Koh Santipheap Daily |
- សមត្ថកិច្ចចំរុះឆ្មក់ចូលបបង្រ្កាបអ្នកប្រើប្រាស់គ្រឿងញៀនក្នុងផ្ទះសំណាក់មួយឃាត់ខ្លួនមនុស្ស១១នាក់
- ជនផឹកស៊ីស្រែកឡូឡាដែលឪពុកមាបាញ់ត្រូវក្បាលបានស្លាប់ហើយ
- ដឹកកម្មករជាង៣០នាក់ទៅធ្វើការ បើកបរលឿនពេកចាក់ចោលតាមផ្លូវ
- នារីបើករថយន្តវង្វេងស្មារតីចូលមន្ទីរពេទ្យស្គាល់អត្តសញ្ញាណហើយ ប៉ូលិសប្រគល់រថយន្តជូនសាច់ញាតិវិញ
- ក្មេងប្រុសតូចៗ២នាក់បងប្អូនលង់ទឹកស្លាប់ ខណៈឪពុកអុំទូកទៅកណ្តាលព្រែកដាក់មង
- ឃាត់ខ្លួនម្ចាស់ផ្ទះខារ៉ាអូខេ និងភ្ញៀវសង្ស័យពាក់ព័ន្ធគ្រឿងញៀន
- ជំនួបសវនាការសំខាន់ៗចំនួន៣របស់សម្តេចតេជោនាយករដ្ឋមន្ត្រី
- បុរសជនជាតិអង់គ្លេសម្នាក់ដួលស្លាប់ក្នុងបន្ទប់ទឹកនៃសណ្ឋាគាររីចេនប៉ាក
- អង្គការ COCD ចែកធុងចំរោះទឹកស្អាតដល់ប្រជាជនស្រុកភ្នំក្រវាញ
- បុរសម្នាក់ប្រចណ្ឌវាយប្រពន្ធ និងម្នាក់ស្រវឹងស្រាវាយបំផ្លាញទ្រព្យសម្បត្តិ
- ផែនទីបង្ហាញផ្លូវរបស់ក្រុមប្រឹក្សាសន្តិសុខ អ.ស.ប សម្រាប់សន្តិភាព
- រដ្ឋមន្ត្រីថោង ខុន រិះរកវិធានការលុបបំបាត់អំពើឆក់កាបូបពីអ្នកទេសចរ
- សមត្ថកិច្ចចំរុះត្រួតពិនិត្យជាតិអាល់កុលនៅខណ្ឌ៧មករា
- តុលាការសំរេចឃុំខ្លួនជនស្ទើរភ្លើងចាប់ក្មេងជំរិតទារប្រាក់៣.០០០ដុល្លារ
- មន្ទីរសុខាភិបាលបូកសរុបការងារឆ្នាំ២០១០ ដុតកម្ទេចឱសថក្លែងក្លាយ និងខូចសុខភាព
- ធ្លាប់ទំនាក់ទំនងស្រឡាញ់គ្នាបានរូបបានកាយ ម្តាយប្តឹងឱ្យប៉ូលិសចាប់
- ផ្ទុះគ្រាប់បែកជាបន្តបន្ទាប់នៅមូលដ្ឋានយោធាតង់ហ្សានីស្លាប់២០នាក់
- ស្លាប់៤នាក់នៅយេម៉ែនដែលការប្រឆាំងតវ៉ាកាន់តែខ្លាំងឡើង
- បណ្តាមេខ្លោងប្រឆាំងអ៊ីរ៉ង់នឹងត្រូវកាត់ទោស
| Posted: 18 Feb 2011 07:47 PM PST រាជធានីភ្នំពេញ ៖ សមត្ថកិច្ចចំរុះ មានប៉ូលិស ប៉េអឹម មន្រ្តីអាជ្ញាធរមូលដ្ឋាន និងមន្រ្តីតុលាការដឹកនាំដោយលោក ជេត ខេមរា ព្រះរាជអាជ្ញារងសាលាដំបូងរាជធានីចុះឆ្មក់ចូលបង្រ្កាបឆែកឆេរបទល្មើសប្រើប្រាស់ជួញដូរគ្រឿងញៀននៅក្នុងអគារលេខ៦០៤ នៃផ្ទះសំណាក់យីហោ ១៣៣ ភូមិទួលសង្កែ សង្កាត់ទួលសង្កែ ខណ្ឌឬស្សីកែវ ឃាត់ខ្លួនមនុស្សសុទ្ធតែក្រុមក្មេងស្ទាវ១១នាក់ គឺស្រី៤នាក់ ប្រុស៧នាក់ ក្នុងនោះមានកូនប្រុសម្ចាស់ផ្ទះសំណាក់ម្នាក់ផងដែរ ។ ការឆ្មក់ចូលបង្រ្កាបសកម្មភាពលួចលាក់ប្រើប្រាស់គ្រឿងញៀននេះបានធ្វើឡើងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី១៩ កុម្ភៈ ២០១១ និងបន្តរហូតមកវេលាម៉ោង៩ព្រឹកថ្ងៃដដែលនេះ ទើបព្រះរាជអាជ្ញាបានសម្រេចប្លុំបេផ្ទះសំណាក់នេះចោលផ្អាកធ្វើអាជីវកម្ម រង់ចាំធ្វើការដោះស្រាយតាមច្បាប់ ។ យុវជនស្ទាវប្រើប្រាស់គ្រឿងញៀនដែលឃាត់ខ្លួននេះត្រូវបញ្ជូនទៅកាន់អធិការដ្ឋានប៉ូលិសខណ្ឌឬស្សីកែវដើម្បីកសាងសំណុំរឿងចាត់ការតាមច្បាប់ ៕  |
| ជនផឹកស៊ីស្រែកឡូឡាដែលឪពុកមាបាញ់ត្រូវក្បាលបានស្លាប់ហើយ Posted: 18 Feb 2011 07:47 PM PST រាជធានីភ្នំពេញ ៖ យុវជនស៊ុន សុភាសិត ដែលត្រូវឪពុកមាបង្កើតបាញ់ត្រូវក្បាលបណ្តាលឱ្យរងរបួសធ្ងន់ដោយសារជម្លោះរឿងផឹកស៊ីឡូឡារំខានគេដេកពួនយប់ព្រលប់នោះ បានស្លាប់បាត់បង់ជីវិតហើយកាលពីវេលាម៉ោង១រំលងអធ្រាត្រឈានចូលថ្ងៃទី១៩ កុម្ភៈ ២០១១ នៅមន្ទីរពេទ្យកាល់ម៉ែតបន្ទាប់ពីគ្រូពេទ្យបានយកចិត្តទុកដាក់ព្យាបាលយ៉ាងអស់ពីលទ្ធភាព ។ ការផឹកស៊ីអ៊ូអូរក្ឌុងក្ខាំងដ៏គ្មានសណ្តាប់ធ្នាប់របស់យុវជន មួយក្រុមក្នុងពេលរាត្រីរំខានអ្នកជិតខាងដេកពួនបានឈានទៅ ដល់ការប្រើអំពើហិង្សាជូរចត់ គឺឪពុកមាទាញកាំភ្លើងខ្លីបាញ់ទៅលើក្មួយប្រុសបង្កើតម្នាក់ចំ ក្បាល បណ្តាលឱ្យរងរបួសធ្ងន់ធ្ងរត្រូវបញ្ជូនទៅសង្គ្រោះនៅមន្ទីរពេទ្យ កាល់ម៉ែត្រយ៉ាងប្រញិបប្រញាប់បំផុត ។ អំពើហិង្សាដោយគ្រាប់កាំភ្លើងនេះបានកើតឡើងកាលពីវេលាម៉ោង៣ រំលងអធ្រាត្រឈានចូលថ្ងៃទី១៨ កុម្ភៈ ២០១១ នៅមុខផ្ទះដីឡូត៍ (រស់នៅច្រើនគ្រួសារ) លេខ៤៨ តាមបណ្តោយផ្លូវលេខ២៨៩ សង្កាត់បឹងកក់២ បង្កឱ្យមានការភ្ញាក់ផ្អើលដល់អ្នកជិតខាងទាំងយប់ ។ បុរសអ្នកបាញ់ប្រហារឈ្មោះសឹង សុផា អាយុ៣៨ឆ្នាំ ជាអនុសេនីយ៍ទោ បំរើការនៅការិយាល័យទី២ នៃទីបញ្ជាការដ្ឋានកងទ័ពជើងគោក បានគេចខ្លួនបាត់ក្រោយពេលទប់ចិត្តមិនបានប្រើកាំភ្លើងខ្លី ម៉ាកកា៥៤ បាញ់ទៅលើក្មួយបង្កើតចំចិញ្ចើមខាងឆ្វេងធ្លាយទៅចិញ្ចើមខាងស្តាំ ។ បុរសរងគ្រោះឈ្មោះស៊ុន សុភាសិត អាយុ២៦ឆ្នាំ ជាកម្មករលីសែងនៅផ្សារធំថ្មី ស្នាក់នៅផ្ទះកើតហេតុខាងលើ ឥឡូវកំពុងស្ថិតក្នុងការសង្គ្រោះបន្ទាន់នៅមន្ទីរពេទ្យកាល់ម៉ែត ។ ប្រភពព័ត៌មាននៅកន្លែងកើតហេតុបានឱ្យដឹងថា មុនដំបូងឈ្មោះស៊ុន សុភាសិត ប្អូនប្រុសរបស់គេ និងមិត្តភក្តិ២-៣នាក់ទៀតបានវិលត្រឡប់មកពី ផឹកស៊ីច្រៀងខារ៉ាអូខេនៅម្តុំផ្សារមាន់អាំង...ពេលមកដល់ផ្ទះ វេលាម៉ោងជិត៣រំលងអធ្រាត្រពួកគេបានបន្តការផឹកស៊ីថែមទៀត និយាយឡូឡាក្ឌុងក្ឌាំងរំខានដល់អ្នកជិតខាងពន់ពេកណាស់... ឃើញបែបនេះលោកស៊ឹង សុផា (ជនដៃដល់) បានចេញទៅណែនាំ និងស្តីបន្ទោសកុំឱ្យក្ឌុងក្ឌាំងរំខានគេឯង...ពេលនោះទំនាស់ពាក្យ សម្តីបានកើតឡើង ហើយឈ្មោះស៊ុន សុភាសិតនិងប្អូនប្រុស ព្រមទាំងបក្សពួកសរុបទៅ៤-៥នាក់ បានហក់មកប្រវាយប្រតប់ជាមួយលោកសឹង សុផា ធ្វើឱ្យលោកសឹង សុផា ដកកាំភ្លើងបាញ់ការពារខ្លួន ទើបត្រូវស៊ុន សុភាសិត រងរបួសធ្ងន់ធ្ងរបែបនេះ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
 |
| ដឹកកម្មករជាង៣០នាក់ទៅធ្វើការ បើកបរលឿនពេកចាក់ចោលតាមផ្លូវ Posted: 18 Feb 2011 05:47 PM PST រាជធានីភ្នំពេញ ៖ រថយន្តមួយគ្រឿងបានចាក់មនុស្សចោលជាង៣០នាក់ បណ្តាលឱ្យរងរបួសធ្ងន់គ្រាន់បើចំនួន៨នាក់ ត្រូវបញ្ជូនទៅសង្រ្គោះនៅមន្ទីរពេទ្យភ្លាមៗបង្កឱ្យមានការរន្ធត់និងភ្ញាក់ផ្អើលយ៉ាងខ្លាំងកាលពីវេលាម៉ោង៦ និង១០នាទីព្រឹកថ្ងៃទី១៩ កុម្ភៈ ២០១១ លើកំណាត់ផ្លូវជាតិលេខ៣ ស្ថិតក្នុងភូមិស្រែញរ សង្កាត់ពងទឹក ខណ្ឌដង្កោ ។ តាមប្រភពព័ត៌មាននៅកន្លែងកើតហេតុជំហានដំបូងបានឱ្យដឹងថា រថយន្តដេលក្រឡាប់ចាក់មនុស្សចោលនេះម៉ាកទីតាន ប្រភេទ១តោនកន្លះ ពណ៌ខៀវដឹកកម្មករជាង៣០នាក់ចេញទៅដាក់នៅតាមរោងចក្រកាត់ដេរដើម្បីឱ្យពួកគេចូលធ្វើការដូចសព្វមួយដង...ប៉ុន្តែរថយន្តនេះបើកបរលឿនពេកជ្រែគេជ្រែឯងទៅមុខហាក់ប្រញាប់ប្រណាល់ណាស់ លុះគេចចុះគេចឡើងមិនដឹងជាយ៉ាងម៉េចក៏ជាន់ហ្រ្វាំងបង្ខំបណ្តាលឱ្យវេរបោកខ្លួនក្រឡាប់ផ្អៀងពោះតែម្តង។ ក្រោយពេលកើតហេតុអ្នកបើកបរបានបិទសាប៊ូគេចខ្លួនបាត់ទៅហើយបន្សល់ទុកឱ្យមនុស្សម្នាចោមរោមមើលរថយន្តដេកផ្អៀងចង្រ្គុងចង្រ្គាង និងអ្នករបួសរដូករណែល ៕  |
| Posted: 18 Feb 2011 03:31 AM PST  ខេត្តកំពង់ចាម ៖ តាមការផ្សាយគេហទំព័រកោះសន្តិភាព នៅវេលាម៉ោង៥ល្ងាចថ្ងៃទី១៧ កុម្ភៈ ២០១១ ក្រុមសាច់ញាតិដែលបានបាត់សមាជិកម្នាក់នោះ ទទួលបាននូវដំណឹងភ្លាមៗ ពីនារីម្នាក់ដែលមានស្មារតីវង្វេង និងមិននិយាយស្តីបានរត់ចូលមន្ទីរពេទ្យ ក៏ប្រញាប់ប្រញាល់នាំគ្នាចេញដំណើរមកកាន់ក្រុងកំពង់ចាម ។ អត្ដសញ្ញាណរបស់នារីរូបនេះត្រូវបានដឹងថា នាងឈ្មោះជា សុខលីន អាយុ២៩ឆ្នាំ មានទីលំ នៅក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។ លោកជា សេងលី អាយុ៣២ឆ្នាំ ដែលត្រូវជាបងប្រុសរបស់នាងបានរៀបរាប់ប្រាប់ថា នៅវេលាម៉ោងជាង១២ថ្ងៃត្រង់ថ្ងៃទី១៦ កុម្ភៈ ២០១១ ប្អូនស្រីឈ្មោះសុខលីន បានបើករថយន្តរបស់នាងម៉ាក RAV-4 ពណ៌ទឹកប្រាក់ចេញពីផ្ទះ តែមិនមានអ្នកណាម្នាក់ចាប់អារម្មណ៍ឡើយ និងនឹកស្មានតែនាងទៅដើរលេងជាមួយមិត្តភក្តិ ។ លុះដល់វេលាម៉ោងជាង៨យប់ មិនឃើញនាងត្រឡប់មកផ្ទះវិញ ហើយទូរស័ព្ទក៏នាងមិនបានយកទៅជាមួយទៀត ទើបនាំគ្នាស្វែងតាមរកនៅក្នុងរាជធានីភ្នំពេញ តែមិនមានតំរុយទាល់តែសោះ ។ លោកជា សេងលី បានបន្តថា លុះមកដល់វេលាម៉ោងប្រហែល៥ល្ងាចថ្ងៃទី១៧ កុម្ភៈ ក្រុមសាច់ញាតិបាននាំបើកគេហទំព័រសារព័ត៌មានកោះសន្តិភាព ដែលផ្សាយថា មានស្ត្រីម្នាក់មិនស្គាល់ឈ្មោះបើករថយន្តម៉ាកRAV-4 ទៅចូលដេកនៅក្នុងគ្លីនិកឯកជនមួយ ស្ថិតនៅភូមិទី១០ សង្កាត់កំពង់ចាម ក្រុងកំពង់ចាម ទើបដឹងច្បាស់ថា ពិតជាប្អូនស្រីរបស់លោកក៏នាំគ្នាឡើងជិះរថយន្តមកកាន់ក្រុងកំពង់ចាម ជាបន្ទាន់និងមកដល់មន្ទីរពេទ្យខេត្តនៅវេលាម៉ោង៨យប់ហើយនៅព្រឹកថ្ងៃទី១៨ កុម្ភៈ ក៏បានសុំការអនុញ្ញាតពីគ្រូពេទ្យយកប្អូនត្រឡប់ទៅផ្ទះវិញ ។ នៅវេលារសៀលថ្ងៃទី១៨ កុម្ភៈ នគរបាលក្រុងកំពង់ចាម បានប្រគល់រថយន្តរបស់នាងដល់បុរសជាបងប្រុស ។ នាងជា សុខលីន ជាបុគ្គលិកនៅក្រុមហ៊ុនឯកជនមួយក្នុងរាជធានីភ្នំពេញ។ តាមបុរសជាបងនិយាយថា ប្អូនស្រីគាត់ជិះរថយន្តមកលេងបងប្អូននៅក្រុងកំពង់ចាម លុះដឹងថា មិនស្រួលខ្លួន ក៏បើករថយន្តចូលរកពេទ្យតែម្តង ចំណែករូបលោកក៏មានការព្រួយបារម្ភដែរខ្លាចតែប៉ះគេឯង ព្រោះកន្លងមកនាងធ្លាប់មានជំងឺបែបនេះ ។ ទោះជាយ៉ាងណា ការប្រាប់ឱ្យដឹងពីមូលហេតុនៅតែមានមន្ទិលដដែលដោយសារនាងមិនមានជំងឺធម្មតាទេ ព្រោះតែនាងមិននិយាយស្តី សូម្បីតែឈ្មោះក៏មិនស្គាល់ខ្លួនឯងផង ។ គួររំលឹកថា នារីរូបនេះបានបើករថយន្តម៉ាក RAV-4 ពណ៌ទឹកប្រាក់មួយគ្រឿង ពាក់ស្លាកលេខភ្នំពេញ 2K-9789 មកឈប់នៅអែបចិញ្ចើមថ្នល់ ហើយដើរចូលទៅដេកលើគ្រែអ្នកជំងឺនៅក្នុងគ្លីនិកឯកជនមួយនៅភូមិទី១០ សង្កាត់កំពង់ចាម ក្រុងកំពង់ចាម កាលពីវេលាម៉ោង៣រសៀលថ្ងៃទី១៦ កុម្ភៈ ២០១១ ។ ដោយសារនាងមិននិយាយស្តីអ្វីទាំងអស់ បង្កឱ្យមានការសង្ស័យខ្លាចមានបញ្ហាមិនល្អ ម្ចាស់គ្លីនិកក៏បានទាក់ទងទៅអាជ្ញាធរសង្កាត់កំពង់ចាម និងសមត្ថកិច្ចឱ្យមកពិនិត្យនិងបាននាំទៅសង្គ្រោះនៅមន្ទីរពេទ្យខេត្តជាបន្ទាន់ផងដែរ ។ តាមលោកឃុត រុន នាយប៉ុស្តិ៍រដ្ឋបាលសង្កាត់កំពង់ចាម និយាយថា គេមិនទាន់បានដឹងថា ស្ត្រីនេះជិះរថយន្តចេញមកពីកន្លែងណាទេ តែរថយន្តផ្នែកខាងមុខមានស្នាមក្រពឹតនៅខាងស្តាំ ដូចជាប៉ះនឹងអ្វីមួយ ហើយព្យាយាមបើករថយន្តមកឈប់អែបចិញ្ចើមថ្នល់រួចចូលទៅដេកលើគ្រែនៅក្នុងគ្លីនិក ៕  |
| ក្មេងប្រុសតូចៗ២នាក់បងប្អូនលង់ទឹកស្លាប់ ខណៈឪពុកអុំទូកទៅកណ្តាលព្រែកដាក់មង Posted: 18 Feb 2011 03:11 AM PST  ខេត្តព្រះសីហនុ ៖ ក្មេងប្រុស២នាក់បងប្អូនបង្កើតបានលង់ទឹកព្រែកស្លាប់យ៉ាងអាណោចអាធ័ម ខណៈទៅលេងក្បែរច្រាំងតាមឪពុក ហើយឪពុកបានអុំទូកចូលទៅកណ្តាលព្រែក ដើម្បីដាក់មងចាប់ត្រី ដែលពេលនោះឪពុកភ្លេចខ្លួនក្រឡេកមើលកូន បណ្តាលឱ្យកូនប្រុសតូចៗទាំង២ចុះទៅលេងទឹក រួចហើយលង់ទឹកស្លាប់ជាមួយគ្នាតែម្តង...មើលទៅគួរឱ្យអាណិតណាស់ ។ ហេតុការណ៍ក្មេងប្រុសលង់ទឹកស្លាប់នោះ បានកើតឡើងកាលពីវេលាម៉ោង២និង៣០នាទីរសៀលថ្ងៃទី១៨ កុម្ភៈ ២០១១ នៅចំណុចគល់ស្ពានព្រែកត្រែង (ឆ្នេរសួនច្បារសម្តេចអគ្គមហាសេនាបតីតេជោហ៊ុន សែន) ស្ថិតក្នុងក្រុម២ ភូមិ៣ សង្កាត់លេខ១ ក្រុងព្រះសីហនុ ។ ក្មេងប្រុស បងឈ្មោះចេង លីហួ អាយុ១១ឆ្នាំ ក្មេងប្រុសប្អូនឈ្មោះចេង លីហេង អាយុ៣ឆ្នាំ ពួកគេទាំង២នេះ នៅតូចៗ មិនយល់អ្វីទេ...អ្នកភូមិបានសន្និដ្ឋានថា ដំបូងអាចក្មេងប្រុសប្អូនចុះទៅលេងទឹកជ្រុលរអិលដួលធ្លាក់ចូលទឹក ហើយក្មេងបងឃើញបែបនេះ ក៏រត់ទៅជួយ...ប៉ុន្តែពួកគេពុំអាចជួយគ្នាបានក៏លង់ស្លាប់ទាំង២តែម្តង ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.  |
| ឃាត់ខ្លួនម្ចាស់ផ្ទះខារ៉ាអូខេ និងភ្ញៀវសង្ស័យពាក់ព័ន្ធគ្រឿងញៀន Posted: 18 Feb 2011 02:06 AM PST  ខេត្តកំពង់ស្ពឺ ៖ ជនសង្ស័យ២នាក់ ដែលម្នាក់ជាម្ចាស់ផ្ទះបើកខារ៉ាអូខេ និងម្នាក់ទៀតជាភ្ញៀវត្រូវកម្លាំងសមត្ថកិច្ចនគរបាលខេត្តកំពង់ស្ពឺ ចាប់ខ្លួនកាលពីវេលាម៉ោង៧និង៣០នាទីថ្ងៃទី១៧ កុម្ភៈ នៅផ្ទះខារ៉ាអូខេតូចមួយខាងជើងផ្លូវជាតិលេខ៤ ចំណុចភូមិចំបក់ ឃុំវល្លិ.ស ស្រុកសំរោងទង ជាប់ចោទពីបទលក់ និងប្រើប្រាស់គ្រឿងញៀន ។ លោកលី ឡាង មេភូមិចំបក់ ដែលបានសហការជាមួយសមត្ថកិច្ចបានឱ្យដឹងថា ម្ចាស់ផ្ទះបើកខារ៉ាអូខេនោះឈ្មោះនៅ ស៊ីថា ភេទស្រី អាយុ៤៨ឆ្នាំ និងយុវជនម្នាក់ទៀតឈ្មោះសុវណ្ណ អាយុប្រហែល១៧ឆ្នាំ ជាជាងជួសជុលម៉ូតូ ។ អ្នកទាំង២រស់នៅភូមិចំបក់ជាមួយគ្នា ។ នៅផ្ទះជនសង្ស័យ សមត្ថកិច្ចបានរកឃើញថ្នាំញៀនប្រភេទផ្កាឈូក១គ្រាប់ និងកំប៉ុងទុយោសំរាប់ប្រើប្រាស់ថ្នាំញៀនផងដែរ ។ លោកមេភូមិបន្តថា ជនសង្ស័យម្ចាស់ខារ៉ាអូខេមានកូនប្រុស២ ស្រី២ ប្តីទៅបំរើការងារនៅខេត្តព្រះសីហនុ ។ ប្រភពពីក្រុមគ្រួសារស្ត្រីសង្ស័យបានឱ្យដឹងថា នៅយប់ថ្ងៃកើតហេតុនោះ ពួកគេកំពុងលក់ដូរតាមធម្មតា ដូចជានំបុ័ងទឹកក្រឡុក បង្អែមនៅខាងមុខផ្ទះ ក៏ស្រាប់តែមានយុវជន៣នាក់ ជិះម៉ូតូ១គ្រឿង ចូលសំដៅទៅច្រកផ្ទះខាងក្រោយបានប្រហែលជា២០នាទី ក៏ស្រាប់តែមានសមត្ថកិច្ចជាច្រើនប្រដាប់ដោយអាវុធ បានចាប់ឃាត់ខ្លួនយុវជនម្នាក់ និងម្ចាស់ផ្ទះតែម្តង ។ នៅព្រឹកថ្ងៃទី១៨ កុម្ភៈ ប្រជាជនភូមិចំបក់ ក៏ដូចជាអាជីវករលក់ដូរនៅផ្សារកំពង់ស្ពឺ បានដឹងអំពីព័ត៌មានបង្ក្រាបកន្លែងប្រើប្រាស់គ្រឿងញៀន ហើយថែមទាំងស្វាគមន៍សាទរដល់អាជ្ញាធរសហការជាមួយកំលាំងសមត្ថកិច្ចបង្ក្រាបទាន់ពេល។ ទាក់ទិននឹងការចាប់ឃាត់ខ្លួនដែលសង្ស័យពាក់ព័ន្ធប្រើប្រាស់គ្រឿងញៀននេះ កោះសន្តិភាពពុំអាចសុំការអត្ថាធិប្បាយពីកម្លាំងសមត្ថកិច្ចជំនាញបានទេ នៅថ្ងៃទី១៨ កុម្ភៈ ២០១១នេះ ៕  |
| ជំនួបសវនាការសំខាន់ៗចំនួន៣របស់សម្តេចតេជោនាយករដ្ឋមន្ត្រី Posted: 18 Feb 2011 01:57 AM PST       រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រាប់ឱ្យដឹងថា នៅក្នុងជំនួបពិភាក្សាការងារជាមួយសម្តេចតេជោនាយករដ្ឋមន្ត្រីហ៊ុន សែន នាព្រឹកថ្ងៃទី១៧ ខែកុម្ភៈ ឆ្នាំ២០១១ នៅវិមានសន្តិភាពទីស្តីការនាយករដ្ឋមន្ត្រី លោកស៊ូយ៉ាប្រាសាទ ស៊ូភើឌី អ្នកសរសេររបាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្ស បានសម្តែងនូវការរីករាយចំពោះកិច្ចសហប្រតិបត្តិការរវាងរាជរដ្ឋាភិបាលកម្ពុជា ជាមួយរូបលោកផ្ទាល់ ។ លោកបានសម្តែងនូវការរីករាយចំពោះអ្វីដែលកម្ពុជាទទួលបានជោគជ័យ ពិសេសការដោះស្រាយជម្លោះនិងស្វែងរកសុខសន្តិភាពជូនប្រជាជនកម្ពុជា តាមរយៈនាំមកនូវការបោះឆ្នោតតាមបែបលទ្ធិប្រជាធិបតេយ្យនៅកម្ពុជា ។ ក្នុងន័យនេះ លោកបានមានប្រសាសន៍ស្វាគមន៍ចំពោះដំណើរការលទ្ធិប្រជាធិបតេយ្យនៅកម្ពុជា ។ លោកស៊ូភើឌី បន្តថា អ្វីដែលនៅសេសសល់នោះគឺការពង្រីកលទ្ធិប្រជាធិបតេយ្យនៅកម្ពុជា ដោយផ្តោតលើចំណុចសំខាន់ៗពីរគឺការយកចិត្តទុកដាក់ទៅលើឯករាជ្យភាពរបស់តុលាការ និងការពិភាក្សាដោយផ្ទាល់រវាងសង្គមស៊ីវិលជាមួយរាជរដ្ឋាភិបាល ។ មានអង្គការសង្គមស៊ីវិលប្រមាណ៣០០ដែលបានរួមគ្នា និងកំពុងរៀបចំឯកសារពិភាក្សាពាក់ព័ន្ធនានាដើម្បីធ្វើការពិភាក្សាជាមួយនឹងរាជរដ្ឋាភិបាលកម្ពុជា។ ទាក់ទិននឹងបញ្ហានេះសម្តេចតេជោនាយករដ្ឋមន្ត្រីមានប្រសាសន៍ថា តើសង្គមស៊ីវិល ជ្រើសរើសយកអង្គការក្រៅរដ្ឋាភិបាលទាំង៣០០នោះតាមរបៀបណា បើអង្គការក្រៅរដ្ឋាភិបាលនៅកម្ពុជាមានជាង៣ពាន់អង្គការ ។ តើអង្គការក្រៅរដ្ឋាភិបាលជាង២ពាន់ទៀត នឹងត្រូវគិតដោយរបៀបណា ហើយសិទ្ធិនិងសំឡេងរបស់អង្គការក្រៅរដ្ឋាភិបាលជាង២ពាន់ទៀតនោះ ត្រូវបានបដិសេធចោលយ៉ាងដូចម្តេច ? ពីព្រោះពួកគេមានសិទ្ធិនិងកាតព្វកិច្ចក្នុងការបំរើសង្គមដូចគ្នា ។ សម្តេចមានប្រសាសន៍សង្កត់ធ្ងន់ថា សម្តេចផ្ទាល់មិនគ្រាន់តែមានការសោកស្តាយយ៉ាងខ្លាំងនោះទេ ប៉ុន្តែការអនុវត្តបែបនេះវាមិនមែនជួយពង្រីកលទ្ធិប្រជាធិបតេយ្យនៅកម្ពុជាឡើយ ផ្ទុយទៅវិញវាបានបង្រួញដំណើរលទ្ធិប្រជាធិបតេយ្យនៅកម្ពុជា តាមរយៈការលុបបំបាត់ចោលសិទ្ធិនិងការបញ្ចេញមតិរបស់អង្គការក្រៅរដ្ឋាភិបាលទាំងជាង២ពាន់ ។ សម្តេចតេជោមានប្រសាសន៍បន្តថា វាជាការគួរឱ្យសោកស្តាយដែលអន្តរជាតិនានាបានលើកឡើងនិងជំរុញឱ្យកម្ពុជាពង្រឹងនិងពង្រីកលទ្ធិប្រជាធិបតេយ្យ ពិសេសតាមរយៈលោកផ្ទាល់ដែលជាសាស្ត្រាចារ្យខាងច្បាប់ជាអ្នកលើកស្ទួយលទ្ធិប្រជាធិបតេយ្យផងនោះ បែរជាបំភ្លេចនូវសិទ្ធិនិងសំឡេងរបស់អង្គការក្រៅរដ្ឋាភិបាលជាង២ពាន់ ដោយជ្រើសរើសយកតែអង្គការក្រៅរដ្ឋាភិបាល៣០០ ដែលមិនត្រូវទទួលការបោះឆ្នោតពីសំណាក់អង្គការក្រៅរដ្ឋាភិបាលផ្សេងទៀតសំរាប់ធ្វើជាតំណាងរបស់ខ្លួននោះ ។ សម្តេចមានប្រសាសន៍បន្តថា ចំពោះបញ្ហានេះ រូបសម្តេចផ្ទាល់មិនអាចទទួលយកបានទេដរាបណាមានតំណាងអង្គការក្រៅរដ្ឋាភិបាលដែលត្រូវបានបោះឆ្នោតជ្រើសតាំងដោយអង្គការក្រៅរដ្ឋាភិបាលទាំងអស់នៅកម្ពុជា ។ សម្តេចតេជោនាយករដ្ឋមន្ត្រីបានសង្កត់ធ្ងន់ថា អង្គការក្រៅរដ្ឋាភិបាលទាំងអស់តែងតែមានការចុះបញ្ជីនិងមានសិទ្ធិរៀងៗខ្លួន និងនៅក្នុងប្រទេសប្រជាធិបតេយ្យ ជនគ្រប់រូបសុទ្ធសឹងតែជាអ្នកបញ្ចេញមតិនិងចូលរួមបម្រើសង្គម ស្មើៗគ្នាទាំងអស់ ។ ពាក់ព័ន្ធទៅនឹងឯករាជ្យភាពរបស់តុលាការសម្តេចតេជោនាយករដ្ឋមន្ត្រីមានប្រសាសន៍ថា ជាការពិតណាស់បញ្ហាវានៅតែមាន ព្រោះកម្ពុជាកំពុងតែធ្វើកំណែទម្រង់លើប្រព័ន្ធតុលាការ និងយុត្តិធម៌ ហើយបើទោះបីជាយ៉ាងណាក៏ដោយ ការកែទំរង់វាគ្រាន់បើជាងគ្មានការកែទម្រង់ ។ ជាមួយគ្នានេះ រាជរដ្ឋាភិបាលកម្ពុជា មិនលូកដៃទាល់តែសោះ ទៅក្នុងកិច្ចការរបស់តុលាការ ។ បន្ទាប់ពីបានជួបពិភាក្សាជាមួយអ្នកសរសេររបាយការណ៍ពិសេសរបស់អង្គការសហប្រជាជាតិរួចមក នៅព្រឹកថ្ងៃដដែល សម្តេចតេជោនាយករដ្ឋមន្ត្រី ក៏បានជួបពិភាក្សាការងារជាមួយលោកTRAIRONG SOWANN NAKHIRI ឧបនាយករដ្ឋមន្ត្រីថៃ ទទួលបន្ទុកសេដ្ឋកិច្ច ។ លោកឧបនាយករដ្ឋមន្ត្រីថៃទទួលបន្ទុកសេដ្ឋកិច្ចមានប្រសាសន៍ថា រូបលោកសូមថ្លែងអំណរគុណយ៉ាងជ្រាលជ្រៅចំពោះសម្តេចតេជោនាយករដ្ឋមន្ត្រី និងរាជរដ្ឋាភិបាលកម្ពុជា ដែលបានគាំទ្រឱ្យមានការរៀបចំពិព័រណ៍ពាណិជ្ជកម្មថៃ-កម្ពុជានៅកម្ពុជា ។ លោកឧបនាយករដ្ឋមន្ត្រី ថៃមានប្រសាសន៍បន្តថា រូបលោកផ្ទាល់បានធ្វើកិច្ចសហប្រតិបត្តិការបានល្អជាមួយលោកទេសរដ្ឋមន្ត្រីចម ប្រសិទ្ធ ដើម្បីធ្វើយ៉ាងណាឱ្យការរៀបចំពិព័រណ៍ពាណិជ្ជកម្មនេះប្រព្រឹត្តទៅដោយជោគជ័យ ។ សម្តេចតេជោនាយករដ្ឋមន្ត្រីមានប្រសាសន៍បញ្ជាក់ថា គោលដៅរបស់កម្ពុជាគឺធ្វើយ៉ាងណាបង្រួញទំនាស់ ពង្រីកកិច្ចសហប្រតិបត្តិការ ចៀសវាងការពង្រីកទំនាស់ក្នុងតំបន់ព្រំដែនពីកន្លែងមួយ រីករាលដាលទៅកាន់ទីកន្លែងដទៃ ពិសេសពាក់ព័ន្ធទៅដល់ការវិនិយោគ និង ពាណិជ្ជកម្មនៃប្រទេសទាំង២ ។ សម្តេចមានប្រសាសន៍បន្តថា ជាការពិតណាស់ ប្រទេសទាំង២កម្ពុជានិងថៃ ប្រៀបដូចអណ្តាតនិងធ្មេញមិនអាចដកមួយទុកមួយបានទេ យើងគប្បីបង្កើនកិច្ចសហប្រតិបត្តិការជាមួយគ្នាឱ្យកាន់តែរឹងមាំថែមទៀត ។ ជាមួយគ្នានេះ សម្តេចតេជោបានផ្ញើសារតាមលោកឧបនាយករដ្ឋមន្ត្រីថៃទៅជូនលោកអាប់ភីស៊ីត នាយករដ្ឋមន្ត្រីថៃលើចំណុចសំខាន់ៗចំនួន៤គឺ ៖ នៅរសៀលថ្ងៃទី១៧ ខែកុម្ភៈនោះដែរ ក្នុងជំនួបពិភាក្សាការងារជាមួយសម្តេចអគ្គមហាសេនាបតីតេជោហ៊ុន សែន នៅវិមានសន្តិភាពទីស្តីការនាយករដ្ឋមន្ត្រី លោកម៉ាស្សាហ៊ីកូ គូមូរ៉ា អតីតរដ្ឋមន្ត្រីការបរទេសជប៉ុន មានប្រសាសន៍ថា រូបលោកមិនបានមកកាន់ប្រទេសកម្ពុជារយៈពេល១០ឆ្នាំមកហើយ មកដល់ពេលនេះ លោកបានសង្កេតឃើញផ្ទាល់ភ្នែកពីការរីកចម្រើនយ៉ាងខ្លាំងរបស់ប្រទេសកម្ពុជា ពិសេសជីវភាពរស់នៅរបស់ប្រជាពលរដ្ឋកម្ពុជាមានការកើនឡើង ដែលនេះឆ្លុះបញ្ចាំងពីការដឹកនាំដ៏ត្រឹមត្រូវរបស់ថ្នាក់ដឹកនាំកម្ពុជា ។ លោកមានប្រសាសន៍បន្តថា ពីប្រទេសមួយដែលធ្លាប់ទទួលយកកម្លាំងអន្តរជាតិមកចូលរួមដោះស្រាយបញ្ហាប្រឈមនានា ប៉ុន្តែនៅពេលនេះកម្ពុជាមានសមត្ថភាពគ្រប់គ្រាន់និងកំពុងបញ្ជូនកម្លាំងរបស់ខ្លួន ទៅជួយដល់បេសកកម្មអង្គការសហប្រជាជាតិ ។ ទាក់ទិនទៅនឹងប្រទេសទាំង២ កម្ពុជា-ជប៉ុន លោកម៉ាស្សាហ៊ីកូ មានប្រសាសន៍ថា ចាប់តាំងពីដើមរៀងមក ជប៉ុនបានប្តេជ្ញាចិត្តក្នុងការជួយដល់ប្រទេសកម្ពុជា ចំពោះការស្តារនិងកសាងប្រទេសឡើងវិញ ប៉ុន្តែខាងវិស័យឯកជននៅមានភាពទន់ខ្សោយនៅឡើយ ។ ក្នុងន័យនេះ ដំណើររបស់លោកមកកាន់ព្រះរាជាណាចក្រកម្ពុជានៅពេលនេះ គឺដើម្បីជំរុញការវិនិយោគលើវិស័យឯកជនមកកាន់ប្រទេសកម្ពុជា ។ លោកមានប្រសាសន៍បន្តថា សហគ្រាសធុនតូច និងសហគ្រាសធុនធំ នឹងអាចនាំមកជួយដល់ការអភិវឌ្ឍកម្ពុជាផង និងនាំទៅដល់ការអភិវឌ្ឍប្រទេសជប៉ុនផង ក្នុងន័យនេះ លោកបាននាំអ្នកវិនិយោគជប៉ុនមកកាន់កម្ពុជា ។ សម្តេចតេជោនាយករដ្ឋមន្ត្រីមានប្រសាសន៍ ថា ជប៉ុនគឺជាប្រទេសមួយដែលផ្តល់ជំនួយដ៏ធំំជាងគេដល់កម្ពុជា ប៉ុន្តែនៅពេលនេះជាការពិតការវិនិយោគរបស់ជប៉ុននៅមានតិចតួចនៅឡើយ ។ សម្តេចសូមស្វាគមន៍ចំពោះក្រុមហ៊ុនរបស់ជប៉ុនដែលបានសំរេចចិត្តមកបណ្តាក់ទុននៅកម្ពុជា។ តាមរយៈនេះសម្តេចមានប្រសាសន៍ថ្លែងអំណរគុណចំពោះលោកម៉ាស្សាហ៊ីកូ គូមូរ៉ា លោកស៊ីណូហារ៉ា អតីតឯកអគ្គរាជទូតជប៉ុនប្រចាំកម្ពុជា ដែលកំពុងតែមានសកម្មភាពយ៉ាងសកម្មក្នុងការជួយជំរុញអ្នកវិនិយោគ និងវិស័យអប់រំនៅកម្ពុជា ។ សម្តេចមានប្រសាសន៍បន្តថា តំបន់សេដ្ឋកិច្ចពិសេសនៅខេត្តព្រះសីហនុ ដែលប្រើប្រាស់ប្រាក់ជំនួយរបស់ជប៉ុន គឺជាចំណុចចាប់ផ្តើមរបស់អ្នកវិនិយោគជប៉ុនមកកាន់ប្រទេសកម្ពុជា ។ ជាមួយគ្នានេះ កម្ពុជាបានចុះហត្ថលេខាលើវិស័យពាណិជ្ជកម្មរវាងជប៉ុននិងកម្ពុជា និងដែលបានចូលជាធរមានកាលពីឆ្នាំ២០០៧ គឺជាកត្តាមួយក្នុងការជំរុញលើកទឹកចិត្តមកកាន់កម្ពុជា ។ សម្តេចតេជោនាយករដ្ឋមន្ត្រីមានប្រសាសន៍សង្កត់ធ្ងន់ថា ជំនួយ ODA មកកាន់កម្ពុជាមិនទាន់គ្រប់គ្រាន់ទេ ចាំបាច់ត្រូវការវិនិយោគទុនជប៉ុន ហើយនៅពេលនេះទៀតសោត កត្តាសំខាន់របស់កម្ពុជា ដែលជាជំនឿទុកចិត្តរបស់អ្នកវិនិយោគជប៉ុននោះគឺសុខសន្តិភាព ស្ថិរភាព នយោបាយ និងស្ថិរភាពម៉ាក្រូសេដ្ឋកិច្ច ។ ជាមួយគ្នានេះ កម្ពុជាកំពុងជំរុញហេដ្ឋារចនាសម្ព័ន្ធសេដ្ឋកិច្ច ធ្វើយ៉ាងណាបង្កលក្ខណៈងាយស្រួលដល់អ្នកវិនិយោគដែលមានបំណងមកកាន់កម្ពុជា ។ ពាក់ព័ន្ធនឹងការវិនិយោគនេះទៀតសោត កម្ពុជាមានការជួបរវាងវិស័យឯកជន និងរាជរដ្ឋាភិបាលរៀងរាល់៦ខែម្តង ហើយអ្វីដែលជាកត្តាពិសេសនិងសំខាន់បំផុតនោះគឺកម្ពុជាអនុញ្ញាតឱ្យជនជាតិបរទេសដាក់ទុនវិនិយោគ១០០%នៅកម្ពុជា ។ តាមរយៈនេះ សម្តេចស្នើសុំឱ្យលោកអតីតរដ្ឋមន្ត្រីការបរទេសជប៉ុនជួយដល់កម្ពុជាលើវិស័យទេសចរណ៍ តាមរយៈការជំរុញឱ្យមានការហោះហើរត្រង់ពីប្រទេសជប៉ុនមកកាន់ប្រទេសកម្ពុជា ៕  |
| បុរសជនជាតិអង់គ្លេសម្នាក់ដួលស្លាប់ក្នុងបន្ទប់ទឹកនៃសណ្ឋាគាររីចេនប៉ាក Posted: 18 Feb 2011 01:56 AM PST រាជធានីភ្នំពេញ ៖ បុរសជនជាតិអង់គ្លេសម្នាក់បានដួលស្លាប់នៅក្នុងបន្ទប់ទឹកនៃបន្ទប់ស្នាក់នៅរបស់ខ្លួនលេខ៤០៥ ជាន់ទី៤នៃសណ្ឋាគាររីចេនប៉ាក ស្ថិតនៅតាមបណ្តោយវិថីព្រះសុធារស សង្កាត់ចតុមុខ ខណ្ឌដូនពេញ បង្កឱ្យមានការភ្ញាក់ផ្អើលយ៉ាងខ្លាំងដល់បុគ្គលិកសណ្ឋាគារ ហើយបានទៅរាយការណ៍ជូនសមត្ថកិច្ចចុះមកត្រួតពិនិត្យកាលពីវេលាម៉ោង១១និង៣០នាទីថ្ងៃត្រង់ទី១៨ កុម្ភៈ ២០១១ ។ បុរសជនជាតិអង់គ្លេសម្នាក់នេះ មានឈ្មោះ TARROLL DAVID KENNETH អាយុ៤៥ឆ្នាំ ត្រូវគេប្រទះឃើញដេកដួលស្លាប់ក្នុងបន្ទប់ទឹកដោយមានស្លៀកកន្សែងពោះគោពណ៌.ស ។ នៅលើរាងកាយសពពុំឃើញមានស្នាមជាំ ឬស្នាមវាយដំធ្វើទារុណកម្មអ្វីទេ ក្រៅពីការសន្និដ្ឋានថា បុរសនេះរអិលជើងដួលបោកក្បាលស្លាប់...នៅក្នុងប្ទប់ស្នាក់នៅរបស់ជនរងគ្រោះ គេរកឃើញមានម្សៅពណ៌សមួយចំនួន... ។ សមត្ថកិច្ចបានសន្និដ្ឋានថា ការស្លាប់នេះអាចបណ្តាលមកពីការគាំងបេះដូង ងងឹតមុខដួល បោកក្បាល ប៉ះទង្គិចថ្មក្នុងបន្ទប់ទឹក...អ្នកខ្លះធ្វើការសន្និដ្ឋានក្រៅផ្លូវការថា បុរសជនជាតិអង់គ្លេសម្នាក់នេះអាចស្លាប់បណ្តាលមកពីការប្រើប្រាស់គ្រឿងញៀនលើសកំណត់ ហើយគាំងបេះដូងតែម្តង ។ ព័ត៌មានលំអឹតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព .  |
| អង្គការ COCD ចែកធុងចំរោះទឹកស្អាតដល់ប្រជាជនស្រុកភ្នំក្រវាញ Posted: 18 Feb 2011 01:22 AM PST   ខេត្តពោធិ៍សាត់ ៖ ដើម្បីឱ្យប្រជាជននៅ តាមជនបទមានទឹកស្អាតបរិភោគ កាត់បន្ថយនូវជំងឺរាក ជំងឺផ្សេងៗទៀត និងកាត់បន្ថយនូវថ្លៃព្យាបាលជំងឺក្នុងគ្រួសារនោះ កាលពីថ្ងៃទី១៦ កុម្ភៈ ២០១១ អង្គការកម្ពុជាដើម្បីកុមារនិងការអភិវឌ្ឍ (COCD)បានធ្វើពិធីចែកធុងចំរោះទឹកស្អាតចំនួន៤៥០ធុង ដល់ប្រជាពលរដ្ឋ៤៥០គ្រួសារនៅភូមិព្រែក១ ឃុំសំរោង ស្រុកភ្នំក្រវាញ ក្រោមការជួយឧបត្ថម្ភរបស់រដ្ឋាភិបាលអូស្ត្រាលី។ លោកប៊ិន បូរ៉ា ប្រធានសម្របសម្រួលអង្គការ COCD ប្រចាំស្រុកភ្នំក្រវាញបានបញ្ជាក់ថា អង្គការកម្ពុជាដើម្បីកុមារនិងការអភិវឌ្ឍជាអង្គការមិនមែនរដ្ឋាភិបាលក្នុងស្រុក មិនរកប្រាក់ចំណេញ មិនប្រកាន់សាសនា និងមិនបំរើឱ្យគណបក្សនយោបាយណាមួយឡើយ។ អង្គការនេះទទួលស្គាល់ដោយក្រសួងមហាផ្ទៃនៅឆ្នាំ២០០៨កំពុងអនុវត្តកម្មវិធីធំៗចំនួន៤នៅស្រុកភ្នំក្រវាញ គឺ ១-លើកកំពស់ការអប់រំ, ២-លើកកំពស់សុខភាពបឋម, ៣-លើកកំពស់កំរិតជីវភាពប្រជាជន និង៤-កម្មវិធីប្រឆាំងការជួញដូរកុមារ។ លោកឱ្យដឹងថា ក្នុងកម្មវិធីលើកកំពស់សុខភាពបឋមនេះ ក្រៅពីចែកធុងចំរោះ អង្គការបានផ្តល់បង្គន់អនាម័យ និងជីកអណ្តូងទឹកឱ្យប្រជាជនបានប្រើប្រាស់ទៀតផង។ ដោយការអនុវត្តកម្មវិធីបានជោគជ័យ រដ្ឋាភិបាលប្រទេសអូស្ត្រាលីបានផ្តល់ថវិកាដល់អង្គការ COCD ដើម្បីអនុវត្តកម្មវិធីលើកកំពស់សុខភាពបឋម និងកម្មវិធីលើកកំពស់កំរិតជីវភាពប្រជាជនចាប់ពីខែកុម្ភៈ ឆ្នាំ២០១១នេះ នៅភូមិចំនួន៥ ក្នុងឃុំផ្ទះរុងបន្ថែមទៀត។ លោកទូច សំបូរ អភិបាលស្រុកភ្នំក្រវាញបានថ្លែងអំណរគុណចំពោះអង្គការ COCD ដែលបានផ្តល់ធុងចំរោះទឹកស្អាតដល់ប្រជាជនឃុំសំរោងនាពេលនេះសំរាប់ប្រាស់។ អង្គការ COCD ចូលមកអភិវឌ្ឍក្នុងស្រុកភ្នំក្រវាញនាឆ្នាំ២០០៩ ដែលមានកម្មវិធីធំៗទាំង៤ខាងលើ គឺពិតជាបានលើកកំពស់សុខភាពប្រជាជនតាមតំបន់គោលដៅជាមួយមន្ត្រីសុខាភិបាលខេត្តពោធិ៍សាត់ និងចូលរួមចំណែកជាមួយរាជរដ្ឋាភិបាលក្នុងការអភិវឌ្ឍប្រទេសដើម្បីកាត់បន្ថយភាពក្រីក្ររបស់ប្រជាពលរដ្ឋ។ លោកអភិបាលស្រុក បានផ្តាំផ្ញើសូមឱ្យប្រជាជនដែលទទួលបានធុងចំរោះទឹកស្អាតពីអង្គការ COCD នេះយកទៅប្រើប្រាស់តាមការណែនាំរបស់មន្ត្រីអង្គការ ដើម្បីបានទឹកស្អាតគ្មានមេរោគប្រើប្រាស់ និងទទួលទាន។ មានធុងចំរោះកាត់បន្ថយជំងឺ ចំណេញពេលវេលា ចំណេញថវិកា និងត្រូវថែទាំឱ្យបានគង់វង្ស។ ជាមួយគ្នានេះលោកបានសំណូមពរឱ្យមាតា បិតា អាណាព្យាបាល បញ្ជូនកូនទៅចូលរៀនឱ្យបានគ្រប់ៗគ្នា ហើយត្រូវចេះគោរពច្បាប់ចរា  |
| បុរសម្នាក់ប្រចណ្ឌវាយប្រពន្ធ និងម្នាក់ស្រវឹងស្រាវាយបំផ្លាញទ្រព្យសម្បត្តិ Posted: 18 Feb 2011 01:16 AM PST  ខេត្តកណ្តាល ៖ អំពើហិង្សាក្នុងគ្រួសារបានកើតឡើង២លើកបន្តបន្ទាប់គ្នា ដែលបង្កឡើងដោយបុរសជាប្តី ព្រោះតែស្រវឹងស្រា និងប្រចណ្ឌ ហើយបានវាយធ្វើបាបប្រពន្ធ និងវាយបំផ្លិចបំផ្លាញទ្រព្យសម្បត្តិក្នុងផ្ទះត្រូវបានប៉ូលិសព្រហ្មទណ្ឌស្រុកអង្គស្នួល ចាប់ឃាត់ខ្លួនដើម្បីកសាងសំណុំរឿង និងធ្វើការអប់រំ ។ ហេតុការណ៍ខាងលើបានកើតឡើងនៅកន្លែងពីរផ្សេងគ្នា ដោយលើកទី១កើតឡើងកាលពីវេលាម៉ោង២រសៀល ថ្ងៃទី១៥ កុម្ភៈ នៅក្នុងភូមិព្រៃសំរោង ឃុំទួលព្រិច ស្រុងអង្គស្នួល ដែលបុរសជាប្តីបានផឹកស្រាស្រវឹងអួទីនួរាល់ថ្ងៃរករឿងប្រពន្ធ និងវាយបំផ្លាញទ្រព្យសម្បត្តិនៅក្នុងផ្ទះ ។ បុរសជាប្តីឈ្មោះយ៉ង់ អាត អាយុ៥២ឆ្នាំ ជាកសិករត្រូវប៉ូលិសចាប់ខ្លួន ចំណែកឯស្ត្រីជាប្រពន្ធឈ្មោះញ៉ិល បូរាណ អាយុ៥២ឆ្នាំ សព្វថ្ងៃស្នាក់នៅក្នុងភូមិកើតហេតុខាងលើ ហើយសំភារដែលត្រូវបុរសជាប្តីវាយបំផ្លិចបំផ្លាញនោះមានចាន ឆ្នាំង ខ្ទះឆា និងចាក់ស្រូវចោលបណ្តាលឱ្យកំពប់ខ្ទេចខ្ទីអស់ទៀតផង គឺមានតែប៉ុណ្ណឹងដែលត្រូវបំផ្លាញអស់។ តាមប្រភពព័ត៌មានបានឱ្យដឹងថា កន្លងមកបុរសរូបនេះ ចេះតែដើរស៊ីផឹកស្រវឹងអួទីនួរាល់ថ្ងៃមិនចេះដើររកស៊ីនោះទេ។ នៅថ្ងៃកើតហេតុពេលត្រឡប់មកពីដើរស៊ីផឹកវិញ ប្រពន្ធមិនទាន់ដាំស្លឆ្អិនក៏បានរករឿងជេរបញ្ចោរ ហើយក៏ត្រូវប្រពន្ធតបតវិញ ធ្វើឱ្យបុរសនោះខឹងយ៉ាងខ្លាំងក៏វាយបំផ្លិចបំផ្លាញទ្រព្យសម្បត្តិក្នុងផ្ទះទាំងកំរោល។ ដោយសារតែកន្លងមកធ្លាប់ធ្វើរបៀបនេះញឹកញាប់ និងត្រូវប៉ូលិសចាប់ខ្លួនម្តងមកហើយ ពេលនេះអត់រាងចាល ទើបប្រពន្ធលែងអនុគ្រោះក៏បានប្តឹងឱ្យប៉ូលិសចាប់ខ្លួនទៅធ្វើការអប់រំតែម្តង ។ ដោយឡែក អំពើហិង្សាទី២ បានកើតឡើងកាលពីវេលាម៉ោង៤និង២០នាទីរសៀល ថ្ងៃទី១៧ កុម្ភៈ នៅក្នុងភូមិថ្លើក ឃុំពើក ស្រុកអង្គស្នួល ។ ហេតុការណ៍នេះកើតឡើងព្រោះតែការប្រចណ្ឌប្រពន្ធគ្មានមូលហេតុ ហើយបុរសជាប្តីបានវាយធ្វើបាបប្រពន្ធរបស់ខ្លួនបណ្តាលឱ្យរងរបួសប៉ោងមុខ និងជាំខៀវភ្នែកយ៉ាងដំណំត្រូវប្រពន្ធប្តឹងឱ្យប៉ូលិសចាប់ខ្លួនយកទៅអប់រំ ។ បុរសដែលប្រើកណ្តប់ដៃដាល់ចំៗមុខប្រពន្ធ នោះឈ្មោះស៊ុម សៅ អាយុ៣៥ឆ្នាំ ជាសន្តិសុខរោងចក្រ រស់នៅក្នុងភូមិកើតហេតុខាងលើ ចំណែកឯស្ត្រីជាប្រពន្ធឈ្មោះខុន ស៊ីនួន អាយុ៣១ឆ្នាំ ជាកម្មកររោងចក្រ មានកូន៣នាក់ រងរបួសហើមមុខ និងជាំភ្នែកយ៉ាងដំណំ។ តាមប្រភពព័ត៌មានបានឱ្យដឹងថា នៅមុនពេលកើតហេតុ ស្ត្រីជាប្រពន្ធបានទៅធ្វើការរោងចក្រ ចំណែកឯបុរសជាប្តីបានទៅយាមនៅរោងចក្រផ្សេងទៀត។ ប៉ុន្តែជារៀងរាល់ថ្ងៃនៅពេលចេញពីធ្វើការស្ត្រីជាប្រពន្ធតែងតែទូរស័ព្ទហៅឱ្យប្តីជិះម៉ូតូមកទទួលរូបនាងត្រឡប់ទៅផ្ទះវិញ ។ ប្រភពដដែលបានបន្តទៀតថា នៅថ្ងៃកើតហេតុក្រោយពីចេញពីធ្វើការស្ត្រីជាប្រពន្ធបានខ្ទីទូរស័ព្ទមិត្តភក្តិរបស់នាងហៅឱ្យប្តីមកទទួលយកនាងត្រឡប់ទៅផ្ទះ ។ ពេលនោះបុរសជាប្តីបានមកឌុបប្រពន្ធត្រឡប់ទៅផ្ទះ បន្ទាប់មកបានសួរនាំពីលេខទូរស័ព្ទដែលនាងជាប្រពន្ធហៅមករកខ្លួននោះ ដោយប្តីរូបនោះនឹកស្មានថា ប្រពន្ធយកទូរស័ព្ទប្រុសផ្សេងហៅរកខ្លួន ។ ប្រភពដដែលបានបន្តថា ពេលប្តីសួរដេញដោលពីរឿងលេខទូរស័ព្ទនាងបានប្រាប់ថា ទូរស័ព្ទនោះនាងខ្ចីមិត្តភក្តិស្រីទេ មិនមែនជាទូរស័ព្ទរបស់ប្រុសណាឡើយ ប៉ុន្តែពេលនោះបុរសជាប្តីមិនជឿប្រពន្ធទេ ហើយបានបង្កឱ្យមានទំនាស់កើតឡើងតែម្តង ។ ខណៈនោះបុរសជាប្តីចិត្តស្រាលអត់គិតវែងឆ្ងាយក៏បានប្រើកណ្តាប់ដៃវាយ និងដាល់ចំផ្ទៃមុខស្ត្រីជាប្រពន្ធជាច្រើនដៃបណ្តាលឱ្យដួលអុកគូទរងរបួសយ៉ាងដំណំ និងខាងទាំងពេលវេលាទៅធ្វើការទៀត។ ក្រោយពេលកើតហេតុស្ត្រីជាប្រពន្ធបានប្តឹងឱ្យប៉ូលិសចាប់ប្តីនាំយកទៅធ្វើការអប់រំ ហើយក៏ត្រូវប៉ូលិសព្រហ្មទណ្ឌស្រុកអង្គស្នួល ចុះចាប់ខ្លួនភ្លាមៗរួចនាំយកទៅកាន់អធិការដ្ឋានឃុំខ្លួនបណ្តោះអាសន្នដើម្បីធ្វើសាវតារជាតិ និងអប់រំដោយឱ្យធ្វើកិច្ចសន្យាបញ្ឈប់អំពើហិង្សាតទៅទៀត ៕  |
| ផែនទីបង្ហាញផ្លូវរបស់ក្រុមប្រឹក្សាសន្តិសុខ អ.ស.ប សម្រាប់សន្តិភាព Posted: 18 Feb 2011 12:47 AM PST យើងបានឈានដល់ និងរស់ក្នុងសតវត្សទី២១ ហើយ ។ ពេលនេះជាឱកាសដែលសន្តិភាពអាចនឹងត្រូវបានកសាងឡើងជាអចិន្ត្រៃយ៍នៅតាមតំបន់ព្រំដែនកម្ពុជា និងថៃ ជាពិសេសនៅតំបន់ប្រាសាទព្រះវិហារ ។ នៅពេលដែលលោកស្រី Maria Luiza Ribeiro Viotti ប្រធានក្រុមប្រឹក្សាសន្តិសុខអង្គការសហប្រជាជាតិ និងជាឯកអគ្គរដ្ឋទូតប្រេស៊ីល បានធ្វើសេចក្តីប្រកាសព័ត៌មានមួយ បន្ទាប់ពីប្រជុំក្រុមប្រឹក្សាសន្តិសុខថា៖ «សមាជិកនៃក្រុមប្រឹក្សាសន្តិសុខអំពាវនាវឱ្យភាគីទាំងពីរបង្កើតឱ្យមានបទឈប់បាញ់គ្នាជាអចិន្ត្រៃយ៍ ហើយអនុវត្តន៍បទឈប់បាញ់គ្នានោះឱ្យបានពេញលេញ» ក្រុមប្រឹក្សាសន្តិសុខអង្គការសហប្រជាជាតិបានកត់សំគាល់ថា ១-សង្គ្រាមបានផ្ទុះឡើង ២-មានការបាត់បត់ជីវិត និងទ្រព្យសម្បត្តិ ៣-ប្រជាជនរាប់ម៉ឺននាក់ប្រឈមមុខនឹងអសន្តិសុខ និងជីវភាពមិនច្បាស់លាស់រៀងរាល់ថ្ងៃ ហើយមហន្តរាយទាំងនេះ ត្រូវតែបញ្ឈប់ ។ នៅពេលដែលលោកស្រីប្រធានក្រុមប្រឹក្សាសន្តិសុខថ្លែងបន្ថែមថា៖ «ក្នុងន័យនេះគឺថា ត្រូវយើងធ្វើការដោយមានការចូលរួមសហការឱ្យបានខ្លាំងក្លាបំផុតជាមួយកិច្ចខិតខំប្រឹងប្រែងក្នុងតំបន់ ដែលបច្ចុប្បន្នកិច្ចខិតខំប្រឹងប្រែងក្នុងតំបន់កំពុងតែត្រូវបានអនុវត្តពេញទំហឹង គឺគេត្រូវដោះស្រាយស្ថានការណ៍ដោយសន្តិវិធីតាមរយៈកិច្ចសន្ទនាដ៏មានប្រសិទ្ធភាព» នោះ ក្រុមប្រឹក្សាសន្តិសុខអង្គការសហប្រជាជាតិបានដាក់ចេញនូវដំណើរការនៃការងារសម្រាប់ឱ្យភាគីទាំងពីរអនុវត្តតាម ដែលក្នុងនោះ គឺ «ការសម្រុះសម្រួលរបស់ភាគីទី៣» ដែលត្រូវបានគាំទ្រ និងទាមទារយ៉ាងទទូចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ រដ្ឋមន្ត្រីការបរទេសឥណ្ឌូណេស៊ី Marty Natalegawa ដែលជាប្រធានអាស៊ានបានទទួលបកស្រាយនូវបញ្ហាដ៏ក្តៅគគុក និងស្មុគស្មាញនេះដោយភាពរួសរាយ ប៉ុន្តែម៉ឺងម៉ាត់ ដើម្បីជួយដោះស្រាយបញ្ហា ដោយឆ្លើយបញ្ជាក់គាំទ្រសេចក្តីថ្លែងការណ៍របស់លោកស្រីប្រធានក្រុមប្រឹក្សាសន្តិសុខដូចនេះថា៖ «ជាការពិតណាស់ បញ្ហានេះគឺជាបញ្ហាដែលនឹងត្រូវដោះស្រាយក្នុងដំណាក់កាលចុងក្រោយ ក្នុងន័យទ្វេភាគីរវាងភាគីទាំងពីរ ប៉ុន្តែមិនមានន័យថា គ្មានច្រក និងតួនាទីសម្រាប់ប្រទេសក្នុងតំបន់នោះទេ» ។ ឥឡូវនេះទម្រង់បែបបទការងារ គឺបានចេញជារូបរាងហើយ ហើយនីតិវិធីនៃការចរចាទ្វេភាគី នឹងសម្រុះសម្រួលប្រាកដណាស់និងត្រូវបង្កើតឡើងនៅឯកិច្ចប្រជុំអាស៊ាន នាថ្ងៃទី២២ កុម្ភៈក្នុងប្រទេសឥណ្ឌូណេស៊ី ។ នៅទីនោះហេតុផល ភាពយុត្តិធម៌ នីតិច្បាប់ នឹងលេចចេញច្បាស់បង្ហាញឱ្យគេដឹងពីភាពកុហកភូតភរ ការបង្ហាញព័ត៌មានខុស ការក្រឡៃការពិត ការប្រមាថមើលងាយ ការផ្សព្វផ្សាយព័ត៌មានគ្មានមូលដ្ឋានច្បាស់លាស់ និងការលើកឡើងដោយមិនសមហេតុផលរបស់ថៃ ៕  |
| រដ្ឋមន្ត្រីថោង ខុន រិះរកវិធានការលុបបំបាត់អំពើឆក់កាបូបពីអ្នកទេសចរ Posted: 18 Feb 2011 12:42 AM PST ខេត្តសៀមរាប ៖ រដ្ឋមន្ដ្រីក្រសួងទេសចរណ៍បានថ្លែងថា លោកនឹងជួបពិភាក្សាជាមួយអាជា្ញធរខេត្ដសៀមរាប ដើម្បីរិះរកវិធានការរឹតបន្ដឹងផ្នែកសន្ដិសុខដើម្បីធានាសុវត្ថិភាពជូនភ្ញៀវទេសចរ បន្ទាប់ពីមានព័ត៌មានរាយការណ៍ថា មានភ្ញៀវទេសចរមួយចំនួនបានរងគ្រោះបាត់បង់សំភារលុយកាក់ ដោយសារតែក្រុមក្មេងស្ទាវធ្វើសកម្មភាពជិះម៉ូតូឆក់ជាច្រើនករណីកាលពីពេលថ្មីៗកន្លងមកនេះ។ លោកថោង ខុន រដ្ឋមន្ដ្រីក្រសួងទេសចរណ៍នៃព្រះរាជាណាចក្រកម្ពុជា បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី១៦ កុម្ភៈ ថា លោកនឹងពិភាក្សាជាមួយលោកស៊ូ ភិរិន្ទ អភិបាលខេត្ដសៀមរាប ដើម្បីពង្រឹងកិច្ចការសន្ដិសុខឡើងវិញ បន្ទាប់ពីលោកបានទទួលព័ត៌មានថា មានក្រុមក្មេងស្ទាវធ្វើសកម្មភាពឆក់កាបូបភ្ញៀវទេសចរជាច្រើនករណីរួចមកហើយនៅក្នុងខេត្ដទេសចរណ៍មួយនេះ។ លោករដ្ឋមន្ដ្រីបានមានប្រសាសន៍បន្ដថា សកម្មភាពឆក់កាបូបភ្ញៀវទេសចរគួរតែត្រូវបានទប់ស្កាត់ និងបង្រ្កាបឱ្យបានទាន់ពេលមិនអាចបណ្ដែតបណ្ដោយបានទេ ព្រោះវាប៉ះពាល់យ៉ាងធ្ងន់ធ្ងរដល់សន្ដិសុខសុវត្ថិភាពភ្ញៀវ និងប៉ះពាល់ជាពិសេសដល់មុខមាត់ និងកិត្ដិយសប្រទេសជាតិ ក៏ដូចជាគោលនយោបាយទេសចរណ៍របស់យើងផងដែរ។ អធិការនគរបាលក្រុងសៀមរាប លោកភឹង ចិន្ដារិទ្ធិ កាលពីរសៀលថ្ងៃទី១៦ កុម្ភៈ ពុំបានទទួលទូរស័ព្ទនៅពេលមានការហៅចូលដើម្បីសុំការពន្យល់ពីហេតុការណ៍ឆក់ ដែលកំពុងតែកើតឡើងយ៉ាងផុសផុលនៅក្នុងក្រុងសៀមរាប នាពេលបច្ចុប្បន្ននេះទេ។ ទោះជាយ៉ាងណា លោកអនុសេនីយ៍ទោ ឆឹង សុភា មេប៉ូលិសប៉ុស្ដិ៍សង្កាត់ស្វាយដង្គំ កាលពីព្រឹកថ្ងៃទី១៦ កុម្ភៈ បានប្រាប់ឱ្យដឹងថា សកម្មភាពឆក់កាបូបភ្ញៀវទេសចរនៅក្នុងក្រុងសៀមរាបកំពុងតែកើតឡើងគួរឱ្យកត់សម្គាល់នារយៈពេលចុងក្រោយនេះ គឺ៥ករណីហើយ ក្នុងសង្កាត់គោកចក ២ករណី សង្កាត់សាលាកំរើក ២ករណី និង ករណីឆក់ចុងក្រោយកើតឡើងនៅវេលាម៉ោងប្រមាណ៤រសៀលថ្ងៃទី១៥ កុម្ភៈ នៅចំណុចក្រោយស្ដាតចាស់ក្នុងសង្កាត់ស្វាយដង្គំ ។ លោកបានបញ្ជាក់បន្ថែមថា មុខសញ្ញាក្រុមចោរឆក់ទាំងនោះភាគច្រើនជាក្រុមក្មេងស្ទាវ និងជាអ្នកស្នាក់នៅបណ្ដោះអាសន្ន ស្ថិតក្នុងចំណោមអ្នកសេពគ្រឿងញៀន ផឹកស្រា ឬជាអ្នកញៀនល្បែងផងដែរ ដោយប្រើប្រាស់មធ្យោបាយម៉ូតូពុំមានកំណត់សម្គាល់ត្រឹមត្រូវ ហើយសកម្មភាពឆក់ភាគច្រើនទៅលើភ្ញៀវទេសចរបរទេស ។ តាមការឱ្យដឹងពីអ្នកដែលឃើញហេតុការណ៍ឆក់កន្លងមកបាននិយាយថា មានភ្ញៀវទេសចរមួយចំនួនបានស្រែកទ្រហោយំនៅពេលដែលកាបូបរបស់គេត្រូវបានក្រុមចោរឆក់យកទៅបាត់ ដែលនៅក្នុងកាបូបនោះ សុំមានលុយកាក់ច្រើនប៉ុន្មានទេ តែរបស់សំខាន់គឺលិខិតឆ្លងដែន និងឯកសារផ្សេងៗបូករួមទាំងកាម៉ារ៉ាថតរូបផងដែរ ។ អនុប្រធានសហព័ន្ធសហជីពកម្មករនិយោជិកវិស័យទេសចរណ៍សេវាកម្មកម្ពុជា លោកម៉ម រិទ្ធី បានថ្លែងទាក់ទិនទៅនឹងសកម្មភាពឆក់ទៅលើភ្ញៀវទេសចរនោះថា លោកមានការព្រួយបារម្ភយ៉ាងខ្លាំងទៅលើសកម្មភាពឆក់កាបូបភ្ញៀវពីសំណាក់ក្រុមក្មេងស្ទាវទាំងនោះ មិនថា ឆក់យូរៗម្ដង ឬឆក់ជាញឹកញាប់ទេ វាគួរណាស់តែត្រូវបានយកចិត្ដទុកដាក់ទប់ស្កាត់ពីសមត្ថកិច្ចពាក់ព័ន្ធ។ លោកបន្ដថា បើក្នុងករណីអាក្រក់បែបហ្នឹងកើតឡើងច្រើនទៅៗនោះ វានឹងធ្វើឱ្យប៉ះពាល់ដល់អារម្មណ៍ភ្ញៀវទេសចរដែលគេមកទស្សនាប្រាសាទអង្គរ ឬក៏ស្រុកខ្មែរយើង ធ្វើឱ្យពួកគេលែងចង់មក ព្រោះគេមានការខ្លាចរអាពីសន្ដិសុខផ្ទាល់ខ្លួន ដល់ពេលនោះវានឹងប៉ះពាល់ដល់វិស័យជាច្រើនទៀត ដែលពឹងផ្អែកលើវិស័យទេសចរណ៍នេះ។ ទាក់ទិនទៅនឹងបញ្ហាអស់ទាំងហ្នឹង លោកឧត្តមសេនីយ៍ត្រី សត ណាឌី ស្នងការនគរបាលខេត្ដសៀមរាបបានថ្លែងប្រាប់តាមទូរស័ព្ទថា ចំពោះករណីឆក់ហ្នឹង លោកកំពុងតែបញ្ជាឱ្យកម្លាំងតាមស្វែងរកមុខសញ្ញាហើយ ដោយសង្ឈឹមថា ពួកគេគេចមិនផុតពីការចាប់ខ្លួនទេ ដូចឃើញស្រាប់ហើយប៉ុន្មានថ្ងៃមុន កម្លាំងលោកចាប់បាន៣នាក់បញ្ជូនទៅតុលាការចាត់ការតាមច្បាប់រួចហើយដែរ៕  |
| សមត្ថកិច្ចចំរុះត្រួតពិនិត្យជាតិអាល់កុលនៅខណ្ឌ៧មករា Posted: 18 Feb 2011 12:21 AM PST   រាជធានីភ្នំពេញ ៖ សមត្ថកិច្ចចម្រុះមានប៉ូលិសចរាចររាជធានី ប៉ូលិសចរាចរខណ្ឌ៧មករា ប្រមាណជា៥០នាក់ ដឹកនាំដោយលោកទី សុឡេង អភិបាលរងខណ្ឌ៧មករា និងលោកឡុង សាវុធ អធិការរងប៉ូលិសខណ្ឌ៧មករា នៅវេលាម៉ោង៩និង៣០នាទីយប់ ថ្ងៃទី១៦ កុម្ភៈ បានចុះត្រួតពិនិត្យរកជាតិអាល់កុលនៅចំណុចមុខផ្សារស៊ីដនីមហាវិថីកម្ពុជាក្រោម ដោយរកឃើញអ្នកបើកបររថយន្ត និងម៉ូតូមានជាតិស្រវឹងចំនួន២នាក់ អ្នកបើកបរម៉ូតូចំនួន១៤នាក់ មិនពាក់មួកសុវត្ថិភាព និងពិនិត្យលើម៉ូតូមិនដាក់កញ្ចក់សំរាប់មើលក្រោយ ហើយមិនពាក់ស្លាកលេខផងដែរ ។ តាមតួលេខនេះ បង្ហាញថា ការបើកបរក្នុងស្ថានភាពស្រវឹងបានថយចុះគួរកត់សំគាល់ ។ លោកឡុង សាវុធ អធិការរងប៉ូលិសខណ្ឌ៧មករា បានឱ្យដឹងថា ការចុះត្រួតពិនិត្យជាតិអាល់កុលលើអ្នកបើកបរ និងឃាត់ម៉ូតូដែលមិនពាក់មួកសុវត្ថិភាព អត់ដាក់កញ្ចក់ និងអត់ស្លាកលេខនេះ គឺ មានការចូលរួមដោយប៉ូលិសចរាចរមកពីតាមខេត្តដែលជាសិក្ខាកាមចំនួន១០នាក់ផងដែរ។ លោកបន្តថា សិក្ខាកាមដែលជាប៉ូលិសចរាចរមកពីខេត្ត មកបណ្តុះបណ្តាលដើម្បីយកច្បាប់ចរាចរណ៍ផ្លូវគោកទៅអនុវត្ត ខណៈពួកគេទៅបំពេញការងារនៅតាមខេត្តវិញ ។ លោកបន្តថា ប៉ូលិសបានរកឃើញអ្នកបើកបរម៉ូតូដែលមានជាតិអាល់កុលចំនួនម្នាក់ និងអ្នកបើកបររថយន្តចំនួនម្នាក់ ចំណែកឯម៉ូតូអត់កញ្ចក់ និងអ្នកបើកបរមិនពាក់មួកសុវត្ថិភាព រួមទាំងម៉ូតូអត់ស្លាកលេខផងនោះ មានចំនួន១៤នាក់ ហើយសមត្ថកិច្ចបានដឹកម៉ូតូតាមរថយន្តទៅពិន័យនៅអធិការដ្ឋានខណ្ឌ ម៉ូតូមួយគ្រឿងត្រូវផាកពិន័យ២.៣០០រៀល។ ចំពោះអ្នកបើករថយន្តមានជាតិអាកុល០,២៥ទៅ០,៣៩ត្រូវពិន័យ១.២០០រៀល ចំពោះអ្នកបើកម៉ូតូមានជាតិអាល់កុល០,២៥ ទៅដល់០,៣៥ ពិន័យ៦.០០០រៀល ។ គួរបញ្ជាក់ថា បើទោះបីជាសមត្ថកិច្ចធ្វើការចាប់ម៉ូតូផាកពិន័យជារៀងរាល់ថ្ងៃ យា៉ងណាក៏ដោយ នៅតែមានអ្នកប្រពឹត្តជិះម៉ូតូមិនពាក់មួកសុវត្ថិភាព ឬដាក់កញ្ចក់ដែលមានចំនួនច្រើនដដែល ៕  |
| តុលាការសំរេចឃុំខ្លួនជនស្ទើរភ្លើងចាប់ក្មេងជំរិតទារប្រាក់៣.០០០ដុល្លារ Posted: 18 Feb 2011 12:17 AM PST  រាជធានីភ្នំពេញ ៖ តុលាការសាលាដំបូងរាជធានីភ្នំពេញកាលពីរសៀលថ្ងៃទី១៧ កុម្ភៈ បានសំរេចឃុំខ្លួនជនស្ទើរភ្លើងម្នាក់ដែលពាក់ព័ន្ធចាប់ក្មេងទៅលាក់ទុក ហើយគំរាមទារប្រាក់ពីអាណាព្យាបាលចំនួន៣.០០០ដុល្លារសហរដ្ឋអាមេរិក។ យុវជនស្ទើរភ្លើងដែលតុលាការសំរេចឃុំខ្លួនដាក់ពន្ធនាគារជាបណ្តោះអាសន្ននោះមានឈ្មោះប៊ូ សារ៉េន អាយុ២២ឆ្នាំ ជាកម្មកររោងចក្រ។ គួរបញ្ជាក់ថា ជនជាប់សង្ស័យដែលតុលាការសំរេចឃុំខ្លួននោះបានធ្វើសកម្មភាពចាប់ក្មេងប្រុសជំរិតទារប្រាក់ ហើយត្រូវបានប៉ូលិសប៉ុស្តិ៍ស្ទឹងមានជ័យ សហការជាមួយប៉ូលិសខណ្ឌមានជ័យ រៀបចំអន្ទាក់តាមចាប់ខ្លួន បន្ទាប់ពីជននេះបានល្បួងក្មេងប្រុសពង្រាត់ចេញពីឪពុក-ម្តាយ ហើយទូរស័ព្ទទៅគំរាមទារប្រាក់ចំនួន៣.០០០ដុល្លារ ។ ជននេះត្រូវបានធ្លាក់ក្នុងអន្ទាក់ប៉ូលិសនៅវេលាម៉ោង១និង៣០នាទីរសៀលថ្ងៃទី១៤ កុម្ភៈ កន្លងមកនៅហាងកាហ្វេមួយកន្លែងស្ថិតក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ ។ ជនជាប់សង្ស័យឈ្មោះប៊ូ សារ៉េន អាយុ២២ឆ្នាំ ស្នាក់នៅផ្ទះជួល ម្តុំផ្សារកាណាឌីយ៉ា សង្កាត់ចោមចៅ ខណ្ឌដង្កោ រីឯក្មេងប្រុសរងគ្រោះឈ្មោះយឹម សារី អាយុ១០ឆ្នាំ ស្នាក់នៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ៕  |
| មន្ទីរសុខាភិបាលបូកសរុបការងារឆ្នាំ២០១០ ដុតកម្ទេចឱសថក្លែងក្លាយ និងខូចសុខភាព Posted: 18 Feb 2011 12:14 AM PST    ខេត្តកំពត ៖ មន្ទីរសុខាភិបាលខេត្ត នៅថ្ងៃទី១៧ កុម្ភៈ ២០១១ បានធ្វើសន្និបាតពេញមួយថ្ងៃ បូកសរុបលទ្ធផលការងារសុខាភិបាលឆ្នាំ២០១០ និងធ្វើពិធីដុតកម្ទេចចោលនូវឱសថក្លែងក្លាយ ឱសថគ្មានបញ្ជិកា និងឱសថហួសកំណត់នៃការប្រើប្រាស់ជាច្រើនទៀត ក្រោមអធិបតីភាពលោកជូ យិនស៊ីម រដ្ឋលេខាធិការក្រសួងសុខាភិបាល និងលោកសូត យា អភិបាលរងខេត្តកំពត និងមានការចូលរួមពីមន្ត្រីអធិការកិច្ចក្រសួងសុខាភិបាល មន្ត្រីមន្ទីរពាក់ព័ន្ធ តំណាងក្រុមហ៊ុនឱសថ និងបុគ្គលិកមន្ទីរសុខាភិបាលខេត្តកំពតយ៉ាងច្រើនកុះករ ។ ឱសថគ្មានបញ្ជិកាមានចំនួន២០មុខ និងឱសថហួសពេលប្រើប្រាស់ចំនួន៧៩មុខ សរុបទឹកប្រាក់៧.៧៣៨.៨០០រៀល ត្រូវដុតកម្ទេចចោល ។ ឃាត់ទុកឱសថ Guu Tongwann ចំនួន៣៥៤.៦០០គ្រាប់ ។ មន្ទីរសុខាភិបាលបានចុះបិទសេវាព្យាបាលឯកជនដែលពុំមានលក្ខណៈនិងបច្ចេកទេសគ្រប់គ្រាន់ចំនួន៣កន្លែង ចុះបិទផ្ទះលក់ឱសថមួយកន្លែងពុំមានលក្ខណៈសមស្រប បញ្ឈប់ការផ្សាយផលិតផលគ្រឿងសំអាង ពុំមានច្បាប់អនុញ្ញាតពីក្រសួងសុខាភិបាលចំនួន២កន្លែង បញ្ឈប់សកម្មភាពរបស់សមាគមគ្រូ ពេទ្យគុណធម៌ ដែលចុះទៅព្យាបាលនៅក្នុងស្រុកកំពង់ត្រាច ពុំអនុវត្តតាមគោលការណ៍ស្តីពីកិច្ចសហប្រតិបត្តិការរួម និងខាងមន្ទីរបានអនុវត្តការងារជាច្រើនទៀត ៕  |
| ធ្លាប់ទំនាក់ទំនងស្រឡាញ់គ្នាបានរូបបានកាយ ម្តាយប្តឹងឱ្យប៉ូលិសចាប់ Posted: 18 Feb 2011 12:10 AM PST  ក្រុងប៉ោយប៉ែត ៖ បុរសជាកម្មករម្នាក់ត្រូវបានសមត្ថកិច្ចប៉ូលិសក្រុងប៉ោយប៉ែតឃាត់ខ្លួនតាមពាក្យបណ្តឹងរបស់នារីរងគ្រោះដោយចោទ ប្រកាន់ពីបទចាប់រំលោភសេពសន្ថវៈរហូតបានសំរេច ។ តាមការបំភ្លឺរបស់លោកអនុសេនីយ៍ព្រហ្ម ពិសិដ្ឋ នាយផ្នែកព្រហ្មទណ្ឌនគរបាល យុត្តិធម៌ក្រុងប៉ោយប៉ែតបានឱ្យដឹងថា បុរសជាកម្មករដែលសមត្ថកិច្ចឃាត់ខ្លួននេះឈ្មោះឈុន លី អាយុ២៧ឆ្នាំ មុខរបរជាកម្មករជ្រែខោអាវស្នាក់នៅចំណុចឡធ្យូងក្នុងភូមិបាលិលេយ្យ សង្កាត់ប៉ោយប៉ែត និងត្រូវបានឃាត់ខ្លួននៅកន្លែងស្នាក់នៅខាងលើកាលពីរសៀលថ្ងៃទី១៦ កុម្ភៈ ។ បុរសម្នាក់នេះបានជាប់ចោទពីបទចាប់រំលោភនារីរងគ្រោះអាយុ២១ឆ្នាំនៅក្នុងបន្ទប់ជួលស្នាក់នៅរបស់ខ្លួនរហូតបានសំរេច ហើយបន្ទាប់មក ក៏ត្រូវភាគីខាងស្រីដាក់ពាក្យបណ្តឹងឱ្យសមត្ថកិច្ចជួយរកយុត្តិធម៌ ។ តាមការបំភ្លឺពីស្ត្រីម្នាក់អះអាងថា ជាម្តាយក្រោយ (ចុង) របស់នាងក្រមុំរងគ្រោះបានរៀបរាប់ឱ្យដឹងថា កូនស្រីរបស់គាត់ជាបុគ្គលិកបំរើការនៅក្នុងកាស៊ីណូក្រុងប៉ោយប៉ែត ចំណែកបុរសដែលជាជនល្មើសគឺជាអ្នកជួលបន្ទប់ស្នាក់នៅជិតគ្នា ហើយបុរសនេះបានអះអាងថា រូបគេជាបុរសពោះម៉ាយ និងព្យាយាមតាមស្រឡាញ់កូនរបស់គាត់ តែកូនស្រីគាត់មិនព្រមស្រឡាញ់វិញទេ គឺគ្រាន់តែរាប់អានគ្នាធម្មតាប៉ុណ្ណោះ ហើយបន្ទាប់មកក៏ត្រូវបុរសនោះចាប់រំលោភរហូតបានសំរេចទើបរូបគាត់មកប្តឹងសមត្ថកិច្ច៕  |
| ផ្ទុះគ្រាប់បែកជាបន្តបន្ទាប់នៅមូលដ្ឋានយោធាតង់ហ្សានីស្លាប់២០នាក់ Posted: 18 Feb 2011 12:08 AM PST នាយករដ្ឋមន្ត្រីតង់ហ្សានី លោក Mizengo Pinda ថ្លែងកាលពីល្ងាចថ្ងៃទី១៧ កុម្ភៈ ថា ការផ្ទុះជាបន្តបន្ទាប់នៅមូលដ្ឋានយោធាក្នុងប្រទេសបណ្តាលឱ្យស្លាប់មនុស្ស២០នាក់ និងជំរុញឱ្យមនុស្សជាង៤.០០០នាក់ទៀតរត់ភៀសខ្លួនពីផ្ទះសម្បែង ។ ក្នុងសេចក្តីថ្លែងការណ៍មួយដែលធ្វើឡើងនៅពេលពន្យារពេលការប្រជុំសភា លោក Pinda ថ្លែងថា ការផ្ទុះកើតឡើងតាំងពីយប់ថ្ងៃទី១៦ កុម្ភៈ មាននៅកន្លែងស្តុកគ្រឿងផ្ទុះនៃមូលដ្ឋានយោធាក្នុងរដ្ឋធានីដាអេស សាឡាអាម។ ការផ្ទុះទាំងនេះបានបំផ្លាញកន្លែងស្តុកគ្រឿងផ្ទុះ២៣កន្លែង ព្រមទាំងសាលារៀន និងផ្ទះសម្បែងដែលនៅក្បែរនោះ ហើយបង្ខំឱ្យមនុស្ស៤.០០០នាក់ រត់ភៀសខ្លួនចេញពីផ្ទះសម្បែង ទៅជ្រកកោននៅពហុកីឡដ្ឋានជាតិ ។ លោកនាយករដ្ឋមន្ត្រី Pinda ថ្លែងទៀតថា ចំនួនអ្នកស្លាប់អាចកើនឡើងថែមទៀត ។ មន្ត្រីមួយរូបបាននិយាយថា មនុស្សយ៉ាងហោចណាស់១៨៤នាក់ រងរបួសក្នុងការផ្ទុះទាំងនោះ ៕  |
| ស្លាប់៤នាក់នៅយេម៉ែនដែលការប្រឆាំងតវ៉ាកាន់តែខ្លាំងឡើង Posted: 18 Feb 2011 12:06 AM PST  ចូលដល់ថ្ងៃទី៧ នៃបាតុកម្មតវ៉ានៅយេម៉ែនប្រឆាំងនឹងប្រធានាធិបតីលោកអាលី អាប់ដាល់ឡាហ៍ សាឡាហ៍ ការប៉ះទង្គិចគ្នាយ៉ាងខ្លាំងក្លាបានផ្ទុះឡើងកាលពីថ្ងៃទី១៧ កុម្ភៈ នៅទីក្រុងសាណាអា រវាងពួកអ្នកគាំទ្រ និងពួកប្រឆាំងរដ្ឋាភិបាលចំណែកឯបាតុករ៤នាក់បានត្រូវស្លាប់នៅទីក្រុងអាដេន ភាគខាងត្បូងប្រទេស ។ បាតុករប្រឆាំងប្រមាណជា៣.០០០នាក់ បានប្រមូលផ្តុំគ្នានៅក្នុងទីក្រុងកំពង់ផែអាដេន ភាគខាងត្បូងប្រទេស ។ ប៉ូលិសបានបាញ់ទៅលើអាកាស ដើម្បីបំបែកពួកគេ ក៏ប៉ុន្តែបណ្តាអ្នកទទួលខុសត្រូវរបស់មន្ទីរពេទ្យ២នៃទីក្រុងនេះ អះអាងថា មនុស្ស៣នាក់ស្លាប់ក្រោយត្រូវរបួសធ្ងន់ដោយសារគ្រាប់កាំភ្លើង ។ អ្នកទទួលខុសត្រូវម្នាក់ទៀតនិយាយពីមនុស្សស្លាប់៤នាក់ ហើយ២០នាក់ទៀតត្រូវរបួស ។ ពួកបាតុករក្រុងអាដេន បាននាំគ្នាស្រែកថា «បដិសេធការគាបសង្កត់ បដិសេធអំពើពុករលួយ ប្រជាជនទាមទារផ្តួលរំលំរបប» ។ នៅទីក្រុងសាណាអា រដ្ឋធានីយេម៉ែន អ្នកគាំទ្រលោកប្រធានាធិបតីសាឡេហ៍ ជាច្រើនរយនាក់ប្រដាប់ដោយកាំបិតស្នៀត និងព្រនង់បានវាយប្រហារពួកប្រឆាំងប្រមាណជា១.៥០០នាក់ ដែលតបតវិញដោយគប់ដុំថ្ម ។ មនុស្សយ៉ាងតិច៤០នាក់ ត្រូវរបួសក្នុងការប៉ះទង្គិចគ្នាទាំងនេះ ដែលចាប់ផ្តើមនៅក្នុងបរិវេណសាកលវិទ្យាល័យមុនឆ្លងរាលដាលនៅតាមដងវិថីទាំងឡាយ ។ លោកសាឡេហ៍ ជាសម្ព័ន្ធមិត្តមួយរូបរបស់សហរដ្ឋអាមេរិក ក្នុងការតស៊ូប្រឆាំងអាល់កៃដា នៅឧបទ្វីបអារ៉ាប់នោះបានខិតខំចាប់តាំងពី១ខែមកហើយ ប្រយុទ្ធទប់ទល់នឹងបាតុកម្មដែលកើតមានស្ទើររាល់ថ្ងៃ ៕  |
| បណ្តាមេខ្លោងប្រឆាំងអ៊ីរ៉ង់នឹងត្រូវកាត់ទោស Posted: 17 Feb 2011 11:43 PM PST  ប្រមុខនៃប្រព័ន្ធតុលាការអ៊ីរ៉ង់ដកស្រង់សំដីដោយទូរទស្សន៍ជាតិអះអាងកាលពីថ្ងៃទី១៧ កុម្ភៈថា បណ្តាមេខ្លោងប្រឆាំងអ៊ីរ៉ង់នឹងត្រូវកាត់ទោសពីបទធ្វើវិច្ឆេទកម្មប្រឆាំងនឹងបដិវត្តន៍អ៊ិស្លាម។ ដោយពុំអើពើចំពោះការហាមឃាត់របស់អាជ្ញាធរ ចលនាបៃតងរបស់លោកមៀរហូសេន មូសាវី និងលោកមឺហ៍ឌី ការ៉ូប៊ី ដែលកើតក្រោយការបោះឆ្នោតប្រធានាធិបតីជុំទី២កាលពីខែមិថុនា ឆ្នាំ២០០៩ បានអំពាវនាវដល់ពួកអ្នកគាំទ្រខ្លួនឱ្យធ្វើបាតុកម្មកាលពីថ្ងៃទី១៤ កុម្ភៈ កន្លងមកនេះនៅក្រុងតេហេរ៉ង់ និងទីក្រុងដទៃៗទៀតរបស់ប្រទេសដើម្បីសំដែងសាមគ្គីភាពជាមួយការបះបោរនៅអេហ្ស៊ីប និងទុយនីស៊ី។ នេះជាលើកដំបូងហើយតាំងពីជាង១ឆ្នាំកន្លងមកនេះដែលពួកប្រឆាំងអ៊ីរ៉ង់បាននាំ គ្នាធ្វើបាតុកម្មទៀត។ មនុស្សជាច្រើនសិបនាក់ត្រូវរបួស ហើយជាច្រើននាក់ទៀតត្រូវចាប់ខ្លួន។ លោក SADEQ LARIJANI ជាចៅ ក្រមជាន់ខ្ពស់នៃប្រព័ន្ធតុលាការអ៊ីរ៉ង់បានព្រមានកាលពីថ្ងៃទី១៧ កុម្ភៈថា អំពើក្បត់របស់ពួកមេដឹកនាំប្រឆាំង គឺបង្ហាញយ៉ាងច្បាស់ ហើយប្រព័ន្ធអ៊ិស្លាមនឹងមិនអត់អោនឱ្យពួកគេប្រមាថដល់បដិវត្តន៍ឡើយ។ ពួកគេពិតណាស់ជាកម្មវត្ថុនៃការកាត់ទោស។ សមាជិកសភាអ៊ីរ៉ង់នៃក្រុមរ៉ាឌីកាល់បានទាមទារឱ្យកាត់ទោសប្រហារជីវិតប្រឆាំងលោកការូប៊ី និងលោកមូសាវី ដែលរដ្ឋអំណាចហៅពួកគេថា ជាអ្នករួមគំនិតជាមួយសហរដ្ឋអាមេរិក និងអ៊ីស្រាអែល។ ពួកប្រឆាំងអ៊ីរ៉ង់គ្រោងប្រមូលផ្តុំមនុស្សជាថ្មីនាថ្ងៃទី២០ កុម្ភៈ ដែលនាថ្ងៃទី១៨ កុម្ភៈ នឹងមានបាតុកម្មជាតិទាំងឡាយនៅអ៊ីរ៉ង់តាមការអំពាវនាវរបស់អាជ្ញាធរ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
