Koh Santipheap Daily |
- រថយន្តដឹកឈើបុកគ្នាជាមួយរថយន្តប៉ូលិសមុខស្នងការរាជធានីភ្នំពេញស្លាប់ម្នាក់
- សម្តេចតេជោហ៊ុន សែន ៖ ពលករនៅក្រៅប្រទេសមួយចំនួនត្រូវថៅកែរបស់ខ្លួនប្រមាថធ្វើបាប គួរពិចារណារកការងារក្នុងប្រទេសវិញ
- ជប៉ុន ៖ បណ្តាអ្នកភូមិស្នើកុំផឹកទឹករ៉ូប៊ីណេជិតមជ្ឈមណ្ឌលនុយក្លេអ៊ែរហ្វូគូស៊ីម៉ាដែលអគ្គិសនីស្តារឡើងវិញ
- ទាហានសៀមបានរុះរើបន្លាលួសដែលដាក់នៅមុខច្រកទ្វារដែកប្រាសាទព្រះវិហារចេញវិញហើយ
- ប្រទេស៥បើកការវាយប្រហារប្រឆាំងមេដឹកនាំផ្តាច់ការលីប៊ី កក្រើកមហាសមុទ្រមេឌីទែរ៉ាណេ
- ប្រទេសលោកខាងលិចត្រៀមបើកការវាយប្រហារប្រឆាំងលោកកាដាហ្វីមួយឈុតថ្មីទៀត
- ពួកបះបោរលីប៊ីនិយាយថា មានមនុស្សពួកគេស្លាប់ដល់ជាង8.000នាក់
- ផ្ទុះក្នុងអណ្តូងរ៉ែធ្យូងថ្មមួយនៅភាគពាយ័ព្យប៉ាគីស្ថានស្លាប់កម្មករ7នាក់
- អតីត Freshie Girl បដិសេធព័ត៌មានចោទថា នាងជាស្រីទំនើង
- លោកកាដាហ្វី សច្ចាថានឹងយកឈ្នះលើកងទ័ពពួកលោកខាងលិច
- អាជ្ញាធរនិងសមត្ថកិច្ចបើកប្រតិបត្តិការតាមអនុសាសន៍ បំបែកសំបុកកុងត្រូលជជុះតាមផ្លូវជាតិលេខ៧រុះរើទីតាំងចោល
- ប្រធានាធិបតីយេម៉ែនបណ្តេញរដ្ឋាភិបាលរបស់លោកចេញ
- អាជីវករលក់មាស-ប្តូរប្រាក់នៅផ្សារកំពង់ស្ពឺត្រូវចោរតាមប្លន់ដល់មុខផ្ទះបាញ់២គ្រាប់ យកអស់ជាង៥ម៉ឺនដុល្លារ
- ជនពាលជម្រះបញ្ជីខ្មៅ បាញ់ប្រហារគ្មានត្រាប្រណីសម្លាប់ប្តី-ប្រពន្ធនិងកូនស្រីសង្ស័យរឿងពាលស៊ីពាល
- បំបែកសំណុំរឿងចោរប្លន់នាយកុយនិងប្លន់លុយក្រុមហ៊ុន
- រន្ទះសាហាវបាញ់សម្លាប់ម្នាក់ និងដួលសន្លប់២នាក់ផ្សេងទៀត ខណៈផ្ទៃមេឃរកកល់ភ្លៀង
- ទាហានសៀមឈុតខ្មៅយកលួសបន្លាមកពង្រាយមុខប៉ុសិ៍្តប៉ូលិសកម្ពុជា
- វាយសម្លាប់យាយអាយុ៦៦ឆ្នាំ ក្នុងចំការល្មុតប្លន់យកមាស៥ជី និងប្រាក់១៥០ដុល្លារកណ្តាលថ្ងៃ
- អាជ្ញាធរខណ្ឌមានជ័យ ចុះបង្ក្រាបសង្វៀនបញ្ជល់មាន់
- ពីរនាក់ឪពុក និងកូនឃើញនាងក្រមុំដើរម្នាក់ឯងនិយាយលែបខាយក្លាយជាហិង្សា
| រថយន្តដឹកឈើបុកគ្នាជាមួយរថយន្តប៉ូលិសមុខស្នងការរាជធានីភ្នំពេញស្លាប់ម្នាក់ Posted: 20 Mar 2011 11:38 PM PDT   រាជធានីភ្នំពេញ ៖ រថយន្តដឹកឈើម៉ាកកាមរី ពណ៌ខ្មៅ ពាក់ស្លាកលេខ ច-៥២១៥ ភព២ មួយគ្រឿង បានបើកបោះពួយបុកគ្នាជាមួយរថយន្តស្ទូចរបស់ប៉ូលិសចរាចរ បណ្តាលឱ្យស្លាប់អ្នកបើកបររថយន្តដឹកឈើម្នាក់ដោយសារឈើខ្ទាតមកបុកពីក្រោយបន្ថែមកៀបជាប់ជាមួយចង្កូតរថយន្ត កាលពីវេលាម៉ោង១០យប់ថ្ងៃទី២០ មីនា ២០១១ នៅលើកំណាត់ផ្លូវលេខ៥៩៨ មុខស្នងការដ្ឋានរាជធានីភ្នំពេញ ស្ថិតក្នុងសង្កាត់ច្រាំងចំរេះ២ ខណ្ឌឫស្សីកែវ ។  |
| Posted: 20 Mar 2011 11:19 PM PDT ខេត្តបាត់ដំបង ៖ សម្តេចតេជោនាយករដ្ឋមន្ត្រីហ៊ុន សែន បានអំពាវនាវឱ្យប្រជាពលរដ្ឋ ក៏ដូចជាពលករខ្មែរដែលទៅធ្វើជាកម្មករនៅក្រៅប្រទេសដូចជាប្រទេសថៃជាដើម ប្រសិនបើមានការលំបាកពេក គួរបញ្ឈប់ទៅ ពីព្រោះទីផ្សារក្នុងប្រទេសកម្ពុជាកំពុងតែខ្វះខាត និងត្រូវការ ។ សម្តេចបានសង្កត់ធ្ងន់ថា មានកម្មករខ្មែរមួយចំនួនជួបនូវការលំបាក ការប្រមាថមើលងាយជិះជាន់ធ្វើបាបពីសំណាក់ថៅកែរបស់ខ្លួន ហើយក៏មានពលករខ្លះប្រថុយជីវិតថែមទៀត ។ ដូច្នេះគួរពិចារណា និងរកការងារក្នុងប្រទេសវិញ ។  |
| Posted: 20 Mar 2011 11:19 PM PDT  ក្រសួងសុខាភិបាលជប៉ុនរាយការណ៍កាលពីថ្ងៃទី២០ មីនា ថា បានចេញការណែនាំដល់ប្រជាជននៃភូមិមួយស្ថិតនៅចម្ងាយ៣០គីឡូម៉ែត្រភាគពាយ័ព្យនៃមជ្ឈមណ្ឌលនុយក្លេអ៊ែរហ្វូគូស៊ីម៉ា ដាយអ៊ីជី កុំឱ្យផឹកទឹករ៉ូប៊ីណេដោយសារមានអត្រាខ្ពស់នៃអ៊ីយ៉ូដវិទ្យុសកម្ម។  |
| ទាហានសៀមបានរុះរើបន្លាលួសដែលដាក់នៅមុខច្រកទ្វារដែកប្រាសាទព្រះវិហារចេញវិញហើយ Posted: 20 Mar 2011 11:19 PM PDT ព្រំដែនព្រះវិហារ ៖ បើតាមអគ្គមេបញ្ជាការរងនៃកងយោធពលមខេមរភូមិន្ទកម្ពុជា លោកនាយឧត្តមសេនីយ៍ផ្កាយមាស៤ ជា តារា បានឱ្យដឹងថា ទាហានសៀមបានរុះរើ និងដកបន្លាលួស ដែលពួកគេបានដាក់ពង្រាយនៅមាត់ច្រកខ្លោងទ្វារដែកមុខប្រាសាទព្រះវិហារនោះវិញហើយ ។ គួរបញ្ជាក់ថា កាលពីវេលាម៉ោងជាង៨ព្រឹកថ្ងៃទី២០ មីនា ម្សិលមិញនេះ ពួកទាហានឈុតខ្មៅសៀម៧នាក់ បានធ្វើការដាក់ពង្រាយលួសបន្លានៅមុខប៉ុស្តិ៍ប៉ូលិសកម្ពុជា ស្ថិតនៅមាត់ច្រកខ្លោងទ្វារដែកមុខប្រាសាទព្រះវិហារ ។  |
| ប្រទេស៥បើកការវាយប្រហារប្រឆាំងមេដឹកនាំផ្តាច់ការលីប៊ី កក្រើកមហាសមុទ្រមេឌីទែរ៉ាណេ Posted: 20 Mar 2011 08:45 PM PDT                 សំឡេងផ្ទុះ និងការបាញ់កាំភ្លើងប្រឆាំងយន្តហោះបានលាន់កក្រើកលើទីក្រុងទ្រីប៉ូលី រដ្ឋធានីលីប៊ី កាលពីវេលាព្រលឹមស្រាងៗនាថ្ងៃទី២០ មីនា ២០១១ ។ មន្ទីរប៉ង់តាហ្គោននិយាយថា នោះគឺជាការវាយប្រហារដោយមីស៊ីលជាលើកដំបូងរបស់សហរដ្ឋអាមេរិក ប្រឆាំងមេដឹកនាំលីប៊ី ដែលក្រាញអំណាច លោកមូអាម៉ា កាដាហ្វី ។ មីស៊ីលនោះគឺបាញ់ចេញពីនាវាចម្បាំងដែលដាក់ពង្រាយនៅឯផ្ទៃសមុទ្រមេឌីទែរ៉ាណេ ។ មន្ត្រីជាន់ខ្ពស់អាមេរិកសុំមិនបញ្ចេញឈ្មោះនិយាយថា ការវាយប្រហារនោះគឺសំដៅទៅលើទីតាំងការពារដែនអាកាសនៅតាមបណ្តោយឆ្នេរសមុទ្រលីប៊ី ជុំវិញរដ្ឋធានីទ្រីប៉ូលី ។ មន្ត្រីដដែលឱ្យដឹងទៀតថា នេះជាការវាយប្រហារលើកទីមួយប៉ុណ្ណោះ ពាក់ព័ន្ធជាមួយនឹងការប្រើប្រាស់នាវាចម្បាំង និងយន្តហោះរបស់អាមេរិក ។ មន្ត្រីមន្ទីរប៉ង់តាហ្គោននិយាយថា ការវាយប្រហារនោះធ្វើឡើងក្នុងគោលបំណងទាមទារឱ្យយោធារបស់ប្រទេសលីប៊ីបើកផ្លូវអាកាស ពិសេសដើម្បីជួយការពារយន្តហោះបរទេស ដែលហោះហើរទៅកាន់ដែនអាកាសរបស់ប្រទេសលីប៊ី ។ តាមមន្ទីរប៉ង់តាហ្គោនថា ប្រទេសចំនួន៥ មានដូចជាសហរដ្ឋអាមេរិក បារាំង អង់គ្លេស កាណាដា និងប្រទេសអ៊ីតាលី បានចូលរួមក្នុងការវាយប្រហារនេះប្រឆាំងលោកកាដាហ្វី ហើយសម្ព័ន្ធមិត្តចម្រុះនេះមាននាវាចម្បាំង២៥គ្រឿងដាក់ពង្រាយនៅលើផ្ទៃសមុទ្រម៉េឌីទែរ៉ាណេ ។ កងកម្លាំងសហរដ្ឋអាមេរិក កងកម្លាំងបារាំង និងកងកម្លាំងអង់គ្លេសបានបើកការវាយប្រហារនោះក្រោយពីមានការជឿជាក់ថា លោកកាដាហ្វីនឹងមិនប្រកាន់ខ្ជាប់ ហើយគោរពបទឈប់បាញ់របស់អង្គការសហប្រជាជាតិ ។ ការវាយប្រហារនោះប្រឆាំងទីតាំងឈរជើងរបស់យោធាលីប៊ី ដោយគ្រាប់មីស៊ីល និងយន្តហោះចម្បាំង ក្នុងនោះរួមមានការអនុវត្តតំបន់ហាមហោះហើរ ។ មីស៊ីល Tomahaw ជាង១០០គ្រាប់ ត្រូវបានបាញ់ពីនាវាចម្បាំង និងនាវាមុជទឹករបស់អាមេរិក និងអង់គ្លេសប្រឆាំងទៅលើដែនអាកាស និងប្រព័ន្ធការពារមីស៊ីលរបស់ប្រទេសលីប៊ី នៅតំបន់ភាគខាងលិចប្រទេស។ ការវាយប្រហារលើកដំបូងនេះយន្តហោះចម្បាំងរបស់ប្រទេសបារាំង ត្រូវបញ្ជូនទៅដាក់ពង្រាយនៅតាមសមុទ្រក្បែរប្រទេសលីប៊ី ហើយហោះហើរបាញ់សំដៅរថយន្តយោធាប្រឆាំងនឹងកងទ័ពរបស់លោកកាដាហ្វី ។ នាយករដ្ឋមន្ត្រីអង់គ្លេស លោកដេវីដ កាម៉េរ៉ុន ថ្លែងកាលពីល្ងាចថ្ងៃទី១៩ មីនា ថា កងទ័ពអង់គ្លេសកំពុងតែប្រតិបត្តិការប្រឆាំងមេដឹកនាំផ្តាច់ការប្រទេសលីប៊ី ។ លោកដេវីដ កាម៉េរ៉ុន ថ្លែងថា «អ្វីដែលយើងកំពុងធ្វើជារឿងចាំបាច់ ជារឿងស្របច្បាប់ហើយជាសិទ្ធិរបស់យើងក្នុងការការពារប្រជាពលរដ្ឋដែលប្រកាន់ខ្ជាប់ គោរពលទ្ធិប្រជាធិបតេយ្យ ។ យើងមិនអាចគាំទ្រមេដឹកនាំផ្តាច់ការរបស់លីប៊ីដែលសម្លាប់ពលរដ្ឋរបស់ខ្លួននោះទេ» ។
លោកមូអាម៉ា កាដាហ្វី ថ្លែងតាមទូរទស្សន៍រដ្ឋកាលពីព្រឹកថ្ងៃទី២០ មីនា នេះថា ធម្មនុញ្ញអង្គការសហប្រជាជាតិផ្តល់សិទ្ធិដល់ប្រទេសលីប៊ីដើម្បីការពារខ្លួននៅពេលមានសង្គ្រាម ។ លោកកាដាហ្វី ថ្លែងទៀតថា «ពលរដ្ឋនៃប្រទេសកាន់សាសនាអ៊ិស្លាម ពលរដ្ឋអាហ្វ្រិក និងពលរដ្ឋអាមេរិកឡាទីន ព្រមទាំងពលរដ្ឋអាស៊ីត្រូវតែឈរខាងពលរដ្ឋលីប៊ី ដើម្បីប្រយុទ្ធប្រឆាំងនឹងការរំលោភបំពាននេះ» ។ ជាមួយគ្នានេះ ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា បានអំពាវនាវដល់លោកកាដាហ្វី ឱ្យដកថយចេញពីទីក្រុង Zawiya នៅភាគខាងលិចរដ្ឋធានីទ្រីប៉ូលី ។ អ្នកនាំពាក្យរដ្ឋាភិបាលលីប៊ីនិយាយថា ការវាយប្រហារប្រឆាំងទីតាំងជាច្រើននៅទីក្រុងទ្រីប៉ូលីបង្កឱ្យមានគ្រោះថ្នាក់ធ្ងន់ធ្ងរដល់ជនស៊ីវិល ។ កាលពីព្រឹកថ្ងៃទី១៩ មីនា កន្លងមក លោកកាដាហ្វី បានចេញសារផ្គើនមួយដល់ប្រទេសមហាអំណាចពិភពលោក ដែលក្នុងសារនោះលោកកាដាហ្វីថ្លែងថា «ពលរដ្ឋលីប៊ីភាគច្រើនបានត្រៀមខ្លួនស្ម័គ្រស្លាប់សម្រាប់ខ្ញុំរួចហើយ»។ សារនោះលោកកាដាហ្វីផ្ញើជូនលោកបារ៉ាក់ អូបាម៉ា ។ ទូរទស្សន៍រដ្ឋលីប៊ីរាយការណ៍ថា ក្នុងការវាយប្រហាររបស់ក្រុមសម្ព័ន្ធមិត្តចម្រុះនោះបណ្តាលឱ្យស្លាប់មនុស្ស៤៨នាក់ ។
កងទ័ពអាកាសបារាំង បានបើកការវាយប្រហារមុនគេប្រឆាំងនឹងកងទ័ពរបស់មេដឹកនាំផ្តាច់ការលីប៊ី លោកមូអាម៉ា កាដាហ្វី រយៈពេលប៉ុន្មានម៉ោងក្រោយ ពីកិច្ចប្រជុំកំពូលក្រុងប៉ារីសស្តីអំពីការអន្តរាគមន៍របស់យោធា កាលពីថ្ងៃទី១៩ មីនា កន្លងមក ។ នេះបើតាមការឱ្យដឹងដោយអ្នកនាំពាក្យសេនាធិការបារាំង លោក Thierry Burckhard ។ លោក Thierry បានប្រាប់ទូរទស្សន៍បារាំង BFM ថា ការវាយប្រហារនោះសំដៅលើរថយន្តដែលគេជឿថា ជារបស់កងទ័ពលោកកាដាហ្វី នៅវេលាម៉ោងជិត៦ល្ងាចថ្ងៃទី១៩ មីនា ។ ការវាយប្រហារនេះជាចំណាត់ការរបស់យោធាបរទេសដំបូងគេប្រឆាំងប្រទេសលីប៊ី ចាប់តាំងពីអង្គការសហប្រជាជាតិអនុម័តលើដំណោះស្រាយមួយកាលពីថ្ងៃទី១៨ មីនា អនុញ្ញាតឱ្យមានតំបន់ហាមហោះហើរនៅប្រទេសលីប៊ី និងប្រកាន់យករាល់វិធានការចាំបាច់ទាំងអស់ ដើម្បីការពារជនស៊ីវិល ។ ប្រធានាធិបតីបារាំង លោកនីកូឡាស់ សាកូហ្ស៊ី ក្នុងសន្និសីទកាសែតមួយ បានថ្លែងបញ្ជាក់ថា យន្តហោះចម្បាំងរបស់បារាំងកំពុងបើកបេសកកម្មស៊ើបអង្កេតនៅពីលើប្រទេសលីប៊ី ។ ក្នុងសេចក្តីថ្លែងការណ៍មួយដែលចេញក្រោយពីកិច្ចប្រជុំកំពូលក្រុងប៉ារីស បណ្តាមេដឹកនាំនានាបានឯកភាពគ្នាថា លោកកាដាហ្វី បំពានបទឈប់បាញ់គ្នា បើទោះបីជាមានការព្រមានអំពីការអន្តរាគមន៍របស់យោធាក៏ដោយ ។ លោកប្រធានាធិបតីនីកូឡាស់ សាកូហ្ស៊ី ថ្លែងថា កងទ័ពរបស់យើងនឹងប្រឆាំងការឈ្លានពានណាមួយដោយលោកកាដាហ្វី ដែលប្រឆាំងពលរដ្ឋក្រុងបេនហ្គាហ្ស៊ី ។
ថ្លែងតាមទូរទស្សន៍រដ្ឋ លោកមូអាម៉ា កាដាហ្វី ថ្លែងថា ធម្មនុញ្ញរបស់អង្គការសហប្រជាជាតិផ្តល់សិទ្ធិដល់លីប៊ី ដើម្បីការពារខ្លួននៅពេលមានសង្គ្រាមដោយលោកសច្ចាថា នឹងសងសឹកការវាយប្រហាររបស់សម្ព័ន្ធភាពចម្រុះរបស់អាមេរិក បារាំង និងអង់គ្លេសនោះ ។ លោកកាដាហ្វី ថ្លែងទៀតថា ឃ្លាំងស្តុកសព្វាវុធរបស់លីប៊ីនឹងបើកចំហ ដើម្បីយកអាវុធបំពាក់ឱ្យពលរដ្ឋលីប៊ី ចូលរួមទប់ទល់ការវាយប្រហាររបស់ប្រទេសលោកខាងលិច ។ នៅក្នុងលិខិតដែលផ្ញើជូនប្រធានាធិបតីបារាំង លោកនីកូឡាស សាកូហ្ស៊ី និងនាយករដ្ឋមន្ត្រីអង់គ្លេស លោកដេវីដ កាមេរ៉ុន និងអគ្គលេខាធិការអង្គការសហប្រជាជាតិ លោកបាន គីមូន លោកកាដាហ្វី បានចាត់ទុកវិធានការរបស់អង្គការសហប្រជាជាតិថាជា «វិធានការគ្មានសុពលភាព» ពីព្រោះដំណោះស្រាយរបស់ក្រុមប្រឹក្សាសន្តិសុខមិនអនុញ្ញាតឱ្យមានអន្តរាគមន៍ក្នុងកិច្ចការផ្ទៃក្នុងរបស់លីប៊ី ដោយប្រទេសផ្សេងៗ ។ ទោះបីជាបែបណា ពុំមានប្រភពណាមួយឱ្យដឹងថា លោកកាដាហ្វី កំពុងលាក់ខ្លួននៅកន្លែងណានោះទេ ។
ទីភ្នាក់ងារព័ត៌មានន័រវេស NTB រាយការណ៍កាលពីថ្ងៃទី២០ មីនា ថា យន្តហោះចម្បាំងធុន F16 របស់ន័រវេស៦គ្រឿង នឹងត្រូវបញ្ជូនទៅចូលរួមប្រតិបត្តិការសឹកដែលដឹកនាំដោយបណ្តាប្រទេសលោកខាងលិច ប្រឆាំងប្រទេសលីប៊ី ក្រោយពីកងទ័ពអាកាសន័រវេសទទួលបានការអនុញ្ញាត ។ ទីភ្នាក់ងារព័ត៌មានដដែលឱ្យដឹងទៀតថា កងទ័ពអាកាសន័រវេស កាលពីយប់ថ្ងៃទី១៩ មីនា ទទួលបានបញ្ជាឱ្យត្រៀមយន្តហោះចម្បាំង F16 ចំនួន៦គ្រឿង និងអ្នកបើកជាង១០០នាក់ សម្រាប់ប្រតិបត្តិការនៅក្នុងប្រទេសលីប៊ី ។ យន្តហោះចម្បាំងទាំង៦គ្រឿងនឹងចាប់ផ្តើមចេញដំណើរនៅដើមសប្តាហ៍នេះ ហើយនឹងចុះចតនៅមូលដ្ឋានក្នុងទីក្រុង Sicily ប្រទេសអ៊ីតាលី ។ នាយករដ្ឋមន្ត្រីន័រវេស លោក Jens Stoltenberg ថ្លែងថា ន័រវេសនឹងចូលរួមប្រតិបត្តិការសឹក ដើម្បីពង្រឹង និងអនុវត្តតំបន់ហាមហោះហើរគាំទ្រដោយអង្គការសហប្រជាជាតិនៅប្រទេសលីប៊ី ។ លោក Jen Stoltenberg ថ្លែងដូច្នេះនៅពេលលោកចូលរួមក្នុងកិច្ចប្រជុំកំពូលក្រុងប៉ារីស ។ លោក Stoltenberg ថ្លែងទៀតថា យន្តហោះចម្បាំងរបស់ន័រវេសអាចចូលរួមបេសកកម្មគ្រប់ប្រភេទទាំងអស់ គឺទាំងការអនុវត្តតំបន់ហាមហោះហើរ និងការទម្លាក់គ្រាប់បែកសំដៅកងទ័ពលើដី ។
ក្រុមសហភាពអាហ្វ្រិកសម្រាប់ប្រទេសលីប៊ី កាលពីថ្ងៃទី២០ មីនា បានអំពាវនាវឱ្យបញ្ឈប់ការវាយប្រហារប្រឆាំងប្រទេសលីប៊ីជាបន្ទាន់ ក្រោយពីសហរដ្ឋអាមេរិក បារាំង និងអង់គ្លេស បើកប្រតិបត្តិការសឹកប្រឆាំងកងទ័ពរបស់លោកមូអាម៉ា កាដាហ្វី ។ ក្រោយពីកិច្ចប្រជុំមួយរយៈពេលជាង៤ម៉ោង នៅក្នុងទីក្រុង Mauritanian សហភាពអាហ្វ្រិក បានស្នើដល់អាជ្ញាធរលីប៊ី ឱ្យធានារ៉ាប់រងនូវជំនួយមនុស្សធម៌សម្រាប់អ្នកដែលត្រូវការ ព្រមទាំងការពារជនបរទេស ដែលរស់នៅក្នុងប្រទេសលីប៊ី ។ ក្រុមសហភាពអាហ្វ្រិកគ្រោងបើកកិច្ចប្រជុំមួយនៅក្នុងទីក្រុងអាឌីល អាបាបា រដ្ឋធានីអេត្យូពីនៅថ្ងៃទី២៥ មីនា ខាងមុខ ដោយមានតំណាងមកពីសម្ព័ន្ធអារ៉ាប់ អង្គការសន្និសីទអ៊ិស្លាម សហគមន៍អឺរ៉ុប និងអង្គការសហប្រជាជាតិ សំដៅបង្កើតយន្តការមួយសម្រាប់ការពិគ្រោះយោបល់គ្នា និងចាត់វិធានការរួមគ្នា ដើម្បីដោះស្រាយវិបត្តិនៅលីប៊ី ។
ប្រភពយោធាបារាំងបានបដិសេធរបាយការណ៍នានាដែលថា យន្តហោះចម្បាំងមួយគ្រឿងក្នុងចំណោមយន្តហោះចម្បាំងរបស់បារាំងដែលធ្វើប្រតិបត្តិការសឹកនៅប្រទេសលីប៊ី ត្រូវបានបាញ់ធ្លាក់ ។
ទីភ្នាក់ងារព័ត៌មានបរទេសកាលពីថ្ងៃទី២០ មីនា ឱ្យដឹងថា លោកម៉ូអាមម៉ា កាដាហ្វ៉ី មេដឹកនាំប្រទេសលីប៊ី បានថ្លែងក្រោយពីមានប្រតិបត្តិការវាយប្រហាររបស់កងកម្លាំងអង្គការសហប្រជាជាតិ ទាំងផ្លូវអាកាស និងតាមនាវា ដោយអំពាវនាវឱ្យជនជាតិលីប៊ីកាន់អាវុធតស៊ូ និងអាហ្វ្រិកខាងជើងក្លាយជាតំបន់សង្គ្រាមដែលជនជាតិលីប៊ីនឹងប្រឈមមុខជាមួយអ្នកឈ្លានពាន។ លោកបន្តទៀតថា ការឈ្លានពានលើកនេះ ធ្វើឱ្យជនជាតិលីប៊ីរឹងមាំ និងរួមគ្នាជាធ្លុងមួយ។ លោកព្រមានថា បច្ចុប្បន្នឃ្លាំងអាវុធយុទ្ធភណ្ឌបានបើក និងប្រជាជនត្រូវប្រដាប់អាវុធការពារអធិបតេយ្យភាពលីប៊ី។ ក្នុងខណៈពេលដែលសហរដ្ឋអាមេរិក អង់គ្លេស និងបារាំង បើកឆាកវាយប្រហារប្រទេសលីប៊ីដោយកាំជ្រួចជាច្រើនគ្រាប់ គួបផ្សំនឹងការវាយប្រហារតាមផ្លូវអាកាសកាលពីព្រឹកថ្ងៃទី២០ មីនា បានបង្កើតកំហឹងដល់លោកម៉ូអាមម៉ា កាដាហ្វ៉ី ដោយលោកប្រកាសថា សមុទ្រមេឌីទែរ៉ាណេ នឹងក្លាយជា «សមរភូមិ»។ ស្ថានីយទូរទស្សន៍ជាតិបានផ្សាយថា ប្រជាជនជាច្រើននាក់បានប្រមូលផ្តុំគ្នាជារបាំងមនុស្សដល់លោកកាដាហ្វ៉ី នៅទីបញ្ជាការបាបអាល់ អាស៊ីស៊ីយ៉ា និងនៅអាកាសយានដ្ឋានអន្តរជាតិក្រុងទ្រីប៉ូលី ។
ម៉ូអាម៉ា ម៉ូហាម៉ាត អាល់ កាដាហ្វី (Muam-mar Muhammad al-Gaddafi) មានឋានៈជាវរសេនីយ៍ឯក បានក្លាយជាមេដឹកនាំរបស់ ប្រទេសលីប៊ី តាំងពីឆ្នាំ១៩៦៩ តាមរយៈរដ្ឋ ប្រហារយោធាមួយ។
ម៉ូហាម៉ាត អាល់ កាដាហ្វី កើតនៅក្នុងតង់ bedouin (ជាតង់ម្យ៉ាងដែលគេសង់លើសមុទ្រខ្សាច់) ក្នុងតំបន់ដាច់ស្រយាលជិតទីក្រុង Sirt ក្នុងឆ្នាំ១៩៤២។ គ្រួសាររបស់លោកជាសមាជិកមួយនៃកុលសម្ព័ន្ធ arabized Berbers។ ក្នុងវ័យកុមារគាត់ចូលរៀនក្នុងសាលាអ៊ិស្លាម ចំពេលដែលមានហេតុការណ៍ធំមួយកើតឡើងក្នុងពិភពអារ៉ាប់ គឺពួកអ៊ីស្រាអែល បានយកឈ្នះពួកប៉ាឡេស្ទីនក្នុងឆ្នាំ១៩៤៨ និងលោក Gamal Abdel Nasser បានឡើងកាន់អំណាចក្នុងប្រទេសអេហ្ស៊ីប ក្នុងឆ្នាំ១៩៥២។ លោកចូលចិត្តសិក្សាមុខវិជ្ជាប្រវតិ្តសាស្ត្រ។ លោកបានចុះឈ្មោះបម្រើក្នុងជួរកងទ័ពលីប៊ីនៅទីក្រុងក្នុងឆ្នាំ១៩៦១ បានជាប់ទាក់ទងជាមួយនឹងចលនាមន្ត្រីសេរី ចាប់តាំងពីគាត់ចូលរៀននៅសាលាយោធា។ លោកបានរៀបចំផែនការទម្លាក់រាជវង្សតាំងពីលោកនៅរៀនក្នុងសាលាយោធាមកម៉្លេះ។ បន្ទាប់ពីបានបញ្ចក់ការសិក្សាក្នុងប្រទេសលោកត្រូវបញ្ជូនទៅរៀននៅទ្វីបអឺរ៉ុប។ ក្នុងជីវិត របស់លោកមានពាក្យចចាមអារ៉ាមជាច្រើនដូចជា លោកមិនបានចូលរៀនសាលាយោធា Royal Military Academy Sandhurst លោកមិនបានទទួលការហ្វឹកហ្វឺនយោធាបន្ថែមនៅឯ Hellenic Military Academy ក្នុងទីក្រុងអាទែន ប្រទេសក្រិចទេ ឬកន្លែងណាមួយច្បាស់លាស់ក្នុងប្រទេសអង់គ្លេសដែរ។
ថ្ងៃ១ កញ្ញា ឆ្នាំ១៩៦៩ មេដឹកនាំយោធាជាន់ខ្ពស់មួយក្រុមដែលដឹកនាំដោយលោក កាដាហ្វី បានចាប់ផ្តើមធ្វើរដ្ឋប្រហារបង្ហូរឈាមទម្លាក់សេ្តច Idris ពេលទ្រង់ទៅសម្រាកព្យាបាលព្រះរោគក្នុងប្រទេសតួកគី។ រាជបុត្រទ្រង់ព្រះនាម Sayyid Hasan ar-Rida al-Mahdi as-Sanussi ដែលនឹងត្រូវស្នងរាជ្យត្រូវទម្លាក់ចេញពីតំណែងក្នុងពេលមានបដិវត្តន៍របស់ មន្ត្រីកងទ័ព និងត្រូវចាប់ឃុំក្នុងព្រះរាជដំណាក់។ ក្រោយមកក្រុមនេះបានរំលាយរបបរាជានិយម និងប្រកាសជាសាធារណរដ្ឋអារ៉ាប់លីប៊ី។
គណៈកម្មាធិការបដិវត្តន៍របស់កាដាហ្វី បានជួបប្រជុំគ្នាយកតាមគំរូប្រព័ន្ធប្រទេសកុម្មុយនីស្តមួយចំនួន។ ការងារពី១០ទៅ២០ភាគរយក្នុង ប្រទេសលីប៊ីត្រូវគណៈកម្មាធិការនេះជាអ្នកពិនិត្យដូចមេដឹកនាំអ៊ីរ៉ាក់ សាដាម ហ៊ូសេន និងមេដឹកនាំកូរ៉េខាងជើងគីមជុងអ៊ីលដែរ។ ការត្រួតពិនិត្យ ធ្វើឡើងតាំងពីក្នុងរដ្ឋាភិបាល រោងចក្រសហគ្រាស និងផ្នែកអប់រំផងដែរ។ មានច្បាប់មួយចែងថា ការនិយាយគ្នាជាមួយជនបរទេសពីកិច្ចការនយោបាយ ជាទោសឧក្រិដ្ឋត្រូវជាប់ពន្ធនាគារ៣ឆ្នាំ។ ហេតុនេះកាដាហ្វី បានលុបចោលការសិក្សាភាសាបរទេសទាំងអស់ក្នុងវិស័យអប់រំ។ ក្នុងរបបនយោបាលរបស់គាត់ ការកាត់ទោសប្រហារជីវិតចំពោះអ្នកប្រឆាំងត្រូវធ្វើឡើងជាសាធារណៈ និងផ្សាយឡើងវិញតាមរយៈទូរទស្សន៍របស់ជាតិ។ លីប៊ីជាប្រទេសដែលទទួលរង់ការរិះគន់បំផុតពីបណ្តាប្រទេសនៅក្នុងតំបន់មជ្ឈិមបូព៏ា និងអាហ្វ្រិក។ ភ្នាក់ងាររបស់កាដាហ្វី មានសកម្មភាពបំផុតក្នុងដែនដីចក្រភពអង់គ្លេស ដែលមានប្រជាជនលីប៊ីជាច្រើនសុំសិទ្ធិជ្រកកោន។ បន្ទាប់ពីមន្ត្រីទូតលីប៊ីបាញ់សម្លាប់ក្រុមបាតុករប្រឆាំងកាដាហ្វី១០នាក់ និងសម្លាប់ប៉ូលិសអង់គ្លេសរួចមក ចក្រភពអង់គ្លេសក៏បានផ្តាច់ទំនាក់ទំនងការទូតជាមួយលីប៊ី។ កាដាហ្វីធ្លាប់ពោលថា ការសម្លាប់អាចធ្វើឡើងបើទោះជាពួកគេនិរទេសខ្លួនក្តី។ នាឆ្នាំ២០០៤ លីប៊ីបានឲ្យតម្លៃក្បាលមេដឹកនាំរិះគន់លោក Ashur Shamis ចំនួន១លានដុល្លារ ដែលជាអ្នកសារព័ត៌មានអង់គ្លេសជាតិលីប៊ី។
ប្រាក់សរុបរបស់កាដាហ្វីទាំងអស់មានចំនួន៧០ពាន់លានដុល្លារ។ លោកមានភាគហ៊ុនក្នុងក្រុមហ៊ុន និងធនាគារក្នុងប្រទេសអ៊ីតាលី និងធនាគារដូចជា ក្រុមហ៊ុនប្រេង Eni ក្រុមហ៊ុន Fiat ធនាគារ Unicredit និងក្រុមហ៊ុន Finmeccanica។ ក្នុងខែមករា ឆ្នាំ២០០២ កាដាហ្វីបានទិញភាគហ៊ុន៧,៥ភាគរយស្មើនឹង២១លានដុល្លាររបស់ក្លឹបបាល់ទាត់អ៊ីតាលី Juventus តាមរយៈក្រុមហ៊ុន Lafico។
ការជ្រើសរើសអង្គរក្សរបស់កាដាហ្វីបានក្លាយជាចំណីដ៏ឆ្ងាញ់របស់បណ្តាញអ្នកសារព័ត៌មានជានិច្ច។ អង្គរក្សផ្ទាល់៤០នាក់របស់គាត់ត្រូវបានគេឲ្យឈ្មោះថា Amazonian Guard ដែលសុទ្ធសឹងជាស្រ្តីភេទ ហើយនៅក្រមុំបរិសុទ្ធ និងត្រូវជ្រើសរើសដោយលោកផ្ទាល់។ ពួកគេត្រូវបញ្ជូនឲ្យទៅហ្វឹកហាត់បាញ់កាំភ្លើង និងក្បាច់គុនមុនពេលបំពេញភារកិច្ច៕ (សុខលី+វិជ្ជា)  |
| ប្រទេសលោកខាងលិចត្រៀមបើកការវាយប្រហារប្រឆាំងលោកកាដាហ្វីមួយឈុតថ្មីទៀត Posted: 20 Mar 2011 08:36 PM PDT     កងទ័ពសម្ព័ន្ធមិត្តមានប្រទេសបារាំង អង់គេស និងសហរដ្ឋអាមេរិក ពេលនេះបានត្រៀមខ្លួនរួចជាស្រេចដើម្បីបើកការវាយប្រហារមួយឈុតថ្មីទៀត ប្រឆាំងមេដឹកនាំផ្តាច់ការលីប៊ី លោកមូអាម៉ា កាដាហ្វី ដើម្បីអនុវត្ត និងពង្រឹងដំណោះស្រាយរបស់ក្រុមប្រឹក្សាសន្តិសុខ អង្គការសហប្រជាជាតិ សំដៅរារាំងលោកកាដាហ្វី កុំឱ្យវាយប្រហារប្រឆាំងជនស៊ីវិល ។ ការវាយប្រហារមួយឈុតដំបូងពីលើអាកាស និងពីក្នុងសមុទ្រដោយប្រទេសមហាអំណាចពិភពលោកចំនួន៣ប្រឆាំងលីប៊ីធ្វើឱ្យមេដឹកនាំប្រទេសនេះព្រមានពីការកើតមានសង្គ្រាមរយៈពេលវែងនៅសមរភូមិសមុទ្រមេឌីទែរ៉ាណេ។ យន្តហោះចម្បាំងអារ៉ាប់ និងយន្តហោះចម្បាំងរបស់ប្រទេសលោកខាងលិចកំពុងប្រមូលផ្តុំគ្នានៅមូលដ្ឋានទ័ពអាកាសរបស់ប្រទេសអ៊ីតាលីត្រៀមចូលរួមយុទ្ធនាការជាអន្តរជាតិប្រឆាំងលីប៊ី ។ រដ្ឋមន្ត្រីការពារប្រទេសអ៊ីតាលីលោក Ignazio La Russa ថ្លែងថា ក្រុងរ៉ូមបានត្រៀមយន្តហោះចម្បាំង៨គ្រឿងសម្រាប់ប្រតិបត្តិការសឹកប្រឆាំងលីប៊ី ហើយយន្តហោះទាំងនេះអាចប្រើប្រាស់នៅពេលណាក៏បាន ។ ការវាយប្រហារដោយមីស៊ីលរបស់ប្រទេសមហាអំណាចពិភពលោក បារាំង អង់គ្លេស និងសហរដ្ឋអាមេរិក កាលពីថ្ងៃទី២០ មីនា កន្លងមក បានបំផ្លាញស្ទើរតែទាំងស្រុងនូវមូលដ្ឋានយ៉ាងរឹងមាំមួយដែលគេជឿថាជារបស់លោកកាដាហ្វី ៕  |
| ពួកបះបោរលីប៊ីនិយាយថា មានមនុស្សពួកគេស្លាប់ដល់ជាង8.000នាក់ Posted: 20 Mar 2011 08:22 PM PDT  អ្នកនាំពាក្យម្នាក់របស់ពួកបះបោរលីប៊ីថ្លែងកាលពីថ្ងៃទី២០ មីនា តាមទូរទស្សន៍អាល់ហ្សាហ្ស៊ីរ៉ាថា ពលរដ្ឋលីប៊ីជាង៨.០០០នាក់ដែលតស៊ូក្នុងជួរពួកបះបោរបានត្រូវស្លាប់តាំងពីចាប់ផ្តើមបដិវត្តន៍ប្រឆាំងរបបលោកមូអាម៉ា កាដាហ្វីមក។ អ្នកនាំពាក្យរូបនេះ លោកអាប់ដែល ហាហ្វីសហ្គោហ្គា និយាយថា យើងជំរឿនឃើញមនុស្សរបស់យើងស្លាប់ជាង៨.០០០នាក់។ ម្យ៉ាងទៀតអ្នកនាំពាក្យរូបនេះបានរិះគន់អគ្គលេខាធិការសម្ព័ន្ធអារ៉ាប់ លោកអាមរ៍មូសាដែលបានសំដែងការប្រឆាំងចំពោះអន្តរាគមន៍តាមអាកាស និងតាមដែនសមុទ្ររបស់ពួកលោកខាងលិចនៅលីប៊ី។ លោកអាមរ៍ មូសាមានប្រសាសន៍ថា អ្វីដែលកើតមាននៅលីប៊ីវាខុសនឹងទិសដៅបង្កើតតំបន់ហាមការហោះហើរមួយពីលើប្រទេសលីប៊ី ហើយអ្វីដែលយើងចង់បាននោះ គឺការពារជនសីុវិល ពុំមែនការទំលាក់គ្រាប់បែកថែមទៀតលើជនសីុវិលនោះឡើយ។  |
| ផ្ទុះក្នុងអណ្តូងរ៉ែធ្យូងថ្មមួយនៅភាគពាយ័ព្យប៉ាគីស្ថានស្លាប់កម្មករ7នាក់ Posted: 20 Mar 2011 08:20 PM PDT  កម្មកររ៉ែធ្យូងថ្មយ៉ាងហោចណាស់៧នាក់បានស្លាប់ និង៤៥នាក់ទៀតបាត់ខ្លួនក្រោយពីមានការផ្ទុះជាបន្តបន្ទាប់កើតឡើងកាលពីល្ងាចថ្ងៃទី២០ មីនា កន្លងមក នៅអណ្តូងរ៉ែធ្យូងថ្មមួយនៅក្បែរទីក្រុងកេតា ខេត្តបាលូជីស្ថាន ភាគពាយ័ព្យប្រទេសប៉ាគីស្ថាន ។ តាមប្រភពព័ត៌មានថា ការផ្ទុះនៅអណ្តូងរ៉ែនោះកើតឡើងនៅពេលឧស្ម័នមេតានក្នុងអណ្តូងរ៉ែកើនឡើងខ្លាំង ។  |
| អតីត Freshie Girl បដិសេធព័ត៌មានចោទថា នាងជាស្រីទំនើង Posted: 20 Mar 2011 08:19 PM PDT  រាជធានីភ្នំពេញ ៖ នាងសុខ សុជាតា អាយុ២៥ឆ្នាំ អតីត Freshie Girl ចំណាត់ថ្នាក់លេខ៣ឆ្នាំ២០០៥នៃស្ថានីយទូរទស្សន៍ប៉ុស្តិ៍លេខ៣ បច្ចុប្បន្នជាម្ចាស់ភោជនីយដ្ឋាន១៨ក្នុងសង្កាត់ចតុមុខ ខណ្ឌដូនពេញ។ ថ្មីៗនេះសារព័ត៌មានមួយចុះផ្សាយថា នាងជាស្រីទំនើងគំរាមបាញ់អ្នកកាសែត និងជេរប្រមាថគំរាមដកម៉ាស៊ីនថតទៀតផង។ នៅរសៀលថ្ងៃទី១៨ ខែមីនា ឆ្នាំ២០១១ អ្នកយកព័ត៌មានបានទៅជួបនាងផ្ទាល់ ហើយសម្ភាសន៍ជាមួយនាងរយៈពេល១ម៉ោង។ នាងបាននិយាយរៀបរាប់ពីដំណើររឿងត្រួសៗថា កាលពីរសៀលថ្ងៃទី១៦ ខែមីនា ឆ្នាំ២០១១ នាងបានទៅពិគ្រោះរឿងការងារបញ្ជីស្នាមជាមួយបុគ្គលិករបស់នាង ព្រោះកន្លងមកមានបាត់ប្រាក់ក្រុមហ៊ុនរហូតរាប់មឺុនដុល្លារឯណោះ ។ ខណៈពេលរូបនាង និងបុគ្គលិកស្ថិតនៅក្នុងការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញ ដោយមន្ត្រីនគរបាលកំពុងសាកសួរបុគ្គលិករបស់នាង និងរូបនាង(មានមនុស្សជិត២០នាក់) ស្រាប់តែមានបក្សពួកភាគីបុគ្គលិករបស់នាងម្នាក់ដើរចូលក្នុងបន្ទប់ និងនិយាយពាក្យគ្រោធគ្រាត។ ដោយ នាងខឹង ក៏តបតវិញ។ ស្របពេលនោះស្រាប់តែលេចបុរសម្នាក់ថា ខ្លួនជាអ្នកកាសែតដើរចូលមក ហើយលើកម៉ាស៊ីនថតរូប ។ នាងក៏សួរទៅអ្នកកាសែតនោះថា ម៉េចបានជាថតរូបនាងខ្ញុំដោយគ្មានការអនុញ្ញាតបែបនេះ? ខ្ញុំសុំឱ្យលុបរូបនាងខ្ញុំចេញ។ ពេលនោះអ្នកកាសែតឆ្លើយថា ចាំខ្ញុំលុបឱ្យ។ នាងសុជាតា ប្រាប់ថា ដោយនាងដាក់ពាក្យប្តឹងបុគ្គលិករបស់នាងទើបមន្ត្រីនគរបាលសុំឱ្យនាង និងបុគ្គលិកទាំងអស់ចូលខ្លួនមកការិយាល័យព្រហ្មទណ្ឌដើម្បីសាកសួរ។ នាងសុខ សុជាតា បានសំណូមពរចំពោះបុគ្គលអ្នកកាសែតនោះថា «សូមលោកកុំដើរថតរូបគេ ហើយបង្កើតព័ត៌មានថា នាងជាស្រីទំនើង។ ពាក្យនោះមិនល្អទេ ។ រូបខ្ញុំមិនមែនជាស្រីទំនើងដូចពាក្យចោទប្រកាន់ទេ។ មួយវិញទៀតនាងខ្ញុំសុំបដិសេធចំពោះការចោទប្រកាន់ថា នាងខ្ញុំគំរាមបាញ់អ្នកកាសែត គឺមិនពិតទេ ព្រោះនាងខ្ញុំជាអ្នករកស៊ីលក់ដូរគ្មានសិទ្ធិប្រើប្រាស់អាវុធទេ ហើយទីនោះជាកន្លែងនគរបាល បើនាងខ្ញុំគំរាមបាញ់អ្នកកាសែតមែនប្រហែលជានគរបាលមិនឱ្យចេញពីស្នងការដ្ឋានបានទេ»។ នាងសុខ សុជាតា និយាយថា អ្នកកាសែតរូបនោះស្រវឹងស្រាពេលនាងចេញពីស្នងការដ្ឋានមកផ្ទះវិញគេជិះម៉ូតូតាមក្រោយរថយន្តលើកដៃជាសញ្ញាជេរប្រមាថនាងទៅវិញទេ មិនមែននាងជេរប្រមាថអ្នកកាសែតទេ។ នាងសុជាតាប្រាប់ថា នាងកំពុងតែឱ្យមេធាវីរបស់នាងរៀបចំដាក់ពាក្យបណ្តឹងពីករណីចោទថា នាងជាស្រីទំនើងគំរាមបាញ់អ្នកកាសែតដើម្បីឱ្យសមត្ថកិច្ចរកយុត្តិធម៌ឱ្យរូបនាង ព្រោះនាងមិនបានប្រព្រឹត្តទេ ៕  |
| លោកកាដាហ្វី សច្ចាថានឹងយកឈ្នះលើកងទ័ពពួកលោកខាងលិច Posted: 20 Mar 2011 08:18 PM PDT  បើទោះបីជារងការវាយប្រហារពីលើអាកាស និងពីសមុទ្រដោយមីស៊ីលក៏ដោយ ក៏មេដឹកនាំផ្តាច់ការលីប៊ី លោកមូអាម៉ា កាដាហ្វី នៅតែមិនចុះញ៉មឡើយ ហើយបានសច្ចាថានឹងសងសឹកវិញ។ កាលពីថ្ងៃទី២០ មីនា កន្លងមក លោកកាដាហ្វី សច្ចាថា កងទ័ពស្ម័គ្រស្លាប់របស់លោកនឹងវាយយកឈ្នះកងទ័ពពួកលោកខាងលិច ហើយលោកកាដាហ្វី បានហៅការវាយប្រហាររបស់ពួកលោកខាងលិចប្រឆាំងលីប៊ីថា ជា «សង្គ្រាមសាសនា» ប្រឆាំងពលរដ្ឋលីប៊ី ។ លោកកាដាហ្វី ថ្លែងថា «យើងនឹងមិនចាកចេញទុកឱ្យប្រទេសលោកខាងលិចកាន់កាប់ប្រេងរបស់លីប៊ីឡើយ» ហើយលោកអះអាងថា ពួកសម្ព័ន្ធមិត្តចម្រុះដែលបើកការវាយប្រហារប្រឆាំងកងទ័ពរបស់លោកនឹងទទួលបរាជ័យនៅទីបញ្ចប់ ព្រោះរដ្ឋាភិបាលលីប៊ី បានបើកឃ្លាំងស្តុកអាវុធ យកអាវុធបំពាក់ដល់ពលរដ្ឋលីប៊ីទាំងអស់ ដើម្បីតទល់ជាមួយកងទ័ពលោកខាងលិច ។ លោកកាដាហ្វី ថ្លែងក្នុងសារខ្លីមួយចេញផ្សាយតាមទូរទស្សន៍ផ្លូវការលីប៊ីថា «អាវុធកំពុងត្រូវផ្តល់ទៅឱ្យពលរដ្ឋទាំងអស់» ។ លោកវរសេនីយ៍ឯកកាដាហ្វី បានអះអាងដូច្នេះក្រោយពីពួកមហាអំណាចពិភពលោកមានប្រទេសបារាំង អង់គ្លេស និងសហរដ្ឋអាមeរិក បើកការវាយប្រហារយ៉ាងចាស់ដៃពីលើអាកាស និងពីសមុទ្រប្រឆាំងគោលដៅកងទ័ពរបស់លោកកាដាហ្វី ក្រោយពីក្រុមប្រឹក្សាសន្តិសុខអង្គការសហប្រជាជាតិសម្រេចអនុម័តលើដំណោះស្រាយមួយបង្កើតតំបន់ហាមហោះហើរឆ្លងកាត់ និងដើម្បីការពារជនស៊ីវិលនៅក្នុងប្រទេសលីប៊ី ។ ក្នុងការវាយប្រហារនោះប្រទេសបារាំងបានបើកការវាយប្រហារមុនគេ ៕  |
| Posted: 20 Mar 2011 08:14 PM PDT    ខេត្តក្រចេះ ៖ បណ្តាចំណុចឈរជើងរបស់ក្រុមកុងត្រូលជជុះជាច្រើនកន្លែងដែលកើតមានយ៉ាងស្អេកស្កះនៅតាមបណ្តោយផ្លូវជាតិត្រូវបានរលាយយ៉ាងឆាប់រហ័សតែមួយប៉ប្រិចភ្នែក បន្ទាប់ពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានព្រមានយ៉ាងធ្ងន់ៗរួចមក ។ គេសង្កេតឃើញថា កន្លងមកទីតាំងនៃកុងត្រូលជជុះនៅលើដងផ្លូវជាតិលេខ៧អាស៊ានមានមិនតិចជាងដប់កន្លែងទេ រាប់ចាប់ពីភូមិអូរគ្រៀង ឃុំអូរគ្រៀង ស្រុកសំបូររហូតដល់ស្រុកស្នួល ខេត្តក្រចេះ។ ក្នុងនោះមានកុងត្រូលជជុះធំៗចំនួន៣កន្លែង គឺនៅចំណុចខ្លីទទឹងក្នុងភូមិសាស្ត្រឃុំក្បាលដំរី ស្រុកសំបូរ និងនៅចំណុចផ្លូវបំបែកខ្លាស្ទុះ ស្ថិតក្នុងសង្កាត់អូរឫស្សី ក្រុងក្រចេះ និងមួយកន្លែងទៀតនៅភូមិឃ្សឹមក្រៅ ឃុំឃ្សឹម ស្រុកស្នួល ។ កន្លងមកតែងតែមានសមត្ថកិច្ចគ្រប់ស្ថាប័ន ដាក់ក្បាលឡានរាប់សិបគ្រឿងក្នុងមួយកន្លែង ចាំសំកុកទារលុយពីឈ្មួញ និងរថយន្តធ្វើដំណើរទៅមក ព្រមទាំងមានការប្រដេញយ៉ាងប្រសេកប្រសាចពាសេពញផ្លូវជាតិជាហេតុបង្កឱ្យមានភាពអនាធិបតេយ្យ ។ ជាពិសេសបង្កឱ្យមានការភ្ញាក់ផ្អើលដល់ប្រជាពលរដ្ឋផងដែរ។ ទោះជាបែបណាក្តីអត់មានការបង្ក្រាបទេ ។ រហូតមកទល់នឹងពេលនេះបណ្តាកុងត្រូលជជុះទាំងនោះបានរលាយទាំងស្រុង បន្ទាប់ពីមានការព្រមានរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាយ៉ាងធ្ងន់ៗទៅលើអាជ្ញាធរខេត្តដែលត្រូវតែលុបបំបាត់។ ជាក់ស្តែងនៅយប់ថ្ងៃទី១៩ មីនា សមត្ថកិច្ចដឹកនាំដោយលោកឧត្តមសេនីយ៍ត្រីជួង ស៊ាងហាក់ ស្នងការនគរបាលខេត្ត ដោយចូលរួមសហការពីលោកអីុវ សាភុំ អភិបាលស្រុកស្នួល លោកមេឃុំ មេភូមិ រួមទាំងមន្ត្រីនគរបាលនៃស្នងការដ្ឋាននគរបាលខេត្តជាច្រើនរូបទៀត បានទៅត្រួតពិនិត្យទីតាំងកុងត្រូលជជុះដែលកន្លងមកធ្លាប់មាននៅលើផ្លូវជាតិលេខ៧តាំងពីចំណុចឃុំអូរគ្រៀង ស្រុកសំបូរ រហូតដល់ស្រុកស្នួល ខេត្តក្រចេះ។ នៅក្នុងយុទ្ធនាការដ៏ក្តៅគគុកនេះ មន្ត្រីសមត្ថកិច្ចបានប្រើរូបភាពឱ្យរថយន្តមួយគ្រឿងរត់ពីមុខក្បួនក្នុងល្បឿនលឿនប្រៀបដូចរថយន្តដឹកឈើប្រណីតដើម្បីបញ្ឆោតឱ្យបណ្តាសមត្ថកិច្ចដែលនៅតាមកុងត្រូលជជុះទាំងនោះដេញតាម។ តែទោះបីជាយ៉ាងណាក៏យុទ្ធនាការនៅក្នុងយប់នោះ សមត្ថកិច្ចមិនបានប្រទះក្រុមកុងត្រូលជជុះទេ បែរជារលាយអស់ដោយស្វ័យប្រវត្តិប្រហែលជាដឹងមុនផងក៏មិនដឹង។ នៅក្នុងសកម្មភាពនាយប់នោះ កំលាំងសមត្ថកិច្ចបានរុះរើរោងឈើប្រក់ស័ង្កសីមួយនៅជាប់ផ្លូវជាតិក្នុងភូមិសាស្ត្រភូមិឃ្សឹមក្រៅ ឃុំឃ្សឹម ស្រុកស្នួល ដែលជាទីតាំងរបស់កុងត្រូលជជុះដ៏ធំមួយ។ កន្លងមកចំណុចនេះជាបណ្តុំកុងត្រូលជជុះមានរថយន្តរាប់សិបគ្រឿងទាំងយប់ ទាំងថ្ងៃ ហើយក៏ជាទីតាំងរបស់កាសែតដំណឹងកម្ពុជា ដែលគេមិនធ្លាប់ឮ ឈ្មោះហើយក៏មានអ្នកកាសែតមួយចំនួនទៀតរស់នៅប្រមូលផ្តុំគ្នាយ៉ាងគគ្រឹកគគ្រេង។ បន្ទាប់ពីការចុះសួរនាំរួចមកអាជ្ញាធរមានសមត្ថកិច្ចដឹកនាំដោយលោកស្នងការ និងលោកអភិបាលស្រុកបានរុះរើចេញរោងដោលរបៀបជាផ្ទះមួយខ្នងនេះ និងបានណែនាំឱ្យក្រុមអ្នកអះអាងថា ខ្លួនជាអ្នកកាសែតនោះបញ្ឈប់សកម្មភាព។ នៅព្រឹកថ្ងៃទី២០ មីនា កំលាំងសមត្ថកិច្ចបានបន្តដំណើរទៅមើលទីតាំងមួយកន្លែងទៀតស្ថិតនៅភូមិមានជ័យ ឃុំស្រែចារ ស្រុកស្នួល ដែលក៏ជាទីតាំងនៃកុងត្រូលជជុះដ៏ធំមួយដែរ ក្នុងនោះមានសមាសភាពទាំងអង្គការក្រៅរដ្ឋាភិបាល និងអ្នកកាសែតដែលគេមិនសូវស្គាល់ដោយលើកស្លាកសញ្ញានៅមុខរោង និងមានដាក់ក្បាលរថយន្តចេញមកក្រៅ។សមត្ថកិច្ចសហការជាមួយលោកមេភូមិ មេឃុំ បានសំរេចរុះរើទំលាក់ស្លាកសញ្ញាទាំងនោះចុះក្រោម រួមមានស្លាកសញ្ញាសមាគមព័ត៌មានឃ្លាំមើលកម្ពុជា និងស្លាកសញ្ញាអង្គការការពារព្រៃឈើ សត្វព្រៃ និងបរិស្ថាន។ ជុំវិញសកម្មភាពនៃការបង្ក្រាបទីតាំងកុងត្រូលជជុះនាយប់នោះ លោកឧត្តមសេនីយ៍ស្នងការនគរបាលខេត្តមានប្រសាសន៍ថានេះជាការ អនុវត្តទៅតាមបទបញ្ជារបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាទៅលើការលុបបំបាត់ភាពអនាធិបតេយ្យ បណ្តុំកុងត្រូលជជុះដែលធ្លាប់កើតមាននៅតាមមូលដ្ឋាន ។ សកម្មភាពនេះសមត្ថកិច្ចនឹងធ្វើយ៉ាងសកម្មបំផុតឱ្យដូចជាភ្លៀងរលឹម។ ចំពោះទីតាំងដែលសមត្ថកិច្ចរុះរើទាំងយប់នេះវាជាបណ្តុំកុងត្រូលជជុះធំៗជ្រកក្រោមស្លាកសញ្ញាសារព័ត៌មានដែលជាកាសែតមានតែឈ្មោះ ៕  |
| ប្រធានាធិបតីយេម៉ែនបណ្តេញរដ្ឋាភិបាលរបស់លោកចេញ Posted: 20 Mar 2011 08:00 PM PDT  ប្រធានាធិបតីយេម៉ែន លោកអាលីអាប់ឌុលឡាហ៍ សាឡេហ៍ កាលពីថ្ងៃទី២០ មីនា បានបណ្តេញរដ្ឋមន្ត្រីទាំងអស់របស់លោកចេញពីតំណែង ខណៈពេលការធ្វើបាតុកម្មទាមទារឱ្យលោកចុះចេញពីតំណែងមានការកើនឡើងយ៉ាងខ្លាំង ។ ការប្រកាសពីការបណ្តេញគណៈរដ្ឋមន្ត្រីចេញពីតំណែងរបស់លោកសាឡេហ៍ ធ្វើឡើងក្រោយពីបាតុករជាច្រើនម៉ឺននាក់បានចូលរួមក្នុងពិធីកាន់ទុក្ខនាពិធីបុណ្យសពបាតុករ៥២នាក់ ដែលត្រូវស្លាប់ កាលពីថ្ងៃទី១៩ មីនា កន្លងមក ដោយសារស្នាដៃរបស់កងទ័ពមានភក្តីភាពចំពោះរដ្ឋាភិបាល ។  |
| Posted: 20 Mar 2011 07:14 PM PDT ខេត្តកំពង់ស្ពឺ ៖ ចោរ៤នាក់ប្រដាប់ដោយកាំភ្លើងខ្លី១ដើម តាមប្លន់អ្នកលក់មាសនៅផ្សារកំពង់ស្ពឺដល់មុខផ្ទះយកអស់រាប់ម៉ឺនដុល្លារ កាលពីវេលាម៉ោង៥និង៣០នាទីល្ងាចថ្ងៃទី២០ មីនា ២០១១ ស្ថិតក្នុងភូមិចំបក់ ឃុំវល្លិ-ស ស្រុកសំរោងទងខាងលិចឆៀងខាងជើងវត្តចំបក់ ដោយក្រុមចោរបានបាញ់២គ្រាប់គំរាមមិនឱ្យតដៃ រួចហើយគេចខ្លួនបាត់ស្រមោលតែម្តង បន្សល់ទុកការភ័យរន្ធត់ និងយំសោកស្តាយពីសំណាក់គ្រួសាររងគ្រោះ ។ បុរសចំណាស់ម្ចាស់ទ្រព្យឈ្មោះសូ ធំ អាយុ៧៣ឆ្នាំ ប្រពន្ធឈ្មោះជា បួយ អាយុ៧២ឆ្នាំ រស់នៅភូមិ-ឃុំកើតហេតុខាងលើ និងជាអ្នកលក់មាស-ប្តូរប្រាក់នៅផ្សារកំពង់ស្ពឺ បានឱ្យដឹងថា មុនពេលកើតហេតុ ពួកគាត់២នាក់ប្តី-ប្រពន្ធ ព្រមទាំងសមាជិកគ្រួសារមានគ្នា៦នាក់ បានរៀបចំអីវ៉ាន់ពីតូបលក់មាស-ប្តូរប្រាក់ជិះរថយន្តកាមរី ធ្វើដំណើរទៅកាន់លំនៅឋាន...លុះដល់មុខផ្ទះក៏ចាក់សោចូលទៅខាងក្នុងបណ្តើរៗទៅហើយ ស្រាប់តែមានបុរស៤នាក់ជិះម៉ូតូម៉ាកឌ្រីម C125 ពណ៌ខ្មៅ ២គ្រឿង ចូលមកយ៉ាងតក់ក្រហល់បំផុត ដណ្តើមយកហិបប្រាក់ និងគ្រឿងអលង្ការ ប៉ុន្តែពួកគាត់មិនព្រមប្រគល់ឱ្យទេ ក៏ប្រតាយប្រតប់គ្នា ពេលនោះចោរម្នាក់បានដកកាំភ្លើងខ្លី១ដើមបាញ់សំដៅពួកគាត់២គ្រាប់ ប៉ុន្តែមិនត្រូវ...បន្ទាប់មកគ្មាននរណាហ៊ានតដៃជាមួយពួកចោរទេ ពួកគេក៏យកហិបដាក់ប្រាក់ និងគ្រឿងអលង្ការឡើងម៉ូតូូជិះចាកចេញយ៉ាងប្រញាប់ប្រញាល់ទៅបាត់ស្រមោល ។ បុរសម្ចាស់ផ្ទះរងគ្រោះបានឱ្យដឹងទៀតថា ក្នុងហិបនោះមានលុយខ្មែរជាង១០លានរៀលគ្រឿងអលង្ការមាស-ប្លាទីនរាប់សិបតម្លឹង សរុបទៅជាង៥ម៉ឺនដុល្លារ ។ ក្រោយពេលកើតហេតុប៉ូលិសបានចុះទៅធ្វើកំណត់ហេតុ និងស្រាវជ្រាវមុខសញ្ញាយ៉ាងញាប់ដៃ-ជើង...ម៉ូតូរបស់ពួកចោរត្រូវបានស្គាល់១គ្រឿងម៉ាកឌ្រីម C125 ពណ៌ខ្មៅ ពាក់ស្លាកលេខ ភ្នំពេញ 1AQ-3097៕  |
| Posted: 20 Mar 2011 07:03 PM PDT   ខេត្តបាត់ដំបង ៖ ខ្មាន់កាំភ្លើងដែលគេមិនទាន់ស្គាល់អត្តសញ្ញាណ មានគ្នាយ៉ាងតិច៣នាក់ត្រូវគេរាយការណ៍ថា បានលបចូលទៅបាញ់ប្រហារយ៉ាងសាហាវទៅលើប្តីប្រពន្ធនិងកូនដែលរស់នៅតំបន់ដាច់ស្រយាលមួយនៅចំណុចថ្លុកសង្កែ ស្ថិតក្នុងភូមិជ្រៃ ឃុំសិរីមានជ័យ ស្រុកសំពៅលូន កាលពីវេលារំលងអធ្រាត្រ ឈានចូលថ្ងៃទី១៩ មីនា បណ្តាលឱ្យសមាជិកគ្រួសារនេះចំនួន៣នាក់ស្លាប់និងកូនតូចម្នាក់ទៀតរងរបួស។ នៅក្នុងអំពើបាញ់ប្រហារគ្មានប្រណីនេះ ធ្វើឱ្យសង្ស័យថា កើតចេញពីរឿងពាលស៊ីពាល ព្រោះដោយសារតែបុរសដែលឃាតកបាញ់សម្លាប់នោះគឺជាមុខសញ្ញាដែលសមត្ថកិច្ចកំពុងតាមចាប់ខ្លួន ពីបទប្លន់អ្នកលក់មាសនៅផ្សារពង្រ ស្រុករលាប្អៀរ ខេត្តកំពង់ឆ្នាំង ដែលបក្សពួក៧នាក់ត្រូវបានចាប់ខ្លួនហើយ ។ លោកឈិត សេង មន្ត្រីនគរបាលផ្នែកព្រហ្មទណ្ឌស្រុកសំពៅលូន បានឱ្យដឹងថា ជនរងគ្រោះដែលរងការបាញ់ប្រហារពីសំណាក់ក្រុមខ្មាន់កាំភ្លើងនោះជាសមាជិកគ្រួសារតែមួយ ។ មន្ត្រីរូបនេះបានប្រាប់ថា អ្នកស្លាប់មានចំនួន៣នាក់ រួមមាន១-ឈ្មោះគង់ គី អាយុ៥០ឆ្នាំ ជាប្តីត្រូវបាញ់ចំនួន៣គ្រាប់ ២-ឈ្មោះពុំ ច្រិប អាយុ៤៩ឆ្នាំ ជាប្រពន្ធ ត្រូវបាញ់ចំនួន២គ្រាប់ និង៣-ឈ្មោះគង់ ចាន់ធី អាយុ១៧ឆ្នាំ ជាកូនស្រី ត្រូវចំនួន១គ្រាប់ រីឯកូនស្រីអាយុ៩ឆ្នាំ ឈ្មោះគង់ ចាន់ណា របួសស្រាល ។ ដោយឡែកម៉ូតូមួយគ្រឿងរបស់គ្រួសារនេះត្រូវក្រុមជនដៃដល់បាញ់កម្ទេចម៉ាស៊ីនចោលចំនួន៣គ្រាប់ ។ មន្ត្រីរូបនេះបន្តថា ក្រុមជនសង្ស័យរូបនេះត្រូវបានសាក្សីប្រាប់ថា មានបក្សពួកចំនួន៣នាក់ ប្រដាប់ដោយកាំភ្លើងអាកា មួយដើម ។ តាមប្រភពដដែលបញ្ជាក់ថា ក្នុងគ្រួសារអ្នកត្រូវបាញ់សម្លាប់នេះ មានកូនតូចអាយុប្រហែល២ខែ និងក្មួយស្រីឈ្មោះគង់ សុភាព អាយុ២០ឆ្នាំ បានរួចផុតពីការបាញ់ប្រហារនេះ ។ តាមការបំភ្លឺពីក្មួយស្រីដែលរួចផុតពីសេចក្តីស្លាប់ នាងគង់ សុភាព បាននិយាយថា ក្រុមគ្រួសាររបស់នាងកំពុងដេកលង់លក់ក្នុងដំណេក។ នាងនិយាយថា ខ្មាន់កាំភ្លើងបានបាញ់បន្តទៅលើប្រពន្ធខណៈគាត់ងើបស្ទុះទៅជួយ លុះពេលកូនស្រីគាត់ស្ទុះទៅអោបម្តាយ ជនដៃដល់បានបាញ់ប្រហារកូនស្រីគាត់ទៀត ។ ចំណែករូបនាងបានពួនសំងំមិនហ៊ានឱ្យឮមាត់ទេហើយក៏មិនហ៊ានចេញមុខដែរ ។ នាងគង់ សុភាព បានបញ្ជាក់ប្រាប់សមត្ថកិច្ចថា ក្រោយពីបាញ់សម្លាប់មនុស្សជាបន្តបន្ទាប់ហើយ ជនទាំងនោះបានបាញ់កម្ទេចម៉ូតូចោលមួយគ្រឿងទៀត ហើយស្រែកគំរាមរកដុតផ្ទះបំផ្លាញចោលទៀត មុនពេលចាកចេញ ។ ពួកនោះហាក់មានចរិតកាចសាហាវបំផុត ។ ក្រោយពេលបាញ់សម្លាប់មនុស្សយ៉ាងសាហាវនេះ សាក្សីដែលឃើញផ្ទាល់ភ្នែកបានបំភ្លឺប្រាប់សមត្ថកិច្ចថា គេបានឃើញមនុស្ស៣នាក់ ដើរចេញពីផ្ទះជនរងគ្រោះ ក្រោមពន្លឺព្រះចន្ទចែងចាំង ។ សាក្សីបានបញ្ជាក់ថា ក្នុងចំណោមក្រុមនេះ៣នាក់ មាន២នាក់ស្លៀកពាក់ខ្មៅប្រដាប់ដោយកាំភ្លើងអាកាមួយដើម ។ អ្នកភូមិនិយាយថា មុនពេលកើតហេតុ១ថ្ងៃ ពេលចូលរួមផឹកស៊ីគេឮជនរងគ្រោះឈ្មោះគង់ គី ពោលប្រាប់គេថា ខ្លួនធ្លាប់មានរឿងរ៉ាវកន្លងមក ហើយខ្លួនខ្លាចតែមានគេតាមសងសឹកវិញទេ លុះពេលយប់ឡើងស្រាប់តែមានរឿងនេះកើតឡើងតែម្តង។ ទាក់ទិននឹងរឿងរ៉ាវបាញ់ប្រហារដ៏កំរោលខាងលើនេះ លោកជេត វណ្ណនី ស្នងការរង និងជាប្រធានការិយាល័យកណ្តាលនគរបាលយុត្តិធម៌ ដែលបានចុះទៅដល់កន្លែងកើតហេតុ ទាំងយប់ងងឹតបានថ្លែងថា បើយោងលើការសាកសួរនិងធ្វើការស្រាវជ្រាវអស់រយៈពេលជាច្រើនម៉ោងតាមការចង្អុលបង្ហាញពីលោកស្នងការខេត្តយើងបានសន្និដ្ឋានថា អំពើបាញ់សម្លាប់មនុស្សដ៏កំរោលនេះគឺជាអំពើឃាតកម្មដែលកើតចេញពីរឿងគំនុំ ។ លោកបានបន្ថែមទៀតថា បើយោងលើសំណុំរឿងនិងឯកសារផ្សេងទៀតដែលពាក់ព័ន្ធលើឈ្មោះគង់ គី នេះ គឺលោកអាចសន្និដ្ឋានបានទៀតថា ក្រៅពីរឿងគំនុំ គឺជារឿងពាលស៊ីពាល ព្រោះជនឈ្មោះគង់ គី នេះ មានឈ្មោះជាជនសង្ស័យក្នុងបញ្ជីខ្មៅរបស់សមត្ថកិច្ច ដែលយើងតាមប្រមាញ់នាប៉ុន្មានឆ្នាំកន្លងមក ហើយ ។ ក្នុងសកម្មភាពបាញ់ប្រហាររាត្រីនោះ គ្រួសារនេះមិនមានបាត់បង់ទ្រព្យសម្បត្តិទេ សូម្បីតែម៉ូតូ១គ្រឿងក៏ត្រូវខ្មាន់កាំភ្លើងបាញ់កម្ទេចម៉ាស៊ីនចោលដែរ ។ ប្រវត្តិល្មើសដែលពាក់ព័ន្ធឈ្មោះគង់ គី លោកជេត វណ្ណនី ស្នងការរងខេត្តបានមានប្រសាសន៍ថា គ្រួសាររបស់ឈ្មោះគង់ គី នេះ មានស្រុកកំណើតនៅខេត្តពោធិ៍សាត់ ។ ជននេះ មានប្រវត្តិជាប់ពាក់ព័ន្ធបទល្មើសឧក្រិដ្ឋជាច្រើននៅខេត្តពោធិ៍សាត់ បាត់ដំបង កំពង់ឆ្នាំង និងខេត្តដទៃទៀត ។ លោកបានមានប្រសាសន៍ទៀតថា ជនឈ្មោះគង់ គី នេះ ក៏កំពុងស្ថិតក្រោមការតាមប្រមាញ់របស់សមត្ថកិច្ចខេត្តពោធិ៍សាត់ដែរ តាមដីកាចាប់ខ្លួនលេខ០៧ ចុះថ្ងៃទី៣០ មករា ឆ្នាំ២០០៨ ដោយចៅក្រមស៊ើបសួរលោកគង់ សុខុម នៃតុលាការខេត្តពោធិ៍សាត់ ពីបទប៉ុនប៉ងមនុស្សឃាតដោយចេតនា ដែលប្រព្រឹត្តកាលពីថ្ងៃទី៨ មករា ឆ្នាំ២០០៨ នៅភូមិស្រះម្កាក់ ឃុំអូរតាប៉ោង ស្រុកបាកាន ខេត្តពោធិ៍សាត់ ដែលកាលណោះឈ្មោះគីនេះ បានប្រើប្រាស់កាំភ្លើងបាញ់ទៅលើអ្នកភូមិម្នាក់ឱ្យរងរបួសធ្ងន់ ហើយពិការរហូតមកដល់សព្វថ្ងៃនេះ ។ លោកជេត វណ្ណនី បានបញ្ជាក់ថា ក្រោយពីប្រព្រឹត្តបទល្មើសមិនឈប់់ឈរនេះ ហើយដឹងថា សមត្ថកិច្ចស្ទើរគ្រប់ទីកន្លែងកំពុងតាមប្រមាញ់ ជននេះបានរត់មកសំងំលាក់ខ្លួននៅឯភូមិបឹងរុន ឃុំសំឡូត ស្រុកសំឡូត ខេត្តបាត់ដំបង ។ លុះក្រោយមកជននេះបានភៀសខ្លួនទាំងគ្រួសារមកសំងំសុខនៅតំបន់ឆ្ងាយដាច់ស្រយាលមួយកន្លែងទៀតក្នុងភូមិត្រាវជូ ឃុំសិរីមានជ័យ ស្រុកសំពៅលូន ដែលជាកន្លែងត្រូវបញ្ចប់ជីវិតខាងលើកាលពីរាត្រីថ្ងៃទី១៩ មីនា នេះ ។ ពាក់ព័ន្ធនឹងការស្លាប់របស់ឈ្មោះគង់ គី នេះ នៅឯខេត្តកំពង់ឆ្នាំង សមត្ថកិច្ចនៃខេត្តនេះ បានឱ្យដឹងដែរថា ពួកគេក៏កំពុងតាមប្រមាញ់ឈ្មោះគង់ គីនេះពីមុនមកដែរ ដែលជននេះពាក់ព័ន្ធក្នុងអំពើប្លន់ប្រដាប់អាវុធកាលពីចុងខែកុម្ភៈ កន្លងទៅនៅផ្ទះលក់មាស ប្តូរប្រាក់ ក្នុងផ្សារពង្រ ស្ថិតក្នុងឃុំពង្រ ស្រុករលាប្អៀរ ខេត្តកំពង់ឆ្នាំង ។ ក្រោយមកសមត្ថកិច្ចខេត្តកំពង់ឆ្នាំងបានស្រាវជ្រាវចាប់ខ្លួនបក្សពួកចោរប្លន់បានចំនួន៧នាក់ ដែលគេសង្ស័យថា ឈ្មោះគង់ គី នេះ ក៏មានជាប់ពាក់ព័ន្ធក្នុងអំពើប្លន់នេះដែរ ។ លោកជេត វណ្ណនី ស្នងការរងខេត្តបាត់ដំបង បានបញ្ជាក់ដែរថា កន្លងមកសមត្ថកិច្ចរបស់លោកបានប្រឹងប្រែងបំផុតដើម្បីស្វែងរកមុខសញ្ញាដ៏កាចសាហាវឈ្មោះគង់ គី នេះ ព្រោះជននេះមានឈ្មោះក្នុងបញ្ជីខ្មៅរបស់លោកយូរឆ្នាំមកហើយ ។ ប៉ុន្តែជននេះតែងផ្លាស់ទីលំនៅគឺដូរដីរហូតទើបយើងជួបការលំបាកក្នុងការស្វែងរក ។ លោកបានថ្លែងថា ការស្លាប់របស់ឈ្មោះគង់ គី ក្រោមកាណុងកាំភ្លើង បែបពាល ស៊ីពាលខាងលើនេះ គឺវាស័ក្តិសមទៅនឹងកំហុសដែលជននេះបានប្រព្រឹត្តមិនឈប់ឈរកន្លងមក ហើយអាចចាត់ទុកថា ជាការលុបឈ្មោះជននេះចេញពីបញ្ជីខ្មៅជាស្ថាពរ។ ប៉ុន្តែទាំងសមត្ថកិច្ច ទាំងប្រជាពលរដ្ឋ ទូទៅមានការសោកស្តាយនិងស្រណោះអាណិតដល់ប្រពន្ធកូនរបស់គ្រួសារដែលបាត់បង់ជីវិតក្រោមកាណុងកាំភ្លើងរបស់ជនពាល ដែលពួកគេមិនដឹងអ្វីសោះ គឺពួកគេទទួលរងគ្រោះថ្នាក់ដោយសារតែប្តីកំណាច ៕  |
| បំបែកសំណុំរឿងចោរប្លន់នាយកុយនិងប្លន់លុយក្រុមហ៊ុន Posted: 20 Mar 2011 06:57 PM PDT   រាជធានីភ្នំពេញ ៖ កម្លាំងនគរបាលការិយាល័យព្រហ្មទណ្ឌកំរិតស្រាលរាជធានីភ្នំពេញ ដែលបានខិតខំស្រាវជ្រាវទាំងថ្ងៃទាំងយប់ក្រោយពីមានសកម្មភាពប្លន់គ្រឿងអលង្ការ ប្រាក់តាមផ្ទះ ហាងកាត់សក់ យានដ្ឋានជួសជុលរថយន្ត និងតាមរថយន្តដោយប្រើរូបភាពប្លែកៗ ដើម្បីបំភ័ន្តភ្នែកសមត្ថកិច្ច លុះកាលពីយប់ថ្ងៃទី១៨ មីនា ឆ្នាំ២០១១ ជនសង្ស័យជាមេខ្លោងក្នុងអំពើប្លន់ប្រដាប់អាវុធម្នាក់ត្រូវបានក្របួចជាប់នៅលើកំណាត់ផ្លូវលេខ៨១ស្ថិតក្នុងសង្កាត់ផ្សារថ្មីទី២ ខណ្ឌដូនពេញ ខណៈពេលជននោះកំពុងជិះរថយន្តហ្ស៊ីប ព្រមទាំងដកហូតបានអាវុធខ្លីចំនួនបីដើម។ ក្រោយពីសមត្ថកិច្ចតាមប្រមាញ់បានមេខ្លោងរួមជាមួយអាវុធចំនួនបីដើមរួចមក នៅយប់ថ្ងៃដដែលបក្សពួកម្នាក់ទៀតត្រូវបានក្របួចជាប់នៅលើកំណាត់ផ្លូវមួយក្នុងសង្កាត់ស្ទឹងមានជ័យ ខណ្ឌមានជ័យ ។ ជនសង្ស័យជាមេខ្លោងឈ្មោះណិល ពិន និងម្នាក់ទៀតឈ្មោះពេជ្រ ពួកគេមានអាយុជាងម្ភៃឆ្នាំដូចគ្នា ហើយឈ្មោះពេជ្រ នេះធ្លាប់បានធ្វើសកម្មភាពប្លន់គ្រឿងអលង្ការរបស់លោកជួង ជី ហៅកុយ បានចំណែក៣.៥០០ដុល្លារ។ ដោយឡែកជនសង្ស័យឈ្មោះណិល ពិន ជាមេខ្លោងក្នុងការធ្វើសកម្មភាពប្លន់ប្រាក់ចំនួន៦ម៉ឺនដុល្លារ កាលពីថ្ងៃទី៧ កុម្ភៈ ឆ្នាំ២០១១ វេលាម៉ោង៩និង១០នាទីព្រឹក នៅលើកំណាត់វិថីព្រះសុីសុវត្ថិ សង្កាត់ស្រះចក ខណ្ឌដូនពេញ ។ ការប្លន់នេះកើតឡើងខណៈបុរសម្នាក់ជាបុគ្គលិកក្រុមហុ៊នប្រេង សាវីមុិច បើករថយន្តម៉ាកវីហ្គោ ពណ៌ទឹកប្រាក់ ពាក់ស្លាកលេខភ្នំពេញ 2K-1688 មកដល់មុខក្រុមប្រឹក្សាអភិវឌ្ឍន៍កម្ពុជា (CDC) ក៏ត្រូវជនប្រដាប់អាវុធពីរនាក់ជិះម៉ូតូសេ១២៥ ពណ៌ខ្មៅ សេ៊រី២០១០ បើកកៀររថយន្តឱ្យឈប់និងដកកាំភ្លើងខ្លីភ្ជង់គំរាមមិនឱ្យស្រែករួចបាញ់មួយគ្រាប់ព្រមទាំងវាយបំបែកកញ្ចក់ទ្វាររថយន្តខាងឆ្វេងយកស្បោងលុយរួចជិះម៉ូតូគេចបាត់។ ជនសង្ស័យរូបនេះក៏ជាអ្នកធ្វើសកម្មភាពប្លន់គ្រឿងអលង្ការពីនាយទាហានម្នាក់ដែលកំពុងអង្គុយកាត់សក់នៅក្នុងហាងមួយទល់មុខកំពង់ផែថ្មវិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ ក្នុងកំឡុងខែតុលា ឆ្នាំ២០១០ និងបាញ់គំរាមមួយគ្រាប់មុននឹងចាកចេញទៅ។ ក្នុងប្រតិបត្តិការតាមប្រមាញ់ក្រុមចោរប្លន់ប្រដាប់អាវុធខាងលើ មិនត្រូវបានសមត្ថកិច្ចឱ្យដឹង ជាផ្លូវការទេ គ្រាន់តែលួចបង្ហើបថា ចំមុខសញ្ញា៨០ភាគរយ ហើយពេលនេះកំពុងដុតដៃដុតជើង តាមចាប់បក្សពួកបន្ថែមទៀត។ ទោះបីជាយ៉ាងណា ប្រជាពលរដ្ឋបានសាទរកិច្ចខិតខំប្រឹងប្រែងរបស់នគរបាលការិយាល័យព្រហ្មទណ្ឌកំរិតស្រាលនៃស្នងការដ្ឋានរាជធានីភ្នំពេញ ដែលបានបង្រ្កាបក្រុមចោរខាងលើដោយជោគជ័យ។ មន្ត្រីសមត្ថកិច្ចជំនាញបានប្រាប់ថា សំណុំរឿងនេះមិនធម្មតាទេ ដែលសមត្ថកិច្ចបង្រ្កាបបានមេខ្លោងឈ្មោះណិល ពិន មានកាំភ្លើង រហូតដល់ទៅបីដើម ក្នុងនោះមានម៉ាកបេអាតាចំនួនពីរដើម និងម៉ាកប្រាហាមួយដើម។ ជននេះ កំពុងត្រូវបានឃាត់នៅការិយាល័យនគរបាលព្រហ្មទណ្ឌកំរិតស្រាលស្នងការដ្ឋាននគរបាលរាជធានីភ្នំពេញ ។ ទាក់ទិននឹងការបំបែកសំណុំរឿងចោរប្លន់នៅកណ្តាលរាជធានីភ្នំពេញនេះ គួរឱ្យកត់សំគាល់ថា អ្វីដែលមហាជនចាប់អារម្មណ៍នោះ គឺការប្លន់យកគ្រឿងអលង្ការនាយកុយ គិតជាប្រាក់ប្រមាណ៣ម៉ឺនដុល្លារ ដែលរហូតមកដល់ពេលនេះនាយកុយ នៅតែរំលឹកពីចោរប្លន់តាមឆាករហូតមក ។ ទាក់ទិននឹងការប្លន់លុយក្រុមហ៊ុនប្រេងសាវីម៉ិច គឺជាបញ្ហាគួរឱ្យសង្ស័យ ព្រោះក្រុមចោរតាមប្លន់លុយហាក់បីដូចជាបានដឹងយ៉ាងច្បាស់ថា រថយន្តដឹកលុយទៅធនាគារ។ ពេលនេះសមត្ថកិច្ចមិនទាន់បង្ហាញពីលទ្ធផលស្រាវជ្រាវផ្លូវការនៅឡើយទេ ៕  |
| រន្ទះសាហាវបាញ់សម្លាប់ម្នាក់ និងដួលសន្លប់២នាក់ផ្សេងទៀត ខណៈផ្ទៃមេឃរកកល់ភ្លៀង Posted: 20 Mar 2011 06:47 PM PDT  ខេត្តព្រះសីហនុ ៖ បុរសម្នាក់ស្លាប់ និងពីរនាក់ផ្សេងទៀត សន្លប់មួយសន្ទុះធំស្ទើរតែអស់ជីវិតព្រោះតែជួបឧប្បត្តិហេតុគ្រោះធម្មជាតិរន្ទះបាញ់ ក្នុងខណៈពេលដែលផ្ទៃមេឃកំពុងរកកលចង់ភ្លៀង។ រីឯអ្នករងគ្រោះទាំងនោះខ្លះកំពុងដេកក្រោមផ្ទះ ឯខ្លះទៀតកំពុងឈរជជែកគ្នាតាមបណ្តោយផ្លូវលំកណ្តាលវាល។ ហេតុការណ៍ដែលគួរឱ្យសោកសង្រេងនេះ បានកើតមានឡើងកាលពីថ្ងៃទី១៩ មីនា វេលាម៉ោង៣និង១០នាទីរសៀល នៅចំណុចក្រុម៣ ភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។ លោកអនុសេនីយ៏ទោកែវ អននាយប៉ុស្តិ៍ រដ្ឋបាលឃុំជើងគោបានប្រាប់ឱ្យដឹងនៅនឹងកន្លែងកើតហេតុថា ជនរងគ្រោះក្នុងហេតុការណ៍នេះ ១-ឈ្មោះឈួន សំបឿន ភេទប្រុស អាយុ២៥ឆ្នាំ ត្រូវរន្ទះបាញ់ស្លាប់នៅនឹងកន្លែងដែលកំពុងឈរជជែកគ្នា ២-ឈ្មោះលន់ មុំ ភេទស្រី អាយុ៣៤ឆ្នាំ ដែលឈរជជែកគ្នាបណ្តើរជាមួយជនរងគ្រោះទីមួយត្រូវចំហាយរន្ទះបណ្តាលឱ្យសន្លប់ជាង១ម៉ោង ៣-ឈ្មោះហុង ផាត់ ភេទប្រុស អាយុ៦៤ឆ្នាំ កំពុងសំរាកលើគ្រែក្រោមផ្ទះដែលមានចំងាយប្រមាណប្រហែលជាង១០០ម៉ែត្រ ពីជនរងគ្រោះទី១ និងទី២ បណ្តាលឱ្យសន្លប់មួយសន្ទុះដែរ។ ចំណែកសសរផ្ទះមួយដើមប្រេះជាពីរនិងដំបូលផ្ទះបាយប្រក់ស្លឹកដូងបណ្តាលឱ្យឆេះ តែត្រូវបានពន្លត់ទាន់ពេល។ លោកអនុសេនីយ៍ទោបានឱ្យដឹងទៀតថា ក្នុងឃុំជើងគោឆ្នាំនេះមានអ្នកស្លាប់ ដោយសារបាតុភូតធម្មជាតិ គឺរន្ទះបាញ់មានចំនួនពីរនាក់ និងពីរនាក់ទៀត របួស។ ចំពោះស្រុកព្រៃនប់ ទាំងមូលក្នុងឆ្នាំនេះជនរងគ្រោះដោយសាររន្ទះបាញ់មានចំនួន៥នាក់ស្លាប់ និងពីរនាក់របួស។ សូមបព្ជាក់ថា បាតុភូតធម្មជាតិរន្ទះបាញ់ដែលកើតឡើងក្នុងស្រុកព្រៃនប់ ឆ្នាំនេះមានសភាពកាចសាហាវជាងឆ្នាំមុន។ តាមការកត់សំគាល់ឆ្នាំនេះមានពេលខ្លះ ខុសត្រូវគ្នាតែមួយនាទី មានរន្ទះបាញ់ចំនួនពីរកន្លែងផ្សេងៗគ្នា ហើយបណ្តាលឱ្យស្លាប់មនុស្សជាបន្តបន្ទាប់ដែលអ្នកព្រៃនប់ ភ័យខ្លាចណាស់ពេលមានមេឃរកភ្លៀងម្តងៗ ៕  |
| ទាហានសៀមឈុតខ្មៅយកលួសបន្លាមកពង្រាយមុខប៉ុសិ៍្តប៉ូលិសកម្ពុជា Posted: 20 Mar 2011 06:44 PM PDT ខេត្តព្រះវិហារ ៖ តាមប្រភពព័ត៌មានពីតំបន់ប្រាសាទព្រះវិហារនាថ្ងៃទី២០ មីនា បានឱ្យដឹងថា ពួកទាហានឈុតខ្មៅសៀម៧នាក់កាលពីវេលាម៉ោងជាង៨ព្រឹក បានធ្វើការដាក់ពង្រាយលួសបន្លានៅមុខប៉ុស្តិ៍ប៉ូលិសកម្ពុជា ស្ថិតនៅមាត់ច្រកខ្លោងទ្វារដែកមុខប្រាសាទព្រះវិហារ ។ ប្រភពព័ត៌មានដដែលបន្តថា ការពង្រាយនេះ ខាងកម្ពុជាបានមានប្រតិកម្មយ៉ាងខ្លាំងចំពោះទង្វើរបស់ទាហានឈុតខ្មៅសៀមនេះដោយតម្រូវឱ្យពួកគេរុះរើចេញវិញ តែពួកទាហានសៀមនេះអត់រុះរើទេ ដោយគ្រាន់តែបានផ្អាកការពង្រាយលួសបន្លានេះតទៅទៀត ខណៈពួកគេពង្រាយបានប្រវែង៦០ម៉ែត្រ ។ នៅវេលាម៉ោង១រសៀល កងទ័ពកម្ពុជាបានប្រកាសថា បើពួកគេមិនបញ្ឈប់ទេ នឹងមានការផ្ទុះអាវុធ ហើយចំពោះមូលហេតុដែលពួកទាហាសៀមឈុតខ្មៅយកលួសបន្លាមកពង្រាយនេះពួកគេបានត្រឹមតែនិយាយថា មេប្រើឱ្យមកពង្រាយ។ យោងតាមប្រភពព័ត៌មាននេះបង្ហាញថា ពួកសៀមនៅមិនសុខនោះទេ ក្នុងការរុកកួនម្តងហើយម្តងទៀតតាមខ្សែបន្ទាត់ព្រំដែន ទោះបីបានសន្យាគ្នាច្រើនដងមកហើយក្តី ខណៈក្រុមអ្នកសង្កេតការណ៍ឥណ្ឌូណេស៊ីនៅមិនទាន់ត្រូវបានបញ្ជូនមកនោះ ៕  |
| វាយសម្លាប់យាយអាយុ៦៦ឆ្នាំ ក្នុងចំការល្មុតប្លន់យកមាស៥ជី និងប្រាក់១៥០ដុល្លារកណ្តាលថ្ងៃ Posted: 20 Mar 2011 06:13 PM PDT  ខេត្តកណ្តាល ៖ លោកយាយឈ្មោះលាន លឹម អាយុ៦៦ឆ្នាំ ត្រូវជនមិនស្គាល់មុខវាយសម្លាប់ប្លន់យកមាសអស់៥ជី ប្រាក់អាមេរិកចំនួន១៥០ដុល្លារ និងប្រាក់រៀលមួយចំនួនពី ក្នុងហោប៉ៅអាវ ខណៈគាត់ទៅបេះផ្លែល្មុតនៅដីចំការតែម្នាក់ឯងឆ្ងាយពីផ្ទះ។ ដំបូងលោកយាយត្រូវគេប្រទះឃើញដេកសន្លប់នៅក្បែរចំការល្មុតរបស់គាត់កាលពីវេលាម៉ោង៤រសៀល ថ្ងៃទី១៩ ខែមីនា នៅភូមិស្វាយកណ្តាល ឃុំព្រែកថ្មី ស្រុកកោះធំ ខេត្តកណ្តាល។ នៅលើខ្លួនលោកយាយមានស្នាមជាំខ្មៅជាច្រើនកន្លែងដែលជនមិនស្គាល់មុខបានវាយនឹងវត្ថុរឹង។ ក្រោយពីប្រទះឃើញត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកស្រុកកោះធំ ប៉ុន្តែប៉ុន្មានម៉ោងក្រោយមកលោកយាយបានស្លាប់ដោយសាររបួសធ្ងន់ធ្ងរពេក។ លោកតាឌុក ឆែម អាយុ៧៣ឆ្នាំ ជាប្តីលោកយាយរងគ្រោះបានប្រាប់ឱ្យដឹងថា ក្រោយពីប្រទះឃើញប្រពន្ធគាត់ដេកសន្លប់នៅក្នុងចំការល្មុត និងមានស្នាមជាំលើខ្លួនផងនោះ ក្រុមគ្រួសារកូនចៅឆែកលើខ្លួន បាត់អស់មាសចំនួន៥ជី គឺខ្សែ.កមួយខ្សែទម្ងន់៣ជី និងចិញ្ចៀនមួយវង់ទម្ងន់២ជី ប្រាក់ដុល្លារចំនួន១៥០ដុល្លារ និងប្រាក់រៀលមួយចំនួនទៀតដែលតែងតែរក្សាទុកនៅក្នុងហោប៉ៅអាវក្នុងរបស់គាត់ជាប្រចាំ។ លោកតាឌុក ឆែម ជាប្តីបានឱ្យដឹងទៀតថា បន្ទាប់ពីហូបបាយថ្ងៃត្រង់ហើយ វេលាម៉ោងជាង១២ប្រពន្ធគាត់បានរៀបចំខ្លួនជិះកង់ទៅបេះល្មុតនៅចំការខាងក្រោយភូមិចម្ងាយប្រហែលជាងមួយគីឡូម៉ែត្រពីផ្ទះ។ រហូតដល់ម៉ោង៤រសៀលថ្ងៃដដែលក្មេងត្រឡប់មកពីឃ្វាលគោប្រទះឃើញប្រពន្ធគាត់ដេកសន្លប់នៅក្បែរដីចំការល្មុត ក៏រត់មកប្រាប់ក្រុមគ្រួសារឱ្យដឹង។ ពេលនាំគ្នាទៅមើលឃើញប្រពន្ធគាត់ដេកសន្លប់នៅក្បែរកង់ដែលមានផ្លែល្មុតច្រកបាវរឹតជាប់រានកង់ផ្អែកជាប់ដើមឈើនៅជាប់ចំការល្មុត។ សមត្ថកិច្ចសន្និដ្ឋានថា ជនល្មើសជនធ្វើសកម្មភាពវាយប្លន់ ខណៈជនរងគ្រោះបេះល្មុតបានហើយរៀបចំមកផ្ទះវិញ។ ក្រោយពីបញ្ជូនមកដល់មន្ទីរពេទ្យជនរងគ្រោះសន្លប់បាត់ស្មារតីរហូត ហើយបានស្លាប់នៅយប់ថ្ងៃដដែល។ ក្រុមគ្រួសារបានព្យាយាមរកមើលលើខ្លួនជនរងគ្រោះ តែរកមិនឃើញខ្សែ.កមាសទម្ងន់៣ជី និងចិញ្ចៀនទម្ងន់២ជី ប្រាក់ដុល្លារ១៥០ដុល្លារ និងប្រាក់រៀលមិនតិចជាង៧ម៉ឺនរៀលដែលគាត់តែងតែដាក់ជាប់តាមខ្លួនជាប្រចាំក្នុងហោប៉ៅអាវក្នុង។ នៅព្រឹកថ្ងៃទី២០ ខែមីនា ប៉ូលិសបច្ចេកទេសខេត្ត និងស្រុកទៅពិនិត្យធ្វើកោសល្យវិច័យលើសាកសពឃើញមានស្នាមជាំជាច្រើនកន្លែងលើខ្លួនជនរងគ្រោះដែលសន្និដ្ឋានថា ត្រូវគេវាយនឹងវត្ថុរឹង ហើយអាវជនរងគ្រោះមានស្នាមដាច់រហែកផងដែរ ទំនងជាមុនពេលកើតហេតុនោះមានការប្រតាយប្រតប់គ្នាផងដែរទើបវាយនឹងវត្ថុរឹងជាក្រោយ។ ក្រោយពីពិនិត្យចប់សាកសពត្រូវបានប្រគល់ទៅឱ្យក្រុមគ្រួសារធ្វើបុណ្យតាមប្រពៃណី ហើយសមត្ថកិច្ចកំពុងស្រាវជ្រាវរកមុខឃាតក ៕  |
| អាជ្ញាធរខណ្ឌមានជ័យ ចុះបង្ក្រាបសង្វៀនបញ្ជល់មាន់ Posted: 20 Mar 2011 03:56 AM PDT    រាជធានីភ្នំពេញ ៖ សង្វៀនបញ្ជល់មាន់ដ៏ធំមួយកន្លែងស្ថិតនៅភូមិចំរើនផល សង្កាត់បឹងទំពុន ខណ្ឌមានជ័យ ត្រូវសមត្ថកិច្ច និងអាជ្ញាធរមូលដ្ឋានដឹកនាំដោយលោកគួច ចំរើន អភិបាលខណ្ឌមានជ័យ លោកហៀក ចាន់លាង អភិបាលរងខណ្ឌ និងលោកហ៊ី ណារិន អធិការនគរបាលខណ្ឌចុះឡោមព័ទ្ធបង្ក្រាបជាក់ស្តែង កាលពីព្រឹកថ្ងៃទី២០ មីនា ខណៈដែលក្រុមអ្នកញៀនល្បែងស៊ីសងតាមរយៈការភ្នាល់មាន់ជល់កំពុងនាំគ្នាភ្នាល់ឈ្នះ-ចាញ់ដាក់លុយ ។ ក្នុងប្រតិបត្តិការខាងលើនេះ សមត្ថកិច្ចបានដកយកមាន់គកសម្រាប់ផ្គូផ្គងឱ្យជល់គ្នាដាក់លុយបានចំនួន៩ក្បាល និងឃាត់ខ្លួនមនុស្សចំនួន១៥នាក់ រួមទាំងដកហូតបានប្រាក់រៀល និងលុយដុល្លារមួយចំនួនពីក្រុមអ្នកភ្នាល់មាន់ជល់ខាងលើ ។ ក្នុងសកម្មភាពនោះក៏មានលោកព្រះរាជអាជ្ញារងនៃសាលាដំបូងរាជធានីភ្នំពេញ ដឹកនាំចូលរួមបង្ក្រាបទីតាំងល្បែងភ្នាល់ខាងលើនេះផងដែរ ។ ក្រោយប្រតិបត្តិការសមត្ថកិច្ចចម្រុះក្នុងខណ្ឌមានជ័យ បានប្រមូលទាំងមនុស្ស និងមាន់គក ព្រមទាំងថវិកាបញ្ជូនមកកាន់អធិការដ្ឋាននគរបាលខណ្ឌមានជ័យ ។ លោកហ៊ី ណារិន អធិការនគរបាលខណ្ឌមានជ័យ បានប្រាប់អ្នកយកព័ត៌មានកោះសន្តិភាពតាមទូរស័ព្ទថា ការបង្ក្រាបទីតាំងសង្វៀនជល់មាន់ខាងលើនេះ គឺសមត្ថកិច្ចត្រូវកសាងសំណុំរឿងបញ្ជូនទាំងមនុស្ស និងវត្ថុតាងទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ ប្រភពព័ត៌មានមួយទៀតបានឱ្យដឹងថា ទីតាំងសង្វៀនជល់មាន់ខាងលើនេះ ទើបនឹងលួចលាក់ធ្វើសកម្មភាព កាលពីពេលថ្មីៗនេះប៉ុណ្ណោះ ។ ដោយឡែកប្រតិបត្តិការចុះបង្ក្រាបគឺ ដោយសារមន្ត្រីមូលដ្ឋានបានទទួលព័ត៌មានរាយការណ៍ពីប្រជាពលរដ្ឋអំពីភាពអនាធិបតេយ្យនៅក្នុងទីតាំងសង្វៀនជល់មាន់ខាងលើនេះ ។ បន្ទាប់ពីទទួលបានព័ត៌មានភ្លាមលោកហៀក ចាន់លាង អភិបាលរងខណ្ឌមានជ័យ ដឹកនាំកម្លាំងស៊ីវិលចុះពិនិត្យជាក់ស្តែងក៏ឃើញមានសកម្មភាពល្មើសពិតប្រាកដមែន ទើបឈានទៅធ្វើការបង្ក្រាបជាទ្រុងទ្រាយធំតែម្តង ។ លោកគួច ចំរើន អភិបាលខណ្ឌមានជ័យ បានឱ្យដឹងថា ការបង្ក្រាបទីតាំងសង្វៀនបញ្ជល់មាន់ខាងលើនេះ ក៏ជាការលុបបំបាត់ល្បែងភ្នាក់មួយដែរ ដែលជាការចូលរួមក្នុងសកម្មភាពអនុវត្តគោលនយោបាយភូមិ-សង្កាត់មានសុវត្ថិភាពដែលមានលក្ខណៈសម្បត្តិ ៥យ៉ាងគឺ១-គ្មានសកម្មភាព លួច ឆក់ ប្លន់គ្រប់ប្រភេទ ២-គ្មានការផលិត ការចែកចាយ និងប្រើប្រាស់គ្រឿងញៀន ខុសច្បាប់ ៣-គ្មានអំពើអនាចារ ការជួញដូរស្ត្រី កុមារ និងអំពើហិង្សាក្នុងគ្រួសារ ៤-គ្មានក្មេងទំនើង និង៥-គ្មានការលេងល្បែងស៊ីសង ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ ។ គួរបញ្ជាក់ផងដែរថា ជានិច្ចកាលលោកគួច ចំរើន អភិបាលខណ្ឌមានជ័យ តែងតែដឹកនាំគណៈបញ្ជាការឯកភាពក្នុងខណ្ឌចុះបង្ក្រាបបទល្មើសផ្សេងៗមិនថា យប់អធ្រាត្រ ឬក៏ថ្ងៃអាទិត្យ ឈប់សម្រាកពីការងារឡើយ ។ ចំពោះសកម្មភាពនេះហើយទើបស័ក្តិសមជាភ្នែកច្រមុះរបស់រាជរដ្ឋាភិបាលក្រោមការដឹកនាំ របស់សម្តេចតេជោ ហ៊ុន សែន នាយករដ្ឋមន្ត្រី ៕  |
| ពីរនាក់ឪពុក និងកូនឃើញនាងក្រមុំដើរម្នាក់ឯងនិយាយលែបខាយក្លាយជាហិង្សា Posted: 20 Mar 2011 03:45 AM PDT  រាជធានីភ្នំពេញ ៖ បុរសពីរនាក់ឪពុក និងកូនត្រូវបានកម្លាំងប៉ូលិសប៉ុស្តិ៍រដ្ឋបាលកាកាប ធ្វើការឃាត់ខ្លួនបញ្ជូនទៅកាន់ផ្នែកព្រហ្មទណ្ឌខណ្ឌដង្កោ ដើម្បីកសាងសំណុំរឿងបញ្ជូនទៅតុលាការ បន្ទាប់ពីពួកគេធ្វើសកម្មភាពកាប់ប្រហារទៅលើបុរសម្នាក់ទៀតបណ្តាលឱ្យរងរបួសយ៉ាងធ្ងន់ធ្ងរ ស្ទើរស្លាប់ស្ទើររស់ ។ ហេតុការណ៍នោះបានកើតឡើងកាលពីវេលាម៉ោង១០យប់ ថ្ងៃទី១៩ មីនា ឆ្នាំ២០១១ នៅចំណុចផ្ទះជួលក្រុមទី៨ ភូមិចំការឪឡឹក សង្កាត់កាកាប ខណ្ឌដង្កោ រាជធានីភ្នំពេញ ។ ជនដៃដល់ទាំងពីរនាក់នោះ ឪពុកឈ្មោះឆាង សុភាព អាយុ៥០ឆ្នាំ ជាសន្តិសុខឯកជន ឯកូនប្រុសឈ្មោះឆាង សាម៉ុន អាយុ១៩ឆ្នាំ ជាកម្មករសំណង់ ពួកគេទាំងពីរនាក់ស្នាក់នៅផ្ទះជួលកើតហេតុខាងលើ ។ ចំណែកឯជនរងគ្រោះឈ្មោះចៀវ ពុទ្ធី អាយុ២៥ឆ្នាំ ជាកម្មករសំណង់ ស្នាក់នៅផ្ទះជួលខាងលើដែរ រងរបួសរយះក្បាលខាងឆ្វេងសន្លប់បាត់ស្មារតី ហើយភ្លាមៗត្រូវគេបញ្ជូនទៅកាន់មន្ទីរពេទ្យព្រះកុសុមៈ តែដោយស្ថានភាពរបួសធ្ងន់ធ្ងរពេកទើបគេបញ្ជូនបន្តទៅកាន់មន្ទីរពេទ្យកាល់ម៉ែត ។ តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះអង្គុយលេងជាមួយបុរសម្នាក់ទៀតដែលជាបងប្អូនជីដូនមួយនៅមុខបន្ទប់ផ្ទះជួលខាងលើ ។ ចំណែកឯជនដៃដល់ឈ្មោះឆាង សាម៉ុន ក៏អង្គុយនៅមុខបន្ទប់ផ្ទះជួលរបស់ខ្លួនដែរ លុះមួយសន្ទុះក្រោយមកប្អូនស្រីជីដូនមួយរបស់ជនរងគ្រោះបានដើរកាត់មុខផ្ទះជនដៃដល់ ជននោះក៏បាននិយាយលែបខាយនូវពាក្យអសុរោះថា «ដល់កហើយមើលមេនេះគូទ.ងបះដល់ហើយវើយ» ។ ប្រភពដដែលបានបន្តថា ពេលឮបែបនេះបានធ្វើឱ្យនាងក្រមុំរូបនោះខ្មាសអៀន និងខឹងយ៉ាងខ្លាំង ចំណែកឯជនរងគ្រោះ និងបងប្អូនជីដូនមួយម្នាក់ដែលអង្គុយនៅជាមួយគ្នានោះបានយករឿងនេះទៅប្រាប់ស្ត្រីជាម្តាយរបស់នាងក្រមុំរូបនោះឱ្យដឹង។ ភ្លាមៗនោះស្ត្រីជាម្តាយបានដើរទៅសួរនាំជននោះ ឯជនរងគ្រោះក៏បានដើរទៅជាមួយដែរ ពេលទៅដល់ក៏បានសួរនាំឈ្មោះឆាង សាមុន ពីរឿងនិយាយពាក្យអសុរោះដាក់ប្អូនស្រីជីដូនមួយរបស់ខ្លួន។ ខណៈនោះជនដៃដល់អត់បាននិយាយឆ្លើយតបនោះទេ តែគេបានទាញកាំបិតប៉័ងតោមកកាប់ប្រហារទៅលើជនរងគ្រោះ បណ្តាលឱ្យដួលសន្លប់នៅនៅនឹងកន្លែងតែម្តង និងបង្កការភ្ញាក់ផ្អើលយ៉ាងខ្លាំង ។ ប្រភពដដែលបានបន្តទៀតថា ដោយឡែកបុរសជាឪពុកជននោះពេលឃើញបែបនេះ អត់ចាប់ឃាត់កូនទេ បែរជាទាញពូថៅប្រុងស្ទុះទៅកាប់បងប្អូនជនរងគ្រោះទៅវិញ។ ប៉ុន្តែដោយសារតែការភ្ញាក់ផ្អើលកាន់តែខ្លាំង ទើបជននោះបញ្ឈប់សកម្មភាពរបស់ខ្លួន ហើយក្រោយមកប៉ូលិសប៉ុស្តិ៍កាកាបបានចុះទៅឃាត់ខ្លួនពួកគេទាំងពីរនាក់ឪពុក និងកូនភ្លាមៗតែម្តង ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
