Koh Santipheap Daily |
- បារាំងបើកការវាយប្រហារប្រឆាំងលោកកាដាហ្វី មុនគេ
- លោកកាដាហ្វី សច្ចាសងសឹកការវាយប្រហាររបស់ប្រទេសលោកខាងលិច
- ការបង្ក្រាបល្បែងធ្វើឡើងយ៉ាងក្តៅគគុកពីមួយថ្ងៃទៅមួយថ្ងៃ
- បារាំងបដិសេធពីការបាញ់ធ្លាក់យន្តហោះរបស់ខ្លួននៅលីប៊ី
- ន័រវេសបញ្ជូនយន្តហោះចម្បាំង F16 ចំនួន6គ្រឿងចូលរួមប្រតិបត្តិការសឹកប្រឆាំងលីប៊ី
- នគរបាលចរាចរសហការជាមួយយុវជនកាកបាទក្រហមស្ម័គ្រចិត្តផ្សព្វផ្សាយច្បាប់ចរាចរណ៍
- ក្រុមប្រឹក្សាឃុំ-សង្កាត់៤០០នាក់ ស្នើឱ្យកាត់ទោសមេដឹកនាំខ្មែរក្រហមបានឆាប់
- ប្រទេស៥បើកការវាយប្រហារប្រឆាំងមេដឹកនាំផ្តាច់ការលីប៊ី លោកមូអាម៉ា កាដាហ្វី
- ភាពភ័យខ្លាចវិទ្យុសកម្មធ្វើឱ្យប្រជាជនចិននាំគ្នាទិញអំបិលទុកក្នុងផ្ទះ
- មិនទាន់មានពន្លឺយ៉ាងណាទេ សម្រាប់ការសុំលើកលែងទោសរបស់វីរ៉ា ស៊ុមខ្វាមឃីត និងស្ត្រីរ៉ាទ្រី
- ក្រុមហ៊ុន Nukepills.com បញ្ជូនថ្នាំប៉ូតាស្យូម អ៊ីអូឌីត (Potassium iodide) ទៅជប៉ុន
- លោកនាយរងប៉ុស្តិ៍អន្តោប្រវេសន៍ច្រកទ្វារអន្តរជាតិបើករថយន្តទំនើងរេពេញផ្លូវផ្អើលអ្នកក្រុងប៉ោយប៉ែត
- ខ្មាន់កាំភ្លើងបាញ់សម្លាប់ឪពុក ម្តាយ និងកូនក្រមុំ សមត្ថកិច្ចសង្ស័យគំនុំ និងពាលស៊ីពាល
- នគរបាលរាជធានីភ្នំពេញបំបែកសំណុំរឿងចោរប្លន់ប្រាក់ក្រុមហ៊ុនប្រេងសាវីម៉ិច៦ម៉ឺនដុល្លារ
- បញ្ជូនម្ចាស់ផ្ទះសំណាក់រស្មីផ្កាឈូក២ទៅតុលាការ និងអ្នកប្រើប្រាស់គ្រឿងញៀន១១នាក់
- ទទួលទានសាន់វិចធ្វើពីត្រីធូណាការពារងងឹតភ្នែកក្នុងវ័យចាស់
- ស្ថានភាពនៅរោងចក្រនុយក្លេអ៊ែរហ្វូគូស៊ីម៉ា កំពុងមានភាពល្អប្រសើរឡើងវិញ
- មាក់ងាយកូនក្រមុំគេ ពេលសួរនាំ២នាក់ឪពុកកូនព្រួតគ្នាកាប់ ប៉ូលិសចាប់ខ្លួន
- ប៉ូលិសឃាត់ខ្លួនបុរសម្នាក់ពីបទលាក់ទុកអាវុធអាកាកាត់ស្វាយខុសច្បាប់
- ប៉េអឹមក្រុងចាប់រថយន្តដឹកឈើមួយគ្រឿងប្រគល់ឱ្យមេព្រៃ
| បារាំងបើកការវាយប្រហារប្រឆាំងលោកកាដាហ្វី មុនគេ Posted: 20 Mar 2011 12:28 AM PDT កងទ័ពអាកាសបារាំង បានបើកការវាយប្រហារមុនគេប្រឆាំងនឹងកងទ័ពរបស់មេដឹកនាំផ្តាច់ការលីប៊ី លោកមូអាម៉ា កាដាហ្វី រយៈពេលប៉ុន្មានម៉ោងក្រោយ ពីកិច្ចប្រជុំកំពូលក្រុងប៉ារីសស្តីអំពីការអន្តរាគមន៍របស់យោធា កាលពីថ្ងៃទី១៩ មីនា កន្លងមក ។ នេះបើតាមការឱ្យដឹងដោយអ្នកនាំពាក្យសេនាធិការបារាំង លោក Thierry Burckhard ។  |
| លោកកាដាហ្វី សច្ចាសងសឹកការវាយប្រហាររបស់ប្រទេសលោកខាងលិច Posted: 20 Mar 2011 12:28 AM PDT ថ្លែងតាមទូរទស្សន៍រដ្ឋ លោកមូអាម៉ា កាដាហ្វី ថ្លែងថា ធម្មនុញ្ញរបស់អង្គការសហប្រជាជាតិផ្តល់សិទ្ធិដល់លីប៊ី ដើម្បីការពារខ្លួននៅពេលមានសង្គ្រាមដោយលោកសច្ចាថា នឹងសងសឹកការវាយប្រហាររបស់សម្ព័ន្ធភាពចម្រុះរបស់អាមេរិក បារាំង និងអង់គ្លេសនោះ ។  |
| ការបង្ក្រាបល្បែងធ្វើឡើងយ៉ាងក្តៅគគុកពីមួយថ្ងៃទៅមួយថ្ងៃ Posted: 20 Mar 2011 12:15 AM PDT  ខេត្តកំពង់ចាម ៖ សង្វៀនបញ្ជល់មាន់ដុះស្លែមួយកន្លែងស្ថិតនៅភូមិមេ.ស ឃុំព្រែកកុយស្រុកកងមាស ត្រូវបានលោកឧត្តមសេនីយ៍ត្រី នួន សាមិន ស្នងការនគរបាលខេត្ត និងលោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ បញ្ជាឱ្យកម្លាំងនគរបាលព្រហ្មទណ្ឌកម្រិតស្រាលខេត្ត ចុះបង្ក្រាបកាលពីវេលាម៉ោង៣និង៣០នាទីថ្ងៃទី១៨ មីនា ឆ្នាំ២០១១ ជាមួយនឹងការបង្ក្រាបនេះសមត្ថកិច្ចឃាត់អ្នកលេងបានចំនួន៦នាក់ និងដកហូតបានវត្ថុតាងមានមាន់គកចំនួន៣ក្បាល ស៊ុមក្រុងមាន់ចំនួន១០ និងម៉ូតូចំនួន១១គ្រឿង បញ្ចូនមកកាន់ស្នងការដ្ឋាននគរបាលខេត្ត ។ តាមលោកវរសេនីយ៍ត្រី មិន សុគន្ធវិបុល នាយការិយាល័យព្រហ្មទណ្ឌកម្រិតស្រាលខេត្ត បានឱ្យដឹងថា ដោយមានសេចក្តីរាយការណ៍ពីមូលដ្ឋានថា នៅភូមិមេ.ស ឃុំព្រែកកុយ មានបើកសង្វៀនបញ្ជល់មាន់ខុសច្បាប់ លោកក៏សុំគោលការណ៍ពីលោកស្នងការ និងស្នងការរងខេត្ត ដើម្បីមានវិធានការបង្ក្រាប ។ ក្រោយពីបានទទួលបញ្ជាពីលោកស្នងការខេត្តហើយនោះ រូបលោកបានដឹកនាំកម្លាំងក្រោមឱវាទ ចុះទៅបង្ក្រាបនារសៀលថ្ងៃទី១៨ មីនា នោះ ដោយមានការចូលរួមពីលោកផាន់ សុភ័ក្រ្ត ព្រះរាជអាជ្ញារងអមសាលាដំបូងខេត្តផងដែរ ។ លោកមិន សុគន្ធវិបុល បានឱ្យដឹងទៀតថា តាមការប៉ាន់ក្រុមអ្នកលេងដែលមានគ្នាប្រហែលជាង១០០នាក់ឯណោះ ដោយពួកគេបាននាំគ្នារត់កាត់តាមវាលស្រែប្រសាច តែត្រូវដេញព័ទ្ធចាប់បានចំនួន៦នាក់ រួមមាន ១-ឈ្មោះជាង សុភ័ក្រ្ត ភេទប្រុស អាយុ៣០ឆ្នាំ រស់នៅស្រុកមុខកំពូល ខេត្តកណ្តាល ២-ឈ្មោះថាំ សុំ ភេទប្រុស រស់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ៣-ឈ្មោះទន់ គានហួត ភេទប្រុស អាយុ២៥ឆ្នាំ នៅភូមិវាលធ្នង់ ឃុំបុសខ្នុរ ស្រុកចំការលើ ខេត្តកំពង់ចាម ៤-ឈ្មោះហេង រ៉ាវី ភេទប្រុស អាយុ១៩ឆ្នាំ រស់នៅភូមិរកាកោងទី១ ឃុំរកាកោងទី១ ស្រុកមុខកំពូល ខេត្តកណ្តាល ៥-ឈ្មោះឈិត ភាង ភេទប្រុស អាយុ៣៨ឆ្នាំ រស់នៅភូមិកងតាណឹង ឃុំកងតាណឹង ស្រុកកងមាស ខេត្តកំពង់ចាម ៦-ឈ្មោះស៊ុន រ៉េន ភេទប្រុស អាយុ៥៨ឆ្នាំ រស់នៅភូមិព្រែកផ្តៅ ឃុំរកាកោងទី១ ស្រុកមុខកំពូល ខេត្តកណ្តាល ។ លោកវរសេនីយ៍ត្រី មិន សុគន្ធវិបុល បានបញ្ជាក់ថា ក្រោយពីក្រុមអ្នកញៀននឹងល្បែងបញ្ជល់មាន់រត់បែកខ្ញែកគ្នានោះ ចំពោះវត្ថុតាងនៅនឹងសង្វៀនគឺរឹបអូសបានម៉ូតូចំនួន១១គ្រឿង ស៊ុមក្រុងមាន់ចំនួន១០ និងមាន់គកចំនួន៣ក្បាល បញ្ជូនមកកាន់ស្នងការដ្ឋាននគរបាលខេត្ត និងកសាងសំណុំរឿងបញ្ជូនទៅឲ្យលោកព្រះរាជអាជ្ញាចាត់ការតាមច្បាប់ ។ ចំពោះសកម្មភាពបង្រ្កាបល្បែងស៊ីសងត្រូវបានកត់សំគាល់ឃើញថា បាននិងកំពុងធ្វើឡើងប្រៀបបានភ្លៀងរលឹមដោយមិនដកដៃទេ សំដៅធ្វើយ៉ាងណាឲ្យភូមិ-ឃុំមានសុវត្ថិភាព មិនមានចោរលួចចោរប្លន់ដែលកើតចេញមកពីប្រភពល្បែងស៊ីសងនេះ ៕  |
| បារាំងបដិសេធពីការបាញ់ធ្លាក់យន្តហោះរបស់ខ្លួននៅលីប៊ី Posted: 20 Mar 2011 12:07 AM PDT ប្រភពយោធាបារាំងបានបដិសេធរបាយការណ៍នានាដែលថា យន្តហោះចម្បាំងមួយគ្រឿងក្នុងចំណោមយន្តហោះចម្បាំងរបស់បារាំងដែលធ្វើប្រតិបត្តិការសឹកនៅប្រទេសលីប៊ី ត្រូវបានបាញ់ធ្លាក់ ។  |
| ន័រវេសបញ្ជូនយន្តហោះចម្បាំង F16 ចំនួន6គ្រឿងចូលរួមប្រតិបត្តិការសឹកប្រឆាំងលីប៊ី Posted: 20 Mar 2011 12:07 AM PDT ទីភ្នាក់ងារព័ត៌មានន័រវេស NTB រាយការណ៍កាលពីថ្ងៃទី២០ មីនា ថា យន្តហោះចម្បាំងធុន F16 របស់ន័រវេស៦គ្រឿង នឹងត្រូវបញ្ជូនទៅចូលរួមប្រតិបត្តិការសឹកដែលដឹកនាំដោយបណ្តាប្រទេសលោកខាងលិច ប្រឆាំងប្រទេសលីប៊ី ក្រោយពីកងទ័ពអាកាសន័រវេសទទួលបានការអនុញ្ញាត ។ ទីភ្នាក់ងារព័ត៌មានដដែលឱ្យដឹងទៀតថា កងទ័ពអាកាសន័រវេស កាលពីយប់ថ្ងៃទី១៩ មីនា ទទួលបានបញ្ជាឱ្យត្រៀមយន្តហោះចម្បាំង F16 ចំនួន៦គ្រឿង និងអ្នកបើកជាង១០០នាក់ សម្រាប់ប្រតិបត្តិការនៅក្នុងប្រទេសលីប៊ី ។  |
| Posted: 19 Mar 2011 11:51 PM PDT   ខេត្តបន្ទាយមានជ័យ ៖ ក្រោយពីច្បាប់ចរាចរណ៍ផ្លូវគោក ដាក់ឱ្យប្រើប្រាស់ជាធរមានហើយនោះ នៅមានបុគ្គលមួយចំនួនពុំទាន់គោរពច្បាប់ចរាចរណ៍នេះនៅឡើយទេ ដូចជាអ្នកបើកបរម៉ូតូខ្លះមិនពាក់មួកសុវត្ថិភាព ម៉ូតូគ្មានកញ្ចក់មើលក្រោយ និងគ្មានស្លាកលេខ ហើយអ្នកបើកបររថយន្តខ្លះបានបើកហួសល្បឿនកំណត់ ក្នុងច្បាប់ឱ្យបើកតែ៤០គីឡូម៉ែត្រក្នុងមួយម៉ោង នៅក្នុងទីប្រជុំជន និងក្រៅទីប្រជុំឱ្យបើកបរត្រឹមតែ៦០គីឡូម៉ែត្រក្នុងមួយម៉ោងប៉ុណ្ណោះ ។ ទន្ទឹមនឹងនោះផងដែរ អ្នកបើកបរយានយន្ត ឬទោចក្រយានយន្តមួយចំនួន បានផ្ទុកទំនិញហួសកំណត់ដឹកសំពីងសំពោងធ្វើឱ្យបាត់បង់សណ្តាប់ធ្នាប់ដែលក្នុងនោះក៏មានរថយន្តផ្ទុកទំនិញធំៗ បានកែច្នៃតកន្ទុយខុសលក្ខណៈបច្ចេកទេស ហើយក៏មានបុគ្គលខ្លះបើកបរមានជាតិស្រវឹងដែលកត្តាទាំងអស់នេះហើយ បង្កឱ្យកើតមានគ្រោះថ្នាក់ចរាចរណ៍ជាញឹកញាប់ បណ្តាលឱ្យមនុស្សរងរបួសក្លាយជាជនពិការ និងស្លាប់គួរឱ្យរន្ធត់ ក្នុងនោះធ្វើឱ្យខូចខាតទ្រព្យសម្បត្តិផ្ទាល់ខ្លួន និងទ្រព្យសម្បត្តិសាធារណៈជាច្រើនផងដែរ។ ដូច្នេះ ដើម្បីឱ្យការគោរពច្បាប់ចរាចរណ៍ផ្លូវគោកនេះមានប្រសិទ្ធភាព និងតម្លាភាពនោះនៅព្រឹកថ្ងៃទី១៨ មីនា ឆ្នាំ២០១១ កម្លាំងជំនាញចរាចរខេត្តបន្ទាយមានជ័យ ចំនួន១៥នាក់ បានសហការជាមួយក្រុមយុវជនកាកបាទក្រហមកម្ពុជាស្ម័គ្រចិត្តចំនួន១៥នាក់ បានចុះពង្រឹង និងផ្សព្វផ្សាយនូវច្បាប់ចរាចរណ៍ផ្លូវគោក និងចែកនូវខិត្តប័ណ្ណជូនដល់មហាជន ប្រជាពលរដ្ឋ និងអ្នកបើកបរទោចក្រយានយន្ត និងយានយន្តគ្រប់ប្រភេទ ឱ្យបានយល់ជ្រួតជ្រាបផងដែរ ហើយនឹងចូលរួមអនុវត្តច្បាប់ចរាចរណ៍ ដើម្បីកាត់បន្ថយអត្រានៃការគ្រោះថ្នាក់ចរាចរណ៍ ។ លោកវរសេនីយ៍ត្រី គី មករា និងលោកវរសេនីយ៍ត្រី សន គឹមសួគ៌ នាយរងការិយាល័យចរាចរជើងគោកខេត្តបានឱ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ស្នងការ និងការបញ្ជាផ្ទាល់ពីលោកនាយការិយាល័យចរាចរណ៍ខេត្ត លោកបានដឹកនាំកម្លាំងជំនាញដោយសហការជាមួយយុវជនស្ម័គ្រចិត្តកាកបាទក្រហមកម្ពុជា ចុះផ្សព្វផ្សាយ និងចែកខិត្តប័ណ្ណច្បាប់ចរាចរណ៍តាមទីប្រជុំជន និងភ្លើងស្តប់ ។ ក្នុងខិត្តប័ណ្ណដែលផ្សព្វផ្សាយនោះ គឺ ណែនាំឱ្យអ្នកបើកបរទោចក្រយានយន្ត និងយានយន្តគ្រប់ប្រភេទត្រូវពាក់មួកសុវត្ថិភាព ហាមបើកបរហួសល្បឿនកំណត់ ឬក្រោមឥទ្ធិពលនៃជាតិស្រវឹងដែលប្រឈមមុខនឹងការគ្រោះថ្នាក់ទទួលការផាកពិន័យ ឬផ្តន្ទាទោសតាមច្បាប់ ហាមផ្ទុកលើសចំណុះ ឬសំពីងសំពោងជាហេតុបណ្តាឱ្យកើតមានគ្រោះថ្នាក់ជាយថាហេតុ ៕  |
| ក្រុមប្រឹក្សាឃុំ-សង្កាត់៤០០នាក់ ស្នើឱ្យកាត់ទោសមេដឹកនាំខ្មែរក្រហមបានឆាប់ Posted: 19 Mar 2011 11:48 PM PDT  រាជធានីភ្នំពេញ ៖ ក្រុមប្រឹក្សាឃុំ-សង្កាត់ប្រមាណ៤០០នាក់ បានស្នើសុំដល់អង្គជំនុំជម្រះវិសាមញ្ញក្នុងតុលាការកម្ពុជា ធ្វើការកាត់ទោសមេដឹកនាំខ្មែរក្រហមទាំង៥រូប ដែលកំពុងជាប់គុកនៅសាលាក្តីនាពេលនេះឱ្យបានឆាប់ ព្រោះពួកអ្នកទាំងនោះមានវ័យកាន់តែចាស់ជរាណាស់ទៅហើយ បើមិនប្រញាប់កាត់ទោសទេ ពួកគាត់អាចស្លាប់អស់មុនពេលកាត់ទោស ។ លោកកែវ ស៊ីផាន ជាតំណាងក្រុមប្រឹក្សាឃុំ-សង្កាត់មកពីខេត្តស្វាយរៀង បានថ្លែងថា ប្រជាពលរដ្ឋបានផ្តាំមកលោកប្រធានសាលាក្តីខ្មែរក្រហមឱ្យកាត់ទោសមេដឹកនាំខ្មែរក្រហមទាំងនេះឱ្យបានឆាប់ព្រោះពួកគាត់មានការបារម្ភថាពួកមេដឹកនាំខ្មែរក្រហមទាំងនេះអាចនឹងស្លាប់មុនពេលកាត់ទោស ។ សូមបញ្ជាក់ថា មេដឹកនាំខ្មែរក្រហមដែលកំពុងជាប់ឃុំឃាំង មានកាំង ហ្គិចអ៊ាង ហៅឌុច, នួន ជា, ខៀវ សំផន, អៀង សារី និងអៀង ធីរិទ្ធ ៕  |
| ប្រទេស៥បើកការវាយប្រហារប្រឆាំងមេដឹកនាំផ្តាច់ការលីប៊ី លោកមូអាម៉ា កាដាហ្វី Posted: 19 Mar 2011 11:47 PM PDT     សំឡេងផ្ទុះ និងការបាញ់កាំភ្លើងប្រឆាំងយន្តហោះបានលាន់កក្រើកលើទីក្រុងទ្រីប៉ូលី រដ្ឋធានីលីប៊ី កាលពីវេលាព្រលឹមស្រាងៗនាថ្ងៃទី២០ មីនា ២០១១។ មន្ទីរប៉ង់តាហ្គោននិយាយថា នោះគឺជាការវាយប្រហារដោយមីស៊ីលជាលើកដំបូងរបស់សហរដ្ឋអាមេរិក ប្រឆាំងមេដឹកនាំលីប៊ី ដែលក្រាញអំណាច លោកមូអាម៉ា កាដាហ្វី ។ មីស៊ីលនោះគឺបាញ់ចេញពីនាវាចម្បាំងដែលដាក់ពង្រាយនៅឯផ្ទៃសមុទ្រមេឌីទែរ៉ាណេ ។ មន្ត្រីជាន់ខ្ពស់អាមេរិកសុំមិនបញ្ចេញឈ្មោះនិយាយថា ការវាយប្រហារនោះគឺសំដៅទៅលើទីតាំងការពារដែនអាកាសនៅតាមបណ្តោយឆ្នេរសមុទ្រលីប៊ី ជុំវិញរដ្ឋធានីទ្រីប៉ូលី ។ មន្ត្រីដដែលឱ្យដឹងទៀតថា នេះជាការវាយប្រហារលើកទីមួយប៉ុណ្ណោះ ពាក់ព័ន្ធជាមួយនឹងការប្រើប្រាស់នាវាចម្បាំង និងយន្តហោះរបស់អាមេរិក ។ មន្ត្រីមន្ទីរប៉ង់តាហ្គោននិយាយថា ការវាយប្រហារនោះធ្វើឡើងក្នុងគោលបំណងទាមទារឱ្យយោធារបស់ប្រទេសលីប៊ីបើកផ្លូវអាកាស ពិសេសដើម្បីជួយការពារយន្តហោះបរទេស ដែលហោះហើរទៅកាន់ដែនអាកាសរបស់ប្រទេសលីប៊ី ។ តាមមន្ទីរប៉ង់តាហ្គោនថា ប្រទេសចំនួន៥ មានដូចជាសហរដ្ឋអាមេរិក បារាំង អង់គ្លេស កាណាដា និងប្រទេសអ៊ីតាលី បានចូលរួមក្នុងការវាយប្រហារនេះប្រឆាំងលោកកាដាហ្វី ហើយសម្ព័ន្ធមិត្តចម្រុះនេះមាននាវាចម្បាំង២៥គ្រឿងដាក់ពង្រាយនៅលើផ្ទៃសមុទ្រម៉េឌីទែរ៉ាណេ ។ កងកម្លាំងសហរដ្ឋអាមេរិក កងកម្លាំងបារាំង និងកងកម្លាំងអង់គ្លេសបានបើកការវាយប្រហារនោះក្រោយពីមានការជឿជាក់ថា លោកកាដាហ្វីនឹងមិនប្រកាន់ខ្ជាប់ ហើយគោរពបទឈប់បាញ់របស់អង្គការសហប្រជាជាតិ ។ ការវាយប្រហារនោះប្រឆាំងទីតាំងឈរជើងរបស់យោធាលីប៊ី ដោយគ្រាប់មីស៊ីល និងយន្តហោះចម្បាំង ក្នុងនោះរួមមានការអនុវត្តតំបន់ហាមហោះហើរ ។ មីស៊ីល Tomahaw ជាង១០០គ្រាប់ ត្រូវបានបាញ់ពីនាវាចម្បាំង និងនាវាមុជទឹករបស់អាមេរិក និងអង់គ្លេសប្រឆាំងទៅលើដែនអាកាស និងប្រព័ន្ធការពារមីស៊ីលរបស់ប្រទេសលីប៊ី នៅតំបន់ភាគខាងលិចប្រទេស។ ការវាយប្រហារលើកដំបូងនេះយន្តហោះចម្បាំងរបស់ប្រទេសបារាំង ត្រូវបញ្ជូនទៅដាក់ពង្រាយនៅតាមសមុទ្រក្បែរប្រទេសលីប៊ី ហើយហោះហើរបាញ់សំដៅរថយន្តយោធាប្រឆាំងនឹងកងទ័ពរបស់លោកកាដាហ្វី ។ នាយករដ្ឋមន្ត្រីអង់គ្លេស លោកដេវីដ កាម៉េរ៉ុន ថ្លែងកាលពីល្ងាចថ្ងៃទី១៩ មីនា ថា កងទ័ពអង់គ្លេសកំពុងតែប្រតិបត្តិការប្រឆាំងមេដឹកនាំផ្តាច់ការប្រទេសលីប៊ី ។ លោកដេវីដ កាម៉េរ៉ុន ថ្លែងថា «អ្វីដែលយើងកំពុងធ្វើជារឿងចាំបាច់ ជារឿងស្របច្បាប់ហើយជាសិទ្ធិរបស់យើងក្នុងការការពារប្រជាពលរដ្ឋដែលប្រកាន់ខ្ជាប់ គោរពលទ្ធិប្រជាធិបតេយ្យ ។ យើងមិនអាចគាំទ្រមេដឹកនាំផ្តាច់ការរបស់លីប៊ីដែលសម្លាប់ពលរដ្ឋរបស់ខ្លួននោះទេ» ។ លោកមូអាម៉ា កាដាហ្វី ថ្លែងតាមទូរទស្សន៍រដ្ឋកាលពីព្រឹកថ្ងៃទី២០ មីនា នេះថា ធម្មនុញ្ញអង្គការសហប្រជាជាតិផ្តល់សិទ្ធិដល់ប្រទេសលីប៊ីដើម្បីការពារខ្លួននៅពេលមានសង្គ្រាម ។ លោកកាដាហ្វី ថ្លែងទៀតថា «ពលរដ្ឋនៃប្រទេសកាន់សាសនាអ៊ិស្លាម ពលរដ្ឋអាហ្វ្រិក និងពលរដ្ឋអាមេរិកឡាទីន ព្រមទាំងពលរដ្ឋអាស៊ីត្រូវតែឈរខាងពលរដ្ឋលីប៊ី ដើម្បីប្រយុទ្ធប្រឆាំងនឹងការរំលោភបំពាននេះ» ។ ជាមួយគ្នានេះ ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា បានអំពាវនាវដល់លោកកាដាហ្វី ឱ្យដកថយចេញពីទីក្រុង Zawiya នៅភាគខាងលិចរដ្ឋធានីទ្រីប៉ូលី ។ អ្នកនាំពាក្យរដ្ឋាភិបាលលីប៊ីនិយាយថា ការវាយប្រហារប្រឆាំងទីតាំងជាច្រើននៅទីក្រុងទ្រីប៉ូលីបង្កឱ្យមានគ្រោះថ្នាក់ធ្ងន់ធ្ងរដល់ជនស៊ីវិល ។ កាលពីព្រឹកថ្ងៃទី១៩ មីនា កន្លងមក លោកកាដាហ្វី បានចេញសារផ្គើនមួយដល់ប្រទេសមហាអំណាចពិភពលោក ដែលក្នុងសារនោះលោកកាដាហ្វីថ្លែងថា «ពលរដ្ឋលីប៊ីភាគច្រើនបានត្រៀមខ្លួនស្ម័គ្រស្លាប់សម្រាប់ខ្ញុំរួចហើយ»។ សារនោះលោកកាដាហ្វីផ្ញើជូនលោកបារ៉ាក់ អូបាម៉ា ។ ទូរទស្សន៍រដ្ឋលីប៊ីរាយការណ៍ថា ក្នុងការវាយប្រហាររបស់ក្រុមសម្ព័ន្ធមិត្តចម្រុះនោះបណ្តាលឱ្យស្លាប់មនុស្ស៤៨នាក់៕  |
| ភាពភ័យខ្លាចវិទ្យុសកម្មធ្វើឱ្យប្រជាជនចិននាំគ្នាទិញអំបិលទុកក្នុងផ្ទះ Posted: 19 Mar 2011 11:45 PM PDT    ផ្សារទំនើបនៅក្នុងទីក្រុងធំៗរបស់ប្រទេសចិន គ្មានតាំងអំបិលលក់ទេ បន្ទាប់ពីអ្នកដើរផ្សារនាំគ្នារត់តម្រង់ទៅទិញអំបិលទាំងអស់គ្នា ក្រោយពីមានពាក្យចចាមអារ៉ាមរីកសាយថា អំបិលអាចការពារប្រឆាំងសារធាតុវិទ្យុសកម្មបាន។ លោក Song Zhangjing អ្នកនាំពាក្យរបស់សមាគមអំបិលចិននៃអង្គការឧស្សាហកម្មបានខិតខំកាត់បន្ថយការភ័យខ្លាចដែលអាចនឹង កើតមានឡើងដោយសារការសាយភាយសារធាតុវិទ្យុសកម្ម។  |
| Posted: 19 Mar 2011 11:40 PM PDT រាជធានីភ្នំពេញ ៖ សំណើសុំព្រះមហាក្សត្រកម្ពុជាលើកលែងទោសដល់អ្នកទោសជនជាតិថៃ២នាក់ ដែលបាននិងកំពុងជាប់ពន្ធនាគារព្រៃសនោះ នៅមិនទាន់ទៅដល់ខុទ្ទកាល័យក្រសួងយុត្តិធម៌នៅឡើយទេ ។ នេះបើយោងតាមលោកសំ ប្រជាមានិត នាយកខុទ្ទកាល័យរដ្ឋមន្ត្រីក្រសួងយុត្តិធម៌ ដែលថ្លែងតាមទូរស័ព្ទប្រាប់កោះសន្តិភាពកាលពីព្រឹកថ្ងៃសៅរ៍ ទី១៩ មីនា ។ អ្នកទោសជនជាតិថៃឈ្មោះវីរ៉ា ស៊ុមខ្វាមឃីត និងស្ត្រីជំនួយការរបស់លោកម្នាក់ទៀតគឺ លោកស្រីរ៉ាទ្រី ត្រូវបានសាលាដំបូងរាជធានីភ្នំពេញផ្តន្ទាទោសកាលពីថ្ងៃទី១ កុម្ភៈ ពីបទឆ្លងដែនខុសច្បាប់ចូលក្នុងទីលានយោធាក្នុងបំណងទុច្ចរិត និងពីបទចារកម្ម ។ អ្នកទោសទាំង២នេះបានសម្រេចមិនធ្វើបណ្តឹងឧទ្ធរណ៍ជំទាស់សាលក្រមនេះទេ ហើយបានសរសេរលិខិតស្នើសុំព្រះរាជទានលើកលែងទោសពីព្រះករុណា ព្រះបាទ សម្តេចព្រះបរមនាថ នរោត្តម សីហមុនី តាមរយៈរដ្ឋាភិបាលកម្ពុជា ។ បើតាមលោកសំ ប្រជាមានិត នៅពេលសំណើសុំលើកលែងទោសបានមកដល់ក្រសួងយុត្តិធម៌ គឺរដ្ឋមន្ត្រីក្រសួងយុត្តិធម៌គ្រាន់តែពិនិត្យលើទិដ្ឋភាពច្បាប់ ហើយរាយការណ៍ជូនសម្តេចតេជោហ៊ុន សែន តែប៉ុណ្ណោះ។ គួរបញ្ជាក់ថា សំណើនោះបានទៅដល់ក្រសួងការបរទេសកាលពីល្ងាចថ្ងៃទី១៦ មីនា ដោយមានអមជាមួយនូវកំណត់ទូតរបស់ស្ថានទូតថៃផង ។ យោងតាមអ្នកនាំពាក្យក្រសួងការបរទេស លោកកុយ គួង ឱ្យដឹងថា អ្នកទោសទាំង២នាក់មានសិទ្ធិក្នុងការស្នើសុំព្រះរាជទានទោសពីព្រះមហាក្សត្រ ប៉ុន្តែកម្ពុជានឹងពិចារណាករណីនេះស្របតាមច្បាបស់របស់កម្ពុជាដែរ ។ ទោះជាយ៉ាងណាសំណើរបស់អ្នកទោសថៃទាំង២នាក់នេះ មិនទាន់មានពន្លឺនៅឡើយទេ ក្នុងពេលដែលសម្តេចតេជោនាយករដ្ឋមន្ត្រីហ៊ុន សែន ធ្លាប់បានមានប្រសាសន៍ថា អ្នកទោសជនជាតិថៃទាំង២នាក់ ត្រូវអនុវត្តទោសឱ្យបាន២ភាគ៣សិន មុននឹងមានការពិចារណាអំពីការលើកលែងទោសនោះ ៕  |
| ក្រុមហ៊ុន Nukepills.com បញ្ជូនថ្នាំប៉ូតាស្យូម អ៊ីអូឌីត (Potassium iodide) ទៅជប៉ុន Posted: 19 Mar 2011 11:36 PM PDT  ប្រភេទថ្នាំដែលជួយការពារជំងឺមហារីកបង្កពីសារធាតុវិទ្យុសកម្មត្រូវបានក្រុមហ៊ុនNukepills.comបញ្ជូនទៅកាន់មន្ទីរពេទ្យទីក្រុងកូត្យូ។ ចំនួនថ្នាំ Potassium iodide សរុបមានប្រហែល៥០.០០០គ្រាប់ និងត្រូវចែកចាយតាមរយៈក្រុមគ្រូពេទ្យសង្គ្រោះ Tokushukai។ ជំងឺមហារីកក្រពេញទីរ៉ូអ៊ីត គឺជាជំងឺដ៏គ្រោះថ្នាក់ពេលមនុស្សទទួលរងសារធាតុវិទ្យុសកម្មក្នុងកម្រិតខ្ពស់ ដូចជាពេលមានឧបទ្ទវហេតុរ៉េអាក់ទ័រនុយក្លេអ៊ែរ។ FDA បានរកឃើញថ្នាំប៉ូតាស្យូម iodide ក្នុងឆ្នាំ១៩៨២ ហើយយើងអាចទទួលទានវាបានដោយគ្មានវេជ្ជបញ្ជា។ ការទទួលទានថ្នាំគ្រប់ដុសដែលធានាសុវត្ថិភាពពេលអ្នកទទួលទានថ្នាំនេះ គឺក្មេងទើបនឹងកើតរហូតអាយុ១ឆ្នាំ ទទួលទានកន្លះគ្រាប់សម្រាប់ថ្នាំទម្ងន់៦៥មិល្លីក្រាម ចំណែកមនុស្សចាប់ពីអាយុ១ឆ្នាំឡើងដល់ពេញវ័យទទួលទាន១គ្រាប់រាល់ថ្ងៃ សម្រាប់ថ្នាំទម្ងន់១៣០មិល្លីក្រាម។ ការទទួលទានក្នុងកម្រិតតិចតែអាចការពារសារធាតុវិទ្យុសកម្មiodideបាន។ មនុស្សចាប់ពីអាយុ១៨ឆ្នាំឡើងទៅ ទទួលទានមួយគ្រាប់រាល់ថ្ងៃសម្រាប់ថ្នាំទម្ងន់១៣០មិល្លីក្រាម ។ មនុស្សអាយុចាប់ពី៣ឆ្នាំដល់១៨ឆ្នាំ ទទួលទានកន្លះគ្រាប់រាល់ថ្ងៃសម្រាប់ថ្នាំទម្ងន់៦៥មិល្លីក្រាម ចំណែកក្មេងអាយុ១ខែដល់៣ឆ្នាំទទួលថ្នាំ១ភាគ៤រាល់ថ្ងៃ សម្រាប់ថ្នាំទម្ងន់៣២មិល្លីក្រាម។ ដោយឡែកក្មេងដែលទើបនឹងកើតរហូតដល់អាយុ៣ខែ ត្រូវទទួលទាន១ភាគ៨សម្រាប់គ្រាប់ថ្នាំទម្ងន់១៦មិល្លីក្រាម ៕  |
| Posted: 19 Mar 2011 11:30 PM PDT ខេត្តបន្ទាយមានជ័យ ៖ ពីក្រុងប៉ោយប៉ែតខេត្តបន្ទាយមានជ័យ មានសេចក្តីរាយការណ៍មកថា នាយរងប៉ុស្តិ៍អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត លោកវរសេនីយ៍ត្រីជុំ សារ៉េត ហៅហេង ស្រវឹងស្រាបានបើករថយន្តរេជ្រែពេញផ្លូវ និងបានជ្រុលចង្កូតទៅប៉ះម៉ូតូ១គ្រឿង បង្កឱ្យមានការភ្ញាក់ផ្អើលដល់ប្រជាពលរដ្ឋ និងភ្ញៀវទេសចរកាលពីវេលាម៉ោង៥ល្ងាចថ្ងៃសៅរ៍ ទី១៩ មីនា ម្សិលមិញនេះ ។ បើតាមអ្នកយកព័ត៌មានកោះសន្តិភាពប្រចាំក្រុងប៉ោយប៉ែតបានបញ្ជាក់ឱ្យដឹងថា រថយន្តដែលនាយរងប៉ុស្តិ៍អន្តោប្រវេសន៍ស្រវឹងស្រាបើករេពេញផ្លូវបង្កឱ្យមានការភ្ញាក់ផ្អើលនោះម៉ាកមែរសឺដេស ពណ៌កណ្តុរល្មែះ ចង្កូតឆ្វេង ពាក់ស្លាកលេខ ភ្នំពេញ 2H-4929 ហើយម៉ូតូដែលលោកជុំ សារ៉េត ជ្រុលចង្កូតទៅប៉ះបណ្តាលឱ្យមានការខូចខាត បន្តិចបន្តួចនោះម៉ាក C125 ស៊េរី២០០៩ ពាក់ស្លាកលេខ ពោធិ៍សាត់ 1B-5544 ជាកម្មសិទ្ធិរបស់ឈ្មោះយាយម៉ាប់ ជាអាជីវករជ្រែទំនិញចេញ-ចូលនៅច្រកទ្វារអន្តរជាតិប៉ោយប៉ែត ។ សេចក្តីរាយការណ៍បានបន្តថា បន្ទាប់ពីបើករថយន្តរេពេញផ្លូវ និងប៉ះពារប្រជាពលរដ្ឋបង្កឱ្យមានការភ្ញាក់ផ្អើលរួចមក លោកនាយរងប៉ុស្តិ៍អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែតឈ្មោះជុំ សារ៉េត នេះ បានបើករថយន្តចូលក្នុងកាស៊ីណូហូលីដេ ផាឡេស បន្តផឹកស៊ី ធ្វើហាក់ដូចជាគ្មានរឿងអ្វីកើតឡើង ។ គេនៅមិនទាន់បានដឹងនៅឡើយទេ ថា តើខាងមន្ត្រីថ្នាក់លើ នឹងមានវិធានការតាមច្បាប់យ៉ាងណា ដើម្បីចាត់ការលោកជុំ សារ៉េត មន្ត្រីនគរបាលទំនើងម្នាក់នេះ ៕  |
| ខ្មាន់កាំភ្លើងបាញ់សម្លាប់ឪពុក ម្តាយ និងកូនក្រមុំ សមត្ថកិច្ចសង្ស័យគំនុំ និងពាលស៊ីពាល Posted: 19 Mar 2011 11:27 PM PDT ខេត្តបាត់ដំបង ៖ ការបាញ់សម្លាប់សមាជិកគ្រួសារចំនួន៣នាក់ នៅតំបន់ឆ្ងាយដាច់ស្រយាលមួយកន្លែងក្នុងភូមិត្រាវជូរ ឃុំសិរីមានជ័យ ស្រុកសំពៅលូន កាលពីវេលារំលងអធ្រាត្រឈានចូលថ្ងៃទី១៩ មីនា ២០១១ សមត្ថកិច្ចបានដាក់ការសង្ស័យថា វាកើតចេញពីរឿងគំនុំ និងអាចជាក្រុមពាលស៊ីពាលសុទ្ធសាធ ។  |
| នគរបាលរាជធានីភ្នំពេញបំបែកសំណុំរឿងចោរប្លន់ប្រាក់ក្រុមហ៊ុនប្រេងសាវីម៉ិច៦ម៉ឺនដុល្លារ Posted: 19 Mar 2011 09:15 PM PDT  រាជធានីភ្នំពេញ ៖ កម្លាំងនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញបានខិតខំស្រាវជ្រាវទាំងថ្ងៃទាំងយប់ ក្រោយពីមានសកម្មភាពបទល្មើសប្លន់គ្រឿងអលង្ការប្រាក់តាមផ្ទះហាងកាត់សក់យានដ្ឋានជួសជុលរថយន្ត និងតាមរថយន្តដោយប្រើរូបភាពប្លែកៗ ដើម្បីបំភ័ន្តភ្នែកសមត្ថកិច្ច ពាក្យចាស់បានពោលថា «កុកភ្លេចជុង ប៉ុន្តែជុងមិនភ្លេចកុកនោះទេ» ជាក់ស្តែងកាលពីយប់ថ្ងៃទី១៨ មីនា ២០១១ ជនសង្ស័យជាមេខ្លោងក្នុងអំពើប្លន់ប្រដាប់អាវុធម្នាក់ និងបក្សពួក២នាក់ទៀតត្រូវបានក្របួចជាប់នៅលើកំណាត់ផ្លូវលេខ៨១ ស្ថិតក្នុងសង្កាត់ផ្សារថ្មីទី២ ខណ្ឌដូនពេញ ខណៈពេលជននោះកំពុងតែជិះរថយន្តហ្ស៊ីប ហើយដកហូតបានអាវុធខ្លីចំនួន៣ដើមទៀតផង ។ ក្រោយពីសមត្ថកិច្ចតាមប្រមាញ់មេខ្លោងប្លន់ប្រដាប់អាវុធ និងដកហូតអាវុធដល់ទៅ៣ដើមរួចមក នៅយប់ថ្ងៃដដែល បក្សពួកចោរប្លន់ម្នាក់ទៀតត្រូវបានក្របួចជាប់លើកំណាត់ផ្លូវមួយក្នុងសង្កាត់ស្ទឹងមានជ័យ ខណ្ឌមានជ័យ ។ ជនសង្ស័យជាមេខ្លោងឈ្មោះណិល និងម្នាក់ទៀតឈ្មោះពេជ្រ ពួកគេមានអាយុជាង២០ឆ្នាំ ។ ឈ្មោះពេជ្រ នេះបានធ្វើសកម្មប្លន់គ្រឿងអលង្ការរបស់លោកជួង ជី ហៅកុយ ទទួលបានផលចំណែក៣.៥០០ដុល្លារ ចំណែកជនសង្ស័យឈ្មោះណិល ជាមេខ្លោងក្នុងការធ្វើសកម្មភាពប្លន់ប្រាក់ចំនួន៦ម៉ឺនដុល្លារ កាលពីថ្ងៃទី៧ កុម្ភៈ ២០១១ វេលាម៉ោង៩និង១០នាទីព្រឹកនៅលើកំណាត់វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ ខណៈបុរសម្នាក់ជាបុគ្គលិកក្រុមហ៊ុនប្រេងសាវីម៉ិច បើករថយន្តម៉ាកវីហ្គោ ពណ៌ទឹកប្រាក់ ពាក់ស្លាកលេខ ភ្នំពេញ 2K-1688 មកដល់មុខក្រុមប្រឹក្សាអភិវឌ្ឍន៍កម្ពុជា (CDC) ក៏មានជនប្រដាប់អាវុធ២នាក់ជិះម៉ូតូម៉ាក C125 ពណ៌ខ្មៅ ស៊េរី២០១០ គ្មានពាក់ម៉ាស់ បានបើកម៉ូតូកៀររថយន្តឱ្យឈប់ និងដកកាំភ្លើងភ្ជង់គំរាមមិនឱ្យស្រែក រួចបាញ់មួយគ្រាប់ ព្រមទាំងវាយបំបែកកញ្ចក់ទ្វាររថយន្តខាងឆ្វេងយកស្បោងលុយជិះម៉ូតូគេចបាត់ដោយមិនរំខានដល់នគរបាលប៉ុស្តិ៍នោះទេ ។ ជនសង្ស័យរូបនេះក៏ជាអ្នកធ្វើសកម្មភាពប្លន់គ្រឿងអលង្ការពីនាយទាហានម្នាក់ដែលកំពុងអង្គុយកាត់សក់នៅក្នុងហាងមួយទល់មុខកំពង់ផែថ្ម វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ ក្នុងអំឡុងខែតុលា ២០១០ និងបាញ់គំរាមមួយគ្រាប់មុននឹងចាកចេញទៅ ។ សូមបញ្ជាក់ថា ក្រោយពេលប៉ូលិសសួរនាំ ឈ្មោះណិល បានសារភាពចង្អុលបង្ហាញមុខមាត់គ្នារបស់គេម្នាក់ទៀត គឺជាកូនប្រុសនាយករងក្រុមហ៊ុនប្រេងសាវីម៉ិចតែម្តង ហើយប៉ូលិសបានទៅចាប់ខ្លួនដល់ក្រុមហ៊ុនកាលពីព្រឹកថ្ងៃទី១៩ មីនា ២០១១ ។ កូនប្រុសនាយករងក្រុមហ៊ុនប្រេងសាវីម៉ិចនេះមិនទាន់ត្រូវបានសមត្ថកិច្ចប្រាប់ឈ្មោះទេ ដោយទុកស្រាវជ្រាវចាប់បក្សពួកបន្ត... ប៉ុន្តែគេថា ជននេះជារនុកក្នុងជាអ្នកឱ្យដំណឹងទៅក្រុមចោរប្លន់ប្រដាប់អាវុធ ៕  |
| បញ្ជូនម្ចាស់ផ្ទះសំណាក់រស្មីផ្កាឈូក២ទៅតុលាការ និងអ្នកប្រើប្រាស់គ្រឿងញៀន១១នាក់ Posted: 19 Mar 2011 08:55 PM PDT   រាជធានីភ្នំពេញ ៖ លោកសុខ សម្បត្តិ អភិបាលខណ្ឌដូនពេញ បានបញ្ជាក់ថា ម្ចាស់ផ្ទះសំណាក់រស្មីផ្កាឈូក២ ដែលមានទីតាំងលេខ៧៦ ផ្លូវលេខ១៧២ ភូមិ១១ សង្កាត់ផ្សារថ្មីទី៣ ខណ្ឌដូនពេញ ឈ្មោះព្រំ សុធា ភេទប្រុស អាយុ៣៦ឆ្នាំ ជនជាតិខ្មែរ រួមទាំងអ្នកប្រើប្រាស់គ្រឿងញៀនចំនួន១១នាក់ ត្រូវបញ្ជូនទៅតុលាការ ដើម្បីផ្តន្ទាទោស ហើយផ្ទះសំណាក់នឹងបិទអាជីវកម្មបណ្តោះអាសន្ន ព្រោះមិនគោរពតាមការណែនាំរបស់សាលារាជធានីភ្នំពេញ ក៏ដូចជាផែនការអនុវត្តភូមិ-សង្កាត់មានសុវត្ថិភាព ដែលសាលាខណ្ឌដូនពេញបានធ្វើការផ្សព្វផ្សាយដល់ផ្ទះសំណាក់កន្លងមក ។ គួររំលឹកថា កាលពីថ្ងៃទី១៨ មីនា ២០១១ វេលាម៉ោង១០យប់ គណៈបញ្ជាការឯកភាពខណ្ឌដូនពេញ ដឹកនាំដោយលោកសុខ សម្បត្តិ អភិបាលខណ្ឌដូនពេញ បានឆ្មក់ចូលផ្ទះសំណាក់រស្មីផ្កាឈូក២ ដែលមានទីតាំងលេខ៧៦ ផ្លូវលេខ១៧២ ភូមិ១១ សង្កាត់ផ្សារថ្មីទី៣ ហើយឃាត់ខ្លួនជនជនសង្ស័យប្រើប្រាស់គ្រឿងញៀនក្នុងបន្ទប់លេខ៣១១ ជាន់ទី៣ ចំនួន៤នាក់ ស្រីម្នាក់ បន្ទប់លេខ១០៣ ជាន់ទី១ ចំនួន៣នាក់ ប្រុសទាំង៣ និងនៅក្រៅបរិវេណផ្ទះសំណាក់ចំនួន៤នាក់ មានស្រីម្នាក់ ។ សមត្ថកិច្ចមូលដ្ឋាននិយាយថា ជនសង្ស័យប្រើប្រាស់គ្រឿងញៀនដែលឃាត់ខ្លួន១១នាក់ ក្នុងនោះមានជនជាតិវៀតណាមផងដែរ ហើយម្ចាស់ផ្ទះសំណាក់រស្មីផ្កាឈូក២ ឈ្មោះព្រំសុធា ភេទប្រុស អាយុ៣៦ឆ្នាំ ត្រូវបានឃាត់ខ្លួនព្រោះជាអ្នកផ្តល់ទីតាំងឱ្យគេប្រើប្រាស់គ្រឿងញៀន ។ ជនសង្ស័យខាងលើត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ក្រោមការចោទពីបទផ្តល់ទីតាំង និងប្រើប្រាស់គ្រឿងញៀន ។ លោកអភិបាលខណ្ឌដូនពេញបានរំលឹកផងដែរថា កាលពីព្រឹកថ្ងៃទី១១ មីនា ២០១១ ដោយមានការសហកាល្អពីម្ចាស់ផ្ទះសំណាក់អិល អេស ដែលមានទីតាំងលេខ១C ផ្លូវលេខ៥៣ ភូមិ៥ សង្កាត់ផ្សារថ្មីទី៣ បានរាយការណ៍ឱ្យនគរបាលប៉ុស្តិ៍រដ្ឋបាលផ្សារថ្មទី៣ ខណៈជនបរទេសនាំក្មេងស្រីចូលបន្ទប់ ហើយភ្លាមៗនោះគណៈកម្មការចម្រុះធ្វើការឃាត់ខ្លួនជនជាតិអាមេរិកម្នាក់ និងស្ត្រីខ្មែរ២នាក់ ព្រមទាំងដកហូតរូបថតអាសអាភាស គ្រឿងញៀនផងដែរ ។ បច្ចុប្បន្នជនទាំង៣នាក់នោះត្រូវបានតុលាការចេញដីកាឃុំខ្លួនបណ្តោះអាសន្ននៅពន្ធនាគារព្រៃសរង់ចាំបើកសវនាការ ៕  |
| ទទួលទានសាន់វិចធ្វើពីត្រីធូណាការពារងងឹតភ្នែកក្នុងវ័យចាស់ Posted: 19 Mar 2011 08:30 PM PDT  បណ្តាអ្នកស្រាវជ្រាវបាននិយាយថា ការទទួលទានសាន់វិចធ្វើពីសាច់ត្រីធូណា អាចជួយការពារការងងឹតភ្នែកក្នុងវ័យចាស់ ។ លទ្ធផលនៃការសិក្សាខាងនេះ កើតចេញពីការធ្វើពិសោធន៍ទៅលើស្រ្តីចំនួន៣៨.០០០នាក់។ អ្នកដឹកនាំការសិក្សាវេជ្ជបណ្ឌិត វីលៀម គ្រីសស្ទេនបាននិយាយថា ៖«អត្រាប្រឈមដ៏តិចតួចចំពោះការងងឹតភ្នែកកើតមានឡើងដោយសារតែការទទួលទានសាច់ត្រីធូណាច្រកកំប៉ុងនិងប្រភេទសាច់ត្រីដទៃទៀត »។  |
| ស្ថានភាពនៅរោងចក្រនុយក្លេអ៊ែរហ្វូគូស៊ីម៉ា កំពុងមានភាពល្អប្រសើរឡើងវិញ Posted: 19 Mar 2011 08:20 PM PDT ទីភ្នាក់ងារព័ត៌មានចិនស៊ីនហួបានចេញផ្សាយព័ត៌មានដោយដកស្រង់សម្តីរដ្ឋមន្ត្រីការពារប្រទេសជប៉ុន លោក Toshimi Kitazawa ដែលថ្លែងកាលពីថ្ងៃទី១៩ មីនា ថា លក្ខខណ្ឌ និងស្ថានភាពនៃម៉ាស៊ីនរ៉េអាក់ទ័រចំនួន៤នៅរោងចក្រថាមពលនុយក្លេអ៊ែរ ហ្វូគូស៊ីម៉ា ដែលរងផលប៉ះពាល់ដោយការរញ្ជួយដីកម្រិត៨,៩រិចស្ទ័រ បង្កឱ្យកើតមានរលកយក្សស៊ូណាមីនោះកំពុងមានភាពល្អប្រសើរវិញហើយ ។ លោក Kitazawa ថ្លែងថា ប្រតិបត្តិការនៃការទប់ស្កាត់ការបញ្ចេញវិទ្យុសកម្មនៅរោងចក្រនុយក្លេអ៊ែរនោះទទួលបានជោគជ័យយ៉ាងធំធេង ក្រោយពីកងកម្លាំងស្វ័យការពារជាតិ និងអ្នកពន្លត់អគ្គីភ័យបាញ់ទឹកដាក់ម៉ាស៊ីនរ៉េអាក់ទ័រលេខ៣ ដែលរងផលប៉ះពាល់ធ្ងន់ធ្ងរជាងគេកាលពីរសៀលថ្ងៃទី១៩ មីនា ។  |
| មាក់ងាយកូនក្រមុំគេ ពេលសួរនាំ២នាក់ឪពុកកូនព្រួតគ្នាកាប់ ប៉ូលិសចាប់ខ្លួន Posted: 19 Mar 2011 08:20 PM PDT រាជធានីភ្នំពេញ ៖ បុរស២នាក់ឪពុក និងកូនត្រូវបានប៉ូលិសខណ្ឌដង្កោចាប់ឃាត់ខ្លួន បន្ទាប់ពីពួកគេទាំង២នាក់នេះ មាក់ងាយកូនក្រមុំ គេ និងព្រួតគ្នាកាប់ប្រហារទៅលើបុរសម្នាក់ទៀត បណ្តាលឱ្យរងរបួសក្បាលធ្ងន់ត្រូវបញ្ជូនទៅសង្គ្រោះនៅមន្ទីរពេទ្យយ៉ាងប្រញាប់ប្រញាល់កាលពីវេលាម៉ោង១០ព្រឹកថ្ងៃទី១៩ មីនា ២០១១ នៅផ្ទះជួលក្រុមទី៨ ភូមិចំការឪឡឹក សង្កាត់កាកាប ខណ្ឌដង្កោ ។  |
| ប៉ូលិសឃាត់ខ្លួនបុរសម្នាក់ពីបទលាក់ទុកអាវុធអាកាកាត់ស្វាយខុសច្បាប់ Posted: 19 Mar 2011 08:04 PM PDT  ខេត្តក្រចេះ ៖ ប៉ូលិសបានឃាត់ខ្លួនបុរសម្នាក់ពីបទលាក់ទុកអាវុធខុសច្បាប់ ខណៈពេលចុះឆែកឆេរក្នុងលំនៅឋានក៏ប្រទះឃើញមានលាក់ទុកកាំភ្លើងអាកាកាត់ស្វាយមួយដើម។ ការចុះឆែកឆេររកឃើញអាវុធខុសច្បាប់ដោយកម្លាំងនគរបាលស្រុកនេះ បានធ្វើឡើងកាលពីព្រឹកថ្ងៃទី១៥ មីនា នៅលើផ្ទះចាំចំការមួយកន្លែងស្ថិតនៅចំណុចគីឡូម៉ែត្រលេខ២២ ខាងក្រោយភូមិព្រែកប្រសព្វ ឃុំព្រែកស្រព្វ ស្រុកប្រែកសឮប្រសព្វ ព្រមទាំងបានឃាត់ខ្លួនបុរសម្នាក់ឈ្មោះប៊ុន កុយជាន អាយុ៣៤ឆ្នាំ មានទីលំនៅភូមិព្រែកតាអាំ ឃុំបុសលាវ ស្រុកចិត្របុរី ដែលបច្ចុប្បន្នមកធ្វើចំការនៅចំណុចខាងលើ។ លោកវរសេនីយ៍ត្រី ស៊ុម សុឃីម អធិការនគរបាលស្រុកព្រែកប្រសព្វបានឱ្យដឹងថា ដោយអនុវត្ដគោលនយោបាយភូមិ-ឃុំមានសុវត្ថិភាព និងបន្ទាប់ពីមានការយល់ដឹងច្រើននូវគោលនយោបាយនេះ ប្រជាពលរដ្ឋបានផ្ដល់ព័ត៌មានជាសំងាត់មកកាន់នគរបាលពីសកម្មភាពលាក់ទុកអាវុធខុសច្បាប់របស់បុរសរូបនេះ។ ក្រោយពីទទួលបានព័ត៌មាននេះ កម្លាំងនគរបាលស្រុក បានចុះទៅដល់ផ្ទះបុរសខាងលើ និងបានឆែកឆេររកឃើញអាវុធអាកាកាត់ស្វាយមួយដើមផលិតនៅប្រទេសហុងគ្រី មានគ្រាប់ចំនួន២៤គ្រាប់ ដែលនៅសល់គុណភាពប្រើប្រាស់៧០ភាគរយ ហើយកាំភ្លើងមួយដើមនេះ គឺបុរសជាប់ចោទបានលាក់ទុកនៅក្រោមហិបខោអាវលើផ្ទះ ដោយមានរុំកំណាត់ ដូចតាមការផ្ដល់ព័ត៌មានពីប្រជាពលរដ្ឋមែន។ ចំណែកបុរសជាប់ចោទបានរៀបរាប់ប្រាប់សមត្ថកិច្ចថា កាំភ្លើងមួយដើមនេះគឺគេបានទិញពីជនម្នាក់តាំងពីឆ្នាំ២០០៤មកម៉្លេះ ក្នុងតំលៃ១៦ម៉ឺនរៀល ដើម្បីទុកគ្រាន់ការពារខ្លួនព្រោះគេឧស្សាហ៍ចេញចូលទៅប្រកបរបររកស៊ីក្នុងព្រៃ។ លោកអធិការស្រុកបានបញ្ជាក់ថា សមត្ថកិច្ចកំពុងតែធ្វើការស្រាវជ្រាវរកជនជាម្ចាស់កាំភ្លើងដែលបានលក់ឱ្យជនជាប់ចោទ ដើម្បីមានវិធានការបន្ដ៕  |
| ប៉េអឹមក្រុងចាប់រថយន្តដឹកឈើមួយគ្រឿងប្រគល់ឱ្យមេព្រៃ Posted: 19 Mar 2011 07:52 PM PDT   ខេត្តពោធិ៍សាត់ ៖ កាលពីព្រឹកថ្ងៃទី១៨ មីនា កងរាជអាវុធហត្ថក្រុងពោធិ៍សាត់ បានធ្វើពិធីប្រគល់រថយន្តកាមរីពណ៌សំបកឪឡឹក ស៊េរី៩៣ ពាក់ស្លាកលេខភ្នំពេញ 2E-6558 មួយគ្រឿង និងឈើគ្រញូងចំនួន៤១ដុំ ស្មើនឹង០,៦៧២ម៉ែត្រគូប ឱ្យទៅខណ្ឌរដ្ឋបាលព្រៃឈើ ដើម្បីរក្សាទុកជាសម្បត្តិរដ្ឋ បន្ទាប់ពីចាប់ឃាត់បានពីឈ្មួញទុច្ចរិតរកស៊ីខុសច្បាប់ ។ តាមប្រភពពីលោកអនុសេនីយ៍ឯក សំ ថា មេបញ្ជាការកងរាជអាវុធហត្ថក្រុងពោធិ៍សាត់ ដែលដឹកនាំបង្ក្រាបផ្ទាល់បានឱ្យដឹងថា បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រតិកម្មខ្លាំងៗចំពោះរថយន្តដឹកឈើ និងកុងត្រូលជជុះឡើងវិញភ្លាម លោកមេបញ្ជាការកងរាជអាវុធហត្ថលើផ្ទៃប្រទេស និងមេបញ្ជាការខេត្តបានដាក់វិធានការពង្រឹងកម្លាំងបន្ថែមទៀតក្នុងការបង្ក្រាបបទល្មើស ។ ជាក់ស្តែង កាលពីវេលាម៉ោង១១និង៣០នាទីយប់ ថ្ងៃទី១៧ មីនា ឆ្នាំ២០១១ កម្លាំងកងរាជអាវុធហត្ថក្រុងពោធិ៍សាត់ បានធ្វើការចាប់ឃាត់រថយន្តដឹកឈើមួយគ្រឿងនៅចំណុចចំការដើមអាកាស្យា ស្ថិតក្នុងភូមិទួលគ្រួស សង្កាត់ចំរើនផល យកមកប្រគល់ជូនខណ្ឌរដ្ឋបាលព្រៃឈើនាពេលនេះ ។ លោកបន្តថា នៅយប់នោះភ្នាក់ងារបានផ្តល់ព័ត៌មានមកថា មានរថយន្តម៉ាកកាមរី៤ គ្រឿងផ្ទុកឈើប្រណីត ក្នុងនោះធុនឆ្លាមមួយគ្រឿង អាហើមចង្កូតស្តាំ២គ្រឿង ចង្កូតឆ្វេង១គ្រឿង ដោយមានអាបាឡែនបិទគូថពីក្រោយកំពុងធ្វើដំណើរពីស្រុកភ្នំក្រវាញ សំដៅទៅផ្លូវជាតិលេខ៥។ ពេលនោះលោកបានចាត់វិធានការឱ្យកម្លាំងរបស់លោកចាំស្ទាក់ ។ លុះមួយសន្ទុះក្រោយមកឃើញមានរថយន្តកាមរីពណ៌សំបកឪឡឹក ចង្កូតឆ្វេងស៊េរី៩៣ ពាក់ស្លាកលេខភ្នំពេញ 2E-6558 មួយគ្រឿង ពេលបើកមកដល់ខាងមុខទីបញ្ជាការភូមិស្ទឹងតូច ឃើញកម្លាំងរបស់លោកច្រើនក៏ត្រឡប់ក្រោយវិញយ៉ាងលឿន ។ ឃើញដូច្នោះដោយមានការសង្ស័យកម្លាំងរបស់លោកបានបើករថយន្តប្រដេញតាមក្រោយជាប់រហូត ។ លុះទៅដល់ភូមិទួលគ្រួស រថយន្តនោះបានចូលក្នុងចំការដើមអាកាស្យា រួចឈប់រថយន្តទុកទីនោះ អ្នកបើកបរមិនស្គាល់ឈ្មោះរត់គេចខ្លួនបាត់ ។ នៅពេលពិនិត្យក្នុងរថយន្តឃើញមានផ្ទុកឈើគ្រញូងខុសច្បាប់ហើយក៏បានយកមករក្សាទុកនៅក្នុងទីបញ្ជាការបណ្តោះអាសន្នសិន ។ លុះព្រឹកឡើងទើបប្រគល់ឱ្យខាងមេព្រៃចាត់ចែងតាមនីតិវិធី ។ ប្រភពព័ត៌មាននិយាយថា នៅគល់ស្ពានខាងមុខផ្លូវចូលមណ្ឌលពុទ្ធិកសិក្សាមណីរ័ត្ន ភូមិមាន់ចែ សង្កាត់ព្រៃញី ក្រុងពោធិ៍សាត់ ជារៀងរាល់យប់តាំងពីដើមមក គេតែងឃើញមនុស្សមួយក្រុមមានរថយន្ត២ទៅ៣គ្រឿង ដេកចាំយកលុយពីរថយន្តដឹកឈើ ដឹកត្រី ផ្លែឈើ ជង្គង់មាន់ សត្វព្រៃ ដឹកជ្រូក ដឹកគោ និងដឹកសាច់ កំណាត់ជាដើម មិនដឹងសមត្ថកិច្ចខាងណាទេ ។ ប៉ុន្តែមានការអះអាងថា ជាប៉ូលិសប្រឆាំងបទល្មើសសេដ្ឋកិច្ចខេត្តពោធិ៍សាត់ លួចដាក់កុងត្រូលជជុះយ៉ាងព្រហើនបំផុត ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
