VOA News: ព័ត៌មាន: “អតីតអ្នកភូមិបឹងកក់ទាមទារសំណងបន្ថែម” plus 6 more |
- អតីតអ្នកភូមិបឹងកក់ទាមទារសំណងបន្ថែម
- មេបក្សសម រង្ស៊ីគំរាមធ្វើឲ្យមានវិបត្តិរដ្ឋធម្មនុញ្ញ
- នួន ជា មានសុខភាពអាចចូលរួមសវនាការបាន
- ជនរងគ្រោះខ្មែរនៅអាមេរិកនឹងចូលរួមស្តាប់សវនាការសំណុំរឿង០០២
- តំណាងរាស្ត្រលក្ខខណ្ឌកិច្ចព្រមព្រៀងក្រុងប៉ារីសមិនត្រូវបានអនុវត្ត
- សហព្រះរាជអាជ្ញារក្សាជំហចោទប្រកាន់ក្នុងសំណុំរឿង០០៣និង០០៤
- ព័ត៌មានអន្តរជាតិ៖ ១៦ វិច្ឆិកា
| អតីតអ្នកភូមិបឹងកក់ទាមទារសំណងបន្ថែម Posted: 16 Nov 2011 03:11 PM PST អតីតក្រុមប្រជាពលរដ្ឋដែលរស់នៅតំបន់បឹងកក់នៅថ្ងៃពុធនេះបានប្រមូលផ្តុំគ្នាតវ៉ាជាថ្មីម្តងទៀតបន្ទាប់ពីការតវ៉ាលើកមុនមិនបានសម្រេច។ ការតវ៉ាលើកនេះបានប្រើប្រាស់ពេលវេលាចំនួនបីថ្ងៃនៅទីលានប្រជាធិបតេយ្យដើម្បីទាមទារសាលាក្រុងភ្នំពេញ និងក្រុមហ៊ុនស៊ូកាគូអ៊ីនផ្តល់សំណងបន្ថែមចំនួន២០.០០០ដុល្លារក្នុងមួយគ្រួសារ។ ពួកគេនិយាយថា គេព្រមទទួលសំណងលើកមុនដោយសារការគំរាមកំហែង និងបង្ខិតបង្ខំ។ នៅក្នុងរង្វង់ខ្សែមួយដែលចងព័ទ្ឋជុំវិញក្រោមម្លប់ដើមឈើតូចៗ និងមានការតាមឃ្លាំមើលពីកម្លាំងសម្ថកិច្ចប្រមាណជាង២០នាក់ក្រុមអ្នកស្រុកបានឈរកាន់បដារូបថតលោកនាយរដ្ឋមន្ត្រីហ៊ុន សែន និងភរិយារបស់លោក និងរូបព្រះឆាយាល័ក្ខណ៍សម្តេចឪសម្តេចម៉ែព្រមទាំងពាក្យស្លោកដែលរិះគន់ពីការបណ្តេញចេញដោយបង្ខំ។ «ត្រូវតែមានតម្លាភាព និងយុត្តិធម៌ដល់ប្រជាពលរដ្ឋដែលបានចាកចេញនៅតំបន់បឹងកក់»។ ប្រជាពលរដ្ឋប្រមាណជាង៤.០០០គ្រួសារកាលពីអំឡុងឆ្នាំ២០០៨បានចាកចេញពីតំបន់បឹងកក់ជាថ្នូរនឹងទឹកប្រាក់ខុសៗគ្នាដោយគ្រួសារខ្លេះទទួលសំណង១.០០០ដុល្លារ ហើយគ្រួសារខ្លះទទួលបាន៨.០០០ដុល្លារ និងទឹកប្រាក់ចំនួន២លានរៀល។ លោកស្រី សំ វណ្ណាអាយុ៥០ឆ្នាំដំណាងប្រជាពលរដ្ឋនៅតំបន់បឹងកក់បាននិយាយថាសំណងដែលផ្តល់កន្លងមកបានធ្វើឡើងតាមការបង្ខិតបង្ខំនិងគំរាមកំហែង។ លោកស្រីបាននិយាយថា ប្រជាពលរដ្ឋភាគច្រើនមិនអាចយកប្រាក់ទាំងនេះទៅប្រកបរបរចិញ្ចឹមជីវិតបានទេហើយការតវ៉ារបស់ពួកយើងនៅថ្ងៃនេះគឺចង់ទាមទារដល់សាលាក្រុងនិងក្រុមហ៊ុនស៊ូការគូអ៊ីនឲ្យផ្តល់សំណងបន្ថែមរហូតដល់២.០០០០ដុល្លារក្នុងមួយគ្រួសារ។ «អ្នកខ្លះបានត្រឹម៤.០០០ អ្នកខ្លះរុះរើទៅក៏អត់បានលុយដែរ។ អញ្ចឹងហើយពួកយើងខ្ញុំមកនេះដើម្បីឲ្យរាជរដ្ឋាភិបាលធ្វើការឲ្យមានតម្លាភាព និងយុត្តិធម៌ចំពោះអ្នកចាកចេញ»។ ក្រុមប្រជាពលរដ្ឋដែលបានចាកចេញពីតំបន់បឹងកក់បានទៅរស់នៅកន្លែងផ្សេងៗពីគ្នាជាយក្រុងភ្នំពេញប្រមាណជាង២០គីឡូម៉ែត្រនិងមានអ្នកខ្លះទៅរស់នៅតាមបណ្តាខេត្តមួយចំនួន។ អ្នកស្រីដួង ម៉ារីន អាយុ៥៩ឆ្នាំកំពុងអង្គុយក្រោមម្លប់ដើមឈើមួយជាមួយនឹងប្រជាពលរដ្ឋផ្សេងទៀតហើយបច្ចុប្បន្ននេះកំពុងរស់នៅបូរីសន្តិភាពពីរក្នុងខ័ណ្ឌដង្កោបាននិយាយថាប្រជាពលរដ្ឋមានជីវភាពដុនដាបបន្ទាប់ពីបានចាកចេញពីតំបន់បឹងកក់។ អ្នកស្រីបាននិយាយថា អ្នកស្រីបានទទួលសំណងជាផ្ទះមួយល្វែង៤មគុណនឹង១២ក៏ប៉ុន្តែផ្ទះនេះគ្មានគុណភាព។ «ផ្ទះហ្នឹងវាពុកឥឡូវដំបូលវាផ្ទុះហើយ។ ដូចជ្រាបស្រាប់ហើយសុទ្ឋតែកម្មករអ្នកទូលកញ្ច្រែងគ្មានលុយជួសជុលទេ។ មួយរដូវភ្លៀងហ្នឹងវាលិចហើយឡើងប្រេះខ្មៅៗអស់ហើយ»។ លោក កើត ឆែ នាយករងរដ្ឋបាលសាលាក្រុងភ្នំពេញបាននិយាយថា លោកមិនបានដឹងការតវ៉ារបស់ប្រជាពលរដ្ឋអតិតរស់នៅតំបន់បឹងកក់ទេ។ «ខ្ញុំសួរបងឯងវិញ បើបងឯងអត់ដឹងរឿង បងឯងឆ្លើយយ៉ាងម៉េចដែរ។ រឿងហ្នឹងគាត់ប្រគល់ឲ្យសាលាខ័ណ្ឌប្រជុំធ្វើម៉េចខ្ញុំដឹងទៀត»។ លោក សុខ ពេញវុធ អភិបាលរងខ័ណ្ឌដូនពេញមិនបានធ្វើអត្ថាធិប្បាយទេដោយលោកបាននិយាយថា កំពុងជាប់រវល់ប្រជុំ។ លោកបណ្ឌិតឡៅ ម៉ុងហៃ អ្នកវិភាគឯករាជ្យមួយរូបដែលបានឃ្លាំមើលការតវ៉ារបស់ប្រជាពលរដ្ឋបាននិយាយថា ទាំងអាជ្ញាធរ ទាំងក្រុមហ៊ុន ទោះបីជាពួកគេរស់នៅតំបន់ណាក៏ដោយត្រូវតែផ្តល់ជីវភាពឲ្យដលើកម្រិតដើមរបស់ពួកគេវិញនៅពេលមានការបណ្តេញចេញពីកន្លែងចាស់។ «គេធ្លាប់រស់នៅស្រួលត្រឹមណាគឺប្រញាប់ប្រញាល់អភិវឌ្ឃន៍កន្លែងហ្នឹងដើម្បីឲ្យជីវភាពរស់នៅរបស់ពួកគេរស់នៅឲ្យបានស្រួលដូចដើមវិញបើមិនបានប្រសើរជាងទេ។ នេះគោលការណ៍សុភមង្គលរបស់ប្រជាពលរដ្ឋ»។ ក្រុមហ៊ុនស៊ូការគូអ៊ីនបានជួលដីបឹងកក់ពីសាលាក្រុងភ្នំពេញរយៈពេល៩៩ឆ្នាំសម្រាប់ធ្វើការអភិវឌ្ឃឲ្យទៅជាមជ្ឃមណ្ឌលពាណិជ្ជកម្មសណ្ឋាគារ និងផ្ទះសម្បែងក៏ប៉ុន្តែការអភិវឌ្ឃនេះត្រូវបានប្រជាពលរដ្ឋចោទប្រកាន់ថាបានធ្វើឲ្យពួកគេដែលធ្លាប់រស់នៅបឹងកក់បានធ្លាក់ខ្លួនក្រនិងខ្វះទីជម្រកសមរម្យ៕ This posting includes an audio/video/photo media file: Download Now |
| មេបក្សសម រង្ស៊ីគំរាមធ្វើឲ្យមានវិបត្តិរដ្ឋធម្មនុញ្ញ Posted: 16 Nov 2011 11:50 AM PST លោក សម រង្សី មេដឹកនាំគណបក្សប្រឆាំងនៅថ្ងៃពុធនេះ បានដាក់ការគាបសង្កត់ទៅលើគណបក្សគ្រប់គ្រងអំណាច ឱ្យបង្អាក់ការរំលោភដីធ្លី និងការបណ្តេញដោយបង្ខំ ដោយប្រកាសថាសមាជិកសភាគណបក្សសម រង្សីទាំងអស់គ្រោងនឹងលាលែង ដើម្បីបង្កើតឱ្យមានវិបត្តិរដ្ឋធម្មនុញ្ញ។ លោក សម រង្សី បានថ្លែងប្រាប់ក្រុមអ្នករាយការណ៍ព័ត៌មានតាមរយៈ Video Conference ពីប្រទេសបារាំងមកថា សមាជិកសភាគណបក្សប្រឆាំងសម្រេចចិត្តបង្កើតឱ្យមានវិបត្តិរដ្ឋធម្មនុញ្ញដោយលាលែងជាក្រុម និងរាំងខ្ទប់រដ្ឋសភាក្នុងការអនុម័តផ្សេងៗពីព្រោះពួកគេមិនអាចចរចាជាមួយរដ្ឋាភិបាល។ លោក សម រង្សី ប្រធានគណបក្សសម រង្សី បានថ្លែងថា គណបក្សសម រង្សីនឹងធ្វើឱ្យរដ្ឋសភាបាត់បង់ភាពស្របច្បាប់ និងធ្វើឱ្យសេចក្តីសម្រេចរបស់រដ្ឋសភាខ្វះលក្ខណៈច្បាប់ពេញលេញ។ «រឿងវិបត្តិធម្មនុញ្ញ។ វិបត្តិធម្មនុញ្ញនេះគឺបណ្តាលមកពីការផ្តួចផ្តើមគំនិតរបស់គណបក្សសម រង្សី ហើយយើងផ្អែកលើមាត្រា៧៦ និងមាត្រា៩៥នៃរដ្ឋធម្មនុញ្ញ»។ លោក សម រង្សី មិនបានលម្អិតអំពីពេលវេលា និងរបៀបនៃការអនុវត្តយុទ្ធសាស្ត្រថ្មីរបស់លោកទេ។ លោក សម រង្សី បានថ្លែងថា គណបក្សសម រង្សីនឹងបន្តរាំងខ្ទប់ការបោះឆ្នោត ឬការសម្រេចណាមួយដោយរដ្ឋសភារហូតដល់រដ្ឋាភិបាល ដែលដឹកនាំដោយគណបក្សប្រជាជនកម្ពុជា ទទួលយកទៅអនុវត្តនូវការបង្អាក់ការរំលោភដីធ្លី និងការបណ្តេញចេញដោយបង្ខំ ហើយផ្លាស់ប្តូរសមាសភាពគណៈកម្មាធិការជាតិរៀបចំការបោះឆ្នោត។ លោក សម រង្សី បានគំរាមថា បើរដ្ឋាភិបាលមិនដោះស្រាយការទាមទាររបស់គណបក្សសម រង្សី នេះទេ ច្បាប់ថវិកាជាតិឆ្នាំ២០១២មិនអាចត្រូវបានអនុម័ត ហើយគេមិនអាចផ្តល់សច្ចាប័នស្របតាមរដ្ឋធម្មនុញ្ញបានដល់កិច្ចព្រមព្រៀងស្តីពីកម្ចីដែលត្រូវបានចុះហត្ថលេខាថ្មីៗនេះដោយរដ្ឋាភិបាលជាមួយបរទេស និងស្ថាប័នហិរញ្ញវត្ថុអន្តរជាតិនានានោះទេ។ លោក ជាម យៀប សមាជិកសភាជាន់ខ្ពស់ខាងគណបក្សប្រជាជនកម្ពុជា បានថ្លែងថា បើសមាជិកសភាចំនួន២៦រូបរបស់គណបក្សសម រង្សីលាលែង រដ្ឋសភានៅតែមានសមាជិកចំនួន១២៣រូបដដែលគ្មានវិបត្តិរដ្ឋធម្មនុញ្ញកើតឡើង និងមិនរាំងស្ទះដល់ការអនុម័តច្បាប់ថវិកាជាតិឆ្នាំ២០១២ និងការផ្តល់សច្ចាប័នលើកិច្ចព្រមព្រៀងស្តីពីកម្ចីនោះទេ។ «ខ្ញុំសូមជម្រាបថា អ្វីដែលជាVideo Conference ដែលលោកសម រង្សី ធ្វើគឺជាសិទ្ធិរបស់គាត់។ តែនេះជាភាពទាល់ច្រក ភាពទុទិដ្ឋិនិយម ហើយនឹងការអស់សង្ឃឹមរបស់គាត់ ដែលគាត់លើកឡើងទាំងអម្បាលមាណ។ គាត់អត់យល់ដឹងអំពីច្បាប់របស់កម្ពុជាតាំងពីរដ្ឋធម្មនុញ្ញឆ្នាំ១៩៩៣ ច្បាប់ស្តីពីការបោះឆ្នោតជ្រើសតាំងតំណាងរាស្ត្រឆ្នាំ១៩៩៧ ច្បាប់ស្តីពីលក្ខន្តិកៈតំណាងរាស្ត្រ បទបញ្ជាផ្ទៃក្នុងនៃរដ្ឋ សភា ការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត និងការរៀបចំ និងការប្រព្រឹត្តទៅនៃក្រុមប្រឹក្សាធម្មនុញ្ញ។ គាត់មិនយល់ពីច្បាប់ទាំងអស់នេះទេ»។ លោក សុខ សំអឿន នាយកប្រតិបត្តិនៃអង្គការអ្នកច្បាប់ការពារសិទ្ធិកម្ពុជាបានបញ្ជាក់ថាសមាជិកសភាគណបក្សសម រង្សី មានសិទ្ធិលាលែងពីតំណាងរាស្ត្រ ហើយគណៈកម្មាធិការជាតិរៀបចំការបោះឆ្នោត មានសិទ្ធិតែងតាំងបេក្ខជនលេខបន្ទាប់ឱ្យធ្វើតំណាងរាស្ត្រជំនួសបាន។ លោក សុខ សំអឿន បានបន្តថា ការលាលែងរបស់តំណាងរាស្ត្រគណបក្សសម រង្សី មិនអាចរាំងខ្ទប់ដំណើរការរដ្ឋសភាបានទេ ដោយសារសំឡេងអនុម័តតម្រូវឱ្យមាន៥០ភាគរយបូកមួយ។ គណបក្សសម រង្សី មានសមាជិកសភាចំនួន២៦រូប ខណៈដែលគណបក្សប្រជាជនកម្ពុជា មានសមាជិកសភាចំនួន៩០រូប ក្នុងចំណោម១២៣រូប៕ This posting includes an audio/video/photo media file: Download Now |
| នួន ជា មានសុខភាពអាចចូលរួមសវនាការបាន Posted: 16 Nov 2011 11:39 AM PST អង្គជំនុំជម្រះសាលាដំបូងរបស់សាលាក្ដីខ្មែរក្រហម បានសម្រេចនៅថ្ងៃពុធនេះថា នួន ជា មានសម្បទាគ្រប់គ្រាន់ក្នុងការចូលរួមការកាត់ទោសលើរូបគាត់។ ការសម្រេចនេះធ្វើឡើងប្រាំថ្ងៃប៉ុណ្ណោះមុននឹងការកាត់ទោសពេញអង្គសេចក្តីសំណុំរឿង០០២ ចាប់ផ្ដើម។ កាលពីខែសីហា អង្គជំនុំជម្រះសាលាដំបូងបានបើកសវនាការស្ដីពីកាយសម្បទារបស់ជនជាប់ចោទចំនួនបីនាក់ គឺនួន ជា អៀង សារី និងអៀង ធីរិទ្ធ ប៉ុន្ដែខៀវ សំផន បានបដិសេធការធ្វើកោសល្យវិច័យពីកាយសម្បទារបស់គាត់សម្រាប់ចូលរួមសវនាការ។ នៅក្នុងសវនាការរយៈពេលបីថ្ងៃ លោកសាស្ដ្រាចារ្យ ចន ខាំបែល (John Campbel) គ្រូពេទ្យជំនាញផ្នែកជំងឺមនុស្សចាស់ បានបញ្ជាក់ថា ផ្នែកសំខាន់ៗទាំងបួនក្នុងរាង្គកាយដែលជាមូលដា្ឋនបញ្ជាក់ពីសម្បទាមាំទាំរបស់នួន ជា គឺបេះដូង ខួរក្បាល សាច់ដុំ និងគ្រោងឆ្អឹង រួមទាំងប្រពន្ធ័ផ្សេងៗទៀត មិនមានបញ្ហា ដែលអាចរារាំងរូបគាត់ ក្នុងការចូលរួមសវនាការពេញអង្គសេចក្ដីនោះទេ។ នៅក្នុងសេចក្ដីសម្រេចដែលផ្សព្វផ្សាយជាសាធារណៈនៅថ្ងៃនេះ លោកចៅក្រមនិល ណុន ប្រធានអង្គជំនុំជម្រះសាលាដំបូងសរសេរថា នួន ជា៖ «មានកាយសម្បទាគ្រប់គ្រាន់សម្រាប់ចូលរួមសវនាការ»។ លោកចៅក្រម និល ណុន បញ្ជាក់បន្ថែមថា អង្គជំនុំជម្រះសាលាដំបូងកត់សម្គាល់ថា គ្រូពេទ្យជំនាញមិនបានរកឃើញអសមត្ថភាពរបស់នួន ជា សម្រាប់ចូលរួមសវនាការក្នុងពេលនេះទេ។ អតីតប្រធានសភាខ្មែរក្រហមអាយុ៨៥ ឆ្នាំរូបនេះត្រូវចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម និងបទប្រល័យពូជសាសន៍ជាមួយនឹងជនជាប់ចោទបីនាក់ផ្សេងទៀតក្នុងសំណុំរឿង០០២។ ការចោទប្រកាន់ដែលទាក់ទងទៅនឹងការស្លាប់ និងការសម្លាប់ប្រជាពលរដ្ឋកម្ពុជាជិតពីរលាននាក់ ចន្លោះឆ្នាំ ១៩៧៥ និងឆ្នាំ ១៩៧៩។ សហមេធាវីកម្ពុជារបស់ នួន ជា លោក សុន អារុណ មិនបានច្រានចោលការសម្រេចរបស់សាលាដំបូងនេះទេ។ «ត្រឹមត្រូវហើយ។ សុខភាពកូនក្ដីខ្ញុំគ្រាន់តែចាស់ប៉ុណ្ណោះ។ ប៉ុន្ដែគាត់នៅមានបញ្ញា និងអាចឆ្លើយឆ្លងបាន»។ ជាមួយគ្នានេះលោកមេធាវី សុន អារុណ បញ្ជាក់ថា លោកបានត្រៀមខ្លួនរួចជាស្រេចសម្រាប់ចូលរួមសវនាការពេញអង្គសេចក្ដី ដែលនឹងចាប់ផ្ដើមនៅថ្ងៃច័ន្ទសប្តាហ៍ក្រោយនេះ៕ This posting includes an audio/video/photo media file: Download Now |
| ជនរងគ្រោះខ្មែរនៅអាមេរិកនឹងចូលរួមស្តាប់សវនាការសំណុំរឿង០០២ Posted: 16 Nov 2011 03:12 PM PST ជនរងគ្រោះនៃរបបខ្មែរក្រហមពីសហរដ្ឋអាមេរិក ដែលជាដើមបណ្តឹងរដ្ឋប្បវេណីក្នុងសាលាក្តីខ្មែរក្រហម នឹងចូលរួមក្នុងពេលបើកសវនាការសំណុំរឿងលេខ០០២ដែលគ្រោងនឹងចាប់ផ្តើមនៅថ្ងៃច័ន្ទសប្តាហ៍ក្រោយ។ អ្នកស្រីនៅ សារឹម អតីតអ្នកទោសនៃមន្ទីរឃុំឃាំងបឹងត្របែក លោកស្រីបៃ សុផានី និងលោកស្រីជា ម៉ារីគ្រោងនឹងស្នាក់នៅប្រទេសកម្ពុជាចំនួនមួយសប្តាហ៍ដើម្បីចូលរួមនិងតាមដានដំណើរការសាលាក្តីខ្មែរក្រហម។ អ្នកទាំងបីបានដាក់ពាក្យបណ្តឹងតាមរយៈវិទ្យាស្ថានស្រាវជ្រាវអនុវត្តន៍សង្គមនៃកម្ពុជា ប្តឹងមេដឹកនាំទាំងបួននាក់ ដែលមាននួន ជា ខៀវ សំផន អៀង សារី និងអៀង ធីរិទ្ធ។ អ្នកស្រីនៅ សារឹមបានបញ្ជាក់ថា នេះជាការស្វែងរកយុត្តិធម៌សម្រាប់ឱ្យអ្នកដែលស្លាប់បាត់បង់ជីវិតនិងជនរងគ្រោះដែលនៅរស់រានមានជីវិត។ «យើងនឹងស្តាប់ ហើយយើងនឹងធ្វើការវិនិច្ឆ័យទៅតាមហ្នឹងគឺយើងមិនយកកំហឹងទៅទល់កំហល់ទៅរកអ្នកទាំងអស់នោះទេ ព្រោះគ្រាន់តែប៉ុណ្ណឹងក៏អាចធ្វើឱ្យអ្នកដែលបានប្រព្រឹត្តអំពើហ្នុងក៏មានការញញើតខ្លះដែរ (ហើយ)សម្រាប់អ្នកបន្តជំនាន់ក្រោយនេះ អំពើដែលខ្លួនបានធ្វើអាក្រក់ហ្នឹងគឺថាថ្ងៃណាមួយគឺវានឹងលេចចេញមកសម្រាប់ឱ្យខ្លួនរងទុក្ខទោសវិញ»។ លោកស្រីបៃ សុផានីបានបញ្ជាក់ក្នុងសេចក្តីប្រកាសព័ត៌មានរបស់វិទ្យាស្ថានស្រាវជ្រាវអនុវត្តន៍សង្គមនៃកម្ពុជាថា លោកស្រីចង់ដឹងថា ហេតុអ្វីបានជាពួកខ្មែរក្រហមសម្លាប់មនុស្សច្រើនម៉្លេះ ហើយរហូតមកដល់ពេលនេះ ពួកមេដឹកនាំទាំងនោះមិនបានទទួលខុសត្រូវចំពោះអំពើប្រល័យពូជសាសន៍។ លោកស្រីចង់បានយុត្តិធម៌សម្រាប់ជនរងគ្រោះទាំងអស់។ សវនាការកាត់ទោសមេដឹកនាំជាន់ខ្ពស់នៃរបបខ្មែរក្រហមក្នុងសំណុំរឿងលេខ០០២នឹងចាប់ផ្តើមពីថ្ងៃច័ន្ទទី២១ខែវិច្ឆិកា ហើយបន្តរហូតដល់ថ្ងៃទី១៦ខែធ្នូ មុននឹងតុលាការសម្រាករយៈពេលខ្លី។ ក្នុងរយៈពេលនេះគឺមានការអានបទចោទប្រកាន់ពីតុលាការ ការអានសេចក្តីថ្លែងការណ៍ការពារខ្លួនរបស់មេធាវីជនជាប់ចោទនិងការពិនិត្យមើលលើភស្តុតាងជាដើម។ នេះបើតាមសេចក្តីប្រកាសព័ត៌មានរបស់សាលាក្តីខ្មែរក្រហម។ មេដឹកនាំទាំងបួន ដែលបច្ចុប្បន្ននេះមានវ័យចំណាស់ខ្លាំងណាស់ហើយនោះ ត្រូវប្រឈមមុខនឹងការចោទប្រកាន់ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិ។ លោកហ៊ុយ វណ្ណៈ មន្រ្តីអ្នកនាំពាក្យនៃសាលាក្តីខ្មែរក្រហម បានបញ្ជាក់ថា កម្រិតនៃការចាប់អារម្មណ៍លើសំណុំរឿងលេខ០០២មានការកើតឡើងច្រើន បើប្រៀបធៀបនឹងសំណុំរឿងលេខ០០១។ លោកបញ្ជាក់ថា រហូតមកដល់ពេលនេះមានអ្នកចុះឈ្មោះ ចូលរួមស្តាប់អង្គសវនាការជាង១០០០នាក់ហើយ។ «យើងឃើញថាមានការចាប់អារម្មណ៍ច្រើនចំពោះសាធារណជន។ ហើយរហូតមកដល់ពេលនេះ យើងទទួលបានការចុះឈ្មោះជាផ្លូវការគឺជាងមួយពាន់នាក់ហើយសម្រាប់សាធារណជន។ ហើយដំណើរការនៃការចុះឈ្មោះនេះ យើងមិនទាន់បញ្ចប់នៅឡើយទេគឺនឹងបន្តរហូតទៅដល់ថ្ងៃព្រហស្បតិ៍ និងថ្ងៃសុក្រ។ ហើយជាទូទៅសាធារណជនគាត់អញ្ជើញមកដោយមានការចុះឈ្មោះ ឬក្រុមមួយចំនួនទៀត ដែលមិនមកតាមរយៈអង្គការក្រៅរដ្ឋាភិបាលឬស្ថាប័នដែលធ្វើកិច្ចការទាក់ទងនឹងតុលាការនេះគឺលោកអញ្ជើញមកដោយខ្លួនគាត់ផ្ទាល់ តាមមធ្យោបាយគាត់ផ្ទាល់»។ វិទ្យាស្ថានស្រាវជ្រាវអនុវត្តន៍សង្គមនៃកម្ពុជាឱ្យដឹងថា ជនរងគ្រោះពីរបបខ្មែរក្រហមដែលរស់នៅសហរដ្ឋអាមេរិកបានចូលរួមយ៉ាងសកម្មក្នុងសំណុំរឿងលេខ០០២។ ពួកគេបានដាក់ពាក្យបណ្តឹងចំនួន១៧០តាមរយៈវិទ្យាស្ថាននេះ ក្នុងនោះមានអ្នកសុំតាំងខ្លួនជាដើមបណ្តឹងរដ្ឋប្បវេណីចំនួន៤១នាក់។ «អ្វីដែលវិទ្យាស្ថានយើងសម្រេចបានគឺពិតជាការសាទរចំពោះស្មារតីនៃមនុស្សជាតិ ជាការសាទរចំពោះការក្លាហានមិនរាថយដែលអ្នកនៅរស់រានមានជីវិតត្រូវពុះពារដើម្បីយុត្តិធម៌។ ខ្ញុំសូមសរសើរអ្នកនៅរស់រានមានជីវិតរបស់យើង មិនគ្រាន់តែលើសេចក្តីក្លាហានរបស់ពួកគេទេ ក៏ប៉ុន្តែលើការស៊ូទ្រាំរបស់ពួកគេក្នុងការធ្វើជាគម្រូចំពោះជនកម្ពុជាដទៃទៀត កុំឱ្យបោះបង់ការតស៊ូ ហើយសម្រាប់យុវជនជំនាន់ក្រោយពួកគេគួរតែមានមោទនភាព»។ លោកស្រី នូស្ស៊ីន សាការ៉ាទី មេធាវីរបស់មជ្ឈមណ្ឌលសម្រាប់យុត្តិធម៌និងការទទួលខុសត្រូវដែលជាក្រុមមេធាវីតំណាងឱ្យជនរងគ្រោះជាពលរដ្ឋខ្មែរអាមេរិកាំង បានបញ្ជាក់ថា៖ «បញ្ហាដែលគួរឱ្យចាប់អារម្មណ៍សម្រាប់កូនក្តីរបស់យើងខ្ញុំនៅសហរដ្ឋអាមេរិកគឺថា ទោះបីជាពួកគេនៅឆ្ងាយពីប្រទេសកម្ពុជា ពួកគេនៅតែមានរោគសញ្ញានៃជម្ងឺបាក់ស្បាត គឺដូចជាអ្នកដែលនៅប្រទេសកម្ពុជាដែរ។ ការសិក្សាបង្ហាញថា ជនភៀសខ្លួនកម្ពុជាប្រហែល៨៦ភាគរយដែលមកនៅអាមេរិក ក្រោយពីការដួលរលំរបបខ្មែរក្រហមនៅតែរងគ្រោះពីជំងឺបាក់ស្បាតរហូតដល់សព្វថ្ងៃនេះ។ ដូច្នេះទាំងនេះគឺជាអ្វីដែលយើងចង់បញ្ជាក់ប្រាប់តុលាការថា បើទោះបីជាពួកគេមកនៅឆ្ងាយដាច់ស្រយ៉ាលពីប្រទេសកម្ពុជា និងពីទីឧក្រិដ្ឋកម្មក៏ដោយ ក៏អ្វីដែលពួកខ្មែរក្រហមធ្វើចំពោះពួកគេគឺនៅជាប់អារម្មណ៍ពួកគេជានិច្ច»។ លោកស្រីនូស្ស៊ីននឹងធ្វើដំណើរទៅប្រទេសកម្ពុជាជាមួយនឹងកូនក្តីទាំងបីនាក់ដែរហើយលោកស្រីបន្ថែមថា ជាយុទ្ធសាស្រ្តគឺលោកស្រីនឹងជំរុញយ៉ាងណាឱ្យតុលាការទទួលជនរងគ្រោះពីអាមេរិកបានចូលរួមផ្តល់សក្ខីកម្ម យ៉ាងហោចណាស់ក៏បានម្នាក់ដែរ។ ទូទាំងសហរដ្ឋអាមេរិក មានអ្នកដាក់ពាក្យជាដើមបណ្តឹងរដ្ឋប្បវេណីចំនួន៥០នាក់ ក្នុងនោះមានខ្មែរអាមេរិកាំងចំនួន៤៨នាក់និងជនជាតិអាមេរិកាំងចំនួន២នាក់។ នេះបើតាមការបញ្ជាក់របស់មជ្ឈមណ្ឌលសម្រាប់យុត្តិធម៌ និងការទទួលខុសត្រូវ៕ This posting includes an audio/video/photo media file: Download Now |
| តំណាងរាស្ត្រលក្ខខណ្ឌកិច្ចព្រមព្រៀងក្រុងប៉ារីសមិនត្រូវបានអនុវត្ត Posted: 16 Nov 2011 10:20 AM PST ក្នុងបទសម្ភាសន៍ជាមួយវីអូអេ សំឡេងស.រ.អា. លោកគឹម សួរភីរិទ្ធ តំណាងរាស្ត្រគណបក្សសម រង្ស៊ី ពន្យល់ថា មានចំណុចខ្វះខាតជាច្រើនដែលមិនបានបំពេញតាមកិច្ចព្រមព្រៀងទីក្រុងប៉ារីស ដូចជាបញ្ហាសិទ្ធិមនុស្ស សេរីភាពបញ្ចេញមតិ លទ្ធិប្រជាធិបតេយ្យ បញ្ហាព្រំដែន និងប្រព័ន្ធតុលាការដែលមិនឯករាជ្យ។ កិច្ចសម្ភាសន៍នេះធ្វើឡើងកាលពីថ្ងៃទី២៤ ខែតុលា ឆ្នាំ២០១១ អំឡុងពេលលោកគឹម សួរភីរិទ្ធមកស.រ.អា.ចូលរួមខួបលើកទី២០នៃកិច្ចព្រមព្រៀងសន្តិភាពក្រុងប៉ារីស និងជួបអ្នកគាំទ្រគណបក្សប្រឆាំងនេះ។ លោកនិយាយថា «មានតែការផ្លាស់ប្តូរទេ ទើបនាំឲ្យមានលទ្ធិប្រជាធិបតេយ្យពិតប្រាកដនៅប្រទេសកម្ពុជា»។ ទោះជាយ៉ាងណាក្តី លោកបន្ថែមថា ដើម្បីសម្រេចបានជោគជ័យ ការផ្លាស់ប្តូរនេះត្រូវតែធ្វើឡើងដោយអហិង្សា។
This posting includes an audio/video/photo media file: Download Now |
| សហព្រះរាជអាជ្ញារក្សាជំហចោទប្រកាន់ក្នុងសំណុំរឿង០០៣និង០០៤ Posted: 16 Nov 2011 09:20 AM PST សហព្រះរាជអាជ្ញាសាលាក្តីខ្មែរក្រហមភាគីអង្គការសហប្រជាជាតិ លោក អាន់ឌ្រូ ខេយលី (Andrew Cayley) ការពារការចោទប្រកាន់របស់លោក ទោះបីមានការច្រានចោលពីអតីតកម្មាភិបាលខ្មែរក្រហមឬក្រុមជនសង្ស័យក្នុងសំណុំរឿងបន្ថែម០០៣និង០០៤ខ្លះថាពួកគេទទួលរងការចោទប្រកាន់មិនត្រឹមត្រូវពីបទកាប់សម្លាប់ពលរដ្ឋខ្មែរក្នុងសម័យខ្មែរក្រហមនៅទសវត្សរ៍១៩៧០ក្តី។ លោកព្រះរាជអាជ្ញា អាន់ឌ្រូ ខេយលី អះអាងដោយផ្ទុះសំណើចតិចៗថា ការបដិសេធដូច្នេះគឺជារឿងធម្មតា។ «បាទ! សុំសង្កេតមើលចុះ។ ខ្ញុំគិតថា ជាការធម្មតាទេ មនុស្សដែលត្រូវចោទប្រកាន់អំពីបទឧក្រិដ្ឋធ្ងន់ៗ តែងតែបដិសេធពាក្យចោទទាំងនោះ»។ លោក អាន់ឌ្រូ ខេយលីបានថ្លែងដូច្នេះប្រាប់វីអូអេសំឡេងសរអា កាលពីសប្តាហ៍កន្លងទៅក្នុងកិច្ចសម្ភាសជាពិសេសមួយនៅឯសាកលវិទ្យាល័យ Rutgers រដ្ឋNew Jersey សរអាពេលលោកធ្វើបទឧទ្ទេសនាម អំពីរឿងសាលាក្តីខ្មែរក្រហមទៅកាន់ក្រុមនិស្សិត និង សាស្ត្រាចារ្យអាមេរិកាំង។ សំណុំរឿង០០៣និង០០៤មានជនជាប់ចោទ៥នាក់ដែលជាកម្មាភិបាលខ្មែរក្រហមថ្នាក់កណ្តាល។ ជនសង្ស័យទាំងនេះត្រូវគេផ្សាយឈ្មោះឲ្យដឹងក្រោយពីមានការបែកធ្លាយឯកសារសម្ងាត់របស់ តុលាការ។ ជនទាំងនោះមាន លោក ស៊ូ ម៉េត ជាអតីតមេបញ្ជាការកងពល៥០២ទទួលបន្ទុកផ្នែក ទ័ពអាកាសផងដែរ និង លោក មាស មុត មេបញ្ជាការកងពល១៦៤ លោក យឹម ទិត ជាអតីតប្រធាន ស្តីទីភូមិភាគពាយ័ព្យ លោក អោម អាន ឬ តាអាន អនុប្រធានតំបន់មជ្ឈិមនិងអ្នកស្រីអ៊ឹម ចែមគណៈ ស្រុកព្រះនេតព្រះ។ ពួកគេត្រូវចោទប្រកាន់ដោយសហព្រះរាជអាជ្ញាអ.ស.បពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មប្រល័យពូជសាសន៍ និងឧក្រិដ្ឋកម្ម ធ្ងន់ធ្ងរជាច្រើនទៀត ដែលមានការកាប់សម្លាប់ពលរដ្ឋខ្មែរស្លូតត្រង់ជាច្រើនពាន់នាក់ និងជាច្រើនម៉ឺននាក់សម្រាប់ជនសង្ស័យខ្លះនៅចន្លោះឆ្នាំ១៩៧៥ និង ១៩៧៩។ នេះជាការបញ្ជាក់នៃដីកាបញ្ជូនរឿងឲ្យស៊ើបសួរក្នុងសំណុំរឿង០០៣និង០០៤ ឬ ជាឯកសារសម្ងាត់របស់សហព្រះរាជអាជ្ញាផ្ញើជូនសហចៅក្រមស៊ើបអង្កេតកាលពីខែវិច្ឆិកាឆ្នាំ២០០៨ដែលវីអូអេទទួលបាន។ ឯកសារសម្ងាត់ដដែលនោះបានរៀបរាប់ពីតួនាទី ការពាក់ព័ន្ធយ៉ាងលម្អិតរបស់ជនសង្ស័យនីមួយៗ។ ឯកសារដដែលបានបញ្ជាក់ថាអ្នកស្រី អ៊ឹម ចែម អាយុ៦៥ឆ្នាំជាអតីតចៅហ្វាយស្រុកព្រះនេតព្រះនៅក្នុងខេត្តនៅភាគពាយ័ព្យនិងធ្លាប់ជាប្រធានគុកភ្នំត្រយូងដែលមានមនុស្សយ៉ាងតិច៤០.០០០នាក់ស្លាប់។ ដីកាសន្និដ្ឋានរបស់សហព្រះរាជអាជ្ញាដដែល ដែលវីអូអេផ្នែកខេមរភាសាទទួលបានពីប្រភពស្និទ្ធនឹងតុលាការ(ដែលសុំលាក់ឈ្មោះព្រោះជារឿងរសើបនោះ) សហព្រះរាជអាជ្ញាអន្តរជាតិចោទប្រកាន់ជាបឋមថា អ្នកស្រីអ៊ឹម ចែមមានជាប់ទាក់ទិននឹងឧក្រិដ្ឋកម្មជាច្រើនមានដូចជាមនុស្សឃាត ធ្វើទារុណកម្ម ធ្វើទុក្ខបុកម្នេញផ្នែកសាសនាជាពិសេសជនជាតិចាម ឧក្រិដ្ឋកម្មប្រឆាំងមនុស្សជាតិដូចជនសង្ស័យផ្សេងទៀតក្នុងសំណុំរឿង០០៣ និង០០៤។ ក៏ប៉ុន្តែថ្លែងប្រាប់វីអូអេផ្នែកខេមរភាសាកាលពីពាក់កណ្តាលខែកក្កដាឆ្នាំ២០១១ ក្នុងកិច្ចសម្ភាសជាពិសេសដ៏កម្រមួយនៅផ្ទះរបស់អ្នកស្រីនៅក្នុងស្រុកអន្លង់វែងខេត្តឧត្តរមានជ័យអ្នកស្រី អ៊ឹម ចែម បានថ្លែងថាការចោទប្រកាន់អ្នកស្រីថាមានជាប់ទាក់ទិននឹងឧក្រិដ្ឋកម្មនានាសម័យខ្មែរក្រហមគឺជារឿងធ្ងន់ធ្ងរខុសពីការណ៍ពិត ជារឿងចោទសម្លាប់អ្នកស្រីឲ្យអស់ជីវិត។ «អស់ជីវិតដូចថាចោទខ្ញុំគ្រប់គ្រងគុកអី ខ្ញុំអត់បានដឹងផង។ បើអញ្ចឹងព្រះរាជអាជ្ញា នេះថាខ្ញុំនេះប្រព្រឹត្តអំពើអាក្រក់ យក(ខ្ញុំ)ទៅតុលាការ កាត់ទោសអញ្ចឹងទៅ ខ្ញុំមិនត្រូវអស់ជីវិតហើយ»។ អ្នកស្រីអ៊ឹម ចែមបានអះអាងបន្តថាអ្នកស្រីជាអ្នកចូលទៅគ្រប់គ្រងថ្មីគ្មានជាប់ទាក់ទិននឹងអំពើ ឧក្រិដ្ឋកម្មហើយក៏មិនដឹងពីអំពើកាប់សម្លាប់នោះដែរ។ «មូលហេតុដែលខ្ញុំថាអត់ដឹងគឺអត់ដឹងមែន។ តែអ្នកដែលទទួលមុនខ្ញុំគេប្រព្រឹត្តក៏ ខ្ញុំអត់ដឹងព្រោះខ្ញុំទៅពីឆ្ងាយទៅខ្ញុំគិតតែទៅដើម្បីបំផុស ផ្សព្វផ្សាយឲ្យប្រជាជនខំដាំដុះ ខំធ្វើ ខំដកខំស្ទូងដើម្បីចិញ្ចឹមជីវិតកូនចៅតែប៉ុណ្ណឹង។ ភារកិច្ចខ្ញុំមានតែដឹកនាំ ប្រជាជនធ្វើស្រែធ្វើចំការដើម្បីចិញ្ចឹមជីវិតតែប៉ុណ្ណឹង។ ឯរឿងអីទៀតគេធ្វើមុនមកខ្ញុំ អត់ដឹង»។ ជនសង្ស័យម្នាក់ទៀតគឺ តា អាន ឬ អោម អានអាយុ៧៨ឆ្នាំជាអតីតអនុប្រធានតំបន់មជ្ឈិម ឬខេត្តកំពង់ចាមដែលមានមនុស្សជាង១៥០.០០០នាក់ស្លាប់ក្នុងរបបខ្មែរក្រហម។ ជិតពាក់កណ្តាលនៃចំនួននេះជាជនជាតិចាម។ បើយោងតាមដីកាសន្និដ្នានជាសម្ងាត់របស់សហព្រះរាជអាជ្ញាបរទេសដែលវីអូអេខ្មែរទទួលបានពីប្រភពស្និទ្ធនឹងតុលាការខ្មែរក្រហមបានភ្ជាប់លោក អោម អានទៅនឹងបទឧក្រិដ្ឋកម្មនាសម័យនោះ។ តែថ្លែងប្រាប់វីអូអេខ្មែរកាលពីល្ងាចថ្ងៃ២៧ ខែកក្កដា ឆ្នាំ២០១១ ក្នុងកិច្ចសម្ភាសជាពិសេសដ៏កម្រមួយ នៅផ្ទះរបស់លោកនៅក្នុងភូមិមួយជាប់នឹងផ្លូវធំមួយ នៃស្រុកកំរៀង ខេត្តបាត់ដំបង តា អាន បដិសេធ ពីការជាប់ពាក់ព័ន្ធនឹងបទឧក្រិដ្ឋសម័យខ្មែរក្រហមដែលព្រះរាជអាជ្ញាបានចោទប្រកាន់នោះ។ តា អានបានថ្លែងថា លោកមិនព្រួយបារម្ភនឹង តុលាការ និងយមបាលដែលកាត់ទោសមនុស្ស មានបាប និងប្រព្រឹត្តអាក្រក់បន្ទាប់ពីស្លាប់ទៅនោះទេ។ «បច្ចុប្បន្ននេះក៏ខ្ញុំអត់ភ័យនឹងតុលាការ។ ទៅអនាគតទៀត ពេលខ្ញុំស្លាប់ ក៏ខ្ញុំអត់ភ័យនឹងយមបាល។ អត់ភ័យទេ។ បុណ្យឥឡូវខ្ញុំធ្វើ។ សីលខ្ញុំកាន់។ ពីមុនមក ខ្ញុំអត់មានកាប់សម្លាប់។ ខ្ញុំខ្លាចយមបាល? ខ្ញុំអត់ខ្លាចទេ»។ តា អានថ្លែងដូច្នេះដោយយោងថា លោកបានផ្លាស់ពីខេត្តកំពតទៅកាន់កាប់តំបន់មជ្ឈិមនៅកំពង់ចាមដែលមានស្រុកជាច្រើន ដែលរួមមាន ស្រុកព្រៃឈរ ពាមជីកង កំពង់សៀម និងបាធាយ កាលពីចុងឆ្នាំ១៩៧៧។ តា អាននិយាយថា ពេលនោះ គាត់ពុំដឹងថាគេដកប្រជាពលរដ្ឋ ទៅណាអស់នោះទេ។ តា អាន បញ្ជាក់ថា មុនពេលគាត់ទៅដល់តំបន់នោះស្ថិតក្រោមការគ្រប់គ្រងរបស់កែ ពកដែលជាប្រធានភូមិភាគ។ តា អាន បានថ្លែងប្រាប់វីអូអេខ្មែរថា៖ «ខ្ញុំ បើមានសិទ្ធិតវ៉ាដូចខ្ញុំថាអញ្ចឹងគឺខ្ញុំអត់មានបញ្ហាអីទាក់ទិននឹងឃាតកម្មអស់ហ្នឹងទេ។ អត់មានទេដូចខ្ញុំជម្រាបប្រសាសន៍អញ្ចឹងគឺថាពេលដែលខ្ញុំទៅគឺអស់ហើយពីក្រោមរហូតដល់លើនៅតែកែ ពកមួយទេ។ រួចខ្ញុំទៅរៀបចំភូមិ ឃុំថ្មី។ ខ្ញុំមានការទាក់ទិនរឿងអី? អត់»។ នៅពេលសួរបញ្ជាក់តា អានជាថ្មីថាតើពេលគេផ្លាស់គាត់ឲ្យទៅកាន់កាប់តំបន់កំពង់ចាមនោះ ប្រជាពលរដ្ឋត្រូវគេសម្លាប់អស់ក្នុងពេលច្របូកច្របល់នោះមែនឬយ៉ាងណា? តា អានបានបញ្ជាក់ថា៖ «បាទ! គេដោះស្រាយ (សម្លាប់) អស់ហើយ រួចបានខ្ញុំទៅក្រោយ។ ទៅអស់ហើយ។ ខ្ញុំរៀបចំក្រោយ។ នៅតែ កែ ពកមួយ។ ភូមិ ឃុំ ស្រុក តំបន់ រួចខ្ញុំអត់មានទៅប្រឡាក់ប្រឡូសអីទេ។ អាហ្នឹងដែលខ្ញុំចង់តវ៉ាអញ្ចឹងឯង តើខ្ញុំមានបញ្ហាអីទាក់ទិន? ហើយមកដល់ឆ្នាំ១៩៧៧ ឆ្នាំ១៩៧៨ ហើយនឹងឆ្នាំ១៩៧៩អស់ហើយ»។ ជនសង្ស័យម្នាក់ទៀតគឺលោក មាស មុតអាយុ៧១ឆ្នាំជាអតីតមេបញ្ជាការកងពល១៦៤ទទួលបន្ទុកទាហាន ជើងទឹកនៅខេត្តព្រះសីហនុនិងកំពតនៅក្នុងទសវត្សរ៍១៩៧០។ បើតាមដីកាសន្និដ្ឋានដដែល សហព្រះរាជអាជ្ញាអន្តរជាតិចោទប្រកាន់ជាបឋម លើរូបលោកមាស មុតថាមានជាប់ទាក់ទិននឹងឧក្រិដ្ឋកម្មជាច្រើនមានដូចជាការធ្វើមនុស្សឃាត កម្ចាត់ជនសង្ស័យដែលក្បត់បក្សឬអង្គការ ធ្វើទារុណកម្ម ធ្វើទុក្ខបុកម្នេញផ្នែកសាសនា ជាតិសាសន៍ នយោបាយ បញ្ជូនឲ្យគុក ស២១ សម្លាប់ ឬឧក្រិដ្ឋកម្មប្រឆាំងមនុស្សជាតិដូចជនសង្ស័យម្នាក់ទៀតគឺលោក ស៊ូ ម៉េត អតីតមេបញ្ជាការកងពល៥០២ ដែលតុលាការបានចោទប្រកាន់ដូចគ្នាទៅនឹង លោកមាស មុតដែរ។ ដីកាសន្និដ្ឋានដដែលបាន និយាយថាមានមនុស្សជាច្រើនពាន់នាក់ដែលស្លាប់ក្រោមការកាន់កាប់របស់លោក មាស មុត។ ក៏ប៉ុន្តែនៅក្នុងដីការបញ្ជូនរឿងឲ្យស៊ើបសួរលើកទី៣ជាឯកសារសម្ងាត់របស់សហព្រះរាជអាជ្ញា អន្តរជាតិដែលមានចំនួន១១២ទំព័រជាភាសាអង់គ្លេសដែល វីអូអេខេមរភាសាទទួលបានពីប្រភពស្និទ្ធ នឹងតុលាការ សហព្រះរាជអាជ្ញាអន្តរជាតិបានសរសេរពីការទទួលខុសត្រូវរបស់លោក មាស មុត ថាជា ប្រធានគុក វត្តអង់តាញឹម ខេត្តព្រះសីហនុ និងជាប់សង្ស័យពីការកម្ចាត់ ក្រុមមន្ត្រីកងទ័ពក្នុងកងពល ១៦៤ ឯកសារដដែលនោះបានបញ្ជាក់ថាលោក មាស មុត បានទាក់ទងជាលិខិត ទូរស័ព្ទជាប្រចាំ ជាមួយ សុន សេន អតីតរដ្ឋមន្ត្រីក្រសួងការពារជាតិខ្មែរក្រហមដែលកាន់កាប់កងទ័ពទាំងមូល។ ហើយពេលខ្លះទាក់ទងជាមួយប៉ុល ពតនិងមេដឹកនាំជាន់ខ្ពស់របស់ខ្មែរក្រហមផងដែរក្រៅពីបាន បញ្ជាក់ពីការដឹងឮទាំងអស់ទាក់ទងនឹងការចាប់ខ្លួន ការបញ្ជូនខ្លួនទៅកាន់គុក ស២១។ ឯកសារដដែលបានបញ្ជាក់ថា៖ «ជាផ្នែកមួយនៃការសម្លាប់ក្នុងកងពល១៦៤ លោក មាស មុត បានចាប់កងទ័ពនៃកងពល១៦៤ និង បញ្ជូនពួកគេទៅកាន់គុកស ២១ ដែលជនទាំងនោះត្រូវគេឃុំ គេធ្វើទារុណកម្មហើយនឹងសម្លាប់ ទៀតផងនៅទីបំផុត។ កងទ័ពជិត៤០០នាក់មកពីកងពល១៦៤ត្រូវចាប់ខ្លួន ហើយបញ្ជូនទៅគុកស២១ ដោយលោក មាស មុត»។ ប៉ុន្តែនៅពេលថ្លែងប្រាប់វីអូអេផ្នែកខេមរភាសាកាលពីពាក់កណ្តាលខែកក្កដាឆ្នាំ២០១១ ក្នុងកិច្ចសម្ភាសជាពិសេសមួយនៅផ្ទះរបស់លោកនៅក្នុងស្រុកសំឡូតខេត្តបាត់ដំបងលោក មាស មុត អះអាងថាលោកពុំជាប់ពាក់ព័ន្ធបទឧក្រិដ្ឋកម្មដូចការចោទប្រកាន់របស់សហព្រះរាជអាជ្ញានៃតុលាការខ្មែរក្រហមនោះទេ។ លោក ថ្លែងថាមិនបានដឹងពីឧក្រិដ្ឋកម្មកើតឡើងទេព្រោះនៅកន្លែងលោកគ្មានប្រជាពលរដ្ឋទេមានតែទាហាន។ តែលោកទទួលស្គាល់ថាអង្គភាពរបស់លោក មានការកើតឡើងមួយករណីឬពីរករណីដែរ ពេលសេនាធិកាជាថ្នាក់លើបានចាត់វិធានការ។ «ដែលខ្ញុំថាអាចមានខ្លះតាមវិធីអញ្ចេះ ខាងសេនាធិការគេហៅឲ្យទៅរៀនសូត្រ។ ដល់រួចទៅគេប្រាប់ មកអង្គភាពវិញថាឈ្មោះនេះៗ ប៉ុន្មាននាក់នេះគេមិនឲ្យត្រឡប់ទៅអង្គភាពវិញទេ។ ហើយខាង សេនាធិការគេបញ្ជូនទៅស ២១ទៅ។ ហើយខាងអង្គភាពអត់ដឹងថារឿងហ្នុងវាយ៉ាងម៉េចអីយ៉ាង ម៉េចទេ។ នេះខ្ញុំនិយាយពីអង្គភាពដែលខ្ញុំទទួលខុសត្រូវមានបញ្ហាហ្នឹងខ្លះ មួយករណី ពីរករណី»។ ទោះជាមានការបដិសេធពីក្រុមជនសង្ស័យដូច្នេះមែនតែលោក ព្រះរាជអាជ្ញា Andrew Cayley ដែល ការិយាល័យរបស់លោកជាអ្នកចោទប្រកាន់អតីតកម្មាភិបាលខ្មែរក្រហមទាំងនេះបានថ្លែងទៀតថា៖ «ខ្ញុំគិតថារឿងទាំងនេះ ជាញឹកញយអាចដោះស្រាយបាននៅក្នុងតុលាការ ពីព្រោះនឹងមានសវនាការ មួយស្តីពីភស្តុតាង បុគ្គលម្នាក់នឹងមានអ្នកការពារ។ ដូច្នេះអ្នកជាប់ចោទនឹងមានមេធាវីការពារម្នាក់ ដែលអាចសួរចម្លើយកសិណសាក្សី ដោយសួរពួកគេថាតើអ្នកជាប់ចោទនេះ បាននិយាយអ្វីខ្លះជាមួយអ្នក «នែ៎ ខ្ញុំមិនទទួលខុសត្រូវក្នុងរៀងនេះទេ។ ខ្ញុំមិនបានប្រព្រឹត្តទេ។ ខ្ញុំមិនបានដឹងរឿងនេះទេ»។ ក្រោយមកចៅក្រមសម្រេចថាតើ ជននោះជាអ្នកទទួលខុសត្រូវឬមិនទទួលខុសត្រូវ។ តែខ្ញុំគិតថា នៅក្នុងអាជីពរបស់ខ្ញុំ ខ្ញុំមិនអាចចាំបានរឿងក្តីណាមួយទេ លើកលែងតែសំណុំរឿង ឌុច ចេញ គឺថាគ្រប់សំណុំរឿងទាំងអស់ដែលខ្ញុំប្តឹងឡើងតុលាការ ជនជាប់ចោទបានអះអាងដូចៗគ្នា ថាពួកគេមិនជាអ្នកទទួលខុសត្រូវទេ»។ លោក Cayley បានថ្លែងដែរថាមានភស្តុតាង សាក្សីច្រើនណាស់ដែលបន្សល់ទុកពីរបបខ្មែរក្រហម ដែលគាំទ្រការចោទប្រកាន់របស់លោក ឲ្យក្លាយជាសំណុំរឿងដ៏រឹងមាំ។ នេះបើតាមការបញ្ជាក់ របស់លោក Cayleyឆ្លើយតបទៅនឹងសំណុំរឿង០០២ ឬសំណុំរឿងមេដឹកនាំខ្មែរក្រហមកំពូលៗ៤នាក់ដែលត្រៀមប្រឈមមុខនឹងការកាត់ទោសនៅចុងខែនេះ។ «ខ្ញុំមិនអាចនិយាយថាជាចន្លោះដ៏ធំទេ។ ខ្ញុំមានន័យថាសំណុំរឿងនេះមានទម្ងន់ណាស់ដើម្បីតតាំង ជាមួយជនជាប់ចោទទាំងនេះពីព្រោះតែទំហំនៃបទឧក្រិដ្ឋដែលគេប្រព្រឹត្ត។ មានភស្តុតាងជាខ្សែភាព យន្តដែលភ្ជាប់ពួកគេនឹងបទឧក្រិដ្ឋនៅនឹងកន្លែង រួមទាំងការបោះពុម្ភផ្សាយជាច្រើននៃរបបខ្មែរក្រហមផង ហើយរួមទាំងភស្តុតាងជាឯកសារដែលគេបានឃើញផង។ លោកដឹងទេ យើងបាន និយាយសំអាងលើមជ្ឈមណ្ឌលឯកសារកម្ពុជា។ ខ្ញុំមានន័យថាមជ្ឈមណ្ឌល នេះមាន ឯកសារជិត ៥ម៉ឺនកើតចេញពីអំឡុងពេលនោះដែលបង្កើតជាភស្តុតាងពាក់ព័ន្ធដែលយើងកំពុងនិយាយ។ ជាអវសាន រឿងនេះសម្រេចលើចៅក្រមក្នុងការសម្រេចថាតើបុគ្គលទាំងបីនេះមានជាប់ទាក់ទងនឹង បទឧក្រិដ្ឋឬទេ។ គេគ្មានទោសរហូតទាល់តែមានភស្តុតាងដាក់ទោស។ ក្រុមរដ្ឋអាជ្ញាយើងហៅថាភស្តុតាងដាក់បន្ទុក។ យើងត្រូវតែផ្តល់ភស្តុតាងអំពីបទឧក្រិដ្ឋ និងការជាប់ពាក់ព័ន្ធរបស់ពួកគេ ដល់ពួកគេដោយមានភស្តុតាងជាក់ច្បាស់។ក៏ប៉ុន្តែ ខ្ញុំមានក្តីសង្ឃឹមថាយើងនឹងផ្តល់ភស្តុតាងបញ្ជាក់បានពីសំណុំរឿងយើងនៅក្នុងពេលសវនាការ»។ ចំណែកជនសង្ស័យ២នាក់ផ្សេងទៀតនៃសំណុំរឿងបន្ថែមគឺលោក យឹម ទិត និង លោក ស៊ូ ម៉េតដែលជាមន្ត្រីយោធាជាន់ខ្ពស់ក្នុងរដ្ឋាភិបាលមិនបានឆ្លើយតបនឹងការសុំធ្វើកិច្ចសម្ភាសរបស់វីអូអេទេ។ទោះបីជាយ៉ាងណាក៏ដោយជនសង្ស័យទាំងនាក់ទៀតក្នុងសំណុំរឿង០០៣/០០៤ គឺស្ថិតក្នុងដៃ សហ ចៅក្រមស៊ើបអង្កេតដែលត្រូវសម្រេចថា នឹងចាប់ខ្លួនមកឃុំបណ្តោះអាសន្ន ស៊ើបអង្កេត ឬក៏មិនធ្វើ តាមសហព្រះរាជអាជ្ញាបរទេស។ សហព្រះរាជអាជ្ញា បរទេសបានស្នើឲ្យសហចៅក្រមស៊ើបអង្កេតចាប់ឃុំខ្លួនជនសង្ស័យក្នុងសំណុំរឿងបន្ថែមឬសំណុំរឿង០០៣/០០៤ តាំងពីខែវិច្ឆិកាឆ្នាំ២០០៨ម៉្លេះ នៅក្នុងដីកាបញ្ជូនរឿងឲ្យស៊ើបសួរចុងក្រោយ។ ក៏ប៉ុន្តែសហចៅក្រមស៊ើបអង្កេតពុំបានធ្វើតាមនោះទេ រហូតទាល់តែមានការលាឈប់ពីមុខតំណែងរបស់សហចៅក្រមស៊ើបអង្កេត Siegfried Blunkដោយចោទថាមានការជ្រៀតជ្រែកផ្នែកនយោបាយធ្វើឱ្យលោកមិនអាចបំពេញកិច្ចការបាន។ សំណុំរឿង០០៣និង០០៤គឺជាសំណុំរឿង ដ៏ចម្រូងចម្រាសពេលដែលចៅក្រមនិងព្រះរាជអាជ្ញាជាតិមានជំហរដូចរដ្ឋាភិបាលកម្ពុជាដែលមិនចង់ឃើញជនសង្ស័យណាផ្សេងទៀតត្រូវគេនាំយកមកជុំនំជម្រះទោស។ ការសម្រេចរបស់រដ្ឋាភិបាល គឺឈរលើសន្តិភាព ការបង្រួបបង្រួមជាតិ ដែលផ្ទុយពីភាគីអ.ស.បដែលអះអាង តាមច្បាប់ថាជនទាំងឡាយណាដែលប្រព្រឹត្តបទឧក្រិដ្ឋត្រូវតែនាំយកមកកាត់ទោស។ ក្រៅពីបានជំនុំជម្រះទោសប្រធានគុកទួលស្លែងខ្មែរក្រហម កាំង ហ្កេកអ៊ាវ ហៅឌុចឬសំណុំរឿង០០១ នោះ សាលាក្តីកាត់ទោសខ្មែរក្រហមដែលចំណាយលុយអស់ជិត២០០លានដុល្លារ គ្រោងនឹងចាប់ផ្តើម កាត់ទោសអតីតមេដឹកនាំជាន់ខ្ពស់នៃរបបខ្មែរក្រហម៤នាក់នៅចុងខែវិច្ឆិកានេះពីបទជាប់សង្ស័យ ថាមានពាក់ព័ន្ធនឹងការកាប់សម្លាប់ពលរដ្ឋខ្មែរស្លូតត្រង់ជិត២លាននាក់ក្នុងទសវត្សរ៍១៩៧០។ ជនជាប់ចោទ ទាំងនោះមាន នួន ជា បងធំទី២ ខៀវ សំផន ប្រមុខរដ្ឋ អៀង សារី រដ្ឋមន្ត្រីការបរទេស និង អ្នកស្រីអៀង ធីរិទ្ធ រដ្ឋមន្ត្រីសង្គមកិច្ចការងារ៕ This posting includes an audio/video/photo media file: Download Now |
| ព័ត៌មានអន្តរជាតិ៖ ១៦ វិច្ឆិកា Posted: 15 Nov 2011 10:33 PM PST ព័ត៌មានចុងក្រោយបំផុត៖ ស.រ.អា៖ ក្រុមមេដឹកនាំស.រ.អានិងអូស្ត្រាលី បានប្រកាសអំពីកិច្ចព្រមព្រៀងដើម្បីទុកកងទ័ពស.រ.អានៅលើទឹកដីអូស្រ្តាលី។ ចិន៖ ប្រទេសចិនឲ្យដឹងថា សេចក្ដីសម្រេចរបស់ស.រ.អាចង់ពង្រីកវត្ដមានយោធារបស់ខ្លួននៅប្រទេសអូស្រ្តាលីគួរពិនិត្យមើលឲ្យបានទូលំទូលាយថែមទៀត ហើយអាចមិនត្រឹមត្រូវ។ ស៊ិរី៖ ក្រុមសកម្មជនជំទាស់ស៊ិរីនិយាយថាក្រុមអ្នករត់ចោលជួរកងទ័ពបានវាយប្រហារមូលដ្ឋានយោធានៅជិតរដ្ឋធានី Damasque ដែលទំនងជាការបះបោរ៨ខែដែលកើនឡើងប្រឆាំងរដ្ឋាភិបាលអត្ដធិបតេយ្យរបស់លោកប្រធានាធិបតី Bashar al-Assad នៃប្រទេស ស៊ិរី។ អាហ្វហ្កាននិស្ថាន៖ លោកប្រាធានាធិបតី Hamid Karzai នៃប្រទេស អាហ្វហ្កាននិស្ថាននិយាយថាប្រទេសរបស់លោកចង់យកអធិបតេយ្យភាព ហើយនឹងការបញ្ចប់ការវាយប្រហារនៅពេលយប់ធ្វើជាលក្ខខណ្ឌសម្រាប់ភាពជាដៃគូគ្នាខាងយុទ្ធសាស្ដ្រជាមួយស.រ.អា ។ យោងតាមលក្ខខណ្ឌនេះ កងទ័ពស.រ.អាខ្លះនឹងស្ថិតនៅក្នុងប្រទេស អាហ្វហ្កាននិស្ថាន។ ប៉ាគិស្ថាន៖ ក្រុមមន្ដ្រីស៊ើបការណ៍សម្ងាត់និយាយថា គេសង្ស័យថាការទម្លាក់គ្រាប់បែករបស់យន្ដហោះគ្មានអ្នកបើករបស់ស.រ.អាឬ droneនៅក្នុងប្រទេស ប៉ាគិស្ថានភាគពាយ័ព្យបានសម្លាប់ពួកសកម្មប្រយុទ្ធយ៉ាងតិច១៦នាក់។ អ៊ឺរ៉ុប៖ ក្រុមមេដឹកនាំនៃប្រទេសអ៊ីតាលី និងក្រិក ដែលទើបតែជាប់ឆ្នោតថ្មីកំពុងតែប្រឈមនឹងបទពិសោធន៍សំខាន់លើសលប់ ខណ: ដែលអស់លោកខំប្រឹងប្រែងជួយតំបន់ប្រើប្រាក់អ៊ឺរ៉ូ ចេញពីមហន្ដរាយសេដ្ឋកិច្ចដែលហៀបតែនឹងកើតឡើង។ ស.រ.អា៖ ក្រុមអ្នកតវ៉ាចលនាកាន់កាប់ Wall street បានទទួលការអនុញ្ញាតទៅកាន់សួនឧទ្យាន នៅទីក្រុង New Yorkដែលពួកគេត្រូវបានបណ្ដេញចេញនៅព្រឹកថ្ងៃអង្គារ ប៉ុន្ដែមិនអាចបោះតង់នៅថ្ងៃអង្គារទេ។ អាស៊ាន៖ ក្រុមរដ្ឋមន្ដ្រីក្រសួងការទេសនៃសមាគម ASEANផ្ដោតអារម្មណ៍លើបញ្ហាសន្ដិសុខតំបន់ នៅកិច្ចប្រជុំរបស់អស់លោកនៅប្រទេសឥណ្ឌូនេស៊ីនៅថ្ងៃពុធ។ ហ្វីលីពីន៖ ស.រ.អាឲ្យដឹងនៅថ្ងៃពុធថា គួរមានដំណោះស្រាយគ្នាអំពី ជម្លោះដណ្ដើមដែនសុទ្រនៅសមុទ្រចិនខាងត្បូងយោងតាមច្បាប់អន្ដរជាតិនៃសន្ធិសញ្ញាដែនសមុទ្រ ដែលជាឥរិយាបទដែលគាំទ្រប្រទេសហ្វីលីពីនក្នុងជម្លោះជាមួយប្រទេសចិន។ ហ្វីលីពីន៖ លោកស្រី Gloria Arroyo អតីតប្រធានាធិបតីហ្វីលីពីនគ្រោងធ្វើដំណើរដើម្បីព្យាបាលខ្លួន មួយថ្ងៃក្រោយពីរដ្ឋាភិបាលមិនធ្វើតាមបទបញ្ជារបស់តុលាការ ហើយបានរារាំងខ្ទប់ដំណើររបស់លោកស្រី។ <!--AV--> ព័ត៌មាននៅពេលមុននេះ៖ <!--IMAGE-RIGHT--> ភូមា ៖ រដ្ឋមន្រ្តីក្រសួងការបរទេសភូមិភាគអាស៊ីអាគ្នេយ៍បានផ្តល់ការយល់ព្រមការស្វះស្វែងរបស់ភូមាធ្វើជាប្រធានសមាគមប្រទេសជាតិអាស៊ីអគ្នេយ៍ក្នុងឆ្នាំ២០១៤។ ភូមា ៖ ក្រុមអង្គការសិទ្ធិមនុស្សកំពុងសម្តែងនូវការសង្ស័យលើការអះអាងរបស់គណកម្មការសិទ្ធិមនុស្សថ្មីរបស់ភូមាថាអ្នកទោស៣រយនាក់នៃអ្នកទោសនយោបាយទាំងអស់ចំនួន៣ពាន់នាក់ស្ថិតនៅគុកនៅឡើយនោះ។ ស៊ីរី ៖ ក្រុមអង្គការសិទ្ធិមនុស្សស៊ីរីប្រាប់ឲ្យដឹងថាកងកម្លាំងសន្តិសុខស៊ីរីបានសម្លាប់មនុស្សជាង៨០នាក់ក្នុងរយៈពេល២៤ម៉ោងចុងក្រោយនេះ ដោយធ្វើឲ្យការសម្លាប់នេះក្លាយជាការស្លាប់ដ៍ច្រើនបំផុតក្នុងការបះបោររយៈពេល៨ខែប្រឆាំងប្រធានាធិបតី Bashar al – Assad។ អាហ្វហ្គានីស្ថាន ៖ មន្រ្តីអាហ្គានីស្ថាននិយាយថាអង្គការមូលនិធិរូបីប័ណ្ណអន្តរជាតិ ( IMF) បានឈោងដល់កិច្ចព្រមព្រៀងមួយដើម្បីស្តារកម្មវិធីឥណទានសម្រាប់ប្រទេសអាហ្គានីស្ថាន ជាងរយៈពេលមួយឆ្នាំបន្ទាប់ពីប្រទេសនោះបានបាត់ប្រាក់អន្តរជាតិរាប់លានដុល្លាបណ្តាលមកពីរឿងអាស្រូវធនាគារក្រុងកាប៊ុល។ អ៊ីរ៉ាក់ ៖ មន្រ្តីយោធាកំពូលសហរដ្ឋអាមេរិកម្នាក់និយាយថា លោកមានការព្រួយកង្វល់អំពីអនាគតអ៊ីរ៉ាក់បន្ទាប់ពីការដកកងទ័ពសហរដ្ឋអាមេរិកចេញពីប្រទេសនោះ។ អ៊ីតាលី ៖ សេដ្ឋកិច្ចតំបន់ចាយប្រាក់ Euro រីកចម្រើនតិចតួចបំផុតពីខែកក្កដាដល់ខែកញ្ញាដែលបណ្តាលមកពីវិបត្តិហិរញ្ញវត្ថុដ៍ធ្ងន់ធ្ងរនៃប្រទេសក្រិកនិងប្រទេសអ៊ីតាលី។ សហរដ្ឋអាមេរិក ៖ អភិបាលក្រុងញូយ៉ក Michael Bloomberg មានប្រសាសន៍ថាពួកបាតុករនៃចលនាកាន់កាប់ Wall Street នឹងត្រូវអនុញ្ញាតិឲ្យវិលត្រឡប់ទៅកាន់សួនឧទ្យាននៅកណ្តាលក្រុងវិញ ជាទីកន្លែងពួកគេបានបោះជំរុំអស់រយៈពេល២ខែ តែពួកគេនឹងមិនអនុញ្ញាតិឲ្យយកតង់ស្នាក់នៅឬស្បោងសម្រាប់ដេកទៅជាមួយទេ។ សហរដ្ឋអាមេរិក ៖ ការលក់ទំនិញរាយរបស់សហរដ្ឋអាមេរិក បានកើនឡើងយឺតៗក្នុងខែតុលា ដោយមកពីការចំណាយរបស់ពួកអ្នកប្រើប្រាស់ទំនិញបានឡើងជាមធ្យមដែលធ្វើឲ្យសេដ្ឋកិច្ចសហរដ្ឋអាមេរិកមានសកម្មភាពបំផុត។ សហរដ្ឋអាមេរិក ៖ ប្រធានាធិបតីសហរដ្ឋអាមេរិក បារ៉ាក់ អូបាម៉ា កំពុងធ្វើតំណើរទៅកាន់ប្រទេសអូស្រ្តាលីដែលជាតំណើរបំពេញទស្សនៈកិច្ចដែលបានពន្យាពេលជាយូរយាមកហើយដើម្បីពិភាក្សាការព្រួយកង្វល់ខាងសេដ្ឋកិច្ចនិងសន្តិសុខ។ ឥណ្ឌានិងប៉ាគីស្ថាន៖ បានព្រមព្រៀងគ្នាធ្វើឲ្យពាណិជ្ជកម្មមានភាពជាប្រក្រតីឡើងវិញ ដែលជាទំនាក់ទំនងដ៍សំខាន់រវាងគូប្រកួតប្រជែងបរមាណូទាំងពីរ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
