VOA News: ព័ត៌មាន: “ផ្សារធំថ្មីត្រូវបានបើកឲ្យដំណើរការឡើងវិញ” plus 1 more |
| ផ្សារធំថ្មីត្រូវបានបើកឲ្យដំណើរការឡើងវិញ Posted: 25 May 2011 02:51 PM PDT ផ្សារធំថ្មីដែលជាកេរដំណែលមួយរបស់ប្រទេសបារាំង ត្រូវបានបើកសម្ពោធជាថ្មីឡើងវិញនៅថ្ងៃពុធនេះ ដែលក្រុមន្រ្តីផ្លូវការចាត់ទុកថា ផ្សារនេះនិងក្លាយទៅជាមណ្ឌលប្រវត្តិសាស្រ្តមួយសម្រាប់ការទាក់ទាញទេសចរ។ ដោយរក្សាការលាបពណ៌លឿងដូចកាលពី៧៤ឆ្នាំមុន ផ្សារធំថ្មីដែលស្ថិតនៅចំកណ្តាលទីក្រុងភ្នំពេញ ត្រូវបានចាប់ផ្តើមជួសជុលឡើងវិញកាលពីខែមករា ឆ្នាំ២០០៩។ នេះគឺជាផ្សារបុរាណ ក៏ប៉ុន្តែសំណង់មានលក្ខណៈទំនើប និងមានស្តង់សម្រាប់លក់ទំនិញសុរបជាង៣.០០០តូប។ ទំនិញទាំងនោះរួមមានបន្លែ ផ្លែឈើ ត្រីសាច់ គ្រឿងអលង្កា សម្លៀកបំពាក់ គ្រឿងអេឡិចត្រូនិក សៀវភៅ និងរបស់អនុវស្សាវរីយ៍ជាដើម។ លោក អេរិក បឺហ្កណត (Eric Beugnot) នាយកទីភ្នាក់ងារបារំាងសម្រាប់ការអភិវឌ្ឍ AFD ដែលជាភ្នាក់ងារផ្តល់កម្ចីសម្រាប់ការជួសជុលផ្សារធំថ្មីឡើងវិញ។ លោក អេរិក បឺហ្កណត មានប្រសាសន៍ថា គោលដៅនៃការជួសជុលនេះ គឺដើម្បីសុខមាលភាពនៅក្នុងទីផ្សារ។ លោកបានថ្លែងតាមរយៈអ្នកបកប្រែភាសាថា នេះគឺជាផ្នែកមួយនៃការថែរក្សាកេរដំណែកបេតិកភណ្ឌ។ លោកបឺហ្កណត ថ្លែងថា៖ «ផែនការបច្ចេកទេសផងដែរ គម្រោងគឺមានគោលដៅក្នុងការធានាសុវត្ថិភាពរូបវ័ន្តរបស់ប្រជាពលរដ្ឋ និងការកែលម្អលក្ខខណ្ឌអនាម័យ។ ហើយជាពិសេសអភិរក្ស ឬរក្សានូវគុណភាពបេតិកភណ្ឌនៃអគារ»។ ផ្សារធំថ្មីត្រូវបានបើកសម្ពោធឲ្យប្រើប្រាស់ជាផ្លូវការកាលពីខែកញ្ញាឆ្នាំ១៩៣៧ ក្រោមព្រះរាជអធិបតីភាព របស់ព្រះមហាក្សត្រព្រះបាទស៊ីសុវត្ថិមុន្នីវង្ស។ ទីភ្នាក់ងារបារាំងសម្រាប់ការអភិវឌ្ឍ បានផ្តល់ជំនួយប្រមាណជា៦លានដុល្លារសម្រាប់ការជួសជុលផ្សារនេះ។ <!--IMAGE--> សព្វថ្ងៃផ្សារធំៗបីគឺជាគោលដៅមួយសម្រាប់ទេសចរបរទេសមកទស្សនានៅក្នុងនាមជាកេរដំណែល ប្រវត្តិសាស្រ្តដែលនៅសេសសល់ពីសម័យអាណានិគមនិយមបារាំង។ លោកកែប ជុតិមា អភិបាលរាជធានីភ្នំពេញ មានប្រសាសន៍រំលឹកអំពីប្រវត្តិសាស្រ្តខ្លះៗរបស់ផ្សារធំថ្មី ដោយចាត់ទុកថា ផ្សារនេះគឺជាមោទនភាពរបស់កម្ពុជា។ លោក មានប្រសាសន៍ថា៖ «ផ្សារធំថ្មីបានក្លាយទៅជាមជ្ឈមណ្ឌលពាណិជ្ជកម្មដ៏ធំមួយរបស់ប្រទេសកម្ពុជាក្នុងទសវត្យរ៍ទី៣០រហូតដល់៧០។ ប្រវត្តិនៃផ្សារធំថ្មីនេះ យើងត្រូវតែចងចាំ ហើយត្រូវមានមោទនភាពទាំងអស់គ្នាថា នេះជាបេតិកភណ្ឌរបស់ប្រជាជនកម្ពុជា»។ ទីក្រុងភ្នំពេញមានប្រជាពលរដ្ឋកើនដល់ជាងពីរលាននាក់នៅក្នុងពេលបច្ចុប្បន្ននេះ។ នេះបើផ្អែកទៅតាម ការប៉ាន់ប្រមាណរបស់លោកអភិបាលក្រុងភ្នំពេញកែប ជុតិមា។ ការរីកចម្រើនរបស់ក្រុងភ្នំពេញ បានធ្វើឲ្យមានការឃ្លាតឆ្ងាយពីការថែរក្សាសំណង់ចាស់ៗជាសម្បត្តិបេតិកភណ្ឌប្រវត្តិសាស្រ្ត។ សំណង់ថ្មីបែបទំនើបបានរីកដុះដាល រីឯសំណង់បុរាណមួយចំនួនដូចជាអតីតពន្ធនាគារតេបី (T3) ត្រូវបានរំលាយចោល។ លោកគ្រី ស្យង់កុនណាន ឯកអគ្គរដ្ឋទូតបារាំងប្រចាំកម្ពុជាមានប្រសាសន៍ថា ការជួសជុលអគារផ្សារធំថ្មីឡើងវិញ គឺជាសមិទ្ធិផលមួយចុងក្រោយរវាងប្រទេសបារំាងជាមួយ និងសាលាក្រុងភ្នំពេញ៕ This posting includes an audio/video/photo media file: Download Now |
| មន្ត្រីសុខាភិបាលព្រមានអំពីការរាតត្បាតដោយជំងឺគ្រុនឈាម Posted: 25 May 2011 01:50 PM PDT មន្រ្តីសុខាភិបាលកម្ពុជា និងអង្គការសហប្រជាជាតិបានក្រើនរំឭកថា ជំងឺគ្រុនឈាមនៅកម្ពុជាអាចនឹងផ្ទុះឡើងនៅឆ្នាំ២០១១នេះ។ របាយការណ៍ក្រសួងសុខាភិបាលកម្ពុជាបញ្ជាក់ថា មានកុមារកម្ពុជាចំនួនប្រាំមួយនាក់បានស្លាប់ដោយសារជំងឺគ្រុនឈាមក្នុងរយៈពេលបួនខែដើមឆ្នាំ២០១១នេះ។ គិតមកទល់ដើមខែឧសភានេះ មានកុមារកម្ពុជាអាយុក្រោម១៥ឆ្នាំសរុបចំនួន៥៨០នាក់ បានឆ្លងជំងឺគ្រុនឈាម ដែលក្នុងនោះកុមារចំនួនប្រាំមួយនាក់បានស្លាប់។ លោកវេជ្ជបណ្ឌិត ង៉ាន់ ច័ន្ទថាជានាយកកម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាលបានឲ្យដឹងកាលពីថ្ងៃព្រហស្បតិ៍ថា ទោះបីជានៅពេលនេះមិនទាន់មានសញ្ញាណាមួយបង្ហាញឲ្យឃើញថា អាចមានការរីករាលដាលនៃជំងឺគ្រុនឈាមយ៉ាងណាក៏ដោយ ក៏ប្រជាពលរដ្ឋទាំងអស់ត្រូវតែមានការប្រុងប្រយ័ត្នខ្ពស់ពីព្រោះឆ្នាំ២០១១នេះ គឺជាវដ្តនៃជំងឺគ្រុនឈាមដែលជំងឺនេះអាចនឹងផ្ទុះឡើងជាយថាហេតុ បើសិនគ្មានការប្រុងប្រយ័ត្នទេនោះ។ លោកវេជ្ជបណ្ឌិតបានប្រាប់វីអូអេខ្មែរថា៖ «យើងឃើញថា សភាពការណ៍នេះគួរតែយើងប្រយ័ត្នដែរ ពីព្រោះសព្វថ្ងៃនេះយើងឃើញថា វាចូលដល់រដូវមួយដែលជារដូវក្នុងការចំលងខ្លាំងនៃជំងឺគ្រុនឈាម ហើយចាប់ពីខែ៦ ខែ៧ ខែ៨រហូតដល់ខែ១០។ ទាក់ទងនឹងសភាពការណ៍សព្វថ្ងៃនេះបើសិនជាយើងទាំងអស់គ្នាមិនចូលរួមទេ វានឹងវិវត្តន៍ទៅរកដូចឆ្នាំ២០០៧ពីព្រោះឆ្នាំ២០១១នេះគឺជាឆ្នាំមួយដែលតាមការបទពិសោធន៍របស់កម្មវិធីជាតិយើងឃើញថា វាចូលដល់វដ្តរបស់វាហើយ។ គ្រុនឈាមនេះវាត្រូវតែផ្ទុះចេញនៅពេលណាមួយជាមិនខានទេ ដូច្នេះបើយើងខិតខំប្រឹងទប់ទៅ យើងអាចទប់វាបាន»។ ជំងឺគ្រុនឈាមភាគច្រើនកើតលើកុមារដែលមានអាយុតិចជាង១៥ឆ្នាំ។ ជំងឺនេះចម្លងដោយមូសខ្លា។ មានប្រជាពលរដ្ឋកម្ពុជាចន្លោះពី១០.០០០នាក់ទៅ១២.០០០នាក់ក្នុងមួយឆ្នាំៗឆ្លងជំងឺនេះ ក៏ប៉ុន្ដែអត្រាស្លាប់ដោយសារជំងឺនេះមានកម្រិតក្រោម១ភាគរយ។ ម្យ៉ាងវិញទៀតជំងឺគ្រុនឈាមនៅកម្ពុជាតែងតែផ្ទុះឡើងរាតត្បាតយ៉ាងខ្លាំងក្លាជាប្រចាំរវាងពីបីទៅប្រាំឆ្នាំម្តង។ ជំងឺនេះបានផ្ទុះឡើងខ្លាំងនាចុងក្រោយនេះនៅឆ្នាំ២០០៧ដែលមានមនុស្សជិត៤ម៉ឺននាក់បានកើតជំងឺនេះក្នុងនោះប្រហែល៩៥ភាគរយជាកុមារហើយបានធ្វើឲ្យមនុស្សជាង៤០០នាក់បានស្លាប់បាត់បង់ជីវិតដោយសារជំងឺគ្រុនឈាមនេះ។ លោកវេជ្ជបណ្ឌិត ស្ទីវិន ប៊ីយ៉កហ្គី (Steven Bjorge) ទទួលបន្ទុកផ្នែកជំងឺគ្រុនចាញ់ និងជំងឺក្រុមឈាមរបស់អង្គការសុខភាពពិភពលោកមានប្រសាសន៍ថា ករណីកើតជំងឺគ្រុនឈាមនៅកម្ពុជាមានការថយចុះបើប្រៀបធៀបនឹងរយៈពេលដូចគ្នាកាលពីពីរឆ្នាំចុងក្រោយនេះ។ ក៏ប៉ុន្ដែលោកគិតថា ការព្រួយបារម្ភរបស់មន្ដ្រីក្រសួងសុខាភិបាលកម្ពុជាក្នុងពេលនេះគឺជារឿងត្រឹមត្រូវ។ «សេចក្ដីព្រួយបារម្ភដែលពួកគេមាននោះគឺជារឿងត្រឹមត្រូវខ្លាំងណាស់ ពីព្រោះថា ថ្វីបើឆ្នាំនេះអាចមានករណីកើតជំងឺគ្រុនឈាមតិចមែន យើងនៅមានចំនួនកើតជំងឺនេះកើនរហូតដល់ ១២.០០០ករណី។ ផ្នែកមួយនៃការព្រួយបារម្ភរបស់គេ គឺគេសម្លឹងមើលទិសដៅរយៈពេលវែង»។ របាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់បានឲ្យដឹងថា ខេត្តដែលមានដង់ស៊ីតេប្រជាពលរដ្ឋខ្ពស់ ច្រើនតែទទួលរងការឆ្លងជំងឺគ្រុនឈាមជាងគេក្នុងនោះរូមមានខេត្តកណ្តាល ភ្នំពេញ សៀមរាប កំពង់ចាម កំពង់ស្ពឺ ព្រៃវែង តាកែវ កំពង់ឆ្នាំង កំពង់ធំនិងបន្ទាយមានជ័យ។ វេជ្ជបណ្ឌិត ង៉ាន់ ចន្ទ័ថា បានឲ្យដឹងថា ដើម្បីទប់ទល់នឹងជំងឺនេះ មជ្ឈមណ្ឌលជាតិបានចុះផ្សព្វផ្សាយ និងអប់រំដល់ប្រជាពលរដ្ឋនៅតាមមូលដ្ឋានឲ្យយល់ពីទប់ស្កាត់ជំងឺនេះ ដោយមានការពង្រឹងសមត្ថិភាពបន្ថែមដល់គ្រូពេទ្យនៅតាមមន្ទីរពេទ្យនីមួយៗឲ្យធ្វើការតាមដានតួលេខជំងឺគ្រុនឈាមដើម្បីគ្រប់គ្រងស្ថានភាពនៃជំងឺនេះ និងមានការចែកថ្នាំអាបេតដាក់ក្នុងទឹកប្រមាណពី១៥០តោនទៅ១៨០តោនក្នុងមួយឆ្នាំ។ វេជ្ជបណ្ឌិត ង៉ាន់ ចន្ទ័ថា បញ្ជាក់ថា សព្វថ្ងៃនេះនៅពុំទាន់មានវ៉ាក់សាំងចាក់ការពារជំងឺគ្រុនឈាមនេះនៅឡើយ។ ដូច្នេះវិធានការការពារដ៏មានប្រសិទ្ធភាពគឺការកម្ចាត់មូសខ្លាដែលជាភ្នាក់ងារចម្លង និងជម្រករបស់វា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
