VOA News: ព័ត៌មាន: “រហូតមកដល់ពេលនេះសាលក្រមចុងក្រោយឌុចនៅតែមិនទាន់ចេញរួច” plus 5 more |
- រហូតមកដល់ពេលនេះសាលក្រមចុងក្រោយឌុចនៅតែមិនទាន់ចេញរួច
- ជំនួបម្ចាស់ជំនួយត្រូវពន្យារគ្មានពេលកំណត់
- កម្ពុជារៀបចំទិញឧទ្ធម្ភាគចក្រពីចិន
- អង្គការសង្គមស៊ីវិលថា ខ្លឹមសារច្បាប់ពន្ធនាគារមិនច្បាស់
- ព័ត៌មានអន្តរជាតិសង្ខេប៖ ២៤ សីហា
- សហព្រះរាជអាជ្ញាអន្ដរជាតិនៃសាលាក្តីខ្មែរក្រហមប្តឹងសារទុក្ខ
| រហូតមកដល់ពេលនេះសាលក្រមចុងក្រោយឌុចនៅតែមិនទាន់ចេញរួច Posted: 24 Aug 2011 02:08 PM PDT ប្រសិនបើគេរាប់ចាប់តាំងពីពេលចាប់ខ្លួន ឌុច នៅខែ ឧសភា ឆ្នាំ១៩៩៩ ឌុច បានស្ថិតក្នុងពន្ធនាគារអស់រយៈពេលជាង១២ឆ្នាំហើយ។ ក៏ប៉ុន្ដែនោះមិនមែនជាការជាប់ឃុំឃាំងដោយអំណាចសាលក្រមរបស់អង្គជំនុំជម្រះវិសាមញ្ញក្នុងតុលាការកម្ពុជា ឬដែលគេស្គាល់ថា សាលាក្ដីខ្មែរក្រហមនោះទេ។ នៅពេលនេះអតីតប្រធានគុកទួលស្លែង ឬមន្ទីរស២១ ដែលត្រូវចោទប្រកាន់ក្នុងសំណុំរឿង០០១អំពីឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម បទមនុស្សឃាត និងទារុណកម្ម កំពុងរង់ចាំការប្រកាសសាលដីការបស់អង្គជំនុំជម្រះតុលាការកំពូល។ ក៏ប៉ុន្ដែគ្មានការបញ្ជាក់ជាផ្លូវការណាមួយពីកាលបរិចេ្ឆទនៃការប្រកាសសាលដីកានេះទេ។ ជនរងគ្រោះដែលធ្លាប់ស្ថិតក្រោមការធ្វើទារុណកម្មរបស់ឌុចហាក់ដូចជាបាត់បង់ការអត់ធ្មត់ ហើយចាត់ទុកថា នេះគឺជាការអូសបន្លាយពេលវេលានៃការប្រកាសសាលដីកា។ កាលពីថ្ងៃសុក្រសប្ដាហ៍មុននេះ សមាគមជនរងគ្រោះដោយរបបកម្ពុជាប្រជាធិបតេយ្យ ហៅកាត់ថា ក្សេមក្សាន្ដដែលដឹកនាំដោយអតីតអ្នកទោសគុកទួលស្លែង លោក ជុំ ម៉ី បានផ្ញើលិខិតមួយច្បាប់ទៅកាន់អង្គជំនុំជម្រះតុលាការកំពូលរបស់សាលាក្ដីខ្មែរក្រហមដើម្បីតឿនរំលឹកពីការប្រកាសសាលដីកានោះ។ នេះបើយោងតាមមេធាវីរបស់សមាគមក្សេម្ដក្សាន្ដ លោក លឹម ម៉េងឃី។ លោកមានប្រសាសន៍ថា៖ «សមាគមគាត់បានសុំសួរបញ្ជាក់ថា តើថ្ងៃប្រកាសសាលក្រម មានកាលបរិច្ឆេទជាក់លាក់ ហើយ ឬនៅ? នៅថ្ងៃណា? ហើយ ប្រសិនបើឥតទាន់មានកាលបរិច្ឆេទជាក់លាក់ គាត់ចង់ដឹងថា តើដំណើរការនៃការពិចារណាសម្រេចដល់ត្រឹមណាហើយ ពីព្រោះគាត់ទន្ទឹងរង់ចាំមើលសេចក្តីសម្រេចចុងក្រោយហ្នឹង»។ កាំង ហ្គិចអ៊ាវ ហៅឌុច អាយុ៦៩ឆ្នាំជាប់សង្ស័យក្នុងការជាប់ពាក់ព័ន្ធនឹងការធ្វើទារុណកម្ម និងសម្លាប់អ្នកទោសយ៉ាងតិចចំនួន១២.៣៨០នាក់ ក្នុងពេលដែលគាត់ត្រួតត្រាគុកទួលស្លែងពីឆ្នាំ ១៩៧៦ ដល់ខែមករា ឆ្នាំ ១៩៧៩។ គាត់ត្រូវបានបញ្ជូនពីការឃុំឃាំងបណ្ដោះអាសន្ននៅតុលាការយោធានៅឆ្នាំ ២០០៧។ ការកាត់ទោសឌុច ដោយអង្គជំនុំជម្រះសាលាដំបូងត្រូវបានធ្វើឡើងអស់រយៈពេល៧៧ថ្ងៃដោយរាប់ចាប់ពីថ្ងៃទី៣០ ខែមិនា ឆ្នាំ២០០៩រហូតដល់ខែកញ្ញា ឆ្នាំដដែលនោះ។ ដប់ខែក្រោយគឺនៅខែកក្កដា ឆ្នាំ២០១០ ទើបមានការប្រកាសសាលក្រមដែលផ្ដន្ទាទោសរូបគាត់ឲ្យជាប់ពន្ធនាគារចំនួន៣៥ ឆ្នាំ។ ក៏ប៉ុន្ដែទោសនេះត្រូវសម្រួលនៅត្រឹម១៩ឆ្នាំដែលធ្វើឲ្យមានប្រតិកម្មពីជនរងគ្រោះ និងពីសហព្រះរាជអាជ្ញាជាខ្លាំង។ សហព្រះរាជអាជ្ញាលោកស្រី ជា លាង និងលោក អាន់ឌ្រូ ខេលី បានប្ដឹងសារទុក្ខហើយទាមទារឲ្យអង្គជំនុំជម្រះតុលាការកំពូលបន្ថែមទោសឌុច ឲ្យជាប់ពន្ធនាគារអស់មួយជីវិត ឬយ៉ាងតិចបំផុតចំនួន៤៥ ឆ្នាំ។ យ៉ាងណាក៏ដោយបន្ទាប់ពីសវនាការរបស់តុលាការកំពូលរយៈពេលបីថ្ងៃគឺពីថ្ងៃទី២៨ ដល់ថ្ងៃទី៣០ ខែមិនា ឆ្នាំ ២០១១នេះមក នៅមិនទាន់មានការសម្រេចទោសឌុច ជាថ្មីដោយអង្គជំនុំជម្រះតុលាការកំពូលនោះទេ។ លោក ជុំ ម៉ី ប្រធានអង្គការក្សេមក្សាន្ដ និងជាអតីតអ្នកទោសគុកទួលស្លែងបញ្ជាក់ថា លោកកំពុងចង់ដឹងថាតើឌុចនឹងត្រូវទទួលទោសយ៉ាងដូចម្ដេចដោយលោកមិនចង់រង់ចាំរហូតដល់ការកាត់ទោសពេញអង្គសេចក្ដីក្នុងសំណុំរឿង០០២ឡើយ។ លោកបញ្ជាក់ថា៖ «តើវាប៉ុន្មានឆ្នាំទៀតបានវាចេញសាលក្រមហ្នឹង? សាលក្រម ជាស្ថាពរហ្នឹង! យើង រង់ចាំមើលដែរ។ គេបន្ថយទោសឌុចឲ្យមកនូវ១០ឆ្នាំ ឬគេដាក់ដំឡើងពី៣៥ឆ្នាំឡើងទៅលើទៀត។ យើងចង់ឲ្យចេញអាបួននាក់នេះ»។ អតីតអ្នកទោស គុកទួលស្លែងម្នាក់ទៀតគឺលោក ប៊ូ ម៉េង មានប្រសាសន៍ប្រកបដោយភាពអន្ទះសារ៖ «ហេតុអី បានជាមិនឆ្លើយសំណួរហ្នឹង? ខ្ញុំឆ្ងល់ត្រង់ហ្នឹង! កាត់កន្លងមកសាក្សីគេមានគ្រប់គ្រាន់ ក្រដាសស្នាមដែលជាស្លាកស្នាមក៏មានគ្រប់គ្រាន់ រាប់ពាន់រាប់ម៉ឺនសន្លឹកហើយៗឯកសាររស់ដូចជាខ្ញុំ ដូចជាសាក្សី ដូចជាអ្នកជំនាញការ គឺមានគ្រប់គ្រាន់ហើយ។ តើវាទៅជាយូរអីទៀត?» ទាំងលោកជុំ ម៉ី ទាំងលោក ប៊ូ ម៉េង សុទ្ធតែយល់ថា ការពន្យារពេលណាមួយក្នុងការសម្រេចក្ដីទឹកចុងក្រោយក្នុងសំណុំរឿង ឌុច នេះនឹងនាំឲ្យប៉ះពាល់ដល់យុតិ្តធម៌សម្រាប់ពួកលោក។ ក៏ប៉ុន្ដែលោក ឡាស អលសិន មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហមមិនចាត់ទុកថា ដំណើរការក្ដីរហូតមកទល់ពេលនេះគឺជាការពន្យារពេលនោះទេ។ លោកមានប្រសាសន៍ថា៖ «ខ្ញុំដឹងប្រាកដថា ទាំងអស់គ្នាប្រាកដជាអន្ទះសារចង់ដឹងពីការសម្រេចក្តីរបស់អង្គជំនុំជម្រះតុលាការកំពូលក្នុងសំណុំរឿងទី១។ អង្គជំនុំជម្រះតុលាការកំពូលកំពុងតែធ្វើសេចក្តីព្រាងទី១នៃសាលក្រម ប៉ុន្តែយើងមិនដឹងថាតើនឹងត្រូវការពេលប៉ុន្មានដើម្បីបញ្ចប់នោះទេ»។ លោកស្រី អាន ហេនដិល (Anne Heindel) ទីប្រឹក្សាច្បាប់របស់មជ្ឈមណ្ឌលឯកសារកម្ពុជាពន្យល់ថា ភាពស្មុគ្រស្មាញក្នុងសំណុំរឿងឌុច និងកង្វះពិសោធន៍របស់អង្គជំនុំជម្រះតុលាការកំពូលរបស់សាលាក្ដីខ្មែរក្រហមក្នុងការកាត់ក្ដីសំណុំរឿងឧក្រិដ្ឋកម្មបែបនេះបាននាំឲ្យមានការប្រើប្រាស់ពេលវេលាច្រើន។ លោកស្រីបានថ្លែងថា៖ «បណ្តឹងសារទុក្ខនៃសំណុំរឿងឌុចជាប់ទាក់ទងនឹងបញ្ហាផ្លូវច្បាប់យ៉ាងស្មុគស្មាញ ហើយអង្គជំនុំជម្រះតុលាការកំពូលមិនដែលបានដោះស្រាយសំណុំរឿងដូចច្នោះទេ។ ដើម្បីសម្រេចសំណុំរឿងនេះ ក្រុមចៅក្រមត្រូវគិតជាមុន អំពីផលបះពាល់នានាទៅដល់សំណុំរឿងមួយទៀត គឺសំណុំរឿង ០០២។ វាមិនមែនជាការស៊ីពេលវែងនោះទេ រហូតមកដល់ពេលនេះ ក្នុងការសរសេរសាលក្រមរបៀបនេះ។ ខ្ញុំសង្ឃឹមថា វានឹងស៊ីពេលយ៉ាងសមរម្យនឹងមានការសម្រេចយ៉ាងត្រឹមត្រូវ។ ប្រសិនបើយើងមើលតុលាការអន្តរជាតិផ្សេងទៀត ដូចជាតុលាការព្រហ្មទណ្ឌអន្តរជាតិនៃអតីតយ៉ូកូស្លាវី និងតុលាការអន្តរជាតិសម្រាប់ប្រទេសរវ៉ាន់ដា គេប្រើរយៈពេលរហូតដល់ មួយឆ្នាំដើម្បីទទួលបានលទ្ធផលនៃបណ្តឹងឧទ្ធរណ៍មួយ។ ប្រសិនបើលោកមើលការសម្រេចក្តីក្នុងសំណុំរឿងឌុច នៅអង្គជំនុំជម្រះសាលាដំបូង ពេលវេលាដែលប្រើគឺអស់បីត្រីមាស។ ដូច្នេះ ជាពេលវេលាសមហេតុផល»។ លោក ឡាស អលសិន និងលោកស្រី អាន ហេនដិល ក៏បានលើកឡើងពីការបកប្រែភាសាផងដែរដែលជម្រុញឲ្យមានភាពស្មុគ្រស្មាញដល់ដំណើរការប្រកាសសាលដីការបស់តុលាការកំពូល។ ក៏ប៉ុន្ដែប្រភពស្និទ្ធនឹងសាលាក្ដីខ្មែរក្រហមមួយចំនួនបានបង្ហាញពីភាពមិនទាន់ចុះសម្រុងគ្នារវាងចៅក្រមអន្ដរជាតិ និងចៅក្រមជាតិក្នុងការកំណត់ទោសទណ្ឌរបស់ ឌុចដែលជារឿងមិនល្អដល់ការចេញសាលដីកា។ ប្រភពដដែលបញ្ជាក់ថា តុលាការកំពូលរបស់សាលាក្ដីខ្មែរក្រហមត្រូវការធ្វើសេចក្ដីសម្រេចតែលើចំណុចចំនួនបីតែប៉ុណ្ណោះគឺទី១ ការសម្រេចទៅលើយុត្តាធិការ ទី២ការសម្រេចទៅលើការផ្ដន្ទាទោស និងទី៣ការគណនាទោសសម្រាប់ឧក្រិដ្ឋកម្មប្រឆាំងមនុស្សជាតិដែលឌុច ទទួលរងការចោទប្រកាន់។ ទោះជាយ៉ាងនេះក្ដីមានការរំពឹងទុកថា ការប្រកាសសាលដីកាសម្រាប់សំណុំរឿង០០១ ករណីឌុចនឹងអាចប្រព្រឹត្តិទៅមុនដំណាច់ឆ្នាំនេះ។ ក៏ប៉ុន្តែមានការប៉ាន់ប្រមាណថា សំណុំរឿង០០២នឹងអូសបន្លាយពេលច្រើនជាងនេះ៕ This posting includes an audio/video/photo media file: Download Now |
| ជំនួបម្ចាស់ជំនួយត្រូវពន្យារគ្មានពេលកំណត់ Posted: 24 Aug 2011 02:28 PM PDT រដ្ឋាភិបាលកម្ពុជាបានសម្រេចពន្យារពេលវេទិកាប្រជុំកិច្ចសហប្រតិបត្តិការអភិវឌ្ឍន៍កម្ពុជា លើកទី៤ ដោយគ្មានពេលកំណត់ជាក់លាក់។ នេះបើតាមសម្តីរបស់លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ នៅថ្ងៃអង្គារនេះ។ មានប្រសាសន៍ប្រាប់ វីអូអេខ្មែរនៅក្រសួងសេដ្ឋកិច្ច និងហិរញ្ញវត្ថុ លោកគាត ឈន់ បានមានប្រសាសន៍ថា មូលហេតុនៃការលើកពេលេវេទិកានេះ បានកំណត់នៅក្នុងអ្វីដែលរដ្ឋាភិបាលបានប្រកាសរួចហើយ។ លោកថ្លែងថា៖ «អើយ! បាទ! ហេតុផលមានជូនទៅឲ្យលោកដែលអ្នកសម្របសម្រួលរួចហើយ គឺគ្មានអីលើសពីហ្នឹងទេ។ ខ្ញុំមិនអាចនឹងកំណត់ពេលណាបានទេ បាទ។ មិនទាន់កំណត់បាន»។ នៅក្នុងសារអេឡិចត្រូនិករបស់លោក គាត ឈន់ ផ្ញើជូនលោក ជី ម៉ាហ្វាន់ នាយកធានាគារពិភពលោកប្រចាំកម្ពុជា និងលិខិតដាច់ដោយឡែកមួយទៀតផ្ញើជូនមន្ត្រីរដ្ឋាភិបាលគ្រប់ស្ថាប័ន និងក្រសួងទាំងអស់ដែលវីអូអេខ្មែរបានទទួលជាពិសេស លោក គាត ឈន់ បានស្នើដល់ធានាគារពិភពលោកឲ្យជូនដំណឹងនៃការពន្យារពេលនេះដល់បណ្តាលប្រទេសដៃគូអភិវឌ្ឍន៍នានា។ លោក គាត់ ឈន់ បានមានប្រសាសន៍នៅក្នុងលិខិតទាំងពីរនោះថា ការសម្រេចលើកពេលវេទិកានេះ បណ្តាលមកពីស្ថានភាពសេដ្ឋកិច្ចពិភពលោក ដែលរហួតមកដល់ពេលនេះ នៅតែមានភាពមិនប្រាកដប្រជានៅឡើយ ហើយស្ថានភាពហិរញ្ញវត្ថុសាធារណៈនៃប្រទេសដែលជាដៃគូសំខាន់ៗ មួយចំនួននៅតែប្រឈមមុខនឹងវិបត្តិសេដ្ឋកិច្ចនៅឡើយ។ ស្ថានទូតសំខាន់ៗមួយចំនួនដែលជាដៃគូអភិវឌ្ឍន៍យ៉ាងសំខាន់របស់កម្ពុជាដូចជាស្ថានទូតសហរដ្ឋអាមេរិក បារាំង និងជប៉ុន បានបង្ហាញពីជំហរប្រយ័ត្នប្រយែងក្នុងការឆ្លើយតបរបស់ខ្លួនទាក់ទឹងទៅនឹងការលើកពេលវេទិកាកិច្ចសហប្រតិបត្តិការអភិវឌ្ឍន៍កម្ពុជាលើកទី៤នេះ។ ក៏ប៉ុន្តែ ស្ថានទូតទាំងនោះបានអះអាងថា បានទទួលដំណឹងពីការលើកពេលនេះហើយតាមរយៈធានាគារពិភពលោក។ ការលើកពេលវេទិកានេះ បានកើតមានឡើងក្រោយពេលពីធានាគារពិភពលោកបានបង្កកប្រាក់ជំនួយកម្ពុជាដោយសារតែរដ្ឋាភិបាលមិនបានដោះស្រាយជម្លោះដីធ្លីនៅតំបន់បឹងកក់។ បន្ទាប់ពីមានការបង្កកជំនួយដោយធនាគារពិភពលោក រដ្ឋាភិបាលកម្ពុជាបានប្រញាប់ប្រញាល់ ប្រគល់ដីជាង១២ហិកតាដល់ប្រជាពលរដ្ឋនៅតំបន់បឹងកក់សម្រាប់ធ្វើការអភិវឌ្ឍដោយខ្លួនឯង។ លោក សុខ សំអឿន នាយកក្រុមអ្នកច្បាប់ការពារសិទ្ធិកម្ពុជា បានបញ្ជាក់ថា តាមការយល់ឃើញរបស់លោក ការលើកពេលសម្រាប់វេទិកានេះដោយសារតែបញ្ហានៅតំបន់បឹងកក់។ លោកបានមានប្រសាសន៍ថា នៅពេលដែលមានកិច្ចប្រជុំ ម្ចាស់ជំនួយតែងតែលើកឡើងនូវអ្វីដែលបានកើតឡើងនាពេលថ្មីៗនេះ។ លោកបានប្រាប់វីអូអេខ្មែរថា៖ «ធម្មតា យើងម្ចាស់ជំនួយ។ កាលណា វាមានបញ្ហាជាមួយអ្នកដែលទទួលជំនួយអញ្ចឹង វាមានបញ្ហា។ អញ្ចឹងតែងតែចាប់ផ្តើមគិត។ តើគួរឲ្យប៉ុណ្ណឹងដដែល ឬក៏ដកខ្លះ ឬក៏អត់សោះ។ អញ្ចឹង ហើយដូច្នេះដើម្បីជៀសវាងពីបញ្ហាហ្នឹង រដ្ឋាភិបាសត្រូវតែត្រៀមខ្លួន ទាញចម្លើយឲ្យបានសមហេតុសមផល ទើបអាចឲ្យទឹកចិត្តម្ចាស់ជំនួយផ្សេងទៀតហ្នឹងនៅតែរក្សាគោលជំហរដែលគេចង់ឲ្យជំនួយមកប្រទេសយើងដដែល បាទ»។ លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានជំទាស់នឹងការលើកឡើងនេះ ដោយលោកបានបញ្ជាក់ថា នេះគឺជាការយល់ឃើញតែម្នាក់ឯងតែប៉ុណ្ណោះ។ លោកថ្លែងថា៖ «មកពីគេអ្នកចេះ! ចេះតែធ្វើគិតគូតែម្នាក់ឯងទេ អ្នកនោះ។ ជាមតិអត្តនោម័តិ ចេះតែមានមតិទៅ។ អ្នកណាមានមតិយ៉ាងណាស្រេចតែគេទៅ»។ កាលពីឆ្នាំ២០១០កន្លងទៅនេះ កម្ពុជាបានទទួលជំនួយជាង១.០០០លានដុល្លារអាមេរិក ដោយប្រទេសជំនួយទាំងនោះបានភ្ជាប់លក្ខខណ្ខកំណែទម្រង់យ៉ាងច្រើន។ លោក ឈិត សំអាត នាយកប្រតិបត្តិអង្គការមិនមែនរដ្ឋាភិបាល ដែលហៅកាត់ថា NGOs Forum មិនបានធ្វើអត្ថាធិប្បាយជុំវិញការលើកពេលវេទិការបស់រដ្ឋាភិបាលទេ ដោយលោក ឈិត សំអាត គ្រាន់តែបានបញ្ជាក់ថា លោកទទួលបានដំណឹងអំពីការលើកពេលនេះរួចហើយ។ លោកបានប្រាប់វីអូអេខ្មែរថា៖ «ដោយសារខ្ញុំមិនយល់ពីមូលហេតុច្បាស់លាស់ដែរ គ្រាន់តែបញ្ជាក់ថា NGOs Forum យើងបានដឹងព័ត៌មានពីការពន្យារពេលរបស់កិច្ចប្រជុំរបស់ប្រទេសម្ចាស់ជំនួយជាមួយរដ្ឋាភិបាល។ មូលហេតុផ្សេងៗ ខ្ញុំមិនទាន់បានឃើញបញ្ជាក់នៅក្នុងហ្នឹងឲ្យបានច្បាស់លាស់ដែរ។ អញ្ចឹង! ខ្ញុំសុំមិនមានប្រសាសន៍ច្រើនជាងហ្នឹង»។ វេទិកាកិច្ចសហប្រតិបត្តិការអភិវឌ្ឍន៍កម្ពុជាលើកទី៤រដ្ឋាភិបាលគ្រោងនឹងកំណត់ពេលនៅថ្ងៃទី២៤ និងថ្ងៃទី២៥ ខែវិច្ឆិកា ខាងមុខនេះ ក៏ប៉ុន្តែត្រូវបានលើកពេលទៅវិញ៕ This posting includes an audio/video/photo media file: Download Now |
| កម្ពុជារៀបចំទិញឧទ្ធម្ភាគចក្រពីចិន Posted: 24 Aug 2011 01:33 PM PDT មន្ត្រីជាន់ខ្ពស់រដ្ឋាភិបាលកម្ពុជាបានបញ្ជាក់ថា កម្ពុជាគ្រោងនឹងទិញឧទ្ធម្ភាគចក្រពីចិនក្នុងគម្រោងទឹកប្រាក់ចំនួន១៩៥,៥លានដុល្លារអាមេរិកដែលជាប្រាក់កម្ចីពីចិន។ គម្រោងនេះបានធ្វើឡើងក្នុងអំឡុងពេលទស្សនកិច្ចជាផ្លូវការរបស់លោក ចូវ យ៉ុង កាង សមាជិកអចិន្ត្រៃយ៍នៃការិយាល័យនយោបាយមជ្ឈឹមបក្សកុម្មុយនីស្តចិនកាលពីសប្តាហ៍កន្លងទៅនេះ។ លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រាប់អ្នកកាសែតនៅក្រសួងសេដ្ឋកិច្ច និងហិរញ្ញវត្ថុថា ឧទ្ឋម្ភាគចក្រទាំងនេះសម្រាប់ប្រើក្នុងការប្រយុទ្ឋប្រឆាំងភេរវកម្មនិងគ្រប់គ្រងគ្រោះមហន្តរាយ។ លោកគាត ឈន់ មិនបានបញ្ជាក់ថា ឧទ្ឋម្ភាគចក្រនេះនឹងមកដល់កម្ពុជានៅពេលណាទេ ដោយលោកគ្រាន់តែបានបញ្ជាក់ថា កម្ពុជាត្រូវតែមានឧបករណ៍គ្រប់គ្រាន់។ លោកបានប្រាប់វីអូអេខ្មែរថា៖ «ខ្ញុំមិនធ្វើអត្ថាធិប្បាយទេគ្រាន់តែថាHelicopter នេះគ្រាន់តែសម្រាប់គ្រប់គ្រងគ្រោះមហន្តរាយនិងប្រយុទ្ឋប្រឆាំងនឹងអំពើភេរវកម្ម»។ លោកសឹង សំណាងមេបញ្ជាការកងទ័ពអាកាសបានមានប្រសាន៍ថា ខាងក្រុមហ៊ុនចិនមិនទាន់បានផ្តល់ព័ត៌មានលម្អិតស្តីពីការទិញឧទ្ឋម្ភាគចក្រនេះនៅឡើយទេ។ លោកសឹង សំណាងបានបង្វែរឲ្យទៅសួរក្រសួងការពារជាតិវិញ។ លោកឆ្លើយថា៖ «ខាងក្រុមហ៊ុនចិនមិនទាន់បានមកទាក់ទងជាមួយខ្ញុំដែរ ព្រោះអាហ្នឹងវាត្រូវការហ្វឹកហ្វាត់ អ្នកបច្ចេកទេសទៀត។ ដូច្នេះខ្ញុំមិនទាន់ស៊ីជម្រៅរឿងហ្នឹងនៅឡើយទេ»។ វីអូអេខ្មែរមិនអាចសុំលោកចៅ ភារុណ អគ្គនាយកនៃអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិបំភ្លឺបានទេ ដោយទូរស័ព្ទរបស់លោកគ្មានអ្នកឆ្លើយតប។ ចំណែកលោកឧត្តមសេនីយឯក ឈុំ សុជាតិ អ្នកនាំពាក្យក្រសួងការពារជាតិបានបញ្ជាក់ថា លោកមិនទាន់ដឹងអំពីផែនការនេះនៅឡើយទេ ដោយរងចាំការមកដល់របស់ឧទ្ធម្ភាគចក្រជាមុនសិន។ លោកមានប្រសាសន៍ថា៖ «អត់មានរបាយការណ៍ជាលាយលក្ខណ៍អក្សរនិយាយអត់កើតទេ។ ទាល់តែមានរបាយការណ៍បាននិយាយកើត។ គេអត់បានរាយការណ៍ឲ្យ»។ ក្នុងអំឡុងពេលទស្សនកិច្ច ឯកសារសំខាន់ៗចំនួន២៩ត្រូវបានចុះហត្ថលេខារវាងរដ្ឋាភិបាលកម្ពុជានិងរដ្ឋាភិបាលចិន ហើយក្នុងនោះមានមួយចំណុចបានលើកឡើងពីគម្រោងទិញឧទ្ធម្ភាគចក្រប្រភេទ Z-9ពីចិន។ ចិនមានទំនាក់ទំនងជាមួយកម្ពុជាតាំងពីយូរឆ្នាំណាស់មកហើយ។ រយៈពេលចុងក្រោយនេះបន្ទាប់ពីកម្ពុជាមានជម្លោះព្រំដែនជាមួយថៃរដ្ឋាភិបាលចិនបានផ្តល់អំណោយសម្ភារៈយោធាជាច្រើន ដូចជារថយន្តយោធា រថពាសដែក និងសម្លៀកបំពាក់ជាដើម៕ This posting includes an audio/video/photo media file: Download Now |
| អង្គការសង្គមស៊ីវិលថា ខ្លឹមសារច្បាប់ពន្ធនាគារមិនច្បាស់ Posted: 24 Aug 2011 12:57 PM PDT នៅថ្ងៃអង្គារនេះ សកម្មជនសិទ្ធិមនុស្សបានសម្តែងការព្រួយបារម្ភអំពីនិយមន័យ និងខ្លឹមសារនៃមាត្រាមួយចំនួននៅក្នុងសេចក្តីព្រាងច្បាប់ពន្ធនាគារដែលមានភាពមិនច្បាស់លាស់។ ក្រសួងមហាផ្ទៃបានរៀបចំសេចក្តីព្រាងច្បាប់ស្តីពីពន្ធនាគារក្នុងគោលបំណងកំណត់ការគ្រប់គ្រងពន្ធនាគារនៅកម្ពុជា និងមានគោលដៅអប់រំ កែប្រែ ស្តារនីតិសម្បទា ដើម្បីធ្វើសមាហរកម្មជនជាប់ឃុំទៅក្នុងសង្គមជាតិវិញ និងទប់ស្កាត់ការប្រព្រឹត្តបទល្មើសសាជាថ្មី។ សេចក្តីព្រាងច្បាប់នេះមាន៨៥មាត្រា និងមានវិសាលភាពអនុវត្តលើពន្ធនាគារនៅកម្ពុជា លើកលែងតែពន្ធនាគារយោធា។ គណៈរដ្ឋមន្ត្រីបានអនុម័តសេចក្តីព្រាងច្បាប់ស្តីពីពន្ធនាគារនេះកាលពីថ្ងៃសុក្រ។ លោក ចាន់ សាវ៉េត ប្រធានឃ្លាំមើលស្ថានភាពសិទ្ធិមនុស្សនៃសមាគមសិទ្ធិមនុស្សអាដហុកបានថ្លែងថាអង្គការសង្គមស៊ីវិលគាំទ្រឲ្យមានច្បាប់ពន្ធនាគារក្នុងលក្ខខណ្ឌត្រឹមត្រូវតាមផ្លូវច្បាប់ដែលមានស្តង់ដាអន្តរជាតិ។ លោក ចាន់ សាវ៉េត បានបន្តថា ច្បាប់នេះមិនបានចែងឲ្យច្បាស់លាស់អំពីការសួរសុខទុក្ខអ្នកទោស ការដាក់ទោសពិន័យផ្ទាល់ទៅលើមន្ត្រីពន្ធនាគារដែលប្រព្រឹត្តខុស ដូចជាការយកប្រាក់ពីអ្នកទោស និងអ្នកសួរសុខទុក្ខអ្នកទោស និងអត្ថន័យមិនច្បាស់លាស់អំពីទារុណកម្មក្នុងពន្ធនាគារ។ លោកបានប្រាប់វីអូអេខ្មែរថា៖ «ច្បាប់នេះ យើងមើលទៅហាក់បីដូចជាមានសម្ពាធខ្លាំងទៅលើតែអ្នកទោសទេ។ បែបបទនៃការចូលធ្វើការនៅក្នុងពន្ធនាគារ រីឯពាក់ព័ន្ធជាមួយនឹងបញ្ហាសិទ្ធិសេរីភាពរបស់អ្នកទោស អំពីការដាក់ទោសប្បញ្ញត្តិទៅលើមន្ត្រីពន្ធនាគារដែលប្រព្រឹត្តខុសក៏នៅមិនទាន់បាននិយាយឲ្យច្បាស់ បញ្ហាទារុណកម្មក៏មិនទាន់ឲ្យនិយមន័យ អំពើទារុណកម្មនៅក្នុងពន្ធនាគារទៀត។ អញ្ចឹង យើងគិតថា វាមានចំណុចខ្លះដែលយើងនៅចង់បន្ថែម ហើយនឹងចង់ឲ្យមានលក្ខខណ្ឌថា ច្បាប់ពន្ធនាគារនេះធ្វើឲ្យសមស្របទៅតាមបទដ្ឋានអន្តរជាតិ ក៏ដូចជាច្បាប់រដ្ឋធម្មនុញ្ញយើងដែរ»។ លោក អ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់ថា សេចក្តីព្រាងច្បាប់ស្តីពីពន្ធនាគារនេះមានចំណុចអវិជ្ជមានមួយចំនួន ហើយក៏មានចំណុចវិជ្ជមានដែរ ហើយច្បាប់នេះមិនបានចែងអំពីនិយមន័យ និងខ្លឹមសារឲ្យបានច្បាស់លាស់ទេ។ លោកបញ្ជាក់ថា៖ «យើងឃើញថា មានគ្របដណ្តប់ទាំងមន្ត្រីគ្រប់គ្រងពន្ធនាគារ ក៏ដូចជាអ្នកជាប់ឃុំ។ ប៉ុន្តែ ក្នុងច្បាប់នេះ យើង ឃើញថា មានចែងអំពីពិន័យ ឬទណ្ឌកម្ម ឬទោសទណ្ឌភាគច្រើនទៅលើអ្នកជាប់ឃុំ។ ចំណែកឯ មន្ត្រី យើងឃើញមានដែរ តែតិចតួច ហើយមិនបានចែងឲ្យបានលម្អិតថា តើមន្ត្រីដែលធ្វើខុសនោះ ត្រូវទទួលទោសរបៀបណា»។ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រីបានថ្លែងថា បើអង្គការសង្គមស៊ីវិលមិនពេញចិត្តលើមាត្រាណាមួយនៅក្នុងសេចក្តីព្រាងច្បាប់នេះ អាចសួរទៅរដ្ឋសភាបាន។ លោកបានប្រាប់វិអូអេថា៖ «ទណ្ឌិតទទួលបានកិច្ចការពារសិទ្ធិរបស់ខ្លួន។ រដ្ឋាភិបាលកំពុងតែប្រឹងប្រែងធ្វើឲ្យភាពរស់នៅក្នុងពន្ធនាគារទទួលបានការគោរព និងជីវភាពប្រសើរ»។ សេចក្តីថ្លែងការណ៍របស់ទីស្តីការគណៈរដ្ឋមន្ត្រី បញ្ជាក់ថា សេចក្តីព្រាងច្បាប់នេះគ្រប់គ្រងជនជាប់ឃុំឲ្យធានាបានសន្តិសុខ សុវត្ថិភាព និងមនុស្សធម៌។ កាលពីថ្ងៃសុក្រតុលាការក្រុងភ្នំពេញបានកាត់ទោសអតីតសន្តិសុខពន្ធនាគារម្នាក់នៅពន្ធនាគារ PJ ឲ្យជាប់ពន្ធនាគាររយៈពេល១០ខែ និងព្យួរទោសរយៈពេល២៦ខែ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២៤ សីហា Posted: 24 Aug 2011 09:27 AM PDT លីប៊ី៖ មេដឹកនាំប្រទេសលីប៊ី លោក ម៉ូអាម៉ារ ហ្កាដាហ្វី (Moammar Gadhafi) បានអំពាវនាវឲ្យអ្នកស្រុកនៅក្នុងរដ្ឋធានី ទ្រីប៉ូលី (Tripoli) បោសសម្អាតពួកឧទ្ទាមឲ្យអស់ពីទីក្រុង បន្ទាប់ពីពួកយុទ្ធជនឧទ្ទាមបានចូលលុកលុយក្នុងគេហដ្ឋានរបស់លោក ហើយបានយកគ្រឿងអាវុធ ទូរទស្សន៍ និងវត្ថុអនុស្សាវរីយ៍ចេញពីទីកន្លែងរបស់លោក។ លីប៊ី៖ បុគ្គលិកស្ថានទូតលីប៊ីនៅប្រទេសហ្វីលីពីនបានធ្វើពិធីអបអរសាទរដល់អ្វីដែលមើលឃើញហាក់ដូចជាការធ្លាក់ពីអំណាចរបស់លោក ម៉ូអាម៉ារ ហ្កាដាហ្វី នៅថ្ងៃពុធនេះ ដោយបានបំផ្លាញនិមិត្តរូបនៃការកាន់អំណាចផ្តាច់ការអស់ពេលជាយូររបស់លោក។ សហរដ្ឋអាមេរិក៖ ក្រុមមន្ដ្រីនៃទីភ្នាក់ងារភូគព្ភសាស្ដ្រស.រ.អ.ឲ្យដឹងថា ការរញ្ជួយផែនដីនៅថ្ងៃអង្គារមានកម្លាំង៥,៨ ជាការរញ្ជួយផែនដីធំជាងគេនៅភាគខាងកើតស.រ.អ. ចាប់តាំងពីឆ្នាំ១៩៤៤មក។ រុស្ស៊ី/កូរ៉េខាងជើង៖ ប្រធានាធិបតីប្រទេសរុស្ស៊ី លោក ឌីមីទ្រី មែដវេឌែហ្វ (Dmitry Medvedev) បានជួបជាមួយមេដឹកនាំកូរ៉េខាងជើង លោក គីម ចុងអ៊ិល (Kim Jong Il) នៅថ្ងៃពុធនេះ នៅក្នុងមូលដ្ឋានយោធាមួយនៅតំបន់ស៊ីបេរី (Siberia)។ ស.រ.អ./អាស៊ី៖ លោកប្រធានាធិបតី ចូ បាយឌិន (Joe Biden) នៃសហរដ្ឋអាមេរិក បានបញ្ចប់ទស្សនកិច្ចរបស់លោកនៅក្នុងទ្វីបអាស៊ី នៅថ្ងៃពុធនេះ ដោយបានថ្លែងអំណរគុណចំពោះកងទ័ពសហរដ្ឋអាមេរិកនិងគ្រួសាររបស់គេ ដែលបានផ្តល់ជំនួយទៅឲ្យប្រជាពលរដ្ឋនៃប្រទេសជប៉ុននៅក្រោយការរញ្ជួយដីនិងរលកទឹក ស៊ូណាមី (Tsunami) កាលពីថ្ងៃទី ១១ ខែមិនាមុន។ ចិន៖ រដ្ឋាភិបាលចិនកំពុងតែសុំឲ្យអ.ស.ប.នាំមុខគេក្នុងការខំប្រឹងប្រែងស្ថាបនាប្រទេសលីប៊ីឡើងវិញ នៅក្រោយពេលសង្គ្រាមពេលដែលខ្លួនអំពាវនាវឲ្យមានអន្ដរកាលនយោបាយនៅក្នុងប្រទេសនៅភាគខាងជើងទ្វីបអាហ្រ្វិកដែលឆេះឆាបដោយសង្គ្រាម។ ស៊ីរី៖ បស្ចឹមប្រទេសបានផ្សាយសេចក្តីព្រាងនៃសេចក្ដីសម្រេចចិត្ដរបស់ក្រុមប្រឹក្សាសន្ដិសុខអ.ស.ប.នៅថ្ងៃអង្គារដែលសុំឲ្យដាក់ទណ្ឌកម្មលើលោកប្រធានាធិបតី Bashar al-Assad នៃប្រទេសស៊ីរី សមាជិកគ្រួសារដ៏មានឥទ្ធិពល និងអ្នកជំនិតនឹងលោក ក្នុងគោលបំណងដើម្បីបញ្ឈប់ការបង្ក្រាបរបស់រដ្ឋាភិបាលដែលមានជាបន្ដទៅទៀតទៅលើពួកជំទាស់។ ជប៉ុន៖ លោក Yoshihoko Noda និយាយថា ការទុកចិត្ដទៅលើសេដ្ឋកិច្ចនៃប្រទេសនេះនឹងមិនត្រូវបានរង្គោះរង្គើដោយសារការបញ្ចុះកម្រិតបំណុលរបស់ប្រទេសជប៉ុនដោយទីភ្នាក់ងារឥណទានអន្ដរជាតិទេ។ លីបេរីយ៉ា៖ ក្រុមមន្ដ្រីរៀបចំការបោះឆ្នោតនៅក្នុងប្រទេសលីបេរីយ៉ា រាយការណ៍អំពីចំនួនមនុស្សបន្ដិចបន្តួចដែលចេញទៅបោះប្រជាមតិអំពីរដ្ឋធម្មនុញ្ញ។ ញូវយ៉ក៖ ចៅក្រមនៅទីក្រុងញូវយ៉កបានបដិសេធការចោទក្នុងបទចាប់រំលោភភេទប្រឆាំងលោក Dominique Strauss-Kahn អតីតនាយកមូលនិធិរូបិយវត្ថុអន្ដរជាតិ នៅមួយថ្ងៃក្រោយពីក្រុមរដ្ឋអាជ្ញាសម្រេចដកពាក្យបណ្ដឹងវិញ។ បង់ក្លាដែស៖ អង្គការសិទ្ធិមនុស្សអន្ដរជាតិ កំពុងតែសុំឲ្យប្រទេសបង់ក្លាដែសបញ្ឈប់អាជ្ញាធររបស់ខ្លួនកុំឲ្យសម្លាប់ក្រៅផ្លូវតុលាការ ហើយនឹងការរំលោភដទៃៗទៀតដែលមានការអះអាងថាបន្ដប្រព្រិត្ដធ្វើទោះបីរដ្ឋាភិបាលប្ដេជ្ញាចិត្ដថានឹងបញ្ឈប់ក៏ដោយ។ This posting includes an audio/video/photo media file: Download Now |
| សហព្រះរាជអាជ្ញាអន្ដរជាតិនៃសាលាក្តីខ្មែរក្រហមប្តឹងសារទុក្ខ Posted: 23 Aug 2011 06:27 PM PDT សហព្រះរាជអាជ្ញាអន្ដរជាតិបានដាក់ពាក្យបណ្ដឹងសារទុក្ខកាលពីខែកក្កដាប្រឆាំងនឹងការបដិសេធសំណើសុំឲ្យស៊ើបអង្កេតបន្ថែមពីក្រុមសហចៅក្រមស៊ើបអង្កេត។ ការស្នើសុំឲ្យទាត់ចោលការសម្រេចរបស់សហចៅក្រមស៊ើបអង្កេតដោយសំអាងថា សហចៅក្រមស៊ើបអង្កេតមានការច្រឡំក្នុងការបកស្រាយច្បាប់។ សហចៅក្រមស៊ើបអង្កេតលោក យូ ប៊ុនឡេង និងលោក ស៊ិកហ្វ្រិត ប៊្លុង របស់សាលាក្ដីខ្មែរក្រហមបានចេញផ្សាយជាសាធារណៈនូវព័ត៌មានស្ដីពីការស៊ើបអង្កេតក្នុងសំណុំរឿង០០៤ នៅថ្ងៃច័ន្ទនេះដោយបង្ហាញទីតាំងស៊ើបអង្កេតក្នុងខេត្តចំនួនប្រាំមួយ រួមទាំងមន្ទីរសន្ដិសុខ និងទីតាំងសម្លាប់មនុស្សទៀតផង។ ការទម្លាយព័ត៌មានស្ដីពីការស៊ើបអង្កេតនេះធ្វើឡើងបួនថ្ងៃប៉ុណ្ណោះបន្ទាប់មានការជំរុញពីសហព្រះរាជអាជ្ញាអន្ដរជាតិលោក អាន់ឌ្រូ ខេយលី (Andrew Cayley) ដែលលោកចាត់ទុកថា ការផ្ដល់ព័ត៌មានអំពីសំណុំរឿង០០៤ដល់ជនរងគ្រោះនឹងផ្ដល់ផលប្រយោជន៍យ៉ាងសំខាន់សម្រាប់ពួកគេដែលចង់ចូលរួមក្នុងដំណើរការក្ដីចុងក្រោយនេះ។ មានការរិះគន់ជាខ្លាំងចំពោះក្រុមសហចៅក្រមស៊ើបអង្កេតដោយសារតែការរក្សាព័ត៌មាននៃការស៊ើបអង្កេតក្នុងសំណុំរឿង០០៣និង០០៤ទុកជាការណ៍សម្ងាត់។ នៅក្នុងសេចក្ដីថ្លែងការណ៍របស់ខ្លួន សហចៅក្រមស៊ើបអង្កេត លោក យូ ប៊ុនឡេង និងលោកស៊ិតហ្វ្រិក ប៊្លុង ហាក់ដូចជាចង់សម្អាតសេចក្ដីអត្ថាធិប្បាយក្រៅផ្លូវការមួយចំនួនដោយលើកឡើងថា ការចេញផ្សាយតាមបណ្ដាញផ្សព្វផ្សាយនូវព័ត៌មានជាច្រើននាពេលកន្លងមកទាក់ទងនឹងសំណុំរឿង០០៤ គឺជាព័ត៌មាន «ដែលមានលក្ខណៈប៉ាន់ស្មាន» និងប្រកបដោយ«ការភាន់ច្រឡំ»។ សហចៅក្រមស៊ើបអង្កេតទាំងពីររូបបានរៀបរាប់ចំណុចគោលៗដោយពុំមានសេចក្ដីអធិប្បាយឡើយអំពីទីតាំងដែលមានការស៊ើបអង្កេតដូចជានៅក្នុងភូមិភាគកណ្ដាលនៃខេត្តកំពង់ចាមរួមមានមន្ទីរសន្ដិសុខក្នុងស្រុកចំនួនប្រាំ ដែលក្នុងនោះក៏មានការបង្ហាញអំពីទីកន្លែងសម្លាប់មនុស្ស និងការដ្ឋានធ្វើការដោយបង្ខំក្នុងស្រុកទាំងប្រាំ និងអំពើប្រល័យពូជសាសន៍ប្រឆាំងនឹងជនជាតិចាម។ មានមន្ទីរសន្ដិសុខ និងទីកន្លែងសម្លាប់ចំនួនបួននៅក្នុងភូមិភាគកណ្ដាលនៃខេត្តកំពង់ធំ។ ក្នុងខេត្តពោធិ៍សាត់ ក្រុមចៅក្រមបង្ហាញការស៊ើបអង្កេតលើគុកលេខ៨ក្នុងឃុំស្យា ស្រុកកណ្ដៀង និងទីតាំងសម្លាប់មនុស្សក្នុងស្រុកកណ្ដៀងដូចគ្នានេះ។ មានទីតាំងសម្លាប់មនុស្ស និងមន្ទីរសន្ដិសុខចំនួនប្រាំពីរក្នុងខេត្តបាត់ដំបង។ ដោយឡែកសហចៅក្រមស៊ើបអង្កេតបានបង្ហាញការស៊ើបអង្កេតក្នុងតំបន់ចំនួនប្រាំបីក្នុងខេត្តបន្ទាយមានជ័យ ដែលក្នុងនោះមានមន្ទីរសន្ដិសុខ ទីតាំងសម្លាប់មនុស្ស និងការដ្ឋានធ្វើការដោយបង្ខំដូចជាការដ្ឋានទំនប់ត្រពាំងថ្ម និងការដ្ឋានស្ពានស្រែង និងទំនប់ព្រៃរនាមក្នុងស្រុកព្រះនេត្រព្រះ។ ក្រៅពីនោះមានការស៊ើបអង្កេតលើមន្ទីរសន្ដិសុខវត្តប្រធាតុ ក្នុងស្រុកគិរីវង្សខេត្តតាកែវ ដែលតំណាងឲ្យភូមិភាគនិរតីរបស់ពួកខ្មែរក្រហម។ សហចៅក្រមស៊ើបអង្កេតក៏បានបញ្ជាក់ពីការស៊ើបអង្កេត លើគោលការណ៍បោសសម្អាតក្នុងភូមិភាគកណ្ដាល និងការបោសសម្អាតនៅភូមិភាគពាយ័ព្យផងដែរ។ លោក អាន់ឌ្រូ ខេយលី បានឆ្លើយតាមសារអេឡិកត្រូនិកជាមួយវីអូអេខ្មែរនៅថ្ងៃនេះថា លោកមានសេចក្ដីរីករាយជាខ្លាំងដែលថា សហចៅក្រមស៊ើបអង្កេត «ធ្វើតាមច្បាប់» របស់តុលាការហើយបានធ្វើតាមសំណើរបស់លោក។ លោកសង្កត់ធ្ងន់ថា ប្រជាពលរដ្ឋមានសិទ្ធិទទួលព័ត៌មានទាំងនេះ។ លោកស្រី ស៊ីលកិ៍ ស្ទូហ្សិនស្គី (Silke Stuzensky) ដែលជាមេធាវីមួយរូបតំណាងឲ្យដើមបណ្ដឹងរដ្ឋប្បវេណីក៏បានស្វាគមន៍ដូចគ្នានេះដែរ។ លោកស្រីថ្លែងថា៖ «ខ្ញុំសូមស្វាគមន៍សេចក្ដីថ្លែងការណ៍ជាសាធារណៈស្ដីពីវិសាលភាពនៃការស៊ើបអង្កេតក្នុងសំណុំរឿង០០៤។ ឥឡូវយ៉ាងហោចណាស់ជនរងគ្រោះស្ថិតក្នុងជំហរមួយចំពោះអ្វីដែលកំពុងស្ថិតក្រោមការស៊ើបអង្កេតដើម្បីសម្រេចចិត្តថា តើពួកគាត់ចង់ក្លាយជាដើមបណ្ដឹងរដ្ឋប្បវេណីឬទេ?»។ សហចៅក្រមស៊ើបអង្កេត បានបញ្ចប់ការស៊ើបអង្កេតសំណុំរឿង០០៣ កាលពីខែមេសា ក៏ប៉ុន្តែលោក អាន់ឌ្រូ ខេយលី បានហៅការស៊ើបអង្កេតនោះថា មិនទាន់ពេញលេញ។ នៅក្នុងសេចក្ដីប្រកាសរបស់ខ្លួននៅថ្ងៃនេះ សហចៅក្រមស៊ើបអង្កេតក៏បានអំពាវនាវឲ្យជនរងគ្រោះចាប់ផ្ដើមដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីចាប់ពីពេលនេះសម្រាប់សំណុំរឿង០០៤៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
