែលយើងគួរព្រួយបារម្ភ ហើយយើងនឹងតាមដានតទៅទៀត»។ លោក ឡូយ សុផាត អភិបាលខេត្តស្ទឹងត្រែង បានមានប្រសាសន៍ថា កម្រិតទឹកនៅក្នុងខេត្តស្ទឹងត្រែងបានកើនឡើងដល់កម្រិតប្រកាសអាសន្ន ជាផ្លូវការហើយ។ លោកបានមានប្រសាសន៍ទៀតថា ស្រុកដែលប៉ះពាល់មុនគេ មានស្រុកថៈឡាបរិវ៉ាត់ ស្រុកសៀមបូក ស្រុកសេសាន និងក្រុងស្ទឹងត្រែង។ លោកឡូយ សុផាតមានប្រសាសន៍ថា៖ «ទីមួយគឺឲ្យប្រជាពលរដ្ឋ លោកយល់ ផ្សព្វផ្សាយដើម្បី និងកំណត់គោលដៅទៅរកកន្លែងមានសុវត្ថិភាព និងម្ចាស់ការបង្ការាល់ការធ្វើដំណើរឆ្លងកាត់។ ទីពីរ បានយើងគិតដល់កម្លាំងត្រៀមអន្តរាគមន៍ ហើយទីបីយើងគិតដល់គ្រប់មធ្យោបាយ នៃបណ្តាស្ថាប័នទាក់ទងគ្រប់ទាំងអស់»។ លោក ខាំ ភឿន អភិបាលខេត្តក្រចេះបានមានប្រសាសន៍ថា លោកមិនទាន់បានទទួលសេចក្តីជូនដំណឹង ពីក្រសួងធនធានទឹក នៅឡើយទេ ក៏ប៉ុន្តែអាជ្ញាធរបានតាមដានកម្រិត កម្ពស់ទឹកជំនន់ជាប់ជាប្រចាំ។ លោកបានបញ្ជាក់ទៀតថា នៅក្នុងខេត្តក្រចេះនៅក្នុងតែរយៈពេល មួយយប់ មួយថ្ងៃតែប៉ុណ្ណោះ ទឹកឡើងកម្ពស់ពី0,៤ម៉ែត្រ ទៅ0,៥ម៉ែត្រ ហើយឃុំដែលទទួលរងប៉ះពាល់មុនគេ គឺឃុំបុស្សលាវ និងព្រែកសាម៉ាន់។ «ជាពិសេស អ្នកដែលរស់នៅផ្ទះ នៅលើទឹក ប្រុងប្រយ័ត្នកូន ចៅដែលវាត្រូវធ្វើអីចុះឡើង ប្រុងប្រយ័ត្នក្រែងវាមានបញ្ហាធ្វើអីធ្លាក់ អញ្ចឹង ទុកដាក់កូនចៅឲ្យមានអ្នកថែទាំឲ្យបានច្បាស់លាស់ផង អញ្ចឹងទើបកូនចៅវាមានសុវត្ថិភាព»។ លោក ខាំ ភឿន បានមានប្រសាសន៍ទៀតថា អ្នកនេសាទត្រូវបានហាមឃាត់ ពីរឬបីថ្ងៃខាងមុខ ដើម្បីជៀសវាងគ្រោះថ្នាក់ដោយសារទឹកជំនន់៕ This posting includes an audio/video/photo media file: Download Now |
| ចៅក្រមចេញផ្សាយទីតាំងស៊ើបអង្កេតក្នុងករណីដ៏ចម្រូងចម្រាស Posted: 08 Aug 2011 01:40 PM PDT សហចៅក្រមស៊ើបអង្កេតលោកយូ ប៊ុនឡេង និងលោក ស៊ិកហ្វ្រិត ប៊្លុង របស់សាលាក្ដីខ្មែរក្រហមបានចេញផ្សាយជាសាធារណៈនូវព័ត៌មានស្ដីពីការស៊ើបអង្កេតក្នុងសំណុំរឿង០០៤ នៅថ្ងៃច័ន្ទនេះដោយបង្ហាញនូវទីតាំងស៊ើបអង្កេតក្នុងខេត្តចំនួនប្រាំមួយ រួមទាំងមន្ទីរសន្ដិសុខនិងទីតាំងសម្លាប់មនុស្សទៀតផង។ ការចេញទម្លាយនូវព័ត៌មានស្ដីពីការស៊ើបអង្កេតនេះធ្វើឡើងបួនថ្ងៃប៉ុណ្ណោះបន្ទាប់មានការជំរុញពីសហព្រះរាជអាជ្ញាអន្ដរជាតិលោក អាន់ឌ្រូ ខេយលី (Andrew Cayley)។ លោក អាន់ឌ្រូ ខេយលី ចាត់ទុកថា ការផ្ដល់ព័ត៌មានអំពីសំណុំរឿង០០៤នេះដល់ជនរងគ្រោះនឹងផ្ដល់ផលប្រយោជន៍យ៉ាងសំខាន់សម្រាប់ពួកគេដែលចង់ចូលរួមក្នុងដំណើរការក្ដីចុងក្រោយនេះ។ មានការធ្វើឲ្យមានសម្ពាធប្រកបទៅដោយការរិះគន់ជាខ្លាំងទៅលើក្រុមសហចៅក្រមស៊ើបអង្កេតដោយសារតែការរក្សាព័ត៌មាននៃការស៊ើបអង្កេតក្នុងសំណុំរឿង០០៣និងសំណុំរឿង០០៤ទុកជាការណ៍សម្ងាត់។ នៅក្នុងសេចក្ដីថ្លែងការណ៍របស់ខ្លួនសហចៅក្រមស៊ើបអង្កេតលោក យូ ប៊ុនឡេង និងលោកស៊ិតហ្វ្រិក ប៊្លុង ហាក់ដូចជាចង់សម្អាតនូវសេចក្ដីអត្ថាធិប្បាយក្រៅផ្លូវការមួយចំនួនដោយលើកឡើងថា ការចេញផ្សាយតាមបណ្ដាញផ្សព្វផ្សាយនូវព័ត៌មានជាច្រើននាពេលកន្លងមកទាក់ទងនឹងសំណុំរឿង០០៤ គឺជាព័ត៌មាន«ដែលមានលក្ខណៈជាការប៉ាន់ស្មាន» និងប្រកបទៅដោយ«ការភ័ន្ដច្រឡំ»។ សហចៅក្រមស៊ើបអង្កេតទាំងពីររូបបានរៀបរាប់ជាចំណុចគោលៗដោយពុំមានសេចក្ដីអធិប្បាយឡើយអំពីទីតាំងដែលមានការស៊ើបអង្កេតដូចជានៅក្នុងភូមិភាគកណ្ដាលនៃខេត្តកំពង់ចាមរួមមានមន្ទីរសន្ដិសុខក្នុងស្រុកចំនួនប្រាំ ក្នុងនោះដែរក៏មានការបង្ហាញអំពីទីកន្លែងសម្លាប់មនុស្ស និងការដ្ឋានធ្វើការដោយបង្ខំក្នុងស្រុកទាំងប្រាំនិងការប្រល័យពូជសាសន៍លើជនជាតិចាម។ មានមន្ទីរសន្ដិសុខ និងទីកន្លែងសម្លាប់ចំនួនបួននៅក្នុងភូមិភាគកណ្ដាលនៃខេត្តកំពង់ធំ។ ក្នុងខេត្តពោធិ៍សាត់ក្រុមចៅក្រមបង្ហាញការស៊ើបអង្កេតលើគុកលេខ ៨ក្នុងឃុំស្យា ស្រុកកណ្ដៀង និងទីតាំងសម្លាប់មនុស្សក្នុងស្រុកកណ្ដៀងដូចគ្នានេះ។ មានទីតាំងសម្លាប់មនុស្ស និងមន្ទីរសន្ដិសុខចំនួនប្រាំពីរក្នុងខេត្តបាត់ដំបង។ ដោយឡែកសហចៅក្រមស៊ើបអង្កេតបានបង្ហាញការស៊ើបអង្កេតក្នុងតំបន់ចំនួនប្រាំបីក្នុងខេត្តបន្ទាយមានជ័យក្នុងនោះមានមន្ទីរសន្ដិសុខ ទីតាំងសម្លាប់មនុស្ស និងការដ្ឋានធ្វើការដោយបង្ខំដូចជាការដ្ឋានទំនប់ត្រពាំងថ្ម និងការដ្ឋានស្ពានស្រែង និងទំនប់ព្រៃរនាមក្នុងស្រុកព្រះនេតព្រះ។ ក្រៅពីនោះមានការស៊ើបអង្កេតលើមន្ទីរសន្ដិសុខវត្តប្រធាតុ ក្នុងស្រុកគិរីវង់ខេត្តតាកែវ ដែលតំណាងឲ្យភូមិភាគនិរតី របស់ពួកខ្មែរក្រម។ សហចៅក្រមស៊ើបអង្កេតក៏បានបញ្ជាក់ពីការស៊ើបអង្កេត លើគោលការណ៍បោសសម្អាតក្នុងភូមិភាគកណ្ដាល និងការបោសសម្អាតនៅភូមិភាគពាយ័ព្យផងដែរ។ លោក អាន់ឌ្រូ ខេយលី បានឆ្លើយតាមសារអេឡិកត្រូនិកជាមួយវីអូអេសំឡេងសហរដ្ឋអាមេរិកនៅថ្ងៃនេះថា លោកមានសេចក្ដីរីករាយជាខ្លាំងដែលថាសហចៅក្រមស៊ើបអង្កេត«ធ្វើតាមច្បាប់» របស់តុលាការហើយបានធ្វើតាមសំណើរបស់លោក។ លោកសង្កត់ធ្ងន់ថា ប្រជាពលរដ្ឋដែលតុលាការបម្រើរូបគាត់នោះ មានសិទ្ធិនឹងទទួលព័ត៌មានទាំងនេះ។ លោកស្រី ស៊ីល ស្ទូហ្សិនស្គី (Silke Stuzensky) មេធាវីមួយរូបតំណាងឲ្យដើមបណ្ដឹងរដ្ឋប្បវេណីក៏បានសម្តែងស្វាគមន៍ដូចគ្នានេះដែរ។ «ខ្ញុំសូមស្វាគមន៍សេចក្ដីថ្លែងការណ៍ជាសាធារណៈស្ដីពីវិសាលភាពនៃការស៊ើបអង្កេតក្នុងសំណុំរឿង០០៤។ ឥឡូវយ៉ាងហោចណាស់ជនរងគ្រោះស្ថិតក្នុងជំហរមួយចំពោះអ្វីដែលកំពុងស្ថិតក្រោមការស៊ើបអង្កេតដើម្បីសម្រេចចិត្តថា តើពួកគាត់ចង់ក្លាយជាដើមបណ្ដឹងរដ្ឋប្បវេណីឬទេ?» សហចៅក្រមស៊ើបអង្កេត បានបិទបញ្ចប់ការស៊ើបអង្កេតសំណុំរឿង០០៣ កាលពីខែមេសា ក៏ប៉ុន្តែលោក អាន់ឌ្រូ ខេយលី បានហៅការស៊ើបអង្កេតនោះថាមិនទាន់ពេញលេញ។ នៅក្នុងសេចក្ដីប្រកាសរបស់ខ្លួននៅថ្ងៃនេះ សហចៅក្រមស៊ើបអង្កេតក៏បានអំពាវនាវឲ្យជនរងគ្រោះចាប់ផ្ដើមដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីចាប់ពីពេលនេះសម្រាប់សំណុំរឿង០០៤៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ៨ សីហា Posted: 07 Aug 2011 07:00 PM PDT ព័ត៌មានចុងក្រោយបំផុត៖ សេដ្ឋកិច្ចពិភពលោក៖ ទីផ្សារភាគហ៊ុនស្តុកសាកលនៅតែបន្ដចុះតម្លៃដោយសារតែមានការភ័យខ្លាចពីបំណុលពាក់ព័ន្ធនឹងការបន្ទាបអត្រាឥណទានរបស់ស.រ.អ. ធ្វើឡើងដោយទីភ្នាក់ងារ S&P និងវិធានការរបស់ធនាគារកណ្ដាលអឺរ៉ុបដើម្បីជួយពង្រឹងគោលជំហរហិរញ្ញវត្ថុរបស់ប្រទេស អ៊ីតាលីនិងអេស្ប៉ាញ។ ភូមា៖ មេដឹកនាំគណបក្សជំទាស់នៅក្នុងប្រទេសភូមាលោកស្រី អ៊ុងសានស៊ូជី (Aung San Suu Kyi) បានតទល់នឹងរដ្ឋាភិបាលភូមា ដោយលោកស្រីទៅចូលរួមក្នុងពិធីផ្ដល់កិត្ដិយសដល់ជនរងគ្រោះក្នុងការ បះបោរគ្មានជោគជ័យប្រឆាំងរដ្ឋាភិបាលយោធាភូមាកាលពីឆ្នាំ១៩៨៨។ ឡាវ៖ ប្រធានាធិបតីនៃប្រទេសឡាវលោក ឈំមាលី សាយាសន បានធ្វើដំណើរដល់ទីក្រុងហាណូយ ដើម្បីធ្វើទស្សនកិច្ចបីថ្ងៃ ដោយលោកដឹកនាំគណៈប្រតិភូជាន់ខ្ពស់ពីប្រទេសឡាវ។ ម៉ាឡេស៊ី៖ ចៅក្រមនៃតុលាការម៉ាឡេស៊ី បានពន្យារពេលការកាត់ក្ដីអតីត មេដឹកនាំគណបក្សជំទាស់ លោក អាន់វ៉ា អ៊ីប្រាហ៊ីម ដែលបានត្រូវចោទប្រកាន់ពីបទសេពកាមមិនប្រក្រតី នៅពេលដែលក្រុមមេធាវីការពារក្ដី បានត្រូវអនុញ្ញតឲ្យសម្ភាសសាក្សី រាប់ទាំងនាយករដ្ឋមន្ដ្រី ណាជិព រ៉ាហ្សាក ផងដែរ។ ចិន៖ បណ្ដាញព័ត៌មានផ្លូវការចិនរាយការណ៍ថា កម្មករខិតខំតស៊ូដើម្បីសង្រ្គោះរោងចក្រគីមីមួយនៅតំបន់ឦសានប្រទេសចិន ក្រោយពីមានរលកសមុទ្រធំៗ បណ្ដាលមកពីខ្យល់ព្យុះត្រូពិក បានទម្លាយទំនប់កាលពីព្រឹកថ្ងៃច័ន្ទ។ វៀតណាម៖ គ្រាប់កំាភ្លើងធំជំនាន់ចាស់នៃសង្រ្គាមក្នុងប្រទេសវៀតណាមបានផ្ទុះបណ្ដាលឲ្យមនុស្សពីរនាក់ស្លាប់នៅពេលដែលជននោះខិតខំបំបែកគ្រាប់ជាពីរ។ ស៊ីរី៖ ប្រទេសអារាប៊ីសាអ៊ូឌីតបានកោះហៅឯកអគ្គរដ្ឋទូតរបស់ខ្លួនប្រចំានៅក្នុងប្រទេសស៊ីរី ហើយបានថ្កោលទោសការវាយបង្រ្កាបដ៏បង្ហូរឈាមខណៈដែលសហគមន៍អន្ដរជាតិ ធ្វើការគាបសង្កត់មកលើរដ្ឋាភិបាលស៊ីរី ដើម្បីឲ្យបញ្ឈប់ការវាយបង្រ្កាបមកលើក្រុមបាតុករប្រឆាំងរដ្ឋាភិបាល។ អាហ្វហ្គានីស្ថាន៖ កងកម្លាំងជើងទឹកពិសេសរបស់ស.រ.អ. Navy Seals និង កងកម្លាំងអាហ្វហ្គានីស្ថានដែលបានប្រយុទ្ធតទល់នឹងក្រុមបះបោរនៅចំកណ្ដាលខេត្ដវ៉ាដាក ទីកន្លែងជិតឧទ្ធម្ភាគចក្រនៃកងកម្លាំងអាមេរិកាំងធ្លាក់ កាលពីព្រលឹមថ្ងៃអាទិត្យ បណ្ដាលឲ្យទាហានអាមេរិកាំង៣០នាក់ស្លាប់។ ទីបេតិ៍៖ មេដឹកនាំថ្មីនៃរដ្ឋាភិបាលទីបេតិ៍នៅក្រៅប្រទេសបានធ្វើសម្បថឡើងកាន់តំណែងកាលពីថ្ងៃច័ន្ទ ដោយលោកសច្ចាថានឹងបន្ដឲ្យមានចីរភាពដល់ចលនានៅក្រៅប្រទេសរហូតដល់សេចក្ដីសម្រេចឲ្យមានសេរីភាពនៅក្នុងដែនដីទីបេតិ៍។ អ៊ុយក្រែន៖ ចៅក្រមម្នាក់នៅក្នុងប្រទេសអ៊ុយក្រែនបានបដិសេធកាលពីថ្ងៃច័ន្ទនូវសេចក្ដីស្នើរបស់មេធាវីការពារក្ដីនៃអតីតនាយករដ្ឋមន្ដ្រីលោកស្រី ជូលីយ៉ា ទិម៉ូសិនកូ (Yulia Tymoshenko) ដើម្បីរំដោះលោកស្រីចេញពីមន្ទីរឃុំឃាំងនៅពេលការកាត់ទោសលោកស្រីពីបទបំពានអំណាចនៅពេលកាន់តំណែង។ ម៉ាឡេស៊ី៖ តុលាការជាន់ខ្ពស់របស់ប្រទេសម៉ាឡេស៊ីបានរាំងខ្ទប់រដ្ឋាភិបាលមិនឲ្យបញ្ជូនក្រុមជនភៀសខ្លួនអ្នកស្វែងរកទីលំនៅថ្មីរហូតដល់ពេលដែលតុលាការអាចស្ដាប់សេចក្ដីរាយការណ៍នៃច្បាប់តទល់នឹងផែនការរបស់រដ្ឋាភិបាលនៅចុងខែនេះ។ ព័ត៌មាននៅពេលមុននេះ៖ <!--IMAGE-->វៀតណាម៖ មនុស្សប្រមាណមួយរយនាក់បានធ្វើការតវ៉ានៅថ្ងៃអាទិត្យក្នុងរដ្ឋធានីហាណូយ ប្រទេសវៀតណាម ដើម្បីប្រឆាំងនឹងការប្រកាសទាមទារទឹកដីរបស់ចិនក្នុងជម្លោះសមុទ្រចិនខាងត្បូង ដែលជាបាតុកម្មជាបន្តបន្ទាប់ប្រឆាំងនឹងចិនក្នុងរយៈពេលពីរខែកន្លងមកនេះ។ ការប្រឆាំងតវ៉ាបែបនេះជាការកម្រមានមួយក្នុងប្រទេសវៀតណាមផ្តាច់ការនេះ ដែលការប្រឆាំងជាសាធារណៈត្រូវបង្អាក់ ហើយជាធម្មតាត្រូវទទួលទណ្ឌកម្ម។ ចិនបានទាមទារទឹកដីក្នុងសមុទ្រទាំងអស់ ដោយធ្វើឲ្យមានការឈ្លោះប្រកែកជាមួយវៀតណាម ហ្វីលីពីន ម៉ាឡេស៊ី និងប្រទេសព្រុយណេ ដែលបានទាមទារដែនទឹកនោះដែរ។ ទាំងរដ្ឋាភិបាលរដ្ឋធានីហាណូយ និងរដ្ឋាភិបាលក្រុងម៉ានីល បានអះអាងថា នាវាចិនបានជ្រៀតជ្រែកការរុករកឧស្ម័នធម្មជាតិ និងប្រេងក្នុងផ្ទៃទឹក ដែលពួកគេអះអាងថាជាតំបន់សេដ្ឋកិច្ចពិសេសរបស់ខ្លួន។ សហរដ្ឋអាមេរិក៖ នាយកចាត់ចែងទីភ្នាក់ងារពិន្ទុឥណទាន Standard and Poor និយាយថាមានឧកាសមួយក្នុងចំណោម៣ដែលអត្រាពិន្ទុសហរដ្ឋអាមេរិក នឹងបញ្ចុះថែមទៀតក្នុងរយៈពេល៦ខែបន្ទាប់ទៀតនៅចន្លោះពេលពីរឆ្នាំនេះ។ អឺរ៉ុប៖ សន្ទស្សន៍ភាគហ៊ុននៅអឺរ៉ុបធ្លាក់ចុះយ៉ាងខ្លាំងកាលពីថ្ងៃសុក្រនៅពេលមានការព្រួយកង្វល់ពីរដ្ឋាភិបាលដែលរួមរឹតទៅដោយបំណុលទាំងក្នុងប្រទេសអ៊ីតាលី និងអេស៉្បាញ ដែលមានសេដ្ឋកិច្ចធំទី៣និងទី៤នៅអឺរ៉ុបគម្រាមកំហែងដល់ប្រាក់ Euro។ ស៊ីរី៖ ក្រុមអង្គការសិទ្ធិមនុស្ស នៃប្រទេសស៊ីរី និយាយថា កងទ័ពរដ្ឋាភិបាលដែលគាំទ្ររថពាសដែកបានសម្លាប់មនុស្សយ៉ាងហោច៥៣នាក់ដែរ នៅក្នុងការវាយប្រហារទៅលើទីក្រុងពីរដែលជាទីកន្លែងជនស៊ីវិលបានប្រឆាំងតវ៉ាការកាន់អំណាចផ្តាច់ការរបស់ប្រធានាធិបតី Bashar al – Assad ។ យេម៉ែន៖ ពួកមន្រ្តីនៃប្រទេសអារ៉ាប់ប៊ីសាអូឌីត និងយេម៉ែន និយាយថាប្រធានាធិបតី Ali Abdellah Saleh នៃប្រទេសយ៉េម៉ែនបានចាកចេញពីមន្ទីរពេទ្យក្នុងរាជធានី Riyadh ជាទីកន្លែងដែលលោកបានព្យាបាលការលាកដ៏ខ្លាំងបំផុតនៅក្នុងការវាយប្រហារដោយគ្រាប់បែកកាលពីថ្ងៃទី៣ ខែមិថុនានៅបរិវេណគេហដ្ឋានរបស់លោកក្នុងរដ្ឋធានីសាណាអា។ នេប៉ាល់៖ ប្រទេសនេប៉ាល់ បានបង្កើតច្បាប់ថ្មីមួយហាមឃាត់ការជក់បារីនៅកន្លែងសាធារណ។ វិធានកាណ៍ដែលចូលជាធរមានកាលពីថ្ងៃអាទិត្យបានចាត់ទុកថាខុសច្បាប់ចំពោះការជក់បារីនៅចំណតអាកាសយានដ្ឋាន សណ្ឋាគារ ការិយាល័យរដ្ឋាភិបាល និងអាគារសាធារណៈ។ អ៊ីរ៉ាក់៖ ប៉ូលីសអ៊ីរ៉ាក់និយាយថា ការវាយប្រហាររបស់ពួកបះបោរ ក្នុងផ្នែកជាច្រើនបានសម្លាប់មនុស្ស៨នាក់ រួមមានសមាជិក៦នាក់ដែលផ្ទះរបស់ពួកគេ បានផ្ទុះក្នុងតំបន់ភាគកណ្តាលប្រទេសអ៊ីរ៉ាក់។ អាហ្វហ្គានីស្ថាន៖ អង្គការអូតង់ដែលកំពុងស៊ើបអង្កេតការអះអាងរបស់ពួកតាលីបានថា ពួកគេបានបាញ់ទម្លាក់ឧត្ថម្ភាគចក្រសហរដ្ឋអាមេរិក១គ្រឿងនៅតំបន់កណ្តាលអាហ្វហ្គានីស្ថាន ដោយបានសម្លាប់មនុស្ស៣៨នាក់រួមមានកងកម្លាំងពិសេសរបស់សហរដ្ឋអាមេរិកផង។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
