VOA News: ព័ត៌មាន: “អ្នកស្ម័គ្រចិត្តភីសខរស៍ ក្រុមទី៥មកដល់កម្ពុជា” plus 4 more |
- អ្នកស្ម័គ្រចិត្តភីសខរស៍ ក្រុមទី៥មកដល់កម្ពុជា
- ជនរងគ្រោះបឹងកក់ប្តឹងអាជ្ញាធរពីបទបំផ្លាញលំនៅដ្ឋានរបស់ខ្លួន
- សង្គ្រោះបន្ទាន់ត្រូវបានអំពាវនាវឲ្យមានសម្រាប់គ្រួសាររងគ្រោះដោយទឹកជំនន់
- ព័ត៌មានអន្តរជាតិ៖ ០៤ តុលា
- អតីតអ្នករស់នៅតំបន់បឹងកក់ចេញទាមទារសំណងបន្ថែម
| អ្នកស្ម័គ្រចិត្តភីសខរស៍ ក្រុមទី៥មកដល់កម្ពុជា Posted: 04 Oct 2011 02:56 PM PDT ជនជាតិអាមេរិកាំងចំនួន៥៩នាក់នៃភ្នាក់ងារអ្នកស្ម័គ្រចិត្តភីសខរស៍ (Peace Corps) បានស្បថចូលកាន់ការងារជាអ្នកស្ម័គ្រចិត្តកាលពីថ្ងៃច័ន្ទ ដែលធ្វើឲ្យចំនួនអ្នកស្ម័គ្រចិត្តរបស់ភ្នាក់ងារនេះកើនដល់១០៦នាក់ នៅកម្ពុជា។ អ្នកស្ម័គ្រចិត្តកំពុងរស់នៅជាមួយប្រជាពលរដ្ឋកម្ពុជាដោយផ្ទាល់ក្នុងខេត្តចំនួន១៥។ លោក ចេហ្វ ដេហ្គល (Jeff Daigle) ភារៈធារីអមស្ថានទូតអាមេរិកប្រចាំកម្ពុជា មានប្រសាសន៍ក្នុងពិធីស្បថក្នុងទីក្រុងភ្នំពេញថា បេសកកម្មរបស់អ្នកស្ម័គ្រចិត្តទាំងនេះ បាននាំឲ្យមានការផ្លាស់ប្ដូរវប្បធម៌យ៉ាងសំខាន់សម្រាប់ប្រទេសទាំងពីរ កម្ពុជា សហរដ្ឋអាមេរិក។ «អ្នកស្ម័គ្រចិត្តភីសខរស៍រស់នៅជាមួយគ្រួសារខ្មែរ ទទួលបាននូវការយល់ដឹងយ៉ាងជ្រាលជ្រៅអំពីវប្បធម៌របស់កម្ពុជា យល់ដឹងពីភាសារបស់ប្រទេសនេះ និងយល់ដឹងពីប្រជាពលរដ្ឋនៃប្រទេសនេះ។ នៅពេលដែលអ្នកស្ម័គ្រចិត្តត្រឡប់ទៅសហរដ្ឋអាមេរិកវិញ ពួកគេនឹងមានអ្វីៗជាច្រើនសម្រាប់ចែករំលែកដល់ជនជាតិអាមេរិកអំពីប្រទេសកម្ពុជា។ តាមរយៈនេះប្រទេសយើងទាំងពីរទទួលបានផលប្រយោជន៍អំពីកម្មវិធីរបស់ ភីសខរស៍។ ទីភ្នាក់ងារភីសខរស៍ត្រូវបង្កើតឡើងដោយអតីតប្រធានាធិបតីសហរដ្ឋអាមេរិក លោក ចន ខេណិឌី (John F. Kennedy)។ នៅឆ្នាំ១៩៦១ ដើម្បីលើកកម្ពស់មិត្តភាព និងសន្ដិភាពជាមួយបណ្ដាប្រទេសនានាក្នុងពិភពលោក គោលបំណងនៃទីភ្នាក់ងារនេះ គឺបណ្ដុះបណ្ដាល និងអប់រំបុរស និងស្ដ្រីនៅតាមបណ្ដាប្រទេសដែលចាប់អារម្មណ៍ និងដើម្បីលើកកម្ពស់ការយោគយល់គ្នា ជាពិសេសក្នុងប្រទេសកំពុងអភិវឌ្ឍន៍។ ចាប់តាំងពីពេលនោះមកមានជនជាតិអាមេរិកាំងនៃក្រុមភីសខរស៍ប្រហែលចំនួន ២សែននាក់បានចូលបម្រើជាអ្នកស្ម័គ្រចិត្តក្នុងប្រទេសចំនួន១៣៩ ដែលក្នុងនោះអ្នកស្ម័គ្រចិត្តចំនួន២២៧នាក់បានមកបំពេញការងារនៅកម្ពុជា ចាប់តាំងពីឆ្នាំ ២០០៧ មក។ នេះបើយោងតាមតួលេខរបស់ភ្នាក់ងារភីសខរស៍នៅកម្ពុជា។ អ្នកស្ម័គ្រចិត្តក្រុមទី៥ មានចំនួន៥៩នាក់ ដែលបានទទួលការបណ្ដុះបណ្ដាលរយៈពេលប្រាំបួនសប្ដាហ៍ក្នុងខេត្តតាកែវ ដោយចាប់ផ្ដើមរស់នៅជាមួយគ្រួសារនៃពលរដ្ឋកម្ពុជានៅទីនោះ។ ក្នុងពិធីស្បថចូលកាន់ការងារជាផ្លូវការ ពួកគេបានស្លៀកពាក់ជារបៀបខ្មែរ មានអាវប៉ាក់ និងសំពត់ហូល។ ក្រុមទី៥នេះនឹងមានបេសកម្មជួយបង្រៀនភាសាអង់គ្លេសដល់យុវជនកម្ពុជា និងចូលរួមសកម្មភាពអប់រំសុខភាព និងអនាម័យដល់សហគមខ្មែរនៅតាមទីជនបទសម្រាប់រយៈពេលពីរឆ្នាំ ក្នុងខេត្តចំនួន១៤ ក្នុងចំណោមខេត្ត១៥ ដែលកំពុងមានវត្តមានអ្នកស្ម័គ្រចិត្ត ក្នុងនោះមាន ខេត្តស្វាយរៀង ព្រៃវែង កំពង់ចាម កណ្ដាល តាកែវ កំពត ព្រះសីហនុ កោះកុង កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ លើសពីនេះ អ្នកស្ម័គ្រចិត្តក្នុងក្រុមទី៥ នេះនឹងចូលរួមចំណែកក្នុងគម្រោងអប់រំផ្នែកបរិដ្ឋាន ការការពារអំពើហិង្សាក្នុងគ្រួសារ និងការអភិវឌ្ឍជំនួញខ្នាតតូចផងដែរ។ លោកស្រី ផេនី ហ្វៀលស៍ (Penny Fields) នាយិកាភ្នាក់ងារភីសខរស៍នៅកម្ពុជាមានប្រសាសន៍ថា ក្រុមអ្នកស្ម័គ្រចិត្តនឹងពាំនាំយកជាមួយពួកគេនូវអ្វីដែលគេបានរៀនសូត្រពីកម្ពុជា ហើយពួកគេនឹងយកកម្ពុជាជាប់នឹងខ្លួនគេជានិច្ច។ លោក សន ក្រុតធី (Sean Crotty) អ្នកស្ម័គ្រចិត្តម្នាក់ក្នុងក្រុមទី៥នេះ ទើបតែចេះភាសាខ្មែរបានខ្លះបន្ទាប់ពីទទួលវគ្គបណ្ដុះបណ្ដាលរយៈពេលជាងពីរខែកន្លងមក។ លោកនិយាយភាសាខ្មែរតាមសំនៀងអង់គ្លេសថា៖ «ខ្ញុំញ៉ាំបាយប្រាំបួនចានក្នុងមួយថ្ងៃ។ ខ្ញុំជាអ្នកចូលចិត្តម្ហូបខ្មែរជាងគេ។ ខ្ញុំពិតជាមានអារម្មណ៍សប្បាយរីករាយដែលខ្ញុំមានឱកាសមកធ្វើការនៅក្នុងប្រទេសមួយ ដែលជាប្រទេសមួយដ៏ល្អដូចជាប្រទេសកម្ពុជា»។ លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ដែលធ្វើជាធិបតីក្នុងពិធីស្បថរបស់ក្រុមភីសខរស៍មានប្រសាសន៍ថា ក្រុមអ្នកស្ម័គ្រចិត្តអាមេរិកបាន និងកំពុងរួមចំណែកក្នុងការអភិវឌ្ឍកម្ពុជា។ «កម្មវិធីរបស់ភ្នាក់ងារភីសខរស៍ កំពុងរួមចំណែកយ៉ាងសំខាន់ក្នុងការអនុវត្តន៍ផែនការយុទ្ធសាស្ដ្រជាតិរបស់រាជរដ្ឋាភិបាលកម្ពុជា។ ការរស់នៅនិងការធ្វើការងារជាមួយពលរដ្ឋកម្ពុជាក្នុងសហគមធ្វើឲ្យពួកគេបង្កើនការយល់ដឹងផ្នែកវប្បធម៌ និងជំនាញនិយាយភាសាខ្មែរបានច្រើន»។ ជាមួយគ្នានេះលោក ម៉ម ប៊ុនហេង ក៏បានរំលឹកដល់ក្រុមអ្នកស្ម័គ្រចិត្តអាមេរិកឲ្យប្រុងប្រយ័ត្នចំពោះជំងឺរាករូស និងជំងឺគ្រុនចាញ់នៅកម្ពុជា៕ This posting includes an audio/video/photo media file: Download Now |
| ជនរងគ្រោះបឹងកក់ប្តឹងអាជ្ញាធរពីបទបំផ្លាញលំនៅដ្ឋានរបស់ខ្លួន Posted: 04 Oct 2011 01:53 PM PDT ប្រជាពលរដ្ឋចំនួនប្រាំបីគ្រួសាររស់នៅភូមិ២២ ក្នុងតំបន់បឹងកក់ នៅថ្ងៃអង្គារនេះបានដាក់ពាក្យបណ្តឹងជាផ្លូវការទៅតុលាការក្រុងភ្នំពេញដើម្បីប្រឆាំងជំទាស់នឹងក្រុមហ៊ុនស៊ូកាគូអ៊ីន និងមន្ត្រីប៉ូលីសមួយចំនួនផ្សេងទៀត ដោយទាមទារសំណងជាប្រាក់ជាង២សែនដុល្លារសហរដ្ឋអាមេរិក។ នៅក្នុងពាក្យបណ្តឹងមួយច្បាប់ដែលបានដាក់ជូនតុលាការក្រុងភ្នំពេញ ហើយបានចែកជូនក្រុមអ្នកយកព័ត៌មាននៅពីមុខតុលាការបានប្តឹងជំទាស់នឹងក្រុមហ៊ុនស៊ូកាគូអ៊ីន មន្រ្តីប៉ូលីសចំនួនពីររូប និងលោក សុខ ពេញវុធ អភិបាលរងខណ្ឌដូនពេញ ព្រមទាំងលោក សុខ ហុង ប្រធានបូមខ្សាច់។ ការដាក់ពាក្យបណ្តឹងរបស់ប្រជាពលរដ្ឋនេះ បានកើតមានឡើងក្រោយពេលដែលផ្ទះប្រជាពលរដ្ឋ ចំនួនប្រាំបីខ្នងនៅភូមិ២២ នៅក្នុងតំបន់បឹងកក់ត្រូវបានអាជ្ញាធរវាយកម្ទេចចោលកាលពីថ្ងៃទី១៦ កញ្ញា កន្លងទៅនេះ។ ការវាយកម្ទេចផ្ទះប្រជាពលរដ្ឋនេះបានធ្វើឲ្យអ្នកភូមិម្នាក់បានទទួលរងរបួស យ៉ាងធ្ងន់ធ្ងរដោយសារតែពួកគេបានព្យាយាមរារាំង ហើយត្រូវបានកម្លាំងប៉ូលីសប្រដាប់ដោយអាវុធ ខែល ដំបងឆក់ និងកំាភ្លើងស្វ័យប្រវត្តិបានវាយបំបែក។ លោក ដួង គា អាយុ៤២ឆ្នាំ ប្រជាពលរដ្ឋរស់នៅភូមិ២២ ដែលនៅក្នុងពាក្យបណ្តឹងនោះ បានទាមទារសំណងបួនម៉ឺននិងពីរពាន់(៤២.០០០)ដុល្លារសហរដ្ឋអាមេរិក។ លោកនិយាយថា លោកចង់ឲ្យក្រុមហ៊ុនស៊ូកាគូអ៊ីន សងទ្រព្យសម្បត្តិដែលលោកបានបាត់បង់ និងផ្ទះរបស់លោកដែលត្រូវបានវាយកម្ទេចកាលពីថ្ងៃទី១៦ កញ្ញា កន្លងទៅនេះ។ «លោកសុខ ពេញវុធ ដែលជាអភិបាលរងខណ្ឌដូនពេញ រដ្ឋ កុសល ជាមេបញ្ជការស្នងការរាជធានីភ្នំពេញ និងផន សុភេន ជាមេបញ្ជការស្នងការដ្ឋាននគរបាលរាជធានីភ្នំពេញ បានបញ្ជាកូនចៅជាង២០០នាក់ ទៅវាយកម្ទេចផ្ទះរបស់ខ្ញុំនៅតំបង់បឹងកក់ភូមិ២២។ អញ្ចឹងហើយខ្ញុំមានតែរកវិធីម្យ៉ាង គឺរកផ្លូវច្បាប់ដើម្បីឲ្យច្បាប់រកដំណោះស្រាយឲ្យប្រជាពលរដ្ឋនៅតំបន់បឹងកក់ ជាពិសេសប្រាំបីគ្រួសារបងប្អូនរបស់ពួកខ្ញុំ»។ លោក ដួង គា បានបញ្ជា្កក់ថា យើងប្តឹងពីរករណី គឺករណីសំណងរដ្ឋប្បវេណី និងពីបទព្រហ្មទណ្ឌហើយលោកសង្ឃឹមថា តុលាការនឹងរកយុត្តិធម៌ជូនលោក។ អ្នកស្រី ហេង មុំ ប្រជាពលរដ្ឋរងគ្រោះម្នាក់ទៀត នៅភូមិ២២ បាននិយាយថាសាលាក្រុងភ្នំពេញ មិនបានផ្តល់សំណងដល់ពួកគាត់ទេ។ អ្នកស្រីបានមានប្រសាសន៍ទៀតថា យើងរស់នៅក្រោមតង់កៅស៊ូយ៉ាងវេទនា បន្ទាប់ពីផ្ទះរបស់ពួកយើងត្រូវបានវាយកម្ទេច។ «មកទល់ពេលនេះ មិនមានអ្នកណាមកសួរពួកខ្ញុំទេ មានតែការបង្ហូរទឹក និងបូមខ្សាច់លុបពួកខ្ញុំថែមពីលើទៀត ទោះបីពួកខ្ញុំសន្សំសំច័យលុយរៃបានតិចតួចយកមកធ្វើហ្នឹង ធ្វើមិនកើតទៀត ត្រូវខ្សាច់កប់ពីលើថែមទៀត។ នេះជាករណីមួយដែលធ្វើឲ្យខ្ញុំពិបាកទ្រាំ ពិបាករស់នៅមែនទែន»។ លោក សុខ ពេញវុធ អភិបាលរងខណ្ឌដូនពេញ បាននិយាយថាលោកកំពុងជាប់រវល់ប្រជុំ។ «អត់ទេបង! សុំទោស! ខ្ញុំកំពុងជាប់រវល់ប្រជុំ»។ ចំណែកលោក ឡាវ វ៉ាន់ នាយកប្រតិបត្តិក្រុមហ៊ុនស៊ូកាគូអ៊ីន មិនបានឆ្លើយទៅនឹងសំណួររបស់វីអូអេ សំឡេងសហរដ្ឋអាមេរិទេ ហើយលោកបានបង្វែរសំណួរនេះ ទៅសួរមន្ត្រីសាលាក្រុងភ្នំពេញវិញ។ «ចុះឧបមាថា បើទៅជួលផ្ទះគេមួយ ដើម្បីបង្កើតអាជីវកម្មអញ្ចឹង នៅក្នុងផ្ទះរបស់គេ! គេធ្វើដូចម្តេចខ្លះចំពោះម្ចាស់ផ្ទះ? ចាំមើលគេអ្នកជួលជាមួយម្ចាស់ផ្ទះទៅ»។ មន្ត្រីសាលាក្រុងភ្នំពេញមិនអាចទាក់ទងសុំការបំភ្លឺបានទេនៅថ្ងៃអង្គារនេះ ក៏ប៉ុន្តែលោក កែប ជុតិមា ធ្លាប់បានប្រាប់ វីអូអេ ថា សាលាក្រុងភ្នំពេញនឹងមិនចេញប្លង់កាន់កាប់កម្មសិទ្ធិដីធ្លីដល់ប្រជាពលរដ្ឋដែលរស់នៅមាត់ទឹកទេ ក៏ប៉ុន្តែនឹងពិចារណាផ្តល់សំណងដល់ពួកគេ៕ This posting includes an audio/video/photo media file: Download Now |
| សង្គ្រោះបន្ទាន់ត្រូវបានអំពាវនាវឲ្យមានសម្រាប់គ្រួសាររងគ្រោះដោយទឹកជំនន់ Posted: 04 Oct 2011 01:21 PM PDT នៅថ្ងៃអង្គារនេះ អង្គការមនុស្សធម៌អន្តរជាតិ អុកស្វាម (Oxfam) បានអំពាវនាវឲ្យមានការឲ្យផ្តល់ស្បៀងអាហារ ទឹកស្អាត សម្ភារៈថែទាំអនាម័យ និងទីជម្រក ដើម្បីជួយសង្គ្រោះជីវិតមនុស្ស និងដោះស្រាយតម្រូវការជាបន្ទាន់របស់ប្រជាពលរដ្ឋច្រើនរាប់ម៉ឺននាក់ដែលកំពុងរងគ្រោះដោយទឹកជំនន់។ លោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់នៅថ្ងៃអង្គារ៍នេះថា នៅក្នុងខេត្តចំនួន១៧ ប្រជាពលរដ្ឋចំនួន១៦៤ បានស្លាប់ដោយទឹកជំនន់។ ប្រជាពលរដ្ឋចំនួន២១៥.១៦២គ្រួសារបានទទួលរងគ្រោះ និងប្រជាពលរដ្ឋចំនួន២០.៩១៤គ្រួសារត្រូវបានជម្លៀស។ ផ្ទះចំនួន១៦០.៨៨៩ខ្នងបានលិចលង់ និងផ្ទះខូចចំនួន៤៥៣ខ្នង។ សាលារៀនជាង៩០០កន្លែង វត្តជាង៤២០ និងមណ្ឌលសុខភាពចំនួន៧៥ត្រូវបានជន់លិច។ សន្ទូងចំនួន២៩១.១៣៥ហិកតា ក្នុងនោះខូចប្រមាណ ៨០.០០០ហិកតា និងសំណាបចំនួន៣៨០ហិកតាត្រូវបានលិចលង់។ ផ្លូវជាតិប្រវែង២៤៤គីឡូម៉ែត្រ និងផ្លូវក្រាលគ្រួសប្រវែង២.០១៩គីឡូម៉ែត្របានជន់លិច។ សេចក្តីថ្លែងការណ៍របស់អង្គការអុកស្វាម បានបញ្ជាក់ថា ទោះបីរដ្ឋាភិបាល អាជ្ញាធរមូលដ្ឋាន និងអង្គការមនុស្សធម៌បានចាប់ផ្តើមការងារសង្គ្រោះហើយក៏ដោយ ក៏ប្រជាពលរដ្ឋរាប់ពាន់គ្រួសារដែលត្រូវបានជម្លៀសចេញពីលំនៅស្ថានដោយគ្រោះមហន្តរាយទឹកជំនន់នេះ នៅតែត្រូវការជំនួយបន្ទាន់បន្ថែមទៀត ហើយជនរងគ្រោះមួយចំនួនបានឲ្យដឹងថា ពួកគេបានទទួលជំនួយសង្គ្រោះតិចតួចណាស់រហូតមកដល់ពេលនេះ។ លោកនាយករដ្ឋមន្ត្រី ហ៊ុន សែន បានប្រកាសនៅក្នុងប្រជុំគណៈរដ្ឋមន្ត្រីពិសេសកាលពីសប្តាហ៍មុនថា រដ្ឋាភិបាលនឹងបម្រុងថវិកា៥៥លានដុល្លារអាមេរិក និងអង្គរចំនួន១,៧លានតោន ដើម្បីជួយជនរងគ្រោះដោយទឹកជំនន់។ សេចក្តីថ្លែងការណ៍នេះបានបញ្ជាក់ថា ធនធានទាំងនេះអាចនឹងជួយបង្កើនល្បឿននៃកិច្ចប្រឹងប្រែងរបស់កម្ពុជាក្នុងការឆ្លើយតបនឹងគ្រោះមហន្តរាយនេះ។ លោកនាយករដ្ឋមន្ត្រី ហ៊ុន សែន បានណែនាំដល់អាជ្ញាធរដែនដីនៃបណ្តាខេត្តដែលទទួលរងផលប៉ះពាល់ដោយទឹកជំនន់ឲ្យសហការជាមួយកាកបាទក្រហមកម្ពុជានៅតាមខេត្ត និងស្ថាប័នពាក់ព័ន្ធនានាយកចិត្តទុកដាក់ដល់សុខភាពរបស់ប្រជាពលរដ្ឋពេលមានទឹកជំនន់ និងក្រោយពេលទឹកជំនន់ និងដោះស្រាយស្បៀងអាហារ និងជួយសង្គ្រោះប្រជាពលរដ្ឋទៅកាន់កន្លែងសុវត្ថិភាព។ លោក ហ្រ្វង់ស៊ីស ប៉េរ៉េហ្ស (Francis Perez) អ្នកគ្រប់គ្រងកម្មវិធីគ្រោះមហន្តរាយរបស់អង្គការអុកស្វាម ប្រចាំនៅកម្ពុជា បានបញ្ជាក់ក្នុងសេចក្តីថ្លែងការណ៍ថា អុកស្វាម ស្វាគមន៍ព័ត៌មានដែលថា រដ្ឋាភិបាលបានបម្រុងស្បៀង និងថវិកាសម្រាប់ជួយជនរងគ្រោះដោយទឹកជំនន់។ «យើងសង្ឃឹមថា ធនធានដ៏មានសារៈសំខាន់ទាំងអស់នេះនឹងត្រូវបានចែកចាយសម្រាប់ជួយសង្គ្រោះជីវិតប្រជាពលរដ្ឋ និងដោះស្រាយតម្រូវការបន្ទាន់ ជាពិសេស ស្បៀងអាហារ ទឹកស្អាត និងអនាម័យ»។ សេចក្តីថ្លែងការណ៍ បានឲ្យដឹងថា នៅថ្ងៃអង្គារនេះ អុកស្វាមបានចែកកញ្ចប់សម្ភារៈអនាម័យដែលរួមមានធុងចម្រោះទឹក សាប៊ូ សារុ ង ក្រមា និងសម្ភារៈមួយចំនួនទៀតដល់ជនរងគ្រោះ៣៣៣គ្រួសារនៅក្នុងស្រុកកំពង់ស្វាយ ខេត្តកំពង់ធំ ហើយអុកស្វាម មានការព្រួយបារម្មណ៍លើបញ្ហាអនាម័យនៅក្នុងតំបន់រងផលប៉ះពាល់ដោយទឹកជំនន់ខណៈដែលទឹកជំនន់បានបន្តស្រក។ សេចក្តីថ្លែងការណ៍នេះ បញ្ជាក់ថាទឹកជំនន់ទន្លេមេគង្គបានបន្តស្រក ប៉ុន្តែស្ថានភាពនេះអាចវិវឌ្ឍទៅជាសភាពធ្ងន់ធ្ងរ បើខ្យល់ព្យុះត្រូពិក ណាលហ្គេ ដែលបច្ចុប្បន្នកំពុងធ្វើដំណើរទៅកាន់ភាគកណ្តាលវៀតណាម និងផ្នែកខាងត្បូងចិនបង្អុរទឹកភ្លៀងមកលើប្រទេសនៅតាមដងទន្លេមេគង្គផ្នែកខាងលើ៕ This posting includes an audio/video/photo media file: Download Now |
| Posted: 03 Oct 2011 06:20 PM PDT ព័ត៌មានចុងក្រោយបំផុត៖ ភូមា៖ ក្រុមហ៊ុនចិនពាក់ព័ន្ធនឹងការសាងសង់ទំនប់វារីអគ្គីសនីនៅក្នុងប្រទេសភូមាបានចេញសេចក្ដីព្រមានថា នឹងមានបញ្ហាខាងច្បាប់ប្រសិនបើរដ្ឋាភិបាលភូមាសម្រេចបញ្ឈប់គម្រោងសាងសង់ទំនប់នោះ។ អ៊ីស្រាអែល/ប៉ាឡេស្ទីន៖ រដ្ឋមន្ដ្រីការបរទេសសហរដ្ឋអាមេរិកលោក ឡេអន ប៉ាណេត្ដា (Leon Panetta) បានទិតៀនក្រុមអ្នកតាក់តែងច្បាប់អាមេរិកាំង ដែលបានផ្អាកជំនួយចំនួន ២០០ លានដុល្លារសម្រាប់ឧបត្ថម្ភលើគម្រោងអភិវឌ្ឍន៍នៅក្នុងដែនដីប៉ាឡេស្ទីន។ ប៉ាគីស្ថាន៖ ប៉ូលីសប៉ាគីស្ថាននិយាយថា ជនប្រដាប់អាវុធបានបាញ់សម្លាប់មនុស្សយ៉ាងតិច១៣ នាក់ កាលពីព្រឹកថ្ងៃអង្គារ នៅក្នុងការវាយប្រហារប្រឆាំងសាសនាខុសគ្នាមួយ មកលើរថយន្ដក្រុង ដែលដឹកក្រុមអ្នកកាន់សាសនាម៉ូស្លីម និកាយហ្សីអិត នៅជិតតំបន់រង្គោះរង្គើរ កេត្ដា (Quetta) ស្ថិតនៅភាគនីរតីប្រទេស។ សហរដ្ឋអាមេរិក៖ អ្នកវិទ្យាសាស្រ្ដដើមកំណើតអាមេរិកាំង ៣ នាក់បានទទួលរង្វាន់ណូបែលរូបសាស្រ្ដឆ្នាំ ២០១១ សម្រាប់ «ការរុករកឃើញការរីកមាឌយ៉ាងរហ័សរបស់ចក្រវាឡ» តាមរយៈការសង្កេតមើលផ្កាយដែលផ្ទុះ។ សហរដ្ឋអាមេរិក៖ នាង Amanda Knox ដែលជានិស្សិតអាមេរិកាំងម្នាក់បានឡើងយន្ដហោះចាកចេញពីប្រទេសអ៊ីតាលី ក្នុងឋានៈជាអ្នករួចទោសកាលពីថ្ងៃអង្គារ ដើម្បីធ្វើដំណើរមកកាន់សហរដ្ឋអាមេរិក ក្រោយពីគណៈវិនិច្ឆ័យតុលាការក្នុងប្រទេសអ៊ីតាលីបានទម្លាក់ចោលការចោទប្រកាន់លើរូបនាងពីបទឃាតកម្ម។ អឺរ៉ុប៖ ក្រុមរដ្ឋមន្ដ្រីហិរញ្ញវត្ថុមកពីប្រទេសសមាជិកនៃតំបន់ប្រើប្រាស់ប្រាក់អឺរ៉ូទាំង ១៧ បានពន្យាពេលការធ្វើសេចក្តីសម្រេចចិត្ដមួយក្នុងការផ្ដល់ជំនួយស្រោចស្រង់ប្រទេសមួយលើកទៀតឲ្យប្រទេសក្រិក។ ហ្វីលីពីន៖ ក្រុមមន្ដ្រីហ្វីលីពីនបានសន្យាថា នឹងធ្វើឲ្យប្រសើរឡើងដល់ការការពារសន្ដិសុខនៅក្នុងឧស្សហកម្មរ៉ែចំបងរបស់ជាតិ ក្រោយពីក្រុមបះបោរកុម្មុយនីស្តបានវាយដណ្ដើមយកទីកន្លែងជីករ៉ែ ៣ នៅក្នុងសប្ដាហ៍នេះ។ ឥណ្ឌា៖ ប្រធានាធិបតីអាហ្វហ្គានីស្ថាន លោក ហាមីដ កាហ្សៃ (Hamid Karzai) បានធ្វើទស្សនកិច្ចការទូតរយៈពេលពីរថ្ងៃទៅកាន់ប្រទេសឥណ្ឌា ដែលជាទស្សនកិច្ចមួយធ្វើឡើងក្នុងអំឡុងពេលមានភាពតានតឹងកាន់តែខ្លាំងឡើងជាមួយប្រទេសប៉ាគីស្ថាន ដែលជាបច្ចាមិត្ដប្រពៃណីរបស់ប្រទេសទាំងពីរ។ <!--AV--> ព័ត៌មាននៅពេលមុននេះ៖ <!--IMAGE-RIGHT--> កម្ពុជា៖ មនុស្សជាង១៥០នាក់បានស្លាប់ក្នុងប្រទេសកម្ពុជានិងវៀតណាមខាងត្បូងដោយសារទឹកជំនន់ដ៏ធំបំផុតតាមបណ្តោយដងទន្លេមេគង្គក្នុងរយៈពេល១១ឆ្នាំ។ ពួកមន្រ្តីក្នុងប្រទេសទាំងពីរនិយាយថា ទឹកជំនន់បានជន់លិចដីស្រែរាប់ពាន់ហិចតា ធ្វើឲ្យលិចផ្ទះសម្បែង បំផ្លាញស្ពាន និងបង្ខំមនុស្សរាប់ពាន់នាក់ឲ្យជន្លៀសចេញពីផ្ទះរបស់ខ្លួន។ ស្ថានភាពអាចកាន់តែអាក្រក់ឡើងៗ បើខ្យល់ព្យុះទីហ្វុង Nesat ដែលបានសម្លាប់មនុស្សយ៉ាងហោចណាស់ជាង១៥០នាក់ក្នុងប្រទេសហ្វីលីពីននិងបីនាក់ទៀតក្នុងប្រទេសចិនកាលពីសប្តាហ៍មុន បានធ្វើឲ្យធ្លាក់ភ្លៀងកាន់តែខ្លាំងឡើងដែលជន់លិចដីដែលធ្វើឲ្យទឹកទន្លេមេគង្គឡើងរឹតតែខ្លាំង។ ក្នុងប្រទេសកម្ពុជា ឧប្បនាយករដ្ឋមន្រ្តី យឹម ឆាយលី និយាយកាលពីថ្ងៃច័ន្ទថា កម្ពុជាបានទទួលគ្រោះថ្នាក់មកពីការផ្លាស់ប្តូរអាកាសធាតុក្នុងរយៈពេលប៉ុន្មានឆ្នាំថ្មីៗនេះ។ ទឹកជំនន់បានសម្លាប់មនុស្សយ៉ាងហោចណាស់ក៏១៥០នាក់ដែរក្នុងប្រទេសកម្ពុជាចាប់តាំងពីខែសីហាមក។ ក្នុងប្រទេសវៀតណាម ពួកអាជ្ញាធរនិយាយថា មនុសុ្សយ៉ាងហោចណាស់ក៏១៨នាក់ដែរបានស្លាប់ក្នុងរយៈពេល១០ថ្ងៃនេះ។ រដ្ឋាភិបាលប្រទេសថៃប្រាប់ឲ្យដឹងថា ទឹកជំនន់បានសម្លាប់មនុស្សជាង១៨០នាក់ចាប់តាំងពីខែសីហាមក។ លីប៊ី៖ នាយករដ្ឋមន្រ្តីបណ្តោះអាស័ន្នលីប៊ី និយាយថា លោក នឹងចាកចេញពីតំណែងរបស់លោកនៅពេលដែលទីក្រុងកំណើតរបស់ Moammar Gadhafi ត្រូវបានរឹបអូស ហើយនៅពេលដែលក្រុមប្រឹក្សាអន្តរកាលជាតិ ផ្លាស់ប្តូរគណរដ្ឋមន្រ្តីរបស់ខ្លួន។ បារ៉ែន៖ តុលាការសន្តិសុខនៃប្រទេសបារ៉ែន បានកាត់ទោសមនុស្ស២៤នាក់ឲ្យជាប់គុកអស់មួយជីវិតនៅក្នុងការសម្លាប់ជនជាតិប៉ាគីស្ថាននាក់ក្នុងអំឡុងពេលនៃការចលាចលដែលបានទាក់ទិននឹងបាតុកម្មកំណែទម្រង់មួយនៅដើមឆ្នាំនេះ។ អាហ្វហ្គានីស្ថាន៖ ទីភ្នាក់ងារផ្តល់ជំនួយអន្តរជាតិនាំមុខពីរ ប្រាប់ឲ្យដឹងថាសិទ្ធិរបស់ស្រ្តីក្នុងប្រទេសអាហ្វហ្គានីស្ថាន បានស្ថិតនៅក្រោមការគំរាមកំហែង ពេលដែលកងទ័ពអន្តរជាតិប្រុងប្រៀបចាកចេញពីប្រទេសដែលហែកហួរដោយសារសង្គ្រាមនេះ។ ក្រិក៖ ផ្សារភាគហ៊ុនសកលលោកបានធ្លាក់ចុះយ៉ាងខ្លាំងកាលពីថ្ងៃច័ន្ទ ព្រោះតែសេចក្តីភ័យខ្លាចថ្មីថាប្រទេសក្រិក ប្រហែលមិនមានប្រាក់សងបំណុលនាពេលឆាប់ៗនេះលើប្រាក់កម្ចីជួយសង្គ្រោះកាលពីឆ្នាំទៅ។ សហរដ្ឋអាមេរិក៖ លោក Leon Panetta រដ្ឋមន្រ្តីក្រសួងការពារប្រទេសសហរដ្ឋអាមេរិក និយាយថាមិនមានជម្រើសណាក្រៅពីការចរចារវាងអ៊ីស្រាអែលនិងប៉ាឡេស្ទីនក្នុងការការពារដំណោះស្រាយសន្តិភាពដល់ជម្លោះតំបន់មជ្ឈឹមបូព៌ាប្រទេសទេ។ សហរដ្ឋអាមេរិក៖ ពលរដ្ឋអាមេរិកាំងម្នាក់ បានរងការចោទប្រកាន់ពីការរៀបចំផែនការវាយប្រហារក្រសួងការពារប្រទេសនិងវិមានរដ្ឋសភាសហរដ្ឋអាមេរិកដោយប្រើយន្តហោះដោយប្រដាប់បញ្ជារពីចម្ងាយដែលផ្ទុកគ្រឿងផ្ទុះ ។ បុរសនោះត្រូវបានកំណត់ពេលបង្ហាញខ្លួននៅតុលាការសហព័ន្ធនៅថ្ងៃនេះ។ សហរដ្ឋអាមេរិក៖ សម័យប្រជុំថ្មីរបស់តុលាការកំពូលសហរដ្ឋអាមេរិក បានបើកធ្វើកាលពីថ្ងៃច័ន្ទ។ សម័យប្រជុំនេះ ទំនងរួមមានរឿងក្តីដ៏ចម្រូងចម្រាសពាក់ព័ន្ធនឹងអំណាចសហព័ន្ធ រួមមានការថែទាំសុខភាព ច្បាប់អន្តោប្រវេសន៍និង ច្បាប់ផ្តល់សិទ្ធស្មើគ្នាAffirmative Action។ This posting includes an audio/video/photo media file: Download Now |
| អតីតអ្នករស់នៅតំបន់បឹងកក់ចេញទាមទារសំណងបន្ថែម Posted: 03 Oct 2011 03:47 PM PDT ស្របពេលដែលរដ្ឋាភិបាលកំពុងជាប់គាំងក្នុងការដោះស្រាយបញ្ហាប្រជាពលរដ្ឋដែលនៅសេសសល់នៅតំបន់បឹងកក់ នៅថ្ងៃច័ន្ទនេះ ប្រជាពលរដ្ឋអតីតរស់នៅតំបន់បឹងកក់ដែលបានចាកចេញបន្ទាប់ពីទទួលយកសំណងចំនួន៨.០០០ដុល្លានិងប្រាក់២លានរៀល បានលេចមុខតវ៉ាទាមទារសំណងពីក្រុមហ៊ុន និងពីសាលាក្រុងភ្នំពេញចំនួន២ម៉ឺនដុល្លារក្នុងមួយគ្រួសារ។ ការតវ៉ារបស់ពលរដ្ឋនេះបានកើតមានឡើងបន្ទាប់ពីលោកនាយករដ្ឋមន្ត្រីហ៊ុន សែន បានធ្វើសម្បទានដីចំនួន១២,៤៤ហិកតាដល់ប្រជាពលរដ្ឋដែលនៅសេសសល់ជិត៨០០គ្រួសារសម្រាប់ធ្វើការអភិវឌ្ឃន៍ដោយខ្លួនឯងក៏ប៉ុន្តែក្នុងចំណោមទំហំដីទាំងនោះក៏មានប្រជាពលរដ្ឋប្រមាណ៤៤គ្រួសារត្រូវបានបដិសេធមិនប្រគល់ប្លង់កម្មសិទ្ធិស្របច្បាប់ទេ។ យ៉ាងតិចមានប្រជាពលរដ្ឋប្រមាណជាង៣.០០០គ្រួសារបានចាកចេញពីដំបន់បឹងកក់ហើយបានទៅរស់នៅកន្លែងផ្សេងៗគ្នាចម្ងាយប្រមាណជាង២០គីឡូម៉ែត្រពីទីក្រុងភ្នំពេញ។ ក៏ប៉ុន្តែការចាកចេញនោះត្រូវបានប្រជាពលរដ្ឋទាំងនោះបានអះអាងថា បានធ្វើឡើងតាមការបង្ខិតបង្ខំ ហើយការផ្តល់សំណងមិនត្រូវបានព្រមព្រាងគ្នាដោយស្ម័គ្រចិត្តទេដោយមានពលរដ្ឋខ្លះបានទទួល៣.០០០ដុល្លារនិងអ្នកផ្សេងទៀតទទួលបាន៨.០០០ដុល្លារ និង២លានរៀល។ សំណងនេះសម្រាប់អ្នកដែលមិនទទួលយកដីទំហំ៤ម៉ែត្រគុណនឹង១៦ម៉ត្រ។ អ្នកស្រី សំ វណ្ណា អតីតរស់នៅក្នុងតំបន់បឹងកក់ហើយសព្វថ្ងៃរស់នៅបូរីសន្តិភាពពីរចម្ងាយ១៦គីឡូម៉ែត្រពីទីក្រុងភ្នំពេញបាននិយាយថា ការទទួលយកសំណងកន្លងមកត្រូវបានធ្វើឡើងតាមការគំរាមនិងបង្ខិតបង្ខំ។ អ្នកស្រីបាននិយាយទៀតថា អ្នកស្រីចង់ឲ្យសាលាក្រុងនិងក្រុមហ៊ុនផ្តល់សំណងបន្ថែមទៀតដល់ពួកគាត់រហូតដល់ចំនួន២ម៉ឺនដុល្លារក្នុងមួយគ្រួសារដោយសារសំណងលើកមុនតិចតួចពេកដែលធ្វើឲ្យពួកគាត់មិនអាចយកទៅទិញផ្ទះឬក៏ប្រកបអាជីវកម្មដោយខ្លួនឯងបាន។ «ខ្ញុំធ្វើនេះមិនមែនប្រឆាំងចំពោះអ្នកពួករស់នៅទេ គឺខ្ញុំរីករាយណាស់ដែលពួកគេបានរស់នៅតំបន់បឹងកក់»។ អ្នកស្រី ទេព វន្នី តំណាងប្រជាពលរដ្ឋដែលនៅសេសសល់នៅតំបន់បឹងកក់បាននិយាយថាអ្នកស្រីគាំទ្រចំពោះការតវ៉ានេះ។ អ្នកស្រីបាននិយាយថា ការទាមទាររបស់ពលរដ្ឋដែលបានចាកចេញនិងមិនធ្វើឲ្យប៉ះពាល់ដល់អ្នកដែលទទួលបានដីពីគោលការណ៍របស់លោកនាយករដ្ឋមន្រ្តី ហ៊ុន សែនទេ។ «អនុក្រឹត្យរបស់សម្តេចបានកាត់ដី១២,៤៤ហិកតាគឺសម្រាប់ប្រជាពលរដ្ឋដែលគាត់មិនទទួលយកសំណងជាទឹកប្រាក់ ឬដូរផ្ទះមួយល្វែងនៅដំណាក់ទ្រយឹង។ នេះគឺជាដីកាដូពីសម្តេចដែលជូនប្រជាពលរដ្ឋដែលនៅសេសសល់ដែលមានជិត៨០០គ្រួសារ។ អញ្ចឹងខ្ញុំជឿជាក់លើប្រមុខរដ្ឋាភិបាលថាមិនអាចជាមានបញ្ហាដល់ពួកខ្ញុំទេ»។ លោក សៀ ភារម្យ នាយកលេខាធិការដ្ឋាននៃក្រុមការងារពិសេសសិទ្ធិលំនៅស្ថានបាននិយាយថាក្រុមអង្កការសង្គមស៊ីវិលតែងតែបារម្មណ៍ថា អាចនិងមានរឿងតវ៉ាមិនសុខចិត្តកើតឡើងដោយសារតែការផ្តល់សំណងមិនសមរម្យ។ លោកបានបញ្ជាក់ថាប្រសិនបើរដ្ឋាភិបាលនូវតែបន្តទង្វើដូចរាល់ថ្ងៃនោះរដ្ឋាភិបាលនឹងដោះស្រាយបញ្ហាដដែលៗដោយគ្មានទីបញ្ចប់។ «អញ្ចឹងវាជាបន្ទុករបស់រដ្ឋាភិបាល។ វាជាការខ្ជះខ្ជាយថវិកា ឬក៏ពេលវេលាដោះស្រាយតែរឿងដ៏ដែលៗអត់ចេះចប់អត់ចេះហើយទេ។ អញ្ចឹងការវិវត្តន៍ហ្នឹងនឹងមិនមាននិរន្តរភាពទេប្រសិនបើយើងនូវតែបន្តឬអនុវត្តការងារដដែលៗ»។ លោក អំ សំអាត មន្ត្រីផ្នែកស៊ើបអង្កេតរបស់អង្កការសិទ្ធិមនុស្សលីកាដូបាននិយាយថា នេះជាមេរៀនមួយថ្មីសម្រាប់រដ្ឋាភិបាល។ នៅពេលណាប្រគល់ដីទៅឲ្យក្រុមហ៊ុនឯកជនធ្វើការអភិវឌ្ឍត្រូវតែមានការដោះស្រាយឲ្យមានសំណងសមរម្យ និងតម្លាភាពសម្រាប់ប្រជាពលរដ្ឋដើម្បីឲ្យពួកគេអាចកសាងជីវភាពបាននូវពេលដែលបានចាកចេញពីទីតាំងចាស់។ «រដ្ឋាភិបាលនិងសាលាក្រុងគាត់ត្រូវតែពិនិត្យនិងពិចារណាឡើងវិញសម្រាប់ប្រជាពលរដ្ឋទាំងអស់ហ្នឹងដើម្បីបញ្ជៀសនូវបាតុភាពនៃការតវ៉ាអាចក្លាយទៅជាអំពើហឹង្សាផ្សេងៗគឺមិនមែនជាផលចំណេញទេទាំងរដ្ឋាភិបាលនិងក្រុមហ៊ុនឯកជន»។ លោក កែប ជុតិមា អភិបាលក្រុងភ្នំពេញមិនអាចទាក់ទងដើម្បីសុំបំភ្លឺបានទេនៅថ្ងៃច័ន្ទនេះ។ចំណែកលោក កើត ឆែ នាយករងរដ្ឋបាលនៃសាលាក្រុងមាននិយាយថាលោកកំពុងជាប់រវល់ប្រជុំ។ សាលាក្រុងភ្នំពេញកន្លងមកធ្លាប់បានផ្តល់សំណងដល់ប្រជាពលរដ្ឋដែលព្រមចាកចេញក្នុងជម្រើសផ្សេងៗគ្នាគឺផ្តល់ប្រាក់ចំនួន៨.៥០០ដុល្លារ ឬផ្ទះល្វែងមួយខ្នងដែលមានទំហំ៤ម៉ែត្រគុណនិង១៦ម៉ែត្រនៅដំណាក់ទ្រយឹង។ ការផ្តល់សំណងនេះបានធ្វើឲ្យប្រជាពលរដ្ឋជាង៣.០០០គ្រួសារបានចាកចេញហើយបាននៅសេសសល់តែជិត៨០០គ្រួសារតែប៉ុណ្ណោះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
