VOA News: ព័ត៌មាន: “អ្នកភូមិរៀបចំទប់ទល់នឹងអាជ្ញាធរបង្ក្រាប” plus 4 more |
- អ្នកភូមិរៀបចំទប់ទល់នឹងអាជ្ញាធរបង្ក្រាប
- អតីតនាយករដ្ឋមន្ត្រីថៃថ្លែងថាកម្ពុជាគួរបង្កើនចំណាយរដ្ឋក្នុងវិស័យហេដ្ឋារចនាសម្ព័ន្ធនិងអប់រំ
- សត្វទន្សោងរងការផុតពូជ
- អ្នកភូមិបឹងកក់រងរបួសពេលប៉ះទង្គិចជាមួយប៉ូលីស ខណៈដែលក្រុមហ៊ុនបន្តឈូសផ្ទះពួកគេ
- ព័ត៌មានអន្តរជាតិសង្ខេប៖ ១៩ កញ្ញា
| អ្នកភូមិរៀបចំទប់ទល់នឹងអាជ្ញាធរបង្ក្រាប Posted: 19 Sep 2011 11:41 AM PDT ចាប់តាំងពីព្រឹករហូតដល់ល្ងាចថ្ងៃច័ន្ទនេះ អ្នកភូមិបឹងកក់ ក្មេងចាស់ ប្រុសស្រីជាច្រើននាក់ បានអង្គុយនៅតាមផ្ទះរបស់ខ្លួនរៀងៗខ្លួនដើម្បីចាំឃ្លាំមើល មន្ត្រីប៉ូលីស និងក្រុមហ៊ុនស៊ូកាគូអ៊ីន របស់លោកឧកញ៉ា ឡាវ ម៉េងឃីន សមាជិកព្រឹទ្ធសភាខាងគណបក្សប្រជាជនកម្ពុជាដឹកគ្រឿងចក្រមកកម្ទេចផ្ទះរបស់អ្នកភូមិ។ ក៏ប៉ុន្តែពេញមួយថ្ងៃនេះ សកម្មភាពរបស់ប៉ូលីស និងក្រុមហ៊ុនស៊ូកាគូអ៊ីន ពុំមានសកម្មភាពទេ បន្ទាប់ពីបានផ្ទុះអំពើហឹង្សាមួយ ជាមួយនឹងប្រជាពលរដ្ឋ កាលពីថ្ងៃសុក្រ ដែលបានបណ្តាលឲ្យប្រជាពលរដ្ឋមួយរូប ដែលជាសកម្មជនគណបក្សសម រង្ស៊ី ម្នាក់ទទួលរងរបួសយ៉ាងធ្ងន់ធ្ងរ។ ការផ្ទុះអំពើហឹង្សានេះ បានកើតមានឡើងបន្ទាប់ពីក្រុមហ៊ុនស៊ូកាគូអ៊ីនបានដឹកគ្រឿងចក្រមកវាយកម្ទេចផ្ទះរបស់អ្នកភូមិបឹងកក់នៅភូមិ២២ចំនួន៨ខ្នងផ្ទះយ៉ាងខ្ទេចខ្ទីរាបដល់ដី ហើយត្រូវបានប្រឆាំងជំទាស់មកវិញពីអ្នកភូមិ ប៉ុន្តែប៉ូលីសប្រដាប់ដោយខែល នឹងដំបងឆក់បានបង្ក្រាបពួកគាត់។ រូបភាពនៃការប៉ះទង្គិចហិង្សាកាលពីថ្ងៃសុក្រទី១៦ខែកញ្ញាឆ្នាំ២០១១៖ <!--AV--> កំពុងតែអង្គុយនៅពីមុខផ្ទះខ្ទមឈើតូចមួយនៅភូមិ២២ អ្នកស្រី ផាន់ ឈានរ៉េត អាយុ៥៤ឆ្នាំ បាននិយាយថា អ្នកស្រុកបានត្រៀមដុំថ្ម កាំបិត និងដំបងជាស្រេច ប្រសិនណាក្រុមហ៊ុនដឹកគ្រឿងចក្រមកកម្ទេចផ្ទះម្តងទៀត។ «ត្រៀមចាំ បើគេមកឈូសទៀតប្រើអំពើហឹង្សាដាក់វិញ។ មានដុំថ្ម គប់ដុំថ្ម មានស្អីដាក់ហ្នឹង! ឥតមិនបណ្តោយឲ្យឈូសទៀតទេ។ ត្រៀមមានដំបង មានដុំថ្មអញ្ចឹងទៅ។ ច៎ា! កាំបិត ពូថៅ»។ ប្រជាពលរដ្ឋនៅភូមិ២២ ប្រមាណ២៤គ្រួសារ ត្រូវបានសាលាក្រុងបដិសេធមិនចេញប្លង់ស្របច្បាប់ទេ ហើយផ្ទះដែលនៅសេសសល់ ក្រុមហ៊ុនស៊ូកាគូអ៊ីនមានបំណងវាយកម្ទេចចោល។ អ្នកស្រី ឆេង លាភ រស់នៅភូមិ២២ បានមានប្រសាសន៍ថា យើងនឹងធ្វើការតវ៉ាមិនអនុញ្ញាតឲ្យក្រុមហ៊ុនចូលមកឈូសឆាយផ្ទះអ្នកភូមិទៀតទេ។ អ្នកស្រីបាននិយាយទៀតថា យើងនឹងវាយឆ្នាំចាន ជាសញ្ញាដើម្បីប្រមូលផ្តុំអ្នកភូមិ ប្រសិនណាបើមានក្រុមហ៊ុនចូលមកកម្ទេសផ្ទះអ្នកស្រុកដោយគ្មានការជូនដំណឹង។ «ទប់ទល់វិញ ព្រោះអីកន្លងមកៗប្រើអំពើហឹង្សាដ៏ថោកទាបមកលើប្រជាពលរដ្ឋនេះ ដោយគ្នានជូនដំណឹង ដោយគ្មានឱសានវាទដីកាចេញពីតុលាការ ហើយក៏គ្មានជូនដំណឹងប្រជាពលរដ្ឋមុនដែរ។ ស្រាប់តែស្ងៀមៗ មកឈួសឆាយផ្ទះប្រជាពលរដ្ឋ ដល់ពេលហៅប្រជាពលរដ្ឋទៅដោះស្រាយ មានគំនាបឲ្យប្រជាពលរដ្ឋបន្តិចបន្តួច សំណងពុំត្រឹមត្រូវ»។ ផ្ទះរបស់ប្រជាពលរដ្ឋ ដែលបានត្រូវក្រុមហ៊ុនស៊ូកាគូអ៊ីន វាយកម្ទេចបានចងតង់កៅស៊ូ នឹងបានសរសេរជាអក្សរខ្មែរ និងភាសាអង់គ្លេសដែលមានន័យថា៖ «ហេតុអ្វីបានជាវាយផ្ទះអ្នកស្រុកដោយគ្មានដំណោះស្រាយ» និងសរសេរអំពីការទាមទាររកយុត្តិធម៌ជាដើម។ ព្រះតេជគុណ ស៊ីង តុងលី ព្រះជន្ម៧៧ព្រះវស្សា គង់នៅក្នុងទីក្រុងឡុងប៊ិច រដ្ឋកាលីហ្វ័រញ័រ សហរដ្ឋអាមេរិក ដែលបាននិមន្តមកផ្តល់ភួយមួយចំនួនដល់ក្រុមគ្រួសារជនរងគ្រោះ។ ដោយសារតែអាជ្ញាធរវាយកម្ទេច ព្រះអង្គបានមានសង្ឃដីកាថា ការវាយកម្ទេចនេះគឺជាអំពើអយុត្តិធម៌។ «ក្នុងពិភពលោក យើងឥតដែលឃើញ ឥតដែលឃើញ អ្នកដឹកនាំប្រទេសណាដែលប្លន់ប្រជាជនអញ្ចឹង»។ មន្ត្រីសាលាក្រុង និងមន្ត្រីក្រុមហ៊ុនស៊ូកាគូអ៊ីន មិនទាក់ទងបានទេនៅថ្ងៃច័ន្ទនេះ ក៏ប៉ុន្តែសប្តាហ៍មុន លោក កែប ជុតិមាអភិបាលក្រុងភ្នំពេញ ធ្លាប់បានប្រាប់វីអូអេសំឡេងសហរដ្ឋអាមេរិដផ្នែកភាសាខ្មែរថា សម្រាប់ប្រជាពលរដ្ឋដែលរស់នៅមាត់បឹង សាលាក្រុងភ្នំពេញមិនចេញប្លង់កម្មសិទ្ធិឲ្យទេ ក៏ប៉ុន្តែនឹងពិចារណានឹងផ្តល់ជាសំណង៕ This posting includes an audio/video/photo media file: Download Now |
| Posted: 19 Sep 2011 11:00 AM PDT នៅថ្ងៃច័ន្ទនេះ លោកអតីតនាយករដ្ឋមន្ត្រីថៃ Thaksin Shinawatra បានថ្លែងកោតសរសើរដល់កំណើនសេដ្ឋកិច្ចកម្ពុជាយ៉ាងខ្លាំង ខណៈដែលលោកនាយករដ្ឋមន្ត្រី ហ៊ុន សែន និងធនាគារអភិវឌ្ឍន៍អាស៊ី បានព្យាករណ៍អំពីអត្រាកំណើនសេដ្ឋកិច្ចកម្ពុជានៅក្នុងឆ្នាំ២០១១នេះ។ លោក Thaksin បានធ្វើបទឧទ្ទេសនាមនៅក្នុងសន្និសីទសេដ្ឋកិច្ចអាស៊ីនៅទីស្តីការគណៈរដ្ឋមន្ត្រីថា ប្រទេសកម្ពុជាមានកំណើនសេដ្ឋកិច្ចយ៉ាងខ្លាំង បើប្រៀបធៀបនឹងកំណើនសេដ្ឋកិច្ចតំបន់ក្នុងរយៈពេលប៉ុន្មានឆ្នាំចុងក្រោយនេះ។ លោក Thaksin សង្ឃឹមថាប្រទេសកម្ពុជានឹងអាចជាតំណាងឲ្យសេដ្ឋកិច្ចនៅអាស៊ី និងអាចមានតួនាទីដ៏សំខាន់មិនអាចខ្វះបាននៅក្នុងសេដ្ឋកិច្ចពិភពលោក។ លោក Thaksin កាលពីថ្ងៃសៅរ៍ បានជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន ក្រុមអ្នកសេដ្ឋកិច្ចនិងមន្ត្រីរដ្ឋាភិបាលនៅក្នុងសិក្ខាសាលាមួយផ្តោតជាសំខាន់ទៅលើជម្រើសនានា សម្រាប់កំណើនសេដ្ឋកិច្ចកម្ពុជា និងបានផ្តល់អនុសាសន៍សំខាន់ៗ មួយចំនួនដល់រដ្ឋាភិបាលកម្ពុជាឲ្យបង្កើនចំណាយរដ្ឋក្នុងវិស័យហេដ្ឋារចនាសម្ព័ន្ធ និងអប់រំព្រមទាំងធ្វើទំនើបកម្មដល់ប្រព័ន្ធហិរញ្ញវត្ថុរបស់ប្រទេស។ លោក ចាន់ សុផល ប្រធានសមាគមសេដ្ឋកិច្ចកម្ពុជា បានថ្លែងថា កំណើនសេដ្ឋកិច្ចកម្ពុជាអាចសម្រេចបានតាមអ្វីដែលលោក Thaksin ចង់បាន ដើម្បីដើរឲ្យទាន់កំណើនសេដ្ឋកិច្ចរបស់ប្រទេសជិតខាងជឿនលឿនជាងប្រទេសកម្ពុជា ដោយសារប្រទេសកម្ពុជា មានសក្តានុពលល្អ ស្ថិតនៅក្នុងតំបន់ដែលមានលក្ខណៈជឿនលឿន និងមានអំណោយផល ប៉ុន្តែប្រទេសកម្ពុជាត្រូវការឲ្យមានអភិបាលកិច្ចល្អ និងការដឹកនាំ ដែលគិតគូរពីផលប្រយោជន៍ជាតិខ្ពស់យូរអង្វែង។ «ខ្ញុំជឿថាប្រសាសន៍របស់លោក Thaksin គឺជាការលើកទឹកចិត្តឲ្យប្រទេសកម្ពុជាយើងខិតខំចាប់យកផ្លូវ ឬ ក៏មាគ៌ាសេដ្ឋកិច្ចដែលមានកំណើនខ្ពស់ គឺហៅថាជាមធ្យមជុំវិញ១០ភាគរយ។ អ្នកដឹកនាំនៃព្រះរាជាណាចក្រកម្ពុជា នឹងមានការលើកទឹកចិត្តចំពោះប្រសាសន៍របស់លោក Thaksin ហើយខិតខំធ្វើយ៉ាងណាឲ្យសម្រេចបានដូចដែលគំនិតរបស់លោក Thaksin ចង់បាន»។ លោក សុន ឆ័យ តំណាងរាស្ត្រគណបក្សសម រង្សី បានថ្លែងថា ប្រទេសម្ពុជា ជាប្រទេសដែលទិញទំនិញពីប្រទេសថៃប្រមាណ ២.០០០លានដុល្លារអាមេរិចក្នុងមួយឆ្នាំ និងការនាំចេញទៅប្រទេសថៃវិញប្រមាណ ៥០លានដុល្លារអាមេរិកតែប៉ុណ្ណោះ ដែលបង្ហាញពីសេដ្ឋកិច្ចទន់ខ្សោយរបស់កម្ពុជា ហើយសេដ្ឋកិច្ចកម្ពុជាពឹងផ្អែកលើធនធានធម្មជាតិ និងការនាំចេញសម្លៀកបំពាក់។ «យើងគ្រាន់តែស្តាប់ពាក្យសម្តីទាំងនេះហួសពីការពិតហួសហេតុ។ យើងនិយាយឲ្យសាមញ្ញ គឺជាសម្តីបញ្ជោរដែលឲ្យយើង ជាពលរដ្ឋខ្មែរ ត្រូវតែប្រុងប្រយ័ត្ននូវអ្វីដែលមន្ត្រីនយោបាយថៃជើងចាស់រូបនេះ និយាយអំពីស្ថានភាពសេដ្ឋកិច្ចរបស់ប្រទេសកម្ពុជានោះ។ ដូច្នេះការនិយាយបែបនេះ គឺជាការនិយាយដែលយើងអាចសន្និដ្ឋានថា គេកំពុងតែបញ្ជោរយើង ដើម្បីផលប្រយោជន៍អ្វីមួយហើយ»។ លោក កឹម សុខា ប្រធានគណបក្សសិទ្ធិមនុស្ស បានថ្លែងថា លោក Thaksin នឹងទាញយកប្រយោជន៍សេដ្ឋកិច្ចពីប្រទេសកម្ពុជាយកទៅឲ្យប្រជាពលរដ្ឋថៃរបស់លោក។ ដូចដែលលោកចង់បានតំបន់កោះកុង ធ្វើជាមូលដ្ឋានសេដ្ឋកិច្ចផ្តាច់មុខរបស់លោក និងបញ្ហាប្រេងជាដើម។ «ខ្ញុំមើលឃើញថា ការណ៍ដែលគាត់លើកនេះ គឺការជាក់ស្តែងនោះ តិចណាស់ ហើយការប្រមើលមើលពិតដូចគាត់ថានោះ វាតិចណាស់។ វាមិនពិតទេ។ ភាគច្រើនការដែលគាត់លើកកោតសរសើរនេះ ដើម្បីបញ្ជោរលាកនាយករដ្ឋមន្ត្រី ហ៊ុន សែន ដើម្បីបើកឱកាសឲ្យគាត់មកឆក់យកប្រយោជន៍របស់គាត់នៅក្នុងប្រទេសកម្ពុជាតែប៉ុនហ្នឹង»។ លោកនាយករដ្ឋមន្ត្រី ហ៊ុន សែន បានថ្លែងកាលពីសប្តាហ៍មុនថា ប្រទេសកម្ពុជានឹងទទួលបានផលប្រយោជន៍ពីលោក Thaksin ផ្នែកចំណេះដឹង និងបទពិសោធន៍ផ្នែកសេដ្ឋកិច្ចសម្រាប់មកអភិវឌ្ឍន៍សេដ្ឋកិច្ចកម្ពុជា ហើយលោកនឹងមិនពិភាក្សាអំពីបញ្ហាប្រេង និងផលប្រយោជន៍ រវាងប្រទេសទាំងពីរជាមួយលោក Thaksin ទេ៕ This posting includes an audio/video/photo media file: Download Now |
| Posted: 19 Sep 2011 01:11 PM PDT ការប្រគល់ដីសម្បទានសេដ្ឋកិច្ចធំៗ និងការបរបាញ់ខុសច្បាប់បាននិងកំពុងគំរាមកំហែងយ៉ាងធ្ងន់ធ្ងរដល់សត្វទន្សោងនៅកម្ពុជា។ សត្វទន្សោងកម្ពុជាដែលមានចំនួនច្រើនជាងគេបំផុតនៅក្នុងពិភពលោក។ នេះបើយោងតាមរបាយការណ៍របស់អង្គការមូលនិធិសកលសម្រាប់អភិរក្សធម្មជាតិ (WWF) នៅថ្ងៃច័ន្ទនេះ។ របាយការណ៍ដែលធ្វើឡើងបន្ទាប់ពីបានធ្វើការសិក្សារួមគ្នាជាមួយភ្នាក់ងាររដ្ឋាភិបាលកម្ពុជា បានទាមទារឲ្យរដ្ឋាភិបាលធ្វើការអភិរក្សសត្វទន្សោងនេះជាបន្ទាន់ដើម្បីរក្សាតុល្យភាពនៃសត្វព្រៃដែលកំពុងទទួលរងការគំរាមកំហែងពីការផុតពូជនៅកម្ពុជា។ របាយកាណ៍ដដែលបង្ហាញថា សត្វទន្សោងនៅកម្ពុជាក្នុងពេលបច្ចុប្បន្នមានចំនួនចន្លោះពី២.៧០០ ទៅ៥.៧០០ក្បាលខណៈដែលសត្វប្រភេទនេះមានចំនួនសរុបពី៥.៧០០ ទៅ ១១.០០០ ក្បាលក្នុងពិភពលោក។ ក៏ប៉ុន្ដែចំនួននេះបានធ្លាក់ចុះជាង៩០ភាគរយចាប់តាំងពីទសវត្សឆ្នាំ១៩៦០ មកម៉្លេះ។ លោក ទេព អស្នារិទ្ធ មន្រ្តីផ្នែកទំនាក់ទំនងព័ត៌មានរបស់អង្គការ WWF មានប្រសាសន៍ថា ការបាត់បង់ជម្រកសត្វទន្សោង គឺជាកង្វល់ធ្ងន់ធ្ងរជាងការបាត់បង់សត្វទន្សោងដោយការប្រមាញ់ខុសច្បាប់។ «ការបាត់បង់ទីជម្រកនេះ បច្ចុប្បន្នគឺជាកត្តាគំរាមកំហែងមួយដែលយើងមានការព្រួយបារម្ភជាងគេ។ គឺស្ដែងឡើងតាមរូបភាពសម្បទានដីកសិកម្ម។ សម្ពាធចេញពីការវិនិយោគជាតិ និងអន្ដរជាតិ ពាក់ពន្ធ័ទៅនឹងការវិនិយោគកសិកម្មធ្វើឲ្យមានការព្រួយបារម្ភចំពោះការងារអភិរក្ស»។ សត្វទន្សោងគឺជាអម្បូរសត្វគោ។ វាមានពណ៌លឿងចាស់ ហើយប្រែទៅជាពណ៌ប្រផេះនៅពេលដែលវាមានវ័យចំណាស់។ អង្គការមូលនិធិសកលសម្រាប់អភិរក្សធម្មជាតិ (WWF) និងភ្នាក់ងាររដ្ឋាភិបាលមកពីក្រសួងបរិស្ថាន និងក្រសួងកសិកម្មបានធ្វើការសិក្សាលើព្រៃទំហំសរុប៦.០០០ គីឡូម៉ែត្រក្រឡា ក្នុងតំបន់អភិរក្សសត្វព្រៃភ្នំព្រិច និងព្រៃអភិរក្សមណ្ឌលគិរី ដែលតំបន់ទាំងពីរនេះស្ថិតក្នុងខេត្តមណ្ឌលគិរី។ ការសិក្សាចាប់ផ្ដើមតាំងឆ្នាំ២០០៩ មកម៉្លេះមុននឹងឈានដល់ការធ្វើសេចក្ដីសន្និដ្ឋានក្នុងថ្ងៃនេះ។ ការសិក្សានោះបង្ហាញទៀតថា ក្រៅពីសត្វទន្សោង ពពួកសត្វជ្រូកព្រៃ និងសត្វឈ្លូសក៏កំពុងទទួលរងការវិនាសផងដែរ។ អង្គការ WWF បញ្ជាក់ថា សត្វទាំងនេះគឺជាចំណីរបស់សត្វខ្លាធំ ហើយការបាត់បង់សត្វដែលជាចំណីសត្វខ្លាទាំងនេះនឹងធ្វើឲ្យបាត់បង់តុល្យភាពសត្វព្រៃកម្ពុជា។ ជាពិសេស ការបាត់បង់សត្វខ្លាធំដែលនៅសេសសល់ប្រមាណតែជាង៣.០០០ ក្បាលតែប៉ុណ្ណោះក្នុងពិភពលោក។ នេះបើយោងតាមការបញ្ជាក់របស់ទេព អស្នារិទ្ធ។ លោក ផាន់ ចាន់ណា មន្ដ្រីជំនាញនៃនាយកដ្ឋានឧទ្យានជាតិរបស់ក្រសួងបរិស្ថាន និងជាអ្នកចូលរួមស្រាវជ្រាវជាមួយនិងអង្គការ WWF មានប្រសាសន៍ថា ប្រសិនបើការបរបាញ់ខុសច្បាប់នៅតែបន្ដ សត្វទាំងនេះនឹងទទួលរងការផុតពូជ។ «បើសិនជាការបរបាញ់នៅតែបន្តនោះ វាអាចធ្វើឲ្យបាត់បង់។ ជាពិសេសពពួកដែលងាយទទួលរងគ្រោះហ្នឹង! ជាពពួកប្រភេទខ្លាធំ ខ្លារខិនអីហ្នឹង។ នៅពេលដែលចំអីវាថយចុះទៅ អាចពួកវាក៏ថយតាមហ្នឹងដែរ។ ដូចជាករណីទន្សោងដែលពួកខ្ញុំរកឃើញហ្នឹង ព្រោះលើពិភពលោកហ្នឹងគឺចំនួនរបស់ពួកវាគឺថយចុះខ្លាំង»។ មន្ដ្រីក្រសួងកសិកម្មមិនអាចទាក់ទងសុំសេចក្ដីអត្ថាធិបាយបានទេនៅថ្ងៃនេះ។ ទោះជាយ៉ាងណា លោក ទេព អស្នារិទ្ធ មានប្រសាសន៍ថា រដ្ឋាភិបាលបានបង្ហាញការប្រឹងប្រែងការស្ដារឲ្យចំនួនសត្វខ្លាឲ្យមានចំនួនកើនឡើង។ អង្គការ WWF ជំរុញឲ្យមានការជួយទប់ស្កាត់បទល្មើសព្រៃឈើ និងបទល្មើសលើសត្វព្រៃ៕ This posting includes an audio/video/photo media file: Download Now |
| អ្នកភូមិបឹងកក់រងរបួសពេលប៉ះទង្គិចជាមួយប៉ូលីស ខណៈដែលក្រុមហ៊ុនបន្តឈូសផ្ទះពួកគេ Posted: 19 Sep 2011 08:13 AM PDT អ្នកតវ៉ាប៉ះទង្គិចជាមួយប៉ូលិសកាលពីថ្ងៃសុក្រទី១៦ខែកញ្ញាសប្តាហ៍មុននេះ ទាក់ទងនឹងជម្លោះដីធ្លីយ៉ាងយូរនៅតំបន់បឹងកក់ ដែលរដ្ឋាភិបាលជួលឲ្យក្រុមហ៊ុនចិនអភិវឌ្ឍ ហើយដែលមានទំនាក់ទំនងជាមួយឧកញ៉ាម្នាក់។ កាលពីខែមុន លោកនាយករដ្ឋមន្ត្រីហ៊ុន សែនបានយល់ព្រមប្រគល់ដី១២,៤៤ហិកតាឲ្យគ្រួសារនៅសល់ ក្រោយពីការបណ្តេញចេញ។ ការសម្រេចរបស់លោកហ៊ុន សែនធ្វើឡើងក្រោយពីធានាគារពិភពលោកផ្អាកប្រាក់កម្ចីកាលពីខែសីហា។ អ្នកភូមិបឹងកក់ខ្លះបានកម្មសិទ្ធិពីសាលាក្រុង តែអ្នកមិនមានឈ្មោះបានដី នៅតែបន្តតវ៉ា។ សាលាក្រុងភ្នំពេញពន្យល់ថា ពួកគាត់មិនមានឈ្មោះពីព្រោះផ្ទះរបស់គាត់សង់នៅលើបឹង។ <!--AV--> អំពើហិង្សាកើតឡើង ក្រោយពីក្រុមហ៊ុនបញ្ជូនម៉ាស៊ីនឈូសដី២គ្រឿងបំផ្លាញផ្ទះនានា ហើយប៉ូលីសបំបែកការតវ៉ា។ ប៉ូលិសកាន់ខែល ដំបងឆក់ ហើយបានប្រើអំពើហិង្សាបំបែកបាតុករប្រហែល១៥០នាក់ ដែលជួបជុំគ្នានៅបឹងកក់។ លោកអំ សំអាត សកម្មជនសិទ្ធិមនុស្សលីកាដូនិយាយថា៖ «នេះជាការរំលោភទៅលើសិទ្ធិមនុស្សចំពោះប្រជាពលរដ្ឋ ក៏ដូចជាការរំលោភទៅលើផ្ទះសម្បែងឬក៏សិទ្ធិលំនៅដ្ឋានរបស់ប្រជាពលរដ្ឋ ពីព្រោះយើងមិនទាន់បានធ្វើការចរចាដោយសន្តិវិធីដើម្បីរកដំណោះស្រាយសមរម្យផង ហើយយើងទៅបំផ្លិចបំផ្លាញ ទ្រព្យសម្បត្តិ ផ្ទះសម្បែងរបស់គាត់ទៀតគឺធ្វើឲ្យប្រជាពលរដ្ឋកាន់តែក្រីក្រ»។ ក្រុមសិទ្ធិមនុស្សនិងបុគ្គលិកជំនួយបរទេសនិយាយថា មន្ត្រីរដ្ឋាភិបាលបានប្រើកម្លាំងបណ្តេញអ្នកភូមិដើម្បីយកដីលក់ឲ្យឈ្មួញបរទេស និងឈ្មួញក្នុងស្រុក។ ក្រុមតាមដានការបណ្តេញមនុស្សចេញពីផ្ទះសម្បែងឲ្យដឹងថា អ្នកភូមិ៣ម៉ឺននាក់ត្រូវបណ្តេញចេញពីដីរបស់ខ្លួនក្នុងឆាំ្ន២០១០ និង២៧.០០០នាក់ក្នុងឆ្នាំ២០០៩។ គេរំពឹងថា ក្នុងពេលពីរបីឆ្នាំទៀតនឹងមានការបណ្តេញអ្នកភូមិប្រមាណ១៤ម៉ឺននាក់ ក្នុងនោះមាន៧ឬ៨ម៉ឺននាក់នៅភ្នំពេញ។ មន្ត្រីរដ្ឋាភិបាលអះអាងថា ផែនការនេះគឺអភិវឌ្ឍរាជធានីភ្នំពេញ។ មានពលរដ្ឋជិត៤ពាន់គ្រួសារពាក់ព័ន្ធក្នុងជម្លោះដីធ្លីនៅបឹងកក់តាំងពីឆ្នាំ២០០៦មក។ បឹងកក់នៅភ្នំពេញនេះត្រូវចាក់ដីបំពេញដើម្បីសង់ផ្ទះប្រណិតដោយក្រុមហ៊ុនចិនឈ្មោះ Inner Mongolia Erdos Hongjun Investemt Corp ដែលសន្យាចំណាយ៣ពាន់លានដុល្លារសាងសង់ផ្ទះ ស្លដែក និងផលិតអគ្គិសនីនៅកម្ពុជា។ អ្នកភូមិ២.៧៥២គ្រួសារត្រូវបានបណ្តេញចេញពីផ្ទះនៅតំបន់បឹងកក់ហើយ ហើយ១.៥០០គ្រួសារមិនព្រមចេញ ដោយនៅតវ៉ារាល់ថ្ងៃ បដិសេធសំណងចំនួន៨.៥០០ដុល្លារ ឬផ្ទះថ្នូរនៅក្រៅទីក្រុង។ ការទាមទារចុងក្រោយរបស់អ្នកភូមិគឺដីនៅនឹងកន្លែងទំហំ៦៤ម៉ែត្រការ៉េក្នុងមួយគ្រួសារ។ ក្រុមហ៊ុនស៊ូកាកូអ៊ីងទទួលបានសម្បទានដីបឹងកក់នេះ ហើយមានផែនការសាងសង់មជ្ឈមណ្ឌលពាណិជ្ជកម្ម និងផ្ទះសម្រាប់លក់។ បឹងកក់ធ្លាប់ជាកន្លែងប្រជាប្រិយសម្រាប់អ្នកទេសចរមើលថ្ងៃលិចនៅរាជធានីភ្នំពេញ ហើយមានភោជនីយដ្ឋាន និងផ្ទះសំណាក់ជាច្រើនរបស់ប្រជាជនក្នុងតំបន់នេះ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ១៩ កញ្ញា Posted: 19 Sep 2011 06:39 AM PDT ព័ត៌មានចុងក្រោយបំផុត៖ លីប៊ី៖ ពួកអាជ្ញាធរអន្តរកាលនៃប្រទេសលីប៊ីកំពុងប្រឈមមុខបញ្ហាខាងយោធានិងនយោបាយ ខណៈពេលដែលពួកអ្នកប្រយុទ្ធបានជួបប្រទះការតស៊ូដែលបន្តកើតមានឡើងនៅទីតាំងដ៏រឹងមាំដែលនៅសេសសល់របស់អតីតមេដឹកនាំម៉ូអាម៉ារ ហ្កាដាហ្វី ហើយមេដឹកនាំក្រុមប្រឹក្សាអន្តរកាលជាតិបានពន្យារពេលការប្រកាសរដ្ឋាភិបាលថ្មី។ ឥណ្ឌា៖ ភ្លៀងធ្លាក់យ៉ាងខ្លាំងនៅថ្ងៃច័ន្ទនេះបានបង្អាក់ការស្វែងរកពួកអ្នកនៅរស់រានមានជីវិតពីគ្រោះរញ្ជួញដីដែលមានកម្លាំង ៦,៩ ដែលបានសម្លាប់មនុស្សយ៉ាងហោចណាស់ក៏៥៣នាក់នៅតំបន់ដាច់ស្រយាលមួយនៃភ្នំហេមពាន្តនៃព្រំដែនប្រទេសឥណ្ឌា ប្រទេសនេប៉ាល់ និងប្រទេសចិន។ ប៉ាគីស្ថាន៖ ប៉ូលីសប៉ាគីស្ថាននិយាយថាអ្នកដាក់គ្រាប់បែកអត្តឃាតម្នាក់បានចុចបំផ្ទុះគ្រឿងផ្ទុះដែលផ្ទុកក្នុងរថយន្តនៅខាងក្រៅគេហដ្ឋានរបស់មន្ត្រីប៉ូលីសជាន់ខ្ពស់ម្នាក់ក្នុងទីក្រុង Karachi ដោយបានសម្លាប់មនុស្សយ៉ាងហោចណាស់ក៏៨នាក់ដែរ។ យេម៉ែន៖ សាក្សីនៅក្នុងរដ្ឋធានីសាណា (Sana'a) នៃប្រទេសយេម៉ែននិយាយថា កងកម្លាំងសន្តិសុខរដ្ឋាភិបាលបានសម្លាប់មនុស្សយ៉ាងតិច៥នាក់ នៅក្នុងការវាយប្រយុទ្ធជាមួយក្រុមអ្នកតវ៉ាប្រឆាំងរដ្ឋាភិបាល នៅពេលមួយថ្ងៃបន្ទាប់ពីទីក្រុងនេះបានពើបប្រទះនឹងអំពើហិង្សាដ៏អាក្រក់បំផុតក្នុងពេលជាច្រើនខែកន្លងមកនេះ។ ចិន/កោះតៃវ៉ាន់៖ បណ្តាញផ្សាយព័ត៌មានរដ្ឋចិន កំពុងព្រមានថានឹងមានផលវិបាកយ៉ាងធ្ងន់ធ្ងរ ប្រសិនបើសហរដ្ឋអាមេរិកបន្តធ្វើទៅតាមផែនការដែលបានរាយការណ៍ឲ្យដឹង ក្នុងការធ្វើឲ្យប្រសើរឡើងនូវកងយន្តហោះចម្បាំង F-16 ដែលកោះតៃវ៉ាន់មានទាំងប៉ុន្មាន។ សហរដ្ឋអាមេរិក៖ លោកប្រធានាធិបតីសហរដ្ឋអាមេរិកបារ៉ាក់ អូបាម៉ា នឹងប្រកាសអនុសាសន៍របស់លោកដើម្បីកាត់បន្ថយឱនភាពថវិការសហព័ន្ធនៅថ្ងៃច័ន្ទនេះ។ សំណើនេះអំពាវនាវឲ្យមានប្រាក់ចំណូលពន្ធដាថ្មីចំនួន១,៥លានលានដុល្លារ រួមមានអត្រាពន្ធដាអប្បបរមាថ្មីដ៏សម្រាប់អ្នកទាំងឡាយណាដែលរកប្រាក់ចំណូលបានជាង១លានដុល្លារក្នុងមួយឆ្នាំ។ កូរ៉េខាងជើង៖ នៅថ្ងៃច័ន្ទនេះ អ្នកការទូតកំពូលរបស់ប្រទេសចិនបានអំពាវនាវឲ្យមានការចាប់ផ្តើមកិច្ចចរចាជាថ្មីឡើងវិញអំពីការលុបបំបាត់អាវុធនុយក្លេអ៊ែរជាមួយប្រទេសកូរ៉េខាងជើង។ថ្លែងនៅក្នុងសិក្ខាសាលាមួយស្តីពីកិច្ចចរចានេះនៅទីក្រុងប៉េកាំង លោករដ្ឋមន្រ្តីការបរទេស យ៉ាង ជាឈី (Yang Jiechi) បានជម្រាបអ្នកការទូតនិងអ្នកបញ្ញវន្តថា ប្រទេសចិនមានសេចក្តីរីករាយក្នុងការឃើញការទាក់ទងគ្នាទៅវិញទៅមកជាវិជ្ជមានក្នុងចំណោមភាគីទាំង៦ ដែលជាប់ទាក់ទងនឹងកិច្ចចរចានេះ។ ព័ត៌មាននៅពេលមុននេះ៖ <!--IMAGE-RIGHT--> ឥណ្ឌា៖ មានការរង្គើផែនដីខ្លាំងមួយមានកម្លាំង៦,៩បានកើតមានទ្បើងក្នុងផ្នែកឦសាននៃប្រទេសឥណ្ឌា ក្នុងប្រទេសនេប៉ាល់និងផ្នែកឯទៀតៗនៃតំបន់នោះ បណ្តាលឱ្យមនុស្សយ៉ាងតិចណាស់៨នាក់ស្លាប់ ធ្វើឱ្យខូចអគារនិងនាំឱ្យមានការស្លន់ស្លោ។ នីហ្សេរីយ៉ា៖ ប្រទេសនីហ្សេរីយ៉ាបានប្រកាសផ្តល់រង្វាន់យ៉ាងច្រើនឱ្យដល់ជនទាំងទ្បាយណាដែលផ្តល់ព័ត៌មានអំពីជនជាមេគំនិតនៃការបំផ្ទុះគ្រាប់បែកដ៏ប្រល័យកាលពីខែមុននៅឯទីស្នាក់ការធំរបស់អ.ស.ប.ក្នុងក្រុងអាប៊ូហ្សា (Abuja)។ លីប៊ី៖ ក្រុមយុទ្ធជននៃក្រុមប្រឹក្សាជាតិអន្តរកាលនៃប្រទេសលីប៊ីបានជួបប្រទះនឹងការទប់ទល់យ៉ាងខ្លាំងកាលពីថ្ងៃអាទិត្យនៅក្នុងសំបុក២ដែលសេសសល់របស់ Moammar Gadhafi នៅពេលដែលពួកមេដឹកនាំ NTC បានពន្យារពេលការប្រកាសរដ្ឋាភិបាលថ្មីមួយ។ យេម៉ែន៖ ពួកអ្នកឃើញហេតុការណ៍ដោយផ្ទាល់ និងពួកពេទ្យបាននិយាយថា កងកម្លាំងសន្តិសុខ យេម៉ែនបានសម្លាប់មនុស្សយ៉ាងតិចណាស់១៥នាក់កាលពីថ្ងៃអាទិត្យនៅពេលដែលពួកគេបានបាញ់ទៅលើក្រុមបាតុករប្រឆាំងនឹងរដ្ឋាភិបាលក្នុងរដ្ឋធានីសាណា។ ប៉ាឡេស្ទីន៖ ពួកប្រេសិតមកពីប្រទេសនិងអង្គការបួនទទួលបន្ទុកកិច្ចការភូមិភាគមជ្ឈឹមបូព៌ា (Mideast Quartet) ប្រជុំគ្នាក្នុងបូរីញូវយ៉កកាលពីថ្ងៃអាទិត្យ នៅក្នុងកិច្ចខិតខំប្រឹងប្រែងថែមទៀតដើម្បីបញ្ចៀសកុំឱ្យមានការប៉ះទង្គិចខាងពាក្យសម្តីនៅក្នុងអ.ស.ប.អំពីបញ្ហារដ្ឋប៉ាឡេស្ទីន។ សហរដ្ឋអាមេរិក៖ នៅថ្ងៃច័ន្ទនេះ លោកប្រធានាធិបតីស.រ.អ.បារ៉ាក់ អូបាម៉ា នឹងប្រកាសអំពីផែនការថែមទៀត ដើម្បីកាត់បន្ថយឱនភាពថវិការដ្ឋាភិបាល ដោយមានរួមបញ្ចូលទាំងសំណើមួយសម្រាប់អត្រាពន្ធដារតិចបំផុតសម្រាប់ពួកបុគ្គលដែលមានប្រាក់ចំណូលជាង១លានដុល្លារក្នុងមួយឆ្នាំ។ ប៉ាគីស្ថាន៖ ពួកមន្ត្រីស៊ើបការណ៍សម្ងាត់ប៉ាគីស្ថានបាននិយាយថា ក្រុមទាហានរដ្ឋាភិបាលនិងពួកជនសកម្មប្រយុទ្ធតាលីបាន់បានប្រយុទ្ធគ្នាកាលពីថ្ងៃអាទិត្យដើម្បីដណ្តើមយកកម្ទេចនៃយន្តហោះគ្មានមនុស្សបើកមួយគ្រឿងដែលបានធ្លាក់នៅក្នុងតំបន់កុលសម្ព័ន្ធ Waziristan ខាងត្បូង។ អាហ្វហ្គានីស្ថាន៖ អង្កការណាតូបាននិយាយថាកងកម្លាំងចម្រុះនិងកងកម្លាំងរដ្ឋាភិបាលអាហ្វហ្គានីស្ថានបានសម្លាប់ពួកបះបោរ១០នាក់នៅក្នុងការឆ្មក់វាយប្រហារមួយទៅលើកន្លែងផលិតគ្រឿងញៀនមួយក្នុងផ្នែកខាងត្បូងនៃប្រទេសអាហ្វហ្គានីស្ថាន នៅពេលដែលពួកជនសកម្មប្រយុទ្ធបានសម្លាប់ទាហានណាតូ៣នាក់ក្នុងឧប្បតិ្តហេតុដាច់ដោយទ្បែកពីគ្នា។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
