Koh Santipheap Daily |
- កូនកណ្តុរបៅដោះមេឆ្មាជារឿងចម្លែកនៅប្រទេសថៃ
- បុរសដែលខឹងប្រពន្ធមិនមកផ្ទះ រឿងម៉ឹមអេង លេបថ្នាំពុលសម្លាប់ខ្លួននោះបានស្លាប់ហើយ
- វាយប្រហារតាមអាកាសរបស់ពួកលោកខាងលិចស្លាប់ជនស៊ីវិល100នាក់បាញ់ធ្លាក់យន្តហោះលីប៊ីមួយ
- មន្ត្រីបសុព្យាបាលអត់ច្បាប់អនុញ្ញាតដាក់កុងត្រូលចាំចាប់រថយន្តដឹកគោ
- សហគមន៍អឺរ៉ុបទទូចឱ្យរារាំងលោកដាកាហ្វី កុំឱ្យទទួលបានប្រាក់ចំណូលពីប្រេង និងឧស្ម័ន
- អង្គការអូតង់ទទួលយកការបញ្ជាលើតំបន់ហាមហោះហើរនៅលីប៊ី
- រញ្ជួយព្រះធរណី2 ក្នុងនោះមួយមានកម្រិត7រីស្ទ័រនៅភូមាញ័ររង្គើដល់ក្រុងបាងកក ចិន និងវៀតណាម
- អាជ្ញាធរអប្សរាព្រមានប្តឹងមន្ត្រីយោធាពីបទប្រើកម្លាំងរារាំងប្រតិបត្តិការរុះរើសំណង់ខុសច្បាប់
- គ្រួសារអតីតយុទ្ធជនពិការដែលស្លាប់សុំប្រាក់គោលនយោបាយមន្រ្តីសន្យាថាសប្តាហ៍ក្រោយប្រគល់ប្រាក់ឱ្យហើយ
- អណ្តើកចម្លែកនៅតំបន់កន្ទុយនាគឈ្មួញវៀតណាមកំពុងតថ្លៃខ្ពស់
- យុទ្ធនាការបង្ក្រាបជំនួញឈើប្រណីតកក្រើកច្រើនខេត្ត
- គ្រូទាយមើលនិស្ស័យឆ្លងទ្វីប តុលាការកាត់ទោសដាក់គុក១២ឆ្នាំ និងបង់ប្រាក់ចំនួន២៤លានរៀល
- មន្ត្រីការទូតស៊ុយអែតចាប់អារម្មណ៍ពីសក្តានុពលទេសចរណ៍នៃប្រទេសកម្ពុជា
- រកការងារធ្វើនៅក្រៅប្រទេសដោយខុសច្បាប់ងាយទទួលរងដោយហានិភ័យ
- ជិះម៉ូតូទៅចូលរួមពិធីបុណ្យ ត្រូវរថយន្តកាមរីបុកស្លាប់
- ឈាមស្រែកស្បែកហៅចាប់បានជនសង្ស័យបក្សពួកចោរប្លន់សម្លាប់នៅត្រាំកក់
- រថយន្តស្តារិចបង្កប់ឈើប្រណីតប្រុងលោតឆត្រទៅព្រំដែនវៀតណាម
- អាជ្ញាធរវាយកំទេចផ្ទះថ្មជាន់ទី២ដែលសាងសង់គ្មានច្បាប់តាមបណ្តឹងអ្នកជាន់ក្រោម
- តុលាការបិទផ្ទះសំណាក់ម៉ីហួរក្នុងខណ្ឌដូនពេញ
| កូនកណ្តុរបៅដោះមេឆ្មាជារឿងចម្លែកនៅប្រទេសថៃ Posted: 25 Mar 2011 12:16 AM PDT  ចាត់ទុកថា ជារឿងចម្លែកមួយដែលមិនធ្លាប់កើតមានដោយមេឆ្មាមួយក្បាលបានផ្តល់ទឹកដោះដល់កូនកណ្តុរប្រៀបដូចជាកូនបង្កើត ។ កូនកណ្តុរនោះកើតមកគ្មានមេបៅដោះទេ តែមានសំណាងល្អ ដែលឆ្មាធ្លាប់ជាសត្រូវរបស់កណ្តុរជួយចិញ្ចឹមបីបាច់ និងឱ្យបៅដោះប្រៀបដូចកូនរបស់ខ្លួន ។ ហេតុការណ៍ចម្លែកនេះកើតឡើងនៅក្នុងឃុំបាងហួសឿ ស្រុកព្រះប្រឌែង ខេត្តសាមុតប្រាកាន ប្រទេសថៃ ។ ម្ចាស់ឆ្មានោះ គឺអ្នកស្រីស៊ុមពង្ស គូចារើនអាយុ៥០ឆ្នាំ ។ គាត់ប្រាប់ថា មេឆ្មារបស់គាត់អាយុ២ឆ្នាំ ហើយវាផ្តល់ទឹកដោះដល់កូនឆ្មាទើបនឹងកើត ។ កូនកណ្តុរអាយុ១សបា្តហ៍បានដេកបៅដោះមេឆ្មាធ្វើឱ្យអ្នកស្រុកនាំគ្នាផ្អើលទៅមើល ។ អ្នកស្រីស៊ុមពង្សបញ្ជាក់ថា មេឆ្មាមួយក្បាលនេះ អាយុ២ឆ្នាំ គាត់សុំពីអ្នកជិតខាងមកចិញ្ចឹម ចាប់តាំងពីទើបកើតមក ។ នៅថ្ងៃទី១ មីនា វាបង្កើតបានកូន៣ក្បាល ហើយមានអ្នកស្រុកសុំកូន២ក្បាលទៅចិញ្ចឹម ។ អ្នកស្រីបន្តទៀតថា «រយៈពេល១សបា្តហ៍មុននេះ គាត់ឃើញឆ្មារបស់គាត់ទៅពាំកូនកណ្តុរ ទើបកើតពណ៌ក្រហមមកឱ្យកូនវាស៊ីជាចំណី ប៉ុន្តែកូនវាមិនស៊ីទេ ។ ហេតុដូច្នេះហើយ មេឆ្មាបណ្តោយឱ្យកូនកណ្តុរដេកជាមួយកូនវា និងយល់ព្រមឱ្យកូនកណ្តុរបឺតទឹកដោះវាតែម្តង ៕  |
| បុរសដែលខឹងប្រពន្ធមិនមកផ្ទះ រឿងម៉ឹមអេង លេបថ្នាំពុលសម្លាប់ខ្លួននោះបានស្លាប់ហើយ Posted: 25 Mar 2011 12:12 AM PDT  ខេត្តស្វាយរៀង ៖ បុរសដែលលេបថ្នាំពុលប៉ុនប៉ងសម្លាប់ខ្លួន ដោយសារតែខឹងប្រពន្ធមិនមកផ្ទះ ពាក់ព័ន្ធនឹងរឿងម៉ឹមអេងនោះបានស្លាប់ហើយ កាលពីវេលាម៉ោង៩ព្រឹកថ្ងៃទី២៤ មីនា ២០១១ ពីព្រោះជាតិពុលបានជ្រាបសព្វប្រាណ និងចូលដល់បេះដូងទៅហើយ ម្យ៉ាងទៀតហួសលទ្ធភាពដែលគ្រូពេទ្យព្យាបាល។ សូមរំលឹកថា បុរសម្នាក់តូចចិត្តដ្បិតប្រពន្ធមិនឱ្យម៉ឹមអេងផឹកថ្នាំពុលសម្លាប់ខ្លួន កាលពីថ្ងៃទី២៣ មីនា ២០១១ វេលាម៉ោង៣និង៣០នាទីរសៀលនៅភូមិស្វាយតាភ្ល ឃុំបាសាក់ ស្រុកស្វាយជ្រំ ។ជនធ្វើអត្តឃាតឈ្មោះគង់ ថាវី អាយុ២២ឆ្នាំ មានទីលំនៅភូមិ-ឃុំកើតហេតុខាងលើ ។ បើតាមស្ត្រីម្នាក់ឈ្មោះដក់ សារួន អាយុ៤៨ឆ្នាំ ត្រូវជាបងថ្លៃ បានប្រាប់កោះសន្តិភាពថា បុរសគិតខ្លីគង់ ថាវី នេះមានប្រពន្ធឈ្មោះត្រប់ អាយុ២៣ឆ្នាំ ជាកម្មការិនីរោងចក្រកាត់ដេរ ស្ថិតនៅភូមិសាមគ្គី សង្កាត់ស្វាយតឿ ក្រុងស្វាយរៀង ។ កាលពីវេលាម៉ោង៥ល្ងាច បុរសជាប្តីបានជិះម៉ូតូទៅទទួលប្រពន្ធពីរោងចក្រឌុបត្រឡប់មកផ្ទះវិញ លុះដល់ភូមិសាលារៀន ឃុំបាសាក់ ប្រពន្ធឱ្យប្តីឌុបចូលលេងផ្ទះម្តាយ ពេលនោះប្តីនិយាយថា កុំអី...ប្រញាប់ទៅផ្ទះយើងវិញ ព្រោះបងឃ្លានម៉ឹម! ពេលនោះប្រពន្ធនិយាយថា ចូលផ្ទះម្តាយតែមួយភ្លែតទេ ...ប្តីក៏យល់ព្រម ពេលអង្គុយលេងបានមួយស្របក់ ប្តីក៏និយាយតឿនប្រពន្ធទៀតថា ប៉ុណ្ណឹងបានហើយប្រញាប់ទៅផ្ទះ ផ្ទះគ្មានអ្នកណានៅទេ ។ កូនយើង បងផ្ញើបងស្រីឱ្យមើលប្រញាប់ទៅ បងឃ្លានម៉ឹម ។ ទំនងជាប្រពន្ធស្តាប់ច្រឡំ ឬក៏ប្តីនិយាយច្រឡំក៏មិនដឹង?...ប៉ុន្តែសម្រាប់ប្រពន្ធវិញឮថា ប្តីនិយាយឃ្លានម៉ឹម ទើបមិនព្រមត្រឡប់ទៅផ្ទះជាមួយប្តី ខ្លាចប្តីម៉ឹមៗ... រួចធ្វើអ្វីៗទៀត... ម្យ៉ាងនាងកំពុងអស់កម្លាំងចេញពីធ្វើការរោងចក្រផង ក៏តម្អក់មិនទៅជាមួយប្តី ។ ការពិតនាងមានកូនតូចអាយុ៥ខែ នៅឯផ្ទះ ប្រពន្ធទៅធ្វើការរោងចក្រទុកកូនតូចឱ្យប្តីមើលនៅផ្ទះ កូនតូចម៉ឹមដោះម្តាយបានតែពេលព្រឹក និងពេលល្ងាចប៉ុណ្ណោះ ទើបកូនឃ្លានម៉ឹម តែដោយសារប្រពន្ធយល់ច្រឡំ ឬក៏ប្តីចង់ម៉ឹមមែន ទែន ក៏មិនដឹង? ទើបមិនព្រមត្រឡប់ទៅផ្ទះជាមួយប្តី ។ បុរសជាប្តីបានជិះម៉ូតូត្រឡប់ទៅផ្ទះវិញម្នាក់ឯង ហើយផ្ទះម្តាយ និងផ្ទះខាងប្តីនេះនៅចម្ងាយ២គីឡូម៉ែត្រពីគ្នា ពេលបុរសជាប្តីទៅដល់ផ្ទះអង្គុយតូចចិត្តនឹងប្រពន្ធមិនព្រមត្រឡប់មកផ្ទះជាមួយខ្លួន ក៏គិតខ្លីយកថ្នាំបំពុលសត្វល្អិតបាញ់ស្រូវផឹកអស់ជិតកន្លះដប ធ្វើឱ្យប្រកាច់បែកពពុះមាត់សន្លប់ឈឹងតែម្តង...ឥឡូវកំពុងសង្គ្រោះបន្ទាន់នៅមន្ទីរពេទ្យខេត្ត ៕  |
| វាយប្រហារតាមអាកាសរបស់ពួកលោកខាងលិចស្លាប់ជនស៊ីវិល100នាក់បាញ់ធ្លាក់យន្តហោះលីប៊ីមួយ Posted: 24 Mar 2011 11:48 PM PDT កងយន្តហោះចម្បាំងលោកខាងលិចនៅពុំទាន់អាចរារាំងកងរថក្រោះរបស់កងទ័ពលោកមូអាម៉ា កាដាហ្វី មិនឱ្យវាយប្រហារទីក្រុងជាច្រើនរបស់ពួកបះបោរនៅឡើយ ។ ស្នូរផ្ទុះនានាត្រូវបានស្តាប់ឮនៅទីក្រុងទ្រីប៉ូលី ។  |
| មន្ត្រីបសុព្យាបាលអត់ច្បាប់អនុញ្ញាតដាក់កុងត្រូលចាំចាប់រថយន្តដឹកគោ Posted: 24 Mar 2011 11:45 PM PDT  ខេត្តកណ្តាល ៖ អនុវត្តផែនការភូមិ-ឃុំមានសុវត្ថិភាព និងយោងតាមអនុសាសន៍លុបបំបាត់កុងត្រូលជជុះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គណៈបញ្ជាការឯកភាពស្រុកពញាឮសហការជាមួយកងរាជអាវុធហត្ថស្រុកបានដឹកនាំកម្លាំងចុះល្បាតតាមបណ្តោយផ្លូវជាតិលេខ៥ក៏ជួបក្រុមមន្ត្រីបសុព្យាបាលរបស់ក្រសួងកសិកម្ម រុក្ខាប្រមាញ់ និងនេសាទដែលមានលិខិតបេសកកម្ម ប៉ុន្តែមិនបានសហការជាមួយសមត្ថកិច្ចមូលដ្ឋាន និងពីរដ្ឋបាលខេត្តស្រាប់តែមកដាក់កុងត្រូលចល័តឃាត់រថយន្តដឹកគោនៅចំណុចភូមិធ្យូង ឃុំវិហារហ្លួង ស្រុកពញាឮ ។ សូមបញ្ជាក់ថា កាលពីវេលាម៉ោង៣ និង៣០នាទីទៀបភ្លឺ ថ្ងៃទី២៤ មីនា លោកតុង ស៊ីវមី អភិបាលស្រុកពញាឮ លោកចេវ ឈី អភិបាលរងស្រុក លោកវរសេនីយ៍ត្រីទឹម សាវុធ អធិការនគរបាលស្រុក និងលោកសែ ហាក់ មេបញ្ជាការកងរាជអាវុធហត្ថស្រុក បានដឹកនាំកម្លាំងនគរបាល៤នាក់ កងរាជអាវុធហត្ថ៤នាក់ចុះដើរល្បាតការពារសុវត្ថិភាពភូមិ-ឃុំក៏ជួបជាមួយក្រុមមន្ត្រីបសុព្យាបាលរបស់ក្រសួងកសិកម្ម រុក្ខាប្រមាញ់ និងនេសាទចំនួនបីនាក់មកដាក់កុងត្រូលឃាត់រថយន្តដឹកគោមួយគ្រឿងម៉ាកហ៊ីណូ ពាក់ស្លាកលេខតាកែវ ៣A០៦៦៧ នៅតាមបណ្តោយផ្លូវជាតិលេខ៥។ លោកអភិបាលស្រុកបានថ្លែងថា ដោយយោងតាមអនុសាសន៍របស់រាជរដ្ឋាភិបាលស្តីពីភូមិ-ឃុំមានសុវត្ថិភាពសមត្ថកិច្ចរបស់លោកតែងតែចុះដើរល្បាតជារៀងរាល់ថ្ងៃ តែពុំឃើញមានដាក់កុងត្រូលជជុះនៅស្រុកពញាឮ តាមបណ្តោយផ្លូវជាតិលេខ៥ទេ ទើបតែនៅវេលាម៉ោង៣ និង៣០នាទីទៀបភ្លឹនោះឃើញក្រុមមន្ត្រីបសុព្យាបាលកំពុងឃាត់រថយន្តដឹកគោក៏បានធ្វើការសាកសួរ និងដឹងថា ពុំបានសហការជាមួយសមត្ថកិច្ចមូលដ្ឋាននិងមិនមានការអនុញ្ញាតពីរដ្ឋបាលខេត្តឡើយ។ លោកអភិបាលស្រុកបន្តថា បន្ទាប់មកក៏នាំមន្ត្រីបសុព្យាបាលទាំង៣នាក់ និងរថយន្តដឹកគោមកធ្វើការសាកសួរ និងធ្វើកំណត់ហេតុ ដែលរួមមាន ១-ឈ្មោះសរ សេរីបុត្រ, ២-ឈ្មោះហ៊ុន សាវ៉ាត់ និង៣-ឈ្មោះកាន់ គន្ធា បន្ទាប់ពីធ្វើការសាកសួររួចមក សមត្ថកិច្ចបានឃាត់រថយន្តដែលជិះធ្វើសកម្មភាពរបស់មន្ត្រីបសុព្យាបាលម៉ាកកូរ៉ូឡា ពាក់ស្លាកលេខភ្នំពេញ ២H០២៣៨ ។ ឯមន្ត្រីបសុព្យាបាលទាំងបីនាក់នោះបានចុះហត្ថលេខាហើយត្រឡប់ទៅគេហដ្ឋានវិញ និងឡើងទៅដោះស្រាយនៅសាលាខេត្តកណ្តាល។ ចំណែករថយន្តដឹកគោដែលឃាត់ដែរនោះមានម្ចាស់ឈ្មោះតេង ទី ភេទប្រុស អាយុ៤០ឆ្នាំ នៅភូមិច្រកកេសា ឃុំដងទង់ ស្រុកដងទង់ ខេត្តកំពត តំណាងឱ្យឈ្មោះម៉ៅ យ៉ាត។ បន្ទាប់ពីធ្វើការសាកសួរ និងពិនិត្យឃើញមានលិខិតអនុញ្ញាតរបស់ការិយាល័យផលិតកម្ម និងបសុព្យាបាលច្បាប់ដើមពិតប្រាកដហើយក៏ឱ្យរថយន្តនោះត្រឡប់ទៅវិញ។ លោកអភិបាលស្រុកបានមានប្រសាសន៍ឱ្យដឹងដែរថា ការដាក់កុងត្រូលចល័តរបស់ក្រុមមន្ត្រីបសុព្យាបាលនេះមិនសហការជាមួយសមត្ថកិច្ច និងមិនមានការអនុញ្ញាតពីរដ្ឋបាលខេត្ត ហើយនៅក្នុងលិខិតបញ្ជាបេសកកម្មក៏ពុំមែនជិះរថយន្តដូចខាងលើដែរ ។ ទាក់ទិននឹងព័ត៌មានមន្ត្រី បសុព្យាបាលចាប់រថយន្តដឹកគោនេះ អាជីវកររកស៊ីកាប់គោបានត្អូញត្អែរថា ធម្មតាការធ្វើដំណើរទៅរកទិញគោពីតាមបណ្តាខេត្តនានាមកតែងជួបឧបសគ្គខូចរថយន្ត ដូច្នេះការដែលទៅទិញនៅថ្ងៃទី២៤ ទាល់តែធ្វើដំណើរមកដល់ត្រឹមម៉ោងសូន្យ បើហួសតែកន្លះម៉ោងត្រូវផាកពិន័យជាប្រាក់រហូតដល់១២ម៉ឺនរៀល។ អាជីវករបានសំណូមពរឱ្យមន្ត្រីបសុព្យាបាលគោរពច្បាប់ផង ៕  |
| សហគមន៍អឺរ៉ុបទទូចឱ្យរារាំងលោកដាកាហ្វី កុំឱ្យទទួលបានប្រាក់ចំណូលពីប្រេង និងឧស្ម័ន Posted: 24 Mar 2011 11:20 PM PDT បណ្តាមេដឹកនាំសហគមន៍អឺរ៉ុប កាលពីថ្ងៃទី២៤ មីនា បានទទូចដល់សហគមន៍អន្តរជាតិពិសេសបណ្តាប្រទេសមហាអំណាចពិភពលោកឱ្យពង្រឹងវិធានការរបស់ខ្លួនធ្វើយ៉ាងណាកុំឱ្យរបបរបស់មេដឹកនាំផ្តាច់ការលីប៊ី លោកមូអាម៉ា កាដាហ្វី ទទួលបានប្រាក់ចំណូលដែលទទួលបានពីប្រេង និងឧស្ម័ន ។ ក្នុងសេចក្តីថ្លែងការណ៍មួយដែលចេញនៅឯកិច្ចប្រជុំកំពូលរបស់សហគមន៍អឺរ៉ុប បណ្តាមេដឹកនាំសហគមន៍អឺរ៉ុប ដែលមានប្រទេស២៧ជាសមាជិក និយាយថា ពួកគេបានត្រៀមខ្លួនរួចជាស្រេចហើយ ដើម្បីផ្តួចផ្តើម និងអនុម័តទណ្ឌកម្មប្រឆាំងលោកកាដាហ្វី មានដូចជាវិធានការដែលធានា ឱ្យប្រាកដថា ប្រាក់ចំណូលដែលទទួលបានពីប្រេង និងឧស្ម័នមិនធ្លាក់ដល់ដៃមេដឹកនាំផ្តាច់ការរូបនេះ ។  |
| អង្គការអូតង់ទទួលយកការបញ្ជាលើតំបន់ហាមហោះហើរនៅលីប៊ី Posted: 24 Mar 2011 11:20 PM PDT  អង្គការអូតង់កាលពីថ្ងៃទី២៤ មីនា បានយល់ព្រមទទួលយកតួនាទីបញ្ជាការអនុវត្តតំបន់ហាមហោះហើរនៅប្រទេសលីប៊ី ហើយពេលនេះកំពុងពិចារណាពីការទទួលយកការគ្រប់គ្រង និងត្រួតពិនិត្យបេសកកម្មយោធា ដែលគាំទ្រដោយអង្គការសហប្រជាជាតិទៀត ។ នេះបើតាមការឱ្យដឹងពីអគ្គលេខាធិការអង្គការអូតង់ លោក Anders Fogh Rasmussen ។  |
| Posted: 24 Mar 2011 08:34 PM PDT  ការរញ្ជួយដីដ៏ខ្លាំង២ដែលមួយមានកម្រិត៧រីស្ទ័រកើតឡើងនៅប្រទេសភូមា កាលពីយប់ថ្ងៃទី២៤ មីនា កន្លងមក ។ បាតុភូតរញ្ជួយដីនេះកើតឡើងនៅតំបន់ក្បែរព្រំដែនភូមាជាប់ជាមួយប្រទេសចិន ប្រទេសថៃ និងប្រទេសឡាវ ។ នេះបើតាមការឱ្យដឹងដោយមជ្ឈមណ្ឌលស្រាវជ្រាវផ្នែកភូមិសាស្ត្ររបស់អាមេរិក ។ មជ្ឈមណ្ឌលនេះបានឱ្យដឹងទៀតថា ការរញ្ជួយដ៏មានឥទ្ធិពលនេះកើតឡើងនៅភាគខាងកើតភូមាមានចម្ងាយ៥៥ម៉ាយ ប្រហែល៨៩គីឡូម៉ែត្រ ភាគខាងជើងខេត្តឈៀងរ៉ៃ ប្រទេសថៃ ។  |
| Posted: 24 Mar 2011 08:09 PM PDT      ខេត្តសៀមរាប ៖ មន្ដ្រីអាជា្ញធរអប្សរាបានថ្លែងឱ្យដឹងថា គេកំពុងតែរៀបចំគម្រោងប្ដឹងមន្ដ្រីយោធាយោធភូមិភាគ៤មួយរូប ដែលបានប្រើតួនាទីបញ្ជាកម្លាំងរារាំងមន្ដ្រីអាជា្ញធរអប្សរាពេលកំពុងប្រតិបត្ដិការទប់ស្កាត់ការសាងសង់ដោយខុសច្បាប់នៅលើតំបន់ហាមឃាត់នៃឧទ្យានវប្បធម៌ប្រវត្ដិសាស្ដ្រអង្គរបេតិកភណ្ឌពិភពលោក។ ប្រធាននាយកដ្ឋានសណ្ដាប់ធ្នាប់ និងសហប្រតិបត្ដិការនៃអគ្គនាយកដ្ឋានអាជា្ញធរអប្សរា លោកព្រំ ករុណា កាលពីព្រឹកថ្ងៃទី២៤ មីនា បានថ្លែងឱ្យដឹងថា ថ្នាក់លើបានជួបពិភាក្សាគ្នារួចហើយថា នឹងរៀបចំឯកសារប្ដឹងទៅតុលាការប្រឆាំងទៅលើឈ្មោះអ៊ុក សឿម ភេទប្រុស អាយុ៥០ឆ្នាំ ជាយោធាថ្នាក់វរសេនីយ៍ទោបម្រើការនៅយោធភូមិភាគ៤ ដែលបានបញ្ជាកម្លាំងយោធារារាំងកម្លាំងប្រតិបត្ដិការរបស់អាជា្ញធរអប្សរា កាលពីថ្ងៃទី២២ មីនា ឆ្នាំ២០១១កន្លងទៅថ្មីៗនេះ។ កាលពីព្រឹកថ្ងៃទី២២ មីនា ឆ្នាំ២០១១ កម្លាំងប្រតិបត្ដិការរបស់នាយកដ្ឋានសណ្ដាប់ធ្នាប់ និងសហប្រតិបត្ដិការ ដឹកនាំដោយអនុប្រធាននាយកដ្ឋាននេះមួយរូបបានចុះបេសកកម្មរុះរើសំណង់ប្រភេទគ្រោងឈើប្រក់ស្បូវ «ក្យូស» ចំនួន៨ ដែលក្យូសនីមួយៗមានទំហំ៣គុណ៤ម៉ែត្រ របស់ភោជនីយដ្ឋាន «មហាលាភ» ស្ថិតនៅក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប «តំបន់២» ដែលជួលដីពីឈ្មោះអ៊ុក សឿម ភេទប្រុស អាយុ៥០ឆ្នាំ ជាយោធាភូមិភាគ៤។ អនុប្រធាននាយកដ្ឋានដែលដឹកនាំកម្លាំងប្រតិបត្ដិការនៅពេលនោះបានថ្លែងថា ខណៈពេលកម្លាំងកំពុងរុះរើ ស្រាប់តែលោកអ៊ុក សឿម ជាម្ចាស់ដី ស្ថិតនៅក្នុងឯកសណ្ឋានយោធាបានចេញមុខមកឡូឡាជេរប្រមាថមកលើកម្លាំងសមត្ថកិច្ច រួចហើយទូរស័ព្ទហៅទាហានប្រមាណជាង១០នាក់មករារាំង និងថែមទាំងយករថយន្ដអង្គភាពយោធាពណ៌ត្រេអ៊ី ពាក់ស្លាកលេខខេមរៈភូមិន្ទ៨៥០១ ដែលដឹកទាហានទាំងនោះ មកដាក់បាំងពីមុខផ្លូវចូលមិនឱ្យកម្លាំងអាជា្ញធរចេញចូលបាន ។ ទោះជាយ៉ាងណានៅគ្រានោះពុំមានសេចក្ដីរាយការណ៍អំពីការប៉ះទង្គិចគ្នាដោយហិង្សារវាងកម្លាំងប្រតិបត្ដិការជាមួយកម្លាំងទាហានដែលលោកវរសេនីយ៍ទោ អ៊ុក សឿម ហៅមកនោះទេ ហើយទាហានទាំងនោះបានប្រាប់ថា គេមកតាមបញ្ជាតែប៉ុណ្ណោះ ។ លោកព្រំ ករុណា បានហៅការបញ្ជាឱ្យកម្លាំងយោធាមកធ្វើការរារាំងកម្លាំងអាជា្ញធរមិនឱ្យរុះរើសំណង់ខុសច្បាប់នៅក្នុងតំបន់ការពារនៃឧទ្យានវប្បធម៌ប្រវត្ដិសាស្ដ្រអង្គរពីសំណាក់ លោកអ៊ុក សឿម នេះ ថាជាទង្វើមួយប្រឆាំងទាំងស្រុងទៅនឹងព្រះរាជក្រឹត្យលេខ០០១នស ចុះថ្ងៃទី២៨ ឧសភា ឆ្នាំ១៩៩៤ ស្ដីពីការកំណត់ និងចាត់ចែងគ្រប់គ្រងតំបន់សៀមរាប-អង្គរ និងសេចក្ដីសម្រេចរបស់រាជរដ្ឋាភិបាលលេខ៧០ សសរ ចុះថ្ងៃទី១៦ វិច្ឆិកា ឆ្នាំ២០០៤ ស្ដីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និង២ ក្នុងតំបន់រមណីយដ្ឋានសៀមរាប-អង្គរ ។ លោកបានបញ្ជាក់ផងដែរថា អ្វីដែលអាជា្ញធរអប្សរាកំពុងតែធ្វើសព្វថ្ងៃនេះ មិនមែនធ្វើដើម្បីបម្រើផលប្រយោជន៍បុគ្គលនោះទេ គឺជាកាតព្វកិច្ចក្នុងកិច្ចការពារ អភិរក្សរមណីយដ្ឋានអង្គរដែលជាបេតិកភណ្ឌមនុស្សជាតិប្រកបដោយចីរភាព គឺធ្វើយ៉ាងណាការពារមិនឱ្យមានកំណើនខ្នងផ្ទះនៅក្នុងទំហំផ្ទៃដី៤០១គីឡូម៉ែត្រការ៉េ គ្របដណ្ដប់ទៅលើផ្នែកមួយចំនួននៃស្រុក-ក្រុងចំនួន៥ និងឃុំចំនួន២១ ភូមិប្រមាណ១១២ របស់ខេត្ដសៀមរាប ដែលត្រូវបានចាត់បញ្ចូលទៅជាតំបន់ទ្រនាប់នៃឧទ្យានអង្គរបេតិកភណ្ឌពិភពលោកកាលពីអំឡុងឆ្នាំ១៩៩២ កន្លងទៅ។ ដូច្នេះការបញ្ជាកម្លាំងយោធាមករារាំងប្រតិបត្ដិការរុះរើសំណង់ខុសច្បាប់នេះ ជាអំពើល្មើសនឹងច្បាប់ទាំងស្រុង ។ ទាក់ទិនជាមួយនឹងការមិនឱ្យប្រជាពលរដ្ឋរស់នៅក្នុងតំបន់ឧទ្យានអង្គរបង្កើតខ្នងផ្ទះថ្មី មានសំណួរជាច្រើនសួរថា តើឱ្យប្រជាពលរដ្ឋទៅរស់នៅទីណានៅពេលមានកូនចៅរៀបការរួចហើយត្រូវការបំបែកគ្រួសារនោះ? មន្ដ្រីអាជា្ញធរអប្សរាបានប្រាប់ថា គេបានគិតគូរបញ្ហាហ្នឹងរួចហើយ គឺយើងបានបង្កើតភូមិមួយនៅស្រុកបន្ទាយស្រី ដែលដាក់ឈ្មោះថា ភូមិធម្មជាតិរុនតាឯក មានផ្ទៃដីមួយពាន់ហិកតា ដែលបច្ចុប្បន្នមានប្រជាពលរដ្ឋជាងមួយរយគ្រួសារហើយដែលបានដាក់ពាក្យសុំទៅតាំងទីលំនៅថ្មីនៅទីនោះ។ ជុំវិញបញ្ហានេះ ពេញមួយរសៀលថ្ងៃទី២៤ មីនា លោកវរសេនីយ៍ទោ អ៊ុក សឿម មន្ដ្រីយោធាយោធភូមិភាគ៤ មិនអាចទំនាក់ទំនងដើម្បីបំភ្លឺទាក់ទិនទៅនឹងការចោទប្រកាន់របស់មន្ដ្រីអាជា្ញធរអប្សរាដែលថា លោកបានបញ្ជាកម្លាំងទ័ពឱ្យមករារាំងប្រតិបត្ដិការរុះរើសំណង់ខុសច្បាប់នោះបានទេ៕  |
| Posted: 24 Mar 2011 07:54 PM PDT  ខេត្តកំពង់ឆ្នាំង ៖ ស្ត្រីជាភរិយាអតីតយុទ្ធជនពិការម្នាក់ដែលបានស្លាប់កាលពីដើមខែមករា ២០១១នេះ បានលើកដៃសំពះអង្វរសុំសមត្ថកិច្ចពាក់ព័ន្ធជួយទាមទារប្រាក់ពលីនិងប្រាក់សមាគមរបស់ប្តីគាត់ផង ព្រោះអង្គភាពពាក់ព័ន្ធពិសេសមន្ទីរសង្គមកិច្ចខេត្តបានប្រាប់គាត់ថា ប្រាក់នេះត្រូវរង់ចាំ២ឆ្នាំទៀត ។ ស្ត្រីឈ្មោះហុយ ខន អាយុ៥៦ឆ្នាំ មានទីលំនៅភូមិផ្សារលើ សង្កាត់ផ្សារឆ្នាំង ដែលត្រូវជាប្រពន្ធអតីតយុទ្ធជនពិការឈ្មោះគន សុខុម អាយុ៥៩ឆ្នាំ បានរៀបរាប់និងលើកសៀវភៅបើកប្រាក់ឧបត្ថម្ភរបស់មន្ទីរសង្គមកិច្ច ដែលចុះហត្ថលេខាដោយលោកចូ វណ្ណា ប្រធានមន្ទីរសង្គមកិច្ច និងអតីតយុទ្ធជនពលីពិការបង្ហាញផងដែរថា ប្តីគាត់បានពិការដោយជាន់មីនខ្មែរក្រហមនៅផ្លូវដែកក្តុល កាលពីថ្ងៃទី២២ ខែមីនា ឆ្នាំ១៩៨៧ ។ កាលនោះប្តីគាត់មានឋានៈជាអនុសេនីយ៍ត្រី ប្រធាន គ នៅអង្គភាពវរសេនាតូចលេខ៥។ ចាប់តាំងពីពេលនោះមកប្តីគាត់បានទទួលប្រាក់ឧបត្ថម្ភទាំងប្រពន្ធកូនចំនួន១៣៩.៣៨០រៀល ប៉ុន្តែសល់តែ១៣៣.០០០រៀលប៉ុណ្ណោះ ដោយសារកាត់ប្រាក់ចូលសមាគមក្នុងអង្គភាពនេះ៥.០០០រៀល និងថ្លៃចំណាយផ្សេងៗទៀត ។ លុះនៅថ្ងៃទី៩ មករា ២០១១ ប្តីគាត់បានស្លាប់ហើយពេលគាត់ទៅបើកប្រាក់ឧបត្ថម្ភនោះស្រាប់តែគេមិនចង់បើកឱ្យ ដោយប្រាប់គាត់ថាប្តីគាត់ស្លាប់ហើយងើបមកផ្តិតមេដៃកើតទេ? ប៉ុន្តែដោយសារគាត់ទទូចសុំខ្លាំងពេកទើបគេអាណិតបើកឱ្យគាត់១ខែមករា ហើយបានប្រាប់គាត់ថា ចាប់ពីខែកុម្ភៈទៅ គ្មានប្រាក់បើកឱ្យទៀតទេ ។ គាត់បញ្ជាក់ថា ប្តីគាត់ស្លាប់ភ្លាមគេបិទប្រាក់ឧបត្ថម្ភនេះភ្លាម ឯប្រាក់ពលីដែលមានប្រមាណ១លានរៀល និងប្រាក់សមាគម១ខែកាត់លុយគាត់៥ពាន់រៀលយូរឆ្នាំហើយដែលត្រូវបើកបាន៤លានរៀលទៀតនោះគេថា ចាំ២ឆ្នាំទៀតទើបអាចបើកបាន ។ ស្ត្រីរូបនេះបានបញ្ជាក់ថា សព្វថ្ងៃគាត់បានប្តីពិការនេះជាអ្នករត់រទេះសេះចិញ្ចឹមគ្រួសារ លុះដល់ប្តីស្លាប់ទៅប្រាក់បានពីការបរទេះសេះក៏អត់ ប្រាក់ឧបត្ថម្ភក៏ត្រូវគេកាត់ផ្តាច់ទៀតតើឱ្យគ្រួសារគាត់រត់ដោយរបៀបណា ។ ពេលនេះគាត់គ្រាន់តែសូមអំពាវនាវដល់ស្ថាប័នពាក់ព័ន្ធមេត្តាជួយពិនិត្យមើលថា តើប្រាក់ពលីនិងប្រាក់សមាគមពិតជាត្រូវបើកដល់២ឆ្នាំក្រោយ មែនឬ ។ លោកចូ វណ្ណា ប្រធានមន្ទីរសង្គមកិច្ច និងអតីតយុទ្ធជន បានបកស្រាយប្រាប់សារព័ត៌មានកោះសន្តិភាពថា កាលលើកមុនប្តីរបស់គាត់ជាអតីតយុទ្ធជនពិការ ទទួលប្រាក់ឧបត្ថម្ភទាំងប្តី-ប្រពន្ធ និងកូនជាង១៣ម៉ឺនរៀលក្នុង១ខែ ប៉ុន្តែក្រោយពេលគាត់ស្លាប់កាលពីខែមករា ២០១១ មកមន្ទីរសង្គមកិច្ចកំពុងរៀបចំស្នើសុំទៅក្រសួងដាក់គ្រួសាររបស់គាត់ទៅជាគ្រួសារពលីវិញ ដែលត្រូវបើកប្រាក់ឧបត្ថម្ភប្រពន្ធ និងកូនបន្តទៀត ។ នៅពេលបានសេចក្តីសម្រេចដាក់គ្រួសារគាត់ជាគ្រួសារពលីហើយនឹងមានបើកប្រាក់១លើកទៀត គឺសម្រាប់ធ្វើបុណ្យសព ។ នេះគឺប្រាក់របស់រាជរដ្ឋាភិបាល ដែលពាក្យសាមញ្ញហៅថា ប្រាក់ពលី ។ ដោយឡែកប្រាក់សមាគមវិញដែលក្នុងខ្លឹមសារប្រើពាក្យ«ប្រាក់មរណៈសង្គ្រោះ»នេះមាន៤លានរៀល គឺត្រូវតែមាន ប៉ុន្តែទោះយ៉ាងណាក្តី មិនដល់២ឆ្នាំដូចការនិយាយនោះទេ ។ លោកពន្យល់ថា អតីតយុទ្ធជនពលីដែលបានស្លាប់គឺមានលេខរៀងរបស់វាហើយបើទូទាំងប្រទេសមានអ្នកស្លាប់តិចគឺឆាប់ បានបើកប៉ុន្តែបើមានអ្នកស្លាប់ច្រើនគឺយូរបន្តិចមែន ។ លោកបានបង្ហាញឈ្មោះអ្នកស្លាប់សម្រាប់បើកប្រាក់ខែមីនានោះដែលមានចំនួនដល់ទៅ៣០នាក់ទូទាំងប្រទេស ហើយក្នុងនោះខេត្តកំពង់ឆ្នាំង គឺមាន៣នាក់ដែរ ។ ប៉ុន្តែមិនមែនលេខរៀងដល់គ្រួសារនេះទេ ព្រោះគាត់ទើបស្លាប់ខែមករា ។ ទោះជាយ៉ាងណាក្តី គាត់បានទម្លាក់កំហុសលើការិ យាល័យសង្គមកិច្ចក្រុងប្រហែលជាប្រាប់គ្រួ សារនោះថា ពី១ដល់ទៅ២ឆ្នាំទើបបើកប្រាក់ទាំងនេះបាន ទើបគាត់ខ្វល់បែបនេះ ។ គាត់សន្យាផ្តល់ប្រាក់១លានរៀលជាប្រាក់មរណសង្គ្រោះមុនគេនៅសបា្តហ៍ក្រោយ ដើម្បីទប់ទល់ភាពខ្វះខាត៕  |
| អណ្តើកចម្លែកនៅតំបន់កន្ទុយនាគឈ្មួញវៀតណាមកំពុងតថ្លៃខ្ពស់ Posted: 24 Mar 2011 07:23 PM PDT     ខេត្តរតនគិរី ៖ សត្វអណ្តើកចម្លែកមួយក្បាលត្រូវបានគេប្រទះឃើញនៅក្នុងព្រៃតំបន់កន្ទុយនាគ ហើយចាប់យកមកចូលភូមិក៏មានការភ្ញាក់ផ្អើលល្បីតៗគ្នាធ្វើឱ្យមានចម្ងល់ខ្លាំង ស្ទើរទូទាំងខេត្តរតនគិរី ថែមទាំងមានឈ្មួញវៀតណាមចង់ទិញដោយឱ្យតម្លៃខ្ពស់ទៀតផង ។ បុរសឈ្មោះនៃ បានចូលព្រៃតំបន់កន្ទុយនាគប្រទះឃើញអណ្តើកចម្លែក រួចចាប់យកមកផ្ទះរបស់គាត់ កាលពីថ្ងៃទី២២ មីនា ២០១១ ស្ថិតក្នុងភូមិតាឡាវ ឃុំតាឡាង ស្រុកអណ្តូងមាស ហើយត្រូវបានឈ្មួញវៀតណាមតថ្លៃសុំទិញ ដោយឱ្យតម្លៃចំនួន២.៥០០ដុល្លារ ប៉ុន្តែម្ចាស់អណ្តើកចម្លែកនោះទារថ្លៃរហូតដល់៤.០០០ដុល្លារ ។ តាមប្រភពព័ត៌មានបានឱ្យដឹងថា សត្វចម្លែកនោះត្រូវបានគេនាំយកទៅលក់នៅក្រុងបានលុងទៀតហើយ ប៉ុន្តែមានអ្នកខ្លះអះអាងថា មិនទាន់យកទៅលក់នៅឡើយទេ គឺនៅក្នុងដៃម្ចាស់ដើមនៅឡើយ សត្វអណ្តើកចម្លែកប្រភេទនេះ កាលពីឆ្នាំទៅមិញ ធ្លាប់មានគេចាប់បានដែរ ហើយបានលក់ទៅឱ្យឈ្មួញវៀតណាមតម្លៃ១.៥០០ដុល្លារ ។ អ្នកដែលបានឃើញផ្ទាល់បានឱ្យដឹងថា សត្វអណ្តើកចម្លែកនោះខុសគ្នាជាមួយអណ្តើកធម្មតាត្រង់ថា សត្វនោះមានស្នូកពីលើដូចជាកន្ធាយ ប៉ុន្តែស្នូកពីក្រោមដូចជាអណ្តើកធម្មតា ហើយមានកន្ទុយវែង មានស្រកាដូចពង្រូល ជើងដូចជាសត្វក្រពើ ឯក្បាលមានចំពុះកោងចុះក្រោមដូចចំពុះសត្វឥន្ទ្រី ។ សត្វប្រភេទនេះគឺជាសត្វកម្រមាន និងកម្របានជួបប្រទះណាស់ គឺមានតែក្នុងតំបន់ព្រៃកន្ទុយនាគទេ មានសត្វចម្លែកប្រភេទនេះ ។ ប្រភពក៏បានឱ្យដឹងទៀតថា ម្ចាស់សត្វនេះកំពុងបារម្ភខ្លាចក្រែងសមត្ថកិច្ច ឬក្រសួងពាក់ព័ន្ធចុះទៅដកហូតយកសត្វនោះពីគាត់ ដោយពុំបានផ្តល់ប្រាក់ដូចដែលឈ្មួញបានសុំទិញមានតម្លៃខ្ពស់ ។ សត្វកម្របែបនេះ គួរតែស្ថាប័នមានសមត្ថកិច្ចសុំទិញដោយឱ្យតម្លៃសមរម្យយកមករក្សាទុកនៅក្នុងសួនសត្វដើម្បីទាក់ទាញភ្ញៀវជាតិ និងអន្តរជាតិមកទស្សនា ហើយក៏អាចទាញយកកម្រៃផលចំណេញពីទេសចរផងដែរ ។ បើមិនដូច្នោះទេ សត្វចម្លែកនោះត្រូវធ្លាក់ក្នុងកណ្តាប់ដៃឈ្មួញយកទៅក្រៅប្រទេសមិនខានឡើយ ៕  |
| យុទ្ធនាការបង្ក្រាបជំនួញឈើប្រណីតកក្រើកច្រើនខេត្ត Posted: 24 Mar 2011 07:00 PM PDT   ខេត្តព្រះវិហារ ៖ នៅព្រឹកថ្ងៃទី២៣ មីនា ដោយមានបទបញ្ជាពីលោកអ៊ុំ ម៉ារ៉ា អភិបាលខេត្ត កម្លាំងសមត្ថកិច្ចចម្រុះដឹកនាំដោយលោកស ថាវី អភិបាលរងខេត្ដ ដែលមានមន្ដ្រីរដ្ឋបាលព្រៃឈើខេត្ដ បរិស្ថានខេត្ដ នគរបាលខេត្ដ រួមជាមួយកម្លាំងកងពលធំអន្ដរាគមន៍លេខ៣ផង បានឃាត់ចាប់រថយន្ដធុនធ្ងន់ប្រភេទបែនដឹកដីចំនួន៤គ្រឿង បន្ទាប់ពីដឹងថា រថយន្តទាំងនេះរកស៊ីដឹកឈើគ្រញូងចេញពីស្រុកជាំក្សាន្ដ តាមដងផ្លូវជាតិលេខ៦២ ឆ្ពោះទៅកាន់ខេត្ដកំពង់ចាម ដោយមានថៅកែម្នាក់ឈ្មោះនី ភេទប្រុស អាយុប្រហែល៤០ឆ្នាំ មានទីលំនៅភូមិថ្នល់ទទឹង ស្រុកត្បូងឃ្មុំ ខេត្ដកំពង់ចាម ។ សមត្ថកិច្ចចំរុះខេត្ដដែលបានធ្វើការប្រមាញ់ចាប់រថយន្ដចំនួន៤គ្រឿងខាងលើ គឺបន្ទាប់ពីដឹងថា រថយន្ដទាំងនោះ បានឆក់ឱកាសដឹកឈើគ្រញូងជាយូរមកហើយ ដោយឈ្មួញបានប្រើល្បិច «ត្រីងៀតឆ្លៀតពង»។ សូមបញ្ជាក់ថា ផ្លូវជាតិលេខ៦២ ចាប់ពីកំពង់ធំរហូតដល់ប្រាសាទព្រះវិហារ ត្រូវបានក្រុមហ៊ុនចិនស្ថាបនា ហើយក្រុមហ៊ុនបានប្រើប្រាស់រថយន្ដបែនដឹកដី និងថ្មប្រភេទធំៗជាច្រើនរយគ្រឿងនៅតាមដងផ្លូវនោះ ។ ចំណែកពួកឈ្មួញបានឆ្លៀតឱកាសប្រើប្រាស់រថយន្ដបែននេះដឹកឈើគ្រញូងមួយជើងពី៨ទៅ១០ម៉ែត្រគូប ដោយគេដាក់ឈើប្រណីតពីក្រោម ហើយគេយកថ្មសំរាប់ក្រាលផ្លូវដាក់ពីលើដើម្បីបំភ័ន្តភ្នែកសមត្ថកិច្ច ។ ពួកគេនាំគ្នាលួចដឹកជញ្ជូនទាំងយប់ទាំងថ្ងៃ ដោយពុំមានអ្នកណាចាប់អារម្មណ៍ឡើយ ទើបតែពេលនេះបែកការណ៍ដោយអាជ្ញាធរខេត្ដ បានធ្វើការឃ្លាំមើលអស់រយៈពេលមួយយប់ថ្ងៃទី២២ មីនា ទើបបានដឹង ក៏តាមចាប់បានរថយន្ដចំនួន២គ្រឿង ឯ២គ្រឿងទៀតបើករត់គេចបាត់។ លោកស ថាវី អភិបាលរងខេត្ដបានឱ្យដឹងថា បន្ទាប់ពីទទួលបានបទបញ្ជាពីលោកអ៊ុំ ម៉ារ៉ា អភិបាលខេត្ដរួចមក លោកបានដឹកនាំកម្លាំងចម្រុះតាមចាប់រថយន្ដខាងលើ ដើម្បីវែកមុខឈ្មួញបញ្ជូនទៅផ្ដន្ទាទោសតាមផ្លូវតុលាការ ។ បច្ចុប្បន្ន រថយន្ដទាំងពីរគ្រឿងខាងលើ និងឈើគ្រញូងត្រូវបានយកមករក្សាទុកនៅសាលាខេត្ដតែឈ្មួញ និងអ្នកបើកបរបានរត់គេចខ្លួនអស់ដែលសមត្ថកិច្ចកំពុងកសាងសំណុំរឿងបញ្ជូនទៅសាលាដំបូង និងសុំដីកាស្វែងរកចាប់ខ្លួន ។
ខេត្តកំពង់ចាម ៖ យោងតាមការណែនាំរបស់លោកនេត សាវឿន អគ្គស្នងការនគរបាលជាតិ និងលោកឧត្តមសេនីយ៍ទោស៊ាង ប៊ុនលាង ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ កំលាំងនគរបាលសេដ្ឋកិច្ចក្រសួង បានសហការជាមួយនគរបាលសេដ្ឋកិច្ចនៃស្នងការដ្ឋានខេត្ត បង្រ្កាបបានរថយន្តម៉ាកស្តារិច១គ្រឿង ដែលលួចដឹកឈើប្រណីតខុសច្បាប់នៅត្រង់ចំណុចឡូត៍កៅស៊ូលេខ២៥ មូលដ្ឋានចំការកៅស៊ូពាមជាំង ស្រុកអូររាំងឪ កាលពីវេលាម៉ោង៥ និង១០នាទីល្ងាចថ្ងៃទី២៣មីនា ដែលបំរុងនាំទៅលក់នៅព្រំដែនវៀតណាម ។ លោកវរសេនីយ៍ត្រីហឿន វីណា អនុប្រធានការិយាល័យប្រឆាំងបទល្មើសសេដ្ឋកិច្ចក្រសួងមហាផ្ទៃ មានប្រសាសន៍ឱ្យដឹងថា កម្លាំងមូលដ្ឋានបានរាយការណ៍មករូបលោកថា មានរថយន្ត១គ្រឿងម៉ាកស្តារិចបើកឆ្លងស្ពានព្រែកតាមាក់ចូលមកខេត្តកណ្តាល និងបន្តមកកាន់ស្រុកអូររាំងឪសង្ស័យមានបង្កប់ឈើប្រណីតក្នុងគោលបំណងយកទៅលក់នៅប្រទេសជិតខាង ។ ក្រោយពីទទួលបានព័ត៌មាននេះភ្លាម រូបលោក បានបញ្ជាឱ្យកម្លាំងក្រោមឱវាទចុះសហការជាមួយនឹងនគរបាលសេដ្ឋកិច្ចខេត្តត្រៀមកំលាំងចាំឃ្លាំមើលនៅក្នុងឡូត៍កៅស៊ូពាមជាំងរហូតដល់វេលាម៉ោង៥ និង១០នាទីល្ងាចថ្ងៃដដែល ក៏ឃើញរថយន្តដែលមានភិនភាគគួរឱ្យសង្ស័យនោះមែន ។ លោកហឿន វីណា បានបន្តទៀតថា លុះពេលឃាត់ធ្វើការឆែកឆេរឃើញមានឈើប្រណីតលេខ១ ប្រភេទនាងនួន និងគ្រញូងចំនួន៧ដុំ ក៏បញ្ជូនមកកាន់ស្នងការដ្ឋាននគរបាលខេត្តរួមជាមួយអ្នកបើកបរ ឈ្មោះលី ម៉េង ភេទប្រុស អាយុ៣៣ឆ្នាំ មានទីលំនៅក្នុងសង្កាត់ទឹកល្អក់ ខណ្ឌទួលគោក រាជធានីភ្នំពេញ ។ អ្នកបើកបររថយន្តរូបនេះបានឆ្លើយថា ឈើទាំងនេះគឺដឹកចេញពីភ្នំពេញ ក្នុងគោលដៅយក ទៅស្រុកមេមត់ជាប់ព្រំដែនប្រទេសវៀតណាម ។ បន្ទាប់មកនៅវេលាម៉ោង១០ និង៥០នាទីព្រឹកថ្ងៃទី២៤ មីនា ក៏បានរៀបចំបែបបទប្រគល់ឱ្យទៅលោកជា បញ្ញា នាយរងសង្កាត់រដ្ឋបាលព្រៃឈើស្រីសន្ធរ ដើម្បីចាត់ ការតាមច្បាប់ ។
ខេត្តកំពង់ឆ្នាំង ៖ ឈើគ្រញូងដែលលួចដឹកតាមរថយន្តក្រុងត្រូវបានកម្លាំងកងរាជអាវុធហត្ថខេត្តដឹកនាំដោយលោកពេញ វិបុល ព្រះរាជអាជ្ញាអមសាលាដំបូងខេត្ត ស្ទាក់ចាប់បានកាលពីវេលាម៉ោង៣និង៣០នាទីរសៀល ថ្ងៃទី២៣ មីនា នៅចំណុចមុខស្នាក់ការ៥០០ ស្ថិតក្នុងឃុំលង្វែក ស្រុកកំពង់ត្រឡាច ។ លោកលឹម ហាក់ មន្ត្រីកងរាជអាវុធហត្ថខេត្តបាននិយាយឱ្យដឹងថា អ្នកបើកបររថយន្តក្រុងឈ្មោះអ៊ុក ឈុនម៉េង អាយុ៣៤ឆ្នាំ រស់នៅភូមិភ្នំតូច ស្រុកឧដុង្គ ខេត្តកំពង់ស្ពឺ ។ លោកបានបន្តថា ដោយទទួលបានព័ត៌មានស្តីពីរថយន្តក្រុងដឹកអ្នកដំណើរ ពាក់ស្លាកលេខភ្នំពេញ ៤០៣០ មានដឹកឈើគ្រញូងចំនួន៤ការុងកន្លះ ចេញពីផ្សារស្រុកក្រគរ ខេត្តពោធិ៍សាត់ ទើបលោកពេញ វិបុល ព្រះរាជអាជ្ញាអមសាលាដំបូងខេត្ត ដឹកនាំកម្លាំងកងរាជអាវុធហត្ថខេត្ត និងស្នាក់ការ៥០០ ស្ទាក់ចាប់បានរថយន្តខាងលើ ដែលក្រោយការរាប់ចំនួនឃើញមាន១១៣កំណាត់ ស្មើជាងកន្លះម៉ែត្រគូប ។ ក្រោយការចាប់ឃាត់អ្នកបើកបររថយន្តបានប្រាប់សមត្ថកិច្ចថា គាត់បានទទួលបញ្ញើពីគេឱ្យដឹកឈើគ្រញូង៤ការុងកន្លះនេះ ពីស្រុកក្រគរ ខេត្តពោធិ៍សាត់ ទៅកាន់រាជធានីភ្នំពេញ ប៉ុន្តែពេលមកដល់ខេត្តកំពង់ឆ្នាំង ក៏ត្រូវសមត្ថកិច្ចចាប់តែម្តង។ ឈើគ្រញូងទាំង១១៣ដុំនេះត្រូវបានសមត្ថកិច្ចកសាងសំណុំរឿងបញ្ជូនទៅខណ្ឌរដ្ឋបាលព្រៃឈើ ចំណែករថយន្តយកទៅរក្សាទុកនៅទីបញ្ជាការកងរាជអាវុធហត្ថខេត្តដើម្បីចាត់ការ។
ខេត្តស្ទឹងត្រែង ៖ កម្លាំងរដ្ឋបាលព្រៃឈើស្ទឹងត្រែងសហការជាមួយកងរាជអាវុធហត្ថខេត្ត និងនគរបាលក្រុងស្ទឹងត្រែង ដឹកនាំដោយលោកជា ពេជ្រ ព្រះរាជអាជ្ញារងអមសាលាដំបូងខេត្តបានចុះធ្វើការត្រួតពិនិត្យទីតាំងស្តុកឈើគ្រញូងចំនួន៣កន្លែងស្ថិតនៅភូមិលើ សង្កាត់ស្ទឹងត្រែង ក្រុងស្ទឹងត្រែង ។ មុនការចូលត្រួតពិនិត្យ គឺសមត្ថកិច្ចបានឡោមព័ទ្ធកាលពីវេលាម៉ោង១រសៀល ថ្ងៃទី២៣ មីនា ទើបកម្លាំងជំនាញទាំងអស់ចូលឆែកឆេរឃើញឈើគ្រញូងជាច្រើនដុំលាក់ទុកក្នុងបន្ទប់ដេក និងបន្ទប់ទឹក ។ មន្ត្រីរដ្ឋបាលព្រៃឈើបានឱ្យដឹងថា លំនៅឋានទាំង៣កន្លែងដែលសង្ស័យស្តុកឈើប្រណីតខុសច្បាប់ ត្រូវបានរឹបអូសឈើគ្រញូងចំនួនប្រមាណជា៧ ទៅ៨ម៉ែត្រគូប និងឃាត់ខ្លួនកម្មករចំនួន២នាក់ ព្រមទាំងមធ្យោបាយដឹកជញ្ជូនគឺរថយន្តកាមរីគូទស្វិតពណ៌.សចំនួន១គ្រឿង ។ ក្នុងការអនុវត្តការឆែកឆេរនេះ លំនៅឋានទី១គឺមិនបានឃើញម្ចាស់ឈើទេ ឃើញតែវត្ថុតាងជាឈើ និងរថយន្តតែប៉ុណ្ណោះ ចំណែកកម្មករ២នាក់នោះថៅកែឈើបាននាំយកមកពីស្រុកសៀមប៉ាង ដើម្បីជួលលើកដាក់ឈើ ។ ចំពោះលំនៅឋាន២ទៀតសមត្ថកិច្ចបានរកឃើញឈើគ្រញូងជាច្រើនដុំ ដែលម្ចាស់ផ្ទះឆ្លើយថា ជារបស់ឈ្មួញដែលជួលបន្ទប់ផ្ទះរបស់គាត់ស្នាក់នៅនិងស្តុកទុក ។ គាត់មិនដែលឱ្យម្ចាស់ឈើទុកឈើនៅផ្ទះរបស់គាត់ទេ ទើបតែយប់ថ្ងៃទី២២ មីនា ម្ចាស់ឈើទាំងនោះបានសុំផ្ញើឈើមួយយប់ ហើយថា ព្រឹកឡើងគេនឹងដឹកចេញ តែរហូតមកដល់ព្រឹកថ្ងៃទី២៣ មីនា ក៏បាត់ដំណឹងម្ចាស់ឈើបែរជាឃើញសមត្ថកិច្ចមកព័ទ្ធផ្ទះរបស់គាត់ទៅវិញ ។ មន្ត្រីជំនាញរដ្ឋបាលព្រៃឈើ បានរឹបអូសរថយន្ត១គ្រឿង និងឈើប្រណីតទាំងនោះមករក្សាទុកនៅខណ្ឌរដ្ឋបាលព្រៃឈើស្ទឹងត្រែងចំណែកកម្មករទាំង២នាក់ កម្លាំងកងរាជអាវុធហត្ថបាននាំខ្លួនទីបញ្ជាការកងរាជហត្ថខេត្ត ដើម្បីសួរនាំរកអត្តសញ្ញាណម្ចាស់ឈី ៕  |
| គ្រូទាយមើលនិស្ស័យឆ្លងទ្វីប តុលាការកាត់ទោសដាក់គុក១២ឆ្នាំ និងបង់ប្រាក់ចំនួន២៤លានរៀល Posted: 24 Mar 2011 06:49 PM PDT   រាជធានីភ្នំពេញ ៖ ព្រឹកថ្ងៃទី២៤ មីនា សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលើគ្រូទស្សន៍ទាយម្នាក់មើលរាសីឆ្លងទ្វីបត្រៃវេទ តាមទូរស័ព្ទឈ្មោះលឹម ច័ន្ទថន ដាក់គុកក្នុងពន្ធនាគាររយៈពេល១២ឆ្នាំ និងតម្រូវឱ្យបង់ប្រាក់ចូលរដ្ឋ៤លានរៀល សងជំងឺចិត្តដល់ជនរងគ្រោះ៥នាក់ ក្នុងម្នាក់៤លានរៀលទៀត ។ សាលក្រមនេះត្រូវបានប្រកាសឡើងដោយលោកចៅក្រមសួស សំអាត ប្រធានក្រុមប្រឹក្សា និងលោកឯក ឆេងហួត ព្រះរាជអាជ្ញារងតំណាងអយ្យការ ។ សំណុំរឿងជនត្រូវចោទឈ្មោះលឹម ច័ន្ទថន គ្រូទស្សន៍ទាយមើលរាសីឆ្លងទ្វីបតាមរយៈទូរស័ព្ទដៃដែលល្បីឈ្មោះហៅថា «គ្រូត្រៃវេទ» នេះត្រូវបានតុលាការសាលាដំបូងលើកយកមកបើកសវនាការកាលពីថ្ងៃទី១៥ មីនា ឆ្នាំ២០១១។ ក្នុងអង្គហេតុតំណាងអយ្យការបានចោទប្រកាន់គ្រូត្រៃវេទ លឹម ច័ន្ទថន ពីបទល្មើសទិញពេស្យាចារកុមារ និងប្រព្រឹត្តអំពើអាសលើកុមារ ដែលបទល្មើសនេះបានចែងក្នុងច្បាប់ស្តីអំពីការបង្ក្រាបអំពើជួញដូរមនុស្ស និងអាជីវកម្មលើផ្លូវភេទតាមមាត្រា៣៤ បទទិញពេស្យាចារកុមារតម្រូវផ្តន្ទាទោសពី២ឆ្នាំទៅ៥ឆ្នាំ។ រីឯបទល្មើសអំពើអាសប្រឆាំង និងអនីតិជនអាយុក្រោម១៥ឆ្នាំ តម្រូវផ្តន្ទាទោសពី១ឆ្នាំទៅ៣ឆ្នាំ និងពិន័យជាប្រាក់ពី២លានទៅ៦លានរៀល ។ គួររំលឹកថា គ្រូទស្សន៍ទាយមើលរាសីឆ្លងទ្វីបតាមរយៈទូរស័ព្ទដៃល្បីឈ្មោះម្នាក់នៅឆ្នាំ២០១០ ឈ្មោះគ្រូត្រៃវេទ លឹម ច័ន្ទថន ត្រូវបាននគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ ចាប់ខ្លួនដាក់ខ្នោះដៃបណ្តើរដោយជាប់សង្ស័យពាក់ព័ន្ធរឿងទិញពេស្យាចារ កុមារ នៅវេលាម៉ោង៤រសៀលថ្ងៃទី១៤ តុលា ឆ្នាំ២០១០ កន្លងមក ។ គ្រូត្រៃវេទ លឹម ច័ន្ទថន ភេទប្រុស អាយុ៦០ឆ្នាំ ជាបុរសពោះម៉ាយ ស្នាក់នៅផ្ទះលេខ៨២៣ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ អតីតជាមន្ត្រីនគរបាលព្រហ្មទណ្ឌរាជធានីភ្នំពេញ។ បន្ទាប់មកបានផ្ទេរទៅបំរើការងារនៅក្រសួងយុត្តិធម៌ និងចុងក្រោយបានចូលនិវត្តន៍ ហើយក៏បែកគំនិតធ្វើជាគ្រូទាយ និងស្រោចទឹកមើលរាសីនៅក្នុងប្រទេសរហូតល្បីដល់ក្រៅប្រទេសទៀតផង តាមរយៈទូរស័ព្ទ ។ ទាក់ទិននឹងការចាប់ខ្លួនគ្រូត្រៃវេទ លឹម ច័ន្ទថន នេះ ត្រូវបានលោកវរសេនីយ៍ត្រីកែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជនស្នងការដ្ឋានរាជធានី ឱ្យដឹងថា ការចាប់ខ្លួនគ្រូត្រៃវេទនេះ គឺធ្វើឡើងតាមរយៈនៃការស៊ើបអង្កេត និងស្រាវជ្រាវរបស់មន្ត្រីជំនាញ ។ លោកកែវ ធា ឱ្យដឹងថា ដំបូងសមត្ថកិច្ចបានទទួលព័ត៌មានពីប្រជាពលរដ្ឋថា នៅផ្ទះគ្រូត្រៃវេទ លឹម ច័ន្ទថន មានក្មេងស្រីអាយុក្រោម១៥ឆ្នាំ ចេញចូលជាញឹកញាប់ ធ្វើឱ្យមានការសង្ស័យ ។ ពេលទទួលបានព័ត៌មាននោះ មន្ត្រីជំនាញរបស់លោកបានចុះទៅស្រាវជ្រាវសួរនាំក្មេងស្រីទាំងនោះ ទើបលេចឡើងជាព័ត៌មានថា គ្រូរូបនេះតែងអន្ទងក្មេងស្រីយកទៅបំរើផ្លូវភេទ ។ លោកកែវ ធា បានឱ្យដឹងទៀតថា ពេលចាប់ខ្លួនគ្រូទស្សន៍ទាយឈ្មោះលឹម ច័ន្ទថន ទៅកាន់ការិយាល័យភ្លាម មានពាក្យបណ្តឹងរបស់អាណាព្យាបាលកុមារីរងគ្រោះចំនួន៧នាក់ ដាក់ជូនសមត្ថកិច្ចភ្លាម ដែលពាក្យបណ្តឹងនីមួយៗ ចោទប្រកាន់គ្រូនេះថា បានលួងលោមកូនស្រីរបស់ពួកគាត់ក្រោមអាយុ១៥ឆ្នាំ ទៅបៀតបៀន និងរំលោភផ្លូវភេទ ដោយគ្រាន់តែផ្តល់ប្រាក់ពី២.០០០ទៅ៥.០០០រៀលប៉ុណ្ណោះ និងនៅមានជនរងគ្រោះជាច្រើនទៀតដែលត្រូវគ្រូនេះបានប្រព្រឹត្ត។ ក្នុងពាក្យបណ្តឹងកុមារី៧នាក់បានឱ្យដឹងថា ពួកគេសុទ្ធតែជាកូនអ្នកក្រីក្ររស់នៅភូមិមិត្តភាព ខណ្ឌឫស្សីកែវ ។ ពេលរត់លេងក៏ដូចជាពេលធ្វើដំណើរទៅកាន់សាលារៀនត្រូវឆ្លងកាត់មុខផ្ទះគ្រូត្រៃវេទ ពេលនោះលោកគ្រូរមែងហៅពួកគេឱ្យចូលលេងក្នុងផ្ទះ ។ លើកដំបូងគ្រាន់តែឱ្យច្របាច់ជើង ឬដកស្កូវសក់ឱ្យគាត់ក៏ផ្តល់ប្រាក់មកវិញ២.០០០ទៅ៥.០០០រៀល រយៈពេលកន្លះម៉ោង ឬមួយម៉ោងបានប្រាក់ ទើបឱ្យចេញទៅវិញ ។ ការលួងលោមរបៀបនេះ២ទៅ៣លើក ទើបគ្រូនេះចាប់ផ្តើមប្រើប្រាស់ម្រាមដៃបៀតបៀនប្រដាប់ភេទកុមារី និងអង្អែលសុដន់លេងធ្វើឱ្យមានសំរើប ចុងក្រោយលោកគ្រូបានឈានទៅប្រើប្រដាប់ភេទខ្លួនឯងដើម្បីសំរេចបំណង ។ ទោះបីជាបែបណា ការចោទប្រកាន់ខាងលើនេះ ត្រូវបានលោកគ្រូត្រៃវេទ លឹម ច័ន្ទថន បដិសេធ និងមិនបានធ្វើអត្ថាធិប្បាយណាមួយពាក់ព័ន្ធលើករណីចោទប្រកាន់នេះទេ ដោយលោកមានជំនឿថា ទេវតានឹងអាចមើលឃើញមនុស្សធ្វើល្អ ឬអាក្រក់ ។ ក្រោយការឃាត់ខ្លួននៅព្រឹកថ្ងៃទី១៥ តុលា ២០១០ សមត្ថកិច្ចការិយាល័យប្រឆាំងការ ជួញដូរមនុស្ស និងការពារអនីតិជន បាននាំគ្រូនេះទៅឆែកឆេរលំនៅឋាន ដើម្បីរកវត្ថុតាង ។ ក្នុងការឆែកឆេរតាមច្បាប់នេះបានរកឃើញឌីស្កមួយចំនួន និងកូនក្រក១ ដែលគ្រូនេះដាក់តាំងក្នុងទូកញ្ចក់ទំហំ២ទៅ៣តឹក ៤ជ្រុងលើអាសនៈ ។ មិនដឹងថា អាសនៈនោះពូកែ ឬបែប ណាទេ ៕  |
| មន្ត្រីការទូតស៊ុយអែតចាប់អារម្មណ៍ពីសក្តានុពលទេសចរណ៍នៃប្រទេសកម្ពុជា Posted: 24 Mar 2011 06:17 PM PDT  រាជធានីភ្នំពេញ ៖ លោកជំទាវ Anne HÖGLUNG ឯកអគ្គរាជទូតថ្មីប្រទេសស៊ុយអែត ប្រចាំកម្ពុជា បានមានប្រសាសន៍ថា កម្ពុជាជាប្រទេសដែលលោកជំទាវស្រឡាញ់ជាយូរមកហើយ ហើយអ្វីដែលលោកជំទាវចាប់អារម្មណ៍នោះ គឺសក្តានុពលវិនិយោគលើវិស័យទេសចរណ៍ ព្រោះប្រទេសមួយនេះពោរពេញដោយរមណីយដ្ឋានធម្មជាតិដ៏ស្រស់ត្រកាល និងប្រាសាទបុរាណជាច្រើនដែលអ្នកទេសចរចូលចិត្ត។ ម្យ៉ាងទៀតលោកជំទាវក៏បានចាប់អារម្មណ៍ផងដែរ ចំពោះការរីកចម្រើនលើគ្រប់វិស័យនៅកម្ពុជាបច្ចុប្បន្ន។ លោកជំទាវឯកអគ្គរាជទូតថ្មីនៃប្រទេសស៊ុយអែត បានមានប្រសាសន៍ដូច្នេះក្នុងឱកាសចូលជួបសម្តែងការគួរសមជាមួយលោកជំទាវ ស៊ុន សាភឿន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី២៣ មីនា ឆ្នាំ២០១១ នៅទីស្តីការក្រសួងការបរទេស។ លោកជំទាវ Anne HÖGLUNG មានប្រសាសន៍ថា កម្ពុជា និងស៊ុយអែត មានទំនាក់ទំនងល្អជាមួយគ្នាតាំងពីយូរមកហើយ ហើយប្រទេសស៊ុយអែតក៏បានជួយប្រទេសកម្ពុជាលើផ្នែកជាច្រើន ដូចជាគ្រប់គ្រងរដ្ឋបាល សេដ្ឋកិច្ច អភិវឌ្ឍន៍ជនបទ បណ្តុះបណ្តាលធនធានមនុស្ស វិស័យសង្គមកិច្ច សុខាភិបាល និងជំនួយមនុស្សធម៌ ។ ក្នុងជំនួបនោះដែរ លោកជំទាវបានសំណូមពរឱ្យប្រទេសស៊ុយអែត បន្តជួយកម្ពុជាលើគ្រប់ផ្នែកដែលស៊ុយអែតបានជួយកន្លងមក ជាពិសេសជួយជំរុញវិនិយោគិនឱ្យមកបណ្តាក់ចុះវិនិយោគសំខាន់លើវិស័យកសិកម្ម និងឧស្សាហកម្ម នៅពេលដែលកម្ពុជា ពុំទាន់មានបច្ចេកទេសខ្ពស់លើផ្នែកផលិតចំណីអាហារដើម្បីនាំចេញ និងពុំទាន់មានម៉ាស៊ីនកិនស្រូវទំនើបដែលអាចផលិតអង្ករឱ្យបានតាមស្តង់ដាទីផ្សារអន្តរជាតិ ។ ជាមួយនេះជួយជំរុញទេសចរមកកាន់កម្ពុជា ឱ្យបានច្រើន និងគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ២០១៣-២០១៤ ដែលការបោះឆ្នោត នឹងប្រព្រឹត្តទៅនៅមហាសន្និបាតអង្គការសហប្រជាជាតិនាឆ្នាំ២០១២ ខាងមុខ៕  |
| រកការងារធ្វើនៅក្រៅប្រទេសដោយខុសច្បាប់ងាយទទួលរងដោយហានិភ័យ Posted: 24 Mar 2011 06:05 PM PDT   រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវជាថ្មីម្តងទៀតដល់ប្រជាពលរដ្ឋកម្ពុជាទាំងអស់ ជាពិសេសក្មួយៗយុវវ័យ សូមកុំជឿតាមការភូតកុហកអូសទាញពីសំណាក់ជនខិលខូចមួយចំនួន ដើម្បីទៅរកការងារធ្វើនៅក្រៅប្រទេសដោយខុសច្បាប់ ពីព្រោះទង្វើបែបនេះងាយទទួលរងហានិភ័យសព្វបែបយ៉ាង ។ សម្តេចតេជោនាយករដ្ឋមន្ត្រីបានអំពាវនាវជាថ្មីបែបនេះ នារសៀលថ្ងៃទី២៣ មីនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបការងារឆ្នាំ២០១០ និងកំណត់ទិសដៅអនុវត្តឆ្នាំ២០១១ របស់ក្រសួងការងារ និងបណ្តុះបណ្តាលវិជ្ជាជីវៈនៅសាលសន្និសីទចតុមុខ ។ ពាក់ព័ន្ធនឹងបញ្ហាខាងលើ សម្តេចតេជោនាយករដ្ឋមន្ត្រីនៅតែបន្តអំពាវនាវដល់ប្រជាពលរដ្ឋកម្ពុជាទាំងអស់ ហើយឱ្យចាត់វិធានការយ៉ាងតឹងរ៉ឹងចំពោះជនខិលខូចដែលអូសទាញបងប្អូនទៅធ្វើការនៅក្រៅប្រទេសដោយគ្មានការទទួលខុសត្រូវ ព្រោះនោះគឺជាការបោកប្រាស់តែម្តង រួមទាំងថវិកាក្នុងមធ្យោបាយធ្វើដំណើរទៅផង។ ពេលធ្វើដំណើរទៅមានខ្លះទៅជាប់នៅម៉ាឡេស៊ី ឥណ្ឌូណេស៊ី ជាពិសេសគឺជាប់នៅប្រទេសថៃតែម្តង ។ នៅប្រទេសថៃ សម្តេចតេជោបានរំឭកថែមទៀតថា មុខរបរនៅប្រទេសថៃ គឺពុំមានមុខរបរអ្វីប្លែកពីប្រទេសកម្ពុជាទេ ។ ទៅធ្វើការនៅប្រទេសថៃ គេឱ្យច្រូតស្រូវ កាប់អំពៅ ដកដំឡូង គឺសុទ្ធតែមុខរបរកសិកម្មដូចនៅកម្ពុជាដែរ គេពុំដែលឱ្យទៅធ្វើជាថៅកែគេទេ ។ សូម្បីតែប្រាក់ចំណូលក៏វាប្រហាក់ប្រហែលដូចជានៅក្នុងស្រុកខ្មែរដែរ ប៉ុន្តែការចំណាយនោះគឺវាខ្ពស់ ត្រូវបែកក្រុមគ្រួសារ ប្រពន្ធកូន ហើយគ្មានអ្វីជាទីពឹងទេ ទៅខុសច្បាប់ គេចាប់ដាក់ទ្រុងបិទជិត បញ្ជូនត្រឡប់មកវិញ ហាក់បីដូចជាទ្រុងដាក់សត្វពាហនៈអុុីចឹង ។ ដោយឡែក មានខ្លះទៀតទៅជាប់លើកប៉ាល់នេសាទរាប់ឆ្នាំ ទំរាំរំដោះខ្លួន ម្យ៉ាងទៀត ប្រទេសថៃក៏មានបញ្ហារបស់ខ្លួនដែរ ឥឡូវនេះត្រូវបាត់បង់ការងារមួយចំនួនពីអារ៉ាប់ ហើយពលករថៃក៏ត្រូវត្រឡប់មកវិញ ហើយក៏ត្រូវទទួលបន្ទុកអ្នករកការងារពីកម្ពុជាហូរចូលទៀត...។ សូមបញ្ជាក់ថា បើទៅត្រូវច្បាប់ទៅចុះ តែបើទៅខុសច្បាប់កុំទៅឱ្យសោះ ។ សូមអំពាវនាវម្តងទៀតដល់ប្រជាពលរដ្ឋរបស់យើងម្តងហើយម្តងទៀត កុំឱ្យធ្វើចំណាកស្រុកចេញទៅក្រៅប្រទេសប្រថុយប្រថាន ដោយខុសច្បាប់ ។ នៅស្រុកខ្មែរ ក៏មានការពង្រឹងពិពិធកម្មក្នុងវិស័យកសិកម្មដើម្បីចៀសវាងចំណាកស្រុកចោលជនបទមកកាន់ទីក្រុងមករកការងារធ្វើ ។ ប៉ុន្តែបើបានជាជ្រុល ក៏ត្រឹមតែក្នុងស្រុកខ្មែរបានហើយ កុំហួសទៅក្រៅប្រទេស ។ ក្នុងឱកាសនោះ សម្តេចតេជោនាយករដ្ឋមន្ត្រីក៏បានរំឭកផងដែរថា កាលពី៤១ឆ្នាំមុន ពេលនោះគឺកំពុងចលនាយុវជនចូលព្រៃម៉ាគី ហើយកាលពីសប្តាហ៍មុន ១៨ មីនា បន្ទាប់ពីប្រជុំគណៈរដ្ឋមន្ត្រី គឺទៅស្ថានទូតជប៉ុនគោរពវិញ្ញាណក្ខន្ធចំពោះអ្នកដែលបាត់បង់ជីវិតដោយការរញ្ជួយដី និងដោយរលកយក្សស៊ូណាមី ។ ថ្ងៃនេះ២៣ មីនា ខ្ញុំកំពុងឈរអំពាវនាវឱ្យយុវជន និងប្រជាជនកម្ពុជាប្រកបមុខរបរដោយសុខដុមរមនា ។ ប៉ុន្តែកាលពី៤១ឆ្នាំមុនសង្គ្រាមបានផ្ទុះហើយបាត់បង់ការងារទូទាំងប្រទេស អ្វីៗទាំងអស់ក៏ធ្វើអត់បាន...។ ស្ថានភាពគឺផ្លាស់ប្តូរ ដូច្នេះ តើនោះជាកំហុសអ្នកណា...? គឺមិនមែនកំហុសរបស់យើងនៅទីនេះទេ តែផ្តើមចេញពីរដ្ឋប្រហារ១៨ មីនា ដែលធ្វើឱ្យស្ថានភាពដូច្នេះ ។ ឥឡូវគឺយើងចាប់ផ្តើមពីបាតដៃទទេ ដែលភ្នំពេញអត់មានមនុស្សនៅសោះ ។ សម្តេចមានប្រសាសន៍បន្តថា ៤១ឆ្នាំក្រោយ ខ្ញុំអំពាវនាវរឿងមួយផ្សេង ក្នុងគោលដៅដោះស្រាយការងារឱ្យប្រកបដោយចីរភាព និងសម្រាប់រយៈពេលយូរអង្វែង កម្ពុជាចាំបាច់ត្រូវធ្វើទំនើបកម្មសេដ្ឋកិច្ច ពោលគឺ «ជំរុញការអភិវឌ្ឍវិស័យឧស្សាហកម្ម» ។ រាជរដ្ឋាភិបាលយល់យ៉ាងច្បាស់ថា ការងារអភិវឌ្ឍធនធានមនុស្ស គឺជាកត្តាស្នូលក្នុងការអភិវឌ្ឍសង្គម-សេដ្ឋកិច្ច និងបានចាត់ទុកជាការងារអាទិភាព ដូចមានចែងក្នុងយុទ្ធសាស្ត្រចតុកោណដំណាក់កាលទី២នេះ ។ ក្នុងនោះ រាជរដ្ឋាភិបាលត្រូវបន្តអនុវត្តគោលនយោបាយបណ្តុះ បណ្តាលវិជ្ជាជីវៈផ្សារភ្ជាប់ទៅនឹងទីផ្សារពលកម្មដោយសហការយ៉ាងជិតស្និទ្ធជាមួយតួអង្គពាក់ព័ន្ធតាមរយៈវិធានការ៤ចំណុច ទី១-ផ្តល់ការបណ្តុះបណ្តាលជំនាញមូលដ្ឋានដល់ប្រជាពលរដ្ឋនៅជនបទដើម្បីបង្កើនប្រាក់ចំណូល ទី២-ផ្តល់ការបណ្តុះបណ្តាលដល់ពលករតាមរោងចក្រដោយសហការជាមួយនិយោជក ទី៣-បន្តជំរុញការអប់រំ បណ្តុះបណ្តាលបច្ចេកទេស និងវិជ្ជាជីវៈ ដោយពង្រីកសេវានេះឱ្យទៅដល់ខេត្ត-ក្រុងក្នុងនោះមានរួមបញ្ចូលនូវការបណ្តុះបណ្តាលសហគ្រិនភាពទៅក្នុងកម្មវិធីផងដែរ ទី៤-ការរៀបចំបង្កើតទីភ្នាក់ងារជាតិមុខរបរ និងការងារ និងមជ្ឈមណ្ឌលការងារនៅតាមខេត្ត-ក្រុង សម្រាប់ជាយន្តការសម្រួលដល់ការផ្សព្វផ្សាយព័ត៌មានទីផ្សារការងារ ។ បន្តការយកចិត្តទុកដាក់លើកកម្ពស់ប្រព័ន្ធបណ្តុះបណ្តាលវិជ្ជាជីវៈ ផ្សារភ្ជាប់នឹងទីផ្សារការងារ ដើម្បីធានាបានប្រសិទ្ធភាពមានលក្ខណៈទាក់ទាញ បង្កើនការទទួលស្គាល់ជាសាធារណៈ និងស្របតាមចក្ខុវិស័យនៃការធ្វើទំនើបកម្មសេដ្ឋកិច្ចកម្ពុជា ។ ទន្ទឹមនេះ សម្តេចតេជោនាយករដ្ឋមន្ត្រីបានផ្តល់អនុសាសន៍មួយចំនួនដូចតទៅ ៖ ទី១-បន្តអនុវត្តយុទ្ធសាស្ត្រផ្តោតលើកំណើន ការបង្កើនឧត្តមភាពប្រកួតប្រជែង និងពិពិធកម្មជំនាញ វិជ្ជាជីវៈ និងមុខរបរ ដើម្បីរត់តាមល្បឿននៃចរន្តទីផ្សារ ដែលនឹងអាចរក្សាបាននូវនិរន្តរភាពកម្មវិធីផង និងចាប់ច្បាមយកបាននូវផលដែលកើតចេញពីកំណើនសេដ្ឋកិច្ចឱ្យបានច្រើនជាអតិបរមា ។ ទី២-ត្រូវលើកកម្ពស់គុណភាពនៃការអប់រំបណ្តុះបណ្តាលបច្ចេកទេសវិជ្ជាជីវៈ សំដៅបង្កើនឱកាសការងារ ផលិតភាពការងារ និងការបង្កើនប្រាក់ចំណូលរបស់ប្រជាពលរដ្ឋ ។ ត្រូវបន្តការបណ្តុះបណ្តាលវិជ្ជាជីវៈ និងមុខរបរដល់ជនរងគ្រោះ យុវជន និងស្ត្រីក្នុងគ្រួសារក្រីក្រឱ្យមានមុខរបរផ្ទាល់ខ្លួន ឬការងារធ្វើ ដើម្បីលើកស្ទួយកាលានុវត្តភាពការងារ បន្ថយភាពងាយរងគ្រោះ ចូលរួមឱ្យបានច្រើនជាអតិបរមាទៅក្នុងផលិតភាពរបស់ជាតិ និងការលើកកម្ពស់សុពលភាពសង្គម។ ទី៣-ត្រូវពង្រឹងគោលការណ៍បណ្តុះបណ្តាលប្រកបដោយសមធម៌ និងបន្តលើកកម្ពស់ផ្តល់សេវាសុវត្ថិភាពសង្គម ដោយយកចិត្តទុកដាក់ដល់ស្ត្រី ជនបាត់បង់ឱកាស ឬមានឱកាសតិចតួចក្នុងសង្គម យុវជនទីទ័លក្រ និងសិស្សដែលបោះបង់ការសិក្សា យោធិនរំសាយ ចូលនិវត្តន៍បាត់បង់សមត្ថភាពការងារ ពិការ និងគ្រួសារយោធិនពលី មរណៈ ជនអនាថា ដើម្បីឆ្លើយតបនឹងការធ្វើឱ្យប្រសើរឡើងនៃជីវភាពរស់នៅឱ្យកាន់តែមានប្រសិទ្ធភាព និងសកម្ម។ ទី៤-ត្រូវធ្វើឱ្យឃើញច្បាស់ថា វិស័យឯកជនបានចូលរួមចំណែកដល់ការបណ្តុះបណ្តាលជំនាញវិជ្ជាជីវៈយ៉ាងពិតប្រាកដដល់ពលករកម្ពុជា ដូចដែលបណ្តាក្រុមហ៊ុនវិនិយោគនានាតែងបានសន្យាជាមួយរាជរដ្ឋាភិបាលនោះ ។ ឧទាហរណ៍ នៅពេលក្រុមហ៊ុនវិនិយោគមួួយចិញ្ចឹមសត្វនៅតំបន់ណាមួយ ហើយគេចាប់ផ្តើមបណ្តុះបណ្តាលបុគ្គលិក ពេលនោះយើងអាចបញ្ជ្រាបបញ្ចូលប្រជាពលរដ្ឋដែលជាក្រុមគោលដៅនៃការបណ្តុះបណ្តាលឱ្យទទួលបានការបណ្តុះបណ្តាលជាមួយបុគ្គលិកក្រុមហ៊ុននោះតែម្តង ។ ប្រសិនបើអនុវត្តការងារបែបនេះបាននោះ វិសាលភាពនៃការបណ្តុះបណ្តាលរបស់យើងកាន់តែរីកធំហើយអាចធានាបានថា ប្រជាពលរដ្ឋដែលត្រូវទទួលការបណ្តុះបណ្តាលអាចឆ្លើយតបបានទៅនឹងការធ្វើពិពិធកម្មជំនាញ វិជ្ជាជីវៈ និងមុខរបរនោះ ។ ទី៥-ត្រូវបន្តយកចិត្តទុកដាក់រៀបចំសេចក្តីព្រាងច្បាប់ស្តីពីសហជីព ដោយសហការជាមួយស្ថាប័ន ក្រសួងពាក់ព័ន្ធ អង្គការអន្តរជាតិខាងការងារឱ្យចប់សព្វគ្រប់ នៅមុនដំណាច់ឆ្នាំ២០១១ ។ ត្រូវបន្តយក ចិត្តទុកដាក់ពង្រឹងការអនុវត្តច្បាប់ និងបទបញ្ជាពាក់ព័ន្ធនឹងវិស័យការងារ ដោយធានាឱ្យបាននូវភាពសុខដុមរមនានៅក្នុងដំណើរការផលិតកម្ម និងសេវាកម្ម ដើម្បីធានាយ៉ាងពិតប្រាកដនូវសិទ្ធិ ផលប្រយោជន៍កម្មករ និយោជិត និងនិយោជក។ ទី៦-ត្រូវខិតខំដោះស្រាយបញ្ហាប្រាក់ឈ្នួល កម្មករ និយោជិត ដោយឈរលើយន្តការនៃគណៈកម្មការប្រឹក្សាការងារ ។ ដោយឡែក ក៏ត្រូវពង្រឹងការអនុវត្តប្រព័ន្ធសន្តិសុខសង្គម ដោយខិតខំបង្កើតឱ្យបាននូវរបបធានារ៉ាបរងសុខភាព និងប្រាក់សោធននិវត្តន៍ សំដៅធានាឱ្យកម្មករ និយោជិត មានសន្តិសុខប្រាក់ចំណូលទាំងក្នុងពេលបច្ចុប្បន្ន និងអនាគត ។ នៅទីបញ្ចប់ សម្តេចតេជោនាយករដ្ឋមន្ត្រីក៏បានបំពាក់មេដាយជូនថ្នាក់ដឹកនាំ និងមន្ត្រីជាន់ខ្ពស់ ដែលរួមមាន លោកពេជ សោភ័ន រដ្ឋលេខាធិការ មេដាយជាតូបការ លោកអូស្មាន់ ហាស្សាន់ រដ្ឋលេខាធិការ មេដាយជាតូបការ លោកកាន់ ម៉ន រដ្ឋលេខាធិការ មេដាយតូបការ ។ មេដាយព្រះរាជាណាចក្រកម្ពុជាថ្នាក់មហាសេរីវឌ្ឍន៍ចំនួន៨រូប មុនីសារាភ័ណ្ឌថ្នាក់មហាសេរីវឌ្ឍន៍ចំនួន៣រូប ព្រះរាជាណាចក្រកម្ពុជាថ្នាក់ធិបឌិន្ទ ចំនួន៤រូប និងមុនីសារាភ័ណ្ឌថ្នាក់ធិបឌិន្ទចំនួន២រូប ៕  |
| ជិះម៉ូតូទៅចូលរួមពិធីបុណ្យ ត្រូវរថយន្តកាមរីបុកស្លាប់ Posted: 24 Mar 2011 04:23 AM PDT  រាជធានីភ្នំពេញ ៖ បុរសម្នាក់ស្លាប់ភ្លាមៗដោយសាររថយន្តមួយគ្រឿងម៉ាកកាមរី ពណ៌ស ពាក់ស្លាកលេខ ឧត្តរមានជ័យ 2A-0029 បើកបរដោយបុរសម្នាក់ឈ្មោះសោម វិសាល មានទីលំនៅស្រុកសំរោង ភូមិសំរោង ខេត្តឧត្តរមានជ័យ ជាមន្ត្រីអគ្គិសនី លក់គ្រឿងអគ្គិសនី ស្នាក់នៅសង្កាត់ចោមចៅ ខណ្ឌដង្កោ បានបុកម៉ូតូរបស់គាត់ បណ្តាលដួលបោកក្បាលលើថ្នល់ ។ បុរសរងគ្រោះជិះម៉ូតូម៉ាកសង់កូរ៉េ ពណ៌ខៀវ គ្មានស្លាកលេខ គឺជិះតែម្នាក់ឯង លើផ្លូវទំនប់កប់ស្រូវ ភូមិត្រពាំងរាំង សង្កាត់ឃ្មួញ ខណ្ឌសែនសុខ ក៏ត្រូវរថយន្តនោះបុកតែម្តង ។ បើតាមអ្នកឃើញហេតុការណ៍បានប្រាប់ឱ្យដឹងថា មុនពេលកើតហេតុ គេឃើញបុរសរងគ្រោះឈ្មោះប៉ោ ជាមង្គល អាយុ៣៨ឆ្នាំ ជាបុគ្គលិកក្រុមហ៊ុនហ្គ្រេន ស្រុកកំណើតនៅមង្គលបុរី ខេត្តបន្ទាយមានជ័យ ជិះម៉ូតូសង់កូរ៉េ ពណ៌ខៀវ ធ្វើដំណើរទៅចូលរួមបុណ្យនៅក្នុងវត្តកប់ស្រូវ ប៉ុន្តែមិនទាន់ដល់ផង ស្រាប់តែមានរថយន្តកាមរីធ្វើដំណើរស្របគ្នាបុកពីក្រោយ ហើយអូសជាង១០០ម៉ែត្រ ធ្វើឱ្យបុរសនេះ ខ្ទាតបោកក្បាលទៅលើថ្នល់ស្លាប់ភ្លាមៗកាលពីវេលាម៉ោង១៣និង២០នាទីរសៀលថ្ងៃទី២៤ មីនា ២០១១ ។ អ្នកបើករថយន្តប្រុងគេចខ្លួនក៏ត្រូវអ្នកធ្វើដំណើរឃើញហេតុការណ៍នេះចាប់បញ្ជូនឱ្យប៉ូលិសចាត់ការតាមច្បាប់ ហើយជនរងគ្រោះត្រូវបានគ្រួសារនាំយកទៅធ្វើបុណ្យតាមប្រពៃណី៕  |
| ឈាមស្រែកស្បែកហៅចាប់បានជនសង្ស័យបក្សពួកចោរប្លន់សម្លាប់នៅត្រាំកក់ Posted: 24 Mar 2011 03:59 AM PDT     ខេត្តតាកែវ ៖ ជនសង្ស័យជាបក្សពួកក្រុមចោរប្លន់ម្នាក់ ត្រូវបាននគរខេត្តចាប់ខ្លួនបញ្ជូនទៅកាន់ស្នងការដ្ឋាននគរបាលខេត្តទាំងយប់ ដើម្បីសាកសួរ ខណៈដែលជនសង្ស័យម្នាក់នេះបានជិះម៉ូតូរេរា។ រង់ចាំឌុបបក្សពួករបស់គេពេលធ្វើសកម្មភាពរួច។ ការចាប់ខ្លួនជនសង្ស័យនេះក្រោយពីហេតុការណ៍បាញ់សម្លាប់ស្ត្រីរងគ្រោះយ៉ាងឃោរឃៅកាលពីថ្ងៃទី២២ មីនា វេលាម៉ោង២០និង៣០នាទី នៅក្បែរលំនៅឋានជាកន្លែងលក់សាំងតេលាអង្គតាសោម ស្រុកត្រាំកក់។ តាមប្រភពពីលោកវរសេនីយ៍ត្រី សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តឱ្យដឹងថា ក្រោមបញ្ជាផ្ទាល់របស់លោកឧត្តមសេនីយ៍ត្រី អ៊ុក សំណាង ស្នងការនគរបាលខេត្ត ក្រោយពីការកើតហេតុ កម្លាំងប៉ូលិសបានពួនស្ទាក់គ្រប់ច្រកល្ហកនៅតាមបណ្តោយផ្លូវលំ និងផ្លូវជាតិ។ នៅពេលកម្លាំងជិះរថយន្តតាមបណ្តោយផ្លូវជាតិលេខ៣ ក៏បានជួបជនសង្ស័យម្នាក់កំពុងជិះម៉ូតូនៅតាមបណ្តោយផ្លូវជាតិ ប៉ូលិសក៏បានហៅឱ្យឈប់ តែជនសង្ស័យហាក់ដឹងខ្លួនក៏បើកម៉ូតូមានបំណងរត់ ភ្លាមនោះប៉ូលិសតាមប្រមាញ់ដេញតាមតាំងពីថ្នល់បែកគុស រហូតដល់ចំណុចខាងលើត្រូវរថយន្តកៀរម៉ូតូជនសង្ស័យផ្តួលទើបចាប់ខ្លួនបាន។ លោកនាយការិយាល័យបន្តថា ជនសង្ស័យម្នាក់នេះឈ្មោះរស់ សុវណ្ណ ភេទប្រុស អាយុ៣៤ឆ្នាំ មានស្រុកកំណើតនៅភូមិតាមំ ឃុំបាននៀវ ស្រុកឈូក ខេត្តកំពត បច្ចុប្បន្នរស់នៅមិនពិតប្រាកដ រួមជាមួយម៉ូតូ C125 ពណ៌ខ្មៅ ស៊េរី២០១១ មួយគ្រឿង។ លុះថ្ងៃទី២៣ មីនា ប៉ូលិសបាននាំជនសង្ស័យទៅយកកាំភ្លើង អាកា ១ដើម ដែលបក្សពួកបានលាក់ទុកនៅក្នុងព្រៃជាប់ផ្លូវជាតិលេខ៣ ពីផ្ទះកើតហេតុមកថ្នល់បែកគុស មានចំងាយ៣គីឡូម៉ែត្រ។ នៅចំពោះមុខសមត្ថកិច្ច ជនសង្ស័យរស់ សុវណ្ណ បានសារភាពថា ពេលធ្វើសកម្មភាពនោះ រូបគេបានចូលទៅដល់ក្រោយផ្ទះជនរងគ្រោះ មានគម្រោងប្លន់យកទ្រព្យសម្បត្តិ មិនទាន់បានប្លន់ផង ជនរងគ្រោះបានចុចពិលទៅឃើញទើបបក្សពួក២នាក់ទៀតដែលម្នាក់កាន់កាំភ្លើងខ្លី និងម្នាក់ទៀតកាន់កាំភ្លើងអាកា បានភ្ជង់ជនរងគ្រោះមិនឱ្យស្រែក តែដោយការភ័យខ្លាច នារីរងគ្រោះអត់ស្តាប់ទេ ក៏រត់ទើបបក្សពួកខ្លួនបាញ់សម្លាប់តែម្តង។ ចំណែករូបគេគេចខ្លួនចេញទៅខាងកើតផ្ទះ រួចដើរមកយកម៉ូតូជិះគេចខ្លួនដោយអត់ប្លន់អ្វីបានទេ។ ជនរងគ្រោះដែលស្លាប់នោះមានឈ្មោះក្រូច ស្រីមុំ ភេទស្រី អាយុ១៩ឆ្នាំ ឪពុកឈ្មោះក្រូច ហន អាយុ៥៩ឆ្នាំ រងរបួសស្រាល។ ជនរងគ្រោះរស់នៅភូមិអង្គសំរឹទ្ធិ ឃុំស្រែននោង ស្រុកត្រាំកក់។ នៅរសៀលថ្ងៃទី២៤ មីនា ប៉ូលិសបានបញ្ជូនជនសង្ស័យរួមនិងវត្ថុតាងទៅសាលាដំបូងខេត្ត និងតាមចាប់ខ្លួនបក្សពួកមកផ្តន្ទាទោសបន្តទៀត៕  |
| រថយន្តស្តារិចបង្កប់ឈើប្រណីតប្រុងលោតឆត្រទៅព្រំដែនវៀតណាម Posted: 24 Mar 2011 03:48 AM PDT  ខេត្តកំពង់ចាម ៖ យោងតាមការណែនាំរបស់លោកនេត សាវឿន អគ្គស្នងការនគរបាលជាតិ និងលោកឧត្តមសេនីយ៍ទោស៊ាង ប៊ុនលាង ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ កំលាំងនគរបាលសេដ្ឋកិច្ចក្រសួង បានសហការជាមួយនគរបាលសេដ្ឋកិច្ចនៃស្នងការដ្ឋានខេត្ត បង្រ្កាបបានរថយន្តម៉ាកស្តារិច១គ្រឿង ដែលលួចដឹកឈើប្រណីតខុសច្បាប់នៅត្រង់ចំណុចឡូត៍កៅស៊ូលេខ២៥ មូលដ្ឋានចំការកៅស៊ូពាមជាំង ស្រុកអូររាំងឪ កាលពីវេលាម៉ោង៥ និង១០នាទីល្ងាចថ្ងៃទី២៣មីនា ដែលបំរុងនាំទៅលក់នៅព្រំដែនវៀតណាម ។ លោកវរសេនីយ៍ត្រីហឿន វីណា អនុប្រធានការិយាល័យប្រឆាំងបទល្មើសសេដ្ឋកិច្ចក្រសួងមហាផ្ទៃ មានប្រសាសន៍ឱ្យដឹងថា កម្លាំងមូលដ្ឋានបានរាយការណ៍មករូបលោកថា មានរថយន្ត១គ្រឿងម៉ាកស្តារិចបើកឆ្លងស្ពានព្រែកតាមាក់ចូលមកខេត្តកណ្តាល និងបន្តមកកាន់ស្រុកអូររាំងឪសង្ស័យមានបង្កប់ឈើប្រណីតក្នុងគោលបំណងយកទៅលក់នៅប្រទេសជិតខាង ។ ក្រោយពីទទួលបានព័ត៌មាននេះភ្លាម រូបលោក បានបញ្ជាឱ្យកម្លាំងក្រោមឱវាទចុះសហការជាមួយនឹងនគរបាលសេដ្ឋកិច្ចខេត្តត្រៀមកំលាំងចាំឃ្លាំមើលនៅក្នុងឡូត៍កៅស៊ូពាមជាំងរហូតដល់វេលាម៉ោង៥ និង១០នាទីល្ងាចថ្ងៃដដែល ក៏ឃើញរថយន្តដែលមានភិនភាគគួរឱ្យសង្ស័យនោះមែន ។ លោកហឿន វីណា បានបន្តទៀតថា លុះពេលឃាត់ធ្វើការឆែកឆេរឃើញមានឈើប្រណីតលេខ១ ប្រភេទនាងនួន និងគ្រញូងចំនួន៧ដុំ ក៏បញ្ជូនមកកាន់ស្នងការដ្ឋាននគរបាលខេត្តរួមជាមួយអ្នកបើកបរឈ្មោះលី ម៉េង ភេទប្រុស អាយុ៣៣ឆ្នាំ មានទីលំនៅក្នុងសង្កាត់ទឹកល្អក់ ខណ្ឌទួលគោក រាជធានីភ្នំពេញ ។ អ្នកបើកបររថយន្តរូបនេះបានឆ្លើយថាឈើទាំងនេះគឺដឹកចេញពីភ្នំពេញក្នុងគោលដៅយកទៅស្រុកមេមត់ជាប់ព្រំដែនប្រទេសវៀតណាម ។ បន្ទាប់មកនៅវេលាម៉ោង១០ និង៥០នាទីព្រឹកថ្ងៃទី២៤ មីនា ក៏បានរៀបចំបែបបទប្រគល់ឱ្យទៅលោកជា បញ្ញា នាយរងសង្កាត់រដ្ឋបាលព្រៃឈើស្រីសន្ធរ ដើម្បីចាត់ការតាមច្បាប់ ៕  |
| អាជ្ញាធរវាយកំទេចផ្ទះថ្មជាន់ទី២ដែលសាងសង់គ្មានច្បាប់តាមបណ្តឹងអ្នកជាន់ក្រោម Posted: 24 Mar 2011 03:41 AM PDT   រាជធានីភ្នំពេញ ៖ ផ្ទះល្វែងជាន់ទី២ដែលបានសាងសង់រួចរាល់ហើយនោះ ត្រូវបានអាជ្ញាធរខណ្ឌទួលគោកប្រើកម្លាំងចុះទៅវាយកំទេចចោលកាលពីវេលាព្រឹកថ្ងៃទី២៤ មីនា ដោយអះអាងថា លំនៅឋាននោះសាងសង់គ្មានច្បាប់អនុញ្ញាត ហើយការសាងសង់ទៀតសោធ នៅលើអគារសំណង់ចាស់ទ្រុឌទ្រោម និងមានពាក្យបណ្តឹងរបស់ប្រជាពលរដ្ឋដែលរស់នៅជាន់ក្រោម ។ សំណង់អត់ច្បាប់ដែលមានការប្តឹងទំទាស់នោះត្រូវសមត្ថកិច្ចឱ្យដឹងថា ស្ថិតនៅផ្ទះលេខ៧៧៤Eo មហាវិថីកម្ពុជាក្រោម សង្កាត់ទឹកល្អក់ទី១ ខណ្ឌទួលគោក ដែលមានម្ចាស់ឈ្មោះឈ ហ៊ាងស៊ា ភេទប្រុស ។ លំនៅឋាននោះជាន់ទី២ ស្ថិតនៅលើផ្ទះ៣ល្វែងដែលជាសំណង់ចាស់ ។ តាមលោកធឹម សំអាន អភិបាលរងខណ្ឌទួលគោកបានឱ្យដឹងថា សំណង់ខាងលើនេះពុំមានច្បាប់អនុញ្ញាតឡើយ សាងសង់លើសំណង់ចាស់ទ្រុឌទ្រោម ហើយការសាងសង់នោះមានប្រជាពលរដ្ឋរស់នៅជាន់ក្រោមប្តឹងជំទាស់ ។ ប្រភពដដែលបន្តថា នៅពេលសាងសង់ អាជ្ញាធរខណ្ឌក៏ដូចភូមិបាលខណ្ឌចុះទៅហាមឃាត់ និងណែនាំឱ្យម្ចាស់ផ្ទះសុំច្បាប់ឱ្យបានត្រឹមត្រូវ តែម្ចាស់មិនស្តាប់តាមការណែនាំនៅតែបន្តសាងសង់រហូតដល់ចប់រួចរាល់ ។ លោកអភិបាលរងខណ្ឌទួលគោកបានបន្តទៀតថា ការចុះវាយសំណង់អត់ច្បាប់ចោលនេះ ធ្វើឡើងទៅតាមលិខិតរបស់សាលារាជធានីភ្នំពេញលេខ៤១៤ចុះថ្ងៃទី២២ តុលា ឆ្នាំ២០១០ និងលិខិតជាបន្តបន្ទាប់ចំនួន២ទៀតរបស់សាលារាជធានីភ្នំពេញ ។ មុនពេលប្រើកម្លាំង អាជ្ញាធរខណ្ឌទួលគោកបានធ្វើលិខិតជូនដំណឹងជាបន្តបន្ទាប់ ដើម្បីឱ្យម្ចាស់រុះរើចេញ តែម្ចាស់មិនស្តាប់តាមការណែនាំទើបអាជ្ញាធរប្រើវិធានការរដ្ឋបាលចុះមកវាយតែម្តង ។ តាមលិខិតលេខ៤១៤ ចុះថ្ងៃទី២២ តុលា ឆ្នាំ២០១០ដោយលោកស្រីទូច សារ៉ុម អភិបាលរងសាលារាជធានីភ្នំពេញ បានជម្រាបទៅអភិបាលខណ្ឌទួលគោក និងលោកប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី រាជធានីភ្នំពេញ បានឱ្យដឹងថា សំណង់ថ្មីបន្ថែមជាន់ទី២របស់ឈ្មោះឈ ហ៊ាងស៊ា សាងសង់បន្តុបពីលើអគារចាស់ទ្រុឌទ្រោមផ្ទះលេខ៧៧៤Eo ផ្លូវលេខ១២៨ (ផ្លូវកម្ពុជាក្រោម) សង្កាត់ទឹកល្អក់ទី១ ខណ្ឌទួលគោកដោយពុំមានលិខិតអនុញ្ញាតពីសាលារាជធានីភ្នំពេញ និងមានបណ្តឹងពីអ្នករស់នៅជាន់ក្រោមផង ទើបសាលារាជធានីភ្នំពេញសូមណែនាំឱ្យម្ចាស់ផ្ទះសង់ថ្មីធ្វើការរុះរើចេញ។ ក្នុងករណីម្ចាស់សំណង់មិនអនវុត្តតាមការណែនាំទេ អាជ្ញាធរខណ្ឌត្រូវអនុវត្តវិធានការរដ្ឋបាលដោយរុះរើសំណង់នោះចេញដើម្បីសុវត្ថិភាពអ្នករស់នៅជាន់ក្រោម ៕  |
| តុលាការបិទផ្ទះសំណាក់ម៉ីហួរក្នុងខណ្ឌដូនពេញ Posted: 24 Mar 2011 03:23 AM PDT  រាជធានីភ្នំពេញ ៖ កាលពីរសៀលថ្ងៃទី២៤ មីនា ២០១១ គណៈកម្មការចម្រុះសាលាខណ្ឌដូនពេញ ដឹកនាំដោយលោកមាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ លោកសុខ ពេញវុធ អភិបាលរងខណ្ឌដូនពេញ លោកហែម រិទ្ធី នាយករងរដ្ឋបាលខណ្ឌដូនពេញព្រមទាំងមន្ត្រីជំនាញបានធ្វើការបិទទ្វារផ្ទះសំណាក់យីហោម៉ីហួរមានទីតាំងស្ថិតក្នុងសង្កាត់ស្រះចក ខណ្ឌដូនពេញ ជាបណ្តោះអាសន្ន ក្រោយពីសាលាខណ្ឌដូនពេញ ផ្អាកអាជីវកម្មផ្ទះសំណាក់នេះពាក់ព័ន្ធនឹងបញ្ហាគ្រឿងញៀន ។ លោកហែម រិទ្ធី នាយករងរដ្ឋបាលសាលាខណ្ឌដូនពេញបានឱ្យដឹងថា ការបិទអាជីវកកម្មផ្ទះសំណាក់យីហោម៉ីហួរ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ គឺយោងតាមដីកាលេខ២៦០០តព្រ ចុះថ្ងៃទី៣ មីនា២០១១ ចុះហត្ថលេខាដោយលោកអឿង សៀង ចៅក្រមស៊ើបសួរសាលាដំបូងរាជធានីភ្នំពេញ ។ គួររំលឹកថា កាលពីថ្ងៃទី១៥ កុម្ភៈ ២០១១ វេលាម៉ោង១០និង១០នាទីព្រឹក ការិយាល័យនគរបាលប្រឆាំងគ្រឿងញៀនសហការជាមួយសាលាខណ្ឌដូនពេញ បានឆ្មក់ចូលបន្ទប់លេខ១A ក្នុងផ្ទះសំណាក់យីហោម៉ីហួរ តាមបណ្តោយមហាវិថីព្រះមុនីវង្ស សង្កាត់ស្រះចក ខណ្ឌដូនពេញ ហើយឃាត់ខ្លួនស្ត្រីម្នាក់ឈ្មោះវ៉ាង ស្រីមុំ អាយុ២៤ឆ្នាំ ស្នាក់នៅផ្ទះលេខ៩៣E1 ផ្លូវលេខ១៤០ សង្កាត់មនោរម្យ ខណ្ឌ៧មករា ដោយមិនរំខានដល់នគរបាលប៉ុស្តិ៍រដ្ឋបាលស្រះចកឡើយ សមត្ថកិច្ចដកហូតបានគ្រឿងញៀនប្រភេទម៉ាទឹកកកចំនួន៧កញ្ចប់តូចនៅក្នុងកាបូបស្ត្រីនោះ ។ ផ្ទះសំណាក់ម៉ីហួរដែលមានទីតាំងលេខ២៧ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ ចោទពីបទចែកចាយគ្រឿងញៀន ខុសច្បាប់ និងផ្តល់ទីតាំងសម្រាប់ចែកចាយគ្រឿងញៀនខុសច្បាប់តាមមាត្រា៣៥.២ថ្មី និងមាត្រា៣៦ថ្ងៃនៃច្បាប់ស្តីពីវិសោធនកម្មច្បាប់ស្តីពីការត្រួតពិនិត្យគ្រឿងញៀន ។ គួរបញ្ជាក់ផងដែរថា កាលពីថ្ងៃទី២២ មីនា ២០១១ គណៈកម្មការចម្រុះសាលាខណ្ឌដូនពេញដឹកនាំដោយលោកហែម រិទ្ធី នាយករងរដ្ឋបាល បានធ្វើការបិទអាជីវកកម្ម ផ្ទះសំណាក់យីហោរស្មីផ្កាឈូក២ ផ្លូវលេខ១៧២ សង្កាត់ផ្សារថ្មីទី៣ ខណ្ឌដូនពេញ ក្រោយពីសាលាខណ្ឌឆ្មក់ចូលបង្ក្រាបជនប្រើប្រាស់គ្រឿងញៀនប្រុស-ស្រីចំនួន១១នាក់ និងម្ចាស់ផ្ទះសំណាក់ឈ្មោះព្រំ សុធា ភេទប្រុស អាយុ៣៦ឆ្នាំ បច្ចុប្បន្នត្រូវបានតុលាការចេញដីកាឃុំខ្លួននៅពន្ធនាគារព្រៃសពីបទសម្រួលទីតាំងដោយចេតនាឱ្យអ្នកដទៃប្រើប្រាស់នូវគ្រឿងញៀនដែលបណ្តាលឱ្យមានគ្រោះថ្នាក់ធ្ងន់ធ្ងរ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
