VOA News: ព័ត៌មាន: “មន្ត្រីអាមេរិកព្រមានថាការគំរាមពីភេរវកម្មនឹងនៅមានក្រោយការស្លាប់របស់ប៊ិនឡាដិន” plus 5 more |
- មន្ត្រីអាមេរិកព្រមានថាការគំរាមពីភេរវកម្មនឹងនៅមានក្រោយការស្លាប់របស់ប៊ិនឡាដិន
- មន្រ្តីអាមេរិកផ្តល់សេចក្តីលម្អិតអំពីកិច្ចប្រតិបត្តិការសម្លាប់ប៊ិនឡាដិន
- បារាំងអំពាវនាវឲ្យកម្ពុជានិងថៃឈប់បាញ់
- ពលរដ្ឋកម្ពុជាអបអរមរណភាពរបស់មេភេរវកម្ម
- រថក្រោះត្រូវបានពង្រាយបន្ថែមនៅតាមព្រំដែនមានជម្លោះ
- ឥទ្ធិពលរបស់ប៊ិនឡាដិននៅក្នុងមជ្ឈឹមបូព៌ាចុះថយនៅពេលថ្មីៗនេះ
| មន្ត្រីអាមេរិកព្រមានថាការគំរាមពីភេរវកម្មនឹងនៅមានក្រោយការស្លាប់របស់ប៊ិនឡាដិន Posted: 03 May 2011 03:08 PM PDT ខណៈជនជាតិអាមេរិកមានប្រតិកម្មចំពោះព័ត៌មានអំពីការសម្លាប់អូសាម៉ាប៊ិនឡាដិនដោយកងកុំម៉ង់ដូសហរដ្ឋអាមេរិក ក្រុមមន្ដ្រីអាមេរិកព្រមានថា ការស្លាប់របស់មេដឹកនាំក្រុមអាល់កៃដានៅក្នុងការវាយឆ្មក់មួយនៅប៉ាគីស្ថានមិនបំបាត់ការគម្រាមវាយប្រហាររបស់ពួកភេរវជនទេ។ ការវាយឆ្មក់ប្រកបដោយជោគជ័យនៅក្នុងទីក្រុង អាប្បូតាបាដ (Abbotabad) ប្រទេសប៉ាគីស្ថាន នាពេលព្រលឹមថ្ងៃច័ន្ទ បាននាំឲ្យលោកប្រធានាធិបតីអូបាម៉ាប្រកាសថា «មានយុត្ដិធ៌មហើយ»។ លោកបាន គីមូនអគ្គលេខាធិការអង្គការសហប្រជាជាតិ ហៅការសម្លាប់នេះ ថាជា «ឱកាសដ៏សំខាន់មួយ»។ ក៏ប៉ុន្ដែលោកនីកូឡាស សារកូស៊ី ប្រធានាធិបតីបារាំង ថ្លែងដោយប្រុងប្រយ័ត្នថា នេះមិនមែនជាទីបញ្ចប់នៃក្រុមអាល់កៃដាទេ ហើយលោកស្រី ហ៊ីឡារី គ្លិនតុន រដ្ឋមន្ដ្រីក្រសួងការបរទេសសហរដ្ឋអាមេរិកមានប្រសាសន៍ថា ការប្រយុទ្ធនឹងមិនចប់ត្រឹមការស្លាប់របស់ប៊ិនឡាដិននេះទេ។ លោកស្រីថ្លែងថា៖ «សហប្រតិបត្ដិការជាបន្ដទៅទៀតនឹងមានសារ:សំខាន់នាពេលខាងមុខនេះ ពីព្រោះថា ទោះបីយើងមានព្រិត្ដិការណ៍ដ៏សំខាន់នេះក៏ដោយ ក៏យើងមិនគួរភ្លេចថា សង្គ្រាមដើម្បីបញ្ឈប់ពួកអាល់កៃដា និងអង្គការចាត់តាំងភេរវកម្មរបស់ក្រុមនេះនឹងមិនចប់ទៅដោយការស្លាប់របស់ប៊ិនឡាដិននោះទេ»។ លោក ដ្យន ប្រិន្និន (John Brennan) ជំនួយការរបស់លោកប្រធានាធិបតីអូបាម៉ា ទទួលបន្ទុកខាងសន្ដិសុខមាតុភូមិ និងការប្រឆាំងភេរវកម្ម ប្រាប់ក្រុមអ្នកយកព័ត៌មានថា មេដឹកនាំក្រុមអាល់កៃដា «ពួននៅកណ្ដាលវាល» ហើយប្រាកដជាបានទទួលជំនួយ។ ប៊ិន ឡាដិនត្រូវបានតាមដានរហូតដល់បរិវេណមួយស្ថិតនៅក្នុងភូមិអ្នកមានទ្រព្យសម្បត្ដិ ដែលមានចម្ងាយប្រមាណ៥០គីឡូម៉ែត្រពីរដ្ឋធានីអ៊ីស្លាម៉ាបាតនៅក្នុងតំបន់មួយពេញដោយកងកម្លាំង និងបុគ្គលិកស៊ើបការណ៍សម្ងាត់របស់ប៉ាគីស្ថានយ៉ាងច្រើនកុះករ។ លោក ប្រិន្និន ប្រាប់អ្នកយកព័ត៌មាននៅថ្ងៃច័ន្ទថា ក្រុមអាល់ខាដាត្រូវបានបំផ្លាញហើយ ក៏ប៉ុន្ដែនៅតែអាចបង្កគ្រោះថ្នាក់។ ប្រតិបត្ដិការប្រកបដោយជោគជ័យកើតមានឡើងប៉ុន្មានខែប៉ុណ្ណោះមុនថ្ងៃខួបនៃការវាយប្រហាររបស់ភេរវជនទៅលើទីក្រុងញូយ៉ក និងទីក្រុងវ៉ាស៊ីនតោន នៅថ្ងៃទី១១ខែកញ្ញាឆ្នាំ២០០១។ ក្នុងរយ:ពេល១០ឆ្នាំចាប់តាំងពីពេលនោះមក អគាររបស់រដ្ឋាភិបាលសហរដ្ឋអាមេរិកត្រូវបានបំពាក់ប្រព័ន្ធការពារសន្ដិសុខថ្មី។ ក្រសួងសន្ដិសុខមាតុភូមិចេញសេចក្ដីថ្លែងការណ៍មួយថា ខ្លួននឹងមិនប្រកាសការប្រុងជើងការដោយសារតែការស្លាប់របស់ប៊ិនឡាដិនទេ ក៏ប៉ុន្ដែថាទីភ្នាក់ងារនេះនឹងនៅតែស្ថិតនៅក្នុងភាពប្រុងប្រយ័ត្នខ្ពស់។ ក្រុមមន្ដ្រីក្នុងតំបន់នៅទូទាំងប្រទេសបានគាំទ្រអត្ថាធិប្បាយរបស់ទីក្រុងវ៉ាស៊ីនតោន។ លោក ឆាលី បិក (Charlie Beck) ស្នងការប៉ូលីសទីក្រុង ឡស អានដ្យឺឡេស (Los Angeles) ហៅថ្ងៃដែលប៊ិនឡាដិនស្លាប់ថា ជាថ្ងៃដ៏ល្អមួយសម្រាប់សហរដ្ឋអាមេរិក ក៏ប៉ុន្ដែបានចេញការព្រមានមួយ។ «ខណៈយើងទទួលជ័យជម្នះនោះ យើងត្រូវតែប្រុងប្រយ័ត្នជានិច្ចថា ការកម្ចាត់មេដឹកនាំម្នាក់មិនអាចបំបាត់អង្គការនោះបានទេ។ យើងនៅតែប្រឈមមុខនឹងការគម្រាមយ៉ាងធ្ងន់ធ្ងរ។ ទោះបីជាគ្មានការគម្រាមជាក់លាក់ទៅលើទីក្រុង ឡស អានដ្យឺឡេស ក៏ដោយ ក៏ការគម្រាមជាទូទៅនៅតែមាន ហើយកាតព្វកិច្ចរបស់ខ្ញុំគឺធ្វើឲ្យទីក្រុងនេះមានសុវត្ថិភាព»។ អ្នកស្រី ម៉ារហ្ការ៉ិត ហ្ក្រេ (Margaret Gray) ដែលរស់នៅក្នុងទីក្រុង ឡស អានដ្យឺឡេស បើករថយន្ដដឹកកូនស្រីរបស់គាត់ទៅចំណតយន្ដហោះដើម្បីជិះយន្ដហោះទៅទីក្រុងឈីខាហ្គោ (Chicago) ហើយ អ្នកស្រី ហ្រ្កេ រីករាយនឹងបានឃើញមានសន្ដិសុខបន្ថែមទៀត។ អ្នកស្រីបន្តថា៖ «មានកន្លែងឈប់សម្រាប់សន្ដិសុខពេលយើងចូលទៅខាងក្នុង ហើយលោកត្រូវឆែកកន្ទុយរថយន្ដរបស់ខ្ញុំ។ ខ្ញុំចង់និយាយថា លោកគ្រាន់តែអើតក្បាលចូលតាមបង្អួច ក៏ប៉ុន្ដែលោកមានការជឿជាក់នៅក្នុងចិត្ដ ហើយនៅទីបំផុតលោកនិយាយថា «អញ្ជើញឲ្យបានសុខសប្បាយ»។ ធ្វើបែបនេះមិនមែនជាវិធានការតឹងតែងទេ ដូច្នេះខ្ញុំមានអារម្មណ៍ល្អថា ពួកគេចង់ឲ្យមានសន្ដិសុខ ហើយពួកគេព្យាយាមប្រុងជើងការ ហើយប្រុងប្រៀបខ្លួន»។ លោក រ៉ប៊ត ហ្គូត្តម៉ិន (Robert Guttman) អ្នកវិភាគនៅសាកលវិទ្យាល័យ ដ្យនស៍ ហបឃីនស (Johns Hopkins) និយាយថា ការប្រុងប្រយ័ត្នកម្រិតខ្ពស់នឹងបន្ដមាននៅក្នុងទីក្រុងធំៗសំខាន់ៗនៅសហរដ្ឋអាមេរិក និងទីកន្លែងផ្សេងៗទៀត។ លោកហ្គូត្តម៉ិន ថ្លែងថា៖ «នៅមិនទាន់ចប់ទេ។ ខ្ញុំគិតថា នឹងមានសន្ដិសុខកម្រិតខ្ពស់នៅជុំវិញសហរដ្ឋអាមេរិក ជាពិសេសនៅទីក្រុងញូយ៉ក វ៉ាស៊ីនតោនហើយនឹងឡុង»។ សមាជិកសំខាន់ៗនៃពួកអាល់កៃដាមួយចំនួនត្រូវបានសម្លាប់ ឬចាប់បាន ក៏ប៉ុន្ដែខ្លះទៀតនៅមានច្រើន មានរាប់ទាំង អាយមែន អា ហ្សារ៉ាហ៊ីរី (Ayman a-Zarahiri) ដែលជាភូឈួយរបស់អូសាម៉ាប៊ិនឡាដិន៕ ប្រែសម្រួលដោយ កង ស៊ីវន This posting includes an audio/video/photo media file: Download Now |
| មន្រ្តីអាមេរិកផ្តល់សេចក្តីលម្អិតអំពីកិច្ចប្រតិបត្តិការសម្លាប់ប៊ិនឡាដិន Posted: 03 May 2011 12:06 PM PDT បន្ទាប់ពីការប្រកាសរបស់លោកប្រធានាធិបតី បារ៉ាក់ អូបាម៉ា (Barack Obama) ថា មេដឹកនាំក្រុម អាល់កៃដា (al-Qaida) អូសាម៉ា ប៊ិនឡាដិន (Osama bin Laden) បានត្រូវសម្លាប់នៅក្នុងកិច្ចប្រតិបត្តិការកងកម្លាំងពិសេសរបស់អាមេរិកនៅប៉ាគីស្ថាន មន្រ្តីជាន់ខ្ពស់របស់រដ្ឋបាលអូបាម៉ាបានផ្តល់សេចក្តីលម្អិតអំពីរឿងនេះ។ ថ្លែងត្រួសៗទៅកាន់អ្នកយកព័ត៌មាននៅក្នុងសន្និសីទព័ត៌មានតាមទូរស័ព្ទបន្ទាប់ពីប្រធានាធិបតីនិយាយ មន្រ្តីរដ្ឋបាលជាន់ខ្ពស់បានផ្តល់សេចក្តីលម្អិតបន្ថែមពីកិច្ចប្រតិបត្តិការដែលបានសម្លាប់ ប៊ិនឡាដិន ទោះគេបានបញ្ជាក់ថា គេមិនអាចនិងមិនផ្តល់សេចក្តីលម្អិតជាច្រើនអំពីបេសកម្មនេះក៏ដោយ។ មន្រ្តីបានពិណ៌នាអ្វីដែលពួកគេហៅថា ការវាយឆ្មក់ប្រកបដោយគ្រោះថ្នាក់ដោយក្រុមប្រតិបត្តិការពិសេសតាមឧទ្ធម្ភាគចក្រធុនតូច ទៅលើបរិវេណដ៏ធំមួយនៅក្នុងទីក្រុង អាប្បុតាបាដ (Abbotabad) ភាគខាងជើង រដ្ឋធានី អ៊ីស្លាម៉ាបាដ (Islamabad) នៃប្រទេសប៉ាគីស្ថាន។ មន្រ្តីបាននិយាយថា បរិវេណនោះសាងសង់ប្រហែលប្រាំឆ្នាំហើយ ហើយមានសន្តិសុខដ៏រឹងមាំ ដោយមានជញ្ជាំងដ៏ក្រាស់ និងមានលួសបន្លាជារង្វង់នៅពីលើ ហើយមានបង្អួចលយចេញទៅក្រៅ ហើយមានច្រកទ្វារពីរដែលមានការ ការពារសន្តិសុខ ហើយមិនមានទូរស័ព្ទនិងសេវាកម្មអ៊ិនធឺណិតទេ។ មន្រ្តីប្រាប់ឲ្យដឹងថា អូសាម៉ា ប៊ិនឡាដិន (Osama bin Laden) បានតដៃជាមួយកងទ័ព ហើយត្រូវបានសម្លាប់នៅក្នុងការវាយប្រហារតបតនោះ។ មន្រ្តីអាមេរិកមិនបានផ្តល់សេចក្តីលម្អិតអំពីរយៈពេលនៃការប្រយុទ្ធនោះទេ។ <!--IMAGE--> ក្រុមប្រតិបត្តិការពិសេសសហរដ្ឋអាមេរិក បានស្ថិតនៅក្នុងបរិវេណនោះមិនដល់៤០នាទីទេ ហើយក៏មិនបានប្រឈមនឹងអាជ្ញាធរមូលដ្ឋានណាមួយរបស់ប៉ាគីស្ថានដែរ។ មន្រ្តីនិយាយថា បេសកម្មនេះត្រូវបានរៀបចំឡើងដើម្បីធ្វើឲ្យមានការខូចខាត និងគ្រោះថ្នាក់តិចតួចបំផុតដល់អ្នកមិនប្រយុទ្ធនៅក្នុងបរិវេណនោះ ហើយនឹងជនស៊ីវិលប៉ាគីស្ថាននៅក្នុងតំបន់នោះ។ នៅក្នុងប្រយុទ្ធតបតគ្នាមន្រ្តីនិយាយថាក្មេងជំទង់ប្រុសៗបីនាក់បានត្រូវសម្លាប់ រួមមានអ្នកដែលត្រូវគេជឿជាក់ថា ជាអ្នកនាំសាររបស់ប៊ិនឡាដិនពីរនាក់ ហើយបុរសទី៣ ដែលមន្រ្តីនិយាយថា គេជឿជាក់ថា ជាកូនប្រុសរបស់ប៊ិនឡាដិន។ មានស្រ្តី និងកូនក្មេងជាច្រើននៅក្នុងបរិវេណនោះ។ មន្រ្តីនិយាយថា ស្រ្តីម្នាក់បានត្រូវសម្លាប់នៅពេលដែលស្រ្តីនោះត្រូវបានអ្នកប្រយុទ្ធម្នាក់យកធ្វើជាខែលការពារខ្លូន ។ ស្រ្តីពីរនាក់ផ្សេងទៀតបានរងរបួស។ សហរដ្ឋអាមេរិកបានខាតបង់ឧទ្ធភាគមួយគ្រឿងក្នុងកិច្ចប្រតិបត្តិការនោះ ដោយសារតែបញ្ហាមេកានិក ដែលពួកមន្រ្តីមិនបាននិយាយលម្អិត។ គេនិយាយថា យន្តហោះមួយគ្រឿងនោះបានត្រូវកម្ទេចចោលដោយអ្នកបើកបរដោយហេតុផលសន្តិសុខ។ ទ័ពវាយឆ្មក់ត្រូវបានដឹកតាមឧទ្ធម្ភាគចក្រដែលនៅសល់ពីបរិវេណនោះ។ នៅក្នុងការឆ្លើយទៅកាន់សំណួររបស់អ្នកយកព័ត៌មាន មន្រ្តីជាន់ខ្ពស់រដ្ឋបាលបាននិយាយថា គេបានចាត់វិធានការដើម្បីធ្វើឲ្យប្រាកដថាសពរបស់ ប៊ិនឡាដិន នឹងត្រូវចាត់ការស្របទៅតាមការប្រតិបត្តិ និងប្រពៃណីអ៊ិស្លាម។ គេនិយាយថា អាមេរិកបានគិតគូរដ៏ហ្មត់ចត់បំផុតពីបញ្ហានេះ។ នៅពេលដែលសួរអំពីការពិតថា ប៊ិនឡាដិន នៅទីបំផុតត្រូវបានគេរកឃើញនៅប៉ាគីស្ថាន ហើយថាតើការណ៍នេះបញ្ជាក់ពីការជាប់ទាក់ទិនណាមួយ ដែល ប៊ិនឡាដិនមានជាមួយអាជ្ញាធរប៉ាគីស្ថាន មន្រ្តីទាំងនោះនិយាយថា អាមេរិកមានការព្រួយកង្វល់យ៉ាងខ្លាំងអំពីការពិតដែលថា ប៊ិនឡាដិនបាននៅប៉ាគីស្ថាន ដោយមន្ត្រីទាំងនោះនិយាយបន្ថែមទៀតថា នេះជាបញ្ហាដែលយើងកំពុងបន្តដោះស្រាយជាមួយមន្រ្តីប៉ាគីស្ថាន។ មន្រ្តីជាន់ខ្ពស់រដ្ឋបាលបានរំលឹកឡើងវិញថា ប្រធានាធិបតីអូបាម៉ា បានបញ្ជាក់យ៉ាងច្បាស់ម្តងហើយម្តងទៀតថា អាមេរិក នឹងធ្វើតាមព័ត៌មានសម្ងាត់ស្តីពីទីកន្លែងរបស់ប៊ិនឡាដិន។ គេនិយាយថា ពួកគេបានជម្រាបត្រួសៗដល់មេដឹកនាំជាន់ខ្ពស់ប៉ាគីស្ថានបន្ទាប់ពីវាយឆ្មក់ ស្តីអំពីគោលបំណង និងលទ្ធផលនៃប្រតិបត្តិការនេះ។ មន្រ្តីជាន់ខ្ពស់រដ្ឋបាលនិយាយថា ព័ត៌មានសម្ងាត់ស្តីពីបរិវេណផ្ទះរបស់ ប៊ិនឡាដិន មិនត្រូវបានចែករំលែកជាមួយប្រទេសផ្សេងទៀតទេរួមមានទាំងប៉ាគីស្ថានផងដែរ ដោយនិយាយថា រឿងនេះមានសារៈសំខាន់សម្រាប់សន្តិសុខនៃកិច្ចប្រតិបត្តិការ ហើយនឹងបុគ្គលិកអាមេរិក។ មន្រ្តីនិយាយបន្ថែមទៀតថាមានតែមនុស្សមួយក្រុមតូចនៅក្នុងរដ្ឋាភិបាលអាមេរិកប៉ុណ្ណោះបានដឹងអំពីប្រតិបត្តិការនេះ។ មន្រ្តីនិយាយបន្ថែមទៀតថា នៅដើមខែកញ្ញា ឆ្នាំកន្លងទៅ ទីភ្នាក់ងារស៊ើបការណ៍សម្ងាត់កណ្តាលសហរដ្ឋអាមេរិកបានចាប់ផ្តើមធ្វើការងារជាមួយប្រធានាធិបតីអូបាម៉ា ពីការវាយតម្លៃជាបន្តបន្ទាប់ដែលបាននាំឲ្យទីភ្នាក់ងារនោះជឿជាក់ថា អូសាម៉ា ប៊ិនឡាដិន ស្ថិតនៅឯបិវេណក្នុងប្រទេសប៉ាគីស្ថាន។ នៅពាក់កណ្តាលខែកុម្ភៈ ពួកមន្រ្តីនិយាយថា ជំនួបដ៏លម្អិតជាបន្តបន្ទាប់ផ្អែកលើព័ត៌មានសម្ងាត់ជាក់លាក់មួយដើម្បីតាមរកចាប់ខ្លួនប៊ិនឡាដិន។ ក្នុងរវាងពាក់កណ្តាលខែមិនា និងចុងខែមេសា មន្រ្តីនិយាយថា ប្រធានាធិបតី អូបាម៉ា បានធ្វើជាអធិបតីនៃកិច្ចប្រជុំក្រុមប្រឹក្សាសន្តិសុខជាតិដើម្បីអភិវឌ្ឍវិធានការមួយនាំយកប៊ិនឡាដិនទៅកាន់តុលាការ ហើយនឹងបញ្ជាចុងក្រោយធ្វើប្រតិបត្តិការនៅព្រឹក ថ្ងៃអង្គារទី២៩។ មន្រ្តីជាន់ខ្ពស់ម្នាក់និយាយថា កិច្ចប្រតិបត្តិការប្រកបដោយជោគជ័យកើតមានឡើងដោយសារការងារការស៊ើបការសម្ងាត់ដ៏ជឿនលឿនយ៉ាងប្រយ័ត្នប្រយ៉ែងជាច្រើនឆ្នាំ ដែលមានការចូលរួមពីសំណាក់ទីភ្នាក់ងារយ៉ាងច្រើន។ មន្រ្តីនោះនិយាយថា នៅពេលដែលករណីត្រូវបានសម្រេចថា បរិវេណក្នុងប្រទេសប៉ាគីស្ថានជាទិសដៅនៃការវាយប្រហារ។ មន្រ្តីនោះនិយាយថា មន្រ្តីចាប់ផ្តើមរៀបចំបេសកម្មជាមួយយោធាដោយការសហការរបស់អាមេរិក។ ចំពោះឥទ្ធិពលនៃការសម្លាប់ ប៊ិនឡាដិន នឹងមានលើពួក អាល់កៃដា នោះ មន្ត្រីជាន់ខ្ពស់រដ្ឋបាលបានហៅការសម្លាប់ ប៊ិនឡាដិន ថាជាជ័យជម្នះដ៏ធំបំផុតមួយនៅក្នុងយុទ្ធនាការដែលដឹកនាំដោយអាមេរិកដើម្បីបង្អាក់ រំលាយ និងធ្វើឲ្យពួកអាល់កៃដា បរាជ័យ ហើយនឹងជាវិធានការសំខាន់ និងមានសារៈសំខាន់គឺដើម្បីកម្ទេចពួកអាល់កៃដានៅទីបញ្ចប់។ ទោះបីមន្រ្តីរដ្ឋបាលនិយាយថា ការស្លាប់របស់ ប៊ិនឡាដិន នឹងធ្វើឲ្យពួកអាល់កៃដា អន់ថយ និងពិបាកត្រឡប់ទៅរកស្ថានភាពដូចដើមវិញក៏ដោយ គេនិយាយថា អង្គការភេវរកម្ម ប្រហែលមិនអាចរលំរលាយនៅពេលឆាប់នេះទេ។ មន្ត្រីនិយាយថា វាជាការល្អណាស់ដែលមរណភាពរបស់ប៊ិនឡាដិន កើតចំពេលដែលមានចលនាដ៏ធំមួយដើម្បីសេរីភាព លទ្ធិប្រជាធិបតេយ្យ ដែលកំពុងបោសសម្អាតមេដឹកនាំនៅពិភពអារ៉ាប់ ដោយបានបន្ថែមថាប៊ិនឡាដិន គឺជាឧបសគ្គរារាំងអ្វីដែលបុរស និងស្រ្តីដ៏ក្លាហាននៅពាសពេញតំបន់មជ្ឈឹមបូព៌ា និងអាហ្វ្រិកខាងជើងកំពុងប្រថុយប្រថានជីវិតរបស់ពួកគេ គឺដើម្បីសិទ្ធិបុគ្គល និងសេចក្តីថ្លៃថ្នូររបស់មនុស្សជាតិ។ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| បារាំងអំពាវនាវឲ្យកម្ពុជានិងថៃឈប់បាញ់ Posted: 02 May 2011 04:29 PM PDT ក្រសួងការបរទេសបារាំង នៅថ្ងៃច័ន្ទនេះ បានអំពាវនាវឲ្យកម្ពុជានិងថៃឈប់បាញ់គ្នាជាបន្ទាន់ ហើយដោះស្រាយអរិភាពព្រំដែនជាមួយគ្នាដោយសន្ដិវីធី និងដោយគោរពតាមច្បាប់អន្ដរជាតិ។ សេចក្ដីអំពាវនាវធ្វើឡើង ខណៈដែលកងទព័នៃប្រទេសទាំងពីរបានបន្ដប្រយុទ្ធគ្នានៅតំបន់ប្រាសាទតាមាន់ និងប្រាសាទតាក្របីរបស់ខ្មែរក្នុងខេត្តឧត្តរមានជ័យ ជាប់ជាមួយខេត្តសុរិន្ទរបស់ថៃ ឈានចូលដល់ថ្ងៃទី១១ ហើយនៅថ្ងៃនេះ។ មន្ដ្រីជាន់ខ្ពស់យោធានៃប្រទេសទាំងពីរ បានចរចាចំនួនបីដង ហើយក៏បានព្រមព្រៀងគ្នាឈប់បាញ់គ្នាចំនួនបីដងរួចមកហើយដែរក្នុងចន្លោះពេលមានការប្រយុទ្ធគ្នានេះ។ ក៏ប៉ុន្ដែកិច្ចព្រមព្រៀងនេះមិនត្រូវបានអនុវត្តនោះឡើយ។ អ្នកនាំពាក្យក្រសួងការបរទេសបារាំង លោក បេណាដ វ៉ាលឺរ៉ូ (Bernard Valero) មានប្រសាសន៍ក្នុងសេចក្ដីប្រកាសព័ត៌មាននៅថ្ងៃនេះថា៖ «នៅពេលដែលកងទព័នៃប្រទេសកម្ពុជានិងកងទព័របស់ប្រទេសថៃ ទើបតែព្រមព្រៀងឈប់បាញ់គ្នា យើងបានដឹងថាការប្រយុទ្ធគ្នាបានកើតឡើងសារជាថ្មីដោយបណ្ដាលឲ្យមានជនរងគ្រោះថ្មីៗទៀត»។ មន្ដ្រីអ្នកនាំពាក្យក្រសួងការបរទេសបារាំងបញ្ជាក់ថា បារាំងទទូចឲ្យភាគីមានជម្លោះអត់ធ្មត់ និងទទួលខុសត្រូវ ហើយបារាំងគាំទ្រជំហររបស់ឥណ្ឌូណេស៊ី ដែលជាប្រធានអាស៊ានបច្ចុប្បន្ន និងការដាក់ពង្រាយកងទព័សង្កេតការរបស់ឥណ្ឌូណេស៊ីនៅតំបន់ឈ្លោះប្រកែក។ កងទព័កម្ពុជា និងកងទព័ថៃបានប្រយុទ្ធគ្នាយ៉ាងប្ដូរផ្ដាច់ចាប់តាំងពីថ្ងៃទី២២ខែមេសា។ កងទព័នៃប្រទេសទាំងពីរបានស្លាប់កើនដល់១៧នាក់ហើយ។ ប្រជាពលរដ្ឋជាច្រើនម៉ឺននាក់នៃភាគីទាំងសងខាងត្រូវបានជម្លៀសចេញពីភូមិឋានរបស់ពួកគេ។ បណ្ដាញផ្សព្វផ្សាយនៃប្រទេសទាំងពីរបានស្រង់សម្តីចោទប្រកាន់គ្នាទៅវិញទៅមកអំពីការបង្កជម្លោះរបស់ភាគីនីមួយៗ។ អគ្គលេខាធិការអង្គការសហប្រជាជាតិ លោក បាន គីមូន និងរដ្ឋាភិបាលអាមេរិក បានអំពាវនាវកាលពីសប្ដាហ៍មុន សុំឲ្យរដ្ឋាភិបាលកម្ពុជា និងថៃបន្តភាពអត់ធ្មត់របស់ខ្លួនក្នុងការដោះស្រាយជម្លោះ។ លោកនាយករដ្ឋមន្ដ្រីខ្មែរ ហ៊ុន សែន បានប្រកាសឲ្យដឹងថា លោកនឹងលើកបញ្ហាជម្លោះប្រដាប់អាវុធនៅតាមតំបន់ព្រំដែនជាមួយប្រទេសថៃនេះនៅក្នុងកិច្ចប្រជុំកំពូលអាស៊ាននៅឥណ្ឌូនេស៊ីនៅថ្ងៃទី៧ និងទី៨ ឧសភា នេះ។ នាយកដ្ឋានទំនាក់ទំនងកិច្ចការសាធារណៈរបស់ថៃក៏បានប្រកាសឲ្យដឹងនៅថ្ងៃនេះដែរថា នាយករដ្ឋមន្ដ្រីថៃ លោក អាភីស៊ីត វិចាជីវ៉ា គ្រោងនឹងធ្វើការបំភ្លឺមួយជុំវិញជម្លោះប្រដាប់អាវុធនេះដល់មេដឹកនាំប្រទេសអាស៊ានក្នុងកិច្ចប្រជុំនោះដែរ៕ This posting includes an audio/video/photo media file: Download Now |
| ពលរដ្ឋកម្ពុជាអបអរមរណភាពរបស់មេភេរវកម្ម Posted: 02 May 2011 03:55 PM PDT នៅថ្ងៃច័ន្ទនេះ ប្រជាពលរដ្ឋខ្មែរ បានអបអរសាទរចំពោះមរណភាពរបស់មេភេរវកម្មអូសាម៉ាប៊ិនឡាដិន ដោយពិពណ៌នាការសម្លាប់ប៊ិនឡាដិនថា ជាជ័យជម្នះដ៏ធំធេងនៃយោធាអាមេរិកក្នុងការឆ្ពោះទៅរកការធ្វើឲ្យវិនាសសាបសូន្យដល់អំពើភេរវកម្មអន្តរជាតិ។ ប្រជាពលរដ្ឋអាមេរិករាប់ពាន់នាក់ បានប្រមូលផ្តុំគ្នានៅខាងក្រៅសេតវិមាននៅរដ្ឋធានីវ៉ាស៊ីនតោន និងនៅមជ្ឈមណ្ឌលពាណិជ្ជកម្មពិភពលោក ដែលត្រូវបានរំលំដោយអំពើភេរវកម្មរបស់អូសាម៉ា ប៊ិន ឡាដិន ដើម្បីអបអរសាទរការសម្លាប់មេភេរវកម្ម អូសាម៉ា ប៊ិន ឡាឌិននេះ។ ប្រជាពលរដ្ឋខ្មែរបានចូលរួមជាមួយប្រជាពលរដ្ឋអាមេរិកក្នុងព្រឹត្តិការណ៍នេះផងដែរ។ លោក អេស សុះ អាយុ ៣៧ឆ្នាំ ជនជាតិខ្មែរអ៊ិស្លាម បាននិយាយថា ការស្លាប់របស់អូសាម៉ា ប៊ិន ឡាដិន គឺជាសញ្ញាវិជ្ជមានមួយសម្រាប់បញ្ចប់ការភ័យខ្លាចអំពើភេរវកម្មនៅជុំវិញពិភពលោក ហើយសង្គ្រាមភេរវកម្មដែលកំពុងកើតមាននៅអ៊ីរ៉ាក់ ប៉ាគីស្ថាន អាហ្កានីស្ថាន និងកន្លែងដទៃទៀតនឹងថយចុះ។ លោក សុះ បានបញ្ជាក់ថា ការប៉ះបោររបស់អ្នកកាន់សាសនាអ៊ិស្លាមដើម្បីលទ្ធិប្រជាធិបតេយ្យនៅមជ្ឈឹមបូព៌ា និងការសម្លាប់ ប៊ិន ឡាដិន មិនមែនមានសារៈសំខាន់សម្រាប់តែខ្មែរអ៊ិស្លាមទេ ប៉ុន្តែថែមទាំងសម្រាប់ពិភពអ្នកកាន់សាសនាអ៊ិស្លាមក្នុងការបង្កើនជំនឿជឿជាក់ទៅវិញទៅមកក្នុងចំណោមសាសនាផ្សេងៗកាន់ខ្លាំងឡើង។ លោក រ៉ូនី អាតាម អាយុ២៦ និស្សិតខ្មែរអ៊ិស្លាម នៅសាកលវិទ្យាល័យព្រះកុសមៈ បាននិយាយថា លោកស្វាគមន៍ដំណឹងអំពីមរណភាពរបស់ ប៊ិន ឡាដិន ហើយនេះជាដំណឹងល្អសម្រាប់ពិភព លោកទាំងមូលដែលនឹងអាចរួចផុតពីការគំរាមគំហែងភេរវកម្មអន្តរជាតិនេះ។ លោក អាតាម បានបន្តថា អាមេរិកបានបង្ហាញកិត្យានុភាព និងសមត្ថភាពនៃអំណាចយោធាក្នុងការសម្លាប់ ប៊ិន ឡាដិន និងបង្កើនកេរ្តិ៍ឈ្មោះអាមេរិកនៅក្នុងពិភពលោកទាំងមូល។ លោកអាតាម ថ្លែងដូច្នេះថា៖ «អំពើភេរវកម្មក្រោមការដឹកនាំរបស់អូសាម៉ា ប៊ិនឡាដិន អាចកាត់បន្ថយ ឬសាបសូន្យនៅពេលមេភេរវករ អូសាម៉ា ប៊ិន ឡាដិនត្រូវបានសម្លាប់ ហើយអង្គការភេរវកម្មរបស់គាត់អាចនឹងសាបសូន្យទៅ តាមជីវិតរបស់គាត់។ ធ្វើអ្វីៗត្រូវតែមានមេដឹកនាំ។ បើមេដឹកនាំស្លាប់ហើយ អំពើនោះនឹងត្រូវបញ្ចប់»។ លោកស៊ុន ដារា អាយុ២៣ឆ្នាំ និស្សិតឆ្នាំទី៣នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បាននិយាយថាអាមេរិក និងប្រជាពលរដ្ឋអាមេរិកពិតជារីករាយ ខណៈដែលអូសាម៉ា ប៊ិន ឡាដិន ត្រូវបានសម្លាប់ដោយកងទ័ពអាមេរិកនេះ។ លោកបន្តទៀតថា៖ «សហរដ្ឋអាមេរិក និងប្រជាពលរដ្ឋអាមេរិកមានការសប្បាយចិត្តណាស់ នៅពេលដែលគាត់បានឈ្នះ និងបានការសម្លាប់អូសាម៉ា ប៊ិន ឡាដិន។ ពិភពលោកមានសប្បាយចិត្តដោយសារតែមេដឹកនាំ ម្នាក់នេះត្រូវបានសម្លាប់។ ប៉ុន្តែរឿងមួយទៀតដែលយើងមានការព្រួយបារម្ភ ហើយយើងគួរយកចិត្ត ទុកដាក់ឱ្យមែនទែន។ ថ្វីត្បិតតែអូសាម៉ា ប៊ិនឡាដិន ត្រូវបានស្លាប់មែន តែក្រុមអាល់ កៃដា មួយចំនួនទៀត ដែលមានកំហឹងនឹងបន្តធ្វើអំពើភេរវកម្មកើនឡើងទៀត»។ លោក ឈិត តក់ អាយុ២៤ឆ្នាំ និស្សិតនៅសកលវិទ្យាល័យមេគង្គកម្ពុជាផ្នែកវិទ្យាសាស្ត្រសេដ្ឋកិច្ច បាននិយាយថា អាមេរិក និងពិភពលោកបានសាទរប្រវត្តិសាស្ត្រថ្មីមួយនៃការសម្លាប់អូសាម៉ា ប៊ិន ឡាដិន ហើយវាជាយុត្តិធម៌ពិតសម្រាប់អាមេរិក និងពិភពលោក ដែលបានទទួលរងគ្រោះនៃអំពើភេរវកម្មរបស់ប៊ិន ឡាដិន ។ លោក ឈិត តក់ និយាយថា៖ «ខ្ញុំគិតថា សង្គ្រាមភេរវកម្មបានកើតឡើងខ្លាំងក្លាមែនទែននៅក្នុងសម័យអូសាម៉ាប៊ិនឡាដិន ប៉ុន្តែ ក្រោយពីអូសាម៉ាប៊ិនឡាដិនស្លាប់ សង្គ្រាមភេរវកម្មនឹងត្រូវកាត់បន្ថយច្រើន»។ លោកបណ្ឌិត ឈាង វណ្ណារិទ្ធ នាយកប្រតិបត្តិនៃវិទ្យាស្ថានកម្ពុជាដើម្បីសហប្រតិបត្តិការ និងសន្តិភាព បានថ្លែងថា ការស្លាប់របស់ ប៊ិន ឡាដិន អាចធ្វើឱ្យចលនាភេរវកម្មអន្តរជាតិអាល់ កៃដា ចុះខ្សោយ។លោក វណ្ណារិទ្ធ បានបញ្ជាក់ថា អាមេរិកនឹងអាចបន្ថយការរិះគន់ពីការរឹតត្បិតសិទ្ធិសេរីភាពរបស់ប្រជាពលរដ្ឋ កាលពី១០ឆ្នាំមុន បន្ទាប់ពី ប៊ិន ឡាដិន ត្រូវបានសម្លាប់។ លោក វណ្ណារិទ្ធ បានប្រាប់វីអូអេខ្មែរថា៖ «ភេរវកម្មអន្តរជាតិដែលដឹកនាំដោយអូសាម៉ា ប៊ិនឡាដិន នឹងមិនមែនជាការគំរាមគំហែងធំដល់សហរដ្ឋអាមេរិកទៀតទេ។ ដូច្នេះខ្ញុំគិតថា សហរដ្ឋអាមេរិកប្រហែលជាអាចមានការបន្ធូរបន្ថយទាក់ទងនឹងសិទ្ធិផ្នែកអ៊ិនធើណែត និងផ្នែកទូរស័ព្ទ។ ចំពោះករណី Quantamo Bay ខ្ញុំនឹងពិបាកយល់ ប៉ុន្តែខ្ញុំសង្ឃឹមថា សហរដ្ឋអាមេរិកនឹងមានការគោរពសិទ្ធិមនុស្សបន្ថែមទៀត»។ លោក អំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានថ្លែងយ៉ាងដូច្នេះថា៖ «ពីមុនសហរដ្ឋអាមេរិក បានរិតត្បិតសិទ្ធិសេរីភាពមួយចំនួនដោយសារភេរវកម្ម និងបក្ខពួករបស់អូសាម៉ា ប៊ិន ឡាដិន ហើយឥឡូវបន្ទាប់ពីអូសាម៉ា ប៊ិន ឡាដិន ត្រូវបានសម្លាប់ ខ្ញុំគិតថាសហរដ្ឋអាមេរិក នឹងបើកសិទ្ធិសេរីភាពរបស់ប្រជាពលរដ្ឋទូលំទូលាយឡើងវិញ»។ មេភេរវកម្មអូសាម៉ា ប៊ិន ឡាដិន បាននៅពីក្រោយការបំផ្លាញមជ្ឈមណ្ឌលពាណិជ្ជកម្មនៅក្នុងបូរីញូវយ៉កដែលសម្លាប់មនុស្សជាង៣.០០០នាក់កាលពីថ្ងៃទី១១ខែកញ្ញាឆ្នាំ២០០១។ ចាប់តាំងពីពេលនោះមក សហរដ្ឋអាមេរិកបានតាមប្រមាញ់អូសាម៉ា ប៊ិន ឡាឌិន ជារៀងរហូតមក៕ This posting includes an audio/video/photo media file: Download Now |
| រថក្រោះត្រូវបានពង្រាយបន្ថែមនៅតាមព្រំដែនមានជម្លោះ Posted: 02 May 2011 05:12 PM PDT រថក្រោះបានធ្វើដំណើរយឺតៗ នៅលើកំណាត់ផ្លូវជាតិតាមរថយន្តកាំម៉ីយ៉ុងមកឈប់នៅទីប្រជុំជនមួយនៃស្រុកក្រឡាញ់ ខេត្តសៀមរាប ដែលជាផ្លូវបំបែកឆ្ពោះទៅតំបន់សមរភូមិខេត្តឧត្តរមានជ័យ។ ប្រជាពលរដ្ឋបានស្វាគមន៍យ៉ាងរាក់ទាក់ និងបានផ្តល់អំណោយជាបន្តបន្ទាប់ដល់កងទ័ព។ កំពុងតែហុចទឹកសុទ្ធ មី និងត្រីខកំប៉ុងមួយចំនួន ដោយលាយឡំជាមួយនឹងទឹកមុខសប្បាយរីករាយ អ្នកស្រីហ៊ុយ ម៉ានី អាយុ៥១ឆ្នាំ នៅស្រុកក្រឡាញ់ ខេត្តសៀមរាប បានមានប្រសាសន៍ថា ដោយសារតែទឹកចិត្តរបស់អ្នកស្រីស្រឡាញ់មាតុភូមិ អ្នកស្រីបានផ្តល់អំណោយបន្តិចបន្តូចដល់កងទ័ព ដើម្បីឲ្យជួយការពារបូរណភាពទឹកដី។ អ្នកស្រីមានប្រសាសន៍ថា៖ «ឡានប្រាំពីរ ប្រាំបី ខ្ញុំជូនទាំងអស់ ជូនដើម្បីថា បងកងទ័ពគាត់ទៅការពារ ជូនគាត់ពិសារ ឲ្យគាត់ទៅសមរភូមិ»។ កញ្ញា អ៊ំ បូរមី អាយុ ២៤ឆ្នាំ បានយកនុំ ដែលកំពុងដាក់លក់នៅតាមដងផ្លូវនៅក្នុងស្រុកក្រឡាញ់ ជូនកងទ័ព ដោយមិនស្តាយអំពីការខាតបង់។ កញ្ញាបាននិយាយទៀតថា យើងចង់ផ្សាភ្ជាប់ទឹកចិត្តរវាងសមរភូមិមុខ និងសមរភូមិក្រោយ បន្ទាប់ពីកម្ពុជាបានវាយប្រយុទ្ធគ្នាជាមួយនឹងទ័ពថៃនៅតំបន់ព្រំដែន។ កញ្ញាបានប្រាប់វីអូអេខ្មែរថា៖ «អស់១០កញ្ចប់ជាង។ អត់ស្តាយទេពីព្រោះថា កងទ័ពតស៊ូដើម្បីយើងជារាស្រ្ត។ ដូច្នេះហើយយើងជូនបន្តិចបន្តូចអត់ស្តាយទេ។ មានទឹកចិត្តមុះម៉ុតខ្លាំងក្លា»។ ការបញ្ជូនរថក្រោះបន្ថែមទៅតំបន់សមរភូមិខេត្តឧត្តរមានជ័យនេះ បានកើតមានឡើងក្រោយពីកងទ័ពថៃនិងកម្ពុជាបានបន្តវាយប្រយុទ្ធគ្នាជាបន្តបន្ទាប់ នៅតំបន់ប្រាសាទតាមាន់ ប្រាសាទតាក្របី និងតំបន់ថ្មដូន។ មន្រ្តីយោធាមួយរូប ដែលបានដឹកនាំរថក្រោះ បាននិយាយថា រថក្រោះទាំងនេះត្រូវបានដឹកចេញពីបន្ទាយកងរថក្រោះក្នុងខេត្តកំពង់ស្ពឺ។ លោកមានប្រសាសន៍ទៀតថា រថក្រោះទាំងអស់មានចំនួន១០គ្រឿង ដែលយើងបញ្ជូនទៅតំបន់សមរភូមិខេត្តឧត្តរមានជ័យ ដើម្បីជួយបាញ់ផ្នែកគាំទ្រដល់កងទ័ពនៅខ្សែត្រៀមជួរមុខ។ លោកប្រាប់វីអូអេខ្មែរថា៖ «ដោយសារតែនៅសមរភូមិមុខ ពួកខ្មាំងសៀមវាឈ្លានពានទឹកដីរបស់យើង បានយើងសម្រេច បញ្ជូនរថពាសដែកទៅសមរភូមិមុខថែមទៀត»។ លោកអនុសេនីយ៍ឯក លឹម ហួត អ្នកបើកបររថក្រោះមួយរូបបាននិយាយថា រថក្រោះនេះបំពាក់ដោយ កាំភ្លើងផ្លោង១០០មីលីម៉ែត្រ និងកាំភ្លើង១២.៧។ លោកបានមានប្រសាសន៍ទៀតថា លោកបានត្រៀមខ្លួនរួចរាល់ហើយដើម្បីការពារបូរណភាពទឹកដី។ លោកលឹម ហួតបន្តថា៖ «យើងជួយថ្មើរជើង។ ទឹកចិត្តកងទ័ពយើងក្លាហាន។ អ្នកមុខនៅពីមុខ អ្នកក្រោយជួយទប់ពីក្រោយទៀត»។ ចំណែកប្អូនប្រុស គង់ សុបឿន មានតួនាទីជាអ្នកបញ្ចូលគ្រាប់នៅក្នុងរថក្រោះបាននិយាយាថាប្អូន បានត្រៀមខ្លួនលក្ខណៈប្រយុទ្ធជានិច្ចដើម្បីបូរណភាពទឹកដី។ លោកថ្លែងយ៉ាងខ្លីថា៖ «មានតែសប្បាយចិត្តវាយថៃ។ ត្រៀមខ្លួនរួចហើយ»។ កងទ័ពកម្ពុជា និងថៃ រហូតមកដល់ថ្ងៃច័ន្ទនេះ បានវាយប្រយុទ្ឋគ្នាឈានដល់ថ្ងៃទី១១ហើយ នៅតំបន់ប្រាសាទតាមាន់ ប្រាសាទតាក្របី និងតំបន់ថ្មដូន ខេត្តឧត្តរមានជ័យ និងខេត្តសុរិន្ទប្រទេសថៃ។ ការវាយប្រយុទ្ធគ្នានៅថ្ងៃចន្ទ័នេះ កងទ័ពថៃ បានប្រើប្រាស់គ្រាប់កំាភ្លើងផ្លោង និងវាយប្រហារដោយ គ្រាប់បែកដៃ ក៏ប៉ុន្តែកងទ័ពកម្ពុជាបានឆ្លើយតបតិចតូចប៉ុណ្ណោះ។ កងទ័ពនៅខ្សែត្រៀមជួរមុខរវាងប្រទេសទាំងពីរ បានជួបគ្នាជាញឹកញាប់ ដើម្បីស្វែងរកការឈប់បាញ់ ក៏ប៉ុន្តែភាគីកម្ពុជា បានអះអាថា កងទ័ពថៃនៅតែបន្តវាយបកមកលើកងទ័ពកម្ពុជា។ ការបញ្ជូនរថក្រោះទៅតំបន់សមរភូមិខេត្តឧត្តមានជ័យនេះ ស្របពេលនឹងជនភៀសសឹកពីសង្គ្រាម បានវិលត្រឡប់ទៅកាន់លំនៅដ្ឋានរបស់ខ្លួនវិញមួយចំនួនធំ។ បើតាមការបញ្ជាក់របស់លោក លួន អាន អភិបាលរងខេត្តឧត្តរមានជ័យ និងជាប្រធានគណៈកម្មការកាកបាទក្រហមខេត្តបានឲ្យដឹងថា ប្រជាពលរដ្ឋយ៉ាងតិចចំនួន៩៩ភាគរយបានត្រឡប់ទៅកាន់លំនៅដ្ឋានវិញ។ លោកបានមានប្រសាសន៍ទៀតថា ក្នុងចំណោមជនភៀសសឹកទំាងអស់ ដែលមានចំនួន១៥.០៦៦ គ្រួសារនៅសល់តែ២៥០គ្រួសារតែប៉ុណ្ណោះ។ ប៉ុន្តែទោះជាយ៉ាងណាក៏ដោយ ក៏ការត្រឡប់ទៅកាន់លំនៅដ្ឋានរបស់ប្រជាពលរដ្ឋនោះមិនទាន់ហ៊ានធានាសុវត្ថិភាពនៅឡើយទេ។ លោកធន់ ណុល អភិបាលក្រុងសំរោង បាននិយាយថា ប្រជាពលរដ្ឋត្រូវបានណែនាំឲ្យជីកលេនដ្ឋាន នៅក្បែរផ្ទះ សាលារៀន និងតាមវាលស្រែ និងហាមប៉ះពាល់គ្រឿងផ្ទុះគ្រប់ប្រភេទនៅតាមភូមិឃុំ។ លោកបានមានប្រសាសន៍ទៀតថា សន្តិសុខមិនទាន់បានធានាទេ សម្រាប់ប្រជាពលរដ្ឋដែលវិលត្រឡប់ទៅកាន់លំនៅដ្ឋានវិញនោះ៕ This posting includes an audio/video/photo media file: Download Now |
| ឥទ្ធិពលរបស់ប៊ិនឡាដិននៅក្នុងមជ្ឈឹមបូព៌ាចុះថយនៅពេលថ្មីៗនេះ Posted: 02 May 2011 03:26 PM PDT ព័ត៌មានអំពីការស្លាប់របស់អូសាម៉ាប៊ិនឡាដិនត្រូវបានទទួលស្វាគមន៍ជាទូទៅនៅទូទាំងមជ្ឈឹមបូព៌ា ក៏ប៉ុន្ដែនៅតែមានសេចក្ដីព្រួយបារម្ភថា ប្រព័ន្ធអាល់ខៃដារបស់គាត់នឹងមិនបញ្ចប់ភ្លាមៗនោះទេ។ នៅប្រទេសយេមែន ដែលនៅក្នុងប្រទេសនោះក្រុមសាខារបស់ពួកអាល់ខេដានៅក្នុងឧបទ្វីបអារ៉ាប់ចាក់ឬសគល់ ក្រុមមន្ដ្រីរដ្ឋាភិបាលអបអរសាទរចំពោះព័ត៌មានថាជាជោគជ័យសំខាន់មួយនៅក្នុងការប្រយុទ្ធប្រឆាំងភេរវកម្ម។ ជនជាតិយេមែនសាមញ្ញជាច្រើននាក់ក៏មានអារម្មណ៍ដូចគ្នាដែរ។ លោក Mortada Abed Al Qader អ្នកស្រុករស់នៅក្នុងទីក្រុងសាណា និយាយថា ប៊ិនឡាដិនជាប់ពាក់ព័ន្ធនឹងការប្រព្រឹត្ដខុសឆ្គងជាច្រើនប្រឆាំងនឹងអ៊ិស្លាម ហើយថាការស្លាប់របស់គាត់នេះ ជាការត្រឹមត្រូវហើយ។ ការសម្ដែងការធូរស្រាលនៅក្នុងចិត្ដដូចគ្នានេះត្រូវបានឮពីក្រុមមេដឹកនាំហើយនឹងពលរដ្ឋនៅជុំវិញតំបន់នេះ។ លោក Abdullah Gul ប្រធានាធិបតីនៃប្រទេសទួរគីមានប្រសាសន៍ថា សកម្មភាពនេះបង្ហាញឲ្យឃើញថាពួកភេរវជន នៅទីបញ្ចប់់នឹងត្រូវបានចាប់ទោះបីជាស្លាប់ឬរស់។ នៅក្នុងប្រទេសអ៊ីស្រាអែលដែលនៅទីនោះរដ្ឋាភិបាលជាកំណត់មុខសញ្ញារបស់កំហឹងរបស់ប៊ិនឡាដិន ក្រុមមេដឹកនាំសម្ដែងការរីករាយចំពោះព័ត៌មាននេះ។លោកនាយករដ្ឋមន្ដ្រី Benjamin Netanyahu ហៅការ សម្លាប់នេះថាជាជ័យជម្នះយ៉ាងខ្ទរខ្ទារសម្រាប់យុត្ដិធ៌ម។ ក៏ប៉ុន្ដែក្រុមប៉ាឡេស្ទីនអ៊ិស្លាមហាម៉ាសថ្កោលទោសចំពោះការសម្លាប់នេះ ដោយហៅ ប៊ិនឡាដិនថាជាអ្នកចម្បាំងអារ៉ាប់ពិសិដ្ឋ៕ ប្រែសម្រួលដោយ កង ស៊ីវន This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
