VOA News: ព័ត៌មាន: “គណបក្សប្រជាជនប្រកាសជំទាស់នឹងករណីពីរទៀតនៅក្នុងសាលាក្តី” plus 2 more |
- គណបក្សប្រជាជនប្រកាសជំទាស់នឹងករណីពីរទៀតនៅក្នុងសាលាក្តី
- ការសិក្សាបង្ហាញថាយុវជនខ្មែរខ្វះចំណេះដឹងពីលទ្ធិប្រជាធិបតេយ្យ
- ព័ត៌មានអន្តរជាតិសង្ខេប៖ ២១ កក្កដា
| គណបក្សប្រជាជនប្រកាសជំទាស់នឹងករណីពីរទៀតនៅក្នុងសាលាក្តី Posted: 21 Jul 2011 12:37 PM PDT គណបក្សប្រជាជនកម្ពុជាកំពុងកាន់អំណាចបានបង្ហាញជំហររបស់ខ្លួននៅថ្ងៃព្រហស្បតិ៍នេះដោយប្រឆាំងចំៗមិនឲ្យមានការកាត់ទោសសំណុំរឿងបន្ថែម០០៣ និងសំណុំរឿង០០៤ដោយសាលាក្ដីខ្មែរក្រហមនោះទេ។ នៅក្នុងសេចក្ដីជូនដំណឹងស្ដីពីលទ្ធផលសន្និបាតគណៈកម្មការកណ្ដាលរយៈពេលពីរថ្ងៃដែលបានបញ្ចប់នៅថ្ងៃនេះ គណបក្សប្រជាជនកម្ពុជាបានថ្លែងថា ខ្លួនគាំទ្រការកាត់ទោសអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យដោយអង្គជំនុំជម្រះវិសាមញ្ញនៅក្នុងតុលាការកម្ពុជា ឬដែលគេស្គាល់ថាជាសាលាក្ដីខ្មែរក្រហមដើម្បីរកយុត្តិធម៌ជូនជនរងគ្រោះកម្ពុជា។ ក៏ប៉ុន្ដែជាមួយគ្នានេះគណបក្សកាន់អំណាចបានឆ្លៀតបញ្ជាក់ថា ការគាំទ្ររបស់ខ្លួនត្រូវផ្អែកលើមូលដ្ឋានសន្ដិភាព ស្ថិរភាព និងការផ្សះផ្សារជាតិដោយស្របទៅតាមទស្សនៈរបស់លោកនាយករដ្ឋមន្ដ្រី ហ៊ុន សែន។ លោកហ៊ុន សែន ដែលបានបញ្ជាក់ប្រាប់លោកអគ្គលេខាធិការអង្គការសហប្រជាជាតិ បាន គីមូន កាលពីខែតុលា ឆ្នាំ២០១០ ថា លោកមិនត្រូវការឱ្យមានការកាត់ទោសជនសង្ស័យបន្ថែមលើសពីជនសង្ស័យដែលត្រូវចាប់ខ្លួនរួចទៅហើយនោះទេ។ លោក ជាម យៀប តំណាងរាស្ដ្រនិងជាសមាជិកគណៈកម្មការអចិន្ដ្រៃយ៍របស់គណបក្សប្រជាជនកម្ពុជាបញ្ជាក់បន្ថែមថាជំហររបស់គណបក្សកាន់អំណាចគឺគាំទ្រទស្សនៈលោកនាយករដ្ឋមន្ដ្រីហ៊ុន សែន។ «យើងត្រូវកាត់ទោសចំពោះតែបុគ្គលដែលដឹកនាំជាន់ខ្ពស់បំផុតនៃរបបខ្មែរក្រហម អញ្ចឹងយើងត្រូវកាត់ទោសតែសំណុំរឿង០០១ និង០០២តែប៉ុណ្ណឹងទេ»។ កាលពីថ្ងៃពុធម្សិលមិញនេះលោកជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភាក៏បានព្រមានជាប្រយោលមិនចង់ឲ្យមានការកាត់ទោសសំណុំរឿងដូចគ្នានេះដែរ។ សំណុំរឿងបន្ថែមដែលគេដឹងក្រៅផ្លូវការថាមានជនជាប់សង្ស័យសរុបចំនួនប្រាំនាក់ ក្នុងនោះមានអតីតមេបញ្ជាការកងទ័ពខ្មែរក្រហមដ៏មានឥទ្ធិពលចំនួនពីររូបគឺលោក ស៊ូ ម៉េត និងលោកមាស មុត។ លោកឡៅ ម៉ុងហៃ អ្នកវិភាគឯករាជ្យកម្ពុជាមានប្រសាសន៍ថា នេះគឺជាការបញ្ជាក់ជំហរឡើងវិញ របស់គណបក្សប្រជាជនកម្ពុជាដើម្បីពង្រឹងជំហររបស់លោក ហ៊ុន សែន ដែលបានបង្ហាញជាសាធារណៈកាលពីពេលមុន ក៏ប៉ុន្ដែជំហរនេះក៏អាចក្លាយជាឧបសគ្គសល់សាលាក្ដីខ្មែរក្រហមផងដែរ។ «នេះកាន់តែរារាំងថែមទៀតហើយក្នុងការធ្វើការស៊ើបអង្កេតជាបន្ដពីសំណាក់តុលាការ»។ សាលាក្ដីខ្មែរក្រហមទើបតែបានកាត់ទោសសំណុំរឿង០០១ ករណីឌុចចប់សព្វគ្រប់មួយជំហានកាលពីខែមិនា កន្លងទៅហើយនៅដំណាក់កាលអង្គជំនុំជម្រះតុលាការកំពូល។ នៅក្នុងពេលនេះសាលាក្ដីខ្មែរក្រហមកំពុងរៀបចំកាត់ទោសនៅក្នុងសំណុំរឿង០០២ បន្ថែមទៀតដែលមានជនជាប់ចោទដែលជាអតីតមេដឹកនាំកំពូលនៃរបបកម្ពុជាប្រជាធិបតេយ្យ គឺនួន ជា ខៀវ សំផន អៀង សារី និងអៀង ធិរិទ្ធ។ ជនសង្ស័យទាំងនេះត្រូវចាប់ខ្លួន និងចោទប្រកាន់ទាក់ទងទៅនឹងការស្លាប់របស់ប្រជាពលរដ្ឋកម្ពុជាយ៉ាងតិច១,៧លាននាក់ ចន្លោះពីឆ្នាំ ១៩៧៥-១៩៧៩។ រហូតមកទល់ពេលនេះភាគីកម្ពុជានៅក្នុងសាលាក្ដីខ្មែរក្រហមនៅមិនទាន់បានបង្ហាញជំហរសហការក្នុងការស៊ើបអង្កេតក្នុងសំណុំរឿង០០៣និង០០៤នៅឡើយទេ។ សូមបញ្ជាក់ថានៅក្នុងការបិទបញ្ចប់សន្និបាតគណៈកម្មការកណ្ដាលរបស់ខ្លួនគណបក្សប្រជាជនកម្ពុជាក៏បានប្រកាសគាំទ្រជាថ្មីម្ដងទៀតចំពោះបេក្ខភាពលោកហ៊ុន សែន ជានាយករដ្ឋមន្ដ្រីនៅក្នុងការបោះឆ្នោតឆ្នាំ២០១៣ និងសម្រាប់ការបោះឆ្នោតតំណាងរាស្ដ្រនៅក្រោយៗទៀត។ លោក ជាម យៀប បញ្ជាក់ថាបេក្ខជនលោកនាយករដ្ឋមន្ដ្រីហ៊ុន សែន មានសារៈសំខាន់និងមានសក្ដានុពលសម្រាប់គណបក្សកាន់អំណាចដោយសារតែលោកមានភាពឈ្លាសវៃ មានបទពិសោធន៍ខ្ពស់និងមានប្រជាប្រិយភាព។ លោក ឡៅ ម៉ុងហៃ មានប្រសាសាន៍ថា ការរក្សាបេក្ខភាពនាយករដ្ឋមន្ដ្រីដដែលៗសម្រាប់គណបក្សឈ្នះឆ្នោត គឺជារឿងធម្មតានៅក្នុងពិភពលោក។ ផ្ទុយទៅវិញលោក កឹម សុខា ប្រធានគណបក្សសិទ្ធិមនុស្សដែលទើបនឹងទទួលរងការទម្លាយឯកសារសន្ទនាជាមួយលោកហ៊ុន សែន បានរិះគន់ថាការតែងតាំងបេក្ខភាពនាយករដ្ឋមន្ដ្រីដដែលៗរបស់លោកហ៊ុន សែន បង្ហាញថាគណបក្សប្រជាជនកម្ពុជាមិនមានគោលការណ៍លទ្ធិប្រជាធិបតេយ្យខ្វះធនធានមនុស្សសម្រាប់ឈរឈ្មោះជាបេក្ខជននាយករដ្ឋមន្ដ្រី៕ This posting includes an audio/video/photo media file: Download Now |
| ការសិក្សាបង្ហាញថាយុវជនខ្មែរខ្វះចំណេះដឹងពីលទ្ធិប្រជាធិបតេយ្យ Posted: 21 Jul 2011 09:09 AM PDT កម្មវិធីអភិវឌ្ឍន៍សហប្រជាជាតិបានឱ្យដឹងនៅថ្ងៃព្រហស្បតិ៍នេះថាយុវជនកម្ពុជាមានការយល់ដឹងតិចតួចណាស់អំពីស្ថាប័នប្រជាធិបតេយ្យនិងតួនាទីរបស់ស្ថាប័ននេះដែលបម្រើឱ្យផលប្រយោជន៍របស់ខ្លួន។ កម្មវិធីអភិវឌ្ឍន៍សហប្រជាជាតិបានសហការជាមួយ BBC World Service Trust នៅក្នុងខែវិច្ឆិកាឆ្នាំ២០១០ ដើម្បីធ្វើសម្ភាសន៍ទល់មុខគ្នាជាមួយយុវជនចំនួន២.០០០នាក់ ដែលមានអាយុចាប់ពី១៥ឆ្នាំទៅ២៤ឆ្នាំ សម្រាប់ការសិក្សាលើចំណេះដឹងអំពីស្ថាប័នប្រជាធិបតេយ្យ និងការចូលរួមបោះឆ្នោត។ ការសិក្សានេះត្រូវបានធ្វើឡើងនៅក្នុងតំបន់ចំនួនប្រាំ រួមមានទីក្រុងភ្នំពេញ តំបន់ទំនាប តំបន់សមុទ្រ តំបន់ទន្លេសាបនិងតំបន់ភ្នំ។ យុវជនកម្ពុជាបច្ចុប្បន្នមានសុទិដ្ឋិនិយមអំពីមាគ៌ាជារួមដែលប្រទេសរបស់ខ្លួនកំពុងធ្វើដំណើរ ប៉ុន្តែពួកគេក៏កំពុងជួបប្រទះនឹងបញ្ហាប្រឈមជាច្រើននៅឡើយក្នុងការទទួលបានឱកាសចូលប្រឡូកក្នុងជីវិតនយោបាយនិងសេដ្ឋកិច្ច-សង្គមកិច្ចរបស់កម្ពុជា។ ចំណេះដឹង និងការយល់ដឹងតិចតួចអំពីដំណើរការប្រជាធិបតេយ្យ និងការលំបាកក្នុងការលើកបញ្ហានានាដែលជាក្តីកង្វល់របស់ពួកគេ គឺស្ថិតនៅក្នុងចំណោមឧបសគ្គទាំងឡាយចំពោះការចូលរួមឱ្យបានទូលំទូលាយរបស់យុវជនក្នុងឋានៈជាពលរដ្ឋក្នុងសង្គម នេះបើតាមការសិក្សាថ្មីមួយរបស់កម្មវិធីអភិវឌ្ឍន៍សហប្រជាជាតិ។ ការសិក្សានេះបានបង្ហាញថាការយល់ដឹងរបស់អ្នកឆ្លើយសំណួរសម្ភាសន៍អំពីស្ថាប័នប្រជាធិបតេយ្យ និងអំពីតួនាទីរបស់ខ្លួនគឺនៅមានកម្រិតទាបនៅឡើយ ជាពិសេសការយល់ដឹងអំពីស្ថាប័នដែលតំណាងឱ្យខ្លួន ដូចជា រដ្ឋសភា និងក្រុមប្រឹក្សាឃុំ-សង្កាត់ជាដើម។ ការសិក្សានេះ បានរកឃើញថាក្នុងចំណោមស្ថាប័នទាំងបី ស្ថាប័នរដ្ឋសភាត្រូវបានគេស្គាល់តិចជាងគេបំផុតដែលមានតែបីភាគបួនប៉ុណ្ណោះធ្លាប់ឮអំពីរដ្ឋសភា ហើយពីរភាគបីមិនដឹងថារដ្ឋសភាធ្វើអ្វីទេ។ ការសិក្សានេះបានបញ្ជាក់ថាយុវជនចំនួន៩២ភាគរយបានឮអំពីក្រុមប្រឹក្សាឃុំ-សង្កាត់ ប៉ុន្តែមួយភាគបីនៃអ្នកដឹង ឬ ស្គាល់ក្រុមប្រឹក្សាឃុំ-សង្កាត់មិនបានដឹងថាក្រុមប្រឹក្សាឃុំ-សង្កាត់ធ្វើអ្វីឡើយ។ ការសិក្សានេះបានរកឃើញថា៥៤ភាគរយនៃអ្នកឆ្លើយសំណួរសម្ភាសន៍ដែលជាអ្នកមានសិទ្ធិអាចបោះឆ្នោតជ្រើសតាំងក្រុមប្រឹក្សាឃុំ-សង្កាត់ឆ្នាំ២០០៧ ពុំបានទៅបោះឆ្នោតទេ និង២១ភាគរយនៃអ្នកមានសិទ្ធិអាចបោះឆ្នោតបានពុំបានចុះឈ្មោះក្នុងបញ្ជីបោះឆ្នោតឡើយ។ លោកស្រីអេលីណា ទីសឆេនកូ (Elena Tischenko) នាយិកាកម្មវិធីអភិវឌ្ឍន៍សហប្រជាជាតិប្រចាំកម្ពុជា បានថ្លែងសន្និសីទកាសែតនៅទីស្នាក់ការកម្មវិធីអភិវឌ្ឍន៍សហប្រជាជាតិថា៖ «យុវជនជាច្រើននាក់ពិបាកស្វែងរកការពន្យល់អំពីតួនាទីរបស់ស្ថាប័នប្រជាធិបតេយ្យដ៏សំខាន់ ដូចជា រដ្ឋសភា»។ ការសិក្សាបានបង្ហាញថាយុវជននៅមានការយល់ដឹងខុសៗគ្នាចំពោះអត្ថន័យនៃពាក្យចំនួនបី គឺ សិទ្ធិមនុស្ស ប្រជាធិបតេយ្យ និងការចូលរួមរបស់ប្រជាពលរដ្ឋ។ យុវជនជាច្រើនដែលធ្លាប់ឮពាក្យទាំងអស់នេះ មិនដឹងថាមានន័យយ៉ាងដូចម្តេចទេ។ លោកស្រី ស៊ៀង លក្ខិណា អ្នកវិភាគកម្មវិធីនៃកម្មវិធីអភិវឌ្ឍន៍សហប្រជាជាតិ បានបញ្ជាក់នៅក្នុងសន្និសីទកាសែតនេះថា៖ «ពួកគេបាននិយាយថាពួកគេធ្លាប់បានឮពាក្យទាំងនេះ ប៉ុន្តែពួកគេមិនអាចឱ្យអត្ថន័យជាក់លាក់ថាពាក្យទាំងនេះមានន័យយ៉ាងដូចម្តេចទេ»។ ការសិក្សានេះបានរកឃើញថាសុវត្ថិភាព សន្តិសុខ និងជីវិតនៅក្នុងសហគមន៍ ជាកង្វល់ចម្បងរបស់យុវជនជាមួយនឹងកង្វល់បន្ទាប់មកទៀត មានដូចជាភាពក្រីក្រ ធនធានធម្មជាតិ វិវាទដីធ្លី និងគ្រោះថ្នាក់ចរាចរណ៍។ បញ្ហាថ្នាក់ជាតិវិញ វិវាទព្រំដែនជាកង្វល់ទីមួយ ហើយក្រៅពីនេះ កង្វល់របស់ពួកគេប្រហាក់ប្រហែលគ្នាទៅនឹងកង្វល់អ្នកឯទៀតដែរ។ លោកស្រីសួន សុវណ្ណ ប្រធានគម្រោងនៃវិទ្យាស្ថានខ្មែរដើម្បីលទ្ធិប្រជាធិបតេយ្យបានបញ្ជាក់ថាបើយុវជនខ្វះការយល់ដឹងពីស្ថាប័ន ប្រជាធិបតេយ្យ វាជាឧបសគ្គដល់ដំណើរការប្រជាធិបតេយ្យ។ «ខ្ញុំយល់ថាបើយុវជនយើងខ្វះការយល់ដឹងពីស្ថាប័នប្រជាធិបតេយ្យនេះ វាអាចធ្វើឱ្យយុវជនយើងមិនសូវបានចូលរួមច្រើនក្នុងការងារកសាងប្រទេសជាតិ ហើយបើសិនជាគាត់អត់មានការយល់ដឹងទេ ដំណើរការប្រជាធិបតេយ្យដូចជាមិនសូវបានជឿនលឿនល្អប្រសើរ»។ លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សប្រចាំទីស្តីការគណៈរដ្ឋមន្ត្រី បានថ្លែងថាយុវជនកម្ពុជាមានការយល់ដឹងច្រើនអំពីប្រជាធិបតេយ្យ និងច្បាប់ពីក្រុមអ្នកច្បាប់ តំណាងរាស្ត្រ និងតំណាងក្រុមប្រឹក្សាឃុំ-សង្កាត់អំពីនីតិវិធីជាច្រើនដើម្បីបង្កើននូវមូលធនបញ្ញា និងការបណ្តុះបណ្តាលអំពីច្បាប់ និងលទ្ធិប្រជាធិបតេយ្យតាមការផ្សព្វផ្សាយរបស់ទូរទស្សន៍នានា។ «ការលើកឡើងនេះ គឺជាផ្នែកមួយនៃទស្សនៈរបស់អង្គការម្ចាស់ជំនួយមួយ ប៉ុន្តែរដ្ឋាភិបាលកំពុងខិតខំពង្រីកការផ្សព្វផ្សាយប្រជាធិបតេយ្យនេះ ហើយយើងគិតថាទៅពេលខាងមុខទៀតនេះ យុវជននឹងមានការយល់ដឹងអំពីប្រជាធិបតេយ្យ សិទ្ធិមនុស្ស និងច្បាប់ទម្លាប់ផ្សេងៗកាន់តែច្រើនលើសពីនេះទៅទៀត»។ ការសិក្សានេះបានបង្ហាញថាបច្ចេកវិជ្ជាប្រព័ន្ធផ្សព្វផ្សាយនានា ដូចជា ទូរទស្សន៍ វិទ្យុ អ៊ីនធឺណិត និងបច្ចេកវិជ្ជាចល័តផ្តល់អត្ថប្រយោជន៍ដល់យុវជន៕ This posting includes an audio/video/photo media file: Download Now |
| ព័ត៌មានអន្តរជាតិសង្ខេប៖ ២១ កក្កដា Posted: 20 Jul 2011 09:24 PM PDT ព័ត៌មានចុងក្រោយបំផុត៖ ស.រ.អ៖ យានអវកាសចម្លងអាទ្លែនធិស៍ (Atlantis) បានហោះចុះយ៉ាងល្អឥតខ្ចោះ ដោយបានកំណត់ទីបញ្ចប់ជាផ្លូវការនូវបេសកកម្មក្នុងរយៈពេល៣០ឆ្នាំរបស់យានអវកាសចម្លងរបស់ស.រ.អ.។ អាស៊ាន៖ រដ្ឋមន្រ្តីការបរទេសពីប្រទេសអាស៊ីបូព៌ានិងអាស៊ីអាគ្នេយ៍បានអំពាវនាវនៅថ្ងៃព្រហស្បតិ៍នេះ សុំឲ្យមានការចាប់ផ្តើមឡើងវិញយ៉ាងឆាប់រហ័សនូវកិច្ចចរចា៦ភាគីស្តីពីកម្មវិធីនុយក្លេអ៊ែររបស់ប្រទេសកូរ៉េខាងជើង។ ស៊ីរី៖ សកម្មជនសិទ្ធិមនុស្សនិយាយថា មានការបាញ់តគ្នាយ៉ាងខ្លាំងនៅក្នុងទីក្រុងហ៊មស៍ (Homs) នៅភាគកណ្តាលនៃប្រទេសនៅពេលដែលកងកម្លាំងសន្តិសុខបន្តការបង្ក្រាបទៅលើក្រុមបាតុករប្រឆាំងនិងរដ្ឋាភិបាល។ ស.រ.អ៖ លោកប្រធានាធិបតីស.រ.អ. បារ៉ាក់ អូបាម៉ា ថ្លែងថា លោកមិនបោះបង់ចោលសេចក្តីសង្ឃឹមរបស់លោកចំពោះអ្វីដែលលោកហៅថា «ការតថ្លៃគ្នាដ៏ធំមួយ»ដើម្បីតំឡើងកម្រិតប្រាក់ដែលស.រ.អ.អាចខ្ចីបរទេសនោះទេ ហើយនៅពេលជាមួយគ្នានោះកាត់បន្ថយប្រាក់បំណុលជាតិយ៉ាងច្រើនផងដែរ។ អឺរ៉ុប៖ មេដឹកនាំនៃប្រទេសអឺរ៉ុបកំពុងជួបប្រជុំគ្នានៅថ្ងៃព្រហស្បតិ៍នេះ ដើម្បីពិភាក្សាអំពីការជួយសង្គ្រោះសេដ្ឋកិច្ចជាលើកទីពីរដល់ប្រទេសក្រិក(Greece)។ មន្រ្តីនិយាយថាផែនការជួយសង្គ្រោះអាចអនុញ្ញាតឲ្យប្រទេសក្រិកធ្លាក់ចូលទៅក្នុងរយៈពេលជាបណ្តោះអាសន្នមួយដែលមិនអាចសងប្រាក់បំណុលរបស់ខ្លួនបាន។ យេមែន៖ យោធាប្រទេសយេមែន (Yemen) និយាយថាកងកម្លាំងរបស់ខ្លួនបានសម្លាប់មេដឹកនាំម្នាក់នៃសាខាអាល់ខៃដានៅក្នុងយេមែន។ <!--AV--> ព័ត៌មាននៅពេលមុននេះ៖ <!--IMAGE-->អសប៖ បានប្រកាសអំពីការអត់អាហារ កើតមានឡើងនៅតំបន់ពីរនៃប្រទេសសូម៉ាលីភាគខាងត្បូង នៅតំបន់អាហ្វ្រិកស្នែងក្របីដែលមានការរាំងស្ងួតដ៏អាក្រក់បំផុតជាច្រើនទសវត្សមកហើយ។ អាហ្វហ្គានីស្ថាន៖ ក្រុមបះបោលអាហ្វហ្គានីស្ថាន បានបើកការវាយប្រហារអត្តឃាតមកលើទីក្រុងសំខាន់ៗ កាលពីថ្ងៃពុធ ទោះបីជាក្រុមចម្រុះកំពុងប្រគល់កិច្ចការត្រួតត្រាសន្ដិសុខមកឲ្យកងកម្លាំងអាហ្វហ្គានីស្ថានក៏ដោយ។ យេម៉ែន៖ មន្ដ្រីយេម៉ែននិយាយថា ការផ្ទុះគ្រាប់បែកពីរថយន្ដនៅតំបន់ផែភាគខាងត្បូង អេដិន បានសម្លាប់ប្រធានប្រតិបត្ដិជាតិអង់គ្លេសម្នាក់ ដោយគេដាក់កំហុសមកលើការវាយប្រហារធ្វើឡើងដោយក្រុម អាល់កៃដា។ ឥណ្ឌា៖ រដ្ឋមន្ដ្រីការបរទេស សរអ ហ៊ីលឡារី គ្លីនតុន បានអំពាវនាវប្រទេសឥណ្ឌាឲ្យប្រើឥទ្ធពលជាមហាអំណាចសេដ្ឋកិច្ច ដើម្បីជួយលើកដម្កើងពាណិជ្ជកម្មទូទាំងតំបន់អាស៊ីកណ្ដាល រាប់ទាំងប្រទេសអាហ្វហ្គានីស្ថាន និងប៉ាគីស្ថាន ដែលជាគូប្រជែងដ៏យូរអង្វែងរបស់ឥណ្ឌា។ ម៉ាឡាវី៖ ប៉ូលីសប្រទេសម៉ាឡាវី បានប៉ះទង្គិចជាមួយក្រុមបាតុករនៅក្នុងទីក្រុងធំៗកាលពីថ្ងៃពុធ បណ្ដាលឲ្យមនុស្សម្នាក់ស្លាប់។ សរអ៖ អ្នកអវកាសអង្គការណាសា ជិះនៅក្នុងយានអវកាស Atlantis កំពុងរៀបចំខ្លួនចុះចតលើដី នៅថ្ងៃព្រហស្សតិ៍ ដែលនឹងបញ្ចប់កម្មវិធីយានអវកាស សរអ អាយុ ៣០ ឆ្នាំនោះ។ អ៊ីរ៉ង់៖ ដោយសារតែអ៊ីរ៉ង់ ប្រឈមមុខនឹងបញ្ហាធ្ងន់ធ្ងរនៃការប្រើប្រាស់គ្រឿងញៀន និង ការរត់ថ្នាំញៀន នាយកទីភ្នាក់ងារប្រឆាំងឆ្នាំញៀនបានចូលទៅចរចាជាមួយមន្ដ្រីថ្នាក់ខ្ពស់ អ៊ីរ៉ង់។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
