VOA News: ព័ត៌មាន: “បទឈប់បាញ់ត្រូវបានធ្វើឡើងនៅព្រំដែនកម្ពុជាថៃ” plus 5 more |
- បទឈប់បាញ់ត្រូវបានធ្វើឡើងនៅព្រំដែនកម្ពុជាថៃ
- រដ្ឋាភិបាលហាមការប្រមូលផ្តុំនៅទិវាពលកម្មអន្តរជាតិ
- សម រង្ស៊ីទាមទារឲ្យហ៊ុនសែនចុះចេញពីតំណែង
- ជនភៀសសឹកយ៉ាងតិច៥០នាក់ធ្លាក់ខ្លួនឈឺចម្លែក
- សាកលវិទ្យាល័យអូហៃយ៉ូនឹងរៀបចំវេទិកាខេមរសិក្សាលើកទី៣
- សក្តានុពលនៃផលប៉ះពាល់របស់ទំនប់នៅទន្លេមេគង្គត្រូវបានបង្ហាញក្នុងភាពយន្តឯកសារ
| បទឈប់បាញ់ត្រូវបានធ្វើឡើងនៅព្រំដែនកម្ពុជាថៃ Posted: 28 Apr 2011 03:20 PM PDT ក្រសួងការពារជាតិកម្ពុជានៅថ្ងៃព្រហស្បតិ៍នេះ បានបញ្ជាក់ថា កម្ពុជា និងថៃ បានព្រមព្រៀងគ្នាឈប់បាញ់មួយអន្លើនៅតាមក្រវ៉ាត់ព្រំដែនដែលមានជម្លោះ នៅក្នុងខេត្តសុរិន្ទ ប្រទេសថៃ និងខេត្តឧត្តមានជ័យ ប្រទេសកម្ពុជា ។ ការវាយប្រយុទ្ធគ្នាអស់រយៈពេលប្រាំពីរថ្ងៃកន្លងមកនេះ បានបណ្តាលឲ្យយោធាទាំងសងខាងយ៉ាងតិចប្រមាណ១៥នាក់ បានស្លាប់បាត់បង់ជីវិត និងប្រមាណជាង៦០នាក់ផ្សេងទៀតបានរងរបួស។ នៅក្នុងសេចក្តីប្រកាសព័ត៌មានរបស់ក្រួសងការពារជាតិកម្ពុជា ដែលបានចេញផ្សាយនៅថ្ងៃ ព្រហស្បតិ៍នេះបានឲ្យដឹងថា បន្ទាប់ពីមានការវាយប្រយុទ្ធគ្នាចំនួនប្រាំពីរថ្ងៃជាប់ៗគ្នា ជំនួបចរចាគ្នាមួយ នៅច្រកអូរស្មាច់រវាងលោកឧត្តមសេនីយ៍ទោ ជា ម៉ន មេបញ្ជាការយោធភូមិភាគទី៤ ខាងភាគីកម្ពុជា និងលោកឧត្តមសេនីយ៍សុវត្ថិឆៃ សាមុតសាខន មេបញ្ជាការយោធភូមិភាគ២ និងលោកឧត្តមសេនីយ៍ វ៉ា វ៉ាលីត មេបញ្ជាការកងពលថ្មើជើងលេខ៦ខាងភាគីថៃ ។ លោកឧត្តមសេនីយ៍ឯកឈុំ សុជាតិ អ្នកនាំពាក្យក្រសួងការពារជាតិ បានឲ្យដឹងថា ភាគីទាំងពីរ បានយល់ព្រមគ្នាថា បញ្ឈប់ការបាញ់គ្នាចាប់ពីពេលនេះតទៅ។ លោក សុជាតិបានប្រាប់វីអូអេខ្មែរនូវកិច្ចព្រមព្រៀងប្រាំមួយចំណុចថា៖ «បញ្ហាទី១ គឺថា បញ្ឈប់ការបាញ់គ្នាចាប់ពេលនេះតទៅ ទី២ កងទ័ពទាំងពីរឈរជើងនៅកន្លែងណា គឺត្រូវតែឈរជើងនៅកន្លែងនោះមិនឲ្យចល័តកម្លាំង។ ចំណុចទី៣ គឺជំរុញឲ្យមេបញ្ជាការជួមុខជួបគ្នា និងបង្កើតឲ្យមានក្រុមទំនាក់ទំនង ដើម្បីស្រួលទាកទង់គ្នាពេលមានសភាពការណ៍ ចំណុចទី៤ ចំពោះបញ្ហាព្រំដែនទុកឲ្យគណៈកម្មការចម្រុះព្រំដែននៃរដ្ឋាភិបាលនៃប្រទេសទាំងពីរដោះស្រាយ ខាង យោធាដោះស្រាយតែបញ្ហាទាក់ទងការឈប់បាញ់ ចំណុចទី៥ បង្កលក្ខណៈឲ្យប្រជាពលរដ្ឋស៊ីវិល បានត្រឡប់ទៅរស់នៅតាមភូមិឋានជាធម្មតាវិញ ដើម្បីបង្កើតការទុកចិត្តគ្នា ចំណុចទី៦ បើកច្រកព្រំដែនឡើងវិញ»។ ការចរចាដើម្បីបញ្ឈប់ការបាញ់គ្នានេះ មិនមែនធ្វើឡើងជាលើកទី១ទេ ចាប់តាំងពីប្រទេស កម្ពុជាមានជម្លោះព្រំដែនជាមួយនឹងប្រទេសថៃតាំងពីឆ្នាំ២០០៨កន្លងមកម្លេះ។ លោកឧត្តសេនីយ៍ឯកឈុំ សុជាតិ បានបញ្ជាក់ថា ភាគីកម្ពុជាបានឯកភាពគ្នាថា ឈប់បាញ់ក៏ ប៉ុន្តែបើភាគីថៃនៅតែបន្តបាញ់មកលើកម្ពុជា កម្ពុជានឹងបន្តការពារបូរណភាពទឹកដី។ កងទ័ពកម្ពុជា និងថៃ កាលពីយប់ថ្ងៃពុធឈានដល់ថ្ងៃព្រហស្បតិ៍នេះ ភាគីទាំងពីរបានវាយប្រយុទ្ធគ្នាលក្ខណៈទ្រង់ទ្រាយធំដដែលនៅតំបន់ប្រសាទតាមាន់ និងប្រាសាទតាក្របី បន្ទាប់ពីមានការវាយប្រយុទ្ធគ្នាជាច្រើនម៉ោង កងទ័ពកម្ពុជាយ៉ាងតិចប្រមាណបីនាក់ត្រូវបានរាយការណ៍មកថា បានរងរបួសស្រាល និងជនស៊ីវិលចំនួនបីនាក់ផ្សេងទៀតទទួលរងរបួស ដែលក្នុងនោះមានកុមារីម្នាក់អាយុបីឆ្នាំផងដែរ។ ចំណែកឯភាគីថៃ ត្រូវបានកាសែតបាងកកប៉ុស្តិ៍ បានដកស្រង់សម្តីមកថា មានទាហានថៃម្នាក់ បានស្លាប់បាត់បង់ជីវិតនៅក្នុងការវាយប្រយុទ្ធគ្នានៅថ្ងៃព្រហស្បតិ៍នេះ។ មន្រ្តីយោធាមួយរូប នៅតំបន់ប្រតិបត្តិការសឹករងខេត្តឧត្តរមានជ័យ ដែលបានផ្តល់សម្ភាសន៍ ដោយផ្ទាល់ជាមួយនឹងវីអូអេខ្មែរនៅប៉ុន្មាននាទីប៉ុណ្ណោះ ក្រោយពីលោកបានរងរបួសជាមួយនឹងមិត្តរួមអាវុធពីរនាក់ផ្សេងទៀត។ លោកបាននិយាយថា លោកបានរងរបួសនៅព្រឹកថ្ងៃព្រហស្បតិ៍នេះ ដោយសារតែថៃបានបាញ់គ្រាប់កាំភ្លើងផ្លោងដាក់។ លោក បញ្ជាក់ថា៖ «ត្រូវដៃ។ ប្រហែលជាម៉ោងប្រាំបីជាង។ កំពុងតែប្រយុទ្ធគ្នា។ ចាប់ពីម៉ោងប្រាំពីររហូតដល់ម៉ោងប្រាំបី ប្រាំបួន ត្រូវរបួសនៅពេលប្រយុទ្ធទល់មុខគ្នាអំបែងវាត្រូវ»។ ចំណែកលោកជុំ សុក អាយុ៥៤ឆ្នាំ ប្រជាពលរដ្ឋនៅភូមិថ្នល់បទ ឃុំគោកមន ស្រុកបន្ទាយអំពិល បានឲ្យដឹងថា លោកបានរងរបូសត្រង់ដៃខាងស្តាំ និងភ្លៅខាងស្តាំ ខណៈពេលដែលលោកកំពុងអង្គុយនៅពីមុខត្រ់ងសេ។ លោកបញ្ជាក់ថា៖ «បាញ់ខ្លាំងរបស់ថៃ។ បាញ់រាប់មិនអស់ទេ។ ត្រូវរបួសបីនាក់។ ត្រូវដៃ។ ត្រូវភ្លៅ។ ត្រូវកៀនភ្នែក។ ធ្លាក់មកគឺស្លុត។ ដល់ស្លុតស្ទាបទៅក៏ឃើញឈាម»។ កងទ័ពកម្ពុជាដែលទទួលរងរបួសស្រាលកំពុងសម្រាក់ព្យាបាលនៅក្នុងមន្ទីរពេទ្យមួយនៅក្នុង ខេត្តឧត្តរមានជ័យ។ ចំណែកឯអ្នកដែលទទួលរងបួសធ្ងន់ធ្ងរ ត្រូវបានបញ្ជូនទៅព្បាបាលនៅក្នុងខេត្ត សៀមរាប៕ This posting includes an audio/video/photo media file: Download Now |
| រដ្ឋាភិបាលហាមការប្រមូលផ្តុំនៅទិវាពលកម្មអន្តរជាតិ Posted: 28 Apr 2011 03:01 PM PDT នៅថ្ងៃព្រហស្បតិ៍នេះ រដ្ឋាភិបាលកម្ពុជាបានចេញសារាចរហាមឃាត់ការដើរដង្ហែក្បួនរបស់កម្មករនៅទិវាពលកម្មអន្តរជាតិ ដើម្បីធ្វើសកម្មភាពតវ៉ាដែលអាចធ្វើឱ្យប៉ះពាល់ដល់សន្តិសុខ និងសណ្តាប់ធ្នាប់សង្គម។ ការប្រារព្វទិវាពលកម្មអន្តរជាតិនឹងត្រូវបានធ្វើនៅថ្ងៃទី១ខែឧសភា ជារៀងរាល់ឆ្នាំ ហើយកម្មករនៅប្រទេសជាច្រើនបាននាំគ្នាដើរដង្ហែក្បួននៅតាមដងផ្លូវ និងបានលើកឡើងពីទុក្ខកង្វល់នានាទាក់ទងនឹងការងារជូនរដ្ឋាភិបាលដោះស្រាយ។ សារាចរនេះត្រូវបានធ្វើឡើងបន្ទាប់ពីសហព័ន្ធសហជីពស៊ីកាដូគ្រោងនឹងដើរដង្ហែក្បួនកម្មករប្រមាណ៣.០០០នាក់ នៅតាមដងផ្លូវក្នុងទីក្រុងភ្នំពេញនៅទិវាពលកម្មអន្តរជាតិ។ លោកនាយករដ្ឋមន្ត្រីហ៊ុន សែន បានថ្លែងនៅក្នុងសារាចរណែនាំថា អង្គការវិជ្ជាជីវៈរបស់កម្មករនិយោជិតចៀសវាងដាច់ខាតនូវការប្រើប្រាស់រូបភាពទិវាពលកម្មអន្តរជាតិនេះ ដើម្បីធ្វើសកម្មភាពទាំងឡាយណាដែលបណ្តាលឱ្យមានផលប៉ះពាល់ដល់សណ្តាប់ធ្នាប់សាធារណៈសង្គម។ លោករ៉ុង ឈុន ប្រធានសហភាពសហជីពកម្ពុជា បានថ្លែងថាលោកនឹងមិនធ្វើការដង្ហែរក្បួននៅទិវាពលកម្មអន្តរជាតិនេះទេ ដោយសារតែគ្មានថវិកា។ ប៉ុន្តែលោកបានហៅសារាចររបស់រដ្ឋាភិបាលថាជាការភ័យខ្លាច និងការបំបិទសេរីភាពជួបប្រជុំ និងសម្តែងមតិ។ លោករ៉ុង ឈុន ថ្លែងថា៖ «ជារៀងរាល់ឆ្នាំ រដ្ឋាភិបាលមិនដែលបានចេញសារាចរបំរាមក្នុងការព្រួយបារម្ភទាក់ទិនទៅនឹងទិវាពលកម្មអន្តរជាតិនេះទេ។ នេះជាការភ័យខ្លាច និងការគំរាមគំហែងរបស់រដ្ឋាភិបាលដល់សិទ្ធិសេរីភាពក្នុងការជួបជុំ និងការបញ្ចោញមតិរបស់ប្រជាពលរដ្ឋខ្មែរ»។ លោក រ៉ុង ឈុន បានបញ្ជាក់ថា លោកបានលើកសំណើប្រាំបួនចំណុចជូនរដ្ឋាភិបាល រដ្ឋសភា ព្រឹទ្ធសភា ដើម្បីជួយដោះស្រាយជូនកម្មកររួមមាន។ សំណើប្រាំបួនចំណុចរួមមាន៖ កំណត់បន្ថែមប្រាក់ឈ្នួលអប្បរមារបស់កម្មករនិយោជិតចំនួន១១២ដុល្លារអាមេរិកក្នុងមួយខែ កាត់បន្ថយម៉ោងធ្វើការពី៤៨ម៉ោងមកត្រឹម៤៤ម៉ោងក្នុងមួយសប្តាហ៍ បញ្ឈប់ការរើសអើងគ្រប់រូបភាពចំពោះសិទ្ធិសេរីភាពសហជីព និងសមាគម និងបង្កើតតុលាការការ ងារឯករាជ្យជាដើម។ លោក បន្តថា៖ «យើងឃើញតម្លៃទំនិញនៅលើទីផ្សារមានការកើនឡើងខ្ពស់ ជាពិសេសតម្លៃប្រេងឥន្ទនៈ ដែលបង្កការលំបាកទៅដល់ជីវភាពរស់នៅ។ ដូច្នេះហើយបានជាយើងលើកស្នើសុំឱ្យរដ្ឋាភិបាលផ្តល់ដំណោះស្រាយអំពីប្រាក់ខែជូនកម្មករ គ្រូបង្រៀន មន្ត្រីរាជការ នគរបាល ទាហ៊ាន ឱ្យមានតុល្យភាពទៅនឹងតម្លៃទីផ្សារដើម្បីឱ្យគាត់រស់នៅក្នុងភាពថ្លៃថ្នូរ។ លោក អាត់ ធន់ ប្រធានសហព័ន្ធសហជីពស៊ីកាដូ បានថ្លែងថា លោកនឹងប្រមូលផ្តុំកម្មករប្រមាណ៣.០០០នាក់នៅសួនច្បារមុខក្រុមប្រឹក្សាអភិវឌ្ឍន៍កម្ពុជា និងដង្ហែក្បួនឆ្លងកាត់ព្រះបរមរាជវាំង ឆ្ពោះទៅកាន់រដ្ឋសភា ដើម្បីនាំយកញត្តិទៅជូនរដ្ឋសភា និងរដ្ឋាភិបាល ឱ្យជួយដោះស្រាយចំណុចខ្វះខាតមួយចំនួនទាក់ទងនឹងសិទ្ធិ និងលក្ខខណ្ឌការងារល្អប្រសើរ។ លោកអាត់ ធន់ ថ្លែងថា៖ «សារាចរនេះបង្ហាញនូវភាពចង្អៀតចង្អល់ដល់ការប្រមូលផ្តុំ និងការដើរដង្ហែក្បួន ប៉ុន្តែទោះបីជាយ៉ាងណាក៏ដោយមកដល់ពេលនេះ ក្រុមការងាររបស់យើងខ្ញុំនៅតែបន្តធ្វើតាមគម្រោងដោយគ្មានការផ្លាស់ប្តូរ។ ការប្រមូលផ្តុំរបស់យើងមិនធ្វើឱ្យប៉ះពាល់ដល់សន្តិសុខ និងសណ្តាប់ធ្នាប់សាធារណៈទេ។ អាជ្ញាធរមានលទ្ធភាពក្នុងការការពារសន្តិសុខ និងសណ្តាប់ធ្នាប់សាធារណៈ។ ខ្ញុំគិតថារដ្ឋាភិបាលមិនគួរឱ្យមានការភ័យខ្លាចទេ»។ លោកនាយករដ្ឋមន្ត្រីហ៊ុន សែន បានបញ្ជាក់ក្នុងសារាចរណែនាំនេះថា ក្រសួងមហាផ្ទៃអគ្គស្នងការនគរបាលជាតិ បញ្ជាការដ្ឋានកងរាជអាវុធហស្ថលើផ្ទៃប្រទេស អាជ្ញាធររាជធានី ខេត្ត និងស្ថាប័នពាក់ព័ន្ធទាំងអស់ត្រូវចាត់វិធានការតាមសមត្ថកិច្ចរបស់ខ្លួនក្នុងការថែរក្សាសន្តិសុខ សុវត្ថិភាពសណ្តាប់ធ្នាប់សាធារណៈក្នុងឱកាសទិវាទពលកម្មអន្តរជាតិឆ្នាំ២០១១នេះ៕ This posting includes an audio/video/photo media file: Download Now |
| សម រង្ស៊ីទាមទារឲ្យហ៊ុនសែនចុះចេញពីតំណែង Posted: 28 Apr 2011 02:48 PM PDT លោក សម រង្ស៊ី ទាមទារឲ្យលោកនាយករដ្ឋមន្ត្រីខ្មែរ លោក ហ៊ុន សែន ចុះចេញពីតំណែង ដោយសារតែលោកអះអាងថា លោកហ៊ុន សែន គ្មានសមត្ថភាពដោះស្រាយជម្លោះជាមួយប្រទេសជិតខាងដោយសន្តិវិធី និងអាចបណ្តាលឲ្យកម្ពុជាបាត់បង់ទឹកដីភាគខាងកើតនិងខាងលិចរបស់ខ្លួនទៅប្រទេសជិតខាង។ កងទ័ពកម្ពុជា និងថៃបានចាប់ផ្តើមបន្តវាយប្រយុទ្ធគ្នាតាមព្រំដែនអស់រយៈពេលមួយសប្តាហ៍ហើយ។ មេដឹកនាំគណបក្សជំទាស់នៃប្រទេសកម្ពុជា គឺលោក សម រង្ស៉ីដែលកំពុងនិរទេសខ្លួនដោយសារបញ្ហាព្រំដែនកម្ពុជាវៀត ណាម បានថ្លែង ក្នុងលិខិតចំហររបស់លោកមួយកាលពីថ្ងៃពុធថា លោកនាយករដ្ឋមន្ត្រីហ៊ុន សែន ត្រូវតែចុះចេញពីដំណែង ដើម្បីឲ្យកម្ពុជាជៀសផុតពីសង្រ្គាម និងការបាត់បង់ទឹកដីដល់ប្រទេសជិតខាងទាំងខាងកើតនិងខាងលិច។ លោកបានហៅរដ្ឋាភិបាលហ៊ុន សែន ថា អសម្មត្ថភាពក្នុងការដោះស្រាយបញ្ហាដោយសន្តិវិធី។ លោក សម រង្ស៊ីបានថ្លែងតាមខ្លឹមសារដើមក្នុងលិខិតពីទីក្រុងបារីសមកថា៖ «បើរដ្ឋាភិបាលលោក ហ៊ុន សែនមិនអាចធ្វើបានដូច្នេះទេ ត្រូវតែរដ្ឋាភិបាលនេះ ចុះចេញពីដំណែង ដើម្បីឲ្យប្រទេសកម្ពុជាជៀសវាងសង្រ្គាម និងការបាត់បង់ទឹកដីទាំងខាងលិច ទាំងខាងកើត»។ ឆ្លើយតបទៅនឹងសេចក្តីថ្លែងនេះ លោកផៃ ស៊ីផានអ្នកនាំពាក្យរបស់រដ្ឋាភិបាលមួយរូបបានបដិសេធការចោទប្រកាន់របស់លោក សម រង្ស៊ី ហើយហៅទង្វើរបស់លោក សម រង្ស៊ីថា ជាការចង់បានការចាប់អារម្មណ៍ និងបង្កើតឱកាសដើម្បីតតាំងជាមួយលោកនាយករដ្ឋមន្ត្រីហ៊ុន សែនដែលមានការគាំទ្រពីប្រជាពលរដ្ឋខ្ពស់ជាងលោក សម រង្ស៊ី។ លោក ស៊ីផាន បានប្រាប់វីអូអេខ្មែរតាមទូរស័ព្ទថា៖ «ហើយទោះជាគាត់មិនទទួលបានការគាំទ្រពីមហាជនដែលជាប្រជាពលរដ្ឋខ្មែរយ៉ាងណាក៏ដោយ ក៏គាត់នៅតែរក្សាភាពតតាំងជាមួយសម្តេចតេជោ។ យើងដឹង ហើយថា សម្តេចតេជោយ៉ាងហោចណាស់៧៦ភាគរយនៃប្រជាពលរដ្ឋកម្ពុជា ហ្នឹងដែលទទួលស្គាល់ ហើយទទួលយល់ព្រមថា លោក ដឹកនាំប្រទេសលើផ្លូវត្រូវ»។ លោក ផៃ ស៊ីផានបានពន្យល់ពីយុទ្ធសាស្ត្ររបស់រដ្ឋាភិបាលត្រួសៗថា៖ ជាមួយប្រទេសថៃ កម្ពុជានៅតែរក្សាបាន និងគ្រប់គ្រងបាននូវស្ថានភាពសមរភូមិក៏ដូចជាផ្នែកការទូត ដែលលោកអះអាងថា កម្ពុជាទទួលបានការសរសើរពីអន្តរជាតិ។ ចំណែកបញ្ហាព្រំដែន ជាមួយនឹងវៀតណាមវិញ លោក ស៊ីផានអះអាងថា កម្ពុជាដោះស្រាយតាមសហសន្តិវិជ្ជមាន ចែងក្នុងរដ្ឋធម្មនុញ្ញកម្ពុជាដែលត្រូវដោះស្រាយតាមច្បាប់ ដែលមិនមែនជាការលើកទ័ពទៅឈ្លានពាននោះទេ។ តែលោក សម រង្ស៉ីថ្លែងដូច្នេះ ដោយយោងថាការមិនព្រមប្រើប្រាស់កិច្ចព្រមព្រៀង ទីក្រុងបារីសឆ្នាំ១៩៩១ ដែលមានបណ្តាប្រទេសមហាអំណាច និងប្រទេសធំៗចំនួន១៨ ជាអ្នកធានាឯករាជ្យភាព អធិតេយ្យភាពកម្ពុជានោះហើយ ដែលនាំឲ្យមានការឈ្លានពានពីប្រទេសជិតខាងទាំងខាងកើតនិងខាងលិច។ លោក សម រង្ស៊ី ចាត់ទុកថា លោកបានបង្កើតជោគជ័យធំមួយដែលដកតម្រុយបង្គោលព្រំដែននៅខេត្តស្វាយរៀង កាលពីឆ្នាំ២០០៩ ដើម្បីឲ្យវៀតណាមដកថយពីការរំលោភទឹកដីកម្ពុជា។ មន្ត្រីវៀតណាម ក៏ដូចជាមន្ត្រីថៃធ្លាប់បដិសេធការចោទប្រកាន់នានារបស់កម្ពុជាដែលថាគេរំលោភបំពានទឹកដីកម្ពុជា។ លោក សម រង្ស៊ីពេលនេះកំពុងគេចខ្លួនពីការកាត់ទោសកំបាំងមុខ ពីបទដកតម្រុយបង្គោលព្រំដែន៕ This posting includes an audio/video/photo media file: Download Now |
| ជនភៀសសឹកយ៉ាងតិច៥០នាក់ធ្លាក់ខ្លួនឈឺចម្លែក Posted: 28 Apr 2011 02:02 PM PDT ជនភៀសសឹកយ៉ាងតិច៥០នាក់ដែលស្នាក់នៅឃុំពង្រ ស្រុកចុងកាល់ ខេត្តឧត្តរមានជ័យ បានធ្លាក់ខ្លួនឈឺជាបន្តបន្ទាប់កាលពីយប់ថ្ងៃពុធនិងឈានដល់ព្រឹកថ្ងៃព្រហស្បតិ៍ ភ្លាមៗបន្ទាប់ពីយោធាកម្ពុជា និងថៃបានព្រមព្រៀងគ្នាលើបទឈប់បាញ់បណ្តោះអាសន្ន។ ក្រុមអ្នកជំងឺនិងគ្រូពេទ្យបានអះអាងថា អាការៈរួមមានការក្អួតចង្អោរ ពិបាកដកដង្ហើម វិលមុខ អស់កម្លាំង និងទន់ដៃទន់ជើង ហើមពោះជាដើម។ ព្រិត្តិការណ៍នេះកើតឡើងចំពោះមនុស្សចាស់ ក្មេង ស្ត្រីផងដែរ។ បច្ចុប្បនពួកគាត់កំពុងសម្រាកព្យាបាលនៅក្នុងមន្ទីរពេទ្យបង្អែកខេត្តឧត្តរមានជ័យ។ អ្នកជំងឺមួយរូបបានថ្លែងប្រាប់វីអូអេខ្មែរ នៅពេលកំពុងសម្រាកក្នុងមន្ទីរពេទ្យប៉ុន្មានម៉ោងក្រោយពីរងគ្រោះបានអះអាងថា លោកធ្លាក់ខ្លួនឈឺដូច្នេះថា លោកមិនដឹងថាមូលហេតុអ្វីពិតប្រាកដទេ តែកើតឡើងក្រោយពីការទទួលទានទឹក។ «បាទអត់មានញ៉ាំអីទេ តែហូបទឹកស្រះនៅវត្តពង្រ។ ជនភៀសខ្លួនមុនៗគាត់មានកើតមុនខ្ញុំទៀតក៏មានដែរបាទ។ ឈឺជាបន្តរបន្ទាប់ក្រោយៗមកបាទ»។ លោកគ្រូពេទ្យ កែវ ស្តើង អនុប្រធានមន្ទីរពេទ្យខេត្តឧត្តរមានជ័យ ដែលកំពុងព្យាបាលអ្នកជំងឺបានថ្លែងប្រាប់វីអូអេខ្មែរថា លោកមិនទាន់ដឹងប្រាកដថាជំងឺនេះកើតពីអ្វីទេ។ លោកមានប្រសាសន៍ថា៖ «ការសន្និដ្នានជំហានដំបូងគឺអាចបណ្តាលមកពីបរិស្ថានជុំវិញ ដូចជាការប្រើប្រាស់ទឹក ហើយគាត់រស់នៅគ្នាច្រើន ហើយក្តៅផងអញ្ចឹងបង្កឲ្យមានអាការៈបែបនេះ»។ ក្រុមគ្រូពេទ្យកំពុងយកឈាមដើម្បីធ្វើពិសោធន៍។ ជនភៀសសឹកដែលគេចចេញពីការវាយប្រយុទ្ធគ្នារវាងកងទ័ពកម្ពុជានិងថៃមួយសប្តាហ៍មកនេះមានរាប់ពាន់គ្រួសារ ហើយដែលរស់នៅរប៉ាត់រប៉ាយតាមភូមិឃុំជាច្រើន។ ពួកគេគ្មានជម្រកសមរម្យ ទឹកស្អាតប្រើប្រាស់ ម្ហូបអាហារគ្រប់គ្រាន់នោះទេ៕ This posting includes an audio/video/photo media file: Download Now |
| សាកលវិទ្យាល័យអូហៃយ៉ូនឹងរៀបចំវេទិកាខេមរសិក្សាលើកទី៣ Posted: 28 Apr 2011 02:25 PM PDT សាកលវិទ្យាល័យអូហៃយ៉ូ (Ohio University) នឹងរៀបចំវេទិកាខេមរសិក្សាលើកទី៣របស់ខ្លួននៅចុងខែមេសានេះ។ វេទិកានេះផ្តល់ឱកាសដ៏កម្រមួយសម្រាប់អ្នកសិក្សាស្រាវជ្រាវអំពីកម្ពុជាដើម្បីចែករំលែកស្នាដៃ និងការរកឃើញរបស់ខ្លួន។ វេទិកាខេមរសិក្សាលើកទី៣ នៅសាកលវិទ្យាល័យអូហៃយ៉ូផ្តល់ឱកាសឲ្យមានការពិភាក្សាអំពីបញ្ហាកម្ពុជា។ នៅក្នុងវេទិកាពីរថ្ងៃដែលនឹងចាប់ផ្តើមពីថ្ងៃទី២៩ មេសានោះ អ្នកសិក្សាស្រាវជ្រាវកម្ពុជា អ្នកសិក្សាអំពីកម្ពុជា និងអ្នកចង់ដឹងអំពីកម្ពុជានឹងជួបជុំគ្នានៅសាលកវិទ្យាល័យអូហៃយ៉ូ ក្នុងទីក្រុងអាថិន (Athens) រដ្ឋអូហៃយ៉ូ សហរដ្ឋអាមេរិក ដើម្បីចែករំលែកគំនិត ស្នាដៃ និងការរកឃើញរបស់ខ្លួន។ បណ្ឌិតគ្រិស្ទីន ស៊ូ (Christine Su) អ្នករៀបចំវេទិកានេះនិយាយថា វេទិកាមានអ្នកចូលរួមចម្រុះទាំងអ្នកសិក្សាស្រាវជ្រាវ និងក្រុមបញ្ញវន្ត ក៏ដូចជាអ្នកចាប់អារម្មណ៍ខាងវប្បធម៌និងសហគមន៍។ «វេទិកាខេមរសិក្សាសំខាន់ណាស់ ពីព្រោះវេទិកានេះជាឱកាសសិក្សាអំពីកម្ពុជាជាពិសេស និយាយអំពីប្រវត្តិសាស្ត្រកម្ពុជា វប្បធម៌កម្ពុជា បញ្ហាថ្មីៗរបស់កម្ពុជា ហើយនឹងជាឱកាសសម្រាប់បុគ្គលិកសិក្សា និងសហគមន៍ដែលប្រហែលមិនបានដឹងច្រើនអំពីកម្ពុជា រៀនពីនិស្សិត និងអ្នកធ្វើបទបង្ហាញ»។ បណ្ឌិត ស៊ូ ប្រាប់វីអូអេខ្មែរ តាមទូរស័ព្ទថា វេទិកានឹងមានប្រធានបទច្រើនចាប់ពីភាសាសាស្ត្រ សំណេរខ្មែរបុរាណ បញ្ហាអ្នករួចជីវិតពីអំពើប្រល័យពូជសាសន៍ ភាពយន្ត ប្រព័ន្ធផ្សព្វផ្សាយនៅកម្ពុជា បញ្ហាឆ្លងកាត់ព្រំដែន ការបញ្ជូនត្រឡប់ទៅប្រទេសវិញដោយបង្ខំ ការបណ្តេញចេញពីលំនៅស្ថានដោយបង្ខំ ការអភិវឌ្ឍ និងនយោបាយកម្ពុជា។ បណ្ឌិត ស៊ូ ថ្លែងថា នឹងមានការបង្ហាញក្បាច់គុណបូរាណខ្មែរល្បុក្កតោ ម្ហូបខ្មែរ និងរបាំបូរាណខ្មែរ បន្ថែមទៅលើឯកសារសិក្សាស្រាវជ្រាវ។ លោក ដន ដ្យេម៉ឺសាន់ (Don Jameson) ជាអតីតអ្នកការទូតអាមេរិក ដែលធ្វើការនៅកម្ពុជាពីឆ្នាំ ១៩៧០ ដល់ ១៩៧៤។ លោកនឹងធ្វើបទបង្ហាញកិច្ចការរបស់លោកមួយ ដែលមានចំណងជើងថា «កម្ពុជានៅលើផ្លូវរលាក់ឆ្ពោះទៅរកការអភិវឌ្ឍ»។ លោកមានប្រសាសន៍ថា វេទិកានេះបង្ហាញអំពីថាតើមានការសិក្សាស្រាវជ្រាវអំពីកម្ពុជាប៉ុន្មាននឹងត្រូវចេញផ្សាយ។ «នៅពេលខ្ញុំទៅទីនោះនៅដើមទសវត្សរ៍១៩៧០ មានសៀវភៅប្រហែលពីរបីក្បាលអំពីកម្ពុជា។ មានតិចណាស់ដែលជាការពិបាកក្នុងការស្វែងយល់អំពីកម្ពុជា និងអ្វីដែលកើតឡើងនៅទីនោះ។ ពេលនេះ មានឯកសារស្រាវជ្រាវ និងសៀវភៅច្រើនត្រូវបានចេញផ្សាយ»។ លោកស្រី ណារិន ដ្យេម៉ឺសាន់ (Narin Jameson) អ្នកនិពន្ធសៀវភៅធ្វើម្ហូបខ្មែរ ដែលមានចំណងជើងថា «ធ្វើម្ហូបតាមរបៀបខ្មែរ» ឬ "Cooking the Cambodian Way" នឹងបង្ហាញរបៀបធ្វើម្ហូបខ្មែរនៅឯវេទិកានោះដែរ។ លោកស្រីបានប្រាប់វីអូអេខ្មែរថា ម្ហូបគឺជាផ្នែកមួយនៃអត្តសញ្ញាណជាតិ។ «ម្ហូបក៏ជាវប្បធម៌ខ្មែរមួយដែរ។ ម្លោះហើយយើងគួរតែបង្ហាញម្ហូបខ្មែរយើងឲ្យគេស្គាល់។ ការបង្ហាញម្ហូបខ្មែរហ្នឹងមានប្រយោជន៍ណាស់ចា៎ ពីព្រោះដើម្បីឲ្យគេស្គាល់ខ្នែរយើងឡើង ព្រោះអីម្ហូបគឺជារឿងមួយសំខាន់ក្នុងជីវិត មនុស្ស»។ អ្នករៀបចំវេទិកាខេមរសិក្សានៃសាកលវិទ្យាល័យអូហៃយ៉ូ ថ្លែងថា វេទិកាទី១ និងទី២ បានទទួលជោគជ័យ ដូច្នេះពួកគេចង់ធ្វើឲ្យវេទិកាខេមរសិក្សានេះក្លាយជាព្រឹត្តិការណ៍ប្រចាំឆ្នាំ៕ This posting includes an audio/video/photo media file: Download Now |
| សក្តានុពលនៃផលប៉ះពាល់របស់ទំនប់នៅទន្លេមេគង្គត្រូវបានបង្ហាញក្នុងភាពយន្តឯកសារ Posted: 28 Apr 2011 09:02 AM PDT ខ្សែភាពយន្តឯកសារមួយស្តីពីគម្រោងសាង់សង់ទំនប់វារីអគ្គីសនីលើដងទន្លេមេគង្គ ត្រូវបានដាក់បញ្ចាំងក្នុងទីក្រុងភ្នំពេញ ដើម្បីបង្ហាញពីផលប៉ះពាល់អវិជ្ជមានធ្ងន់ធ្ងរលើប្រជាសហគមន៍នៅតាមដងទន្លេនេះ ប្រសិនបើទំនប់ត្រូវបានសាងសង់មែននោះ។ ខ្សែវីដេអូឯកសារដែលមានចំណងជើងថា «Where Have All the Fish Gone? Killing the Mekong Dam by Dam» ឬមានន័យជាភាសាខ្មែរថា «តើត្រីទៅណា? ការសម្លាប់ទន្លេមេគង្គដោយទំនប់ម្តងមួយៗ» ត្រូវបានដាក់បញ្ចាំងជាសាធារណៈនៅឯសាកលវិទ្យាល័យបញ្ញាសាស្ត្រក្នុងទីក្រុងភ្នំពេញនៅយប់ថ្ងៃអង្គារ ទី២៦ខែមេសានេះ ដោយមានអ្នកចូលរួមទស្សនាប្រមាណ២០០នាក់ដែលភាគច្រើនសុទ្ធសឹងជានិស្សិតសាកលវិទ្យាល័យ។ ការដាក់បញ្ចាំងខ្សែវីដេអូដែលនិយាយជាភាសាអង់គ្លេសនេះបានធ្វើឡើង បន្ទាប់ពីប្រទេសជាសមាជិកទាំងបួននៃគណៈកម្មការទន្លេមេគង្គគឺថៃ កម្ពុជា វៀតណាម និងឡាវ បានបរាជ័យក្នុងការសម្រេចព្រមព្រៀងគ្នាលើគម្រោងសាងសង់ទំនប់វារីអគ្គីសនីសាយ៉ាបូរីដ៏ចម្រូងចម្រាស់របស់ឡាវនៅក្នុងកិច្ចប្រជុំចុងក្រោយមួយរបស់ប្រទេសទាំងបួនក្នុងទីក្រុងវៀច័ន្ទ កាលពីសប្តាហ៍មុន។ ខ្សែវីដេអូដែលមានរយៈពេលជាង២៣នាទីបង្ហាញពីទំនប់សោវ៉ាន់ (Xiaowan Dam) ដ៏ធំសម្បើមរបស់ចិនដែលត្រូវបានសាងសង់លើដងទន្លេមេគង្គផ្នែកខាងលើ ហើយក៏បង្ហាញពីការតវ៉ារបស់ប្រជាសហគមន៍នៅតាមដងទន្លេមេគង្គ ប្រឆាំងនឹងគម្រោងសាងសង់ទំនប់វារីអគ្គីសនីលើដងទន្លេមេគង្គផ្នែកខាងក្រោមផងដែរ។ ខ្សែវីដេអូដែលត្រូវបានថតនៅក្នុងប្រទេសថៃ ឡាវ កម្ពុជា និងវៀតណាម ដោយចំណាយពេលអស់ជាងបីខែចាប់ពីចុងឆ្នាំ២០១០មកនេះ ក៏លាតត្រដាងតាមរយៈបទសម្ភាសន៍ជាមួយអ្នកជំនាញ និងអ្នកវិទ្យាសាស្ត្រជាច្រើននាក់ អំពីផលប៉ះពាល់អវិជ្ជមានធ្ងន់ធ្ងរមកលើជីវភាពរស់នៅរបស់ប្រជាសហគមន៍ដែលរស់នៅពឹងអាស្រ័យនឹងទន្លេមេគង្គនេះប្រសិនបើទំនប់ដែលបានគ្រោងធ្វើ ពិតជានឹងត្រូវបានសាងសង់មែននោះ។ លោក ថម ហ្វថ្រូព (Tom Fawthrop) ផលិតករភាពយន្តឯកសារនេះ មានប្រសាសន៍នៅក្នុងសម្ភាសន៍ជាមួយវីអូអេខ្មែរ ក្រោយពីការបញ្ចាំងវីដេអូនេះថា លោកផលិតខ្សែភាពយន្តនេះ គឺដើម្បីទាក់ទាញសាធារណៈជនឲ្យយល់បន្ថែមទៀតអំពីផលប៉ះពាល់ដ៏ធំធេងដែលអាចបណ្តាលមកពីគម្រោងសាងសង់ទំនប់វារីអគ្គីសនីលើដងទន្លេមេគង្គក្រោមនេះ។ លោកថ្លែងថា៖ «ការបំផ្លាញទន្លេដ៏អស្ចារ្យបំផុតមួយនៅលើពិភពលោក គ្រាន់តែដើម្បីទាញយកថាមពលអគ្គីសនីនេះនឹងបង្កឲ្យមានការបាត់បង់យ៉ាងធំធេង។ គឺបាត់បង់ធនធានជលផល បាត់បង់បរិស្ថាន និងបាត់បង់ជីវៈចម្រុះ។ ប្រសិនបើទន្លេមេគង្គត្រូវបានបំផ្លាញតាមការប៉ានស្មាន ធនធានជលផលនឹងធ្លាក់ចុះពី៤០%ទៅ៦០%»។ ក្រៅពីទំនប់យ៉ាងតិចចំនួន៨ដែលបានដំណើរការ កំពុងស្ថាបនា និងគ្រោងនឹងសាងសង់នៅលើដងទន្លេមេគង្គផ្នែកខាងលើក្នុងប្រទេសចិន និងភូមានោះ ទំនប់វារីអគ្គីសនីចំនួន១១ទៀតត្រូវបានគ្រោងនឹងស្ថាបនានៅលើទន្លេនេះផ្នែកខាងក្រោមក្នុងប្រទេសឡាវនិងកម្ពុជា។ បច្ចុប្បន្ន គម្រោងទំនប់សាយ៉ាបូរី ដែលជាទំនប់វារីអគ្គីសនីដំបូងគេក្នុងចំណោមគម្រោងទំនប់ទាំង១១លើដងទន្លេមេគង្គក្រោមនេះ កំពុងរង់ចាំការពិភាក្សាសម្រេចពីរដ្ឋាភិបាលទាំងបួនដែលជាសមាជិកនៃគណៈកម្មការទន្លេមេគង្គ។ របាយការណ៍របស់អង្គការទន្លេអន្តរជាតិ (International Rivers) បានបង្ហាញថា ប្រសិនបើទំនប់នឹងត្រូវបានស្ថាបនាមែននោះ ទំនប់សាយ៉ាបូរី ដែលស្ថិតនៅភាគខាងជើងប្រទេសឡាវនឹងធ្វើឲ្យខូចខាតប្រព័ន្ធអេកូឡូស៊ី និងជីវៈចម្រុះនៅក្នុងទន្លេមេគង្គជារៀងរហូតដោយវានឹងធ្វើឲ្យបាត់បង់ពពួកពូជមច្ឆាយ៉ាងតិចចំនួន៤១ប្រភេទដូចជាពូជត្រីរាជទន្លេមេគង្គជាដើម។ លោក ថម ហ្វថ្រូព មានប្រសាសន៍ថា ប្រសិនបើគម្រោងសាងសង់វារីអគ្គីសនីណាមួយនៅតាមដងទន្លេមេគង្គក្រោម ពិតជាលេចចេញជារូបរាងមែននោះ ប្រទេសកម្ពុជានឹងទទួលរងផលប៉ះពាល់ធ្ងន់ធ្ងរជាងគេខាងសន្តិសុខស្បៀង និងជីវជាតិអាហារ ដោយសារប្រជាជនកម្ពុជាភាគច្រើន ទទួលបានជាតិប្រូតេអ៊ីនពីការបរិភោគត្រី។ លោកមានប្រសាសន៍ថា៖ «សេដ្ឋកិច្ចវិទូដែលធ្វើការឲ្យរដ្ឋាភិបាល និងធ្វើការនៅក្នុងក្រសួងនានា មិនបានធ្វើលំហាត់នៅផ្ទះទាល់តែសោះ។ ពួកគេអាចប្រាប់អ្នកថាតើថាមពលអគ្គីសនីប៉ុន្មានដែលយើងអាចទទួលបាន ប៉ុន្តែពួកគេមិនអាចប្រាប់អ្នកថាតើយើងនឹងបាត់បង់ត្រីអស់ប៉ុន្មាននោះទេ។ ហើយអ្នកនយោបាយដែលចង់សាងសង់ទំនប់ដោយសារហេតុផលនយោបាយណាមួយនោះ អាចប្រាបអ្នករាល់គ្នាថា ទំនប់នេះល្អសម្រាប់សុខភាពរបស់អ្នក ប៉ុន្តែតាមការពិត វាអាក្រក់ទៅវិញទេ សម្រាប់សុខភាពរបស់ត្រីសុខភាពរបស់មនុស្ស និងសុខភាពរបស់ប្រជាជាតិទាំងមូល»។ របាយការណ៍វាយតម្លៃផលប៉ះពាល់បរិស្ថានជាយុទ្ធសាស្ត្រនៃគម្រោងសាងសង់ទំនប់វារីអគ្គីសនីនៅតាមដងទន្លេមេគង្គក្រោម បានបង្ហាញថា កម្ពុជាអាចនឹងបាត់បង់បរិមាណត្រីច្រើនជាងគេរហូតដល់ជាង២១០.០០០តោនក្នុងមួយឆ្នាំ ដោយសារឥទ្ធិពលនៃទំនប់វារីអគ្គីសនី។ លោក ទូច ស៊ាងតាណា ប្រធានគណៈកម្មការអភិវឌ្ឍន៍តំបន់ទេចរណ៍ផ្សោតទន្លេមេគង្គនៃទីស្តីការគណៈរដ្ឋមន្ត្រីកម្ពុជា មានប្រសាសន៍ក្រោយពីទស្សនាខ្សែភាពយន្តឯកសារថា គម្រោងសាងសង់ទំនប់វារីអគ្គីសនីនៅតាមដងទន្លេមេគង្គនេះ ក៏អាចនឹងធ្វើឲ្យបាត់បង់ផ្សោតធម្មជាតិផងដែរ។ ផ្សោតទន្លេមេគង្គគឺជាប្រភពទាក់ទាញទេសចរណ៍ដ៏សំខាន់មួយរបស់កម្ពុជា។ លោកថ្លែងដូច្នេះថា៖ «ការសង់ទំនប់នេះ បើសិនជាគេសង់ គឺវានឹងធ្វើឲ្យមានការប៉ះពាល់ធ្ងន់ធ្ងរទៅលើផ្សោតដែលរស់នៅតាមធម្មជាតិ។ ត្រីក៏ដូចគ្នាដែរ ប៉ះពាល់ត្រីក៏ដូចជាប៉ះពាល់ផ្សោតដែរ ព្រោះកាលណាអស់ត្រី ផ្សោតក៏អត់រស់នៅបានដែរព្រោះផ្សោតស៊ីត្រី»។ កញ្ញា អ៊ឹង សិទ្ធារីន និស្សិតសាកលវិទ្យាល័យបញ្ញាសាស្ត្រកម្ពុជា បាននិយាយថា ខ្សែភាពយន្តឯកសារស្តីពីគម្រោងស្ថាបនាទំនប់នៅតាមដងទន្លេមេគង្គនេះ បានផ្តល់សារដ៏សំខាន់មួយអំពីអនាគតដ៏ផុយស្រួយរបស់ទន្លេមេគង្គ ប្រសិនបើទំនប់វារីអគ្គីសនីពិតជាត្រូវបានស្ថាបនា។ កញ្ញាបញ្ជាក់ថា៖ «ប្រសិនបើមានការសាងសង់ដូចវីដេអូដែលបង្ហាញហ្នឹង ខ្ញុំគិតថា អនាគតទន្លេគឺជាទន្លេមួយដែលបាត់បង់ភាពដើមរបស់វា ដែលពុំមានការផ្តល់នូវធនធានធម្មជាតិដូចជាត្រី ដូចជាបរិស្ថានល្អ និងបរិយាកាសដ៏ស្រស់ស្អាតទៀតទេ»។ កញ្ញា សិទ្ធារីន បន្ថែមថា ដូច្នេះ បណ្តាប្រទេសនៅតាមដងទន្លេមេគង្គក្រោម ជាពិសេស កម្ពុជាគួរតែពិចារណា និងថ្លឹងថ្លែងឲ្យបានម៉ត់ចត់អំពីសេចក្តីសម្រេចចិត្តរបស់ខ្លួនថាតើគួរជ្រើសរើសយកមួយណា៖ ត្រីសម្រាប់ប្រជាពលរដ្ឋក្រីក្រ ឬថាមពលអគ្គីសនីដើម្បីឆ្លើយតបទៅនឹងតម្រូវការថាមពលរបស់ខ្លួន៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
