VOA News: ព័ត៌មាន: “ពលរដ្ឋខ្មែរអាមេរិកបង្ហាញក្តីរន្ធត់អំពីភេរវកម្មថ្ងៃ៩វិច្ឆិកាកាលពី១០ឆ្នាំមុន” plus 3 more |
- ពលរដ្ឋខ្មែរអាមេរិកបង្ហាញក្តីរន្ធត់អំពីភេរវកម្មថ្ងៃ៩វិច្ឆិកាកាលពី១០ឆ្នាំមុន
- វត្តមានអាជ្ញាធរជាតិប្រេងកាតកម្ពុជាទាក់ទាញចំណាប់អារម្មណ៍
- ព័ត៌មានអន្តរជាតិសង្ខេប៖ ៩ កញ្ញា
- ចៅក្រមតុលាការខ្មែរក្រហមរិះគន់ប្រព័ន្ធផ្សព្វផ្សាយ
| ពលរដ្ឋខ្មែរអាមេរិកបង្ហាញក្តីរន្ធត់អំពីភេរវកម្មថ្ងៃ៩វិច្ឆិកាកាលពី១០ឆ្នាំមុន Posted: 09 Sep 2011 01:53 PM PDT ពេលជិតដល់ខួប១០ឆ្នាំនៃការវាយប្រហារដោយភេរវកម្ម ពលរដ្ឋខ្មែរអាមេរិកាំងនៅក្រុងឡូវែលរដ្ឋម៉ាស្សាឈូសេតយល់ថា មានតែអហិង្សាទេដែលអាចទប់ស្កាត់ហិង្សាបាន រួមទាំងអំពើហិង្សាដោយភេរវកម្មផងដែរ។ លោក រ៉ាឌី មុំ គ្រូពេទ្យសរសៃនៅក្រុងឡូវែល និយាយថា មានតែការចរចាប៉ុណ្ណោះអាចលុបបំបាត់អំពើភេរវកម្មរបស់ក្រុមអាល់កៃដាបាន ពីព្រោះអំពើហិង្សានេះកើតចេញមនោគមន៍វិជ្ជា និងទស្សនៈខុសគ្នា ដែលទាមទារការសម្របសម្រួល ឬចៀសវាងការប៉ះទង្គិចគ្នា។ «ខ្ញុំមានតែម្រាមដៃ១០ សូមបួងសួងឲ្យធម៌ព្រះពុទ្ធជួយបំភ្លឺបុគ្គលគ្រប់រូបថា យើងស្រឡាញ់ខ្លួនយើងប៉ុណ្ណា គេក៏ស្រឡាញ់ខ្លួនគេយ៉ាងនោះដែរ»។ <!--AV--> ពេលកំពុងមើលឌីវីឌីរបស់គណៈកម្មការស្រាវជ្រាវភេរវកម្ម៩វិច្ឆិកា លោក រ៉ាឌី មុំ និយាយថា៖ «មនុស្សអស់សង្ឃឹមដឹងថា អស់ជីវិត ហើយសុខចិត្តហក់តាមបង្អួចមក មិនមែនពីរបីម៉ែត្រឯណា កម្ពស់សឹងតែកន្លះគីឡូម៉ែត្រពីលើមកក្រោម ធ្លាក់មកដល់ដីស្លាប់។ ខ្ញុំតក់ស្លុតមែនទែន»។ ទោះជាយ៉ាងណាក្តី លោក រ៉ាឌី មុំ កោតសរសើរវីរភាពរបស់ជនរងគ្រោះក្នុងយន្តហោះ United Airlines Flight 93 (ជើងហោះហើរលេខ៩៣) ដែលបានប្រយុទ្ធប្រឆាំងភេរវករ ទប់ស្កាត់មិនឲ្យភេរវករបង្កមហន្តរាយធ្វើជាងនេះស្មានមិនដល់។ លោកក៏គាំទ្រយុទ្ធសាស្ត្រប្រឆាំងភេរវកម្មដែរ ដូចជាការសម្លាប់ ប៊ីនឡាឌីន មេដឹកនាំអាល់កៃដា តែលោកមិនគាំទ្រការធ្វើសង្គ្រាមប្រឆាំងរដ្ឋាភិបាល ឬប្រទេសផ្សេងទេ។ ព្រះតេជគុណង៉ែត គឹមសឿន ដែលគង់នៅវត្តត្រៃរតនារាមមានសង្ឃដីកាថា ពេលឃើញព័ត៌មានអំពីភេរវកម្មថ្ងៃ១១កញ្ញា ព្រះអង្គតក់ស្លុត។ «នេះជាទិដ្ឋភាពមិនគួរឲ្យជឿ ហើយវាកើតមានយ៉ាងពិតប្រាដកនៅលើទឹកដីស.រ.អា.។ ព្រះសង្ឃគ្រប់រូប ប្រជាជនខ្មែរ ក៏ដូចប្រជាជនទូទៅក្នុងពិភពលោក ក្នុងនាមជាមនុស្សរស់នៅក្នុងសង្គមយើងគ្រប់រូបសុទ្ធតែប្រាថ្នាសេចក្តីសុខ ដល់ឃើញអញ្ចឹង សុទ្ធតែតក់ស្លុត»។ រីឯកញ្ញាដានី ត្រាន អ្នកសម្របសម្រួលពិធីបុណ្យអុំទូកនៅក្រុងឡូវែល (Lowell) រដ្ឋ ម៉ាស្សាឈូសេត (Massachusetts) និយាយថា សាច់ញាតិគ្រូរបស់នាងស្លាប់ក្នុងអគារភ្លោះ ដែលធ្វើឲ្យនាងកាន់តែរន្ធត់។ នាងនិយាយថា ទប់ស្កាត់ភេរវកម្មគឺជារឿងពិបាក ហើយចំណាយថវិកាច្រើន។ «ពេលខ្ញុំឃើញព័ត៌មានអំពីភេរវកម្មថ្ងៃ១១កញ្ញា ខ្ញុំតក់ស្លុត។ មើលទៅវេទនាណាស់។ កាលណោះខ្ញុំអាយុ១៣ឆ្នាំរៀនថ្នាក់ទី៧។ រដ្ឋាភិបាលអាមេរិកាំងកំពុងព្យាយាមគ្រប់គ្រងស្ថានភាពនៅបរទេស។ យើងមិនអាចគ្រប់គ្រងពួកភេរវករបានទេ។ បើយើងប្រើអំពើនិងសង្គ្រាម យើងមិនអាចដោះស្រាយបានទេ។ ខ្ញុំមានជំនឿលើការសម្របសម្រួល»។ លោកជូច ជីហ្គឹស សាស្ត្រាចារ្យនៅសាកលវិទ្យាល័យ UMASS នៅក្រុង ឡូវែល (Lowell) និយាយថា៖ «សួស្តី! ខ្ញុំឈ្មោះ George Chigas។ ខ្ញុំធ្វើការនៅសាកលវិទ្យាល័យ UMASS នៅទីនេះ ឆ្លងស្ទឹងនេះ»។ លោកបានឲ្យដឹងថា ពេលភេរវកម្មកើតឡើងភ្លាមៗ ពលរដ្ឋអាមេរិកាំងឆ្ងល់ថា ហេតុអ្វីបានជារឿងនេះកើតឡើង អ្នកណានៅពីក្រោយរឿងនេះ គឺដូចជនជាតិខ្មែរឆ្ងល់អំពីមូលហេតុនៃអំពើប្រល័យពូជសាសន៍របស់ខ្មែរក្រហមដែរ។ «ថ្ងៃទី១១ កញ្ញា ខ្ញុំយល់ថា ជាថ្ងៃមានសារៈសំខាន់ក្នុងប្រវត្តិសាស្ត្ររដ្ឋាភិបាលស.រ.អា.។ អ្នកដែលបានមើលទូរទស្សន៍ ឬឃើញផ្ទាល់នៅក្រុងញូវយ៉ក មុនដំបូងអត់ដឹងថាជារឿងពិត ឬយ៉ាងម៉េចទេ។ ប៉ុន្តែក្រោយមក យើងដឹងថា ពិត។ ខ្ញុំយល់ថា រឿងនេះដូចរឿងខ្មែរក្រហម។ យើងអត់ដឹងថា ហេតុអ្វីបានជាកើតមានរឿងនេះ? អ្នកណាធ្វើ? ហេតុអ្វីគេធ្វើរឿងនេះ?» បច្ចុប្បន្នពលរដ្ឋអាមេរិកាំងដឹងច្បាស់ហើយពីមូលហេតុ និងអ្នកនៅពីក្រោយភេរវកម្មថ្ងៃ១១ កញ្ញានោះ ហើយប៊ីនឡាឌីនក៏ស្លាប់ហើយដែរ។ ផ្ទុយទៅវិញជាង៣០ឆ្នាំកន្លងផុតទៅ ជនជាតិខ្មែរនៅមិនទាន់ទទួលបានយុត្តិធម៌នៅឡើយ ហើយមិនទាន់ដឹងច្បាស់ថា ហេតុអ្វីខ្មែរសម្លាប់ខ្មែរក្នុងរបបខ្មែរក្រហម៕ This posting includes an audio/video/photo media file: Download Now |
| វត្តមានអាជ្ញាធរជាតិប្រេងកាតកម្ពុជាទាក់ទាញចំណាប់អារម្មណ៍ Posted: 09 Sep 2011 12:51 PM PDT អាជ្ញាធរជាតិប្រេងកាតកម្ពុជាគឺជាអង្គការរដ្ឋាភិបាលមួយសម្រាប់គ្រប់គ្រងធនធានប្រេង។ អាជ្ញាធរជាតិប្រេងកាតកម្ពុជាត្រូវបានបង្កើតឡើងដោយព្រះរាជក្រឹត្យឆ្នាំ១៩៩៨។ លោកឧបនាយករដ្ឋមន្ត្រី សុខ អាន ជាប្រធាននៃអាជ្ញាធរជាតិនេះ។ លោក ម៉ែន ដែន អគ្គនាយករងនៃអាជ្ញាធរជាតិប្រេងកាតកម្ពុជា បានថ្លែងនៅថ្ងៃទី២៩ខែសីហា ថាបុគ្គលិកភាគច្រើនមានបទពិសោធន៍ការងារ សម្ថភាព និងចំណេះដឹងជំនាញខាងកិច្ចការប្រេងកាតគ្រប់គ្រាន់ ហើយមានសញ្ញាប័ត្រជាន់ខ្ពស់ទាក់ទងនឹងកិច្ចការប្រេងកាតពីប្រទេសរុស្សី ន័រវែស បែលហ្ស៊ិក និងអាមេរិក។ លោក ម៉ែន ដែន បានថ្លែងថា លោកមានបទពិសោធន៍ការងារខាងកិច្ចការប្រេងកាតនេះ អស់រយៈពេល២៣ឆ្នាំ និងបានទទួលសញ្ញាប័ត្រថ្នាក់បណ្ឌិតផ្នែកប្រេងកាត និងថាមពលពីសាកលវិទ្យាល័យ Preston នៅរដ្ឋ Wyoming សហរដ្ឋអាមេរិក ព្រមទាំងសញ្ញាប័ត្រជាន់ខ្ពស់ផ្នែកប្រេងកាតពីប្រទេសរុស្ស៊ី ន័រវែសន៍ និងវិទ្យាស្ថានបច្ចេកវិទ្យាមិត្តភាពកម្ពុជា-សូវៀត តិចណូ។ «ខ្ញុំកាន់ផ្នែកសិក្សាស្រាវជ្រាវ ការអភិវឌ្ឍ និងអាជីវកម្មធនធានប្រេងកាត។ នេះជាស្នូលនៅក្នុងអាជ្ញាធរជាតិប្រេងកាតកម្ពុជា។ ខ្ញុំគ្រប់គ្រងផ្នែកបច្ចេកទេស»។ លោក ម៉ែន ដែន បានបញ្ជាក់ថា អាជ្ញាធរជាតិប្រេងកាតកម្ពុជាមានបុគ្គលិកប្រមាណ១០០នាក់ ដែលភាគច្រើនមានសញ្ញាប័ត្រផ្នែកជំនាញប្រេងកាត ពីប្រទេសសូវៀត ន័រវែស បែលហ្ស៊ិក និងអាមេរិក។ លោក ម៉ែន ដែន បានបន្តថាអ្នកជំនាញមានប្រមាណ៨០ភាគរយ រួមមានអ្នកជំនាញ និងបទពិសោធន៍យូរឆ្នាំប្រមាណ៤០ភាគរយនៅក្រៅប្រទេស។ «អ្នកបម្រើការនៅទីនេះសុទ្ធតែមានសញ្ញាប័ត្រជាន់ខ្ពស់ ប៉ុន្តែមានអ្នកមានបទពិសោធន៍ច្រើនឆ្នាំ និងមានអ្នកខ្លះទើបចូលមកធ្វើការថ្មី ហើយអ្នកចាស់បង្រៀនអ្នកថ្មី។ យើងប្រជុំ យើងចេះជួយគ្នា ដែលគេហៅថា ចែករំលែកបទពិសោធន៍។ អ្នកមិនចេះសួរអ្នកចេះ។ អ្នកចេះបង្រៀនអ្នកមិនចេះទៅ។ ជំនាញខាងខួង ជំនាញខាងវិស្វកម្មអាងប្រេងកាតជំនាញខាងភូមិសាស្ត្រ និងជំនាញសេដ្ឋកិច្ច»។ លោក លឹម វុត្ថា នាយករងផ្នែករុករកធនធានប្រេង នៃអាជ្ញាធរជាតិប្រេងកាតកម្ពុជា បានថ្លែងថាលោក មានបទពិសោធន៍ការងាររុករកធនធានរ៉ែប្រេងកាត អស់រយៈពេល ២០ឆ្នាំ ក្នុងឋានៈ ជាភូគព្ភវិទូដែលបានសិក្សាអំពីផែនដីតាំងពីឆ្នាំ១៩៩១។ លោក លឹម វុត្ថា បានបញ្ជាក់ថា លោកបានទទួលសញ្ញាប័ត្រផ្នែករុករកធនធានរ៉ែប្រេងកាតពីអតីតរដ្ឋ អាហ្ស៊ែបៃហ្សាន (Azerbaijan) នៃអតីតសហភាពសូវៀត។ បន្ទាប់ពីបានបញ្ចប់ការសិក្សានៅសូវៀត រដ្ឋាភិបាល បានតែងតាំងលោកឲ្យធ្វើការនៅក្រសួងឧស្សាហកម្ម រ៉ែ និងថាមពល ផ្នែកប្រេងកាត។ លោក លឹម វុត្ថា បានបន្ថែមថា នៅពេលដែលមានការបង្កើតអាជ្ញាធរជាតិប្រេងកាតកម្ពុជា ក្នុងឆ្នាំ១៩៩៨ លោក និងបុគ្គលិកទាំងអស់ធ្វើ ការនៅផ្នែកប្រេងកាត នៃក្រសួងឧស្សាហកម្ម ត្រូវបាន ផ្លាស់មកធ្វើការនៅអាជ្ញាធរជាតិប្រេងកាតកម្ពុជានេះវិញ។ អាជ្ញាធរជាតិប្រេងកាតកម្ពុជា ត្រូវបានបង្កើតឡើង ដើម្បីទំនាក់ទំនងផ្លូវការរវាងរដ្ឋាភិបាលកម្ពុជា និងក្រុមហ៊ុនឧស្សាហកម្ម រ៉ែ ប្រេង និងឧស្ម័ន នៅពេលដែលវិស័យទាំងនេះចាប់ផ្តើមអភិវឌ្ឍន៍នៅកម្ពុជា។ លោក ឆាយ សារ៉ាត់ មន្ត្រីសម្របសម្រួលនៃសម្ព័ន្ធភាពកម្ពុជា ដើម្បីតម្លាភាពចំណូលធនធាន បានថ្លែងថា មន្ត្រីជាន់ខ្ពស់នៃអាជ្ញាធរជាតិប្រេងកាតកម្ពុជាបានទទួលការបណ្តុះបណ្តាលជាន់ខ្ពស់ក្នុងឧស្សាហកម្មបូមយកប្រេងនៅសហរដ្ឋអាមេរិក ន័រវែស និងបណ្តាលប្រទេសអឺរ៉ុបផ្សេងៗទៀតដើម្បីសិក្សាពីបទពិសោធន៍នានារបស់ប្រទេសទាំងនេះ និងពង្រឹងសមត្ថភាពរបស់អ្នកជំនាញកម្ពុជាទាក់ទងជាមួយបញ្ហាស្មុគស្មាញជាច្រើនជុំវិញឧស្សាហកម្មបូមយកប្រេងនេះ។ «យើងមានការចាប់អារម្មណ៍ខ្លាំងដោយឃើញពីចំណេះដឹងរបស់មន្ត្រីអាជ្ញាធរជាតិប្រេងកាតកម្ពុជា និងការបើកទូលាយ និងការចាប់អារម្មណ៍ធ្វើការយ៉ាងមានប្រសិទ្ធិភាព និងផលិតផល និងបញ្ហាទាក់ទងនឹងរឿងវិស័យប្រេង និងឧស្ម័ននៅកម្ពុជា»។ របាយការណ៍របស់កម្មវិធីអភិវឌ្ឍន៍សហប្រជាជាតិ (UNDP) ស្តីពីបញ្ហាធនធានមនុស្សសម្រាប់អនាគតកំណើនសេដ្ឋកិច្ចកម្ពុជាឆ្នាំ២០១១នេះបាននិយាយថា UNDP កំពុងធ្វើការជាមួយធនាគារអភិវឌ្ឍន៍អាស៊ី និងដៃគូអភិវឌ្ឍន៍ដទៃទៀតដើម្បីពង្រីកជំនាញ និងសមត្ថភាពរបស់បុគ្គលិកនៅអាជ្ញាធរជាតិប្រេងកាតកម្ពុជា៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ៩ កញ្ញា Posted: 09 Sep 2011 03:26 AM PDT ព័ត៌មានចុងក្រោយបំផុត៖ សហរដ្ឋអាមេរិក៖ មន្រ្តីប្រឆាំងភេរវកម្មរបស់សហរដ្ឋអាមេរិកកំពុងធ្វើការស៊ើបអង្កេតអំពីអ្វីដែលពួកគេហៅថាការគំរាមមួយដែលអាចជឿបានតែមិនអាចបញ្ជាក់ថាពិតបាន ដែលមានផែនការធ្វើឲ្យចំលើខួបឆ្នាំទី ១០ នៃការវាយប្រហារភេរវកម្មថ្ងៃទី ១១ ខែកញ្ញាមកលើសហរដ្ឋអាមេរិក។ សហរដ្ឋអាមេរិក៖ លោកប្រធានាធិបតីសហរដ្ឋអាមេរិកបារ៉ាក់ អូបាម៉ា បានអំពាវនាវដល់ក្រុមអ្នកតាក់តែងច្បាប់ឲ្យអនុម័តផែនការបង្កើតការងារ មានទឹកប្រាក់ជិត ៤៥០ ពាន់លានដុល្លារ ដែលនឹងបញ្ចូលការកាត់ប្រាក់ពន្ធជាមួយប្រាក់ចំណាយរបស់រដ្ឋាភិបាល។ លីប៊ី៖ ប៉ូលីសអន្តរជាតិ (Interpol) បានចេញដីកាចាប់ខ្លួនអតីតមេដឹកនាំលីប៊ី លោកម៉ូអាមារ ហ្កាដាហ្វី លើបទចោទប្រកាន់ថាលោកបានប្រព្រឹត្តឧក្រិដ្ឋកម្មប្រឆាំងមនុស្សជាតិ។ ស៊ីរី៖ លោកប្រធានាធិបតី Dmitry Medvedev នៃប្រទេសរុស្ស៊ី បានបង្ហើបឲ្យដឹងថារដ្ឋាភិបាលក្រុង មូស្គូ ប្រហែលជាបើកចំហចំពោះសេចក្តីសម្រេចមួយរបស់អង្គការសហប្រជាជាតិ ដែលមានគោលដៅបញ្ជូន«សារដ៏ខ្លាំង»ទៅលោកប្រធានាធិបតីបាស្ហារ៍ អាល់ អាសេដ (Bashar al-Assad) នៃប្រទេសស៊ីរី ក៏ប៉ុន្តែលុះណាតែសេចក្តីសម្រេចនោះដោះស្រាយបញ្ហាពួកបាតុករប្រឆាំងនឹងរដ្ឋាភិបាលផងដែរ។ ទួកគី/អ៊ីស្រាអែល៖ ប្រទេសទួកគីប្រាប់ឲ្យដឹងថានាវាចំបាំង នឹងអមកប៉ាល់ដឹកទំនិញរបស់ខ្លួនដែលដឹកជញ្ជូនជំនួយមនុស្សធម៌ទៅកាន់តំបន់កាហ្សា ស្រ្ទីប (Gaza Strip) ដើម្បីការពារកប៉ាល់ដឹកទំនិញទាំងនោះកុំឲ្យប្រទេសអ៊ីស្រាអែលជ្រៀតជ្រែក។ អ៊ីស្រាអែល /ប៉ាឡេស្ទីន៖ លោកអគ្គលេខាធិការអង្គការសហប្រជាជាតិ បាន គី មូន បានសម្តែងការគាំទ្រជាថ្មីម្តងទៀតចំពោះរដ្ឋប៉ាឡេស្ទីន មួយ ដោយបាននិយាយថាបញ្ហានេះ «គួរតែដោះស្រាយតាំងពីយូរយារមកហើយ»។ <!--AV--> ព៏ត៌មាននៅពេលមុននេះ៖ <!--IMAGE-LEFT-->ចិន៖ ទីភ្នាក់ងារផ្តល់ពិន្ទុឥណទានកំពូលអន្តរជាតិមួយប្រាប់ថាខ្លួនអាចបញ្ចុះពិន្ទុឥណទានរបស់ចិនក្នុងរយៈពេលពីរឆ្នាំទៀត ព្រោះតែកំណើនឡើងនូវភាពគ្រោះថ្នាក់នៃការជំពាក់បំណុលដ៏សន្ធឹកសន្ធាប់របស់ធនាគារនិងរដ្ឋាភិបាលមូលដ្ឋាន។ អាល្លឺម៉ង់៖ ប៉ូលីសអាល្លឺម៉ង់ថាពួកគេបានចាប់ខ្លួនបុរសពីរនាក់នៅក្រុងបែរឡាំងដែលសង្ស័យរៀបចំផែនការវាយប្រហារភេរវកម្មដ៏ធំមួយ។ សហរដ្ឋអាមេរិក៖ ប្រាប់ឲ្យដឹងថាពួកភេរវជនឥឡូវនេះ កំពុងតស៊ូយ៉ាងត្រដាបត្រដួសដើម្បីការពារប្រាក់កាក់របស់ខ្លួន។ អាហ្វហ្គានីស្ថាន៖ អង្គការអូតង់ថាទាហានរបស់ខ្លួនម្នាក់បានសម្លាប់អ្នកកាសែត BBC (British Broadcasting Corporation) ក្នុងអំឡុងពេលវាយប្រហារនៅអាហ្វហ្គានីស្ថានខាងត្បូង បន្ទាប់ពីបាញ់ច្រឡំលោកថាជាអ្នកគ្រាប់បែកអត្តឃាត។ អឺរ៉ុប៖ នាយកធនាគារកណ្តាលរបស់សហភាពអឺរ៉ុបថា ការគម្រាមកំហែងដល់សេដ្ឋកិច្ចក្នុងប្រទេសជាតិចំនួន១៧ដែលប្រើប្រាស់ប្រាក់អឺរ៉ូបានកើនឡើងយ៉ាងខ្លាំង ហើយសេចក្តីសង្ឃឹមនៃការរីកលូតលាស់បានរលាយបាត់។ សេដ្ឋកិច្ចសកលលោក៖ អង្គការសម្រាប់កិច្ចសហប្រតិបត្តិការសេដ្ឋកិច្ចនិងអភិវឌ្ឍន៍ និយាយថាការរើបឡើងវិញនូវសេដ្ឋកិច្ច បានខិតចូលការជាប់គាំងក្នុងប្រទេសឧស្សាហកម្មជឿនលឿន។ សហរដ្ឋអាមេរិក៖ ចំនួនមនុស្សគ្មានការងារធ្វើដែលកំពុងស្វះស្វែងរកជំនួយហិរញ្ញវត្ថុថ្មីរបស់រដ្ឋាភិបាលសហរដ្ឋអាមេរិក បានកើនឡើងបន្តិចកាលពីសប្តាហ៍មុន ដោយមានភស្តុតាងរឹតតែច្រើនឡើងថាសេដ្ឋកិច្ចប្រទេសកំពុងមានការរីកចម្រើនយឺតៗ។ សហរដ្ឋអាមេរិក៖ ប្រធានាធិបតីសហរដ្ឋអាមេរិកបារ៉ាក់ អូបាម៉ា បានអញ្ជើញទៅវិមានរដ្ឋសភាកាលពីថ្ងៃព្រហស្បត៍ដើម្បីគូសបញ្ជាក់ផែនការរបស់លោកចំពោះការបង្កើតការងារ បន្ទាប់ពីតួលេខថ្មីៗនេះ បានបង្ហាញថាការបង្កើតការងារនៅជាប់គាំង ដែលកំពុងគំរាមកំហែងសេដ្ឋកិច្ចលើកទី២។ ស៊ីរី៖ កងកម្លាំងប្រទេសស៊ីរី បានវាយឆ្មក់ភូមិនៅផ្នែកពាយ័ព្យនៅពេលដែលរដ្ឋាភិបាលបន្តការបង្ក្រាបរបស់ខ្លួនលើពួកប្រឆាំង។ ស៊ីរី៖ ស្ថានីយ៍ទូរទស្សន៍ស៊ីរីបានចាក់ផ្សាយសារថតសម្លេងដែលគេសន្មតថាជារបស់មេដឹកនាំបណ្តេញចេញពីតំណែង Moammar Gadhafi ប្រទេសលីប៊ី ដែលបានរិះគន់សេចក្តីរាយការណ៍ថាលោកបានរត់គេចចេញពីលីប៊ីតាមក្បួនកុងវ័រមួយទៅប្រទេសនីហ្សេ ជាប្រទេសជិតខាង។ ប៉ាឡេស្ទីន៖ ចាប់ផ្តើមកិច្ចប្រឹងប្រែងទំនាក់ទំនងសាធារណៈមួយឈុតដើម្បីស្វែងរកការចូលរួមរបស់ខ្លួនក្នុងអង្គការសហប្រជាជាតិជាសមាជិករដ្ឋពេញសិទ្ធ មួយថ្ងៃបន្ទាប់ពីបេសកជនសហរដ្ឋអាមេរិក បានព្យាយាមឲ្យពួកគេទម្លាក់ចោលការស្វះស្វែងនេះ។ សហរដ្ឋអាមេរិក៖ ខ្យល់ព្យុះតំបន់ត្រូពិកកំពុងធ្វើឲ្យធ្លាក់ភ្លៀងយ៉ាងខ្លាំងក្នុងផ្នែកនានាភាពឦសាន្តសហរដ្ឋអាមេរិក បណ្តាលឲ្យមានការអំពាវនាវដល់តំបន់នោះឲ្យមានការជម្លៀសមនុស្សដ៏ច្រើន។ This posting includes an audio/video/photo media file: Download Now |
| ចៅក្រមតុលាការខ្មែរក្រហមរិះគន់ប្រព័ន្ធផ្សព្វផ្សាយ Posted: 09 Sep 2011 08:15 AM PDT ចៅក្រមម្នាក់របស់តុលាការខ្មែរក្រហមដែលគាំទ្រដោយអង្គការសហប្រជាជាតិនៅកម្ពុជា បានរិះគន់ប្រព័ន្ធផ្សព្វផ្សាយពីការកាត់ទោសឧក្រិដ្ឋកម្មសង្គ្រាមដែលកំពុងបន្តធ្វើឡើងបន្ទាប់ពីមានសេចក្តីរាយការណ៍ជាបន្តបន្ទាប់ដែលបានលេចចេញព័ត៌មានសម្ងាត់។ ចៅក្រមតុលាការកំពូលម្នាក់សម្រាប់តុលាការខ្មែរក្រហមនៅកម្ពុជា បានប្រើពាក្យសម្តីខ្លាំងៗចំពោះសេចក្តីរាយការណ៍របស់ប្រព័ន្ធផ្សព្វផ្សាយពីដំណើរការកាត់ក្តីរបស់ខ្លួន។ កាលពីឆ្នាំទៅ តុលាការនេះបានកាត់ទោសអតីតមេដឹកនាំខ្មែរក្រហមម្នាក់ពីបទឧក្រិដ្ឋដែលជននោះបានប្រព្រឹត្តក្នុងចុងទសវត្សរ៍១៩៧០ ហើយតុលាការកំពុងដំណើរការកាត់ទោសមេដឹកនាំជាន់ខ្ពស់បួននាក់ទៀតក្នុងរឿងក្តី០០២។ ប៉ុន្តែ មានការជជែកដេញដោលជាច្រើនលើបញ្ហាថាតើពួកមេដឹកនាំផ្សេងទៀត នឹងត្រូវនាំមកកាត់ទោសក្នុងករណី០០៣និង០០៤ដែរឬយ៉ាងណា។សេចក្តីលម្អិតនោះបានត្រូវលេចធ្លាយកាលដើមឆ្នាំនេះទៅប្រព័ន្ធផ្សព្វផ្សាយមួយចំនួន។ ចៅក្រម អាហ្កនីអាយស្សាក ក្លនអូវីអៃគុមីលអាត (Agnieszka Klonowiecka-Milart) បានរិះគន់បណ្តាញផ្សាយព័ត៌មានកាលពីពេលថ្មីៗនេះដែលបានរាយការណ៍ពីជនសង្ស័យថ្មីៗសំខាន់ៗដែលឈ្មោះរបស់ពួកគេត្រូវបានបង្ហាញក្នុងឯកសារតុលាការដែលលេចធ្លាយដល់ប្រព័ន្ធផ្សព្វផ្សាយ។ ថ្លែងនៅក្លឹបអ្នកឆ្លើយឆ្លងព័ត៌មានបរទេសរបស់ប្រទេសថៃក្នុងទីក្រុងបាងកក លោកស្រីបាននិយាយថា អ្វីដែលគួរជាការស៊ើបអង្កេតសម្ងាត់ត្រូវបានបណ្តាញផ្សាយព័ត៌មានលួចយក។ «ការជជែកដេញដោលត្រូវបានធ្វើឡើងក្នុងវេទិកាប្រព័ន្ធផ្សព្វផ្សាយដើម្បីប្រឆាំងតុលារការ។ ខ្ញុំគិតថា អូហ៍ ឯកសារសម្ងាត់ត្រូវបានលេចធ្លាយ ទោះបីគេពេញចិត្ត ឬមិនពេញចិត្តក៏ដោយ គេត្រូវទុកបញ្ហានេះចោលមួយឡែកសិន ក៏ប៉ុន្តែ វាជាការគួរឲ្យខ្មាសអៀន។ ទោះបីជាសាធារណៈជនបានដឹងឮហើយក៏ដោយ វាជាការខុសឆ្គងមួយដែលរឿងបែបនេះកើតឡើង។ វាមិនមែនជាហេតុផលដែលគួរដាក់ឲ្យសាធារណជនដឹងឮម្តងទៀតនោះទេ»។ សហចៅក្រមស៊ើបអង្កេតរបស់តុលាការបានចាប់ផ្តើមដាក់ពាក្យប្តឹងសេវាកម្មផ្សាយជាភាសារខ្មែររបស់វីអូអេសំឡេងសហរដ្ឋអាមេរិកចំពោះការដកស្រង់ឯកសារធ្លាយ ហើយផ្សាយរូបភាពឯកសារនេះ។ ឯកសារតុលាការ ដែលបានលេចធ្លាយនៅឆ្នាំនេះហើយខ្លឹមសាររបស់វាបានត្រូវបញ្ចេញរួចហើយទៅប្រព័ន្ធផ្សព្វផ្សាយផ្សេងៗទៀត ប៉ុន្តែតុលាការបានបញ្ចេញឈ្មោះវីអូអេតែមួយគត់ក្នុងដំណើរការនៃការប្តឹងរបស់ខ្លួន។ វីអូអេបានចេញសេចក្តីថ្លែងការណ៍ពីការព្រួយបារម្មណ៍អំពីផលប៉ះពាល់ដែលជាការគម្រាមកំហែងអាចមានលើសេចក្តីរាយការណ៍របស់ប្រព័ន្ធផ្សព្វផ្សាយអំពីតុលាការ។ អ្នកស្រី អ៊ែន ហេនដែល (Anne Heindel) ជាទីប្រឹក្សាច្បាប់របស់មជ្ឈមណ្ឌលឯកសារកម្ពុជា ដែលជាអង្គការប្រមូលភស្តុ័តាងឧក្រិដ្ឋកម្មដែលបានធ្វើឡើងក្នុងអំឡុងរបបខ្មែរក្រហម។ អ្នកស្រីក៏បាននិយាយនៅឯក្លឹបអ្នកឆ្លើយឆ្លងព័ត៌មានបរទេសក្នុងទីក្រុងបាងកកដែរ ហើយអ្នកស្រីបាននិយាយថា ការលេចធ្លាយនេះមកពីរបៀបថែរក្សាព័ត៌មានសម្ងាត់របស់តុលាការតាមរយៈការស៊ើបអង្កេត និងការកាត់ទោស ការរកាំចិត្តនៃការយល់ដឹងជាសាធារណៈហើយនឹងការបន្ថែមការរិះគន់ដល់តុលាការ។ «មនុស្សមានអារម្មណ៍ថា រឿងក្តី០០៣ និង០០៤មិនត្រូវបានស៊ើបអង្កេតឲ្យបានពេញលេញ ហើយរដ្ឋាភិបាលឲ្យដឹងថា ខ្លួនមិនចង់បន្តរឿងក្តីនេះតទៅទៀត។» ជាការពិត អន្តរជាតិមិនចង់ផ្តល់ប្រាក់ដល់រឿងក្តីនេះ។ មានការគិតថារឿងក្តីនេះ នឹងមិនកើតមានឡើងដោយសារមូលហេតុនយោបាយហើយភាគច្រើនមិនមែនមកពីបញ្ហាផ្លូវច្បាប់ទេ។ ការណ៍នេះបាននាំឲ្យមានព័ត៌មានយ៉ាងច្រើនលេចចេញពីបណ្តាញមិនប្រក្រតី និងមិនមែនតាមរយៈតុលាការ»។ ចាប់តាំងពីតុលាការត្រូវបានបង្កើត ពួកអ្នករឹះគន់បានចោទប្រកាន់តុលាការពីបទពុករលួយ ការចំណាយច្រើនពេក ហើយនឹងមានការយឺតយ៉ាវក៏ដូចជាបានទទួលការជ្រៀតជ្រែកខាងនយោបាយ។ លោកហ៊ុន សែននាយករដ្ឋមន្រ្តីកម្ពុជា ដែលខ្លួនលោកជាអតីតខ្មែរក្រហម បានថ្លែងជាសាធារណៈថាមិនមានការកាត់ទោសបន្ថែមទៀតទេពីព្រោះវាអាចនាំឲ្យមានសង្គ្រាមស៊ីវិល។ ពួកកុម្មុយនីស្តជ្រុលនិយមខ្មែរក្រហមដែលដឹកនាំដោយប៉ុល ពតបានគ្រប់គ្រងប្រទេសកម្ពុជាពីឆ្នាំ១៩៧៥ដល់ឆ្នាំ១៩៧៩ ដែលបានធ្វើឲ្យប្រជាពលរដ្ឋកម្ពុជាយ៉ាងច្រើនរហូតដល់២លាននាក់ ដែលជិតស្មើ១ភាគ៤នៃប្រជាពលរដ្ឋសរុបត្រូវបានសម្លាប់ និងស្លាប់ដោយសារការអត់អាហារ ហើយនឹងធ្វើការជាទម្ងន់។ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
