VOA News: ព័ត៌មាន: “រោងចក្រផលិតរថយន្ដដើរដោយថាមពលអគ្គិសនីនឹងដំណើរការនៅកម្ពុជាក្នុងឆ្នាំ២០១២” plus 1 more |
| រោងចក្រផលិតរថយន្ដដើរដោយថាមពលអគ្គិសនីនឹងដំណើរការនៅកម្ពុជាក្នុងឆ្នាំ២០១២ Posted: 25 Mar 2011 02:11 PM PDT ក្រុមហ៊ុនចម្រុះកម្ពុជា-ចិនបានព្រមព្រៀងគ្នានៅថ្ងៃច័ន្ទនេះដើម្បីបង្កើតរោងចក្រផលិតរថយន្ដដំបូងបំផុតនៅកម្ពុជា។ រថយន្ដនេះនឹងត្រូវគូរប្លង់ដោយម្ចាស់យានដ្ឋានកម្ពុជា ដែលបានព្យាយាមបង្កើតម៉ូដរថយន្ដស៊េរីថ្មីៗតាមរបៀបសិប្បកម្មជាច្រើនឆ្នាំមកហើយ។ ប្រទេសកម្ពុជានឹងផលិតរថយន្ដដើរថាមពលអគ្គិសនីជាលើកដំបូងនៅឆ្នាំ២០១២ខាងមុខនេះ។ក្រុមហ៊ុនហេងអភិវឌ្ឈន៍ដែលមានទំនាស់ដីធ្លីយ៉ាងចម្រូងចម្រាស់និងក្រុមហ៊ុនជូលាងអ៊ីនធើប្រាយចំកាត់ (Chau Leong Enterprise (Group) Co.Ltd) មកពីហុងកុង បានចុះហត្ថលេខាធ្វើការវិនិយោគរួមគ្នានៅថ្ងៃច័ន្ទនេះ ក្រោមគម្រោងទឹកប្រាក់ជំហានដំបូងចំនួន២០លានដុល្លារអាមេរិក។ គឺជារថយន្ដដែលនឹងមានម៉ាក"អង្គរ" ដែលច្នៃប្រឌិតម៉ូដដោយម្ចាស់ស្ថានីយ៍លាងរថយន្ដមួយក្នុងទី ក្រុងភ្នំពេញ។ លោកស្រី សៀង ចាន់ហេង នាយិកាក្រុមហ៊ុនហេងអភិវឌ្ឈន៍ មានប្រសាស៍ក្នុងពិធីចុះហត្ថលេខាថា រោងចក្រផលិតរថយន្ដនេះនឹងមានទីតាំងនៅក្នុងស្រុកកណ្ដាលស្ទឹង ខេត្តកណ្ដាល ហើយរោង ចក្រអាចនឹងផលិតរថយន្ដបានពី៥០០ទៅ១០០០គ្រឿងក្នុងមួយឆ្នាំ។ «នៅដើមឆ្នាំ២០១២ខាងមុខ រថយន្ដអង្គរ ដើរដោយថាមពលអគ្គិសនីដែលចេញពីរោងចក្រនេះ នឹងមានវត្តមានលក់នៅលើទីផ្សារកម្ពុជាយើងហើយ»។ រថយន្ដប្រើថាមពលអគ្គិសនីនេះនឹងត្រូវប្រើប្រព័ន្ធសាកភ្លើងបញ្ចូលអាគុយ ហើយនឹងអាចបើកបរបានចម្ងាយប្រមាណជា៥០០គីឡូម៉ែត្រ នេះបើតាមលោកញាន ផលិត ដែលជាអ្នកផ្តួចផ្ដើមគំនិតសម្រាប់ការផលិតរថយន្ដនេះ។ ជាជំហានដំបូង ក្រុមហ៊ុនចម្រុះនឹងផលិតត្រឹមតែប្រភេទរថយន្ដធុនពីរកៅអី ដែលអាចបើកបរក្នុងល្បឿន៨០គីឡូម៉ែត្រក្នុងមួយម៉ោង និងប្រភេទបួនកៅអីដែលអាចបើកបរក្នុងល្បឿន១២០គីឡូម៉ែត្រក្នុងមួយម៉ោង។ លោកលី យៀកលាង ប្រធានក្រុមហ៊ុនជូលាង អ៊ីនធើប្រាយ ចំកាត់ ជឿជាក់ថា រថយន្ដប្រភេទថ្មីនេះ នឹងមានទីផ្សារក្នុងប្រទេសកម្ពុជា។ លោកអ៊ិត ប្រាង រដ្ឋលេខាធិការក្រសួងឧស្សាហកម្ម ថាមពល និងរ៉ែ មានប្រសាសន៍ថា រថយន្ដនេះសមស្របតាមស្ថានភាពចរាចរណ៍ក្នុងប្រទេសកម្ពុជា។ ដោយឡែក លោកស្រីម៉ែន សំអន ឧបនាយករដ្ឋមន្ដ្រី ដែលបានធ្វើជាអធិបតីក្នុងពិធីចុះហត្ថលេខានៃក្រុមហ៊ុនទាំងពីរនេះ មានប្រសាសន៍ថា រថយន្ដអគ្គិសនីនេះនឹងជួយថែទាំបរិដ្ឋាននៅក្នុងស្រុក។ «រថយន្ដអង្គរ ដំណើរការដោយថាមពលអគ្គិសនីនេះពិតជាមានអត្ថប្រយោជន៍ណាស់ ព្រោះថាវានឹងជួយកាត់បន្ថយជាតិពុលក្នុងបរិយាកាស ធ្វើឲ្យបរិដ្ឋានស្អាត និងផ្ដល់ការសន្សំសំចៃខ្ពស់ដល់ជីវភាពអ្នកប្រើប្រាស់»។ លោក ញាន ផល្លឹក ដែលជាអ្នកផ្ដួចផ្ដើមបង្កើតរថយន្ដអង្គរដើរដោយថាមពលអគ្គិសនីនេះគឺជាម្ចាស់ ស្ថានីយ៍លាងរថយន្ដមួយក្នុងខណ្ឌ៧មករាក្រុងភ្នំពេញ។ លោកបានចំណាយពេលផលិតរថយន្ដតាមបច្ចេកទេសផ្ទាល់ខ្លួនចាប់តាំងពីឆ្នាំ២០០២មកម្ល៉េះ ដោយប្រើវិធីផលិតជាលក្ខណៈសិប្បកម្មសុទ្ធសាធ និងដោយស្រូបយក និងកែច្នៃម៉ូដរថយន្ដតាមរថយន្ដក្នុងពិភពលោក។ កូនស្រីរបស់លោកម្នាក់គឺជាអ្នកជួយក្នុងការគូររូបរាងរថយន្ដ។ លោកញាន ផលិតមានប្រសាសន៍ថា លោកចង់ពង្រីកទីផ្សាររថយន្ដប្រភេទនេះនៅក្នុងប្រទេសកម្ពុជា។ ក្រុមហ៊ុនចម្រុះហុងកុង និងក្រុមហ៊ុនកម្ពុជានេះគ្រោងនឹងផលិតរថយន្ដប្រើដោយថាមពលនេះចំនួនប្រាំបី និង១២កៅអីនៅក្នុងពេលអនាគត ដែលជាទិសដៅប្រកួតប្រជែងទីផ្សារជាមួយនឹងរថយន្ដនាំចូល៕ This posting includes an audio/video/photo media file: Download Now |
| ក្រុមនិស្សិតខ្មែរ-អាមេរិកាំងសម្តែងសិល្បៈដើម្បីរក្សាវប្បធម៌ Posted: 25 Mar 2011 01:46 PM PDT សង្គមនិស្សិតខ្មែរឬហៅជាភាសាអង់គ្លេសថា Cambodian Student Society នៅក្នុងសាកលវិទ្យាល័យនៃទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក បានប្រារព្ធពិធីសម្តែងសិល្បៈខ្មែរកាលពីថ្ងៃអាទិត្យ ទី១៣ខែមិនាកន្លងទៅនេះ។ នេះជាលើកទី២៧ហើយដែលក្រុមនិស្សិតខ្មែរប្រារព្ធធ្វើកម្មវិធីនេះឡើងដោយមានការចូលរួមយ៉ាងច្រើនកុះករពីសំណាក់ទស្សនិកជនទាំងខ្មែរនិងបរទេស។ Cambodian Student Society ជាក្រុមនិស្សិតដែលភាគច្រើនពួកគាត់ជាកូនខ្មែរកើតនៅលើទឹកដីអាមេរិកនិងខ្លះទៀតមានស្រុកកំណើតនៅប្រទេសកម្ពុជាតែ បានចាកចេញមករស់នៅទឹកដីអាមេរិកតាំងពីនៅវ័យកុមារ។ សង្គមនិស្សិតខ្មែរនេះបានបង្កើតឡើងនៅឆ្នាំ១៩៥៩។ ដោយមានទឹកចិត្តស្រឡាញ់និងចង់ថែរក្សាវប្បធម៌ប្រពៃណីរបស់ខ្មែរពួកគាត់ព្យាយាមធ្វើយ៉ាងណាឱ្យមានការសម្តែងនេះជារៀងរាល់ឆ្នាំជូនដល់បងប្អូនខ្មែរនិងបរទេសទស្សនា។ គោលបំណងនៃកម្មវិធីនេះគឺចង់បង្ហាញឱ្យស្គាល់ពីវប្បធម៌ ប្រពៃណីខ្មែរ ក៏ដូចជាផ្តល់ឱកាសដល់កូនខ្មែរនិងបងប្អូនខ្មែរបានប្រាស្រ័យទាក់ទងគ្នា។ កញ្ញា អ៊ូ ឈូ (Ou Chhou) ជានាយិការងរបស់ក្រុមនិស្សិតនេះបានឱ្យដឹងថាក្រុមរបស់កញ្ញា បានធ្វើការហ្វឹកហាត់មុនពេលសម្តែងចាប់ផ្តើមតាំងពីប្រាំមួយខែមុនមកម្ល៉េះហើយការសម្តែងរបាំផ្សេងៗទៀតគឺបានជំនួយពីសមាគមនិងអង្គការដទៃទៀត។ កញ្ញា អ៊ូ ឈូមានស្រុកកំណើតនៅប្រទេសកម្ពុជាតែបានចាកចេញមករស់នៅលើទឹកដីអាមេរិកជាមួយឪពុកម្តាយនាងតាំងពីនាងអាយុ៣ឆ្នាំមកម្ល៉េះ។ មកទល់ពេលនេះ កញ្ញាបានចូលរួមជាសមាជិកអស់រយៈពេល៤ឆ្នាំមកហើយនិងខិតខំជំរុញឱ្យមានសកម្មភាព បើទោះបីជាកញ្ញា មមាញឹកនឹងការងារសាលានិងការងារប្រចាំថ្ងៃរបស់កញ្ញាក្តី។ សង្គមនិស្សិតខ្មែរមិនមែនមានតែ សមាជិកជាកូនខ្មែរប៉ុណ្ណោះទេ។ កញ្ញា អ៊ូ ឈូ បានប្រាប់ឱ្យដឹងថា ក្រុមរបស់គាត់មានអ្នកចូលរួមជាជនជាតិវៀតណាម ហ្វីលីពីន និងសាសន៍ដទៃទៀត។ លោក ហ្វឺ អរឌី (Audi Fuhr) ជាកូនកាត់ ហុងហ្ការី និង អេត្យូពី មានអាយុ២២ឆ្នាំ ដែលជាគ្រូបង្វឹកហាត់របាំ ឆៃយ៉ាំ បានឱ្យដឹងថាទោះបីជាលោកមិនមែនជាជនជាតិដើមកំណើតខ្មែរក្តី ក៏លោកមានការចាប់អារម្មណ៍និងចូលចិត្តសិល្បៈខ្មែរ តាំងពីពេលដែលលោកបានសិក្សាអំពីតំបន់អាស៊ីអាគ្នេយ៍។ នៅក្នុងកម្មវិធីនេះមានការសម្តែងសិល្បៈខ្មែរជាច្រើនដូចជា របាំឆៃយ៉ាំ របាំជូនពររបាំអប្សរា ឈុតឆាកខ្លីពីសម័យអង្គរ និងឈុតឆាកសម្តែងដែលឆ្លុះបញ្ចាំងពីសង្គមនិងជីវិតរស់នៅរបស់ប្រជាពលរដ្ឋខ្មែរនៅសហរដ្ឋអាមេរិក។ សមាគមនិស្សិតខ្មែរបានទទួលការគាំទ្រនិងឧបត្ថម្ភ ទាំងផ្នែកថវិកា និង ការលើកទឹកចិត្តជាច្រើនពីសំណាក់ បងប្អូនខ្មែរ ជាពិសេសប្រជាពលរដ្ឋនៅទីក្រុងឡុងប៊ិច។ អ្នកស្រី ឆាយ ដាលីន មានអាយុ៤៣ឆ្នាំ ជាពលរដ្ឋរស់នៅទីក្រុងឡុងប៊ិច ដែលអញ្ជើញមកទស្សនាការសម្តែងនេះ ជាលើកទីមួយហើយបានឱ្យដឹងថា គាត់មានការសប្បាយចិត្តដែលឃើញកូនខ្មែរនៅស្រឡាញ់ប្រពៃណីខ្មែរ។ អ្នកស្រីក៏មានកូនប្រុសជាអ្នករាំរបាំក្រាបនៅក្នុងការសម្តែងនេះដែរ។ កញ្ញា បុប្ផា កញ្ញរ័ត្ន ជាទស្សនិកជន បាននិយាយថា គាត់មានអារម្មណ៍រំភើបនិងគាំទ្រជាខ្លាំងដល់ក្រុមនិស្សិតខ្មែរយើងហើយគាត់មិននឹកស្មានថា ពួកគេកើតនៅអាមេរិកតែអាចនិយាយភាសាខ្មែរនិងសម្តែងបានល្អយ៉ាងនេះ។ គួរបញ្ជាក់ផងដែរថា ការប្រារព្ធពិធីសម្តែងសិល្បៈនេះ គឺដើម្បីស្វាគមន៍ បុណ្យចូលឆ្នាំខ្មែរនៅខែមេសាខាងមុខនេះ។ កញ្ញា អ៊ូ ឈូ ជំនួសមុខឱ្យក្រុមសង្គមនិស្សិតខ្មែរក៏ចង់ជូនពរដល់បងប្អូនខ្មែរនៅប្រទេសកម្ពុជានៅក្នុងឱកាសបុណ្យចូលឆ្នាំថ្មីនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
