VOA News: ព័ត៌មាន: “ប្រតិកម្មចំពោះការព្យាយាមរបស់សាលាក្តីខ្មែរក្រហមប្តឹងវីអូអេខ្មែរ” plus 3 more |
- ប្រតិកម្មចំពោះការព្យាយាមរបស់សាលាក្តីខ្មែរក្រហមប្តឹងវីអូអេខ្មែរ
- សកម្មជនគណបក្សប្រឆាំងពីរនាក់ត្រូវបានចាប់ខ្លួន
- ភាពតានតឹងតាមព្រំដែនខ្មែរថៃបានធូរស្រាលមុនកិច្ចប្រជុំរដ្ឋមន្ត្រីការពារជាតិ
- ព័ត៌មានអន្តរជាតិសង្ខេប៖ ២ កញ្ញា
| ប្រតិកម្មចំពោះការព្យាយាមរបស់សាលាក្តីខ្មែរក្រហមប្តឹងវីអូអេខ្មែរ Posted: 02 Sep 2011 02:35 PM PDT ការិយាល័យសហចៅក្រមស៊ើបអង្គេតរបស់សាលាក្តីខ្មែរក្រហមកំពុងរៀបចំនីតិវីធីតាមផ្លូវច្បាប់ប្រឆាំនឹងវីអូអេខ្មែរ។ នេះបើតាមសេចក្តីអះអាងរបស់មន្ត្រីជាន់ខ្ពស់សាលាក្តីខ្មែរក្រហម នៅថ្ងៃសុក្រនេះ។ លោក ហ៊ុយ វណ្ណៈ មន្រ្តីផ្នែកទំនាក់ទំនងសាធារណៈរបស់សាលាក្តី ដែលគាំទ្រដោយអង្គការសហប្រជាតិ មានប្រសាសន៍ថា ក្រុមចៅក្រមស៊ើបអង្គេតមិនបានបោះចោលនីតិវិធីតាមផ្លូវច្បាប់ ប្រឆាំងទៅនឹង វីអូអេខ្មែរនោះទេ ហើយចំណាត់ការប្រឆាំងនឹងវិទ្យុនេះ គឺជាការព្រមានដល់ការលេចធ្លាយឯកសារសម្ងាត់ និងជាការប្រឆាំងនឹងការជ្រៀតជ្រែតកិច្ចការស៊ើបអង្គេតរបស់តុលាការ។ «អ្វីដែលយើងអាចជម្រាបជូនបានគឺចៅក្រមគាត់នឹងធ្វើការជាមួយមន្ត្រីរបស់ចៅក្រម ក៏ដូចជាមន្ត្រីពាក់ព័ន្ធ ដើម្បីចាប់ផ្តើមនីតិវិធីលើផ្លូវច្បាប់ទៅលើករណីនេះ»។ សហចៅក្រមស៊ើបអង្គេតលោកយូ ប៊ុនលេង និងលោកសេច វិចប្លុង កាលពីថ្ងៃពុធ បានចេញសេចក្តីព្រមានថានឹងចាត់វិធានការផ្លូវច្បាប់ដល់វីអូអេខ្មែរដោយលើកឡើងថា អង្គភាពផ្សាយព័ត៌មានដែលត្រូវបានដំណើរការដោយមូលនិធិរបស់រដ្ឋាភិបាលអាមេរិកបានដកទាំងស្រុងនូវខ្លឹមសារឯកសារសម្ងាត់របស់សាលាក្តីខ្មែរក្រហម និងបានផ្សាយជាសាធារណៈ កាលពីថ្ងៃទី១០ ខែសីហា នូវឯកសារដែលទាក់ទងទៅនឹងសំណុំរឿង០០៣ និងសំណុំរឿង០០៤ ដ៏ចម្រូងចម្រាស។ សហចៅក្រមស៊ើបអង្កេតទាំងពីរបានបញ្ជាក់ថា ខ្លួននឹងបើកដំណើរការនីតិវិធីលើការជ្រៀតជ្រែតចូលកិច្ចការរដ្ឋបាលរបស់សាលាក្តីខ្មែរក្រហមដោយយោងតាមវិធានទី៣៥។ សំណុំរឿងនេះ អាចបញ្ជូនទៅតុលាការជាតិរបស់រដ្ឋាភិបាលខ្មែរ។ វិធានទី៣៥នៃវិធានផ្ទៃក្នុងរបស់សាលាក្តីខ្មែរក្រហមចែងថា សាលាក្តីខ្មែរក្រហមអាចដាក់ទណ្ឌកម្ម ឬអាចបញ្ជូនបុគ្គលណាមួយទៅកាន់អាជ្ញាធរមានសមត្ថកិច្ច ក្នុងករណីដែលបុគ្គលនោះជ្រៀតជ្រែកដោយចេតនាពិតប្រាកដក្នុងកិច្ចការរដ្ឋបាលរបស់សាលាក្តីដូចជាការចេញផ្សាយឯកសារសម្ងាត់ ការបំផ្លាញភ័ស្តុតាង ការគំរាមគំហែង ឬក៏ជួយជនជាប់ចោទ ឬជនត្រូវបានចោទឲ្យរត់គេចខ្លួនដោយចេតនាជាដើម។ នៅត្រង់វិធានទី៣៥ ត្រង់ចំនុច២គ បានបង្ហាញថា បញ្ហាដែលអាចកើតមានខាងលើអាចនឹងត្រូវបានបញ្ជូនទៅកាន់អាជ្ញាធរមានសមត្ថកិច្ចរបស់កម្ពុជា ឬរបស់អង្គការសហប្រជាជាតិ។ នៅថ្ងៃសុក្រ នេះដែល អង្គការការពារអ្នកកាសែតដ៏ធំមួយដែលមានមូលដ្ឋាននៅប្រទេសបារាំង ដែលមានឈ្មោះថា អង្គការអ្នកយកព័ត៌មានគ្មានព្រំដែនបានហៅការព្រមានរបស់សហចៅក្រមស៊ើបអង្គេតលើវីអូអេខ្មែរថាជារឿងគួរឲ្យខកចិត្ត និងរឿងប៉ះទង្គិច។ លោក បិនដ្យាមិន អ៊ីស្មាអ៊ីល (Benjamin Ismail) នាយកអង្គការអ្នកយកព័ត៌មានគ្មានព្រំដែន ប្រចាំតំបន់អាស៊ី បានទាមទារឲ្យសាលាក្តីខ្មែរក្រហមបោះបង់ចំនាត់ការផ្លូវច្បាប់របស់ខ្លួនចោល។ «យើងមានការស្រងាកចិត្តចំពោះសាលាក្តីមួយ ដែលចំណាយពេលវេលាធ្វើចំណាត់លើបណ្តាញផ្សព្វផ្សាយមួយដែលគ្រាន់តែបំពេញការងាររបស់ខ្លួន ហើយផ្សាយបន្តចេញនូវការងាររបស់ខ្លួន ខណៈដែលកិច្ចការតុលាការត្រូវវិនិច័្ឆយនោះ មានសារៈសំខាន់ធំធេងណាស់សម្រាប់យើង។ យើង មិនអាចអត់ឱនឲ្យបាននោះទេ ហើយប្រសិនបើមានចំណាត់ការតាមផ្លូវតុលាការ យើងស្នើសុំឲ្យបោះបង់ចោល»។ វីអូអេសំឡេងសហរដ្ឋអាមេរិកព្រួយបារម្ភជាខ្លាំងចំពោះការព្រមានរបស់សហចៅក្រមស៊ើបអង្គេត ហើយចាត់ទុកថានោះគឺជារឿងគួរឲ្យភ័យខ្លាច។ វីអូអេសម្លេងសហរដ្ឋអាមេរិកចាត់ទុកថាការព្រមាននោះ ជាការព្រមានដ៏ពុំមានហេតុផលសមស្រប។ ជាមួយគ្នានេះវីអូអេសម្លេងសហរដ្ឋអាមេរិកនៅតែរក្សាគោលជំហររបស់ខ្លួនថានឹងបន្តយកព័ត៌មានទាក់ទងនឹងសាលាក្តីខ្មែរក្រហមបន្តទៅទៀត៕ This posting includes an audio/video/photo media file: Download Now |
| សកម្មជនគណបក្សប្រឆាំងពីរនាក់ត្រូវបានចាប់ខ្លួន Posted: 02 Sep 2011 01:57 PM PDT នគរបាលខេត្តកំពង់ចាម បានចាប់ខ្លួនសកម្មជនគណបក្សសិទ្ធិមនុស្សពីរនាក់ចំពោះការធ្វើឲ្យប៉ះពាល់ដល់សណ្តាប់ធ្នាប់សាធារណៈ និងញ៉ុះញ៉ង់ប្រឆាំងនឹងប្រទេសជិតខាងដែលផ្សព្វផ្សាយឯកសារប្រវត្តិសាស្ត្រស្តីពីមហិច្ឆិតារបស់ប្រទេសវៀតណាមដែលឈ្លានពានកម្ពុជា។ លោក ផាន ផា អាយុ ៦៦ឆ្នាំ អនុប្រធានគណៈកម្មាធិការប្រតិបត្តិគណបក្សសិទ្ធិមនុស្សប្រចាំឃុំទន្លេបិទ ស្រុកត្បូងឃ្មុំ ខេត្តកំពង់ចាម និងលោក ភូមិ យាន អាយុ៧១ឆ្នាំ សកម្មជនគណបក្សសិទ្ធិមនុស្សភូមិទួលខ្សាច់ ឃុំទន្លេបិទ ស្រុកត្បូងឃុំ ខេត្តកំពង់ចាម ត្រូវបានចាប់ខ្លួនកាលពីល្ងាចថ្ងៃព្រហស្បតិ៍ បន្ទាប់ពីបានវិលត្រឡប់មកពីសង្កេតការណ៍ពិនិត្យឈ្មោះ និងចុះឈ្មោះបោះឆ្នោតវិញ។ សេចក្តីថ្លែងការណ៍របស់គណបក្សសិទ្ធិមនុស្សបានរៀបរាប់ថា ហេតុការណ៍នេះកើតឡើងដោយគ្រាន់តែសកម្មជនគណបក្សប្រចាំឃុំបានយកឯកសារពាក់ព័ន្ធនឹងគោលនយោបាយគណបក្ស កិច្ចការបោះឆ្នោត និងប្រវត្តិសាស្ត្រខ្មែរទៅប្រគល់ជូនសកម្មជនគណបក្សប្រចាំភូមិ ហើយមេភូមិគណបក្សប្រជាជនកម្ពុជាឃើញបានឆក់យកទៅឲ្យនគរបាល និងមួយថ្ងៃក្រោយមក នគរបាលបាននាំខ្លួនសកម្មជនទាំងពីរនាក់នេះទៅឃុំឃាំងនៅស្នងការនគរបាលខេត្តកំពង់ចាម តែម្តង។ លោក ជឹម សេងហុង ស្នងការរងនគរបាលខេត្តកំពង់ចាម បានថ្លែងថា នគរបាលកំពុងកសាងសំណុំរឿងបញ្ជូនសកម្មជនគណបក្សសិទ្ធិមនុស្សពីរនាក់នេះទៅកាន់តុលាការ។ សេចក្តីថ្លែងការណ៍នេះបានបញ្ជាក់ថា គណបក្សសិទ្ធិមនុស្សបានចាត់ទុកការចាប់ខ្លួនសកម្មជនគណបក្សសិទ្ធិមនុស្សទាំងពីរនាក់នេះគឺជារូបភាពនៃការរំលោភសិទ្ធិនយោបាយ ការគំរាមគំហែងផ្នែកនយោបាយ និងការរំខានដល់ដំណើរការរៀបចំការបោះឆ្នោតដោយសេរី ត្រឹមត្រូវ និងយុត្តិធម៌នៅកម្ពុជា។ លោក សេង ស៊ៀងលី ប្រធានគណបក្សសិទ្ធិមនុស្ស ប្រចាំខេត្តកំពង់ចាម បានថ្លែងថា ឯកសារប្រវត្តិសាស្ត្រខ្មែរនេះបានលើកឡើងអំពីការបាត់បង់ទឹកដីកម្ពុជាទៅវៀតណាម និងថៃ។ «ខ្ញុំថាបញ្ហាការចាប់នេះហាក់បីដូចជាបិទសិទ្ធិសេរីភាពក្នុងការបញ្ចោញមតិឲ្យប្រជាពលរដ្ឋ ឬសកម្មជន ដឹងអំពីប្រវត្តិសាស្ត្រដែលកន្លងមកមានការបាត់បង់ទឹកដីដោយសារតែវៀតណាម និងថៃ។ កន្លងមកហ្នឹង ទឹកដីខ្មែរយើងនៅខាងវៀតណាម២១ខេត្ត និងប្រទេសថៃយកបាន១២ខេត្ត»។ លោក នាង សុវ៉ាត មន្ត្រីសម្របសម្រួលនៃសមាគមសិទ្ធិមនុស្សអាដហុក ប្រចាំខេត្តកំពង់ចាម បានថ្លែងថា អាជ្ញាធរទំនងជាយល់ច្រឡំអំពីសារនយោបាយរបស់គណបក្សទាក់ទងនឹងការចាប់ខ្លួនសកម្មជនគណបក្សសិទ្ធិ មនុស្ស ពីរនាក់នេះ។ «ខ្ញុំសន្និដ្ឋានជាលើកដំបូងថា មេភូមិ ឬនគរបាលប៉ុស្តិ៍មិនបានយល់អំពីសារនយោបាយនេះឲ្យបានច្បាស់ ហើយគាត់មិនបានដឹងថា សារនេះជាសារនយោបាយទូទៅរបស់គណបក្សនយោបាយ។ បើសិនជាវាគ្រោះថ្នាក់ ហើយមានការចោទប្រកាន់ វាគួរតែមានការចោទប្រកាន់យូរហើយ»។ សេចក្តីថ្លែងការណ៍របស់គណបក្សសិទ្ធិ មនុស្ស បានបញ្ជាក់ថាជាក់ស្តែងគ្រាន់តែថ្ងៃពិនិត្យបញ្ជីឈ្មោះ និងចុះឈ្មោះបោះឆ្នោតចាប់ផ្តើមនៅថ្ងៃទី១ ខែកញ្ញានេះភ្លាម ការចាប់ខ្លួនសកម្មជនសិទ្ធិមនុស្សក៏ត្រូវបានធ្វើឡើងភ្លាម។ គណបក្សសិទ្ធិមនុស្សបានអំពាវនាវដល់រដ្ឋាភិបាលឲ្យដោះលែងជាបន្ទាន់នូវសកម្មជនគណបក្សសិទ្ធិមនុស្សទាំងពីរនាក់នេះដែលមិនបានធ្វើអ្វីខុសពីច្បាប់រដ្ឋទាល់តែសោះ៕ This posting includes an audio/video/photo media file: Download Now |
| ភាពតានតឹងតាមព្រំដែនខ្មែរថៃបានធូរស្រាលមុនកិច្ចប្រជុំរដ្ឋមន្ត្រីការពារជាតិ Posted: 02 Sep 2011 12:27 PM PDT ប្រទេសថៃនិងកម្ពុជាសង្ឃឹមថាជំនួបប្រជុំរដ្ឋមន្ត្រីក្រសួងការពារជាតិនាខែកញ្ញានឹងជួយស្តារឡើងវិញទំនាក់ទំនងឆ្លងព្រំដែនបន្ទាប់ពីមានភាពតានតឹងនិងការប៉ះទង្គិចប្រដាប់អាវុធអស់រយៈពេលពីរឆ្នាំ។ ទស្សននិស័យការទូត ដែលបានប្រសើរឡើងបន្ទាប់ពីមានការបោះឆ្នោតខែកក្កដារបស់រដ្ឋាភិបាលថៃក្រោមការដឹកនាំរបស់លោកស្រីនាយករដ្ឋមន្ត្រី យីងឡាក់ ស៊ីណាវ៉ាត់។ រដ្ឋមន្ត្រីក្រសួងការពារជាតិថៃ ឧត្តមសេនីយ៍ យុត្ថាសាក់ សាស៊ីប្រាផា និង ឧបនាយករដ្ឋមន្ត្រីនិងរដ្ឋមន្ត្រីក្រសួងការពារជាតិ ឧត្តមសេនីយ៍ ទៀ បាញ់ នឹងធ្វើជាសហប្រធាននៃជំនួបប្រជុំរបស់គណៈកម្មាធិការព្រំដែនទូទៅ នៅទីក្រុងភ្នំពេញ ថ្ងៃទី៨ ខែកញ្ញា។ ប៉ានីតាន់ វ៉ាតាណាយ៉ាហ្កន អ្នកវិទ្យាសាស្ត្រនយោបាយនៅសាកលវិទ្យាល័យ ជូឡាឡុងកន និងជាអតីតអ្នកនាំពាក្យរដ្ឋាភិបាល និយាយថា បើទោះជានៅមានជម្លោះធំៗច្រើនក៏ដោយ ប្រទេសទាំងពីរក៏មានអារម្មណ៍ថាចង់ត្រឡប់ទៅរកទំនាក់ទំនងការទូតធម្មតាវិញដែរ។ «ខ្ញុំគិតថាប្រទេសទាំងពីរកំពុងតែព្យាយាមបង្កើតចំណាប់អារម្មណ៍ថ្មីមួយថាពួកគេបានត្រឡប់ទៅកាន់តុចរចាវិញហើយ។ ប្រាកដណាស់ថាបញ្ហាធំៗគឺនៅដដែល ប៉ុន្តែពួកគេព្យាយាមបង្កើតចំណាប់អារម្មណ៍ដែលថាអ្វីៗត្រឡប់ទៅកាន់ភាពប្រក្រតីវិញហើយ។ នេះមិនមែនជារឿងអាក្រក់នោះទេ ព្រោះថាក្នុងស្ថានភាពបែបនេះ យើងត្រូវបង្កើតអារម្មណ៍ល្អដាក់គ្នា»។ របាយការណ៍ប្រព័ន្ធផ្សព្វផ្សាយ និយាយថា ឧត្តមសេនីយ៍ យុត្ថាសាក់ ក៏នឹងជួបជាមួយនាយករដ្ឋមន្ត្រីកម្ពុជា លោក ហ៊ុន សែន ដែរ។ ការពិភាក្សាកំណត់ជំហានដើរទៅមុខក្នុងការស្តារឡើងវិញទំនាក់ទំនងព្រំដែនបន្ទាប់ពីដំណាក់កាលក្រឡាប់ចាក់អំឡុងពេលការគ្រប់គ្រងរបស់រដ្ឋាភិបាល លោក អាភីសិត វីចាជីវ៉ា ដែលជាអ្នកដឹកនាំគណបក្សប្រជាធិបតេយ្យ។ ជម្លោះទាំងនោះផ្តោតលើប្រាសាទព្រះវិហារ ដែលជាប្រាសាទហិណ្ឌូកសាងក្នុងសតវត្សរ៍ទី១១។ ប្រទេសថៃនិងកម្ពុជាបានចោទប្រកាន់គ្នាពីបទរំលោភឈ្លានពាន និងថាបានបាញ់គ្រាប់ផ្លោងដាក់ទីតាំងប្រាសាទហិណ្ឌូនេះ។ មនុស្ស១៨នាក់បានស្លាប់នៅក្នុងការប្រយុទ្ធនេះ ហើយមនុស្សរាប់ពាន់នាក់ទៀតបានចាកចេញពីភូមិកររបស់ពួកគេ។ ប្រទេសកម្ពុជានិងថៃបានទាមទារតំបន់ជុំវិញប្រាសាទនេះ។ កាលពីឆ្នាំ១៩៦២ ការកាត់ក្តីរបស់តុលាការពិភពលោកបានផ្តល់ប្រាសាទនេះឲ្យប្រទេសកម្ពុជា ប៉ុន្តែមិនបានដោះស្រាយបញ្ហាដីជុំវិញប្រាសាទដែលនៅខាងព្រំដែនប្រទេសថៃផងទេ។ នៅឆ្នាំ២០០៨ ប្រទេសកម្ពុជាបានដាក់បញ្ចូលប្រាសាទព្រះវិហារជាបិតិភណ្ឌពិភពលោក។ នៅមុនពេលនោះ ប្រទេសថៃបានទទួចឲ្យប្រទេសទាំងពីរដាក់ពាក្យរួមគ្នាទៅគណៈកម្មាធិការបិតិភណ្ឌពិភពលោករបស់ អង្គការ អប់រំ វិទ្យាសាស្ត្រ និងវប្បធម៌ នៃអង្គការសហប្រជាជាតិ។ ក្រុមជាតិនិយមថៃបានចោទប្រកាន់ប្រទេសកម្ពុជាថាបានព្យាយាមត្រួតត្រាបរិវេណដីដែលមានទំហំបួនគីឡូម៉ែត្រការ៉េ ដែលស្ថិតក្នុងផ្នែកថៃនៃព្រំដែន តាមរយៈការស្នើសុំគម្រោងគ្រប់គ្រងប្រាសាទរបស់កម្ពុជា។ ខាល ថៃយ័រ (Carl Thayer) អ្នកវិទ្យាសាស្ត្រនយោបាយនៅសាកលវិទ្យាល័យ ញូវ សោធ វែល (New South Wales) របស់អូស្ត្រាលី និយាយថាចាប់តាំងពីការបោះឆ្នោតរដ្ឋាភិបាលដែលដឹកនាំដោយ លោកស្រី យីងឡាក់ ស៊ីណាវ៉ាត់ បរិយាកាសការទូតមានការប្រសើរឡើង។ «បច្ចុប្បន្នស្ថានភាពទូទៅមានលក្ខណៈវិជ្ជមានបែបគួរឲ្យប្រុងប្រយ័ត្ន។ ប៉ុន្តែ លោកស្រី យីងឡាក់ កំពុងប្រឈមនឹងបញ្ហាផ្ទៃក្នុងយ៉ាងខ្លាំង ហើយបើអ្នកណាម្នាក់ព្យាយាមធ្វើឲ្យបញ្ហាព្រំដែនក្លាយជាបញ្ហាក្នុងស្រុកមួយទៀត វានឹងក្លាយជាបញ្ហាស្មុគស្មាញ»។ កាលពីអតីតកាល ជម្លោះព្រំដែនជាមួយប្រទេសកម្ពុជាគឺជាឧបករណ៍បំបែកនយោបាយនៅក្នុងប្រទេសថៃ ដែលក្រុមជាតិនិយមថៃបានចោទប្រកាន់សម្ព័ន្ធមិត្តរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ថាមិនបានតំណាងប្រយោជន៍របស់ប្រទេសថៃឲ្យបានពេញទំហឹងនៅក្នុងជម្លោះព្រំដែន។ លោក ថាក់ស៊ីន មានទំនាក់ទំនងល្អយូរជាមួយ លោក ហ៊ុន សែន នាយករដ្ឋមន្ត្រីកម្ពុជា ហើយប្រទេសទាំងពីរមានទំនាក់ទំនងជាមិត្តភាពល្អ នៅអំឡុងពេលលោក ថាក់ស៊ីន កាន់តំណែងជានាយករដ្ឋមន្ត្រីថៃ។ ក្រុមហ៊ុនទូរគមនាគមន៏ចាស់របស់លោកឈ្មោះ Shin Corp មានមុខនាទីសំខាន់ក្នុងវិស័យទូរស័ព្ទចល័តកម្ពុជានិងទូរទស្សន៍ខ្សែកាបក្នុងទសវត្សរ៍១៩៩០។ នៅពេលដែល លោក ថាក់ស៊ីន ត្រូវបានទំម្លាក់ពីអំណាចដោយរដ្ឋប្រហារនៅក្នុងប្រទេសថៃក្នុងឆ្នាំ២០០៦ លោក ហ៊ុន សែន បានតែងតាំងរូបលោកជាទីប្រឹក្សាសេដ្ឋកិច្ចនៅឆ្នាំ២០០៩ ហើយបន្ទាប់មកលោកបានធ្វើទស្សនកិច្ចនៅប្រទេសកម្ពុជា។ អំឡុងឆ្នាំ២០០៩ ភាពតានតឹងពីបញ្ហាព្រំដែនបានកើតឡើងម្តងទៀត ហើយបាននាំទៅដល់ការប៉ៈទង្គិចដែលបន្តកើតមានម្តងម្កាលក្នុងរយៈពេលពីរឆ្នាំក្រោយមក។ ខែកក្កដានេះ រដ្ឋាភិបាលកម្ពុជាបានស្នើរសុំឲ្យតុលាការយុត្តិធម៌អន្តរជាតិកាត់សេចក្តីលើជម្លោះនេះ។ តុលាការបានអំពាវនាវឲ្យបង្កើតតំបន់គ្មានយោធានៅក្បែរប្រាសាទព្រះវិហារ និងដាក់អ្នកសង្កេតការណ៏យោធាឥណ្ឌូនេស៊ីដើម្បីពង្រឹងកិច្ចព្រមព្រៀង។ កម្ពុជារំពឹងថានឹងជំរុញអ្នកសង្កេតការណ៍ឥណ្ឌូនេស៊ីឲ្យធ្វើសកម្មភាពជាការធានារទប់ទល់នឹងការបង្កើនទ័ពរបស់ប្រទេសថៃ។ លោក ហង្ស ឆៃយ៉ា នាយកវិទ្យាស្ថានដើម្បីលទ្ធិប្រជាធិបតេយ្យដែលមានមូលដ្ឋាននៅទីក្រុងភ្នំពេញ និយាយថា បើទោះជាកម្ពុជាចេញទៅគ្រប់គ្រងការអភិវឌ្ឍទីតាំងប្រាសាទក៏ដោយ ក៏រដ្ឋាភិបាលក្រុងភ្នំពេញមានការប្រុងប្រយ័ត្នជាងមុនក្នុងការចរចារបស់ខ្លួនជាមួយប្រទេសថៃ។ «រដ្ឋាភិបាលនៅតែចង់បន្តរឿងនេះជាមួយអ្នកសង្កេតការណ៍អន្តរជាតិឬឥណ្ឌូនេស៊ី ហើយចង់ដើរទៅមុខនិងបង្កើតផលប៉ៈពាល់ទាក់ទងនឹងគម្រោងអភិវឌ្ឍន៍ដែលរដ្ឋាភិបាលចង់អនុវត្តលើប្រាសាទព្រះវិហារ។ ប៉ុន្តែរដ្ឋាភិបាលបានចាប់យកវិធីសាស្ត្រប្រុងប្រយ័ត្នណាស់។ រដ្ឋាភិបាលមិនចង់លើកបញ្ហានេះម្តងទៀតជាមួយរដ្ឋាភិបាលថ្មីរបស់ លោកស្រី យីងឡាក់ ស៊ីណាវ៉ាត់ នោះទេ»។ ប្រទេសថៃនិងកម្ពុជាឥឡូវនេះនិយាយថា ការស្តារទំនាក់ទំនង គឺជាអាទិភាព។ លោក ហ៊ុន សែន និយាយថា លោកព្យាយាមកែលំអរស្ថានភាពព្រំដែន ដោយមិននិយាយពីជម្លោះព្រំដែននៅក្នុងការប្រជុំរបស់សហគមន៍ជាតិអាស៊ីអាគ្នេយ៍ដែលមានសមាជិក១០ប្រទេសទៀតនោះទេ៕ ប្រែសម្រួលដោយ បូរី ស៊ីលីវណ្ណ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២ កញ្ញា Posted: 02 Sep 2011 01:19 AM PDT ព័ត៌មានចុងក្រោយបំផុត៖ ឥណ្ឌា/ចិន៖ មន្រ្តីរដ្ឋការឥណ្ឌានិយាយថា នាវាទាហានជើងទឹកមួយគ្រឿងដែលធ្វើដំណើរនៅក្បែរឆ្នេរសមុទ្រប្រទេសវៀតណាមបានប្រឈមមុខជាមួយនាវាចម្បាំងចិន ក្នុងសមុទ្រចិនខាងត្បូង កាលពីខែមុន។ លីប៊ី៖ នៅថ្ងៃសុក្រនេះ ប្រទេសទួកគីបានបើកស្ថានទូតរបស់ខ្លួនក្នុងប្រទេសលីប៊ីឡើងវិញ មួយថ្ងៃបន្ទាប់ពីមេដឹកនាំពិភពលោកបានយល់ព្រមបញ្ចេញប្រាក់រាប់ពាន់លានដុល្លារដែលជាទ្រព្យសម្បត្តិរបស់ប្រទេសលីប៊ីដើម្បីជួយរដ្ឋាភិបាលអន្តរកាលក្នុងការកសាងប្រទេសឡើងវិញ។ ស៊ីរី៖ សហរដ្ឋអាមេរិកនិងប្រទេសអង់គ្លេសកំពុងទាមទារឲ្យមានការដាក់ទណ្ឌកម្មអន្តរជាតិដ៏តឹងរឹងថ្មីមួយដើម្បីបង្ខំឲ្យប្រធានាធិបតីស៊ីរី លោក បាស្ហា អាល់ អាសេដ (Basha al – Assad) ចុះចេញពីតំណែង បន្ទាប់ពីមានការបង្ក្រាបជាបន្តទៅលើក្រុមអ្នកតវ៉ានៅក្នុងប្រទេស។ អ៊ីស្រាអែល/ទួកគី៖ ប្រទេសទួកគី បានបណ្តេញឯកអគ្គរដ្ឋទូតអ៊ីស្រាអែលប្រចាំរដ្ឋធានី អង់ការ៉ា (Ankara) នៅថ្ងៃសុក្រនេះហើយបានផ្អាកកិច្ចព្រមព្រៀងយោធាទាំងអស់បន្ទាប់ពីសេចក្តីរាយការណ៍ដ៏លំអិតរបស់អង្គការសហប្រជាជាតិបានផ្សព្វផ្សាយពីការវាយឆ្មក់ដ៏សាហាវរបស់ប្រទេសអ៊ីស្រាអែលទៅលើកប៉ាល់ដែលធ្វើដំណើរចេញពីប្រទេសទួកគីទៅកាន់តំបន់កាហ្សា (Gaza) កាលពីឆ្នាំទៅ។ សហរដ្ឋអាមេរិក៖ សារព័ត៌មានមួយរបស់សហរដ្ឋអាមេរិក បានរាយការណ៍ថារដ្ឋាភិបាលសហព័ន្ធ ចាប់ផ្តើមដាក់ពាក្យប្តឹងស្ថាប័នហិរញ្ញវត្ថុធំៗចំនួនជាង១២ ដោយសារតែស្ថាប័នទាំងនេះមិនតំណាងឲ្យគុណភាពនៃសន្តិសុខការពារកិច្ចព្រមព្រៀងប្រាក់កម្ចី ដែលបានដើរតួនាទីនៅក្នុងវិបត្តិហិរញ្ញវត្ថុឆ្នាំ២០០៨ នោះ។ ជប៉ុន៖ នាយករដ្ឋមន្រ្តីជប៉ុនដែលទទួលបានការតែងតាំងកាលពីពេលថ្មីៗនេះ បានប្រកាសរដ្ឋាភិបាលថ្មីដែលមានគោលបំណងដឹកនាំប្រទេសឲ្យរើបឡើងវិញដ៏លំបាកពីគ្រោះរញ្ជួយដី និងសេដ្ឋកិច្ចរង្គោះរង្គើ។ កូរ៉េខាងជើង/កូរ៉េខាងត្បូង៖ ប្រទេសកូរ៉េខាងត្បូងនឹងអនុញ្ញាតិឲ្យគណៈប្រតិភូព្រះសង្ឃព្រះពុទ្ធសាសនាចូលរួមក្នុងពិធីសាសនាក្នុងប្រទេសកូរ៉េខាងជើង ដែលជាដំណើរបំពេញទស្សនកិច្ចលើកទីមួយចាប់តាំងពីរដ្ឋាភិបាលទីក្រុងសេអ៊ូលបានចោទប្រកាន់រដ្ឋាភិបាលទីក្រុងព្យុងយ៉ាងពីការបាញ់ពន្លិចនាវាចម្បាំងរបស់ខ្លួនកាលពីឆ្នាំទៅ។ សហរដ្ឋអាមេរិក៖ រដ្ឋ Louisiana ភាគអាគ្នេយ៍សហរដ្ឋអាមេរិក បានប្រកាសស្ថានភាពអាសន្ននៅពេលដែលខ្យល់ព្យុះដ៏មានឥទ្ធិពលមួយបានខិតចូលមកជិតឈូងសមុទ្រម៉ិកស៊ិក។ អង់គ្លេស៖ ប៉ូលីសអង់គ្លេសនឹងអនុវត្តនូវការហាមឃាត់រយៈពេល៣០ថ្ងៃលើក្បួនដង្ហែតវ៉ាក្នុងសង្កាត់ចំនួន៥ក្នុងទីក្រុងឡុងដ៍ដោយចាប់ផ្តើមនៅថ្ងៃសុក្រនេះ។ ប៉ូលីសទីក្រុងឡុងដ៍បានទទួលការអនុញ្ញាតិពីរដ្ឋមន្រ្តីក្រសួងមហាផ្ទៃដើម្បីអនុវត្តនូវបំរាមនេះនៅក្នុងសង្កាត់ Newham, Tower Hamlets, Waltham Forest, Islington និង Hackney។ <!--AV--> ព័ត៌មាននៅពេលមុននេះ៖ <!--IMAGE-LEFT-->សមុទ្រចិនខាងត្បូង៖ ប្រទេសចិននិងហ្វីលីពីននៅថ្ងៃព្រហស្បតិ៍បញ្ជាក់ម្ដងទៀតអំពីការប្ដេជ្ញាចិត្ដរបស់ខ្លួន ចំពោះដំណោះស្រាយដោយសន្ដិវិធី អំពីជម្លោះដែនដីនៅសមុទ្រចិនខាងត្បូង ហើយសន្យាថានឹងធ្វើឲ្យមានការជឿនលឿនសេដ្ឋកិច្ចនៅអាស៊ីខាងកើត។ នៅទីក្រុងប៉េកាំង ប្រធានាធិបតី ហ្វីលីពីន លោក Benigno Aquino កំពុងតែធ្វើទស្សនកិច្ច និងលោកប្រធានាធិបតី Hun Jintao ប្រទេសចិន ចេញសេចក្ដីថ្លែងការណ៍រួម ប្ដេជ្ញាចិត្ដថានឹងធ្វើការចរចាគ្នាច្រើនឡើងទៀតឲ្យមានសន្ដិភាពនិងស្ថិរភាព។ កម្ពុជា៖ តុលាការឧក្រិដ្ឋកម្មសង្គ្រាមនៃប្រទេសកម្ពុជាដែលគាំទ្រដោយអង្គការសហប្រជាជាតិឲ្យដឹងថាខ្លួនបានផ្ដើមនីតិវិធីរឿងក្ដីប្រឆាំងនឹងវីអូអេខ្មែរ ក្នុងបទបញ្ចេញឯកសារសម្ងាត់អំពីការកាត់ទោសពួកខ្មែរក្រហមជាកូនក្ដីជាប់សង្ស័យក្នុងការពាក់ព័ន្ធនឹងការប្រល័យពូជសាសន៍នៅក្នុងទសវត្សរ៍១៩៧០។ លីប៊ី៖ ប្រទេសមានអំណាចដែលចូលរួមក្នុងសន្និសីទនៅទីក្រុងប៉ារីសកំពុងតែមានផែនការណ៍ចាត់វិធានការណ៍សម្រាប់អនាគតប្រទេសលីប៊ី ដែលរួមមានការប្ដេជ្ញាចិត្ដបញ្ចេញប្រាក់រហូតដល់ទៅរាប់ពាន់លានដុល្លារ ដែលជាជំនួយហិរញ្ញវត្ថុដល់អាជ្ញាធរបណ្ដោះអាសន្នប្រទេសនេះ។ ស៊ីរី៖ លោក William Hague រដ្ឋមន្ដ្រីក្រសួងការបរទេសអង់គ្លេសនិយាយថា មន្ដ្រី សហភាពអឺរ៉ុបរៀបចំខ្លួនពិភាក្សាគ្នាអំពីទណ្ឌកម្មទៅលើវិស័យប្រេងឥន្ធន:ប្រទេស ស៊ីរីធ្វើជាមធ្យោបាយដាក់សម្ពាធលើរដ្ឋាភិបាលស៊ីរីឲ្យបញ្ឈប់ការបង្ក្រាបលើក្រុមអ្នកតវ៉ាដើម្បីលទ្ធិប្រជាធិបតេយ្យ។ យេម៉ែន៖ អាជ្ញាធរយេម៉ែនឲ្យដឹងថា ការប្រយុទ្ធគ្នារវាងកងទ័ពយេម៉ែន ហើយនិង ពួកសកម្មប្រយុទ្ធពាក់ព័ន្ធនឹងពួក al-Qaida ក្នុងតំបន់ខាងត្បូងប្រទេសនេះបណ្ដាលឲ្យមនុស្សយ៉ាងតិច១៨ នាក់ស្លាប់នៅថ្ងៃពុធនិងព្រហស្បតិ៍។ កេនយ៉ា៖ តុលាការឧក្រិដ្ឋកម្មអន្ដរជាតិបានបើកធ្វើសវនាការប្រឆាំងជានជាតិ កេនយ៉ាមានឈ្មោះអាស្រូវ៦នាក់ ដែលជាប់ចោទក្នុងបទបង្កឲ្យមានអំពើហិង្សាដ៏សាហាវក្រោយពេលបោះឆ្នោតក្នុងប្រទេសនេះ។ ហ្គីណេអេក្វាទ័រ៖ ប្រធានាធិបតីប្រទេសហ្គីណេអេក្វាទ័រ ត្រូវបានគេនាំយកទៅព្យាបាលនៅប្រទេសសេណេហ្គាល់។ នេះជាការធ្វើដំណើររបស់លោកទៅបរទេសជាច្រើនដង ដែលមានការប៉ាន់ស្មានថាដោយសារសុខភាពរបស់លោក។ អង់គ្លេស៖ Wikileaks ដែលជាគេហទំព័រប្រឆាំងនឹងការសម្ងាត់ បញ្ជាក់អំពីសេចក្ដីរាយការណ៍អំពីការរំលោភលើសន្ដិសុខ ដែលបណ្ដាលឲ្យមានការបញ្ចេញទូរលេខការទូតរបស់សហរដ្ឋអាមេរិកយ៉ាងច្រើនសន្ធឹកចូលទៅក្នុងបណ្តាញអ៊ីនធើណិត ដោយមានបញ្ចេញឈ្មោះប្រភពឲ្យឃើញផង។ ក្នុងសេចក្ដីថ្លែងការណ៍ថ្ងៃព្រហស្បតិ៍ Wikileaks ស្ដីបន្ទោសកាសែត Guardian ប្រទេសអង់គ្លេសក្នុងការលេចចេញនេះ ដោយនិយាយថាអ្នកកាសែតម្នាក់បានបញ្ចេញ ពាក្យសម្ងាត់ដើម្បីបើកប័ណ្ណសារទាំងអស់ដែលមាននៅក្នុងសៀវភៅអំពី Wikileaks ។ សហរដ្ឋអាមេរិក៖ យោធាសហរដ្ឋអាមេរិកឲ្យដឹងថា គ្មានយុទ្ធជនអាមេរិកាំងណាម្នាក់ដែលបានត្រូវស្លាប់នៅខែសីហានៅក្នុងប្រទេសអ៊ីរ៉ាក់ទេ ដែលនោះជាការសម្គាល់ថាជាខែទីមួយ ដែលគ្មានយុទ្ធជនអាមេរិកាំងស្លាប់នៅប្រទេសនេះតាំងពីការលុកលុយទៅក្នុងប្រទេសនេះដែលសហរដ្ឋអាមេរិកដឹកនាំនៅឆ្នាំ២០០៣។ ឥណ្ឌា៖ លោក Anna Hazare សកម្មជនប្រឆាំងអំពើពុករលួយនៅឥណ្ឌាបានវិលត្រឡប់ទៅភូមិកំណើតរបស់លោកវិញហើយ ក្រោយពីបានចេញពីមន្ទីរពេទ្យបន្ទាប់ពីបានធ្វើកូដកម្មអត់អាហារ១៣ថ្ងៃមក។ នេប៉ាល់៖ អតីតពួកបះបោរនៃប្រទេសនេប៉ាល់ ព្រមព្រៀងប្រគល់អាវុធរបស់ខ្លួន ទៅឲ្យគណ:កម្មាធិការពិសេសដែលប្រតិបត្ដិការក្រោមលោកនាយករដ្ឋមន្ដ្រីថ្មី Baburam Bhattarai។ កាណាដា៖ ក្រុមអ្នកស្រាវជ្រាវនៅកាណាដាបានប្រើវីរុសដែលគេបានប្ដូរវាដោយប្រើហ្ស៊ែនដើម្បីសម្លាប់កោសិកាមហារីកដោយរើសមុខ នៅក្នុងខ្លួនរបស់មនុស្ស ដោយមិនចាំបាច់ថ្វើឲ្យខូចជាលិកាល្អ។ សហរដ្ឋអាមេរិក៖ ក្រុមអ្នកជួយសង្គ្រោះបន្ទាន់នៅក្នុងរដ្ឋស្ថិតនៅភាគខាងកើតសហរដ្ឋអាមេរិកបន្ដជួយអ្នកស្រុកងើបពីខ្យល់ព្យុះ Hurricane Irene ដែលធ្វើឲ្យតំបន់នោះប៉ះពាល់ ដែលក្រោយមកទឹកជំនន់ស្រកទៅវិញ ក្រោយពីបានឡើងយ៉ាងខ្ពស់លើសពេលមុនៗ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
