VOA News: ព័ត៌មាន: “ការដោះស្រាយជម្លោះកម្ពុជា-ថៃជាការសាកល្បងសមត្ថភាពអាស៊ាន” plus 3 more |
- ការដោះស្រាយជម្លោះកម្ពុជា-ថៃជាការសាកល្បងសមត្ថភាពអាស៊ាន
- អ.ស.បឱ្យកម្ពុជានិងថៃអត់ធ្មត់ហើយដោះស្រាយតាមយន្តការអាស៊ាន
- យូណេស្កូនឹងបញ្ជូនក្រុមបេសកម្មទៅតំបន់ប្រាសាទព្រះវិហារប៉ុន្តែមិនទាន់កំណត់ពេល
- រដ្ឋាភិបាលកម្ពុជាបដិសេធថាមិនបានបញ្ជាឲ្យរារាំងគេហទំព័រទេ
| ការដោះស្រាយជម្លោះកម្ពុជា-ថៃជាការសាកល្បងសមត្ថភាពអាស៊ាន Posted: 19 Feb 2011 05:28 AM PST ស្របគ្នាទៅនឹងសេចក្តីសម្រេចរបស់ក្រុមប្រឹក្សាសន្តិសុខអ.ស.ប លោកនាយករដ្ឋមន្ត្រីហ៊ុន សែនបានរុញបន្ថែមឲ្យប្រទេសថៃទទួលយកកិច្ចឈប់បាញ់គ្នាដោយការចុះហត្ថលេខានៅក្នុងកិច្ចប្រជុំអាស៊ានក្នុងប្រទេសឥណ្ឌូនេស៊ីនៅសប្តាហ៍ខាងមុខ។ ភ្លាមៗប្រទេសថៃបានបដិសេធសំណើរបស់កម្ពុជា។ ការមិនចុះសម្រុងគ្នាចុងក្រោយនេះបាននាំទៅដល់ការមន្ទិលសង្ស័យលើតួនាទីអាស៊ានក្នុងការជួយដោះស្រាយទំនាស់ប្រទេសទាំងពីរនេះ។ លោក កឹម សុខាប្រធានគណបក្សសិទ្ធិមនុស្សបានអះអាងថាភាពផ្ទុយគ្នារវាងរដ្ឋាភិបាលទាំងពីរនៅមានលក្ខណៈផ្ទុយគ្នាខ្លាំងណាស់ដែលពិបាកនឹងបង្កើតឲ្យមានលទ្ធផលក្នុងពេលប្រជុំអាស៊ាន។ «ហើយស្អីដែលថាការកំណត់របស់ភាគីនីមួយៗហ្នឹង វាមិនមែនភាគីកណ្តាលណាមួយ ភាគីទី៣ណាមួយ ដើម្បីជួយសម្របសម្រួលផងហ្នឹង។ អត់ទាន់ឃើញអីច្បាស់លាស់ផងហ្នឹង។ ខ្ញុំឃើញអាស៊ានហ្នឹង ក៏មិនមែនជាអ្នកសម្របសម្រួលអីដែរគ្រាន់គេថាគេរៀបចំកន្លែងឲ្យយើងជួបគ្នាហ្នឹង»។ លោកថ្លែងយ៉ាងដូច្នេះដោយយោងថាក្នុងករណីដែលគ្មានភាគីទី៣ សង្កេតការណ៍ប្រទេសទាំងពីរនឹងនៅតែចោទប្រកាន់គ្នាដដែលៗអំពីអ្នកនេះបាញ់មុន អ្នកនោះរំលោភបំពានមុនអ្នកនេះ។ ក្រោយពីជំនួបជាមួយលោកឧបនាយករដ្ឋមន្ត្រីថៃត្រៃរុង ស៊ូវ៉ាន់គីរី (Trairong Suwankiri) ក្នុងទីក្រុងភ្នំពេញកាលពីថ្ងៃពុធ លោកនាយករដ្ឋមន្ត្រីហ៊ុន សែននៃប្រទេសកម្ពុជាបានថ្លែងនៅក្នុងសន្និសីទកាសែតដ៏កម្រមួយ ដើម្បីបញ្ជាក់ពីជំហររបស់កម្ពុជាចំពោះការស្វែងរកការប្រថាប់ត្រាពី ប្រទេសថៃនៅចំពោះមុខភាគីទីបីនៅឯកិច្ចប្រជុំថ្នាក់រដ្ឋមន្ត្រី ការបរទេសអាស៊ាននៅថ្ងៃទី២២ ខែកុម្ភៈខាងមុខក្នុងទីក្រុងហ្សាការតា ប្រទេសឥណ្ឌូនេស៊ីដែលជាប្រទេសប្រធានអាស៊ានប្តូរវេនពេលនេះ។ សំណើរ៤របស់លោកនាយករដ្ឋមន្ត្រីហ៊ុន សែននោះគឺស្របគ្នានឹងការសម្រេចរបស់ក្រុមប្រឹក្សាសន្តិសុខអ.ស.ប កាលពីថ្ងៃទី១៤ ខែកុម្ភៈ។ សំណើទាំងនោះទី១ គឺការឈប់បាញ់គ្នាជាអចិន្ត្រៃយ៍និងមិនឲ្យមានការផ្ទុះអាវុធ។ ទី២គឺរក្សាកម្លាំងឈរជើងគ្មានការចល័តរង់ចាំការបោះបង្គោលព្រំដែន ចប់ជាមុន។ ទី៣ ការបន្តពិភាក្សារវាងមេបញ្ជាការកងទ័ពដើម្បីកាត់បន្ថយភាពតានតឹង។ ទី៤ ធានាកិច្ចឈប់បាញ់គ្នាដោយមានអ្នកសង្កេតការណ៍អាស៊ានចូលរួម។ តែនាយករដ្ឋមន្ត្រីថៃ អាប់ភីស៊ីត វីចាជីវ៉ាត្រូវគេរាយការណ៍មកថាបានបដិសេធសំណើរបស់លោកនាយក រដ្ឋមន្ត្រីហ៊ុន សែនភ្លាមៗដែរកាលពីថ្ងៃពុធដោយចាត់ទុកថាជាសំណើមិនច្បាស់លាស់។ នាយករដ្ឋមន្ត្រីហ៊ុន សែនដែលអះអាងថាបញ្ហាកម្ពុជានិងថៃត្រូវដោះស្រាយតាមទ្វេភាគីផង និងពហុភាគីផងយោងទៅតាមជម្លោះផងនោះបានបញ្ចាក់ថា៖ «ខ្ញុំប៉ាន់ស្មានទុកជាមុនថាប្រទេសថៃនឹងមិនយល់ព្រមអាចំណុច ទីបួននេះទេ។ ប៉ុន្តែខ្ញុំសូមប្រកាសទុកឲ្យហើយបើភាគីថៃមិនព្រមអាចំណុចទីបួន ឲ្យមានការព្រមព្រៀងបទឈប់បាញ់ដោយប្រទេសអាស៊ាន កម្ពុជាសូមស្វាគមន៍ទទួលយកកងទ័ពនៃបណ្តាប្រទេសអាស៊ានមកនៅលើទឹកដី របស់ខ្លួនតែម្នាក់ឯងជាឯកតោភាគីដើម្បីឲ្យគេមកធ្វើប៉ូលីសត្រួត ពិនិត្យកងទ័ពកម្ពុជា»។
លោក យឹម សុវណ្ណអ្នកនាំពាក្យគណបក្សជំទាស់របស់លោក សម រង្ស៊ីបានដាក់សំណួរលើយន្តការអាស៊ានក្នុងរឿងបញ្ចប់បញ្ហាជម្លោះរវាងកម្ពុជា-ថៃ។ «ពីព្រោះថាយើងឃើញមាននៅក្នុងចំណោមប្រទេសអាស៊ានក៏មានភាពមិនស្របគ្នាច្រើនណាស់ដែរ។ វាមាននិន្នាការនយោបាយខុសគ្នា។ វាមានផល ប្រយោជន៍ខុសគ្នា។ ដូច្នេះយើងពិបាកហ្នឹងពឹងផ្អែកទៅលើអាស៊ានដើម្បីចរចាដោះស្រាយបញ្ហាហ្នឹងឲ្យបានចប់បានឆាប់រហ័ស»។ លោក យឹម សុវណ្ណ និងលោក កឹម សុខាបានដាក់ជំនឿលើយន្តការអ.ស.ប។ សមាគមប្រជាជាតិអាស៊ីអាគ្នេយ៍ហៅកាត់ថាអាស៊ានមានសមាជិក១០ប្រទេស រួមមាន កម្ពុជា ថៃ វៀតណាម ឡាវ ភូមា សឹង្ហបូរី ម៉ាឡេស៊ី ប្រ៊ុយណេ ហ្វីលីពីននិងឥណ្ឌូនេស៊ី។ ក្រុមអ្នកវិភាគចាត់ទុកថានេះជាការសាកល្បងសម្រាប់ អាស៊ានលើកដំបូងដើម្បីដោះស្រាយបញ្ហាជម្លោះផ្ទៃក្នុងសមាជិករបស់ខ្លួនដែលប្រកាន់តឹងនឹងជំហរមិនជ្រៀតជ្រែកកិច្ចការផ្ទៃក្នុងរបស់គ្នាទៅវិញទៅមក។ លោក បណ្ឌិត ឈាង វណ្ណារិទ្ធនាយកប្រតិបត្តិនៃវិទ្យាស្ថានខ្មែរសម្រាប់កិច្ចសហប្រតិបត្តិការនិងសន្តិភាពបានអះអាងថាសមាគមអាស៊ានត្រូវតែផ្លាស់ប្តូរជំហររបៀបរបបធ្វើការងារនិងនីតិវិធីរបស់ខ្លួនដើម្បីអាចនឹងដោះស្រាយជម្លោះមានប្រសិទ្ធភាព។ «ដូច្នេះខ្ញុំគិតថាអាស៊ានត្រូវតែផ្លាស់ប្តូរនូវអាកប្បកិរិយារបស់ខ្លួនក៏ដូចជាលក្ខន្តិកៈនៅក្នុងក្របខណ្ឌអាស៊ានដើម្បីធ្វើអន្តរាគមន៍ដោះស្រាយជម្លោះនៅក្នុងតំបន់។ ដូច្នេះខ្ញុំសង្ឃឹមថាអាស៊ាននឹងប្តូរទាក់ទិននឹងគោលនយោបាយនេះ»។ ក៏ប៉ុន្តែលោក ផៃ ស៊ីផានអ្នកនាំពាក្យទីស្តីការគណៈរដ្ឋមន្ត្រីកម្ពុជាបានអះអាងថាបញ្ហាកម្ពុជានិងថៃលែងជារឿងផ្ទៃក្នុងរបស់ប្រទេសមួយក្នុងសមាគមអាស៊ានទៀតទេតែជាបញ្ហារបស់សមាជិកទៅវិញហើយ។ «ដូច្នេះអានេះជាការប្រជែងជំនឿទាំងអស់គ្នានៅក្នុងករណីរឿងកម្ពុជានេះថាតើយើងទាំងអស់គ្នាជាអាស៊ានយើងអាចមានសមត្ថភាពក្នុងការដោះស្រាយយកយុត្តិធម៌ជាតួមុខឬយកផលប្រយោជន៍ជាតួមុខ»។ ប្រទេសថៃនិងកម្ពុជាមានជម្លោះព្រំដែនជាមួយគ្នាជាច្រើនទសវត្សរ៍ដែលឈានដល់ការវាយប្រយុទ្ធគ្នាផងហើយពេលខ្លះមានការផ្តាច់ចំណងការទូតផងដែរនៅក្រោយពេលដែលកម្ពុជាបានដាក់ប្រាសាទព្រះវិហារចូលក្នុងបញ្ជីបេតិកភណ្ឌពិភពលោកកាលពីឆ្នាំ២០០៨។ ការវាយប្រយុទ្ធគ្នារវាងកងទ័ពទាំងពីរចុងក្រោយគឺចាប់ផ្តើមកាលពីថ្ងៃទី៤ដល់ថ្ងៃទី៧ខែកុម្ភៈ។ ហើយបានកើតឡើងតិចតួចមួយ លើកទៀតកាលពីពាក់កណ្តាលសប្តាហ៍នេះដែលបង្កឲ្យខូចខាតប្រាសាទ ព្រះវិហារ របួសនិងស្លាប់ទាំងសងខាងនិងប៉ះពាល់ដល់ប្រជាពលរដ្ឋទាំងសងខាងដែលរស់នៅក្បែរតំបន់ជម្លោះ៕ This posting includes an audio/video/photo media file: Download Now |
| អ.ស.បឱ្យកម្ពុជានិងថៃអត់ធ្មត់ហើយដោះស្រាយតាមយន្តការអាស៊ាន Posted: 19 Feb 2011 05:19 AM PST ក្រុមប្រឹក្សាសន្តិសុខអង្គការសហប្រជាជាតិ (អ.ស.ប) បានសម្រេចកាលពីថ្ងៃច័ន្ទថាភាគីថៃនិងកម្ពុជាចាំបាច់ឈប់បាញ់គ្នាជាអចិន្ត្រៃយ៍ ត្រូវដោះស្រាយតាមយន្តការសមាគមអាស៊ាន ហើយឈរលើដំណោះស្រាយដោយសន្តិភាព។ លទ្ធផលដូច្នេះគឺបានកើតឡើងបន្ទាប់ពីកម្ពុជានិងថៃបានរាយការណ៍ជូនក្រុមប្រឹក្សាសន្តិសុខអ.ស.បក្នុងកិច្ចប្រជុំនៅឯទីក្រុងញូវយ៉ក អំពីឧបទ្ទវហេតុដែលបានឈានដល់ការវាយប្រហារគ្នានៅព្រំដែនក្បែរប្រាសាទព្រះវិហារ៤ថ្ងៃ រហូតដល់មានការស្លាប់ របួសទាំងសងខាង ខូចខាតប្រាសាទនិងធ្វើឲ្យអ្នកស្រុកទាំងពីរប្រទេសជាច្រើនពាន់គ្រួសារ ភៀសខ្លួន ចេញពីផ្ទះសម្បែងជាដើម។
លោកបណ្ឌិតឈាង វណ្ណារិទ្ធ នាយកប្រតិបត្តិនៃវិទ្យាស្ថានខ្មែរសម្រាប់កិច្ចសហប្រត្តិបត្តិការនិងសន្តិភាពបានថ្លែងថា ដំណោះស្រាយរបស់អ.ស.បមិនបានជួយពេញលេញដល់ជម្លោះថៃនិងកម្ពុជាទេ។ «ដូច្នេះអ្វីដែលកម្ពុជាសង្ឃឹមនោះគឺសង្ឃឹមឲ្យអ.ស.បជាពិសេសក្រុមប្រឹក្សាសន្តិសុខអ.ស.បបង្កើតក្រុមការងារមួយក៏ដូចជាអ្នកសង្កេតការណ៍អន្តរជាតិកងទ័ពថែរក្សាសន្តិភាពអន្តរជាតិចូលមកដោះស្រាយជម្លោះរវាងប្រទេសទាំងពីរដោយបង្កើតជាតំបន់ទ្រនាប់ដើម្បីកុំឲ្យកងទ័ពនៃប្រទេសទាំងពីរហ្នឹងប៉ះទង្គិចគ្នា»។ លទ្ធភាពមួយផ្សេងទៀតដែលជាបំណងរបស់កម្ពុជាផងនោះគឺក្រុមប្រឹក្សាសន្តិសុខអ.ស.បគួរស្នើឲ្យតុលាការអន្តរជាតិដោះស្រាយតាមផ្លូវច្បាប់។នេះជាការអះអាងរបស់លោក វណ្ណារិទ្ធ។ «គឺក្រុមប្រឹក្សាសន្តិសុខអ.ស.បហ្នឹងអាចកោះហៅអ្នកតំណាងមកពីតុលាការអន្តរជាតិដើម្បីធ្វើការបកស្រាយលើសាលក្រមតុលាការអន្តរជាតិឆ្នាំ១៩៦២ក៏ប៉ុន្តែខ្ញុំគិតថាក្រុមប្រឹក្សាសន្តិសុខអ.ស.បមិនបានធ្វើករណីហ្នឹងទេដូច្នេះហ្នឹងគឺជាការសោកស្តាយមួយ»។ ក៏ប៉ុន្តែលោក ហង្ស ឆៃយ៉ា នាយកវិទ្យាស្ថានខ្មែរដើម្បីលទ្ធិប្រជាធិបតេយ្យបាន យល់ឃើញផ្ទុយគ្នា។ លោកអះអាងថាការសម្រេចរបស់អ.ស.បទំនងជារឿងមួយដែលក្រុមប្រឹក្សាសន្តិសុខអ.ស.បពិចារណាឃើញថាបញ្ហាជម្លោះព្រំដែនកម្ពុជាថៃនេះមិនមែនជារឿងធ្ងន់ធ្ងរដែលតម្រូវឲ្យ មានកងកម្លាំងរក្សាសន្តិសុខចូលរួមពាក់ព័ន្ធទេឬយល់ថាបញ្ហានេះអាចដោះស្រាយបានក្នុងថ្នាក់តំបន់គឺអាស៊ាន។ «ម៉្លោះហើយរឿងនេះគឺថាអ.ស.បទាមទារហ្នឹងមិនមែនជារឿងហួសហេតុពីអ្វីដែលយើងបានស្មានទេ។ ហើយគេចង់ឲ្យឃើញនៅក្នុងតំបន់នេះ ដូចជា សមាគមអាស៊ានហ្នឹងឲ្យមានតួនាទីសំខាន់»។ លោកថ្លែងយ៉ាងដូច្នេះដោយយោងថាអ.ស.បទំនងជាយល់ពីស្ថានការណ៍នយោបាយផ្ទៃក្នុងថៃហើយនឹងត្រូវចំណាយច្រើនប្រសិនបើដាក់កងកម្លាំងអ.ស.បមកកម្ពុជាម្តងទៀត។ លោកបានលើកយកឧទាហរណ៍ពីការចំណាយយ៉ាងច្រើនសន្ធឹកសន្ធាប់គឺ២ពាន់លានដុល្លារសម្រាប់កិច្ចការការពារសន្តិភាពក្នុងប្រទេសកម្ពុជាកាលពី ដើមទសវត្សរ៍១៩៩០ របស់កងទ័ពអ.ស.បដែលហៅកាត់ថាអ៊ុនតាក់។ ទាំងគណបក្សជំទាស់និងអ្នកវិភាគបានចាត់ទុកថាបញ្ហាព្រំដែនស្ថិតនៅក្នុងស្ថានភាពផុយស្រួយដោយសារក្រោយពេលបញ្ចប់ការវាយប្រហារគ្នាកាលពីថ្ងៃទី៧ខែកុម្ភៈមុនពេលកិច្ចប្រជុំក្រុមប្រឹក្សាអ.ស.បអំពីរឿងព្រំដែនមកទល់ពេលនេះ កងទ័ពកម្ពុជានិងថៃរាប់ពាន់នាក់កំពុងត្រៀមលក្ខណៈខ្ពស់នៅឡើយ ជាពិសេសនៅក្បែរតំបន់ប្រាសាទព្រះវិហារ ជាបេតិកភណ្ឌពិភពលោកដែលអន្តរជាតិនិងកម្ពុជាមានភារកិច្ចការពារ។ ទោះជាកម្ពុជានិងថៃបានព្រមព្រៀងជាមួយក្រុមប្រឹក្សាសន្តិសុខអ.ស.បពីការឈប់បាញ់គ្នាជាអចិន្ត្រៃយ៍ក៏ដោយ ក៏កងទ័ពនៃប្រទេសទាំងពីរមិនត្រូវបានដកចេញពីតំបន់ជម្លោះនៅឡើយដែរ។ ដំណោះស្រាយរបស់អ.ស.បត្រូវកម្ពុជានិងថៃចាត់ទុកថាជាជោគជ័យរៀងៗខ្លួន។ ក៏ប៉ុន្តែមន្ត្រីគណបក្សជំទាស់កម្ពុជាចាត់ទុកថាមិនមែនជាជោគជ័យនៅឡើយទេ។ លោក កឹម សុខាប្រធានគណបក្សសិទ្ធិមនុស្សជាគណបក្សជំទាស់ បានអះអាងថាភាគីទាំងពីរមិនបានជោគជ័យដូចគ្នាក្នុងដំណោះស្រាយព្រំដែននៅឯអ.ស.ប នេះ។ លោក កឹម សុខា បញ្ជាក់ថាកម្ពុជាត្រូវប្រឹងប្រែងតទៅទៀត។ «ខ្ញុំថាអត់ទាន់បានទទួលលទ្ធផលអី្វទាំងអស់។ ទាំងពីរ ទាំងសងខាងហ្នឹង នៅតែ មានរឿងទំនាស់ដដែល។ ហើយអត់មាននរណាទទួលជោគជ័យលើនរណាទេ។ ហើយអន្តរជាតិគេបង្ហាញការគាបសង្កត់មួយដែលស្រាលបំផុតសិនក្នុងជំហានទីមួយហ្នឹង។ តែដល់ពេលណាមានបញ្ហាតទៅទៀត បានគេលើកមួយកម្រិតទៀត»។ លោក កឹម សុខា បានអះអាងថាលោកពុំឃើញក្រុមប្រឹក្សាអ.ស.បដាក់ ទណ្ឌកម្មប្រទេសថៃ ឬធ្វើអ្វីមួយនោះទេ។ លោក ថ្លែងថារឿងសំខាន់គឺការលើកទឹកចិត្ត កងទ័ពរបស់កម្ពុជាក្នុងការការពារបូរណភាពទឹកដី ហើយរដ្ឋាភិបាលខ្លួនឯង ក៏ត្រូវប្រកាន់យកការជំរុញយកយន្តការអ.ស.បនិងពហុភាគីតទៅទៀត មិនត្រូវនៅស្ងៀម និងមិនត្រូវរាថយទៅរកកិច្ចចរចាទ្វេភាគីទៀតទេ។ លោក យឹម សុវណ្ណមន្ត្រីនាំពាក្សគណបក្សជំទាស់ដែរគឺគណបក្ស សម រង្ស៊ីបាន ថ្លែងថាស្ថានភាពកម្ពុជាធ្ងន់ធ្ងរដោយសារមានការរំលោភបំពានមិនត្រឹមតែច្បាប់ កម្ពុជាទេគឺច្បាប់អន្តរជាតិផងដែរ។ រឿងនេះតម្រូវឲ្យមានការដោះស្រាយរួមគ្នាទាំងអ.ស.បនិងអាស៊ានតែម្តង។ «អញ្ចឹងហើយភាគីណាក៏ដោយដែលបានរំលោភសេចក្តីសម្រេចរបស់ UNESCO រំលោភក្របខណ្ឌច្បាប់ ផែនទី សាលក្រមតុលាការទីក្រុងឡាអេ រំលោភកិច្ចព្រមព្រៀងទីក្រុងបារីសភាគីនោះត្រូវតែទទួលខុសត្រូវ។ តែខ្ញុំយល់ថានេះជាជំហានទីមួយទេ។ នៅមានការងារជាច្រើនទៀតដែលត្រូវធ្វើ»។ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រីនិងជារដ្ឋលេខាធិការ បាន អះអាងថា សេចក្តីសម្រេចរបស់ក្រុមប្រឹក្សាសន្តិសុខអ.ស.បជា សេចក្តីសម្រេចដែលកម្ពុជាចង់បាន គឺឈប់បាញ់គ្នាជាអចិន្រ្តៃយ៍ ដោះស្រាយដោយសន្តិវិធី និងតាមយន្តការអាស៊ានដែលជាភាគីទី៣។ លោកអះអាងថាការចរចាទ្វេភាគីរឿងព្រំដែនកន្លងមកភាគីថៃមិនដែលយកទៅពិចារណាទេ គឺទុកចោលនៅរដ្ឋាភិបាលនិងរដ្ឋសភា។ ដូច្នេះបើមានភាគីទី៣ចូលរួម លោកផៃ ស៊ីផានបានអះអាងថានឹងធ្វើឲ្យមានការកត់ត្រាជាលាយលក្ខណ៍អក្សរ និងមានអ្នកសង្កេតការណ៍សម្របសម្រួល។ ជាមួយនឹងការទទូចឲ្យរដ្ឋាភិបាលត្រូវពង្រឹងកម្លាំងទ័ពប្រទេសកម្ពុជាដើម្បីប្រឆាំងនឹងប្រទេសជិតខាងដែលមានគំនិតមិនល្អខណៈពេលដែលមានការចរចានោះ លោក យឹម សុវណ្ណ បានបញ្ជាក់ថាការដោះស្រាយព្រំដែនខាងកើតជាមួយ ប្រទេសវៀតណាមក៏ត្រូវដោះស្រាយដែរនៅក្នុងពេលដែលអន្តរជាតិចូលរួមនេះ។ «យ៉ាងណាម៉ិញ នៅព្រំដែនខាងកើតក៏ដូចគ្នាដែរយើងក៏ត្រូវពិនិត្យមើលឲ្យបានហ្មត់ចត់នូវការបោះបង្គោលព្រំដែន។ បើសិនជាមានការប៉ះទង្គិចទៅលើប្រជាពលរដ្ឋត្រូវតែដោះស្រាយជាបន្ទាន់ស្របពេលដែលអ.ស.ប និងសមាគមអាស៊ានកំពុងតែធ្វើការដោះស្រាយបញ្ហាព្រំដែននេះយើងក៏ចង់ឲ្យមានការដោះស្រាយទាំងព្រំដែនខាងកើត ទាំងព្រំដែនខាងលិចរួមជាមួយគ្នាផង ដើម្បីបញ្ចប់បញ្ហាក្នុងពេលតែមួយតែម្តង»។ កម្ពុជានិងវៀតណាម កំពុងដំណើរការ ការបោះបង្គោលព្រំដែនឲ្យចប់ នៅឆ្នាំ២០១២ ទោះបីក្រុមគណបក្សជំទាស់កម្ពុជាបានចោទប្រកាន់ថាព្រំដែនកម្ពុជា ត្រូវមានការរំលោភបំពានពីប្រទេសប្រទេសវៀត ណាមក្តី តែប្រទេសវៀតណាមបានបដិសេធអំពីរឿងនេះដោយលើកឡើងថាប្រទេសទាំងពីរមានគណៈកម្មាធិការព្រំដែនដែលកំពុងបន្តកិច្ចការព្រំដែន។
អាស៊ានធ្លាប់បានខកខានក្នុងការផ្សះផ្សារជម្លោះព្រំដែនកម្ពុជាជាមួយនឹងប្រទេសជិតខាងកម្ពុជាជាច្រើនលើក។ ការខកខាននេះទំនងជាបង្កពីគោលការណ៍មិនជ្រៀតជ្រែកកិច្ចការផ្ទៃក្នុងគ្នាទៅវិញទៅមកក្នុងចំណោមសមាជិក ទាំង១០ប្រទេសនោះ។ បទពិសោធន៍នេះ ធ្វើឲ្យមានសំណួរថាតើអាស៊ាននិងដោះស្រាយយ៉ាងណា ពេលអ.ស.បបានផ្ទេរភារកិច្ច មកឲ្យអាស៊ានដើម្បីដោះស្រាយជម្លោះប្រដាប់អាវុធរវាងកម្ពុជានិងថៃ។ លោក បណ្ឌិត ឈាង វណ្ណារិទ្ធបានអះអាងថាតួនាទីរបស់អាស៊ានក្នុងការដោះស្រាយជម្លោះគឺជារបត់ប្រវត្តិសាស្ត្រថ្មីមួយរបស់អាស៊ាន ហើយអាស៊ានគួរប្រុងប្រៀបដើម្បីផ្លាស់ប្តូរគោលការណ៍របៀបរបបនីតិវិធីរបស់ខ្លួន។ បើពុំដូច្នោះទេនឹងមិនអាចដោះស្រាយជម្លោះបានទេ។ «ដូច្នេះខ្ញុំគិតថាអាស៊ានត្រូវតែផ្លាស់ប្តូរនូវអាកប្បកិរិយារបស់ខ្លួនក៏ដូចជាលក្ខន្តិកៈនៅក្នុងក្របខណ្ឌអាស៊ានដើម្បីធ្វើអន្តរាគមន៍ដោះស្រាយជម្លោះនៅក្នុងតំបន់។ ដូច្នេះខ្ញុំសង្ឃឹមថាអាស៊ាននឹងប្តូរទាក់ទិននឹងគោលនយោបាយនេះ»។ សមាគមអាស៊ានគ្រោងនឹងជួបប្រជុំគ្នានៅសប្តាហ៍ខាងមុខក្នុងទីក្រុងចាការតា (Jakarta) ប្រទេសឥណ្ឌូនេស៊ីដើម្បីពិភាក្សាបញ្ហានានាជាពិសេសបញ្ហាសន្តិសុខក្នុងតំបន់ រួមនឹងបញ្ហាជម្លោះប្រដាប់អាវុធនិងជម្លោះព្រំដែនកម្ពុជាថៃដ៏រ៉ាំរ៉ៃនោះផង។ សមាជិកអាស៊ានមាន១០ប្រទេសរួម កម្ពុជា ថៃ វៀតណាម ឡាវ ភូមា សិង្ហបូរី ម៉ាឡេស៊ី ប្រ៊ុយណេ ហ្វីលីពីន និងឥណ្ឌូនេស៊ី៕ This posting includes an audio/video/photo media file: Download Now |
| យូណេស្កូនឹងបញ្ជូនក្រុមបេសកម្មទៅតំបន់ប្រាសាទព្រះវិហារប៉ុន្តែមិនទាន់កំណត់ពេល Posted: 19 Feb 2011 05:18 AM PST អង្គការយូណេស្កូ (UNESCO)និយាយថាខ្លួននឹងនៅតែបញ្ជូនក្រុមអ្នកជំនាញ ទៅវាយតម្លៃការខូចខាតប្រាសាទព្រះវិហារដោយសារការវាយប្រយុទ្ធគ្នារវាងកងទ័ពថៃនិងកម្ពុជាដដែលក៏ប៉ុន្តែអះអាងថាបេសកកម្មនេះអាចធ្វើទៅបានលុះត្រាតែស្ថានភាពយោធានៅព្រំដែនប្រទេសទាំងពីរវិលទៅរកសភាពធម្មតាវិញ។ នេះបើតាមការអះអាងរបស់លោកស្រី Sue William អ្នកនាំពាក្យរបស់ UNESCO ដែលបានថ្លែងប្រាប់វីអូអេខ្មែរ។ «មិនមានបេសកកម្មត្រូវដឹងជាមុនថានឹងត្រូវបញ្ជូនទៅកាន់ទីប្រាសាទព្រះវិហារនៅពេលនេះ។ ហើយជាក់ស្តែងនឹងគ្មានបេសកកម្មអាចនឹងកើតឡើងនៅប្រាសាទទេរហូតទាល់តែជម្លោះបញ្ចប់ជាមុនសិនរវាងគូភាគីទាំងពីរ»។ ប្រទេសកម្ពុជាបានចោទប្រកាន់ប្រទេសថៃថាបានបាញ់កាំភ្លើងត្រូវចំប្រាសាទព្រះវិហារជាបេតិកភណ្ឌពិភពលោកដែលត្រូវហាមឃាត់មិនឲ្យប៉ះពាល់ក្នុងពេលសង្គ្រាមហើយបានប្តឹងទៅអង្គការសហប្រជាជាតិស្នើសុំក្រុមប្រឹក្សាសន្តិសុខកាលពីសប្តាហ៍មុនឲ្យមានការកោះប្រជុំជាបន្ទាន់អំពីការណ៍ដែលកម្ពុជាបានចោទប្រកាន់កងទ័ពថៃថាបានឈ្លានពានរំលោភអធិបតេយ្យភាពកម្ពុជា។ ក៏ប៉ុន្តែនាយករដ្ឋមន្ត្រីថៃអាប់ភីស៊ីត វីចាជីវ៉ាបានបដិសេធថាថៃពុំបានឈ្លានពានកម្ពុជាទេ។ ប្រទេសថៃបានថ្លែងការពារជំហររបស់ខ្លួនផងដែរថាកងទ័ពថៃគ្រាន់តែឆ្លើយតបទៅនឹងចំណុចដែលកងទ័ពកម្ពុជាវាយប្រហារមកលើខ្លួនតែប៉ុណ្ណោះ នៅពេលសួរពីការទទួលខុសត្រូវរឿងខូចខាតប្រាសាទព្រះវិហារ។ ថៃបានចោទប្រកាន់ត្រឡប់វិញថាកម្ពុជាយកបេតិកភណ្ឌជាមូលដ្នានទ័ពក្នុងការវាយប្រហារ។ ប៉ុន្តែកម្ពុជាបានបដិសេធ។ ទោះជាយ៉ាងណាក៏ដោយអគ្គនាយិកា UNESCO គឺលោកស្រី អ៊ីរីណា បូគូវ៉ា (Irina Bokova) បានសម្រេចបញ្ជូនបេសកជនពិសេសគឺលោកគូអ៊ីជីរ៉ូ ម៉ាត់ស៊ូរ៉ា (Koïchiro Matsuura) ជាអតីតអគ្គនាយក UNESCO ទៅកាន់ប្រទេសថៃនិងកម្ពុជាដើម្បីស្ទាបស្ទង់ស្ថានការណ៍ថាត្រូវធ្វើម៉េចអាចឲ្យជម្លោះរវាងកម្ពុជា-ថៃមានការថមថយ។ ក្រសួងការបរទេសថៃកាលពីថ្ងៃទី៩ ខែកុម្ភៈបានជំទាស់ចំពោះការប៉ុនប៉ងបញ្ជូនបេសកកម្ម UNESCO ទៅកាន់តំបន់ប្រាសាទព្រះវិហារដោយចាត់ទុកថាស្ថានការណ៍នៅមានភាពតានតឹងនៅឡើយក្រៅពីព្រមានថា UNESCO គួរស្វែងរកការយល់ព្រមពីថៃជាមុន។ ការបញ្ជាក់ដូច្នេះកើតឡើងក្រោយពេលដែលកម្ពុជាបានស្នើទៅ UNESCO កាលពីថ្ងៃទី៧ខែកុម្ភៈ ដើម្បីសុំអន្តរាគមន៍ដោយសារមានការខូចខាតប្រាសាទព្រះវិហារដែលជា បេតិកភណ្ឌវប្បធម៌អន្តរជាតិ។ ទោះជាយ៉ាងណាក៏ដោយ ក្រុមប្រឹក្សាសន្តិសុខអ.ស.បបានជួបប្រជុំពិភាក្សាកាលពីថ្ងៃច័ន្ទក្នុងទីក្រុង New York ដើម្បីដោះស្រាយជម្លោះយោធារវាង ភាគីកម្ពុជា និងថៃដែលបានចោទប្រកាន់គ្នាទៅវិញទៅមករឿងការផ្ទុះអាវុធកាលពីថ្ងៃទី៤ដល់ថ្ងៃ៧ ខែកុម្ភៈនោះ។ ក្រៅពីបង្ហាញពីក្តីបារម្ភចំពោះជម្លោះប្រដាប់អាវុធរវាងថៃនិងកម្ពុជា ក្រុមប្រឹក្សា នេះបានជំរុញឲ្យភាគីទាំងពីរបញ្ឈប់ការវាយប្រយុទ្ធគ្នាជាអចិន្ត្រៃយ៍។ ស្ថាប័នសហប្រជាជាតិនេះក៏ពុំបានសម្រេចតាមសំណើកម្ពុជាក្នុងការបញ្ជូនកងកម្លាំងរបស់ខ្លួនទៅកាន់តំបន់ប្រាសាទព្រះវិហារដែរ។ ក៏ប៉ុន្តែលោក បណ្ឌិតឈាង វណ្ណារិទ្ធ នាយកប្រតិបត្តិនៃវិទ្យាខ្មែរសម្រាប់កិច្ចសហ ប្រតិបត្តិការនិងសន្តិភាពបានថ្លែងប្រាប់ វីអូអេខ្មែរ កាលពីមុនកិច្ចប្រជុំក្រុមប្រឹក្សាសន្តិសុខថា៖ ស្ថានភាពយោធារវាងកម្ពុជានិងថៃកំពុងមានហានិភ័យក្រៅពីបញ្ជាក់ថាមានវត្តមានកងទ័ពអ.ស.បជាការល្អ តែលោកអះអាងថាការបញ្ជូនឬយ៉ាងណាគឺអាស្រ័យទៅលើក្រុមប្រឹក្សាសន្តិសុខអ.ស.បទេ។ «ខ្ញុំគិតថាបើក្រុមប្រឹក្សាសន្តិសុខអ.ស.បយល់ថាភាពតានតឹងឬក៏សង្គ្រាមនៅតាមព្រំដែនជាការគំរាមកំហែងមួយដល់សន្តិសុខនិងសន្តិភាពក្នុងតំបន់និងក្នុងសាកលលោកនោះគឺក្រុមប្រឹក្សាសន្តិសុខអាចនឹងចាត់វិធានការបញ្ជូនកងទ័ពមកតំបន់ហ្នឹងបានដោយមិនបាច់មានការយល់ព្រមពីភាគីដែលមានជម្លោះ»។ លោកបានលើកយកឧទាហរណ៍ស្រដៀងគ្នាមួយគឺជម្លោះរវាងប្រទេសឥណ្ឌា និងប៉ាគីស្ថានចាប់តាំងពីទសវត្សរ៍១៩៥០ទល់បច្ចុប្បន្នមកបញ្ជាក់ថា អ.ស.ប បានបញ្ជូនកងកម្លាំងរបស់ខ្លួនទៅកាន់តំបន់ជម្លោះដោយមិនចាំបាច់មានការ យល់ព្រមពីភាគីជម្លោះទាំងពីរទេ៕ This posting includes an audio/video/photo media file: Download Now |
| រដ្ឋាភិបាលកម្ពុជាបដិសេធថាមិនបានបញ្ជាឲ្យរារាំងគេហទំព័រទេ Posted: 18 Feb 2011 04:02 PM PST ប៉ុន្មានសប្តាហ៍កន្លងមកនេះ គេមិនអាចបើកមើលគេហទំព័រមួយចំនួនដែលរិះគន់រដ្ឋាភិបាលបានទេ ដែលការផ្សព្វផ្សាយគេហទំព័រទាំងនោះត្រូវបានធ្វើតាមរយៈក្រុមហ៊ុនផ្តល់សេវាអ៊ីនធឺណិតមួយចំនួន។ ទោះបីជារដ្ឋាភិបាលបានបដិសេធថាមិនមានការបញ្ជាពិនិត្យចាប់ពិរុទ្ធគេហទំព័រក៏ដោយ កំណត់ហេតុដែលធ្លាយចេញបង្ហាញថារដ្ឋាភិបាលពិតជាបានបញ្ជាឲ្យកាត់ផ្តាច់ការប្រើប្រាស់គេហទំព័រទាំងនេះដែរ។ ក្នុងសប្តាហ៍នេះ កាសែតភ្នំពេញប៉ុស្តិ៍បានបោះពុម្ពផ្សាយ ការដកស្រង់មួយចំនួន ពីកំណត់ហេតុប្រជុំមួយ ដែលនៅក្នុងអង្គប្រជុំនោះ ក្រសួងប្រៃសណីយ៍និងទូរគមនាគមន៍បានសើ្នឲ្យក្រុមហ៊ុនផ្តល់សេវាអ៊ីនធឺណិតមួយចំនួនរារាំងការចូលមើលគេហទំព័រទាំងឡាយណាដែលមានលក្ខណៈរិះគន់។ កាសែតភ្នំពេញប៉ុស្តិ៍ ក៏បានបោះពុម្ពផ្សាយផងដែរនូវការដកស្រង់ពីសារអេឡិកត្រូនិកមួយ ដែលផ្ញើដោយមន្រ្តីជាន់ខ្ពស់ម្នាក់នៃក្រសួងនេះ ដែលបានអបអរសាទរដល់ក្រុមហ៊ុនផ្តល់សេវាអ៊ីនធឺណិតចំនួន១០ ដែលបានទប់ស្កាត់ការចេញផ្សាយរបស់គេហទំព័រមួយចំនួន ហើយព្រមានក្រើនរំឭកដល់ក្រុមហ៊ុនផ្តល់សេវាអ៊ីនធឺណិតបីទៀតដែលមិនបានអនុវត្តសំណើរបស់ខ្លួន។ អង្គការសិទ្ធិមនុស្សលីកាដូ ដែលបានចេញផ្សាយរបាយការណ៍ប្រចាំឆ្នាំវាយតម្លៃស្ថានភាពប្រព័ន្ធផ្សព្វផ្សាយនៃប្រទេសកម្ពុជា បានជំទាស់នឹងការពិនិត្យចាប់ពិរុទ្ធគេហទំព័រនេះ។ ម៉ាធូ ភែលើរីន (Mathieu Pellerin) អ្នកផ្តល់ប្រឹក្សានៃអង្គការលីកាដូ និយាយថា ការលេចធ្លាយអំពីការពិនិត្យចាប់ពិរុទ្ធរបស់រដ្ឋាភិបាលនេះ គឺសំខាន់ណាស់។ លោក ភែលើរីន និយាយថា៖ «ការចាប់ផ្តើមពិនិត្យចាប់ពិរុទ្ធអ៊ីនធឺណិត ជាមូលដ្ឋានគឺជាការកំពុងពិនិត្យចាប់ពិរុទ្ធកន្លែងដែលមិនទាន់មានការត្រូតពិនិត្យចុងក្រោយសម្រាប់ប្រជាពលរដ្ឋកម្ពុជាសម្តែងមតិ និងដែលជាកន្លែងតែមួយគត់ដែលពួកគេទទួលបានព័ត៌មានដែលមិនអាចរកបានតាមមធ្យោបាយផ្សេងទៀត។ វាជាជំហានដ៏ធំនិងធ្ងន់ធ្ងរមួយក្នុងការបង្ក្រាបដែលមានជាបន្តបន្ទាប់ ចំពោះសេរីភាពនៃការបញ្ចេញមតិនិងការទទួលបានព័ត៌មាន»។ តាមលក្ខណៈបច្ចេកទេស បណ្តាញព័ត៌មានបោះពុម្ពមានសេរីភាព ប៉ុន្តែគ្រប់ស្ថានីយ៍ទូរទស្សន៍ និងវិទ្យុភាគច្រើនគាំទ្ររដ្ឋាភិបាល។ រដ្ឋាភិបាលប្រើប្រាស់ការគំរាមចោទប្រកាន់ពីបទឧក្រិដ្ឋបរិហារកេរ្តិ៍ ដើម្បីបន្ថយកម្រិតនៃការរិះគន់។ ក្រុមហ៊ុនផ្តល់សេវាអ៊ីនធឺណិត EZECOM ដែលជាក្រុមហ៊ុនផ្តល់សេវាអ៊ីធឺណិតធំបំផុតមួយនៅក្នុងប្រទេសកម្ពុជា បានឲ្យដឹងរាប់សប្តាហ៍មកហើយថា រដ្ឋាភិបាលមិនបានប្រាប់ខ្លួនឲ្យទប់ស្កាត់ការផ្យព្វផ្សាយរបស់គេហទំព័រទេ ហើយថា ខ្លូនមិនបានរារាំងគេហទំព័រណាមួយទេ។ ប៉ុន្តែក្រុមហ៊ុន EZECOM គឺជាក្រុមហ៊ុនមួយក្នុងចំណោមក្រុមហ៊ុនផ្តល់សេវាអ៊ីនធឺណិតចំនួន១០ ដែលសារអេឡិកត្រូនិករបស់មន្ត្រីរដ្ឋាភិបាលនោះបានសរសើរដល់ការទប់ស្កាត់ការចេញផ្សាយគេហទំព័រមួយចំនួន រួមមានគេហទំព័ររបស់ KI-Media ផងដែរ។ មន្រ្តីប្រតិបត្តិការសំខាន់ម្នាក់នៃក្រុមហ៊ុន EZECOM មិនធ្វើអត្ថាធិប្បាយចំពោះសេចក្តីរាយការណ៍របស់កាសែតភ្នំពេញប៉ុស្តិ៍ទេ។ គេហទំព័រប្រាំ ប្រាំមួយ ដែលត្រូវបានរារាំងការចេញផ្សាយ ជារឿយៗរិះគន់គណបក្សកាន់អំណាច។ ឧទាហរណ៍ លោកនាយករដ្ឋមន្ត្រី ហ៊ុន សែន ត្រូវបានចុះក្នុងគេហទំព័រ KI-Media នៅក្នុងទំព័រមួយដែលមានចំណងជើងថា«មេក្បត់ជាតិ»។ គេហទំព័រនោះបង្ហាញលោកសម រង្ស៊ី ដែលជាមេដឹកនាំប្រឆាំងនិរទេស នៅក្នុងទំព័រ«វីរជនស្នេហាជាតិ»របស់ខ្លួន។ គេហទំព័រ KI-Media ជារឿយៗផ្សាយអត្ថបទរិះគន់គណបក្សគ្រប់គ្រងអំណាច និងអ្នកគាំទ្ររបស់ខ្លួន។ ម៉ាធូ ភែលើរីន នៃអង្គការលីកាដូ និយាយថា ពីព្រោះតែទីផ្សារអ៊ីនធឺណិតកម្ពុជានៅតូច ផលប៉ះពាល់នៃការរារាំងការទទួលព័ត៌មានពីគេហទំព័រទាំងនេះ មានភាពធ្ងន់ធ្ងរជាងការគិតទៅទៀត។ «អ្នកមិនមានគេហទំព័រច្រើនដូចប្រទេសដទៃទៀតទេ។ ដូច្នេះចំនួនគេហទំព័រដ៏តិចតួចបំផុតនេះមានផលប៉ះពាល់ដល់អ្នកមើល អ្នកអានយ៉ាងច្រើន ហើយគេហទំព័រដែលទទួលរងការពិនិត្យចាប់ពិរុទ្ធទាំងនេះ មានប្រជាប្រិយភាពយ៉ាងខ្លាំងក្នុងចំណោមសហគមន៍កម្ពុជា»។ រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានប្រាប់វីអូអេម្តងទៀតកាលពីថ្ងៃព្រហស្បតិ៍កន្លងទៅនេះថា គ្មានគោលនយោបាយរារាំងគេហទំព័រទេ៕ ប្រែសម្រួលដោយ អ៊ឹម សុធារិទ្ធ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
