VOA News: ព័ត៌មាន: “ព្រះរាជអាជ្ញាអន្តរជាតិប្តឹងឧទ្ធរណ៍ប្រឆាំងនឹងការបង្គាប់របស់ចៅក្រមស៊ើបអង្កេត” plus 4 more |
- ព្រះរាជអាជ្ញាអន្តរជាតិប្តឹងឧទ្ធរណ៍ប្រឆាំងនឹងការបង្គាប់របស់ចៅក្រមស៊ើបអង្កេត
- ការនាំចេញសម្លៀកបំពាក់ទៅអាមេរិកកើនឡើងក្នុងត្រីមាសទី១
- ពាណិជ្ជកម្មកម្ពុជាថៃកើនទោះបីមានសង្គ្រាមព្រំដែន
- ភាពចម្រូងចម្រាសរវាងចៅក្រមនិងព្រះរាជអាជ្ញាលើករណី០០៣មិនមានផ្លូវចេញ
- ប្រតិកម្មចម្រុះបន្ទាប់ពីសាលាក្តីកំណត់ពេលកាត់ទោសមេខ្មែរក្រហម
| ព្រះរាជអាជ្ញាអន្តរជាតិប្តឹងឧទ្ធរណ៍ប្រឆាំងនឹងការបង្គាប់របស់ចៅក្រមស៊ើបអង្កេត Posted: 23 May 2011 02:25 PM PDT សហព្រះរាជអាជ្ញាអន្ដរជាតិ លោក អ៊ែនឌ្រូ ខេលី (Andrew Cayley) បានឲ្យដឹងនៅថ្ងៃច័ន្ទនេះថា លោកនឹងប្ដឹងឧទ្ធរណ៍ប្រឆាំងនឹងការបង្គាប់របស់ក្រុមសហចៅក្រមស៊ើបអង្កេត ដែលតម្រូវឲ្យរូបលោកដកចេញនូវផ្នែកសំខាន់ៗនៅក្នុងសេចក្ដីថ្លែងការណ៍ជាសាធារណៈរបស់លោក។ នៅក្នុងសេចក្ដីបញ្ជាក់តាមសារអេឡិចត្រូនិចនៅថ្ងៃនេះ លោកអាន់ឌ្រូ ខេលី ដែលកំពង់ស្ថិតនៅប្រទេសអង់គ្លេសមានប្រសាសន៍ថា សេចក្ដីបង្គាប់របស់ក្រុមសហចៅក្រមស៊ើបអង្កេត «មិនអាចទទួលយកបានទេ» ហើយលោកនឹងប្ដឹងឧទ្ធរណ៍នៅពាក់កណ្ដាលសប្ដាហ៍នេះ។ កាលពីថ្ងៃពុធសប្ដាហ៍មុននេះសហចៅក្រមស៊ើបអង្កេត លោកយូ ប៊ុនឡេង និងលោក ស៊ីកហ្រ្វិក ប៊្លុង (Siegried Blunk) បានបញ្ជាឲ្យលោកអាន់ឌ្រូ ខេលី ដកចេញនូវខ្លឹមសារសំខាន់ៗមួយចំនួនទាក់ទងទៅនឹងអំពើឧក្រិដ្ឋកម្ម និងទីកន្លែងឧក្រិដ្ឋកម្មដូចជាការដ្ឋានសាងសង់ព្រលានយន្ដហោះនៅខេត្តកំពង់ ឆ្នាំង មន្ទីរសន្ដិសុខ និងការដ្ឋានវាយថ្មនៅខេត្តព្រះសីហនុជាដើម។ ព័ត៌មានទាំងនេះ ត្រូវបានសហព្រះរាជអាជ្ញាសញ្ជាតិអង់គ្លេសបង្ហាញនៅក្នុងសេចក្ដីថ្លែងការណ៍ជាចំហរបស់ខ្លួន។ លោកចង់ឲ្យសហចៅក្រមស៊ើបអង្កេតបន្ថែមលើឧក្រិដ្ឋកម្ម និងទីកន្លែងទាំងនោះក្នុងសំណុំរឿង០០៣ ជាពិសេស លោក អ៊ែនឌ្រូ ខេលី ទាមទារឲ្យនាំខ្លួនជនសង្ស័យយកមកសាកសួរចម្លើយ។ សហចៅក្រមស៊ើបអង្កេតទាំងពីរលើកឡើងថា លោកអ៊ែនឌ្រូ ខេលី ខ្វះមូលដ្ឋានច្បាប់ ហើយបានរំលោភលើភាពសម្ងាត់នៃការស៊ើបអង្កេត ហើយបញ្ជាឲ្យលោកខេលី ដកផ្នែកដែលជាប់ពាក់ព័ន្ធនោះចេញក្នុងរយៈពេលបីថ្ងៃចាប់ពីថ្ងៃដាក់បញ្ជានោះ។ នៅក្នុងសារឆ្លើយអេឡិចត្រូនិកតបជាមួយវីអូអេខ្មែរ លោកសហព្រះរាជអាជ្ញាជាតិអង់គ្លេសមានប្រសាសន៍ថា «យើងទទួលយកមិនបានទេនូវការបកស្រាយច្បាប់របស់ការរិយាល័យសហចៅក្រមស៊ើបអង្កេតនោះ»។ ទោះជាយ៉ាងណា លោកសហព្រះរាជអាជ្ញាអន្តរជាតិមិនផ្ដល់សេចក្ដីលម្អិតទាក់ទងនឹងការប្ដឹងទាស់របស់លោកនោះទេ។ លោក ខេលី មិនបានបកស្រាយចំៗថា តើលោកនឹងដកន័យសេចក្ដីដែលបង្កបញ្ហានោះមុននឹង អាចដាក់បណ្ដឹងសារទុក្ខនោះទេ ក៏ប៉ុន្ដែលោកលើកឡើងថា «វាគឺជារឿងគ្មានន័យ» ប្រសិនបើរូបលោកដកន័យសេចក្ដីនោះចេញមុននឹងអង្គបុរេជំនុំជម្រះសម្រេចសេចក្ដីលើបណ្ដឹងរបស់លោកនោះ។ លោក ឡាស អលសិន (Lars Olsen) មន្រ្ដីផ្នែកទំនាក់ទំនងកិច្ចការសាធារណៈរបស់សាលាក្ដីខ្មែរក្រហមបញ្ជាក់ថា លោកខេលី មានពេលមួយខែសម្រាប់រៀបចំបណ្ដឹងរបស់លោក ដោយគិតចាប់ពីថ្ងៃបង្គាប់របស់សហចៅក្រមស៊ើបអង្កេតនោះមក។ លោកឡាស អលសិន បន្ថែមថា អង្គបុរេជំនុំជម្រះមិនមានពេលវេលាកំណត់ដើម្បីធ្វើការសម្រេចក្នុងរឿងនេះទេ។ សំណុំរឿង០០៣ និង០០៤ គឺជាប្រធានបទដ៏ចម្រូងចម្រាស់រវាងជំហររបស់អង្គការសហប្រជាតិនិងភាគីនៃរាជរដ្ឋាភិបាលកម្ពុជា។ រដ្ឋាភិបាលកម្ពុជាបានជំទាស់ជាចំហមិនចង់ឲ្យមានសំណុំរឿងទាំងពីរចុងក្រោយនេះទេ ដោយខ្លាចក្រែងនឹងអាចបង្កឲ្យមានសង្គ្រាមស៊ីវិលនៅកម្ពុជាជាថ្មីម្ដងទៀត។ ឯកអគ្គរដ្ឋទូតគោចរសហរដ្ឋអាមេរិកទទួលបន្ទុកឧក្រិដ្ឋកម្មសង្រ្គាម លោកស្តេវិន រែប្ប ( Steven Rapp ) មានប្រសាសន៍កាលពីខែមករាឆ្នាំ ២០១១ ក្នុងសម្ភាសន៍ជាមួយវីអូអេខ្មែរ ថា លោកចង់ឲ្យទាំងភាគីកម្ពុជា និងភាគីអង្គការសហប្រជាជាតិសហការគ្នាក្នុងសំណុំរឿងដ៏ប្រទាំងប្រទិសនេះ។ លោក ស្តេវិន រែប សង្កត់ធ្ងន់ថា «យើងចង់ប្រាកដថា សាលាក្ដីមានលទ្ធភាពបញ្ចប់ការស៊ើបអង្កេតគ្រប់សំណុំរឿងទាំងអស់» ហើយលោកបន្ថែមថា ទស្សនៈរបស់អាមេរិក គឺចង់ឃើញរដ្ឋាភិបាលកម្ពុជាសហការជាមួយតុលាការដោយពេញលេញ៕ This posting includes an audio/video/photo media file: Download Now |
| ការនាំចេញសម្លៀកបំពាក់ទៅអាមេរិកកើនឡើងក្នុងត្រីមាសទី១ Posted: 23 May 2011 02:14 PM PDT ការនាំចេញសម្លៀកបំពាក់ទៅអាមេរិកក្នុងត្រីមាសទី១ឆ្នាំ២០១១នេះ បានកើនឡើងប្រមាណ២៦% បើធ្វើការប្រៀបធៀបទៅនឹងរយៈពេលដូចគ្នាកាលពីឆ្នាំ២០១០។ នេះបើយោងតាមលោកលោក គង់ ពុទ្ធារ៉ា ប្រធាននាយកដ្ឋានស្ថិតិ និងព័ត៌មាននៃក្រសួងពាណិជ្ជកម្មបានមានប្រសាសន៍នៅថ្ងៃច័ន្ទនេះ។ លោកបានមានប្រសាសន៍ទៀតថា ការកើនឡើងនេះដោយសារតែសេដ្ឋកិច្ចអាមេរិក និងសាកលលោកបានងើបឡើងវិញ។ លោកបានប្រាប់វីអូអេខ្មែរថា៖ «បើសិនជាលក់អត់ទ្រទ្រង់ជីវភាពសេដ្ឋកិច្ចបាន ជីវភាពប្រជាជនមានការងារធ្វើបាន គឺគាត់ម៉េចនិងកូម្មង់ (បញ្ជាទិញ) មកយើងកើត។ ដូចយើងអញ្ចឹង ឧបមាថា នៅក្នុងទីផ្សារយើងកលិយុគតាំងពីនយោបាយ តាំងពីអ្វីទាំងអស់ អញ្ចឹងយើងអត់ហ៊ានកុម្មង់ទៅគេទេ។ តែឧបមាអាមេរិកក៏អញ្ចឹងដែរ។ ឧបមាថា ប្រជាជនគេត្រូវការសម្លៀកបំពាក់ពីយើង ទាល់តែគេមានការងារធ្វើ»។ តួលេខរបស់ក្រសួងពាណិជ្ជកម្មឲ្យដឹងថា នៅក្នុងត្រីមាសទី១ឆ្នាំ២០១១នេះ ការនាំចេញសម្លៀកបំពាក់ទៅកាន់សហរដ្ឋអាមេរិកមានចំនួនប្រមាណជាង៥២១លានដុល្លារអាមេរិក ហើយនៅក្នុងឆ្នាំ២០១០ មានចំនួនជាង៤១១លានដុល្លារអាមេរិក ។ ការនាំចេញសម្លៀកបំពាក់ពីកម្ពុជាទៅកាន់ទីផ្សារអាមេរិកក្នុងឆ្នាំ២០១០មានចំនួន១.៨៤៣,៨៩ លានដុល្លារអាមេរិក។ របាយការណ៍អាមេរិកមួយដែលមានឈ្មោះថា Trade and Trade Policy បានឲ្យដឹងថា ការនាំចេញសម្លៀកបំពាក់ពីកម្ពុជា និងបង់ក្លាដេសទៅទីផ្សារអាមេរិកបានកើនឡើងយ៉ាងឆាប់រហ័ស។ ក្នុងចំណោមប្រទេសទាំងបួនដែលរួមមានបង់ក្លាដែស កម្ពុជា អ៊ែលសាលវ៉ាឌ័រ និងហុងឌុរ៉ាស មានតែប្រទេសបង់ក្លាដែសមួយគត់ដែលបាននាំចេញសម្លៀកបំពាក់ទៅអាមេរិកខ្ពស់ជាងគេ គឺមានរហូត ដល់៣៩ភាគរយ។ ចំណែកកម្ពុជាវិញគឺស្ថិតក្នុងលំដាប់ថ្នាក់ទី២មានតែប្រមាណ៣១ភាគរយប៉ុណ្ណោះ ។ លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា បានទទួលស្គាល់ថា ការនំាចេញសម្លៀកបំពាក់ទៅកាន់ទីផ្សារអាមេរិកពិតជាមានការកើនឡើងមែន។ ក៏ប៉ុន្តែប្រាក់ចំណេញទាំងនេះមិនបានផ្តល់ផលប្រយោជន៍ដល់ក្រុមកម្មករខ្មែរទេ។ លោកជា មុនី បានមានប្រសាសន៍ទៀតថា ថៅកែរោងចក្រគួរតែចែករំលែកប្រាក់ចំណេញទាំងនេះដល់ក្រុមកម្មករតាមរយៈការដំឡើងប្រាក់បៀវត្សរ៍ដល់ពួកគេ។ លោកមានប្រសាសន៍ថា៖ «ផលចំណេញនេះធំណាស់ ច្រើនមែនទែន ហើយកម្មករ កម្មការីនី ក្នុងប្រទេសកម្ពុជាប្រាក់ខែទាប ណាស់ចាយអត់គ្រាន់ទេ។ ការដែលយើងឲ្យទៅកម្មករនេះ ដោយសារតែកម្មករជាអ្នកផលិត។ ប្រសិនបើ ណាជាយើងមិនឲ្យទៅកម្មករទេ គឺកម្មករអត់មានទឹកចិត្តនៃការផលិត។ អញ្ចឹងការនាំចេញផលិតផលនៃការ កើនឡើងនៃការនាំចេញ គឺអត់បានតែប៉ុណ្ណឹងទេ។ អញ្ចឹងយើងគួរតែថា អ្វីដែលកម្មករបានខិតខំហើយ ផលចំណេញរបស់កម្មករគួរតែចែកឲ្យកម្មករ»។ លោកជាតិ ខេមរា មន្រ្តីជាន់ខ្ពស់នៃសមាគមរោងចក្រកាត់ដេរកម្ពុជាបានមានប្រសាសន៍ថា ថៅកែ រោងចក្រកាត់ដេរបច្ចុប្បន្ននេះ គ្រាន់តែស៊ីឈ្នួលដេរឲ្យអ្នកទិញតែប៉ុណ្ណោះ។ លោកបានមានប្រសាសន៍ទៀតថា តាមការសិក្សាកន្លងមកនៅតាមបណ្តារោងចក្រមួយចំនួនថៅកែ មិនទទួលបានប្រាក់ចំណេញច្រើនទេ។ លោកបានប្រាប់វីអូអេខ្មែរថា៖ «អ្វីដែលអ្នកបានលើកឡើងថា ចំណេញច្រើន អ្នកនោះមិនដែលមកធ្វើក្នុងវិស័យកាត់ដេរ មិនដែល ក្តោបក្តាប់ ឬក៏វិនិយោគនៅក្នុងវិស័យកាត់ដេរ។ ជំរាបសួរថា កម្ពុជាចំណេញបានប៉ុន្មាន ខ្ញុំគ្រាន់តែឧទារហណ៍ សួរថា កម្ពុជាចំណេញយ៉ាងម៉េច បើកម្ពុជារកតែខ្លួនឯងអត់មានបុគ្គលិកខ្មែរជាអ្នកជំនាញខាងទីផ្សារនៅខាងក្រៅផង ថៅកែលុយកាក់វិលនៅខាងក្រៅទាំងអស់»។ កម្ពុជាមានរោងចក្រ និងសហគ្រាសប្រមាណ៥៣០ដែលមានកម្មករ កម្មការីនីសរុបប្រមាណជាង៣៧ម៉ឺននាក់ ហើយប្រាក់ខែគោលរបស់ក្រុមកម្មករម្នាក់ៗប្រមាណតែ៦១ដុល្លារតែប៉ុណ្ណោះ។ ក្រុមកម្មករធ្លាប់បាននិយាយថា ប្រាក់ខែទាំងនេះមិនអាចទ្រទ្រង់ជីវភាពរបស់ពួកគេបានទេ បើប្រៀបធៀបទៅ និងការឡើងថ្លៃទំនិញនៅក្នុងទីផ្សារបច្ចុប្បន្ននេះ៕ This posting includes an audio/video/photo media file: Download Now |
| ពាណិជ្ជកម្មកម្ពុជាថៃកើនទោះបីមានសង្គ្រាមព្រំដែន Posted: 23 May 2011 01:45 PM PDT ពាណិជ្ជកម្មទ្វេភាគីកម្ពុជានិងថៃបានកើនឡើងក្នុងរយៈពេលបីខែដើមឆ្នាំ២០១១នេះ បើទោះបីជាមានជម្លោះព្រំដែនក៏ដោយ។ ក្រុមអ្នកវិភាគបាននិយាយនៅថ្ងៃច័ន្ទនេះថា កំណើនពាណិជ្ជកម្មទ្វេភាគីនេះអាចជាកត្តាដ៏សំខាន់មួយដើម្បីនាំទៅរកដំណោះស្រាយជម្លោះព្រំដែន។ ពាណិជ្ជកម្មទ្វេភាគីសរុបចំនួន៧១៦លានដុល្លារអាមេរិកក្នុងរយៈពេលបីខែដំបូង ដោយកើនឡើង ៣៥ភាគរយពីចំនួន៥២៧លានដុល្លារអាមេរិកក្នុងរយៈពេលដូចគ្នាកាលពីឆ្នាំ២០១០។ នេះបើតាមស្ថិតិ របស់ស្ថានទូតថៃប្រចាំនៅកម្ពុជាដែលត្រូវបានចេញផ្សាយកាលពីថ្ងៃអាទិត្យ។ ទំហំពាណិជ្ជកម្មទ្វេភាគីកំពុងតែកើនឡើង ខណៈដែលការវាយប្រយុទ្ធគ្នារវាងកងទ័ពកម្ពុជានិងថៃបានផ្ទុះឡើងនៅក្នុងខែកុម្ភៈនៅព្រំដែនក្បែរប្រាសាទព្រះវិហារ និងចាប់ពីថ្ងៃទី២២ខែមេសាដល់ថ្ងៃទី៣ ខែឧសភា នៅប្រាសាទតាមាន់ និងប្រាសាទតាក្របីក្នុងខេត្តឧត្តរមានជ័យ។ លោក ធន សារ៉ាយ ប្រធានសមាគមសិទ្ធិមនុស្សអាដហុក បានថ្លែងថា កំណើនពាណិជ្ជកម្មទ្វេភាគីនេះជារឿងសំខាន់នៃទំនាក់ទំនងទ្វេភាគីរវាងកម្ពុជា និងថៃ ហើយទោះជាប្រទេសទាំងពីរមានជម្លោះព្រំដែន និងការវាយប្រយុទ្ធគ្នារវាងកងទ័ពនៃប្រទេសទាំងពីរក្តី សកម្មភាពពាណិជ្ជកម្មរវាងប្រទេសទាំងពីរមិនបានកាត់ផ្តាច់ទេ។ លោក ធន សារ៉ាយ បានបញ្ជាក់ថា បើពាណិជ្ជករថៃមានឥទ្ធិពលទៅលើនយោបាយថៃ វាអាចជួយជំរុញដល់ដំណោះស្រាយជម្លោះរវាងប្រទេសទាំងពីរ។ លោកថ្លែងថា៖ «ការកើនឡើងពាណិជ្ជកម្មនេះ អាចបង្កលក្ខណៈងាយស្រួលដល់ការចរចាក្នុងការបញ្ចប់អរិភាពខាងយោធានិងនយោបាយ។ រឿងពាណិជ្ជកម្មនេះក៏អាចជួយបង្កលក្ខណៈងាយស្រួលឱ្យមានការបញ្ចប់ជម្លោះនេះ ឱ្យបានឆាប់ដែរ»។ លោក ឈាង វណ្ណារិទ្ធ នាយកប្រតិបត្តិនៃវិទ្យាស្ថានកម្ពុជាដើម្បីកិច្ចសហប្រតិបត្តិការ និងសន្តិភាព បានថ្លែងថា កម្ពុជាមានជម្លោះព្រំដែនជាមួយថៃតាំងពីឆ្នាំ២០០៨ ប៉ុន្តែវាមិនប៉ះពាល់ខ្លាំងដល់ពាណិជ្ជកម្មរវាងប្រទេសទាំងពីរទេដែលជាកត្តាវិជ្ជមាន។ លោកបានប្រាប់វីអូអេខ្មែរថា៖ «ខ្ញុំមើលឃើញថា វាអាចជាកត្តាជំរុញឱ្យមានសន្តិភាពនៃប្រទេសទាំងពីរ។ វាមិនអាចភ្ជាប់ជាលក្ខណៈផ្ទាល់ដល់ជម្លោះព្រំដែនកម្ពុជាថៃទេ ប៉ុន្តែវាជាកត្តាមួយបង្កនូវបរិយាកាសនយោបាយរវាងទីក្រុងភ្នំពេញ និងទីក្រុងបាងកកឱ្យល្អប្រសើរ។ វាមិនបានដោះស្រាយផ្ទាល់ទៅដល់ជម្លោះព្រំដែនក៏ដោយ ក៏វាជាកត្តាវិជ្ជមានមួយ ដើម្បីបង្កឱ្យបរិយាកាសនយោបាយទំនាក់ទំនងទ្វេភាគីកាន់តែល្អ។ វាមិនមែនជាកត្តាចម្បងដើម្បីដោះស្រាយជម្លោះព្រំដែននោះទេ ប៉ុន្តែវាជាកត្តាបន្ទាប់បន្សំសំខាន់មួយដែរ»។ លោក ចាន់ សុផល ប្រធានសមាគមសេដ្ឋកិច្ចកម្ពុជា បានថ្លែងថា កម្ពុជានិងថៃកំពុងទទួលបានផលចំណេញនៃកំណើនពាណិជ្ជកម្មទ្វេភាគីនេះ។ លោក ច័ន្ទ សុផល បានបន្ថែមថា អ្នកនយោបាយនៃប្រទេសទាំងពីរយល់ឃើញពីសារៈសំខាន់នៃកិច្ចសហប្រតិបត្តិការផ្នែកពាណិជ្ជកម្ម និងសេដ្ឋកិច្ចដែលប្រទេសទាំងពីរបានទទួលភាពចំណេញដូចគ្នា និងនាំឱ្យមេដឹកនាំពិចារណាលើការបញ្ចប់ជម្លោះព្រំដែននេះ។ «បើយើងគិតពីផលប្រយោជន៏នៃសេដ្ឋកិច្ច និងវប្បធម៌ យើងយល់ថា វាមិនគួរមានជម្លោះទេ។ សារៈសំខាន់ នៃផ្នែកសេដ្ឋកិច្ច និងពាណិជ្ជកម្មនេះមកធ្វើជាហេតុផលសំខាន់ក្នុងការបញ្ចប់ជម្លោះ និងលើកកម្ពស់កិច្ចសហប្រតិបត្តិការថែមទៀត»។ លោក ចាន់ ណូរ៉ា រដ្ឋលេខាធិការក្រសួងពាណិជ្ជកម្មបានថ្លែងថា ការវាយប្រយុទ្ធគ្នារវាងកងទ័ពកម្ពុជា និងថៃមានផលប៉ះពាល់តិចតួចណាស់ទៅលើសកម្មភាពពាណិជ្ជកម្ម ដោយសារតែពាណិជ្ជកម្ម គឺស្វែងរកផលចំណេញនៅពេលអ្នកជំនួញយល់ថា វាមានផលចំណេញ ពួកគេនៅតែធ្វើ។ លោកស្រី ជីរ៉ាណាន់ វង្សម៉ុងកុល នាយកនៃការិយាល័យជំរុញពាណិជ្ជកម្មបរទេសប្រចាំស្ថានទូតថៃក្នុងទីក្រុងភ្នំពេញ បានបញ្ជាក់ថា ការកើនឡើងនេះគឺដោយសារការជឿជាក់គ្នាទៅវិញទៅមករវាងអ្នកជំនួញ កម្ពុជា និងថៃ ហើយជំនឿរបស់ប្រជាពលរដ្ឋកម្ពុជាលើផលិតផលថៃ ហើយយើងសង្ឈឹមថានិន្នាការកើនឡើងនេះបន្តពេញមួយឆ្នាំ២០១១នេះ។ ស្ថិតិបានបង្ហាញថា ការនាំចូលរបស់ថៃមកកម្ពុជាមានប្រេង ផលិតផលប្រើប្រាស់ គ្រឿងសំណង់ ផ្លែឈើ បន្លែ និងគ្រឿងសំអិតសំអាងកាយជាដើម ហើយផលិតផលកម្ពុជាដែលត្រូវបាននាំចូលទៅថៃរូមមានផលិតផលកសិកម្ម សម្លៀកបំពាក់ ដែកអេតចាយ និងត្រីជាដើម៕ This posting includes an audio/video/photo media file: Download Now |
| ភាពចម្រូងចម្រាសរវាងចៅក្រមនិងព្រះរាជអាជ្ញាលើករណី០០៣មិនមានផ្លូវចេញ Posted: 23 May 2011 01:11 PM PDT ក្រុមអ្នកឃ្លាំមើលសាលាក្តីកាត់ទោសខ្មែរក្រហមអះអាងថាជាការមិនរំលោភច្បាប់ទេចំពោះការប្រកាសរបស់ព្រះរាជអាជ្ញាអំពីភាពលម្អិតមួយចំនួនទាក់ទង នឹងសំណុំរឿង០០៣ដ៏ចម្រូងចម្រាសនោះ ទោះបីជាមានប្រតិកម្មខ្លាំងពីសហចៅក្រមស៊ើបអង្កេតក្តី។ បើទោះបីជាសហចៅក្រមស៊ើបអង្កេតបានបង្គាប់ជាកំហិតឲ្យសហព្រះរាជអាជ្ញាបរទេស Andrew Cayley លុបចោលភាគខ្លះនៃសេចក្តីប្រកាសព័ត៌មានរបស់លោកដែល និយាយពីការខកខានអំពីរឿងមិនបានស៊ើបអង្កេតគ្រប់គ្រាន់លើសំណុំរឿង ០០៣ ដ៏ចម្រូងចម្រាសផ្នែកនយោបាយនោះក្តី តែក្រុមអ្នកឃ្លាំមើល និង អង្គការសង្គមស៊ីវិលមួយចំនួនបង្ហាញពីការគាំទ្រចំពោះសេចក្តីថ្លែងការណ៍ របស់សហព្រះរាជអាជ្ញាបរទេសដោយនិយាយថាសេចក្តីថ្លែងការណ៍នោះគឺ ផ្តល់ព័ត៌មានដល់ជនរងគ្រោះនិងសាធារណជនតែប៉ុណ្ណោះ។ សហចៅក្រមស៊ើបអង្កេតទាំងពីរគឺលោក Siegfried Blunk និង លោក យូ ប៊ុនឡេងបានចាត់ទុកថាសហព្រះរាជអាជ្ញាបញ្ចេញព័ត៌មានខុសនិងច្បាប់ហើយរំលោភលើច្បាប់ស្តីពីភាពសម្ងាត់របស់តុលាការ ដោយទុករយៈពេលបីថ្ងៃដើម្បីដកយកផ្នែកខ្លះចេញពីសេចក្តីប្រកាសព័ត៌មាន។ កញ្ញា សេង ធារី ប្រធានសមាគមនជនរងគ្រោះមួយនឹងជាដើមបណ្តឹងរដ្ឋប្បវេណីរិះគន់ការបង្គាប់របស់សហចៅក្រមស៊ើបអង្កេតទាំងពីរដោយចាត់ ទុកថា ជារឿងមិនសមរម្យហើយជារឿងអស់សំណើចដែលកញ្ញាអធិប្បាយថាជាការអស់ជំនឿលើសហចៅក្រមស៊ើបអង្កេតទាំងពីរ។ កញ្ញា សេង ធារីបានការពារ សេចក្តីប្រកាសព័ត៌មានលោក Andrew Cayley សហព្រះរាជអាជ្ញាបរទេស ដោយនិយាយថាជាការផ្តល់ព័ត៌មានជូនសារធារណជនឲ្យបានដឹងមិនមែនរំលោភច្បាប់ទេ។ «អ្នករំលោភសិទ្ធិ អ្នករំលោភតួនាទីជាសហចៅក្រមស៊ើបអង្កេតនៅក្នុងការអត់បានផ្តល់ព័ត៌មានមកសាធារណជន ពិសេសជនរងគ្រោះ។ បើអញ្ចឹងមិនមែន សហព្រះរាជអាជ្ញាអន្តរជាតិទេដែលបានរំលោភតួនាទីឬសិទ្ធិរបស់ខ្លួននិង សាធារណជនប៉ុន្តែគឺជាសហចៅក្រមស៊ើបអង្កេតវិញ សហចៅក្រមស៊ើប អង្កេតអន្តរជាតិ និងសហចៅក្រមអន្តរជាតិ នៅក្នុងការលះបង់តួនាទី ការទទួល ខុសត្រូវនៅក្នុងការផ្តល់ព័ត៌មានជាសាធារណៈ»។ កញ្ញា សេង ធារីថ្លែងយ៉ាងដូច្នះដោយយោងថាសហចៅក្រមស៊ើបអង្កេតខក ខានរយៈពេលជាង១ឆ្នាំកន្លះដើម្បីផ្តល់ព័ត៌មានដល់ជនរងគ្រោះនិងជនរងគ្រោះ ដើមបណ្តឹងរដ្ឋប្បវេណីដើម្បីរៀបចំដាក់ពាក្យប្តឹងករណី០០៣ ហើយការស៊ើប អង្កេតក៏មានភាពស្ងប់ស្ងាត់តាមអ្វីដែលគេហៅថាភាពសម្ងាត់របស់តុលាការ។ សហព្រះរាជអាជ្ញាបរទេសលោក Andrew Cayley បានអះអាងថាក្នុងសេចក្តីប្រកាសព័ត៌មានកាលពីថ្ងៃទី៩ឧសភាថាសហចៅក្រមស៊ើបអង្កេតពុំបានស៊ើបអង្កេតគ្រប់គ្រាន់ចំពោះឧក្រិដ្ឋកម្មដែលបានកើតឡើងចំពោះករណី០០៣ដែលមានកម្មាភិបាលខ្មែរក្រហមជាច្រើនទៀតដែលសហព្រះរាជអាជ្ញាព្យាយាមនាំខ្លួនមកជំនុំជម្រះទោស។ ការថ្លែងពីកង្វះនៃការស៊ើបអង្កេតនេះគឺយោងទៅលើទីតាំងឧក្រិដ្ឋកម្ម បទក្រិដ្ឋជាច្រើននិងជនជាប់សង្ស័យមិនត្រូវបានធ្វើនិង កោះហៅមកសាកសួរទេ ទោះជាស្ថិតនៅក្នុងយុត្តាធិការនៃសាលាក្តីខ្មែរក្រហមក្តី។ លោកឡាត់ គីអ្នកសម្រមសម្រួលសាលាក្តីខ្មែរក្រហមនៃអង្គការសិទ្ធិមនុស្ស អាដហុក បានអះអាងថាសេចក្តីប្រកាសព័ត៌មានរបស់លោក Andrew Cayley ជាការផ្តល់ព័ត៌មានជូនជនរងគ្រោះ តែលោកអះអាងថាការខ្វែងគំនិតគ្នារវាងអ្នកច្បាប់ទាំងពីរភាគីមិនមែនជារឿងសំខាន់សម្រាប់ជនរងគ្រោះទេ។ «អញ្ចឹងទាក់ទងនឹងទំនាស់ផ្នែកច្បាប់នេះសម្រាប់យើងខ្ញុំជាសង្គមស៊ីវិល យើងខ្ញុំយល់ឃើញថាពុំមានលក្ខណៈអ្វីគួរឲ្យចាប់អារម្មណ៍ប៉ុន្មានទេ។ ប៉ុន្តែអ្វីដែលសំខាន់ គឺយើងយល់ឃើញថាតើប្រយោជន៍យុត្តិធម៌មួយណាដែលភាគីទាំងពីរ នឹងអាចផ្តល់យុត្តិធម៌សម្រាប់ជាប្រវត្តិសាស្ត្រកម្ពុជា? នេះទើបជាការណ៍សំខាន់»។ ក្រុមអ្នកវិភាគរឿងសាលាក្តីខ្មែរក្រហមបានអះអាងថាបញ្ហាមានជម្រើសពីរដែល សហព្រះរាជអាជ្ញាបរទេសត្រូវធ្វើគឺថាជ្រើសរើសយកការប្តឹងឧទ្ធរណ៍ជំទាស់់នឹង ការបង្គាប់របស់សហចៅក្រមស៊ើបអង្កេត ឬ ឲ្យក្រឡាបញ្ជីដកចេញពីឯកសារ ដម្កល់ហើយចេញសេចក្តីប្រកាសព័ត៌មានលុបចោលភាគខ្លះនៃសេចក្តីប្រកាសព័ត៌មានតាមការបង្គាប់នោះ។ ទោះជាយ៉ាងណាក៏ដោយគ្មានការប្រកាសឲ្យដឹង ពីទោសទណ្ឌអ្វីដែលសហព្រះរាជអាជ្ញាបរទេស Cayley ត្រូវទទួលនោះទេ ប្រសិនបើមិនធ្វើតាមការបង្គាប់បញ្ជារបស់សហចៅក្រមស៊ើបអង្កេតនោះ។ ក្រុមអ្នកសង្កេតការណ៍ខ្លះបានថ្លែងថា សហព្រះរាជអាជ្ញាគួរត្រូវធ្វើការតវ៉ារឿងនេះក្នុងពេលប្តឹងជំទាស់ក្នុងអង្គបុរេ មិនគួរធ្វើជាសាធារណៈ ដែលប៉ះពាល់ដល់វិធានផ្ទៃក្នុងនោះទេ។ ក៏ប៉ុន្តែបានបន្ថែមថាការប្រកាសរបស់សហព្រះរាជអាជ្ញាអាចត្រូវគេគិតថាដើម្បីឲ្យសាធារណជនបានដឹងរឿងច្រើន ហើយដាក់សម្ភាធលើសហចៅក្រមស៊ើបអង្កេតទទួលយកតាមអ្វីដែលសហព្រះរាជអាជ្ញាចង់បានដែរ។ សហចៅក្រមស៊ើបអង្កេតបានបញ្ចប់ការស៊ើបសួររបស់ខ្លួនចំពោះសំណុំរឿង០០៣ ដែលមានអតីតមេដឹកនាំខ្មែរក្រហមពីរនាក់ តែជនរងគ្រោះបាននិយាយថា ពួកគេបានទទួលការជូនដំណឹងនៅនាទីដ៏តក់ក្រហល់ចុងក្រោយហើយមិនបានទទួលព័ត៌មានគ្រប់គ្រាន់ដូចសំណុំរឿង០០១និង០០២ទេដើម្បីរៀបចំនីតិវិធីនានាក្នុងការប្តឹងជាជនរងគ្រោះនិងដើមបណ្តឹងរដ្ឋប្បវេណី។ សំណុំរឿងបន្ថែមលេខ០០៣ និង ០០៤មានអតីតកម្មាភិបាលជាន់ខ្ពស់ខ្មែរក្រហម៥នាក់ទៀតដែលគេគិតថាជាជនសង្ស័យត្រូវនាំយកមកជំនុំជម្រះទោស។ ទោះបីជាសហព្រះរាជអាជ្ញាបរទេសចាត់ទុកថាជនសង្ស័យបន្ថែមស្ថិតក្នុងយុត្តាធិការសាលាក្តីមែន តែសហព្រះរាជអាជ្ញាជាតិ លោកស្រី ជា លាងដែលមាន ជំហស្របជាមួយរដ្ឋាភិបាលកម្ពុជានោះ បានចាត់ទុកថាសំណុំរឿងបន្ថែមនេះ មិនស្ថិតក្នុងយុត្តាធិការសាលាក្តីដែលត្រូវនាំខ្លួនយកមកជំនុំជម្រះទោសទេ។ រដ្ឋាភិបាលកម្ពុជាបានប្រកាសជាច្រើនលើកហើយថាមិនគាំទ្រឲ្យមានការនាំខ្លួនជនសង្ស័យបន្ថែមមកកាត់ទោសទេដើម្បីកុំឲ្យប៉ះពាល់ដល់សន្តិភាពនិង ស្ថិរភាព។ ក៏ប៉ុន្តែជំហរនេះផ្ទុយពីភាគីបរទេសដែលចង់ឃើញជន៥នាក់បន្ថែមទៀតត្រូវនាំយកមកកាត់ទោសដើម្បីរកយុត្តិធម៌ជូនជនរងគ្រោះនិងបំបាត់វប្បធម៌គ្មានទោសពៃរ៍។ សាលាក្តីខ្មែរក្រហមគ្រោងនឹងបើកសវនាការបឋមដើម្បី ជំនុំជម្រះទោសអតីតមេដឹកនាំខ្មែរក្រហមកំពូលៗ៤នាក់នៅថ្ងៃទី២៧ខែ មិថុនា ឆ្នាំ២០១១ ពីបទឧក្រិដ្ឋកម្មនានាដែលពាក់ព័ន្ធនឹងការកាប់សម្លាប់ពលរដ្ឋខ្មែរ ស្លូតត្រង់ប្រមាណ១លាន ៧សែននាក់ ក្នុងចន្លោះឆ្នាំ១៩៧៥ដល់១៩៧៩៕ This posting includes an audio/video/photo media file: Download Now |
| ប្រតិកម្មចម្រុះបន្ទាប់ពីសាលាក្តីកំណត់ពេលកាត់ទោសមេខ្មែរក្រហម Posted: 23 May 2011 12:39 PM PDT ក្រុមជនរងគ្រោះដើមបណ្តឹងរដ្ឋប្បវេណីបង្ហាញពីក្តីបារម្ភលាយឡំនឹងភាពរីករាយក្រោយពីសាលាក្តីខ្មែរក្រហមបានប្រកាសកំណត់ថ្ងៃជំនុំជម្រះទោសបឋមលើសំណុំរឿងក្តីខ្មែរក្រហម០០២ ដែលមានអតីតមេដឹកនាំខ្មែរក្រហមកំពូលៗបួនរូប។ កាលបរិច្ឆេទដើម្បីជំនុំជម្រះទោសអតីតមេដឹកនាំខ្មែរក្រហមកំពូលៗបួននាក់ដែលត្រូវគេប្រកាសថានឹងធ្វើនៅថ្ងៃទី២៧ ខែមិថុនា ឆ្នាំ២០១១ បានក្លាយជាដំណឹងរីករាយផងនិងខ្វល់ខ្វាយផងសម្រាប់ជនរងគ្រោះដាក់ពាក្យប្តឹងតាំងខ្លួនជាដើមបណ្តឹងរដ្ឋប្បវេណីក្នុងសាលាក្តីខ្មែរក្រហម។ ក្តីបារម្ភទាំងនោះរាប់បញ្ចូលទាំងការដាក់ទោសតិច ដែលធ្វើឲ្យប៉ះពាល់ដល់យុត្តិធម៌និងភាពស្ងប់ចិត្តរបស់ជនរងគ្រោះ ការមិនសហការពីជនជាប់ចោទ ការដែលអាចមិនបានកាត់ទោសជនជាប់ចោទពេលពួកគេនៅរស់ជាដើម។ លោក ស៊ុំ រិទ្ធី អាយុ៥៨ឆ្នាំជាជនរងគ្រោះដែលទទួលរងទារុណកម្មរហូតដល់ ពិការសារពាង្គកាយក្នុងគុកខ្មែរក្រហមមួយក្នុងខេត្តសៀមរាប។ លោកបានដាក់ពាក្យប្តឹងតាំងខ្លួនជាដើមបណ្តឹងរដ្ឋប្បវេណីដើម្បីតទល់ជាមួយនឹង អតីតមេដឹកនាំខ្មែរក្រហមទាំងបួនដែលមានវ័យចំណាស់ៗហើយកំពុងជាប់ឃុំឃាំង។ លោករិទ្ធី បានថ្លែងថាអ្វីដែលលោកព្រួយបារម្ភមិនមែនការប្រុងប្រៀបតតាំងជាមួយខ្មែរក្រហមទេ តែខ្លាចថាជនទាំងបួនរូបស្លាប់មុនការកាត់ទោសបញ្ចប់ ប្រសិនបើមិនប្រញាប់ធ្វើឲ្យបានឆាប់។ «ព្រោះរយៈកាលកន្លងមកវាដូចជាយូរពេកហើយសម្រាប់ខ្ញុំ។ ហើយអតីតមេខ្មែរ ក្រហមទាំងបួននាក់ហ្នឹងក៏កាន់តែជរាទៅ។ ខ្ញុំខ្លាចមិនបានកាត់ទោស គាត់ស្លាប់ មុនការកាត់ទោស។ ខ្ញុំចេះតែមានការព្រួយបារម្ភពីបញ្ហាហ្នឹង ហើយបើធ្វើទៅបានលឿនជាងហ្នឹងទៀតខ្ញុំរិតតែអរក្នុងស្មារតីចង់ឃើញយុត្តិធម៌ក្នុងសម័យខ្មែរ ក្រហមហ្នឹងបាទ»។ លោក រិទ្ធីបានអះអាងថាលោកនិងប្រជាពលរដ្ឋរងគ្រោះដទៃទៀតនឹងមិនស្ងប់ ចិត្តទេប្រសិនបើជនជាប់ចោទមិនត្រូវបានកាត់ទោសក្នុងតុលាការកូនកាត់ដែល ចូលរួមដោយអង្គការសហប្រជាជាតិ។ លោករិទ្ធីបានអះអាងថាលោករីករាយក្នុងការទទួលដំណឹងពីកាលបរិច្ឆេទសវនាការបឋមចំពោះករណី០០២ដែលមានអតីតមេដឹកនាំខ្មែរក្រហមបួនរូបមាន នួន ជាបងធំទី២នៃរបបកម្ពុជាប្រជាធិបតេយ្យខ្មែរក្រហម អៀង សារី រដ្ឋមន្ត្រីការបរទេស ខៀវ សំផនប្រមុខរដ្ឋ និងអៀង ធីរិទ្ធិរដ្ឋមន្ត្រីសង្គមកិច្ច។ អ្នកទាំង៤ ជាប់ចោទពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មប្រល័យពូជសាសន៍ជាដើមដែលធ្វើឱ្យពលរដ្ឋខ្មែរប្រមាណ១លាន ៧សែននាក់ស្លាប់បាត់បង់ជីវិតក្នុងចន្លោះឆ្នាំ១៩៧៥ ដល់១៩៧៩។ លោកជុំ ម៉ីអាយុ៨១ឆ្នាំអ្នករួចជីវិតម្នាក់ទៀតពីគុកទួលស្លែងខ្មែរក្រហមឬ ស ២១ បានអះអាងថាលោករីករាយនឹងកាលបរិច្ឆេទជំនុំជម្រះទោសករណី០០២។តែលោកថ្លែងថាលោកមិនត្រឹមតែព្រួយបារម្ភពីការមិនអាចនឹងរកយុត្តិធម៌នោះទេតែផ្តល់គំរូអាក្រក់សម្រាប់ក្មេងជំនាន់ក្រោយ។ លោក ម៉ី ក៏បានប្រៀបធៀបការរកយុត្តិធម៌សំណុំរឿងលេខ០០២ ទៅនឹងសំណុំរឿង០០១ ឬករណី ឌុចអតីតប្រធានគុកទួលស្លែង ដែលតុលាការបានដាក់ទោស៣៥ឆ្នាំ ហើយបន្ថយទោសខ្លះដោយសារជាប់ទោសនៅគុកយោធានិងការសហការជាមួយតុលាការ។ «យើងបារម្ភខ្លាចក្មេងជំនាន់ក្រោយ វាថាអ្ហេ៎ឌុចសម្លាប់គេអស់មួយគំនរគគោក (អស់ច្រើន) ហើយកាត់ទោសអត់មានអស់មួយជីវិតផង កាត់ទោសតែ១៩ឆ្នាំ អញ្ចឹងក្មេងជំនាន់ក្រោយវារៀនសូត្រតាមឌុចទៀតតាមអាបីឆ្នាំ ៨ ខែ ២០ ថ្ងៃ ដែលអត់មានច្បាប់ហ្នឹងទៀត ខ្លាចក្មេងទៅអញ្ចឹងទៀតណាក្មួយ»។ លោក ជុំ ម៉ីអះអាងថា លោកនឹងចូលរួមជាដើមបណ្តឹងរដ្ឋប្បវេណីប្រសិនបើ គេហៅលោក។ ក៏ប៉ុន្តែលោកបញ្ជាក់ថាសាលក្រមសំណុំរឿង០០១គួរចេញមុន ដំណើរការនៃការកាត់ទោសសំណុំរឿង០០២ចាប់ផ្តើម ដើម្បីឲ្យជនរងគ្រោះបានដឹងពីទោសទណ្ឌរបស់ឌុច ឲ្យជនរងគ្រោះអស់ចិត្ត ហើយមានពេលវេលាគ្រប់ គ្រាន់ដើម្បីចូលរួមក្នុងសំណុំរឿង០០២តទៅទៀត។ លោក ជុំ ស៊ីរ៉ាត់ ដើមបណ្តឹងរដ្ឋប្បវេណីមួយរូបផ្សេងទៀតបានអះអាងថាការ ស្វែងរកយុត្តិធម៌និងការណ៍ពិតចំពោះសំណុំរឿង០០២ នេះទំនងជាពិបាកដោយ សារតែជនជាប់ចោទមិនបានទទួលស្គាល់កំហុសផង ហើយមិនសហការជាមួយ តុលាការដូចឌុច ក្នុងសំណុំរឿង០០១។ «យើងខ្ញុំដើម្បីឲ្យបានយុត្តិធម៌ទី១ គឺថាចង់ដឹងការណ៍ពិតសិន។ បើសិនជាការកាត់ក្តីហ្នឹងមិននាំការណ៍ពិតមកឲ្យខ្ញុំដឹងទេ អាហ្នឹងគឺថាយើងខ្ញុំមានមនោសញ្ចេតនាថាអត់មានយុត្តិធម៌ទេ។ ហើយតាមរបៀបដែលមើលទៅខាងជនជាប់ចោទទាំង បួននាក់ហ្នឹង ហើយនឹងមេធាវីរបស់គេធ្វើការតវ៉ាទាំងអស់រហូតដល់ពេលឥឡូវនេះ។ ខ្ញុំឃើញថាពួកហ្នឹងមិនព្រមសហការ មិនព្រមចង់និយាយកិច្ចការពិតដើម្បីប្រាប់តុលាការទេ»។ ទោះជាយ៉ាងណាក៏ដោយលោក ឌឹម សុវណ្ណារុំ អ្នកនាំពាក្យសាលាក្តីខ្មែរក្រហមបានអះអាងថាទោះបីជាតុលាការនេះជួបឧបសគ្គ ប៉ះទង្គិចភ្លៀងខ្យល់ ផ្គរ ឥទ្ធិពល យ៉ាងម៉េចក៏ដោយ ក៏តុលាការដំណើរការដោយឈរនៅលើច្បាប់ឈរនៅ លើយុត្តាធិការ ហើយបានឈានដល់ដំណាក់កាលមួយជាដំណាក់កាលវិជ្ជមានបំផុតសម្រាប់ជនរងគ្រោះដែលរង់ចាំជាយូរមកហើយនោះ។ លោកថ្លែងយ៉ាងដូច្នេះដោយយោងថាយុត្តិធម៌នឹងកាន់តែកើតមានបន្ថែមមួយកម្រិតទៀតដោយសារសំណុំរឿង០០២ ដែលមានវិសាលភាពដ៏ធំធេងនោះនឹងចាប់ផ្តើមជំនុំជម្រះបន្ទាប់ពីសំណុំរឿង០០១។ «ខ្ញុំគិតថាពីរជំពូកនេះ ជាសំណុំរឿងដែលអាចបំពេញបន្ថែមគ្នា។ អញ្ចឹងវាកាន់តែឆ្លើយតបទៅនឹងអ្វីមួយជាការណ៍ពិតនិងយុត្តិធម៌មួយដែលជាបេសកកម្មរបស់ អង្គជំនុំជម្រះវិសាមញ្ញក្នុងតុលាការកម្ពុជាដើម្បីឆ្លើយតបទៅនឹងការរង់ចាំរបស់ ជនរងគ្រោះទាំងអស់»។ ដើមបណ្តឹងរដ្ឋប្បវេណីចំនួន ១.០៩៤ ក្នុងចំណោម ២.១២៤នាក់ដែលត្រូវជ្រើស រើសឲ្យមានសិទ្ធិផ្តល់សក្ខីកម្មប្រឆាំងនឹងជនជាប់ចោទទាំងបួននាក់ក្នុងសំណុំ រឿង០០២ ក៏ប៉ុន្តែមិនដឹងថានឹងមានប៉ុន្មាននាក់ដែលត្រូវចម្រាញ់ឲ្យបានចូល តតាំងផ្ទាល់ក្នុងសវនាការអំពីបទឧក្រិដ្ឋ ជាសាក្សី បង្ហាញភស្តុតាងទាមទារ សំណងជាដើមនោះ។ លោក ឡាត់ គីអ្នកសម្របសម្រួលសាលាក្តីខ្មែរក្រហមនៃអង្គការសិទ្ធិមនុស្ស អាដហុកបានឲ្យដឹងថាជនរងគ្រោះបច្ចុប្បន្នមានការខកចិត្តចំពោះការណ៍ដែលពួកគេពុំបានទទួលព័ត៌មានគ្រប់គ្រាន់ដើម្បីរៀបចំវិធីសាស្ត្រនានាក្នុងការតតាំងជាមួយនឹងជនជាប់ចោទទេ ដោយសារតែពាក្យមួយម៉ាត់គឺ«ភាពសម្ងាត់»របស់តុលាការ។ «ចំណុចនេះដោយសារតែវាជាគុណវិបត្តិមួយដែរជាការណ៍ពិតទៅ ទាក់ទងនឹង កិច្ចការទាំងអស់នេះ ដោយសារតែអង្គភាពនីមួយៗប្រកាន់យកជំហស្អី កិច្ចការស្អីទាំងអស់ក៏ជាកិច្ចការសម្ងាត់ កិច្ចការអីក៏ជាកិច្ចការនីតិវិធីទាក់ទងនឹងកិច្ចការសម្ងាត់ទាំងអស់គ្រប់បែបយ៉ាង។ អញ្ចឹងធ្វើឲ្យសាធារណជនរួមទាំងជនរងគ្រោះ អត់អាចដឹងអំពីភាពរីកចម្រើន ឬក៏ភាពរីកចម្រើនអ្វីខ្លះដែលអង្គភាពឬមួយក៏មេធាវីរបស់ខ្លួនបានគិតគូរអំពីយុទ្ធសាស្ត្រ អំពីគំនិត មតិយោបល់នៅក្នុងការស្វែងរកយុត្តិធម៌ជូនពួកគាត់ទេ (ជនរងគ្រោះ)»។ ក៏ប៉ុន្តែលោក ឡាត់ គីបានអះអាងថាការដាក់កាលបរិច្ឆេទដើម្បីបើកសវនាការជា បឋមសម្រាប់សំណុំរឿង០០២នេះជាភាពរីករាយចំពោះជនរងគ្រោះនិងចំពោះ សាធារណជនដែលទន្ទឹងរង់ចាំបីទសវត្សរ៍មកហើយៗក៏ជាការចង់ដឹងថាតើ តុលាការបានរកឃើញអ្វីខ្លះសម្រាប់យុត្តិធម៌ដល់ជនរងគ្រោះនោះ។ មន្ត្រីសង្គមស៊ីវិលនិងជនរងគ្រោះជាអ្នកដាក់ពាក្យតាំងខ្លួនជាដើមបណ្តឹង រដ្ឋប្បវេណីដែលមានសិទ្ធិទាមទារសំណងនោះ បានអះអាងថាការរកយុត្តិធម៌និងការណ៍ពិតជារឿងមួយហើយ តែសំណងសម្រាប់ជនរងគ្រោះក៏ជាការប៉ះប៉ូវ ផ្លូវចិត្តផងដែរ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
