VOA News: ព័ត៌មាន: “ជាង២០០នាក់បានស្លាប់បន្ទាប់ពីការបាញ់ផ្លោងក្នុងទីក្រុងនៃប្រទេសស៊ីរី” plus 3 more |
- ជាង២០០នាក់បានស្លាប់បន្ទាប់ពីការបាញ់ផ្លោងក្នុងទីក្រុងនៃប្រទេសស៊ីរី
- អ៊ីរ៉ង់គំរាមលោកខាងលិចបន្ទាប់ពីការដាក់ទណ្ឌកម្មប្រេង
- ឌុចត្រូវជាប់ពន្ធាគារអស់មួយជីវិត តែជនរងគ្រោះខកចិត្តដោយសារគ្មានសំណងសម្រាប់ពួកគេ
- សាលក្រមកាត់ទោសឌុចឲ្យជាប់ពន្ធនាគារមួយជីវិតត្រូវអបអរសាទរ
| ជាង២០០នាក់បានស្លាប់បន្ទាប់ពីការបាញ់ផ្លោងក្នុងទីក្រុងនៃប្រទេសស៊ីរី Posted: 04 Feb 2012 09:03 AM PST ពួកសកម្មជនសិទ្ធិមនុស្សនិយាយថា កងកម្លាំងប្រដាប់អាវុធស៊ីរីបានបាញ់សម្លាប់មនុស្សយ៉ាងតិចណាស់ ២១៧នាក់នៅក្នុងទីក្រុងហូម (Homs) នៅក្នុងអំពើហិង្សាដែលកើនឡើងយ៉ាងឆាប់រហ័ស ចាប់តាំងពីថ្ងៃសុក្រមក ខណៈដែលអ.ស.បត្រៀមខ្លួនជាស្រេច ដើម្បីបោះឆ្នោតលើសេចក្ដីសម្រេចដែលមានគោលដៅនឹងបញ្ឈប់ការបង្ហូរឈាមនេះ។ អង្គការសង្កេតការណ៍សិទ្ធិមនុស្សស៊ីរី បាននិយាយកាលពីថ្ងៃសុក្រនេះថា មនុស្សរាប់រយនាក់ត្រូវបានរបួស ហើយ អាគារជាច្រើនខ្នងត្រូវបានបំផ្លាញចោល។ ការបាញ់គ្រាប់ផ្លោងភាគច្រើនបានធ្លាក់ក្នុងសង្កាត់ ខាលីឌីយ៉ា (Khalidiya) ក្នុងក្រុងហូម ដែលមានទឹកចិត្តប្រឆាំងរដ្ឋាភិបាលខ្លាំងខ្លា។ ទីក្រុងនោះស្ថិតនៅភាគខាងលិចនៃប្រទេសស៊ីរីជិតព្រំដែនជាមួយប្រទេសលីបង់ ដែលជាចំណុចក្ដៅរបស់ក្រុមប្រឆាំងរបបនយោបាយក្នុងអំឡុងពេលនៃការបះបោរ ដែលចាប់ផ្ដើមអស់ជិត ១១ខែមកហើយ។ នៅពេលដែលចំនួនមនុស្សស្លាប់កាន់តែកើនឡើង ក្រុមប្រឹក្សាសន្ដិសុខអ.ស.បបានថ្លែងថាខ្លួននឹងបោះឆ្នោតនៅថ្ងៃសៅរ៍នេះ មកលើសេចក្ដីសម្រេចដែលបានព្រាងទុកលើប្រទេសស៊ីរី។ រុស្ស៊ីគម្រាមនឹងដាក់វេតូប្រឆាំងទៅលើសេចក្ដីព្រាងដំបូង ហើយ រដ្ឋបាលលោកប្រធានាធិបតី អូបាម៉ា (Obama) បានធ្វើការបញ្ចុះបញ្ចូលឲ្យគាំទ្រសេចក្តីព្រាងដំបូងដែលមានភាពធូលស្រាល ក្នុងការដាក់ទណ្ឌកម្មមកលើស៊ីរី។ ព័ត៌មានអន្តរជាតិសំខាន់ៗដ៏ទៃទៀត៖ អេហ្ស៊ីប៖ ការប៉ះទង្គិចដោយហិង្សាក្នុងប្រទេសអេហ្ស៊ីប បានចូលក្នុងថ្ងៃទី៣ហើយ ស្របពេលដែលពួកបាតុកររាប់ពាន់នាក់បានតវ៉ាប្រឆាំងការខ្វះចំណាត់ការរបស់ពួកអាជ្ញាធរក្នុងអំឡុងពេលនៃការត់ជាន់គ្នាស្លាប់ដ៏ឃោរឃៅនៅឯក្នុងការប្រកួតបាល់ទាត់នៅដើមសប្តាហ៍នេះ។ ស.រ.អា៖ យោធាសហរដ្ឋអាមេរិកបានបញ្ជារឲ្យតុលាការសឹកយកអ្នកវិភាគរបាយការណ៍សម្ងាត់ថ្នាក់ទាបម្នាក់ទៅធ្វើការចោទប្រកាន់ពីបទបញ្ចេញឯកសារសម្ងាត់ទៅឲ្យវីគីលីក (Wikileaks)។ អាហ្វហ្គានីស្ថាន៖ របាយការណ៍មួយរបស់អង្គការសហប្រជាជាតិបានឲ្យដឹងថាមានជនស៊ីវិលជាង៣ពាន់នាក់បានស្លាប់ក្នុងជម្លោះនៃប្រទេសអាហ្វហ្គានីស្ថានកាលពីឆ្នាំមុន ដែលជាចំនួនអ្នកស្លាប់ប្រចាំឆ្នាំដ៏អាក្រក់បំផុតនៅក្នុងសង្គ្រាមរាប់ទសវត្សរ៍មកនេះ។ រុស្ស៊ី៖ គេរំពឹងថាពលរដ្ឋរុស្ស៊ីជាច្រើនម៉ឺននាក់នឹងស៊ូទ្រាំនឹងអាកាសធាតុរងានៅក្នុងរដ្ឋធានីម៉ូស្គូនៅថ្ងៃសៅរ៍នេះដើម្បីចូលរួមក្នុងអ្វីដែលអាចជាការធ្វើមិទ្ទិញគាំទ្រលទ្ធិប្រជាធិបតេយ្យដ៏ធំលើកដំបូងនៃឆ្នាំនេះ។ ស.រ.អា៖ ទីផ្សារមូលប័ត្ររបស់ស.រ.អាបានឡើងខ្ពស់ជាខ្លាំងកាលពីថ្ងៃសុក្រនេះ ក្រោយពីពួកអ្នកជំនាញរបស់រដ្ឋាភិបាលបានរាយការណ៍អំពីកំណើនទីផ្សារការងារខ្លាំង និងអត្រាអ្នកគ្មានការងារធ្វើចុះទាប។ ស.រ.អា៖ ប្រធានាធិបតីស.រ.អាលោក បារ៉ាក់ អូបាម៉ា បានជំរុញសភាស.រ.អាឲ្យអនុម័តទៅលើគំរោងលំនៅឋានមួយ ដែលលោកថ្លែងថានឹងជួយសន្សំប្រាក់ដល់ម្ចាស់គេហដ្ឋានរាប់ពាន់ដុល្លារក្នុងមួយឆ្នាំពីការខ្ចីប្រាក់ទិញផ្ទះ។ ប៉ាពូអាស៊ី នូវែលហ្គីណេ៖ នៅក្នុងប្រទេស ប៉ាពូអាស៊ី នូវែលហ្គីណេ (Papua New Guinea) ក្រុមអ្នកជួយសង្រ្គោះបានស្រង់យកសាកសពមនុស្ស៤នាក់ចេញពីសាឡាងដែលបានលិចកាលពីពីរថ្ងៃមុននោះ នៅជិតឆ្នេរសមុទ្រនៃប្រទេសនេះ។ ពួកអាជ្ងាធរបាននិយាយនៅថ្ងៃសៅរ៍នេះថាមានមនុស្សប្រហែលជា១០០ទៀតកំពុងនៅតែបាត់ខ្លួននៅឡើយ។ អាហ្វ្រិកខាងត្បូង៖ នៅក្នុងប្រទេសអាហ្វ្រិកខាងត្បូង មេដឹកនាំយុវជនដែលកំពុងមានបញ្ហានៃសភាជាតិអាហ្រ្វិក (Afican National Congress) ដែលកំពុងកាន់អំណាច បានត្រូវគេរំពឹងថានឹងដឹងនៅថ្ងៃសៅរ៍នេះ អំពីថាតើការប្តឹងឧទ្ធរណ៍ពីការព្យួរចេញពីគណបក្សរបស់គាត់បានជោគជ័យឬទេ។ <!--AV--> This posting includes an audio/video/photo media file: Download Now |
| អ៊ីរ៉ង់គំរាមលោកខាងលិចបន្ទាប់ពីការដាក់ទណ្ឌកម្មប្រេង Posted: 04 Feb 2012 07:02 AM PST អ៊ីរ៉ង់៖ មេដឹកនាំកំពូល អាយ៉ាតូឡា អាលី ខាមេនី (Ayatollah Ali Khameni) របស់អ៊ីរ៉ង់បានព្រមានកាលពីថ្ងៃសុក្រថាអ៊ីរ៉ង់នឹងធ្វើការសងសឹកប្រឆាំងការដាក់ទ័ណ្ឌកម្មប្រេងដោយប្រទេសលោកខាងលិច ហើយនិងគំរាមកំហែងវាយប្រហារ នៅពេលសេចក្តីរាយការណ៍ផ្សាយព័ត៌មានអាមេរិកមានការភ័យខ្លាចថាអ៊ីស្រាអែលអាចវាយប្រហារអ៊ីរ៉ង់ក្នុងរយៈពេលបីទៅបួនខែខាងមុខទៀតនេះ។ សូម៉ាលី៖ អង្គការសហប្រជាជាតិបានប្រកាសជាផ្លូវការដើម្បីបញ្ចប់ភាពអត់ឃ្លាននៅសូម៉ាលី តែបានព្រមានថា ប្រជាពលរដ្ឋជិតមួយភាគបីរបស់ប្រទេសដែលហែកហួរដោយសារសង្គ្រាមនេះនៅត្រូវការជំនួយម្ហូបអាហារនៅឡើយ។ អេហ្ស៊ីប៖ អំពើហិង្សាបានរាលដាលនៅពាសពេញទីក្រុងនានាកាលពីថ្ងៃសុក្រដែលបានសម្លាប់មនុស្សយ៉ាងហោចណាស់៣នាក់ និង៣០នាក់រងរបួល។ កំហឹងរបស់ប្រជាជននិងក្រុមបាតុករលើអសមត្ថភាពរបស់កងកម្លាំងសន្តិសុខដើម្បីរារាំងការរត់ជាន់គ្នា និងការស្លាប់មនុស្សយ៉ាងហោចណាស់ក៏៧៤នាក់ស្លាប់ក្នុងការប្រកួតបាល់ទាត់កាលពីថ្ងៃសុក្របានវិវត្តទៅជាបាតុកម្ម អំពាវនាវឲ្យក្រុមប្រឹក្សាយោធាប្រគល់អំណាចទៅឲ្យរដ្ឋាភិបាលស៊ីវិល។ អាហ្វហ្គានីស្ថាន៖ លោក អេនដឺ ហ្វក រ៉ាសមូលសេន (Anders Fogh Rasmussen) អគ្គលេខាធិការ អង្គការអូតង់ មានប្រសាសន៍ថាកងទ័ពចម្រុះ នឹងបន្តប្រយុទ្ធជាមួយកងទ័ពអាហ្វហ្គានីស្ថាន នៅពេលដែលការផ្ទេរខាងសន្តិសុខកើតមានឡើងនៅអាហ្វហ្គានីស្ថាន។ សហរដ្ឋអាមេរិក៖ ប្រាប់ឲ្យដឹងថា ទីផ្សារការងាររបស់ខ្លួន កើនឡើងយ៉ាងឆាប់រហ័សការងារ២សែន៤ម៉ឺន៣ពាន់ បានត្រូវបង្កើតនៅក្នុងខែមករា ហើយថាអត្រាអត់ការងារធ្វើរបស់ខ្លួន បានធ្លាក់មកត្រឹម 8,3 ភាគរយដែលជាចំនួនទាបបំផុតក្នុងរយៈពេលជិត៣ឆ្នាំនេះ។ សហរដ្ឋអាមេរិក៖ នាយករដ្ឋមន្រ្តី ដេវីត ខាមេរ៉ន (David Cameron) និងភរិយារបស់លោកគឺលោកជំទាវ សាម៉ាថា (Samatha) នៃប្រទេសអង់គ្លេសនឹងបំពេញទស្សនៈកិច្ចរយៈពេល២ថ្ងៃជាផ្លូវការនៅក្នុងរដ្ឋធានីវ៉ាស៊ីនតោននៅថ្ងៃទី១៣ខែមិនា។ ស៊ីរី៖ ពួកសកម្មជនរាយការណ៍ថាមានមនុស្សយ៉ាងហោចណាស់ក៏១២នាក់បានស្លាប់ នៅពេលដែលការប្រឆាំងតវ៉ានិងការប៉ះទង្គិចបានផ្ទុះឡើងទូទាំងប្រទេស នៅខណៈដែលក្រុមប្រឹក្សាសន្តិសុខអង្គការសហប្រជាជាតិតស៊ូដើម្បីធ្វើសេចក្តីសម្រេចចិត្តដើម្បីជួយបញ្ចប់ការបង្ហូរឈាមនោះ។ ប៉ាគីស្ថាន៖ មន្រ្តីសន្តិសុខនិយាយថាពួកកងជីវពលបានវាយសង្គ្រប់ចំណុចឆែកឆេររបស់កងទ័ពក្នុងតំបន់ពាយ័ព្យនៅប៉ាគីស្ថានបានសម្លាប់ទាហាន៧នាក់និងធ្វើឲ្យ៣នាក់ទៀតរងរបួស។ រុស្ស៊ី៖ មេដឹកនាំរបស់ពួកឧទ្ទាមអ៊ីស្លាមបានបញ្ជាឲ្យបញ្ឈប់វាយប្រហារលើជនស៊ីវិល។ លោក ដូកូ អឺម៉ារ៉ូវ (Doku Umarov) និយាយថា លោកកំពុងជំរុញឲ្យក្រុមទាំងអស់ធ្វើកិច្ចប្រតិបត្តិការណ៍ពិសេសនៅរុស្ស៊ីដើម្បីបញ្ឈប់ការវាយប្រហារដែលអាចធ្វើឲ្យប៉ះពាល់ដល់ប្រជាពលរដ្ឋសន្តិភាព។ This posting includes an audio/video/photo media file: Download Now |
| ឌុចត្រូវជាប់ពន្ធាគារអស់មួយជីវិត តែជនរងគ្រោះខកចិត្តដោយសារគ្មានសំណងសម្រាប់ពួកគេ Posted: 03 Feb 2012 05:26 PM PST ឌុច អតីតប្រធានគុកទួលស្លែងដ៏ទារុណក្នុងរបបខ្មែរក្រហម ត្រូវជាប់ពន្ធាគារអស់មួយជីវិត នេះគឺជាសេចក្ដីសម្រេចរបស់អង្គជំនុំជម្រះតុលាការកំពូលនៅថ្ងៃសុក្រនេះ។ ក៏ប៉ុន្ដែអង្គជំនុំជម្រះតុលាការកំពូលខកខាន ក្នុងការសម្រេចលើផ្ដល់សំណងតាមការទាមទារជាច្រើនរបស់ក្រុមជនរងគ្រោះ។ លោកចៅក្រមគង់ ស្រ៊ីម ប្រធានអង្គជំនុំជម្រះតុលាការកំពូលរបស់សាលាក្ដីខ្មែរក្រហម បានអានសាលដីកា នៅចំពោះមុខ ឌុច ដែលត្រូវនាំខ្លួនយកមកដាក់ក្នុងរង្វង់ក្រចកសេះជាលើកចុងក្រោយ។ <!--AV--> លោកគង់ ស្រ៊ីមបញ្ជាក់ថា ការដាក់ទោសនេះដោយផ្អែកលើឧក្រិដ្ឋកម្មដែលប្រព្រឹត្តក្រោមការគ្រប់គ្រងរបស់ឌុច មានភាពធ្ងន់ធ្ងរបំផុត។ «ឧក្រិដ្ឋកម្មដែលកាំង ហ្គិចអ៊ាវបានប្រព្រឹត្តនៅក្នុងរឿងក្តីនេះគឺពិតជាឧក្រិដ្ឋកម្មមួយនៅក្នុងចំណោមឧក្រិដ្ឋកម្មដ៏អាក្រក់បំផុត នៅក្នុងកំណត់ត្រាប្រវត្តិសាស្ត្ររបស់មនុស្សជាតិ សម្រេចផ្តន្ទាទោសកាំង ហ្គិចអ៊ាវដាក់ពន្ធនាគារអស់មួយជីវិត ដោយគិតចាប់ពីថ្ងៃទី១០ ខែឧសភា ឆ្នាំ១៩៩៩តទៅ ដោយគិតមកទល់ពេលនេះ។ កាំង ហ្គិចអ៊ាវបានទទួលរងទោសអស់រយៈពេល១២ឆ្នាំ និង២៦៩ថ្ងៃ រួចហើយ»។ មានអ្នកទោសនៅមន្ទីរស-២១ ឬគុកទួលស្លែងយ៉ាងតិច១២៣៨០នាក់ត្រូវបានធ្វើទារុណកម្មយ៉ាងព្រៃផ្សៃមុននឹងត្រូវសម្លាប់ចោលនៅក្រោមការគ្រប់គ្រងរបស់ឌុច ចន្លោះពីឆ្នាំ១៩៧៥ដល់ឆ្នាំ១៩៧៩។ នេះគឺជាសាលដីកាស្ថាពរដែលមិនអាចធ្វើការប្ដឹងជំទាស់តទៅទៀតបានឡើយ។ ឌុច ដែលរុំខ្លួនទៅដោយអាវរងារ បានឈរក្នុងរង្វង់ក្រចកសេះដោយទឹកមុខស្ងួត និងស្រងូតស្រងាត់។ តុលាការមិនបានផ្ដល់ឱកាសឲ្យពិរុទ្ធជនរូបនេះថ្លែងសម្តីចុងក្រោយនោះទេ។ ឌុចបានលើកដៃសំពះនៅពេលដែលចៅក្រមអានសាលដីកាចប់ ហើយគាត់ត្រូវកងសន្តិសុខនាំខ្លួនទៅកាន់មន្ទីរឃុំឃាំងភ្លាមៗដែរ។ លោកចៅក្រមគង់ ស្រ៊ីមបានប្រកាសថា ឌុចនឹងត្រូវបន្ដឃុំឃាំងនៅក្នុងពន្ធនាគាររបស់សាលាក្ដីខ្មែរក្រហមមួយរយៈថែមទៀតមុននឹងត្រូវបញ្ជូនទៅកាន់ពន្ធនាគាររបស់រដ្ឋាភិបាល។ កាំង ហ្គិចអ៊ាវ ហៅឌុច អាយុ៦៩ឆ្នាំ ជាប់ចោទពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ អំពើមនុស្សឃាត និងទារុណកម្ម។ ឌុចត្រូវអង្គជំនុំជម្រះសាលាដំបូងនៃសាលាក្ដីខ្មែរក្រហមផ្ដន្ទាទោសឲ្យជាប់ពន្ធនាគារចំនួន៣៥ឆ្នាំ កាលពីថ្ងៃទី២៦ ខែកក្កដា ឆ្នាំ២០១០។ ក៏ប៉ុន្ដែការផ្តន្ទាទោសនេះត្រូវបន្ធូរបន្ថយនៅត្រឹម១៩ឆ្នាំវិញ ដោយហេតុថា ឌុចត្រូវបានឃុំខ្លួនក្នុងគុកយោធារបស់រដ្ឋាភិបាលអស់រយៈពេលជាងដប់ឆ្នាំ និងឌុចបានចូលរួមសហការជាមួយសាលាក្ដីខ្មែរក្រហមបានយ៉ាងល្អ។ ក៏ប៉ុន្ដែលោកចៅក្រមគង់ ស្រ៊ីមនៃអង្គជំនុំជម្រះតុលាការកំពូលបានបញ្ជាក់ថា នោះគឺជាការសម្រេចចិត្តដែលមានកំហុសផ្លូវច្បាប់ ហើយឧក្រិដ្ឋកម្មរបស់ឌុច មិនគួរមានស្ថានសម្រាលទោសណាមួយឡើយ។ មន្ដ្រីទូត អតីតកម្មាភិបាលខ្មែរក្រហម ព្រះសង្ឃ សិស្សានុសិស្ស និងប្រជាពលរដ្ឋកម្ពុជាជាច្រើនរយនាក់ បានចូលរួមស្ដាប់ការប្រកាសសាលដីកាកំណត់ទោសឌុចនេះ។ ដោយឡែកបណ្ដាញផ្សព្វផ្សាយនៅក្នុងស្រុកមួយចំនួន ក៏បានធ្វើការផ្សាយបន្ដផ្ទាល់ផងដែរ។ សហមេធាវីរបស់ឌុច លោកកង ឫទ្ធារីបានប្រតិកម្មទៅលើការបកស្រាយអំពីអង្គច្បាប់របស់អង្គជំនុំជម្រះតុលាការកំពូល។ «ខ្ញុំពិបាកអត្ថាធិប្បាយដែរ ប៉ុន្តែគ្រាន់តែថា វាមានបញ្ហាចម្រូងចម្រាស់ការបកស្រាយច្បាប់។ ខ្ញុំទើបតែនឹងឮបទបញ្ញាត្តិថ្មី ដែលតុលាការកំពូលបានបកស្រាយថា កិច្ចព្រមព្រៀង អ.ស.ប. និងរដ្ឋាភិបាលកម្ពុជាគ្របដណ្តប់លើកម្មាភិបាលខ្មែរក្រហមទាំងអស់។ អញ្ចឹងឲ្យតែកម្មាភិបាលខ្មែរក្រហម ពីថ្ងៃហ្នឹងទៅ ប្រុងខ្លួនឲ្យហើយទៅ។ ហើយមិនមែនតែរឿង០០៣ និង០០៤ទេ វាអស់រាប់ពាន់ករណីឯណោះ»។ លោកស្រីជា លាង សហព្រះរាជអាជ្ញាជាតិ បានថ្លែងភ្លាមៗនៅក្នុងសន្និសីទកាសែតថា នេះគឺជាសញ្ញានៃការលុបបំបាត់និទណ្ឌភាព។ «យុត្តិធម៌ ក្រោយ៣៣ឆ្នាំត្រូវបានមកដល់ហើយ។ ខ្ញុំគិតថា និទណ្ឌភាពត្រូវបានលុបបំបាត់»។ ដៃគូរបស់លោកស្រី គឺលោកសហព្រះរាជអាជ្ញា អែនឌ្រូ ខេលី អធិប្បាយថា នេះគឺជាជោគជ័យរបស់ក្រុមសហព្រះរាជអាជ្ញា ដែលបានទាមទាមឲ្យអង្គជំនុំជម្រះតុលាការកំពូលផ្ដន្ទាទោសឌុច ឲ្យជាប់ពន្ធនាគារយ៉ាងតិចចំនួន៤៥ឆ្នាំ។ «យើងទទួលបានជោគជ័យ ហើយខ្ញុំគិតថា ជនរងគ្រោះអាចសប្បាយរីករាយចំពោះការដាក់ទោសនេះ។ យើងទទួលបានការផ្ដន្ទាទោសច្រើនជាងអ្វីដែលយើងបានទាមទារទៅទៀត»។ ប្រទេសបារាំង និងប្រទេសជប៉ុនបានចេញសេចក្ដីថ្លែងការណ៍រួមមួយ ដោយអះអាងថា ប្រទេសផ្តល់ជំនួយសូមចែករំលែកមោទនភាពនេះជាមួយប្រទេសកម្ពុជា អង្គការសហប្រជាជាតិ និងប្រជាពលរដ្ឋកម្ពុជា។ ក៏ប៉ុន្ដែប្រទេសទាំងពីរបានឆ្លៀតក្រើនរំឭកពីក្ដីប្រាថ្នារបស់ខ្លួនចង់ឃើញចៅក្រម មេធាវី និងបុគ្គលិកទាំងពីរភាគីនៅក្នុងសាលាក្ដីខ្មែរក្រហម «លើកកម្ពស់ផ្នែកបទដ្ឋាន និងនីតិវិធីច្បាប់ឲ្យបានខ្ពស់បំផុត»។ លោកស្ដេហ្វេន រ៉េប ឯកអគ្គរដ្ឋទូតផ្នែកឧក្រិដ្ឋកម្មសង្រ្គាមរបស់សហរដ្ឋអាមេរិក ដែលមានវត្តមានក្នុងការប្រកាសសាលដីកានេះ ក៏បានចាត់ទុកថា ការផ្ដន្ទាទោសឌុច នៅថ្ងៃនេះគឺជាព្រឹត្តិការណ៍ដ៏សំខាន់សម្រាប់ប្រទេសកម្ពុជាផងដែរ។ «ខ្ញុំគិតថា នេះគឺជាថ្ងៃដ៏អស្ចារ្យដែលសំណុំរឿងទីមួយ និងគឺជាសំណុំរឿងដ៏មានសារសំខាន់អាចបិទបញ្ចប់។ ហើយខ្ញុំគិតថា គឺជាជំហានដ៏មានសារសំខាន់សម្រាប់យុត្តិធម៌ និងការផ្សះផ្សារសម្រាប់ប្រជាពលរដ្ឋកម្ពុជា ហើយខ្ញុំគិតថា គឺជាការត្រឹមត្រូវដែលមានការផ្ដន្ទាទោសអស់មួយជីវិត»។ ជាមួយគ្នានេះដែរ លោកសុខ អាន ឧបនាយករដ្ឋមន្ដ្រី និងជារដ្ឋមន្ដ្រីទីស្ដីការគណៈរដ្ឋមន្ដ្រីបានថ្លែងប្រាប់ក្រុមអ្នកយកព័ត៌មាននៅក្នុងសាលាក្ដីខ្មែរក្រហមថា ប្រជាពលរដ្ឋកម្ពុជានឹងមានអារម្មណ៍ធូរស្បើយពីការឈឺចាប់។ «ការសម្រេចចុងក្រោយរបស់តុលាការកំពូលនៃអ.វ.ត.ក.របស់យើងនេះ ពិតជាបានរំលែកនូវការឈឺចាប់ ការសោកសង្រែងទុក្ខលំបាកវេទនា ដែលជនរងគ្រោះយើងបានឆ្លងកាត់»។ ក៏ប៉ុន្ដែក្រុមមេធាវីតំណាងឲ្យដើមបណ្ដឹងរដ្ឋប្បវេណីបានសម្តែងការខកចិត្តទៅវិញ នៅពេលដែលអង្គជំនុំជម្រះតុលាការកំពូលមិនបានសម្រេចផ្ដល់សំណងច្រើនសម្រាប់ជនរងគ្រោះនោះទេ គឺគ្រាន់តែសម្រេចថា នឹងធ្វើការផ្សព្វផ្សាយសាលដីកានេះ រួមទាំងបញ្ចូលឈ្មោះជនរងគ្រោះដែលជាដើមបណ្ដឹងរដ្ឋប្បវេណីជាផ្នែកនៃការផ្ដល់សំណង។ យោងតាម លោកសហព្រះរាជអាជ្ញា អេនឌ្រូ ខេលី បានឲ្យដឹងថា តាមច្បាប់ជាតិរបស់ប្រទេសកម្ពុជា ឌុចអាចស្នើសុំការដោះលែងទោសក្នុងរយៈពេលប្រាំបីឆ្នាំទៀត គឺនៅពេលដែលឌុចទទួលការជាប់ទោសក្នុងពន្ធនាគារ ដោយគិតចាប់ពីការចាប់ខ្លួននៅឆ្នាំ១៩៩៩មក សរុបបានចំនួន២០ឆ្នាំ។ This posting includes an audio/video/photo media file: Download Now |
| សាលក្រមកាត់ទោសឌុចឲ្យជាប់ពន្ធនាគារមួយជីវិតត្រូវអបអរសាទរ Posted: 03 Feb 2012 05:43 PM PST លោកជុំ ម៉ី និងលោកប៊ូ ម៉េង អ្នករស់រានមានជីវិតពីមន្ទីរឃុំឃាំងគុកទួលស្លែង ឬស-២១ មានទឹកមុខញញឹមញញែម បន្ទាប់ពីការស្តាប់សាលដីកាជាស្ថាពរប្រឆាំងជំទាស់ទៅនឹងលោកកាំង ហ្កេកអ៊ាវ ហៅឌុច អតីតប្រធានមន្ទីរឃុំឃាំងគុកទួលស្លែង។ លោកគង់ ស៊ីម ប្រធានតុលាការកំពូលនៃអង្គជំនុំជម្រះរបស់សាលាក្តីខ្មែរក្រហមបានប្រកាសសាលដីកាជាស្ថាពរឲ្យលោកកាំង ហ្កេកអ៊ាវ ហៅឌុចជាប់ពន្ធនាគារអស់មួយជីវិតពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ អំពើមនុស្សឃាត និងការធ្វើទារុណកម្ម ដែលមានមនុស្សជាង១២០០០នាក់បានស្លាប់នៅក្នុងមន្ទីរឃុំឃាំងគុកទួលស្លែង។ <!--AV--> លោកកាំង ហ្កេកអ៊ាវ ហៅឌុច អាយុ៦៩ឆ្នាំ មានទឹកមុខស្ងួតនៅពីមុខរង្វង់ក្រចកសេះ រួចហើយលោកបានលើកដៃសំពះ បន្ទាប់ពីការអានសាលដីកាចប់ជាស្ថាពរ។ សម្រាប់លោកជុំ ម៉ី អ្នករស់រានមានជីវិតមួយរូបពីមន្ទីរឃុំឃាំងគុកទួលស្លែង ត្រូវបានចោមរោមសាកសួរពីក្រុមអ្នកសារព័ត៌មាន បន្ទាប់ពីលោកបានដើរចេញពីបន្ទប់សវនាការ។ លោកជុំ ម៉ីបាននិយាយថា លោកអបអរសាទរចំពោះការប្រកាសសាលដីកានេះ។ លោកបានមានប្រសាសន៍ថា ការសម្រេចនេះបានធ្វើឲ្យអារម្មណ៍របស់លោកបានស្ងប់ចិត្ត។ «អារម្មណ៍ខ្ញុំស្ងប់ចិត្តហើយ! ខ្ញុំសប្បាយចិត្ត សប្បាយចិត្តមែនទែនចំពោះសំណុំរឿង០០១។ មូលហេតុគឺដោយសារសាលាក្តីគឺថា មានយុត្តិធម៌ត្រឹមត្រូវមែន។ គេកាត់ត្រឹមត្រូវណាស់»។ ចំណែកលោកប៊ូ ម៉េង អ្នករស់រានមានជីវិតមួយរូបផ្សេងទៀត ពីមន្ទីរឃុំឃាំងគុកទួលស្លែង បាននិយាយថា ឌុចសមតែទទួលទោសបែបនេះ។ «ដំណឹងនេះ គឺជាដំណឹងដែលធ្វើឲ្យខ្ញុំអាចអុជធូប ដើម្បីបួងសួងជូនដំណឹងនេះទៅឲ្យប្រពន្ធខ្ញុំដឹងផង និងប្រជាជននៅក្នុងពិភពលោក និងប្រទេសកម្ពុជាដែលបានបាត់បង់ជីវិតជាងមួយម៉ឺននាក់នៅក្នុងគុកទួលស្លែង»។ មិនមែនតែអ្នកដែលរស់រានមានជីវិតពីមន្ទីរឃុំឃាំងគុកទួលស្លែងទេ ដែលបានស្វាគមន៍ការប្រកាសសាលដីការបស់កាំង ហ្កេកអ៊ាវ ហៅឌុចនេះ ជនរងគ្រោះនៅក្នុងរបបខ្មែរក្រហម និងអតីតអ្នកសួរចម្លើយអ្នកទោសនៅក្នុងមន្ទីរឃុំឃាំង ស-២១នេះ ក៏គាំទ្រសេចក្តីសម្រេចនេះដែរ។ លោកប្រាក់ ខន អាយុ៥៨ឆ្នាំ មកពីខេត្តតាកែវ អតីតអ្នកសួរចម្លើយមួយរូបនៅមន្ទីរឃុំឃាំងគុកទួលស្លែង បាននិយាយថា ឌុចបានបញ្ជាឲ្យលោកសម្លាប់មនុស្សច្រើនណាស់ នៅក្នុងរបបគ្រប់គ្រងដោយពួកខ្មែរក្រហម។ លោកបានមានប្រសាសន៍ថា នៅពេលដែលមានអ្នកទោសសារភាពថា ជាខ្មាំងបង្កប់ និងភ្នាក់ងាររបស់វៀតណាម ភ្នាក់ងារកាស្ស៉េប៉េ និងសេអ៊ីអា លោកត្រូវបានឌុច បញ្ជាឲ្យសម្លាប់ចោល។ «ព្រោះកំហឹងការឈឺចាប់របស់ខ្ញុំ ដែលខ្ញុំបានរស់នៅផ្ទាល់ ធ្វើការនៅក្នុងបេះដូងស-២១។ ខ្ញុំដឹងរឿងរ៉ាវច្រើនណាស់។ បើរឿងដាក់អស់មួយជីវិត គឺជារឿងត្រឹមត្រូវហើយ។ ហើយបើមិនបានដាក់ដល់ប៉ុណ្ណឹងទេ គឺជារឿងមិនត្រឹមត្រូវទេ»។ អ្នកស្រីគឹម ហួយ អាយុ៦០ឆ្នាំ មកពីខេត្តពោធិសាត់ ដែលមានបងប្អូនចំនួន១៩នាក់ស្លាប់បាត់បង់ជីវិតនៅក្នុងរបបខ្មែរក្រហម បាននិយាយថា លោកស្រីអរគុណតុលាការ ដែលបានរកយុត្តិធម៌ចំពោះសាច់ញាតិរបស់លោកស្រី ដែលបានស្លាប់បាត់បង់ជីវិត។ «វាល្អហើយ ខ្ញុំចង់បានដែរ ព្រោះដឹងថា យុត្តិធម៌ វាសម្រាប់ខ្ញុំ អ្នករងគ្រោះ។ ខ្ញុំសប្បាយចិត្តដែរពេលដែលឃើញតុលាការបានជួយកាត់ទោសរកយុត្តិធម៌ដល់ឪពុកម្តាយខ្ញុំ ដែលបានស្លាប់ទៅ។ ខ្ញុំនៅរស់មានសេចក្តីស្ងប់ដែរ ហើយគាត់អ្នកស្លាប់ ក៏មានសេចក្តីស្ងប់ដែរ»។ សម្រាប់លោកឡុង បញ្ញាវុធ មន្ត្រីគម្រោងនៃអង្គការគម្រោងយុត្តិធម៌សេរីនៅកម្ពុជាដែលហៅកាត់ថា OSJI បានចាត់ទុកថា វាគឺជាការសម្រេចដ៏ខុសឆ្គងមួយរបស់តុលាការកំពូល។ លោកបានមានប្រសាសន៍ថា ឌុចបានប្រព្រឹត្តការរំលោភសិទ្ធិមនុស្សនៅក្នុងរបបកម្ពុជាប្រជាធិបតេយ្យ។ ក៏ប៉ុន្តែតុលាការបានរំលោភទៅលើសិទ្ធិជនជាប់ចោទ នៅពេលដែលគេឃុំឃាំងឌុចរហូតដល់១២ឆ្នាំ គឺមិនបានយកចិត្តទុកដាក់ក្នុងការការពារសិទ្ធិជនជាប់ចោទ។ «នេះគ្រាន់តែជាការរុញដាក់គ្នាទៅវិញទៅមក ពីព្រោះអី ឥឡូវនេះយើងសួរថា តើឌុចអាចប្តឹងទៅតុលាការជាតិដែរឬក៏អត់? ហើយបើសិនជាតុលាការជាតិ សម្រេចទូទាត់សងសំណងឌុចនៅពេលដែលឌុចឃុំខ្លួននៅតុលាការយោធា និងឃុំខ្លួនដោយខុសច្បាប់នោះ សួរថាតើទូទាត់គ្នាដូចម្តេច? តើសាលក្រមមួយណា មានសុពលភាពលើសាលក្រមមួយណា? នេះគឺជាការមួយគួរឲ្យអស់សំណើចណាស់ ដែលតុលាការកំពូលឥតបានគោរពទៅដល់សិទ្ធិរបស់ជនរងគ្រោះ និងជនជាប់ចោទ»។ លោកនេត្រ ភត្រា អ្នកនាំពាក្យសាលាក្តីខ្មែរក្រហម បានមានប្រសាសន៍ថាតុលាការបានពិចារណាទៅតាមអង្គហេតុច្បាស់លាស់ មុននឹងសម្រេចឲ្យឌុចជាប់ពន្ធនាគារអស់មួយជីវិត។ លោកនេត្រ ភត្រា បានមានប្រសាសន៍ទៀតថាជនរងគ្រោះនៅក្នុងរបបខ្មែរក្រហម ដែលបានទន្ទឹងរង់ចាំជាយូរមកហើយនោះ នឹងទទួលបានយុត្តិធម៌ ហើយក៏ជាជោគជ័យមួយសម្រាប់ជនរងគ្រោះ នឹងអ្នករស់រានមានជីវិតពីមន្ទីរឃុំឃាំងគុកទួលស្លែងផងដែរ។ «មុននឹងឈានទៅដល់ការសម្រេចលើការផ្តន្ទាទោសដាក់គុកអស់មួយជីវិតនេះ គឺចៅក្រមនៃអង្គជំនុំជម្រះតុលាការកំពូល បានពិនិត្យយ៉ាងច្បាស់លើបញ្ហាទាំងឡាយ ដែលមាននៅក្នុងអង្គហេតុ ហើយឌុចគឺត្រូវបានចោទប្រកាន់នូវឧក្រិដ្ឋកម្មសង្គ្រាម ហើយនឹងឧក្រិដ្ឋកម្មប្រឆាំងមនុស្សជាតិ ជាឧក្រិដ្ឋកម្មដ៏ធំ ដែលទទួលខុសត្រូវលើការស្លាប់មនុស្សចំនួន១២៣៨០នាក់ នៅគុកទួលស្លែង និងនៅបឹងជើងឯក»។ អង្គការលើកលែងទោសអន្តរជាតិបានស្វាគមន៍ការសម្រេចផ្តន្ទាទោសលើបណ្តឹងឧទ្ធរណ៍នេះ ថាជាការបិទសំណុំរឿង០០១។ អង្គការដដែលបានចាត់ទុកថា នេះគឺជាថ្ងៃដ៏មានសារៈសំខាន់មួយ ដែលយើងអាចឃើញថា តុលាការនេះកំពុងចាប់ផ្តើមជួយប្រកាសអាសន្នអំពីយុគសោដនាកម្មនៃប្រវត្តិសាស្ត្រកម្ពុជា ហើយយើងក៏ស្វាគមន៍ដែរថា ដើមបណ្តឹងរដ្ឋប្បវេណីត្រូវបានទទួលស្គាល់បន្ថែមទៀត។ ទោះជាយ៉ាងណាក៏ដោយ ក៏អង្គការលើកលែងទោសអន្តរជាតិបានសម្តែងការខកចិត្តដែរ ដោយហេតុថា អង្គជំនុំជម្រះនៃតុលាការកំពូលមិនបានសម្រេចលើសំណងផ្លូវចិត្ត និងសំណងសមោហភាពបន្ថែមទៀត។ តុលាការសាលាដំបូងរបស់អង្គជំនុំជម្រះនៃសាលាក្តីខ្មែរក្រហមបានសម្រេចផ្តន្ទាទោសឲ្យឌុចជាប់ពន្ធនាគារអស់រយៈពេល៣៥ឆ្នាំ ក៏ប៉ុន្តែទោសកំហុសនេះត្រូវបានសម្រេចបន្ធូរបន្ថយមកនៅត្រឹម១៩ឆ្នាំវិញ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
