VOA News: ព័ត៌មាន: “កម្ពុជាស្នើឱ្យមានអ្នកសង្កេតការណ៍អាស៊ានក្នុងជម្លោះព្រំដែនជាមួយថៃ” plus 3 more |
- កម្ពុជាស្នើឱ្យមានអ្នកសង្កេតការណ៍អាស៊ានក្នុងជម្លោះព្រំដែនជាមួយថៃ
- ក្រុមប្រឹក្សាសន្តិសុខអ.ស.ប.ស្នើសុំឲ្យកម្ពុជានិងថៃឈប់បាញ់គ្នាជាអន្ត្រៃយ៍
- តុលាការក្រុងភ្នំពេញផ្តន្ទាទោសជនបរទេសបីនាក់រឿងគំរាមទូតអាមេរិក
- តុលាការកំពូលលើកពេលប្រកាសសាលក្រមរឿងសម្លាប់មេសហជីពខ្មែរ
| កម្ពុជាស្នើឱ្យមានអ្នកសង្កេតការណ៍អាស៊ានក្នុងជម្លោះព្រំដែនជាមួយថៃ Posted: 16 Feb 2011 12:15 PM PST ប្រទេសកម្ពុជានឹងស្នើសុំឱ្យបណ្តាប្រទេសអាស៊ានបញ្ជូនក្រុមអ្នកសង្កេតការណ៍មកកាន់តំបន់ជម្លោះ នៅក្បែរប្រាសាទព្រះវិហារដើម្បីត្រួតពិនិត្យមើលបទឈប់បាញ់គ្នាខណៈដែលរដ្ឋមន្ត្រីការបរទេសអាស៊ាននឹងបើកកិច្ចប្រជុំនៅសប្តាហ៍ក្រោយនេះដើម្បីពិភាក្សាអំពីបញ្ហាជម្លោះព្រំដែនរវាងប្រទេសកម្ពុជានិងប្រទេសថៃ។ លោករដ្ឋមន្ត្រីការបរទេសហោ ណាំហុង បានថ្លែងនៅថ្ងៃពុធនេះថាប្រទេសកម្ពុជានឹងស្នើសុំឱ្យសមាគម ប្រជាជាតិអាស៊ីអាគ្នេយ៍បញ្ជូនក្រុមអ្នកសង្កេតការណ៍មកកាន់តំបន់ជម្លោះព្រំដែនក្បែរប្រាសាទព្រះវិហារ ដើម្បីធានានូវបទឈប់បាញ់គ្នារវាងកងទ័ពកម្ពុជានិងកងទ័ពថៃ។ លោកហោ ណាំហុង បានថ្លែងប្រាប់ក្រុមអ្នករាយការណ៍ព័ត៌មាននៅអាកាសយានដ្ឋានអន្តរជាតិភ្នំពេញក្រោយពីវិលត្រឡប់មកពីកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថាលោកនឹងធ្វើសំណើទៅកាន់កិច្ចប្រជុំរដ្ឋមន្ត្រីការបរទេសអាស៊ានដែលគ្រោងនឹងធ្វើឡើងនៅថ្ងៃទី២២ ខែកុម្ភៈនៅក្នុងទីក្រុងហ្សាកាតាឱ្យដាក់ពង្រាយក្រុមអ្នកសង្កេតការណ៍របស់ខ្លួននៅតំបន់ជម្លោះព្រំដែនសម្រាប់ត្រួតពិនិត្យមើលបទឈប់បាញ់គ្នា។ «ការប្រជុំថ្នាក់រដ្ឋមន្ត្រីការបរទេសអាស៊ាននៅទីក្រុងហ្សាកាតា ថ្ងៃទី២២ ខែកុម្ភៈ នឹងជជែកបញ្ហាជម្លោះ ព្រំដែន កម្ពុជា-ថៃនេះ។ ខ្ញុំនឹងស្នើឱ្យមានអ្នកសង្កេតការណ៍របស់អាស៊ានមកត្រួតពិនិត្យមើលបទឈប់ បាញ់ដើម្បីឱ្យមានការឈប់បាញ់»។ ប្រទេសសមាគមអាស៊ានមានប្រទេសប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី ភូមា ហ្វីលីពីន សិង្ហបូរី ថៃ និងវៀតណាម។ នៅក្នុងសេចក្តីថ្លែងការណ៍របស់ក្រុមប្រឹក្សាសន្តិសុខអង្គការសហប្រជាជាតិសមាជិកក្រុមប្រឹក្សាសន្តិសុខ អង្គការសហប្រជាជាតិបានសម្តែងការព្រួយបារម្ភយ៉ាងខ្លាំងអំពីការវាយប្រយុទ្ធគ្នារវាងកងទ័ពកម្ពុជានិងកងទ័ពថៃកាលពេលថ្មីៗនេះនៅតំបន់ព្រំដែនក្បែរប្រាសាទព្រះវិហារនិងបានអំពាវនាវដល់ភាគីទាំងពីរឱ្យបង្កើតបទឈប់បាញ់ជាអចិន្ត្រៃយ៍។ សមាជិកក្រុមប្រឹក្សាសន្តិសុខអង្គការសហប្រជាជាតិបាន អំពាវនាវដល់ភាគីទាំងពីរបង្ហាញនូវភាពអត់ធ្មត់ជាអតិបរមានិងបញ្ចៀសសកម្មភាពណាមួយដែលអាច ធ្វើស្ថានភាពកាន់តែធ្ងន់ធ្ងរឡើង។
លោករដ្ឋមន្ត្រីការបរទេសហោ ណាំហុង បានបន្ថែមថាប្រទេសកម្ពុជាត្រូវតែចរចាជាមួយថៃដើម្បីដោះ ស្រាយបញ្ហាជម្លោះព្រំដែន។ ប្រទេសកម្ពុជាមិនអាចជៀសវាងការចរចាជាមួយថៃបានទេ។ ប៉ុន្តែការចរចាជាមួយថៃត្រូវមានការចូលរួមពីភាគីទីបី ជាពិសេសអាស៊ាននេះ។ «ក្នុងកិច្ចប្រជុំនៅហ្សាកាតាខាងមុខនេះ ខ្ញុំនឹងស្នើឱ្យមានវត្តមានរបស់តំណាងអាស៊ាន ឬ ប្រធានអាស៊ាន ចូលរួមគ្រប់កិច្ចប្រជុំស្តីពីបញ្ហាជម្លោះព្រំដែនរវាងកម្ពុជានិងថៃ។ សូម្បីតែកិច្ចប្រជុំគណៈកម្មការព្រំដែន កម្ពុជា-ថៃក៏ត្រូវតែមានវត្តមានរបស់តំណាងប្រធានអាស៊ានចូលរួមដែរ។ ដូច្នេះ ការចាំបាច់ត្រូវឱ្យមាន អ្នកទីបីចូលរួមស្តាប់មើលការព្រមព្រៀង និងថាតើនរណាអនុវត្ត និងនរណាមិនអនុវត្ត»។ សំណើរបស់ប្រទេសកម្ពុជានេះផ្ទុយនឹងគោលជំហររបស់ប្រទេសថៃដែលបានអំពាវនាវឱ្យមានការចរចាទ្វេភាគីដើម្បីដោះស្រាយបញ្ហាជម្លោះព្រំដែនរវាងប្រទេសទាំងពីរ។ ការវាយប្រយុទ្ធគ្នារវាងកងទ័ពកម្ពុជានិងថៃពីថ្ងៃទី៤ដល់ថ្ងៃទី៧ ខែកុម្ភៈ បានសម្លាប់មនុស្សយ៉ាងតិច១០ នាក់ និងបានធ្វើឱ្យប្រជាពលរដ្ឋច្រើនរាប់ពាន់គ្រួសារនៃប្រទេសទាំងពីរគ្មានទីជម្រក។ សេចក្តីថ្លែងការណ៍របស់ក្រសួងការបទេសកម្ពុជាបានបញ្ជាក់ថាកាលពីយប់ថ្ងៃអង្គារនិងព្រឹកថ្ងៃពុធនេះ កងទ័ពថៃបានគប់គ្រាប់បែក បាញ់កាំភ្លើងត្បាល់ទំហំ៨១មីលីម៉ែត្រ និងកាំភ្លើងយន្តជាច្រើនគ្រាប់មក តំបន់ភ្នំទ្រព្យដែលស្ថិតនៅចម្ងាយប្រមាណ១.៦០០ម៉ែត្រពីព្រំដែនក្នុងតំបន់ជុំវិញប្រាសាទព្រះវិហារ។ប៉ុន្តែកងទ័ពកម្ពុជាមិនបានបាញ់តបតវិញទេ។ លោក សានសើន កែវកំណើត (Sansern Kaewkamnerd) អ្នកនាំពាក្យកងទ័ពជើងគោកថៃបានបដិសេធការចោទប្រកាន់នេះ៕ This posting includes an audio/video/photo media file: Download Now |
| ក្រុមប្រឹក្សាសន្តិសុខអ.ស.ប.ស្នើសុំឲ្យកម្ពុជានិងថៃឈប់បាញ់គ្នាជាអន្ត្រៃយ៍ Posted: 16 Feb 2011 06:24 AM PST ការិយាល័យអ.ស.ប.៖ ក្រុមប្រឹក្សាសន្តិសុខអង្គការសហប្រជាជាតិ បានជំរុញឲ្យប្រទេសកម្ពុជា និងថៃដោះស្រាយជម្លោះព្រំដែនដែលកំពុងកើតមានឡើងនេះ ហើយឲ្យមានបទឈប់បាញ់គ្នាជាអចិន្ត្រៃយ៍។ ការប្រយុទ្ធគ្នានាពេលថ្មីៗនេះ បានបញ្ឆេះជម្លោះដែលមានរាប់ទសវត្សរ៍ និងបាននាំឲ្យស្លាប់មនុស្សយ៉ាងហោចណាស់១០នាក់ដែរ ក្នុងពេលប៉ះទង្គិចរវាងទាហានរបស់ប្រទេសជាតិអាស៊ីអាគ្នេយ៍ទាំង២នេះ។ រដ្ឋមន្រ្តីក្រសួងការបរទេសកម្ពុជា និងថៃបានជួបគ្នាយ៉ាងសម្ងាត់ជាមួយសមាជិកទាំង១៥របស់ក្រុមប្រឹក្សានេះ ហើយនិងរដ្ឋមន្រ្តីក្រសួងការបរទេសនៃប្រទេសឥណ្ឌូនេស៊ីដែលជាប្រធានអង្គការតំបន់ASEANនេះ។ បន្ទាប់ពីជំនួបនោះ ប្រធានក្រុមប្រឹក្សាសម្រាប់ខែកុម្ភៈនេះគឺលោកស្រី Marai Luiza Ribeiro Viotti ឯកអគ្គរដ្ឋទូតប្រទេសប្រេស៊ីល បានអានសេចក្តីថ្លែងការណ៍ ដែលសម្តែងនូវការព្រួយកង្វល់យ៉ាងខ្លាំងរបស់ក្រុមប្រឹក្សាសន្តិសុខ អំពីការប្រយុទ្ធគ្នានាពេលថ្មីៗនេះក្នុងតំបន់ដាច់ស្រយាលមួយនៅជិតប្រាសាទហិណ្ឌូរបស់ខ្មែរគឺប្រាសាទព្រះវិហារ ដែលមានអាយុជាង៩០០ឆ្នាំ។ «សមាជិកក្រុមប្រឹក្សាសន្តិសុខបានអំពាវនាវឲ្យភាគីទាំង២សម្តែងនូវការអត់ធ្មត់ជាអតិបរមា ហើយឲ្យបញ្ចៀសសកម្មភាពដែលអាចធ្វើឲ្យស្ថានភាពនេះកាន់តែធ្ងន់ធ្ងរឡើង។ សមាជិកក្រុមប្រឹក្សាសន្តិសុខបានជំរុញបន្ថែមទៀតឲ្យភាគីទាំងពីរឈប់បាញ់គ្នាជាអចិន្ត្រៃយ៍ ហើយនិងអនុវត្តបទឈប់បាញ់គ្នានេះឲ្យបានពេញលេញនិងដោះស្រាយស្ថានភាពនេះដោយសន្តិវិធី និងតាមរយៈការសន្ទនាដ៏មានប្រសិទ្ធិភាព។ សមាជិកក្រុមប្រឹក្សាសន្តិសុខបានសម្តែងការគាំទ្រដល់ការខិតខំប្រឹងប្រែងយ៉ាងសកម្មរបស់ ASEAN នៅក្នុងបញ្ហានេះ ហើយបានលើកទឹកចិត្តឲ្យភាគីទាំងពីរបន្តធ្វើកិច្ចសហប្រតិបត្តិការជាមួយអង្គការនេះក្នុងបញ្ហានេះ»។ ថ្លែងតាងនាមឲ្យសមាគម ASEAN លោក Marty Natalagawa រដ្ឋមន្រ្តីក្រសួងការបរទេសឥណ្ឌូនេស៊ី បានប្រាប់ពួកអ្នកយកព័ត៌មានថា លោកមានសុទិដ្ឋិនិយមកាន់តែច្រើនឡើងអំពីស្ថានការណ៍នោះ បន្ទាប់ពីជំនួបរបស់អង្គការសហប្រជាជាតិ។ «នៅថ្ងៃនេះក្នុងអំឡុងពេលនៃការពិភាក្សារបស់ក្រុមប្រឹក្សា ខ្ញុំបានឮយ៉ាងខ្លាំង ហើយយ៉ាងច្បាស់នូវបំណងប្រាថ្នារបស់សមាជិកក្រុមប្រឹក្សាសន្តិសុខ ដែលពិតជាចង់ឲ្យបញ្ហានោះត្រូវបានដោះស្រាយដោយសន្តិវិធី តាមរយៈការសន្ទនា និងការចរចាគ្នា ហើយនេះជាចំណុចមួយដែលប្រទេសឥណ្ឌូណេស៊ី ជាប្រធាន ASEAN បានបញ្ជាក់ជាច្រើនដង និងជាច្រើនលើក។ ហើយក៏មានការទទួលស្គាល់ដែរថា ត្រូវតែមានការឈប់បាញ់គ្នា ហើយថា ត្រូវតែមានប្រភេទគំរូខ្លះ ឬបង្កើតប្រព័ន្ធទាក់ទងគ្នាដើម្បីធ្វើឲ្យប្រាកដថា មានការឈប់បាញ់គ្នា»។ លោកមានប្រសាសន៍បន្តទៀតថា រដ្ឋមន្រ្តីក្រសួងការបរទេសASEAN នឹងពិភាក្សាបញ្ហានេះនៅសប្តាហ៍ក្រោយក្នុងរដ្ឋធានី Jarkarta។ ភាគីទាំង២បានស្តីបន្ទោសគ្នាទៅវិញទៅមកចំពោះការចាប់ផ្តើមអរិភាពនេះ។ កម្ពុជាក៏បានចោទប្រកាន់ថា ប្រទេសថៃប្រើប្រាស់គ្រាប់មីនចង្កោម។ ការចោទប្រកាន់នេះបានត្រូវលោក Kasit Piromya រដ្ឋមន្រ្តីការបរទេសថៃ បដិសេធយ៉ាងដាច់អហង្ការ។ លោកបានប្រាប់ពួកអ្នកយកព័ត៌មានថា មិនមានហេតុផលដែលថា ជម្លោះព្រំដែនគួរបន្តទៀតទេ ក៏ប៉ុន្តែលោកនិយាយទៀតថា ជម្លោះបែបនេះត្រូវការពេលវេលា និងឆន្ទៈនយោបាយ ទើបដោះស្រាយបាន។ ឧបនាយករដ្ឋមន្រ្តី និងរដ្ឋន្រ្តីក្រសួងការបទេសកម្ពុជា លោក ហោ ណាំហុង បាននិយាយសង្កត់ធ្ងន់ប្រាប់ពួកអ្នកយកព័ត៌មានអំពីការប្រើប្រាស់គ្រាប់មីនចង្កោម ដោយលោកមានប្រសាសន៍ថា អ្នកជំនាញការ២នាក់បានកំណត់ថា ភាគីថៃបានប្រើប្រាស់គ្រាប់មីនចង្កោម។ លោកក៏បានសម្តែងនូវការអាក់អន់ចិត្តរបស់លោកដែរ ពីព្រោះក្រុមប្រឹក្សាសន្តិសុខមិនមានផែនការដាក់ពង្រាយអ្នកសង្កេតការណ៍ ឬបេសកកម្មស្វែងរកការណ៍ពិតនៅតំបន់នោះ ដើម្បីធានាឲ្យមានការអនុវត្តបទឈប់បាញ់គ្នានេះ៕ ប្រែសម្រួលដោយជឹង ប៉ូជីន This posting includes an audio/video/photo media file: Download Now |
| តុលាការក្រុងភ្នំពេញផ្តន្ទាទោសជនបរទេសបីនាក់រឿងគំរាមទូតអាមេរិក Posted: 16 Feb 2011 01:09 PM PST តុលាការក្រុងភ្នំពេញនៅថ្ងៃពុធនេះបានសម្រេចផ្ដន្ទាទោសជនបរទេសចំនួនបីនាក់ឲ្យជាប់ពន្ធនាគាររហូតទៅដល់ប្រាំបីឆ្នាំ។ ជនទាំងបីនាក់ត្រូវចោទប្រកាន់ពីបទបានគំរាមធ្វើការវាយប្រហារទៅលើស្ថានទូតបស្ចិមប្រទេសក្នុងទីក្រុងភ្នំពេញកាលពីប្រាំបីខែមុននេះ។ ជនទាំងនោះគឺមានជនជាតិបង់ក្លាដេសចំនួនពីរនាក់ គឺលោក រ៉ាហ្វីកល អ៊ីស្លាម (Rafiqul Islam) អាយុ៤២ឆ្នាំនិងលោក មីយ៉ាស មហាម៉េដ ហ៊ុយម៉ាយុន កាឌៀ (Miah Mohammad Huymayun Kadir) អាយុ៤៥ឆ្នាំនិងជនសង្ស័យសញ្ជាតិនេប៉ាល់ម្នាក់គឺលោក ឌីប ប៉ូឌីយ៉ាល់ (D.P Paudyal) អាយុ៤៤ឆ្នាំ។ ការផ្ដន្ទាទោសក្រោមការចោទប្រកាន់ពីបទភេរវកម្មបន្ទាប់ពីក្រុមអាជ្ញាធរបានរកឃើញកាលពីក្នុងអំឡុងខែមេសា ឆ្នាំ២០១០ ថាជនសង្ស័យទាំងបីនាក់បានផ្ញើលិខិតគំរាមកំហែងព្រមានពីការវាយប្រហារប្រឆាំងស្ថានទូតសហរដ្ឋអាមេរិក ស្ថានទូតអូស្រ្តាលី និងស្ថានទូតរបស់ប្រទេសអង់គ្លេស។ ជនបរទេសទាំងបីត្រូវនាំយកមកកាត់ទោសជាបន្ដបន្ទាប់ក្នុងអំឡុងខែមករាកន្លងទៅនេះ។ លោក ស៊ីន វិសាល ប្រធានចៅក្រមជំនុំជម្រះនៃតុលាការក្រុងភ្នំពេញ បានអះអាងក្រោយពីការប្រកាសសាលក្រមកាលពីព្រឹកម៉ិញថាតុលាការមានភស្ដុតាងគ្រប់គ្រាន់ទាក់ទងនឹងការបង្ហាញអំពី ចេតនាប៉ុនប៉ងគំរាមកំហែងផ្នែកភេរវកម្ម។ «មានកំហុស មានសំអាងហេតុហើយ បានជាតុលាការហ៊ានសម្រេចនេះ»។ លោកមេធាវី មួង សុគន្ធ ការពារក្ដីឲ្យជនជាប់ចោទ រ៉ាហ្វីកល អ៊ីស្លាម មានប្រសាសន៍ថា តុលាការមិនមានភស្ដុតាងសំអាងរឹងមាំណាមួយក្រៅពីលិខិតដែលអាជ្ញាធរប្រមូលបាននោះទេ។ «ភស្ដុតាងដែលដាក់បន្ទុកដូចជាការឆែកឆេរ (អ្វី) ដែលត្រូវចាប់បានដោយសមត្ថកិច្ចគឺអត់មានទាំងអស់។ កូនក្ដីខ្ញុំនិងខ្ញុំមិនអាចទទួលយកបានទេដូច្នេះខ្ញុំនឹងរៀបចំដាក់បណ្ដឹងឧទ្ធរណ៍ក្នុងពេលឆាប់ៗ ជូនកូនក្ដីខ្ញុំ»។ ជនជាប់សង្ស័យក៏បានបដិសេធផងដែរចំពោះការចោទប្រកាន់របស់តុលាការក្នុងអំឡុងពេលសវនការដោយលើកឡើងថាពួកគេមិនបានប្រព្រឹត្តដូចការចោទប្រកាន់នោះទេ។ សូមបញ្ជាក់ថា D. P. Poudyal លោក Miah Mohammad Huymayun Kadir និងលោក Rafigul Islam ត្រូវចាប់ខ្លួនដោយប៉ូលីសក្រសួងមហាផ្ទៃកាលពីខែមិថុនានិងខែកញ្ញាឆ្នាំ២០១០ គឺចន្លោះពីពីរទៅប្រាំខែ បន្ទាប់ពីក្រុមអាជ្ញាធររកឃើញលិខិតព្រមានពីការវាយប្រហារ។ នៅក្នុងលិខិតនោះបានសរសេរថាមានភេរវករចំនួនបួននាក់នៅក្រុមអាល់កៃដា កំពុងមានវត្តមាននៅក្នុងទីក្រុងភ្នំពេញហើយប៉ុនប៉ងវាយប្រហារទៅលើស្ថានទូតបស្ចិមប្រទេសទាំងបីខាងលើនេះ។ អ្នកនាំពាក្យស្ថានទូតសហរដ្ឋអាមេរិកលោក ម៉ាក វ៉េនិក (Mark Wenig) មិនធ្វើអត្ថាធិប្បាយលើករណីដាក់ទោសជនជាប់សង្ស័យទាំងបីរូបនោះទេ ក៏ប៉ុន្ដែលោកមានប្រសាសន៍តាមសារអេឡិចត្រូនិក (អ៊ីម៉ែល) ថា នៅពេលដែលយើងមិនគិតថា ភេរវកម្មមិនមែនជាបញ្ហាសម្រាប់ប្រទេសកម្ពុជានោះ បញ្ហាដូចជាការចន្លោះប្រហោងតាមព្រំដែនត្រូវបានភ្ជាប់ទៅនឹងអំពើភេរវកម្មកាលពីក្នុងអំឡុងអតីតកាល។ លោក ម៉ាក វ៉េនិក បញ្ជាក់យ៉ាងដូច្នេះថា៖ «យើងកំពុងធ្វើការជាមួយរាជរដ្ឋាភិបាលនៅគ្រប់កម្រិតលើបញ្ហាភេរវកម្មនេះហើយប្រទេសកម្ពុជានៅតែជាដៃគូដ៏មានសារៈសំខាន់នៅក្នុងតំបន់ក្នុងការដោះស្រាយការគំរាមកំហែងភេរវកម្ម»៕ This posting includes an audio/video/photo media file: Download Now |
| តុលាការកំពូលលើកពេលប្រកាសសាលក្រមរឿងសម្លាប់មេសហជីពខ្មែរ Posted: 16 Feb 2011 11:07 AM PST តុលាការកំពូលបានលើកពេលប្រកាសសាលក្រមជនជាប់ចោទដែលជាប់ពាក់ព័ន្ធនឹងការ បាញ់សម្លាប់លោក រស់ សុវណ្ណារ៉េត ប្រធានសហជីពសេរីកម្មករប្រចាំរោងចក្រទ្រីណុងហ្កាល់កុមារា ទៅ ថ្ងៃទី២ខែមិនាខាងមុខនេះ។ ការលើកពេលប្រកាសសាលក្រមនេះបានធ្វើឡើងនៅថ្ងៃពុធនេះហើយស្របពេលដែលលោក ស៊ូយ៉ា ប្រាសាទ ស៊ូប៊ែឌី (Surya Subedi) អ្នករាយការណ៍ពិសេសអង្គការសហប្រជាជាតិមានវត្តមាននៅក្នុងតុលាការកំពូលដែលជាផ្នែកមួយនៃបេសកម្មរបស់លោកចំនួន១០ថ្ងៃនៅកម្ពុជាដើម្បីឃ្លាំមើលកំណែទម្រង់ប្រព័ន្ធតុលាការ។ តុលាការកំពូលបានបើកសវនាការជំនុំជម្រះរឿងក្តីនេះ កាលពីថ្ងៃទី០៩កុម្ភៈកន្លងទៅនេះ ក៏ប៉ុន្តែមិនទាន់បានសម្រេចប្រកាសសាលក្រមទេ ដោយលោកឃឹម ប៉ុណ្ណ ប្រធានចៅក្រមជំនុំជម្រះនៃតុលាការកំពូលបានប្រកាសថាសាលក្រមនេះនឹងប្រកាសជាផ្លូវការនៅថ្ងៃទី១៦ខែកុម្ភៈនេះ។ ក៏ប៉ុន្តែក្រោយមកតុលាការកំពូលបានសម្រេចលើកពេលប្រកាសសាលក្រមម្តងទៀត។ លោកស៊ូយ៉ា ប្រាសាទ ស៊ូប៊ែឌី នៅថ្ងៃពុធនេះបានទៅដល់ខ្លោងទ្វាររបងរបស់តុលាការកំពូលដើម្បីចូលរួមស្តាប់ការប្រកាសសាលក្រមរបស់តុលាការ។ ក៏ប៉ុន្តែក្រោយមកត្រូវបានមន្រ្តីតុលាការប្រាប់ថាបានលើកពេលប្រកាសសាលក្រមហើយ។ លោកស៊ូយ៉ា ប្រាសាទស៊ូប៊ែឌី បានមកធ្វើទស្សនកិច្ចប្រទេសកម្ពុជាដើម្បីស្វែងយល់អំពីកំណែទម្រង់ប្រព័ន្ធតុលាការ និងការគោរពសិទ្ធិមនុស្ស។ លោកជា មុន្នី ប្រធានសហជីពសេរីកម្មកររបស់ប្រទេសកម្ពុជាបានមានប្រសាសន៍ថាការលើកពេលប្រកាសសាលក្រមរបស់តុលាការកំពូលបានបង្ហាញឲ្យឃើញថាតុលាការមិនឯករាជ្យ។ «នេះ បញ្ជាក់ថា តុលាការក្នុងប្រទេសកម្ពុជាមិនមានភាពឯករាជ្យ មិនមានភាពច្បាស់លាស់ មិនអាចយកវិជ្ជាជីវៈរបស់ខ្លួនទៅប្រើប្រាស់បានទេ។ អញ្ចឹងករណីហ្នឹងហើយដែលយើងឃើញថារាល់ការដែលកាត់សេចក្តីកន្លងមកធ្វើឲ្យប្រជាពលរដ្ឋស្លូតត្រង់ដែលមិនបានប្រព្រឹត្តនូវបទល្មើសទទួលនូវបទល្មើសជំនួសអ្នកដែលបង្កបទល្មើស»។ លោកឃឹម ប៉ុណ្ណ ប្រធានចៅក្រមជំនុំជម្រះនៃតុលាការកំពូល មិនអាចស្នើសុំអត្ថាធិប្បាយបានទេ នៅថ្ងៃពុធនេះ។ ក៏ប៉ុន្តែបើតាមការបញ្ជាក់របស់លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបានច្រានចោលការលើកឡើងនេះ។ លោកផៃ ស៊ីផាន បានមានប្រសាសន៍ថាតុលាការមានឯករាជ្យភាពគ្រប់គ្រាន់ក្នុងការសម្រេចប្រកាស សាលក្រម ឬមិនប្រកាសសាលក្រម។ លោកបានមានប្រសាសន៍ទៀតថា វត្តមានរបស់មន្រ្តីអង្គការសហប្រជាជាតិគ្មានប្រយោជន៍អ្វីដល់តុលាការកម្ពុជាទេ។ «អ្នកដទៃទៀត ទោះជាឥស្សរជនមកពីខាងណាក៏មិនអាចមានឥទ្ធិពលជះទៅលើការសម្រេចរបស់តុលាការដែរនេះចំណុចទីមួយ។ ចំណុចទីពីរ តុលាការមានឯករាជ្យគ្រប់គ្រាន់សម្រាប់ខ្លួនគេក្នុងការងារប្រកាសឬ មិនប្រកាស។ នេះជាឆន្ទានុសិទ្ធិរបស់តុលាការ»។ លោករស់ សុវណ្ណារ៉េត ប្រធានសហជីពសេរីកម្មកររបស់ប្រទេសកម្ពុជា ប្រចាំរោងចក្រទ្រីណុងហ្គាល កុមារា ត្រូវបានឃាតករបាញ់សម្លាប់កាលពីថ្ងៃទី០៤ ខែឧសភា ឆ្នាំ២០០៤ នៅជិតម្តុំតោពីរ សង្កាត់ទឹកល្អក់ ក្រុងភ្នំពេញ។ អាជ្ញាធរប៉ូលីស បានចាប់ខ្លួនលោកថាច់ សាវ៉េត ហៅចាន់ សុភ័ក្រ ដែលសង្ស័យថា ជាប់ពាក់ព័ន្ធទៅនឹងករណីឃាតកម្មខាងលើនេះ។ លោកថាច់ សាវ៉េត អាយុ២៨ ឆ្នាំ ត្រូវបានតុលាការក្រុងភ្នំពេញ និងសាលាឧទ្ធរណ៍បានផ្តន្ទាទោសឲ្យជាប់ពន្ធនាគាររយៈពេល១៥ឆ្នាំ និងពិន័យជាប្រាក់ជិត២.០០០ដុល្លារសហរដ្ឋអាមេរិក។ អ្នកស្រីហួន ផល្លា អាយុ៤៩ឆ្នាំ ម្តាយបង្កើតរបស់លោកថាច់ សាវ៉េត បានមានប្រសាសន៍ថា កូនប្រុសរបស់អ្នកស្រីមិនជាប់ពាក់ព័ន្ធទៅនឹងករណីឃាតកម្មនេះទេ។ អ្នកស្រីបាននិយាយទាំងអួលដើមកនៅក្នុងបរិវេណរបស់តុលាការកំពូលថា អ្នកស្រីចង់ឲ្យតុលាការកំពូលប្រកាសសាលក្រមឲ្យបានឆាប់ៗដើម្បីបញ្ចប់នូវមន្ទិលសង្ស័យចំពោះករណីឃាតកម្មនេះ។ «ខ្ញុំចង់ដឹង អាឃាតករ ដែលបាញ់ រស់ សុណ្ណារ៉េត មិនមែនកូនខ្ញុំអ្នកបាញ់។ ហើយតាមសាម៉ីខ្លួនវានិយាយថា ដែលគេប្តឹង។ អាប៉ូលីសវាថា មិនមែនប្តឹងកូនខ្ញុំឯណា។ តែអាប៉ូលីសតើវាមកចាប់កូនខ្ញុំ។ ឥឡូវអាប៉ូលីសខណ្ឌទួលគោកជាប់គុកអស់ហើយនៅតែកូនខ្ញុំអត់រួចទៀត»។ លោកសំ ចំរើន មេធាវីការពារក្តីជនជាប់ចោទ បានមានប្រសាសន៍ថា រយៈពេលមួយសប្តាហ៍មក ហើយ តុលាការមានពេលគ្រប់គ្រាន់ក្នុងការប្រកាសសាលក្រមនេះ។ ក៏ប៉ុន្តែទោះជាយ៉ាងណា ក៏ដោយក៏ លោកបានមានប្រសាសន៍ថា ការពន្យារពេល គឺជាឆន្ទានុសិទ្ធិរបស់តុលាការ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
