VOA News: ព័ត៌មាន: “នាយករដ្ឋមន្រ្តីខ្មែររិះគន់សំឡេងសហរដ្ឋអាមេរិកនិងវិទ្យុអាស៊ីសេរី” plus 4 more |
- នាយករដ្ឋមន្រ្តីខ្មែររិះគន់សំឡេងសហរដ្ឋអាមេរិកនិងវិទ្យុអាស៊ីសេរី
- សាលាឧទ្ធរណ៍សម្រេចដោះលែងពលរដ្ឋមានទំនាស់ដីធ្លីនៅសៀមរាប
- ចៅក្រមសាលាក្តីខ្មែរក្រហមគិតថាសំណុំរឿង០០២អាចស៊ីពេលពីរឆ្នាំទៀត
- លោកហ៊ុន សែនជំរុញឱ្យមានការចរចាត្រីភាគីរឿងជម្លោះព្រំដែន
- ព័ត៌មានអន្តរជាតិសង្ខេប៖ ២២ កក្កដា
| នាយករដ្ឋមន្រ្តីខ្មែររិះគន់សំឡេងសហរដ្ឋអាមេរិកនិងវិទ្យុអាស៊ីសេរី Posted: 22 Jul 2011 02:40 PM PDT កាលពីថ្ងៃសុក្រលោកនាយករដ្ឋមន្រ្តីហ៊ុន សែននៃប្រទេសកម្ពុជាបានរិះគន់យ៉ាងខ្លាំងលើវិទ្យុសំឡេងសហរដ្ឋអាមេរិក (VAO)និងវិទ្យុអាស៊ីសេរី ដោយលោកនិយាយថាសេចក្តីរាយការណ៍របស់ពួកគេ«អន់ណាស់»។ លោកនាយករដ្ឋមន្រ្តីបានចោទប្រកាន់ប្រព័ន្ធផ្សព្វផ្សាយទាំងពីរនេះ ដែលផ្តល់ថវិកាដោយរដ្ឋាភិបាលសហរដ្ឋអាមេរិកស្ថិតនៅក្រោមក្រុមប្រឹក្សាភិបាលនៃការ ផ្សាយ ពីការបំភ្លៃព័ត៌មានឬគ្មានព័ត៌មានអ្វីទាំងអស់។ នាយករដ្ឋមន្រ្តីបានធ្វើអត្ថាធិប្បាយនៅក្នុងការឆ្លើយតបទៅនឹងសំណួរអ្នកកាសែតរបស់ វីអូអេផ្សាយជាភាសាខ្មែរម្នាក់នៅឯសន្និសីទកាសែតក្នុងប្រទេសកម្ពុជា។ សំណួរនោះអំពីតុលាការខ្មែក្រហម ហើយលោកហ៊ុន សែននិយាយថាវាមិនមែនក្នុងប្រធានបទដែលត្រូវរាយការណ៍ដោយសន្និសីទសារព័ត៌មានទេដែលបានកើតមានឡើងបន្ទាប់ពីកិច្ចប្រជុំគណៈរដ្ឋមន្រ្តីរបស់លោកហើយបានគ្របដណ្តប់ដោយសំណួរពីជម្លោះព្រំដែនកម្ពុជាជាមួយប្រទេសថៃ។ លោកហ៊ុន សែន បានសរសើរវិទ្យុបារាំងអន្តរជាតិហើយលោកបានស្នើផ្តល់ការងារឲ្យធ្វើដល់បុគ្គលិកខ្មែរនៅ វីអូអេ និងវិទ្យុអាស៊ីសេរីនៅស្ថានីយវិទ្យុក្នុងស្រុក។ វីអូអេសំឡេងសហរដ្ឋអាមេរិកបានឆ្លើយតបដល់សេចក្តីអត្ថាធិប្បាយរបស់នាយករដ្ឋមន្រ្តីដោយនិយាយថា «អ្នកយកព័ត៌មានរបស់វីអូអេនៅជុំវិញពិភពលោក រួមមានទាំងអ្នកកាសែតទាំងនោះដែលកំពុងរាយការណ៍ព្រឹត្តិការណ៍ក្នុងប្រទេសកម្ពុជា បានប្រកាន់បទដ្ឋាននៃភាពសុក្រិត និងភាពមិនលម្អៀង ទៅតាមបទដ្ឋានដែលកំណត់ដោយច្បាប់សហរដ្ឋអាមេរិក»។ រដ្ឋាភិបាលកម្ពុជាបានជំទាស់កាន់តែខ្លាំងឡើងដល់រឿងក្តីច្រើនជាងមុននៃការកាត់ទោសខ្មែរក្រហមដែលធ្វើឡើងតុលាការរួមកម្ពុជានិងអន្តរជាតិដែលកំពុងកាត់ទោសមេដឹកនាំខ្មែរក្រហមដែលបានគ្រប់គ្រងប្រទេសក្នុងចុងទសវត្សរ៍១៩៧០។ ប្រជាពលរដ្ឋជាង១លាននាក់បានស្លាប់នៅក្រោមរបបខ្មែរក្រហម អ្នកស្លាប់ជាច្រើនមកពីការដាច់ពោះស្លាប់ ឬធ្វើការជាទម្ងន់និងអ្នកខ្លះទៀតត្រូវគេសម្លាប់ចោល។ មេខ្មែរក្រហមម្នាក់បានត្រូវកាត់ឲ្យជាប់ទោសដោយតុលាការហើយ៤នាក់ផ្សេងទៀតនឹងត្រូវកាត់ទោស។ រដ្ឋាភិបាលនិយាយថាការកាត់ទោសបន្ថែម អាចធ្វើឲ្យគ្រោះថ្នាក់ដល់ស្ថិរភាពប្រទេសជាតិ។ វីអូអេសំឡេងសហរដ្ឋអាមេរិកផ្សាយព័ត៌មានជាង៤០ភាសាតាមរយៈរលកវិទ្យុអាកាសខ្លីនិងវិទ្យុ FM ទូរទស្សន៍ ផ្កាយរណបនិងប្រព័ន្ធអ៊ីនធឺណិត។ វិទ្យុអាស៊ីសេរីផ្សាយព័ត៌មានទៅកាន់ទ្វីបអាស៊ី។ ក្រុមប្រឹក្សាអភិបាលនៃការផ្សាយក៏មើលការខុសត្រូវវិទ្យុអឺរ៉ុបសេរី វិទ្យុ Liberty បណ្តាញផ្សាយព័ត៌មានតំបន់មជ្ឈិមបូព៌ា The Middle East Broadcasting Networks និងការិយាល័យផ្សាយទៅកាន់ប្រទេសគុយបា៕ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| សាលាឧទ្ធរណ៍សម្រេចដោះលែងពលរដ្ឋមានទំនាស់ដីធ្លីនៅសៀមរាប Posted: 22 Jul 2011 01:48 PM PDT សាលាឧទ្ធរណ៍នៅថ្ងៃសុក្រនេះបានសម្រេចតម្កល់សាលក្រមសាលាដំបូងខេត្តសៀមរាបដោយលើកលែងការចោទប្រកាន់ប្រជាពលរដ្ឋចំនួន៥នាក់នៅស្រុកជីក្រែងក្នុងករណីវិវាទដីធ្លី។ ការសម្រេចរបស់សាលាឧទ្ធរណ៍ថ្ងៃនេះធ្វើឡើងបន្ទាប់ពីមានការជំនុំជម្រះកាលពីថ្ងៃទី៧ ខែកក្កដានេះ។ ករណីទំនាស់ដីធ្លីនេះបានកើតឡើងតាំងពីឆ្នាំ២០០៥រវាងប្រជាពលរដ្ឋចំនួន៤៥គ្រួសារនិងប្រជាពលរដ្ឋចំនួន១៧៥គ្រួសារលើផ្ទៃដីចំនួន៤៧៥ហិកតាស្ថិតនៅភូមិទំនប់សួង ឃុំអន្លង់សំណរ ស្រុកជីក្រែង ខេត្តសៀមរាប។ លុះដល់ថ្ងៃទី២២ ខែមិនាឆ្នាំ២០០៩ក៏មានការផ្ទុះអាវុធកើតឡើងដោយសារសមត្ថកិច្ចបានធ្វើការហាមឃាត់ប្រជាពលរដ្ឋមួយចំនួនក្នុងចំណោមប្រជាពលរដ្ឋមានទំនាស់មិនឱ្យធ្វើស្រែនៅលើដីដែលកំពុងស្ថិតក្នុងភាពប្រទាញប្រទង់។ ការផ្ទុះអាវុធនោះបានបណ្ដាលឲ្យប្រជាពលរដ្ឋចំនួន៤នាក់បានរងរបួសនិង១២នាក់បានចាប់ខ្លួនដោយចោទប្រកាន់ពីបទល្មើសផ្សេងៗចំនួន៩ករណីទាក់ទងនឹងបទល្មើសព្រហ្មទណ្ឌដូចជាការបង្ករបួសស្នាម និងបង្ខាំងមនុស្សខុសច្បាប់ជាដើម។ ក៏ប៉ុន្តែ ប្រជាពលរដ្ឋចំនួន៧នាក់ត្រូវបានលើកលែងការចោទប្រកាន់ហើយមានការដោះលែងជាបន្តបន្ទាប់ដោយនៅសល់តែប្រជាពលរដ្ឋចំនួន៥នាក់តែប៉ុណ្ណោះ។ សាលាដំបូងខេត្តសៀមរាបបានបើកសវនាការសម្រេចលើកលែងការចោទប្រកាន់ទាំងស្រុងលើអ្នកភូមិទាំងប្រាំនាក់ចុងក្រោយនេះកាលពីខែធ្នូឆ្នាំ២០០៩ដែលក្នុងនោះ២នាក់បានស្ថិតនៅក្រៅឃុំនិង៣នាក់ជាប់ឃុំជាបន្ត។ ក៏ប៉ុន្ដែព្រះរាជអាជ្ញាបានប្ដឹងជំទាស់នឹងសេចក្ដីសម្រេចនេះ។ ប្រជាពលរដ្ឋ៣នាក់ដែលបានជាប់ឃុំបន្តរហូតមកដល់ពេលនេះមានឈ្មោះស៊ឹម លាភ អាយុ ៦១ ឆ្នាំ ចាន់ លាភ អាយុជាង៤០ឆ្នាំនិងឈ្មោះខ្លិន អ៊ៀង អាយុជាង៥០ឆ្នាំ។ លោក ហម ស៊ុនរិទ្ធ មេធាវីរបស់ប្រជាពលរដ្ឋដែលត្រូវបានគេចោទប្រកាន់នោះបានឱ្យដឹងថាកូនក្តីរបស់គាត់មិនទាន់បានដោះលែងនៅឡើយដោយត្រូវរង់ចាំការរៀបចំទៅតាមនីតិវិធីផ្នែករដ្ឋបាលជាមុនសិន។ លោក តូប ពន្លឹក ជាកូនរបស់ស៊ឹម លាភបានសាទរចំពោះការលើកលែងការចោទប្រកាន់នេះក៏ប៉ុន្តែលោកគិតថាវាហាក់ដូចជាយូរខ្លាំងពេកទំរាំមានការជំនុំជម្រះនេះ។ «តាមយោបល់របស់ខ្ញុំមានភាពយុត្តិធម៌ចំពោះពួកគាត់ដោយមិនមានការចោទប្រកាន់ហើយមិនមានការឱ្យគាត់មានទទួលទោសបន្តទៅទៀតក៏ប៉ុន្តែត្រង់ថាការជាប់យូរឬជាប់ឆាប់នោះគឺមានភាពអយុត្តិធម៌សម្រាប់គាត់ណាស់ត្រង់ថាគាត់មិនបានប្រព្រឹត្តបទល្មើសតែតុលាការខេត្តសៀមរាបយកគាត់ទៅឃុំអស់រយៈពេលជាងពីរឆ្នាំ»។ លោក អំ សំអាត អ្នកគ្រប់គ្រងការិយាល័យស៊ើបអង្កេតអង្គការការពារសិទ្ធិមនុស្សលីកាដូបានឱ្យដឹងថា លោកសូមស្វាគមន៍សេចក្ដីសម្រេចរបស់សាលាឧទ្ធរណ៍ក៏ប៉ុន្តែលោកនៅតែចាត់ទុកថានេះជាករណីអយុត្តិធម៌ជាខ្លាំងសម្រាប់ប្រជាពលរដ្ឋដែលគ្មានកំហុសនេះ។ «ខ្ញុំស្វាគមន៍ចំពោះសេចក្តីសម្រេចរបស់សាលាឧទ្ធរណ៍ដែលបានតម្កល់សាលក្រមសាលាដំបូងខេត្តសៀមរាបហើយនឹងធ្វើការលើកលែងចោទហើយបង្គាប់ឱ្យដោះលែងនេះក៏ប៉ុន្តែអ្វីដែលយើងគួរឱ្យសោកស្តាយថាពួកគាត់នេះត្រូវជាប់ឃុំរយៈពេល២ឆ្នាំដោយមិនបានប្រព្រឹត្តអ្វីហើយរឿងនេះគឺជារឿងដីធ្លីសុទ្ធសាធ។ បញ្ហាដីធ្លីនេះគឺនៅមិនទាន់បានដោះស្រាយនៅឡើយអញ្ចឹងបន្ទាប់ពីមានការដោះលែងនេះអាជ្ញាធរខេត្តគាត់ត្រូវតែមានការដោះស្រាយករណីដីធ្លីតាមរបៀបណាមួយដើម្បីបញ្ជៀសទំនាស់ទៅថ្ងៃក្រោយទៀតជៀសវាងឱ្យប្រជាពលរដ្ឋរងគ្រោះទៀត»។ ទំនាស់ដីធ្លីបានកើតឡើងយ៉ាងផុលផុសភាគច្រើនរវាងប្រជាពលរដ្ឋនិងអ្នកមានអំណាចនៅក្នុងខណៈពេលដែលដីនៅក្នុងប្រទេសកម្ពុជាមានតម្លៃកើនឡើងខ្ពស់។ករណីភាគច្រើនត្រូវគេមើលឃើញថាប្រជាពលរដ្ឋក្រីក្រ គឺជាអ្នកទទួលរងគ្រោះពីជម្លោះទាំងនោះ៕ This posting includes an audio/video/photo media file: Download Now |
| ចៅក្រមសាលាក្តីខ្មែរក្រហមគិតថាសំណុំរឿង០០២អាចស៊ីពេលពីរឆ្នាំទៀត Posted: 22 Jul 2011 01:15 PM PDT សហចៅក្រមស៊ើបអង្កេតអន្ដរជាតិលោកស៊ីកហ្វ្រ៊ីត ប៊្លុង (Siegfried Blunk) បានធានាអះអាងថាជនជាប់ចោទចាស់ជរាទាំងបួននាក់ក្នុងសំណុំរឿង០០២ នឹងនៅតែត្រូវនាំខ្លួនយកមកកាត់ទោសបើទោះជាពួកគេមានបញ្ហាសុខភាពក៏ដោយ។ ម្យ៉ាងវិញទៀតការកាត់ទោសរបស់អតីតមេដឹកនាំកំពូលខ្មែរក្រហមទាំងនេះអាចនឹងស៊ីពេលយ៉ាងតិចរហូតដល់ពីរឆ្នាំ។ សេចក្ដីថ្លែងរបស់សហចៅក្រមស៊ើបអង្កេតសញ្ជាតិអាល្លឺម៉ង់ធ្វើឡើងខណៈដែលអង្គជំនុំជម្រះសាលាដំបូងរបស់សាលាក្ដីខ្មែរក្រហមគ្រោងនឹងបើកសវនាការស្ដីអំពីបញ្ហាសុខភាពរបស់ជនជាប់ចោទបីនាក់ក្នុងចំណោមបួននាក់នៅក្នុងខែសីហាខាងមុខនេះ នឹងគ្រោងចាប់ផ្ដើមបើកសវនាការពេញអង្គសេចក្ដីនៅក្នុងខែកញ្ញា ឆ្នាំនេះ។ លោកចៅក្រមស៊ើបអង្កេតស៊ីកហ្វ្រ៊ីត ប៊្លុង មានប្រសាសន៍ក្នុងបទសម្ភាសទល់មុខជាមួយនឹងវីអូអេ សំឡេងសហរដ្ឋអាមេរិកជាខេមរភាសាកាលពីថ្ងៃពុធទី២០ ខែកក្កដាថា វិធានផ្ទៃក្នុងបានអនុញ្ញាតឲ្យនាំខ្លួនជនជាប់សង្ស័យមកកាត់ទោសដោយឡែកក្នុងករណីជននោះមានជំងឺ។ «វាជាការត្រឹមត្រូវដែលលោកព្រួយបារម្ភពីបញ្ហាវ័យកាន់តែចាស់ជរារបស់ជនជាប់ចោទ។ ក្នុងករណីចៃដន្យប្រសិនបើជនជាប់ចោទណាម្នាក់មានជំងឺមិនអាចនាំខ្លួនមកកាត់ទោសបាន គឺមានវិធានផ្ទៃក្នុងរបស់តុលាការដែលអាចអនុញ្ញាតឲ្យនាំជនជាប់ចោទមកកាត់ទោសដាច់ដោយឡែកបាន»។ អតីតរដ្ឋមន្ដ្រីការបរទេសខ្មែរក្រហមអៀង សារី អាយុ៨៥ ឆ្នាំជិតឈានចូល៨៦ ឆ្នាំ ត្រូវគេដឹងថា មានជំងឺបេះដូង និងជំងឺឆ្អឹងខ្នង។ អៀង ធិរិទ្ធ ប្រពន្ធរបស់គាត់អាយុ ៧៩ ឆ្នាំ អតីតរដ្ឋមន្ដ្រីសង្គមកិច្ចខ្មែរក្រហម មានជំងឺជង្គង់ ជំងឺភ្នែក និងមានជំងឺគេងមិនលក់។ អតីតបងធំទី២ នួន ជា អាយុ ៨៥ ឆ្នាំ មានជំងឺលើសឈាម និងបញ្ហាភ្នែកខ្លាំង។ ជនជាប់ចោទទាំងបីបានស្នើសុំតាមរយៈក្រុមមេធាវីរបស់ខ្លួនឲ្យអង្គជំនុំជម្រះសាលាដំបូងធ្វើការសម្រេចថា បើផ្អែកលើបញ្ហាសុខភាព តើពួកគេនៅតែត្រូវចូលរួមក្នុងសវនាការកាត់ទោសដែរឬយ៉ាងណា។ លោក ស៊ីកហ្វ្រ៊ីត ប៊្លុង មានប្រសាសន៍ថា សហចៅក្រមស៊ើបអង្កេតបានប្រមូលភស្ដុតាងពីសាក្សីជាង៧.០០០ នាក់ក្នុងសំណុំរឿងទីពីរនេះ រួមទាំងឯកសារចងក្រងចំនួនជាង ១០.០០០ ឯកសារ។ លោកបញ្ជាក់ថា ការកាត់ទោសអតីតមេដឹកនាំកំពូលខ្មែរក្រហមទាំងបួននាក់នឹងក្លាយជាការកាត់ក្ដីដ៏ធំបំផុត និងដ៏ស្មុគស្មាញបំផុតក្នុងប្រវត្តិសាស្ដ្រយុត្តិធម៌ក្នុងប្រទេសកម្ពុជា។ ហើយពិភពលោកនឹងសម្លឹងមើលការកាត់ក្ដីនេះ។ សហចៅក្រមស៊ើបអង្កេតបានទទួលស្គាល់ជនរងគ្រោះជាដើមបណ្ដឹងរដ្ឋប្បវេណីជាង២.០០០ នាក់ក្នុងសំណុំរឿងនេះ។ ក៏ប៉ុន្ដែមេធាវីតំណាងឲ្យដើមបណ្ដឹងរដ្ឋប្បវេណីបានតវ៉ាចង់បានការចូលរួមរបស់ដើមបណ្ដឹងរដ្ឋប្បវេណីច្រើនជាងនេះ។ អង្គបុរេជំនុំជម្រះទើបតែបានសម្រេចកាលពីពេលថ្មីៗនេះទទួលយកដើមបណ្ដឹងរដ្ឋប្បវេណីជាង ១.៧០០ នាក់បន្ថែមទៀត។ លោក ស៊ីកហ្វ្រ៊ីត ប៊្លុង កត់សម្គាល់ថា នេះគឺជាដំណើរការមួយសម្រាប់បំពេញយុត្តិធម៌សម្រាប់ជនរងគ្រោះ។ លោកបានប៉ាន់ប្រមាណថា ការកាត់ទោសក្នុងសំណុំរឿង ០០២ ដ៏មានសារៈសំខាន់នេះត្រូវការពេលវេលាយ៉ាងហោចណាស់ចំនួនពីរឆ្នាំ។ «ផ្អែកតាមបទពិសោធរបស់ខ្ញុំចំនួន៣០ ឆ្នាំមកនេះដែលខ្ញុំធ្លាប់ធ្វើជាចៅក្រម និងរដ្ឋអាជ្ញាការកាត់ទោសរបៀបនេះអាចត្រូវការពេលវេលាចំនួនពីរឆ្នាំ។ តើវានឹងត្រូវការពេលវេលាចំនួនប៉ុន្មាននោះវាអាស្រ័យនឹងកត្តាមួយចំនួនដូចជាយុទ្ធសាស្ដ្ររបស់មេធាវីការពារក្ដី បញ្ហាសុខភាពរបស់ជនជាប់ចោទ និងបញ្ហាសហការរវាងសាក្សីជាដើម។ ប្រសិនបើការកាត់ក្ដីនេះត្រូវការរយៈពេលពីរឆ្នាំ នោះវានឹងបង្ហាញពិភពលោកថា ប្រជាពលរដ្ឋកម្ពុជា និងរដ្ឋាភិបាលរបស់ពួកគេមានភាពម៉ឺងម៉ាត់ក្នុងការកាត់ទោសអ្នកទទួលខុសត្រូវខ្ពស់បំផុតនៃរបបខ្មែរក្រហម»។ លោកសហចៅក្រមស៊ើបអង្កេតស៊ីកហ្វ្រ៊ីត ប៊្លុង មានជំនឿថា នៅចុងបញ្ចប់នៃការកាត់ទោសសំណុំរឿង០០២ នេះនឹងនាំឲ្យមានការផ្សះផ្សាជាតិមួយ។ ជាពិសេសការផ្សះផ្សាដែលកើតឡើងដោយការទទួលកំហុសរបស់ជនជាប់ចោទ និងការសុខចិត្តអត់ឱនទោសដល់ពួកគេពីសំណាក់ជនរងគ្រោះ៕ This posting includes an audio/video/photo media file: Download Now |
| លោកហ៊ុន សែនជំរុញឱ្យមានការចរចាត្រីភាគីរឿងជម្លោះព្រំដែន Posted: 22 Jul 2011 12:51 PM PDT នៅថ្ងៃសុក្រនេះ លោកនាយករដ្ឋមន្ត្រីហ៊ុន សែន បានទទូចឱ្យមានការចរចាត្រីភាគីរវាងប្រទេសកម្ពុជា ប្រទេសថៃ និងប្រទេសឥណ្ឌូនេស៊ី ដើម្បីស្វែងរកវិធីអនុវត្តន៍សេចក្តីសម្រេចរបស់តុលាការយុត្តិធម៌អន្តរជាតិ។ កាលពីថ្ងៃច័ន្ទ តុលាការយុត្តិធម៌អន្តរជាតិបានបញ្ជាឱ្យកម្ពុជានិងថៃដកកងទ័ពចេញពីតំបន់ជម្លោះព្រំដែនជាបន្ទាន់ និងអនុញ្ញាតឱ្យ អ្នកសង្កេតការណ៍អាស៊ានដាក់ពង្រាយនៅក្នុងតំបន់គ្មានកងទ័ពក្បែរប្រាសាទព្រះវិហារ។ លោកនាយករដ្ឋមន្ត្រីហ៊ុន សែន បានថ្លែងប្រាប់សន្និសីទកាសែតនៅទីស្តីការគណៈរដ្ឋមន្ត្រីថាប្រទេសកម្ពុជាសំណូមពរឱ្យចាប់ផ្តើមការចរចាត្រីភាគីដោយក្រុមការងារនៃភាគីទាំងបី ដើម្បីពន្លឿនដំណើការអនុវត្តន៍សេចក្តីសម្រេចរបស់តុលាការទីក្រុងឡាអេ។ «ឥឡូវ ខ្ញុំសូមប្រកាសបើកចំហការចរចាត្រីភាគីរវាងកម្ពុជា ថៃ និងឥណ្ឌូនេស៊ីធ្វើពេលណា កន្លែងណា និងកម្រិតណាក៏បាន។ កម្ពុជាសំណូមពរឱ្យមានការចាប់ផ្តើមដោយក្រុមការងារនៃភាគីទាំងបី គឺក្រុមការងាររបស់ភាគីកម្ពុជា ក្រុមការងាររបស់ភាគីថៃ និងក្រុមការងាររបស់ភាគីឥណ្ឌូនេស៊ី ដើម្បីពន្លឿនដំណើរការ។ យើងអាចចាប់ផ្តើម (ចរចា) ពីលេខាធិការដ្ឋាននៃគណៈកម្មាធិការព្រំដែនទូទៅក៏បាន ហើយដែលអាចក្រុមលេខាធិការដ្ឋានម្ខាងៗអាចនាំមកជាមួយនូវអ្នកច្បាប់ និងអ្នកពាក់ព័ន្ធនិងភាគីទាំងអស់។ ឥណ្ឌូនេស៊ីអាចបញ្ជូនតំណាងមក។ កម្ពុជាសូមទទួលបន្ទុកធ្វើម្ចាស់ផ្ទះប្រជុំតែម្តង ដើម្បីពិភាក្សាអំពីការខិតខំឆ្ពោះទៅរកការអនុវត្តសេចក្តីសម្រេចរបស់តុលាការយុត្តិធម៌អន្តរជាតិថ្ងៃទី១៨ ខែកក្កដា»។ លោកនាយករដ្ឋមន្ត្រីហ៊ុន សែន បានបញ្ជាក់ថាប្រទេសកម្ពុជាបានបញ្ជូនសេចក្តីព្រាងកិច្ចព្រមព្រៀងទៅកាន់ប្រទេសថៃ ប្រទេសឥណ្ឌូនេស៊ីតុលាការយុត្តិធម៌អន្តរជាតិ និងក្រុមប្រឹក្សាសន្តិសុខអង្គការសហប្រជាជាតិ សំដៅអនុវត្តន៍តាមសេចក្តីបញ្ជារបស់តុលាការទីក្រុងឡាអេ ដើម្បីកំណត់តំបន់គ្មានកងទ័ពនៅក្បែរប្រាសាទព្រះវិហារ។ សេចក្តីព្រាងកិច្ចព្រមព្រៀងដែលបានស្នើឡើងដោយប្រទេសកម្ពុជា មានប្រាំពីរចំណុចដែលនិយាយអំពីការដកកងទ័ពចេញពីតំបន់គ្មានកងទ័ពតាមការបញ្ជារបស់តុលាការយុត្តិធម៌អន្តរជាតិ កិច្ចសហប្រតិបត្តិការជាមួយក្រុមអ្នកសង្កេតការណ៍ឥណ្ឌូនេស៊ី និងភាពលម្អិតទៅតុលាការអំពីចំនួនកងទ័ព និងទីតាំងឈរជើងរបស់កងទ័ពនៅក្នុងតំបន់គ្មានកងទ័ព។ សេចក្តីព្រាងកិច្ចព្រមព្រៀងនេះ បានបញ្ជាក់ថាភាគីនីមួយៗត្រូវផ្តល់ព័ត៌មានលម្អិតទៅតុលាការអំពីចំនួន និងទីតាំងឈរជើងរបស់កងទ័ពគិតត្រឹមថ្ងៃទី១៨ ខែកក្កដានៅក្នុងតំបន់គ្មានកងទ័ពជាបណ្តោះអាសន្ន។ ភាគីនីមួយៗត្រូវផ្តល់ព័ត៌មានលម្អិតទៅតុលាការអំពីស្ថានភាពនៃសកម្មភាពមិនមែនយោធាគិតត្រឹមថ្ងៃទី១៨ ខែកក្កដានៅក្នុងតំបន់គ្មានកងទ័ពជាបណ្តោះអាសន្ន។ សេចក្តីព្រាងកិច្ចព្រមព្រៀង បានបន្តថាបន្ទាប់ពីកិច្ចព្រមព្រៀងនេះចូលជាធរមានហើយ ភាគីទាំងពីរស្នើសុំឱ្យមានការចាត់តាំង និងបញ្ជូនអ្នកសង្កេតការណ៍ឥណ្ឌូនេស៊ីជាបន្ទាន់ក្នុងនាមអាស៊ាន។ បន្ទាប់ពីពេលអ្នកសង្កេតការណ៍ឥណ្ឌូនេស៊ីមកដល់ ភាគីទាំងពីរសហការជាមួយអ្នកសង្កេតការណ៍ឥណ្ឌូនេស៊ី ត្រូវកំណត់ទីតាំងលើដីជាក់ស្តែងនៃចំណុចអា បេ សេ និងដេនៃតំបន់គ្មានកងទ័ពជាបណ្តោះអាសន្ន។ សេចក្តីព្រាងកិច្ចព្រមព្រៀងបានបន្ថែមថាដោយសហការជាមួយអ្នកសង្កេតការណ៍ឥណ្ឌូនេស៊ី ភាគីទាំងពីរត្រូវកំណត់កាលវិភាគសម្រាប់ការដកកងទ័ពទាំងអស់របស់ភាគីទាំងពីរជាបន្ទាន់ចេញពីតំបន់គ្មានកងទ័ព។ លោកនាយករដ្ឋមន្ត្រីហ៊ុន សែន បានបញ្ជាក់ថានៅពេលតំបន់ប្រាសាទព្រះវិហារបានក្លាយទៅជាតំបន់គ្មានកងទ័ព ការបង្ហូរឈាមគ្នារវាងប្រទេសកម្ពុជា និងប្រទេសថៃនឹងលែងមានតទៅទៀតហើយ។ «យើងចាប់ផ្តើមធ្វើការដកកងទ័ពនៅម៉ោងជាមួយគ្នា ពេលជាមួយគ្នា ហើយអ្នកសង្កេតការណ៍ឥណ្ឌូនេស៊ីអាចឈរមើល ដើម្បីឱ្យឃើញកងទ័ពនៃភាគីទាំងពីរដកចេញទាំងអស់គ្នា»។ កាសែត បាងកកប៉ុស្តិ៍ បានរាយការណ៍នៅថ្ងៃសុក្រនេះថាលោកនាយករដ្ឋមន្ត្រីថៃ អាភីស៊ីត វីចាជីវ៉ា ដែលជិតចាកចេញពីតំណែង បានទាមទារឱ្យប្រទេសកម្ពុជាដកកងទ័ពចេញពីតំបន់ជម្លោះនៅក្បែរប្រាសាទព្រះវិហារ មុននឹងអ្នកសង្កេតការណ៍ឥណ្ឌូនេស៊ី ចូលទៅកាន់តំបន់នោះ។ មេបញ្ជាការកងទ័ពជើងគោកថៃ ប្រាយុទ្ធ ចាន់អូចា បានបញ្ជាក់ថាកងទ័ពរបស់លោកបានរក្សានៅក្នុងតំបន់ជម្លោះ រហូតដល់មានការចរចារវាងប្រទេសកម្ពុជា និងប្រទេសថៃ, នេះបើតាមកាសែតបាងកកប៉ុស្តិ៍។ កាសែតបាងកកប៉ុស្តិ៍ បានរាយការណ៍ថាមេនគរបាលជាតិថៃ វិចៀន ប្រូតេភស់ស្រ៊ី (Wichean Potephosree) បានទៅមើលតំបន់ព្រំដែនក្នុងខេត្តស៊ីសាកេតកាលពីថ្ងៃព្រហស្បតិ៍ ដើម្បីរៀបចំការដាក់ពង្រាយអង្គភាពល្បាតព្រំដែន ជំនួសកងទ័ពនៅពេលអនាគត ស្របតាមការបញ្ជាឱ្យមានតំបន់គ្មានកងទ័ពរបស់តុលាការយុត្តិធម៌អន្តរជាតិ៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២២ កក្កដា Posted: 21 Jul 2011 09:38 PM PDT ព័ត៌មានចុងក្រោយបំផុត៖ អាស៊ាន៖ លោកស្រី Hillary Clinton រដ្ឋមន្រ្តីក្រសួងការបរទេសសហរដ្ឋអាមេរិកបានសរសើរប្រទេសចិននិងសមាគមអាស៊ានចំពោះការឈោងទៅដល់ការព្រមព្រៀងដំបូងដើម្បីដោះស្រាយជម្លោះដែនដីដោយសន្តិវិធីក្នុងសមុទ្រចិនខាងត្បូង។ ភូមា៖ លោកស្រី Hillary Clinton រដ្ឋមន្រ្តីក្រសួងការបរទេសសហរដ្ឋអាមេរិកបានអំពាវនាវនៅថ្ងៃសុក្រនេះដល់ភូមា ឲ្យដោះលែងអ្នកទោសនយោបាយទាំងអស់ ដោះស្រាយកង្វល់អំពីការរីកសាយអាវុធនុយក្លេអ៊ែរ និងចាប់ផ្តើមសន្ទនាជាមួយលោកស្រី Aung San Suu Kyi មេដឹកនាំគណបក្សប្រឆាំង។ កូរ៉េ៖ ពួកមន្រ្តីកូរ៉េខាងត្បូងនិយាយថា បេសកជននុយក្លេអ៊ែរមកពីប្រទេសកូរ៉េខាងជើងនិងកូរ៉េខាងត្បូងបានធ្វើការចរចានៅថ្ងៃសុក្រនេះនៅខាងក្រៅសន្និសីទសន្តិសុខអាស៊ាននៅកោះបាលីប្រទេសឥណ្ឌូនេស៊ី។ សហរដ្ឋអាមេរិក៖ ការចរចាដ៏ខ្លាំងក្លាកំពុងបន្តធ្វើឡើងក្នុងរដ្ឋធានីវ៉ាស៊ីនតោនស្តីពីកិច្ចព្រមព្រៀងកាត់បន្ថយការចំណាយ និងបញ្ចៀសពីការមិនសងបំណុលដែលសហរដ្ឋអាមេរិកបានជំពាក់យ៉ាងច្រើននោះ។ ចិន៖ មនុស្សយ៉ាងហោចណាស់៤១នាក់ បានស្លាប់ហើយ៦នាក់ទៀតបានរងរបួសនៅថ្ងៃសុក្រនេះ នៅពេលដែលរថយន្តដឹកអ្នកដំណើរផ្ទុកហួសចំណុះ បានឆេះភ្លើងក្នុងតំបន់កណ្តាលនៃប្រទេសចិន។ សហរដ្ឋអាមេរិក៖ បុរសជនជាតិអាមេរិកាំងម្នាក់បានត្រូវកាត់ទោសប្រហារជីវិតចំពោះការសម្លាប់គ្រួសារមួយដែលមានសមាជិកបីនាក់ នៅក្នុងអ្វីដែលគេជឿជាក់ថាជាការប្រហារជីវិតដែលមានការថតកាសែតវីដេអូលើកដំបូងនៅក្នុងសហរដ្ឋអាមេរិកក្នុងរយៈពេលជិតពីរទសវត្សរ៍នេះ។ ក្រិក៖ ប្រទេសក្រិកកំពុងសម្តែងនូវការធូរស្បើយបន្ទាប់ពីការបញ្ចេញកម្មវិធីហិរញ្ញវត្ថុក្នុងគ្រាអាសន្នទី២ដែលបានទទួលការគាំទ្រពីអឺរ៉ុប ក្នុងគោលបំណងបញ្ចៀសមិនឲ្យរដ្ឋាភិបាលទីក្រុង Athens ខកខានមិនបានសងបំណុលដ៏ធំសម្បើម និងធ្វើឲ្យមានស្ថេរភាពដល់រូបិយប័ណ្ណរួមអឺរ៉ុប។ ស៊ែរប៊ី៖ ប្រទេសស៊ែរប៊ីបានធ្វើបត្យាប័ន Goran Hadzic អតីតមេដឹកនាំជនជាតិភាគតិចស៊ែបនៃប្រទេសក្រូអាស៊ីទៅតុលាការឧក្រិដ្ឋកម្មសង្គ្រាមទីក្រុងឡាអេនៃប្រទេសហូឡង់។ ចិន៖ មន្ត្រីជាន់ខ្ពស់ម្នាក់ទៀតរបស់ចិន បានស្ថិតនៅក្រោមការស៊ើបអង្កេតក្នុងរឿងក្តីថ្មីៗបំផុត ពាក់ព័ន្ធនឹងអំពើពុករលួយក្នុងប្រព័ន្ធផ្លូវរថភ្លើង។ <!--AV--> ព័ត៌មាននៅពេលមុននេះ៖ <!--IMAGE-->សូម៉ាលី៖ កម្មវិធីស្បៀងអាហារពិភពលោកនៃអ.ស.ប ឲ្យដឹងថា នៅពេលឆាប់ៗនេះខ្លួននឹងបើកផ្លូវថ្មីមួយចំនួនទៅកាន់តំបន់ខ្លះនៃប្រទេសសូម៉ាលី កំពុងទទួលរងគ្រោះទុរ្ភិក្ស ដែលនៅទីនោះវត្ដមានរបស់ពួកសកម្មប្រយុទ្ធ ធ្វើឲ្យមានការលំបាកទៅដល់មនុស្សកំពុងអត់ឃ្លាន។ លីប៊ី៖ ក្រុមមេដឹកនាំពួកបះបោរលីប៊ី ដែលកំពុងតែទៅធ្វើទស្សនកិច្ចនៅប្រទេសបារាំង និយាយថា បានសុំលោកប្រធានាធិបតី Nicolas Sarkozy ឲ្យផ្ដល់ជំនួយយោធាទៅឲ្យពួកគេដើម្បីឲ្យពួកគេអាចដណ្ដើមយកទីក្រុងទ្រីប៉ូលីមកគ្រប់គ្រង ដែលជាទីក្រុងការពាររឹងមាំរបស់លោកមេដឹកនាំ Moammar Gadhafi ។ ស.រ.អ៖ យានអាវកាសចម្លង Atlantis បានចុះចតយ៉ាងល្អឥតខ្ចោះ ជាការបញ្ចប់បេសកកម្មរយ: ពេល៣០ឆ្នាំរបស់យានអាវកាសចម្លង នៃស.រ.អ។ ស.រ.អ៖ អ្នកនាំពាក្យសេតវិមាននិយាយថា លោកគ្មានការជឿនលឿនអ្វីនឹងរាយការណ៍អំពីការសន្ទនាគ្នាអំពីការកាត់បន្ថយការចំណាយប្រាក់ និងការចៀសវាងការគ្មានប្រាក់សំណងប្រាក់កម្ចីយ៉ាងច្រើនលើសលប់ទេ តែថាស.រ.អនឹងសងប្រាក់បំណុលឲ្យទាន់ពេលវេលា។ ម៉ាឡាវី៖ ប្រធានាធិបតីប្រទេសម៉ាឡាវី បានអំពាវនាវឲ្យមានការស្ងប់ស្ងៀមក្រោយពេលដែលមានមនុស្សយ៉ាងតិច៨នាក់ត្រូវបានសម្លាប់នៅក្នុងការពើបប្រយុទ្ធគ្នា រវាងប៉ូលីស និងក្រុម តវ៉ាប្រឆាំងរដ្ឋាភិបាល។ ស.រ.អ៖ សេចក្ដីប្រកាសដំណឹងរបស់រដ្ឋាភិបាលស.រ.អព្រមានថា ពួកនិយមជ្រុលហួសប្រើអំពើហឹង្សា អាចខំព្យាយាមប្រើអ្នករនុកក្នុងដើម្បីឲ្យអាចធ្វើឲ្យខូចខាតទីកន្លែងទឹក ភ្លើង និងទូរស័ព្ទជាដើម រួមមានរោងចក្រគីមី កន្លែងចំរ៉ាញ់ប្រេង និងរោងចក្រនុយគ្លេអ៊ែរបាន។ ក្រិក៖ ក្រុមមេដឹកនាំអឺរ៉ុបបានអនុម័តលើវិធានការមួយចំនួនមានគោលដៅ ដើម្បីជៀសវាងកុំឲ្យប្រទេសក្រិកគ្មានប្រាក់សំណងប្រាក់បំណុលយ៉ាងច្រើនលើសលប់របស់ខ្លួន ហើយធ្វើឲ្យរូបិយប័ណ្ណអឺរ៉ុបរួមគ្មានលំនឹង។ អាហ្វហ្គានីស្តាន៖ អង្គការអូតង់បានប្រគល់ការត្រួតត្រាផ្នែកសន្ដិសុខខេត្ដ Herat នៅភាគខាងលិចប្រទេសអាហ្វហ្គានីស្តានទៅឲ្យកងកម្លាំងសន្ដិសុខប្រទេសនេះ។ ប៉ាគីស្ថាន៖ រដ្ឋាភិបាលប្រទេសប៉ាគីស្ថាន កំពុងតែតវ៉ាអំពីការចាប់បុរសម្នាក់នៅស.រ.អ ដែលជាប់ចោទក្នុងបទតាំងខ្លួនធ្វើជាភ្នាក់ងារប៉ាគីស្ថាន ដើម្បីជះឥទ្ធិពលលើមាគ៌ានយោបាយរបស់ស.រ.អអំពីដែនដី Kashmir។ ដែនដីនេះជាតំបន់ភ្នំហេមពានដែលមានជម្លោះ ដែលបែងចែករវាងប្រទេសឥណ្ឌា និងប្រទេសប៉ាគីស្ថាន។ ឥណ្ឌា៖ រដ្ឋាភិបាលឥណ្ឌាឲ្យដឹងថា ខ្លួនបានបាញ់បង្ហោះសាកល្បងដោយជោគជ័យកាំជ្រួច ផ្លោងកាជ្រួចថ្មីមានប្រតិកម្មភ្លាមៗមានវង់ប្រតិបត្ដិការណ៍ខ្លី។ ចិន៖ ប្រទេសចិនឲ្យដឹងថា ខ្លួនបានទម្លាយភាពទាល់ច្រកនៅក្នុងបច្ចេកវិទ្យានុយគ្លេអ៊ែរ ដោយបានសាកល្បងម៉ាស៊ីនរ៉េអាក់ទ័រនុយត្រុងរហ័សមួយ។ ស.រ.អ៖ ក្រុមហ៊ុនធ្វើភេសជ្ជ:ធំជាងគេក្នុងពិភពលោកមានការលំបាកកាន់តែខ្លាំងឡើងក្នុងការលក់ឲ្យអតថិជននៅក្នុងប្រទេសអភិវឌ្ឍន៍ ។ ក្រុមហ៊ុន PepsiCO មានទីស្នាក់ការនៅស.រ.អ ដែលធ្វើភេសជ្ជ: Pepsi Cola និង Mountain Dew ឲ្យដឹងនៅថ្ងៃព្រហស្បតិ៍ថា ការលក់ភេសជ្ជ: នៅស.រ.អ ថយចុះក្នុងរយ:ពេលបីខែកន្លងទៅនេះ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
