VOA News: ព័ត៌មាន: “ប្រតិកម្មជុំវិញមរណភាពរបស់លោកវ៉ាន់ ណាត” plus 2 more |
- ប្រតិកម្មជុំវិញមរណភាពរបស់លោកវ៉ាន់ ណាត
- អតីតអ្នកទោសគុកទួលស្លែងវ៉ាន់ ណាត ទទួលមរណភាព
- ព័ត៌មានអន្តរជាតិសង្ខេប៖ ៥ កញ្ញា
| ប្រតិកម្មជុំវិញមរណភាពរបស់លោកវ៉ាន់ ណាត Posted: 05 Sep 2011 02:03 PM PDT ក្រុមមន្ត្រីការទូត រដ្ឋាភិបាល និងអង្គការសង្គមស៊ីវិលបានសម្តែងការសោកស្តាយចំពោះមរណភាពរបស់លោក វ៉ាន់ ណាត ដែលជាអតីតអ្នករស់រានមានជីវិតពីគុកទួលស្លែង និងសាក្សីដ៏សំខាន់នៅក្នុងសាលាក្តីខ្មែរក្រហមប្រឆាំងនឹងឌុច អតីតដែលមេគុកទួលស្លែងរបស់ពួកខ្មែរក្រហម។ លោកឡាត់ គី អ្នកឃ្លាំមើលសាលាក្តីខ្មែរក្រហមនៃសមាគមសិទ្ធិមនុស្សអាដហុក បានថ្លែងថា លោកវ៉ាន់ ណាត គឺជាជនរងគ្រោះ និងសាក្សីដ៏សំខាន់ដែលបានដឹងរឿងរ៉ាវនៃការធ្វើទារុណកម្មយ៉ាងឃោរឃៅរបស់ពួកខ្មែរក្រហម។ «ការបាត់បង់របស់គាត់នេះគឺជាការគួរឲ្យសោកស្តាយមែនទែនចំពោះការចូលរួមចំណែកនៅក្នុងការស្វែងរកយុត្តិធម៌ ហើយគាត់គឺជាមនុស្សម្នាក់ដែលមានមនសិកាខ្ពស់មែនទែន ហើយលះបង់ខ្ពស់ណាស់នៅក្នុងកិច្ចការយុត្តិធម៌ និងនៅក្នុងការចូលរួមដំណើរការសាលាក្តីនេះ»។ លោក ឡាត់ គី បានបន្ថែមថា មរណភាពរបស់លោកវ៉ាន់ ណាត ជាសារមួយជំរុញឲ្យតុលាការកំពូលនៃសាលាក្តីខ្មែរក្រហមចេញសាលដីកាចុងក្រោយនៃរឿងក្តីឌុចឲ្យបានឆាប់។ «ការស្លាប់របស់គាត់ ខ្ញុំយល់ឃើញថា វាជាសារមួយសំខាន់សម្រាប់សាធារណជន ក៏ដូចជាអង្គជំនុំជម្រះតុលាការកំពូលក្នុងការពន្លឿនកិច្ចការនៅក្នុងការប្រកាសសាលដីការបស់ខ្លួនឲ្យបានឆាប់ផងដែ»។ លោក ឆាង យុ នាយកមជ្ឈមណ្ឌលឯកសារកម្ពុជា បានថ្លែងថា លោកវ៉ាន់ ណាត មិនចង់បានអ្វីក្រៅតែពីយុត្តិធម៌ ហើយលោកបានចូលរួមធ្វើជាសាក្សីប្រវត្តិសាស្ត្រម្នាក់ប្រឆាំងនឹងឌុច ដែលជាអតីតប្រធានមន្ទីរសន្តិសុខស-២១ ប៉ុន្តែអកុសល លោកបានស្លាប់ដោយមិនទាន់បានទទួលយុត្តិធម៌ពេញលេញ។ លោក ឆាង យុ បានបន្តថា សាលាក្តីខ្មែរក្រហមបានជជែកដេញដោលគ្នាអំពីសុខភាពរបស់ជនជាប់ចោទ ប៉ុន្តែមិនបានគិតអំពីសុខភាពរបស់ជនរងគ្រោះ និងសាក្សីដូចលោកវ៉ាន់ ណាតនេះទេ។ «សព្វថ្ងៃ យើងខ្វល់ខ្វាយអំពីសុខភាពរបស់ជនត្រូវចោទអៀង ធីរិទ្ធ និងនួន ជា ប៉ុន្តែឪពុកម្តាយ និងបងប្អូនយើងដែលបានរស់ពីរបបខ្មែរក្រហម បានស្លាប់ជាបន្តបន្ទាប់។ ខ្ញុំថាគាត់ជានិមិត្តរូបនៃភាពរឹងមាំរបស់ជនរងគ្រោះ។ ដូចជាពូ វ៉ាន់ ណាត ខ្មែរយើងថា ស្លាប់ទៅបិទភ្នែកមិនជិត មិនបានឃើញយុត្តិធម៌ពេញលេញមួយដែលត្រូវបានផ្តល់ជូនគាត់»។ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យនៃទីស្តីការគណៈរដ្ឋមន្ត្រី បានថ្លែងថា ការបាត់បង់វត្តមានរបស់លោកអាចជា ការបាត់បង់ចំណែកណាមួយនៃការងារតុលាការ។ «នេះ ជាដំណឹងដ៏ក្រៀមក្រំ ហើយជាការសោកស្តាយដ៏ធំបំផុត ដោយសារយើងយល់ឃើញថា គាត់គឺជា សាក្សីភ្នែកស្រស់ដែលចូលរួមចំណែកយ៉ាងសំខាន់ក្នុងការផ្តល់យុត្តិធម៌ទាំងសងខាង។ យុត្តិធម៌ទាំងជនជាប់ចោទ និងទាំងជនរងគ្រោះនៃអំពើពីរបបប្រល័យពូជសាសន៍។ លោក ស្សន ម៉ាកឃីនតុស្ស (Sean McIntosh) អ្នកនាំពាក្យស្ថានទូតអាមេរិកប្រចាំកម្ពុជា បានបញ្ជាក់តាមសម្តីដើមថា៖ «យើងមានការសោកស្តាយអំពីដំណឹងមរណៈភាពរបស់លោកវ៉ាន់ ណាត ដែលជាបុគ្គលដ៏អង់អាច និងប៉ិនប្រសប់ ហើយយើងសូមសម្តែងសមានទុក្ខចំពោះក្រុមគ្រួសាររបស់លោក»។ សេចក្តីថ្លែងការណ៍រួមរបស់ស្ថានទូតបារាំង និងជប៉ុនប្រចាំកម្ពុជា បានបញ្ជាក់ថា ស្ថានទូតបារាំង និងជប៉ុនបានសម្តែងការសោកស្តាយយ៉ាងក្រៃលែងចំពោះមរណភាពរបស់លោកវ៉ាន់ ណាត ដែលជាអ្នករស់រានពីមជ្ឈមណ្ឌលឃុំឃាំងស-២១ និងជាសាក្សីដ៏សំខាន់នៃអំពើឃោរឃៅរបស់ពួកខ្មែរក្រហម។ លោកស្រី គ្លែរ ដាហ្វ៊ី (Clair Duffy) មន្ត្រីឃ្លំាំមើលសាលាក្តីខ្មែរក្រហមនៃអង្គការគំនិតផ្តួចផ្តើមយុត្តិធម៌សង្គមសេរី (OSJI) បានថ្លែងថា វាជារឿងសោកសៅបំផុតចំពោះ មរណភាពរបស់លោកវ៉ាន់ ណាត ហើយលោកបាននិយាយអំពីបទពិសោធន៍ដ៏ឈឺចាប់របស់គាត់នៅគុកទួលស្លែងរបស់ខ្មែរក្រហម និងទាមទារយុត្តិធម៌ចំពោះអំពើឃោរឃៅសម្រាប់ការឈឺចាប់របស់លោក និងជនរងគ្រោះដែលបានស្លាប់នៅគុកទួលស្លែង។ «ខ្ញុំគិតថាគ្រួសាររបស់លោកវ៉ាន់ ណាត ព្រមទាំងដើមបណ្តឹងរដ្ឋប្បវេណីទាំងអស់ និងអ្នករស់រានមានជីវិតដទៃទៀតចង់ឃើញសេចក្តីសម្រេចចុងក្រោយចំពោះ ឌុច ឲ្យបានឆាប់បំផុតតាមដែលអាចធ្វើបាន។តុលាការកំពូលនៃសាលាក្តីខ្មែរក្រហមបានប្រកាសកាលពីសប្តាហ៍មុនថា សេចក្តីសម្រេចអំពីករណីឌុច នឹងត្រូវបានប្រកាសនៅមុនបំណាច់ឆ្នាំ២០១១នេះ»៕ This posting includes an audio/video/photo media file: Download Now |
| អតីតអ្នកទោសគុកទួលស្លែងវ៉ាន់ ណាត ទទួលមរណភាព Posted: 05 Sep 2011 01:43 PM PDT លោក វ៉ាន់ ណាត ដែលជាអតីតអ្នករស់រានមានជីវិតនៃមន្ទីរឃុំឃាំងទួលស្លែង និងជាសាក្សីដ៏សំខាន់មួយរូបនៃសាលាក្តីខ្មែរក្រហម បានទទួលមរណភាពនៅថ្ងៃច័ន្ទ ទី៥ ខែធ្នូ ឆ្នាំ ២០១១នេះ នៅម៉ោងប្រមាណ១២ និង៤៥នាទី នៅគ្លីនិកឯកជនមួយ ដោយសារជំងឺគាំងបេះដូងក្នុងជន្មាយុ៦៦ឆ្នាំ។ សាកសពលោក វ៉ាន់ ណាត ត្រូវបានក្រុមគ្រួសារ និងក្រុមគ្រូពេទ្យដឹកតាមរថយន្តពេទ្យមួយ ដោយមានការហែហមដោយក្រុមគ្រួសារទៅធ្វើបុណ្យតាមប្រពៃណីនៅគេហដ្ឋានរបស់លោកដែលមានទីតាំងនៅក្នុងសង្កាត់មិត្តភាព ខណ្ឌ៧មករា ក្រុងភ្នំពេញ។ អ្នកស្រី គិត អេង បានផ្តល់កិច្ចសម្ភាសន៍ជាមួយវីអូអេសំឡេងសហរដ្ឋអាមេរិកជាខេមរភាសាថា អ្នកស្រីមានការសោកស្តាយចំពោះការបាត់បង់ជីវិតរបស់ស្វាមីអ្នកស្រី។ «ខ្ញុំមានការសោកស្តាយរកអ្វីមកប្រៀបមិនបានព្រោះមួយជីវិតមនុស្សដែលគាត់ជាមនុស្សសំខាន់ក្នុងជីវិតរបស់ខ្ញុំ»។ នៅឯគ្លីនិកឯកជន ក្រុមគ្រួសារ សាច់ញាតិ និងមន្ត្រីអតីតសាលាក្តីខ្មែរក្រហមបានមកសួរសុខទុក្ខលោកវ៉ាន់ ណាត ចុងក្រោយមុននឹងសម្រេចដឹកតាមរថយន្តចេញទៅគេហដ្ឋាន។ ក្រុមគ្រួសាររបស់លោកវ៉ាន់ ណាត បានហាមអ្នកយកព័ត៌មានផ្តិតយករូបភាពរបស់លោកវ៉ាន់ ណាត នៅពេលដែលដឹកជញ្ជូនចេញពីគ្លីនិចឯកជន។ លោកស្រី ហេឡិន ចាវីស (Helen Jarvis) អតីតមន្ត្រីសាធារណៈរបស់សាលាក្តីខ្មែរក្រហម ដែលតែងតែមកសួរលោកវ៉ាន់ ណាត មុនពេលដែលលោកធ្លាក់ខ្លួនឈឺជាទម្ងន់រហូតដល់បាត់បង់ជីវិតបាននិយាយថា ការស្លាប់របស់លោកវ៉ាន់ ណាត គឺជាការបាត់បង់សាក្សីដ៏សំខាន់មួយរូបសម្រាប់សាលាក្តីខ្មែរក្រហម។ «ខ្ញុំគិតថា វ៉ាន់ ណាត មានតួនាទីសំខាន់ក្នុងប្រវត្តិសាស្ត្រកម្ពុជា គាត់ជាជាងគំនូរដ៏ល្បីល្បាញ ហើយគាត់ជាសាក្សីពីសម័យដ៏ងងឹតក្នុងប្រវត្តិសាស្ត្រកម្ពុជា។ យើងសោកស្តាយទាំងអស់គ្នានៅទីនេះ»។ លោក លន់ ណារ៉ា អាយុ ៤០ឆ្នាំ កូនប្រសាររបស់លោកវ៉ាន់ ណាត បាននិយាយថា នៅក្នុងអំឡុងម៉ោង១២ថ្ងៃត្រង់ លោកវ៉ាន់ ណាតចាប់ផ្តើមធ្វើទុក្ខយ៉ាងខ្លាំង ហើយក្រុមគ្រូពេទ្យបានខិតខំជួយសង្គ្រោះដែរ តែក្រុមគ្រូពេទ្យមិនអាចជួយសង្គ្រោះគាត់ជាលោកទីពីរបាន។ «ព្រោះពេលហ្នឹង គាត់អត់មាននិយាយអី។ គាត់គិតតែព្យាយាមដូចថា ធ្វើអាម៉ាស្សាបេះដូងឲ្យឡើងវិញ ហើយរយៈពេលដែលធ្វើហ្នឹង គាត់មានបញ្ហាតាំងពីម៉ោងប្រហែល១២:១៥នាទី គាត់ចាប់ផ្តើមមានបញ្ហា ហើយធ្វើទុក្ខខ្លាំង ធ្វើម៉ាស្សាទៅវាឥតមានឡើង»។ លោក វ៉ាន់ ណាត បានចូលសម្រាកនៅក្នុងគ្លីនិកឯកជនមួយ ដែលមានឈ្មោះថាមជ្ឈមណ្ឌលលាងឈាមឡាសង់តេ កាលពីថ្ងៃទី២៦ សីហា កន្លងទៅនេះ ដោយសារតែមានជំងឺគាំងបេះដូង។ ក៏ប៉ុន្តែ បន្ទាប់ពីបានសម្រាកព្យាបាលចំនួន១១ថ្ងៃ លោកបានទទួលមរណភាពទៅ។ លោក ហ៊ុយ វណ្ណៈ មន្ត្រីទំនាក់ទំនងកិច្ចការសាធារណៈ របស់សាលាក្តីខ្មែរក្រហម បានមានប្រសាសន៍ថា លោកមានការសោកស្តាយចំពោះការបាត់បង់ជីវិតរបស់លោកវ៉ាន់ ណាត ដែលលោកមិនបានស្តាប់សាលក្រមជាស្ថាពររបស់កាំង ហ្កេកអ៊ាវ ហៅឌុច។ លោកហ៊ុយ វណ្ណៈ បានបញ្ជាក់ថា សាលាក្តីខ្មែរក្រហមគ្រោងនឹងប្រកាសសាលក្រមនៃសំណុំរឿង០០១ ជាស្ថាពរ នៅចុងឆ្នាំ២០១១ នេះ។ «ព្រហ្មលិខិតដែលមិនបានឲ្យគាត់រស់រានមានជីវិត និងទទួលបានយុត្តិធម៌គាត់បានប្រឹងប្រែងតាំងពីដើមមក ហើយតុលាការក៏កំពុងធ្វើការញាប់ដៃញាប់ជើង ហើយគ្រោងប្រកាសសាលដីកាស្ថាពរនៅក្នុងសំណុំរឿង០០១ ដែលប្រឆាំងលោកកាំង ហ្កេកអ៊ាវហៅឌុច។ ក្នុងសំណុំរឿងហ្នឹងគាត់បានដើរតួនាទីសំខាន់នៅក្នុងសំណុំរឿងហ្នឹង»។ យ៉ាងតិចមានមនុស្សចំនួន១២.៣៨០នាក់ បានស្លាប់បាត់បង់ជីវិតនៅក្នុងមន្ទីរទារុណកម្មទួលស្លែងចន្លោះឆ្នាំ១៩៧៥ រហូតដល់ឆ្នាំ១៩៧៩ ដែលគ្រប់គ្រងដោយឌុច។ មានមនុស្សតែចំនួនប្រាំពីរនាក់ប៉ុណ្ណោះដែលរស់រានមានជីវិតពីមន្ទីរឃុំឃាំងទួលស្លែងនេះ ដែលក្នុងនោះរួមមានលោកវ៉ាន់ ណាត លោកជុំ ម៉ី និងលោកប៊ូ ម៉េង។ លោកជុំ ម៉ី អ្នករស់រានមានជីវិតម្នាក់ទៀតពីគុកទួលស្លែងបានចូលរួមការសោកស្តាយបំផុតចំពោះការបាត់បង់ជីវិតរបស់លោកវ៉ាន់ ណាត៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ៥ កញ្ញា Posted: 05 Sep 2011 12:31 AM PDT លីប៊ី៖ អ្នកនាំពាក្យម្នាក់របស់ក្រុមយុទ្ធជនប្រឆាំងនឹង Ghadafi និយាយថាកិច្ចចរចាគ្នាដែលមានគោលដៅបញ្ចប់ដោយសន្តិវិធីនៅឯទីតាំងមួយក្នុងបណ្តាទីតាំងនៅសេសសល់របស់អតីតមេដឹកនាំលីប៊ី Moammar Gadhafi មិនបានទទួលជោគជ័យទេ។ ស៊ីរី៖ អគ្គលេខាធិការសម្ព័ន្ធអារ៉ាប់និយាយថាស៊ីរីយល់ព្រមទទួលលោកសម្រាប់ទស្សនកិច្ចមួយក្នុងសប្តាហ៍នេះ ពេលដែលអាជ្ញាធរស៊ីរីនៅតែបន្តបង្ក្រាបលើក្រុមអ្នកប្រឆាំងខាងនយោបាយនៅទូទាំងប្រទេស។ ប៉ាគីស្ថាន៖ ប៉ាគីស្ថានអំពាវនាវដល់លោកប្រធានាធិបតី Hamid Karzai ប្រទេសអាហ្វហ្គានីស្ថានជួយឲ្យមានការដោះលែងយុវជនប៉ាគីស្ថានប្រមាណ៣០នាក់ដែលត្រូវចាប់ពង្រត់ដោយពួកជនសកម្មប្រយុទ្ធតាលីបាន់នៅតាមព្រំដែនប្រទេសទាំងពីរកាលពីសប្តាហ៍មុន។ អាហ្វហ្គានីស្ថាន៖ ចលនាតាលីបាន់របស់ប្រទេសអាហ្វហ្គានីស្ថានបានដោះលែងវិស្វករតួកគីបួននាក់ដែលបានត្រូវចាប់ពង្រត់កាលពីខែធ្នូមុននៅខេត្ត Paktia នាប៉ែកខាងកើតប្រទេស។ សូម៉ាលី៖ ពួកមេដឹកនាំសូម៉ាលីបានបើកប្រជុំសន្និសីទមួយដើម្បីពិភាក្សាគ្នាអំពីទម្រង់រដ្ឋាភិបាលថ្មីរបស់ប្រទេសដែលមានវិបត្តិនេះ។ នីហ្សេរីយ៉ា៖ ពួកប៉ូលីសនៅក្នុងតំបន់កណ្តាលនៃប្រទេសនីហ្សេរីយ៉ានិយាយថាសមាជិក៨នាក់នៃគ្រួសារមួយបានត្រូវសម្លាប់នៅជិតក្រុង Jos ជាកន្លែងមានអំពើហិង្សាខាងពូជសាសន៍និងខាងសាសនាយ៉ាងញឹកញយ។ ស្វីស៖ របាយការណ៍ព័ត៌មានប្រទេសស្វីសនិយាយថាសហរដ្ឋអាមេរិកបានដាក់ឱសានវាទមួយដល់ស្វីស ដោយទាមទារឱ្យប្រទេសនេះផ្តល់ព័ត៌មានលម្អិតអំពីពលរដ្ឋរាប់ពាន់នាក់ដែលជាប់សង្ស័យថាបានប្រើប្រាស់ធនាគារស្វីសដើម្បីបន្លំពន្ធដារ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
