Koh Santipheap Daily |
- ជា សំនៀង ជួបជាមួយ វង្ស ណយ ខណៈ ខុន ឆៃលាង ជួប ហេង វិឆ័យ
- ប៉ូលិសខណ្ឌចំការមនបន្តបើកប្រតិបត្តិការបង្ក្រាបថ្នាំញៀន
- លោកកែប ជុតិមា ចុះសួរសុខទុក្ខនិងផ្តល់អំណោយដល់កងទ័ពការពារតំបន់ប្រាសាទព្រះវិហារ
- សមាគមនាំអង្ករចេញទៅកាន់ទីផ្សារអន្តរជាតិត្រូវបានបង្កើត
- JCI រៀបចំការប្រគំតន្ត្រីប្រមូលមូលនិធិជួយដល់ទណ្ឌិតជាប់មន្ទីរឃុំឃាំង
- ស្ត្រី២នាក់មានជំនាញខាងលូកហោប៉ៅអាជីវករផ្សារសេរីភាពចាប់ខ្លួនប្រគល់ឱ្យប៉ូលិស
- ចាប់ឃាត់ខ្លួននារីវ័យក្មេងពាក់ព័ន្ធជួញដូរគ្រឿងនៅក្នុងបន្ទប់ផ្ទះសំណាក់
- សម្តេចតេជោហ៊ុន សែន ៖ ប្រទេសជិតខាងគ្នាគួរតែប្រែក្លាយតំបន់ព្រំដែនទៅការអភិវឌ្ឍន៍សេដ្ឋកិច្ចពាណិជ្ជកម្ម និងសន្តិភាព
- ប៉ូលិសបង្ក្រាបសង្វៀនបញ្ជល់មាន់ ឃាត់ខ្លួនបុរស១០នាក់យ៉ាងប៉ផាប់ពភីង
- ប្រេសិតអង្គការសហប្រជាជាតិទទួលបន្ទុកសិទ្ធិមនុស្សបានមកបំពេញទស្សនកិច្ចនៅកម្ពុជាជាលើកទី៤
- ផលិតផលផ្តៅកម្ពុជាជួបអ្នកទិញនៅទីផ្សារអន្តរជាតិហើយ
- ពួកប្រឆាំងអ៊ីរ៉ង់នៅតែធ្វើបាតុកម្មទោះមានការហាមឃាត់
- ក្រុមប្រឹក្សាសន្តិសុខអ.ស.បស្នើឱ្យមានបទឈប់បាញ់គ្នាអចិន្ត្រៃយ៍មួយរវាងកម្ពុជា និងថៃ
- លោកអែលបារ៉ាដេបង្ហាញពីជំហរលោកចំពោះអនាគតនៃប្រទេសអេហ្ស៊ីប
- កម្មករសំណង់-លីសែងនៅទីក្រុងកោះពេជ្រប្រមាណជាង១០០នាក់ នៅតែធ្វើបាតុកម្មប្រឆាំងកងសន្តិសុខ
- យុវជនម្នាក់តូចចិត្តទៅលោតទឹកសម្លាប់ខ្លួនចំថ្ងៃបុណ្យនៃក្តីស្រលាញ់
- ខ្លាញ់ត្រី«អូមេហ្គា3»ជួយការពារជំងឺរលាកអញ្ចាញធ្មេញ
- បុរសចិនម្នាក់ស្រាតឡើងលើបង្គោលខ្សែភ្លើងធ្វើបាតុកម្ម
- តារាម៉ូដែលប្រេស៊ីលមានដើមទ្រូងធំបំផុតប៉ុនប៉ងធ្វើអត្តឃាត
- ប្រមុខការទូតកម្ពុជាត្រៀមនឹងជួបចរចាគ្នាម្តងទៀត នៅក្រុងហ្សាការតាថ្ងៃទី២២ កុម្ភៈ ក្រោមការសំរបសំរួលអាស៊ាន
| ជា សំនៀង ជួបជាមួយ វង្ស ណយ ខណៈ ខុន ឆៃលាង ជួប ហេង វិឆ័យ Posted: 14 Feb 2011 11:39 PM PST ខេត្តកណ្តាល ៖ នៅលើសង្វៀនប្រដាល់ស្ថានីយទូរទស្សន៍ប៉ុស្តិ៍លេខ៥ សំរាប់ល្ងាចថ្ងៃសុក្រ ទី១៨ កុម្ភៈ ខាងមុខនេះ ជា សំនៀង មកពីក្លឹបកងពលតូចឆត្រយោង៩១១ ត្រូវបានផ្គូផ្គងឱ្យជួបប្រកួតជាមួយវង្ស ណយ មកពីក្លឹបកងពលតូចលេខ៣១ ។ ជា សំនៀង ជាអ្នកប្រដាល់ជើងចាស់ធ្លាប់អង្រួនសង្វៀនឱ្យកក្រើកតាមរយៈស្នៀតគុនដ៏ពូកែរបស់គេ ។ ទោះបីជាឃ្លាតឆ្ងាយពីសង្វៀនប្រដាល់មួយរយៈមកហើយក្តី ពេលត្រឡប់មកវិញគេនៅរក្សាបានវិជ្ជាគុនល្អដដែល។ កាលពីថ្ងៃទី៦ កុម្ភៈ កន្លងទៅ ជា សំនៀង បានយកឈ្នះវា៉ន់ ចាន់វ៉េត មកពីក្លឹបសិង្ហកីឡា និងមានឱកាសប្រើជង្គង់ឱ្យអាជ្ញាកណ្តាលរាប់ ចាន់វ៉ែត ទៀតផង ។ សំនៀង ជាអ្នកមានជំនាញខាងជង្គង់ និងកែងយ៉ាងប៉ិនប្រសប់ ។ ចំណែកវង្ស ណយវិញ នៅខណៈ ពេលដែលគ្មានវត្តមានជា សំនៀង មួយរយៈនេះគេដើរធ្វើព្យុះធ្វើភ្លៀងខ្លាំងណាស់ ។ បច្ចុប្បន្នវង្ស ណយ ក្លាយជាខ្លាកំណាចដែលមិនងាយមានអ្នកណាបង្ក្រាបបានទេ គេក៏ជាអ្នកលេងស្នៀតកែងដ៏ពូកែម្នាក់ដែរ។ កាលពីថ្ងៃទី៤ កុម្ភៈ កន្លងទៅវង្ស ណយ បានប្រើស្នៀងកែងដ៏មុតស្រួចរបស់ខ្លួនបំបាត់អ៊ឹង បូរិន មកពីក្លឹបសិង្ហកីឡា ត្រូវគ្រូពេទ្យបញ្ឈប់ក្នុងទឹកទី៣ ។ រវាងជា សំនៀង និងវង្ស ណយ ពិតជាខ្លាំងដូចគ្នា ប៉ុន្តែទោះបីជាយ៉ាងណាចុងក្រោយពិតជាមានអ្នកខ្លោច ។ ខុន ឆៃលាង មកពីក្លឹបកងពលធំអន្តរាគមន៍លេខ៣ ខេត្តព្រះវិហារ ត្រូវប្រកួតជាមួយហេង វិឆ័យ មកពីក្លឹបកងពលតូចលេខ៧០ ។ ឆៃលាង និងវិឆ័យ មានសមត្ថភាពប្រហាក់ប្រហែលគ្នា ប៉ុន្តែវិឆ័យហាក់មានចិត្តធំជាង ហើយផ្នែកកម្លាំងក៏គ្រាន់បើជាងដែរ ។ សំរាប់អ្នកលេងភ្នាល់លុយក្រៅសង្វៀនមានជំនឿលើវិឆ័យច្រើនជាងក្នុងការដណ្តើមជ័យជំនះ ។ ស៊ូ វណ្ណៈ មកពីក្លឹបយុវកីឡាខេត្តកណ្តាល ត្រូវប្រកួតជាមួយ ឡុង វណ្ណៈ មកពីក្លឹបសាលវ័ន្តកីឡា ។ ស៊ូ វណ្ណៈ មានផ្លែជង្គង់ល្អ ប៉ុន្តែយឺត រីឯឡុង វណ្ណៈ គេជាអ្នកលេងកណ្តាប់ដៃយ៉ាងពូកែ។ តើអ្នកល្អជង្គង់ និងអ្នកល្អកណ្តាប់ដៃនរណាឈ្នះ? ជា ឆៃយ៉ា មកពីក្លឹបខេមរិនមានឫទ្ធិ ត្រូវប្រកួតជាមួយពេជ្រ សំពៅ មកពីក្លឹបក្រសួងការពារជាតិ ។ រីឯការប្រកួតជាលក្ខណៈសាកល សូ សុផាត មកពីក្លឹបតោមាស ត្រូវប្រកួតជាមួយប៉ី យីម មកពីក្លឹបតាព្រហ្មមានជ័យ ៕  |
| ប៉ូលិសខណ្ឌចំការមនបន្តបើកប្រតិបត្តិការបង្ក្រាបថ្នាំញៀន Posted: 14 Feb 2011 11:31 PM PST  រាជធានីភ្នំពេញ ៖ ជនជាតិវៀតណាម២នាក់ប្តីប្រពន្ធបានត្រូវសមត្ថកិច្ចនគរបាលខណ្ឌចំការមន ដឹកនាំដោយលោកអនុសេនីយ៍ឯកហៀង ថារ៉េត និងលោកអនុសេនីយ៍ឯកគល់ យី អធិការរងនគរបាលខណ្ឌជំនួសមុខឱ្យលោកអ៊ុច សុខុន អធិការនគរបាលខណ្ឌឡោមព័ទ្ធចាប់ខ្លួននៅក្នុងបន្ទប់ផ្ទះជួល ស្ថិតក្នុងភូមិ១០ សង្កាត់ផ្សារដើមថ្កូវ ខណ្ឌចំការមន កាលពីព្រឹកថ្ងៃទី១៤ កុម្ភៈ ឆ្នាំ២០១១ ខណៈពួកគេកំពុងធ្វើសកម្មភាពជួញដូរថ្នាំញៀន ។ ជនជាតិវៀតណាមទាំង២នាក់នេះ ប្តីឈ្មោះហេង ពិសិដ្ឋ អាយុ២៥ឆ្នាំ ប្រពន្ធឈ្មោះសុក្រ ស្រីពៅ អាយុ២២ឆ្នាំ ។ ជាមួយនឹងការឃាត់ខ្លួននេះដែរ សមត្ថកិច្ចដកហូតបានថ្នាំញៀនប្រភេទគ្រាប់ពណ៌ផ្កាឈូកចំនួន៧២គ្រាប់ និងថ្នាំកញ្ចប់ម្សៅចំនួន៦កញ្ចប់តូចៗ ហើយបច្ចុប្បន្នសមត្ថកិច្ចបានកសាងសំណុំរឿងបញ្ជូនខ្លួនពួកគេទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ ។ មន្ត្រីនគរបាលប៉ុស្តិ៍ផ្សារដើមថ្កូវដែលជាម្ចាស់ករណីបង្ក្រាបមុខសញ្ញាខាងលើនេះនិយាយថា សមត្ថកិច្ចបានដាក់កំលាំងចុះច្បាមទាំងយប់ ទាំងថ្ងៃទើបចាប់បានពួកគេជាក់ស្តែងតែម្តង ។ សូមរំលឹកថា រយៈពេលប៉ុន្មានថ្ងៃជាប់ៗគ្នានេះ សមត្ថកិច្ចនគរបាលខណ្ឌចំការមនបានបើកប្រតិបត្តិការទ្រង់ទ្រាយធំបង្ក្រាបមុខសញ្ញាជួញដូរ ថ្នាំញៀនបានជាបន្តបន្ទាប់សរុបចំនួន១២នាក់ហើយ។ ទន្ទឹមនឹងសកម្មភាពនេះ ប្រជាពលរដ្ឋបានសំណូមពរឱ្យសមត្ថកិច្ច និងអាជ្ញាធរមូលដ្ឋានលុបបំបាត់ល្បែងហ្គេមគ្រប់ប្រភេទនៅក្នុងមូលដ្ឋានដែលកំពុងពង្វក់អារម្មណ៍សិស្សសាលា និងបង្កការរំខានដល់ការរស់នៅរបស់អ្នកជិតខាង ជាពិសេសនៅប្លុកអគារប៊ូលឌិញតែម្តង ៕  |
| លោកកែប ជុតិមា ចុះសួរសុខទុក្ខនិងផ្តល់អំណោយដល់កងទ័ពការពារតំបន់ប្រាសាទព្រះវិហារ Posted: 14 Feb 2011 11:23 PM PST   ខេត្តព្រះវិហារ ៖ ដើម្បីផ្សារភ្ជាប់រវាងសមរភូមិក្រោយនិងសមរភូមិមុខ កាលព្រឹកថ្ងៃទី១២ កុម្ភៈ ប្រតិភូសាលារាជធានីភ្នំពេញដឹកនាំដោយលោកកែប ជុតិមា អភិបាលរាជធានី និងលោកម៉ប់ សារិន ប្រធានក្រុមប្រឹក្សារាជធានី បានអញ្ជើញទៅសួរសុខទុក្ខ និងនាំយកអំណោយទៅផ្តល់ជូនដល់កងយោធពលខេមរភូមិន្ទ ក្នុងកងពលធំអន្តរាគមន៍លេខ៣ ប្រចាំទិសប្រាសាទព្រះវិហារ ស្របពេលដែលសភាពការណ៍តាមព្រំដែនកម្ពុជា-សៀមកំពុងមានសភាពតានតឹងផ្នែកយោធា ។ លោកឧត្តមសេនីយ៍ត្រីសួង កុសល មេបញ្ជាការរងកងពលធំអន្តរាគមន៍លេខ៣បានឱ្យដឹងថា ក្រោយពីមានការបង្កហេតុពីសំណាក់ទាហានសៀម បង្ខំឱ្យកម្លាំងយើងប្រើសិទ្ធិការពារបូរណភាពទឹកដី ឆ្លើយតបទៅនឹងអំពើឈ្លានពានរបស់សៀមយ៉ាងមានប្រសិទ្ធភាព និងបានធ្វើម្ចាស់ការលើសមរភូមិទាំងស្រុង។ លោកឧត្តមសេនីយ៍ត្រីបានបញ្ជាក់ទៀតថា យើងស្អប់សង្គ្រាមតែយើងមិនបណ្តោយឱ្យពួកឈ្លានពានរំលោភទឹកដីយើងបានជាដាច់ខាត ។ កងទ័ពរបស់យើងបាននិងកំពុងតែអនុវត្តបទបញ្ជាដ៏មានប្រសិទ្ធភាពរបស់សម្តេចអគ្គមហាសេនាបតីតេជោហ៊ុន សែន ជាប់ជានិច្ច ។ មានប្រសាសន៍ទៅកាន់កងកម្លាំងនាឱកាសនោះ លោកកែប ជុតិមា អភិបាលរាជធានីភ្នំពេញ ក្នុងនាមថ្នាក់ដឹកនាំ មន្ត្រីរាជការ និងប្រជាពលរដ្ឋរាជធានីភ្នំពេញ សូមគោរពកោតសរសើរដ៏ស្មោះចំពោះវីរភាពដ៏អង់អាចក្លាហានរបស់វីរកងទ័ពយើងទាំងអស់ ដែលឈរជើងយ៉ាងរឹងមាំការពារបូរណភាពទឹកដី ដោយលះបង់សាច់ស្រស់ឈាមស្រស់ដើម្បីជាតិមាតុភូមិនិងជារបងការពារព្រំដែនដ៏រឹងមាំ ។ លោកកែប ជុតិមា បានលើកឡើងថា សង្គ្រាមរវាងកម្ពុជានិងពួកសៀមឈ្លានពានជាសង្គ្រាមយូរអង្វែងហើយដែលធ្វើឱ្យយើងគ្មានជំរើសអ្វីក្រៅពីការប្រឆាំងតបវិញ ហើយក្នុងសម័យតេជោនេះយើងមានកងទ័ពដ៏អង់អាចក្លាហានធ្វើឱ្យពួកសៀមឈ្លានពានមិនអាចមើលស្រាលជាដាច់ខាត ។ ក្នុងពិធីសំណេះសំណាលនោះ លោកកែប ជុតិមា បាននាំយកអំណោយមួយចំនួនទៅផ្តល់ជូនកងទ័ពរបស់យើង ក្នុងនោះមានកងពលធំអន្តរាគមន៍លេខ៣ទទួលបានថវិកា២០លានរៀល បារី៤ប៊ិច កងពលតូចអន្តរាគមន៍លេខ៧ ថវិកា៥លានរៀល បារី៣ប៊ិច កងពលតូចអន្តរាគមន៍លេខ៨ ថវិកា៥លានរៀល បារី៣ប៊ិច កងពលតូចអន្តរាគមន៍លេខ៩ និងវរសេនាតូចចំណុះចំនួន១២ ក្នុងមួយវរៈទទួលបានថវិកា២លានរៀល បារី១ប៊ិច ។ ផ្តល់ជារួមនូវឆៃប៉ូវ ៨២០គីឡូក្រាម សៀង២០២០គីឡូក្រាម ទឹកស៊ីអ៊ីវ៤១២យួរ ទឹកត្រី៤០២យួរ ត្រីខ៣៤០កេស មី១០៧០កេស ត្រីងៀត១០០គីឡូក្រាម ទឹកបរិសុទ្ធ៥០០កេស បារី២៥ប៊ិច ផ្ទាំងថាមពលព្រះអាទិត្យ៩ផ្ទាំង ម៉ាស៊ីនភ្លើង២គ្រឿង ថ្នាំពេទ្យចំរុះស្មើនឹងទឹកប្រាក់ជាង៧លានរៀល ព្រមទាំងបានផ្តល់រថយន្តភីក-អាប់មួយគ្រឿង ដល់កងពលធំអន្តរាគមន៍លេខ៣ផងដែរ ៕  |
| សមាគមនាំអង្ករចេញទៅកាន់ទីផ្សារអន្តរជាតិត្រូវបានបង្កើត Posted: 14 Feb 2011 11:16 PM PST រាជធានីភ្នំពេញ ៖ ក្នុងគោលបំណងគាំទ្រដល់រាជរដ្ឋាភិបាលកម្ពុជាដែលមានផែនការនាំអង្ករចេញទៅលក់នៅលើទីផ្សារអន្តរជាតិ ក្រុមពាណិជ្ជករកម្ពុជាបានឆ្លើយតបយុទ្ធសាស្ត្រថ្មីនេះដោយរួមគ្នាបង្កើតសមាគមនាំអង្ករចេញ។ កិច្ចប្រជុំស្តីពីការបង្កើតសមាគមនាំអង្ករចេញត្រូវបានរៀបចំធ្វើឡើងកាលពីថ្ងៃទី១២ ខែកុម្ភៈ ឆ្នាំ២០១១ នៅការិយាល័យក្រុមហ៊ុនហេង អភិវឌ្ឍន៍ រាជធានីភ្នំពេញ។ លោកលឹម ប៊ុនហេង ប្រធានសមាគមស្បៀង និងនាំចេញអង្ករកម្ពុជាមានប្រសាសន៍ថា ក្រុមពាណិជ្ជករធំៗនៅក្នុងប្រទេសកម្ពុជាបានចាប់អារម្មណ៍ និងយកចិត្តទុកដាក់ក្នុងការនាំអង្ករចេញពីកម្ពុជាទៅលក់នៅលើទីផ្សារអន្តរជាតិ។ ដូច្នេះសមាគមដែលនឹងត្រូវបង្កើតឡើងនេះ គឺធ្វើការគាំទ្រចំពោះរាជរដ្ឋាភិបាលកម្ពុជាដែលមានផែនការក្នុងការនាំចេញអង្ករទៅលក់នៅលើទីផ្សារអន្តរជាតិ។ លោកបញ្ជាក់ថា វិស័យកសិកម្មនៅកម្ពុជាពីមួយឆ្នាំទៅមួយឆ្នាំមានកំណើនពី៥%ទៅ៧% ដែលជាអំណោយផលដល់សកម្មភាពសមាគមដែលនឹងត្រូវបង្កើតឡើងនេះ។ លោកលឹម ប៊ុនហេង បានបន្តថា សមាគមស្បៀងនេះ គឺមានការនាំចេញនូវកសិផលដែលទាក់ទងទៅនឹងវិស័យកសិកម្មរួមមានអង្ករ ពោត សណ្តែក និងផលិតផលកសិកម្មជាច្រើនមុខទៀតដែលរាជរដ្ឋាភិបាលកម្ពុជាបានចុះហត្ថលេខាជាមួយប្រទេសចិន។ ដូច្នេះ យើងនឹងខិតខំប្រឹងប្រែងរកទីផ្សារក្រៅប្រទេសសំរាប់សមាគមនេះ ហើយធ្វើយ៉ាងណាឱ្យសមាគមមានលទ្ធភាពនាំចេញអង្ករយ៉ាងតិចចំនួន១សែនតោនក្នុងមួយឆ្នាំៗ។ លោកជំទាវសៀង ចាន់ហេង ប្រធានក្រុមហ៊ុនហេងអភិវឌ្ឍន៍ និងជាក្រុមប្រឹក្សាភិបាលនៃសមាគមស្បៀង និងនាំអង្ករចេញកម្ពុជាមានប្រសាសន៍ថា គោលបំណងរបស់សមាគមគឺចូលរួមចំណែកជាមួយរាជរដ្ឋាភិបាលដែលមានគោលការណ៍ក្នុងការនាំអង្ករចេញទៅទីផ្សារក្រៅ ប្រទេស។ ទន្ទឹមនោះ យើងក៏នឹងរួមចំណែកផងដែរក្នុងការជំរុញវិស័យកសិកម្ម និងវិស័យពាណិជ្ជកម្មនៅកម្ពុជា។ លោកជំទាវបញ្ជាក់ថា សមាជិកពាណិជ្ជករដែលបានចូលរួមសហការក្នុងការបើកសមាគមនេះ គឺរួមមានពាណិជ្ជករមកពីក្រុមហ៊ុនផ្សេងៗប្រមាណជាង២០០ក្រុមហ៊ុន ដែលនឹងធ្វើឱ្យសមាគមនេះមានលទ្ធភាព និងសក្តានុពលក្នុងការនាំអង្ករចេញ និងរកទីផ្សារនៅក្រៅប្រទេស។ លោកជំទាវគឹង ចាន់ឌី ក្រុមប្រឹក្សាភិបាលនៃសមាគមស្បៀង និងនាំអង្ករចេញកម្ពុជាមានប្រសាសន៍នាឱកាសនោះ ដោយធ្វើការគាំទ្រចំពោះសមាគម និងជំរុញឱ្យសមាគមខិតខំបង្កបង្កើតនូវផ្នែកកសិកម្មតាមគោលការណ៍របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន។ លោកជំទាវបន្តថា ទន្ទឹមនឹងការពង្រីក និងពង្រឹងសមាគម យើងគប្បីធ្វើយ៉ាងណាបំផុស និងលើកទឹកចិត្តដល់ប្រជាកសិករឱ្យចូលរួមកាន់តែច្រើនក្នុងការផលិតស្រូវដើម្បីបំពេញបានតាមតំរូវការនៃការនាំចេញរបស់សមាគម។ យោងតាមលក្ខន្តិកៈរបស់សមាគមស្បៀង និងនាំអង្ករចេញកម្ពុជាបានចែងថា សមាគមនេះគឺជាអង្គភាពមិនមែនរដ្ឋាភិបាល មិនស្វែងរកផលចំណេញជាលក្ខណៈឯកជន អព្យាក្រឹត មិនប្រកាន់ពូជសាសន៍ សាសនា និន្នាការនយោបាយ និងមិនធ្វើជាឧបករណ៍នយោបាយ ក្នុងនោះនឹងមិនផ្តល់មធ្យោបាយជាសំភារ ហិរញ្ញវត្ថុ ធនធានមនុស្សដើម្បីគាំទ្រគណបក្សនយោបាយ ឬបេក្ខជន តែជាអង្គភាពបំរើផលប្រយោជន៍សាធារណៈ។ តាមរចនាសម្ព័ន្ធសមាគមស្បៀង និងនាំអង្ករចេញកម្ពុជា គឺរួមមានលោកនាយឧត្តមសេនីយ៍គន់ គីម អគ្គមេបញ្ជាការរងកងយោធពលខេមរភូមិន្ទ ជាប្រធានកិត្តិយស លោកជំទាវគឹង ចាន់ឌី និងលោកជំទាវឧកញ៉ាសៀង ចាន់ហេង ជាក្រុមប្រឹក្សាភិបាល លោកជា ចំរើន និងលោកគីម រិទ្ធី ជាទីប្រឹក្សា លោកលឹម ប៊ុនហេង ជាប្រធានសមាគម លោកលឹម ប៊ុនសេង ជាអគ្គលេខាធិការ និងមានអគ្គលេខាធិការរង និងថ្នាក់ដឹកនាំសមាគមជាច្រើនរូបទៀត ៕  |
| JCI រៀបចំការប្រគំតន្ត្រីប្រមូលមូលនិធិជួយដល់ទណ្ឌិតជាប់មន្ទីរឃុំឃាំង Posted: 14 Feb 2011 11:10 PM PST ខេត្តកំពង់ចាម ៖ សភាយុវពាណិជ្ជករអន្តរជាតិកម្ពុជា (JCI) សហការជាមួយផលិតផល Chameleon Music បានរៀបចំការប្រគំតន្ត្រី Rock’n Roll Sharing Smile ដើម្បីប្រមូលមូលនិធិឧបត្ថម្ភដល់ទណ្ឌិតជាប់នៅមន្ទីរឃុំឃាំង CC3 ក្នុងខេត្តកំពង់ចាម ។ ការប្រគំតន្ត្រីត្រូវបានធ្វើឡើងកាលពីយប់ថ្ងៃទី១៣ កុម្ភៈ ឆ្នាំ២០១១ នៅមជ្ឈមណ្ឌលមេតាហោស ។ លោកសោម សំបូរ ប្រធានគណៈកម្មាធិការសង្គមកិច្ចរបស់សភាយុវពាណិជ្ជករអន្តរជាតិកម្ពុជាបានមានប្រសាសន៍ថា នេះជាលើកទី១ ហើយដែល JCI បានរៀបចំកម្មវិធីនេះឡើងដើម្បីប្រមែប្រមូលរកថវិកាទិញនូវសំភារផ្សេងៗជួយដល់ទណ្ឌិតដែលកំពុងជាប់នៅមន្ទីរឃុំឃាំង CC3 ក្នុងខេត្តកំពង់ចាម ។ លោកបន្តថា ក្នុងកម្មវិធីនេះគឺតម្រូវឱ្យសម្តែងស្លៀកពាក់ និងយកបទចម្រៀងក្នុងទសវត្សទី៦០ និង៧០ ដើម្បីជាការរំលឹកដល់តារាចម្រៀងជំនាន់ដើម ពិសេសនោះគឺ ចង់ធ្វើឱ្យប្លែកសម្រាប់ទស្សនិកជនដែលចូលរួម ។ លោកបញ្ជាក់ថា ទឹកប្រាក់ដែលបានមកពីការប្រគំតន្ត្រីនេះ នឹងយកមកប្រើប្រាស់ដើម្បីទិញសំភារដូចជា ថ្នាំដុសធ្មេញ ច្រាសដុសធ្មេញ និងគ្រឿងឧបភោគបរិភោគមួយចំនួនចែកជូនដល់ទណ្ឌិតដែលកំពុងជាប់ឃុំឃាំងនៅ CC3 ។ លោកឯក ស៊ីដេរ តារាចម្រៀងដែលបានចូលរួមក្នុងកម្មវិធីនេះបាននិយាយថា ក្នុងនាមលោកជាសិល្បករម្នាក់ លោកមានការសប្បាយរីករាយយា៉ងខ្លាំងដែលបានចូលរួមក្នុងកម្មវិធីប្រគំតន្ត្រី ដើម្បីស្វែងរកមូលនិធិជួយដល់ទណ្ឌិតជាប់មន្ទីរឃុំឃាំង CC3 ។ លោកបន្តថា លោកសូមផ្ញើក្តីស្រលាញ់ និងលើកទឹកចិត្តដល់ពួកគាត់ទាំងអស់ ដើម្បីឱ្យពួកគាត់ខិតខំកសាងខ្លួនឱ្យក្លាយជាមនុស្សល្អសម្រាប់សង្គមពេលចេញពីពន្ធនាគារវិញ ៕  |
| ស្ត្រី២នាក់មានជំនាញខាងលូកហោប៉ៅអាជីវករផ្សារសេរីភាពចាប់ខ្លួនប្រគល់ឱ្យប៉ូលិស Posted: 14 Feb 2011 11:07 PM PST រាជធានីភ្នំពេញ ៖ ស្ត្រី២នាក់ដែលល្បីថា ពូកែខាងទម្លាក់សំណបោកបញ្ឆោតប្រជាពលរដ្ឋដូរយកមាស ឬគ្រឿងអលង្ការ និងពូកែខាងលូកហោប៉ៅលួចយកទ្រព្យសម្បត្តិនោះ ត្រូវបានគេតាមទាន់ចាប់ជាប់ ព្រមានម្នាក់មួយដៃម្នាក់មួយជើង ខណៈលូកហោប៉ៅអាជីវករម្នាក់យកប្រាក់ជាង១០០ដុល្លារ រួចហើយប្រគល់ឱ្យប៉ូលិសចាត់ការតាមច្បាប់កាលពីវេលាម៉ោងជាង៩ព្រឹកថ្ងៃទី១៥ កុម្ភៈ ២០១១ នៅក្នុងផ្សារសេរីភាព ស្ថិតក្នុងសង្កាត់វាលវង់ ខណ្ឌ៧មករា ។ ស្ត្រីដៃឆើត២នាក់នេះម្នាក់ឈ្មោះកែវ ស្រស់ អាយុ៤៩ឆ្នាំ ស្នាក់នៅផ្ទះជួលតាមបណ្តោយផ្លូវលេខ៦A សង្កាត់ឫស្សីកែវ ខណ្ឌឫស្សីកែវ និងម្នាក់ទៀតឈ្មោះកែវ ចិន្តា អាយុ៤៤ឆ្នាំ ស្នាក់នៅផ្ទះជួលលេខ៥AEo ផ្លូវលេខ២៩២ សង្កាត់បឹងកេងកងទី១ ខណ្ឌចំការមន ។ ស្ត្រីទាំង២នេះ ល្បីថា ជាចោរជំនាញខាងលូកហោប៉ៅ និងទម្លាក់កាឡៃបោកបញ្ឆោតគេឯងដូរយកមាស និងគ្រឿងអលង្ការ រហូតគេស្គាល់ច្បាស់ទៅហើយ ហើយក៏មានមនុស្សមិនតិចនាក់ដែរ ដែលរងគ្រោះដោយសារចោរស្រីដៃឆើតនេះ ប៉ុន្តែពេលនេះអស់លក្ខណ៍ដោយសារគេចំណាំមុខ។ ចំណែកម្ចាស់ទ្រព្យសម្បត្តិឈ្មោះហុង លីជូ ភេទស្រី អាយុ៣៨ឆ្នាំ ស្នាក់នៅផ្ទះលេខ២៨Eo ផ្លូវលេខ១០៧ សង្កាត់មនោរម្យ ខណ្ឌ៧មករា បានឱ្យដឹងថា ចោរស្រីដៃឆើត២នាក់នេះបានលូកហោប៉ៅរបស់គាត់លួចយកកាបូបដែលមានលុយ១០២ដុល្លារ និងលុយខ្មែរ៧.០០០រៀល គឺគាត់ និងអាជីវករជាច្រើននាក់ចាប់បាន ខណៈពេលលួចជាក់ស្តែងតែម្តង ៕  |
| ចាប់ឃាត់ខ្លួននារីវ័យក្មេងពាក់ព័ន្ធជួញដូរគ្រឿងនៅក្នុងបន្ទប់ផ្ទះសំណាក់ Posted: 14 Feb 2011 10:51 PM PST  រាជធានីភ្នំពេញ ៖ នារីវ័យក្មេងម្នាក់ត្រូវបានប៉ូលិសខណ្ឌ៧មករា សហការជាមួយប៉ូលិសនៃមន្ទីរប្រឆាំងគ្រឿងញៀន និងមន្ត្រីតុលាការធ្វើការឃាត់ចាប់ខ្លួនពាក់ព័ន្ធនឹងបទល្មើសជួញដូរគ្រឿងញឿននៅក្នុងបន្ទប់ផ្ទះសំណាក់លេខ១A នៃផ្ទះសំណាក់ឈ្មោះម៉ីហួរ ស្ថិតនៅតាមបណ្តោយមហាវិថីព្រះមុនីវង្ស សង្កាត់ច្រក ខណ្ឌដូនពេញ ។ នារីជាប់សង្ស័យជួញដូរគ្រឿងញៀនម្នាក់នេះឈ្មោះវ៉ាង ស្រីមុំ អាយុ២៤ឆ្នាំ ស្នាក់នៅសង្កាត់មនោរម្យ ខណ្ឌ៧មករា...ពេលចាប់ខ្លួនសមត្ថកិច្ចដកហូតបានថ្នាំញៀនប្រភេទម៉ាទឹកកក ៧កញ្ចប់តូច ដែលក្នុងកញ្ចប់តូចនេះមានតំលៃពី៣៥ទៅ៤០ដុល្លារ និងរឹបអូសសំភារប្រើប្រាស់គ្រឿងញៀនជាច្រើនជាច្រើនទៀត...។ នៅមានបក្សពួកជនជាប់សង្ស័យជួញដូរគ្រឿងញៀនជាច្រើននាក់ទៀត កំពុងត្រូវបានប៉ូលិសតាមប្រមាញ់នៅឡើយ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព .  |
| Posted: 14 Feb 2011 10:47 PM PST  ក្រុងប៉ោយប៉ែត ៖ សម្តេចនាយករដ្ឋមន្ត្រីហ៊ុន សែន បានលើកឡើងនៅចំពោះមុខក្រុមមន្ត្រីជាន់ខ្ពស់រដ្ឋាភិបាល តំណាងស្ថានទូត អង្គការជាតិ-អន្តរជាតិ សិស្សានុសិស្ស និងប្រជាពលរដ្ឋរាប់ពាន់នាក់ថា ប្រទេសជិតខាងជាប់ព្រំប្រទល់ដែនគ្នា គួរតែរិះរកមធ្យោបាយអភិវឌ្ឍន៍នៅតាមខ្សែបន្ទាត់ព្រំដែន ដើម្បីឱ្យប្រជាពលរដ្ឋទាំងសងខាងទទួលបានភាពកក់ក្តៅមួយហៅថា ព្រំដែនសន្តិភាព សន្តិសុខ និងការរីកចំរើនពាណិជ្ជកម្ម សេដ្ឋកិច្ច ព្រមទាំងវិស័យផ្សេងៗជាច្រើនទៀត ។ សម្តេចតេជោនាយករដ្ឋមន្ត្រីបានលើកឡើងបែបនេះកាលពីព្រឹកថ្ងៃទី១៥ កុម្ភៈ ២០១១ ខណៈដឹកនាំក្រុមមន្ត្រីអញ្ជើញជាអធិបតីក្នុងពិធីបើកការដ្ឋានស្ថាបនាផ្លូវជាតិមួយខ្សែលេខ៥៩ ដែលមានប្រវែងជាង១៤៤គីឡូម៉ែត្រ ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែត ។ ផ្លូវជាតិលេខ៥៩នេះ នឹងផ្តល់អត្ថប្រយោជន៍ដល់ប្រជាពលរដ្ឋងាយស្រួលក្នុងការធ្វើដំណើរចំណេញពេលវេលា ទំនាក់ទំនងសេដ្ឋកិច្ច ពាណិជ្ជកម្ម ពិសេសជួយសំរួលដល់ជីវភាពគ្រួសារប្រចាំថ្ងៃរបស់ប្រជាពលរដ្ឋ ដោយសារវាបានភ្ជាប់ទំនាក់ទំនងទៅច្រើនតំបន់ដូចជា ស្រុកសំពៅលូន ម៉ាឡៃ ភ្នំព្រឹក កំរៀង ប៉ៃលិន...។ សម្តេចតេជោនាយករដ្ឋមន្ត្រីបានមានប្រសាសន៍ថា ផ្លូវមួយខ្សែនេះគឺជាការអភិវឌ្ឍន៍មុំ៣ ដែលវានឹងផ្តល់ការអភិវឌ្ឍន៍សំរាប់ខេត្ត៣ គឺខេត្តបាត់ដំបង់ បន្ទាយមានជ័យ និងប៉ៃលិន ហើយសង្ឃឹមថា ប្រជាពលរដ្ឋនឹងទទួលបាននូវភាពងាយស្រួលយ៉ាងច្រើនសំរាប់ជីវភាពប្រចាំថ្ងៃរបស់ពួកគេ ។ លើសពីនេះទៀត សម្តេចតេជោបានសង្កត់ធ្ងន់ថា យើងមិនគួរប្រែក្លាយតំបន់ព្រំដែនជាមួយប្រទេសជិតខាងទៅជាសមរភូមិផ្ទុះអាវុធឡើយ ព្រោះវានឹងនាំមកនូវមហន្តរាយ ជម្លោះយូរអង្វែងពិបាករកទីបញ្ចប់ ប្រជាពលរដ្ឋរងគ្រោះ ការអភិវឌ្ឍន៍រេចរឹល បង្កអសន្តិសុខដល់ក្នុងតំបន់ ទីបំផុតសង្គមរបស់ផងខ្លួននឹងអន់ថយ...៕  |
| ប៉ូលិសបង្ក្រាបសង្វៀនបញ្ជល់មាន់ ឃាត់ខ្លួនបុរស១០នាក់យ៉ាងប៉ផាប់ពភីង Posted: 14 Feb 2011 10:30 PM PST  រាជធានីភ្នំពេញ ៖ បុរស១០នាក់ដែលចូលលេងល្បែងភ្នាល់បញ្ជល់មាន់នៅសង្វៀនធំមួយលាក់ខ្លួនពួនអាត្មាយូរគ្រាន់បើហើយនោះ ត្រូវបានប៉ូលិសខណ្ឌសែនសុខព័ទ្ធចាប់ខ្លួនយ៉ាងប៉ផាប់ពភីង កាលពីវេលាម៉ោង១០និង១០នាទីព្រឹកថ្ងៃទី១៥ កុម្ភៈ ២០១១ នៅភូមិបឹងបាយាប សង្កាត់ភ្នំពេញថ្មី ខណ្ឌសែនសុខ ។ ពេលនេះប៉ូលិសកំពុងតែសាកសួរបុរសញៀនល្បែងបញ្ជល់មាន់ទាំង១០នាក់នេះ ដើម្បីចាត់ការតាចម្បាប់ និងកំពុងតែតាមប្រមាញ់អ្នកញៀនល្បែងដែលរត់គេចរួចជាបន្តទៀត ។ ព័ត៌មានលំអិតនឹងផ្សាយជូនពេលក្រោយនិងនៅលើទំព័រកាសែតកោះសន្តិភាព.  |
| Posted: 14 Feb 2011 08:04 PM PST រាជធានីភ្នំពេញ ៖ អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស៊ូយ៉ា ប្រាសាត ស៊ូប៊ែឌី នឹងមកបំពេញទស្សនកិច្ចនៅកម្ពុជាកាលពីវេលាម៉ោង១០ព្រឹកថ្ងៃអង្គារ ទី១៥ កុម្ភៈ នេះ ។ នេះបើយោងតាមសេចក្តីប្រកាសព័ត៌មានពីទីក្រុងហ្សឺណែវ កាលពីសប្តាហ៍មុន ។ សេចក្តីប្រកាសព័ត៌មានក៏បានបញ្ជាក់ផងដែរថា នៅក្នុងដំណើរបំពេញទស្សនកិច្ចលើកទី៤ របស់អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស៊ូប៊ែឌី នឹងពិនិត្យមើលអនុសាសន៍របស់លោកអំពី មុខងាររបស់តុលាការ ។ លោកនឹងពិនិត្យមើលផងដែរអំពីភាពរីកចំរើនដែលទទួលបានពីការដកបទបរិហាកេរ្តិ៍ចេញពីបទល្មើសព្រហ្មទណ្ឌ និងការបង្កើតយន្តការអចិន្ត្រៃយ៍មួយសំរាប់កិច្ចសន្ទនារវាងរដ្ឋាភិបាល និងសង្គមស៊ីវិល ព្រមទាំងការសិក្សាលើអង្គនីតិប្បញ្ញតិក្នុងបរិបទលើកស្ទួយសិទ្ធិមនុស្ស ។ ជាមួយគ្នានេះ លោកស៊ូប៊ែឌី នឹងចូលរួមពិភាក្សាផងដែរលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល លើទំនាស់ដីធ្លី និងការបណ្តេញចេញ ។ ក្រៅពីនេះលោកគ្រោងនឹងជួបជាមួយមន្ត្រីរដ្ឋាភិបាល តំណាងស្ថាប័ននីតិប្បញ្ញត្តិ សង្គមស៊ីវិល តំណាងសហប្រជាជាតិ និងម្ចាស់ជំនួយផងដែរ ។ លោកស៊ូយ៉ា ប្រាសាន ស៊ូប៊ែឌី នឹងចាកចេញពីកម្ពុជានៅ ថ្ងៃទី២៤ កុម្ភៈ ឆ្នាំ២០១១ ខាងមុខនេះ ៕  |
| ផលិតផលផ្តៅកម្ពុជាជួបអ្នកទិញនៅទីផ្សារអន្តរជាតិហើយ Posted: 14 Feb 2011 07:59 PM PST  ទីក្រុងហ្វ្រេងហ្វឺត ប្រទេសអាល្លឺម៉ង់ ថ្ងៃ ទី១១-១៥ កុម្ភៈ ២០១១ ៖ នាពិធីតាំងពិព័រណ៍ពាណិជ្ជកម្មធំមួយលំដាប់អន្តរជាតិអំពីសំភារបន្ទាប់បន្សំមានឈ្មោះថា អាមប្យ៊ាងតេ (Ambiente) ដែលប្រព្រឹត្តទៅក្នុងរយៈពេល៥ថ្ងៃ គិតចាប់ពីថ្ងៃនេះ សមាគមផ្តៅកម្ពុជា កំពុងដាក់តាំងបង្ហាញនូវផលិតផលផ្តៅកម្ពុជាក្នុងគោលដៅផ្សព្វផ្សាយម៉ូដផលិតផលផ្តៅប្រកបដោយលក្ខណៈច្នៃប្រឌិតខ្ពស់ ហើយគោរពគោលការណ៍និរន្តរភាព ។ ដោយមានការជ្រោមជ្រែងពីអង្គការ WWF សិប្បករផ្តៅកម្ពុជាចូលរួមក្នុងការតាំងពិព័រណ៍នេះ ដើម្បីបង្ហាញដល់អន្តរជាតិឱ្យឃើញអំពីសមិទ្ធផលនៃការខិតខំប្រឹងប្រែងក្នុងការអនុវត្តប្រព័ន្ធផលិតកម្មដែលការពារបរិស្ថាន ។ ផលិតផលប្រើប្រាស់បន្ទាប់បន្សំរួមមាន កញ្ច្រែងច្រើនប្រភេទ គោមអំពូលភ្លើង ទ្រនាប់ និងទម្រ ថូផ្កាធ្វើពីផ្តៅ បានចូលខ្លួនក្នុងពិធីតាំងពិព័រណ៍នេះក្នុងគោលបំណងដើម្បីទាក់ទាញពាណិជ្ជករអន្តរជាតិ ។ ផលិតផលផ្តៅទាំងអស់សុទ្ធសឹងត្រូវបានកែច្នៃយ៉ាងសម្រិតសម្រាំងដោយអនុលោមទៅតាមគោលការណ៍បរិស្ថានស្អាត និងលក្ខខណ្ឌស្តង់ដាគុណភាពនៃទីផ្សារអឺរ៉ុប ។ លោកឃុន ថន អនុប្រធានសមាគមផ្តៅកម្ពុជា មានប្រសាសន៍ថា «ដោយមានការជួយជ្រោមជ្រែងពីគំរោងផ្តៅនៃអង្គការ WWF យើងបានកែច្នៃចេញជាម៉ូដផលិតផលផ្តៅច្រើនប្រភេទប្លែកៗ ហើយមានភាពទាក់ទាញខ្ពស់សំរាប់អតិថិជនអន្តរជាតិ ដែលចូលរួមក្នុងការតាំងពិព័រណ៍ពាណិជ្ជកម្មដែលជាឱកាសដ៏មានតំលៃសំរាប់ផលិតករផ្តៅកម្ពុជាក្នុងការស្វែងយល់បន្ថែមអំពីតំរូវការ និងការពេញនិយមនៃ ទីផ្សារអន្តរជាតិ ក៏ដូចជាកិច្ចការងារផ្សព្វផ្សាយរកទីផ្សារ» ។ លោកឃុន ថន សង្ឃឹមថា ផលិតផលផ្តៅខ្មែរនឹងអាចស្វែងរកបាននូវអតិថិជនក្នុងឱកាសពិព័រណ៍មួយនេះ ។ ទន្ទឹមនឹងការផ្សព្វផ្សាយផលិតផល អង្គការ WWF នឹងជួយសម្របសម្រួលឱ្យក្រុមអ្នកជំនួញផ្តៅកម្ពុជាបានជួបជាមួយពាណិជ្ជករអន្តរជាតិមួយចំនួន តួយ៉ាងដូចជាក្រុមជំរុញការនាំចូលមកពីប្រទេសស្វីស ក្នុងគោលដៅឃោសនាម៉ូដផលិតផលផ្តៅខ្មែរជាមួយនឹងក្តីសង្ឃឹមថា នឹងបង្កើតបានទំនាក់ទំនងពាណិជ្ជកម្មជាផ្លែផ្កា ។ ផ្អែកតាមសំដីលោកអ៊ូ រតនៈ ប្រធានគំរោងផ្តៅនៃអង្គការ WWF ឥឡូវនេះសិប្បករផ្តៅកម្ពុជាអាចប្រាប់អ្នកបញ្ជាទិញអំពីឆន្ទៈរបស់ពួក គេក្នុងការអនុវត្តបច្ចេកទេសកែច្នៃផ្តៅដែលការពារបរិស្ថាន ហើយពួកគេបានសមត្ថភាពក្នុងការឆ្លើយតបនឹងតំរូវការរបស់អ្នកបញ្ជាទិញ ។ លោករតនៈ បានអះអាងថា «សិប្បករផ្តៅកម្ពុជាត្រៀមខ្លួនរួចជាស្រេចក្នុងការផ្គត់ផ្គង់នូវផលិតផលប្រកបដោយគុណភាពស្តង់ដា ព្រមទាំងការរចនាម៉ូដប្លែកៗ ប្រកបដោយភាពច្នៃ ប្រឌិត» ។ លោកបន្ថែមថា «ការផ្សារភ្ជាប់វិស័យផ្តៅកម្ពុជាទៅនឹងទីផ្សារសាកល គឺជាគោលដៅសំខាន់មួយរបស់គំរោង» ។ គំរោងនិរន្តរភាពផ្តៅរបស់អង្គការ WWF មានគោលដៅធ្វើការគ្រប់គ្រងតំបន់ព្រៃធម្មជាតិ ដែលផ្តៅកំពុងដុះលូតលាស់នៅទីនោះ ព្រមទាំងលើកកំពស់ផលិតកម្មស្អាត ។ ដើម្បីធ្វើកិច្ចការទាំងនេះ គេត្រូវលើកទឹកចិត្តដល់ការប្រើប្រាស់ឱ្យអស់លទ្ធភាពនូវវត្ថុធាតុដើម និងជំរុញឱ្យខ្សែសង្វាក់ផលិតកម្មមានប្រសិទ្ធភាពដោយកាត់បន្ថយឱ្យអស់លទ្ធភាពដែលអាចធ្វើទៅបាននូវការខ្ជះខ្ជាយវត្ថុធាតុដើម ការប្រើសារធាតុគីមី និងការបញ្ចេញចោលនូវឧស្ម័ន។ លោកសេង ទៀក នាយកអង្គការ WWF មានប្រសាសន៍ថា «ការរក្សាបានគង់វង្សនូវធនធានព្រៃឈើដែលមានផ្តៅដុះលូតលាស់នៅទីនោះ និងការស្វែងរកបាននូវទីផ្សារជាកត្តាសំខាន់ដែលធានាបាននូវនិរន្តរភាពផ្តៅ» ។ កម្មវិធីនិរន្តរភាពផ្តៅរបស់អង្គការ WWF បានទទួលថវិកា៨០% ពីថវិកាសរុបនៃកម្មវិធី EU SWITCH-Asia ចំនួន២,៤លានអឺរ៉ូ ។ SWITCH-Asia មានគោលបំណងលើកកំពស់ផលិតកម្មស្អាត និងគោលការណ៍ប្រើប្រាស់ធនធានដែលការពារបរិស្ថាន ។ កម្មវិធីនិរន្តរភាពផ្តៅរបស់អង្គការ WWF កំពុងអនុវត្តសកម្មភាពនេះប្រកបដោយភាពជោគជ័យក្នុងការសំរេចគោលបំណងរបស់ខ្លួន ដោយធ្វើការជាមួយដៃគូពាក់ព័ន្ធទាំងអស់នៅក្នុងខ្សែសង្វាក់ផលិតកម្មផ្តៅព្រមទាំងជំរុញឱ្យមានប្រព័ន្ធទទួលស្គាល់ផលិតផលស្តង់ដា ។ កម្មវិធីនេះត្រូវបានសហការផ្តល់ហិរញ្ញវត្ថុដោយក្រុមហ៊ុន IKEA និង DEG ។ សំរាប់ព័ត៌មានបន្ថែមសូមទាក់ទង ៖ លោកទេព អស្នារិទ្ធ ការិយាល័យសារព័ត៌មាន និងកិច្ចការសាធារណៈ អង្គការ WWF មហាតំបន់មេគង្គ ការិយាល័យកម្មវិធីអភិរក្សនៅកម្ពុជា ទូរស័ព្ទ ០២៣ ២១៨ ០៣៤ អុីម៉ែល asnarith.tep@wwf.panda.org គេហទំព័រ www.cambodia.panda.org ព័ត៌មានសំរាប់អ្នកនិពន្ធ ៖ -ការចូលរួមក្នុងពិធីតាំងពិព័រណ៍ Ambiente នេះគឺជាឱកាសលើកទីពីរសំរាប់សិប្បករផ្តៅកម្ពុជា ក្នុងក្របខណ្ឌពិព័រណ៍ពាណិជ្ជកម្មដែលមានលក្ខណៈសាកល ។ កាលពីឆ្នាំ២០១០ សិប្បករផ្តៅកម្ពុជាបានដាក់តាំងផលិតផលផ្តៅរបស់ខ្លួននៅទីក្រុង Cologne ប្រទេសអាល្លឺម៉ង់ ដែលពេលនោះមានអ្នកចូលរួមប្រមាណជាង៤៥.០០០នាក់ មកពីជុំវិញពិភពលោក ។ សំរាប់ព័ត៌មានបន្ថែមអំពីពិព័រណ៍ Ambiente សូមទៅកាន់ http://ambiente.messefrankfurt.com/ frankfurt/en/besucher/willkommen/ erleben.html -គំរោងផ្តៅនៃអង្គការ WWF ធ្វើការជាមួយអ្នករចនាម៉ូដជនជាតិស៊ុយអែត មកពីសាកលវិទ្យាល័យ Lund និងអ្នករចនាម៉ូដជនជាតិកម្ពុជា ដើម្បីជួយជ្រោមជ្រែងសិប្បករផ្តៅកម្ពុជា ក្នុងការបង្កើតម៉ូដផលិតផលផ្តៅដែលមានលក្ខណៈនិរន្តរភាពតំរូវតាមតំរូវការទីផ្សារអន្តរជាតិ ។ ការបង្កើតម៉ូដផលិតផលផ្តៅ រាប់មានទាំងផលិតផលប្រើប្រាស់បន្ទាប់បន្សំក្នុងផ្ទះ និងក្នុងការិយាល័យ ព្រមទាំងគ្រឿងសង្ហារិម ។ -ដោយសហការជាមួយការិយាល័យជាតិផលិតកម្មស្អាតនៃក្រសួងឧស្សាហកម្ម រ៉ែ និងថាមពល ជាមួយមជ្ឈមណ្ឌលផលិតកម្មស្អាតនៃប្រទេសវៀតណាម និងជាមួយសមាគមសិប្បករកម្ពុជា គំរោងផ្តៅនៃអង្គការ WWF ខិតខំធ្វើយ៉ាងណាឱ្យសហគ្រាសខ្នាតតូច និងមធ្យមមានការយល់ដឹង ព្រមទាំងអនុវត្តតាមគោលការណ៍ផលិតកម្មស្អាតពាក់ព័ន្ធនឹងការប្រើប្រាស់បច្ចេកទេសកែច្នៃដែលអាចធានាបានគុណភាពខ្ពស់ ហើយធានាបាននូវនិរន្តរភាពធនធាន ៕  |
| ពួកប្រឆាំងអ៊ីរ៉ង់នៅតែធ្វើបាតុកម្មទោះមានការហាមឃាត់ Posted: 14 Feb 2011 07:59 PM PST ប្រភពព័ត៌មានពីពួកប្រឆាំងរាយការណ៍ថា សកម្មជនប្រឆាំងអ៊ីរ៉ង់ជាច្រើនសិបនាក់បានត្រូវចាប់ខ្លួនកាលពីថ្ងៃទី១៤ កុម្ភៈ ខណៈដែលកងកំលាំងសន្តិសុខបានពង្រាយកំលាំងជាច្រើនដើម្បីរារាំងការប្រមូលផ្តុំមនុស្សធ្វើបាតុកម្មអបអរសាទរជោគជ័យនៃការបះបោរនៅអេហ្ស៊ីប និងនៅទុយនីស៊ី ។ នៅក្រុងតេហេរ៉ង់ដែលកងកំលាំងសន្តិសុខប្រើឧស្ម័នបង្ហូរទឹកភ្នែក បាតុករជាច្រើនសិបនាក់ត្រូវចាប់ខ្លួនខណៈដែលពួកគេប៉ុនប៉ងលើកទៅកាន់មហាទីលានសាហ្សាឌី (សេរីភាព) ទោះបីមានការហាមឃាត់របស់អាជ្ញាធរក្តី ។ ទីភ្នាក់ងារសារព័ត៌មានអ៊ីរ៉ង់ FARS រាយការណ៍ថា បុរសអ៊ីរ៉ង់ម្នាក់បានត្រូវស្លាប់ដោយគ្រាប់កាំភ្លើងក្នុងឱកាសនៃបាតុកម្មរបស់ពួកប្រឆាំងក្នុងរដ្ឋធានីតេហេរ៉ង់ ។ FARS សរសេរថា មនុស្សម្នាក់ស្លាប់ដោយសារគ្រាប់កាំភ្លើង ហើយច្រើននាក់ទៀតត្រូវរបួសដោយសារពួកសកម្មជនប្រឆាំង ដែលប្រមូលផ្តុំគ្នានៅក្រុងតេហេរ៉ង់ ។ នៅទីក្រុងអ៊ីស្ប៉ាហាន ជាទីក្រុងធំទី៣ របស់ប្រទេសមានឧប្បត្តិហេតុនានាផ្ទុះឡើងរវាងកងកំលាំងសន្តិសុខ និងពួកប្រឆាំងដែលពុំអើពើចំពោះការហាមឃាត់របស់អាជ្ញាធរ ហើយលើកគ្នាធ្វើបាតុកម្ម៕  |
| ក្រុមប្រឹក្សាសន្តិសុខអ.ស.បស្នើឱ្យមានបទឈប់បាញ់គ្នាអចិន្ត្រៃយ៍មួយរវាងកម្ពុជា និងថៃ Posted: 14 Feb 2011 07:55 PM PST  ដោយសំដែងពីការព្រួយបារម្ភយ៉ាងខ្លាំងក្រោយការប៉ះទង្គិចគ្នាដោយអាវុធនាពេលថ្មីៗនេះរវាងកម្ពុជា និងថៃនៅតំបន់ក្បែរប្រាសាទព្រះវិហារនៅតាមព្រំដែនរវាងប្រទេសទាំង២បណ្តាសមាជិកក្រុមប្រឹក្សាសន្តិសុខអ.ស.ប បានស្នើកាលពីថ្ងៃទី១៤ កុម្ភៈ ដល់រដ្ឋទាំង២ឱ្យប្រកាសបទឈប់បាញ់គ្នាជាអចិន្ត្រៃយ៍មួយ ។ ឯកអគ្គរដ្ឋទូតប្រេស៊ីល លោកស្រី MARIA LUIZA RIBEIRO VIOTTI ដែលជាប្រធានប្តូរវេនរបស់ក្រុមប្រឹក្សាសន្តិសុខអ.ស.ប សំរាប់ខែកុម្ភៈគូសបញ្ជាក់ថា បណ្តាសមាជិកក្រុមប្រឹក្សាសន្តិសុខអំពាវនាវដល់ភាគីទាំង២ឱ្យប្រកាន់យកការអត់ធ្មត់ខ្លាំងបំផុត ហើយចៀសវាងរាល់សកម្មភាពដែលនឹងអាចធ្វើឱ្យសភាពការណ៍កាន់តែធ្ងន់ធ្ងរ ។ ក្រោយកិច្ចប្រជុំជាសំងាត់មួយរបស់ក្រុមប្រឹក្សាសន្តិសុខអ.ស.ប មានចេញសេចក្តីថ្លែងការណ៍រួមមួយអានដល់សារព័ត៌មានដោយលោកស្រី MARIA LUIZA RIBEIRO VIOTTI ដោយសេចក្តីថ្លែងការណ៍រួមនេះលើកឡើងថា បណ្តាសមាជិកក្រុមប្រឹក្សាសន្តិសុខស្នើដល់ភាគីទាំង២ឱ្យបង្កើតបទឈប់បាញ់គ្នាជាអចិន្ត្រៃយ៍មួយ អនុវត្តទាំងស្រុង និងដោះស្រាយដោយសន្តិវិធីនូវជំលោះតាមរយៈការចរចាដ៏មានប្រសិទ្ធភាពមួយ ។ ក្នុងឱកាសនៃកិច្ចប្រជុំនេះក្រុមប្រឹក្សាសន្តិសុខបានស្តាប់សេចក្តីរាយការណ៍របស់លោកហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិរបស់កម្ពុជា និងរបស់សមភាគីថៃ លោកកាស៊ីត ភិរម្យ ព្រមទាំងរបស់អង្គលេខាធិការរងអ.ស.បទទួលបន្ទុកកិច្ចការនយោបាយលោក B-LYNN PASCOE និងប្រសាសន៍របស់រដ្ឋមន្ត្រីការបរទេសឥណ្ឌូណេស៊ី លោក MARTY NATALEGAWA ដែលប្រទេសរបស់លោកជាប្រធានរបស់អាស៊ាន។ ក្រុមប្រឹក្សាសន្តិសុខអ.ស.បសំដែងនូវការគាំទ្ររបស់ខ្លួនចំពោះការខិតខំប្រឹងប្រែងយ៉ាងសកម្មរបស់អាស៊ានដើម្បីដោះស្រាយវិបត្តិ ។ ក្រុមប្រឹក្សាសន្តិសុខអ.ស.បក៏លើកទឹកចិត្តផងដែរដល់បណ្តាភាគីឱ្យបន្តរួមសហការគ្នាជាមួយអង្គការតំបន់ចំពោះរឿងនេះមុនពេលបញ្ហាអាចលើកយកទៅពិភាក្សាគ្នាក្នុងឱកាសនៃកិច្ចប្រជុំថ្នាក់រដ្ឋមន្ត្រី ការបរទេសអាស៊ាននាថ្ងៃទី២២ កុម្ភៈ ខាងមុខនេះ។ កាលពីដើមខែកុម្ភៈ ការប្រយុទ្ធគ្នានានាបានផ្ទុះឡើងនៅជិតប្រាសាទព្រះវិហារដែលបញ្ចូលក្នុងបញ្ជីបេតិកភណ្ឌពិភពលោករបស់អង្គការយូ ណេស្កូកាលពីឆ្នាំ២០០៨។ អគ្គលេខាធិការអ.ស.បលោកបានគីមូន ធ្លាប់បានអំពាវនាវឱ្យមានការអត់ធ្មត់ ។ អគ្គនាយិកាអង្គការយូណេស្កូ លោកស្រី អ៊ីរីណា បូកូវ៉ា បានតែងតាំងបេសកជនពិសេសមួយរូបជនជាតិជប៉ុន លោកកូអ៊ីជីរ៉ូ ម៉ាតស៊ូអ៊ូរ៉ា អតីតអគ្គនាយកយូណេស្កូមកកាន់កម្ពុជា និងថៃ ៕  |
| លោកអែលបារ៉ាដេបង្ហាញពីជំហរលោកចំពោះអនាគតនៃប្រទេសអេហ្ស៊ីប Posted: 14 Feb 2011 07:49 PM PST  លោកម៉ូហាម៉េដ អែលបារ៉ាដេ អតីតនាយករបស់ទីភ្នាក់ងារថាមពលបរមាណូអន្តរជាតិថ្លែងកាលពីថ្ងៃទី១៤ កុម្ភៈ ថា ទិសដៅរបស់លោកគឺរួមចំណែកឱ្យមានលទ្ធិប្រជាធិបតេយ្យនៅអេហ្ស៊ីបជាជាងឈរឈ្មោះជាបេក្ខជនប្រធានាធិបតីដែលតំណែងនេះលោកថា យកល្អគួរជ្រើសរើសមនុស្សដែលមានអាយុប្រមាណជា៤០ ឬ៥០ឆ្នាំ ។  |
| Posted: 14 Feb 2011 07:47 PM PST  រាជធានីភ្នំពេញ ៖ កម្មករសំណង់-លីសែងដែលបំរើការសាងសង់អគារផ្សេងៗនៅក្នុងតំបន់អភិវឌ្ឍន៍ទីក្រុងកោះពេជ្រប្រមាណជាង១០០នាក់ នៅតែប្រមូលផ្តុំគ្នាធ្វើការតវ៉ាយ៉ាងខ្លាំងក្លាដដែលនៅមុខការិយាល័យរដ្ឋបាលនៃទីក្រុងកោះពេជ្រ កាលពីវេលាម៉ោង៨និង៣០នាទីព្រឹកថ្ងៃទី១៥ កុម្ភៈ ២០១១ ប្រយោជន៍ទាមទារកុំឱ្យកងសន្តិសុខដែលយាមកាមនៅក្នុងមូលដ្ឋានកោះពេជ្រនេះធ្វើការជំរិតយកអីវ៉ាន់ គ្រឿងឧបភោគ បរិភោគ របស់ពួកគាត់ទៅទៀត និងសុំឱ្យដកឈ្មោះប៉ូ សុខម៉េង ជាប្រធានសន្តិសុខ ចេញពីតំបន់កោះពេជ្រជាបន្ទាន់ ព្រោះជននេះជើងខ្លាំងខាងគំរាមជំរិត។ សូមបញ្ជាក់ថា ការធ្វើបាតុកម្មតវ៉ាកាលពីម្សិលមិញក្រុមកម្មករសំណង់-លីសែង មានគ្នាប្រមាណ៦០០នាក់ បានតវ៉ាយ៉ាងផុសផុលសុំឱ្យប្រធានក្រុមហ៊ុនបញ្ឈប់សកម្មភាពគំរាមកំហែង និងជំរិតយកអីវ៉ាន់របស់កម្មករពីសំណាក់ក្រុមសន្តិសុខយាមកាមទីក្រុងកោះពេជ្រ ប៉ុន្តែមិនទទួលបានលទ្ធផលទេ ដោយខាងក្រុមហ៊ុនប្រាប់ថា រង់ចាំដោះស្រាយជូនកម្មករតំរូវឱ្យទៅធ្វើការសិនទៅ...រហូតមកដល់ពេលនេះនៅតែមិនទាន់មានដំណោះស្រាយទៀត។ ចំណែកស្រាទុកគ្រាន់ផឹករំលាយឈាម ឬគ្រាំក្នុង ក្រោយពេលធ្វើការលីសែងហត់នឿយតែប៉ុណ្ណោះ ប៉ុន្តែជាមួយគ្នានេះក៏មានបងប្អូនកម្មករសំណង់-លីសែងមួយចំនួនគាត់បានទិញគ្រឿងហូបចុកពីខាងក្រៅមកទុកលាក់ឱ្យកម្មករដូចគ្នានៅក្នុងទីនេះផងដែរ...ចំណែកកងសន្តិសុខរបស់ក្រុមហ៊ុនទីក្រុងកោះពេជ្រជាច្រើននាក់ មានប្រដាប់ដោយកាំភ្លើងគ្រប់ដៃតែងតែដើរឆែកឆេររៀងរាល់យប់ ហើយគំរាមកំហែងប្រមូលយកគ្រឿងហូបចុករបស់បងប្អូនកម្មករយ៉ាងសន្ធឹកសន្ធាប់ទៅផឹកស៊ីខ្ជះខ្ជាយ ដូច្នេះពួកគាត់ជាកម្មករត្រូវតែតវ៉ាចំពោះរឿងនេះ ។ ចំណែកកងសន្តិសុខម្នាក់ប្រចាំនៅទីក្រុងកោះពេជ្របាននិយាយផងដែរថា តាមគោលការណ៍របស់ក្រុមហ៊ុនទីក្រុងកោះពេជ្របានកំណត់ថា មិនអនុញ្ញាតឱ្យប្រជាពលរដ្ឋ ឬកម្មករណាប្រមូលយកគ្រឿងហូបចុក ឬគ្រឿងទេស  |
| យុវជនម្នាក់តូចចិត្តទៅលោតទឹកសម្លាប់ខ្លួនចំថ្ងៃបុណ្យនៃក្តីស្រលាញ់ Posted: 14 Feb 2011 07:39 PM PST  រាជធានីភ្នំពេញ ៖ យុវជនម្នាក់ទំនងជាខឹងស្រីសេ្នហ៍បានមកអង្គុយផឹកស្រាម្នាក់ឯងចំថ្ងៃបុណ្យនៃក្តីស្រលាញ់ នៅលើកៅអីថ្មម៉ាប ត្រង់ចំណុចច្រាំងទន្លេកែងវិថីព្រះស៊ីសុវត្ថិ និងផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ។ បន្តិចក្រោយមកស្រាប់តែយុវជននោះលោតពីច្រាំងទន្លេចូលទឹក ដើម្បីធ្វើអត្តឃាតបង្កឱ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី១៤ កុម្ភៈ ២០១១ ប៉ុន្តែត្រូវបានទូកអ្នកនេសាទជួយស្រង់ចេញពីទឹកបញ្ជូនទៅមន្ទីរពេទ្យសង្គ្រោះទាន់ពេលវេលា។ គូស្នេហ៍មួយគូដែលឃើញហេតុការណ៍នេះបាននិយាយឱ្យសមត្ថកិច្ចដឹងថា មុនពេលកើតហេតុពួកគេបានឃើញយុវជនម្នាក់មានកាន់ដបស្រានៅនឹងដៃ បានដើរទៅអង្គុយលើថ្មម៉ាបច្រាំងទន្លេដោយមានទឹកមុខក្រៀមក្រំទំនងជាអាក់អន់ចិត្តនឹងស្រីស្នេហ៍មិនបានឱ្យផ្កាកុលាបថ្ងៃបុណ្យក្តីស្រលាញ់ហើយមើលទៅ ។ ក្រោយពីផឹកស្រាអស់មួយដប ហើយយុវជននោះដើរតាមកាំជណ្តើរចុះទៅមាត់ទន្លេ ឈរបានបន្តិចក៏លោតទម្លាក់ខ្លួនចូលទឹកតែម្តង ហើយពេលនោះមានការភ្ញាក់ផ្អើលដល់ស្រទាប់យុវជន យុវនារី ដែលកំពុងនាំ គ្នាខ្លះឈរ ខ្លះអង្គុយអបអរសាទរថ្ងៃបុណ្យនៃក្តីស្រលាញ់តាមមាត់ទន្លេ នាំគ្នាមើលយុវជនគិតខ្លី ដែលអណ្តែតរសាត់តាមខ្សែទឹកចុះទៅទិសខាងត្បូង ។ មន្ត្រីនគរបាលមូលដ្ឋានបានឱ្យដឹងថា ភ្លាមៗនោះ មានទូកនេសាទមួយគ្រឿងបានបើកតាមយុវជនរងគ្រោះ និងស្រង់គេចេញពីទន្លេ ទាន់ពេលវេលា រួចហើយនាំយកទៅសង្គ្រោះ...យុវជនមានវិបត្តិឈ្មោះភឿក ថូ អាយុ១៨ឆ្នាំ បាននិយាយថា រូបគេមិនមែនតូចចិត្តនឹងសង្សារអ្វីទេ គឺខឹងឪពុកម្តាយក្រុមគ្រួសារតែប៉ុណ្ណោះ ៕  |
| ខ្លាញ់ត្រី«អូមេហ្គា3»ជួយការពារជំងឺរលាកអញ្ចាញធ្មេញ Posted: 14 Feb 2011 07:34 PM PST  តាមការស្រាវជ្រាវពីក្រុមអ្នកជំនាញវេជ្ជសាស្ត្រទៅលើក្រុមគំរូជាង១ម៉ឺននាក់ មានអាយុចាប់ពី២០ឆ្នាំឡើងឃើញថា ការទទួលទានខ្លាញ់ត្រី«អូមេហ្គា៣» ជាប្រចាំអាចជួយការពារជំងឺរលាកអញ្ចាញធ្មេញបាន ពីព្រោះអ្នកដែលទទួលទានខ្លាញ់ត្រី អូមេហ្គា៣ ជាប្រចាំនឹងកើតជំងឺរលាកអញ្ចាញធ្មេញតិចជាងអ្នកដែលមិនទទួលទានសោះដល់ទៅ៣០% ព្រោះសារធាតុក្នុងខ្លាញ់ត្រីអូមេហ្គា៣ មានចំណែកជួយកាត់បន្ថយការកើតជំងឺរលាក ។ ក្រៅពីនេះ អ្នកជំនាញមកពីមហាវិទ្យាល័យវេជ្ជសាស្ត្រ«ហាវ៉ើល» បានធ្វើការណែនាំឱ្យបរិភោគខ្លាញ់ត្រីអូមេហ្គា៣ជាប្រចាំ ប៉ុន្តែមិនគួរបរិភោគច្រើនពេកនោះទេ ព្រោះវានឹងមិនផ្តល់ផលល្អឡើយ ។ ក្មេងនិងស្ត្រីគួរបរិភោគក្នុងបរិមាណកំណត់គឺយ៉ាងតិចក្នុងមួយសប្តាហ៍២ដង ទើបធ្វើឱ្យរាងកាយមានសុខភាពល្អនិងជួយការពារភាពប្រថុយប្រថានក្នុងការកើតជំងឺបេះដូងដោយ កាត់បន្ថយកំរិតកូឡេស្តេរ៉ូល និងជួយដល់ការធ្វើការរបស់ខួរក្បាល ថ្លើម និងប្រព័ន្ធសរសៃប្រសាទ ។ ខ្លាញ់ត្រីអូមេហ្គា៣ ប្រទះឃើញមាននៅក្នុងខ្លួនត្រីសមុទ្រដូចជាត្រីសាឌីន ត្រីទឹកសាបមួយចំនួន រួមទាំងសណ្តែកនិងគ្រាប់ធញ្ញជាតិ ៕  |
| បុរសចិនម្នាក់ស្រាតឡើងលើបង្គោលខ្សែភ្លើងធ្វើបាតុកម្ម Posted: 14 Feb 2011 07:24 PM PST  បុរសជនជាតិចិនម្នាក់កាលពីពេលថ្មីៗកន្លងមក បានធ្វើឱ្យមនុស្សផងទាំងឡាយមានការភ្ញាក់ផ្អើលយ៉ាងខ្លាំង ដោយស្រាតសំលៀកបំពាក់ចេញអស់រួចតោងឡើងលើបង្គោលខ្សែភ្លើងយ៉ាងខ្ពស់ ដើម្បីធ្វើបាតុកម្មប្រឆាំងប៉ូលិសដែលបង្ក្រាបអ្នកសុំទាន ។ បុរសរូបនេះឈ្មោះ Mir Wei អាយុ៤៣ឆ្នាំ រស់នៅក្នុងទីក្រុង Hechi បានស្រាតធ្វើបាតុកម្មដូច្នេះដោយសារលោកខឹងប៉ូលិសធ្វើបាបអ្នកសុំទាន ។ នៅពេលស្រាតហើយឡើងលើបង្គោលខ្សែភ្លើងនោះ ប៉ូលិសស្នើសុំឱ្យលោកចុះមកដីវិញ ប៉ុន្តែលោកនៅតែមិនព្រមធ្វើឱ្យប៉ូលិសខឹងប្រើកាំភ្លើងបាញ់សត្វបាញ់កំញើញលោកឱ្យចុះដី ហើយចាប់ខ្លួនតែម្តង ៕  |
| តារាម៉ូដែលប្រេស៊ីលមានដើមទ្រូងធំបំផុតប៉ុនប៉ងធ្វើអត្តឃាត Posted: 14 Feb 2011 07:24 PM PST  តារាម៉ូដែលជនជាតិប្រេស៊ីលមួយរូបដែលជាប់ឯតទគ្គកម្មជាស្ត្រីមានសុដន់ធំបំផុតលើពិភព លោកបានប៉ុនប៉ងធ្វើអត្តឃាតសំលាប់ខ្លួន ក្រោយពីវេជ្ជបណ្ឌិតធ្វើឱ្យសុដន់របស់នាងរួមតូចវិញ ។ តាមប្រភពព័ត៌មានថា តារាម៉ូដែលរូបនេះឈ្មោះ Sheyla Hershy អាយុ៣១ឆ្នាំ កាលពី យប់ថ្ងៃទី១៤ កុម្ភៈ កន្លងមក បានសន្លប់ធំលែងដឹងខ្លួូន ក្រោយពីលេបថ្នាំងងុយដេកច្រើនជ្រុលប៉ុនប៉ងធ្វើអត្តឃាត ។  |
| Posted: 14 Feb 2011 07:01 PM PST  លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេសកម្ពុជា បានមានប្រសាសន៍ថា កម្ពុជាស្វាគមន៍ចំពោះលទ្ធផលនៃកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ដែលរុញការចរចាជម្លោះនេះមកឱ្យអាស៊ានដើរតួ ដោះស្រាយសម្របសម្រួលសំរាប់ប្រទេសក្នុងតំបន់អាស៊ានខ្លួនឯង ហើយលោកត្រៀមនឹងជួបចរចាគ្នាម្តងទៀតរវាងក្រុមអាស៊ាននៅក្រុងហ្សាការតា នាថ្ងៃទី២២ កុម្ភៈ ២០១១ ។ លោកប្រមុខការទូតកម្ពុជាបានលើកឡើងថា កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិដែលប្រើពេលជាង២ម៉ោងនៅបុរីញូវយ៉ក សហរដ្ឋអាេមរិកនេះ កម្ពុជាទទួលបានជោគជ័យ ប៉ុន្តែលោកប្រមុខការទូតបញ្ជាក់ថា ទោះជាយ៉ាងណាក៏ដោយ យន្តការនៃការចរចាទ្វេភាគីជាមួយថៃតទៅទៀតនោះគឺកម្ពុជាមិនអាចទទួលយកបាននោះទេ ពីព្រោះការចរចាជាច្រើនលើកនៅតែមិនទទួលបានជោគជ័យដោយសារតែភាគីថៃមិនអនុវត្តតាមការព្រមព្រៀង ។ លោកម៉ាទី ណាហ្គាលីហ្គាវ៉ា រដ្ឋមន្ត្រីការបរទេសឥណ្ឌូណេស៊ី និងជាប្រធានអាស៊ានដែលមានវត្តមាននៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិនោះដែរ បានមានប្រសាសន៍នៅក្នុងសន្និសីទកាសែតនាគ្រាជាមួយគ្នានោះដែរថា លោកស្វាគមន៍ចំពោះការជួយសំរបសំរួលបញ្ហាកម្ពុជា-ថៃក្នុងនាមប្រទេសឥណ្ឌូណេស៊ីជាប្រធានអាស៊ាន បើទោះណាយើងត្រូវវះកាត់ឧបសគ្គក្នុងដំណាក់កាលដំបូងក៏ដោយ ។ គួរបញ្ជាកដែរថា តាមការអញ្ជើញរបស់រដ្ឋមន្ត្រីការបរទេសឥណ្ឌូណេស៊ី លោករដ្ឋមន្ត្រីការបរទេសកម្ពុជា-ថៃ គ្រោងនឹងជួបគ្នាម្តងទៀតនៅទីក្រុងហ្សាការតា ប្រទេសឥណ្ឌូណេស៊ី នៅថ្ងៃទី២២ កុម្ភៈ ខាងមុខនេះ ដើម្បីរិះរកមធ្យោបាយបញ្ចប់ជម្លោះសៀមឈ្លានពានទឹកដីកម្ពុជា ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
