VOA News: ព័ត៌មាន: “សវនាការចាប់ផ្តើមដំណើរការស្តីអំពីសុខភាពជនជាប់ចោទខ្មែរក្រហម” plus 5 more |
- សវនាការចាប់ផ្តើមដំណើរការស្តីអំពីសុខភាពជនជាប់ចោទខ្មែរក្រហម
- អតីតជនរងគ្រោះគុកទួលស្លែងឈឺធ្ងន់
- អតីតខ្មែរក្រហមត្រូវការការអភិវឌ្ឍច្រើនជាងការកាត់ទោសបន្ថែម
- ផលប៉ះពាល់របស់អេដស៍លើការអភិវឌ្ឍសេដ្ឋកិច្ចសង្គមកម្ពុជា
- ប្រតិកម្មរបស់ប្រជាពលរដ្ឋខ្មែរអាមេរិកចំពោះតន្ត្រីបូរាណនិងសម័យខ្មែរ
- ព័ត៌មានអន្តរជាតិសង្ខេប៖ ២៩ សីហា
| សវនាការចាប់ផ្តើមដំណើរការស្តីអំពីសុខភាពជនជាប់ចោទខ្មែរក្រហម Posted: 29 Aug 2011 01:34 PM PDT ថ្លែងក្នុងអង្គជំនុំជម្រះសាលាដំបូងដែលកាត់ក្តីពីបញ្ហាសុខភាពរបស់គាត់កាលពីថ្ងៃច័ន្ទនេះ អតីតបងធំទី២នៃរបបកម្ពុជាប្រជាធិបតេយ្យ នួន ជា អាយុ៨៥ឆ្នាំ បានត្អូញត្អែរថា គាត់ចាស់ជរាហើយ មិនអាចចូលរួមសវនាការកាត់ទោសបានយូរនោះទេ។ «ខ្ញុំអាចអង្គុយស្តាប់បាន អានបាន និងយល់បានតែប្រហែលរយៈពេលតែមួយម៉ោង ទៅមួយម៉ោងកន្លះដំបូងតែប៉ុណ្ណោះ។ បន្ទាប់ពីនេះ វានឹងប៉ះពាល់ដល់ភ្នែករបស់ខ្ញុំ ដែលនឹងស្រវាំង។ វាជះឥទ្ធិពលដល់ខួរក្បាលរបស់ខ្ញុំ ធ្វើឲ្យឡើងង៉ូងដែលបណ្តាលឲ្យបេះដូងរបស់ខ្ញុំដើរញ៉ាប់ខ្លាំង។ ពេលនោះសម្ពាធឈាមឡើងខ្ពស់ បន្ទាប់មកចង្កេះចាប់ផ្តើមឈឺចុកចាប់ឲ្យលំបាកអង្គុយ ដល់អង្គុយលែងបាន។ ហើយបើទោះបីជាបង្ខំខ្លួនឯងឲ្យអង្គុយឬដេកមើល ឬស្តាប់តទៀត ក៏មិនអាចយល់បានដែរ។ ដើម្បីឲ្យច្បាស់ថែមទៀតលើបញ្ហានេះ ខ្ញុំសូមស្នើតុលាការចាត់អ្នកជំនាញម្នាក់ទៀត ឬរួមជាមួយវេជ្ជបណ្ឌិតកំបែលដើម្បីពិនិត្យពីបញ្ហាផ្ចង់អារម្មណ៍របស់ខ្ញុំ។ សូមអរគុណ!»។ នួន ជា បានថ្លែងយ៉ាងដូច្នេះនៅក្នុងពេលដែលមេធាវីរបស់គាត់លោកស៊ុន អារុណ ស្នើឲ្យកូនក្តីរបស់ខ្លួនត្រឡប់ទៅបន្ទប់ឃុំឃាំងជាបណ្តោះអាសន្នបន្ទាប់ពីអង្គជំនុំជម្រះចាប់ផ្តើមបើកសវនាការកាលពីព្រឹកថ្ងៃច័ន្ទ។ អង្គជំនុំជម្រះសាលាដំបូងបើកសវនាការរយៈពេលបីថ្ងៃ ចាប់ពីថ្ងៃច័ន្ទនេះតទៅ ដើម្បីពិចារណាលើសម្បទា និងស្មារតីជនជាប់ចោទអៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច និងនួន ជា អតីតប្រធានសភាខ្មែរក្រហមនៅក្នុងការចូលរួមសវនាការ និងលទ្ធភាពរបស់គាត់នៅក្នុងការអង្គុយនៅក្នុងសវនាការរយៈពេលយូរ។ សវនាការនេះផ្អែកទៅលើរបាយការណ៍របស់លោកវេជ្ជបណ្ឌិតចន ខាំបែល ជំនាញផ្នែកមនុស្សចាស់មកពីប្រទេសនូវែលសេឡង់។ លោក ចន ខាំបែល បានឆ្លើយនៅក្នុងសវនាការតបទៅនឹងសំណួររបស់សហមេធាវីការពារក្តីថា នួន ជា មិនមានបញ្ហាក្នុងការផ្ចង់អារម្មណ៍នោះទេ។ លោក ចន ខាំបែល មានប្រសាសន៍តាមរយៈអ្នកបកប្រែដូច្នេះថា៖ «ខ្ញុំពិនិត្យឃើញថា គាត់មិនបាត់បង់ការផ្ចង់អារម្មណ៍ទេ។ ខ្ញុំបានសួរ គាត់បានឆ្លើយមកត្រឹមត្រូវ។ នេះជាអារម្មណ៍គាត់ ដែលគាត់ថា គាត់មិនអាចផ្ចង់អារម្មណ៍បាន។ នេះគឺជាកត្តាអត្តនោម័តមួយរបស់គាត់»។ សាស្រ្តាចារ្យវេជ្ជបណ្ឌិតសញ្ជាតិនូវែលសេឡង់ដដែលបានបញ្ចប់ការធ្វើកោសល្យវិច័យសុខភាពជនជាប់ចោទចំនួនបីនាក់នៅក្នុងរឿងក្តី០០២ កាលពីខែមិថុនា ឆ្នាំ២០១១កន្លងទៅនេះ ហើយបានរកឃើញថា លោកអៀង សារី អតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសខ្មែរក្រហម អាយុ៨៦ឆ្នាំ និងនួន ជា មិនមានបញ្ហាសុខភាពសម្រាប់ចូលរួមនៅក្នុងសវនាការពេញលេញនោះទេ។ <!--IMAGE-RIGHT--> ដោយឡែក អ្នកស្រីអៀង ធីរិទ្ធ មានបញ្ហាសុខភាពធ្ងន់ធ្ងរសម្រាប់ការចូលរួមដំណើរការកាត់ទោសរបស់គាត់ឲ្យបានពេញលេញ នេះបើយោងតាមរបាយការណ៍ដែលអានដោយលោកចៅក្រមណិល ណុន ប្រធានអង្គជំនុំជំរះសាលាដំបូងនៅថ្ងៃច័ន្ទនេះ៖ «នៅក្នុងរបាយកាណ៍ពាក់ព័ន្ធនឹងជនជាប់ចោទអៀង ធីរិទ្ធ លោកសាស្រ្តាចារ្យខាំ បែល បានសន្និដ្ឋានថា ជនជាប់ចោទអៀង ធីរិទ្ធ មានបញ្ហាស្មារតី និងប្រព័ន្ធសរសៃប្រសាទ ដែលរារាំងលទ្ធភាពរបស់គាត់ក្នុងការចូលរួមពេញលេញក្នុងការជំនុំជម្រះលើរូបគាត់ និងរារាំងដល់ការអនុវត្តសិទ្ធរបស់គាត់ក្នុងការទទួលបានការជំនុំជម្រះដោយយុត្តិធម៌»។ សូមបញ្ជាក់ថា ខៀវ សំផនជនជាប់ចោទម្នាក់ទៀតនៅក្នុងរឿងក្តី០០២ ដែលធ្លាប់ធ្វើជាប្រមុខរដ្ឋសម័យកម្ពុជាប្រជាធិបតេយ្យរបស់ពួកខ្មែរក្រហមបានបដិសេធក្នុងការធ្វើកោសល្យវិច័្ចយលើសុខភាពរបស់គាត់ហើយអៀង សារី មិនបានប្តឹងជំទាស់នឹងរបាយការណ៍របស់លោកសាស្ត្រាចារ្យវេជ្ជបណ្ឌិតចន ខាំបែល នោះទេ។ នៅក្នុងសវនាការកាលពីព្រឹកថ្ងៃច័ន្ទនេះ អៀង សារី និងមេធាវីរបស់គាត់ក៏បានបង្ហាញខ្លួនផងដែរ ក៏ប៉ុន្តែវត្តមានរបស់ពួកគាត់គឺសម្រាប់តែការសង្កេតការណ៍តែប៉ុណ្ណោះ៕ This posting includes an audio/video/photo media file: Download Now |
| អតីតជនរងគ្រោះគុកទួលស្លែងឈឺធ្ងន់ Posted: 29 Aug 2011 02:54 PM PDT លោក វាន់ ណាត អាយុ ៦៦ឆ្នាំ អតីតអ្នករស់រានមានជីវិតមួយរូបនៃគុកទួលស្លែង ឬមន្ទីរស២១ និងជាសាក្សីមួយរូបដ៏សំខាន់ក្នុងរឿងក្តី០០១ បានធ្លាក់ខ្លួនឈឺជាទម្ងន់ ហើយកំពុងសម្រាកព្យាបាលនៅក្នុងគ្លីនិកឯកជនមួយឈ្មោះមជ្ឈមណ្ឌលលាងឈាមឡាសង់តេ។ នេះបើតាមការបញ្ជាក់ពីក្រុមគ្រួសាររបស់លោក។ ការធ្លាក់ខ្លួនឈឺរបស់លោកវាន់ ណាត បានកើតមានឡើងខណៈដែលលោកកំពុងរងចាំការប្រកាសសាលក្រមរបស់សាលាក្តីខ្មែរក្រហមលើសំណុំរឿង០០១ដែលមានជនជាប់ចោទតែមួយរូបប៉ុណ្ណោះ គឺលោកកាំង ហ្គិចអ៊ាវ ហៅឌុច អតីតប្រធានមន្ទីរឃុំឃាំងទួលស្លែង។ អ្នកស្រី គិត អេង អាយុ៦២ឆ្នាំ ភរិយារបស់លោកវាន់ ណាត បានផ្តល់សម្ភាសន៍ជាមួយវីអូអេខ្មែរថា លោកវាន់ ណាត បានធ្លាក់ខ្លួនឈឺកាលពីយប់ថ្ងៃសុក្រសប្តាហ៍មុន។ អ្នកស្រីបានបញ្ជាក់ទៀតថា ស្វាមីរបស់អ្នកស្រីមានជំងឺលើសឈាម និងទឹកចូលសួត ហើយមកដល់ថ្ងៃច័ន្ទនេះ លោកមិនទាន់ដឹងខ្លួននៅឡើយ។ «ខ្ញុំនៅកៀកគាត់ នៅជាប់គាត់ហ្នឹង។ មកនៅជាមួយគ្នាទាំងអស់ ទាំងកូនមកជុំគ្នា។ គាត់ដូចអត់ស្រួលថាមកលាងឈាម។ គាត់ថាគាត់មកឥតរួចឥឡូវមកអត់រួច។ ឲ្យនាំគ្នាមកគ្រាគាត់។ គ្រាន់តែប្រាំនាទី មួយភ្លែតហ្នឹង គាត់ដូចឆ្លេឆ្លា។ គាត់ដូចអត់ស្រួលអញ្ចឹងហ្មង។ គាត់លែងដឹងខ្លួននៅលើដៃប្រពន្ធកូនទាំងអស់ហ្នឹង»។ លោក វាន់ ណាត យ៉ាងតិចមួយសប្តាហ៍ពីរដង គាត់ត្រូវមកលាងឈាមនៅមជ្ឈមណ្ឌលឡាសង់តេ ក៏ប៉ុន្តែការធ្លាក់ខ្លួនឈឺរបស់លោកជាទម្ងន់នេះ បន្ទាប់ពីលោកបានបញ្ចប់ទស្សនកិច្ចនៅបារាំងកាលពី បីខែមុន។ នេះបើតាមការបញ្ជាក់របស់អ្នកស្រីគិត អេង។ «គាត់មានជំងឺលើសឈាមរាប់ឆ្នាំហើយ តាំងពីគាត់ចាប់ចេះលាងឈាមហ្នឹងមក។ ហើយពេលលាងឈាមម្តងៗ គាត់ច្រើនឡើងឈាម។ គាត់ ឡើងឈាម ជួនកាលឈាមឡើងជាមួយម្ភៃទៅ។ទៅ បានដាក់ថ្នាំទៅ វានេះមកវិញទៅណាស់»។ លោកវេជ្ជបណ្ឌិតតាន់ សុគន្ធ អនុប្រធានមន្ទីរពេទ្យព្រះកុសមៈ និងជាប្រធានផ្នែកបច្ចេកទេសនៃមជ្ឈមណ្ឌលលាងឈាមឡាសង់តេបានបញ្ជាក់ថា លោកវាន់ ណាត មានជំងឺបេះដូង។ លោកមានប្រសាសន៍ទៀតថា លោកវាន់ ណាត អាចដកដង្ហើមបានបន្តិច បន្ទាប់ពីលោកត្រូវបានគ្រូពេទ្យជួយសង្គ្រោះទាន់។ ក៏ប៉ុន្តែ លោកមានសង្ឃឹមរស់តិចតួចណាស់។ «បេះដូងគាំងហើយ គឺថាស្អីៗ វាច្រាល មិនមែនជាទឹកទេដែលយើងបឺតទៅ។ ដូចជាស្លេសដែលគាត់លេបចូលទៅវិញ។ ហើយយើងសន្និដ្ឋានថា ប្រហែលជាបេះដូងគាត់មានបញ្ហា។ ជាទូទៅបើទឹកចូលសួតល្មមៗគឺថាគាត់អាចមកដល់មន្ទីរពេទ្យទាន់នៅក្នុងរយៈពេលប្រាំនាទី ឬដប់នាទីបាន។ ក៏ប៉ុន្តែ អ្វីដែលធ្វើឲ្យគាត់ទន់ភ្លាមៗហ្នឹងគឺថានិយាយហើយគឺហត់ភ្លាម។ ករណីគឺច្រើនតែបេះដូងទេ ធ្វើឲ្យលឿន»។ ក្នុងចំណោមអ្នករស់រានមានជីវិតទាំងប្រាំពីររូបនៃគុកទួលស្លែងដែលត្រូវបានគ្រប់គ្រងដោយ ឌុច គឺមានតែបីរូបតែប៉ុណ្ណោះ គឺលោកជុំ ម៉ី លោកវាន់ ណាត និងលោកប៊ូ ម៉េង គឺជាសាក្សីដ៏សំខាន់ក្នុងសាលាក្កីខ្មែរក្រហម។ លោក ហ៊ុយ វណ្ណៈ មន្ត្រីផ្នែកកិច្ចការសាធារណៈរបស់សាលាក្តីខ្មែរក្រហមបានមានប្រសាសន៍ថា លោកក្រាញ់ តូនី ប្រធានស្តីទីនៃរដ្ឋបាលសាលាក្តីខ្មែរក្រហម បានផ្តល់ថវិកាផ្ទាល់ខ្លួនចំនួន៥០០ដុល្លារអាមេរិកដល់លោកវាន់ ណាត។ លោកហ៊ុយ វណ្ណៈ បានបញ្ជាក់ថា លោក និងសហការីលោកសូមបួងសួងឲ្យលោកវាន់ ណាត ឆាប់ជាសះស្បើយពីជំងឺពីព្រោះលោកជាមនុស្សដ៏សំខាន់ ទាំងផ្នែកប្រវត្តិសាស្ត្រ និងបានចូលរួមយ៉ាងសកម្មក្នុងការស្វែងរកយុត្តិធម៌ដល់ជនរងគ្រោះនៅក្នុងសាលាក្តីខ្មែរក្រហម៕ This posting includes an audio/video/photo media file: Download Now |
| អតីតខ្មែរក្រហមត្រូវការការអភិវឌ្ឍច្រើនជាងការកាត់ទោសបន្ថែម Posted: 29 Aug 2011 02:20 PM PDT អតីតកងទ័ពខ្មែរក្រហម នៅក្នុងស្រុកសំឡូត បានជំរុញឲ្យសាលាក្តីខ្មែរក្រហម បោះបង់ចោលសំណុំរឿង០០៣ និង០០៤ ដោយទាមទារឲ្យសាលាក្តីពិសេស គិតដល់ការផ្សះផ្សា និងការអភិវឌ្ឍទើបប្រសើរជាជាង។ ថ្លែងក្នុងឱកាសចោទជាសំណួរ នៅក្នុងវេទិកាសាធារណៈ ដែលរៀបចំដោយសាលាក្តីខ្មែរក្រហម នៅក្នុងទីរួមស្រុកសំឡូត កាលពីព្រឹកថ្ងៃសុក្រ លោកពេញ លឹម អតីតទាហានខ្មែរក្រហមម្នាក់បកស្រាយថា ប្រជាពលរដ្ឋរងគ្រោះមានការចងកំហឹងលើមេដឹកនាំខ្មែរក្រហម ក៏ប៉ុន្តែ ប្រទេសកម្ពុជា ចង់បានការអភិវឌ្ឍជាជាងការចាប់ខ្លួន និងការកាត់ទោសបន្ថែមទៀត។ «ក៏សូមឲ្យអស់លោកទាំងអស់នេះ ចាប់អារម្មណ៍ខ្ពស់ កាត់ទោសចំពោះតែថ្នាក់ដឹកនាំខ្ពស់ៗចុះពីព្រោះ កំហុសខុសឆ្គងកន្លងមក គឺមិនមែននៅលើថ្នាក់ក្រោមទេ គឺថ្នាក់ខាងលើដែលជាថ្នាក់ដឹកនាំ។ (ករណី)០២ ០៣ ០៤ អីតទៅទៀតទៅ។ ការដឹងឮបញ្ហានេះ ចេះតែច្រើនឡើងៗ មិនចេះចប់ទេ»។ <!--IMAGE-RIGHT--> ការលើកឡើងរបស់អតីតទាហាននៃកងទ័ពខ្មែរក្រហមរូបនេះ ធ្វើឡើងបន្ទាប់ពីលោក វាំងសង់ ដឺ វីល ដឺ អេស្មាអែល (Vincent De Wille De' Estmael) ជំនួយការជាន់ខ្ពស់របស់សហព្រះរាជអាជ្ញាអន្តរជាតិ បានបង្ហាញប្រាប់នៅក្នុងវេទិកា ដើម្បីផ្សព្វផ្សាយពីការវិវត្ត នៃសាលាក្តីខ្មែរក្រហមនោះថា សំណុំរឿងបន្ថែម ០០៣ និង០០៤ កំពុងតែដំណើរការ។ ទីតាំងនៃឧក្រិដ្ឋកម្មត្រូវបានបង្ហាញ ហើយសំណុំរឿងនេះមានជនជាប់សង្ស័យចំនួនប្រាំនាក់ ក៏ប៉ុន្តែ គេនៅមិនទាន់ដឹង អំពីការចាប់នាំខ្លួនជនជាប់សង្ស័យទាំងនេះមកកាត់ទោសនោះទេ។ ទោះជាយ៉ាងណា មន្រ្តីសាលាក្តីខ្មែរក្រហមដដែល មិនបង្ហាញអត្តសញ្ញាណ នៃជនជាប់សង្ស័យនៅក្នុងសំណុំរឿងទាំងពីរ ដែលបង្កឲ្យមានភាពចម្រូងចម្រាសជាខ្លាំង រវាងភាគីកម្ពុជា និងភាគីអង្គការសហប្រជាជាតិនៅក្នុងសាលាក្តីខ្មែរក្រហមទេ។ តាមការបង្ហាញព័ត៌មានក្រៅផ្លូវការ មានអតីតកម្មាភិបាលខ្មែរក្រហមចំនួនប្រាំរូប នៅក្នុងនោះមានអតីតមេបញ្ជាការជាន់ខ្ពស់កងទ័ពខ្មែរក្រហម គឺលោក មាស មុត និងលោក ស៊ូ មេត និងអតីតកម្មាភិបាលខ្មែរក្រហមបីនាក់ផ្សេងទៀត រួមមានយាយចែម តាទិត្យ និងតាអាន ដែលជនទាំងនេះមួយចំនួន មានវ័យកាន់តែចាស់ជរា និងមានជំងឺជាប់នឹងខ្លួនទៀតផង។ <!--IMAGE-LEFT--> អតីតទាហានខ្មែរក្រហមម្នាក់ទៀត ឈ្មោះ ហួនក៏បានផ្តោតទៅលើការទាមទារឲ្យមានការអភិវឌ្ឍប្រសើរជាជាងការកាត់ទោសបន្ថែមទៀតដែរ។ «បើយើង កាត់បន្ត ០០១កាត់ហើយ ឈានដល់០០២ ឈានដល់០០៣ ឈានដល់០០៤ តើវាមានប្រយោជន៍អ្វី? តើមានប្រយោជន៍អ្វី? ប្រជាជនខ្មែររាល់ថ្ងៃ បើតាមតែខ្ញុំទេ ដូចបងប្អូនទាំងអស់ សូមឲ្យតែទំនេរស្រុក មានការអភិវឌ្ឍ ជួយប្រទេសខ្មែរឲ្យរុងរឿង ធ្វើឲ្យមានសាមគ្គី មហាសាមគ្គី ការពារប្រទេសជាតិ កសាងប្រទេស គឺជាការបញ្ចប់»។ មានការផ្តល់យោបល់ ពីក្រុមអតីតកងទ័ពខ្មែរក្រហម នៅក្នុងវេទិកាដែលមានមនុស្សចូលរួមប្រមាណជាង ២០០នាក់ ភាគច្រើនគឺជា អតីតសមាជិកចលនាតស៊ូកុម្មុយនីស្តខ្មែរក្រហម ឲ្យមានការគោរពតាមព្រះពុទ្ធសាសនា ហើយជៀសវាងការចងពារ តាមរយៈការស្វែងរកជនសង្ស័យបន្ថែមយកមកកាត់ទោស។ លោកវាំងសង់ ដឺ វីល ដឺអេស្មាអែល បានធានានៅក្នុងវេទិកានោះថា នឹងមិនមានការតាមចាប់ខ្លួន និងចោទប្រកាន់ជនសង្ស័យលើសពីចំនួនដប់នាក់នោះទេ។ «សំណុំរឿងពី ០១ ០២ ០៣ ០៤ មានទាក់ទងនឹងបុគ្គលតែចំនួនដប់រូបតែប៉ុណ្ណោះ មិនមានចំនួនលើសពីដប់រូបទេ»។ លោកសុខ គង់ អភិបាលរងខេត្តបាត់ដំបង ដែលធ្វើជាអធិបតីនៅក្នុងវេទិកានោះ ក៏បានថ្លែងធានាដែរថា រដ្ឋាភិបាលនៅតែរក្សាការផ្សះផ្សា នឹងបង្រួបបង្រួមជាតិ ហើយនឹងពុំមានការកាត់ទោសកម្មាភិបាលខ្មែរក្រហមតូចតាចនោះទេ។ «គឺច្បាស់ណាស់ថា តុលាការមិនធ្វើការកាត់ទោសថ្នាក់ក្រោម និងកម្មាភិបាលតូចតាចនោះទេ»។ សំឡូត គឺជាអតីតតំបន់ប្រយុទ្ធយ៉ាងខ្លាំងក្លារវាងកងទ័ពតស៊ូខ្មែរក្រហម ជាមួយកងទ័ពរដ្ឋាភិបាលក្រុងភ្នំពេញ។ ខ្មែរក្រហមនៅតំបន់នេះ បានចុះចូលជាមួយរដ្ឋាភិបាលក្រុងភ្នំពេញ នៅឆ្នាំ១៩៩៦។ លោក ឡាស់ អលស៊ិន (Lars Olsen) មន្ត្រីផ្នែកទំនាក់ទំនងកិច្ចការច្បាប់ របស់សាលាក្តីខ្មែរក្រហម និងលោក អាង ឧត្តមសហមេធាវីកម្ពុជាការពារក្តីឲ្យអៀង សារី ដែលជាជនជាប់ចោទម្នាក់នៅក្នុងចំណោមជនជាប់ចោទចំនួនបួននាក់ នៅក្នុងសំណុំរឿង០០២ បានពន្យល់អតីតកងទ័ពខ្មែរក្រហម ពីបេសកកម្មស្វែងរកយុត្តិធម៌របស់សាលាក្តីខ្មែរក្រហម៕ This posting includes an audio/video/photo media file: Download Now |
| ផលប៉ះពាល់របស់អេដស៍លើការអភិវឌ្ឍសេដ្ឋកិច្ចសង្គមកម្ពុជា Posted: 29 Aug 2011 12:22 PM PDT ជំងឺអេដស៍បានបង្កើនទម្ងន់នៃភាពក្រីក្រដល់ប្រជាពលរដ្ឋកម្ពុជាកាន់តែខ្លាំងថែមមួយកម្រិតទៀតខណៈដែលអ្នកជំងឺកំពុងស្ថិតក្នុងស្ថានភាពជីវភាពយ៉ាប់យ៉ឺនរួចទៅហើយ។ របាយការណ៍ជាតិស្ដីអំពីផលប៉ះពាល់ខាងសេដ្ឋកិច្ចសង្គមនៃមេរោគអេដស៍មកលើក្រុមគ្រួសារនៅកម្ពុជាដែលត្រូវបានបង្ហាញជាសាធារណៈកាលពីថ្ងៃព្រហស្បតិ៍ក្នុងទីក្រុងភ្នំពេញបង្ហាញថា គ្រួសារដែលមានអ្នកជំងឺអេដស៍មានការថយចុះនូវប្រាក់ចំណូល ហើយការចំណាយមានការកើនឡើង ហើយ១ភាគ៣នៃក្រុមគ្រួសារអ្នកជំងឺអេដស៍មានកុមារដែលកំព្រាដោយសារអេដស៍។ របាយការណ៍ដែលត្រូវបានធ្វើឡើងរួមគ្នារវាងអាជ្ញាធរជាតិប្រយុទ្ធនឹងជំងឺអេដស៍ និងកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា (UNDP) បញ្ជាក់ថាប្រាក់សន្សំរបស់គ្រួសារនៃអ្នកជំងឺអេដស៍មានប្រាក់បំណុលថយចុះ ដែលជាកត្តាប៉ះពាល់ជាអវិជ្ជមានលើសន្តិសុខស្បៀងអាហារ និងសុខុមាលភាពសង្គម ក៏ដូចជាស្ថានភាពស្រ្តី និងការអប់រំរបស់កុមារផងដែរ។ របាយការណ៍នេះផ្តោតលើប្រជាពលរដ្ឋកម្ពុជាចំនួន៤.១៧២គ្រួសារក្នុងនោះគ្រួសារអ្នកជំងឺអេដស៍ចំនួន២.៦២៣គ្រួសារ និងគ្រួសារអ្នកគ្មានជំងឺអេដស៍ចំនួន១.៥៤៩គ្រួសារ។ នេះគឺជារបាយការណ៍ដែលធ្វើការសិក្សាលើអ្នកផ្ទុកជំងឺអេដ៍ដ៏ពិស្តារលើកដំបូងនៅកម្ពុជាដែលមានអត្រាអ្នកក្រីក្រជិត៣០ភាគរយ។ របាយការណ៍ក៏បានបញ្ជាក់ផងដែរថា គ្រួសារនៃអ្នកមានជំងឺអេដស៍ងាយរងគ្រោះបំផុតនៅពេលដែលមានវិបត្តិសេដ្ឋកិច្ចកើតឡើង។ ថ្វីបើមានការកត់សម្គាល់ថាកម្ពុជាមានការរីកចម្រើនក្នុងការទប់ស្កាត់ការរីករាលដាលនៃជម្ងឺអេដស៍ក៏ដោយ ក៏របាយការណ៍ដដែលនេះលើកឡើងថា ជម្ងឺអេដស៍នៅតែប៉ះពាល់យ៉ាងខ្លាំងលើក្រុមគ្រួសារកម្ពុជា។ លោកវេជ្ជបណ្ឌិតទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍ក្នុងពិធីផ្សព្វផ្សាយរបាយការណ៍ជាតិស្ដីអំពីផលប៉ះពាល់ខាងសេដ្ឋកិច្ចសង្គមនៃជំងឺអេដស៍មកលើក្រុមគ្រួសារនៅកម្ពុជានោះថា កម្ពុជាបានឆ្លងជំងឺអេដស៍នេះអស់រយៈពេល២០ឆ្នាំមកហើយ។ ដូច្នេះគួមានវិធានការណ៍ដោះស្រាយជួយពួកគេ។ លោកបានបន្តថា ក្នុង១ឆ្នាំត្រូវចំណាយថវិកាប្រមាណជា៥៨លានដុល្លារអាមេរិកសម្រាប់ការងារប្រឆាំងនឹងជំងឺអេដស៍នេះ ដែលការងារទាំងនោះរូមមានការថែទាំ ការការពារ និងការផ្តល់ថ្នាំពន្យារជីវិត។ លោកបានបញ្ជាក់ថា ជំងឺអេដស៍ បានរុញច្រានគ្រួសារអ្នកជំងឺអេដស៍ឲ្យឈានទៅរកភាពក្រីក្រកាន់តែធ្ងន់ធ្ងរឡើងៗ។ លោកបានមានប្រសាសន៍ថា៖ «សំខាន់បំផុតគឺយើងឃើញថា បញ្ហាសេដ្ឋកិច្ចគឺកើតឡើងដោយសារស្ថានភាពដែលគាត់លាក់កំបាំងសា្ថនភាពដែលគាត់អស់មុខរបរ និងចំណូលពីប្តី។ ហើយខ្លួនឯងក៏អស់ដែរ។ ទី២ក្រីក្រ។ ទី៣គឺផ្ទុកទៅទៀត។ ហើយទន្ទឹមនឹងនេះ គាត់ត្រូវទទួលបន្ទុកមើលកូនហើយកូនមួយចំនួនទៀតមានផ្ទុកទៅទៀត។ អញ្ចឹងគឺធ្ងន់ធ្ងរណាស់សម្រាប់គ្រួសារ។ ដូចនេះការសិក្សានេះ គឺសំខាន់ចង់ឲ្យដឹងអំពីស្ថានភាពជាក់ស្តែងរបស់អ្នកផ្ទុកមេរោគអេដស៍ជាពិសេសគឺស្រ្តីនេះឯង»។ នៅក្នុងសេចក្តីប្រកាសព័ត៌មានស្តីពីការផ្សព្វផ្សាយរបាយការណ៍នោះ ឌូហ្ក្លាស ប្រូដឺរិក (Douglas Broderick ) ប្រធានសម្របសម្រួលអង្គការសហប្រជាជាតិប្រចាំនៅកម្ពុជាបានឲ្យដឹងថា ការសិក្សានេះរកឃើញថា គ្រួសារអ្នកជំងឺអេដស៍មានប្រាក់ចំណូលថយចុះ រួមផ្សំជាមួយនឹងការកើនឡើងនៃការចំណាយខាងផ្នែកវេជ្ជសាស្រ្ត ដែលបញ្ហាទាំងនេះធ្វើឲ្យគ្រួសារងាកទៅប្រើប្រាស់យន្តការដោះស្រាយដែលនាំទៅរកភាពក្រីក្រដូចជា ការថយចុះប្រាក់សន្សំ និងទ្រព្យសម្បតិ្ត តែមានបំណុលកើនឡើង។ លោក ប្រូដឺរិក បន្ថែមទៀតថា លទ្ធផលបង្ហាញថា នេះគូសបញ្ជាក់អំពីសារៈសំខាន់នៃការពង្រីកកម្មវិធីជាតិការពារសង្គមសម្រាប់អ្នកមានជំងឺអេដស៍ និងការធានាថា កិច្ចអន្តរាគមន៍កាត់បន្ថយភាពក្រីក្រនឹងបានទៅដល់ជនក្រីក្របំផុត និងសមាជិកដែលងាយរងគ្រោះបំផុតនៅក្នុងសហគមន៍។ ជំងឺអេដស៍បានចាប់ផ្ដើមកើតនៅកម្ពុជានៅឆ្នាំ១៩៩១ ហើយបន្ទាប់មកបានរីករាលដាលជាខ្លាំងរហូតដល់ជនបទ។ បច្ចុប្បន្នមានប្រជាពលរដ្ឋកម្ពុជាប្រមាណ៧៥.០០០នាក់ក្នុង៦០.០០០ក្រុមគ្រួសារកំពុងតែមានជំងឺអេដស៍។ អំឡុងពេលដែលកម្មវិធីរបស់រដ្ឋាភិបាលត្រូវបានពង្រីកបន្ថែម ដើម្បីលើកកម្ពស់គុណភាពជីវិតអ្នកជំងឺអេដស៍ ពួកគេទាំងនោះជាច្រើននៅតែមានកង្វះខាតដូចជា ការមិនអាចទទួលបានសេវាការពារ ព្យាបាល និងគ្រាំទ្រ។ ជាញឹកញាប់ជំងឺអេដស៍បាន ធ្វើឲ្យប្រជាពលរដ្ឋទាំងអ្នកមាន និងអ្នកក្របាត់បង់ការងារ និងធ្វើឲ្យពួកគេជួបការម៉ាក់ងាយ និងការរើសអើង។ នេះបើយោងតាមរបាយការណ៍ខាងលើ។ របាយការណ៍រៀបរាប់ទៀតថា កុមារដែលកំព្រាដោយសារជំងឺអេដស៍បានធ្វើឲ្យកើនឡើងនូវបន្ទុកសេដ្ឋកិច្ចនៃសមាជិកគ្រួសារដែលនៅរស់។ ជំងឺអេដស៍ក៏ជាបន្ទុករបស់ប្រទេសផងដែរដោយសារតែរដ្ឋាភិបាលបានបង់ប្រាក់ទៅលើវេជ្ជសាស្រ្ត ដែលទាក់ទងនឹងជំងឺអេដស៍។ ទោះជាយ៉ាងណាក្ដី របាយការណ៍ក៏បានផ្តល់អនុសាសន៍ឲ្យពង្រីកកម្មវិធីគាំពារសង្គមដែលពាក់ព័ន្ធនឹងជំងឺអេដស៍ និងត្រូវធ្វើឲ្យប្រាកដថា អន្តរាគមន៍ក្នុងការកាត់បន្ថយភាពក្រីក្រនានាត្រូវបានធ្វើឡើងចំពោះគ្រួសារក្រីក្របំផុត និងអ្នកដែលងាយរងគ្រោះជាងគេ៕ This posting includes an audio/video/photo media file: Download Now |
| ប្រតិកម្មរបស់ប្រជាពលរដ្ឋខ្មែរអាមេរិកចំពោះតន្ត្រីបូរាណនិងសម័យខ្មែរ Posted: 29 Aug 2011 09:56 AM PDT របាំប្រពៃណី និងចម្រៀងសម័យទាក់ទាញចំណាប់អារម្មណ៍ផ្សេងគ្នាក្នុងចំណោមអ្នកចូលរួមពិធីបុណ្យអុំទូក បណ្តែតកន្ទោង ឬប្រទីបខួបលើកទី១៥ នៅទីក្រុងឡូវែល រដ្ឋម៉ាស្សាឈូស៊ែត សហរដ្ឋអាមេរិក នៅឆ្នាំនេះ។ បុណ្យតាមប្រពៃណីរបស់ជនជាតិអាស៊ីអាគ្នេយ៍កាលពីថ្ងៃសុក្រទី១៩ និងថ្ងៃសៅរ៍ ទី២០ ខែសីហានេះ មានអ្នកចូលរួមច្រើនម៉ឺននាក់ដែលមានវ័យ និងមានប្រវត្តិជីវិត និងចំណូលចិត្តខុសៗគ្នា ជាពិសេសទាក់ទងនឹងសិល្បៈចម្រៀង។ លោកហឿន ឈ្លីវ អាយុ៥២ឆ្នាំ ភៀសខ្លួនពីខេត្តបាត់ដំបងមកសហរដ្ឋអាមេរិកនៅឆ្នាំ១៩៨៥។ លោកចូលចិត្តរបាំប្រពៃណី តែលោកមិនចូលចិត្តចម្រៀងរែព (Rap) និង ហ៊ីពហព (hip-hop) ទេ។ លោកមានប្រសាសន៍ថា «ខ្ញុំចូលចិត្តរបាំប្រពៃណីជាង។ របាំខ្មែរយើង អញ្ចឹងយើងចូលចិត្តហើយ។ រែព ខ្ញុំមិនសូវចូលចិត្តទេ។ បានតែគេក្មេងទេ អាហ្នឹង។ ស្តាប់បានខ្លះ មិនបានខ្លះ។ បទ រែព ច្រើនតែជេរគ្នា។ ពិបាកស្តាប់។ មើលវាមិនសូវចូលភ្នែកដែរ»។ ផ្ទុយទៅវិញយុវជនដែលធំដឹងក្តីនៅសហរដ្ឋអាមេរិកចូលចិត្តចម្រៀងរែព និងហ៊ីព ហព ជាងព្រោះមិនពិបាកស្លៀកពាក់តែងខ្លួន។ គេអាចសម្តែង រែព និងហ៊ីព ហព ទីណាក៏បាន។ រាំបាន ទោះជាម្នាក់ឯង។ លោកអាដាម ឡុង (Addam Long) កីឡាករអុំទូកក្រុម ឡាវបូឌាន (LaoBodian) និយាយថា៖ «ខ្ញុំចូលចិត្តចម្រៀងរែព។ ខ្ញុំជាក្មេងជំនាន់ថ្មី។ ខ្ញុំធំដឹងក្តីក្នុងបរិយាកាសចម្រៀងរែព និងហ៊ីពហព។ ខ្ញុំចូលចិត្តហ៊ីព ហព តែខ្ញុំក៏ស្តាប់ចម្រៀងប្រពៃណីអាស៊ីខ្លះដែរ»។ រីឯកញ្ញា ម៉ៅ ចាន់សុខនា ជានិស្សិតខ្មែរមករៀននៅសាកលវិទ្យាល័យ ស៊ែន្ត ឡូរ៉ិនស៍ (St. Laurence) នាទីក្រុងញូវយ៉កនិយាយថា នាងចូលចិត្តរបាំប្រពៃណីជាងចម្រៀងរែព និងហ៊ីពហព។ នាងបានប្រាប់វីអូអេខ្មែរថា៖ «ខ្ញុំចូលចិត្តរបាំគោះត្រឡោក ដែលជារបាំប្រពៃណីខ្មែរយើង ហើយខ្ញុំក៏ចូលចិត្តចម្រៀងសម័យផងដែរ។ ខ្ញុំចូលចិត្តរបាំខ្មែរជាង»។ អ្នកស្រីឡុច អឹម ដែលជាអតីតជនភៀសខ្លួនមិនបានបញ្ជាក់ច្បាស់ពីចំណូលចិត្តរបស់អ្នកស្រីទេ។ អ្នកស្រីនិយាយថា «ចូលចិត្តទាំងអស់ហ្នឹងឯង។ ឲ្យតែគេលេង ចេះតែមើលហើយ»។ ពេលសួរអំពីខ្លឹមសារចម្រៀង រែព អ្នកស្រីសើច ហើយឆ្លើយថា៖ «ស្តាប់មិនបាន»។ អ្នកចូលចិត្តចម្រៀងរែព និងហ៊ីព ហព ហាក់ដូចជាមានចំនួនតិច តែសម្រែក ការទះដៃ និងសកម្មភាពគាំទ្រមានសភាពកងរំពងជាងរបាំប្រពៃណី៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២៩ សីហា Posted: 28 Aug 2011 08:19 PM PDT ព័ត៌មានចុងក្រោយបំផុត៖ កម្ពុជា៖ អ្នកជំនាញការខាងសុខាភិបាលម្នាក់បានប្រាប់តុលាការខ្មែរក្រហមនៃប្រទេសកម្ពុជានៅថ្ងៃច័ន្ទនេះថា ចុងចោទម្នាក់ក្នុងចំណោមចុងចោទបួននាក់កំពុងមានជំងឺបាត់បង់ស្មារតីហើយអាចមានជំងឺវង្វេងវង្វាន់។ ជប៉ុន៖ គណបក្សកំពុងកាន់អំណាចជប៉ុន បានបោះឆ្នោតជ្រើសរើសលោកយ៉ូស៊ីហ៊ីកុ ណូដា (Yoshihiko Noda) រដ្ឋមន្រ្តីក្រសួងហិរញ្ញវត្ថុជាមេដឹកនាំថ្មីរបស់ខ្លួន ដែលករណីនេះមានន័យថាអ្នកអភិរក្សនិយមផ្នែកហិរញ្ញវត្ថុនេះនឹងប្រាកដជាក្លាយជានាយករដ្ឋមន្ត្រីទី៦របស់ប្រទេសជាតិនាពេលឆាប់ៗ ក្នុងរយៈពេល៥ឆ្នាំចុងក្រោយនេះ។ ជប៉ុន៖ លោកយ៉ូស៊ីហ៊ីកុ ណូដា (Yoshihiko Noda) រដ្ឋមន្រ្តីក្រសួងហិរញ្ញវត្ថុ ដែលនឹងក្លាយជានាយករដ្ឋមន្រ្តីជប៉ុន ជាអ្នកគាំទ្រនាយករដ្ឋមន្រ្តីចេញពីតំណែង ណាអុតុ កាន់ (Naoto Kan)យ៉ាងខ្ជាប់ខ្ជួន ហើយគេរំពឹងថា គាត់នឹងបន្តនយោបាយរបស់លោក កាន់ (Kan)។ អាស៊ី៖ ខ្យល់ព្យុះសង្ឃរាទីហ្វុងណាន់ម៉ាឌុល (Nanmadol) បានធ្វើឲ្យមានភ្លៀងធ្លាក់យ៉ាងខ្លាំងហើយនឹងមានខ្យល់បក់ក្នុងល្បឿនជាងមួយរយគីឡូម៉ែត្រក្នុងមួយម៉ោងនៅពេលដែលវាឆ្លងកាត់កោះតៃវ៉ាន់ភាគខាងត្បូង និងខាងកើតនៅថ្ងៃច័ន្ទនេះ ដោយបានធ្វើឲ្យសាលារៀន និងកន្លែងអាជីវកម្មផ្សេងៗបិទទ្វារ និងបង្ខំឲ្យមនុស្សរាប់ពាន់នាក់ជម្លៀសចេញពីទីលំនៅ។ សហរដ្ឋអាមេរិក៖ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានប្រកាសភាពអាសន្នក្នុងរដ្ឋមួយចំនួនដែលរងការបក់បោកដោយសារខ្យល់ព្យុះសង្ឃរាឈ្មោះ អាយរីន (Irene) រួមមានរដ្ឋ North Carolina, Virginia, និងទីក្រុងញូវយ៉ក ដើម្បីផ្តល់ធនធានសហព័ន្ធឲ្យបានគ្រប់គ្រាន់ដល់រដ្ឋទាំងនោះ។ ស៊ីរី៖ សកម្មជនសិទ្ធិមនុស្សស៊ីរីនិយាយថា កងកម្លាំងសន្តិសុខរដ្ឋាភិបាលបានឡោមពទ័្ធទីក្រុងភាគកណ្តាលដែលជាទីកន្លែងនៃការតវ៉ាប្រឆាំងប្រធានាធិបតី បាសៀរ អាល់ អាសេដ (Bashar al- Assad)។ ពួកសកម្មជននិយាយថា កងទ័ពដែលឡោមព័ទ្ធទីក្រុងរ៉ាស់តាន់ (Rastan) បានបាញ់កាំភ្លើងយន្តនៅថ្ងៃច័ន្ទនេះ ដោយបន្តបង្ក្រាបការងើបបះបោរគាំទ្រលទ្ធិប្រជាធិបតេយ្យដែលមានរយៈពេល៥ខែនោះ។ លីប៊ី៖ កងកម្លាំងប្រឆាំងនឹងលោកហ្កាដាហ្វី (Gadhafi) នៃប្រទេសលីប៊ី កំពុងខិតចូលកាន់តែជិតទីក្រុងស៊ឺដ (Sirte)ដែលជាស្រុកកំណើតរបស់ម៉ូអាម៉ារ ហ្ដាដាហ្វី (Moammar Gadhafi) ខណៈពេលដែលពួកគេបន្តស្វែងរកមេដឹកនាំចុះខ្សោយរូបនេះបន្ទាប់ពីពួកគេបានត្រួតត្រារដ្ឋធានីលីប៊ីរួចមក។ ចិន៖ ឧត្តមសេនីយ៍ចិនម្នាក់និយាយក្នុងរូបភាពវីដេអូដែលគេបានមើលឃើញជាទូទៅថា ប្រទេសរបស់លោក ខកខានមិនបានកាត់ទោសចារបុរសល្បីៗក្នុងរយៈពេលមួយទសវត្សកន្លងមកនេះ ពីព្រោះតែរឿងក្តីនោះជារឿងអាម៉ាស់បំផុតបើផ្សាយជាសាធារណៈនោះ។ ព័ត៌មាននៅពេលមុននេះ៖ <!--IMAGE-LEFT--> សហរដ្ឋអាមេរិក៖ លោកស្រី Janet Napolitano រដ្ឋមន្ត្រីក្រសួងសន្តិសុខមាតុភូមិបានសុំដល់ប្រជារាស្ត្រដែលឋិតនៅក្នុងតំបន់ដែលខ្យល់ព្យុះ Irene បោកបក់លើឱ្យមានការប្រុងប្រយ័ត្ន ទោះណាជាខ្យល់ព្យុះនេះបានបក់ហួសទៅហើយ ក៏នៅមានគ្រោះថ្នាក់ដែរ។ តៃវ៉ាន់៖ កោះតៃវ៉ាន់កំពុងត្រៀមសម្រាប់ខ្យល់ព្យុះទីហ្វុងដ៏សាហាវមូយដែលបោកបក់ទៅទិសខាងជើងពីប្រទេសហ្វីលីពីន ដែលនៅទីនោះវាបានបោកបក់លើកោះ Luzon ជាកោះធំជាងគេ ជាមួយការធ្លាក់ភ្លៀងនិងមានខ្យល់ខ្លាំងជាច្រើនថ្ងៃបណ្តាលឱ្យមានមនុស្សយ៉ាងតិចណាស់៨នាក់ស្លាប់។ លីប៊ី៖ ក្រុមឧទ្ទាមលីប៊ីនិយាយថា ពួកគេបានវាយយកបានក្រុង Bin Jawad នៅជាប់មាត់សមុទ្រ ក្រោយពីបានប្រយុទ្ធច្រើនថ្ងៃជាមួយពួកយុទ្ធជនដែលស្មោះត្រង់ជាមួយ Moammar Gadhafi។ ស៊ីរី៖ ប្រទេសស៊ីរីបានច្រានចោលសេចក្តីថ្លែងការណ៍មួយរបស់សម្ព័ន្ធអារ៉ាប់ដែលបានអំពាវនាវឱ្យមានការបញ្ឈប់អំពើហិង្សាព្រៃផ្សៃ ដែលបានធ្វើឱ្យមានការភិតក្នុងប្រទេស ពេលដែលរដ្ឋាភិបាលបង្ក្រាបការបះបោរលម្អៀងទៅខាងលទ្ធិប្រជាធិបតេយ្យដែលមានរយៈពេល៥ខែមកហើយ។ ប៉ាគីស្ថាន៖ អ្នកនយោបាយជាន់ខ្ពស់ម្នាក់របស់គណបក្សប្រជារាស្ត្រប៉ាគីស្ថានដែលជាបក្សគ្រប់គ្រងប្រទេសបានលាលែងចេញពីតំណែងរបស់លោកក្នុងក្រុង Karachi ប៉ែកខាងត្បូងប្រទេស ដោយបានចោទប្រកាន់បក្សធំជាងគេក្នុងក្រុងនេះថាបានធ្វើឃាតកម្មនិងប្រព្រឹត្តភេរវកម្ម។ នេប៉ាល់៖ សភានៃប្រទេសនេប៉ាល់បានបោះឆ្នោតជ្រើសតាំងមេដឹកនាំនិយមលទ្ធិម៉ៅសេទង់ជាន់ខ្ពស់ម្នាក់ឱ្យកាន់តំណែងជានាយករដ្ឋមន្ត្រីថ្មីរបស់ប្រទេស។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
