VOA News: ព័ត៌មាន: “មេធាវី នួន ជា មិនឆ្លើយសំណួររបស់តុលាការក្រុងភ្នំពេញដោយថាមិនឯករាជ្យ” plus 3 more |
- មេធាវី នួន ជា មិនឆ្លើយសំណួររបស់តុលាការក្រុងភ្នំពេញដោយថាមិនឯករាជ្យ
- រដ្ឋសភាអនុម័តមាត្រាដ៏ចម្រូងចម្រាស់នៃច្បាប់អាស៊ីដ
- ព័ត៌មានអន្តរជាតិ៖ ០៣ វិច្ឆិកា
- មន្ត្រីយោធាជាន់ខ្ពស់ពីររូបត្រូវឃុំខ្លួនទាក់ទិននឹងការជួញដូរគ្រឿងញៀន
| មេធាវី នួន ជា មិនឆ្លើយសំណួររបស់តុលាការក្រុងភ្នំពេញដោយថាមិនឯករាជ្យ Posted: 03 Nov 2011 07:08 AM PDT សហមេធាវីបរទេសរបស់ នួន ជា បានបដិសេធមិនព្រមឆ្លើយនឹងសំណួររបស់ព្រះរាជអាជ្ញារងសាលាដំបូងរាជធានីភ្នំពេញ នៅថ្ងៃព្រហស្បតិ៍នេះ ក៏ប៉ុន្ដែបានទទូចឲ្យតុលាការចាត់នីតិវិធីប្រឆាំងនឹងលោកនាយករដ្ឋមន្ដ្រី ហ៊ុន សែន និងមន្ដ្រីជាន់ខ្ពស់ក្នុងរដ្ឋាភិបាល ចំពោះការចោទប្រកាន់ពីការជ្រៀតជ្រែក ផ្នែកនយោបាយលើសាលាក្ដីខ្មែរក្រហម។ លោកព្រះរាជអាជ្ញារង សុខ រឿន បានកោះហៅសហមេធាវីបរទេសរបស់អតីតបងធំទី២ នៃរបបកាប់សម្លាប់របស់ពួកខ្មែរក្រហម គឺលោក ម៉ាយឃើល ផេសម៉ិន (Michiel Pestman) ឲ្យចូលខ្លួននៅថ្ងៃព្រហស្បតិ៍នេះ ដើម្បីសាកសួរ និងប្រគល់ភស្ដុតាង រីឯលោក អេនឌ្រូ អ៊ាននូហ្ស៊ី (Andrew Ianuzzi) ទីប្រឹក្សាច្បាប់នៃមេធាវីការពារ នួន ជា នឹងត្រូវចូលខ្លួនទៅសាលាដំបូងរាជធានីភ្នំពេញនៅថ្ងៃស្អែក។ លោក ម៉ាយឃើល ផេសម៉ិន ថ្លែងក្នុងសន្និសីទកាសែតក្នុងទីក្រុងភ្នំពេញបន្ទាប់ពីចូលខ្លួនទៅតុលាការថា ព្រះរាជអាជ្ញារងមិនឯករាជ្យ។ «មិនមានប្រយោជន៍ដែលយើងត្រូវឆ្លើយនឹងសំនួរទេ ពីព្រោះខ្ញុំជឿថា គាត់មិនឯករាជ្យ ហើយខ្ញុំគិតថា គាត់នឹងបិទការស៊ើបអង្កេតឆាប់ៗនេះ»។ កាលពីថ្ងៃច័ន្ទសប្ដាហ៍មុន មេធាវីអន្ដរជាតិរបស់លោក នួន ជា បានដាក់បណ្ដឹងទៅកាន់សាលាដំបូងរាជធានីភ្នំពេញប្រឆាំងទៅនឹងលោកនាយករដ្ឋមន្ដ្រីខ្មែរហ៊ុន សែន និងលោកជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភា លោកហេង សំរិន ប្រធានកិត្តិយសគណបក្សនេះ លោកហោ ណាំហុង រដ្ឋមន្រ្ដីការបរទេស លោកគាត ឈុន រដ្ឋមន្ដ្រីក្រសួងសេដ្ឋកិច្ចនិងហិរញ្ញវត្ថុ លោកគង់ សំអុល រដ្ឋមន្ដ្រីក្រសួងព្រះបរមរាជវាំង លោកអ៊ុក ប៊ុនឈឿន និងលោកស៊ីម កា សមាជិកព្រឹទ្ធសភា និង មន្ដ្រីជាន់ខ្ពស់បំផុតរបស់គណបក្សប្រជាជនកម្ពុជាកំពុងកាន់អំណាច លោកឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ លោករដ្ឋមន្ដ្រីក្រសួងព័ត៌មាន ខៀវ កាញារីទ្ធ និងប្រឆាំង លោក ផៃ ស៊ីផាន រដ្ឋលេខាធិការទីស្ដីការគណៈរដ្ឋមន្ត្រី។ ក្នុងបណ្ដឹងនោះ ក្រុមមេធាវីការពារបានសំអាងថា លោកប្រមុខរដ្ឋាភិបាល មេដឹកនាំ និងមន្ដ្រីជាន់ខ្ពស់ គណបក្សប្រជាជនកម្ពុជា ទាំងនោះបានធ្វើឲ្យប៉ះពាល់ដល់វិស័យយុតិ្តធម៌ ដោយបានធ្វើសេចក្ដីថ្លែងការណ៍ជាបន្ដបន្ទាប់គ្នាប្រឆាំងនឹងសំណុំរឿង០០៣ និង០០៤ ដែលបង្កឲ្យមានភាពចម្រូងចម្រាស់រវាងភាគីកម្ពុជានិងអង្គការសហប្រជាជាតិ។ នៅក្នុងសន្និសីទកាសែតនោះ មេធាវី នួន ជា សំអាងថា មន្ដ្រីទាំងនោះមិនត្រឹមតែគំរាមដល់ឯករាជ្យភាព និងភាពស្របច្បាប់របស់ស្ថាប័នតុលាការតែប៉ុណ្ណោះទេ ប៉ុន្ដែបានប៉ះពាល់ដោយផ្ទាល់ដល់សិទ្ធិរបស់កូនក្ដីរបស់លោក និងប៉ះពាល់ដល់ការកាត់ក្ដីដោយត្រឹមត្រូវក្នុងសំណុំរឿង០០២ ផងដែរ។ លោកមេធាវី ម៉ាយឃើល ផេសម៉ិន បានទទូចចង់ឃើញសាលាដំបូងរាជធានីភ្នំពេញចាត់ការលើបណ្ដឹងរបស់ក្រុមលោកបន្ទាប់ពីបណ្ដឹងស្ដីពីការចោទប្រកាន់ពីអំពើពុករលួយក្នុងសាលាក្ដីខ្មែរក្រហមកាលពីលើកមុនត្រូវបានទាត់ចោល។ លោក សុខ រឿន ព្រះរាជអាជ្ញារងតុលាការក្រុងភ្នំពេញ មិនអាចទាក់ទងបានទេ នៅថ្ងៃនេះ ដោយទូរស័ព្ទរបស់លោករោទិ៍គ្មានអ្នកទទួល។ កាលពីសប្ដាហ៍មុន លោក ហោ ណាំហុង ដែលមានឈ្មោះក្នុងបណ្ដឹងរបស់ក្រុមមេធាវីការពារ នួន ជា មានប្រសាសន៍ថា បណ្ដឹងប្រឆាំងរូបលោក គឺជាការលេងកំប្លែងរបស់ក្រុមមេធាវីការពារ នួន ជា។ ក្នុងរយៈពេលចុងក្រោយនេះ រដ្ឋាភិបាលខ្មែរបានបង្ហាញជំហរថា ខ្លួនមិនធ្វើការជ្រៀតជ្រែកលើការសម្រេចចិត្តរបស់សាលាក្ដីខ្មែរក្រហមនោះទេ។ ជាពិសេសបន្ទាប់ពីមានការលាលែងពីការងាររបស់សហចៅក្រមស៊ើបអង្កេតអន្ដរជាតិ លោក ស៊ីកហ៊្វ្រីត ប៊្លុង។ លោក ប៊្លុង ដែលបានសំអាងថា មានការជ្រៀតជ្រែករបស់រដ្ឋាភិបាលលើការស៊ើបអង្កេតក្នុងសំណុំរឿង ០០៣ និង ០០៤ ដែលកំពុងស្ថិតក្នុងភាពប្រទាញប្រទង់រវាងអង្គការសហប្រជាជាតិជាមួយរដ្ឋាភិបាល៕ This posting includes an audio/video/photo media file: Download Now |
| រដ្ឋសភាអនុម័តមាត្រាដ៏ចម្រូងចម្រាស់នៃច្បាប់អាស៊ីដ Posted: 03 Nov 2011 06:55 AM PDT នៅថ្ងៃព្រហស្បតិ៍នេះ សមាជិកសភាភាគច្រើន បានអនុម័តមាត្រានៃសេចក្តីព្រាងច្បាប់អាស៊ីដខ្លាំងដ៏មានរឿងចម្រូងចម្រាស់ទាក់ទងដល់ការព្យាបាលជនរងគ្រោះដោយសារអាស៊ីដខ្លាំង ដោយឥតគិតថ្លៃរហូតដល់ជាសះស្បើយ ជំនួសការព្យាបាលបឋម។ មាត្រាដែលធ្វើឲ្យមានកង្វល់ គឺមាត្រា១១អំពីការព្យាបាលដល់ជនរងគ្រោះដោយទឹកអាស៊ីដ ត្រូវបានអនុម័តដោយសំឡេង៩១លើ៩៣ បន្ទាប់ពីគេបានលុបចោលពាក្យ «បឋម ពីមណ្ឌលសុខភាព មន្ទីរពេទ្យរដ្ឋ ឬ គ្រឹះស្ថានព្យាបាលសាធារណៈផ្សេងទៀត ត្រូវផ្តល់ការសង្គ្រោះ និងការព្យាបាលបឋមដល់ជនរងគ្រោះដោយសារអាស៊ីដខ្លាំង ដោយឥតគិតថ្លៃ» មកជា «មណ្ឌលសុខភាព មន្ទីរពេទ្យរដ្ឋ ឬ គ្រឹះស្ថានព្យាបាលសាធារណៈផ្សេងទៀត ត្រូវផ្តល់ការសង្គ្រោះ និងការព្យាបាលដល់ជនរងគ្រោះដោយសារអាស៊ីដខ្លាំង ដោយឥតគិតថ្លៃ»។ លោកស្រី ឃួន សុដារី ប្រធានគណៈកម្មការសិទ្ធិមនុស្ស និងទទួលពាក្យបណ្តឹងនៃរដ្ឋសភាខាងគណបក្សប្រជាជនកម្ពុជា បានថ្លែងនៅក្នុងសម័យប្រជុំសភាថា ជនរងគ្រោះដោយសារអាស៊ីដរងទុក្ខលំបាកវេទនាទាំងផ្លូវកាយផ្លូវចិត្ត និងសុខភាពផ្លូវកាយផ្លូវចិត្ត និងដល់អាយុជីវិតថែមទៀតផង។ «យើងឃើញថា រាជរដ្ឋាភិបាលបានយកចិត្តទុកដាក់ជួយដល់ជនរងគ្រោះដោយសារអាស៊ីដដោយការសង្គ្រោះ ការព្យាបាលដោយឥតគិតថ្លៃ។ នេះគឺជាឆន្ទៈមួយល្អប្រពៃណាស់ ពីព្រោះគិតថាជនរងគ្រោះដោយសារទឹកអាស៊ីដនេះ មិនមែនព្យាបាលរយៈពេលខ្លីទេ គឺរយៈពេលវែងណាស់។ ដូច្នេះ នេះគឺជាឆន្ទៈនយោបាយ និងទឹកចិត្តយកចិត្តទុកដាក់ចំពោះសុខុមាលភាព សណ្តាប់ធ្នាប់សង្គម និងសុខភាពរបស់ប្រជាពលរដ្ឋដដែល»។ លោកស្រី មួរ សុខហួរ តំណាងរាស្ត្រគណបក្សសម រង្សី បានថ្លែងថា ការលុបពាក្យ «បឋម» នេះ គឺជាការណ៍ត្រឹមត្រូវ។ ជំពូកទី៣ មិនមែនត្រឹមតែគាំពារប៉ុណ្ណោះទេ ប៉ុន្តែទាំងការពារដល់ជនរងគ្រោះដោយសារអាស៊ីដដើម្បីធ្វើជាសាក្សីនៅក្នុងតុលាការ។ លោកស្រី មួរ សុខហួរ បានបន្ថែមថា មាត្រា១១គួរបន្ថែម ការព្យាបាលដោយឥតគិតថ្លៃអស់មួយជីវិត។ ជនប្រព្រឹត្តបទល្មើសត្រូវបានរឹបអូសយកទ្រព្យសម្បត្តិមកសងជំងឺចិត្តចំពោះជនរងគ្រោះ។ រដ្ឋត្រូវមានមូលនិធិសង្គម ឬ ថវិកាជាតិ និងត្រូវបណ្តុះបណ្តាលជំនាញដល់គ្រូពេទ្យសម្រាប់ព្យាបាលជនរងគ្រោះដោយសារអាស៊ីដ។ «មាត្រា១១ បាននិយាយអំពីមណ្ឌលសុខភាព មន្ទីរពេទ្យ គ្រឹះស្ថានព្យាបាលសង្គ្រោះ និងព្យាបាលដោយឥតគិតថ្លៃជូនដល់ជនរងគ្រាះ។ ខ្ញុំយល់ឃើញថា គួរបន្ថែមពាក្យដោយឥតគិតថ្លៃអស់មួយជីវិត។ ខ្ញុំយល់ឃើញថា រដ្ឋត្រូវតែផ្តល់ជំនួយសង្គ្រោះផ្នែកច្បាប់ដល់ជនរងគ្រោះដោយឥតគិតថ្លៃ»។ លោក តេង សាវង្ស រដ្ឋលេខាធិការក្រសួងមហាផ្ទៃ បានថ្លែងនៅក្នុងសម័យប្រជុំសភាថា មាត្រានេះ បានចែងច្បាស់លាស់។ រដ្ឋាភិបាលចង់បង្ហាញឆន្ទៈយកចិត្តទុកដាក់ចំពោះជនរងគ្រោះដោយសារអាស៊ីដខ្លាំង។ «យើងចែងច្បាស់ថាមន្ទីរពេទ្យ និងគ្រឹះស្ថានព្យាបាលរបស់រដ្ឋត្រូវព្យាបាលគេ (ជនរងគ្រោះដោយសារអាស៊ីដខ្លាំង) ឱ្យជាសះស្បើយដោយមិនគិតថ្លៃ និងឱ្យគេរួចផុតពីការស្លាប់។ ករណីខ្លះពាក់ព័ន្ធដល់ការកែសម្ផស្ស។ រាជរដ្ឋាភិបាលមិនអាចទទួលបញ្ហានោះបានទេ»។ លោកវេជ្ជបណ្ឌិត ហង ឡៃរ៉ាប៉ូ បានបញ្ជាក់ថា រហូតមកដល់ពេលនេះ អង្គការជួយសង្គ្រោះជនរងគ្រោះដោយទឹកអាស៊ីដបានចំនួន៣៤៥នាក់។ លោក អ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់ថា ការវាយប្រហារទឹកអាស៊ីដនៅទូទាំងប្រទេសកម្ពុជាអាចមានដល់ទៅ៤០ករណីក្នុងមួយឆ្នាំ។ រដ្ឋសភាបានអនុម័តដល់មាត្រា១៣ ក្នុងចំណោមមាត្រាសរុប២៧ នៃសេចក្តីព្រាងច្បាប់អាស៊ីដ នៅក្នុងការពិភាក្សាថ្ងៃដំបូងនេះ៕ This posting includes an audio/video/photo media file: Download Now |
| ព័ត៌មានអន្តរជាតិ៖ ០៣ វិច្ឆិកា Posted: 03 Nov 2011 08:40 AM PDT ព័ត៌មានចុងក្រោយបំផុត៖ សរអា៖ ក្រសួងការបទេសរុស្ស៊ីបានសម្ដែងការសង្ស័យអំពីការកាត់សេចក្ដីឲ្យលោក Viktor Bout អ្នកលក់ដូរអាវុធជាតិរស្ស៊ីមានទោសថាយុត្ដិធ៌មឬអត់។ ជប៉ុន៖ អ្នកប្រតិបត្ដិការនៅរោងចក្រនុយក្លេអ៊ែរដែលខូចរបស់ប្រទេសជប៉ុននិយាយថា ឧស្ម័នផ្ទុកវិទ្យុសកម្មដែលគេបានរកឃើញនៅក្នុងម៉ាស៊ីនរ៉េអាក់ទ័រនៃរោងចក្រនោះ ទំនងដូចជាកើតមានដោយសារមូលហេតុធម្មជាតិ មិនមែនដោយមកពីប្រតិកម្មនុយក្លេអ៊ែរទប់ទល់មិនបាននោះទេ។ ហ្គិ្រក៖ លោកនាយករដ្ឋមន្ដ្រី Papandreouកំពុងតែកោះប្រជុំគណ:រដ្ឋមន្ដ្រីគ្រាអាសន្ននៅថ្ងៃព្រហស្បតិ៍ ដោយសមាជិកសភានៅក្នុងគណ:បក្សសង្គមនិយមកាន់កាប់អំណាចរបស់លោក គំរាមបោះបង់ចោលរដ្ឋាភិបាលរបស់លោក ដោយមកពីផែនការចម្រូងចម្រាសរបស់លោកចង់ធ្វើការបោះឆ្នោតកញ្ចប់សង្គ្រោះនៅទូទាំងប្រទេស។ ស៊ិរី៖ សកម្មជននិយាយថា កងកម្លាំងសន្ដិសុខស៊ិរី សម្លាប់មនុស្សបីនាក់នៅថ្ងៃព្រហស្បតិ៍ មួយថ្ងៃក្រោយពីរដ្ឋាភិបាលព្រមព្រៀងយកផែនការដែលសុំឲ្យបញ្ចប់អំពើហិង្សាប្រឆាំងបាតុករជំទាស់។ លីប៊ី៖ រដ្ឋអាជ្ញានៃតុលាការឧក្រិដ្ឋកម្មអន្ដរជាតិនិយាយថា ការិយាល័យរបស់លោកបានខំប្រឹងប្រែងនាំយកកូនប្រុសរបស់លោកMoammar Gadhafi ទៅជំនុំជម្រះកាត់សេចក្ដី ព្រមទាំងអតីតនាយកស៊ើបការណ៍សម្ងាត់របស់មេដឹកនាំលីប៊ីផងដែរ។ លោកLuis Moreno-Ocampoនិយាយថា គេកំពុងតែខំប្រឹងប្រែងដើម្បីធានាឲ្យលោកSeif al-Islamកូនប្រុសរបស់លោក Gadhafi ប្រគល់ខ្លួន។ ចិន៖ ប្រទេសចិនឲ្យដឹងថា ខ្លួនបានសម្រេចជោគជ័យក្នុងបេសកកម្មឲ្យយាន្ដអាវកាសពីរដែលហោះឆ្វែលផែនដីជួបគ្នា។ មន្ដ្រីចិននិយាយថា យាន្ដអាវកាសគ្មានមនុស្សបើកឈ្មោះShenzhou-8 ទៅភ្ជាប់យាន្ដអាវកាសTiangong-1 ដែលគេធ្វើការពិសោធនៅពេលព្រឹកថ្ងៃព្រហស្បតិ៍ ចម្ងាយប្រមាណ៣៤០គីឡូម៉ែត្រពីផែនដី។ បារាំង៖ លោកប្រធានាធិបតី Barack Obamaកំពុងតែស្ថិតនៅទីក្រុងCannesប្រទេសបារាំងដើម្បីចូលរួមក្នុងសន្និសីទកំពូលរយ:ពេលពីរថ្ងៃជាមួយក្រុមមន្ដ្រីមកពីប្រទេស២០មានសេដ្ឋកិច្ចលូតលាស់។ <!--AV--> ព័ត៌មាននៅពេលមុននេះ៖ <!--IMAGE-RIGHT--> អង់គ្លេស៖ ស្ថាបនិកគេហទំព័រ Wikileaks លោក Julian Assange បានបាត់បង់ការឡើងឧទ្ធរណ៍ដែលរារាំងមិនឲ្យមានការបញ្ជូនខ្លួនលោក ទៅឲ្យប្រទេសស៊ុយអ៊ែដ ដើម្បីប្រឈមមុខនឹងការចោទប្រកាន់ពីបទរំលោភលើភេទស្រ្ដី។ ចិន៖ និយាយថា នឹងទទួលយកយុវជនដែលធាត់ ហើយខ្លះមានដៅសាក់ច្រើនលើស្បែកឲ្យចូលធ្វើជាទាហាន ដែលជាវិធានការមួយ ដើម្បីទាក់ទាញយុវជនចិនឲ្យចូលបំរើក្នុងកងទ័ព។ ឥណ្ឌា ៖ ប៉ូលីសនៅតំបន់ខាងកើតឥណ្ឌានិយាយថា ក្រុមបះបោរនិយមលទ្ធិម៉ៅ បានចាប់ពង្រត់មនុស្ស១៥នាក់ ដែលជាកម្មករសំណង់ស្ពាន។ នេប៉ាល់៖ គណបក្សធំៗនៅក្នុងប្រទេសនេប៉ាល់ បានយល់ព្រមលើកិច្ចព្រមព្រៀងគ្នាមួយ ដែលបញ្ចូលអតីតយុទ្ធជននិយមម៉ៅ ឲ្យចូលក្នុងកងទ័ពជាតិ។ ស៊ីរី ៖ អង្គការ Arab League និយាយថា រដ្ឋាភិបាលស៊ីរី បានយល់ព្រមលើផែនការមួយដែលនឹងបន្ធូរដៃក្នុងការវាយបង្រ្កាបជិត៨ខែ ទៅលើសកម្មជនអ្នកប្រឆាំងរដ្ឋាភិបាល។ ហ្រ្គិក៖ មេដឹកនាំប្រទេសអឺរ៉ុបត្រូវកំណត់នឹងទៅតទល់ជាមួយនាយករដ្ឋមន្ដ្រីហ្រ្គិក លោក George Papandreou អំពីសេចក្ដីស្នើរបស់លោក ដើម្បីរៀបចំការបោះឆ្នោតប្រជាមតិអំពីកិច្ចព្រមព្រៀងរំដោះបំណុល។ លីប៊ី ៖ អគ្គលេខាធិការអង្គការសហប្រជាជាតិ បានគីមូន កំពុងស្ថិតនៅក្នុងក្រុងទ្រីប៉ូលី ក្នុងទស្សនកិច្ចមូយដែលមិនប្រាប់ឲ្យដឹងមុនទៅកាន់ប្រទេសលីប៊ីជាលើកដំបូងចាប់តាំងពីមានការបះបោរ ដែលបានទម្លាក់អតីតមេដឹកនាំយូរអង្វែង មូមារ កាដាហ្វី។ យេម៉ែន ៖ អ្នកការទូតនៃសហភាពអឺរ៉ុប បាននិយាយប្រាប់វីអូអេថា ប្រធានាធិបតីយេម៉ែន លោក Ali Abdullah Saleh បានបង្ហាញឲ្យឃើញថា លោកប្រុងប្រៀបស្រេចហើយ ដើម្បីប្រគល់អំណាចឲ្យអនុប្រធានាធិបតីចាត់ចែងការផ្ទេរអំណាចនយោបាយទៅឲ្យថ្នាក់ដឹកនាំថ្មីរបស់ប្រទេសនេះ។ អេត្យូពី ៖ ក្រុមជំនួយពេទ្យហៅវេជ្ជបណ្ឌិតគ្មានព្រំដែននិយាយថា ខ្លួនមានការលំបាកនឹងបំពេញកិច្ចការនៅពេលដែលមានជនភៀសខ្លួនកាន់តែច្រើនចូលមកក្នុងជំរុំនៅអេត្យូពីដើម្បីគេចចេញពីសង្រ្គាមនិងទុរិ្ភក្ស។ អាហ្វហ្គានីស្ថាន ៖ ប្រធានាធិបតីអាហ្វហ្គានីស្ថាន ហាមិដ កាសៃ ព្រមានថា គ្មានសេចក្ដីសង្ឃឹមថានឹងមានសន្ដិភាពដល់ប្រទេសរបស់លោក បើគ្មានការជ្រោមជ្រែងពីប្រទេសជិតខាងក្នុងការតស៊ូប្រឆាំងក្រុមភេរវករ។ ប៉ាគីស្ថាន៖ គណរដ្ឋមន្ដ្រីរបស់ប៉ាគីស្ថាន បានយល់ព្រមមកលើសេចក្ដីស្នើដែលផ្ដល់ឲ្យឥណ្ឌានូវឋានៈប្រទេសមានការអនុគ្រោះពាណិជ្ជកម្ម ដែលជាវិធានការមួយគេមើលឃើញថា ជាការបំបែកភាពទល់ច្រកដ៏ធំ ខណៈដែលប្រទេសគូប្រជែងគ្នាខិតខំបង្កើតឲ្យមានការទំនាក់ទំនងគ្នាជាប្រក្រតីឡើងវិញ។ អ៊ីរ៉ង់ ៖ សភាអាមេរិកបានធ្វើចលនាមករកការបន្ដឹងការដាក់ទណ្ឌកម្មមកលើប្រទេសអ៊ីរ៉ង ក្រោយពីមានការបង្ហាញឲ្យឃើញថា អ៊ីរ៉ង់បានរៀបចំផែនការធ្វើឃាតកម្មមកលើរូបឯកអគ្គរដ្ឋទូតអារ៉ាប៊ីយ៉ា សាអ៊ូឌីត៕ This posting includes an audio/video/photo media file: Download Now |
| មន្ត្រីយោធាជាន់ខ្ពស់ពីររូបត្រូវឃុំខ្លួនទាក់ទិននឹងការជួញដូរគ្រឿងញៀន Posted: 02 Nov 2011 05:52 PM PDT តុលាការក្រុងភ្នំពេញនៅកាលពីថ្ងៃម្សិលមិញនេះ បានសម្រេចឃុំខ្លួនមន្ត្រីយោធាជាន់ខ្ពស់ពីររូបនិងប្រជាពលរដ្ឋពីររូបផ្សេងទៀតនៅក្នុងពន្ធនាគារព្រៃស ទាក់ទងនឹងការជួញដូរថ្នាំញៀននិងការរក្សាទុកអាវុធខុសច្បាប់។ បើតាមការបញ្ជាក់របស់លោកសៀង សុខព្រះរាជអាជ្ញារងក្រុងភ្នំពេញ ពួកគេត្រូវបានឃុំខ្លួនតាមមាត្រា៣៣នៃច្បាប់ស្តីពីការជួញដូរថ្នាំញៀននិងតាមមាត្រា២០នៃច្បាប់ស្តីពីការគ្រប់គ្រងអាវុធជាតិផ្ទុះ។ ឧត្តមសេនីយ៍ទាំងពីររូបដែលរួមមានលោកឡែ វីរៈ និងលោកឃួន រឿន មិនបានធ្វើអត្ថាធិប្បាយណាមួយចំពោះអ្នកកាសែតទេ បន្ទាប់ពីបានត្រូវបណ្តើរចេញពីអគារតុលាការដោយមានការការពារយ៉ាងមាំទាំពីសមត្ថកិច្ចប៉ូលីសប្រដាប់ដោយអាវុធ AK ស្វ័យប្រវត្តិ។ ដោយឡែកលោកឧត្តមសេនីយ៍ទោ ឃួន រឿន នៅក្នុងបន្ទប់សវនាការបានប្រាប់វីអូអេ សំឡេងសហរដ្ឋអាមេរិកដោយផ្ទាល់ថា លោកខុសដោយខ្លួនឯង ហើយលោកមិនបានធ្វើអត្ថាធិប្បាយអ្វីបន្ថែមទៀតទេបន្ទាប់ពីមន្ត្រីប៉ូលីសនៃមន្ទីរប្រឆាំងគ្រឿងញៀនបានហាមឃាត់មិនឲ្យផ្តល់ព័ត៌មានដល់អ្នកកាសែត។ លោកពេជ្រ សូរិយាមេធាវីការពារក្តីលោកឡៃ វីរៈមិនបានធ្វើអត្ថាធិប្បាយ ថាស្ថិតនៅក្នុងដំណើរការរឿងក្តីនិងរក្សាការសម្ងាត់នៅក្នុងរឿងក្តីលោកសូមមិនធ្វើអត្ថាធិប្បាយណាមួយទៅនិងសំណួរអ្នកកាសែតទេ។ លោកឧត្តមសេនីយ៍ទោ ឡៃ វីរៈ និងលោកឧត្តមសេនីយ៍ទោឃួន រឿន អតីតក្រសួងការពារជាតិបានពាក់ម៉ាស់និងពាក់មួកការពារបន្ទាប់ពីត្រូវបណ្តើរចូលទៅក្នុងនិងបណ្តើរចេញពីអគារតុលាការរួចហើយត្រូវបានក្រុមសមត្ថកិច្ចបណ្តើរតាមរថយន្តមួយឆ្ពោះទៅឃុំឃាំងនៅពន្ធនាគារព្រៃស។ អ្នកស្រីឡៃ វ៉ារី អាយុ៥៣ឆ្នាំរស់នៅភូមិកំពុងស្វាយឃុំសូភីខេត្តបន្ទាយមានជ័យត្រូវជាប្អូនស្រីលោកឡៃ វីរៈបានមានប្រសាសន៏ថា អ្នកស្រីមិនជឿលោកឡៃ វីរៈ ជាប់ពាក់ព័ន្ធនឹងការជួញដូរថ្នាំញៀនស្រវឹងទេ។ «ខ្ញុំជឿជាក់បងប្រុសខ្ញុំគឺគាត់អត់ដែលធ្វើអំពើបែបនេះសោះ។ អត់មានទេៗ។ ខ្ញុំអត់យល់រឿងនយោបាយ»។ កាលពីថ្ងៃច័ន្ទ មន្ត្រីប៉ូលីសប្រឆាំងគ្រឿងញៀនរបស់អគ្គស្នងការនគរបាលជាតិ បានចាប់ខ្លួនមនុស្សបួននាក់ដែលរួមមានលោកឡៃ វីរៈ និងលោកឃួន រឿនជាមួយនឹងពលរដ្ឋពីរនាក់ផ្សេងទៀតជាមួយនឹងថ្នាំញៀនទឹកកកចំនួន១គីឡូក្រាមនិងអាវុធ AK 47 ចំនួនពីរដើម។ លោកឡៃ វីរៈ ធ្លាប់ជាអតីតមេទ័ពដ៏ស្មោះត្រង់មួយរូបខាងគណបក្សហ៊ុនស៊ីនប៉ិចហើយលោកធ្លាប់ជាអតីតអភិបាលខេត្តឧត្តរមានជ័យ និងក្រោយមកជាអតីតអភិបាលរងក្រុងភ្នំពេញ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
