VOA News: ព័ត៌មាន: “របាយការណ៍សិទ្ធិមនុស្សបារម្ភអំពីការឃុំខ្លួនអ្នកទោសបណ្តោះអាសន្ន” plus 3 more |
- របាយការណ៍សិទ្ធិមនុស្សបារម្ភអំពីការឃុំខ្លួនអ្នកទោសបណ្តោះអាសន្ន
- ព្រះមហាក្សត្រកម្ពុជាបានយាងទៅក្រុងប៉េកាំងពិនិត្យព្រះរាជសុខភាព
- បក្សប្រឆាំងនៅតែរកមិនឃើញជំហររួមដើម្បីច្របាច់បញ្ចូលគ្នា
- អាមេរិកនៅមិនទាន់លើកលែងការហាមឃាត់លើការសុំកូនខ្មែរ
| របាយការណ៍សិទ្ធិមនុស្សបារម្ភអំពីការឃុំខ្លួនអ្នកទោសបណ្តោះអាសន្ន Posted: 19 Apr 2011 02:54 PM PDT អង្គការសិទ្ធិមនុស្សមួយនឹងយករបាយការណ៍មួយជូនសាលាឧទ្ធរណ៍នៅថ្ងៃពុធនេះដើម្បីសម្តែងនូវក្តីព្រួយបារម្ភបញ្ហាមួយចំនួនទាក់ទងនឹងការឃុំខ្លួនអ្នកទោសបណ្តោះអាសន្ន ចំនួនមេធាវីតិចតួច ការគំរាមកំហែងយកចម្លើយសារភាពពីជនជាប់ចោទ និងបញ្ហាពាក់ព័ន្ធនឹងសកម្មភាពចៅក្រមក្នុងពេលសវនាការជាដើម។ ប៉ុន្តែមន្ត្រីតុលាការបានបដិសេធរបាយការណ៍នេះ។ នៅថ្ងៃអង្គារនេះ មជ្ឈមណ្ឌលសិទ្ធិមនុស្សកម្ពុជាបានសម្តែងការព្រួយបារម្ភអំពីអត្រាខ្ពស់នៃការឃុំខ្លួនបណ្តោះអាសន្ន អត្រាទាបនៃចំនួនមេធាវីក្នុងរឿងក្តីបទមជ្ឈឹម និងការប្រើអំពើហិង្សាដើម្បីបាន ចម្លើយសារភាពពីជនជាប់ចោទ។ មជ្ឈមណ្ឌលសិទ្ធិមនុស្សកម្ពុជាបានធ្វើគម្រោងសង្កេតការណ៍សវនាការនៅក្នុងតុលាការក្រុងភ្នំពេញ និងខេត្តកណ្តាលរវាងពីខែកក្កដា ដល់ខែធ្នូ ឆ្នាំ២០១០ ហើយគម្រោងនេះឧបត្ថម្ភដោយទីភ្នាក់ងារ អភិវឌ្ឍន៍អន្តរជាតិសហរដ្ឋអាមេរិក គណៈកម្មការអឺរ៉ុប ស្ថានទូតអង់គ្លេស វិទ្យាស្ថានគ្រប់គ្រងខាងកើត ខាងលិចវិទ្យាស្ថានសង្គមបើកចំហ និងមូលនិធិអាស៊ី។ លោកស្រីមាំង ម៉ូនីកា មន្ត្រីគម្រោងជាន់ខ្ពស់នៃមជ្ឈមណ្ឌលសិទ្ធិមនុស្សកម្ពុជា បានថ្លែង យ៉ាងដូច្នេះថា៖ «យើងមានការព្រួយបារម្ភធ្ងន់ធ្ងរពាក់ព័ន្ធនឹងអត្រាខ្ពស់នៃការឃុំខ្លួនបណ្តោះអាសន្ន អត្រាទាបនៃចំនួនមេធាវីសម្រាប់ជនជាប់ចោទដែលត្រូវបានចោទប្រកាន់អំពីបទមជ្ឈឹម ចៅក្រមនៅតែបន្តប្រើទូរស័ព្ទដៃនៅក្នុងបន្ទប់សវនាការ ហើយមានអំណះអំណាង ដែលលើកឡើងដោយជនជាប់ចោទទាក់ទងនឹងទង្វើមិនត្រឹមត្រូវរបស់ប៉ូលិសដូចជាការគំរាមកំហែង និងប្រើអំពើហិង្សាទៅលើជនជាប់ចោទដើម្បីទទួលបានចម្លើយសារភាព»។ របាយការណ៍បានបញ្ជាក់ថា ទិន្នន័យ ដែលបានមកពីសវនាការចំនួន៥៣២នៅក្នុងតុលាការក្រុងភ្នំពេញ និងតុលាការខេត្តកណ្តាល បានបង្ហាញលទ្ធផលចម្រុះ។ ការបង្ហាញភស្តុតាងនៅក្នុងសវនាការមានការកើនឡើងពី៧៧ភាគរយទៅ៩៦ភាគរយ។ តុលាការទាំងពីរបានផ្តល់ឱកាសស្នើគ្នាដល់ភាគីទាំងពីរក្នុងការបង្ហាញភស្តុតាង និងសាកសួរសាក្សី។ របាយការណ៍នេះបានរកឃើញថា ទិន្នន័យបង្ហាញក្នុងសវនាការចំនួន១៨ មានជនជាប់ចោទត្រូវបានឃុំខ្លួនបណ្តោះអាសន្នលើសពីរយៈកំណត់ដោយច្បាប់។ ភាគច្រើននៃជនជាប់ចោទទាំងនេះមាន៧២ភាគរយត្រូវបានចោទប្រកាន់ពីបទមជ្ឈឹម។ របាយការណ៍នេះបានបន្តថា អត្រាសរុបនៃចំនួនមេធាវីការពារជនជាប់ចោទគ្រប់ករណីទាំងអស់ បានធ្លាក់ចុះពី៦៨ភាគរយមកនៅត្រឹម៥៩ភាគរយ។ ជនជាប់ចោទជិតបីភាគបួន ឬស្មើនឹង៧៤ភាគរយ ដែលត្រូវបានចោទប្រកាន់ពីបទមជ្ឈឹម មិនមានមេធាវីក្នុងពេលសវនាការទេ។ របាយការណ៍នេះបានលើកឡើងថា ក្នុងសវនាការចំនួន៣៣៨នៅតុលាការក្រុងភ្នំពេញ គេសង្កេតឃើញជនជាប់ចោទដែលមានវត្តមាន មានឯកសណ្ឋានជាអ្នកទោសក្នុងសវនាការចំនួន៣១៤នាក់ ឬ ស្មើនឹង៩៣ភាគរយ និង៤ភាគរយនៅតុលាការខេត្តកណ្តាល។ ការណ៍នេះធ្វើឱ្យបាត់បង់នូវសេចក្តីថ្លៃថ្នូរ បាត់សិទ្ធិបង្ហាញខ្លួននៅមុខតុលាការក្នុងនាមជាប្រជាពលរដ្ឋគ្មានទោស។ របាយការណ៍នេះបានបន្ថែមថា ភស្តុតាងក្នុងសវនាការចំនួន២០៦នៅតុលាការក្រុងភ្នំពេញមានតម្រុយ បង្ហាញថា ចម្លើយសារភាពអាចបានមកពីការគំរាមកំហែង ឬការគាបសង្កត់ផ្លូវចិត្តដទៃទៀតនៅក្នុង សវនាការចំនួន២៧ ឬស្មើនឹង១៣ភាគរយ ហើយចម្លើយសារភាពអាចបានមកពីការគាបសង្កត់ក្រោមរូបភាពអំពើហិង្សា ឬទារុណកម្មនៅក្នុងសវនាការចំនួន៣៤ ឬស្មើនឹង១៦ភាគរយនៃចំនួនសវនាការដែលបានសង្កេតទាំងអស់។ ប៉ុន្តែមានតែមួយប៉ុណ្ណោះក្នុងសវនាការចំនួន៨៣នៅតុលាការខេត្តកណ្តាល។ របាយការណ៍នេះបាននិយាយថា អនីតិជនចំនួន៩៧ភាគរយ ដែលត្រូវបានកាត់ទោសអំពីបទល្មើសព្រហ្មទណ្ឌនៅតុលាការក្រុងភ្នំពេញ ត្រូវបានឃុំខ្លួនបណ្តោះអាសន្ន។ នេះជាសញ្ញានាំឱ្យមានការព្រួយបារម្ភអំពីចំនួនលើសលុបនៃអត្រាឃុំខ្លួនបណ្តោះអាសន្នសរុប។ អនីតិជនចំនួន៥នាក់ក្នុងចំណោម៦នាក់ ដែលត្រូវបានកាត់ទោសនៅតុលាការខេត្តកណ្តាល ត្រូវបានឃុំខ្លួនបណ្តោះអាសន្ន។ ចៅក្រមកែ សាខន អនុប្រធានតុលាការក្រុងភ្នំពេញបានថ្លែងថា របាយការណ៍របស់មជ្ឈមណ្ឌល សិទ្ធិមនុស្សកម្ពុជានេះសរសេរខុសការណ៍ពិតជាច្រើន។ «និយាយពីរបាយការណ៍របស់គាត់ (មជ្ឈមណ្ឌលសិទ្ធិមនុស្សកម្ពុជា) ខ្ញុំបានជម្រាបប្រាប់គាត់ហើយថា ខ្ញុំមិនទាន់ឯកភាពទេលើរបាយការណ៍នេះទេ ពីព្រោះមតិរបាយការណ៍មួយចំនួនសរសេរទៅ មានការលើស និងការខុសឆ្គង។ អញ្ចឹង ខាងខ្ញុំអត់ទទួលយកទេ និងសុំឱ្យកែតម្រូវឡើងវិញ»។ លោកអ៊ិន វាន់វិបុល ប្រធានតុលាការខេត្តកណ្តាល បានថ្លែងថា ជនជាប់ចោទដែលបានស្លៀកសម្លៀកបំពាក់ជាអ្នកទោសមានបទល្មើសផ្សេងទៀតដែលតុលាការបានផ្តន្ទាទោសរួចហើយ ព្រោះជនជាប់ចោទអាចជាប់ពិរុទ្ធក្នុងបទល្មើស២ ឬ៣។ «អនីតិជនអាយុក្រោម១៤ឆ្នាំ យើងមិនអាចឃុំខ្លួនបានទេ។ ចាប់ពីអាយុ១៤ឆ្នាំឡើង យើងអាចឃុំខ្លួន ចំពោះអនីតិជន គឺអាចពាក់កណ្តាលនៃរយៈពេលឃុំខ្លួន ដែលយោងទៅតាមបទល្មើស ដូចជាបទល្មើសមជ្ឈឹម៤ខែ និងបទល្មើសឧក្រិដ្ឋ៦ខែជាដើម»។ លោកស្រីមាំង ម៉ូនីកាបានបញ្ជាក់ថា លោកស្រីនឹងយករបាយការណ៍នេះទៅប្រគល់ជូនសាលាឧទ្ធរណ៍ ដើម្បីពិភិក្សារកដំណោះស្រាយលើអ្វីដែលបានរកឃើញ៕ This posting includes an audio/video/photo media file: Download Now |
| ព្រះមហាក្សត្រកម្ពុជាបានយាងទៅក្រុងប៉េកាំងពិនិត្យព្រះរាជសុខភាព Posted: 19 Apr 2011 02:10 PM PDT ព្រះមហាក្សត្រកម្ពុជាបានយាងចេញពីទីក្រុងភ្នំពេញនៅថ្ងៃច័ន្ទឆ្ពោះទៅទីក្រុងប៉េកាំង ទីដែលព្រះអង្គនឹងទទួលការពិនិត្យព្រះរាជសុខភាពពីក្រុមគ្រូពេទ្យចិន។ ក៏ប៉ុន្ដែគេមិនទាន់ដឹងថា តើព្រះអង្គនឹងចំណាយពេលគង់នៅប្រទេសចិនយូរប៉ុណ្ណានោះទេ។ ព្រះមហាក្សត្រខ្មែរសម្ដេចព្រះបរមនាថ នរោត្ដម សីហមុនី បានយាងទៅទីក្រុងប៉េកាំងនៅថ្ងៃច័ន្ទនេះដែលព្រះអង្គបានអះអាងថា គឺជាព្រះរាជដំណើរសម្រាប់ពិនិត្យព្រះរាជសុខភាពរបស់ព្រះអង្គ។ នៅក្នុងព្រះរាជសារផ្ញើជូនជនរួមជាតិ ដែលត្រូវចែកចាយដល់ប្រព័ន្ធផ្សព្វផ្សាយនៅថ្ងៃនេះ ព្រះមហាក្សត្រខ្មែរបានបញ្ជាក់ថា ព្រះអង្គនឹងព្រះរាជអវត្តមានពីប្រទេសចាប់ពីថ្ងៃនេះតទៅ ក៏ប៉ុន្ដែព្រះអង្គមិនបានបង្ហាញថា ព្រះអង្គនឹងយាងនិវត្តន៍មកកាន់ប្រទេសកម្ពុជាវិញនៅពេលណានោះទេ។ សម្ដេចព្រះបរមនាថ នរោមត្តម សីហមុនីត្រូវយាងទៅពិនិត្យព្រះសុខភាពនៅទីក្រុងប៉េកាំងប្រទេសចិនជាទៀតទាត់ ដូចសម្តេចឪនរោត្តមសីហនុ ដែលជាព្រះរាជបិតារបស់ព្រះអង្គដែរ។ ព្រះអង្គបានយាងទៅទីក្រុងប៉េកាំងកាលពីខែកុម្ភៈឆ្នាំ២០១០ដើម្បីពិនិត្យព្រះរាជសុខភាព និងដើម្បីឆ្លៀតពេលគាល់ព្រះរាជបិតា និងព្រះរាជមាតាព្រះអង្គដែលគង់នៅទីនោះ។ លោក កែវ ពុធរស្មី មគ្គុទេសគណបក្សហ៊្វុនស៊ីនប៉ិចនិងជាសមាជិករាជវង្សានុវង្សមួយរូប មានប្រសាសន៍ថា ព្រះមហាក្សត្រអាចគង់នៅទីក្រុងប៉េកាំងក្នុងរង្វង់មួយសប្ដាហ៍។ «ខ្ញុំបានគាល់ព្រះអង្គពីថ្ងៃទី១៤ដែលជាថ្ងៃចូលឆ្នាំ។ លោកបានមានព្រះរាជបន្ទូលប្រាប់ខ្ញុំថា លោកយាងទៅដើម្បីធ្វើការពិនិត្យជំងឺជាទូទៅទេ។ លោកអត់មានអីគួរឲ្យបារម្ភទេ។ បើតាមលោកមានបន្ទូល គឺមិនយូរទេ។ ធម្មតាលោកសម្រាកមួយថ្ងៃ ឬពីរថ្ងៃ ហើយបន្ទាប់មកយាងទៅមន្ទីរពេទ្យធ្វើការពិនិត្យជំងឺ ហើយមិនដល់មួយសប្ដាហ៍ទេ តែលោកមិនអាចបញ្ជាក់ថ្ងៃច្បាស់លាស់»។ លោកជា ស៊ីម ប្រធានព្រឹទ្ធសភា លោកហ៊ុន សែន នាយករដ្ឋមន្រ្តីកម្ពុជា រួមទាំងមន្ដ្រីរដ្ឋាភិបាលនិង សមាជិកសភា និងព្រឹទ្ធសភា បានទៅជូនព្រះរាជដំណើររបស់ព្រះមហាក្សត្រនៅអាកាសយានដ្ឋានអន្ដរជាតិក្រុងភ្នំពេញ។ ក្រុមមន្ដ្រីរដ្ឋាភិបាលនិងមន្រ្តីក្រៅរដ្ឋាភិបាលធ្លាប់បានបង្ហាញការយល់ឃើញថា ការយាងទៅពិនិត្យព្រះរាជសុខភាពរបស់អតីតព្រះមហាក្សត្រ និងព្រះមហាក្សត្របច្ចុប្បន្ននេះបានជួយពង្រឹងទំនាក់ទំនងរវាងប្រទេសកម្ពុជា និងប្រទេសចិនមួយកម្រិតបន្ថែមទៀត។ ប្រទេសទាំងពីរបានស្ថិតក្នុងទំនាក់ទំនងជាប្រវត្តិសាស្ដ្រជាមួយគ្នាជាយូរមកហើយ៕ This posting includes an audio/video/photo media file: Download Now |
| បក្សប្រឆាំងនៅតែរកមិនឃើញជំហររួមដើម្បីច្របាច់បញ្ចូលគ្នា Posted: 19 Apr 2011 01:50 PM PDT ប្រធានគណបក្សជំទាស់ពីរក្នុងប្រទេសកម្ពុជាបង្ហាញពីជំហរផ្ទុយគ្នាជាចុងក្រោយទាក់ទងនឹងការ បញ្ចូលគ្នាឲ្យក្លាយជាបក្សតែមួយ។ មេដឹកនាំគណបក្សសិទ្ធិមនុស្សលោក កឹម សុខាទាមទារឲ្យមេដឹកនាំគណបក្សសម រង្ស៉ីគឺលោក សម រង្ស៉ីឲ្យទទួលយកផែនការដាក់បញ្ចូលគណបក្សទាំងពីរតាមរយៈការបង្កើតគណបក្សថ្មីមួយមុនការបោះឆ្នោត។ នៅក្នុងលិខិតជាផ្លូវការផ្ញើជូនលោក សម រង្ស៉ីកាលពីថ្ងៃ១៨ខែមេសា លោក កឹម សុខាបានបញ្ជាក់ពីជំហរចុងក្រោយរបស់លោកគឺមិនគួរមានការរួបរួមក្នុងក្រប ខណ្ឌគណបក្សសម រង្ស៊ីទេ តែគួរប្រកាន់យកគោលការណ៍បង្កើតឬសាងសង់គណបក្សថ្មីមួយ តែឈ្មោះគណបក្សទាំងពីរនៅរក្សាទុកដដែល ដោយលោក កឹម សុខាបានអះអាងថានេះជាឱកាសចុងក្រោយក្នុងការបង្រួបបង្រួមអ្នក សេ្នហាជាតិ អ្នកប្រជាធិបតេយ្យនិយមដើម្បីរៀបចំចលនាប្រជាធិបតេយ្យដើម្បីការផ្លាស់ប្តូរ។ «អ្វីដែលយើងចង់បង្កើតថ្មីមួយសម្រាប់ទាំងអស់គ្នានោះគឺសំខាន់គឺថាជាផ្ទះគ្រឹះ មួយថ្មីបែបសំណង់ប្រជាធិបតេយ្យហើយសម្រាប់អ្នកទាំងអស់គ្នាហ្នឹងនៅជា មួយគ្នាបាន។ គោលបំណងរបស់យើងៗចង់ប្រមូលកម្លាំងឲ្យបានធំទើបយក ឈ្នះ គណបក្សប្រជាជនបាន ទើបយើងអាចផ្លាស់ប្តូរអ្នកដឹកនាំបច្ចុប្បន្នបាន។ បើយើងអត់សង់ស្អីមួយថ្មីទេ កន្លែងចង្អៀតទេយើងអត់អាចយកឈ្នះបានទេ»។ គណបក្សសម រង្ស៉ី និងគណបក្សសិទ្ធិមនុស្សបានព្យាយាមដាក់បញ្ចូលគ្នាឲ្យទៅជាគណបក្សតែមួយជាងពីរឆ្នាំហើយដើម្បីជាការប្រកួតប្រជែងនឹងគណបក្ស ប្រជាជនកម្ពុជារបស់លោកនាយករដ្ឋមន្ត្រីហ៊ុន សែនដែលកាន់អំណាចជាង៣ទសវត្សរ៍មកហើយ។ ក៏ប៉ុន្តែគោលការណ៍ដាក់បញ្ចូលគ្នាដែលក្រុមការងារបានខកខានព្រមព្រៀងគ្នាជាច្រើនលើកនោះ មិនត្រូវបានទទួលយកដោយភាគីទាំងពីរនោះទេជាពិសេសទៅលើបញ្ហាថាតើត្រូវចូលរួមក្នុងគណបក្សណាមួយឬបង្កើតបក្សថ្មីមួយ? លោក កឹម សុខា បានរិះគន់ គណបក្សសម រង្ស៉ីចំពោះការដឹកនាំផង និងការលំបាកដែលលោកទស្សន៍ទាយសម្រាប់កែទម្រង់តាមបែបប្រជាធិបតេយ្យនៅថ្ងៃ អនាគត។ «យើងឃើញថាប្រព័ន្ធដឹកនាំសព្វថ្ងៃនេះក្នុងគណបក្សសម រង្ស៉ីគឺមិនអាចទទួល យកកម្លាំងដទៃទៀតបានទេ។យើងឃើញថាតាំងពីឆ្នាំ២០០៣មកមានតែអ្នក ចេញ អត់មានអ្នកចូលទេ។ អញ្ចឹងហើយកន្លែងហ្នឹងវាចង្អៀតខ្ញុំនិយាយឲ្យស្រួល ស្តាប់ វាចង្អៀតៗត្រង់ថាប្រព័ន្ធគ្រប់គ្រងវាអត់មានភាពទូលំទូលាយ បែបប្រជា ធិបតេយ្យហ្នឹងទី១ ដែលសម្រាប់អ្នកទាំងអស់គ្នា មិនមែនតែ សម្រាប់គណបក្ស សិទ្ធិមនុស្សទេ ដែលយើងចង់ធ្វើហ្នឹងសម្រាប់ឲ្យបានគណបក្ស អ្នកនយោបាយ និងឥស្សរជនដទៃទៀតអាចចូលរួមបាន»។ លោក កឹម សុខាថ្លែងយ៉ាងដូច្នេះទំនងជាយោងទៅលើការចាកចេញរបស់តំណាងរាស្ត្រគណបក្សសម រង្ស៉ីមួយរូបគឺ លោក ម៉ៅ មុន្នីវណ្ណ ទៅចូលរួមជាមួយ គណបក្សសិទ្ធិមនុស្សរបស់លោកនៅសប្តាហ៍ថ្មីៗនេះជាមួយនឹងការមិនពេញចិត្តនានា ដែលជាដើមហេតុ។ លោក សម រង្ស៊ីបានចោទប្រកាន់គណបក្សសិទ្ធិមនុស្សថាបានប្រើប្រាស់ ភាសា ដូចជាគណបក្សប្រជាជនកម្ពុជា។ ដោយលោកបានបញ្ជាក់ថាមុនការជ្រើសរើស រូបមន្តណាមួយដើម្បីរួមរួមគ្នាត្រូវតែមានឆន្ទៈរួមគ្នាពិតប្រាកដ មិនមែនវាយ ប្រហារគ្នា មិនមែនមែនចាត់ទុកគ្នាជាសត្រូវទេ គឺដៃគូ។ «ដូច្នេះមិនត្រូវធ្វើដូចគណបក្សសិទ្ធិមនុស្សដឹកនាំដោយលោក កឹម សុខា ដែល ចាត់ទុកគណបក្សសម រង្ស៊ីថាជាសត្រូវ។ សុំឲ្យកុំច្រឡំសត្រូវរវាងអ្នកប្រជាធិបតេយ្យ ក្នុងជួរអ្នកសេ្នហាជាតិ។ សត្រូវគឺបរទេសឈ្លានពាននឹងបរិវាររបស់គេ មិនមែនអ្នកស្នេហាជាតិដូចគ្នាទេ»។ លោក សម រង្ស៉ីដែលកំពុងនិរទេសខ្លួននៅក្រៅប្រទេសបានអះអាងថា មានតែ គណបក្ស សម រង្ស៉ីមួយគត់ដែលហ៊ាន ចេញមុខតវ៉ា រឿងរំលោភបំពានព្រំដែន ជាពិសេសជាមួយអាជ្ញាធរវៀតណាម។ ប៉ុន្តែការចោទប្រកាន់នោះតែងតែត្រូវវៀតណាមបដិសេធ។ «បើចាត់ទុកគណបក្សសម រង្ស៉ីជាសត្រូវហើយ ហេតុអ្វីបានចង់មករួមកម្លាំង ជាមួយគណបក្សសម រង្ស៉ី ឬមួយគ្រាន់តែបញ្ចូលពិសពុលតែប៉ុណ្ណោះ ពីព្រោះ គណបក្សសម រង្ស៉ីធ្លាប់ឆ្លងកាត់អស់ហើយការណ៍ដែលគេចង់វាយប្រហារ បញ្ចូលពិសពុល គេធ្វើ បក្សប្រហារ ពីក្នុងពីក្រៅ តែយើងដឹងអស់ ហើយដូច្នេះយើងត្រូវ តែប្រុងប្រយ័ត្នដើម្បីរក្សាកម្លាំងស្នេហាជាតិពិតប្រាកដឲ្យបានគង់វង្ស ឲ្យបាន ស្ថិតស្ថេរ ឲ្យបានរឹងមាំ ពីព្រោះគណបក្ស សម រង្ស៉ីជាក្តីសង្ឃឹមតែមួយគត់សម្រាប់ប្រជារាស្ត្រខ្មែរ»។ អ្នកវិភាគក្នុងប្រទេសកម្ពុជាលោក ពុទ្ធា ហង្ស នាយកប្រតិបត្តិនៃអង្គកានិកហ្វិក បាន អះអាងថាគណបក្សទាំងពីរដែលជាគណបក្សមានសំឡេងក្នុងរដ្ឋសភាមិនអាចឈានដល់កិច្ចព្រមព្រៀងគ្នាទេក្នុងការដាក់បញ្ចូលគ្នាដោយសារគណបក្ស ទាំងពីរ មើលទៅពុំឃើញមានភាគីណាមួយព្រមធ្វើការលះបង់។ «ខ្ញុំគិតថាគណបក្សរៀងខ្លួនសុទ្ធតែមានគោលនយោបាយ ហើយនឹងសុទ្ធតែមានជំហានឬក៏យុទ្ធសាស្ត្ររបស់ខ្លួន អញ្ចឹងនៅពេលដែលពីរបូកបញ្ចូលគ្នាវាច្បាស់ជាមានចំណុចណាដែលត្រួតស៊ីគ្នា ប៉ះពាល់ដល់គ្នាទៅវិញទៅមក អញ្ចឹងការប៉ះពាល់ ឬក៏មិនស្របទស្សនៈគ្នាទាមទារឲ្យមានការលះបង់នឹងឱ្យមានការសម្របសម្រួលទើបអាចដំណើរការបាន»។ លោក ពុទ្ធា ហង្សបានអះអាងថា ថ្វីត្បិតតែអ្នកនយោបាយពិបាកនឹងប៉ាន់ស្មាន ក្នុងការសម្រេចចិត្តមែនតែប្រសិនបើការរង់ចាំដល់កៀកបោះឆ្នោត ហើយសម្រេចចិត្តនោះ វាជារឿងមិនល្អដូចការសម្រេចចិត្តពីចម្ងាយទេ។ ប្រទេសកម្ពុជានឹងធ្វើការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅឆ្នាំ២០១២ និងបោះឆ្នោតជ្រើសតំណាងរាស្ត្រនៅឆ្នាំ២០១៣។ គណបក្សសម រង្ស៊ីទទួលអាសនៈក្នុងរដ្ឋសភាចំនួន ២៦ គណបក្សសិទ្ធិមនុស្សទទួលបានអាសនៈ៣ ហើយ នឹងគណបក្សប្រជាជនកម្ពុជា ដែលជាគណបក្សគ្រប់គ្រងប្រទេសទទួលបានអាសនៈ៩០ ក្នុងចំណោមអាសនៈសរុប១២៣ក្រោយការបោះឆ្នោតឆ្នាំ២០០៨៕ This posting includes an audio/video/photo media file: Download Now |
| អាមេរិកនៅមិនទាន់លើកលែងការហាមឃាត់លើការសុំកូនខ្មែរ Posted: 19 Apr 2011 12:14 PM PDT សហរដ្ឋអាមេរិកបានដាក់បម្រាមស្មុំកូនកម្ពុជាកាលពីខែធ្នូឆ្នាំ២០០១។ ចាប់តាំងពីឆ្នាំ ២០០៩ កម្ពុជាព្យាយាមធ្វើឲ្យដំណើរការស្មុំកូនឈានទៅដល់បទដ្ឋានអន្តរជាតិ។ ប៉ុន្តែ មន្ត្រីសហរដ្ឋអាមេរិក និងក្រុមការពារសិទ្ធិកុមារឲ្យដឹងថា គោលនយោបាយស្មុំកូនរបស់កម្ពុជាមិនទាន់ល្អគ្រប់គ្រាន់នៅឡើយ។ ឯកអគ្គរដ្ឋទូតសហរដ្ឋអាមេរិក ស៊ូសាន ដ្យេខបស៍ (Susan Jacobs) ទទួលបន្ទុកកិច្ចការការពារកុមារ បានមកទស្សនកិច្ចប្រទេសកម្ពុជានាពេលថ្មីៗនេះ ដើម្បីស្វែងយល់អំពីថា តើគោលនយោបាយរបស់កម្ពុជាក្នុងការការពារកុមារល្អល្មមគ្រប់គ្រាន់ដើម្បីឲ្យសហរដ្ឋអាមេរិកបើកដំណើរការស្មុំកូនកម្ពុជាឡើងវិញបានហើយឬនៅ។ ក្នុងដំណើរទស្សនកិច្ចនោះ លោកស្រីបានជួបជាមួយនឹងអង្គការក្រៅរដ្ឋាភិបាល ស្ថានទូត និងមន្ត្រីរដ្ឋាភិបាលកម្ពុជា។ ប៉ុន្តែនៅក្នុងបទសម្ភាសមួយជាមួយវីអូអេខ្មែរ លោកស្រីឯកអគ្គរដ្ឋទូត ស៊ូសាន ដ្យេខបស៍ មានប្រសាសន៍ថា សហរដ្ឋអាមេរិកមិនទាន់អនុញ្ញាតឲ្យប្រជាពលរដ្ឋរបស់ខ្លួនចូលមកសុំកូនកម្ពុជាបានទេ។ លោកស្រីបន្តថា រដ្ឋាភិបាលនៅមានការងារជាច្រើនទៀតដែលត្រូវធ្វើ។ «គេពិតជាកំពុងធ្វើការតាមគន្លងត្រឹមត្រូវហើយ។ ពួកគេធ្វើកិច្ចការនេះដោយយកចិត្តទុកដាក់ និងពិតជាចង់ធ្វើកិច្ចការត្រឹមត្រូវ។ កិច្ចខិតខំប្រឹងប្រែងនោះនឹងអាចសម្រេចបានផលល្អ»។ ស្មុំកូនអន្តរជាតិអាចមានរឿងចម្រូងចម្រាសច្រើន។ ការសុំកូនចិញ្ចឹមដោយឪពុកម្តាយនៅប្រទេសអ្នកមានអាចបង្កឲ្យមានការជួញដូរកុមារដោយឪពុកម្តាយដែលប្រកបដោយបញ្ហានៅប្រទេសក្រីក្រ។ មុនឆ្នាំ២០០១ កុមារកម្ពុជារាប់ពាន់នាក់ត្រូវបានសុំចិញ្ចឹមដោយឪពុកម្តាយនៅអាមេរិក ប៉ុន្តែសហរដ្ឋអាមេរិកបានដាក់ការហាមប្រាមបន្ទាប់ពីមានការព្រួយបារម្ភថា កុមារត្រូវបានជួញដូរ និងចាប់ពង្រាត់ ហើយដំណើរការស្មុំកូនចិញ្ចឹមនៅកម្ពុជាមិនមានភាពត្រឹមត្រូវ។ កម្ពុជាបានអនុម័តច្បាប់ស្មុំកូនអន្តរប្រទេសនៅឆ្នាំ ២០០៩។ ច្បាប់មានទិសដៅបង្កើតដំណើរការស្មុំកូនចិញ្ចឹម ឲ្យត្រូវនឹងបទដ្ឋានដែលត្រូវបានកំណត់ដោយអនុសញ្ញាក្រុងឡាអេ ហើយធានាថា ការសុំកូនចិញ្ចឹមត្រូវបានទទួលស្គាល់ស្របច្បាប់។ ប៉ុន្តែរហូតមកដល់ពេលនេះ ការអនុវត្តច្បាប់នៅខ្វះខាត់នៅឡើយ។ លោក លឹម អែល ឌ្យូរ៉ាដូ អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា បានឲ្យដឹងថា ក្រសួងកំពុងធ្វើសេចក្តីព្រាងប្រកាស និងអនុក្រឹត្យមួយចំនួនដើម្បីធ្វើឲ្យដំណើរការស្មុំកូនប្រកបដោយសុវត្ថិភាព។ ប៉ុន្តែរដ្ឋាភិបាលកម្ពុជាត្រូវការជំនួយពីអន្តរជាតិដើម្បីធ្វើឲ្យប្រាកដថា សេចក្តីព្រាងប្រកាស និងអនុក្រឹត្យទាំងនោះត្រូវបានសរសេរត្រឹមត្រូវ។ ប៉ុន្តែលោកស្រីឯកអគ្គរដ្ឋទូតដ្យេខបស៍ មានប្រសាសន៍ថា ច្បាប់នោះគ្រាន់តែជាការចាប់ផ្តើមប៉ុណ្ណោះ។ មានកិច្ចការជាច្រើនទៀតដែលត្រូវធ្វើដើម្បីធានានូវភាពស្របច្បាប់នៃដំណើរការស្មុំកូនចិញ្ចឹមនេះ។ ជាអាទិ៍ វាជាការលំបាកក្នុងការចែកឲ្យដាច់រវាង ក្មេងកំព្រាពិតប្រាកដ និងក្មេងដែលមានឪពុកម្តាយនៅរស់។ លោកស្រីបន្តថា៖ «ដូច្នេះ គេត្រូវមានប្រព័ន្ធទិន្នន័យមួយ ដែលមានព័ត៌មានអំពីរឿងនោះ។ ពេលនេះ បើតាមការយល់របស់ខ្ញុំគឺថា នៅក្នុងប្រទេសកម្ពុជា គ្មានប្រព័ន្ធផ្ទុកព័ត៌មានអំពីការបំបរបង់ក្មេងផ្លួវការទេ ហើយនោះគឺជាអ្វីដែលត្រូវបញ្ចូលទៅក្នុងច្បាប់ថ្មី»។ លោក ម៉ាក វើរហ្ការ៉ា (Marc Vergara) អ្នកនាំពាក្យអង្គការយូនីសេហ្វ (UNICEF) និយាយថា កម្ពុជាមិនទាន់រៀបចំខ្លួនរួចរាល់នៅឡើយទេ។ «យើងជឿថា យន្តការត្រឹមត្រូវមិនទាន់មាន ហើយប្រព័ន្ធដែលមានស្រាប់មិនទាន់គ្រប់គ្រាន់ ហើយឧបករណ៍ច្បាប់ទាំងនេះនៅពេលនេះមិនទាន់ល្អគ្រប់គ្រាន់ក្នុងការដំណើរការឡើងវិញនូវការសុំកូនចិញ្ចឹមចិញ្ចឹមនៅកម្ពុជាទេ»។ មន្ត្រីកម្ពុជានៅតែធ្វើការកែលម្អប្រព័ន្ធដែលមានស្រាប់ឡើងវិញ។ ប៉ុន្តែសម្រាប់ពេលនេះ សហរដ្ឋអាមេរិកឲ្យដឹងថា ខ្លួនមិនទាន់អនុញ្ញាតឲ្យមានការសុំកូនចិញ្ចឹមពីកម្ពុជាឡើងវិញទេ ហើយឲ្យដឹងទៀតថា មិនដឹងជាពេលណាទើបស្មុំកូននេះនឹងត្រូវបានអនុញ្ញាតឡើងវិញនោះទេ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
