VOA News: ព័ត៌មាន: “មេធាវីទាមទារឲ្យមានការដោះលែងអៀង សារី ឲ្យនៅក្រៅឃុំ” plus 6 more |
- មេធាវីទាមទារឲ្យមានការដោះលែងអៀង សារី ឲ្យនៅក្រៅឃុំ
- មេដឹកនាំអាស៊ាននឹងពិភាក្សាអំពីជម្លោះកម្ពុជាថៃនៅសន្និសីទកំពូល
- កម្ពុជាប្រឈមនឹងគម្លាតបច្ចេកវិទ្យាព័ត៌មានក្នុងចំណោមប្រជាពលរដ្ឋ
- កម្ពុជានៅតែប្រយុទ្ធនឹងភេរវកម្មទោះបីមេភេរវកម្មស្លាប់
- តុលាការយុត្តិធម៌អន្តរជាតិនឹងដោះស្រាយបណ្តឹងកម្ពុជាក្នុងពេលឆាប់ៗ
- រដ្ឋសភាអាមេរិកសាទរមរណភាពរបស់ប៊ិនឡាដិន
- ទោះបីប៊ីនឡាដិនស្លាប់ក្តី មន្ត្រីឥណ្ឌានៅតែបារម្ភ
| មេធាវីទាមទារឲ្យមានការដោះលែងអៀង សារី ឲ្យនៅក្រៅឃុំ Posted: 04 May 2011 02:55 PM PDT សហមេធាវីរបស់អៀង សារី បានទទូចសារជាថ្មីនៅថ្ងៃពុធនេះ ឲ្យសាលាក្ដីខ្មែរក្រហមដោះលែងកូនក្ដីរបស់ខ្លួនជាបន្ទាន់ដោយអះអាងថា ការឃុំខ្លួនកូនក្ដីរបស់ខ្លួនជាបណ្ដោះអាសន្នខុសច្បាប់រហូតមកទល់ពេលនេះ។ ក្រុមមេធាវីការពារក្ដីបានថ្លែងនៅក្នុងសវនាការលើកទី១លើរឿងក្តីរបស់អតីតរដ្ឋមន្ដ្រីក្រសួងការបរទេសខ្មែរក្រហមថា វិធានរបស់សាលាក្ដីខ្មែរក្រហមអនុញ្ញាតឲ្យបន្ដការឃុំឃាំងបណ្ដោះអាសន្នចំពោះជនជាប់ចោទត្រឹមតែបីឆ្នាំតែប៉ុណ្ណោះ ហើយអាចបន្ដការឃុំខ្លួនបន្ថែមទៀតសម្រាប់រយៈពេលបួនខែមុននឹងមានការជម្រះក្ដី។ ក៏ប៉ុន្ដែក្រោយពីសហចៅក្រមស៊ើបអង្កេតបញ្ជូនដីការដំណោះស្រាយ ឬដីការបញ្ជូនរឿងទៅជំនុំជម្រះនៅកាន់សាលាក្ដីអង្គជំនុំជម្រះសាលាដំបូងកាលពីខែកញ្ញា ឆ្នាំ២០១០ រហូតមកទល់ពេលនេះអៀង សារី ត្រូវបានឃុំខ្លួនលើសរយៈពេលកំណត់ជាងបីខែទៅហើយ។ លោក អាង ឧត្តម សហមេធាវីកម្ពុជារបស់អៀង សារី បានទាមទារថា ការឃុំខ្លួនកូនក្ដីរបស់លោកជាបណ្ដោះអាសន្ន គួរតែត្រូវចាត់ទុកជាមោឃៈ ហើយលើកឡើងថា ការដោះលែងលោកអៀង សារី គឺជាដំណោះស្រាយយ៉ាងសក្ដិសមបំផុត ហើយត្រូវដាក់លោកអៀង សារី ឲ្យស្ថិតនៅក្រោមការត្រួតពិនិត្យរបស់តុលាការជាបន្ទាន់។ អតីតបងធំទី៣រូបនេះមានអាយុប្រហែល៨៥ឆ្នាំហើយ។ គាត់ត្រូវបានចោទប្រកាន់ពីបទឧក្រិដ្ឋកម្មសង្រ្កាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ជាមួយនឹងប្រពន្ធរបស់គាត់គឺអៀង ធីរិទ្ធ អតីតរដ្ឋមន្ដ្រីក្រសួងកិច្ចការនារីសម័យខ្មែរក្រហម ជាមួយនួន ជា អតីតប្រធានសភាខ្មែរក្រហម និងខៀវ សំផន អតីតប្រមុខរដ្ឋកម្ពុជាប្រជាធិបតេយ្យ។ បទចោទទាំងនេះទាក់ទងទៅនឹងការស្លាប់របស់ប្រជាពលរដ្ឋកម្ពុជា ជិត២លាននាក់ ក្នុងអំឡុងពេលដែលពួកគេកាន់កាប់អំណាចចន្លោះពីឆ្នាំ ១៩៧៥-៧៩។ កាលពីចុងខែមករា អង្គជំនុំជម្រះសាលាដំបូងបានសម្រេចមិនដោះលែងជនជាប់សង្ស័យអៀង ធីរិទ្ធ នួន ជា និងខៀវ សំផន ឲ្យនៅក្រៅឃុំជាបណ្ដោះអាសន្ននោះទេ ដោយសំអាងហេតុផលដែលអាចបង្កឲ្យមានការប៉ះពាល់ដល់សន្ដិសុខសង្គម ការរត់គេចខ្លួន និងការគំរាមកំហែងដល់សក្សីជាដើម។ សហមេធាវីបរទេសរបស់អៀង សារី លោក ម៉ៃឃ័ល កាណាវ៉ាស (Michael Karnavas) មានប្រសាសន៍ថា ការឃុំខ្លួនអៀង សារី នៅផ្ទះក្រោមការត្រួតពិនិត្យរបស់តុលាការនឹងធានាដល់វត្តមានរបស់គាត់នៅពេលដែលមានសវនាការ។ ហើយជនជាប់ចោទនឹងមិនរត់គេចខ្លួននោះទេ។ ទោះជាយ៉ាងនេះក្ដីសហព្រះរាជអជ្ញាបរទេស លោក ដេល លីសាក់ (Dale Lysak) បានលើកឡើងថា វានឹងមានហានិភ័យខ្ពស់ដល់ការរត់គេចខ្លួនរបស់អៀង សារី ប្រសិនបើគាត់ត្រូវឃុំឃាំងនៅផ្ទះរបស់គាត់នោះ។ សហព្រះរាជអាជ្ញាបរទេសដដែលបានផ្ដល់ហេតុផលថា ជនជាប់ចោទមានធនធាន ហើយជនជាប់ចោទកាន់លិខិតឆ្លងដែនកម្ពុជា និងធ្លាប់កាន់លិខិតឆ្លងដែនចិនផងដែរ៕ This posting includes an audio/video/photo media file: Download Now |
| មេដឹកនាំអាស៊ាននឹងពិភាក្សាអំពីជម្លោះកម្ពុជាថៃនៅសន្និសីទកំពូល Posted: 04 May 2011 01:44 PM PDT មេដឹកនាំពីសមាគមប្រជាជាតិអាស៊ីអាគ្នេយ៍ជួបប្រជុំគ្នានៅសប្តាហ៍នេះក្នុងរដ្ឋធានីហ្សាការតាពីថ្ងៃទី៥ដល់ថ្ងៃទី៨ខែឧសភាដើម្បីពិភាក្សាការអភិវឌ្ឍសេដ្ឋកិច្ចហើយនឹងបញ្ហាសន្តិសុខក្នុងតំបន់។ ទោះជាមិនមានចែងជាក់លាក់នៅលើរបៀបវារៈក៏ដោយ ការខិតខំប្រឹងប្រែងរបស់សមាគម អាស៊ាន ធ្វើការសម្រុះសម្រួលបញ្ចប់ជម្លោះព្រំដែនកម្ពុជាថៃ នឹងទំនងក្លាយជាការយកចិត្តទុកដាក់យ៉ាងខ្លាំងរបស់សន្និសីទកំពូលនេះ។ លោក Michael Tene អ្នកនាំពាក្យក្រសួងការបរទេសឥណ្ឌូណេស៊ីនិយាយថាតួនាទី អាស៊ាន ក្នុងការព្យាយាមបញ្ចប់ជម្លោះព្រំដែនដែលកំពុងបន្តមានឡើងរវាងថៃនិងកម្ពុជា សឹងតែនឹងប្រាកដត្រូវលើកយកមកពិភាក្សានៅពេលប្រមុខរដ្ឋជួបគ្នានៅថ្ងៃទី៧ ខែឧសភា។ «ព្រឹត្តិការណ៍ក្នុងប្រទេសថៃ បញ្ហាព្រំដែនថៃនិងកម្ពុជាពិតជាបញ្ហាដ៏សំខាន់ដែលបានកើតឡើងនៅក្នុងតំបន់របស់យើង។ ដូច្នេះ ខ្ញុំជឿជាក់ថាបញ្ហាបែបនេះនឹងត្រូវលើកឡើងនៅក្នុងសន្និសីទកំពូល»។ ប្រទេសឥណ្ឌូណេស៊ី ជាប្រធានសមាគម អាស៊ាននៅឆ្នាំនេះហើយបានធ្វើជាគោលដៅដើម្បីប្រែក្លាយទៅជា អង្គការមួយដែលជាសមាគមមានភាពធូរលង់ទៅជាអង្គការមួយចូលរួមយ៉ាងសកម្មនៅក្នុងបញ្ហាសេដ្ឋកិច្ចនិងសន្តិសុខក្នុងសាកលលោក។ ក៏ប៉ុន្តែការប៉ះទង្គិចកាលពីខែកុម្ភៈបានផ្ទុះឡើងរវាងសមាជិក អាស៊ាន ពីរគឺប្រទេសថៃនិងកម្ពុជា។ កងទ័ពប្រទេសទាំង២បានប្រយុទ្ធគ្នាចុះឡើងនៅតំបន់មួយជុំវិញប្រាសាទព្រះវិហាររបស់កម្ពុជា ដែលជាកន្លែងប្រវត្តិសាស្រ្តដែលប្រទេសទាំងពីរបានទាមទារថាជាផ្នែកមួយនៃកេរ្ត៍ដំណែលរបស់ខ្លួន។ ក្នុងឋានៈជាមេដឹកនាំ អាស៊ាន លោក Marty Natalegawa រដ្ឋមន្រ្តីក្រសួងការបរទេសឥណ្ឌូណេស៊ីបានចាត់ទុកថាជម្លោះនេះជាករណីនៃការសាកល្បងចំពោះអ្វីដែលមេដឹកនាំអង្គការនេះ អាចធ្វើឲ្យសម្រេច ហើយលោកបានព្យាយាមយ៉ាងសកម្មដើម្បីចរចាបញ្ចប់ជម្លោះនេះ។ រហូតមកទល់ពេលនេះ ការខិតខំប្រឹងប្រែងរបស់លោកមិនបានជោគជ័យទេ ក៏ប៉ុន្តែលោក Surin Pitsuwan អគ្គលេខាធិការសមាគមន៍ អាស៊ាននិយាយថាលោក Natalegawa គួរតែបានទទួលកេរ្តិ៍ឈ្មោះចំពោះការខិតខំខាងការទូតដែលមិនធ្លាប់មានកាលពីពេលមុន។ «មិនដែលធ្លាប់មានជំនួបពិសេសរបស់រដ្ឋមន្រ្តីក្រសួងការបទេសលើបញ្ហារវាងរដ្ឋនិងរដ្ឋកាលពីពេលមុន។ យើងបានធ្វើឲ្យទៅជាប្រវត្តិសាស្រ្តនៅក្រោមការដឹកនាំឥណ្ឌូណេស៊ី។ មិនដែលធ្លាប់មានការប៉ុនប៉ងរបស់ប្រធានធ្វើដំណើរទៅរដ្ឋធានីរបស់ប្រទេសទាំងពីរហើយកាន់ដៃគ្នានិងពិភាក្សាហើយនិងព្យាយាមបញ្ចុះបញ្ចូលថានេះជាបញ្ហាដែលយើងទាំងអស់គ្នានឹងត្រូវដោះស្រាយជាមួយគ្នា»។ លោកនិយាយទៀតថាក្រៅពីការបន្តដោះស្រាយជម្លោះថៃនិងកម្ពុជា ពួកមេដឹកនាំសន្និសិទកំពូល ក៏នឹងទំនងជាពិភាក្សាពីរបៀបស្ថាបនាការខិតខំប្រឹងប្រែងរបស់ឥណ្ឌូណេស៊ីដើម្បីធ្វើឲ្យ អាស៊ាន ក្លាយជាសហគមន៍មានសេដ្ឋកិច្ចនិងនយោបាយបញ្ចូលគ្នានៅពេលអនាគត៕ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| កម្ពុជាប្រឈមនឹងគម្លាតបច្ចេកវិទ្យាព័ត៌មានក្នុងចំណោមប្រជាពលរដ្ឋ Posted: 04 May 2011 01:29 PM PDT មន្ត្រីនៃអង្គការសហប្រជាជាតិ អង្គការសិទ្ធិមនុស្ស សមាគមអ្នកកាសែត អ្នកយកព័ត៌មាន និងនិស្សិតសរុបប្រមាណ៣០០នាក់ បាននាំគ្នាប្រារព្វទិវាសេរីភាពព័ត៌មានពិភពលោកក្នុងទីក្រុងភ្នំពេញនៅថ្ងៃអង្គារនេះ។ ក្រុមមន្ត្រីទាំងនេះ បានលើកឡើងថាកម្ពុជាកំពុងប្រឈមនឹងគម្លាតបច្ចេកវិទ្យាព័ត៌មានដ៏ធំសម្បើមក្នុងចំណោមប្រជាពលរដ្ឋរបស់ខ្លួន និងកង្វះច្បាប់ស្តីពីការទទួលបានព័ត៌មានក្នុងប្រទេសដ៏ក្រីក្រមួយនេះ។ ថ្លែងនៅក្នុងពិធីអបអរសាទរទិវាសេរីភាពព័ត៌មានឆ្នាំនេះ ដែលបានផ្តោតទៅលើប្រធានបទសកលថា «ព័ត៌មានសតវត្សរ៍ទី២១៖ ព្រំដែនថ្មី ឧបសគ្គថ្មី» អ្នកស្រី អាន ឡឺម៉េស្ត្រ (Anne Lemaistre) តំណាងអង្គការយូណេស្កូ (UNESCO) ប្រចាំកម្ពុជាបានកត់សម្គាល់ថា កម្ពុជានៅមានគម្លាតយ៉ាងធំនៅឡើយខាងបច្ចេកវិទ្យាព័ត៌មានថ្មីក្នុងចំណោមប្រជាពលរដ្ឋរបស់ខ្លួន។ លោកស្រីថ្លែងថា៖ «ដោយមានប្រជាពលរដ្ឋតែ១%ប៉ុណ្ណោះដែលទទួលបានការប្រើប្រាស់ប្រព័ន្ធអ៊ីនធឺណិត កម្ពុជានៅមានគម្លាតបច្ចេកវិទ្យាដ៏ធំសម្បើមនៅឡើយ។» គម្លាតដ៏ធំគឺដោយសារកម្ពុជានៅមិនទាន់មានហេដ្ឋារចនាសម្ព័ន្ធខាងបច្ចេកវិទ្យាទូលំទូលាយនៅឡើយ ហើយចំណេះដឹងរបស់ពលរដ្ឋទាក់ទងនឹងបច្ចេកវិទ្យាព័ត៌មាននេះក៏នៅមានកម្រិត។ អ្នកស្រី អាន មានប្រសាសន៍ថា ប្រជាពលរដ្ឋក្នុងប្រទេសក្រីក្រដូចជាកម្ពុជាជាដើមនេះ មិនមែនត្រូវការត្រឹមតែតម្រូវការចាំបាច់មួយចំនួនដូចជាអាហារឬសម្លៀកបំពាក់សម្រាប់រស់នៅប៉ុណ្ណោះទេ តែពួកគេក៏ត្រូវការព័ត៌មាន និងការអប់រំផងដែរ ដើម្បីដោះស្រាយភាពក្រីក្ររបស់ពួកគេ។ លោកស្រីបន្តទៀតថា៖ «អ្នកខ្លះនិយាយថា អ្វីដែលប្រជាពលរដ្ឋនៅក្នុងប្រទេសក្រីក្រពិតជាត្រូវការនោះ គឺអាហារ ទឹក ការងារ ការថែទាំសុខភាព និងអនាម័យ មិនមែនបច្ចេកវិទ្យាថ្មីៗនោះទេ។ ប៉ុន្តែ គំនិតផ្តួចផ្តើម និងគម្រោងថ្មីៗជាច្រើននៅជុំវិញពិភពលោក បានបង្ហាញថា ហេដ្ឋារចនាសម្ព័ន្ធនៃបច្ចេកវិទ្យាព័ត៌មាន អាចដើរតួនាទីជាអាវុធដ៏ល្អបំផុតប្រឆាំងនឹងភាពក្រីក្រតាមរយៈការដោះស្រាយដោយចំណាយថវិកាតិចលើបញ្ហានានារាប់ចាប់ពីការថែទាំសុខភាពដល់បញ្ហាស្បៀងអាហាររហូតដល់បញ្ហាពន្យាកំណើតជាដើម តាមរយៈការចែកចាយព័ត៌មាន និងការអប់រំឲ្យទាន់ពេលវេលា»។ ក្រៅពីគម្លាតនៃបច្ចេកវិទ្យាព័ត៌មានក្នុងចំណោមប្រជាពលរដ្ឋកម្ពុជានេះ ការទទួលបានព័ត៌មានក៏មានលក្ខណៈរិតត្បិតយ៉ាងខ្លាំងដែរក្នុងបរិបទសង្គមកម្ពុជាសព្វថ្ងៃ។ នេះបើផ្អែកតាមលោក សេក បរិសុទ្ធ ប្រធានកម្មវិធីប្រព័ន្ធផ្សព្វផ្សាយនៃអង្គការផេកកម្ពុជា។ លោក សេក បរិសុទ្ធ បានថ្លែងនៅក្នុងបទអន្តរាគមន៍របស់លោកថា «អ្នកកាសែតកម្ពុជាបានប្រឈមយ៉ាងធំនោះគឺសិទ្ធិ ឬលទ្ធភាពទទួលព័ត៌មាន» ដោយសារតែកម្ពុជាខ្វះច្បាប់មួយដែលធានាដល់សិទ្ធិទទួលបានព័ត៌មាន។ បើតាមលោក សេក បរិសុទ្ធ បច្ចុប្បន្ន មានប្រទេសចំនួនប្រមាណ៨០ហើយនៅជុំវិញពិភពលោក ដែលបានបង្កើតច្បាប់ស្តីពីសិទ្ធិទទួលបានព័ត៌មាន។ កាលពីខែកុម្ភៈកន្លងទៅនេះ រដ្ឋាភិបាលកម្ពុជា បានទទួលរងការរិះគន់យ៉ាងខ្លាំងពីសំណាក់អង្គការ សមាគមការពារសិទ្ធិមនុស្សជាតិនិងអង្តរជាតិថា បានព្យាយាមរាំងខ្ទប់គេហទំព័រមួយចំនួនដែលមានទំនោរប្រឆាំងនឹងរដ្ឋាភិបាល។ ការរាំងខ្ទប់ឬបិទគេហទំព័រដែលគេចាត់ទុកថា ជាការរិតត្បិតដល់សិទ្ធិសេរីភាពក្នុងការបញ្ចេញមតិនិងការទទួលព័ត៌មានរបស់ពលរដ្ឋ។ របាយការណ៍របស់សមាគមកម្ពុជាការពារអ្នកកាសែត បានលើកឡើងថា ថ្វីត្បិតតែបច្ចុប្បន្ន ពុំមានអ្នកកាសែតណាម្នាក់ត្រូវផ្តន្ទាទោសឲ្យជាប់ពន្ធនាគារដោយការអនុវត្តវិជ្ជាជីវៈរបស់ខ្លួនក៏ដោយ ក៏មានបណ្តឹងប្រឆាំងនឹងអ្នកកាសែតមួយចំនួននៅតែបន្តមាន ដូចជាបទបរិហារកេរ្តិ៍ បទផ្សាយព័ត៌មានមិនពិត បទឆបោក និងជំរិតទារប្រាក់ជាដើម។ កញ្ញា ហេង សុខចាន់ណារដ្ឋ និស្សិតសាកលវិទ្យាល័យភូមិន្ទភ្នំពេញ បាននិយាយនៅក្នុងបទសម្ភាសថា នៅក្នុងយុគសម័យថ្មីនេះ រដ្ឋាភិបាលត្រូវបើកទូលាយខាងវិស័យព័ត៌មានដើម្បីបើកឱកាសឲ្យពលរដ្ឋចូលរួមបានកាន់តែច្រើននៅក្នុងការសកម្មភាពអភិវឌ្ឍសង្គមនានា។ កញ្ញា សុខចាន់ណារដ្ឋ ថ្លែងថា៖ «នៅក្នុងសម័យនេះ យើងមានបច្ចេកវិទ្យាទំនើប ដូចជាយើងមានអ៊ីនធឺណិត យើងអាចបង្កើតប្លហ្កខ្លួនឯង យើងមានបណ្តាញសង្គមសម្រាប់សរសេរបញ្ចេញមតិ។ អញ្ចឹងខ្ញុំគិតថា តិច ឬច្រើនពួកយើងទាំងអស់គ្នាមានឱកាសច្រើនក្នុងការបញ្ចេញមតិផ្ទាល់ខ្លួនឯងទៅលើបញ្ហាសង្គមឬបញ្ហាអីផ្សេងៗទៀត»។ លោក ខៀវ កាញារិទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលកម្ពុជា បានថ្លែងថា រដ្ឋាភិបាលកម្ពុជាបានបើកទូលាយដល់វិស័យព័ត៌មាននេះ ហើយថា រដ្ឋាភិបាលកន្លងមកគ្មានគោលនយោបាយគាបសង្កត់ ឬរិតបន្តឹងសេរីភាពសារព័ត៌មាននោះទេ។ «ជាគោលការណ៍របស់រដ្ឋាភិបាល យើងជំរុញឲ្យមានការប្រើប្រាស់ទូលាយ។ ហើយជាការពិតហើយ យើងមិនអាចបង្ខំក្មេងមួយឲ្យគិតដូចយើងបានទេ យុវជនគេត្រូវការមានអត្តសញ្ញាណថ្មីរបស់គេ។ គេចង់និយាយ គេចង់បង្ហាញរូបរាងគេ»។ លោក ខៀវ កាញារិទ្ធ មានប្រសាសន៍បន្ថែមថា ចំណែកសេចក្តីព្រាងច្បាប់ស្តីពីសិទ្ធិទទួលបានព័ត៌មានវិញ កំពុងស្ថិតក្នុងការពិភាក្សានៅឡើយ ដោយពុំទាន់ប្រាកដថាតើច្បាប់នោះអាចនឹងលេចចេញជារូបរាងនៅពេលណានោះទេ។ យ៉ាងណាក៏ដោយ អ្នកស្រី អាន ឡឺម៉េស្ត្រ នៃអង្គការយូណេស្កូប្រចាំកម្ពុជា មានប្រសាសន៍ថា រដ្ឋាភិបាលកម្ពុជាគួរតែយ៉ាងហោចណាស់ជួយប្រជាពលរដ្ឋរបស់ខ្លួនក្នុងការប្រើប្រាស់បច្ចេកវិទ្យាថ្មីៗ ជាពិសេស អ៊ីនធឺណិត ដើម្បីភ្ជាប់គម្លាតដ៏ធំសម្បើមខាងបច្ចេកវិទ្យាព័ត៌មានក្នុងចំណោមពួកគេនោះ ប្រយោជន៍ដើម្បីឲ្យពួកគេអាចទទួលបានព័ត៌មានគ្រប់ជ្រុងជ្រោយសម្រាប់ការសម្រេចចិត្តរបស់ពួកគេ៕ This posting includes an audio/video/photo media file: Download Now |
| កម្ពុជានៅតែប្រយុទ្ធនឹងភេរវកម្មទោះបីមេភេរវកម្មស្លាប់ Posted: 04 May 2011 01:08 PM PDT កម្ពុជាបញ្ជាក់ជាថ្មីពីការប្រយុទ្ធប្រឆាំងនឹងអំពើភេរវកម្មដោយ និយាយថា មិនមានជំហរផ្លាស់ប្តូរទេ ក្រោយពីការស្លាប់របស់អូសាម៉ា ប៊ិន ឡាដិន (Osama bin Laden)។ ក្តីបារម្ភនានាអំពីបញ្ហាសងសឹកក្រោយពីមេដឹកនាំភេរវករអូសាម៉ា ប៊ិន ឡាដិន ត្រូវបានសម្លាប់ដោយកងទ័ពអាមេរិកកាលពីថ្ងៃច័ន្ទ។ មានសំណួរថាតើអំពើភេរកម្មនឹងត្រូវបន្តដល់ពេលណានោះ,កម្ពុជាបានបញ្ជាក់ថា ខ្លួននឹងបន្តការប្រយុទ្ធប្រឆាំងនឹងអំពើភេរវកម្មដោយគ្មានការប្រែប្រួលជាមួយនឹងសហគមន៍អន្តរជាតិ។ នេះបើតាមការអះអាងរបស់លោក កុយ គង់ អ្នកនាំពាក្យក្រសួងការបរទេសកម្ពុជា។ លោក កុយ គង់ ថ្លែងថា៖ «ជំហររាជរដ្ឋាភិបាលយើងអត់មានអីប្រែប្រួលទេ។ យើងតែងតែ ប្រកាន់ជំហរច្បាស់លាស់ណាស់គឺប្រឆាំងដាច់ខាតចំពោះអំពើភេរវកម្មនេះ ព្រោះភេរវកម្មនេះជាអំពើមួយដែលសហគមន៍អន្តរជាតិ ក៏ដូច ជាសាកលលោកទាំងមូលធ្វើការផ្តន្ទាទោសហើយនឹងថ្កោល ទោស»។ មន្ត្រីរដ្ឋាភិបាល និងលោក គង់អះអាងថា កម្ពុជាមានច្បាប់ និងស្ថាប័នប្រយុទ្ធប្រឆាំងនឹងភេរវកម្ម និងចូលរួមហ្វឹកហ្វឺនជាមួយអន្តរជាតិផងដែរ។ លោក គង់ថ្លែងយ៉ាងដូច្នេះមួយថ្ងៃក្រោយពេលសហរដ្ឋអាមេរិកបានប្រកាសពីប្រតិបត្តិការនៅប៉ាគិស្ថាន ហើយសម្លាប់អូសាម៉ា ប៊ីន ឡាដិន ដែលជាមេដឹកនាំក្រុមអាល់កៃដាដែលទទួលខុសត្រូវចំពោះការវាយប្រហារនឹងសម្លាប់ជីវិតពលរដ្ឋអាមេរិក៣ពាន់នាក់ កាលពី១០ឆ្នាំមុន។ ប៊ីន ឡាដិនក្រោយមកបានស្ថិតក្នុងបញ្ជីតាមប្រម៉ាញ់ចាប់ខ្លួនខ្លាំងជាងគេរបស់អាមេរិក។ លោក ផៃ ស៊ីផានអ្នកនាំពាក្យរបស់រដ្ឋាភិបាលមួយរូបបានអះអាងថា ការចាប់បាន ឬការសម្លាប់ភេរវករហ្នឹងជាការសាទររបស់ពិភពលោកទាំងមូល ដែលស្អប់អំពើហឹង្សា។ លោកបញ្ជាក់ថា៖ «កម្ពុជាយើងមិនត្រឹមតែបានចូលរួមតាមរយៈសិក្ខាសាលាឬការ ចុះហត្ថលេខាទេយើងបានចាប់បញ្ជូនភេរវករចេញពីទឹកដីកម្ពុជា។ ដូច្នេះកម្ពុជាត្រូវការសន្តិភាព កម្ពុជាមិនគាំទ្ររាល់ភេរវកម្ម ភេរវកម្មឆ្លង ដែន»។ មន្ត្រីប៉ូលីសកម្ពុជាបានអះអាងថា មានការពង្រឹងសន្តិសុខនៅតាមគោលដៅជាច្រើនដូចជាស្ថានទូតបរទេស ហើយបង្កើនការប្រុងប្រយ័ត្នចំពោះឧក្រិដ្ឋកម្មឆ្លងដែន ជាដើមក្រោយពីបានឮដំណឹងអំពីការស្លាប់របស់ ប៊ិន ឡាដិន។ នេះបើតាមការអះអាងរបស់ឧត្តមសេនីយ៍ គាត ចន្ថារិទ្ធ អ្នកនាំពាក្យនគបាលជាតិដែលអះអាងថា មានបទបញ្ជា ពីអគ្គស្នងការនេត សាវឿនទាក់ទងនឹងបញ្ហាបណ្តឹងសន្តិសុខ។ លោកបានប្រាប់វីអូអេខ្មែរតាមទូរស័ព្ទថា៖ «ការកម្ចាត់បានមេភេរវករជារឿងមួយ តែសុវត្ថិភាពប្រជាពលរដ្ឋខ្មែរជារឿងសំខាន់ជាងគេ»។ លោក បណ្ឌិត ឡៅ ម៉ុងហៃអតីតៈអ្នកស្រាវជ្រាវជាន់ខ្ពស់របស់គណៈកម្មាធិការសិទ្ធិមនុស្សអាស៊ីបានអះអាងថា ការសម្លាប់អូសាម៉ា ប៊ីន ឡាដិននឹងនាំឲ្យមានការខឹងសម្បារពីអ្នកក្រោមបង្គាប់ ដែលអាចនឹងមានការប្រឆាំងនឹងពួកបច្ចឹមប្រទេស។ លោកថ្លែងថា ការបង្រ្កាបបាន ប៊ិន ឡាដិន មិនទាន់ជាជោគជ័យពេញលេញនៅឡើយទេ។ កម្ពុជាត្រូវសហរដ្ឋអាមេរិកចាត់ទុកថាជាដៃគូរប្រយុទ្ធប្រឆាំងនឹងអំពើភេរកម្មដ៏ល្អ ក្រោយពេលដែលមានកិច្ចសហការជាមួយអាមេរិកចាប់ខ្លួនមេបណ្តាញមួយចំនួននៃក្រុមភេរវករ ជេម៉ាអា អ៊ិស្លាម៉ីយ៉ាក្នុងប្រទេស ក្រោយពីមានការមកសម្ងំស្នាក់នៅរបស់ហាំបាលីនៅកម្ពុជា ហើយក្រោយមកត្រូវចាប់ខ្លួនក្នុងប្រទេសថៃឆ្នាំ២០០៣៕ This posting includes an audio/video/photo media file: Download Now |
| តុលាការយុត្តិធម៌អន្តរជាតិនឹងដោះស្រាយបណ្តឹងកម្ពុជាក្នុងពេលឆាប់ៗ Posted: 03 May 2011 04:59 PM PDT មន្រ្តីជាន់ខ្ពស់តុលាការយុត្តិធម៌អន្តរជាតិក្រុងឡាអេប្រទេសហូឡង់ បានឲ្យដឹងនៅថ្ងៃអង្គារ៍នេះថា តុលាការនឹងបើកសវនាការផ្ទាល់មាត់ ដើម្បីដោះស្រាយបណ្តឹងរបស់កម្ពុជានៅក្នុងរយៈពេលពីរទៅបីសប្តាហ៍ខាងមុខទៀត ។ សេចក្តីអះអាងធ្វើឡើងបន្ទាប់ពីកម្ពុជា បានដាក់បណ្តឹងមួយច្បាប់កាលពីថ្ងៃទី២៨ ខែមេសា ទៅកាន់តុលាការយុត្តិធម៌អន្តរជាតិ ដោយស្នើសុំឲ្យមានអន្តរាគមន៍របស់តុលាការចំនួនពីរ គឺទី១ស្នើឲ្យ តុលាការចាត់វិធានការជាបន្ទាន់ដើម្បីការពារប្រាសាទព្រះវិហារ ដែលជាដើមចមនៃការប្រយុទ្ឋគ្នារវាងកងទ័ពកម្ពុជា និងកងទ័ពថៃ និងសំណើមួយទៀត គឺសុំឲ្យតុលាការក្រុងឡាអេបកស្រាយសេចក្តីសម្រេចរបស់ខ្លួន ចំពោះការប្រគល់ប្រសាទព្រះវិហារទៅឲ្យកម្ពុជាកាន់កាប់ប្រាសាទដែលថៃធ្លាប់បានទាមទារយកទៅកាន់កាប់កាលពីពេលមុន ។ លោក ប៊ីរិស ហេម (Biris Heim) មន្រ្តីព័ត៌មានរបស់តុលាការយុត្តិធម៌អន្តរជាតិ ICJ បានប្រាប់វីអូអេ ខ្មែរតាមខ្សែទូរស័ព្ទពីទីក្រុងឡាអេថា តុលាការបានទាក់ទងកម្ពុជា និងថៃរួចហើយ ដើម្បីកំណត់ការបរិច្ឆេទបើកសវនការស្តីពីការស្នើសុំការការពារប្រាសាទព្រះវិហារជាបន្ទាន់ពីខាងភាគីកម្ពុជា។ លោកថ្លែងថា៖ «កម្ពុជាបានស្នើសុំជាបន្ទាន់នូវវិធានការការពារប្រាសាទដែលយោងតាមកម្ពុជា គឺដើម្បីឲ្យថៃបញ្ឈប់ការកាន់កាប់ដែនដីមានជម្លោះ ហើយបញ្ឈប់ជាពិសេសការប្រយុទ្ធគ្នា។ ដូច្នេះតុលាការត្រូវកំណត់កាលបរិច្ឆេទមួយក្នុងរយៈពេលដ៏ខ្លីនេះជាមួយនឹងភាគីទាំងពីរដើម្បីឲ្យភាគីនីមួយៗបង្ហាញខ្លួនក្នុងសវនាការដើម្បីផ្ដល់ការអះអាងរបស់ខ្លួន។ សវនាការផ្ទាល់មាត់នេះនឹងត្រូវប្រព្រឹត្តិទៅក្នុងរយៈពេលពីរបីថ្ងៃ ឬពីរ បីសប្ដាហ៍ខាងមុខនេះ»។ យោងតាមលោក ប៊ីរិស តុលាការក្រុងឡាអេ អាចនឹងបើកសវនាការមួយទៀត ដើម្បីផ្តល់ការបកស្រាយសេចក្តីសម្រេចរបស់ខ្លួនកាលពីខែមិថុនា ឆ្នាំ១៩៦២ គឺជាសេចក្តីសម្រេចដែលបានប្រគល់ប្រាសាទព្រះវិហារឲ្យទៅកម្ពុជាកាន់កាប់។ ក៏ប៉ុន្តែបើមិនដូច្នោះនោះទេ តុលាការយុត្តិធម៌អន្តរជាតិ គ្រាន់តែស្នើឲ្យភាគីមានជម្លោះផ្តល់ជូននូវការយល់ឃើញរបស់ខ្លួនជាលាយល័ក្ខអក្សរចំពោះសេចក្តីសម្រេចរបស់តុលាការកាលពី៤៩ឆ្នាំមុន ហើយតុលាការនឹងធ្វើការបកស្រាយជាលាយល័ក្ខអក្សរដែរដោយពុំចាំបាច់បើកសវនការនោះទេ។ កម្ពុជា និងថៃមានជម្លោះប្រទាញប្រទង់គ្នានៅជុំវិញប្រាសាទព្រះវិហារ ដែលអូសបន្លាយចាប់តាំងពីទស្សវត្សទី៥០មកម៉្លេះ ហើយការប្រយុទ្ឋគ្នាក៏បានចាប់ផ្តើមនៅពេលនោះដែរ បើទោះបីជាមានសេចក្តីសម្រេចរបស់តុលាការក្រុងឡាអេ ក៏ដោយ។ ថៃបានជំទាស់សារជាថ្មីចំពោះការដាក់ប្រាសាទព្រះវិហាររបស់ខ្មែរទៅជាសម្បត្តិបេតិកភណ្ឌ ពិភពលោកនៅឆ្នាំ២០០៨ ហើយជម្លោះប្រដាប់អាវុធ បានរីករាលដាលចាប់ពីពេលនោះមក។ ការប្រយុទ្ឋគ្នាបានឈានទៅដល់ថ្ងៃទី១២ហើយ រហូតមកទល់ព្រឹកថ្ងៃអង្គារ៍នេះ គឺនៅតំបន់ប្រសាទ តាក្របី និងប្រសាទតាមាន់របស់ខ្មែរ ដែលជាប់ព្រំដែនជាមួយខេត្តសុរិន្ទរបស់ថៃ។ មានជនរងគ្រោះយ៉ាងតិចចំនួន១៨នាក់បានស្លាប់ ទាំងភាគីកម្ពុជា និងទាំងភាគីប្រទេសថៃ។ កម្ពុជា បានសម្រេចចិត្តដាក់បណ្តឹងទៅកាន់តុលាការយុត្តិធម៌អន្តរជាតិក្រោយពីពុំអាចស្វែងរកដំណោះស្រាយជាលក្ខណៈទ្វេភាគីបាន ។ ភាគីជម្លោះសុទ្ធតែបានទាមទារដីទំហំ៤.៦ គីឡូម៉ែត្រ នៅក្បែប្រាសាទព្រះវិហារថាជារបស់ខ្លួន។ នាយករដ្ឋមន្រ្តីថៃ លោកអាភីស៊ីប វីចាជីវ៉ា បានអះអាងថា ថៃនឹងរៀបចំក្រុមអ្នកជំនាញមួយទៅកាន់តុលាការក្រុងឡាអេ។ ក៏ប៉ុន្តែរហូតពេលនេះ គេនៅមិនទាន់ដឹងពីសមាសភាពនៃគណៈប្រតិភូរបស់ប្រទេសទាំងពីរសម្រាប់ធ្វើដំណើទៅកាន់ទីក្រុងឡាអេនៅឡើយ៕ This posting includes an audio/video/photo media file: Download Now |
| រដ្ឋសភាអាមេរិកសាទរមរណភាពរបស់ប៊ិនឡាដិន Posted: 03 May 2011 04:04 PM PDT សមាជិកសភាសហរដ្ឋអាមេរិកស្វាគមន៍មរណភាពប៊ីនឡាដិន ប៉ុន្តែក្រើនរំឭកថាការតស៊ូប្រឆាំងភេរវកម្មនៅវែងឆ្ងាយទៀត។ លោក ហារី រ៉េដ (Harry Reid)មេដឹកនាំសមាជិកព្រឹទ្ធសភាសំឡេងភាគតិច និយាយថា លោកបានទទួលទូរស័ព្ទពីលោកប្រធានាធិបតីបារ៉ាក់អូបាម៉ា មិនយូរប៉ុន្មានមុនពេលលោកប្រធានាធិបតីប្រកាសថា អូសាម៉ាប៊ីនឡាឌីនត្រូវបានកងកម្លាំងពិសេសរបស់អាមេរិកសម្លាប់។ នៅឯវិមានសភា សភាជិកព្រឹទ្ធសភាមកពីរដ្ឋណេវ៉ាដារូបនេះបានបញ្ចេញប្រតិកម្មរបស់លោកតាមរបៀបស្ងប់ស្ងាត់ និងស្រងូតស្រងាត់។ លោកថ្លែងថា៖ «ថ្ងៃនេះប្រជាពលរដ្ឋអាមេរិកាំងទូទាំងប្រទេសស្វាគមន៍ចំពោះព័ត៌មានថា បុរសកំណាចដែលតំណាងឲ្យបិសាច ត្រូវបានកាត់ទោសដោយកងកម្លាំងអាមេរិក។ មរណភាពរបស់ជននេះគឺជាជោគជ័យសំខាន់បំផុតក្នុងការប្រយុទ្ធរបស់យើងប្រឆាំងភេរវកម្មអាល់កៃដា និងជាការបញ្ជូនសារយ៉ាងច្បាស់មួយព្រមានភេរវករទូទាំងពិភពលោក»។ លោករ៉េដបានសម្តែងការសរសើរដល់កងកម្លាំងអាមេរិកនិងមន្ត្រីស៊ើបការណ៍សម្ងាត់ចំពោះបេសកកម្មដ៏ជោគជ័យរបស់គេ។ លោកបាននិយាយថា ការសម្រេចចិត្តរបស់លោកប្រធានាធិបតីអូបាម៉ា ក្នុងការផ្តោតការយកចិត្តទុកដាក់លើប្រទេសអាហ្វហ្កានិស្ថាន និងប៉ាគិស្ថានបង្ហាញពីសារៈសំខាន់ក្នុងការកំណត់ទីតាំងលាក់ខ្លួន និងក្នុងការសម្លាប់មេដឹកនាំភេរវករនេះ។ ដូចមេដឹកនាំព្រឹទ្ធសភាសំឡេងភាគច្រើនដែរ លោកខាល ឡេវិន (Carl Levin)នៃរដ្ឋ មីឈីហ្កិន (Michigan) ដែលជាប្រធានគណៈកម្មាធិការសេវាកងទ័ពនិយាយថា រឿងប្រឌិតចាស់គំរិលដែលថា ប៊ីនឡាឌីនជាអ្នកចម្បាំងមិនអាចរងគ្រោះ ហើយដែលបង្កការលំបាកធំធេងសម្រាប់បុព្វហេតុរបស់ជននេះ ត្រូវបានសាបរលាបដោយមរណភាពរបស់គាត់នៅកន្លែងលាក់ខ្លួនដ៏រឹងមាំ និងស្តុកស្តម្ភ។ លោកខាលថ្លែងថា៖ «នៅពេលគេគិតថា តួឯករបស់គេកំពុងជ្រកក្នុងរូងភ្នំតាមព្រំដែនរវាងប្រទេសអាហ្វហ្កានិស្ថាន និងប៉ាគិស្ថាននេះ តាមពិតជននេះកំពុងលាក់ខ្លួននៅកន្លែងសុខស្រួលជាច្រើនឆ្នាំ ក្នុងវិមានដ៏ធំ នៅពេលដែលតួឯកក្លែងក្លាយរូបនេះបានបញ្ជូនមនុស្សតូចតាចទៅសម្លាប់ប្រជាជនយ៉ាងព្រៃផ្សៃ»។ សមាជិកសភាខាងគណបក្សប្រជាធិបតេយ្យនេះបានស្វាគមន៍ចំពោះប្រតិកម្មជាវិជ្ជមានរបស់រដ្ឋាភិបាលប៉ាគិស្ថានទាក់ទងនឹងមរណភាពរបស់ប៊ីន ឡាដិន។ ដោយលោកកត់សម្គាល់ថា ប៊ីន ឡាដិនរស់នៅជិតកន្លែងបណ្តុះបណ្តាលកងទ័ព លោកឡេវិន បាននិយាយដោយប្រើពាក្យសម្តីធ្ងន់ៗទៅលើកងកម្លាំង និងផ្នែកស៊ើបការណ៍សម្ងាត់របស់ប៉ាគិស្ថាន។ លោក ឡេវិន មានប្រសាសន៍ថា៖ «គេត្រូវមានហេតុផលច្រើនយកមកពន្យល់»។ លោកស្រី ស៊ូសាន ខូល្លីនស៍ (Susan Collins) សមាជិកព្រឹទ្ធសភាខាងគណបក្សសាធារណរដ្ឋនៃរដ្ឋម៉េន (Maine) និយាយថា ពេលប្រជាពលរដ្ឋអាមេរិកប្រារព្ធជ័យជម្នះនេះ យើងមិនត្រូវប្រហែសក្នុងការយាមល្បាតទេ។ លោកបន្តទៀតថា៖ «យើងមិនត្រូវសម្រាកទេ ពីព្រោះការគំរាមកំហែងនៅតែមានជាបន្តមកលើយើង ថ្វីបើផ្នែកស៊ើបការណ៍សម្ងាត់របស់យើងទទួលបានជោគជ័យធំធេងយ៉ាងនេះក៏ដោយ»។ លោកស្រី ខូល្លីនស៍ និយាយថា លោកស្រីបារម្ភថា ជនជ្រុលនិយមអាចនឹងធ្វើការវាយប្រហារសងសឹកមកលើសហរដ្ឋអាមេរិកនៅក្នុងប្រទេស ឬនៅបរទេស៕ ប្រែសម្រួលដោយ ពិន ស៊ីសុវណ្ណ This posting includes an audio/video/photo media file: Download Now |
| ទោះបីប៊ីនឡាដិនស្លាប់ក្តី មន្ត្រីឥណ្ឌានៅតែបារម្ភ Posted: 03 May 2011 04:17 PM PDT នៅប្រទេសឥណ្ឌាក្រុមមន្រ្តីជាន់ខ្ពស់មានប្រតិកម្មដោយបង្ហាញ «ការព្រួយបារម្ភយ៉ាងខ្លាំង»ទៅនឹងព័ត៌មានដែលថា អូសាម៉ា ប៊ីនឡាដិន (Osama Bin Laden) ត្រូវបានសម្លាប់នៅក្នុងប្រតិបត្តិការរបស់អាមេរិកនៅប៉ាគីស្ថាន។ ពួកអស់លោកនិយាយថា ព័ត៌មាននោះជាការបញ្ជាក់ថា ប៉ាគីស្ថានបន្តផ្តល់ជម្រកដល់ក្រុមភេរវជន។ នាយកការិយាល័យវីអូអេនៅទីក្រុងញូឌេលី លោក Kurt Achin រាយការណ៍ថា ក្រុមមន្រ្តីឥណ្ឌាជាន់ខ្ពស់បានអំពាវនាវជាថ្មីម្តងទៀតឲ្យប្រទេសប៉ាគីស្ថាននាំយកអ្នកទាំងអស់ដែលបានរៀបចំផែនការភេរវកម្មនៅក្នុងទីក្រុងមិមបៃ (Mumbai)កាលពីឆ្នាំ២០០៨នោះ មកកាន់តុលាការ។ រដ្ឋមន្រ្តីការបរទេសឥណ្ឌាបានសម្តែងការស្វាគមន៍ចំពោះព័ត៌មានដែលថា អូសាម៉ា ប៊ិន ឡាដិនបានស្លាប់ទៅហើយនោះ ដោយនិយាយថា វាជា «ជ័យជម្នះជាប្រវត្តិសាស្រ្ត» មួយនៅក្នុងសង្គ្រាមប្រឆាំងនឹងអំពើភេរវកម្ម។ ទោះយ៉ាងនេះក៏ដោយ សេចក្តីថ្លែងការណ៍ពីលោកអែស អិមគ្រីស្នា (S. M. Krishna) បាននិយាយថា ពិភពលោកត្រូវដាក់សម្ពាធដើម្បី«លុបបំបាត់ចោលទីជម្រក និងកន្លែងលាក់ខ្លួនសុខសាន្ត ផ្តល់ឲ្យភេរវជននៅក្នុងប្រទេសជិតខាងឥណ្ឌា»។ ឥណ្ឌាមានការព្រួយបារម្ភជាយូរមកហើយអំពីការគំរាមកំហែងរបស់ភេរវជន ដែលមានប្រភពនៅប៉ាគីស្ថាន ហើយកងកម្លាំងឥណ្ឌាបានផ្តោតការយកចិត្តទុកដាក់យ៉ាងខ្លាំងចំពោះការវាយប្រហារសងសឹកដែលអាចកើតមានឡើង ក្រោយពីការស្លាប់របស់ប៊ីន ឡាដិន។ រដ្ឋមន្រ្តីក្រសួងមហាផ្ទៃឥណ្ឌា លោកភី ឈីតដាបារាម (P. Chidabaram)បានមានប្រសាសន៍នៅក្នុងសេចក្តីថ្លែងការណ៍មួយថា ប៊ីនឡាដិនបានលាក់ខ្លួននៅក្នុងទីជម្រកដ៏ជ្រៅក្នុងប្រទេសប៉ាគីស្ថាន ហើយលោកបង្ហាញការព្រួយបារម្ភរបស់ឥណ្ឌាដែលថា ប៉ាគីស្ថានជាទីកន្លែងលាក់ខ្លួនសម្រាប់«ភេរវជន»នៃក្រុមផ្សេងៗគ្នា។ លោកបារ៉ាត ខាណាដ (Bharat Karnad) នៃមជ្ឈមណ្ឌលញូឌេលីសម្រាប់ការស្រាវជ្រាវគោលនយោបាយ ធ្វើជាទីប្រឹក្សារដ្ឋាភិបាលជាច្រើនឆ្នាំហើយលើបញ្ហាគោលនយោបាយសន្តិសុខជាតិ។ លោកថ្លែងថា គ្មាននរណាម្នាក់គួរភ្ញាក់ផ្អើលអំពីការរកឃើញប៊ីនឡាដិននៅចម្ងាយតែជិត១០០គីឡូម៉ែត្រពីទីក្រុងអ៊ិស្លាមម៉ាបាដនោះទេ។ «វាមិនមែនជាការលាតត្រដាងរឿងថ្មីទេទាំងស្រុងទេ។ គ្រប់គ្នាបានដឹងរួចហើយអំពីរឿងនេះ។ រដ្ឋធានីវ៉ាស៊ីនតោន ក៏ដូចជាក្រុងញូដេលីដែរគឺបានដឹងច្រើនដូចគ្នា។ ពិតណាស់សំនួរនៅត្រង់ថា តើព័ត៌មានច្បាស់ការណ៍កម្រិតណា ទើបស.រ.អា.ចាត់វិធានការ»។ ក្រុមមន្ត្រីស.រ.អា.បានសង្ស័យថា ប៊ីនឡាដិនលាក់ខ្លួនក្នុងតំបន់ព្រៃក្រាស់តាមព្រំដែននៃប្រទេសប៉ាគីស្ថាន និងអាហ្វហ្គានីស្ថាន។ លោកខាណាដថ្លែងថា ក្រុមមន្ត្រីស៊ើបការណ៍សម្ងាត់ឥណ្ឌាបានព្យាយាមយូរមកហើយក្នុងការបញ្ចុះបញ្ចូលឲ្យស.រ.អា.ជឿថា ប៊ីនឡាដិនស្ថិតនៅក្នុងប្រទេសប៉ាគីស្ថាន មិនមែននៅអាហ្វហ្កានីស្ថានទេ។ ក៏ប៉ុន្តែលោកបានត្អូញត្អែរថា ស.រ.អា.បានពន្យារពេលចាត់វិធានការ។ ពលរដ្ឋឥណ្ឌាជាច្រើនមើលឃើញថា ការស្លាប់របស់ប៊ីនឡាដិនបញ្ជាក់ថា ការមិនទុកចិត្តជាមូលដ្ឋានរបស់ឥណ្ឌាចំពោះប្រទេសប៉ាគីស្ថានគឺជារឿងត្រឹមត្រូវ។ការព្យាយាមបង្កើនកិច្ចសន្ទនាផ្នែកការទូតរវាងប្រទេសជិតខាងដែលមានអាវុធនុយក្លេអ៊ែរទាំងពីរនេះត្រូវគេរំពឹងថា នឹងបន្តទៅមុខទៀត៕ ប្រែសម្រួលដោយ លី ម៉ូរីវ៉ាន់ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
