VOA News: ព័ត៌មាន: “កម្ពុជាស្នើសុំឲ្យតុលាការយុត្តិធម៌អន្តរជាតិបកស្រាយសាលក្រមឆ្នាំ១៩៦២” plus 1 more |
| កម្ពុជាស្នើសុំឲ្យតុលាការយុត្តិធម៌អន្តរជាតិបកស្រាយសាលក្រមឆ្នាំ១៩៦២ Posted: 30 Apr 2011 07:24 AM PDT រដ្ឋាភិបាលនៃប្រទេសកម្ពុជាទើបតែបានដាក់បណ្ដឹងមួយទៅកាន់តុលាការយុត្តិធម៌អន្ដរជាតិក្រុងឡាអេប្រទេសហូឡង់ កាលពីថ្ងៃព្រហស្បតិ៍ដើម្បីស្នើសុំឲ្យមានការបកស្រាយលើសាលក្រមសម្រេចប្រគល់ប្រាសាទព្រះវិហារឲ្យប្រទេសកម្ពុជាហើយបានស្នើឲ្យតុលាការនេះចាត់វិធានការជាបន្ទាន់ដើម្បីថែរក្សាប្រាង្គប្រាសាទចំណាស់ជាង៩០០ ឆ្នាំរបស់ខ្មែរ នេះបើយោងតាមសេចក្ដីថ្លែងការណ៍របស់ក្រសួងការបរទេសកម្ពុជាដែលបានប្រកាសឲ្យដឹងនៅថ្ងៃសុក្រនេះ។ បណ្ដឹងធ្វើឡើងបន្ទាប់ពីប្រទេសកម្ពុជានិងប្រទេសថៃបានប្រយុទ្ធគ្នាយ៉ាងខ្លាំងក្លាដោយប្រដាប់អាវុធនៅតាមបណ្ដោយព្រំដែនខេត្តឧត្តមានជ័យកម្ពុជា និងខេត្តសុរិន្ទរបស់ថៃអស់រយៈពេលប្រាំបីថ្ងៃមកហើយ។ ការប្រយុទ្ធគ្នាដែលជាចំណែកមួយត្រូវគេសម្គាល់ឃើញថាបានរីករាលដាលពីជម្លោះនៅប្រាសាទព្រះវិហារ។ នៅក្នុងសេចក្ដីថ្លែងការណ៍របស់ខ្លួន ក្រសួងការបរទេសបានទទូចថា ការចាត់វិធានការជាបន្ទាន់ណាមួយរបស់តុលាការយុត្តិធម៌អន្ដរជាតិ «គឺជាការចាំបាច់ចៀសពុំបាន» ដើម្បីឲ្យមានការឈប់បាញ់គ្នា ជាអចិន្ដ្រៃយ៍រវាងប្រទេសគូជំម្លោះទាំងពីរ។ កាលពីខែមិថុនាឆ្នាំ១៩៦២ តុលាការយុត្តិធម៌អន្ដរជាតិក្រុងឡាអេ បានសម្រេចថាប្រាសាទព្រះវិហារជារបស់ប្រទេសកម្ពុជាដោយបញ្ចប់នូវការប្ដឹងទាមទារយ៉ាងចម្រូងចម្រាស់ពីសំណាក់ប្រទេសថៃ។ ក៏ប៉ុន្ដែប្រទេសថៃ បានសើរើដំបៅចាស់នេះឡើងវិញនៅពេលដែលខ្លួនបានជំទាស់មិនបានសម្រេចចំពោះការដាក់ប្រាសាទព្រះវិហារខ្មែរចូលជាសម្បតិ្តបេតិកភណ្ឌ័ពិភពលោក។ លោក កុយ គួង អនុរដ្ឋលេខាធិការនិងជាអ្នកនាំពាក្យក្រសួងការបរទេសមានប្រសាសន៍ថា ការស្នើសុំរបស់កម្ពុជាឲ្យមានការបកស្រាយលើសាលក្រមក្រុងឡាអេ គឺដើម្បីទាមទារការបញ្ជាក់ច្បាស់លាស់ពីខ្សែបន្ទាត់ព្រំដែន។ «ចំណុចនេះកាលយើងដាក់ស្នើទៅគឺឲ្យបកស្រាយតែរឿងសាលក្រមឆ្នាំ១៩៦២ ដែលសម្រេចឲ្យប្រាសាទព្រះវិហារមកឲ្យខាងកម្ពុជាផ្អែកទៅលើផែនទីដែលទទួលស្គាល់ជាអន្តរជាតិដែលបង្កើតឡើងដោយគណកម្មការបារំាង-សៀម»។ ក៏ប៉ុន្ដែលោក ហង្ស ឆាយ៉ា អនុបណ្ឌិតច្បាប់ផ្នែកបរិដ្ឋានមកពីប្រទេសអូស្ដ្រាលី និងជានាយកប្រតិបត្តិវិទ្យាស្ថានខ្មែរដើម្បីលទ្ធិប្រជាធិបតេយ្យមានប្រសាសន៍ថា សំណើនោះនៅមិនទាន់មានភាពជាក់លាក់នៅឡើយ ហើយកម្ពុជាគួរតែយកមូលដ្ឋានផែនទីដែលទទួលស្គាល់ជាលក្ខណៈអន្ដរជាតិមកដោះស្រាយជម្លោះនេះគឺជាការគ្រប់គ្រាន់។ «ដូចអត់ច្បាស់នៅត្រង់យ៉ាងម៉េច សុំទាមទារឲ្យគេបកស្រាយហ្នឹង។ ខ្ញុំមិនភ្ញាក់ផ្អើលទេ ថាគេឆ្លើយតបមកវិញ គេថាឲ្យយើងពន្យល់បន្ថែមទៀត ពីព្រោះការសម្រេចឆ្នាំ១៩៦២ ច្បាស់ហើយកម្ពុជាឈ្នះ ជឿថាផែនទីណាដែលឆ្នាំ១៩៦២ គេទទួលស្គាល់តែប៉ុណ្ណឹង»។ បណ្ដឹងរបស់ប្រទេសកម្ពុជាដើម្បីស្វែងរកការបកស្រាយសាលក្រមរបស់តុលាការក្រុងឡាអេបានបង្ហាញពីការប្រឹងប្រែងមួយថ្មីទៀតក្នុងការបញ្ចប់ការប្រយុទ្ធគ្នានៅតាមព្រំដែនជាមួយប្រទេសជិតខាងរបស់ខ្លួន។ ការប្រយុទ្ធគ្នាដែលភាគី កម្ពុជាចោទថាគឺជាការរំលោភឈ្លានពានរបស់ប្រទេសថៃហើយដែលគូជម្លោះរបស់ខ្លួនបានរំលោភបទឈប់បាញ់គ្នាជាបន្ដបន្ទាប់បើទោះជាមានការព្រមព្រៀងរួមគ្នាក៏ដោយ។ នៅថ្ងៃនេះ រដ្ឋសភាប្រទេសកម្ពុជា បានថ្កោលទោសការបង្កជម្លោះប្រដាប់អាវុធរបស់ប្រទេសថៃហើយបានអំពាវនាវស្វែងរកអន្ដរាគមន៍ពីសហគមន៍អន្ដរជាតិ៕ This posting includes an audio/video/photo media file: Download Now |
| ការប៉ះទង្គិចគ្នានៅទល់ដែនកម្ពុជា-ថៃមិនប៉ះពាល់ដល់ទេសចរណ៍ទៅកម្ពុជាទេ Posted: 30 Apr 2011 09:27 AM PDT ទោះបីជាប្រទេសកម្ពុជានិងប្រទេសថៃកំពុងតែមានការប្រយុទ្ធគ្នានៅតាមបណ្តាយព្រំដែនយ៉ាងណាក្តីក៏មិនបានបង្កឲ្យមានផលប៉ះពាល់ដល់ទេសចរណ៍នៅក្នុងប្រទេសកម្ពុជានោះទេ។ មន្ដ្រីកម្ពុជានិងភ្នាក់ងារសេវាកម្មផ្នែកទេសចរណ៍អះអាងថាភ្ញៀវទេសចរមកកាន់កម្ពុជានៅបន្តកើនឡើងនៅឡើយ។ មន្រ្តីជាន់ខ្ពស់នៃក្រសួងទេសចរណ៍និងក្រុមហ៊ុនទេសចរណ៏មួយចំនួន បានអះអាងថា ជម្លោះព្រំដែនដែលបាននាំឲ្យមានការបាញ់ប្រយុទ្ធគ្នារវាងកងទ័ពកម្ពុជានិងកងទ័ពថៃអស់រយៈពេលប្រាំបីថ្ងៃមកនេះ មិនបានជះឥទ្ធិពលជាដុំកំភួនដល់ភ្ញៀវទេសចរដែលចូលមកកម្សាន្តក្នុងប្រទេសកម្ពុជានោះទេ។ លោក ថោង ខុន រដ្ឋមន្រ្តីក្រសួងទេសចរណ៍បានប្រាប់ វីអូអេ សំឡេងសហរដ្ឋអាមេរិក នៅថ្ងៃសុក្រនេះថា មានការប៉ះពាល់ដល់លំហូរនៃទេសចរជនជាតិថែមកកាន់ប្រទេសកម្ពុជាដោយសារតែ ការប៉ះទង្គិចនៅតាមព្រំដែនរវាងប្រទេសទាំងពីរ ក៏ប៉ុន្ដែចំនួនភ្ញៀវទេសចរជាទូទៅមានចំនួនកើនឡើងក្នុងអំឡុងពេលនេះ។ «ទោះបីមានបញ្ហាសង្រ្គាមនៅព្រំដែន ភ្ញៀវទេសចរយើងអត់ធ្លាក់ទេជាទូទៅ។ ដោយសារតែវាថយតាមច្រកនេះ វាទៅកើនកន្លែងផ្សេង។ គេអត់ភ័យខ្លាចអ្វីទេជារួម គឺគេដឹងទាំងអស់គ្នាថា អាហ្នឹងជាការប៉ះទង្គិចគ្នានៅព្រំដែនតែស្រុកខ្មែរ គឺមានសន្តិភាព មានសុវត្ថិភាពល្អណាស់។ អញ្ចឹងភ្ញៀវដូចជានៅសៀមរាប គឺអត់មានបញ្ហាធ្លាក់ចុះទេ។ វាធ្លាក់ចុះដោយសារខែនេះ ជាខែវាធ្លាក់ទេ ភ្ញៀវសៀមរាប អត់ឥទ្្ធិពលពីព្រំដែនទេ។ អត់មានទេ តែទេសចរថៃ គឺវាធ្លាក់ វាធា្លក់តាំងពីប៉ះគ្នាដំបូងម៉្លេះ ធ្លាក់ជាង១០%»។ កងទ័ពប្រទេសកម្ពុជានិងកងទ័ពប្រទេសថៃបានប្រយុទ្ធគ្នានៅតាមបណ្ដោយព្រំដែនរួមរវាងខេត្តឧត្តមានជ័យនៅចំណុចប្រាសាទតាក្របីនិងប្រាសាទតាមាន់របស់ខ្មែរឈានដល់ថ្ងៃទី៨ហើយរហូតមកទល់នឹងព្រឹកថ្ងៃសុក្រនេះបើទោះបីជាកងទ័ពជួរមុខនៃប្រទេសជាប់របងគ្នានេះ បានធ្វើកិច្ចព្រមព្រៀងឈប់បាញ់គ្នាកាលពីថ្ងៃព្រហស្បតិ៍ក៏ដោយ។ យោងតាមរបាយការណ៍របស់ក្រសួងទេសចរណ៍បានបង្ហាញឲ្យដឹងថានៅត្រីមាសទីមួយដើមឆ្នាំ២០១១នេះ ចំនួនភ្ញៀវទេសចរចូលមកទស្សនាកម្ពុជាមានចំនួនសរុប៧៧៨.២៥១នាក់ ពោលគឺមានការកើនឡើង១៣.៦ភាគរយបើប្រៀបធៀបទៅនឹងពេលដូចគ្នានៅឆ្នាំ២០១០។ ទេសចរបរទេសដែលបានចូលមកទស្សនាប្រទេសកម្ពុជាកាលពីឆ្នាំ២០១០ មានចំនួនជាង២,៥លាននាក់។ លោកថោង ខុន បញ្ជាក់ថាភ្ញៀវទេសចរបានប្ដូរពីការធ្វើដំណើរតាមច្រកប្រទេសថៃ មក ជាការធ្វើដំណើរតាមច្រកប្រទេសវៀតណាមវិញ។ នៅក្នុងន័យនេះ លោករដ្ឋមន្ដ្រីក្រសួងទេសចរណ៍ បង្ហាញថាលំហូរទេសចរតាមច្រកប្រទេសវៀតណាមបានកើន១៥ភាគរយ ក្នុងនោះដែរ ទេសចរឆ្លងកាត់ប្រទេសសិង្ហបុរី ម៉ាឡេស៊ី កូរ៉េ និងចិនបូករួមទាំងប្រទេសថៃក៏រួមចំណែកក្នុងកំណើននេះដែរ។ ក្រុមហ៊ុនទេសចរណ៍មួយចំនួនដែល វីអូអេ សឡេងសហរដ្ឋអាមេរិកបានទាក់ទងសុទ្ធតែបានអះអាងដូចៗគ្នាថាពុំទាន់មានការប៉ះពាល់ណាមួយដល់ចំនួនភ្ញៀវទេសចរមកកាន់ប្រទេសកម្ពុជាដោយសារតែការប្រយុទ្ធគ្នានៅតាមតំបន់ព្រំដែននោះទេ។ លោក អាង គីមអៀង ប្រធានសមាគមទីភ្នាក់ងារទេសចរណ៍កម្ពុជា បានមានប្រសាសន៍ថាមានភ្ញៀវមួយចំនួនតូចមានការព្រួយបារម្ភបានសាកសួរព័ត៌មានខ្លះៗ ជុំវិញការបាញ់គ្នានេះក៏ប៉ុន្តែពួកគេនៅតែធ្វើដំណើរមកកម្ពុជាដដែលដោយមិនមានការលុបចោលនោះទេ។ «ការប៉ះទង្គិចគ្នាតាមព្រំដែននេះ ខាងសមាគមអត់បានទទួលការរាយការណ៍មកថាមានការលុបដំណើរទស្សកិច្ចមកកម្ពុជាយើងទេ។ ក៏ប៉ុន្តែគេសួរព័ត៌មានថាតើការប៉ះទង្គិចវាប៉ះពាល់ដល់ដំណើរ ទស្សនកិច្ចគេអត់ នៅពេលដែលគេមកទស្សនាហ្នឹងនិងអាចត្រូវបានរំខានដោយការប៉ះទង្គិចហ្នឹង អត់។ គេសួរមកអញ្ចឹងខ្លះៗ គាត់នៅតែបន្តមកសម្រាប់ជនជាតិផ្សេងៗដែលគាត់បានកក់ហើយ»។ ជាមួយគ្នានេះដែរ លោក ឈិន មានគង់ អ្នកគ្រប់គ្រងសេវាកម្មភ្ញៀវទេសចរណ៍នៅក្រុមហ៊ុនទេសចរណ៍ផ្លូវមកកាន់ឥណ្ឌូចិនក៏បានឲ្យដឹងដូចគ្នាទៅនឹងក្រុមហ៊ុនទេសចរណ៍ផ្សេងៗ ដទៃទៀតដែរថាភ្ញៀវទេសចរណ៍ដែលមកលេងប្រទេសកម្ពុជាមិនមានក្រុមណាមួយត្រូវបានលុបចោល ក្នុងអំឡុងពេលមានជម្លោះព្រំដែនប្រទេសកម្ពុជានិងថៃនោះទេ។ លោក បាត សំបូរ ប្រធានសហព័ន្ធសហជីពវិស័យសេវាកម្មទេសចរណ៍កម្ពុជាក៏បានកត់សម្គាល់ដូចគ្នានេះដែរ។ ប្រទេសកម្ពុជានិងប្រទេសថៃមានជម្លោះព្រំដែនជុំវិញប្រាសាទព្រះវិហាររបស់ខ្មែរអស់រយៈពេលជិត៣ឆ្នាំមកហើយ។ នៅដើមឆ្នាំ២០១១នេះមានការវាយប្រហារដោយកម្លាំងយោធានៃប្រទេសទាំងពីរចំនួនពីរលើកគឺ លើកទី១នៅថ្ងៃទី៤រហូតដល់ថ្ងៃទី៧កុម្ភៈ ហើយលើកទីពីរនេះបានចាប់ផ្ដើមពីថ្ងៃទី២២ដល់ថ្ងៃសុក្រទី២៩នេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
