VOA News: ព័ត៌មាន: “ស្ត្រីកម្ពុជាបម្រើការនៅម៉ាឡេស៊ី ត្រូវរងនូវការកេងប្រវ័ញ្ច រំលោភបំពាន” plus 5 more |
- ស្ត្រីកម្ពុជាបម្រើការនៅម៉ាឡេស៊ី ត្រូវរងនូវការកេងប្រវ័ញ្ច រំលោភបំពាន
- ប្រជាជនបុរីកីឡាបាតុកម្មទាមទារឲ្យក្រុមហ៊ុមផានអ៊ីម៉ិចសាងសង់ផ្ទះសម្រាប់ពួកគេតាមកិច្ចសន្យា
- អ្នកសង្កេតការណ៍សាលាក្តីខ្មែរក្រហមមានមតិផ្សេងគ្នាអំពីមុខនាទីសាលាក្តី
- ព័ត៌មានអន្តរជាតិ៖ ០១ វិច្ឆិកា
- ឧត្តមសេនីយ៍ពីរនាក់ និងជនសង្ស័យត្រូវចាប់ខ្លួនដោយសង្ស័យពីបទជួញដូរថ្នាំញៀន
- តុលាការខេត្តបន្ទាយមានជ័យបើកសវនាការរឿងបាក់បង្គោលព្រំដីរបស់សុរិយោដី
| ស្ត្រីកម្ពុជាបម្រើការនៅម៉ាឡេស៊ី ត្រូវរងនូវការកេងប្រវ័ញ្ច រំលោភបំពាន Posted: 01 Nov 2011 11:30 AM PDT អង្គការឃ្លាំមើលសិទ្ធិមនុស្សអន្តរជាតិ HRWបាននិយាយនៅថ្ងៃអង្គារនេះថា ស្ត្រីកម្ពុជាបម្រើការតាមផ្ទះរាប់ពាន់នាក់ នៅក្នុងប្រទេសម៉ាឡេស៊ី ត្រូវបានទទួលរងនូវការកេងប្រវ័ញ្ចកម្លាំងពលកម្ម ការធ្វើទារុណកម្ម ការរំលោភបំពានសិទ្ធិការងារ និងការរំលោភផ្លូវភេទពីថៅកែរបស់ខ្លួន។ លោក James Ross នាយកផ្នែកកិច្ចការច្បាប់ និងគោលនយោបាយនៅអង្គការឃ្លាំមើលសិទ្ធិមនុស្ស HRW ដែលមានមូលដ្ឋានក្នុងបូរីញូយ៉ក បានថ្លែងប្រាប់សន្និសីទកាសែត នៅសណ្ឋាគារ កាំបូឌីយ៉ាណាយ៉ាងដូច្នេះថា «ថ្ងៃនេះ អង្គការឃ្លាំមើលសិទ្ធិមនុស្ស HRW ចេញផ្សាយរបាយការក្រោមចំណងជើងថា "ពួកគេបោកប្រាសយើងគ្រប់ជំហ៊ាន៖ ការរំលោភលើពលករស្ត្រីកម្ពុជាបម្រើការតាមផ្ទះ ដែលធ្វើចំណាកស្រុកទៅកាន់ប្រទេសម៉ាឡេស៊ី"»។ លោកស្រី Jyotsna Poudyal អ្នកចងក្រងរបាយការនេះ បានបញ្ជាក់តាមសម្តីដើមថា៖ «អ្វីដែលយើងបានរកឃើញគឺថា ពលករជួបប្រទះនឹងការរំលោភបំពានគ្រប់ជំហ៊ាននៃរយៈពេលទេសន្តប្រវេសន៍ចាប់ផ្តើម ពីការចាប់ផ្តើមដំបូង នៅពេលដែលមានការជ្រើសរើសនៅតាមភូមិរហូតដល់ធ្វើដំណើរមកដល់មជ្ឈមណ្ឌលបណ្តុះបណ្តាលរហូតដល់ប្រទេសម៉ាឡេស៊ី និងនៅពេលត្រឡប់មកកម្ពុជាវិញ»។ អង្គការឃ្លាំមើលសិទ្ធិមនុស្ស HRW បានរកឃើញថា ស្ត្រី និងកុមារីកម្ពុជាជាច្រើនពាន់នាក់ ដែលទៅបម្រើការតាមផ្ទះនៅប្រទេសម៉ាឡេស៊ី ទទួលបាននូវការការពារបន្តិចបន្តួចពីការបង្ខាំងខ្លួននៅក្នុងមណ្ឌល ពីបន្ទុកបំណុលដ៏ធ្ងន់ធ្ងរ និងពីលក្ខខណ្ឌការងារមានលក្ខណៈកេងប្រវ័ញ្ច។ របាយការនេះបានបញ្ជាក់ថា ស្ត្រី និងកុមារីកម្ពុជាបម្រើការតាមផ្ទះជាច្រើននាក់ នៅក្នុងប្រទេសម៉ាឡេស៊ីធ្វើការពី១៤ម៉ោងទៅ២១ម៉ោងក្នុងមួយថ្ងៃ ដោយគ្មានពេលឈប់សម្រាក ឬថ្ងៃឈប់សម្រាកនោះទេ ហើយពលករជាច្រើននាក់ទៀតត្រូវបានគេបង្ខាំងឱ្យនៅកន្លែងធ្វើការ មិនបានទទួលអាហារគ្រប់គ្រាន់ មិនបានទទួលប្រាក់ខែពេញលេញ និងទទួលរងនូវការរំលោភលើរាងកាយ និងរំលោភដោយពាក្យសម្តី ហើយអ្នកខ្លះទៀតត្រូវបានថៅកែរំលោភខាងផ្លូវភេទ។ របាយការនេះ ដែលបានធ្វើឡើងផ្អែកលើបទសម្ភាសន៍ចំនួន៨០លើក ជាមួយពលករចំណាកស្រុកធ្វើការតាមផ្ទះ គ្រួសាររបស់ពួកគេ មន្ត្រីរដ្ឋាភិបាល អង្គការមិនមែនរដ្ឋាភិបាល និងទីភ្នាក់ងារជ្រើសរើសពលករ បានបង្ហាញពីឧបសគ្គមួយចំនួនដែលបានធ្វើឱ្យស្ត្រី និងកុមារីទទួលរងការធ្វើបាប មិនទទួលបានយុត្តិធម៌ និងមិនមានការដោះស្រាយក្នុងប្រទេសកម្ពុជា និងនៅប្រទេសម៉ាឡេស៊ី។ អង្គការឃ្លាំមើលសិទ្ធិមនុស្សអន្តរជាតិ HRW បាននិយាយនៅក្នុងសេចក្តីថ្លែងការណ៍ថា រដ្ឋាភិបាលកម្ពុជាត្រូវបង្កើតច្បាប់ទូលំទូលាយមួយស្តីពីពលករចំណាកស្រុក ត្រូវពង្រឹងការឃ្លាំមើលទីភ្នាក់ងារជ្រើសរើសពលករ និងដាក់ទោសជាចាំបាច់ ខណៈដែលមានការរំលោភកើតឡើង។ អង្គការឃ្លាំមើលសិទ្ធិមនុស្សអន្តរជាតិ HRW បានជំរុញឱ្យប្រទេសកម្ពុជា និងម៉ាឡេស៊ីផ្តល់សច្ចាប័នលើអនុសញ្ញារបស់អង្គការពលកម្មអន្តរជាតិស្តីពីការងារតាមផ្ទះ។ សន្ធិសញ្ញានេះតម្រូវឱ្យរដ្ឋាភិបាលត្រូវធានាឱ្យមានលក្ខខណ្ឌការងារសមស្រប កំណត់អាយុអប្បបរិមាសម្រាប់ពលករធ្វើការតាមផ្ទះ និងការពារពលករធ្វើការតាមផ្ទះឲ្យរួចពីអំពើហិង្សា និងការអនុវត្តការជ្រើសរើសបែបកេងប្រវ័ញ្ច។ របាយការនេះបានរកឃើញថា តាំងពីឆ្នាំ២០០៨មក ស្ត្រី និងកុមារីកម្ពុជា៤០០០ទៅ៥០០០នាក់ បានធ្វើចំណាកស្រុកទៅកាន់ប្រទេសម៉ាឡេស៊ី ជាអ្នកធ្វើការតាមផ្ទះ។ ទីភ្នាក់ងារជ្រើសរើសពលករមួយចំនួននៅកម្ពុជាបានក្លែងឯកសារអត្តសញ្ញាណ ដើម្បីជ្រើសរើសកុមារ និងផ្តល់គ្រឿងទាក់ទាញទឹកចិត្ត ជាប្រាក់ និងអាហារ ដែលនាំឱ្យពលករចំណាកស្រុក និងគ្រួសាររបស់ពួកគេជំពាក់បំណុលយ៉ាងធ្ងន់ធ្ងរ ធ្វើឱ្យពួកគេយល់ខុសពីការទទួលខុសត្រូវចំពោះការងាររបស់ពួកគេនៅក្នុងប្រទេសម៉ាឡេស៊ី និងយកថ្លៃឈ្នួលជ្រើសរើសច្រើនហួសប្រមាណ។ លោកអាន ប៊ុនហាក់ ប្រធានសមាគមភ្នាក់ងារជ្រើសរើសពលករកម្ពុជា បានថ្លែងប្រាប់ក្រុមអ្នករាយការណ៍ព័ត៌មាន នៅសណ្ឋាគារ កាំបូឌីយ៉ាណាថា សមាគមនឹងទទួលយកចំណុចមួយចំនួនរបស់អង្គការឃ្លាំមើលសិទ្ធិមនុស្សអន្តរជាតិ HRW មកធ្វើការពិចារណា។ «យើងឃើញថា អនុសាសន៍មួយចំនួន ដែលផ្តល់ដោយអង្គការឃ្លាំមើលសិទ្ធិមនុស្សអន្តរជាតិ HRW ទៅលើសមាគមភ្នាក់ងារជ្រើសរើសពលករកម្ពុជា គឺជាអនុសាសន៍ល្អ ហើយខ្ញុំនឹងបញ្ចូលអនុសាសន៍នេះចូលទៅជាយុទ្ធសាស្ត្រ និងផែនការអនុវត្តរបស់សមាគមភ្នាក់ងារជ្រើសរើសពលករកម្ពុជា ដើម្បីធ្វើយ៉ាងណាឲ្យយើងអាចពង្រឹងយន្តការការពារពលកររបស់យើងបន្ថែមទៀត ដែលទៅធ្វើការនៅក្រៅប្រទេស»។ លោកស្រី មូរ សុខហួរ តំណាងរាស្ត្រគណបក្សសម រង្ស៊ី បានថ្លែងប្រាប់ក្រុមអ្នករាយការណ៍ព័ត៌មាន នៅសណ្ឋាគារ កាំបូឌីយ៉ាណាថា៖ «បាយការណ៍នេះជាផែនទីបង្ហាញផ្លូវសម្រាប់រដ្ឋាភិបាលចាត់វិធានការឱ្យបានខ្លាំងក្លា។ របាយការនេះគួរតែធ្វើឱ្យរដ្ឋាភិបាលរិតតែភ្ញាក់រឭក ដើម្បីកែស្ថានការណ៍នេះវិញ។ ខ្ញុំសង្ឃឹមថា ក្រសួងការងារនឹងយករបាយការនេះទៅមើល។ ខ្ញុំសង្ឃឹមថា សមាគមភ្នាក់ងារជ្រើសរើសពលការិនីទៅបរទេសនឹងយករបាយការនេះទៅមើល ពីព្រោះនេះជារបាយការពិត។ នេះជាសម្រែក និងជីវិតពិតៗ»។ លោកហូ វុទ្ធី អនុប្រធាននាយកដ្ឋានការងារនៃក្រសួងការងារ បានបញ្ជាក់យ៉ាងដូច្នេះថា៖ «បើគាត់ចង់ជួយរដ្ឋាភិបាលដោះស្រាយបញ្ហាឱ្យបានពិតប្រាកដ គាត់ទាល់តែយកឯកសារជាក់ស្តែងមកសហការជាមួយរដ្ឋាភិបាលដើម្បីចាត់វិធានការ»។ លោកហូ វុទ្ធីបានបញ្ជាក់ថា រដ្ឋាភិបាលប្រហែលពិចារណាការចុះហត្ថលេខាលើអនុសញ្ញារបស់អង្គការពលកម្មអន្តរជាតិស្តីពីការងារតាមផ្ទះ ទៅតាមអ្វីដែលអាចធ្វើបាន៕ This posting includes an audio/video/photo media file: Download Now |
| ប្រជាជនបុរីកីឡាបាតុកម្មទាមទារឲ្យក្រុមហ៊ុមផានអ៊ីម៉ិចសាងសង់ផ្ទះសម្រាប់ពួកគេតាមកិច្ចសន្យា Posted: 01 Nov 2011 11:17 AM PDT អ្នកភូមិ១២នៃប្លុកបូរីកីឡា ក្រុងភ្នំពេញប្រមាណជិត១០០នាក់ ដែលអះអាងថា តំណាងឲ្យអ្នកគ្មានចំណែកផ្ទះចំនួន៣៧៦គ្រួសារ បានធ្វើការតវ៉ានៅថ្ងៃអង្គារនេះនៅមុខសាលាខណ្ឌ ៧មករា ក្រុងភ្នំពេញ ដើម្បីទាមទារឲ្យក្រុមហ៊ុមផានអ៊ីម៉ិចសាងសង់ផ្ទះបន្ថែមសម្រាប់ពួកគេតាមកិច្ចសន្យា ដែលមានស្រាប់។ ក្រុមប្រជាជនបានដុតកង់ឡានដោយបានទាមទារសុំជួបអាជ្ញាធរធ្វើការដោះស្រាយសំណើរបស់ខ្លួន។ ពួកគេបានសំអាងថា ក្រុមហ៊ុនមិនបានសាងសង់ផ្ទះចំនួនដប់អគារ ដូចដែលបានសន្យាក្នុងការអភិវឌ្ឍនៅនឹងកន្លែងដែលធ្វើឲ្យពួកគាត់ខ្វះទីលំនៅជ្រកកោន។ លោក សេង គង់ អ្នកតវ៉ាម្នាក់ក្នុងចំណោមនោះ។ គាត់និយាយថា៖ «គេនិយាយថា គេក្ស័យធន់ សុំសាងសង់តែប្រាំបីអគារ ហើយគេកុហកទៅសម្ដេចហ៊ុន សែនថា ប្រាំបីអគារនេះគ្រប់ចំនួនប្រជាជនហើយ។ ការណ៍ពិតគឺសល់ប្រជាពលរដ្ឋជាង៣០០គ្រួសារទៀត»។ ការតវ៉ាបានបណ្ដាលឲ្យមានការប្រទាញប្រទង់មួយប្រាវ បន្ទាប់ពីបុរសម្នាក់បានព្យាយាមពន្លត់ភ្លើងកង់ឡានដែលដុតឆេះដោយក្រុមអ្នកភូមិក្រីក្រនេះ។ អ្នកភូមិបានចោល គ្រវែងដុំថ្មបន្តិចបន្ដួចទៅកាន់អគាររដ្ឋបាលខណ្ឌ ប៉ុន្ដែមិនបានបណ្ដាលឲ្យមានការប៉ះពាល់អ្វីឡើយ។ ស្ត្រីម្នាក់ជាជនពិការ។ ជើងរបស់គាត់ទាំងសងខាងស្វិត និងមានសភាពស្លេកស្លាំង។ គាត់បានប្រឹងប្រែងស្វែងរកឧឃោសនសព្ទដើម្បីបន្លឺសម្លេងរបស់ខ្លួន។ គាត់ផ្លាស់ទីដោយប្រើដៃទាំងគូរធាក់រទេះកង់បី។ «ហេតុអ្វីក៏អយុត្តិធម៌សម្រាប់នាងខ្ញុំជាជនពិការដែលកម្សត់ម្នាក់។ តស៊ូចិញ្ចឹមកូន ដើរលក់គ្រាប់ល្ពៅ គ្រលីងឈូក បានព្រឹកខ្វះល្ងាច បើខ្ញុំបាត់បង់ផ្ទះ ខ្ញុំរស់នៅវិធីណា?» ទំនាស់នេះបានកើតឡើងចាប់តាំងពីឆ្នាំ២០០៥ បន្ទាប់ពីក្រុមហ៊ុនផានអ៊ីម៉ិចទទួលសិទ្ធិធ្វើការអភិវឌ្ឍនៅប្លុកបុរីកីឡាលើផ្ទៃដីទំហំ៤,៦ហិចតា។ ក្រុមប្រជាពលរដ្ឋអះអាងថា អ្នកដែលស្ថិតក្នុងទំនាស់មានចំនួនជាង១៧០០គ្រួសារ ក៏ប៉ុន្ដែក្រុមហ៊ុន និងអាជ្ញាធរអះអាងថា ប្រជាពលរដ្ឋមានទំនាស់មានត្រឹមតែជាង១៤០០គ្រួសារប៉ុណ្ណោះ។ ក្រុមហ៊ុនជាប់កុងត្រាក្នុងការសាងសង់អគារចំនួនដប់សម្រាប់ផ្ដល់ជាជម្រកដល់សហគមន៍ក្រីក្រក្នុងប្លុកនេះ ក៏ប៉ុន្ដែក្រុមហ៊ុនបានប្រកាសកាលពីឆ្នាំ២០១០ថា ខ្លួនមានការខាតបង់ក្នុងការសាងសង់អគារចំនួនប្រាំបី ក្នុងចំណោមអគារដប់ ហើយចំនួនប្រជាជនក៏មានចំនួនឆ្លើយតបទៅនឹងចំនួនអគារនេះដែរ។ លោកសោម សុវណ្ណ អភិបាលខណ្ឌ៧មករា មានប្រសាសន៍ថា មិនមានការផ្ដល់លំនៅដ្ឋានដល់ក្រុមអ្នកតវ៉ានោះទេ។ «គាត់ជាប្រជាជនដែលមករស់នៅក្រោយពេលយើងហាមឃាត់ ដូច្នេះគាត់មិនត្រូវមានឈ្មោះបានផ្ទះពីរដ្ឋទេ»។ លោកស្រីស៊ុយ សុផាន ប្រធានក្រុមហ៊ុនផានអ៊ីម៉ិច បញ្ជាក់ថា អ្នកតវ៉ាកាលពីព្រឹកមិញស្ថិតនៅក្រៅក្របខណ្ឌនៃក្រុមប្រជាពលរដ្ឋដែលត្រូវទទួលបានចំណែកផ្ទះ។ «ក្រុមហ៊ុនសង់បានគ្រប់គ្រាន់អស់ហើយ ហើយសល់បន្ទប់ទៀត។ ចំពោះការដុតកង់ឡាន (តវ៉ា) នៅពីមុខខណ្ឌកាលពីព្រឹកមិញគឺប្រជាជនដែលគាត់ទើបតែនៅក្រោយ។ ហើយខ្លះទៀតបានផ្ទះនៅខាងលើហើយលក់ឲ្យគេ រួចចុះមកនៅក្រោម រួចហើយមកប្រមូលគ្នា អ្នកទើបមកនៅថ្មីដើម្បីប្រឆាំង»។ លោកអ៊ូច ឡេង មន្រ្តីផ្នែកកម្មវិធីដីធ្លីរបស់អង្គការការពារសិទ្ធិមនុស្សអាដហុក មានប្រសាសន៍ដោយទទួលស្គាល់ថា មានប្រជាពលរដ្ឋមួយចំនួន ដែលចូលរួមក្នុងការតវ៉ានេះ បានទទួលដី ផ្ទះ ឬជាថវិការួចទៅហើយដែលធ្វើឲ្យការដោះស្រាយមានភាពស្មុគ្រស្មាញ។ ក៏ប៉ុន្ដែភាពស្មុគ្រស្មាញផ្សេងទៀតក៏បណ្ដាលមកពីក្រុមអាជ្ញាធរ និងក្រុមហ៊ុនផងដែរ។ យ៉ាងណាក៏ដោយលោកអ៊ូច ឡេងកត់សំគាល់ឃើញថា ភាគីក្រុមហ៊ុនផានអ៊ីម៉ិចមានចំណែកទទួលខុសត្រូវច្រើនជាង។ «រឿងនេះគឺយើងអាចមើលឃើញថា ជាកំហុសរបស់ក្រុមហ៊ុនទាំងស្រុង ដែលក្រុមហ៊ុនអះអាងថា មិនមានលទ្ធភាពសាងសង់២អគារថែមទៀតជូនប្រជាពលរដ្ឋ។ បើសិនមិនមានលទ្ធភាពសាងសង់ជូនប្រជាជន គួរតែអនុញ្ញាតឲ្យប្រជាជន ដែលសល់ប៉ុន្មានរយគ្រួសារនោះសាងសង់ដោយខ្លួនឯង លើដីរបស់ខ្លួន ហើយចែកគ្នាពីចំនួន២អគារនោះមកវិញ»។ ទោះជាយ៉ាងនេះក្ដី លោកស្រីស៊ុយ សុផានបញ្ជាក់ថា ក្រុមហ៊ុនលោកស្រីបានរៀបចំចំណែកដីដល់ក្រុមអ្នកតវ៉ាក្នុងមួយគ្រួសារ មួយឡូសម្រាប់សាងសង់លំនៅដ្ឋានក្នុងខេត្តកំពង់ស្ពឺ។ ប៉ុន្ដែក្រុមប្រជាពលរដ្ឋត្រូវការស្ថិតនៅក្នុងក្រុងភ្នំពេញ៕ This posting includes an audio/video/photo media file: Download Now |
| អ្នកសង្កេតការណ៍សាលាក្តីខ្មែរក្រហមមានមតិផ្សេងគ្នាអំពីមុខនាទីសាលាក្តី Posted: 01 Nov 2011 09:47 AM PDT ខណៈដែលសាលាក្តីខ្មែរក្រហមកំពុងរៀបចំបើកសវនាការលើអង្គសេចក្តីដើម្បីជំនុំជម្រះសំណុំរឿង ០០២ ប្រឆាំងនឹងនួន ជា ខៀវ សំផន អៀង សារី និងអៀង ធីរិទ្ធ នៅថ្ងៃទី២១ខែវិច្ឆិកាខាងមុខនេះ អ្នកសង្កេតការណ៏សាលាក្តីខ្លះនៅសហរដ្ឋអាមេរិកយល់ថាសាលាក្តីនេះគួរតែបញ្ចប់ត្រឹមករណី០០២ នេះ។ ប៉ុន្តែអ្នកខ្លះទៀតយល់ថាសាលាក្តីនេះគួរតែបន្តការស៊ើបអង្កេតរបស់ខ្លួនក្នុងករណី០០៣ និង ០០៤ បើមិនដូច្នោះទេ និងមិនមានយុត្តិធ៌មពេញលេញជូនជនរងគ្រោះរបបខ្មែរក្រហមទេ។អ្នកសង្កេតការសាលាក្តីខ្មែរក្រហមនៅសរអាមានមតិលាយឡំគ្នាអំពីមុខនាទីរបស់សាលាក្តីនេះ។ អ្នកខ្លះថាសាលាក្តីនេះគួរផ្តោតតែលើមេដឹកនាំជាន់ខ្ពស់៤នាក់តែប៉ុណ្ណោះបានហើយ។ចំណែកអ្នកខ្លះទៀតជជែកថាតុលាការនេះគួរកាត់ទោសមនុស្សមួយចំនួនទៀត។ <!--AV--> ចំពោះលោក Peter Maguireដែលជាអ្នកឃ្លាំមើលការកាត់ទោសមេដឹកនាំខ្មែរក្រហមនេះ ជាច្រើនឆ្នាំមកហើយនោះយល់ថាសាលាក្តីខ្មែរនេះមានតួនាទីតែមួយគត់។ «មុខនាទីរបស់ពួកគេគឺកាត់ទោសពួកមេដឹកនាំខ្មែរក្រហមជាន់ខ្ពស់។ នាយករដ្ឋមន្ត្រីហ៊ុនសែន បានបញ្ជាក់យ៉ាងច្បាស់ហើយថា លោកមិនចង់ឲ្យមានការកាត់ទោសតទៅទៀតទេ។ និងគ្មានករណី០០៣ និង ០០៤ទេ។ ដូច្នេះយើងចាំសង្កេតមើលថាតើពួកគេអាចបញ្ចប់ករណី០០២ មុនជនជាប់ចោទស្លាប់អស់ឬទេ។ បើសិនជាពួកគេបរាជ័យមិនអាចបញ្ចប់ករណី០០២ មុនជនជាប់ចោទស្លាប់អស់នោះ ការកាត់ទោសទាំងអស់នេះ និងជាបរាជ័យមួយទាំងស្រុងហើយ។» ថ្លែងនៅមុនសន្និសិទស្តីពីច្បាប់សិទ្ធិមនុស្សអន្តរជាតិ នៅមហាវិទ្យាល័យ Bard នៅរដ្ឋ New Yorkលោក Macguire និយាយថាការបន្ថែមករណី០០៣និង០០៤ និងធ្វើឲ្យសាលាក្តីក្លាយទៅជាសត្វដំរីដែលមានមាឌធំ ហើយបោះជំហានយ៉ឺតៗ។ លោក Douglas Irvin ជានិសិ្សតថ្នាក់បណ្ឌិតផ្នែកកិច្ចការពិភពលោក នៅសាកលវិទ្យាល័យ Rutgers នៅរដ្ឋ New Jerseyនៃសរអា និងជាអ្នកស្រាវជ្រាវរបស់មជ្ឈមណ្ឌលឯកសារកម្ពុជា។ លោកយល់ថាករណី០០២ មានសារះសំខាន់ជាងគេ ពីព្រោះជនជាប់ចោទទាំងបួន គឺ នួនជា ខៀវសំផន អៀងសារី និង អៀងធីរិទ្ធ ជាមេដឹកនាំជាន់ខ្ពស់ នៃរបបខ្មែរក្រហម។ «បើសិនជាធ្វើទៅមានជោគជ័យ នៅក្នុងទស្សនវិស័យរបស់អសប ខ្ញុំគិតថាជាការគ្រប់គ្រាន់ហើយ។ ហើយខ្ញុំគិតថាការបន្តហួសពី០០២ មិនសំខាន់ដូចការធ្វើឲ្យមានជោគជ័យក្នុង០០២ទេ។ មូលហេតុនោះគឺថា បើគេចេះតែបន្តកាត់ទោសជារៀងរហូតនោះ គេនិងមានមនុស្សជាច្រើននាក់។ វាមិនមានប្រយោជន៏ទេ។ ខ្ញុំគិតថាអ្វីដែលមានតម្លៃនោះគឺនិមិត្តរូប គឺការយកអ្នកទទួលខុសត្រូវថ្នាក់ខ្ពស់ មកកាត់ទោស ហើយសង្ឃឹមថានិងរកឃើញថាពួកគេមានទោស។» ប៉ុន្តែនាង Mary Orsini ដែលជានិស្សិតច្បាប់នៃសាកលវិទ្យាល័យ Rutgersដែលធ្លាប់បានធ្វើការស្រាវជ្រាវអំពីរឿងសាលាក្តីខ្មែរក្រហមនៅមជ្ឈមណ្ឌលឯកសារកម្ពុជា មិនយល់ស្របទេ។ នាងថ្លែងថាការបញ្ចប់ត្រឹមករណី០០២ និងនាំឲ្យខ្វះភាពពេញលេញក្នុងការរកយុត្តិធ៌មជូនពលរដ្ឋកម្ពុជា។ «ទោះជាអ្នកខ្លះគិតថាអសបគួរតែផ្តោតទៅលើករណីតែ២ប៉ុណ្ណោះក៏ដោយ អ្វីដែលសំខាន់គឺនៅពេលដែលតុលាការនេះផ្ចុងផ្តើមឡើងដំបូង មានការពិភាក្សាគ្នាថា យ៉ាងហោចណាស់ក៏កាត់ទោស ពី១០ទៅ១៥នាក់ដែរ។ ការបញ្ចប់ដោយកាត់ទោសតែ៥នាក់បែបនេះ មិនមែនជាគោលដៅដំបូងរបស់តុលាការនេះទេ។» នាង Elena Lesley ជានិស្សិតនៃកម្មវិធីកិច្ចការពិភពលោកនៃសាកលវិទ្យាល័យRutgers។ នាងធ្លាប់ធ្វើការស្រាវជ្រាវអំពីរឿងសាលាក្តីខ្មែរក្រហម តាមរយៈអាហាររូបករណ៍Fullbright ។ នាងជឿថាសាលាក្តីគួរស៊ើបអង្កេត ករណី០០៣និង០០៤។ «ខ្ញុំគិតថាគេគួរធ្វើកិច្ចការទាំងពីរ។ ខ្ញុំមិនជឿថាគេគួរអនុញ្ញាត្តិឲ្យតុលាការដួលរលំដោយសាររឿងចម្រូងចម្រាស់ពាក់ពាន់និងករណី០០៣និង០០៤ទេ។ ខ្ញុំគិតថាករណី០០២ សំខាន់ណាស់ ហើយខ្ញុំគិតថាការបន្តដំណើរការទៅមុខទៀតក៏ជាការសំខាន់ដូចគ្នា ពីព្រោះគ្មានមូលហេតុរឹងមាំអ្វីសម្រាប់ការមិនបន្តទៅមុខ។» លោក Andrew Cayley ជាសហព្រះរាជអជ្ញាអន្តរជាតិក្នុងសាលាក្តីខ្មែរក្រហម។ ថ្មីៗនេះលោកបានថ្លែងទៅកាន់និស្សិតច្បាប់នៅសាកលវិទ្យាល័យ Rutgers អំពីរឿងសាលាក្តីខ្មែរក្រហម។ ហើយក្នុងបទសម្ភាសន៍ជាមួយវីអូអេសម្លេងសរអា លោកថ្លែងថាលោកយល់ថាប្រទេសកម្ពុជាចង់បោះជំហានទៅមុខដើម្បីកសាងប្រទេសឡើងវិញ។ ប៉ុន្តែលោកថាករណី០០៣និង០០៤បានចាប់ផ្តើមឡើងមុនពេលលោកចូលធ្វើការ ដូច្នេះលោកថាលោកមានភារៈកិច្ចដើម្បីអនុវត្តិតាមផ្លូវច្បាប់ ទោះជាអ្នកខ្លះគិតថាករណី០០២សំខាន់ជាងក៏ដោយ។ «ត្រូវតែមានការស៊ើបអង្កេតមួយ។ ចៅក្រមស៊ើបអង្កេតត្រូវតែពិចារណាអំពីភស្តុតាងហើយបន្ទាប់មកត្រូវតែមានបញ្ជាឲ្យលប់ចោលឬឲ្យធ្វើការចោទប្រកាន់។ នេះជាការចែងនៅក្នុងវិន័យ។ គ្មានវិធីអ្វីផ្សេងសម្រាប់ដោះស្រាយករណីទាំងពីរនេះទេ។» សាលាក្តីខ្មែរក្រហមនិយាយថា ការស៊ើបអង្កេតក្នុងករណី០០៣ និង០០៤ កំពុងតែធ្វើជាបន្តដោយមិនបញ្ចាក់ប្រាប់ឈ្មោះជនមន្ទិលសង្ស័យទេ។ប៉ុន្តែនៅក្នុងឯកសារសម្ងាត់របស់សាលាក្តីខ្មែរក្រហមដែលវីអូអេបានទទួល ករណី០០៣ និង០០៤ ពាក់ពាន់និងមេបញ្ជាការយោធាជាន់ខ្ពស់ និង គណៈតំបន់មួយចំនួននៃរបបខ្មែរក្រហម៕ This posting includes an audio/video/photo media file: Download Now |
| ព័ត៌មានអន្តរជាតិ៖ ០១ វិច្ឆិកា Posted: 31 Oct 2011 08:48 PM PDT ព័ត៌មានចុងក្រោយបំផុត៖ អឺរ៉ុប៖ ទីផ្សារនៅក្នុងទ្វីបអឺរ៉ុបបានធ្លាក់ចុះយ៉ាងខ្លាំងនៅថ្ងៃអង្គារ ដែលជាប្រតិកម្មចំពោះសំណើរបស់លោកនាយករដ្ឋមន្ត្រីក្រិក George Papandreou ក្នុងការធ្វើការបោះឆ្នោតប្រជាមតិមួយដើម្បីពិចារណាលើការយល់ព្រមដល់ ផែនការបន្ធូរបន្ថយបំណុលរបស់ទ្វីបអឺរ៉ុបដែលបានយល់ព្រមកាលពី សប្តាហ៍មុន។ លីប៊ី៖ ក្រុមប្រឹក្សាសន្តិសុខអង្គការសហប្រជាជាតិបានជំរុញប្រទេសលីប៊ីឲ្យបញ្ចៀសបញ្ហារាលដាលអាវុធក្នុងតំបន់ ខណៈពេលដែលអាជ្ញាធរបណ្តោះអាសន្នរបស់ប្រទេសនេះបានបោះឆ្នោតជ្រើសរើសនាយករដ្ឋមន្ត្រីបណ្តោះអាសន្នថ្មីម្នាក់ដើម្បីដឹកនាំដំណាក់កាលអន្តរកាលនយោបាយ។ ស៊ីរី៖ អង្គការអូតង់និយាយថាខ្លួនគ្មានបំណងធ្វើសកម្មភាពយោធានៅក្នុងប្រទេសស៊ីរីទេ បន្ទាប់ពីបានបញ្ចប់យុទ្ធនាការរយៈពេល៧ខែរបស់ខ្លួនដើម្បីការពារក្រុមជនស៊ីវិលក្នុងប្រទេសលីប៊ីមក។ អ៊ីស្រាអែល/ប៉ាឡេស្ទីន៖ នាយករដ្ឋមន្ត្រីអ៊ីស្រាអែល Benjamin Netanyahu កំពុងជួបប្រជុំជាមួយពួកទីប្រឹក្សាជាន់ខ្ពស់របស់លោកនៅថ្ងៃអង្គារនេះដើម្បីថ្លឹងថ្លែងអំពីលទ្ធភាពនៃការឆ្លើយតបមួយចំពោះការសម្រេចចិត្តរបស់ទីភ្នាក់ងារវប្បធ៌មនៃអង្គការសហប្រជាជាតិក្នុងការផ្តល់សមាជិកភាពពេញសិទ្ធិដល់ប្រជាពលរដ្ឋប៉ាឡេស្ទីន។ សហរដ្ឋអាមេរិក/សហគមន៍អឺរ៉ុប៖ សហរដ្ឋអាមេរិកនឹងធ្វើជាម្ចាស់ផ្ទះរៀបចំសន្និសីទកំពូលជាមួយសហគមន៍អឺរ៉ុបនៅថ្ងៃទី២៨ខែវិច្ឆិកាឆ្នាំនេះ។សេចក្តីថ្លែងការណ៍មួយរបស់សេតវិមានដែលចេញផ្សាយកាលពីយប់ថ្ងៃចន្ទបានឲ្យដឹងថាលោកប្រធានាធិបតីបារ៉ាក់អូបាម៉ាកំពុងទន្ទឹងរង់ចាំជំនួបជាមួយក្រុមមេដឹកនាំសហគមន៍អឺរ៉ុបក្នុងរដ្ឋធានីវ៉ាស៊ីនតោន។ ចិន៖ ក្រុមមន្ត្រីចិនបានអបអរសាទរដល់ការបង្ហោះយានអវកាសមួយគ្រឿងដោយជោគជ័យក្នុងបេសកកម្មមួយដែលជំរុញផែនការរបស់ចិនទៅមុខដើម្បីបង្កើតស្ថានីយ៍អវកាសមួយដែលមានមនុស្សចាត់ចែងកិច្ចការមិនឲ្យហួសពីឆ្នាំ២០២០។ <!--AV--> ព័ត៌មាននៅពេលមុននេះ៖ <!--IMAGE-RIGHT--> ថៃ៖ កំហឹងបានផ្ទុះឡើងកាលពីថ្ងៃច័ន្ទនៅតាមបណ្តោយរបាំងការពាររាជធានីរបស់ថៃកុំឲ្យទឹកជន់លិច ដោយពួកអ្នកស្រុកដែលខឹងសម្បារស្ថិតនៅខាងក្រៅទំនប់ការពារទឹកជំនន់បានប៉ះទង្គិចជាមួយកងកម្លាំងសន្តិសុខដើម្បីបង្ខំឲ្យបើកច្រកផ្លូវទឹកដែលបានធ្វើឲ្យផ្ទះរបស់ពួកគេលិចទឹក។ សកលលោក ៖ ប្រជាពលរដ្ឋរបស់ពិភពលោកបានឡើងដល់៧ពាន់លាននាក់នៅពេលមានការប្រារព្ឋហើយនឹងការព្រួយកង្វល់អំពីថាតើការកើនឡើងនូវចំនួនប្រជាពលរដ្ឋ នឹងប៉ះពាល់ប្រភពធនធានរបស់ផែនដីយ៉ាងដូចម្តេច។ សហរដ្ឋអាមេរិក៖ ឲ្យដឹងថាខ្លួននឹងកាត់ផ្តាច់ការរួមវិភាគទានហិរញ្ញវត្ថុរបស់ខ្លួនដល់ទីភ្នាក់ងារវប្បធម៌របស់អង្គការសហប្រជាជាតិ បន្ទាប់ពីអង្គការនោះបានបោះឆ្នោតកាលពីថ្ងៃច័ន្ទផ្តល់សមាជិកភាពពេញលេញដល់ប៉ាឡេស្ទីន។ លីប៊ី ៖ ដោយអង្គការអូតង់កំណត់ការបញ្ចប់បេសកម្មរបស់ខ្លួននៅលីប៊ីកាលពីយប់មិញ មន្រ្តីកំពូលរបស់សម្ព័ន្ធមិត្តបានសរសើរយុទ្ធនាការនៃការទម្លាក់គ្រាប់បែករយៈពេល៧ខែក្នុងអំឡុងពេលនៃដំណើរបំពេញទស្សនៈកិច្ចកាលពីថ្ងៃច័ន្ទ។ អាហ្វហ្គានីស្ថាន ៖ ទីភ្នាក់ងារទទួលបន្ទុកជនភៀសខ្លួនរបស់អង្គការសហប្រជាជាតិ ប្រាប់ឲ្យដឹងថា បុគ្គលិករបស់ខ្លួនបីនាក់ស្ថិតក្នុងចំណោមមនុស្ស៥នាក់ដែលបានត្រូវសម្លាប់នៅក្នុងការបំផ្ទុះគ្រាប់បែកអត្តឃាតនៅក្រុង Kandahar ភាគខាងត្បូងអាហ្វហ្គានីស្ថាន។ កែនយ៉ានិងសូម៉ាលី ៖ បានអំពាវនាវសុំជំនួយអន្តរជាតិកាន់តែច្រើនឡើងថែមទៀតដើម្បីជួយកំទិចពួក al – Shabab ដែលជាក្រុមកងជីវពលមានចំណងទាក់ទងជាមួយក្រុម al – Qaida ដែលប្រទេសជិតខាងទាំងអស់បានពណ៌នាក្រុមនេះថាជាសត្រូវរួម។ កៀហ្ស៊ីស៊ីស្ថាន៖ នាយករដ្ឋមន្រ្តី Almazbek Atambayev នៃប្រទេសកៀហ្ស៊ីស៊ីស្ថាននឹងត្រូវក្លាយជាប្រធានាធិបតីបន្ទាប់ពីបាននាំមុខនៅក្នុងការបោះឆ្នោតប្រធានាធិបតីលើកទីមួយរបស់ប្រទេសនោះ ចាប់តាំងពីការបះបោរបង្ហូរឈាមដែលបានបណ្តេញរដ្ឋាភិបាលកាលពីឆ្នាំទៅមក។ សហរដ្ឋអាមេរិក ៖ ក្រុមហ៊ុន Boeing ដែលក្រុមហ៊ុនធ្វើយន្តហោះរបស់សហរដ្ឋអាមេរិក ត្រូវគេរំពឹងនឹងប្រកាសកិច្ចព្រមព្រៀងនៅថ្ងៃនេះដើម្បីស្ថាបនាកន្លែងអាវកាសនៅរោងចក្រកណ្តាលរដ្ឋ Florida ដែលកាលពីពេលមុនបានប្រើប្រាស់ជាកន្លែងសម្រាប់យាន្តចម្លងអាវកាស។ សកលលោក ៖ ការអត់កាងារធ្វើ ការរីកលូតលាស់សេដ្ឋកិច្ចយឺតយ៉ាវរបស់ពិភពលោក ហើយនឹងបញ្ហាបំណុលដ៍ធ្ងន់ធ្ងរ បានប្រឈមមុខមេដឹកនាំ G-20 នៅពេលដែលពួកអស់លោកជួបជុំគ្នាក្នុងសប្តាហ៍នេះដើម្បីស្វែងរកដំណោះស្រាយដល់បញ្ហានេះ។ អឺរ៉ុប ៖ ផែនការជួយសង្គ្រោះបំណុលអឺរ៉ុប ដែលបានព្រមព្រៀងកាលពីសប្តាហ៍មុន បានធ្លាក់ចូលក្នុងការមន្ទិលសង្ស័យនៅពេលដែលក្រិកនិយាយនៅពេលឥឡូវនេះថាខ្លួន នឹងធ្វើការបោះឆ្នោតប្រជាមត្តិថាតើខ្លួនយល់ព្រមក៏អត់៕ This posting includes an audio/video/photo media file: Download Now |
| ឧត្តមសេនីយ៍ពីរនាក់ និងជនសង្ស័យត្រូវចាប់ខ្លួនដោយសង្ស័យពីបទជួញដូរថ្នាំញៀន Posted: 01 Nov 2011 10:46 AM PDT ក្រុមមន្ត្រីប្រឆាំងគ្រឿងញៀននៃក្រសួងមហាផ្ទៃ នៅថ្ងៃច័ន្ទនេះ បានចាប់ខ្លួនមនុស្សចំនួនបួននាក់ ដែលរួមមានលោកឧត្តមសេនីយ៍ទោចំនួនពីរនាក់ ពីបទសង្ស័យថាមានការជាប់ពាក់ព័ន្ធនឹងការជួញដូរថ្នាំញៀន ម៉េតំហ្វេតាមីនទឹកកក ចំនួនមួយគីឡូគីក្រាម នេះបើតាមការបញ្ជាក់របស់មន្រ្តីប៉ូលិស។ លោកឧត្តមសេនីយ៍ឯកគាត ចាន់ថារិទ្ធិ អ្នកនាំពាក្យអគ្គស្នងការនគរបាលជាតិ បានមានប្រសាសន៍នៅថ្ងៃនេះថា លោកឧត្តមសេនីយ៍ទោឡាយ វីរៈ អតីតអភិបាលរងរាជធានីភ្នំពេញ និងជាទីប្រឹក្សាក្រសួងការពារជាតិ និងលោកឧត្តមសេនីយ៍ទោឃួន រឿន ព្រមទាំងប្រជាពលរដ្ឋចំនួនពីររូបផ្សេងទៀត ត្រូវបានខ្លួនចាប់ដោយឡែកៗពីគ្នា នៅតាមបណ្តោយផ្លូវជាតិលេខបួន ក្នុងខណ្ឌដង្កោរ រាជធានីភ្នំពេញ។ លោកបានបញ្ជាក់ទៀតថា ប៉ូលិសបានរកឃើញថ្នាំញៀនម៉េតំហ្វេតាមីនទឹកកកចំនួនមួយគីឡូក្រាម និងអាវុធអាកា៤៧ស្វ័យប្រវត្តិចំនួនពីរដើម។ «ឥឡូវមកទល់ម៉ោងហ្នឹង យើងឃាត់ខ្លួនបួននាក់។ ក្នុងបួននាក់ហ្នឹង ខ្ញុំស្គាល់ឈ្មោះពីរគឺឧត្តមសេនីយ៍ទោឡាយ វីរៈ និងឧត្តមសេទីយ៍ទោឃួន រឿន។ ពីរនាក់ទៀតឥតបានចាំឈ្មោះទេ ប្រជាជនធម្មតាទេ»។ លោកឧត្តមសេនីយ៍ទោឃឿន សាម៉ន ប្រធានមន្ទីរប្រឆាំងគ្រឿងញៀនរបស់អគ្គស្នងការនគរបាលជាតិ បានមានប្រសាសន៍ថា ប៉ូលិសបានប្រើពេលចំនួនជាងពីរសប្តាហ៍ដើម្បីឈានទៅរកការចាប់ខ្លួនជនសង្ស័យទាំងបួនរូបនេះ។ លោកបានមានប្រសាសន៍ថា លោកកំពុងតែស្រាវជ្រាវរកអ្នកពាក់ព័ន្ធបន្ថែមទៀត នៅក្នុងសំណុំរឿងនេះ។ «ខ្សែរយៈវាទៀត។ អានេះ ថ្នាំយកមកពីណា មកណា ក៏យើងមិនទាន់បានដេញដោលសាកសួរជនល្មើសផង។ មិនទាន់ចប់សព្វគ្រប់ទេ។ ហើយមួយទៀតហ្នឹង យើងមិនទាន់ដឹងថា តើជនល្មើសហ្នឹង ប្រភពជនមេខ្លោងជានណាទេ។ ពាក់ព័ន្ធពីណាទៀត ក៏យើងមិនទាន់កំណត់»។ លោកឧត្តមសេនីយ៍ទោឡាយ វីរៈធ្លាប់ជាមេទ័ពដ៏ស្មោះត្រង់មួយរូបខាងគណបក្សហ្វ៊ុនស៊ិនប៉ិច និងធ្លាប់ជាអតីតអភិបាលខេត្តបន្ទាយមានជ័យផងដែរ។ វីអូអេព្យាយាមទាក់ទងទៅលោកឧត្តមសេនីយ៍ឈុំ សុជាតិ តែមិនអាចទាក់បានទេ នៅថ្ងៃច័ន្ទនេះ។ អាជ្ញាធរប៉ូលិសនៅឆ្នាំ២០១១នេះបានចាប់មន្ត្រីជាន់ខ្ពស់ជាច្រើននាក់ ជាប់ពាក់ព័ន្ធនឹងការជួញដូរថ្នាំញៀនស្រវឹង។ មន្ត្រីដែលត្រូវបានចាប់ខ្លួនកន្លងមក រួមមានលោកឧត្តមសេនីយ៍ឯក ម៉ឹក តារា អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោកឧត្តមសេនីយ៍ត្រីហ៊ុន ហ៊ាង ស្នងការប៉ូលិសខេត្តបន្ទាយមានជ័យ លោកជាង ស៊ុន ស្នងការរងប៉ូលិសខេត្តបន្ទាយមានជ័យ លោកជា ឡេង ប្រធានការិយាល័យប្រយុទ្ធប្រឆាំងគ្រឿងញៀនរាជធានីភ្នំពេញ ហើយចុងក្រោយគេលោកឧត្តមសេនីយ៍ទោឡាយ វីរៈ ទីប្រឹក្សាក្រសួងការពារជាតិ៕ This posting includes an audio/video/photo media file: Download Now |
| តុលាការខេត្តបន្ទាយមានជ័យបើកសវនាការរឿងបាក់បង្គោលព្រំដីរបស់សុរិយោដី Posted: 01 Nov 2011 09:57 AM PDT កាលពីថ្ងៃសុក្រសប្តាហ៍មុននេះ តុលាការខេត្តបន្ទាយមានជ័យបានលើកយកសំណុំរឿងទំនាស់ដីធ្លីមួយកាលពីឆ្នាំ២០០៨ រវាងអ្នកស្រុកអូរជ្រៅ ខេត្តបន្ទាយមានជ័យ និងអាជ្ញាធរខេត្តទាក់ទិនទៅនឹងការចោទប្រកាន់ថា បានធ្វើឲ្យបាក់បង្គោលព្រំដីរបស់សុរិយោដីខេត្តមួយដើម។ លោកឡុង លុន មេធាវីការពាររបស់សមាគមសិទ្ធិមនុស្សអាដហុក ដែលបានការពារកូនក្តីប្រជាពលរដ្ឋចំនួន២២នាក់ បាននិយាយថា នៅក្នុងបន្ទប់សវនាការកាលពីថ្ងៃសុក្រសប្តាហ៍មុន មិនមានភស្តុតាងណាមួយដើម្បីដាក់បន្ទុកមកលើកូនក្តីរបស់លោកទេ។ លោកបានបញ្ជាក់ថា តុលាការគួរតែលើកលែងការចោទប្រកាន់ចំពោះកូនក្តីរបស់លោក។ «យើងជាមេធាវី យើងយល់ថា តុលាការមិនមានភស្តុតាង ឬសាក្សីណាមួយបញ្ជាក់ចង្អុលបង្ហាញឲ្យច្បាស់ថា កូនក្តីរបស់ខ្ញុំបាទបានប្រព្រឹត្តដូចការចោទប្រកាន់នោះទេ។ ប៉ុន្តែខាងតំណាងអយ្យការ គាត់លើកឡើងថា មានការបាក់បង្គោលអីមែន។ ប៉ុន្តែយើងរកថា តើនរណាដែលជាអ្នកវាយនោះ ឥតមាននរណាមួយចង្អុលបង្ហាញឲ្យច្បាស់ទេបាទ»។ កាលពីថ្ងៃទី២៨ ខែមករា ឆ្នាំ២០០៨ បង្គោលព្រំដីរបស់សុរិយោដីរបស់ខេត្តបន្ទាយមានជ័យមួយដើម ដែលបានបោះកំណត់ព្រំដីនៅស្រុកអូរជ្រៅ បានបាក់ បន្ទាប់ពីមានរឿងទំនាស់ដីធ្លីមួយបានកើតឡើង។ ប្រជាពលរដ្ឋប្រមាណ១៧០គ្រួសារ ដែលមានទំហំដីប្រមាណជាង១១ហិចតា នៅភូមិទួលប្រាសាទ និងភូមិប៉ាលីល័យ ក្រោយមកត្រូវបានប្តូរឈ្មោះទៅភូមិច័ន្ទគីរី មានទីតាំងក្នុងឃុំប៉ោយប៉ែត ខេត្តបន្ទាយមានជ័យ បានចោទប្រកាន់សមាគមអភិវឌ្ឍន៍កសិកម្មជាតិថា បានរំលោភយកដីរបស់ពួកគេ។ សមាគមអភិវឌ្ឍន៍កសិកម្មជាតិបានជួលដីរដ្ឋចំនួន២៩៧ហិចតា ហើយក្រោយមកពង្រីកផ្ទៃដីរបស់ខ្លួនរហូតទៅដល់ជាង៤០០ហិចតា សម្រាប់ការអភិវឌ្ឍដាំដំណាំកសិកម្ម។ ការអភិវឌ្ឍនេះត្រូវបានប្រជាពលរដ្ឋចោទប្រកាន់ថា បានធ្វើឲ្យប៉ះពាល់ដល់ដីរបស់គេចំនួនបីភូមិ គឺភូមិទួលប្រាសាទ ភូមិទួលពង្រ និងភូមិច័ន្ទគីរី។ ទំនាស់ដីធ្លីនេះបានបង្កឲ្យសុរិយោដីខេត្តចុះទៅធ្វើការវាស់វែងដើម្បីកំណត់ព្រំដី ហើយក្រោយមកឈានរហូតទៅដល់បាក់បង្គោលព្រំដីរបស់មន្ត្រីសុរិយោដីខេត្តមួយដើម។ កាលពីនៅជាព្រះរាជអាជ្ញាខេត្តបន្ទាយមានជ័យ លោកតុប ច័ន្ទសេរីវុឌ្ឍ កាលពីឆ្នាំ២០០៨ បានចេញដីកាចាប់ខ្លួនប្រជាពលរដ្ឋចំនួនបីនាក់ ដាក់ពន្ធនាគារពីបទថា បានវាយបំផ្លិចបំផ្លាញបង្គោលព្រំដីសុរិយោដីខេត្តបន្ទាយមានជ័យ។ លោកតុប ច័ន្ទសេរីវុឌ្ឍក្រោយមកផ្លាស់ប្តូរទៅជាព្រះរាជអាជ្ញាខេត្តពោធិសាត់ ហើយបច្ចុប្បន្ននេះកំពុងជាប់ពន្ធនាគារតុលាការខេត្តពោធិសាត់ ដោយសារតែសំណុំរឿងពុករលួយ។ សាលាឧទ្ធរណ៍បានសម្រេចឲ្យតុលាការខេត្តបន្ទាយមានជ័យដោះលែងជនទាំងបីនាក់ឲ្យនៅក្រៅឃុំ ហើយបង្វែសំណុំរឿងនេះឲ្យមកតុលាការខេត្តបន្ទាយមានជ័យជាអ្នកចាត់ការបន្ត។ លោកនៅ ផល្លា តំណាងប្រជាពលរដ្ឋទាំង១៧០គ្រួសារ បាននិយាយថា ប្រជាពលរដ្ឋមិនបានវាយបំផ្លិចបំផ្លាញបង្គោលព្រំដីសុរិយោដីខេត្តទេ។ លោកបានបញ្ជាក់ថា ទំនងជាបង្គោលព្រំដីនេះ បាក់ដោយខ្លួនឯង ហើយទម្លាក់កំហុសមកលើប្រជាពលរដ្ឋ។ «យើងមិនដឹងថា បង្គោលណាបាក់ទេ បើបង្គោលគាត់បោះច្រើនបង្គោលម្ល៉េះ។ មិនដឹងបាក់បង្គោលណា បើច្រើនម្ល៉េះ។ ក្រែងជ្រូក វាដើរពារមិនដឹង ឬគាត់ធ្វើឲ្យបាក់ខ្លួនឯង ហើយចោទប្រកាន់ពួកខ្ញុំមិនដឹង»។ លោកស៊ុំ ចាន់គា មន្ត្រីស៊ើបអង្កេតរបស់សមាគមសិទ្ធិមនុស្សអាដហុក ប្រចាំខេត្តបន្ទាយមានជ័យ បានឲ្យដឹងថា តាមការសាកសួររបស់លោក ប្រជាពលរដ្ឋចំនួន២២នាក់មិនមានវត្តមាននៅកន្លែងកើតហេតុទេ ហើយពួកគេមិនដឹងថា បង្គោលព្រំដីនេះ បាក់តាំងពីពេលណាមកទេ។ «បើសិនជាការចាប់ចងលក្ខណៈណាមួយឲ្យបានសមរម្យ ឲ្យគ្រប់គ្រាន់ ដែលអាចធ្វើទៅបាន។ ហើយបើប្រើអំណាច ដែលខ្លួនជាភ្នាក់ងាររបស់រដ្ឋ ហើយមកធ្វើបាបប្រជាពលរដ្ឋ នោះគឺជារឿងអយុត្តិធម៌។ ដូច្នេះ យើងឃ្លាំងមើលនូវការអនុវត្តច្បាប់ទាំងអស់នោះបាទ»។ លោកខៀវ ចាន់ពិសិដ្ឋ ប្រធានចៅក្រមជំនុំជម្រះតុលាការខេត្ត បានប្រាប់វីអូអេ តាមរយៈទូរស័ព្ទមកថា តុលាការគ្រោងនឹងប្រកាសសាលក្រមសំណុំរឿងនេះ នៅថ្ងៃទី១៥ ខែវិច្ឆិកា ខាងមុខនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
