VOA News: ព័ត៌មាន: “សាលាក្រុងភ្នំពេញមិនឲ្យពលរដ្ឋតំបន់បឹងកក់ហែក្បួនបាតុកម្ម” plus 4 more |
- សាលាក្រុងភ្នំពេញមិនឲ្យពលរដ្ឋតំបន់បឹងកក់ហែក្បួនបាតុកម្ម
- សាលាឧទ្ធរណ៍តម្កល់សាលដីកាផ្តន្ទាទោសប្រធានមូលនិធិទ្រទ្រង់អរិយធម៌ខ្មែរ
- ចៅហ្វាយក្រុងភ្នំពេញមិនឲ្យមន្ត្រីផ្តល់ព័ត៌មានរឿងគ្រឿងញៀន
- រឿងចម្រូងចម្រាសក្នុងសំណុំរឿង០០៣និង០០៤មានការជ្រៀតជ្រែកផ្នែកនយោបាយ
- វេទិកាខេមរសិក្សាលើកទី៣ទាក់ទាញអ្នកចូលរូមកាន់តែច្រើននិងចម្រុះឡើង
| សាលាក្រុងភ្នំពេញមិនឲ្យពលរដ្ឋតំបន់បឹងកក់ហែក្បួនបាតុកម្ម Posted: 24 May 2011 02:34 PM PDT សាលារាជធានីភ្នំពេញនៅថ្ងៃអង្គារនេះ បានសម្រេចមិនឲ្យក្រុមប្រជាពលរដ្ឋតំបន់បឹងកក់ដែលប្រឈមនឹងការបណ្ដេញចេញ ធ្វើការដើរហែក្បួនបាតុកម្មនៅថ្ងៃពុធស្អែកនេះឡើយ មូលហេតុដោយសារតែខ្លាចប៉ះពាល់ដល់សណ្ដាប់ធ្នាប់និងស្ថិរភាពសង្គម នេះបើយោងតាមសេចក្ដីសម្រេចក្រោយពីកិច្ចប្រជុំរវាងតំណាងប្រជាពលរដ្ឋតំបន់បឹងកក់ចំនួនដប់នាក់ជាមួយលោក កើត ឆែ នាយករងខុទ្ទកាល័យសាលារាជធានីភ្នំពេញកាលពីព្រឹកថ្ងៃអង្គារនេះ។ ក្រុមអ្នកភូមិបឹងកក់ប្រមាណជា១.៥០០គ្រួសារ ដែលនៅសេសសល់ពីការបណ្ដេញចេញដោយបង្ខំ គ្រោងនឹងធ្វើការដើរដង្ហែជាក្បួនបាតុកម្មតាមដងផ្លូវនៅថ្ងៃស្អែកនេះ ដោយឆ្លងកាត់មុខស្ថានទូតសហរដ្ឋអាមេរិកទៅកាន់វិមានឯករាជ្យកាត់មុខព្រះបរមរាជវាំង និងវិលមកកាន់វត្តភ្នំវិញ។ គោលបំណងគឺដើម្បីជំរុញសាលារាជធានីភ្នំពេញឲ្យធ្វើការសម្រេចចេញជារូបរាងពិតប្រាកដឲ្យបានឆាប់រហ័សនូវការសន្យាស្ដីពីការធ្វើការអភិវឌ្ឈនៅនឹងកន្លែងសម្រាប់ពួកគេ។ នៅក្នុងសេចក្ដីសម្រេចនៅថ្ងៃនេះ សាលារាជធានីភ្នំពេញបានហាមប្រាមមិនឲ្យក្រុមប្រជាជនទាំងនេះធ្វើតាមគម្រោងរបស់ពួកគេឡើយ ប៉ុន្ដែបានកំណត់ថ្ងៃជួបជជែកដោះស្រាយជាមួយពួកគេនៅថ្ងៃសុក្រសប្ដាហ៍នេះ។ សេចក្តីរាយការណ៍អំពីការបង្ក្រាបហឹង្សារបស់ប៉ូលីសទៅលើអ្នកតវ៉ាបឹងកក់កាលពីថ្ងៃទី២១ខែមេសាកន្លងទៅនេះ៖ លោក កើត ឆែ នាយករងខុទ្ទកាល័យសាលារាជធានីភ្នំពេញបញ្ជាក់តាមទូរស័ព្ទថា លោកមិនមានអ្វីបញ្ជាក់បន្ថែមលើសពីកំណត់ហេតុចំពោះមុខក្រុមប្រជាពលរដ្ឋតំបន់បឹងកក់កាលពីព្រឹកមិញនោះទេ។ «ខ្ញុំអត់អ្វីបញ្ជាក់លើសពីកំណត់ហេតុខ្ញុំបានចុះហត្ថលេខាជាមួយគាត់ទេ។ អញ្ចឹងក្នុងកំណត់ហេតុមានសរសេរអស់ហើយ»។ អ្នកស្រីទេព វណ្ណី តំណាងសហគមន៍បឹងកក់ មានប្រសាសន៍ថា ក្រុមអ្នកភូមិយល់ព្រមតាមសេចក្ដីសម្រេចរបស់សាលារាជធានីភ្នំពេញ ក៏ប៉ុន្ដែក្រុមអ្នកភូមិគ្រោងនឹងទាមទារឲ្យអាជ្ញាធរក្រុងភ្នំពេញសន្យាជាក់ស្ដែងចំពោះមុខពួកគេក្នុងជំនួបខាងមុខនេះ។ «ពួកខ្ញុំជជែកអំពីបញ្ហានេះសម្រេចតែម្តង ឲ្យមានលាយលក្ខណ៍អក្សរឲ្យច្បាស់លាស់នៅក្នុងថ្ងៃនេះតែម្តង ពីព្រោះសំណើខ្ញុំដាក់ច្រើនដងហើយ។ អញ្ចឹងឯកសារអ្វីដែលប្រជាពលរដ្ឋចង់បាន គឺការទាមទាររបស់គាត់សុំនៅតំបន់បឹងកក់។ អញ្ចឹងពួកខ្ញុំចង់ឲ្យគាត់ជួបប្រជុំជាមួយសហគមន៍បឹងកក់នៅថ្ងៃទី២៧ គឺសម្រេចនូវសំណើតែម្តង»។ រាជរដ្ឋាភិបាលកម្ពុជាបានជួលដីតំបន់បឹងកក់ទៅឱ្យក្រុមហ៊ុន Sukaku Inc របស់លោកឧកញ៉ាឡាវ ម៉េងឃីន និងជាសមាជិកព្រឹទ្ធសភារបស់គណបក្សប្រជាជនកម្ពុជា នៅឆ្នាំ២០០៧ ដើម្បីធ្វើការអភិវឌ្ឍក្នុងតម្លៃ៧៩លានដុល្លារអាមេរិកលើផ្ទៃដីចំនួន១៣៣ ហិកតាសម្រាប់រយៈពេលជិតមួយសតវត្សគឺ៩៩ឆ្នាំ។ ចាប់ពីពេលនោះមក ប្រជាជនប្រមាណជា៤.០០០គ្រួសារបានទទួលរងការបណ្ដេញចេញជាបន្ដបន្ទាប់ ហើយការតវ៉ារបស់ពួកគេមួយចំនួនទទួលបានការរារាំង និងការបង្រ្កាបយ៉ាងហិង្សា។ កាលពីថ្ងៃទី១៦ខែឧសភានេះ ធនាគារពិភពលោក ដែលជាម្ចាស់ជំនួយដ៏ធំមួយសម្រាប់ការអភិវឌ្ឍ បានជំរុញឱ្យរដ្ឋាភិបាលកម្ពុជា និងភាគីអ្នកភូមិបឹងកក់ដែលកំពុងប្រឈមមុខគ្នាក្នុងជម្លោះដីធ្លីនេះ រកដំណោះស្រាយជាមួយគ្នា ហើយធនាគារពិភពលោកព្រមានថា ខ្លួននឹងតាមឃ្លាំមើលដំណើរការនេះយ៉ាងដិតដល់បំផុត៕ This posting includes an audio/video/photo media file: Download Now |
| សាលាឧទ្ធរណ៍តម្កល់សាលដីកាផ្តន្ទាទោសប្រធានមូលនិធិទ្រទ្រង់អរិយធម៌ខ្មែរ Posted: 24 May 2011 02:15 PM PDT សាលាឧទ្ធរណ៍នៅថ្ងៃអង្គារនេះបានតម្កល់សាលដីការបស់សាលាដំបូងរាជធានីភ្នំពេញ ដោយសម្រេចផ្តន្ទាទោសលោកមឿង សុន ប្រធានអង្គការមូលនិធិទ្រទ្រង់អរិយធម៌ខ្មែរ ឲ្យជាប់ពន្ធនាគាររយៈពេលពីរឆ្នាំដដែល ក៏ប៉ុន្តែបានកែប្រែបទចោទប្រកាន់ពីបទផ្សព្វផ្សាយព័ត៌មានមិនពិតមកញុះញ៉ង់វិញ គឺតាមមាត្រា៤៩៤ និងមាត្រា៤៩៥នៃក្រមព្រហ្មទណ្ឌថ្មី។ អ្នកស្រីចាន់ ម៉ាឌីណា ចៅក្រមប្រឹក្សានៃសាលាឧទ្ធរណ៍បានប្រកាសថា តាមការស្តាប់ខ្សែអាត់សំឡេងជាស៊ីឌី និងវីស៊ីឌី ជនជាប់ចោទលោកមឿង សុនពិតជាបានញុះញ៉ង់ធ្វើឲ្យសាធារណជនមានការភាន់ច្រឡំ និងប៉ះពាល់ដល់សន្តិសុខសង្គម។ អ្នកស្រីបានបញ្ជាក់ទៀតថា សាលាឧទ្ធរណ៍បានសម្រេចតម្កល់សាលដីការបស់សាលាដំបូងឲ្យនៅដដែល។ ក៏ប៉ុន្តែបានបន្ធូរបន្ថយពិន័យជាប្រាក់ពី១៥លានរៀល មកនៅត្រឹម៤លានរៀលវិញ។ លោកមឿង សុន អាយុ៦២ឆ្នាំ ប្រធានអង្គការមូលនិធិទ្រទ្រង់អរិយធម៌ខ្មែរ ដែលបច្ចុប្បន្ននេះកំពុងស្នាក់នៅឯក្រៅប្រទេសនោះ ត្រូវបានសាលាដំបូងរាជធានីភ្នំពេញកាត់ទោសកំបាំងមុខ កាលពីថ្ងៃទី១៤ខែកក្កដា ឆ្នាំ២០០៩ ដោយផ្តន្ទាទោសឲ្យជាប់ពន្ធនាគាររយៈពេលពីរឆ្នាំ និងពិន័យជាប្រាក់ចំនួន១៥លានរៀល ពីបទផ្សព្វផ្សាយព័ត៌មានមិនពិត ដោយភ្ជាប់ទៅនឹងខ្លឹមសារសន្និសីទកាសែតមួយកាលពីថ្ងៃទី២៦ខែឧសភាឆ្នាំ២០០៩។ នៅក្នុងអង្គសន្និសីទកាសែតនោះ លោកមឿង សុនបានលើកឡើងថា ការដាក់តំាងអំពូលភ្លើងអគ្គិសនីសម្រាប់បំភ្លឺនៅប្រាសាទអង្គរវត្តបានធ្វើឲ្យប៉ះពាល់យ៉ាងធ្ងន់ធ្ងរដល់ថ្មរបស់ប្រាសាទ ហើយកម្តៅដែលភាយចេញពីអំពូលហ្នឹងធ្វើឲ្យក្បាច់របស់ប្រាសាទសឹករិចរិល។ លោកប៉ាល់ ចាន់តារា មេធាវីការពារក្តីឲ្យរដ្ឋាភិបាល បានសាទរចំពោះការសម្រេចរបស់សាលាឧទ្ធរណ៍។ លោកបានមានប្រសាសន៍ទៀតថា ទាំងសាលាដំបូង និងសាលាឧទ្ធរណ៍ពិតជាបានផ្តល់យុត្តិធម៌ជូនរដ្ឋាភិបាល។ «ទោះបីត្រង់ចំណុច ដែលពិន័យជាប្រាក់ពី៧លានមក៤លានរៀល ដែលសាលាឧទ្ធរណ៍ប្រកាសអម្បាញ់មិញនេះ ខ្ញុំយល់ឃើញថា ទាំងសាលាឧទ្ធរណ៍ ទំាងសាលាដំបូងរាជធានីភ្នំពេញ ពិតជាបានរកយុត្តិធម៌ជូនរាជរដ្ឋាភិបាលប្រាកដមែន»។ លោកសុខ សំអឿន មេធាវីការពារក្តីឲ្យលោកមឿង សុន បានមានប្រសាសន៍ថា លោកទទួលសាលក្រមរបស់សាលាឧទ្ធរណ៍ ក៏ប៉ុន្តែលោកនឹងប្តឹងសារទុក្ខទៅតុលាការកំពូលបន្តទៀត។ «ឥឡូវនៅតុលាការស្រុកខ្មែរ យើងដោះរឿងមួយ គេទៅជាយករឿងមួយទៀតមកដាក់។ កាលពីមុនម៉េចក៏មិនចោទថាញុះញ៉ង់អញ្ចឹងដែរទៅ? ម៉េចចាំបាច់ដូរពេលនេះ? អញ្ចឹងយើងមានការពិបាក។ ធម្មតាបើយើងមេធាវីការពារក៏យើងមិនដឹងការពារម៉េចដែរ បើសិនការពារបទល្មើសមួយ ហើយគេទៅយកបទល្មើសមួយទៀតមកដាក់ ធ្វើយ៉ាងម៉េចទៅ?» ចំណែកអ្នកស្រីយី ផល្លី អាយុ៦៦ឆ្នាំ ត្រូវជាភរិយារបស់លោកមឿង សុន បានថ្លែងប្រាប់ក្រុមអ្នកកាសែតនៅក្នុងបរិវេណរបស់សាលាឧទ្ធរណ៍ថា តុលាការគួរតែពិចារណាម្តងទៀត អំពីទោសកំហុសស្វាមីរបស់អ្នកស្រី។ អ្នកស្រីបានមានប្រសាសន៍ទៀតថា ប្រសិនបើលោកមឿង សុនបានប្រព្រឹត្តខុស ហេតុអ្វីបានជាអំពូលភ្លើងត្រូវដោះចេញពីប្រាសាទអង្គរវត្ត? «អំពូលភ្លើងដោះចេញហើយ មនុស្សនៅតែជាប់ទោសទៀត។ អាហ្នឹងខ្ញុំសូមឲ្យសម្តេចទាំងបី ហើយនឹងព្រះករុណា សូមជួយដោះស្រាយផង ឲ្យកូនចៅបានរួចខ្លួន បានចូលមកស្រុកវិញ»។ អាជ្ញាធរអប្សរាធ្លាប់បានចេញសេចក្តីបំភ្លឺថា ការដាក់អំពូលភ្លើងអគ្គិសនីនៅប្រាសាទអង្គរវត្តពុំបានប៉ះពាល់ដល់ថ្ម និងក្បាច់ចម្លាក់របស់ប្រាសាទអង្គរវត្តទេ។ ក៏ប៉ុន្តែទោះជាយ៉ាងណាក៏ដោយ រហូតមកដល់បច្ចុប្បន្ននេះ បន្ទាប់ពីមានការរិះគន់របស់លោកមឿង សុន ការដាក់តាំងអំពូលភ្លើងនៅប្រាសាទអង្គរវត្តត្រូវបានដោះចេញហើយ៕ This posting includes an audio/video/photo media file: Download Now |
| ចៅហ្វាយក្រុងភ្នំពេញមិនឲ្យមន្ត្រីផ្តល់ព័ត៌មានរឿងគ្រឿងញៀន Posted: 24 May 2011 01:57 PM PDT សាលារាជធានីភ្នំពេញបានចេញបម្រាមដល់មន្ត្រីក្រោមឱវាទរបស់ខ្លួនឱ្យបញ្ឈប់ការផ្តល់ព័ត៌មានទាក់ទងនឹងការបង្ក្រាបគ្រឿងញៀននិងបទល្មើសផ្សេងៗដល់បណ្តាញសារព័ត៌មាន។ បម្រាមនេះត្រូវមន្ត្រីសិទ្ធិមនុស្ស និងសមាគមអ្នកកាសែតរិះគន់នៅថ្ងៃអង្គារនេះ។ បម្រាមចុះថ្ងៃទី១១ខែឧសភានេះបានហាមឃាត់ការផ្តល់ព័ត៌មានជុំវិញការបង្ក្រាបគ្រឿងញៀន និងបទល្មើសផ្សេងៗ ដែលមានលក្ខណៈស្មុគស្មាញ និងមានចរិតជាបទល្មើសបន្ត។ លោកកែប ជុតិមា អភិបាលរាជធានីភ្នំពេញ បានបញ្ជាក់នៅក្នុងបម្រាមនេះថា ដើម្បីជៀសវាងបាតុភាពអសកម្ម សាលារាជធានីភ្នំពេញសូមណែនាំដល់លោកអភិបាលខណ្ឌទាំងប្រាំបី មិនត្រូវផ្តល់ព័ត៌មានដល់បណ្តាញសារព័ត៌មាន ដោយគ្មានការអនុញ្ញាតពីលោកអភិបាលរាជធានីភ្នំពេញជាដាច់ខាត។ លោកកែប ជុតិមា បានបន្តថា ក្នុងករណីនៅតែផ្តល់ព័ត៌មានដល់បណ្តាញសារព័ត៌មាន ដោយគ្មានការអនុញ្ញាតទៀត នឹងត្រូវទទួលវិន័យផ្នែករដ្ឋបាល និងទទួលខុសត្រូវចំពោះមុខច្បាប់ជាធរមាន។ លោកប៉ែន សមិទ្ធី ប្រធានក្លឹមអ្នកកាសែតកម្ពុជា បានថ្លែងយ៉ាងដូច្នេះថា៖ «គេហាមដោយសារតែវាអាចបែកការសម្ងាត់ ប៉ុន្តែទោះយ៉ាងម៉េចក៏ដោយ គួរមានច្រកមួយដើម្បីធ្វើទំនាក់ទំនងជាមួយអ្នកសារព័ត៌មាន ដើម្បីរួមគ្នាក្នុងការទប់ស្កាត់រឿងគ្រឿងញៀននេះ។ សំបុត្រនេះកំហិតក្នុងក្របខ័ណ្ឌគ្រឿងញៀន និងបទល្មើសដែលអត់ទាន់ចប់។ របៀបនេះមិនមែនជាវិធីដោះស្រាយទេ»។ លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា សាលារាជធានីភ្នំពេញគួរតែបញ្ជាក់អំពីមូលហេតុជាក់លាក់អំពីការហាមឃាត់មន្ត្រីរបស់ខ្លួនក្នុងការផ្តល់ព័ត៌មានដល់បណ្តាញសារព័ត៌មាន។ «យើងយល់ថា ការបិទនេះអាចនឹងឈានទៅបិទព័ត៌មានលើសលប់។ បើអ្នកសារព័ត៌មានទទួលបានព័ត៌មាន គាត់មានសិទ្ធិផ្សាយហើយ។ វាអត់មានអ្វីខុសទេ។ លើកលែងករណីកំពុងស៊ើបអង្កេត ហើយមានមូលហេតុ។ ធម្មនុញ្ញរបស់យើងអាចអនុញ្ញាតឱ្យបិទព័ត៌មានទាក់ទងនឹងសន្តិសុខជាតិ»។ លោកនេត្រ ភត្រា អគ្គលេខាធិការសមាគមការពារអ្នកកាសែតកម្ពុជា បានថ្លែងថា បម្រាមនេះគឺជាការបញ្ចប់នូវសិទ្ធិទទួលបានព័ត៌មានរបស់ប្រជាពលរដ្ឋ និងសិទ្ធិយកព័ត៌មានរបស់អ្នកកាសែត។ «ខ្ញុំគិតថា បម្រាមរបស់សាលាក្រុងភ្នំពេញហាមឃាត់អាជ្ញាធរក្រោមបង្គាប់របស់ខ្លួនមិនឱ្យបញ្ចេញនូវព័ត៌មានទាក់ទងជាមួយការបង្ក្រាបគ្រឿងនេះ វាជាការរំលោភសិទ្ធិ ក៏ដូចជាការបិទសិទ្ធិក្នុងការទទួលព័ត៌មានរបស់ប្រជាពលរដ្ឋ ក៏ដូចជាសិទ្ធិផ្សព្វផ្សាយព័ត៌មានរបស់អ្នកកាសែតដែរ»។ លោកធន សារ៉ាយ ប្រធានសមាគមសិទ្ធិមនុស្ស Adhoc បានថ្លែងថា អាជ្ញាធរមានសិទ្ធិបិទបាំងព័ត៌មាន ខណៈដែលអាជ្ញាធរកំពុងតែបង្ក្រាបនិងចាប់ខ្លួនជនល្មើសគ្រឿងញៀននិងឧក្រិដ្ឋកម្មផ្សេងៗ ប៉ុន្តែក្រោយប្រតិបត្តិការ អាជ្ញាធរត្រូវជូនព័ត៌មានដល់សាធារណជន។ «ការសម្ងាត់ធំពីរដែលគេមិនអាចប្រាប់ទៅសាធារណជនបាន គឺទីមួយរឿងសន្តិសុខជាតិ និងទីពីររឿងកំពុងចាប់ជនល្មើស។ ប៉ុន្តែនៅពេលអាជ្ញាធរបង្ក្រាបរួច អាជ្ញាធរត្រូវជូនដំណឹងដល់សាធារណជន ដើម្បីជាការព្រមាន និងបំបាក់ស្មារតីអ្នកកំពុងប្រព្រឹត្ត និងអ្នកត្រៀមប្រព្រឹត្តបទល្មើសទៅថ្ងៃមុខ»។ បម្រាមរបស់សាលារាជធានីភ្នំពេញនេះបានបញ្ជាក់ថា ប្រតិបត្តិការបង្ក្រាបឈានដល់ការចាប់មេខ្លោង ត្រូវជួបការលំបាកស្មុគស្មាញ ដោយសារតែជនល្មើសបានដឹងតាមរយៈសារព័ត៌មានផ្សព្វផ្សាយ ដែលបានផ្តល់ដោយមន្ត្រីមានសមត្ថកិច្ច៕ This posting includes an audio/video/photo media file: Download Now |
| រឿងចម្រូងចម្រាសក្នុងសំណុំរឿង០០៣និង០០៤មានការជ្រៀតជ្រែកផ្នែកនយោបាយ Posted: 24 May 2011 12:39 PM PDT អ្នកឃ្លាំមើលអន្តរជាតិនៃសាលាក្តីខ្មែរក្រហមបង្ហាញឲ្យឃើញថា ភាពចម្រូងចម្រាសចុងក្រោយទាក់ទងនឹងដំណើរការនាំខ្លួនជនសង្ស័យបន្ថែមមកជំនុំជម្រះទោស មានការជ្រៀតជ្រែកផ្នែកនយោបាយ។ អ្នកឃ្លាំមើលអន្តរជាតិមួយចំនួនសម្រាប់សាលាក្តីខ្មែរក្រហមកត់សម្គាល់ថា សម្ពាធនយោបាយ ដែលរារាំងមិនឲ្យមានការកាត់ទោសបន្ថែមលើជនសង្ស័យជាកម្មាភិបាលខ្មែរក្រហមនោះ ត្រូវគេចាត់ទុកថាជាស្នូលនៃភាពចម្រូងចម្រាសចុងក្រោយក្នុងតុលាការកាត់ទោសខ្មែរក្រហមដែលចូលរួមដោយអ.ស.ប.។ សហព្រះរាជអាជ្ញាអន្តរជាតិលោក Andrew Cayley ជនជាតិអង់គ្លេស បាននិយាយ ជាចំហក្នុងសេចក្តីប្រកាសព័ត៌មានរបស់លោកថា សហចៅក្រមស៊ើបអង្កេតទាំងពីរ ខកខានមិនបានស៊ើបអង្កេតឲ្យបានគ្រប់គ្រាន់លើសំណុំរឿង០០៣ទាក់ទងនឹង បទឧក្រិដ្ឋ ទីតាំងឧក្រិដ្ឋកម្ម និងមិនបានកោះហៅជនសង្ស័យមកសាកសួរដើម្បីនាំខ្លួន ជនសង្ស័យបន្ថែមទៀតមកជំនុំជម្រះទោសទេ។ ភ្លាមៗនោះ សហចៅក្រមស៊ើបអង្កេតទាំងពីរគឺ លោកយូ ប៊ុនឡេង និងលោក Siegfried Blunk ជនជាតិអាល្លឺម៉ង់បានចាត់ទុកថា សេចក្តីប្រកាសព័ត៌មានរបស់សហព្រះរាជអាជ្ញាជាការខុសច្បាប់និងរំលោភភាពសម្ងាត់របស់តុលាការ ហើយលោកទាំងពីរបានបង្គាប់ជាផ្លូវការនិងជាសាធារណៈឲ្យលោកសហព្រះរាជអាជ្ញាលុបចោលភាគខ្លះនៃសេចក្តីថ្លែងការណ៍នោះ។ លោក Brad Adams នាយកប្រតិបត្តិនៃអង្គការឃ្លាំមើលសិទ្ធិមនុស្ស Human Rights Watch ទទួលបន្ទុកនៅតំបន់អាស៊ី បានថ្លែងប្រាប់ វីអូអេ ខ្មែរ តាមរយៈ ទូរស័ព្ទថា សហចៅក្រមស៊ើបអង្កេតបានធ្វើដូច្នេះគឺដើម្បីទាត់ចោលសំណុំរឿងទាំងឡាយដែលសហព្រះរាជអាជ្ញាបានស៊ើបអង្កេតយ៉ាងល្អិតល្អន់និងច្បាស់លាស់ ហើយចៅក្រមធ្វើដូច្នេះទំនងជាមកពីហេតុផលនយោបាយ។ «តុលាការឥតលំអៀងនឹងនិយាយថា តាមពិតទៅលោក Cayley ជាអ្នកដែលធ្វើការតាមវិជ្ជាជីវៈ រីឯលោក Blunk និងលោកយូ ប៊ុនឡេងគឺជាអ្នកធ្វើការតាមផ្លូវនយោបាយ និងគ្មានវិជ្ជាជីវៈ»។ លោក Brad Adams បានអះអាងថា រដ្ឋាភិបាលកម្ពុជារបស់លោកនាយករដ្ឋមន្ត្រីហ៊ុន សែនបានព្យាយាមរារាំងសឹងតែគ្រប់សំណុំរឿងនៅក្នុងសាលាក្តីខ្មែរក្រហមតាំងពីមានការចរចាបង្កើតតុលាការកាត់ទោសខ្មែរក្រហមដំបូងម្ល៉េះ។ តែលោកបញ្ជាក់ថា អ.ស.ប. ដែលចូលរួម មានតួនាទីជំរុញឲ្យមានដំណើរការស្វែងរកការណ៍ពិត និងផ្តល់យុត្តិធម៌ជូនជនរងគ្រោះ។ លោកក៏សង្ឃឹមដែរថា ចៅក្រមអ.ស.ប.នឹងបំពេញតាមគោលការណ៍នេះដើម្បីរកយុត្តិធម៌ជូនពលរដ្ឋកម្ពុជា។ «ប្រសិនបើអ.ស.ប.មិនអាចធ្វើដូច្នោះបានទេ អ.ស.ប.គួរតែដើរចេញ ពីព្រោះភាគីកម្ពុជាមានសមត្ថភាព ហើយពូកែណាស់ខាងបង្កើតការកាត់ទោសដែលជាឆាកល្ខោន និងធ្វើការកាត់ក្តីដើម្បីហេតុផល និងផលប្រយោជន៍នយោបាយ»។ លោក Brad Adams ថ្លែងថា មានពលរដ្ឋខ្មែរច្រើនណាស់ដែលរងគ្រោះ និងស្លាប់នៅក្នុងមហាវិនាសកម្មនៃរបបខ្មែរក្រហម ហើយវាប៉ះទង្គិចដល់កម្ពុជាយូរណាស់មកហើយ។ កិច្ចការតុលាការនេះគួរជាកិច្ចការសាធាណៈ មិនត្រូវបិទបាំងទេ។ ទោះជាយ៉ាងណាក៏ដោយ លោកផៃ ស៊ីផាន អ្នកនាំពាក្យរបស់ទីស្តីការគណៈរដ្ឋមន្ត្រី បានបដិសេធថា រដ្ឋាភិបាលមិនជ្រៀតជ្រែកចូលក្នុងកិច្ចការផ្ទៃក្នុង និងមិនជ្រៀតជ្រែកការសម្រេចរបស់តុលាការទេ។ លោកចាត់ទុកថា រឿងរបស់សាលាក្តីខ្មែរក្រហមនៅក្រៅកិច្ចការរបស់រដ្ឋាភិបាល។ «ការសម្រេចគឺអាស្រ័យទៅដោយនីតិវិធី ហើយនិងអាស្រ័យលើឆន្ទានុសិទ្ធិរបស់ចៅក្រមដែលបម្រើការក្នុងសាលាក្តីខ្មែរក្រហមនោះ»។ ទោះជាយ៉ាងណាក៏ដោយ រដ្ឋាភិបាលកម្ពុជារបស់លោកនាយករដ្ឋមន្ត្រីហ៊ុន សែន និងមន្ត្រីផ្សេងៗទៀតបានប្រកាសជាសាធារណៈថា ខ្លួននឹងរារាំងមិនឲ្យមានការនាំ ខ្លួនពួកអតីតមេដឹកនាំខ្មែរក្រហមមកកាត់ទោសបន្ថែមទៀត ក្រៅពី៥នាក់ក្នុងសំណុំ រឿង០០១និង០០២នោះទេ ដោយព្រួយបារម្ភថា វាអាចប៉ះពាល់ដល់សន្តិភាពនិងសន្តិសុខ។ លោកបណ្ឌិត John Ciorciari សាស្ត្រាចារ្យជំនួយផ្នែកគោលនយោបាយសាធារណៈនៃសាលា Gerald R. Ford របស់សាកលវិទ្យាល័យរដ្ឋ Michigan បានថ្លែងថា ការប្រកាសរបស់ថ្នាក់ដឹកនាំរដ្ឋាភិបាលលើករណី០០៣និង០០៤ គឺជាការបញ្ជាក់ថា ការសង្ស័យរបស់ក្រុមអ្នកសង្កេតការណ៍លើសាលាក្តីខ្មែរក្រហមគឺជាការសង្ស័យត្រឹមត្រូវ។ «ប្រសិនបើសំណុំរឿង០០៣ និង០០៤ ប្រាកដជាត្រូវទាល់ចោល ហើយទោះជាសំណុំរឿង០០២ អាចដំណើរការបានក៏ដោយ ក៏សាធារណជននឹងមើលឃើញថាសាលាក្តីនេះស្ថិតក្នុងការត្រួតត្រាដោយនយោបាយដ៏តឹងរឹង ហើយថែមទាំងមានការជ្រៀតជ្រែកជាចំហទៀតផង»។ លោក Ciorciari បានអះអាងបន្ថែមថា យោងតាមវិធានផ្ទៃក្នុង លោកសហព្រះរាជអាជ្ញា Adrew Cayley មានសិទ្ធិក្នុងការចេញសេចក្តីប្រកាសព័ត៌មានជាសាធារណៈ ដោយធ្វើការសង្ខេបអំពីបទឧក្រិដ្ឋនានាដែលលោកបានលើកឡើងនៅក្នុងដីការសន្និដ្ឋានជាបឋមរបស់លោក ដាក់ជូនសហចៅក្រមស៊ើបអង្កេត។ លោកបានបន្ថែម ទៀតថា គេពិបាកជៀសវាងការសន្និដ្ឋានដែលថា ការស៊ើបអង្កេតត្រូវបានគេយកចិត្តទុកដាក់តិចតួច ពីព្រោះគេគ្រោងទាត់ចោលសំណុំរឿងទាំងនេះរួចទៅហើយ។ លោក Jeffrey S. Brand ជានាយកនិងជាសាស្ត្រាចារ្យសាលាច្បាប់នៃសាកលវិទ្យាល័យច្បាប់ San Francisco រដ្ឋកាលីហ្វ័រញ៉ា បានសរសេរប្រាប់ វីអូអេ ខ្មែរ តាមសារអេឡិចត្រូនិចអ៊ីម៉េលថា សេចក្តីប្រកាសព័ត៌មានរបស់សហព្រះរាជអាជ្ញា លោក Andrew Cayley ធ្វើឡើងដើម្បីជំរុញឲ្យបន្តការស៊ើបអង្កេតលើអង្គហេតុ ដែលបញ្ជាក់ក្នុងសំណុំរឿង០០៣។ ការបង្គាប់បញ្ជាឲ្យលោក Cayley លុបចោលភាគខ្លះនៃសេចក្តីប្រកាសព័ត៌មានរបស់លោកនោះគឺជាភស្តុតាងបន្ថែមទៀត ដែលបង្ហាញថា គេគ្មានបំណងបន្តសំណុំរឿង០០៣នេះទេ។ លោកបានសង្កត់ធ្ងន់ថា បញ្ហានេះ ធ្វើឲ្យប៉ះពាល់ដល់ដំណើរការរបស់តុលាការ ជាពិសេសជនរងគ្រោះ។ «តាមទស្សនៈរបស់ខ្ញុំ ការបង្គាប់បញ្ជារបស់តុលាការពេលនេះមិនការពារផលប្រយោជន៍ជនរងគ្រោះឲ្យបានសមរម្យទេ»។ លោក Jeffrey S. Brand បានបន្ថែមថា តុលាការផ្តល់ភស្តុតាងតិចតួចក្នុងសេចក្តី សម្រេចចុងក្រោយបំផុតរបស់ខ្លួន នូវអ្វីជាអង្គហេតុជាក់លាក់ ហើយអ្វីជាគ្រោះថ្នាក់កើតចេញពីអ្វីដែលលោក Cayley បានសរសេរនោះ។ «សហចៅក្រមហាក់ដូចជាព្រួយបារម្ភទាក់ទងនឹងទស្សនៈរបស់លោកសហព្រះរាជអាជ្ញា Cayley ដែលបង្ហាញពីភាពចាំបាច់នៃការស៊ើបអង្កេតបន្ថែមនោះ ច្រើនជាង ការព្រួយបារម្ភអំពីអង្គហេតុដែលត្រូវបានទម្លាយការណ៍ពិតនោះ»។ សហព្រះរាជអាជ្ញាអន្តរជាតិ លោក Andrew Cayley និងសហព្រះរាជអាជ្ញាជាតិ លោកស្រីជា លាងបានខ្វែងគំនិតគ្នាទាក់ទងនឹងការចោទប្រកាន់ជនសង្ស័យបន្ថែមដែលជាអតីតកម្មាភិបាលខ្មែរក្រហម៥នាក់សម្រាប់សំណុំរឿង០០៣និង០០៤។ ការបដិសេធរបស់លោកស្រីធ្វើឡើងមុនពេលលោក Andrew Cayley ចេញសេចក្តីប្រកាសព័ត៌មានរបស់លោក។ លោក Cayley ចាត់ទុកថា ជនទាំង៥នាក់ថ្មីនោះស្ថិតក្នុងយុត្តាធិការរបស់សាលាក្តី ហើយវាផ្ទុយពីលោកស្រីជា លាង ដែលមានជំហរស្រដៀងនឹងជំហររដ្ឋាភិបាលដែលថា ជនទាំងនោះមិនស្ថិតក្នុងយុត្តាធិការដែលត្រូវនាំខ្លួនមកជំនុំជម្រះទោសទេ។ សេចក្តីប្រកាសព័ត៌មានរបស់លោក Cayley បានចេញជាសារធារណៈ នៅពេលមានការខ្វែងគំនិតគ្នា នៅពេលមានសម្ពាធពីជនរងគ្រោះដែលថា ខ្លួនមិនបានទទួលព័ត៌មានគ្រប់គ្រាន់សម្រាប់ដាក់ពាក្យប្តឹង នៅពេលមានការសង្ស័យថា រដ្ឋាភិបាលរារាំង និងនៅពេលមិនមានកិច្ចសហការល្អពីភាគីកម្ពុជាដើម្បីបន្តនីតិវិធីក្នុង តុលាការនោះ។ អ្នកវិភាគខ្លះនិយាយថា សេចក្តីប្រកាសព័តមានដ៏សំខាន់របស់សហព្រះរាជអាជ្ញា អាចជាការដាក់សម្ពាធដល់សហចៅក្រមស៊ើបអង្កេតឲ្យធ្វើតាមការចង់បានរបស់លោកសហព្រះរាជអាជ្ញា។ មន្ត្រីអ្នកការទូតម្នាក់ក្នុងទីក្រុងញូវយ៉ក ដែលជាតំណាងប្រទេសអ្នកផ្តល់ជំនួយ បានថ្លែងថា លោកអគ្គលេខាធិការអ.ស.ប. Ban Ki-Moon និងក្រុមប្រទេសអ្នកផ្តល់ជំនួយសំខាន់ៗមួយចំនួន ត្រូវគេប្រាប់ឲ្យដឹងអំពីរឿងរ៉ាងចុងក្រោយដែលកើត ឡើងក្នុងតុលាការខ្មែរក្រហម។ អ្នកការទូតដដែលនោះអះអាងថា លោក Ban Ki-Moon និងតំណាងប្រទេសអ្នកផ្តល់ជំនួយត្រូវគេជូនដំណឹងដើម្បីឲ្យពិចារណា។ អ្នកការទូតដដែលបានបន្ថែមថា រដ្ឋាភិបាលកម្ពុជាបានធានាប្រាប់អ.ស.ប.និង ប្រទេសផ្តល់ជំនួយអំពីការមិនជ្រៀតជ្រែកផ្នែកនយោបាយ អំពីឯករាជ្យភាពរបស់ តុលាការ។ ការធានានេះធ្វើឡើង ជាពិសេសនៅពេលលោក Ban Ki-Moonបំពេញទស្សនកិច្ចក្នុងប្រទេសកម្ពុជាកាលពីឆ្នាំទៅ។ មានរបាយការណ៍ថា ពេលនោះ រដ្ឋាភិបាលបានបញ្ជាក់ថា ខ្លួនឈប់ធ្វើសេចក្តីថ្លែងការណ៍ ដែលនាំឲ្យប៉ះពាល់ដល់ឯករាជ្យភាពរបស់តុលាការហើយ។ គួររំឭកដែរថា ការលាឈប់ពីតំណែងរបស់សហព្រះរាជអាជ្ញាអន្តរជាតិគឺលោក Robert Pertit និងសហចៅក្រមគឺលោក Marcel Lemond ត្រូវបានគេសង្ស័យថា ទាក់ទងនឹងបញ្ហាមិនមានឯករាជ្យភាព និងមិនមានកិច្ចសហការគ្រប់គ្រាន់ក្នុងសាលាក្តីនេះ៕ This posting includes an audio/video/photo media file: Download Now |
| វេទិកាខេមរសិក្សាលើកទី៣ទាក់ទាញអ្នកចូលរូមកាន់តែច្រើននិងចម្រុះឡើង Posted: 24 May 2011 03:23 PM PDT ក្រោយពីបានចាប់ដំណើរការអស់រយៈពេល៣ឆ្នាំរួចមក វេទិកាខេមរសិក្សាប្រចាំឆ្នាំរបស់សាកលវិទ្យាល័យអូហៃយ៉ូ សាហរដ្ឋអាមេរិក បានវិវត្តទៅជាសន្និសីទពេញលេញមួយ។ កាលពីចុងខែមេសាកន្លងទៅនេះ មានមនុស្សប្រហែល១០០នាក់បានចូលរួមនៅក្នុងវេទិកានេះដើម្បីពិភាក្សាគ្នាអំពីប្រធានបទនានាជាច្រើនទាក់ទងនឹងប្រទេសកម្ពុជា។ វេទិកាខេមរសិក្សាលើកទី៣នេះ បានទាក់ទាញក្រុមអ្នកចូលរួមចំនួនកាន់តែច្រើននិងមានលក្ខណៈកាន់តែចម្រុះឡើង។ ព្រឹត្តិការណ៍នេះបានប្រារព្ធធ្វើឡើងនៅសាកលវិទ្យាល័យអូហៃអូ នៅក្រុងអាថេនស៍ (Athens) រដ្ឋអូហៃអូ (Ohio) ពីថ្ងៃទី២៩ដល់៣០ខែមេសាឆ្នាំ២០១១កន្លងទៅនេះ។ បណ្ឌិត គ្រីស្ទីន ស៊ូ (Christine Su) ប្រធានជំនួយមជ្ឈមណ្ឌលសម្រាប់ការសិក្សាអំពីអាស៊ីអាគ្នេយ៍នៅសាកលវិទ្យាល័យអូហៃយ៉ូ និងជាអ្នករៀបចំវេទិកានេះមានប្រសាសន៍ប្រាប់វីអូអេខ្មែរថា វេទិកាក្នុងឆ្នាំនេះកាន់តែរីកធំឡើងពីវេទិកាដំបូងបំផុត ដែលពេលនោះមានរយៈពេលតែមួយថ្ងៃនិងគ្រាន់តែជាការជួបប្រជុំគ្នាក្រៅផ្លូវការរវាងនិស្សិតក្រោយឧត្តមសិក្សានិងអ្នកស្រាវជ្រាវមួយចំនួនតូចប៉ុណ្ណោះ។ «នេះជាឆ្នាំទី៣ហើយ ហើយវេទិកាត្រូវបានពង្រីកដល់២ថ្ងៃ ហើយមិនត្រឹមតែមាននិស្សិតសាកលវិទ្យាល័យអូហៃយ៉ូប៉ុណ្ណោះទេ តែក៏មានអ្នកចូលរួមដែលមានចំណាប់អារម្មណ៍ចំពោះខេមរសិក្សាមកពីទូទាំងសហរដ្ឋអាមេរិកផង។ ម៉្លេះហើយឆ្នាំនេះ យើងឃើញមានអ្នកចូលរួមមកពីរដ្ឋហាវ៉ៃ ក្រុងបូស្តុន (Boston) ក្រុងញូវយ៉ក ពីរដ្ឋកាលីហ្វ័រញ៉ា ពីក្រុងស៊ីអេថល (Seattle) ជាដើម»។ បណ្ឌិតស៊ូនិយាយថាគោលបំណងសំខាន់បំផុតរបស់វេទិកានេះ គឺដើម្បីផ្តល់ឱកាសដល់អ្នកទាំងឡាយដែលមានចំណាប់អារម្មណ៍ពិភាក្សាអំពីបញ្ហានានារបស់ខ្មែរ មិនថាបញ្ហាក្នុងប្រវត្តិសាស្ត្រឬក្នុងពេលបច្ចុប្បន្ន។ បណ្ឌិតស៊ូ មានឪពុកជាជនជាតិខ្មែរ ហើយលោកស្រីក៏មានការពេញចិត្តផ្ទាល់ខ្លួនចំពោះការណ៍ដែលបានរៀបចំព្រឹត្តិការណ៍អំពីខ្មែរបែបនេះដែរ។ ប្រធានបទនៅក្នុងវេទិកានេះមានចម្រុះនិងប្លែកៗគ្នា រួមមានដូចជា «ឱកាសនិងមធ្យោបាយក្នុងការរៀននិងបង្រៀនភាសាខ្មែរនៅរដ្ឋហាវ៉ៃ» «ទូរស័ព្ទដៃនិងការអប់រំពីចម្ងាយនៅជនបទកម្ពុជា» និងប្រធានបទ «ស្ថានភាពរបស់អ្នកនិពន្ធខ្មែរនាពេលបច្ចុប្បន្ន» ជាដើម។ ប្រធានបទទាំងនេះត្រូវបានគេបញ្ចូលគ្នាជាប្រធានបទធំៗ សម្រាប់ការពិភាក្សាចំនួន៥ គឺ ភាសានិងអក្សរសិល្ប៍ខ្មែរ អន្តោប្រវេសន៍និងអត្តសញ្ញាណ យុត្តិធម៌និងការសះស្បើយពីរបបខ្មែរក្រហម ការអភិវឌ្ឍនិងបច្ចេកវិជ្ជានៅកម្ពុជា និងការបង្កើតវប្បធម៌នៅកម្ពុជា។ មានអ្នកចូលរួមប្រមាណ១០០នាក់នៅក្នុងវេទិការយៈពេល២ថ្ងៃនេះ។ ថ្វីបើកម្មវិធីបានប្រព្រឹត្តធ្វើឡើងនៅក្នុងទីតាំងសាកលវិទ្យាល័យមួយក្តី ក៏វាគ្មិនមិនមែនមានត្រឹមតែជាអ្នកសិក្សាស្រាវជ្រាវប៉ុណ្ណោះទេ។ ក្រៅពីនិស្សិត គ្រូបង្រៀននិងអ្នកស្រាវជ្រាវ ក៏មានវាគ្មិនជាសកម្មជនសហគមន៍ អ្នកនិពន្ធ អ្នកជំនាញនានា និងអ្នកដែលមានចំណាប់អារម្មណ៍អំពីប្រទេសកម្ពុជាផងដែរ។ កញ្ញា ហ៊ឹម ចាន់រិទ្ធី ជាអ្នកនិពន្ធសៀវភៅកំណត់ហេតុផ្ទាល់ខ្លួនពីជីវិតក្នុងរបបខ្មែរក្រហម ដែលទទួលបានរង្វាន់មានចំណងជើងថា «ពេលដែលអំបែងអណ្តែត»។ កញ្ញាបានធ្វើជាវាគ្មិនកិត្តិយសនៅក្នុងវេទិកានេះ។ កញ្ញានិយាយថាវេទិកានេះជាវេទិកាខេមរសិក្សាដ៏ល្អបំផុតមួយដែលកញ្ញាធ្លាប់បានចូលរួម។ កញ្ញានិយាយថា បើប្រៀបធៀបនឹងវេទិកាដទៃទៀត វេទិកាខេមរសិក្សានៅសាកលវិទ្យាល័យអូហៃយ៉ូនេះមានលក្ខណៈពិសេសដោយមានប្រធានបទចម្រុះនិងផ្សេងៗគ្នាច្រើន ដែលនេះអនុញ្ញាតឲ្យកញ្ញាអាចយល់ដឹងពីប្រធានបទថ្មីៗនិងជួបជាមួយអ្នកជំនាញផ្សេងៗដែលមិនដែលជួបពីមុន។ អ្នករៀបចំអះអាងថាវេទិកានេះជាវេទិកាខេមរសិក្សាតែមួយគត់នៅក្នុងសហរដ្ឋអាមេរិក ហើយឆ្នាំនេះ គេក៏ឃើញមានវាគ្មិនជាជនជាតិខ្មែរ-អាមេរិកាំងចូលរួមផងដែរ។ ពួកគាត់បានពិភាក្សាអំពីបញ្ហាសំខាន់ៗដែលមាននៅក្នុងសហគមន៍ខ្មែរអាមេរិកាំង រួមទាំងបញ្ហាការចាប់បញ្ជូនជនជាតិខ្មែរអាមេរិកាំងទៅប្រទេសកម្ពុជាវិញ។ វាគ្មិននៅក្នុងវេទិកាខេមរសិក្សានេះមិនមានត្រឹមតែជនជាតិខ្មែរប៉ុណ្ណោះទេ។ លោក ត្រេនថ៍ វ៉ឃ័រ (Trent Walker) អ្នកស្រាវជ្រាវអាមេរិកាំងម្នាក់នៅឯមជ្ឈមណ្ឌលពុទ្ធិកសិក្សានៃសាកលវិទ្យាល័យស្ទេនហ្វដ (Stanford) រដ្ឋកាលីហ្វ័រញ៉ា និយាយថា វេទិកានេះបានលើកទឹកចិត្តដល់លោកឲ្យបន្តការស្រាវជ្រាវក្នុងផ្នែកខេមរសិក្សា។ លោកថ្លែងប្រាប់វីអូអេខ្មែរថា៖ «កាលខ្ញុំរៀននៅ ស្ទេនហ្វដ រៀននៅកន្លែងផ្សេងៗ មានតែខ្ញុំម្នាក់ទេដែលរៀនខាងខេមរសិក្សា ក៏អ្នកផ្សេងអត់សូវអាចយល់អំពីកិច្ចការស្រាវជ្រាវរបស់ខ្ញុំ។ ក៏ប៉ុន្តែកាលណាខ្ញុំមកចូលរួមនៅទីនេះ ក៏ខ្ញុំឃើញមានមនុស្សច្រើនណាស់ ទាំងខ្មែរទាំងបរទេស ដែលមានចំណាប់អារម្មណ៍ដូចនឹងខ្ញុំដែរខាងខេមរសិក្សានេះ»។ អ្នកនាង ហឿន ង្វៀង (Huyen Nguyen) និស្សិតវៀតណាមថ្នាក់អនុបណ្ឌិតម្នាក់នៅសាកលវិទ្យាល័យអូហៃយ៉ូ បានដឹងអំពីវេទិកានេះតាមរយៈមិត្តភក្តិជាជនជាតិខ្មែរ។ នាងក៏សម្រេចចិត្តធ្វើជាវាគ្មិនពិភាក្សាអំពីប្រធានបទស្នេហានិងមនោសញ្ចេតនានៅក្នុងរឿងប្រជាប្រិយខ្មែររឿង«ទុំទាវ» និងរឿងប្រជាប្រិយវៀតណាមមួយដែលអ្នកចូលរួមខ្មែរភាគច្រើនប្រហែលមិនដែលធ្លាប់ឮពីមុនមក។ រឿងនោះមានឈ្មោះថា «រឿងនិទានផ្លែទុរេន» ដែលរៀបរាប់អំពីស្នេហារវាងស្រ្តីខ្មែរម្នាក់និងបុរសវៀតណាមម្នាក់ក្នុងសតវត្សរ៍ទី១៨។ អ្នកនាង ហឿន ង្វៀង ដែលចេះភាសាខ្មែរខ្លះៗផងនោះ និយាយថា ក្នុងនាមជាពលរដ្ឋប្រទេសជិតខាងកម្ពុជា វេទិកានេះផ្តល់ឱកាសឲ្យអ្នកនាងបានជួបនិងរាប់អានជាមួយអ្នកស្រាវជ្រាវខ្មែរ។ «កត្តាមួយទៀតដែលជំរុញឲ្យខ្ញុំចង់មកចូលរួមនៅក្នុងវេទិកានេះ គឺមិត្តភាពជាមួយប្រជាជនកម្ពុជា។ ខ្ញុំចង់បង្ហាញថាខ្ញុំមានការកោតសរសើរចំពោះវប្បធម៌ខ្មែរនិងចង់ឲ្យមានការយោគយល់គ្នារវាងប្រជាជនវៀតណាមនិងប្រជាជនកម្ពុជា។» ក្នុងចំណោមនិស្សិតខ្មែរតែពីររូបនៅសាកលវិទ្យាល័យអូហៃយ៉ូនេះ លោក បូរី ស៊ីលីវណ្ណ បានធ្វើបទបង្ហាញជាវីដេអូភាពយន្តឯកសារអំពីអង្គការកុមារកំព្រាឈ្មោះ «សុវណ្ណកុមារ» ដែលលោកបានផលិតនៅប្រទេសកម្ពុជាក្នុងឆ្នាំ២០១០។ លោក ស៊ីលីវណ្ណ ដែលជានិស្សិតអាហារូបករណ៍ Fulbright កំពុងបន្តសិក្សាថ្នាក់អនុបណ្ឌិតផ្នែកការសិក្សាអំពីគមនាគមន៍និងការអភិវឌ្ឍ (communications development studies) និយាយថា វេទិកាខេមរសិក្សានេះជួយផ្សព្វផ្សាយវប្បធម៌ខ្មែរដល់មជ្ឈដ្ឋាននិស្សិតអន្តរជាតិ។ «ដោយសារតែនៅសាលាយើងមានជនជាតិខ្មែរតែ៣នាក់ទេ យើងក៏អត់ទាន់មានសមាគមនិស្សិតខ្មែរអីនៅទីនេះដែរ ដូច្នេះការបង្កើតឲ្យមានវេទិកាខេមរសិក្សានៅសាកលវិទ្យាល័យអូហៃយ៉ូនេះដូចជាការបើកភ្នែកឲ្យនិស្សិតអន្តរជាតិផ្សេងៗដែលនៅសាលាបានស្គាល់បានយល់ដឹងពីស្រុកខ្មែរ ហើយក៏ជាឱកាសមួយដែលធ្វើឲ្យខ្ញុំជាខ្មែរផ្ទាល់បានជួបខ្មែរៗដែលនៅអាមេរិក។» លោក តាន់វៀរ តានីម (Tanvir R. Tanim) និស្សិតអនុបណ្ឌិតផ្នែកវិស្វកម្មមេកានិកមកពីប្រទេសបង់ក្លាដេសនិយាយថា លោកមានការកោតសរសើរដែលជនជាតិខ្មែរចំនួនតែពីរបីនាក់ប៉ុណ្ណោះអាចរៀបចំព្រឹត្តិការណ៍នេះបានយ៉ាងល្អ។ លោកថានៅក្នុងវេទិកានេះ រឿងរ៉ាវជីវិតរបស់កញ្ញា ហ៊ឹម ចាន់រិទ្ធី ក្នុងសម័យខ្មែរក្រហមបានធ្វើឲ្យលោករំជួលចិត្តជាខ្លាំង ព្រោះវាស្រដៀងគ្នានឹងព្រឹត្តិការណ៍ហិង្សាដ៏សោកនាដកម្មមួយនៅក្នុងប្រវត្តិសាស្ត្រប្រទេសរបស់លោក។ និស្សិតអាមេរិកាំង ផេច អាឡេកស៊ិស វ៉លធ័រស៍ (Paige Alexis Walters) ដែលកំពុងសិក្សាអំពីកិច្ចការអន្តរជាតិនៅសាកលវិទ្យាល័យអូហៃយ៉ូ ក៏រំជួលចិត្តនឹងរឿងរ៉ាវក្នុងសៀវភៅ «ពេលដែលអំបែងអណ្តែត» នេះដែរ។ នាងមកចូលរួមក្នុងបំណងមកស្តាប់អ្នកនិពន្ធ ហ៊ឹម ចាន់រិទ្ធី ក៏ប៉ុន្តែនាងបានពេញចិត្តនឹងវេទិកាទាំងមូលផងដែរ ហើយមានបំណងនឹងចូលរួមទៀតនៅឆ្នាំក្រោយ។ «ខ្ញុំមានអារម្មណ៍ស្រស់ស្រាយមែនទែនដែលបានជួបមនុស្សជាច្រើនដែលមានចំណាប់អារម្មណ៍នឹងប្រធានបទអន្តរជាតិនានា ហើយដែលពួកគាត់មានចំណេះដឹងយ៉ាងច្រើនអំពីតំបន់មួយដែលខ្ញុំមិនធ្លាប់បានដឹងអ្វីសោះ។» លោក ដន ដ្យេម៉ឺសាន់ (Donald Jameson) អតីតអ្នកការទូតម្នាក់នៅប្រទេសកម្ពុជាក្នុងទសវត្សរ៍១៩៧០ បានធ្វើបទអត្ថាធិប្បាយអំពីប្រធានបទ ដំណើរការអភិវឌ្ឍន៍ដ៏«រដេបរដុប»របស់ប្រទេសកម្ពុជា។ លោកនិយាយថា ថ្វីបើគេឃើញមានចំណាប់អារម្មណ៍អំពីប្រទេសកម្ពុជា បានកើនឡើងក្នុងចំណោមមជ្ឈដ្ឋានអ្នកសិក្សាស្រាវជ្រាវក្តី ក៏ចំណាប់អារម្មណ៍កម្រិតដូចគ្នានេះមិនមានឃើញក្នុងចំណោមអ្នកធ្វើគោលនយោបាយនៅទីក្រុងវ៉ាស៊ីនតោនទេ លើកលែងតែចំពោះប្រធានបទខ្លះដូចជាឥទ្ធិពលប្រទេសចិននិងការកើនឡើងនៃជម្លោះព្រំដែនកម្ពុជាថៃជាដើម។ ក៏ប៉ុន្តែលោកបញ្ជាក់ថាការណ៍នេះជាសញ្ញាល្អទៅវិញទេ ដែលបញ្ជាក់ថាប្រទេសកម្ពុជាមានស្ថិរភាពនិងសន្តិសុខល្អ។ វេទិកាខេមរសិក្សានៅសាកលវិទ្យាល័យអូហៃយ៉ូនេះ បានបញ្ចប់ទៅដោយមានបទបង្ហាញអំពីមានការធ្វើម្ហូបខ្មែរ ការបង្ហាញសម្លៀកបំពាក់ប្រពៃណីខ្មែរ និងការសម្តែងក្បាច់គុនបុរាណខ្មែរ ដោយក្រុម«គីរីហិង្សាគុនខ្មែរ» ប្រចាំក្រុងខូឡាំប៊ឹស (Columbus) រដ្ឋអូហៃអូ ចម្ងាយប្រហែល១២០គ.ម.ពីសាកលវិទ្យាល័យអូហៃយ៉ូ។ បណ្ឌិត គ្រីស្ទីន ស៊ូ និយាយថាលោកស្រីសប្បាយចិត្តដែលវេទិកានេះបានដំណើរការដោយជោគជ័យ ហើយសង្ឃឹមថានិស្សិតខ្មែរដែលគេរំពឹងថានឹងមកសិក្សានៅសាកលវិទ្យាល័យអូហៃយ៉ូនៅឆ្នាំក្រោយ នឹងជួយដល់ការរៀបចំវេទីកាទី៤ប្រកបដោយជោគជ័យ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
