VOA News: ព័ត៌មាន: “អតីតសមាជិកសភាគណបក្សសមរង្ស៊ី ចូលគណបក្សសិទ្ធិមនុស្ស” plus 3 more |
- អតីតសមាជិកសភាគណបក្សសមរង្ស៊ី ចូលគណបក្សសិទ្ធិមនុស្ស
- កម្ពុជាបញ្ជាក់ថាបេសកកម្មរបស់អាស៊ានគឺផ្តោតតែលើការឈប់បាញ់គ្នាទេ
- រដ្ឋសភាបើកសម័យប្រជុំដើម្បីធើ្វវិសោធនកម្មច្បាប់ប្រឆាំងអំពើពុករលួយ
- អ្នកនិពន្ធខ្មែរសិក្សាខាងផ្នែកតែងនិពន្ធនៅសាកលវិទ្យាល័យ Brown
| អតីតសមាជិកសភាគណបក្សសមរង្ស៊ី ចូលគណបក្សសិទ្ធិមនុស្ស Posted: 23 Mar 2011 02:41 PM PDT នៅថ្ងៃពុធនេះ លោក ម៉ៅ មុនីវណ្ណ អតីតសមាជិកសភាតំណារាស្រ្តខាងគណបក្សសម រង្ស៊ី និងសមាជិកគណបក្សសម រង្ស៊ី សំខាន់ៗចំនួនជាង១០រូបផ្សេងទៀត បានប្រកាសជាសាធារណៈថា លោកនឹងចុះចូលជាមួយគណបក្សសិទ្ឋិមនុស្សរបស់លោក កឹម សុខា បន្ទាប់ពីលោកបរាជ័យក្នុងការទាមទារឲ្យមានការកែទម្រង់ផ្ទៃក្នុងរបស់គណបក្សសម រង្ស៊ី។ ការប្រកាសចុះចូលនេះបានធ្វើឡើងតែមួយថ្ងៃប៉ុណ្ណោះ បន្ទាប់ពីលោកបានលាឈប់ពីសមាជិកសភាតំណាងរាស្ត្រខាងគណបក្សសម រង្ស៊ី មណ្ឌលកំពង់ចាម។ ថ្លែងប្រាប់ក្រុមអ្នកយកព័ត៌មាននៅមុខអគាររដ្ឋសភាជាតិ លោកបានមានប្រសាសន៍ថា ការចាកចេញរបស់លោកនេះ គឹដើម្បីចង់ដាក់សម្ពាធដល់គណបក្ស សម រង្ស៊ី ឲ្យរូបរួមជាមួយ និងគណបក្សដែលប្រកាន់និន្នាការប្រជាធិបតេយ្យដូចគ្នា។ លោកម៉ៅ មុនីវណ្ណ បានមានប្រសាសន៍ទៀតថា គណបក្សសិទ្ឋិមនុស្សមានគោលការណ៍ និងប្រព័ន្ឋដឹកនាំរបៀបប្រជាធិបតេយ្យជាងគណបក្សសម រង្ស៊ី ។ លោក មុនីវណ្ណថ្លែងថា៖ «ព្រោះឥឡូវ ខ្ញុំជាមួយនឹងកម្លាំងមូលដ្ឋានមករួមជាមួយគណបក្សសិទ្ឋិមនុស្ស។ បើមេដឹកនាំវៃឆ្លាតស្របទៅនឹងឆន្ទៈរបស់ប្រជាពលរដ្ឋ ត្រូវមករួមជាមួយគណបក្សសិទ្ឋិមនុស្សមក។ ទុកឲ្យពីរគ្រួសារនៅទៅ។ ពីរគ្រូសារនៅនឹងបានជើងកៅអ៊ីមួយម្នាក់»។ បន្ទាប់ពីធ្វើសន្និសីទពត៌មាន លោក ម៉ៅ មុនីវណ្ណ ព្រមទាំងអតីតសមាជិកគណបក្សសម រង្ស៊ី មួយ ចំនួនផ្សេងទៀត បានដើរកាន់បដា ដែលមានសរសេររិះគន់គណបក្សសម រង្ស៊ី។ លោកញយ វ៉ៃ ជំនួយការរបស់លោក ម៉ៅ មុនីវណ្ណ ដែលកំពុងកាន់បដាមួយផ្ទាំងបាននិយាយថា ពាក្យសច្ចៈធម៌ យុត្តិធម៌ លែងមានន័យទៀតហើយ នៅក្នុងគណបក្សសម រង្ស៊ី។ លោក វ៉ៃ បន្តថា៖ «ផ្លាកហ្នឹងបានន័យថា វាមិនយុត្តិធម៌ចំពោះប្រជាពលរដ្ឋ ដែលខំប្រឹងតស៊ូក្នុងគណបក្សសម រង្ស៊ី ទាំងអស់ចង់បង្ហាញថា កុំឲ្យប្រជាពលរដ្ឋទាំងអស់ជឿនៅលើផ្លាកសញ្ញាដែលថា សច្ចៈធម៌ យុត្តិធម៌»។ ឆ្លើយតបទៅនឹងការចាកចេញនេះ លោន សុន ឆៃ ប្រធានក្រុមអ្នកតំណាងរាស្រ្តគណបក្សសម រង្ស៊ី បានប្រាប់អង្គសន្និសីទព័ត៌មានមួយនៅថ្ងៃពុធនេះដែរថា ការចាកចេញនេះ មិនធ្ងន់ធ្ងរពេកទេ បើប្រៀបធៀបទៅនឹងចលនាចាកចេញកាលពីឆ្នាំ២០០៨ ។ លោកស៊ុន ឆៃ បានមានប្រសាសន៍ទៀតថា គណបក្សសម រង្ស៊ី នឹងមានវិធានការកែលម្អឡើងវិញបន្ទាប់ពីការចាកចេញរបស់លោកម៉ៅ មុនីវណ្ណ។ លោកសុន ឆៃ បន្តទៀតថា៖ «អ្វីដែលមានការចាកចេញទៅ ក៏គណបក្សសម រង្ស៊ី ថ្នាក់ដឹកនាំក៏មើលខ្លួនឯងដែរ។ ខ្ញុំបាន ជំរុញឲ្យថ្នាក់ដឹកនាំចេះមើលខ្លួនឯង។ តើយើងមានកំហុសអ្វីខ្លះ ជាជាងចេះតែបន្តោសអ្នកចេញទៅថាខុស១០០ភាគរយ។ ថាតើយើងជាអ្នកដឹកនាំបានធ្វើអ្វីខ្លះទេ ខ្វះខាតអ្វីទេ ដែលនាំឲ្យសមាជិកដ៏សំខាន់ បែបហ្នឹងត្រូវបង្ខំចិត្តចាកចេញពីគណបក្សទៅ»។ លោកកឹម សុខា ប្រធានគណបក្សសិទ្ឋិមនុស្សបានប្រកាសស្វាគមន៍ចំពោះការចូលរួមរបស់អតីត សមាជិកសភាតំណាងរាស្រ្តខាងគណបក្សសម រង្ស៊ី។ លោកកឹម សុខា បានមានប្រសាសន៍ទៀតថា លោកនឹងស្នើសុំទៅគណៈកម្មាធិការនាយករបស់គណបក្សនៅថ្ងៃទី០៨ខាងមុខនេះដើម្បីឲ្យលោកម៉ៅមុនីវណ្ណ ចូលជាសមាជិកគណកម្មាធិការនាយកអនុប្រធានគណកម្មាធិការនាយក និងទីបីជាប្រធានក្រុមការងារគណបក្សសិទ្ឋិមនុស្សប្រចាំខេត្តកំពង់ចាម។ លោកកឹម សុខា បានមានប្រសាសន៍ទៀតថា លោកសង្ឃឹមថា សំឡេងឆ្នោតរបស់គណបក្សសិទ្ឋិ មនុស្សនឹងកើនឡើងនៅក្នុងខេត្តកំពង់ចាម។ លោក សុខានិយាយថា៖ «ប្រជាពលរដ្ឋខ្មែរទាំងអស់ ដែលចង់ឲ្យមានការផ្លាស់ប្តូរ ចង់ឲ្យឈ្នះគណបក្សកាន់អំណាច បច្ចុប្បន្នដើម្បីកែទម្រង់ប្រទេសជាតិយើងដើម្បីធានាអធិបតេយ្យភាពបូរណភាពទឹកដី។ យើងត្រូវតែរួប រួមគ្នាឲ្យបាន។ ហើយរួមគ្នា ប្រសិនជាមេដឹកនាំជាប់ជំពាក់រឿងអ្វីរកមិនបាន យើងខ្ញុំ គណបក្សយើងខ្ញុំ សូមអំពាវនាវស្វាគមន៍ដើម្បីរួមនៅក្នុងប្រព័ន្ឋប្រជាធិបតេយ្យ»។ ការចាកចេញរបស់មន្រ្តីគណបក្សសម រង្ស៊ី នេះ បានកើតមានឡើង បន្ទាប់ពីលោកសម រង្ស៊ី ប្រធានគណបក្សសម រង្ស៊ី ត្រូវបានរដ្ឋសភាបានប្រកាសលុបឈ្មោះចេញពីបញ្ជីសមាជិកសភាតំណាងរាស្រ្តមណ្ឌលខេត្តកំពង់ចាម បន្ទាប់ពីតុលាការកំពូល បានកាត់ទោសឲ្យលោកសម រង្ស៊ី ជាប់ពន្ឋនាគារ រយៈពេលពីរឆ្នាំ ពីបទដកតម្រុយបង្គោលព្រំដែនលេខ១៨៥ រវាងកម្ពុជា និងវៀតណាម និងញុះញ៉ុងឲ្យមានការរើសអើងជាតិសាសន៍ ៕ This posting includes an audio/video/photo media file: Download Now |
| កម្ពុជាបញ្ជាក់ថាបេសកកម្មរបស់អាស៊ានគឺផ្តោតតែលើការឈប់បាញ់គ្នាទេ Posted: 23 Mar 2011 02:25 PM PDT ប្រទេសកម្ពុជាអះអាងថាបេសកកម្មអ្នកសង្កេតការណ៍អាស៊ាននៅតំបន់ជម្លោះមិនទាក់ទិនគ្នានឹងបញ្ហាវិវាទព្រំដែនទេ នៅក្រោយពេលដែលប្រទេសថៃបាន អះអាងថាចំណុចមិនទាន់ព្រមព្រៀងគ្នាគឺទាក់ទិននឹងទំហំនៃការត្រួតពិនិត្យរបស់អ្នកសង្កេតការណ៍និងទីកន្លែងណាដែលអ្នកសង្កេតការណ៍ត្រូវដាក់ពង្រាយ។ លោកទេសរដ្ឋមន្ត្រី វ៉ា គឹមហុង ប្រធានគណៈកម្មាធិការព្រំដែនកម្ពុជាបានអះអាងឲ្យដឹងថា៖ ការដាក់អ្នកសង្កេតការណ៍តាមគោលការណ៍ដែលបានព្រមព្រៀងគ្នាក្នុងក្របខណ្ឌអាស៊ានជាបញ្ហាផ្សេងមួយពីបញ្ហារកដំណោះស្រាយរឿងវិវាទព្រំដែនរវាងកម្ពុជានិងថៃ។ «អ្នកសង្កេតការណ៍ឥណ្ឌូនេស៊ីមិនមែនគាត់មករឿងរកដំណោះស្រាយរឿងព្រំដែនទេគាត់មកតែរឿងផ្នែកខាងសង្កេតការណ៍រឿងឈប់បាញ់គ្នាជាអចិន្ត្រៃយ៍»។ ក្រោយពីលើកពេលប្រជុំម្តងដែលគ្រោងនឹងធ្វើនៅថ្ងៃទី២៤ និងថ្ងៃទី២៥ខែមិនា ភាគីថៃនិងកម្ពុជាបានព្រមព្រៀងជាថ្មីថានឹងជួបប្រជុំគណៈកម្មាធិការព្រំដែនទាំងពីររបស់ខ្លួន តាមសំណើនិងការរៀបចំរបស់ឥណ្ឌូនេស៊ី ជាប្រធានប្តូរវេនរបស់អាស៊ានឆ្នាំនេះនៅថ្ងៃទី៧និងថ្ងៃទី៨ខែមេសាក្នុងទីក្រុងបូហ្គ័រប្រទេសឥណ្ឌូនេស៊ី ដើម្បីពិភាក្សាគ្នាអំពីការបញ្ជូនក្រុមអ្នកសង្កេតការណ៍អាស៊ានជាង៣០នាក់មកកាន់ប្រទេសទាំងពីរ ម្ខាងពាក់កណ្តាល ដើម្បីធានាកិច្ចឈប់បាញ់គ្នាជាស្ថាពរតាមអ្វីដែលក្រុមប្រឹក្សាសន្តិសុខអសបនិងអាស៊ាន ប្រាថ្នាចង់បាន។ ក៏ប៉ុន្តែអ្នកនាំពាក្យក្រសួងការបរទេសថៃ ថានី ថោងភក្ឌីបានប្រាប់ VOA ខ្មែរ កាលពីសប្តាហ៍ថ្មីៗថាចំណុចចុងក្រោយមួយដែលតម្រូវឲ្យមានការជជែកគ្នារវាងប្រទេសទាំងពីរគឺទំហំនៃការត្រួតពិនិត្យរបស់អ្នកសង្កេតការណ៍និងទីកន្លែងណាដែលអ្នកសង្កេតការណ៍ត្រូវដាក់ពង្រាយ។ ថ្លែងប្រាប់ VOA ខ្មែរកាលពីថ្ងៃអង្គារលោក វ៉ា គឹមហុង បានបញ្ជាក់ថាតាមសំណើ របស់ឥណ្ឌូនេស៊ីដែលត្រូវការព័ត៌មានស្តីពីទីតាំងរបស់អ្នកសង្កេតការណ៍នោះ កម្ពុជាបានស្នើដល់ឥណ្ឌូនេស៊ី នូវទីតាំងចំនួន១៥នៅឯតំបន់ជម្លោះប្រដាប់អាវុធ ក្បែរប្រាសាទព្រះវិហារ សម្រាប់ដាក់អ្នកសង្កេតការណ៍។ «យើងអត់មានលាក់ទេ យើងចង់ឲ្យគេមិនត្រួតពិនិត្យទាំងអស់ កន្លែងណាក៏បាន ដែរ តែថៃទេ ម៉េចក៏មិនឆ្លើយទៅ។ លោកថាទេកម្ពុជាឈ្លានលោក លោកឆ្លើយ មកថាចង់បន្ថែមត្រង់នេះទៀត ខ្វះត្រង់នេះទៀតចង់ដាក់ត្រង់នោះ មានអ្វីចម្លែកកម្ពុជាសុំដាក់១៥ចំណុចហើយកម្ពុជាឲ្យលទ្ធភាពទៀត បើថាឥណ្ឌូនេស៊ី ចង់បន្ថែមទៀតយើងស្វាគមន៍ទៅទៀត អស់ប៉ុណ្ណឹង យើងអត់មានអី ព្រោះយើងជាមនុស្សត្រង់ មនុស្សអត់មានកំហុសយើងតែងតែបើកទ្វារចំហជាដរាប វាអត់ មានអីលាក់លៀមទេបាទ»។ លោក វ៉ា គឹមហុងរិះគន់ភាគីថៃថាមិនបានឆ្លើយតបពីរឿងបែបបទការងារទៅកាន់ប្រទេសឥណ្ឌូនេស៊ីនៅឡើយទេ។ តែ លោកម៉ៃខល ធែនីអ្នកនាំពាក្យក្រសួងការបរទេសឥណ្ឌូនេស៊ីបញ្ជាក់ជាថ្មីកាលពីថ្ងៃអង្គារថាភាគីទាំងពីរកម្ពុជា និងថៃ មានការជឿនលឿនទៅមុខ ទាក់ទងនឹងបែបបទការងារ។ កាលពីសប្តាហ៍ថ្មីៗលោក ម៉ៃខលបានបញ្ជាក់ថាមានតែមួយចំណុចប៉ុណ្ណោះដែលភាគីទាំងពីរនៅមិនទាន់ព្រមព្រៀងគ្នា។ តែលោក សង្ឃឹមថាភាគីទាំងពីរនឹងឈានដល់កិច្ចព្រមព្រៀងគ្នាពេលគណៈកម្មាធិការព្រំដែននៃប្រទេសទាំងពីរនឹងជួបប្រជុំគ្នានៅថ្ងៃទី៧ថ្ងៃទី៨ ខែមេសា។ ទោះជាយ៉ាងណាក៏ដោយក្រុមមន្ត្រីកម្ពុជាសម្តែងការភ្ញាក់ផ្អើលខ្លះៗនៅពេល បានទទួលព័ត៌មានតាមបណ្តាញសារព័ត៌មានបាងកកប៉ុស្តិ៍របស់ថៃដែលបានដកស្រង់សំដីអគ្គមេបញ្ជាការយោធាថៃ ប្រយុទ្ធ ចាន់អូចា មកបញ្ជាក់កាលពីថ្ងៃអង្គារថា យោធាថៃនៃគណៈកម្មាធិការព្រំដែន GBC នឹងមិនទៅប្រជុំនៅប្រទេសទីបីទេ ដោយបញ្ជាក់ ថាថៃចង់ប្រជុំទ្វេភាគីជាមួយកម្ពុជាដែលបរទេសមិនគួរលូកដៃចូលក្នុងកិច្ចការនៃប្រទេសទាំងពីរ។ លោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារប្រទេសដែលត្រូវចូលរួមប្រជុំជាមួយសមភាគីថៃរបស់លោក ប្រាវីឌ វង្សាវណ្ណ បានអះអាងកាលពីល្ងាចថ្ងៃអង្គារថា លោកពុំទាន់បានទទួលព័ត៌មានផ្លូវការទេ ហើយដំណឹងដែលថៃមិនចូលរួមក្នុងកិច្ចប្រជុំ GBC នោះគ្រាន់តែជាព័ត៌មានក្រៅផ្លូវការ តែលោកថ្លែងថាជារឿងលឿនពេកក្នុងការធ្វើអត្ថាធិប្បាយ។ «ឥឡូវដំណឹងហ្នឹងដំណឹងវាទើបតែ (កើតឡើង) អម្បាញ់មិញនេះសោះ ដូច្នេះត្រូវតែឲ្យវាជាក់លាក់បន្តិចសិន មុនធ្វើអត្ថាធិប្បាយអ្វីច្រើន»។ លោកទៀ បាញ់ អះអាងថាកម្ពុជានឹងនៅតែត្រៀមទៅកាន់កិច្ចប្រជុំក្រោមការរៀបចំរបស់ឥណ្ឌូនេស៊ីដដែល។ ទាំងលោក វ៉ា គឹមហុងនិង លោក កុយ គួងអ្នកនាំពាក្យក្រសួងការបរទេសកម្ពុជា បានអះអាងកាលពីថ្ងៃអង្គារថាកម្ពុជាកំពុងរង់ចាំមើលការជូនដំណឹងជាផ្លូវការពីឥណ្ឌូនេស៊ី ដែលបានជូនដំណឹងថាភាគីទាំងអស់នឹងចូលរួមប្រជុំនៅថ្ងៃទី៧ទី៨ខែមេសា ទោះជាមានដំណឹងតាមរយៈកាសែតបាងកក ប៉ុស្តិ៍ដែលផ្សាយថាក្រុមយោធាថៃមិនចូលរួមកិច្ចប្រជុំក្តី។ «ខាងព័ត៌មានពីភាគីឥណ្ឌូនេស៊ីយើងអត់ទាន់បានទទួលទេ តែក្នុងបាងកកប៉ុស្តិ៍ ល្ងាចនេះខ្ញុំគ្រាន់តែឃើញថា ប្រយុទ្ធ ចាន់អ៊ូចា និងប្រាវីឌ វង្សាវណ្ណ ហ្នឹងគេបញ្ជាក់ថា គេអត់ទៅចូលរួមទេក្នុងកិច្ចប្រជុំ GBC (គណៈកម្មការ ព្រំដែនទូទៅ ហ្នឹង)»។ លោក កុយ គួង បានបន្ថែមថា លោកមិនទាន់មានព័ត៌មានពីខាងគណៈកម្មការព្រំដែនការបរទេសរបស់ថៃ JBC និងមានជំហរយ៉ាងណាទេ។ ក្រុមមន្ត្រីអ្នកនាំពាក្យរដ្ឋាភិបាលថៃពុំអាចទាក់ទងបានទេកាលពីថ្ងៃអង្គារ។ តែលោកម៉ៃខល ធែនេ អ្នកនាំពាក្យក្រសួងការបរទេស ឥណ្ឌូនេស៊ីបាន អះអាងថា លោក ពុំទាន់បានទទួលព័ត៌មានជាផ្លូវការណាមួយពី ភាគីថៃដែរអំពីការមិនចូលរួមប្រជុំនោះ ដូច្នេះលោកពុំអាចផ្តល់អត្ថាធិប្បាយអ្វីបានទេ។ «តាមអ្វីដែលខ្ញុំដឹងវិញគឺថាមកទល់ពេលនេះ មិនមានទំនាក់ទំនងពីរដ្ឋាភិបាលពាក់ព័ន្ធអំពីរឿងនេះទេ»។ ទោះជាយ៉ាងណាក៏ដោយ គេបានដឹងថារដ្ឋាភិបាលរបស់លោក អាប់ភីស៊ីត វីចាជីវ៉ា ទទួលរងនូវការស្តីបន្ទោសពីសមាជិកសភាថៃយ៉ាងធ្ងន់ធ្ងរអំពីអសមត្ថភាពក្នុងការដោះស្រាយបញ្ហាព្រំដែនបញ្ហាប្រាសាទព្រះវិហារជាមួយកម្ពុជា ហើយនិងបំផុសគំនិតជាតិនិយមជ្រុល ក្រៅពីបង្កឲ្យមានអរិភាពរវាងថៃនិងកម្ពុជា។ តែនៅក្នុងសម្រង់ព័ត៌មានលើគេហទំព័ររបស់រដ្ឋាភិបាលថៃ លោក នាយករដ្ឋមន្ត្រី អាប់ភីស៊ីត បានទម្លាក់ការទទួលខុសត្រូវទៅលើរដ្ឋាភិបាលមុន។ កងទ័ពនៃប្រទេសកម្ពុជានិងថៃធ្លាប់វាយប្រយុទ្ធ៤ថ្ងៃជាប់គ្នាកាលពីថ្ងៃទី៤ដល់ថ្ងៃទី៧ខែកុម្ភៈនៅក្បែរតំបន់ប្រាសាទ ព្រះវិហារ ដោយសារការចោទប្រកាន់គ្នាទៅវិញទៅមកអំពីរឿងរំលោភបំពានបូរណភាពទឹកដី។ កងទ័ពទាំងពីរប្រទេស កំពុងបន្តភាពតានតឹងនៅឡើយ ដែលតម្រូវឲ្យមានវត្តមានក្រុមអ្នកសង្កេតការណ៍ ដើម្បីជាការធានាដល់សន្តិភាពហើយបើកផ្លូវឲ្យថៃនិងកម្ពុជាបន្តចរចាដោះស្រាយរឿងវិវាទព្រំដែន៕ This posting includes an audio/video/photo media file: Download Now |
| រដ្ឋសភាបើកសម័យប្រជុំដើម្បីធើ្វវិសោធនកម្មច្បាប់ប្រឆាំងអំពើពុករលួយ Posted: 23 Mar 2011 12:05 PM PDT នៅថ្ងៃពុធនេះ រដ្ឋសភានឹងអនុម័តការធ្វើវិសោធនកម្មលើមាត្រាមួយចំនួននៃច្បាប់ប្រឆាំងអំពើពុករលួយ ដើម្បីជំរុញប្រសិទ្ធិភាពការងាររបស់ស្ថាប័នប្រឆាំងអំពើពុករលួយ។ ការធ្វើវិសោធនកម្មនេះ សំដៅផ្តល់សិទ្ធិអំណាចដល់ប្រធានក្រុមប្រឹក្សាជាតិប្រឆាំងអំពើពុករលួយ ដើម្បីតែងតាំង និងផ្លាស់ប្តូរមន្ត្រីនៅក្រោមនាយកដ្ឋានអង្គភាពប្រឆាំងអំពើពុករលួយ បង្វែរថវិការបស់ ស្ថាប័នប្រឆាំងអំពើពុករលួយដែលបច្ចុប្បន្ននៅក្រោមទីស្តីការគណៈរដ្ឋមន្ត្រី មកជាថវិកាជាតិវិញ និង លុបចោលមាត្រា៥៧ដែលរាំងស្ទះដល់ការអនុវត្តច្បាប់ប្រឆាំងអំពើពុករលួយ។ មាត្រា៥៧បានចែងថា បទល្មើសពុករលួយ និងទោសមានអានុភាពអនុវត្តក្នុងរយៈពេល១២ខែ បន្ទាប់ពីក្រមព្រហ្មទណ្ឌត្រូវបានអនុវត្តទាំងស្រុង។ បទល្មើសពុករលួយត្រូវបានចែងនៅក្នុងក្រមព្រហ្មទណ្ឌ ដែលបានចូលជាធរមាននៅក្នុងខែធ្នូ ឆ្នាំ២០១០។ លោក ស៊ិច ប៊ុនហុក អនុប្រធានគណៈកម្មការនីតិកម្ម និងយុត្តិធម៌នៃរដ្ឋសភាដែលជាអ្នកត្រួតពិនិត្យមើលការធ្វើវិសោធនកម្មនេះ បានថ្លែងប្រាប់វីអូអេខ្មែរថា ការធ្វើវិសោធនកម្មនេះមានសារៈសំខាន់ណាស់ ដើម្បីជំរុញការងារប្រយុទ្ធប្រឆាំងអំពើពុករលួយឱ្យមានប្រសិទ្ធិភាព និងទាន់ពេលវេលា។ លោកប៊ុនហុកបន្តថា៖ «ជារួម ការធ្វើវិសោធនកម្មមាត្រាទាំងបីនេះនឹងធ្វើឱ្យការងារប្រឆាំងអំពើពុករលួយរបស់ក្រុមប្រឹក្សាប្រឆាំងអំពើពុករលួយកាន់តែមានប្រសិទ្ធិភាព ដោយសារតែថវិកាមិនពិបាក និងពេលវេលាយើងអនុវត្តបានភ្លាម តែម្តងជាពិសេសទោសបញ្ញត្តិចែងនៅក្នុងច្បាប់ប្រឆាំងអំពើពុករលួយ។ យើងរៀបចំធ្វើវិសោធនកម្ម មាត្រាបីនៃច្បាប់ប្រឆាំងអំពើពុករលួយនេះ ដើម្បីជំរុញការងារឱ្យមានប្រសិទ្ធិភាព»។ លោកនាយករដ្ឋមន្ត្រី ហ៊ុន សែន បានបញ្ជាក់នៅក្នុងសេចក្តីថ្លែងហេតុជូនរដ្ឋសភាថា ការធ្វើវិសោធនកម្ម លើមាត្រាមួយចំនួននៃច្បាប់ស្តីពីការប្រឆាំងអំពើពុករលួយនេះសំដៅឆ្លើយតបទៅនឹងតម្រូវការចាំបាច់នៃការអនុវត្តច្បាប់នេះឱ្យមានប្រសិទ្ធិភាព និងទាន់ពេលវេលា។ លោកនាយករដ្ឋមន្ត្រីហ៊ុន សែន បានបន្តថា ការធ្វើវិសោធនកម្មនេះផ្តោតជាសំខាន់ទៅលើការកែសម្រួលបទបញ្ញត្តិមួយចំនួននៃច្បាប់ស្តីពីការប្រឆាំងអំពើពុករលួយ ដើម្បីឱ្យការផ្តន្ទាទោសពីបទល្មើសពុករលួយ តាមច្បាប់ថ្មីនេះមានអានុភាពអនុវត្តភ្លាមៗ ក្រោយពីក្រមព្រហ្មទណ្ឌត្រូវបានអនុវត្ត។ លោកស្រីម៉ម ស៊ីថា ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ បានថ្លែងថា ការធ្វើវិសោធនកម្មនេះ ជាជំហានវិជ្ជមានមួយ ប៉ុន្តែការអនុវត្តច្បាប់ជាក់ស្តែងស្ថិតនៅលើឆន្ទះពិតប្រាកដ។ លោកស្រីថ្លែងថា៖ «តាមពិតការអនុវត្តទៅបាន វាទាល់តែគោរពគោលការណ៍ច្បាប់។ ប៉ុន្តែការអនុវត្តនេះទៅបាន និងមានប្រសិទ្ធិភាពទៅកើត អាស្រ័យទៅលើឆន្ទះទៅវិញ»។ លោកស្រីបានបន្ថែមថា អង្គការសង្គមស៊ីវិលនឹងតាមឃ្លាំមើលការអនុវត្តច្បាប់របស់ស្ថាប័នប្រឆាំងអំពើពុករលួយនេះ បន្ទាប់ពីការធ្វើវិសោធនកម្ម។ លោកកែវ រ៉េមី អ្នកនាំពាក្យក្រុមប្រឹក្សាជាតិប្រឆាំងអំពើពុករលួយបានថ្លែងថា ការប្រកាសទ្រព្យសម្បត្តិកំពុងតែដំណើរទៅមុខយ៉ាងរលូន ហើយការប្រកាសទ្រព្យសម្បត្តិរបស់មន្ត្រីរដ្ឋាភិបាលជាប់កាតព្វកិច្ច ជាង១០០.០០០នាក់នឹងឈានដល់ទីបញ្ចប់នៅថ្ងៃទី៧ ខែមេសាខាងមុខនេះ។ រហូតមកដល់ពេលនេះ មន្ត្រីរដ្ឋាភិបាលយ៉ាងតិចប្រាំមួយនាក់ដែលត្រូវបានចោទប្រកាន់ពីបទពុករលួយ ដោយអង្គភាពប្រឆាំងអំពើពុករលួយ រួមមានលោកឧត្តមសេនីយ៍ឯក មឹក តារា អតីតអគ្គលេខាធិការនៃអាជ្ញាធរជាតិប្រឆាំងគ្រឿងញៀន លោកឧត្តមសេនីយ៍ត្រី ហ៊ុន ហ៊ាន មេប៉ូលីសខេត្តបន្ទាយមានជ័យ និងមេប៉ូលីសរងរបស់លោកគឺលោកឈាង ស៊ុន នៅក្នុងខែមករាព្រមទាំងលោកតុប សេរីវុឌ្ឍ ប្រធានព្រះរាជអាជ្ញាអមតុលាការខេត្តពោធិសាត់ អង្គរក្ស និងបើកបររបស់លោកនៅក្នុងខែធ្នូ៕ This posting includes an audio/video/photo media file: Download Now |
| អ្នកនិពន្ធខ្មែរសិក្សាខាងផ្នែកតែងនិពន្ធនៅសាកលវិទ្យាល័យ Brown Posted: 23 Mar 2011 08:15 AM PDT ការទទួលអាហាររូបករណ៏ទៅសិក្សានៅបរទេស ជារឿងធម្មតា សម្រាប់និស្សិតខ្មែរ។ តែការទទួលអាហាររូបករណ៏ សម្រាប់សិក្សាខាងផ្នែកតែងនិពន្ធជារឿងដែលកម្រមានមួយ។ លោក ប៉ូច រាសី រាយការណ៍ ពីអ្នកនិពន្ធខ្មែរម្នាក់ដែលបានទទួលអាហាររូបករណ៍ពីសាកលវិទ្យាល័យBrownដ៍ល្បីឈ្មោះដើម្បីសិក្សាផ្នែកការតែងនិពន្ធចំនួនមួយឆ្នាំ។ លោក ខូ តារាឫទ្ធិ ជាអ្នកនិពន្ធខ្មែរទីមួយដែលសិក្សានៅសាកលវិទ្យាល័យដ៍ល្បីឈ្មោះនៅភាគខាងកើតស.រ.អា។ លោក ខូ តារាឫទ្ធិ ធ្លាប់បានឆ្លងកាត់ការលំបាក ជាច្រើន។ លោកធ្លាប់រត់ម៉ូតូឌុបនិងធ្វើការជាកម្មករសំណង់ដើម្បីរកប្រាក់ចិញ្ចឹមជីវិត និងបន្តការសិក្សាខាងនិពន្ធមុនពេលលោកទទួលបានអាហាររូបករណ៍មកសិក្សានៅសាកលវិទ្យាល័យBrown។ លោកដឹងថាជីវភាពរបស់អ្នកនិពន្ធមានការលំបាកក៏ប៉ុន្តែលោកថាកើតមកជាអ្នកនិពន្ធលោកមិនអាចផ្លាស់ប្តូររឿងនេះបានទេ។ «បើយើងដុះមកជាឈូកហើយ យើងមិនអាចប្រែក្លាយទៅជាអ្វីផ្សេងទេ។ បើនិយាយឲ្យចំគឺថាវាមានសារជាតិពីកំណើតមក ថាយើងនិងធ្វើអញ្ចឹងណា។ ហើយយើងធ្វើហ្នឹងមិនមែនដើម្បី គាំទ្រឬប្រឆាំងនិងគណបក្សនយោបាយណាមួយទេ។ ខ្ញុំគឺជាអ្នកនិពន្ធឯករាជ្យ»។ ស្នាដៃរបស់លោក រួមមានប្រលោមលោកខ្លីៗ ដូចជារឿងដែលមានចំណងជើងថា "ស្តាយ" ដែលជួយដាស់តឿនយុវជនខ្មែរ កុំឲ្យយល់ច្រឡំពីអត្ថន័យនៃបុណ្យថ្ងៃទី១៤កុម្ភះ ឬ Valentine's Day ។ លោក តារាឫទ្ធិ ថ្លែងថា អ្នកនិពន្ធមានផ្លូវដើរទៅរកជោគជ័យច្រើនណាស់ ប៉ុន្តែលោកថាផ្លូវទាំងនោះត្រូវគេត្រួសត្រាយរួចហើយ ។ ដូច្នេះលោកថ្លែងថាដើម្បីទទួលជោគជ័យ លោកត្រូវត្រួសត្រាយផ្លូវមួយសម្រាប់ខ្លួនឯង។ «យើងត្រូវកាប់ព្រៃបង្កើតផ្លូវខ្លួនឯងមួយ។ ខ្ញុំកំពុងធ្វើរឿងហ្នឹង។ ខ្ញុំកំពុងសរសេរតាមបែបបទរបស់ខ្ញុំ។ ខ្ញុំឃើញបញ្ហាសង្គមខ្ញុំសរសេរ។ ហើយការដែលបានអាហាររូបករណ៏មកសិក្សានៅស.រ.អាមួយរយះពេលហ្នឹង គឺដោយសារតែការប្រឹងប្រែង និងដោយសារតែខ្ញុំមានអត្តសញ្ញាណជាអ្នកនិពន្ធផងដែរ»។ ក្រៅពីការផ្តល់អាហាររូបករណ៏ សាកលវិទ្យាល័យ Brown ថែមទាំងបានរៀបចំ ជាមហោស្រពសេរីភាពសរសេរអក្សរសិល្ប៍អន្តរជាតិមួយ ចំនួន៤ថ្ងៃ នៅពេលថ្មីៗនេះដោយផ្តោតលើសេរីភាពនៃអក្សរសិល្ប៍ខ្មែរ។ <!--IMAGE--> លោក ខូ តារាឫទ្ធិ និងអ្នកនិពន្ធខ្មែរឯទៀត បានចូលរួមនៅក្នុង ការពិភាក្សាគ្នាអំពីបញ្ហាផ្សេងៗដែលអ្នកនិពន្ធខ្មែរប្រឈមមុខ ដូចជាសេរីភាពក្នុងការសម្តែងមតិ និងការសរសេរអំពីបទពិសោធន៍ របស់ជនភៀសខ្លួនជាដើម។ វាគ្មិនមានរួមទាំងអ្នកស្រី កែវ ចាន់បូ អ្នកនិពន្ធមកពីរដ្ឋ Minnesota លោក ឃឿនសំខាន់ អ្នកនិពន្ធមកពីទីក្រុង Lowell រដ្ឋMassachusetts លោក ប្រាជ្ញលី អ្នកចម្រៀងប្រភេទrap មកពីទីក្រុង Long Beachរដ្ឋCalifornia លោកកង រិទ្ធីសាល អ្នកសិក្សាខាងសិល្បៈខ្មែរ ក្នុងកម្មវិធី Fullbright ព្រមទាំងសាស្ត្រាចារ្យអង់គ្លេស Geoff Ryman ដែលជាអ្នកនិពន្ធរឿងប្រលោមលោកវិទ្យាសាស្ត្រ និងអ្នកនិពន្ធរឿងល្ខោន Catherine Filloux ដែលបាននិពន្ធរឿងល្ខោនជាច្រើនរឿង ទាក់ទងនិងប្រទេសកម្ពុជា និង អ្នកនិពន្ធបរទេសមួយចំនួនទៀត។ លោក តារាឫទ្ធិ បញ្ជាក់ថាលោកជាអ្នកនិពន្ធឯករាជ្យ ដែលមានបំណងចង់ជួយលើកស្ទួយអក្សរសិល្ប៍ខ្មែរ។ «រហូតមកដល់ដំណាក់ការនេះគឺខ្ញុំធ្វើដើម្បីខ្មែរដើម្បីអក្សរសិល្ប៍ខ្មែរទូទៅ។ ខ្ញុំអត់នៅក្នុងក្រុមអ្នកនយោបាយណាមួយទេ។ ការដែលខ្ញុំសម្រេចចិត្តធ្វើបែបនេះ គឺដោយសារថាបើសិនជាខ្ញុំចូលទៅក្នុងគណបក្សនយោបាយ ខ្ញុំអត់មានសេរីភាពក្នុងការសរសេរទេ។ ខ្ញុំទាល់តែសរសេរតាមដែលមេគណបក្សគេចង់បាន»។ លោក ខូ តារាឫទ្ធិ ថ្លែងថា លោកមានបំណងចង់បន្តការសិក្សានៅស.រ.អាក្រោយពេលលោកបញ្ចប់ការសិក្សា នៅសាកលវិទ្យាល័យ Brown ដើម្បីយកចំណេះដឹងខាងការតែងនិពន្ធ ទៅជួយបង្រៀននិស្សិតនៅប្រទេសកម្ពុជា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
