The Phnom Penh Post - KHMER: “កម្ពុជា គ្រោងទទួលជំនួយជប៉ុន ៥០លានដុល្លារអាមេរិក” plus 5 more |
- កម្ពុជា គ្រោងទទួលជំនួយជប៉ុន ៥០លានដុល្លារអាមេរិក
- កាកបាទក្រហមផ្តល់សម្ភារប្រើប្រាស់ដល់ជនរងគ្រោះដោយទឹកជំនន់
- ប្រជាពលរដ្ឋ ១០០ នាក់ដើរក្បូនតវ៉ា ឲ្យអាជ្ញាធរចេញប័ណ្ណកម្មសិទ្ធដីធ្លី
- ពលរដ្ឋប៉ះពាល់នឹងគម្រោងស្ពានជ្រោយចង្វាថ្មីរកជំនួយពីនាយករដ្ឋមន្ត្រី
- សាលាឧទ្ធរណ៍លើកពេលកាត់ក្តីបុរសអូទ្រីសរំលោភក្មេងប្រុសខ្មែរ
- សម្រាំងបានបេក្ខជន៤រូបសម្រាប់ឈរឈ្មោះបោះឆ្នោតប្រធានាធិបតីសិង្ហបុរី
| កម្ពុជា គ្រោងទទួលជំនួយជប៉ុន ៥០លានដុល្លារអាមេរិក Posted: 12 Aug 2011 03:29 AM PDT កម្ពុជានិងជប៉ុន គ្រោងចុះហត្ថលេខា លើលិខិតប្តូរសារនូវការបន្តនូវជំនួយឥតសំណង និងប្រាក់កម្ចី សម្រាប់បន្តការអនុវត្តគម្រោងពីរនៅកម្ពុជា ដែលមានទឹកប្រាក់សរុបទាំងពីរគម្រោងជាង៥០លានដុល្លារអាមេរិក។ ក្នុងពិធីដែលនឹងប្រព្រឹត្តទៅនៅថ្ងៃទី១៥ ខែសីហា វេលាម៉ោង ៩ព្រឹក លោក ហ៊ុន សែន នាយករដ្ឋមន្ត្រីកម្ពុជា នឹងអញ្ជើញជាអធិបតីភាព នៅចំពោះមុខពិធីចុះហត្ថលេខារវាងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយលោក ម៉ាសាហ្វូមី គូរ៉ូគី ឯកអគ្គរាជទូតជប៉ុនប្រចាំកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស ទទួលបាននៅថ្ងៃសុក្រទី១២ ខែសីហានេះ។ គម្រោងទី១ គឺជាគម្រោងប្រាក់កម្ចី មានទឹកប្រាក់ជាង ៥៣លានដុល្លារអាមេរិក សម្រាប់ការអនុវត្តលើគម្រោងកែលំអប្រព័ន្ធធារាសាស្ត្របឹងទន្លេសាបខាងលិច និងការធ្វើឲ្យប្រសើរនូវប្រព័ន្ធបង្ហូរទឹក។ ចំណែកគម្រោងទី២ គឹជាជំនួយឥតសំណងលើទឹកប្រាក់ប្រមាណ ៧០ម៉ឺនដុល្លារអាមេរិក សម្រាប់អនុវត្តគម្រោង កែលំអនូវបរិក្ខាអប់រំ នៅវិទ្យាស្ថានបច្ចេកវិទ្យានៃកម្ពុជា៕
|
| កាកបាទក្រហមផ្តល់សម្ភារប្រើប្រាស់ដល់ជនរងគ្រោះដោយទឹកជំនន់ Posted: 12 Aug 2011 02:53 AM PDT មន្ត្រីកាកបាទក្រហមកម្ពុជាដឹកនាំដោយលោក អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយ នៅថ្ងៃសុក្រនេះ បានដឹកនាំសម្ភារជាស្បៀងអាហារ និងសម្ភារប្រើប្រាស់មួយចំនួន មាន៥០០សម្រាប់ ដើម្បីត្រៀមចែកជូនដល់អ្នករងគ្រោះដោយសារទឹកជំនន់នៅខេត្តស្ទឹងត្រែង។ លោក អ៊ុយ សំអាត មានប្រសាសន៍នៅថ្ងៃសុក្រថា តាមព័ត៌មានពីខេត្តស្ទឹងត្រែងមក ប្រជាពលរដ្ឋដែលបានជម្លៀសទាំងគ្រួសារទៅកាន់ទីទួលសុវត្ថិភាព មានក្រោម១០០គ្រួសារប៉ុណ្ណោះ ប៉ុន្តែកាកបាទក្រហម បានត្រៀមដល់ទៅ៥០០ ដើម្បីទុកប្រគល់ជូនសាខាខេត្តចែកបន្ត ព្រោះទឹកទន្លេមេគង្គកំពុងតែកើនឡើងរាល់ថ្ងៃ។ លោកថ្លែងថា ៖ «យើងមិនទាន់មានស្ថិតិជនរងគ្រោះបន្ថែមទៀតទេ ប៉ុន្តែយើងនឹងពិនិត្យមើលស្ថានការណ៍ជាក់ស្តែងនៅពេលទៅដល់ខេត្ត ហើយពិភាក្សាជាមួយថ្នាក់ដឹកនាំ និងមន្ត្រីគ្រោះមហន្តរាយខេត្ត»។ លោកឲ្យដឹងថា អំណោយនឹងត្រូវចែកជូននៅថ្ងៃសៅរ៍ និងថ្ងៃអាទិត្យ ដែលក្នុងនោះមួយគ្រួសារទទួលបាន អង្ករ៣០គីឡូក្រាម ត្រីខ១០កំប៉ុង មីមួយកេសស្មើ៥០កញ្ចប់ មុង១ សារុង១ ភួយ១ និងក្រមា១។
ដោយឡែកលោកបន្តថា នៅក្នុងខេត្តក្រចេះ ដែលកម្ពស់ទឹកបានកើនជាលំដាប់ដែរនោះ គឺខាងសាខាកាកបាទក្រហមខេត្តក៏ត្រៀមចែកជូនដល់ប្រជាពលរដ្ឋ៥៣គ្រួសារដែលពួកគាត់សុទ្ធជាកម្មករលីសែងប្រចាំថ្ងៃនៅតាមផ្សារខេត្តក្រចេះ ហើយពេលដែលទឹកជំនន់លិចក្រុងក្រចេះ ធ្វើឲ្យគាត់គ្មានការងារធ្វើ។ ក្នុងមួយសប្តាហ៍នេះ ក្រសួងធនធានទឹក និងឧតុនិយម បានចេញលិខិតជូនដំណឹងពីរលើក ដែលអំពាវនាវឲ្យប្រជាពលរដ្ឋរស់នៅក្នុងខេត្តជាប់ទន្លេមេគង្គប្រុងប្រយ័ត្នខ្ពស់ចំពោះកម្ពស់ទីកទន្លេ ដែលបង្កឲ្យមានកន្លែងខ្លះជន់លិចតំបន់ខ្លះ៕
|
| ប្រជាពលរដ្ឋ ១០០ នាក់ដើរក្បូនតវ៉ា ឲ្យអាជ្ញាធរចេញប័ណ្ណកម្មសិទ្ធដីធ្លី Posted: 12 Aug 2011 02:52 AM PDT ប្រជាពលរដ្ឋភូមិព្រែកទប់ជាង១០០នាក់ នៅបន្តការតវ៉ាថ្ងៃទីពីរ ជាបន្តទៀត កាលពីព្រឹកថ្ងៃសុក្រនេះ ដោយធ្វើដំណើរតាមដងផ្លូវក្នុងក្រុង ទៅកាន់មន្ទីរដែនដី នគររូបនីយកម្មនិងសំណង់ ទាមទារឲ្យអាជ្ញាធរចេញប័ណ្ណកម្មសិទ្ធិដីធ្លីឲ្យពួកគាត់ ដោយបានបដិសេធមិនទទួលយកសំណងដីទំហំ៤,៥ម៉ែត្រ គុណ២២ម៉ែត្រ។
ការតវ៉ាថ្ងៃទីពីរនេះ មិនមានការបិទផ្លូវជាតិលេខ៤ដូចថ្ងៃទី១ឡើយ ដោយពួកគាត់គ្រាន់តែលើកបដា ដើរជាក្បួនតាមវិថីក្នុងក្រុងព្រះសីហនុ ដោយមានការឃ្លាំមើលពីសមត្ថកិច្ចជាអ្នករៀបចំសណ្តាប់ធ្នាប់។ នេះបើតាមលោក សក់ សុផល អ្នកតំណាងប្រជាពលរដ្ឋ ឲ្យដឹងនៅថ្ងៃសុក្រនេះ។ ប្រជាពលរដ្ឋឲ្យដឹងថា បឹងព្រែកទប់នេះ ត្រូវបានអាជ្ញាធរឲ្យដឹងថា មានគម្រោងធ្វើជាតំបន់ទេសចរធម្មជាតិ ក្នុងសង្កាត់៣ ក្រុងព្រះសីហនុ ដែលស្នើដោយលោកឧកញ៉ា គិត ម៉េង លើផ្ទៃដី៨២ហិកតា ក្នុងរយៈពេល៩៩ឆ្នាំ។ នេះបើតាមលិខិតដែលភ្នំពេញប៉ុស្តិ៍ទទួលបាន។ ដូច្នេះអាជ្ញាធរបានចេញលិខិតជូនដំណឹងឲ្យពួកគាត់រើចេញផ្ទះសម្បែងពីតំបន់នេះ ដើម្បីឲ្យអាជ្ញាធររៀបចំបរិស្ថានជុំវិញផ្ទៃបឹង ឲ្យក្លាយជារមណីយដ្ឋានធម្មជាតិ៕
|
| ពលរដ្ឋប៉ះពាល់នឹងគម្រោងស្ពានជ្រោយចង្វាថ្មីរកជំនួយពីនាយករដ្ឋមន្ត្រី Posted: 11 Aug 2011 04:33 AM PDT ភ្នំពេញៈ ប្រជាពលរដ្ឋប្រមាណ ១៦០គ្រួសារ នៅភូមិ១៦ សង្កាត់ស្រះចក ខណ្ឌដូនពេញ បានដាក់លិខិត ២ ដាច់ដោយឡែកពីគ្នាទៅខុទ្ទកាល័យនាយករដ្ឋមន្រ្តី និងសាលារាជធានីភ្នំពេញ កាលពីថ្ងៃពុធ ដើម្បីស្នើសុំឲ្យមានដំណោះស្រាយសមរម្យដល់ពួកគាត់ បន្ទាប់ពីអាជ្ញាធរខណ្ឌបានដាក់ឱសាទវាទចំនួន ១៥ថ្ងៃ ឲ្យអ្នកភូមិរងការប៉ះពាល់ពីការសាងសង់ស្ពានជ្រោយចង្វារថ្មី រុះរើផ្ទះចេញជាកំហិត។
|
| សាលាឧទ្ធរណ៍លើកពេលកាត់ក្តីបុរសអូទ្រីសរំលោភក្មេងប្រុសខ្មែរ Posted: 11 Aug 2011 04:06 AM PDT  ភ្នំពេញៈ សាលាឧទ្ធរណ៍ បានសម្រេចលើកពេលសវនាការជំនុំជម្រះលើជនជាតិអូទ្រីសម្នាក់ នៅថ្ងៃព្រហស្បតិ៍នេះ ដោយសារតែជនជាប់ចោទគ្មានមេធាវីការពារក្តី និងគ្មានអ្នកបកប្រែ។ |
| សម្រាំងបានបេក្ខជន៤រូបសម្រាប់ឈរឈ្មោះបោះឆ្នោតប្រធានាធិបតីសិង្ហបុរី Posted: 11 Aug 2011 03:48 AM PDT  សិង្ហបុរីៈ រដ្ឋាភិបាលបាននិយាយនៅថ្ងៃព្រហស្បតិ៍នេះថា បេក្ខជន ៤រូប គឺជាមនុស្សសាកសមសម្រាប់ចូលរួមប្រកួតនៅក្នុងការបោះឆ្នោតជ្រើស រើសប្រធានាធិបតីនៅខែនេះ នៅសិង្ហបុរី ជាបើកផ្លូវសម្រាប់ការបោះឆ្នោត ដែលនឹងត្រូវបានគេចាត់ទុកជាក្រៅផ្លូវការនៅក្នុងគណបក្សកំពុង គ្រប់គ្រងអំណាច។ |
| You are subscribed to email updates from ដំណឹងថ្មីបំផុត To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
