VOA News: ព័ត៌មាន: “ជនសង្ស័យក្នុងសាលាក្តីខ្មែរក្រហមព្រមានមិនឱ្យបន្តការកាត់ទោសបន្ថែម” plus 10 more |
- ជនសង្ស័យក្នុងសាលាក្តីខ្មែរក្រហមព្រមានមិនឱ្យបន្តការកាត់ទោសបន្ថែម
- បន្ទោសការផ្លាស់ប្តូរបរិស្ថានថាបានបង្កឲ្យមានទឹកជំនន់
- ព័ត៌មានអន្តរជាតិ៖ ០៦ តុលា
- របាំត្រុដិមានជីវិតថ្មីលើទឹកដីក្រុងឡុងប៊ិច
- និស្សិតកម្ពុជាធ្វើយុទ្ធនាការស្ម័គ្រចិត្តសម្អាតឆ្នេរ
- ដំណើរការចុះឈ្មោះបោះឆ្នោតត្រូវបានមើលឃើញថាមានភាពមិនប្រក្រតី
- អ្នកភូមិបឹងកក់ត្រូវបានប្តឹងពីបទប្រមាថ និងគំរាមកំហែង
- គ្រូបង្រៀនទាមទារដំឡើងប្រាក់បៀវត្សរ៍នៅទិវាគ្រូបង្រៀន
- ស្នាដៃរបាំថ្មីបង្ហាញ«វដ្តនៃការបំពានអំណាច»
- សាស្ត្រាចារ្យច្បាប់អាមេរិក៖ សាលាក្តីខ្មែរក្រហមគ្រាន់តែជាផ្នែកមួយនៃការដោះស្រាយបញ្ហាបាក់ស្បាតនៅកម្ពុជា
- អតីតគ្រូបង្រៀនប្រឹងជំរុញកូនសិស្សខ្មែរនៅឡុងប៊ិចឱ្យបានមកកាន់តំណែងខ្ពស់
| ជនសង្ស័យក្នុងសាលាក្តីខ្មែរក្រហមព្រមានមិនឱ្យបន្តការកាត់ទោសបន្ថែម Posted: 06 Oct 2011 02:18 PM PDT លោកមាស មុតជនសង្ស័យម្នាក់ក្នុងសំណុំរឿងលេខ០០៣និងជាអតីតមន្ត្រីយោធាជាន់ខ្ពស់ខ្មែរក្រហមបានស្នើកុំឱ្យកាត់ទោសលើសពី ចំនួនជនជាប់ចោទដែលកំពុងជាប់ឃុំក្នុងតុលាការខ្មែរក្រហម។ លោកខេមរានៃវីអូអេសំឡេងសហរដ្ឋអាមេរិកបានទៅសម្ភាសដោយផ្ទាល់ជាមួយលោកមាស មុតនៅ ឯលំនៅដ្ឋានរបស់លោកក្នុងខេត្តបាត់ដំបងក្រោយពី ឈ្មោះរបស់លោកត្រូវបានបង្ហាញក្នុងឯកសារមួយរបស់សាលាក្តី។ តទៅនេះសូមលោកអ្នកស្តាប់បទសម្ភាសន៍នេះដូចតទៅ៖ <!--AV--> ស៖ ហេតុអីដែរបានអញ្ជើញមករស់នៅទីនេះ បាទ? ឆ៖ មែនទែន សម័យតស៊ូជាមួយយួនហ្នឹង ក៏មកនៅតាមព្រំដែនហ្នឹងតែម្តង បាទ។ ស៖ នៅទីនេះ វាមានរបៀបថាស្រួលឬក៏ពិបាក ឬក៏យ៉ាងម៉េចដែរ? ឆ៖ ការពិត យើងធ្លាប់លំបាកហើយ មកនៅកន្លែងនេះ វាទៅជាកន្លែងស្រួលទៅវិញ។ ស៖ ថ្មីៗនេះ មានការចេញដូចថាចោទប្រកាន់ពីព្រះរាជអាជ្ញា បរទេស ទាក់ទងទៅនឹងរឿងការកាប់សម្លាប់កាលសម័យខ្មែរក្រហម តើនៅពេលនោះមានការបញ្ជូនដូចជាកងទ័ពអីដើម្បីទៅកាន់ ស-២១ ឬក៏កន្លែង ឌុច នោះ ដើម្បីឲ្យគេកាប់សម្លាប់អញ្ចឹងមែន ឬក៏លោកមានការបកស្រាយយ៉ាងដូចម៉េចវិញដែរ? ឆ៖ តាមខ្ញុំមើលគឺ អាចមានខ្លះ បាទ ប៉ុន្តែឲ្យវាជាចំនួនច្រើនដូចតែគេទាយនោះវាមិនពិតទេ តែខ្ញុំថាអាចមានខ្លះ។ ដែលខ្ញុំថាអាច មានខ្លះតាមវិធីអញ្ចេះ ខាងសេនាធិការ គេហៅឲ្យទៅរៀនសូត្រ បាទ ដល់រួចហើយទៅគេប្រាប់មកអង្គភាពវិញថា ឈ្មោះនេះ ឈ្មោះនេះ ប៉ុន្មាននាក់នេះគេមិនឲ្យត្រឡប់ទៅអង្គភាពវិញទេ។ ហើយខាងសេនាធិការ គេបញ្ជូនទៅ ស-២១ ទៅ ហើយខាងអង្គភាពមែនទែនឥតដឹងថារឿងហ្នឹងវាយ៉ាងម៉េចអីយ៉ាងម៉េចទេ។ អានេះខ្ញុំនិយាយចំពោះអង្គភាពដែលខ្ញុំទទួលខុសត្រូវ វាមានបញ្ហាហ្នឹងខ្លះ។ មួយករណីឬពីរករណី អញ្ចឹង បាទ។ ស៖ នៅក្នុងនោះ បើសិនជាគេហៅទៅរៀនសូត្រហៅទៅអីអញ្ចឹង មានចំនួនច្រើនទេនៅពេលនោះ ហើយតើហេតុអីបានជាអាចទៅរៀនសូត្រ តើមានទោសកំហុសអីរបៀបណា? ឆ៖ ខាងអង្គភាពមែនទែនដូចជាខាងខ្ញុំអញ្ចឹង មែនទែនមិនបានដឹងបញ្ហាហ្នឹងច្បាស់លាស់ថាយ៉ាងម៉េចទេ ប៉ុន្តែជាទម្លាប់ខាងសេនាធិការដែលទទួលខុសត្រូវគ្រប់កងពលហ្នឹងគេតែងហៅមេៗថ្នាក់មធ្យមថ្នាក់ក្រោមនោះទៅរៀនសូត្រនៅកន្លែងគេ។ អាហ្នឹងវាជារបៀបរបបធ្វើការងាររបស់គេមួយ។ មួយឆ្នាំបីដង មួយឆ្នាំបួនដងអីអញ្ចឹង បាទ។ ទៅម្តង មួយកងពល ២០ ឬ ៣០ ឬរហូតដល់កងពលខ្លះ ៥០ ឬ ៦០ នាក់ក៏មានដែរ។ ស៖ នៅក្នុងការណ៍ដែលឯកសាររបស់តុលាការចេញមកនោះ បានចោទប្រកាន់អំពីរឿងហ្នឹងថា អ្នកទទួលខុសត្រូវសម័យនោះគឺក្នុងកងពល ១៦៤ អញ្ចឹងបានទាក់ទងទៅនឹងបទឧក្រិដ្ឋហ្នឹង។ ហើយមានជាប់ទាក់ទងទៅនឹងការបង្ខិតបង្ខំឲ្យធ្វើការងារហួសកម្លាំង ឬក៏ធ្វើមនុស្សឃាត និងចាប់បញ្ជូនទៅដើម្បីឲ្យ ស-២១ កន្លែង ឌុច សម្លាប់។ តើរឿងហ្នឹង វាពិតប៉ុណ្ណាមិនពិតប៉ុណ្ណា ហើយវាទាក់ទងយ៉ាងម៉េចខ្លះ បាទ? ឆ៖ នៅកន្លែងខ្ញុំមែនទែន មិនមានប្រជាជនទេ បាទ ហ្នឹងមួយ។ ទីពីរគឺមានតែកងទ័ពហើយនឹងគ្រួសារកងទ័ព ដូច្នេះការបង្ខិតបង្ខំឲ្យធ្វើការងារអីៗ នៅកន្លែងខ្ញុំគ្មានទេ បាទ។ ស៖ ប៉ុន្តែ ដល់ពេលឯកសារនេះចេញមកយ៉ាងអញ្ចឹង តើគេមានភស្តុតាង មានស៊ើបសួរមកដល់កន្លែងនេះទេ ឬក៏គេបានពីណាពីណីមក? ឆ៖ ខ្ញុំមិនដឹងថា ខាងគេបានឯកសារហ្នឹងពីណាទេ ហើយការមកសាកសួរអីខ្ញុំ ក៏មិនដែលមានដែរ បាទ។ ស៖ នៅក្នុងនេះ សហព្រះរាជអាជ្ញាជាតិដូចជាអត់មានការយល់ព្រមដើម្បីចាប់ខ្លួនជនប្រាំនាក់បន្ថែមទៀតនោះទេ តើក្នុងនាមលោកជាអ្នកទទួលខុសត្រូវម្នាក់នៅក្នុងរបបនោះ ក្នុងកងពល ១៦៤ ហ្នឹង តើយល់ឃើញយ៉ាងម៉េចពីការណ៍ដែលចេញឯកសារនេះ ហើយសហព្រះរាជអាជ្ញាជាតិមិនចង់ធ្វើ តែព្រះរាជអាជ្ញាអន្តរជាតិគេចង់ធ្វើនោះ បាទ? ឆ៖ ខ្ញុំគិតថាព្រះរាជអាជ្ញាជាតិ ដែលគាត់មិនចង់ធ្វើនោះគឺត្រឹមត្រូវ ពីព្រោះបើធ្វើនោះវាហួសច្បាប់ ពីព្រោះច្បាប់កាត់ទោសខ្មែរក្រហមគេកម្រិតត្រឹមតែថាអ្នកដឹកនាំខ្ពស់បំផុតហើយនឹងអ្នកដែលទទួលខុសត្រូវខ្ពស់បំផុត។ ឥឡូវអ្នកដែលដឹកនាំខ្ពស់បំផុតនិងទទួលខុសត្រូវខ្ពស់បំផុតហ្នឹង វានៅឯហ្នុងហើយ។ បើយកអ្នកក្រៅពីហ្នឹងទៀត អាហ្នឹងវាហួសច្បាប់ហើយ ហើយបើហួសច្បាប់ ក្រែងវាមានបញ្ហា វាមិនស្រួលដល់សង្គម ដល់សន្តិសុខជាតិរបស់ខ្មែរយើង បាទ។ អាហ្នឹង ខ្ញុំគិតឃើញថា បើហួសអាហ្នឹងវាប៉ះពាល់ហើយ។ ស៖ ប៉ះពាល់សំដៅយ៉ាងម៉េចខ្លះ បាទ? ឆ៖ ទីមួយគឺខុសច្បាប់ បាទ។ ច្បាប់គេកម្រិតត្រឹមប៉ុណ្ណេះ យើងធ្វើហួសច្បាប់ បាទ។ ហើយទីពីរ បើធ្វើហួសពីហ្នឹងទៀត វាប៉ះពាល់កម្លាំងដែលកំពុងតែការពារព្រំដែន កម្លាំងដែលកំពុងតែរក្សាសន្តិសុខជាតិ បាទ។ ឧបមាថាឥឡូវប្រលេះមួយទៀត ប្រលេះពីរទៀត ប្រលេះប្រាំទៀត ប្រលេះប្រាំហ្នឹងវាអត់បញ្ហាអីទេ ប៉ុន្តែអាអ្នកនៅប៉ុន្មានទៀតនោះ វានឹកថាមុខតែដល់អញទៀត បាទ អាហ្នឹងហើយដែលវាគ្រោះថ្នាក់ អាហ្នឹងដែលហៅថាប៉ះពាល់ គឺអញ្ចឹង។ ទោះតិចទោះច្រើនវាមាន មិនអត់ទេ បាទ។ ស៖ នៅក្នុងសម័យហ្នឹង ឃើញមានការចោទប្រកាន់ដែរនៅក្នុងឯកសារនេះមិនដឹងថារឿងនោះពិតប៉ុណ្ណា ដែលថាមានជនជាតិវៀតណាមអីត្រូវសម្លាប់នៅក្នុងពេលដែលលោកគ្រប់គ្រងកងពលហ្នឹង ហើយចាប់ជនជាតិថៃអី តើរឿងហ្នឹងយ៉ាងម៉េចដែរ បាទ? ឆ៖ តាមពិត នែ៎ ខាងខ្ញុំមិនដែលដឹង មិនដែលឮរឿងហ្នឹងទេ បាទ ហើយនៅកន្លែងខ្ញុំ គ្មានយួនគ្មានសៀមអីទេ បាទ។ ស៖ បើ នៅក្នុងករណីនេះសហព្រះរាជអាជ្ញាជាតិមិនបានយល់ព្រមទៅនឹងការចាប់ខ្លួនជនទាំងប្រាំនាក់បន្ថែមទៀតនោះទេ តែបើសិនជាថ្ងៃក្រោយបើរឿងករណីហ្នឹងកើតឡើងជាយថាហេតុណាមួយ គេមកនាំខ្លួនលោកទៅកាន់តុលាការ អញ្ចឹង តើសុខចិត្តទៅ ឬក៏តវ៉ាតាមផ្លូវច្បាប់យ៉ាងម៉េចខ្លះបាទ? ឆ៖ នែ៎ បើរដ្ឋាភិបាលគេសម្រេចហើយ អាហ្នឹងខ្ញុំត្រូវធ្វើតាមហ្នឹងហើយ បាទ ក៏ប៉ុន្តែក៏ត្រូវវែកញែកឲ្យវាច្បាស់លាស់ដែរ បាទ តើច្បាប់វាកម្រិតត្រឹមប៉ុណ្ណឹង ហើយធ្វើហួសពីហ្នឹងទៀតតើច្បាប់ហ្នឹងវាយ៉ាងម៉េច? បាទ អាហ្នឹងមួយ ប៉ុន្តែទីពីរ បើធ្វើទៅ វាប៉ះពាល់ដល់កិច្ចការងារសន្តិសុខរបស់ជាតិយ៉ាងម៉េច បាទ? វាប៉ះបាល់ដល់អ្នកដែលនៅបន្តទៅទៀត ពីព្រោះខ្មែរក្រហមវាមិនមែនតែពីរបីនាក់នោះឯណា វាច្រើនដែរបាទ នៅក្នុងនៅក្រៅ នៅជិតនៅឆ្ងាយអី វាមានទាំងអស់តែគ្នាមែនទែន ខ្មែរពេលហ្នឹង បាទ។ ស៖ ការបែកធ្លាយឯកសារ យ៉ាងអញ្ចឹង តើលោកគិតថាភ័យបារម្ភអំពីរឿងអ្វីខ្លះទៅ បាទ? ឆ៖ ទេ ខ្ញុំដូចជា ការថាភ័យ ថាព្រួយ ថាបារម្ភអី ខ្ញុំដូចគ្មានអីទេ បាទ ពីព្រោះខ្ញុំគិតអញ្ចេះ បាទ មួយ មនុស្សយើងម្នាក់ៗគ្មានអ្នកណាអាយុ ៨០ ពីរដងទេ បាទ ហើយបើឯកសារហ្នឹងវាធ្លាយវាអីៗអញ្ចឹង អាហ្នឹងវាជារឿងរបស់តុលាការទេ បាទ តុលាការធ្វើការងារវាមិនហ្មត់ចត់ វាមិនប្រាកដប្រជា វាធ្វើឲ្យបែកធ្លាយ។ អានេះបើនិយាយ បើខ្ញុំគិតទេណា ខ្ញុំគិតថា នែ៎ វាដូចជាអុចឲ្យរត់ អុចធ្វើឲ្យមនុស្សដែលមានខ្លួនហ្នឹង វារត់ចូលព្រៃហើយ ព្រោះមនុស្សគ្មានអ្នកណាសុខចិត្តងាប់ទេ។ តែខ្ញុំ ខ្ញុំអត់មានទៅភ័យអត់មានទៅព្រួយអីទេ។ ស៖ ការចូលរួមតស៊ូសម័យនោះ តើមានល័ក្ខខ័ណ្ឌយ៉ាងម៉េច ហើយប្តេជ្ញាចិត្តយ៉ាងម៉េចដែលបានចូលរួមនៅក្នុងចលនាខ្មែរក្រហម ហើយនៅឆ្នាំណាដល់ឆ្នាំណា យ៉ាងម៉េចទៅបាទប្រវត្តិតស៊ូនោះ? ឆ៖ នែ៎ មែនទែនវាវែងបន្តិច ប៉ុន្តែឥឡូវ មិនបាច់និយាយវែងទេ ខ្ញុំនិយាយខ្លីទេ។ រឿងដែលធំគឺ ឧបមាថាតុលាការហ្នឹងក៏ដោយ យើងត្រូវដឹងឲ្យច្បាស់ថា ដើមចោទនៃបញ្ហាវាចេញមកពីប្រភពណា? គឺដោយសារមានរដ្ឋប្រហារ ១៨ មិនា ១៩៧០ ហើយតាមសេចក្តីអំពាវនាវរបស់សម្តេចឪ នាំឲ្យមហាជនខ្មែរយើងគ្រប់ទិសទី គ្រប់កន្លែងទាំងអស់រត់ប្រមូលផ្តុំគ្នាងើបឡើងតស៊ូ។ អញ្ចឹងនែ៎ ដើមចម មេធំរបស់ខ្មែរក្រហម ទីមួយគឺអាមេរិក ហើយទីពីរគឺសម្តេចឪ បាទ។ ឯតុលាការយកប៉ុន្មាននាក់ទៅកាត់ក្តីសូន្យពីរហ្នឹង ខ្ញុំថាមិនទាន់ចំមេមែនទែននៅឡើយទេ បាទ។ ពីព្រោះរឿងវាអញ្ចឹង បើសិនណាជាគ្មានអាមេរិក បញ្ឆេះឲ្យ លន់ នល់ ធ្វើរដ្ឋប្រហារ ក៏អត់កើតខ្មែរក្រហម ហើយបើកុំមានការអំពាវនាវរបស់សម្តេចឪឲ្យកូនចៅរត់ចូលព្រៃម៉ាគីតស៊ូ ក៏អត់មានខ្មែរក្រហម បាទ។ រឿងវាសរុបមក វានៅត្រង់ហ្នឹង បាទ។ អញ្ចឹងបានថា នែ៎ បើតែលេងតែពាក់កណ្តាលផ្លូវ វាហ្នឹងវាដូចជា ខ្ញុំថាដូចជាវាអត់សូវជាស្រួលបួល បាទ។ ខ្ញុំនិយាយខ្លីតែប៉ុណ្ណឹងចុះ បាទ។ ស៖ នៅក្នុងសម័យនោះ ដូចជាមានការឈ្លោះប្រកែកគ្នា បើតាមលោក នួន ជា គាត់បានបញ្ជាក់ថា នៅក្នុងកុនឯកសាររបស់លោក ថេត សម្បត្តិ នោះបានបញ្ជាក់ថា ដូចជាគាត់កំទេចក្រុមអ្នកដែលសត្រូវរបស់ប្រជាជននៅពេលកសាងមនុស្សនោះមិនបាន គាត់ចាប់យកមកដើម្បីកសាងសិន។ តើពាក្យសំដីអស់នោះមើលទៅមានលក្ខណៈឬក៏ទ្រង់ទ្រាយមិនដឹងជាខុសប្លែកពីសម័យមុនហ្នឹងឬក៏លោកចាត់ទុកថាយ៉ាងម៉េចដែរ បាទ? ឆ៖ ខ្ញុំ នែ៎ ខ្ញុំធ្លាប់មើលរឿង សាមកុក បាទ។ ស៊ុន អ៊ួ គាត់ថា សុខចិត្តគាត់ក្បត់គេ ធ្វើម៉េចកុំឲ្យតែគេក្បត់គាត់។ អ្នកឯងប្រឆាំងនិងខ្ញុំ ដាច់ខាតខ្ញុំត្រូវតែមិនទុក បាទ។ ហើយខ្ញុំឃើញថាបញ្ហាហ្នឹង ប្រហែលជាតាមដំណើរហ្នឹង បាទ។ ហើយសូម្បីតែនៅក្នុងប្រទេសណាក៏អញ្ចឹងដែរ ឥឡូវក៏អញ្ចឹងដែរ បាទ។ ឥឡូវយើងមើលនៅអាហ្វ្រិក អារ៉ាប់ បាទ ប្រទេសមួយចំនួនមានបាតុកម្មមានអីៗ នៅ ស៊ីរី ប៉ុន្មានថ្ងៃនេះបាញ់ងាប់មិនមែនតិចទេ។ អាហ្នឹងប្រឆាំងហើយ គេម៉េចនឹងទុកអ្នកឯងឲ្យនៅប្រឆាំងនឹងគេតទៅទៀត។ ស៖ នៅក្នុងសម័យនោះ មានការថាការកាប់សម្លាប់ហ្នឹង ចេញពីការមិនទុកចិត្តគ្នា ឈ្លោះគ្នាអ្នកថ្មីទៅចូលទៅ មានអ្នកចាស់មិនសប្បាយចិត្តទៅ មានការមិនទុកចិត្តគ្នា តើលោកបានឃើញព្រឹត្តិការណ៍នោះយ៉ាងម៉េចខ្លះដែរ តើរឿងហ្នឹងវាកើតឡើងដោយសារអញ្ចឹងមែន ឬមានការបញ្ជាពីក្បាលម៉ាស៊ីនទៅថាត្រូវតែកម្ចេចអ្នកនេះអ្នកនោះ ឲ្យអ្នកនេះកម្ចេចអ្នកនោះ អ្នកនោះកម្ចេចអ្នកនេះអញ្ចឹងឬក៏យ៉ាងម៉េចដែរ បាទ? ឆ៖ ខ្ញុំឃើញបញ្ហាហ្នឹងវាអាចមាន ក្នុងស្ថានភាពដែលការគ្រប់គ្រងវានៅថ្មី អញ្ចឹងការគ្រប់គ្រងវាអត់ជុំទេ។ ហើយទីពីរ គឺថាអ្នកដែលគេមានគំនិតប្រឆាំងជាមួយនឹងការគ្រប់គ្រងឡើងកាន់អំណាចរបស់ខ្មែរក្រហមហ្នឹងក៏មិនមែនតិចទេ ពីខាងអាមេរិកក៏មាន ពីប្រទេសជិតខាងដូចជាយួនក៏មាន។ អញ្ចឹង ភ្នាក់ងាររបស់គេវានៅក្នុងហ្នឹង បាទ។ គេធ្វើសកម្មភាពអុច ដើម្បីធ្វើយ៉ាងម៉េចគឺថាឲ្យរដ្ឋអំណាចហ្នឹងវារលុងរលាយ តាមគោលការណ៍មួយដែលគេនិយាយថា នែ៎ «ដុតឲ្យខ្លោច រោចឲ្យឆៅ»។ តាមខ្ញុំមើលគឺអាចបញ្ហាហ្នឹងគឺអញ្ចឹង បាទ។ ស៖ ប៉ុន្តែ កាលដែលនៅក្នុងកងពលអីហ្នឹង មានការដាក់បញ្ជាថានឹងយកអ្នកនេះទៅឲ្យ ឌុច ដើម្បីកម្ចេចចោល ឬក៏សម្លាប់អី ឬក៏យ៉ាងម៉េច បាទ? ឆ៖ ខាងខ្ញុំ ដូចមិនមានបទបញ្ចាឲ្យនាំទៅអញ្ចឹងទេ។ ខ្ញុំឃើញមានតែម្តងដែលហៅទៅរៀនសូត្រហើយ បីនាក់គេប្រាប់មកវិញថាគេទុកនៅឯនោះហើយមិនឲ្យត្រឡប់មកអង្គភាពវិញទេ។ ស៖ គាត់ខុសអីដែរ អ្នកបីនាក់នោះ? ឆ៖ នែ៎ ខ្ញុំពិនិត្យទៅវាដូចជាមិនឃើញមានអីទេ។ ពីព្រោះ ជួនណាយើងក្តាប់ប្រវត្តិគេពីដើមមកវាវែង មកវាអត់បាន ហើយខាងនោះគេក្តាប់បានយ៉ាងម៉េចអាហ្នឹងក៏យើងមិនដឹងដែរ។ ស៖ កាលពីឆ្នាំ ១៩៩៦ រដ្ឋាភិបាលបានសន្យាថាមិនយកទោសពៃរ៍ជនទាំងឡាយដែលចេញពីចលនាតស៊ូខ្មែរក្រហម ហើយសុខចិត្តឲ្យមករួមរស់ជាមួយសង្គមវិញ ប៉ុន្តែដល់ក្រោយមកមេដឹកនាំប្រាំនាក់ត្រូវយកទៅជំនុំជម្រះទោស ហើយអ្នកដទៃទៀតត្រូវ(តុលាការជាតិ) តុលាការខ្មែរក្រហមដែលមានអន្តរជាតិចូលរួម ចង់យកប្រាំនាក់ឲ្យបានដប់នាក់ទៅទៀត។ តើរឿងហ្នឹង ក្នុងពេលដែលកើតឡើងអញ្ចឹង នៅក្នុងអារម្មណ៍បងប្អូនដែលផ្តាច់ខ្លួនកាលសម័យនោះ ពិបាកចិត្តទេ ហើយចាត់ទុកថារដ្ឋាភិបាលមានជំហរពិបាកទេ ឬក៏ក្បត់ពាក្យសន្យាអីអញ្ចឹង តាមដែលលោកសង្កេតឃើញនោះ បាទ? ឆ៖ នែក ចំពោះបញ្ហានេះ ខ្ញុំគិតថាទុកឲ្យរដ្ឋាភិបាលពិចារណាចុះ បាទ ព្រោះជាពាក្យសំដីរបស់រដ្ឋាភិបាល បាទ។ ស៖ នៅក្នុងពេលឥឡូវនេះមានកងទ័ពសៀមបាន ដូចថាមានការវាយប្រយុទ្ធគ្នានៅតំបន់តាមព្រំដែន អញ្ចឹងនៅតំបន់នេះមានកងទ័ពផ្តាច់ខ្លួនសម័យមុននោះទៅចូលរួមនៅក្នុងការការពារទឹកដីនោះទេ ហើយតើអារម្មណ៍របស់គេយ៉ាងម៉េចអំពីការកាត់ទោសអីហ្នឹង តាមលោកស្ទាបស្ទង់មើលទៅនោះ បាទ? ឆ៖ នែ៎ ទីមួយ កម្លាំងអតីតខ្មែរក្រហមមួយភាគធំក៏បានរួមចំណែក ឈរជើងការពារនៅតាមព្រំដែន ហើយកន្លែងខ្លះក៏បានចូលប្រយុទ្ធនៅក្នុងសមរភូមិខ្លាំងក្លាមែនទែន បាទ។ ឯទីពីរ ពីរឿងដែលថាមានកាត់ទោសមេនេះមេនោះបន្តបន្ទាប់អី ហើយវាចេះតែឮពាក្យចចាមអារ៉ាមអីតទៅទៀត មែនទែនក្នុងអារម្មណ៍មិនមែនអត់ទេ បាទ ហើយចេះតែគិតចេះតែពិចារណាទៅ បើអញ្ចឹងខ្លូនឯងដែលខំប្រយុទ្ធ ថ្ងៃក្រោយទៅឮគេមកចោទថា នែ៎ ឧក្រិដ្ឋកម្មសង្គ្រាម ឧក្រិដ្ឋកម្មស្អីៗទៀត តើគិតយ៉ាងម៉េច? បាទ អាហ្នឹងមានគិត មិនអត់ទេ បាទ ហើយក៏មានការព្រួយបារម្ភដែរ។ ស៖ ជានយោបាយ លោកគិតយ៉ាងម៉េចដែរ នៅពេលឃើញមេរបស់ខ្លួនត្រូវគេជំនុំជម្រះទោស លោក អៀង សារី លោក ខៀវ សំផន លោក នួន ជា។ ហើយជាមនោសញ្ចេតនាវិញ យ៉ាងម៉េចដែរ បាទ នៅក្នុងពេលដែលតុលាការកាត់ទោសអ្នកទាំងប្រាំនោះ បាទ? ឆ៖ នែ៎ អាហ្នុងមែនទែនវាដូចជា ហៅថាឪពុកហើយនឹងកូន កូនហើយនឹងឪពុក អាហ្នឹងវាជារឿងធម្មតាទេ សូម្បីតែសត្វតិរច្ឆានក៏វាមានអារម្មណ៍ដែរ បាទ។ យើងឃើញកូនមាន់ហើយនិងមេមាន់ ពេលដែលគេចាប់កូន អាមេនោះវាខំរត់តាម បាទ ហើយដល់ពេលអាគេចាប់មេនោះ អាកូនហ្នឹងវាខំស្រែក។ អាហ្នឹងវាអត់ខុសគ្នាទេ មនុស្សហើយនឹងសត្វតិរច្ឆាន បាទ។ ស៖ បាទ សុំអរគុណច្រើន លោក មាស មុត ដែលបានផ្តល់កិច្ចសម្ភាសន៍ជាមួយវីអូអេសំឡេងសហរដ្ឋអាមេរិក សុំជម្រាបលា បាទ។ ឆ៖ បាទ អរគុណ បាទ៕ This posting includes an audio/video/photo media file: Download Now |
| បន្ទោសការផ្លាស់ប្តូរបរិស្ថានថាបានបង្កឲ្យមានទឹកជំនន់ Posted: 06 Oct 2011 01:47 PM PDT ទឹកជំនន់នៅកម្ពុជាជាលទ្ធផលនៃការប្រែប្រួលអាកាសធាតុក្នុងតំបន់អាស៊ីដែលរហូតដល់ពេលនេះ បានសម្លាប់មនុស្សយ៉ាងតិចចំនួន១៧៦នាក់នៅកម្ពុជា។ នេះបើតាមសម្តីរបស់លោក ម៉ុក ម៉ារ៉េត ទេសរដ្ឋមន្ដ្រី និងជារដ្ឋមន្ដ្រីក្រសួងបរិដ្ឋាន ដែលបានថ្លែងក្នុងសន្និសីទព័ត៌មានមួយបន្ទាប់ពីសន្និបាតរយៈពេលបីថ្ងៃក្នុងទីក្រុងភ្នំពេញស្ដីពីការប្រែប្រួលអាកាសធាតុកាលពីល្ងាចថ្ងៃពុធ។ លោកម៉ុក ម៉ារ៉េត បានបញ្ជាក់ថា ការប្រែប្រួលអាកាសធាតុបានធ្វើឲ្យរបបទឹកសមុទ្រ និងទឹកភ្លៀង មានការផ្លាស់ប្តូរ។ «ទឹកជំនន់នេះពិតជាចេញមកពីការប្រែប្រួលអាកាសធាតុមួយភាគធំពីព្រោះយើងឃើញកំណើនព្យុះ កំណើនកំដៅទឹកសមុទ្រ ឬមួយទឹកសមុទ្រត្រជាក់។ ដូច្នេះវាធ្វើឲ្យមានកំណើនព្យុះច្រើនហើយ កាចជាងមុន។ យើងឃើញថា នេះគឺជាឥទ្ធិពលនៃការប្រែប្រួលអាកាសធាតុ»។ កម្ពុជាទទួលរងជំនន់ទឹកភ្លៀង និងជំនន់ទឹកទន្លេមេគង្គជាបន្ដបន្ទាប់គ្នាចាប់តាំងពីខែសីហា ហើយបន្ដរហូតមកដល់ខែតុលានេះ។ របាយការណ៍ចុងក្រោយកាលពីថ្ងៃអង្គារ ទី៤ ខែតុលារបស់គណៈកម្មាធិការជាតិគ្រប់គ្រងគ្រោះមហន្ដរាយបានបង្ហាញថា ចំនួនប្រជាពលរដ្ឋកម្ពុជាស្លាប់កើនដល់១៧៦នាក់នៅក្នុងខេត្តចំនួន១២ ក្នុងចំណោមខេត្តចំនួន១៧ ដែលគ្របដណ្ដប់ដោយទឹកជំនន់។ ខេត្តកំពង់ចាមមានជនរងគ្រោះស្លាប់ច្រើនជាងគេ គឺ៤២នាក់។ បន្ទាប់មកគឺខេត្តព្រៃវែងចំនួន៣៩ នាក់ និងខេត្តកំពង់ធំចំនួន២៧ នាក់។ ប្រជាពលរដ្ឋដែលកំពុងទទួលរងផលប៉ះពាល់ជាង២១៥.០០០ គ្រួសារ ក្នុងនោះ ២០.៩១៤ គ្រួសារត្រូវជម្លៀសចេញពីផ្ទះសម្បែង។ ដោយឡែកសន្ទូងចំនួនជាង២៩០.០០០ ហិកតាបានលិចលង់ក្នុងនោះរបាយការណ៍របស់គណកម្មាធិការជាតិគ្រប់គ្រោះមហន្ដរាយបញ្ជាក់ថា សន្ទូងចំនួនជាង ៨៦.០០០ ហិកតាបានខូចខាតទាំងស្រុង។ សាលារៀន មន្ទីរពេទ្យ និងវត្តអារាមសរុបចំនួន ១.០៩៦ បានលិចលង់។ ភ្លៀងនៅបន្ដធ្លាក់នៅកម្ពុជា ហើយមន្ដ្រីផ្លូវការបញ្ជាក់ថា ទឹកនៅតាមដងទន្លេមេគង្គនិងទន្លេបាសាក់បានឡើងបន្ដិចបន្តួចថែមទៀត។ លោក ប្រាយអិន ឡន់ (Brian Lund) នាយកអង្គការអកស្វាមអាមេរិកប្រចាំតំបន់អាស៊ីបូព៌ា បានទាញហេតុផលថា តួលេខនៃការបំផ្លាញដំណាំស្រូវជាង៨ម៉ឺនហិចតានេះស្មើនឹងការបាត់បង់ប្រមាណជា៦០លានដុល្លារនៃដំណាំស្រូវកម្ពុជា។ «ផលប៉ះពាល់គឺនៅទីនេះរួចជាស្រេចទៅហើយ។ នៅក្នុងប្រទេសមួយដូចជាប្រទេសកម្ពុជាបើទោះជាលក្ខខណ្ឌនៃបញ្ហាបម្រែបម្រួលអាកាសធាតុស្ថិតក្នុងភាពច្របូកច្របល់នៅឡើយ ប៉ុន្ដែយើងមានអ្វីៗត្រូវធ្វើច្រើនទៀតសម្រាប់ពង្រីកការយល់ដឹងពីបញ្ហានេះ»។ ជាទូទៅមូលហេតុនៃការប្រែប្រួលអាកាសធាតុក្នុងពិភពលោកត្រូវគេបកស្រាយថា បណ្ដាលមកពី មូលហេតុនៃឧស្ម័នផ្ទះកញ្ចក់។ ក៏ប៉ុន្ដែនៅកម្ពុជា ការកាប់បំផ្លាញព្រៃឈើខុសច្បាប់យ៉ាងរីករាលដាលត្រូវបានមើលឃើញថា ជាផ្នែកមួយដែលនាំឲ្យមានការផ្លាស់ប្ដូរអាកាសធាតុផងដែរ។ លោក ម៉ុក ម៉ារ៉េត មានប្រសាសន៍ដោយមិនបានសំអាងលើហេតុផលនេះទេ ក៏ប៉ុន្ដែលោកឆ្លើយថាព្រៃឈើគឺជាប្រភពជួយការពារដល់ការប្រែប្រួលអាកាសធាតុ។ «ព្រៃឈើជារួមគឺស្រាវជ្រាវទៅឃើញថា មានសារៈសំខាន់ណាស់ក្នុងការស្រូបយកឧស្ម័នផ្ទះកញ្ចក់។ហេតុដូច្នេះព្រៃឈើមានប្រយោជន៍ក្នុងការចូលរួមកាត់បន្ថយការប្រែប្រួលអាកាសធាតុ»។ លោក រ៉ាហ្វាអែល ម៉ូរ៉ូណូ ភារធារីអមគណៈកម្មាការអឺរ៉ុបមានប្រសាសន៍ថា ត្រូវតែមានការចាត់វិធានការណ៍រួមគ្នាទប់ទល់នឹងបម្រែបម្រួលអាកាសធាតុ ហើយវិធាការណ៍នោះត្រូវតែចាប់ផ្ដើមក្នុងពេលឥឡូវនេះ។ លោក ម៉ុក ម៉ារ៉េត អំពាវនាវឲ្យប្រទេសឧស្សាហកម្មជឿនលឿនប្រឹងប្រែងកាត់បន្ថយការបំពុលបរិយាកាសដើម្បីកាត់បន្ថយការកើនឡើងនៃកំដៅពិភពលោក និងបង្កើនជំនួយមូលធន និងបច្ចេកទេសដល់កម្ពុជាបន្ថែមទៀត៕ This posting includes an audio/video/photo media file: Download Now |
| Posted: 05 Oct 2011 07:49 PM PDT ព័ត៌មានចុងក្រោយបំផុត៖ សហរដ្ឋអាមេរិក៖ លោក ស្ទីវ ចបស៍ (Steve Jobs) អ្នកដឹកនាំប្រកបទៅដោយរបៀបថ្មីៗសម្រាប់ក្រុមហ៊ុនអេបផល (Apple) ដោយបានបង្កើតគ្រឿងអេឡិចត្រូនិកតូចៗ ដែលបានប្តូរតូរ្យតន្ត្រី ទូរសព្ទចល័ត និងឧស្សាហកម្មកុំព្យូទ័រក្នុងសាកលលោក បានទទួលមរណភាពកាលពីថ្ងៃពុធ ក្នុងជន្មាយុ ៥៦ ឆ្នាំ។ សហរដ្ឋអាមេរិក៖ គូប្រជែងពាណិជ្ជកម្ម មេដឹកនាំនយោបាយ និងអ្នកនិយមគាំទ្រ បានសម្តែងការគោរពដល់សហស្ថាបនិកក្រុមហ៊ុនអេបផល (Apple) លោក ស្ទីវ ចបស៍ (Steve Jobs) ដែលបានទទួលមរណភាពកាលពីថ្ងៃពុធបន្ទាប់ពីលោកបានតទល់យ៉ាងយូរជាមួយជំងឺមហារីកលំពែង។ លីប៊ី៖ លោក Gerard Longuet រដ្ឋមន្រ្តីការពារប្រទេសបារាំង បានថ្លែងថា អង្គការអូតង់ នឹងបន្តយុទ្ធនាការរបស់ខ្លួននៅក្នុងប្រទេសលីប៊ី ដរាបណានៅមានក្រុមប្រឆាំងដោយកន្លែងតទៅទៀត ហើយរហូតទាល់តែរដ្ឋាភិបាលបណ្តោះអាសន្នសុំឲ្យគេបញ្ឈប់ការវាយប្រហារតាមផ្លូវអាកាស។ ស៊ីរី៖ លោកស្រីរដ្ឋមន្រ្តីការបរទេសសហរដ្ឋអាមេរិក Hillary Clinton បានថ្លែងថា ក្រុមប្រឹក្សាអង្គការសហប្រជាជាតិបានបរាជ័យនៅក្នុងការទទួលខុសត្រូវរបស់ខ្លួន ដែលមិនបានអនុម័តសេចក្តីសម្រេចមួយ ដើម្បីផ្តន្ទាទោសប្រទេសស៊ីរី ចំពោះការបង្រ្កាបដ៏ឃោឃៅទៅលើក្រុមបាតុករស៊ីវិល។ អាហ្វហ្គានីស្ថាន៖ ប្រជាពលរដ្ឋអាហ្វហ្គានីស្ថានយ៉ាងតិចប្រមាណ ២០០ នាក់បានធ្វើបាតុកម្មនៅក្នុងរដ្ឋធានីកាប៊ុល ដើម្បីទាមទារឲ្យកងកម្លាំងអន្តរជាតិដកថយជាបន្ទាន់ពីប្រទេសនេះ នៅមុនខួបឆ្នាំទី ១០ នៃការលុកលុយប្រទេសអាហ្វហ្គានីស្ថានដែលដឹកនាំដោយសហរដ្ឋអាមេរិក។ ជប៉ុន៖ បុរសដែលបានដឹកនាំជ័យជម្នះជាប្រវត្តិសាស្រ្តរបស់គណបក្សគ្រប់គ្រងអំណាចរបស់ប្រទេសជប៉ុនក្នុងឆ្នាំ ២០០៩ បានឡើងតុលាការនៅថ្ងៃព្រហស្បត៍នេះ ពីបទរំលោភច្បាប់រៃអង្គាសប្រាក់។ កូរ៉េខាងជើង៖ ក្រុមបុគ្គលិករបស់បណ្តាញទូរទស្សន៍ព័ត៌មានមួយរបស់បស្ចិមប្រទេស បានត្រឡប់មកពីទស្សនកិច្ចដ៏កម្រមានមួយទៅកាន់តំបន់កសិដ្ឋានដ៏សំខាន់នៅក្នុងប្រទេសកូរ៉េខាងជើង ដោយនាំយកមកជាមួយនូវរូបថតដ៏គួរឲ្យសង្វេគនៃក្មេងដែលគ្មានអាហារបរិភោគគ្រប់គ្រាន់។ រូបនេះជាភស្តុតាងចុងក្រោយបង្អស់នៃអ្វីដែលអង្គការសហប្រជាជាតិនិយាយថាជាវិបត្តិម្ហូបអាហារដ៏ធ្ងន់ធ្ងរបំផុតនៅក្នុងប្រទេសកូរ៉េខាងជើង។ <!--AV--> ព័ត៌មាននៅមុននេះ៖ <!--IMAGE-RIGHT--> ក្រិក៖ កម្មកររាប់ពាន់នាក់នៅប្រទេសក្រិកបានដើរចេញពីការងាររបស់ខ្លួននៅថ្ងៃពុធនេះ បណ្ដាលឲ្យបិទទ្វារដល់សេវាសាធារណៈ ដើម្បីតវ៉ាប្រឆាំងនយោបាយរឹតត្បិតរបស់រដ្ឋាភិបាលដែលតម្រង់ទៅរកការទទួលយកបាននូវជំនួយអន្ដរជាតិ ដើម្បីសងប្រាក់បំណុលជ្រាលជ្រៅរបស់ប្រទេសជាតិ។ ក្រិក៖ មន្ដ្រីនៃសហភាពអឺរុបចាត់វិធានការដើម្បីបន្ថែមថវិកាថ្មីមកឲ្យធនាគារមានបញ្ហា ដែលអាចនាំឲ្យរដ្ឋាភិបាលក្រិកខកខានមិនអាចសងប្រាក់បំណុលរបស់ខ្លួនបាន។ កូរ៉េខាងត្បូង៖ តំបន់ស្នើជាមូលដ្ឋានផែសមុទ្ររបស់ កូរ៉េខាងត្បូង នៅលើកោះរមណីយដ្ឋានទាក់ទាញទេសចរណ៍អាស៊ីអគ្នេយ៍ នឹងមិនទៅជាមូលដ្ឋានសំចតអចិន្ដ្រៃយ៍ នៃនាវាចម្បាំងរបស់សហរដ្ឋអាមេរិកទេ។ លីប៊ី៖ រដ្ឋមន្ដ្រីការពារប្រទេសសហរដ្ឋអាមេរិក លោក ឡេអន ប៉ាណេត្ដាបានព្រមានដល់ក្រុមមន្ដ្រីការពារប្រទេសរបស់អង្គការ អូតង់ ថា គេមិនពឹងពាក់តទៅទៀតមកលើអាមេរិកបានទេ ដើម្បីជួយជ្រោមជ្រែងដល់ការខ្វះខាតថវិកាធ្វើឲ្យមានការលំបាកដល់កិច្ចប្រតិបត្ដិការយោធានៅប្រទេសលីប៊ី និងអាហ្វហ្គានីស្ថាន។ អាហ្វហ្គានីស្ថាន៖ អាជ្ញាធរនៅក្នុងប្រទេសអាហ្វហ្គានីស្ថាននិយាយថាគេបានរាំងខ្ទប់ ផែនការឃាតកម្មមកលើរូបប្រធានាធិបតី ហាមីឌ កាសៃ។ ប៉ាគីស្ថាន៖ ប្រធានាធិបតី អាហ្វហ្គានីស្ថាន ហាមិដ កាសៃ ខិតខំសម្រាលសេចក្ដីព្រួយបារម្ភរបស់ប៉ាគីស្ថាន អំពីកិច្ចព្រមព្រៀងនៃកិច្ចសហការគ្នាជាមួយប្រទេសឥណ្ឌា ជាខ្មាំងប្រពៃណីរបស់ប៉ាគីស្ថាន។ ស៊ីរី៖ អគ្គលេខាធិការអង្គការសហប្រជាជាតិ លោក បានគីមូន ថ្លែងថាសហគមន៍អន្ដរជាតិមាន កាតប្បកិច្ចផ្លូវចិត្ដដើម្បីបញ្ចៀសមិនឲ្យមានការបង្ហូរឈាមនៅក្នុងប្រទេសស៊ីរី មួយថ្ងៃក្រោយពីមានសេចក្ដីព្រាងនៃការសម្រេចចិត្ដរបស់សហភាពអឺរុប ដែលមានគោលដៅនឹង កាត់បន្ថយអំពើឃោរឃៅតែបានបរាជ័យនៅក្នុងក្រុមប្រឹក្សាសន្ដិសុខ អង្គការសហប្រជាជាតិ។ បារ៉ែន៖ បានចេញបញ្ជាឲ្យមានការកាត់ក្ដីជាថ្មីឡើងវិញ មកលើបុគ្គលិកពេទ្យ ២០ នាក់ ដែលបានត្រូវ វិនិច្ឆ័យទោសឲ្យជាប់គុក យូរអង្វែងដោយសារតែមុខនាទី ក្នុងការបះបោរនយោបាយ នៅក្នុងកោះ បារ៉ែននោះ។ ប៉ាគីស្ថាន៖ គណកម្មការស៊ើបអង្កេតមកលើ ឃាតកម្ម អូសាម៉ា ប៊ីន ឡាឌិន និយាយថាខ្លួនបានសួរចម្លើយគ្រួសាររបស់មេដឹកនាំបណ្ដាញភេរវកម្មអាលកៃដា។ សហរដ្ឋអាមេរិក៖ រដ្ឋមន្ដ្រីក្រសួង ការពារសន្ដិសុខ មាតុភូមិ លោកស្រី Janet Napolitano បានការពារប្រព័ន្ធអន្ដោប្រវេសន្ដ របស់រដ្ឋបាល អូបាម៉ា ដែល ឲ្យលទ្ធភាពដល់ ការបញ្ជូនជនអន្ដោប្រវេសន្ដខុសច្បាប់អ្នកប្រព្រឹត្ដឧក្រិដ្ឋកម្ម ចេញពីសហរដ្ឋអាមេរិក។ This posting includes an audio/video/photo media file: Download Now |
| របាំត្រុដិមានជីវិតថ្មីលើទឹកដីក្រុងឡុងប៊ិច Posted: 06 Oct 2011 12:14 PM PDT លោកតាយ ប៊ុនសងមិនដែលឆ្លងកាត់វគ្គសិក្សា ឬមានជំនាញខាងសិល្បៈអ្វីទេ មុនពេលដែលលោកបង្កើតក្រុមរបាំត្រុដិមួយក្នុងទីក្រុងឡុងប៊ិច រដ្ឋកាលីហ្វ័រញ៉ា ក្នុងឆ្នាំ២០០៤។ លោកបានបង្កើតក្រុមរបាំនេះឡើងដោយសារតែទឹកចិត្តស្រឡាញ់សិល្បៈនិងមានគំនិតជួយអភិរក្សរបាំខ្មែរ។ លោកប៊ុនសងបញ្ជាក់ថា លោកបានធ្វើការស្រាវជ្រាវផ្សេងៗដោយខិតខំស្វែងរកសៀវភៅឯកសារនិងវីដេអូនានាទាក់ទងនឹងរបាំត្រុដិនេះដើម្បីស្វែងយល់ពីតួអង្គផ្សេងៗក្នុងក្រុម ត្រូវសម្តែងដូចម្តេច ដូចជាតួប្រើស គោព្រៃ និងព្រានព្រៃ ជាដើម។ «ខ្ញុំមានកំណើតកើតជានៅបាត់ដំបង ដូច្នោះការសម្តែងបានធ្វើឱ្យខ្ញុំចាំនៅក្នុងខួរក្បាលតាំងពីតូចៗមក ដោយខ្ញុំចេះតែរត់លេងតាមមើលគេសម្តែងហ្នឹងរហូតបានជាចេះចាំមក។ ហើយជាភ័ព្វសំណាងល្អខ្ញុំបានទិញឌីវីឌី បានខ្ញុំមើលផ្សែផ្សំ តាមឌីវីឌីផង ខ្ញុំស្រាវជ្រាវឯកសារទាំងនោះផង»។ ជារៀងរាល់ថ្ងៃសៅរ៍ លោកប៊ុនសង និងសមាជិកផ្សេងៗក្នុងសមាគមសិល្បៈនិងវប្បធម៌ខ្មែររបស់លោកធ្វើការបង្ហាត់បង្រៀនសិស្សរបាំក្មេងៗដែលជាអ្នកស្ម័គ្រចិត្តមកពីសាលារៀននានានៅក្នុងក្រុងឡុងប៊ិចនេះ។ សិស្សរបាំមកជុំគ្នាដំកងក្នុងសាលវប្បធម៌ Homeland Cultural Center នៅតាមបណ្តោយផ្លូវ អាណាហែម ទីដែលគេប្រសិទ្ធនាមហៅថា ក្រុងខ្មែរ ឬ Cambodia Town ដើម្បីហាត់សមដោយចាក់ភ្លេងរបាំត្រុដិ។ កញ្ញាប្រេនដឹន ម៉ន ដែលបានបញ្ចប់ការហាត់នៅកន្លែងនេះ ហើយដែលកំពុងស្ម័គ្រចិត្តជួយបង្ហាត់បង្ហាញក្មេងៗ បាននិយាយបន្តទៀតថា៖ «ខ្ញុំចង់ឱ្យកូនខ្មែរជំនាន់នេះជួយរក្សានិងថែរក្សាវប្បធម៌យើងផង។ កូនខ្មែរឥឡូវ ដូចជាមិនចង់រៀនខ្មែរ មិនចង់រៀនពីវប្បធម៌ មិនចង់រៀនពីប្រវត្តិសាស្រ្ត ព្រោះការណ៍ពិតទៅនៅឡុងប៊ិចនេះ បើយើងមិនអប់រំ ឬមិនខំរៀនពីវប្បធម៌និងប្រវត្តិសាស្រ្តអីទេ វានឹងរលាយបាត់។ ហើយខ្ញុំចង់ឱ្យក្មេងៗរៀនខាងហ្នឹងដែរ កុំឱ្យវារលាយសូន្យ។ បើវារលាយសូន្យ យើងមិនអាចយកវាមកវិញបានទេ»។ ការប្រឈមមុខដ៏ធំមួយដែលលោកប៊ុនសងជួបប្រទះនោះគឺការស្វែងរកអ្នកចូលហាត់ថ្មី ក្រោយពីសិស្សមួយចំនួនបានបញ្ចប់ការសិក្សា។ «ពីមួយឆ្នាំទៅមួយឆ្នាំ ព្រួយធំជាងគេគឺរឿងរើសមនុស្សមកលេង ព្រោះអីមួយឆ្នាំផុតទៅ គេកន្លងផុតទៅបាត់ ទៅរើសថ្មីមកទៀត។ មួយឆ្នាំទៀត រើសថ្មីមកទៀត។ ដូច្នោះហើយបញ្ហាហ្នឹងគឺជាបញ្ហាមួយដែលចោទក្នុងខួរក្បាលខ្ញុំ។ ក៏ប៉ុន្តែឆ្នាំនេះ ខ្ញុំមានជំនឿថា ឆ្នាំនេះក្មេងទាំងនេះអាចនឹងឈរនៅ កន្លែងរបាំនេះបានយ៉ាងអន់ណាស់ក៏ពីរបីឆ្នាំទៅមុខទៀត ទម្រាំគ្នាចេញពីវិទ្យាល័យនេះទៅ»។ លោកក៏បានសម្រេចជ្រើសរើសសិស្សដែលមិនមានដើមកំណើតខ្មែរឱ្យចូលហាត់រៀន និងជួយបង្រៀនអក្សរខ្មែរដល់សិស្សរបាំទាំងអស់ផងដែរ។ ក្រោយពីការហាត់សម Andrea William ជាអ្នកដើរតួប្រើស បានបញ្ជាក់ដោយទឹកមុខញញឹមថា គេពេញចិត្តនឹងតួប្រើសនេះ បើទោះបីជានៅក្នុងសាច់រឿង ប្រើសនេះមានវាសនាអភ័ព្វក្តី៖ «សត្វប្រើសចូលមកក្នុងភូមិ។ សត្វនោះនាំសំណាងអាក្រក់ ដូច្នេះហើយអ្នកភូមិទាំងនោះនាំគ្នាមកសម្លាប់សត្វប្រើសដើម្បីបណ្តេញសំណាងអាក្រក់និងនាំសំណាងល្អមកវិញ»។ យោងតាមឯកសារនានាបញ្ជាក់ថា របាំត្រុដិត្រូវគេសម្តែងដើម្បីផ្តាច់ឆ្នាំចាស់និងសុំសេរីសួស្តីក្នុងឆ្នាំថ្មី។ គេសម្តែងរបាំនេះភាគច្រើនក្នុងឱកាសចូលឆ្នាំខ្មែរ។ ប៉ុន្តែគេក៏ឃើញមានការសម្តែងរបាំត្រុដិនេះដើម្បីរៃអង្គាសបច្ច័យយកមកទ្រទ្រង់វត្តអារ៉ាម បណ្តេញឧបទ្រពចង្រៃ ឬក៏សុំទឹកភ្លៀងជាដើម។ ក្រុមរបាំនៃសមាគមសិល្បៈនិងវប្បធម៌ខ្មែរមិនសូមវមានឱកាសសម្តែងបានច្រើនទេក្នុងមួយឆ្នាំគឺអាចសម្តែងភាគច្រើននៅតាមវត្ត ដែលមានតែពីរប៉ុណ្ណោះនៅក្បែរទីក្រុងឡុងប៊ិច និងមានការដើរព្យុះហយាត្រាដែលរៀបចំប្រចាំឆ្នាំក្នុងក្រុងខ្មែរតែប៉ុណ្ណោះ។ ម្តងម្កាលក៏មានការសម្តែងនៅតាមកម្មវិធីវប្បធម៌ខ្មែរជាមួយនឹងក្រុមរបាំផ្សេងៗទៀត។ លោកឃឹម សារិទ្ធ រដ្ឋលេខាធិការក្រសួងវប្បធម៌នៃប្រទេសកម្ពុជា បានបញ្ជាក់ប្រាប់វីអូអេសំឡេងសហរដ្ឋអាមេរិក ក្នុងខណៈពេលដែលលោកធ្វើដំណើរមកសហរដ្ឋអាមេរិក កាលពីពេលថ្មីៗនេះដោយលើកសរសើរពលរដ្ឋខ្មែរអាមេរិកាំង ដែលនៅព្យាយាមរក្សាអត្តសញ្ញាណនិងវប្បធម៌របស់ជាតិហើយក្រសួងតែងតែនាំយកឯកសារស្រាវជ្រាវផ្សេងៗពីក្នុងប្រទេសមកចែកដល់សមាគមមួយចំនួនដែលនៅខ្វះខាតចំណេះដឹងពីវប្បធម៌។ លោកឃឹម សារិទ្ធបានបញ្ជាក់បន្ថែមថា៖ «អ្នកដែលធ្វើការងារវប្បធម៌អស់នេះសុទ្ធតែមានបេះដូងជាខ្មែរសុទ្ធសាធ ពីព្រោះ អ្នកធ្វើនេះមិនមានផលចំណេញបានលុយទេ។ ខ្ញុំដឹងពិតប្រាកដថា ទោះបីជាយ៉ាងម៉េចក៏អត់បានលុយដែរ។ គាត់គ្រាន់តែមានកេរ្តិ៍ឈ្មោះ គេទទួលស្គាល់គាត់ថា ជាខ្មែរម្នាក់មករស់នៅស្រុកគេហើយនៅតែមានបេះដូងជាខ្មែរ នៅតែមានឈាមជ័រជាខ្មែរ។ ឲ្យគាត់អត់បានផលចំណេញគឺអត់ទេ។ ដូច្នេះក្រសួងវប្បធម៌នឹងគាំទ្រជានិច្ច»។ លោកតាយ ប៊ុនសងនិងក្រុមរបស់លោកត្រូវចំណាយថវិកាផ្ទាល់ខ្លួនដើម្បីជួយឱ្យការបង្រៀនរបាំនេះដំណើរការទៅមុខជានិច្ច។ ប៉ុន្តែអ្វីដែលគេទទួលបានមកវិញគឺការថែរក្សាសិល្បៈរបស់ខ្មែរនៅលើទឹកដីអាមេរិកសម្រាប់ក្មេងៗស្រករក្រោយ៕ This posting includes an audio/video/photo media file: Download Now |
| និស្សិតកម្ពុជាធ្វើយុទ្ធនាការស្ម័គ្រចិត្តសម្អាតឆ្នេរ Posted: 06 Oct 2011 10:22 AM PDT យ៉ាងតិចមាននិស្សិតស្ម័គ្រចិត្តប្រមាណជាង១៥០នាក់បានធ្វើដំណើរពីទីក្រុងភ្នំពេញទៅកាន់ក្រុងព្រះសីហនុដើម្បីចូលរួមយុទ្ធនាការសម្អាតឆ្នេរសមុទ្រចំនួនបីថ្ងៃ។ លោក ជី សិលា អ្នកផ្តួចផ្តើមកម្មវិធីនេះបាននិយាយថា លោកចង់អប់រំអ្នកលក់ដូរ និងទេសចរក្នុងស្រុកឲ្យចេះថែរក្សាអនាម័យឆ្នេរសមុទ្រដើម្បីកុំឲ្យបង្កឲ្យខូចបរិស្ថាននៅតំបន់ឆ្នេរសមុទ្រ។ លោក ហេង រស្មី បានធ្វើបទសម្ភាសន៍ជាមួយលោក ជី សិលា ដែលមានខ្លឹមសារដូចតទៅ៖ <!--AV--> This posting includes an audio/video/photo media file: Download Now |
| ដំណើរការចុះឈ្មោះបោះឆ្នោតត្រូវបានមើលឃើញថាមានភាពមិនប្រក្រតី Posted: 06 Oct 2011 08:46 AM PDT នៅពេលដែលគណៈកម្មាធិការជាតិរៀបចំការបោះឆ្នោតគ្រោងនឹងបិទការចុះឈ្មោះបោះឆ្នោតក្រុមប្រឹក្សាឃុំសង្កាត់រយៈពេល៤៥ថ្ងៃនៅថ្ងៃ១៥ខែតុលាខាងមុខនេះ។ ក្រុមគណបក្សនយោបាយនិងអង្គការឃ្លាំមើលដំណើរការបោះឆ្នោតបង្ហាញថាមានភាពមិនប្រក្រតីជាច្រើនទាក់ទងនឹងដំណើរការពិនិត្យបញ្ជី និងចុះឈ្មោះបោះឆ្នោតនោះ។ ភាពមិនប្រក្រតីត្រូវបានមន្ត្រីទាំងនោះរាប់បញ្ចូលទាំងឈ្មោះស្ទួនជាច្រើនមិនទាន់ត្រូវបានដោះស្រាយ បញ្ជីបោះឆ្នោតមិនមានតម្លាភាពនិងគុណភាពដោយសារឈ្មោះខ្មោចមិនទាន់ត្រូវបានលុបចេញពីបញ្ជី ឈ្មោះជនអន្តោប្រវេសន៍ខុសច្បាប់ បញ្ហាទឹកជំនន់ និងឥទ្ធិពលនយោបាយលើការចេញឯកសារដល់អ្នកបោះឆ្នោត ការខ្វះខាតសេរីភាពអប់រំអ្នកបោះឆ្នោតជាដើម។ លោក គួយ ប៊ុនរឿន អ្នកតំណាងរាស្ត្រនិងជាអគ្គលេខាធិការរងគណបក្សទទួលបន្ទុកកិច្ចការបោះឆ្នោតខាងគណបក្សសម រង្ស៊ី បាននិយាយថា អ្នកគាំទ្រគណបក្សកាន់អំណាចមានសិទ្ធិប្រើប្រាស់ឯកសារទាំងនោះដើម្បីកេងចំណេញលើបក្សដទៃ និងនាំឲ្យលទ្ធផលនៃការបោះឆ្នោតគ្មានភាពត្រឹមត្រូវ និងយុត្តិធម៌ប្រសិនបើគជប ប្រើបញ្ជីបោះឆ្នោតគ្មានតម្លាភាពគួបផ្សំនឹងការមិនយល់ដឹងរបស់អ្នកបោះឆ្នោត។ «ឥឡូវយើងឃើញថា មានបញ្ហាលំបាកមែនទែនដោយសារបញ្ហាយើងចង់អប់រំអ្នកបោះឆ្នោតគឺត្រូវបានគេរារាំងដោយសារគេថា រដូវនេះមិនមែនជារដូវឃោសនា។ យើងវាមិនមានការពន្យល់ឲ្យបានច្បាស់រវាងការឃោសនា និងការផ្លល់ព័ត៌មានដល់អ្នកបោះឆ្នោត»។ ពលរដ្ឋអ្នកបោះឆ្នោតមានរយ:ពេលតែ១០ថ្ងៃទៀតប៉ុណ្ណោះ ដើម្បីពិនិត្យបញ្ជី និងចុះ ឈ្មោះមុនការបោះឆ្នោតជាច្រើននៅកម្ពុជានាពេលខាងមុខ។ ការបោះឆ្នោតជ្រើសរើសក្រុមប្រឹក្សាឃុំសង្កាត់ត្រូវបានកំណត់ធ្វើនៅថ្ងៃទី៣ ខែមិថុនា ឆ្នាំ២០១២ ការបោះឆ្នោតព្រឹទ្ធសភានៅថ្ងៃ២៩ ខែកញ្ញា ឆ្នាំ២០១២ និងការបោះ ឆ្នោតជាសកលជ្រើសរើសតំណាងរាស្រ្ត ឬនាយករដ្ឋមន្ត្រីនៅថ្ងៃទី២៨ ខែកក្កដា ឆ្នាំ២០១៣។ លោក កឹម សុខា ប្រធានគណបក្សសិទ្ធិមនុស្សបាននិយាយថា ទម្រង់បោះឆ្នោតថ្មីដែលមានបិទរូបថតពីរសន្លឹកបានបង្កបញ្ហាជាមួយអ្នកបោះឆ្នោតថ្មី។ លោកមានប្រសាសន៏ថា សម្រាប់អ្នកគាំទ្រគណបក្សកាន់អំណាចជាការងាយស្រួល ក៏ប៉ុន្តែសម្រាប់សមាជិកគណបក្សផ្សេងអាជ្ញាធរមិនធ្វើប័ណ្ណឲ្យទេ។ «រឿងមួយដែលយើងចាប់ភស្តុតាងបានត្រង់ថា សមាជិករបស់គណបក្សកាន់អំណាចដែលអាយុក្រោម១៨ទេ គាត់ធ្វើទម្រង់អាចយកទៅចុះបានហើយធ្វើទាំងបាច់ៗរៀបចំឲ្យអាជ្ញាធរគ្នាគាត់ទៅធានាតែម្តង»។ លោក សុខ ពិទូរ្យ អ្នកសម្របសម្រួលផ្នែកអង្កេតរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជាដែលហៅកាត់ថាខូមហ្វ្រ៊ែល (Comfrel) បានបញ្ជាក់ថា ខ្លួនបានរកឃើញថា ការចុះឈ្មោះបោះឆ្នោតរបស់មន្ត្រីអ្នកបោះឆ្នោតបានធ្វើឡើងនៅក្នុងម៉ោងធ្វើការ បើកការិយាល័យមិនទៀងទាត់ និងការចុះឈ្មោះបោះឆ្នោតដោយមិនមានវត្តមានអ្នកបោះឆ្នោតមកបង្ហាញខ្លួនក្នុងឃុំចំនួនជាង៧០ «ប្រជាពលរដ្ឋមួយចំនួនដែលគាត់អត់មានអត្តសញ្ញាណសម្រាប់បញ្ជាក់ការចុះឈ្មោះបោះឆ្នោតនោះគឺគាត់ខ្វះនូវរូបថតសម្រាប់ទៅបិទ។ ហេតុដូច្នេះហើយយើងបារម្ភដែរករណីដែលគាត់ខ្វះរូបថតហ្នឹងអាចធ្វើឲ្យគាត់បាត់បង់សិទ្ធិបោះឆ្នោតដោយសារគាត់មិនមានលទ្ធភាព ជាពិសេសនៅតំបន់ដាច់ស្រយាល»។ លោកពិទូរ្យបានបញ្ជាក់ទៀតថា ខូមហ្វ្រ៊ែលបានដាក់អ្នកអង្កេតការណ៍ចំនួន៧២ឃុំសង្កាត់ដើម្បីធ្វើការងារជាអ្នកអង្កេតការណ៍ចល័ត។ លោក ជាម យៀប មន្ត្រីជាន់ខ្ពស់ខាងគណបក្សគ្រប់គ្រងអំណាចបានច្រានចោលការលើកឡើងនេះ។ លោកមានប្រសាសន៍ថា គណបក្សប្រជាជនកម្ពុជា តែងតែទទួលរងការចោទប្រកាន់គ្មានភស្តុតាងនៅពេលមានការបោះឆ្នោត។ លោកបានបញ្ជាក់ទៀតថា គណបក្សគ្រប់គ្រងអំណាចមិនបានរកឃើញភាពមិនប្រក្រតីក្នុងការចុះឈ្មោះបោះឆ្នោតទេ។ «គណបក្សប្រជាជនកម្ពុជាដូចមិនមានប្រតិកម្មអ្វីខ្លាំងពេកទេ គ្រាន់តែថាអ្វីៗយើងធ្វើតាមបទបញ្ជាដែលគជបបានរៀបចំឡើងហើយដែលច្បាប់បានចង្អុលទិសឲ្យគជបរៀបចំរយៈកាលកន្លងទៅ»។ យោងតាមកម្មវិធីដូចបានគ្រោងទុករបស់គជប ប្រជាពលរដ្ឋគ្រប់រូបត្រូវទៅចុះឈ្មោះនិងពិនិត្យបញ្ជីឈ្មោះបោះឆ្នោតចាប់ពីថ្ងៃ១ ខែកញ្ញារហូតដល់ថ្ងៃទី១៥ ខែតុលា។គិតត្រឹមថ្ងៃទី០១ ខែតុលានេះ ចំនួនអ្នកចុះឈ្មោះបោះឆ្នោតមានចំនួនជាង៥សែននាក់គឺបានកើនឡើងចំនួន១០៩,២០ភាគរយ។ ក៏ប៉ុន្តែចំនួននេះអាចនឹងមានការប្រែប្រួលពីព្រោះគជបនិងពន្យាពេលចុះឈ្មោះបន្ថែមទៀត។ លោក ទេព នីថា អគ្គលេខាធិការនៃគជបបានបញ្ចាក់ថា ប្រសិនបើនៅកន្លែងខ្លះមិនទាន់បានចុះឈ្មោះបោះឆ្នោតឲ្យបានគ្រប់ចំនួនទេ យើងនឹងពិភាក្សាជាមួយក្រុមប្រឹក្សាឃុំសង្កាត់នៅមូលដ្ឋានជាក់ស្តែងដើម្បីបន្ថែមរយៈពេលតាមការជាក់ស្តែង។ លោកទេព នីថា បានបញ្ជាក់ទៀតថា នៅពេលបច្ចុប្បន្ននេះបញ្ហាសំខាន់គឺទឹកជន់លិចក្នុងឃុំសង្កាត់ចំនួន៣០០ដែលធ្វើឲ្យគជបសម្រេចផ្លាស់ប្តូរកម្មវិធីចុះឈ្មោះបោះឆ្នោត។ «តាមព័ត៌មានថ្មីដែលយើងបានទទួលពីរាជធានី ខេត្តមកគឺមានប្រមាណជាង៣០០ឃុំក៏ប៉ុន្តែក្នុងចំណោមឃុំទាំងអស់នេះ។ គណៈកម្មការក៏ដូចជាក្រុមប្រឹក្សាឃុំសង្កាត់គាត់បានលើកស្នើតែឃុំមួយចំនួនតែប៉ុណ្ណោះមិនមែនគ្រប់ទាំង៣០០ឃុំទេហើយដោយសារពេលវេលានៅសល់យើងពិនិត្យថែមលើសំណូមពរនេះទៀតនៅសប្តាហ៍ក្រោយដើម្បីសម្រេចថាតើត្រូវពន្យារពេលសមស្រមទៅតាមកន្លែងជាក់ស្តែង»។ ចាប់តាំងពីការចុះឈ្មោះបោះឆ្នោតមក គជបបានទទួលពាក្យបណ្តឹងបានតិចតួចតែប៉ុណ្ណោះហើយត្រូវបានដោះស្រាយនៅទីនោះ។ នេះបើតាមការបញ្ជាក់របស់ទេពនីថា។ លោកបានមានប្រសាសន៍ថា ការប្តឹងតវ៉ារបស់គណបក្សនយោបាយមានតែពីរបណ្តឹងតែប៉ុណ្ណោះ។ បណ្តឹងទាំងនោះមិនជាប់ពាក់ព័ន្ឋនឹងការចុះឈ្មោះបោះឆ្នោតទាំងអស់ទេ។ វាជាបណ្តឹងទាក់ទិននឹងការអនុវត្តរបស់មេឃុំ ចៅសង្កាត់ និងស្មៀនឃុំ។ លោក រីក រ៉េត អាយុ២៥ ប្រជាពលរដ្ឋមួយរូបនៅស្រុកស្រីស្នំ ខេត្តសៀមរាបបាននិយាយថាលោកបានតៀមឯកសាររួចរាល់ហើយសំរាប់ទៅចុះឈ្មោះបោះឆ្នោត។ លោកបានបញ្ជាក់ថាអាជ្ញាធរបានសំរួលការងារគ្រប់យ៉ាងដល់លោកបើទោះបីជាលោកជាអ្នកចំណូលថ្មីក៏ដោយ។ «គាត់ប្រាប់ថាឲ្យប្រសិនបើយើងមិនបានចុះឈ្មោះនៅភូមិឯណោះយើងអាចចុះនៅទីនេះបានហើយឲ្យទៅចុះមុនថ្ងៃទី១៥ខែ១០»។ ការបោះឆ្នោតក្រុមប្រឹក្សាឃុំកន្លងទៅគណបក្សប្រជាជនកម្ពុជាបានឈ្នះឆ្នោតជាង១.៥៩០ឃុំសង្កាត់ក្នុងចំណោមឃុំសង្កាត់១.៦២១ពេលនោះ ។ គណបក្សសម រង្ស៊ី ជាគណបក្សជំទាស់ធំជាងគេបានឈ្នះលំដាប់ទី២៕ This posting includes an audio/video/photo media file: Download Now |
| អ្នកភូមិបឹងកក់ត្រូវបានប្តឹងពីបទប្រមាថ និងគំរាមកំហែង Posted: 06 Oct 2011 07:02 AM PDT ប្រជាពលរដ្ឋអ្នកភូមិបឹងកក់ចំនួនប្រាំមួយនាក់ត្រូវបានសាលាដំបូងរាជធានីភ្នំពេញ កោះឲ្យចូលខ្លួនតាមកាលបរិច្ឆេទផ្សេងៗគ្នាចាប់ពីថ្ងៃសុក្រសប្តាហ៍នេះរហូតដល់ថ្ងៃសុក្រសប្តាហ៍ក្រោយ នេះបើយោងតាមដីកាកោះដែលត្រូវបានចុះហត្ថលេខាដោយព្រះអាជ្ញាសុខ រឿន ដែលវីអូអេ សំឡេងសហរដ្ឋអាមេរិកទទួលបាននៅថ្ងៃពុធនេះ។ អ្នកភូមិទាំងប្រាំមួយនាក់ត្រូវបានប្តឹងពីបទប្រមាថ និងគំរាមកំហែងដោយលោក ឆាយ ធារិទ្ធិ ចៅសង្កាត់ស្រះចក ក្រុងភ្នំពេញ។ នៅក្នុងចំណោមអ្នកត្រូវបានចោទប្រកាន់ទាំងនោះ មានពីររូបគឺជាម្ចាស់បណ្តឹងប្រឆាំងនឹងអាជ្ញាធរ និងក្រុមហ៊ុនស៊ូកាគូអ៊ីន ពីបទបំផ្លាញផ្ទះរបស់ពួកគេ និងអ្នកស្រី ទេពវ៉ាន់នី តំណាងយ៉ាងសកម្មមួយរូបរបស់អ្នកភូមិបឹងកក់។ អ្នកស្រី ទេព វ៉ាន់នី ដែលត្រូវចូលខ្លួនទៅតុលាការនៅថ្ងៃសុក្រសប្តាហ៍នេះ ហាក់ដូចជាភ្ញាក់ផ្អើល នៅពេលដែលអ្នកស្រីអះអាងថា ក្រុមប្រជាពលរដ្ឋមិនដែលមានការប្រឆាំងនឹងចៅសង្កាត់ម្ចាស់បណ្តឹងនោះទេ។ «ពួកខ្ញុំក៏មិននឹកនាទៅរករឿងគាត់ ធ្វើបាបគាត់ណាបន្តិចដែរ ហើយគាត់មកចោទខ្ញុំជាស្រ្តីជេរ ប្រមាថ»។ លោក ដួង គា ម្ចាស់បណ្តឹងម្នាក់ក្នុងចំណោមម្ចាស់បណ្តឹងទាំងប្រាំមួយនាក់ ដែលបានដាក់ពាក្យបណ្តឹងទៅតុលាការក្រុងភ្នំពេញកាលពីថ្ងៃម្សិលមិញ ប្រឆាំងនឹងក្រុមហ៊ុនស៊ូកាគូអ៊ីន និងអាជ្ញាធរក្រុងភ្នំពេញ ក៏ជាអ្នកទទួលរងបណ្តឹងម្នាក់ដែរពីចៅសង្កាត់ដែលគ្រប់គ្រងកន្លែងដែលគាត់ធ្លាប់រស់នៅនោះ។ លោក ដួង គា យល់ឃើញថា បណ្តឹងនេះគឺជាការគាបសង្កត់ទៅលើប្រជារាស្រ្ត។ «ការពិតទៅ រឿងហ្នឹង ខ្ញុំឥតបានដឹង ឥតបានឮ ហើយខ្ញុំក៏ឥតប្រព្រឹត្តិបទល្មើសដែរ។ បណ្តឹងចាប់ខ្លួនហ្នឹងដើម្បីពួកខ្ញុំរត់ចោលផ្ទះចោលសម្តែងអញ្ចឹងទៅ ហើយគាត់យកដីហ្នឹងស្រួល»។ លោក ឆាយ ធារិទ្ធិ ម្ចាស់បណ្តឹងប្រឆាំងទៅនឹងប្រជាពលរដ្ឋ មិនផ្តល់សេចក្តីអធិប្បាយណាមួយទេ ដោយលោកប្រាប់ថា លោកកំពុងតែជាប់រវល់។ «ជាប់នៅក្នុងពិធី។ ខ្ញុំស្តាប់ឥតបានទេ។ ជាប់នៅក្នុងពិធី ហើយប៉ុនហ្នឹងបានណាស់»។ ដីបឹងកក់ទំហំ១៣៣ហិកតា បានក្លាយទៅជាប្រធានបទនៃទំនាស់យ៉ាងខ្លាំងក្លា រវាងក្រុមហ៊ុន ស៊ូកាគូអ៊ីន និងរវាងអាជ្ញាធរក្រុងភ្នំពេញ ជាមួយប្រជាពលរដ្ឋជាងបួនពាន់គ្រួសារ។ ប្រជាពលរដ្ឋ ភាគច្រើនបានសុខចិត្តចាកចេញពីលំនៅស្ថាន ដោយពួកគេយល់ព្រមទទួលសំណង ដែលពួកគេបានអះអាងថា ពួកគេមិនពេញចិត្តនោះទេ។ អ្នកភូមិទាំងប្រាំមួយនាក់ គឺជាអ្នកប្រឈមមុខនឹងតុលាការដំបូងគេបន្ទាប់ពីទំនាស់ដីធ្លីនេះ កើតមានឡើងហើយអូសបន្លាយចាប់តាំងពីឆ្នាំ២០០៧មកម៉្លេះ។ លោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជា បានហៅបណ្តឹងប្រឆាំងនឹងអ្នកបឹងកក់ថា ជាការចាប់ផ្តើមយន្តការផ្លូវច្បាប់សម្រាប់គាបសង្កាត់ទៅលើក្រុមអ្នកតវា។ «ពីដើមមកដែលថា យុទ្ធសាស្ត្រនេះអស់ប្រសិទ្ធិភាព ទើបអាជ្ញាធរ ពួកក្រុមហ៊ុនទាំងអស់គ្នាហ្នឹង គាត់ប្រើប្រព័ន្ធតុលាការ ហើយដើម្បីគាបសង្កត់ប្រជាពលរដ្ឋ។ យើងឃើញត្រឹមករណីជាច្រើន ប្រជាពលរដ្ឋដែលរងគ្រោះ អញ្ចឹងប្រជាពលរដ្ឋដែលប្តឹងទៅ ឥតមាននរណាហ៊ានយកទៅដាក់ទេ។ ហើយការដោះស្រាយតាមប្រព័ន្ធតុលាការ វាមានប្រវត្តិជោគជ័យជាច្រើន»។ ក្រុមប្រជាពលរដ្ឋទន់ខ្សោយត្រូវបានរាយការណ៍ថា គឺជាអ្នកប្រឈមនឹងគ្រោះថ្នាក់បំផុត។ លោក អ៊ូច ឡេង មន្ត្រីទទួលបន្ទុកផ្នែកកម្មវិធីដីធ្លីរបស់អង្កការការពារសិទ្ធិមនុស្សអាដហុកបានឲ្យដឹងថាមានប្រជាពលរដ្ឋជាង២០០នាក់កំពុងត្រូវបានប្តឹងតាមផ្លូវតុលាការ និងប្រជាពលរដ្ឋជាង៣០នាក់ផ្សេងទៀតកំពុងជាប់ឃុំឃាំងដោយសារតែទំនាស់ដីធ្លី នៅក្នុងអំឡុងប៉ុន្មានខែនៃឆ្នាំ២០១១នេះ៕ This posting includes an audio/video/photo media file: Download Now |
| គ្រូបង្រៀនទាមទារដំឡើងប្រាក់បៀវត្សរ៍នៅទិវាគ្រូបង្រៀន Posted: 06 Oct 2011 06:33 AM PDT គ្រូបង្រៀនជាង៣០០នាក់មកពីទូទាំងប្រទេសអំពាវនាវដល់រដ្ឋាភិបាលកម្ពុជាឲ្យដំឡើងប្រាក់បៀវត្សរ៍យ៉ាងតិច២៥០ដុល្លារអាមេរិកដល់គ្រូបង្រៀនខណៈដែលតម្លៃម្ហូបអាហារកំពុងតែឡើងថ្លៃ។ ការទាមទារនោះត្រូវបានធ្វើឡើងនៅពេលប្រមូលផ្តុំគ្នាដើម្បីប្រារព្ធទិវាគ្រូបង្រៀនពិភពលោកនៅថ្ងៃពុធនេះ។ លោកគ្រូអ្នកគ្រូទាំងនេះមកពីខេត្តក្រុងចំនួន១៨ រួមមានខេត្តកំពង់ចាម ព្រះសីហនុ កំពង់ឆ្នាំង កណ្តាល កំពង់ស្ពឺ ពោធិសាត់ ព្រែវែង និងស្វាយរៀង។ គ្រូបង្រៀនចំនួន១៥នាក់ត្រូវបានអនុញ្ញាតឲ្យដើរដង្ហែក្បួនចេញពីទីលានសេរីភាពដោយនាំយកញត្តិសុំដំឡើងប្រាក់បៀវត្សរ៍ទៅប្រគល់ជូនក្រសួងអប់រំ ខុទ្ទកាល័យលោកនាយករដ្ឋមន្ត្រី រដ្ឋសភា និងព្រឹទ្ធសភា។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានថ្លែងនៅក្នុងពិធីប្រារព្វទិវាគ្រូបង្រៀនពិភពលោកនេះថា សមាគមគ្រូបង្រៀនចង់ប្រើប្រាស់ទិវាគ្រូបង្រៀនពិភពលោកនេះដើម្បីជំរុញឲ្យរដ្ឋាភិបាលយកចិត្តទុកដាក់ចំពោះជីវភាពរស់នៅតួនាទីរបស់គ្រូបង្រៀន និងគុណភាពអប់រំ។ «បើរដ្ឋាភិបាលដោះស្រាយឲ្យគ្រូបង្រៀនមានប្រាក់ឈ្នួលសមរម្យ ពេលនោះការអប់រំនឹងទទួលបានគុណភាពហើយ»។ អ្នកគ្រូ រស់ ទិតម៉ាឡៃ គ្រូបង្រៀននៅសាលាបឹងត្របែកខាងត្បូង បាននិយាយនៅក្នុងពីធីនេះថា អ្នកគ្រូមានប្រាក់បៀវត្សរ៍ជាង៣សែនរៀល ស្មើនឹង៨០ដុល្លារអាមេរិកប៉ណ្ណោះ។ បា្រក់នេះមិនអាចផ្គត់ផ្គង់ជីវភាពរស់នៅរបស់អ្នកគ្រូបានទេ ពីព្រោះទំនិញឡើងថ្លៃយ៉ាងខ្លាំង។ អ្នកគ្រូបានបន្ថែមថា គ្រូបង្រៀនមិនអាចផ្តល់ការអប់រំប្រកបដោយគុណភាពដល់សិស្សបានទេ ដោយសារតែជីវភាពរស់នៅជួបប្រទះនឹងភាពខ្វះខាត ដូចអ្នកគ្រូបានបញ្ជាក់ថា«ពោះបើក ក្រពះឃ្លាន បង្រៀនមិនបាន»។ អ្នកគ្រូ បានបន្ថែមថា គ្រូបង្រៀនបង្ខំចិត្តយកប្រាក់ពី៥០០រៀលទៅ១.០០០រៀលក្នុងសិស្សម្នាក់នៅសាលាបឋមសិក្សា ការលក់ឯកសារមេរៀនឲ្យសិស្ស និងការបង្ខំសិស្សឲ្យរៀនក្រៅម៉ោង។ «ប្រាក់ខែរបស់ពួកខ្ញុំនេះមិនស្មើនឹងសត្វឆ្កែដែលលោកចិញ្ចឹមនៅតាមផ្ទះផង។ អញ្ចឹងប្រាក់ខែនេះមិនអាចតុល្យភាពនឹងទំនិញទីផ្សារទេដែលធ្វើឲ្យពួកគាត់មិនអាចរស់បាន។ ពួកយើងខ្ញុំធ្វើនេះមានការខ្មាសអៀន និងឈឺចាប់ណាស់ចំពោះការលូកដៃយកប្រាក់៥០០-៦០០រៀលពីសិស្សនេះ។ មិនចង់ធ្វើអញ្ចឹងទេ ប៉ុន្តែតម្រូវការក្រពះ»។ លោក យ៉ាន ចំរើន គ្រូបង្រៀននៅសាលាបឋមសិក្សាភ្នំប្រុស ស្រុកកំពង់សៀម ខេត្តកំពង់ចាម បានថ្លែងនៅក្នុងពិធីនេះថា លោកមានប្រាក់បៀវត្សរ៍ ២៩ម៉ឺនរៀល ស្មើនឹង៧២ដុល្លារអាមេរិកគឺមិនអាចទប់ទល់នឹងទំនិញឡើងថ្លៃបានទេ។ លោក យ៉ាន ចំរើន បានថ្លែងថា បើប្រាក់ខែរបស់គ្រូបង្រៀនមិនគ្រប់គ្រាន់ គ្រូបង្រៀនត្រូវការប្រាក់ដើម្បីចិញ្ចឹមជីវិត និងផ្គត់ផ្គង់ជីវភាពគ្រួសារដោយការលក់ឯកសារមេរៀនឲ្យសិស្ស។ «ប្រាក់បៀវត្សរ៍ និងតម្លៃទំនិញនៅទីផ្សារអត់មានតុល្យភាព។ តម្លៃទំនិញទីផ្សារគឺឡើងខ្ពស់។ តម្លៃប្រាក់ខែរបស់ខ្ញុំទាបបំផុតធ្វើឲ្យជីវភាពរបស់ខ្ញុំខ្វះខាតដុនដាបមែនទែន»។ តួលេខរបស់ក្រសួងអប់រំបានបង្ហាញថា គ្រូបង្រៀននៅទូទាំងប្រទេសមានចំនួនជាងសែននាក់។ លោក គង់ ចំរើន មន្ត្រីខុទ្ទកាល័យរបស់លោកនាយករដ្ឋមន្ត្រី ហ៊ុន សែន បានថ្លែងថាលោកបានទទួលយកញត្តិរបស់សមាគមគ្រូបង្រៀនកម្ពុជា ទៅពិចារណា៕ This posting includes an audio/video/photo media file: Download Now |
| ស្នាដៃរបាំថ្មីបង្ហាញ«វដ្តនៃការបំពានអំណាច» Posted: 05 Oct 2011 08:56 PM PDT <!--IMAGE-RIGHT--> ក្រុមរបាំ Khmer Art Ensemble ដែលដឹកនាំដោយលោកស្រី សាភីរ៉ូ ជៀម សុភិលីន (Sophiline Cheam Shapiro) នឹងធ្វើដំណើរមក រដ្ឋកាលីហ្វ័រញ៉ា សហរដ្ឋអាមេរិក ដើម្បីសម្តែងស្នាដៃរបាំថ្មីមួយ មានឈ្មោះថា «ជីវិតអសុរា»។ ការសម្តែងនឹងប្រព្រឹត្តទៅនៅថ្ងៃទី២ខែតុលានាសាកលវិទ្យាល័យកាលីហ្វ័រញ៉ា ប៊ើឃើលី (UC Berkeley) និងនៅថ្ងៃទី៦ខែតុលានាសាកលវិទ្យាល័យ សាន់តា បាបារ៉ា (University of Santa Barbara)។ លោក បូរី ស៊ីលីវណ្ណ សូមជូនបទសម្ភាសន៍តាមទូរស័ព្ទជាមួយលោកស្រី សុភិលីន ដែលជាអ្នកដឹកនាំនិងនាដករស្នាដៃរបាំ «ជីវិតអសុរា»។ <!--AV--> This posting includes an audio/video/photo media file: Download Now |
| Posted: 05 Oct 2011 08:53 PM PDT សៀវភៅ «ស្នាមរបួសដែលលាក់កំបាំងរបស់ប្រទេសកម្ពុជា៖ ចិត្តវិជ្ជានៃបទពិសោធន៍បាក់ស្បាតនៅក្រោយរបបខ្មែរក្រហម» (Cambodia's Hidden Scars: Trauma Psychology in the wake of the Khmer Rouge) ទើបនឹងបានបោះពុម្ពដោយមជ្ឈមណ្ឌលឯកសារកម្ពុជានៅក្នុងប្រទេសកម្ពុជានាពេលថ្មីៗនេះ។ លោកស្រីសាស្រ្តាចារ្យ Beth Van Schaack ជាអ្នកនិពន្ធមួយរូបរបស់សៀវភៅនេះ។ លោកស្រីសាស្រ្តាចារ្យបង្រៀននៅមហាវិទ្យាល័យច្បាប់នៃសាកលវិទ្យាល័យ សេនថា ក្លារ៉ា (Santa Clara)។ <!--IMAGE-RIGHT--> លោកស្រីសាស្រ្តាចារ្យអះអាងថា ដើម្បីជួយជនរងគ្រោះពីរបបខ្មែរក្រហមឲ្យបានធូរស្រាលពី បទពិសោធន៍បាក់ស្បាត និងបញ្ហាផ្លូវចិត្ត រដ្ឋាភិបាលកម្ពុជាគួរគាំទ្រឲ្យមានការបង្កើត គណៈកម្មការស្វែងរកការណ៍ពិតបែបផ្លូវការ ដែលជាពិធីផ្សះផ្សាជាតិមួយមានការចូលរួមពីមនុស្សមកពីគ្រប់តំបន់នៅក្នុងប្រទេសកម្ពុជា បន្ថែមទៅលើការងាររបស់សាលាក្តីខ្មែរក្រហម និងការងាររបស់អង្គការក្រៅរដ្ឋាភិបាល។ នេះជាបទសម្ភាសន៍រវាងលោក ភី សុភាដា ពីវីអូអេខ្មែរ ជាមួយលោកស្រីសាស្រ្តាចារ្យ Beth Van Schaack អំពីសៀវភៅខាងលើ និងបទពិសោធន៍របស់លោកស្រីទាក់ទងនឹងការសរសេរសៀវភៅនេះ៖ <!--AV--> This posting includes an audio/video/photo media file: Download Now |
| អតីតគ្រូបង្រៀនប្រឹងជំរុញកូនសិស្សខ្មែរនៅឡុងប៊ិចឱ្យបានមកកាន់តំណែងខ្ពស់ Posted: 05 Oct 2011 08:49 PM PDT ស្ថិតក្នុងបន្ទប់ដ៏ធំទូលាយមួយក្នុងមន្ទីរពេទ្យ St. Mary ដែលសមាគមមាតាបិតាខ្មែរប្រើប្រាស់ជាទីសម្រាប់ផ្តល់ប្រឹក្សាដល់សិស្សដែលមានការសិក្សាខ្សោយ និងអប់រំដល់សហគមន៍ខ្មែរក្នុងទីក្រុងឡុងប៊ិចឱ្យយល់ពីសារៈសំខាន់នៃការទទួលទានអាហារត្រឹមត្រូវដើម្បីសុខភាពល្អ អ្នកស្រី ចាន់ ហប់សុន កំពុងពន្យល់មេរៀនខ្លះៗដល់សិស្សដែលមកសុំជំនួយពីសមាគមនេះ។ ជាមធ្យមមានសិស្សខ្មែរក្នុងសហគមន៍នៃទីក្រុងឡុងប៊ិច ក្នុងរដ្ឋកាលីហ្វ័រញ៉ា១៥នាក់ក្នុងមួយវគ្គមកសុំឱ្យអ្នកស្រី ចាន់ ហប់សុន នាយិកាប្រតិបត្តិនៃសមាគមមាតាបិតាខ្មែរជួយពន្យល់បន្ថែមនូវមុខវិជ្ជាដល់សិក្សានៅសាលា ហើយពួកគេនៅមិនទាន់យល់ច្បាស់។ លោកស្រីចាន់ ហប់សុនបានបញ្ជាក់ប្រាប់វីអូអេសំឡេងសហរដ្ឋអាមេរិកផ្នែកខេមរភាសាថា មានបញ្ហាជាច្រើនដែលនាំឱ្យកូនសិស្សខ្មែរមានការសិក្សាមិនបានល្អ៖ «កូនខ្មែររបស់យើងដែលមានចំណេះចេះដឹងអន់ច្រើនជាងគេដោយសារខ្វះការទំនុកបម្រុង ខ្វះការយល់ដឹងដល់យុវវ័យរបស់ក្មេងៗ ហើយនឹងខ្វះការផ្ចុងផ្តើមពីខាងចំណីអាហារពីខាងសុខភាព និងការជួយពីក្រោយសាលា»។ លោកស្រីចាន់ ហប់សុនបញ្ជាក់ថា នៅសហរដ្ឋអាមេរិកការផ្តល់ការអប់រំបន្ថែមពីឪពុកម្តាយនៅក្រោយពីការសិក្សានៅតាមសាលាជាការណ៍សំខាន់ណាស់។ «មកដល់ស្រុកនេះ គ្រូអាមេរិកាំងគេមានមុខនាទីតែបង្ហាត់បង្រៀនចំណេះដឹងទេ។ អ្វីៗទាំងអស់នៅ លើឪពុកម្តាយ។ ដូច្នេះហើយរចនាសម្ព័ន្ធខាងការសិក្សានៅស្រុកយើងនិងស្រុកអាមេរិកខុសគ្នាដូចមេឃនិងដី»។ លោកស្រីចាន់ ហប់សុនធ្លាប់ជាគ្រូបង្រៀនម្នាក់ក្នុងប្រទេសកម្ពុជា មុនពេលដែលលោកស្រីរត់ភៀសខ្លួនមកនៅសហរដ្ឋអាមេរិកក្នុងឆ្នាំ១៩៨០។ លោកស្រីបញ្ជាក់ថា ឪពុកម្តាយខ្មែរនៅមិនទាន់យល់ពីការឱ្យតម្លៃពីសមិទ្ធិផលនៃការសិក្សារបស់កូនពួកគេនៅឡើយទេ។ នៅពុំទាន់មានតួលេខជាក់លាក់ទាក់ទងនឹងការសិក្សារបស់សិស្ស និស្សិតក្នុងសហគមន៍ខ្មែរទេ ក៏ប៉ុន្តែយោងតាមការរកឃើញរបស់សមាគមអប់រំជាតិអាមេរិកាំង ឱ្យដឹងថា ជនជាតិអាស៊ី និងអ្នកដែនកោះប៉ាស៊ីហ្វិកជួបបញ្ហាជាច្រើនក្នុងការសិក្សា ដោយសារកត្តាទាក់ទងនឹងស្ថានភាពជាជនភៀសខ្លួនរបស់ឪពុកម្តាយ ការប្រើប្រាស់ភាសា ប្រព័ន្ធអប់រំខ្សោយក្នុងប្រទេសកំណើតរបស់ពួកគេនិងភាពក្រីក្រជាដើម។ លោកស្រីចាន់ ហប់សុនបានបញ្ជាក់ថា ការរៀបចំបង្កើតជាសមាគមមាតាបីតាខ្មែរនេះ ធ្វើឡើងគឺមានសេចក្តីថា មាតាបិតាត្រូវមានភារកិច្ចដើម្បីទំនុកបម្រុង ហើយជួយកូនខ្មែរឱ្យទៅជាកូនដែលប្រកបដោយចំណេះវិជ្ជាខ្ពស់ មានអនាគតល្អ ហើយមានសេចក្តីរុងរឿង ដូចសហគមន៍ដទៃទៀតដែលនៅសហរដ្ឋអាមេរិក។ សមាគមមាតាបិតាខ្មែរត្រូវបានបង្កើតឡើងនៅឆ្នាំ១៩៩៥។ ដោយចាប់ផ្តើមពីដំបូងក្នុងគោលបំណងផ្តល់ការលើកទឹកចិត្តតាមរយៈរៀបចំ ការអបអរសាទរប្រចាំឆ្នាំដល់កូនសិស្សដែលបញ្ចប់ការសិក្សាប៉ុណ្ណោះ ប៉ុន្តែក្រោយមកបានពង្រីកការងាររហូតមកដល់ការជួយបំប៉នចំណេះដល់សិស្សក្រោយការសិក្សានៅតាមសាលានិងអប់រំពីសុខភាព។ ចាប់តាំងពីបង្កើតមក មានសិស្សប្រហែលជិត១.០០០នាក់ហើយដែលមានបញ្ហាក្នុងការសិក្សាហើយមកសុំជំនួយពីលោកស្រី។ សម្រាប់លី ហួរ ជាសិស្សថ្នាក់ទី១១នៅវិទ្យាល័យ Wilson ក្នុងទីក្រុងឡុងប៊ិច ជំនួយដូចនេះជាការសំខាន់ដើម្បីអាចជួយបង្កើនសមត្ថភាពសម្រាប់ការសិក្សា។ «ពេលដែលខ្ញុំអត់បានល្អ គ្រូនៅសាលាគាត់អត់ថាអ្វីទេ។ គ្រាន់តែប្រាប់ថា ពិន្ទុយើងអត់ល្អ ហើយពិន្ទុយើងទាប។ គេមិនបានជាប្រាប់ទល់មុខទេ។ គេគ្រាន់តែដាក់លើក្រដាស»។ លីហួរកំពុងត្រូវការជំនួយបន្ថែមសម្រាប់ផ្នែកភាសាអង់គ្លេស ធ្វើកិច្ចការសាលានិងត្រៀមសម្រាប់ការប្រឡងក្នុងថ្នាក់ ហើយការស្វែងរកជំនួយសិក្សាបំប៉នជាការងារផ្ទាល់ខ្លួន។ សម្រាប់លោកស្រី ចាន់ ហប់សុន ការថែរក្សាសុខភាពក៏ជាបញ្ហាសំខាន់មួយដែរ ដែលសមាគមលោកស្រីផ្តោតការអប់រំដល់សហគមន៍ខ្មែរដើម្បីអាចឱ្យពួកគេមានសុខភាពល្អ។ លោកស្រីមើលឃើញថា ប្រជាពលរដ្ឋខ្មែរនៅទីក្រុងឡុងប៊ិច ក៏ដូចជានៅទូទាំងសហរដ្ឋអាមេរិកដែរ មានបញ្ហា ច្រើនរឿងសុខភាព។ «ដោយសារទីមួយ យើងអត់មានចំណេះចេះដឹងខាងសុខភាព។ ទីពីរយើងអត់ដឹងថា តើយើងត្រូវញ៉ាំម្ហូបចំណីយ៉ាងណាដើម្បីផ្តល់សុខភាពល្អដល់ខ្លួនយើង។ ទីបីយើងអត់ដឹងថា តើមានកម្មវិធី ណាខ្លះដែលអាចជួយយើងខាងសុខភាព ព្រោះយើងអត់ដែលដឹង»។ ការអប់រំមានលក្ខណៈជាចំណេះដឹងមូលដ្ឋាន ដែលមានដូចជាប្រភេទជំងឺផ្សេងៗនិងមូលហេតុរបស់វា ព្រមទាំងវិធីការពារ ក៏ដូចជាការស្វែងរកសេវាព្យាបាល និងការទទួលទានចំណីដែលផ្តល់ផលដល់សុខភាព។ លោកស្រី ព្រំ រ័ត្ន ដែលបានចូលរួមក្នុងវគ្គសិក្សាកន្លងមកបញ្ជាក់ថា៖ «ពីមុនខ្ញុំអត់បានរៀនអ្វី អត់សូវចូលចិត្តញ៉ាំបន្លែទេ ញ៉ាំតែសាច់ច្រើន ហើយបន្លែញ៉ាំតិចៗ ហើយឈឺញឹកញាប់ ឈឺតែក្បាល ហើយកោសខ្យល់សឹងតែមួយអាទិត្យម្តង។ ដល់ពេលគាត់បើកកម្មវិធីទៅ ខ្ញុំបាននាំមិត្តភ័ក្របួនប្រាំ ប្រាំមួយនាក់មកចូលរៀនជាមួយគ្នាដែរ។ ដល់ពេលដែលយើងពិសារតែបន្លែអាហារអត់សូវប្រើសាច់គោ ឬរបស់អ្វីដែលមានជាតិខ្លាញ់ ដូចជាសាច់មាន់ដែលមានជាតិខ្លាញ់ អត់ប្រើទៅ បានដូចជាស្រួលខ្លួន អត់មានការឈឺ វិលមុខវិលអីទេ។ ខ្ញុំ ពីដើម ងើបអត់ចង់រួចទេ។ ពេលងើបវាវិល មកពីយើងញ៉ាំម្អូប អត់មានដឹងរបៀប»។ ផ្លែផ្កានៃការវិនិយោគលើធនធានមនុស្សរបស់សមាគមមាតាបិតាខ្មែរបានចាប់ផ្តើមផ្តល់ជាបណ្តើរៗបើទោះជាមិនទាន់ដល់កម្រិតមួយដែលអ្នកបង្កើតសមាគមនេះចង់បានគឺអនាគតកូនខ្មែរដែលអាចមានការងារធំដុំក្នុងស្ថាប័នសំខាន់ៗរបស់សហរដ្ឋអាមេរិក។ នាពេលបច្ចុប្បន្ននេះ កញ្ញា ម៉ីម៉ី ហួត និងកញ្ញា ស្តេហ្វានី ចាន់ ដែលបានទទួលអាហារូបករណ៍តាមរយៈសមាគមនេះក្នុងឆ្នាំ២០១០និង២០១១ បានស្ម័គ្រចិត្តមកជួយក្នុងការងាររបស់លោកស្រីចាន់ ក្នុងការជួយអប់រំពីសុខភាពនិងបណ្តុះបណ្តាលកុមារជំនាន់ក្រោយ។ អ្នកទាំងពីក៏កំពុងសិក្សាខាងវិជ្ជាពេទ្យ ហើយពួកគេសង្ឃឹមថា អាចនឹងជួយឱ្យប្រសើរឡើងដល់អាជីពរបស់ពួកគេ ក្នុងពេលអនាគត និងបន្តការងារជួយសហគមន៍តទៅទៀត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
