VOA News: ព័ត៌មាន: “បារាំងជំរុញសាលាក្តីខ្មែរក្រហមឲ្យចេញសាលដីកាចុងក្រោយសម្រាប់រឿងក្តីឌុច” plus 4 more |
- បារាំងជំរុញសាលាក្តីខ្មែរក្រហមឲ្យចេញសាលដីកាចុងក្រោយសម្រាប់រឿងក្តីឌុច
- ការិយាល័យសិទ្ធិមនុស្សអ.ស.ប.បើកវគ្គបណ្តុះបណ្តាលការត្រូតពិនិត្យការឃុំខ្លួន
- ប្រជាពលរដ្ឋតំបន់បឹងកក់រង់ចាំចំណាត់ការសាលាក្រុង
- ព័ត៌មានអន្តរជាតិសង្ខេប៖ ៧ កញ្ញា
- តាអាន ជនសង្ស័យនៃសំណុំរឿង ០០៤ បដិសេធការទទួលខុសត្រូវចំពោះការកាប់សម្លាប់ក្នុងរបបខ្មែរក្រហម
| បារាំងជំរុញសាលាក្តីខ្មែរក្រហមឲ្យចេញសាលដីកាចុងក្រោយសម្រាប់រឿងក្តីឌុច Posted: 07 Sep 2011 02:21 PM PDT សម្ពាធអន្តរជាតិមានបន្ថែមលើសាលាក្តីខ្មែរក្រហមដើម្បីជំរុញការកាត់ទោសរបស់តុលាការនេះធ្វើដំណើរទៅមុខឲ្យបានឆាប់រហ័សដើម្បីរកយុត្តិធម៌ជូនជនរងគ្រោះកម្ពុជា។ នៅថ្ងៃពុធនេះ រដ្ឋាភិបាលបារាំងបានធ្វើសេចក្តីថ្លែងការណ៍មួយទទូចឲ្យសាលាក្តីខ្មែរក្រហម ប្រកាសសាលដីកានៃសំណុំរឿង០០១ដែលជាសំណុំរឿងរបស់ឌុចឲ្យបានឆាប់ព្រមទាំងជំរុញសាលាក្តីខ្មែរក្រហមឲ្យចាប់ផ្តើមកាត់ក្តីជាបន្ទាន់លើសំណុំរឿង០០២។ កាលពីថ្ងៃអង្គារ ម្សិលមិញនេះ អង្គភាពសហមេធាវីនាំមុខ តំណាងឲ្យដើមបណ្តឹងរដ្ឋប្បវេណី ដែលជាផ្នែកមួយរបស់សាលាក្តីខ្មែរក្រហមក៏បានជំរុញឲ្យសាលាក្តីនេះធ្វើការកាត់ទោសសំណុំរឿង០០២ ឲ្យបានឆាប់ផងដែរ បន្ទាប់ពីមរណភាពរបស់លោកវ៉ាន់ ណាត អតីតអ្នកទោសគុកទួលស្លែង និងជាសាក្សីមួយរូបដ៏សំខាន់នៅក្នុងសំណុំរឿងរបស់ឌុច។ លោក វ៉ាន់ ណាត ដែលបានទទួលមរណៈភាពកាលពីថ្ងៃច័ន្ទ ដោយរោគាពាធ។ អ្នកនាំពាក្យក្រសួងការបរទេសបារាំងនៅថ្ងៃនេះ បានធ្វើសេចក្តីថ្លែងការណ៍ ដោយយោងទៅលើមរណៈភាពរបស់លោកវ៉ាន់ ណាត ផងដែរ ហើយបានសង្កត់ធ្ងន់ថា នៅក្នុងបរិបទបែបនេះ វាគឺជាការចាំបាច់ដែលអង្គជំនុំជម្រះវិសមញ្ញនៅក្នុងតុលាការកម្ពុជាត្រូវប្រកាសឲ្យបានឆាប់ចំពោះសាលដីកាឧទ្ធរណ៍នៃសំណុំរឿង០០១ ដែលទាក់ទងទៅនឹងឌុច ព្រមទាំងចាប់ផ្តើមបើកសវនការសំណុំរឿង០០២ដោយកុំបង្អង់ឡើយ។ អ្នកនាំពាក្យក្រសួងការបរទេសបារាំងដដែលបានទទូចបន្ថែមថា តម្រូវការចាំបាច់គឺត្រូវរកការពិតសម្រាប់ជនរងគ្រោះចុងក្រោយ ដែលតែងកំពុងនៅរស់រានមានជីវិត ហើយ ក៏ដូចសម្រាប់ពលរដ្ឋកម្ពុជាទាំងអស់ផងដែរ។ លោក ឡាស អលស៊ិន (Lars Olsen) មន្ត្រីទំនាក់ទំនងកិច្ចការច្បាប់របស់សាលាក្តីខ្មែរ មានប្រសាសន៍ដោយយោងទៅតាមការប្រកាសរបស់តុលាការកំពូលថា សាលដីកានៃបណ្តឹងឧទ្ធរណ៍ ក្នុងករណីឌុចនឹងត្រូវផ្សព្វផ្សាយនៅក្នុងចុងឆ្នាំនេះ ក៏ប៉ុន្តែនៅមិនទាន់កំណត់ការកាត់ទោសនៅក្នុងសំណុំរឿង០០២នៅឡើយទេ។ «នៅក្នុងសេចក្តីថ្លែងការណ៍កាលពីសប្តាហ៍មុន អង្គជំនុំជម្រះតុលាការកំពូលបាននិយាយថា ខ្លួននឹងប្រកាសសាលក្រមនៅចុងឆ្នាំនេះ។ អង្គជំនុំជម្រះនឹងកំណត់ កាលបរិច្ឆេទនៃសវនាការពេញអង្គសេចក្តី នៅពេលដែលតុលាការធ្វើសេចក្តីសម្រេច លើបញ្ហាសុខភាពជនជាប់ចោទនៅឆ្នាំនេះ ហើយយើងមិនទាន់ដឹងថា កាលបរិច្ឆេទនេះអាចនឹងធ្វើឡើងនៅពេលណានោះទេ»។ ឌុច ឈ្មោះដើមគឺ កាំង ហ្គេកអ៊ាវ ត្រូវចោទប្រកាន់ពីបទប្រព្រឹត្តអំពើឃោរឃៅដែលបានបង្កឲ្យអ្នកជាប់គុកទួលស្លែងយ៉ាងតិច១២.៣៨០នាក់ ស្លាប់យ៉ាងវេទនាបំផុត។ ដោយឡែក ជនជាប់ចោទទាំងបួននាក់ នៅក្នុងសំណុំរឿង០០២ គឺនួន ជា ខៀវ សំផន អៀង សារី និងអៀង ធីរិទ្ធ មានភាពចាស់ជរាទ្រុឌទ្រោម ហើយសាលាក្តីខ្មែរក្រហមនឹងត្រូវពិនិត្យលទ្ធភាពអំពីការចូលសវនាការរបស់នួន ជា និងអៀង ធីរិទ្ធ នៅពេលខាងមុខនេះ។ លោក ជុំ ម៉ី អតីតអ្នកគុកទួលស្លែង និងជាសាក្សីម្នាក់ទៀត នៅក្នុងសំណុំរឿង០០១ បានសម្តែងការសប្បាយចិត្ត ចំពោះការជំរុញរបស់បារាំង ដោយលោកប្រកាសថា ការប្រកាសសាលដីកាគឺជាយុត្តិធម៌ចុងក្រោយសម្រាប់រូបលោក។ «ធ្វើអញ្ចឹង បើចេញបានឆាប់ វាឆាប់បានយុត្តិធម៌ហើយ បាទ»។ លោក ជុំ ម៉ី ក៏ជាប្រធានសមាគមជនរងគ្រោះដោយរបបប្រជាធិបតេយ្យ ដែលហៅកាត់ថា សមាគមនក្សេមក្សាន ផងដែរ។ កាលពីខែមុន សមាគមរបស់លោកក៏បានជំរុញផងដែរឲ្យសាលាក្តីខ្មែរក្រហមប្រកាសសាលដីកាឌុចឲ្យបានឆាប់បំផុត ហើយអង្គជំនុំជម្រះតុលាការកំពូល បានប្រកាសជាសាធារណៈថា ការប្រកាសសាលដីកាស្តីពីបណ្តឹងឧទ្ធរណ៍នៃសំណុំរឿងឌុច និងធ្វើឡើងនៅក្នុងអំឡុងដំណាច់ឆ្នាំ២០១១នេះ។ ដោយឡែក លោក សុំ វុទ្ធី អតីតអ្នកទោសម្នាក់ទៀតរបស់ពួកខ្មែរក្រហមនៅក្នុងខេត្តសៀមរាប និងជាដើមបណ្តឹងរដ្ឋប្បវេណីនៅក្នុងសំណុំរឿង០០២ក៏បានអបអរសាទរនេះដែរ។ «ត្រឹមត្រូវណាស់ ជាងសាមសិបឆ្នាំហើយ ការចាំតុលាការ។ ហើយដល់តែមានតុលាការ ស្រាប់តែនៅតែអូសបន្លាយពេល ហើយមេដឹកនាំខ្មែរក្រហមកាន់តែចាស់ហើយ»។ យ៉ាងណាក៏ដោយ លោក ឆាំង យុ នាយកមជ្ឈមណ្ឌលឯកសារកម្ពុជា បានហៅការជំរុញរបស់បារាំងចំពោះសាលាក្តីខ្មែរក្រហមថាអាចត្រូវបានបកស្រាយថា ជាការជ្រៀតជ្រែកកិច្ចការតុលាការ ហើយលោកគិតថា ការជំរុញឲ្យតុលាការមានឯករាជ្យភាពគ្រប់គ្រាន់នឹងធ្វើឲ្យដំណើរការកាត់ក្តីទៅមុខកាន់តែលឿន៕ This posting includes an audio/video/photo media file: Download Now |
| ការិយាល័យសិទ្ធិមនុស្សអ.ស.ប.បើកវគ្គបណ្តុះបណ្តាលការត្រូតពិនិត្យការឃុំខ្លួន Posted: 07 Sep 2011 02:00 PM PDT អង្គការសិទ្ធិមនុស្សនៃអង្គការសហប្រជាជាតិប្រចាំកម្ពុជា ចាប់ផ្តើមបណ្តុះបណ្តាលវិធីសាស្ត្រទាក់ទងនឹងជំនាញពិនិត្យឃ្លាំមើលការឃុំខ្លួន ដើម្បីជៀសវាងការធ្វើទារុណកម្មអ្នកទោសនៅក្នុងពន្ធនាគារ។ វគ្គបណ្តុះបណ្តាលរយៈពេលបីថ្ងៃនេះ ផ្តោតជាសំខាន់លើគោលបំណងនៃការពិនិត្យឃ្លាំមើលទីកន្លែងឃុំខ្លួន តួនាទី និងយន្តការបង្ការថ្នាក់ជាតិ គោលការណ៍នៃដំណើរទស្សនកិច្ចត្រួតពិនិត្យមើលការឃុំ និងឃាត់ខ្លួន យុទ្ធសាស្ត្រនៃសម្ភាសន៍ជាដើម។ មន្ត្រីរដ្ឋាភិបាលប្រមាណ២០នាក់មកពីក្រសួងមហាផ្ទៃ ក្រសួងយុត្តិធម៌ ក្រសួងសុខាភិបាល និងគណៈកម្មាធិការសិទ្ធិមនុស្សកម្ពុជារបស់រដ្ឋាភិបាល បានចូលរួមនៅក្នុងវគ្គបណ្តុះបណ្តាលនេះ។ លោក នុត សាអាន រដ្ឋលេខាធិការក្រសួងមហាផ្ទៃ បានថ្លែងបើកវគ្គបណ្តុះបណ្តាលនៅសណ្ឋាគារ Imperial Garden Villa and Hotel ថា វគ្គសិក្សានេះមានសារៈសំខាន់សម្រាប់ជួយជំរុញការយល់ដឹង និងចំណេះដឹងថ្មីៗដល់មន្ត្រីកម្ពុជាឲ្យអនុវត្តការងារឃ្លាំមើល ឬត្រួតពិនិត្យកន្លែងឃុំឃាំងអ្នកទោសឲ្យស្របតាមបទដ្ឋានអន្តរជាតិ។ «ប្រធានបទនេះគឺជាប្រធានបទដែលមានលក្ខណៈថ្មីសម្រាប់យើង ដើម្បីវាស់នូវកម្រិតយល់ដឹងរបស់យើងដែលបានធ្លាប់អនុវត្តកន្លងមក។ វគ្គសិក្សានេះ ខ្ញុំចាត់ទុកជាម៉ែត្រវាស់មួយនូវកម្រិតយល់ដឹងរបស់យើងក៏ដូចជាកម្រិតនៃការអនុវត្តការងាររបស់យើងដែលបានធ្វើការកន្លងមកដែរ»។ លោក ចេមស៍ ហ៊ីណាន (James Heenan) តំណាងស្តីទីការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានថ្លែងនៅក្នុងការបើកវគ្គបណ្តុះបណ្តាលនេះថា ការកសាងសមត្ថភាពនៅកម្ពុជាក្នុងការត្រួតពិនិត្យមើលកន្លែងឃុំឃាំងបានចាប់ផ្តើមជាយូរមកហើយ។ លោក ចេមស៍បានបន្តថា វគ្គបណ្តុះបណ្តាលនេះមិនមែនត្រឹមតែជាឱកាសដើម្បីឈានដល់កម្រិតថ្មីមួយប៉ុណ្ណោះទេ ប៉ុន្តែថែមទាំងតម្រូវឲ្យមានការធានាដល់បញ្ហាធំៗនៃការធ្វើទារុណកម្មនៅកន្លែងឃុំឃាំង។ «កម្ពុជា និងអង្គការសហប្រជាជាតិបានសម្រេចធ្វើការលុបបំបាត់អំពើទារុណកម្ម ការប្រព្រឹត្តមកលើខ្លួននៅតាមកន្លែងឃុំឃាំង ហើយវគ្គបណ្តុះបណ្តាលនេះនឹងជួយយើងទាំងពីរឆ្ពោះទៅរកគោលដៅនោះ ប៉ុន្តែផ្តល់ឲ្យយើងនូវជំនាញមួយ»។ លោក នុត សាអាន បានថ្លែងថា កម្ពុជាបានផ្តល់សច្ចាបណ្ណ័ទៅលើពិធីសារបន្ថែមនៃអនុសញ្ញាប្រឆាំងអំពើទារុណកម្ម (OPCAT) នៅថ្ងៃទី៣០ ខែមិនា ឆ្នាំ២០០៧ ហើយបានចូលជារដ្ឋភាគីនៃពិធីសារបន្ថែមនេះជាផ្លូវការនៅថ្ងៃទី២៩ ខែមេសា ឆ្នាំ២០០៧។ រដ្ឋាភិបាលបានបង្កើតយន្តការទប់ស្កាត់ថ្នាក់ជាតិមួយនៅថ្ងៃទី២៩ ខែមេសា ឆ្នាំ២០០៨ ដែលរួមមានក្រសួងមហាផ្ទៃ ក្រសួងយុត្តិធម៌ និងគណៈកម្មការសិទ្ធិមនុស្សកម្ពុជា ដែលមានភារកិច្ចត្រួតពិនិត្យមើលកន្លែងឃុំឃាំងដើម្បីធានាថា ការធ្វើទារុណកម្មមិនត្រូវបានអនុញ្ញាត។ កម្ពុជាចូលជាភាគីនៃអនុសញ្ញា ប្រឆាំងអំពើទារុណកម្មនៅថ្ងៃទី១៥ ខែតុលា ឆ្នាំ១៩៩២។ លោក ចាន់ សាវ៉េត ប្រធានផ្នែកឃ្លាំមើលសិទ្ធិមនុស្សនៃសមាគមសិទ្ធិមនុស្សអាដហុកបានថ្លែងថា នគរបាល និងកងរាជអាវុធហស្ថ ជាធម្មតា ប្រើអំពើទារុណកម្ម ដើម្បីទទួលបានចម្លើយពីអ្នកជាប់ឃុំទាំងក្នុងកន្លែងឃុំឃាំងរបស់នគរបាល និងពន្ធនាគារ។ «អំពើទារុណកម្មទាំងអស់ បើយើងប្រៀបធៀបកាលពីឆ្នាំ២០១០ សមាគមអាដហុកទទួលបានជាង៧០ករណីក្នុងរយៈពេលមួយឆ្នាំ ហើយរយៈពេលជាងប្រាំមួយខែដើមឆ្នាំ២០១១នេះ សមាគមអាដហុកទទួលបានជាង៤០ករណី»។ លោក ចាន់ សាវ៉េត បានបន្ថែមថា ករណីទារុកម្មភាគច្រើន បានកើតឡើងនៅក្នុងកន្លែងឃុំឃាំងរបស់នគរបាល៕ This posting includes an audio/video/photo media file: Download Now |
| ប្រជាពលរដ្ឋតំបន់បឹងកក់រង់ចាំចំណាត់ការសាលាក្រុង Posted: 07 Sep 2011 10:38 AM PDT កាលពីដើមខែសីហាលោកនាយករដ្ឋមន្ត្រីហ៊ុន សែន បានសម្រេចកាត់ដីចំនួនជាង១២ហិកតាចេញពីគម្រោងអភិវឌ្ឃន៍នៅតំបន់បឹងកក់ ដើម្បីប្រគល់ឲ្យប្រជាពលរដ្ឋអភិវឌ្ឃសាងសង់លំនៅដ្ឋានដោយខ្លួនឯង បន្ទាប់ពីធនាគារពិភពលោកបង្កកជំនួយដល់កម្ពុជាដោយសារតែរដ្ឋាភិបាលមិនបានដោះស្រាយបញ្ហាជម្លោះដីធ្លីដ៏រ៉ាំរ៉ៃនៅតំបន់បឹងកក់។ បន្ទាប់ពីការប្រកាសរបស់លោកនាយករដ្ឋមន្ត្រី ហ៊ុន សែន សាលាក្រុងភ្នំពេញបានប្រញាប់ប្រញាល់ធ្វើពិធីទទួលស្វាគមន៍ប្រជាពលរដ្ឋនៅតំបន់បឹងកក់។ លោកកែប ជុតិមាអភិបាលក្រុងភ្នំពេញនៅពេលនោះបានប្រកាសថា អាជ្ញាធរក្រុងជាអ្នកទទួលបន្ទុកធ្វើប្លង់កាន់កាប់ដីធ្លីជូនប្រជាពលរដ្ឋហើយរដ្ឋជាអ្នកទទួលបន្ទុកបង់ពន្ឋប្រថាប់ត្រាជូន។ ការសម្រេចរបស់រដ្ឋាភិបាលក្នុងការកាត់ដីចំនួន១២,៤៤ហិកតានោះ គឺសម្រាប់ប្រជាពលរដ្ឋចំនួនជិត៨០០គ្រួសារដែលនៅសេសសល់ពីការបណ្តេញចេញយ៉ាងបំពានពីអាជ្ញាធរក្រុង។ ក៏ប៉ុន្តែក្នុងចំណោមប្រជាពលរដ្ឋទាំងនោះមានចំនួន៦៤គ្រួសារទៀតនៅក្នុងភូមិ១ ភូមិ៦ ភូមិ២២និង ភូមិ២៤បានអះអាងថា អាជ្ញាធរបានកាត់ចេញ មិនបានធ្វើប្លង់កម្មសិទ្ឋដល់ពួកគេទេ។ លោក កែប ជុតិមាអភិបាលរាជធានីភ្នំពេញមិនបានធ្វើអត្ថាធិប្បាយទេនៅថ្ងៃពុធនេះ នៅពេលដែលសម្ភាសលោកតាមទូរស័ព្ទ។ ចំណែកឯលោកកើត ឆែ នាយករងរដ្ឋបាលសាលាក្រុងភ្នំពេញបាននិយាយថា លោកកំពុងជាប់រវល់ប្រជុំនៅឯក្រៅប្រទេស។ អ្នកស្រី លី ចាន់ណារី អាយុ៣៦ឆ្នាំតំណាងប្រជាពលរដ្ឋនៅភូមិ១បាននិយាយថា មានប្រជាពលរដ្ឋចំនួន១៨គ្រួសារដែលមានដីទំហំ២,៥ហិកតា ដែលសាលាក្រុងភ្នំពេញបានកាត់ចេញ និងមិនបានធ្វើប្លង់ឲ្យពួកគេ។ អ្នកស្រីបានបញ្ជាក់ថា ក្រុមគាត់បានដាក់សំណើសុំចេញលិខិតកាន់កាប់ដីធ្លីតាំងពីថ្ងៃទី២៣ ខែសីហា ក៏ប៉ុន្តែសាលាក្រុងភ្នំពេញមិនបានឆ្លើយតបទេ។ «នាងខ្ញុំសប្បាយរីករាយណាស់នៅពេលដែលបានទៅទទួលអនុក្រិត្យហ្នឹង ឮថាសម្តេចផ្តល់ប្រទានកម្មសិទ្ធ១២,៤៤ហិកតាហ្នឹង។ ដល់មកដល់ដំណាក់កាលនេះ ពួកនាងខ្ញុំនៅតែមិនទាន់បានទទួលប្លង់កាន់កាប់កម្មសិទ្ឋិទៀត។ ដូច្នេះពួកនាងខ្ញុំនៅតែពិបាកដដែលហ្នឹង»។ លោក ហេង សុវណ្ណប្រជាពលរដ្ឋនៅភូមិ៦បាននិយាយថា ភូមិរបស់លោកអាជ្ញាធរបានមកចុះវាស់វែង និងបានចេញប័ណ្ណសម្រាប់មកទទួលប្លង់កាន់កាប់ដីធ្លីហើយ ក៏ប៉ុន្តែរហូតមកដល់ពេលនេះអាជ្ញាធរមិនបានចេញប្លង់កាន់កាប់ដីធ្លីដល់ពួគេទេ។ «ចង់សំណូមពរដល់ស្ថាប័នរដ្ឋាភិបាលទាំងអស់ឲ្យជួយមើលចំណាត់ការរបស់សាលាក្រុងផងព្រោះប្រជាជនមិនសុខចិត្តទេ។ សម្តេចបានសម្បទានឲ្យប្រជាជនឲ្យ៧៩៤គ្រួសារដីទំហំ៩,៥គឺត្រូវតែបាន។ ក៏ប៉ុន្តែចំណាត់ការរបស់សាលាក្រុងមិនមានភាពប្រក្រតី»។ ក្រុមមន្ត្រីអង្គការសង្គមស៊ីវិលដែលតាមឃ្លាំមើលបញ្ហាទំនាស់ដីធ្លីមិនបានធ្វើការសិក្សាឲ្យបានស៊ីជម្រៅទៅលើការបែងចែកដីរបស់សាលាក្រុងក្រោយពីរដ្ឋាភិបាលបានកាត់ដីចេញពីគម្រោងអភិវឌ្ឃន៍ទេ ក៏ប៉ុន្តែបានអះអាងថា ខ្លួនបានតាមឃ្លាំមើលពីខាងក្រៅតែប៉ុណ្ណោះ។ លោក សៀ ភារម្យ នាយកលេខាធិការដ្ឋាននៃក្រុមការងារពិសេសសិទ្ឋិលំនៅដ្ឋានបាននិយាយថាក្រុមលោកគ្រាន់តែតាមឃ្លាំមើលតែប៉ុណ្ណោះ។ ក៏ប៉ុន្តែក្រុមលោកនឹងបើកទូលាយក្នុងការទទួលពាក្យបណ្តឹងពីប្រជាពលរដ្ឋប្រសិនបើមានបញ្ហា។ «យើងសង្គមស៊ីវិលមានការលំបាកដែរ ដែលយើងចូលទៅក្នុងរឿងហ្នឹងវាអាចមានការចោទប្រកាន់ពីអាជ្ញាធរ។ អញ្ចឹងយើងមានការលំបាកដែរនៅក្នុងរឿងហ្នឹង។ ដូច្នេះខ្ញុំគិតថា ការពង្រឹងសមត្ថភាពខ្លូនឯងដើម្បីធ្វើការស៊ើបអង្កេតក្នុងរឿងហ្នឹង»។ លោក អំ សំអាត មន្ត្រីផ្នែកស៊ើបអង្កេតរបស់អង្កការលីកាដូបានមានប្រសាសន៍ថា លោកបានទទួលដំណឹងថា មានប្រជាពលរដ្ឋមួយចំនួនត្រូវបានអាជ្ញាធរកាត់ដីចេញមិនផ្តល់ប្លង់កម្មសិទ្ឋិដីធ្លីឲ្យទេ។លោកបានបញ្ជាក់ថា អង្កការលីការដូនឹងធ្វើការស៊ើបអង្កេតឡើងវិញជុំវិញការចោទប្រកាន់នេះ។ «សំណូមពរធ្វើយ៉ាងណាសូមឲ្យអាជ្ញាធរធ្វើការប្រកបដោយតម្លាភាពហើយសុំឲ្យប្រជាពលរដ្ឋដែលរស់នៅទទួលស្គាល់ដោយអាជ្ញាធរហើយគាត់រស់នៅតំបន់បឹងកក់ហ្នឹងគាត់ទទួលបាននៅដីធ្លីនេះដូចៗគ្នា»។ លោកចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ឋិមនុស្សអាដហុកបាននិយាយថា សមាគមរបស់លោកទើបតែទទួលបានពាក្យបណ្តឹងពីប្រជាពលរដ្ឋនៅតំបន់បឹងកក់ប្រមាណប្រាំគ្រួសារតែប៉ុណ្ណោះដែលបានអះអាងថា ពួកគេត្រូវបានអាជ្ញាធរមិនចេញប្លង់កម្មសិទ្ឋិដីធ្លីឲ្យ។ លោកមានប្រសាន៏ទៀតថា ការផ្តល់ដីសម្បទានសង្គមកិច្ចជាការលំបាកមួយប្រសិនបើរដ្ឋាភិបាលមិនបានតាមដាន ហើយមន្ត្រីអនុវត្តន៍ច្បាប់មិនសម្តែងការស្មោះត្រង់នឹងអាចធ្វើឲ្យស្ថានភាពនេះកាន់តែលំបាក៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ៧ កញ្ញា Posted: 07 Sep 2011 02:32 AM PDT អាស៊ី៖ ទីផ្សារហ៊ុនក្នុងទ្វីបអាស៊ីបានបិទដោយសារមានការលក់ហ៊ុនកើនឡើងជាងមុននៅថ្ងៃពុធនេះ។ ទីផ្សារហ៊ុននីកេ ក្នុងទីក្រុងតូក្យូរបស់ជប៉ុនបានកើនឡើងជាងពីរភាគរយដោយបញ្ចប់ក្នុងពិន្ទុ៨.៧៦៣ ទីផ្សារហ៊ុនហាងសេង ក្នុងទីក្រុងហុងកុងបានឡើងជិតមួយភាគរយដោយបញ្ចប់ក្នុងពិន្ទុ២០.០៤៨។ តម្លៃភាគហ៊ុនក៏កើនឡើងដែរក្នុងទីក្រុងបាងកក ហ្សាការតា កូឡាឡំពួរ ម៉ានីល ម៉ុមបៃ សេអ៊ូល សៀងហៃ សិង្ហបូរី ស៊ីដនី តៃប៉ិ និងវេលលីងតុន។ ភូមា៖ អគ្គលេខាធិការអង្គការសហប្រជាជាតិនិយាយថាការផ្លាស់ប្តូររដ្ឋាភិបាលក្នុងប្រទេសភូមាក្នុងឆ្នាំនេះបានបង្កើតឲ្យមានឱកាសដើម្បីពិភាក្សាថ្នាក់ជាតិបន្ថែមទៀតដោយរួមបញ្ចូលភាគីច្រើន ប៉ុន្តែបានបន្ថែមថានៅមិនទាន់ដល់ពេលនិយាយថាតើការផ្លាស់ប្តូរពិតប្រាកដកំពុងកើតឡើងឬយ៉ាងណានោះទេ។ ចិន៖ អាជ្ញាធរចិននិយាយថាពួកគេបានជួយសង្គ្រោះកុមារដែលមានបញ្ហាខាងខួរក្បាលចំនួន៣០នាក់ដែលត្រូវបានគេប្រើជាទាសករពលកម្មនៅឯរោងចក្រឥដ្ឋខុសច្បាប់មួយ។ ប៉ាគីស្ថាន៖ ក្រុមតាលីបាននៅប្រទេសប៉ាគីស្ថានអះអាងទទួលខុសត្រូវចំពោះការវាយប្រហារដោយគ្រាប់បែកអត្តឃាតចំនួនពីរដែលវាយប្រហារលើគេហដ្ឋានរបស់មន្ត្រីសនិ្តសុខជាន់ខ្ពស់របស់ប៉ាគីស្ថាន នាថ្ងៃពុធនេះ។ ការវាយប្រហារនោះ បានសម្លាប់មនុស្សយ៉ាងហោចណាស់២២នាក់ដោយរួមទាំងភរិយារបស់មន្ត្រីរូបនោះផងដែរ។ ឥណ្ឌា៖ អាជ្ញាធរឥណ្ឌាបានហៅការវាយប្រហារដោយគ្រាប់បែកនៅខាងក្រៅអាគារតុលាការកំពូលក្នុងទីក្រុងញ៉ូវដេល្លី ថាជាការវាយប្រហារភេរវកម្មដោយចេតនា ក្រោយពីបានសម្លាប់មនុស្សយ៉ាងហោចណាស់១០នាក់និងធ្វើឲ្យមនុស្ស៦២នាក់ផ្សេងទៀតរបួស។ ស៊ីរី៖ សកម្មជនសិទ្ធិមនុស្សស៊ីរីនិយាយថាកងកម្លាំងសន្តិសុខរបស់រដ្ឋាភិបាលដែលមានការគាំទ្រដោយកងរថក្រោះផងបានសម្លាប់មនុស្សយ៉ាងហោចណាស់១នាក់ក្នុងការវាយប្រហារមួយក្នុងទីក្រុងហូមដែលឋិតនៅភាគកណ្តាលប្រទេស។ លីប៊ី៖ មានរបាយការណ៍ប្រទាំងប្រទើសគ្នាទាក់ទងនឹងបញ្ហាថាតើមានក្បួនរថយន្តដ៏ធំដឹកកងកម្លាំងដែលស្មោះត្រង់នឹងមេដឹកនាំមូអាម៉ា ហ្កាដាហ្វី ដែលត្រូវគេទម្លាក់ចេញពីតំណែងបានឆ្លងចូលប្រទេសនីហ្សេឬយ៉ាងណា។ អេហ្សីប៖ តុលាការមួយរបស់ប្រទេសអេហ្សីបបានចាប់ដំណើរការអង្គសវនាការអតីតប្រធានាធិបតីហូស្នី មូបារ៉ាក់ ដោយមានដាក់ពង្រាយកងកម្លាំងសន្តិសុខដ៏ច្រើននៅខាងក្រៅអាគារតុលាការដើម្បីការពារមិនឲ្យមានការប៉ះទង្គិចគ្នារវាងក្រុមអ្នកប្រឆាំងជាមួយនឹងក្រុមអ្នកគាំទ្រមេដឹកនាំដែលត្រូវគេបណ្តេញចេញពីតំណែងនេះ។ អ៊ីរ៉ាក់៖ លោកឡេអូ ប៉ាណេតា រដ្ឋមន្ត្រីក្រសួងការពារជាតិសហរដ្ឋអាមេរិកនិយាយថាមិនទាន់មានការសម្រេចចិត្តណាមួយនៅឡើយទេទាក់ទងនឹងការរក្សាកងកម្លាំងសហរដ្ឋអាមេរិកក្នុងប្រទេសអ៊ីរ៉ាក់បន្ទាប់ពីពេលកំណត់ចុងក្រោយដែលត្រូវដកកងកម្លាំងចេញក្នុងឆ្នាំនេះ។ អាល្លឺម៉ង់/សហគមន៍អឺរ៉ុប៖ តុលាការធម្មនុញ្ញរបស់ប្រទេសអាល្លឺម៉ង់បានរក្សាទុកការចូលរួមរបស់ប្រទេសនេះក្នុងមូលនិធិសង្គ្រោះសហភាពអឺរ៉ុប ប៉ុន្តែនិយាយថាសភាអាល្លឺម៉ង់គួរតែមានសំឡេងធំជាងមុនក្នុងការរៀបចំកញ្ចប់សង្គ្រោះសេដ្ឋកិច្ច។ ប៉ាស៊ីហ្វិក៖ មេដឹកនាំដែនកោះក្នុងសមុទ្រប៉ាស៊ីហ្វិកកំពុងអំពាវនាវរកជំនួយអន្តរជាតិដើម្បីដោះស្រាយបញ្ហាកើនឡើងកម្ពស់ទឹកសមុទ្រដែលបង្កឡើងដោយការប្រែប្រួលអាកាសធាតុសាកលលោក។ សហរដ្ឋអាមេរិក៖ បេក្ខជនប្រធានាធិបតីមកពីគណបក្សសាធារណរដ្ឋរបស់សហរដ្ឋអាមេរិកគ្រោងនឹងជួបពិភាក្សាដេញដោលគ្នានៅយប់ថ្ងៃពុធនេះនៅឯបណ្ណាល័យលោកប្រធានាធិបតីរ៉ូណាល់ រីហ្កេន ក្នុងរដ្ឋកាលីហ្វ័រញ៉ា ។ នេះជាការជួបពិភាក្សាដេញដោលគ្នាលើកដំបូងបង្អស់ក្នុងចំណោមការ ពិភាក្សាដេញដោលគ្នាដែលមានជាបន្តទៀត។ អាហ្វ្រិកខាងកើត៖ ទីភ្នាក់ងារអាកាសធាតុរបស់អង្គការសហប្រជាជាតិព្យាករណ៍ថានឹងមានទឹកភ្លៀងធ្លាក់ធម្មតាឡើងវិញ ឬអាចលើសពីកម្រិតធម្មតាក្នុងភាគខាងត្បូងប្រទេសសូម៉ាលីដែលកំពុងទទួលរងគ្រោះដោយសារគ្រោះទុរ្ភិក្ស។ អាល់ហ្សេរី៖ ក្រុមគណៈប្រតិភូមកពីប្រទេសជិត៤០បានមកជួបជុំគ្នាក្នុងប្រទេសអាល់ហ្សេរីដើម្បីចូលរួមក្នុងកិច្ចប្រជុំរយៈពេលពីរថ្ងៃដើម្បីពិភាក្សាអំពីការគំរាមកំហែងនៃក្រុមមានទំនាក់ទំនងនឹងក្រុមអាល់កៃដានៅតំបន់អាហ្វ្រិកខាងជើង។ <!--AV--> ព័ត៌មាននៅពេលមុននេះ៖ តួកគី៖ ប្រទេសតួកគីនិយាយថាខ្លួនផ្អាកពាណិជកម្មយោធានិងសហប្រតិបត្តិការយោធាជាមួយប្រទេសអ៊ីស្រាអែល ហើយបង្កើនការឃ្លាំមើលដោយកងនាវាចម្បាំងនៅក្នុងផ្ទៃទឹកនៃសមុទ្រមេឌីទែររ៉ាណេ ជាការឆ្លើយតបនឹងការប្រកែកដោយអ៊ីស្រាអែលដែលមិនព្រមសុំអភ័យទោសដល់ការឆ្មក់វាយប្រហារដ៏ប្រល័យមួយទៅលើនាវាដឹកជំនួយតួកគីមួយគ្រឿងកាលពីឆ្នាំទៅមិញ។ ស៊ីរី៖ សហភាពអឺរ៉ុបកំពុងចាត់វិធានការដើម្បីដាក់កំហិតទ័ណ្ឌកម្មបន្ថែមទៅលើប្រទេសស៊ីរីចំពោះការបង្ក្រាបដ៏ឃោរឃៅរបស់រដ្ឋាភិបាលទៅលើក្រុមប្រឆាំង។ក្រសួងការបរទេសបារាំងនិយាយកាលពីថ្ងៃអង្គារថា ពួកអ្នកការទូតកំពុងពិចារណាអំពីវិធានការដែលយកជាទីដៅក្រុមហ៊ុនទាំងទ្បាយណាដែលមានការទាក់ទិនជាមួយការបង្ក្រាបក្រុមជនស៊ីវិលនៅស៊ីរី។ លីប៊ី៖ ក្បួនរថយន្តយ៉ាងតិចណាស់២រយគ្រឿងដែលដឹកកងកម្លាំងស្មោះត្រង់ជាមួយ Moammar Gadhafi ប្រទេសលីប៊ីបានឆ្លងព្រំដែនចូលទៅក្នុងប្រទេសជិតខាងនីហ្សេ ពេលដែលក្រុមយុទ្ធជនប្រឆាំងនឹង Gadhafi បានបន្តប្រមូលផ្តុំគ្នានៅខាងក្រៅទីតាំងចុងក្រោយបង្អស់របស់មេដឹកនាំដែលបានត្រូវបណ្តេញពីតំណែង។ ប៉ាគីស្ថាន៖ គណៈកម្មការប៉ាគីស្ថានបានដាក់កំហិតមិនឱ្យវេជ្ជបណ្ឌិតប៉ាគីស្ថានម្នាក់ធ្វើដំណើរទៅប្រទេសក្រៅទេ។ វេជ្ជបណ្ឌិតរូបនេះបានជួយសហរដ្ឋអាមេរិកក្នុងការឆ្មក់វាយប្រហារនៅថ្ងៃទី២ ឧសភា ដែលបានសម្លាប់អូសាម៉ា ប៊ីនឡាដេន មេរបស់អង្គការអាល់កៃដា។ លីប៊ី៖ ក្រុមជំនួយអន្តរជាតិមួយនិយាយថាពួកអ្នកផ្លាស់ប្តូរលំនៅដ្ឋាននៅអាហ្វ្រិក១ពាន់២រយនាក់បានជាប់គាំងនៅក្រុងមួយនាផ្នែកខាងត្បូងប្រទេសលីប៊ី ជាមួយម្ហូបអាហារនិងទឹកដែលរលោះបន្តិចម្តងៗ។ អាហ្វហ្គានីស្ថាន / អ៊ីរ៉ាក់៖ អតីតឧត្តមសេនីយសហរដ្ឋអាមេរិក ដែលបានបញ្ជាក្រុមទាហានដែលបានត្រូវបន្ថែមនៅក្នុងប្រទេសអ៊ីរ៉ាក់និងប្រទេសអាហ្វហ្គានីស្ថាន នៅពេលនេះជាអ្នកឱ្យបញ្ជានៅក្នុងទីភ្នាក់ងារស៊ើបការសម្ងាត់ CIA។ នីហ្សេរីយ៉ា៖ ពួកប៉ូលីសសម្ងាត់នៃប្រទេសនីហ្សេរីយ៉ា និយាយថាពួកគេបានចាប់ខ្លួនមនុស្ស៦នាក់ដែលមានការទាក់ទងជាមួយនិកាយសាសនាអ៊ីស្លាមនិយមជ្រុលមួយដែលជាប់សង្ស័យថាបានដាក់គ្រាប់បែកឱ្យផ្ទុះនៅក្នុងការិយាល័យបោះឆ្នោតមួយនិងក្នុងព្រះវិហារគ្រឹស្តសាសនាមួយកាលពីពេលមុននេះក្នុងឆ្នាំនេះ។ This posting includes an audio/video/photo media file: Download Now |
| Posted: 06 Sep 2011 02:34 PM PDT ឯកសារសម្ងាត់របស់សហព្រះរាជអាជ្ញានៃសាលាក្តីខ្មែរក្រហមក្នុងសំណុំរឿង ០០៣/០០៤ ដែលវីអូអេខេមរភាសាទទួលបាន បានចោទប្រកាន់បន្ថែមលើជនសង្ស័យ៥នាក់ជាអតីតកម្មាភិបាលខ្មែរក្រហមពីបទសង្ស័យថាទាក់ទងនឹងបទឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មប្រល័យពូជសាសន៍នៅសម័យខ្មែរក្រហមក្នុងទសវត្សរ៍១៩៧០។ ក៏ប៉ុន្តែជនសង្ស័យម្នាក់ ក្នុងចំណោមនោះគឺ តា អាន ជាអតីតអនុប្រធានតំបន់មជ្ឈិម នៅខេត្តកំពង់ចាម ដែលមានជនរងគ្រោះជាង១៥ម៉ឺននាក់ស្លាប់នោះ បានអះអាងថា ការចោទប្រកាន់រូបលោកជាការភ័ន្តច្រឡំ។ តា អានបដិសេធថា គ្មានជាប់ពាក់ព័ន្ធនឹងអំពើឧក្រិដ្ឋកម្មទាំងនោះទេ ហើយអះអាងថា លោកក៏មិនមែនជាអ្នកបង្កើតចលនាខ្មែរក្រហមដែរ។ តា អាន ឬ អោម អាន អាយុ៧៨ ឆ្នាំ បច្ចុប្បន្នជាកសិករ។ លោក សុខ ខេមរា នៃវីអូអេ បានធ្វើដំណើរទៅយកព័ត៌មានក្នុងប្រទេសកម្ពុជាកាលពីខែកក្កដា ហើយបានជួបសម្ភាសផ្ទាល់ជាមួយតា អាននៅផ្ទះរបស់គាត់ក្នុងភូមិមួយនៃស្រុកកំរៀង ខេត្តបាត់ដំបង។ ខាងក្រោមនេះជាភាគទីមួយនៃសេចក្តីសម្ភាសដែលមានបីភាគ។ <!--AV--> សំណួរ៖ កាលពីប៉ុន្មានខែមុន មានសហព្រះរាជអាជ្ញានៅតុលាការអន្តរជាតិបានរំលឹកឲ្យឃើញនៅក្នុងឯកសារដែលចេញថា លោកមានជាប់ពាក់ព័ន្ធនៅក្នុងសម័យអតីតកាលអី ដូចថាមានអំពើឃាតកម្មអី កើតឡើងច្រើនក្នុងពេលមានមនុស្សស្លាប់នៅខាងកំពង់ចាមអីចឹង តើរឿងនោះ ការចោទប្រកាន់យ៉ាងដូច្នោះ មានអត្ថាធិប្បាយយ៉ាងម៉េចដែរបាទ? ឆ្លើយ៖ ខាងកំពង់ចាម? ស៖ បាទ។ ឆ៖ ខ្ញុំ អត់ ខ្ញុំសុំជម្រាបប្រសាសន៍ក្មួយ បញ្ហាខ្ញុំនៅកំពង់ចាមនេះ ខ្ញុំឥតមានទាក់ទិនអីទេ។ អានេះចំពោះរូបខ្ញុំផ្ទាល់។ ព្រោះពេលដែលគេឲ្យខ្ញុំ ផ្លាស់ខ្ញុំទៅកំពង់ចាមនេះ គឺកំពង់ចាមពេលនោះមានភាពច្របូកច្របល់ មានភាពច្របូកច្របល់ និងខាងលើនិងឲ្យខ្ញុំទៅកំពង់ចាមនោះអត់មានទេអ្នកទទួលខុសត្រូវ តាំងពីភូមិ តាំងពីឃុំ ស្រុក គេដក គេគូរ គេតាល់អស់ទៅហើយ។ ហើយខ្ញុំហ្នឹងទៅរៀបចំថ្មីទេ។ អត់មានទាក់ទិនអីជាមួយនិងខ្លួនខ្ញុំទេ។ នេះខ្ញុំសុំជម្រាបប្រសាសន៍ ការណ៍ពិតអញ្ចឹងឯង។ ស៖ ប៉ុន្តែតុលាការ គេថាចង់នាំខ្លួនអ្នកប្រាំនាក់ផ្សេងទៀត នៅក្នុងនោះមានឈ្មោះលោកម្នាក់ដែរ អញ្ចឹងនៅពេលនិងមានការព្រួយបារម្ភទេ ឬក៏នឹងចង់តវ៉ាយ៉ាងម៉េចអំពីគេបញ្ចេញឈ្មោះយ៉ាងដូច្នោះ? ឆ៖ ខ្ញុំ បើមានសិទ្ធិតវ៉ា ដូចខ្ញុំថាអញ្ចឹង គឺខ្ញុំឥតមានបញ្ហាអីទាក់ទិនអំពីឃាតកម្មអស់ហ្នឹងទេ។ អត់មានទេ ដូចខ្ញុំជម្រាបប្រសាសន៍អញ្ចឹងគឺថា ពេលដែលខ្ញុំទៅ គឺអស់ហើយតាំងពីក្រោមរហូតដល់លើ នៅតែ កែ ពក មួយទេ។ រួចខ្ញុំទៅរៀបចំភូមិ ឃុំថ្មី ខ្ញុំមានការទាក់ទិនរឿងអី? (គឺ)អត់។ ស៖ កាលនោះលោកអញ្ជើញទៅ នៅពេលនោះ ឆ្នាំនោះមានន័យថា គេមានការច្របូកច្របល់គ្នារួចហើយ ហើយមនុស្សក៏មានការស្លាប់ សម័យហ្នុង ពីមុន …? ឆ៖ បាទគេដោះស្រាយអស់ហើយ រួចខ្ញុំទៅក្រោយ។ ទៅអស់ហើយ ខ្ញុំរៀបចំក្រោយ។ នៅតែ កែ ពក មួយ។ ភូមិ ឃុំ ស្រុក តំបន់ ខ្ញុំអត់មានទៅប្រឡាក់ប្រឡូសអីទេ អត់ អាហ្នឹងហើយដែលខ្ញុំចង់តវ៉ាអញ្ចឹងឯង តើខ្ញុំមានបញ្ហាអីទាក់ទិន? រួចមកដល់ ៧៧ ៧៨ រួច ៧៩ អស់ហើយ មានស្អី។ ស៖ កែ ពក កាលនោះគាត់ធ្វើអីនៅទីនោះ ដែលនៅសល់គាត់មួយ? ឆ៖ លេខាភាគ(លេខាភូមិភាគ)។ ស៖ អញ្ចឹងគាត់ក្តោបរួមទាំងអស់ សម័យនោះ នៅទីនោះ។ ឆ៖ បាទ។ ស៖ អញ្ចឹង ការចោទប្រកាន់ដែលថា លោកមានជាប់ពាក់ព័ន្ធនៅក្នុងបញ្ហាដូចថា មន្ទីរសន្តិសុខអីហ្នឹង អាហ្នឹងជារឿងមួយដែលគេយល់ច្រឡំ ឫក៏គិតថា រឿងហ្នឹងវា វាយ៉ាងម៉េចបានជាមានការចោទប្រកាន់ពីតុលាការ ពីអីអញ្ចឹងមក? ឆ៖ អាហ្នឹង ខ្ញុំកំណត់ថា ការយល់ច្រឡំរបស់គេ ព្រោះខ្ញុំអត់បានប្រព្រឹត្ត។ ដូចក្មួយជ្រាបច្បាស់ហើយ ខ្ញុំជម្រាបការណ៍ពិតខាងដើមអញ្ចឹង។ គឺថាអស់រលីងហើយ មានស្អី ភូមិ ឃុំ រហូតដល់ស្រុក រហូតដល់តំបន់ កាលណោះ គេមិនមែនថាខែត្តទេ គេថាតំបន់ បើអញ្ចឹងវាអស់ទៅហើយ។ ស៖ អស់ហ្នឹងមានន័យថាពួកគាត់ស្លាប់មុនឬក៏? ឆ៖ គេដកចេញ ដែលថាភាពច្របូកច្របល់ហ្នឹងគេដកចេញអស់ហើយ មិនដឹងគេយកទៅណា បើខ្ញុំអត់ដឹងដែរ ពេលដែលខ្ញុំទៅ វាអស់ទៅហើយ នៅតែ កែ ពក មួយ ហើយ កែ ពក ហ្នឹង កាលណោះមិនដឹងជាគាត់ទទួលខាងអីទេ តែខ្ញុំមិនដឹងដែរ អត់ដឹងថាតើគាត់ គ្រាន់តែដឹងថាគណកម្មាធិការភូមិភាគ ប៉ុន្តែក្នុងគណកម្មការភូមិភាគទាំងមូលហ្នឹងនៅសល់តែគាត់ហ្នឹងតើ តែមួយ។ ខ្ញុំទៅ ខ្ញុំអត់ដឹងរឿងរ៉ាវអីទេ ខ្ញុំទៅគឺថាវាអស់ហើយ បើអស់ហើយខ្ញុំរៀបចំជាថ្មី រៀបចំភូមិ រៀបចំឃុំ រៀបចំស្រុកអី អញ្ចឹងទៅ។ តែប៉ុណ្ណឹងហើយ ដំណើរការធម្មតា មានការកាប់សម្លាប់អី។ ដំណើរការធម្មតាក្នុងពេលនោះ ឥតមានអីទេ មានតែទំនប់ ធ្វើទំនប់ ធ្វើបន្លាយប្រព័ន្ធភ្លឺ គិតតែពីស្រែ អត់មានអី ក្នុងរយៈកាល ៧៧ មក ៧៨ ដល់ ៧៩ រាជរដ្ឋាភិបាលវ៉ៃ វារត់បាត់ទៅ ខ្ញុំទៅបានពីរឆ្នាំកាលណោះ មិនពេញផង។ អញ្ចឹងបានថាពាក្យពេចន៍ទាំងអស់នេះ ខ្ញុំអត់មានអីទាក់ទិន មិនដឹងជាយ៉ាងម៉េច ខ្ញុំអត់ដឹងដែរ។ មិនដឹងជាការចោទប្រកាន់ហ្នឹងរឿងយ៉ាងម៉េច។ ការណ៍ពិតរបស់ខ្ញុំ គឺវាអញ្ចឹង បាទ។ ស៖ ប៉ុន្តែ ឃើញមានសេចក្តីប្រកាសអីកន្លងៗមកថា គេចង់នាំខ្លួនអ្នកដទៃប្រាំនាក់អីទៀតហ្នឹង អត់មានអ្នកណាមកទាក់ទងពីខាងសាលាក្តីអី តុលាការអីមក មិនដែលមកជួបអីសួរ(ទេ)? ឆ៖ អត់ អត់មានផង។ ស៖ កាលសម័យតស៊ូហ្នឹង ហេតុអ្វីបានចូលរួមនៅក្នុងចលនាខ្មែរក្រហម បាទ? ឆ៖ ខ្ញុំជម្រាបប្រសាសន៍ក្មួយ ដូចខ្ញុំនិយាយលេងកន្លងមកហើយណាស់ ដូចខ្ញុំនិយាយលេងជាមួយក្មួយអញ្ចឹងណាស់ អំពីប្រពៃណីរបស់ខ្ញុំគឺព្រះមហាក្សត្រ ដូចខ្ញុំនិយាយអម្បាញ់មិញអញ្ចឹងណាស់ និយាយលេងជាមួយក្មួយនោះណាស់ គឺព្រះមហាក្សត្រតាំងពីជីតាមក រួចដល់ពេលថ្ងៃ ១៨ ខែបីឆ្នាំ ៧០ ហ្នឹងនែ៎ ឯកឧត្តម លន់ នល់ ធ្វើរដ្ឋប្រហារសម្តេច។ ក្នុងពេលនោះ វាមានមហាបាតុកម្មគ្រប់កន្លែង ដោយសម្តេចបានប្រកាសថាកូនចៅទាំងអស់ គឺមានតែនាំគ្នារត់ចូលព្រៃម៉ាគីទេ។ អានេះមូលហេតុ ទាំងអស់ហ្នឹងនែ៎ បានតែពេលធ្វើសម្តេចប្រកាសជាប្រធានរណសិរ្សរួបរួមជាតិ។ អញ្ចឹងណាស់ បាទ។ ប្រធានរណសិរ្សរួបរួមជាតិ។ អញ្ចឹងទៅ ទាំងអស់ គ្មាន(សល់)អ្នកណាមួយទេ គឺត្រូវតែធ្វើការតស៊ូ។ ដូច្នេះក្មួយត្រូវពិនិត្យមើលខ្លួនខ្ញុំផ្ទាល់ តើសមត្ថភាពខ្ញុំហ្នឹងនែ៎ បានន័យថាអ្នកមានគំនិតផ្តួចផ្តើមអញ្ចឹងៗទេ? អត់មានទេសមត្ថភាពនេះ ពណ៌សម្បុរនេះ សមត្ថភាពនេះមិនមានទេ ប៉ុន្តែអញ្ចឹង ដែលទៅជាការតស៊ូ។ រួចដល់ទៅសរុបមក ឈ្នះ ១៩៧៥ ហើយ ទាំងអស់គ្នាវាភ្ញាក់ទាំងអស់តែគ្នាទេ។ វាទៅជាលើកទង់សង្គមនិយមកុម្មុយនិស្តស្អីឯណា វាភ្ញាក់ខ្លួនទាំងអស់តែគ្នាហ្នឹងទេ។ បើទាំងអស់កន្លងមកវា ការរួបរួមជាតិកម្ពុជាហ្នឹងក្រោមទង់រណសិរ្សដែលមានសម្តេចជាប្រធាន។ អាហ្នឹង ខ្ញុំសុំជម្រាបប៉ុណ្ណឹង។ អាហ្នឹង ខ្លួនខ្ញុំផ្ទាល់ទេណាស់ ខ្ញុំជម្រាបប៉ុណ្ណឹង៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
