VOA News: ព័ត៌មាន: “សាដីកាបណ្ដឹងឧទ្ធរណ៍របស់ឌុចគ្រោងប្រកាសនៅសប្ដាហ៍ក្រោយ” plus 4 more |
- សាដីកាបណ្ដឹងឧទ្ធរណ៍របស់ឌុចគ្រោងប្រកាសនៅសប្ដាហ៍ក្រោយ
- សេចក្តីព្រាងច្បាប់គ្រប់គ្រងអ្នកទោសរងការរិះគន់
- ព្រះមហាវីរក្សត្រឈប់យាងចេញពីប្រទេសកម្ពុជា
- វេទិកាគណបក្សសិទ្ធិមនុស្សត្រូវរំខាន
- ព័ត៌មានអន្តរជាតិ៖ ៣១ តុលា
| សាដីកាបណ្ដឹងឧទ្ធរណ៍របស់ឌុចគ្រោងប្រកាសនៅសប្ដាហ៍ក្រោយ Posted: 31 Oct 2011 10:58 AM PDT មន្ដ្រីផ្លូវការរបស់សាលាក្ដីខ្មែរក្រហមបានឲ្យដឹងនៅថ្ងៃច័ន្ទនេះថា អង្គជំនុំជម្រះតុលាការកំពូលនឹងជូនដំណឹងពីកាលបរិច្ឆេទនៃការប្រកាសសាលដីកាសំណុំរឿងឌុចក្នុងអំឡុងសប្ដាហ៍ក្រោយនេះ។ ជាមួយគ្នានេះប្រភពផ្សេងទៀតយល់ថា ការប្រកាសសាលដីកាអតីមេគុកទួលស្លែងនេះនឹងធ្វើឡើងនៅដើមឆ្នាំក្រោយ។ លោកឡាស អលសិន (Lars Olsen) មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហមខាងភាគីអង្គការសហប្រជាជាតិបញ្ជាក់ថា គេនឹងអាចដឹងច្បាស់ពីថ្ងៃប្រកាសសាលដីកាស្ដីពីបណ្ដឹងឧទ្ធរណ៍របស់ឌុចទៅកាន់តុលាការកំពូលនៅប៉ុន្មានថ្ងៃទៀតនេះ។ «យើងរំពឹងថា នៅក្នុងសប្តាហ៍ក្រោយអង្គជំនុំជម្រះតុលាការកំពូលនឹងប្រកាសពីកាលបរិច្ឆេទនៃការប្រកាសសាលដីកា។ យើងត្រូវរង់ចាំរហូតដល់ពេលនោះដើម្បីដឹងថា តើការប្រកាសសាលដីកាធ្វើឡើងនៅពេលណាពិតប្រាកដ»។ កាំង ហ្កេកអ៊ាវ ហៅ ឌុច អតីតប្រធានគុកទួលស្លែងឬមន្ទីរស២១ជាប់ចោទក្នុងសំណុំរឿង០០១ពីបទប្រឆាំងមនុស្សជាតិ ឧក្រិដ្ឋកម្មសង្រ្គាម បទមនុស្សឃាត និងទារុណកម្ម ចំពោះការសម្លាប់អ្នកទោសគុកទួលស្លែងយ៉ាងតិច១២៣៨០នាក់។ អង្គជំនុំជម្រះសាលាដំបូងកាលពីខែកក្កដា ឆ្នាំ ២០១០បានសម្រេចផ្ដន្ទាទោសឌុចឲ្យជាប់ពន្ធនាគាចំនួន៣៥ ប៉ុន្ដែទោសនេះត្រូវបានកាត់កងនៅត្រឹម១៩ឆ្នាំវិញ។ កាលពីខែកញ្ញា អង្គជំនុំជម្រះតុលាការកំពូលនៃសាលាក្ដីខ្មែរក្រហមបានឲ្យដឹងថា ការប្រកាសសាលដីកាក្នុងសំណុំរឿងឌុចនឹងធ្វើឡើងនៅដំណាច់ឆ្នាំនេះ ខណៈដែលការកាត់ទោសឌុចចប់សព្វគ្រប់ដោយតុលាការកំពូលអស់រយៈពេលប្រាំពីរខែគត់នៅថ្ងៃនេះ។ លោកស្រី គ្លែ ដាហ្វ៊ី អ្នកឃ្លាំមើលដំណើរការកាត់ទោសរបស់អង្គការយុត្តិធម៌សង្គមសេរី OSJI របស់សហរដ្ឋអាមេរិក មានប្រសាសន៍ថា អ្នកស្រីបានឮថា ការប្រកាសសាលដីកាដោយតុលាការកំពូលក្នុងសំណុំរឿងឌុចនឹងធ្វើនៅចុងឆ្នាំនេះ ឬដើមឆ្នាំក្រោយ។ លោកស្រីយល់ថា វាយូរដែរហើយសម្រាប់ការរង់ចាំរបស់ជនជាប់ចោទក៏ដូចជាការរង់ចាំរបស់ប្រជាពលរដ្ឋកម្ពុជា។ យ៉ាងណាក៏ដោយការទន្ទឹងរង់ចាំក្នុងពេលនេះគឺថា តើសាលដីការបស់អង្គជំនុំជម្រះតុលាការកំពូលនឹងតម្កល់ការសម្រេចរបស់អង្គជំនុំជម្រះសាលាដំបូងឬយ៉ាងណា? លោកជុំ ម៉ី និងលោកប៊ូ ម៉េង គឺជាជនរងគ្រោះតែពីររូបគត់បច្ចុប្បន្ននៅរស់រានមានជីវិត បន្ទាប់ពីអតីតអ្នកទោសគុកទួលស្លែង ដែលបានរួចផុតពីការកាប់សម្លាប់ប្រមាណជិតដប់នាក់ បានស្លាប់ជាបន្ដបន្ទាប់។ លោកជុំ ម៉ី បច្ចុប្បន្នគឺជាប្រធានសមាគមជនរងគ្រោះ ដោយរបបកម្ពុជាប្រជាធិបតេយ្យហៅកាត់ថា ក្សេមក្សាន្ដ។ សម្រាប់រូបលោក ប្រសិនបើតុលាការកំពូលរក្សាការផ្ដន្ទាទោសឌុចត្រឹម៣៥ដូចមុននោះ វានឹងមិនយុត្តិធម៌សម្រាប់ជនរងគ្រោះនោះទេ។ «ប្រសិនបើគាត់ដាក់ទោស(ឌុច)លើសពី៣៥ឆ្នាំ ដូចព្រះរាជអាជ្ញាទាមទារឲ្យមានការដាក់ទោសចំនួន៤៥ឆ្នាំ នោះគឺជាយុត្តិធម៌ហើយ»។ លោកប៊ូ ម៉េងមានប្រសាសន៍ថា លោកនឹងសប្បាយចិត្ត ប្រសិនបើតុលាការកំពូលផ្តន្ទាទោសឌុចឲ្យជាប់ពន្ធនាគារលើសពីរយៈពេល៣៥ឆ្នាំ ពីព្រោះគឺជាការដាក់ទោសដែលមិនមានតុល្យភាពជាមួយនឹងចំនួនជនរងគ្រោះ ដែលបានស្លាប់បាត់បង់ជីវិត។ «វាអត់មានតុល្យភាពនឹងជីវិតមនុស្ស ដែលបានស្លាប់រាប់លាននាក់ក្នុងសម័យប៉ុល ពតទេ។ សុំ(ដាក់ទោស) មួយជីវិតដើម្បីឲ្យអ្នកដឹកនាំជំនាន់ក្រោយកុំឲ្យយកតម្រាប់តាមឌុច»។ ឌុចមានអាយុ៦៩ឆ្នាំ។ គាត់ត្រួតត្រាគុកទួលស្លែងពីឆ្នាំ១៩៧៦ដល់ខែមករា ឆ្នាំ១៩៧៩។ គាត់ត្រូវបានបញ្ជូនពីការឃុំឃាំងបណ្ដោះអាសន្ននៅតុលាការយោធានៅឆ្នាំ២០០៧។ សហព្រះរាជអាជ្ញាទាំងពីររូបគឺលោកអាន់ឌ្រូ ខេលី និងលោកស្រីជា លាងបានស្នើឲ្យតុលាការកំពូលផ្ដន្ទាទោសឌុចឲ្យជាប់ ពន្ធនាគារអស់មួយជីវិត ឬយ៉ាងហោចណាស់ចំនួន៤៥ឆ្នាំ ដោយមិនមានការបន្ធូរបន្ថយទោស។ លោកវ៉ាន់ថាន់ ពៅតារា នាយករងមជ្ឈមណ្ឌលឯកសារកម្ពុជាមានប្រសាសន៍ថា វានឹងធ្វើឲ្យមានការប៉ះពាល់ដល់ទំនុកចិត្តរបស់ជនរងគ្រោះ ប្រសិនបើអង្គជំនុំជម្រះតុលាការកំពូលរក្សាការដាក់ទោសឌុចដូចមុន។ «ប្រហែលជាធ្វើឲ្យមានការប៉ះពាល់ដល់ការជឿទុកចិត្តរបស់គាត់លើតុលាការ។ តែបើការសម្រេចផ្ទុយពីនេះតាមការស្នើសុំរបស់សហព្រះរាជអាជ្ញាឲ្យតំឡើងទោសឌុចនោះ វានឹងមានន័យសម្រាប់ជនរងគ្រោះ ពីព្រោះទីមួយគាត់អាចទទួលយកបាន ទីពីរធ្វើឲ្យគាត់ស្ងប់ចិត្ត»។ ក៏ប៉ុន្ដែលោកនេត្រ ភក្ដ្រា អ្នកនាំពាក្យសាលាក្ដីខ្មែរក្រហមខាងភាគីកម្ពុជាមានប្រសាសន៍ថា ការសម្រេចទោសឌុចជាចុងក្រោយយ៉ាងណា គឺសុទ្ធតែជាប្រយោជន៍នៃយុត្តិធម៌។ «ការសម្រេចយ៉ាងណានោះគឺជាការសម្រេចមួយប្រកបដោយនីតិវិធីច្បាប់ ហើយវានៅតែឆ្លើយតបទៅនឹងផលប្រយោជន៍យុត្តិធម៌»។ ទីប្រឹក្សាច្បាប់របស់មជ្ឈមណ្ឌលឯកសារកម្ពុជាលោកស្រីអាន ហេនដិល (Anne Heindel) ធ្លាប់បានពន្យល់ថា ភាពស្មុគ្រស្មាញក្នុងសំណុំរឿងឌុច និងកង្វះពិសោធន៍របស់អង្គជំនុំជម្រះតុលាការកំពូលរបស់សាលាក្ដីខ្មែរក្រហមក្នុងការកាត់ក្ដីសំណុំរឿងឧក្រិដ្ឋកម្មបែបនេះ បាននាំឲ្យមានការប្រើប្រាស់ពេលវេលាច្រើន។ លោកឡាស អលសិន និងលោកស្រីអាន ហេនដិលក៏ធ្លាប់បានលើកឡើងពីបញ្ហាបកប្រែភាសាផងដែរ ដែលជំរុញឲ្យមានភាពស្មុគ្រស្មាញដល់ដំណើរការប្រកាសសាលដីការបស់តុលាការកំពូល។ ក៏ប៉ុន្ដែប្រភពស្និទ្ធិនឹងសាលាក្ដីខ្មែរក្រហមមួយចំនួនបានបង្ហាញពីភាពមិនទាន់ចុះសម្រុងគ្នារវាងចៅក្រមអន្ដរជាតិ និងចៅក្រមជាតិក្នុងការកំណត់ទោសទណ្ឌរបស់ឌុច ដែលជារឿងមិនល្អដល់ការចេញសាលដីកា៕ This posting includes an audio/video/photo media file: Download Now |
| សេចក្តីព្រាងច្បាប់គ្រប់គ្រងអ្នកទោសរងការរិះគន់ Posted: 31 Oct 2011 10:07 AM PDT រដ្ឋសភាកម្ពុជាគ្រោងនឹងអនុម័តសេចក្តីព្រាងច្បាប់ថ្មីមួយ សម្រាប់គ្រប់គ្រងអ្នកទោសនៅក្នុងពន្ធនាគារឱ្យមានរបៀបរៀបរយនៅកម្ពុជាក្នុងសប្តាហ៍នេះ។ អង្គការសិទ្ធិមនុស្សលីកាដូបានផ្តល់អនុសាសន៍មួយចំនួនដល់រដ្ឋសភាអំពីកង្វល់ និងភាពស្រពិចស្រពិលនៃច្បាប់នេះទាក់ទងនឹងបញ្ហាចង្អៀតណែនខ្លាំងនៅក្នុងពន្ធនាគារ និងការការពារសិទ្ធិដល់ជនជាប់ឃុំ។ សេចក្តីព្រាងច្បាប់ស្តីពីពន្ធនាគារនេះមាន១០៧មាត្រា និងមានគោលដៅបង្កើត គ្រប់គ្រង និងរៀបចំចាត់ចែងពន្ធនាគារស៊ីវិល ព្រមទាំងមានគោលបំណងឃុំឃាំង គ្រប់គ្រងជនជាប់ឃុំឱ្យមានសន្តិសុខ សុវត្ថិភាព មនុស្សធម៌ និងផ្តល់សេវាថែទាំសុខភាពដល់ជនជាប់ឃុំ។ របាយការណ៍វិភាគរបស់អង្គការលីកាដូបានពិនិត្យឃើញថា ច្បាប់នេះមិនគ្រាន់តែមិនសមស្របប៉ុណ្ណោះទេ ប៉ុន្តែថែមទាំងបង្ហាញពីយុទ្ធសាស្ត្រខ្សោយមួយសម្រាប់ការគ្រប់គ្រងពន្ធនាគារ ហើយច្បាប់ពន្ធនាគារទាំងមូលគឺស្រពិចស្រពិលយ៉ាងខ្លាំង។ របាយការណ៍វិភាគនេះបានសរសេរថា ច្បាប់នេះមានការខ្វះចន្លោះផ្នែកសំខាន់មួយចំនួន និងបង្ហាញពីកង្វល់ ដែលគួរឱ្យព្រួយបារម្ភបំផុតរបស់ខ្លួនដល់រដ្ឋសភាក្នុងការយកទៅពិភាក្សា ដូចជាជនជាប់ឃុំដែលប្តឹងពីស្ថានភាពពន្ធនាគារ ឬការរំលោភបំពានគឺជាអ្នកងាយរងគ្រោះជាងគេបំផុតក្នុងចំណោមជនជាប់ឃុំទាំងអស់ ជាពិសេសគំនុំគំកួន ការសងសឹក ឬបណ្តឹងតវ៉ារបស់អ្នកជាប់ឃុំទាំងនោះត្រូវបានផ្អិបចោល។ ការប្រើប្រាស់កម្លាំងអន្តរាគមន៍មានភាពស្រពិចស្រពិលដើម្បីដោះស្រាយភាពចលាចលនៅក្នុងពន្ធនាគារ។ ស្ថានភាពពន្ធនាគារមានការកើនឡើងនូវចំនួនអ្នកជាប់ឃុំជិតទ្វេដងនៃសមត្ថភាពផ្ទុករបស់ពន្ធនាគារ។ របាយការណ៍វិភាគនេះបានសរសេរថា ច្បាប់នេះមិនបញ្ជាក់ច្បាស់ពីគោលការណ៍សំខាន់ៗនៃបទបញ្ជាផ្ទៃក្នុង និងមិនមានតម្រូវការណា ដែលអគ្គនាយកដ្ឋានពន្ធនាគារ ឬក្រសួងមហាផ្ទៃបង្កើតនីតិវិធីលម្អិតអំពីបទបញ្ជាផ្ទៃក្នុង។ លោកអំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់ថា បណ្តឹងរបស់ជនជាប់ឃុំប្រឆាំងអនុរក្សពន្ធនាគារគឺជាបញ្ហាកង្វល់ធំបំផុត ពីព្រោះគ្មានយន្តការណាមួយដើម្បីការពារដើមបណ្តឹងនៅក្នុងអំឡុងពេលដំណើរការពាក្យបណ្តឹងនេះទេ។ «គាត់ប្តឹងនៅពន្ធនាគារ។ អញ្ចឹង យើងបារម្ភខ្លាចគេធ្វើបាប ឬ គាបសង្កត់គាត់ ព្រោះពួកគាត់នៅក្នុងពន្ធនាគារ»។ លោកសុន ឆ័យ តំណាងរាស្ត្រគណបក្សសម រង្ស៊ី បានទទូលស្គាល់ថាច្បាប់នេះ ជាទូទៅមានគោលការណ៍ប្រសើរជាងមុន ប៉ុន្តែមាត្រាមួយចំនួនមិនច្បាស់លាស់ និងមិនអាចទទួលយកបានទេ។ «យើងឃើញថា ច្បាប់នេះមិនមានការបែងចែករវាងអ្នកទោសនយោបាយ និងអ្នកទោសឧក្រិដ្ឋទេ ហើយមិនបានបញ្ជាក់ឱ្យច្បាស់លាស់អំពីការប្រើប្រាស់ពន្ធនាគារ ដែលមិនមែនដាក់អ្នកជាប់ចោទទេ។ សព្វថ្ងៃនេះ ជនជាប់ចោទប្រហែល៥០ភាគរយជាប់ពន្ធនាគារជាមួយអ្នកទោសឧក្រិដ្ឋដែល»។ លោកជាម យៀប សមាជិកគណៈកម្មាធិការអចិន្ត្រៃយ៍នៃរដ្ឋសភាខាងគណបក្សប្រជាជនកម្ពុជា បានថ្លែងយ៉ាងដូច្នេះថា៖«យើងមានច្បាប់ឱ្យចំៗ ស្តីពីពន្ធនាគាររបៀបនេះគឺថា វាគ្រាន់បើជាងនៅពេលដែលយើងអត់មានច្បាប់។ ច្បាប់ទាំងឡាយ ទោះបីប្រទេសណាក៏ដោយ មិនដែលមានភាពសុក្រិត្យទេ។ យើងអាចអនុវត្តទៅ ហើយកន្លែងណាដែលជួបប្រទះនឹងភាពទាល់ច្រក មិនអាចអនុវត្តបាននោះ។ យើងអាចធ្វើវិសោធនកម្មបាននៅពេលខាងមុខ»។ សេចក្តីថ្លែងការណ៍នៃរដ្ឋសភាបានបញ្ជាក់ថា រដ្ឋសភានឹងបើកការពិភាក្សា និងអនុម័តលើសេចក្តីព្រាងច្បាប់ស្តីពីការគ្រប់គ្រងអាស៊ីដខ្លាំង និងសេចក្តីព្រាងច្បាប់ស្តីពីពន្ធនាគារនៅថ្ងៃព្រហស្បតិ៍នេះ៕ This posting includes an audio/video/photo media file: Download Now |
| ព្រះមហាវីរក្សត្រឈប់យាងចេញពីប្រទេសកម្ពុជា Posted: 31 Oct 2011 11:42 AM PDT មានព្រះរាជបន្ទូលដ៏កម្រនិងមិនដែលធ្លាប់មាននៅក្នុងព្រះរាជពិធីចម្រើនព្រះជន្ម ៨៩ព្រះវស្សាយាងចូល៩០ព្រះវស្សា និងគម្រប់ខួបលើកទី២០នៃការយាងនិវត្តន៍មកកាន់មាតុប្រទេសវិញ សម្តេចឪនរោត្តមសីហនុបានមានព្រះរាជបន្ទូលថា ចាប់ពីពេលនេះតទៅព្រះអង្គឈប់យាងនិវត្តទៅក្រៅប្រទេស ដើម្បីព្យាបាលរោគរបស់ព្រះអង្គទៀតហើយ ហើយប្រសិនណាព្រះអង្គមានបញ្ហាខាងសុខភាព ព្រះអង្គនឹងអញ្ជើញគ្រូពេទ្យចិនមកព្យាបាលនៅក្នុងប្រទេសកម្ពុជា។ នៅក្នុងចំណោមមហាជន មន្ត្រីរាជការ និងមន្ត្រីអង្គការសង្គមស៊ីវិលជាច្រើនរាប់ពាន់នាក់ សម្តេចឪនរោត្តមសីហនុបានមានព្រះរាជបន្ទូលទៀតថា ការមិនយាងចាកចេញទៅក្រៅប្រទេសនេះគឺដើម្បីបង្ហាញប្រាប់ពិភពលោកថា យើងបានរួបរួមគ្នាល្អណាស់ គឺផ្លូវសន្តិភាព ផ្លូវឯករាជ្យ និងបន្តកសាងប្រទេស។ សម្តេចឪបានបញ្ជាក់ទៀតថា យើងកសាងប្រទេសជាតិដើម្បីឲ្យកម្ពុជាប្រាស់ចាកជាដាក់ខាតពីឋានៈទន់ខ្សោយ ទៅរកឋានៈជាអំណាចមួយនៅក្នុងពិភពលោកគឺរួបរួមគ្នាជាធ្លុងមួយរវាងព្រះមហាក្សត្រ រាជរដ្ឋាភិបាល រដ្ឋសភា និងប្រជារាស្ត្រ។ «មិនមានមហិច្ឆតាដល់ទៅចង់ធ្វើមហាអំណាចនោះទេ គឺថា យើងចង់តែឲ្យគេទទួលស្គាល់ថា យើងរួបរួមគ្នា ប្រែមកថាខ្លាំងរឹងមាំ»។ សម្តេចឪនរោត្តមសីហនុ និងសម្តេចម៉ែនរោត្តមមុនីនាថសីហនុបានយាងនិវត្តន៍មកកាន់មាតុប្រទេសវិញជាលើកដំបូង កាលពីថ្ងៃទី១៤ ខែវិច្ឆិកា ឆ្នាំ១៩៩១ ក្រោយពីរបបខ្មែរក្រហមបានដួលរលំ។ រយៈពេល២០ឆ្នាំ បន្ទាប់ពីការយាងមកកាន់មាតុប្រទេសវិញ សម្តេចនរោត្តមសីហនុ ព្រះអង្គមានព្រះរាជតួនាទីយ៉ាងសំខាន់ក្នុងការដោះស្រាយវិបត្តិនយោបាយធំៗនៅក្នុងប្រទេសកម្ពុជា។ លោកនាយករដ្ឋមន្រ្តីហ៊ុន សែនបានមានប្រសាសន៍នៅថ្ងៃអាទិត្យនេះថា កន្លងមក ក៏ដូចជាបច្ចុប្បន្ន គណបក្សប្រជាជនកម្ពុជា និងរាជរដ្ឋាភិបាល ជានិច្ចកាល បានដង្ហែតាមព្រះរាជតម្រិះដ៏ថ្លៃថ្លាភ្លឺស្វាងរបស់ព្រះករុណាព្រះមហាវីរក្សត្រជាងរៀងរហូត។ «តែងបានសង្កេតថ្វាយនូវមនោសញ្ចេតនា គោរពស្រឡាញ់ក្នុងទឹកចិត្តប្រកបដោយកតញ្ញូតាធម៌ដ៏ជ្រៀលជ្រៅបំផុត និងស្មោះត្រង់បំផុតចំពោះព្រះអង្គ ព្រះបិតាឯករាជ្យជាតិ បង្រួបបង្រួមជាតិ និងផ្សះផ្សាជាតិ»។ លោកយឹម សុវណ្ណ អ្នកតំណាងរាស្ត្រ និងជាអ្នកនាំពាក្យគណបក្សប្រឆាំង [សម រង្ស៊ី] បាននិយាយថា លោកគាំទ្រឲ្យមានព្រះវត្តមានរបស់ព្រះអង្គនៅក្នុងប្រទេស។ លោកបានបញ្ជាក់ថា មានតែព្រះអង្គទេ ដែលធានានូវការបង្រួបបង្រួមជាតិ និងការពារបូរណភាពទឹកដីពិតប្រាកដ។ «វត្តមានរបស់ព្រះអង្គចូលរួមចំណែកធ្វើឲ្យយ៉ាងណាដើម្បីធានាថា ការបោះឆ្នោត នៅពេលខាងមុខនេះត្រូវតែមានវត្តមានឯកឧត្តមប្រធានសម រង្ស៊ី ហើយទង្វើឯកឧត្តមប្រធានសម រង្ស៊ីជាទង្វើមួយនៅក្នុងការការពារបូរណភាពទឹកដី នឹងមិនមែនការពារផលប្រយោជន៍របស់បរទេសទេ»។ លោកប៉ុល ហំម អ្នកនាំពាក្យគណបក្សសិទ្ធិមនុស្ស មិនបានធ្វើអត្ថាធិប្បាយចំពោះព្រះរាជតម្រិះរបស់ព្រះមហាក្សត្រទេ ក៏ប៉ុន្តែលោកបានបញ្ចេញទស្សនៈថា គណបក្សនយោបាយអាចស្តាប់ព្រះតម្រិះរបស់ព្រះអង្គ ដោយសារតែព្រះអង្គជាទីគោរពរបស់គ្រប់គណបក្សនយោបាយទាំងអស់។ «ដោយថា ដំបូងលោកមានការគោរពពីគ្រប់ភាគីនយោបាយ។ ហើយដូច្នេះតិច ឬច្រើនខ្ញុំមានជំនឿថា គ្រប់គណបក្សនយោបាយទាំងអស់អាចស្តាប់ខ្លះ។ វាអាស្រ័យទៅលើគណបក្សនយោបាយមួយៗទេបាទ។ ព្រះអង្គមានឥទ្ធិពលខាងផ្នែកសីលធម៌ បានទទួលការគោរពពីប្រជារាស្រ្តភាគច្រើន។ ដូច្នេះអាចថា ជាវិភាគទានមួយដែរ នៅក្នុងបញ្ហារបស់ប្រទេស»។ លោកធន់ សារ៉ាយ ប្រធានសមាគមសិទ្ធិមនុស្សអាដហុក បាននិយាយថា សម្តេចឪ ជាព្រះបិតាបង្រួបបង្រួមជាតិ ហើយនៅពេលដែលព្រះអង្គគង់នៅក្នុងប្រទេស ធ្វើឲ្យប្រជារាស្ត្រមានភាពកក់ក្តៅ។ ក៏ប៉ុន្តែទោះជាងយ៉ាងណាក៏ដោយ បញ្ហាសំខាន់ត្រូវតែដោះស្រាយបញ្ហាសង្គម ដែលកំពុងតែកើតមានឡើងនៅក្នុងពេលបច្ចុប្បន្ននេះ។ «កុំឲ្យមានភាពក្រីក្រ ដែលមានភាពអយុត្តិធម៌ ការរឹបអូសយកដីធ្លី ការដែលមានអយុត្តិមធ៌នៅក្នុងប្រព័ន្ធតុលាការ។ កុំឲ្យមានគម្លាតឆ្ងាយពេក រវាងអ្នកមាននិងអ្នកក្រហ្នឹង ហើយនឹងការដែលធ្វើអ្វី ដែលគម្លាតហ្នឹងកាន់តែឆ្ងាយទៀត។ អាហ្នឹងហើយជាការរក្សាស្ថិរភាពមួយសំខាន់ជាងការគង់នៅរបស់ព្រះអង្គទៀត»។ សម្តេចឪនរោត្តមសីហនុ និងសម្តេចម៉ែនរោត្តមមុនីនាថសីហនុ យូរម្តងៗ ព្រះអង្គបានយាងចាកចេញពីប្រទេសកម្ពុជា ទៅគង់ប្រថាប់នៅក្នុងប្រទេសចិនប្រជាមានិត ដើម្បីព្យាបាលរោគរបស់ព្រះអង្គ៕ This posting includes an audio/video/photo media file: Download Now |
| វេទិកាគណបក្សសិទ្ធិមនុស្សត្រូវរំខាន Posted: 31 Oct 2011 09:02 AM PDT ក្រុមមន្ត្រីគណបក្សសិទ្ធិមនុស្ស នៅថ្ងៃសៅរ៍បានចោទប្រកាន់ថា ប្រធានក្រុមប្រឹក្សាឃុំធ្លាប្រជុំ ស្រុកកោះអណ្តែត ខេត្តតាកែវ ខាងគណបក្សប្រជាជនកម្ពុជា បានប៉ុនប៉ងរារាំងមិនឲ្យគណបក្សសិទ្ធិមនុស្ស រៀបចំវេទិកាសម្តែងមតិ ដោយបានចោទប្រកាន់ថា វេទិកានេះធ្វើឡើងដោយឥតច្បាប់។ គណបក្សសិទ្ធិមនុស្សរបស់លោកកឹម សុខាត្រូវរៀបចំវេទិកាសម្តែងមតិមួយនៅថ្ងៃសៅរ៍ នៅឃុំធ្លាប្រជុំ ស្រុកកោះអណ្តែត ខេត្តតាកែវ ក៏ប៉ុន្តែអាជ្ញាធរបានព្រមានថា មិនអនុញ្ញាតឲ្យរៀបចំវេទិកានេះទេ។ លោកអ៊ូ ច័ន្ទរិទ្ធិ អ្នកតំណាងគណបក្សសិទ្ធិមនុស្ស បាននិយាយថា លោក សាត់ សយ ប្រធានក្រុមប្រឹក្សាឃុំធ្លាប្រជុំ ខាងគណបក្សប្រជាជនកម្ពុជា បានព្រមានចំៗថា មិនឲ្យគណបក្សសិទ្ធិមនុស្សធ្វើសម្មភាពណាមួយ នៅលើទឹកដីរបស់លោក ក្រៅពីគណបក្សប្រជាជនកម្ពុជាទេ។ លោកបានមានប្រសាសន៍ថា គណបក្សសិទ្ធិមនុស្សបានជូនដំណឹងទៅអាជ្ញាធរឃុំរួចហើយកាលថ្ងៃទី ២៥កន្លងទៅនេះ ដើម្បីរៀបចំវេទិកាសម្តែងមតិនេះ។ «ព្រឹកមិញនេះ សកម្មជនលោកបានរៀបចំ ហើយប៉ូលិសបានមកឃាត់មិនឲ្យរៀបចំរោងដើម្បីធ្វើការជួបជុំនោះទេ។ តាមប្រសាសន៍របស់ជំទប់ទីមួយថា ថ្នាក់ខេត្តដែលគណបក្សសិទ្ធិមនុស្សបានទាក់ទងទៅពីរថ្ងៃមុនហ្នឹង លោកជំទប់ហ្នឹងថាមិនអនុញ្ញាតឲ្យគណបក្សណាមកធ្វើសកម្មភាពក្នុងទឹក ដីរបស់គាត់ទេ»។ លោកសាត់ សយ ប្រធានក្រុមប្រឹក្សាឃុំធ្លាប្រជុំ បានច្រានចោលទៅនឹងការចោទប្រកាន់នេះ ដោយលោកបាននិយាយថា លោកមិនបានរារាំង ការរៀបចំវេទិកាសម្តែងមតិរបស់គណបក្សសិទ្ធិមនុស្សនោះទេ។ «មាននណារគេឃាត់ គេឃាំងអី»។ លោកហេង វីរៈ ជំទប់ទីពីរ ឃុំធ្លាប្រជុំខាងគណបក្សសម រង្ស៊ី បាននិយាយថា គណបក្សសិទ្ធិមនុស្សមិនមានទីស្នាក់ការនៅក្នុងឃុំនេះទេ ដូច្នេះអាជ្ញាធរមិនអនុញ្ញាតឲ្យរៀបចំវេទិកាទេ។
«បើយើងមានស្នាក់ការ គណបក្សយើងអាចឃោសនាបាន ឬក៏ផ្សព្វផ្សាយនៅស្នាក់ការគណបក្សយើងបាន។ ដូចយើងមិនទាន់ដល់ថ្ងៃឃោសនាអីញ្ចឹង ហើយយើងធ្វើអញ្ចឹងវាដូចឃោសនាអញ្ចឹង»។ លោកណុប សុវណ្ណ ប្រធានគណបក្សសិទ្ធិមនុស្សប្រចាំខេត្តតាកែវ បាននិយាយថា ជាទូទៅគណបក្សបានជូនដំណឹងទៅអាជ្ញាធរខេត្តស្តីអំពីការរៀបចំ វេទិកា ឬក៏ការរៀបចំការប្រជុំផ្សេងៗ ហើយយើងមិនចាំបាច់សុំច្បាប់អនុញ្ញាតអ្វីបន្ថែមទៀតទេ។ លោកបានបញ្ជាក់ថា ការរារាំងនេះ គឺជាការបំបិទសិទ្ធិសេរីភាពមួយទៀត ក្នុងការចូលរួមសកម្មភាពគណបក្សនយោបាយ។ «គណបក្សប្រជាជនកម្ពុជា ដែលកំពុងកាន់អំណាចសព្វថ្ងៃនេះ មានការគាបសង្កត់ទៅលើគណបក្សនយោបាយដទៃ ដែលកំពុងតែរៀបចំនៅក្នុងប្រទេសកម្ពុជានេះ។ ខ្ញុំគិតថា គេគំរាមយើងឈប់។ គេគំរាម យើងឈប់។ យើងឥតអាចធ្វើអ្វីជូនប្រជាពលរដ្ឋបាន មិនអាចផ្សព្វផ្សាយគោលការណ៍គណបក្សជូនប្រជាពលរដ្ឋបានទេ»។ លោកជាម យៀប អ្នកតំណាងរាស្ត្រខាងគណបក្សប្រជាជនកម្ពុជា បាននិយាយថា គណបក្សកាន់អំណាច មិនមានគោលការណ៍ទៅគំរាមកំហែងគណបក្សនយោបាយណាមួយទេ។ លោកបានមានប្រសាសន៍ថា ប្រសិនបើការរៀបចំវេទិកាណាមួយគោរពទៅតាមច្បាប់ត្រឹមត្រូវទេ អាជ្ញាធរមិនរារាំងទេ។ «មើលប្រធានបទយើងសារឡើងវិញ ព្រោះថា យើងត្រូវប្រាប់ពីមូលហេតុ ឬពីគោលបំណងនិង សំណើច្បាស់់លាស់អំពីការប្រជុំហ្នឹង។ អាហ្នឹងយកទៅគេពិនិត្យតាមហ្នឹង។ កាលណាធ្វើទៅដោយគ្មានការប៉ះពារ។ អាហ្នឹងគេនឹងអាចអនុញ្ញាតឲ្យ»។ លោកចាន់ សាវ៉េត មន្រ្តីឃ្លាំមើលការរំលោភសិទ្ធិមនុស្សរបស់សមាគមសិទ្ធិមនុស្សអាដហុក បាននិយាយថា សិទ្ធិសេរីភាពនៃការជួបប្រជុំ ត្រូវបានការពារដោយរដ្ឋធម្មនុញ្ញ ហើយការរារាំងណាមួយពីអាជ្ញាធរ គឺជាការរំលោភសិទ្ធិមនុស្សរបស់ប្រជាពលរដ្ឋ។ «ស្នើសុំឲ្យរាជរដ្ឋាភិបាល ក៏ដូចជាអាជ្ញាធរពាក់ព័ន្ធទាំងឡាយ គួរតែគោរពសេរីភាពនេះ ឲ្យបានមុតមាំទៅ ហើយនាំគ្នាគោរពសេរីភាពនេះឲ្យបានមុតមាំទៅ ធ្វើឲ្យប្រទេសយើងអាចមានការវិវត្តន៍ទៅមុខ អាចជាលទ្ធិប្រជាធិបតេយ្យពេញបរិបូរណ៌។ ក៏ដូចជាការគោរពសិទ្ធិពេញលេញ ដែលប្រជាពលរដ្ឋយើងទាំងអស់គ្នាទាមទារចង់បានបាទ»។ លោកចាន់ សាវ៉េតបានមានប្រសាសន៍ទៀតថា នេះមិនមែនជាលើកទីមួយទេ ដែលអាជ្ញាធរបានរារាំង។ កន្លងមកអង្គការសង្គមស៊ីវិល និងគណបក្សនយោបាយមួយចំនួនតែងតែរងការរំខានពីអាជ្ញាធរ ក្នុងការរៀបចំវេទិកាសម្តែងមតិ ឬក៏ការជួបប្រជុំផ្សេងៗ៕ This posting includes an audio/video/photo media file: Download Now |
| Posted: 30 Oct 2011 06:49 PM PDT ព័ត៌មានចុងក្រោយបំផុត៖ អាហ្វហ្កានីស្ថាន៖ ក្រុមមន្ត្រីអាហ្វហ្កានីស្ថានបាននិយាយថា ការបំផ្ទុះគ្រាប់បែកអត្តឃាតក្នុងរថយន្តមួយគ្រឿងបានបណ្តាលឲ្យមនុស្ស៤នាក់ស្លាប់នៅជិតការិយាល័យអង្គការក្រៅរដ្ឋាភិបាលមួយនៅក្នុងក្រុងកាន់ដាហារ៍ (Kandahar) នាភាគខាងត្បូងប្រទេសអាហ្វហ្គានីស្ថាន។ ស៊ីរី៖ សម្ព័ន្ធអារ៉ាប់កំពុងរង់ចាំការឆ្លើយតបពីប្រទេសស៊ីរីចំពោះផែនការដែលបានស្នើទ្បើងមួយដើម្បីបញ្ចប់ការបង្ក្រាបដ៏ឃោរឃៅរបស់រដ្ឋាភិបាលស៊ីរីលើការបះបោររបស់ក្រុមប្រឆាំង។ អ៊ីស្រាអែល/ប៉ាឡេស្ទីន៖ នាថ្ងៃចន្ទនេះ ប្រជាពលរដ្ឋប៉ាឡេស្ទីនរំពឹងថារដ្ឋប៉ាឡេស្ទីននឹងទទួលបានសមាជិកភាពពេញសិទ្ធិនៅក្នុងអង្គការយូណេស្កូ (UNESCO) របស់អង្គការសហប្រជាជាតិនៅក្នុងការបោះឆ្នោតមួយដែលនឹងជួយជ្រោមជ្រែងដល់កិច្ចខិតខំប្រឹងប្រែងរបស់ពួកគេដើម្បីឲ្យមានការទទួលស្គាល់រដ្ឋប៉ាឡេស្ទីនជារដ្ឋឯករាជ្យមួយពីអន្តរជាតិ។ លីប៊ី៖ អង្គការអូតង់គ្រោងនឹងបញ្ចប់បេសកកម្មរបស់ខ្លួនក្នុងប្រទេសលីប៊ីនៅថ្ងៃចន្ទនេះ ក្រោយពីបានធ្វើយុទ្ធនាការតាមអាកាសអស់រយៈពេល៧ខែដើម្បីការពារក្រុមជនស៊ីវិលតាមរយៈបេសកកម្មដែលកំណត់ឲ្យដោយក្រុមប្រឹក្សាសន្តិសុខរបស់អង្គការសហប្រជាជាតិ។ <!--IMAGE-RIGHT--> ព័ត៌មាននៅពេលមុននេះ៖ កៀហ្ស៊ីស៊ីស្ថាន ៖ កាលពីយប់ថ្ងៃអាទិត្យអតីតនាយករដ្ឋមន្ត្រី កៀហ្ស៊ីស៊ីស្ថាន បាននាំមុខគេនៅក្នុងការបោះឆ្នោតប្រធានាធិបតីលើកទីមួយក្នុងប្រទេសនេះនាផ្នែកកណ្តាលនៃទ្វីបអាស៊ីចាប់តាំងពីមានការបះបោរដែលបានទម្លាក់អតីតប្រធានាធិបតី kurmanbekBakiyev ពីតំណែង។ អ៊ីស្រាអែល ៖ កងយន្តហោះចម្បាំងអ៊ីស្រាអែលបានវាយប្រហារលើពួកជនសកម្មប្រយុទ្ធ Palestine មួយក្រុមនៅក្នុងតំបន់ Gaza កាលពីថ្ងៃអាទិត្យបណ្តាលឱ្យមនុស្សម្នាក់ស្លាប់តែប៉ុន្មានម៉ោងក្រោយពីពួកជនសកម្មប្រយុទ្ធបានបាញ់រ៉ុក្កែតចូលទៅក្នុងផ្នែកខាងត្បូងនៃប្រទេសអ៊ីស្រាអែលក្នុងថ្ងៃទីពីរ។ ស៊ីរី ៖ ពួកអ្នកតំណាងសម្ព័ន្ធអារ៉ាប់បានជួបជាមួយពួកមន្ត្រីស៊ីរីនៅក្នុងរដ្ឋធានី Doha នៅ Qatar ដើម្បីទាមទារឱ្យមានការបញ្ឈប់ការសម្លាប់ពួកជនស៊ីវិលនៅក្នុងការបង្ក្រាបដោយអាជ្ញាធរស៊ីរីទៅលើការបះបោរមួយរបស់ក្រុមប្រឆាំង។ អ៊ីរ៉ាក់ ៖ កាសែត The New York Times រាយការណ៍ថាសហរដ្ឋអាមេរិកធ្វើការចចារជាមួយគុយវ៉ែតដើម្បីអនុញ្ញាតឱ្យក្រុមទាហានប្រយុទ្ធអាមេរិកាំងតាំងមូលដ្ឋាននៅក្នុងតំបន់ឈូងសមុទ្រពែក្ស ក្រោយបញ្ចប់ការដកទាហានថយពីអ៊ីរ៉ាក់ដែលបានត្រូវប្រកាសមិនឱ្យហួសពីដំណាច់ឆ្នាំនេះទេ។ កែនយ៉ា ៖ កងយន្តហោះប្រតិកម្មប្រយុទ្ធដែលគេសង្ស័យថាជារបស់ប្រទេស Kenya បានទម្លាក់គ្រាប់បែកលើក្រុង Jilib នាផ្នែកខាងត្បូងនៃប្រទេសសូម៉ាលីបណ្តាលឱ្យមនុស្សយ៉ាងតិចណាស់១០នាក់ស្លាប់។ អង់គ្លេស ៖ នាយករដ្ឋមន្ត្រីអង់គ្លេស ដាវីឌ កាម៉េរ៉ូន បានមានប្រសាសន៍ថានាវាជំនួញដែលមានដោតទង់ជាតិអង់គ្លេសដែលធ្វើដំណើរក្នុងដែនសមុទ្រទល់មុខនឹងតំបន់ស្នែងនៃទ្វីបអាហ្វ្រ៊ិកដែលភាសាអង់គ្លេសហៅថា Horn of Africa នឹងត្រូវអនុញ្ញាតឱ្យមានពួកឆ្មាំប្រដាប់អាវុធដើម្បីរាំងរាការពារនឹងពួកចោរសមុទ្រ។ សហរដ្ឋអាមេរិក ៖ មានព្យុះទឹកកកដែលមិនសូវមានមួយក្នុងខែតុលាក្នុងរដ្ឋមួយចំនួននាផ្នែកឦសាននៅអាមេរិក ដែលបានបណ្តាលឱ្យមានមនុស្សបីនាក់ស្លាប់និងគ្មានភ្លើងអគ្គិសនីក្នុងផ្ទះនិងហាងជំនួញជាង២លាន៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
