VOA News: ព័ត៌មាន: “ប៉ូលីស វាយបំបែកនិងចាប់ឃាត់ខ្លួនក្រុមអ្នកតវ៉ាបឹងកក់” plus 5 more |
- ប៉ូលីស វាយបំបែកនិងចាប់ឃាត់ខ្លួនក្រុមអ្នកតវ៉ាបឹងកក់
- ពេលត្រឡប់ពីម៉ាឡេស៊ីវិញ ពលការិនីប្រកែកថាមិនមានការរំលោភទេ
- ការប្រឡងសម្រស់ស្រ្តីខ្មែរអាមេរិកាំងលើកទី១ទាក់ទាញការចាប់អារម្មណ៍
- ខ្មែរនៅឡុងប៊ិចអបអរឆ្នាំថោះដោយការដង្ហែរក្បួន
- ជប៉ុនអាចនឹងបន្ថយជំនួយមកកម្ពុជាដោយសារមហន្តរាយរញ្ជួយដី
- សាលាក្រុង ឡូវែល គ្រោងបង្កើតទីក្រុងខ្មែរ ឬភូមិខ្មែរ
| ប៉ូលីស វាយបំបែកនិងចាប់ឃាត់ខ្លួនក្រុមអ្នកតវ៉ាបឹងកក់ Posted: 21 Apr 2011 10:39 AM PDT ប៉ូលីសបានចាប់ខ្លួនអ្នកតវ៉ាបឹងកក់យ៉ាងតិច១១នាក់ខណៈដែលមានអ្នកតវ៉ាបួននាក់ផ្សេងទៀតបានទទួលរងរបួសពីការវាយដុំរបស់ប៉ូលីសនៅក្នុងការបង្ក្រាបដោយអំពើហិង្សានៅថ្ងៃព្រហស្បតិ៍នេះ។ សាក្សី បាននិយាយថា ប៉ូលីសជាង១០០នាក់ប្រដាប់ដោយដំបងឆក់ និងខែល បានសំរុកចូលទៅក្នុងហ្វូងអ្នកតវ៉ាបឹងកក់ដែលមានគ្នាប្រមាណ១០០នាក់ដែលកំពុងឈរតវ៉ាទាមទារសិទ្ធិលំនៅដ្ឋាននិងសិទ្ធិដីធ្លីនៅខាងក្រៅសាលាក្រុងភ្នំពេញ។ អ្នកទាំង១១នាក់នេះ រួមមានក្មេងប្រុសពីរនាក់និងស្ត្រីជាតំណាងអ្នកភូមិបឹងកក់ចំនួនប្រាំបួននាក់ គឺអ្នកស្រី ទេព វណ្ណី អាយុ២៨ឆ្នាំ អ្នកស្រី លី មុំ អាយុ ៤៤ឆ្នាំ អ្នកស្រី រស់ ស្រីនាង អាយុ ៣៧ឆ្នាំ អ្នកស្រី ហេង មុំ អាយុ៤៦ឆ្នាំ អ្នកស្រី កឹម វាន់នី អាយុ ៤៦ឆ្នាំ អ្នកស្រី សុន សុភ័ណ្ណ អាយុ ២៦ឆ្នាំ ឥឡូវកំពុងស្ថិតក្នុងការឃុំឃាំងនៅស្នងការប៉ូលីសក្រុងភ្នំពេញ។ នេះ បើតាមមន្ត្រីអង្គការសិទ្ធិមនុស្សបានប្រាប់ឱ្យដឹង។ អ្នកស្រី ង៉ែត ឃុន អាយុ៧១ឆ្នាំ នៅភូមិ២២ ជាជនរងគ្រោះក្នុងការបង្ក្រាបរបស់ប៉ូលីស បាននិយាយយ៉ាងដូច្នេះថា៖ «គេវាយខ្ញុំត្រូវបែកក្បាលនិងត្រូវដៃហើម។ ពួកប៉ូលីសវាយខ្ញុំនឹងដំបងឆក់ ដាក់ខ្ញុំមួយដំបងហើយ ហើយថែម មួយដំបងទៀត។ ខ្ញុំរងដៃ ត្រូវដៃ។ ខ្ញុំទៅតវ៉ាដើម្បីតែផ្ទះរបស់ខ្ញុំ ហើយស្រាប់តែយកកម្លាំងមកវាយធ្វើបាបខ្ញុំអញ្ចឹង។ ខ្ញុំចាស់ហើយ ខ្ញុំមានកម្លាំងណាទៅវាយអ្វីឈ្នះវា»។ អង្គការសិទ្ធិមនុស្សក្នុងស្រុកបានចេញសេចក្តីថ្លែងការណ៍ថ្កោលទោសការវាយដំនិងការចាប់ខ្លួនអ្នកតវ៉ាបឹងកក់ចំពោះការប្រើអំពើហិង្សារបស់សមត្ថកិច្ចចម្រុះដែលបានវាយបង្ក្រាបទៅលើអ្នកភូមិរងគ្រោះបឹងកក់ ដោយគ្រាន់តែធ្វើការទាមទារតវ៉ាដោយអហិង្សានៅមុខសាលាក្រុងភ្នំពេញ។ លោកចាន់ សាវ៉េត ប្រធានផ្នែកឃ្លាំមើលស្ថានភាពសិទ្ធិមនុស្សនៃសមាគមសិទ្ធិមនុស្ស អាដហុក បានថ្លែងថា អាជ្ញាធរ បានប្រើកម្លាំងបាយខ្លាំងជ្រុលពេកទៅលើអ្នកតវ៉ាបឹងកក់។ «យើងមើលឃើញកម្លាំង ប្រដាប់អាវុធទៅបង្ក្រាបក្រុមអ្នកតវ៉ាដោយសន្តិវិធី។ វាខុសពីធម្មតា ដែលយើងចាត់ទុកថាជាការរំលោភសិទ្ធិមនុស្សធ្ងន់ធ្ងរ ជាពិសេសគាត់អត់បានគិតពីមនុស្សជាតិដែលមានសេចក្តីត្រូវការនិងទាមទារឱ្យមានការដោះស្រាយដ៏យុត្តិធម៌នោះ។ យើងចាត់ទុកថាទង្វើនៃការប្រើអំពើហិង្សាគឺជាអំពើខុសច្បាប់និងជាការរំលោភសិទ្ធិមនុស្ស»។ លោកអ៊ូ វីរៈ ប្រធានមណ្ឌលសិទ្ធិមនុស្សកម្ពុជា បានបញ្ជាក់ក្នុងសេចក្តីថ្លែងការណ៍ថានេះជារឿងតក់ស្លុតនិងការឆ្លើយតបយ៉ាងអយុត្តិធម៌ចំពោះការតវ៉ាដោយសន្តិវិធីរបស់ប្រជាពលរដ្ឋបឹងកក់លែងឱ្យមានសេរីភាព ហើយការចាប់ខ្លួនកូនក្មេងនិងការវាយដំមនុស្សចាស់បង្ហាញនូវការធ្លាក់ចុះថ្មីមួយ ក្នុងអ្វីដែលបានខំប្រឹងប្រែងតស៊ូនឹងរឿងជម្លោះដីធ្លី។ សមាគមសិទ្ធិមនុស្សអាដហុកបានអំពាវនាវដល់រដ្ឋាភិបាលនិងសាលាក្រុងភ្នំពេញឱ្យបញ្ឈប់ជាបន្ទាន់នូវការប្រើអំពើហិង្សានិងឱ្យដោះលែងអ្នកតវ៉ាបឹងកក់និងបញ្ឈប់ការតាមចាប់ខ្លួនអ្នកភូមិដទៃទៀតហើយបន្តយន្តការដោះស្រាយទំនាស់នេះដោយសន្តិវិធី។ លោកចាន់ សាវ៉េត បានថ្លែង ក្រោយពីជំនួបរវាងក្រុមមន្ត្រីសិទ្ធិមនុស្សជាមួយលោកកែប ជុតិមា អភិបាលក្រុងភ្នំពេញ ថាសាលាក្រុង ភ្នំពេញនឹងពិចារណាដោះលែងអ្នកទាំង១១នាក់នៅថ្ងៃស្អែកបើពួកគាត់ទទួលស្គាល់នូវអ្វីដែលបានធ្វើខុស៕ This posting includes an audio/video/photo media file: Download Now |
| ពេលត្រឡប់ពីម៉ាឡេស៊ីវិញ ពលការិនីប្រកែកថាមិនមានការរំលោភទេ Posted: 21 Apr 2011 10:06 AM PDT អតីតពលការិនីនៅប្រទេសម៉ាឡេស៊ីបានច្រានចោលនៅថ្ងៃព្រហស្បតិ៍នេះនូវការអះអាង របស់ខ្លួនកាលពីលើកមុនថាខ្លួនបានទទួលរងការរំលោភបំពានផ្លូវភេទនៅក្នុងពេលដែលកំពុងបម្រើការនៅក្រៅប្រទេស។ ការបកស្រាយឡើងវិញបានធ្វើឲ្យមន្រ្តីឃ្លាំមើលការរំលោភសិទ្ធិមនុស្សមានការភ្ញាក់ផ្អើល ហើយមន្រ្តីគណបក្សជំទាស់ចាត់ទុកថា ពលការិនីរូបនេះទទួលរងនូវការកៀបសង្កត់។ អ្នកស្រីអ៊ុក សេង អាយុ២៧ឆ្នាំ មកពីខេត្តស្វាយរៀង ត្រូវម្តាយរបស់នាងអះអាងថាបានទទួល រងការរំលោភបំពានផ្លូវភេទចំនួនពីរដង កាលពីខែមីនាឆ្នាំ២០១១ ដោយថៅកែរបស់នាងនៅប្រទេស ម៉ាឡេស៊ី។ ម្តាយរបស់នាង គឺអ្នកស្រី ស្រី សុផល បានប្រាប់ក្រុមអ្នកកាសែតដែលរៀបចំដោយលោកស្រី មូរ សុខហួរ តំណាងរាស្រ្តគណបក្សជំទាស់សម រង្ស៊ី កាលពីដើមខែមេសា ថា កូនស្រីរបស់អ្នកស្រី បានទូរស័ព្ទមកពីប្រទេសម៉ាឡេស៊ីស្វែងរកជំនួយ លាយឡំជាមួយ នឹងការយំសោកប្រកបទៅដោយ ការភ័យខ្លាចអ្នកស្រីអះអាងថា កូនរបស់អ្នកស្រីទទួលរងការធ្វើទារុណកម្ម និងខ្វះអាហារគ្រប់គ្រាន់។ នៅក្នុងសន្និសីទកាសែត ក្នុងទីក្រុងភ្នំពេញ ដែលរៀបចំដោយប៉ូលីសក្រសួងមហាផ្ទៃ អ្នកស្រី អ៊ុក សេង ដែលទើបមកពីប្រទេសម៉ាឡេស៊ី បានច្រានចោលសេចក្តីអះអាងខាងលើទាំងស្រុង។ អ្នកស្រីនិយាយថា អ្នកស្រី និងម្តាយរបស់អ្នកស្រី បានព្រមព្រៀងគ្នាធ្វើការភូតកុហកប្រឌិតនូវព័ត៌មានអំពីការចាប់រំលោភនិងការធ្វើទារុណកម្ម ដោយសារអ្នកស្រីនឹកកូននិងចង់វិលត្រឡប់មកប្រទេសកម្ពុជាវិញ។ «ខ្ញុំសូមជម្រាបជូនថា អត់មានអ្នកណាចាប់រំលោភខ្ញុំទេ។ គឺជាពាក្យមិនពិត»។ សូមបញ្ជាក់ថាម្តាយរបស់អ្នកស្រីអ៊ុក សេង គឺអ្នកស្រី ស្រី សុផល ធ្លាប់បានប្រកាសប្រាប់ក្រុមអ្នកកាសែតយ៉ាងរឹងមំាំថា កូនរបស់អ្នកស្រីពិតជាទទួលរងនូវការរំលោភដោយថៅកែរបស់នាងមែន។ លោកស្រីបានប្រកាសនាពេលនោះថា៖ «សូមមេត្តាជួយរំដោះកូនខ្ញុំឲ្យបានមកស្រុកខ្មែរវិញក្នុងពេលឆាប់ៗពីព្រោះកូនខ្ញុំភ័យណាស់។ យំ ស្រែកមកគឺមានការលំបាកភ័យហើយខ្លាចអ្នកដែលចាប់រំលោភវាយកថ្នាំមកឲ្យលេប ថាមិនដឹង ថ្នាំអ្វីមិនស្គាល់។ ខ្លាចវាឲ្យលេបថ្នាំញៀន ថ្នាំអ្វីទៅវង្វេង វង្វាន់មិនដឹងអ្វី ភ័យឮសំឡេងកូនស្រែក ទ្រហោយំមក ខ្ញុំសឹងសន្លប់ហើយ។ ឮពេញពិភពលោកអស់ទៅហើយនៅតែក្រុមហ៊ុនពីម្សិលមិញ គំរាមខ្ញុំថាប្រយ័ត្នតែរឿងហ្នឹងមិនពិតគេប្តឹងបកវិញ»។ ក៏ប៉ុន្តែក្រោយមកអ្នកស្រី ស្រី សុផល បានលើកឡើងថា អ្នកស្រីបានស្តាប់ច្រឡំនៅក្នុងការ និយាយទូរស័ព្ទជាមួយកូនស្រីរបស់អ្នកស្រីពីប្រទេសម៉ាឡេស៊ី។ សេចក្តីអះអាងនោះ បានធ្វើឡើងនៅក្នុងសន្និសីទកាសែត ដែលរៀបចំដោយប៉ូលីសក្រសួង មហាផ្ទៃនៅមុនពិធីបុណ្យចូលឆ្នាំខ្មែរ។ នៅថ្ងៃនេះដែរ អ្នកស្រី ស្រី សុផល ដែលមានវត្តមាននៅក្នុងសន្និសីទកាសែតរៀបចំដោយ ប៉ូលីសក្រសួងមហាផ្ទៃជាលើកទី២នេះដែរបាននិយាយច្រានចោលសេចក្តីអះអាងអំពីការរំលោភ ផ្លូវភេទទៅលើកូនស្រីរបស់អ្នកស្រីជាថ្មីម្តងទៀត។ លោកស្រីមូរ សុខហួរ តំណាងរាស្រ្តគណបក្សសម រង្ស៊ី ជឿថាម្តាយនិងកូនដែលជាអតីតពល ការិនីកម្ពុជានៅប្រទេសម៉ាឡេស៊ី បានទទួលរងការកៀបសង្កត់។ «ចំពោះខ្ញុំ គឺមានការរំលោភកើតឡើង ហើយមានការបង្ខំមិនឲ្យជនរងគ្រោះនិយាយការណ៍ពិត»។ ជាមួយគ្នានេះដែរ លោកអំ សំអាត ប្រធានការិយាល័យគ្រប់គ្រងបច្ចេកទេសស៊ើបអង្កេតរបស់ អង្គការការពារសិទ្ធិមនុស្ស LICADHO ចាត់ទុកថា ការបដិសេធរបស់អ្នកបម្រើនៅតាមផ្ទះនៅប្រទេស ម៉ាឡេស៊ី គឺជាប្រការគួរឲ្យសង្ស័យ។ «បើសិនជា មិនមានរឿងរ៉ាវកើតឡើងទេ សំណួរ ដែលឆ្ងល់ ហេតុអ្វី បានជាគេឲ្យកូនគាត់ត្រឡប់ មកវិញ»។ ដោយឡែកលោក ជាវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិ ជនរបស់ក្រសួងមហាផ្ទៃ មានប្រសាសន៍ថា លោកនឹងបន្តធ្វើការស៊ើបអង្កេតទៅលើករណីនេះជា បន្ថែមទៀត។ លោកប៊ុន ហាក់ ប្រធានភ្នាក់ងារសមាគមជ្រើសរើសពលករកម្ពុជា បានមានប្រសាសន៍ជំនួស ឲ្យក្រុមហ៊ុនចំប៉ាមែនផូវ័រ ដែលជាក្រុមហ៊ុនជ្រើសរើសអ្នកស្រីអ៊ុក សេង ទៅធ្វើការនៅប្រទេសម៉ាឡេ ស៊ី នោះ ថាក្រុមហ៊ុន នឹងមិនធ្វើការប្តឹងផ្តល់ប្រឆាំងទៅ និងអ្នកស្រីអ៊ុក សេង ទេ ទោះបីជាមានការអះ អាងអំពីការបំភ្លៃភូតកុហកនេះក៏ដោយ។ មានពលការិនីកម្ពុជាដែលកំពុងតែបម្រើនៅតាមផ្ទះនៅប្រទេសម៉ាឡេស៊ី យ៉ាងតិចចំនួន ៣០.០០០ នាក់នៅក្នុងពេលបច្ចុប្បន្ននេះ។ សេចក្តីរាយការណ៍ជាច្រើន បានលើកអំពីការរំលោភបំពានទៅលើពួកគេនៅទីនោះ ហើយ យ៉ាងហោចណាស់ មានពលការិនីចំនួនពីរនាក់ បានស្លាប់នៅមណ្ឌលរបស់ក្រុមហ៊ុនជ្រើសរើសពល ករនៅដើមឆ្នាំ២០១១នេះ មុននឹងពួកគេចេញដំណើរទៅប្រទេសម៉ាឡេស៊ី៕ This posting includes an audio/video/photo media file: Download Now |
| ការប្រឡងសម្រស់ស្រ្តីខ្មែរអាមេរិកាំងលើកទី១ទាក់ទាញការចាប់អារម្មណ៍ Posted: 21 Apr 2011 06:48 AM PDT ការប្រឡងសម្រស់ស្រ្តីខ្មែរអាមេរិកាំងតំបន់ជុំវិញរដ្ឋធានីវ៉ាស៊ីនតោន លើកទី១ត្រូវបានរៀបចំឡើងដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ នៅវត្តពុទ្ធិការាម រដ្ឋមែរីលែនដ៍ (Maryland) សហរដ្ឋអាមេរិកនៅថ្ងៃអាទិត្យ ទី១៧ខែមេសាឆ្នាំ២០១១។ ពិធីប្រឡងសម្រស់ស្រី្តខ្មែរអាមេរិកាំងមានបេក្ខនារី១០រូបចូលរួម ដែលមានអាយុពី១៥ឆ្នាំដល់២២ឆ្នាំ។ ចំណាត់ថ្នាក់លេខ១បានទៅកញ្ញា នីន ដេកា (Nine Deka) អាយុ ១៩ ឆ្នាំ មកពីទីក្រុង Arshburn រដ្ឋវីឌ្យីញៀ លេខ២ បានទៅកញ្ញា អាស៊្លី ប៉ាក (Ashley Pak) អាយុ ១៥ ឆ្នាំ មកពីទីក្រុងAlexandria រដ្ឋវីឌ្យីញៀ និងលេខ៣ បានទៅកញ្ញា តាំង ឌីណា (Tang Dina) អាយុ ១៥ ឆ្នាំ មកពីទីក្រុង ហ្វ្រិឌ័រិក (Frederick) រដ្ឋម៉ារីលែដ៍។ ការប្រកួតមានពីរវគ្គ ដោយវគ្គទី១ តម្រូវឲ្យអ្នកចូលរួមទស្សនាជ្រើសរើសតាមរយៈការបោះឆ្នោតរើសយកបីរូប។ បន្ទាប់មកគណៈកម្មការសួរសំណួរដើម្បីផ្តល់ចំណាត់ថ្នាក់លេខ ១ លេខ ២ និងលេខ ៣។ សំណួរដែលធ្វើឲ្យកញ្ញា នីន ដេកា ទទួលជាជ័យលាភីចំណាត់លេខ១ នោះគឺ «តើនិយមន័យរបស់អ្នក អំពីពាក្យថា ជោគជ័យគឺជាអ្វី? តើអ្នកអាចគិតឃើញទេថា នៅក្នុងកាលៈទេសៈណាដែលជោគជ័យអាចមានផលប៉ះពាល់អវិជ្ជមានដល់មនុស្ស?» កញ្ញា នីន ដេកា ឆ្លើយសំណួររបស់គណៈកម្មការមេប្រយោគដូច្នេះថា៖ «ខ្ញុំជឿថា ជោគជ័យគឺនៅពេលដែលអ្នកបរាជ័យហើយរៀនអំពីបរាជ័យនោះ។ ពេលនោះ អ្នកនឹងមានភាពរីកចម្រើន ហើយអ្នកនឹងក្លាយជាមនុស្សប្រសើរជាងមុន។ កាលៈទេសៈដែលជោគជ័យមិនមែនជារឿងល្អនោះគឺនៅពេលដែលអ្នកតែងតែឈ្នះ ដែលនាំឲ្យអ្នកមានមោទនភាពខ្លួនឯងជ្រុល ដែលជាកត្តានាំឲ្យមានអត្តចរិតមិនល្អ។ សូមអរគុណ»។ កញ្ញា នីន ដេកា បានប្រាប់វីអូអេថា នាងមានមោទនភាព និងរីករាយដែលត្រូវបានជ្រើសរើសជាជ័យលាភីបវរកញ្ញាឯកខ្មែរអាមេរិកាំង ហើយនាងនឹងបរិច្ចាកប្រាក់រង្វាន់ដែលមានចំនួន៥០០ដុល្លារទៅឲ្យសមាគម កូនស្រី ដែលជួយដល់ស្រ្តីរងគ្រោះដោយសារការជួញដូរផ្លូវភេទ។ ចំណែកកញ្ញា ព្រំ ពិសី ដែលជាបេក្ខនារីដែលបានចូលប្រឡងដែរនោះ បានប្រាប់វីអូអេខ្មែរបន្ទាប់ពិធីប្រកួតនោះចប់ថា កញ្ញាត្រេកអរដែលបានចូលរួមក្នុងពិធីប្រឡងសម្រស់ស្រ្តីខ្មែរអាមេរិកាំងនេះ ទោះបីមិនបានជាប់ចំណាត់ថ្នាក់ក្នុងចំណោមបីនាក់ចុងក្រោយក្តី។ «ប៉ារបស់ខ្ញុំបានប្រាប់ខ្ញុំថា ការប្រឡងគឺតែងមានចាញ់មានឈ្នះ ប៉ុន្តែទោះបីជាខ្ញុំជាប់ឬមិនជាប់ក៏មិនជាអ្វីដែរ ពីព្រោះគឺជាការដែលខ្ញុំចូលរួមក្នុងការផ្សព្វផ្សាយវប្បធម៌របស់ខ្មែរយើង ដល់ជនជាតិខ្មែរយើង និងបរទេសដែលនៅសហរដ្ឋអាមេរិកនេះ»។ អ្នកស្រី ផ្លុង អ៊ិត្ថារ៉ា អ្នករៀបចំពីធីប្រឡងសម្រស់ស្ត្រីខ្មែរបានមានប្រសាសន៍បា្រប់វីអូអេខ្មែរនៅខាងក្រោយឆាកនៃការប្រកួតថា គោលបំណងនៃការរៀបចំពិធីនេះ គឺដើម្បីទាក់ទាញកូនខ្មែរអាមេរិកាំងឲ្យត្រឡប់មកផ្តល់តម្លៃវប្បធម៌របស់ខ្លួន និងចង់បង្ហាញដល់ពិភពខាងក្រៅអំពីសម្រស់ស្ត្រីខ្មែរ។ អ្នកស្រីថ្លែងថា៖ «ចង់ជួយក្មេងៗឲ្យមកទាក់ទងនៅវត្ត ដូចថាឲ្យចេះឲ្យតម្លៃវប្បធម៌ខ្មែរ ដោយសារថា ក្មេងៗកើតនៅស្រុកអាមេរិកនេះ វាតាមអាមេរិក។ ការធ្វើបវរកញ្ញាហ្នឹងចង់ហៅក្មេងៗឲ្យត្រឡប់មកស្រឡាញ់វប្បធម៌របស់ខ្លួនឯង និងឲ្យមានមោទនភាពជាតិខ្មែរ»។ ពិធីបុណ្យចូលឆ្នាំនៅវត្តពុទ្ធិការាមឆ្នាំនេះ មានប្រជាពលរដ្ឋទាំងខ្មែរ និងបរទេសចូលរួមយ៉ាងច្រើនកុះករខុសពីឆ្នាំមុនៗ។ អ្នកស្រី សារ៉ង បូរ៉ា មកពីរដ្ឋវីឌ្យីញៀ ដែលជាអ្នកចូលរួមម្នាក់ដែរនេះ បានប្រាប់វីអូអេខ្មែរថា អ្នកស្រីកត់សម្គាល់ឃើញថា ឆ្នាំនេះមានពិធីផ្សេងៗជាច្រើន ដូចជាការសម្តែងរបាំបូរាណ និងប្រជាប្រិយខ្មែរ ល្បែងប្រជាប្រិយ និងជាពិសេសពិធីប្រឡងសម្រស់ស្ត្រីខ្មែរ។ «ថ្ងៃនេះផ្ទាល់គឺមានការប្រកួតបវរកញ្ញាខ្មែរអាមេរិកាំង គឺប្លែក ដោយសារថាឆ្នាំមុនៗមិនធ្លាប់មានកម្មវិធីនេះទេ»។ គណៈកម្មការរៀបចំប្រឡងសម្រស់ស្រ្តីខ្មែរបានឲ្យដឹងថា ដោយសារតែជោគជ័យគួរឲ្យកត់សម្គាល់នៅឆ្នាំនេះ គណៈកម្មការនឹងពិចារណារៀបចំពិធីនេះឲ្យបានរិតតែប្រសើរថែមទៀតនៅឆ្នាំក្រោយៗ ហើយសូមអំពាវនាវឲ្យស្រ្តីដែលមានសម្រស់ល្អដាក់ពាក្យចូលរួមប្រឡងឲ្យបានច្រើននៅឆ្នាំក្រោយ៕ This posting includes an audio/video/photo media file: Download Now |
| ខ្មែរនៅឡុងប៊ិចអបអរឆ្នាំថោះដោយការដង្ហែរក្បួន Posted: 21 Apr 2011 02:39 PM PDT ដើម្បីអបអរសាទរពិធីបុណ្យចូលឆ្នាំខ្មែរ ឆ្នាំថោះ ត្រីស័កពុទ្ធសករាជ២៥៥៥ នៅពេលថ្មីៗនេះ ពលរដ្ឋខ្មែរនៅទីក្រុងឡុងប៊ិច ដែលគេស្គាល់ថាជាទីក្រុងខ្មែរនៅរដ្ឋកាលីហ្វ័រញ៉ា សហរដ្ឋអាមេរិក បានធ្វើក្បួនដង្ហែរ បង្ហាញអំពីសិល្បៈ វប្បធម៌ ដែលឆ្លុះបញ្ចាំងពីខ្មែរ ហើយមានការចូលរួមពីសំណាក់ទស្សនិកជនយ៉ាងច្រើនកុះករ។ សំឡេងហ៊ោកញ្ជ្រៀវ «សួស្តីឆ្នាំថ្មី!» និងសំឡេងជូនពរ បានបន្លឺឡើងផ្តោះផ្តងគ្នារវាងអ្នកចូលរួមទស្សនា និងក្បួនដង្ហែរ។ ការបើកឆាកក្បួនដង្ហែរនេះចាប់ផ្តើមពីរបាំជូនពរ ហែរហមបន្តដោយក្បួនអប្សរា របាំសុវណ្ណមច្ឆា របាំគោះត្រឡោក ក្បួនស៊ីក្លូខ្មែរ ក្បាច់គុណល្បុក្កតោ របាំរបស់ជាតិសាសន៍ម៉ិកស៊ិកូ និងសិល្បៈជាច្រើនទៀត រួមជាមួយនឹងក្បួនគណៈកិត្តិយសដែលមានដូចជា ចៅហ្វាយក្រុង និងមន្រ្តីយោធាប៉ូលីសជាដើម។ កម្មវិធីនេះបានរៀបចំឡើង កាលពីថ្ងៃសៅរ៍ទី២ខែមេសាកន្លងទៅនេះ ដោយ សភាសង្គមខ្មែរ (Cambodian Coordinating Council) ដែលជាសមាគមមិនយកប្រាក់កម្រៃមួយប្រចាំនៅទីក្រុងឡុងប៊ិច។ លោក ទុំ ហ្វីលីប៉ូ ជា ប្រធានរបស់សភាសង្គមខ្មែរនេះបានឱ្យដឹងថា ការដង្ហែរក្បួននេះគឺចង់ផ្សព្វផ្សាយវប្បធម៌ប្រពៃណីខ្មែរឱ្យប្រជាពលរដ្ឋទាំងខ្មែរនិងបរទេសបានស្គាល់។ «ទីមួយគឺថាយើងចង់បង្ហាញអំពីវប្បធម៌របស់ខ្មែរយើងដែរហើយម្យ៉ាងទៀតហ្នឹងគឺយើងចង់បង្ហាញអំពីដូចថា ពាណិជករពាណិជកម្មដែលយើងមាននៅក្នុងក្រុងឡុងប៊ិចនេះ។ យើងចង់បង្ហាញអ្នកដែលនៅក្នុងទីក្រុងឬអ្នកដែលនៅក្រៅទីក្រុងក្តី ដើម្បីឲ្យយល់អំពីពាណិជ្ជករដែលយើងមាននៅទីក្រុងឡុងប៊ិច យើងមានអ្វីខ្លះ ដែលអាចបញ្ចូលទៅក្នុងឡុងប៊ិចឲ្យមានភាពចម្រុះ (diversity) នៅក្នុងទីក្រុងនេះ តែម្តង។ ហើយម្យ៉ាងទៀតយើងក៏ចង់ឲ្យអ្នកដទៃស្គាល់ពីវប្បធម៌យើងដែរ នេះជាឱកាសមួយដែលយើងអាចប្តូរ ដូចថា ចំណេះដឹងអីជាដើម។» ការធ្វើក្បួនដង្ហែរនេះគឺបានធ្វើឡើងនៅលើដងផ្លូវ ឈ្មោះថា អាណាហែម (Anahiem Street) ដែលជាវិថីសម្បូរដោយមុខជំនួញជួញដូររបស់ប្រជាពលរដ្ឋខ្មែរ ហើយត្រូវបានគេឲ្យឈ្មោះថា «Cambodian Town» ឬ«ទីក្រុងខ្មែរ»។ លោក ហ្វីលីប៊ូ ក៏បានឲ្យដឹងពីមូលហេតុដែលសភាសង្គមខ្មែរជ្រើសយកផ្លូវអាណាហែមនេះដែរ ថា៖ «ផ្លូវម្តុំហ្នឹង គេហៅថា Cambodian Town មានន័យថាទីក្រុងខ្មែរ ហ្នឹង ព្រោះវាមាន business (ពាណិជកម្ម) ខ្មែរជាច្រើននៅតាមផ្លូវម្តុំហ្នឹង ម្ល៉ោះហើយ យើងចង់បានចំណុចហ្នឹង ឈ្មោះថាជាទីក្រុងខ្មែរ។ ឈ្មោះនេះជាឈ្មោះចេញពីអាជ្ញាធរ ទីក្រុងឡុងប៊ិចរួចហើយ កាលពីប្រហែលជាបីឆ្នាំមុន ប៉ុន្តែគេនៅចាប់ផ្តើមធ្វើដូចជាសញ្ញានៅតាម Freeway អីជាដើម ដើម្បីឲ្យមើលមក ពេញជាលក្ខណៈទីក្រុងខ្មែរ។» <!--IMAGE--> លោក ខេង សុភ័ក្រ្ត ជាអ្នកស្ម័គ្រចិត្ត ជួយរៀបចំកម្មវិធីក្បួនដង្ហែរនេះបានឲ្យដឹងថា ក្បួនដង្ហែរនេះមានសារៈសំខាន់ណាស់សម្រាប់ទីក្រុងខ្មែរនៅសហរដ្ឋអាមេរិក។ «ហែរ parade នេះពិតប្រាកដវាសំខាន់ណាស់ហើយ ដើម្បីបង្ហាញឲ្យប្រជាជនខ្មែរនៅអាមេរិចក៏ដូចជាប្រជាជនខ្មែរនៅលើពិភពលោកទាំងមូលថា ខ្មែររស់នៅ អាមេរិកក៏មានកម្មវិធីដែលទាក់ទងនឹងប្រពៃណីដែរ។ យើងក៏លើកស្ទួយកិត្តិយសជាតិ លើកស្ទួយប្រពៃណីជាតិ អត់ឲ្យមានការបាត់បង់ទេ។» ជាមួយគ្នានេះដែរលោកក៏មានប្រសាសន៍ឲ្យដឹងថា ការរៀបចំពិធីជារៀងរាល់ឆ្នាំគឺមានការលំបាក ដូច្នេះលោកសូមអំពាវនាវសុំឲ្យមានជំនួយបន្ថែមពីសំណាក់បងប្អូននៅក្នុងសហគមន៍ខ្មែរ។ «ទន្ទឹមនឹងនេះដែរ យើងក៏ត្រូវការបន្ថែមអ្នកដែលមានទឹកចិត្តចង់ជួយជាកម្លាំង វិភាគទានយោបល់គំនិត។ អ្នកទាំងអស់ហ្នឹងហើយដែលអាចធ្វើឲ្យសហគមន៍ខ្មែររីកចំរើនទៅមុខបាន បើទោះជាមានតែបួនដប់អ្នក ដែលមានគំនិតច្នៃប្រឌិតក៏ដោយ ប៉ុន្តែខ្វះកម្លាំងជួយ អត់កើតទេ។ ទោះបីជាយើងមានកម្លាំងជួយ តែយើងខ្វះថវិកា ក៏វាទៅអត់រួចដែរ។ អញ្ចឹង យើងព្យាយាមធ្វើ Parade (ក្បួនដង្ហែរ) ហ្នឹង ពីមួយឆ្នាំទៅមួយឆ្នាំ យើងមានការលំបាកដោយសារតែអ្នកដែលជួយគឺមានតិចតួច។» លោកសួន សុធី ជាប្រជាពលរដ្ឋរស់នៅទីក្រុងឡុងប៊ិច បានសម្តែងការត្រេកអរនៅពេលបានមកចូលរួមទស្សនាក្បួនដង្ហែរនេះ ហើយគាត់ចង់ឲ្យមានការរៀបចំនេះជារៀងរាល់ឆ្នាំ ដោយសារនេះ ជាឱកាសមួយអាចឲ្យកូនខ្មែរនៅសហរដ្ឋអាមេរិករៀនសូត្រពីវប្បធម៌របស់ខ្លួន។ «ខ្ញុំគិតថាសប្បាយណាស់ ព្រោះយើងនៅក្រៅប្រទេស អត់បានទៅស្រុកខ្មែរ យើងនៅស្រុកនេះក៏អាចចូលរួមក្នុងពិធីចូលឆ្នាំខ្មែរយើងបានដែរ។ ទីនេះគឺខ្ញុំនៅម្នាក់ឯង ដូចមានក្តីនឹកស្រុក និងសោកសៅខ្លះដែរពេលខ្លះ ដូចយើងនៅឆ្ងាយពី ឪពុកម្តាយ តែខ្ញុំគិតថានេះជាចំណុចមួយដែរ ដែលគួរឲ្យខ្ញុំកាត់បន្ថយភាពនឹកស្រុក ដូចថាមកអញ្ចឹងបានសប្បាយ អញ្ចឹងទៅវាគ្រាន់ជាងអត់។» គួរបញ្ចាក់ផងដែរថា ក្រៅពីការធ្វើក្បួនដង្ហែរនេះ សភាសង្គមខ្មែរក៏មានរៀបចំ កម្មវិធីបុណ្យចូលឆ្នាំខ្មែរនៅឯសួនឧទ្យានជាតិ El Dorado Park។ សម្រាប់កម្មវីធីនោះ ប្រិយមិត្តអ្នកចូលរួម អាចកម្សាន្តសប្បាយជាមួយនឹងល្បែងប្រជាប្រិយខ្មែរ ការពូនភ្នំខ្សាច់ ការប្រគុំតន្ត្រី ការប្រឡងចម្រៀង ការសម្តែងសិល្បៈ ដែលនឹងមានដូចជា របាំបុរាណ ល្ខោនបាសាក់ និងការសូត្រកំណាព្យជាដើម។ ការប្រារព្ធពិធីបុណ្យចូលឆ្នាំនៅ El Dorado Park គឺបានប្រព្រឹត្តធ្វើឡើងកាលពីថ្ងៃសៅរ៍ទី០៩ខែមេសាឆ្នាំ២០១១កន្លងទៅនេះ៕ This posting includes an audio/video/photo media file: Download Now |
| ជប៉ុនអាចនឹងបន្ថយជំនួយមកកម្ពុជាដោយសារមហន្តរាយរញ្ជួយដី Posted: 20 Apr 2011 03:10 PM PDT មន្រ្ដីការទូតជាន់ខ្ពស់របស់ប្រទេសជប៉ុនបានឲ្យដឹងថា មហន្ដរាយដោយសារធម្មជាតិនៅក្នុងប្រទេសរបស់ខ្លួននឹងបណ្ដាលឲ្យមានការកាត់បន្ថយជំនួយមកកាន់ប្រទេសកម្ពុជា។ មន្ដ្រីសង្គមស៊ីវិលនិងមន្រ្ដីគណបក្សជំទាស់ដាស់តឿនថា រដ្ឋាភិបាលមិនត្រូវពឹងលើប្រភពជំនួយបរទេសពីប្រទេសសំខាន់តែមួយនោះទេ។ ឯកអគ្គរាជទូតជប៉ុន លោកម៉ាសាហ្វ៊ូមី គូរ៉ូគី (Masafumi Kuroki) បានព្រមាននៅថ្ងៃពុធនេះថា ជំនួយឥតសំណងសម្រាប់ការអភិវឌ្ឍមកកាន់ប្រទេសកម្ពុជានឹងរងការប៉ះពាល់ដោយសារតែប្រទេសជប៉ុនត្រូវបំផ្លាញយ៉ាងធ្ងន់ធ្ងរដោយគ្រោះធម្មជាតិដ៏អាក្រក់កាលពីជាងមួយខែមុននេះ។ ក្រោយពីកិច្ចប្រជុំរវាងសហគមន៍ផ្ដល់ជំនួយ និងរដ្ឋាភិបាលកម្ពុជាក្នុងទីក្រុងភ្នំពេញដើម្បីតាមដានការអនុវត្តគម្រោងអភិវឌ្ឍន៍នោះ លោកឯកអគ្គរដ្ឋទូតជប៉ុនបានថ្លែងប្រាប់ VOA សម្លេងសហរដ្ឋអាមេរិកថា រដ្ឋាភិបាលប្រទេសជប៉ុនត្រូវបង្កើនថវិកាជាតិថែមទៀតសម្រាប់ស្ដារតំបន់រងគ្រោះឡើងវិញ ដូច្នេះជំនួយអភិវឌ្ឍន៍ទៅក្រៅប្រទេសនឹងទទួលរងការប៉ះពាល់ ក្នុងនោះរាប់បញ្ចូលទាំងជំនួយសម្រាប់ប្រទេសកម្ពុជាផងដែរ។ «ការប៉ះពាល់ជាអវិជ្ជមានទៅលើថវិកាជំនួយផ្លូវការ (ODA)ជាទូទៅ ប្រហែលជាចៀសមិនផុតទេ ដោយ សារតែគ្រោះមហន្ដរាយនៅប្រទេសជប៉ុននេះ»។ ទោះជាយ៉ាងណា លោកម៉ាសាហ្វ៊ូមី គូរ៉ូគីមានប្រសាសន៍ថា វានៅឆាប់ពេកនៅឡើយ គឺមិនទាន់អាចនិយាយបានទេ ថាតើការកាត់បន្ថយជំនួយក្រៅប្រទេសរបស់ជប៉ុននឹងមានទំហំប៉ុណ្ណានោះ។ ប្រទេសជប៉ុនត្រូវវាយប្រហារដោយរលកយក្សស៊ូណាមិ និងការរញ្ជួយដីកម្រិតខ្ពស់បំផុតកាលពីថ្ងៃ១១ មិនាកន្លងទៅនេះ ដែលបណ្ដាលទីក្រុងនិងភូមិករនៅតាមបណ្ដោយឆ្នេរសមុទ្រប្រវែង២១០០គីឡូម៉ែត្រ រងការបំផ្លិចបំផ្លាញ។ ចំនួនជនរងគ្រោះដែលបានស្លាប់អាចកើនរហូតទៅដល់២៥០០០នាក់ ហើយប្រជាពលរដ្ឋជប៉ុនជាង ៤៥០០០០នាក់បាត់បង់ទីជម្រក។ រហូតមកដល់ពេលនេះមានប្រជាពលរដ្ឋជប៉ុនប្រមាណ៦៦០០០០គ្រួសារខ្វះទឹកស្អាតសម្រាប់ប្រើប្រាស់។ រដ្ឋាភិបាលជប៉ុនបានអនុម័តថវិកាជាតិប្រចាំឆ្នាំកាលពីដើមខែមេសានេះ។ ក៏ប៉ុន្ដែលោកឯកអគ្គរាជទូតជប៉ុនម៉ាសាហ្វ៊ូមី គូរ៉ូគីមានបញ្ជាក់ថា រដ្ឋាភិបាលក្រុងតូក្យូនឹងត្រូវអនុម័តនូវថវិកាជាតិជាបន្ថែមទៀត ក្នុងពេលខាងមុខនេះសម្រាប់ការកសាងប្រទេសឡើងវិញ។ នោះហើយគឺការចាំបាច់សម្រាប់ការកាត់បន្ថយជំនួយដល់ប្រទេសកំពុងអភិវឌ្ឍន៍ ដូចជាប្រទេសកម្ពុជានេះ។ ប្រទេសជប៉ុនផ្ដល់ជំនួយដល់ប្រទេសកម្ពុជាចំនួនជាង១០០លានដុល្លារក្នុងមួយឆ្នាំៗគឺជាប្រទេសដែលផ្ដល់ជំនួយធំជាងគេបំផុតដល់កម្ពុជា ខណៈដែលប្រទេសកម្ពុជាត្រូវពឹងជំនួយបរទេសជាប្រចាំឆ្នាំ ប្រមាណ១០០០លានដុល្លារសម្រាប់ការកសាងនិងអភិវឌ្ឍន៍។ លោកនាយករដ្ឋមន្ដ្រីខ្មែរហ៊ុន សែន កាលពីពេលថ្មីៗនេះ ធ្លាប់បានសម្តែងកង្វល់អំពីការប៉ះពាល់ដល់ជំនួយពីប្រទេសជប៉ុនមកកាន់ប្រទេសកម្ពុជានេះដែរ។ លោកយឹម សុវណ្ណ តំណាងរាស្ដ្រ និងជាអ្នកនាំពាក្យគណបក្សជំទាស់សម រង្ស៊ី មានប្រសាសន៍ថា ការកាត់បន្ថយជំនួយណាមួយពីប្រទេសជប៉ុននឹងប៉ះពាល់ដល់ការវិនិយោគសាធារណៈ និងនិរន្ដរភាពរបស់រដ្ឋាភិបាល។ «អញ្ចឹងហើយបានជាខ្ញុំជូនយោបល់ទៅរដ្ឋាភិបាលជាញឹកញាប់ថា យើងត្រូវតែស្វែងរកប្រភពជំនួយពីបណ្តាប្រទេសផ្សេងៗ។ កុំរំពឹងទៅលើតែប្រទេសណាមួយ។យើងគួរតែខិតខំប្រឹងប្រែងរិះរកមធ្យោបាយ លុបបំបាត់អំពើពុករលួយ ខិតខំប្រមែប្រមូលថវិកាជាតិ ដើម្បីជួយខ្លួនយើង ហើយពង្រឹងហិរញ្ញវត្ថុខ្លួនយើង»។ ដោយឡែក លោកគល់ បញ្ញាក៏បានកត់សម្គាល់ដូចគ្នានេះដែរថា ការកាត់បន្ថយជំនួយរបស់ប្រទេសជប៉ុននឹងប៉ះពាល់ដល់គម្រោងអភិវឌ្ឍន៍នៅកម្ពុជាដោយសារតែជំនួយរបស់ជប៉ុនភាគច្រើន គឺជាជំនួយឥតសំណង។ ក៏ប៉ុន្ដែរដ្ឋាភិបាលមិនទាន់មានយន្តការសម្រាប់គ្រប់គ្រងហានិភ័យនៅពេលដែលម្ចាស់ជំនួយបាត់បង់លទ្ធភាពតាមការរំពឹងទុកដែលប្រទេសកម្ពុជាចង់បាននោះទេ៕ This posting includes an audio/video/photo media file: Download Now |
| សាលាក្រុង ឡូវែល គ្រោងបង្កើតទីក្រុងខ្មែរ ឬភូមិខ្មែរ Posted: 21 Apr 2011 09:09 AM PDT មន្ត្រីសាលាក្រុង Lowell និងអ្នកតំណាងសហគមន៍ខ្មែរកំពុងរៀបចំគម្រោងបង្កើតទីក្រុងខ្មែរ ឬភូមិខ្មែរនៃក្រុងLowell ដែលមានពលរដ្ឋអាមេរិកាំងដើមកំណើតខ្មែរជាង៣ម៉ឺន៥ពាន់នាក់រស់នៅ។ កាលពីថ្ងៃព្រហស្បតិ៍ទី៣១មិនានេះ ក្រុមមន្ត្រីសាលាក្រុងLowell រដ្ឋមាស្សាឈូសែសបានមកធ្វើបទបង្ហាញនៅមជ្ឈមណ្ឌលគាំពារសុខភាពមនុស្សចាស់នៃទីក្រុងLowell បកស្រាយអំពីគម្រោងបង្កើត Little Cambodia គឺទីក្រុងខ្មែរ ភូមិវប្បធម៌ខ្មែរ ឬភូមិខ្មែរនៃក្រុងLowellដែលមានជនជាតិខ្មែររស់នៅជាង៣ម៉ឺន៥ពាន់នាក់។ នាយកគ្រប់គ្រងទីក្រុងLowell លោក Bernard Lynch បានដឹកនាំមន្ត្រីសាលាក្រុងមកធ្វើបទបង្ហាញ និងសួរយោបល់ពលរដ្ឋខ្មែរអាមេរិកាំងជិត១០០នាក់អំពីគម្រោងអភិវឌ្ឍន៍នេះ។ «ម្ចាស់ហាងជាច្រើនចង់កែលម្អកន្លែងរកស៊ីឲ្យមានលក្ខណជាខ្មែរ។ ខ្ញុំគិតថា ដើម្បីឲ្យគម្រោងក្រុងខ្មែរនេះបានជោគជ័យ ម្ចាស់ហាងអាចជួយយើងប្រមូលបច្ច័យ ព្រោះមានអ្នកខ្លះចង់ដាក់រូបចម្លាក់ដែលត្រូវចំណាយលុយទិញ»។ កន្លងមកសាលាក្រុងបានចំណាយប្រហែល៣០ម៉ឺនដុល្លារ ហើយវាយតម្លៃថា ក្នុងតំណាក់កាលចាប់ផ្តើម សាលាក្រុង Lowellនឹងចំណាយរវាង៦០ម៉ឺន ឬ៧០ម៉ឺនដុល្លារ គួបផ្សំនឹងភាគទានពីសហគមន៍ពាណិជ្ជករខ្មែរ។ គម្រោងនេះនឹងចាប់ផ្តើមក្នុងពេលយ៉ាងយូរ៣ខែទៀត។
ក្នុងពេលធ្វើបទបង្ហាញនេះ ជំនួយការរបស់នាយកគ្រប់គ្រងទីក្រុងLowell លោក Adam Baccke មានប្រសាសន៍ថា «នេះគឺជាគម្រោងបង្កើតក្រុងខ្មែររបស់យើង។ ទីមួយនឹងមានការដាក់ស្លាកសញ្ញាសម្គាល់ ដូចជាខ្លោងទ្វារសម្គាល់ថា ហ្នឹងគឺជាខ្លោងទ្វារចូលក្រុងខ្មែរ ឬក៏អ្វីផ្សេងៗ ដែលមានរចនាបថជាខ្មែរ»។ លោក Bacckeបន្តថា សាលាក្រុងនិងសហគមន៍ខ្មែរគួររៀបចំកម្មវិធីវប្បធម៌ កម្មវិធីកម្សាន្តផ្សេងៗដើម្បីផ្សព្វផ្សាយ និងទាក់ទាញចំណាប់អារម្មណ៍ចំពោះគម្រោងនេះ។ លោករ៉ាស៊ី អាន នាយកប្រតិបត្តិនៃសមាគមខ្មែរក្រុងLowell មានប្រសាសន៍ថា «ប្រជាជនមួយណាក៏ដោយដែលបានចូលរួមក្នុងប្រជុំនេះ ចង់ឃើញកន្លែងសង្គមខ្មែរឲ្យស្អាត។ សហគមន៍ខ្មែរនឹងមានផលប្រយោជន៍ច្រើន ដូចជាមុខរបររកស៊ីអាចរីកចម្រើន។ បើយើងមានប្រជាជនមកនៅច្រើនទៅ ក៏គេបានពន្ធច្រើនដែរ។ នេះជាចំណុចសំខាន់»។ អ្នកចូលរួមទាំងអស់សម្តែងការអបអរសាទរចំពោះគម្រោងនេះ។ លោកឈួរ ហេង អាយុ៥៤ឆ្នាំ បានប្តេជ្ញាថា «រួមចំណែកជួយ។ លុយខ្ញុំសុំស្ម័គ្រចិត្តជួយមុនគេ។ បើច្រើនអត់មានទេ តែបើល្មមរត់រួច ខ្ញុំស្ម័គ្រចិត្តជួយ។ សូមអរគុណ អស់យោបល់»។ អ្នកស្រីហាក់ ស៊ីផន មានប្រសាសន៍ថា «ខ្ញុំត្រេកអរណាស់ដែលបានគេធ្វើអញ្ចឹង សប្បាយចិត្ត។ គេចង់បានយោបល់យើង»។ រីឯអ្នកស្រី ដាយអិន ហាំងបន្ថែមថា៖ «ខ្ញុំគាំទ្រ១០០%»។ ខ្មែរម្ចាស់ហាងជាច្រើនចាប់អារម្មណ៍នឹងគ្រោងនេះ ហើយចង់កែលម្អកន្លែងរកស៊ីរបស់ខ្លួន ឲ្យមានលក្ខណៈជាខ្មែរ។ លោករ៉ាស៊ី អានពន្យល់ថា ម្ចាស់ហាងត្រូវលើកគម្រោងកែលម្អ ឬគម្រោងអភិវឌ្ឍន៍កន្លែងរកស៊ីរបស់ខ្លួនជូនទៅសាលាក្រុង។ «សាលាក្រុងបានជម្រាបថា ដើម្បីឲ្យកិច្ចការនេះរីកចម្រើន គេត្រូវការឲ្យអ្នកណាចង់ចូលរួមខាងហ្នឹង ដូចជាយើងមានមុខរបររកស៊ីអ្វីមួយ យើងចង់ធ្វើឲ្យហាងយើងមានរចនាស្អាត យើងត្រូវចំណាយ២០% សាលាក្រុងចំណាយ៨០%»។ អ្នកស្រីម៉ាលី ម្ចាស់ហាងលក់ទំនិញ និងភោជនីយដ្ឋានប៉ៃលិន មានប្រសាសន៍ថា «ខ្ញុំពេញចិត្តណាស់ក្មួយ។ ខ្ញុំគិតថា បើគេអត់ចេញ ក៏ខ្ញុំនៅតែធ្វើ។ យើងចង់បានកន្លែងហ្នឹងស្អាត ចង់បានកន្លែងហ្នឹងជាខ្មែរ។ ប៉ុន្តែដល់ឥឡូវសាលាក្រុងគេចាប់ផ្តើមធ្វើអញ្ចឹង ដូចថា ការស្រមៃរបស់យើងបានសម្រេច»។ ម្ចាស់ហាងដែលរវល់ មិនមានពេលមកចូលរួមស្តាប់គម្រោងអភិវឌ្ឍន៍នេះក៏បានសម្តែងការគាំទ្រដែរ។ លោកយុទ្ធគឺជាម្ចាស់ហាង7 Video ស្ថិតក្នុងតំបន់គម្រោងអភិវឌ្ឍន៍នេះ។ «វាជាមោទនភាពសម្រាប់ប្រជាជនខ្មែររស់នៅទីក្រុងLowellផងដែរ ដែលមានទីក្រុងខ្មែរ»។ លោកអ៊ូ សុវណ្ណ មន្ត្រីកុងស៊ូខ្មែរប្រចាំក្រុង Lowell សម្តែងក្តីសង្ឃឹមថា ការបង្កើតក្រុងខ្មែរនេះនឹងជួយពង្រីកទំនាក់ទំនងជំនួញរវាងជនជាតិខ្មែរនៅក្រុង Lowell និងពាណិជ្ជករខ្មែរនៅស្រុកខ្មែរ។«ការបង្កើតក្រុងខ្មែរហ្នឹងមានសារៈប្រយោជន៍ ជាពិសេស ថ្មីៗនេះអាជីវករយើងទើបចាប់ផ្តើមនាំអង្ករខ្មែរចូលទីក្រុងដែលមានខ្មែររស់នៅ ដូចជាក្រុងLowellនេះតែម្តង»។ លោករស់ វង្ស ប្រធានមជ្ឈមណ្ឌលគាំពារសុខភាពមនុស្សចាស់នៃក្រុងLowellពន្យល់អំពីមូលហេតុមកធ្វើបទបង្ហាញនៅមជ្ឈមណ្ឌលនេះ។ «យើងទទួលស្គាល់ថា ចាស់ៗដឹកនាំកូនខ្មែរ។ ដូច្នេះហើយគាត់មកទីក្រុងនេះ៣០ឆ្នាំហើយ ហើយគាត់ធ្វើការច្រើន។ គាត់រត់ យកក្មេងជំនាន់ខ្ញុំមក គេចគ្រាប់ គេចអម្បែង ទម្រាំមកដល់ស្រុកនេះ។ដូច្នេះហើយ បើគេបង្កើត Little Cambodiaក្នុងទីក្រុងLowell គេគួរមកទីនេះ ព្រោះចាស់ៗយើងនេះជាអ្នកមេដឹកនាំ»។ អ្នកចូលរួមទាំងអស់មានមោទនភាពនឹងគម្រោងនេះ ហើយគេចាប់អារម្មណ៍ជាពិសេសទាក់ទងនឹងការរៀបចំឲ្យមានរចនាបថវប្បធម៌ខ្មែរនៅទីក្រុងខ្មែរ ឬភូមិខ្មែរនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
