VOA News: ព័ត៌មាន: “ក្រុមបរិស្ថានខឹងនឹងការចាប់ផ្តើមសាងសង់ទំនប់ទឹកឡាវមុនមានការអនុញ្ញាត” plus 2 more |
- ក្រុមបរិស្ថានខឹងនឹងការចាប់ផ្តើមសាងសង់ទំនប់ទឹកឡាវមុនមានការអនុញ្ញាត
- កិច្ចព្រមព្រៀងអំពីទន្លេមេគង្គមានចម្លោះប្រហោង
- គ្រោះថ្នាក់ចរាចរណ៍អំឡុងពេលចូលឆ្នាំថ្មី២០១១សម្លាប់អ្នកដំណើរច្រើនជាងមុន
| ក្រុមបរិស្ថានខឹងនឹងការចាប់ផ្តើមសាងសង់ទំនប់ទឹកឡាវមុនមានការអនុញ្ញាត Posted: 18 Apr 2011 02:51 PM PDT ក្រុមអ្នកវិទ្យាសាស្រ្តនិងអ្នកបរិស្ថាននៅក្នុងតំបន់ មានការខឹងសម្បារបន្ទាប់ពីមានសេចក្តីរាយការណ៍ថាក្រុមហ៊ុនសំណង់ថៃមួយបានចាប់ផ្តើមការងារជាបឋម នៅការដ្ឋានសាងសង់ទំនប់វារីអគ្គិសនីនាភាគខាងជើងប្រទេសឡាវ មុនពេលដែលបណ្តាប្រទេសនៅតំបន់ទន្លេមេគង្គបានបានផ្តល់ការយល់ព្រមជាផ្លូវការ។ គម្រោងសាងសង់ទំនប់វារីអគ្គិសនីសាយ៉ាប៊ូរី (Xayaburi) ដែលមានថាមពល១.២៦០មេហ្កាវ៉ាត់នៅភាគខាងជើងប្រទេសឡាវកំពុងប្រឈមមុខនឹងរឿងចម្រូងចម្រាសថ្មីមួយទៀតក្រោយពីបណ្តាញសារព័ត៌មានថៃបានរាយការណ៍ថា ការងារសាងសង់ជំហានដំបូងបានចាប់ផ្តើមតាំងពីមុនពេលមានការអនុញ្ញាតដោយគណៈកម្មការទន្លេមេគង្គ។ គណៈកម្មការនេះដែលមានតំណាងមកពីប្រទេសកម្ពុជា ឡាវ ថៃ និងវៀតណាម គ្រោងនឹងធ្វើរបាយការណ៍ចុងក្រោយនៅថ្ងៃអង្គារដើម្បីសម្រេចថាតើគម្រោងអភិវឌ្ឍន៍ដែលមានទឹកប្រាក់ចំនួន៣,៥ពាន់លានដុល្លារនឹងអាចឱ្យដំណើរការទៅមុខឬយ៉ាងណា។ កាលពីឆ្នាំ២០០៧ ប្រទេសថៃនិងប្រទេសឡាវបានព្រមព្រៀងគ្នាថាថាមពលអគ្គិសនីចំនួន៩៥ភាគរយដែលបានមកពីទំបន់វារីអគ្គិសនីនេះនឹងត្រូវលក់ទៅឱ្យប្រទេសថៃ ដោយប្រើប្រាស់ថវិកានិងក្រុមហ៊ុនសំណង់ថៃសម្រាប់គាំទ្រគម្រោងអភិវឌ្ឍន៍នេះ។ ទំនប់សាយ៉ាប៊ូរី គឺជាទំបន់ទីមួយក្នុងប្រព័ន្ធទន្លេមេគង្គដែលតម្រូវឱ្យមានការឯកភាពពីរដ្ឋាភិបាលនានា។ ប៉ុន្តែសេចក្តីរាយការណ៍ជាច្រើនក្នុងបណ្តាញសារព័ត៌មានថៃកាលពីចុងសប្តាហ៍បានបង្ហាញរូបភាពការសាងសង់ជាបឋមនៅឯការដ្ឋាននាភាគខាងជើងប្រទេសឡាវដែលបានចាប់ផ្តើមអស់ជាច្រើនសប្តាហ៍មកហើយ។ សេចក្តីរាយការណ៍ក្នុងបណ្តាញសារព័ត៌មាននោះបានធ្វើឱ្យក្រុមអ្នកបរិស្ថាននិងអ្នកវិទ្យាសាស្រ្តខឹងសម្បារជាខ្លាំងដោយសារពួកគេចង់ឱ្យមានការសិក្សាតាមបែបវិទ្យាសាស្រ្តបន្ថែមទៀតលើផលប៉ះពាល់នៃទំនប់នៅតាមប្រព័ន្ធទន្លេមេគង្គ។ នាង អេមី ត្រេនដឹម (Ame Trandem) អ្នកធ្វើយុទ្ធនាការម្នាក់សម្រាប់ទន្លេមេគង្គដែលមកពីអង្គការ បណ្តាញទន្លេអន្តរជាតិ (International Rivers) ដែលជាក្រុមអ្នកបរិស្ថាន បានមានប្រសាសន៍ថាក្នុងដំណើរការវាយតម្លៃបានអំពាវនាវឱ្យពន្យារការសាងសង់ណាមួយលើប្រព័ន្ធទន្លេមេ។ «ផលប៉ះពាល់ដែលបង្កដោយទំនប់នេះមានទំហំធំជាងផលចំណេញ ដែលនេះគឺជាបញ្ហាមួយ។ ការវាយតម្លៃផ្នែកបរិស្ថានជាយុទ្ធសាស្រ្តដែលចេញមកពីគណៈកម្មការទន្លេមេគង្គ ក្នុងរយៈពេលបីសប្តាហ៍ក្រោយពីដំណើរការគម្រោងទំនប់សាយ៉ាប៊ូរីបានចាប់ផ្តើម បានផ្តល់ជាអនុសាសន៍ថារាល់ការសម្រេចចិត្តលើការសាងសង់ទំនប់លើប្រព័ន្ធមេទឹកគួរតែពន្យារពេល១០ឆ្នាំសិនព្រោះផលប៉ះពាល់មានទំហំធំខ្លាំងណាស់»។ ក្រុមអ្នកបរិសា្ថននិយាយថា ទំនប់ទឹកសាយ៉ាប៊ូរីនឹងប៉ះពាល់ដល់ប្រព័ន្ធអេកូឡូស៊ី និងចរន្តទឹកទន្លេមេគង្គ។ មន្ត្រីរដ្ឋាភិបាលវៀតណាមក៏បានសម្តែងការព្រួយបារម្ភពីផលប៉ះពាល់ដែលទំនប់នេះមានលើតំបន់ដែនដីសណ្តសម្រាប់ដាំស្រូវ។ ជាដំបូងនោះ គឺមានប្រជាពលរដ្ឋចំនួន២.០០០នាក់នឹងត្រូវផ្លាស់ប្តូរទីលំនៅដោយបង្ខំហើយនឹងមានមនុស្ស២០០.០០០នាក់ផ្សេងទៀតនឹងត្រូវប៉ះពាល់ដោយប្រយោល។ សេចក្តីរាយការណ៍របស់បណ្តាញសារព័ត៌មានថៃក៏បានឱ្យដឹងថាកសិករក្រីក្រឡាវត្រូវបានក្រុមហ៊ុនសំណង់ថៃផ្តល់ប្រាក់សំណងតែប្រមាណ១៥ដុល្លារប៉ុណ្ណោះ។ នាង Painporn Deetes នៃអង្គការ International Rivers និយាយថាទំហំនៃការបង់សំណងនេះបង្ហាញឱ្យដឹងថាក្រុមហ៊ុនអភិវឌ្ឍន៍នេះមិនយល់ដឹងទាំងស្រុងពីផលប៉ះពាល់របស់គម្រោងនេះទៅលើសហគមន៍នៅក្នុងតំបន់ទេ។ «តើគេអាចសងប្រជាពលរដ្ឋទាំងនេះដូចម្តេច ហើយតើគេអាចសងការខូចខាតដល់កសិករទាំងនោះដែលកំពុងរស់នៅ លើដែនដីសណ្តទន្លេមេគង្គយ៉ាងម៉េចទៅ នៅពេលដែលដីស្រែរបស់ពួកគេត្រូវទឹកសមុទ្រជន់លិច តើយើងអាចបញ្ចូលប្រជាពលរដ្ឋទាំងអស់នេះយ៉ាងម៉េចដើម្បី អាចឮសំឡេងរបស់ពួកគេបាន? ពីព្រោះដំណាក់កាលនៃការសម្រេចចិត្តគឺមិនមែនត្រូវធ្វើតែមនុស្សមានអំណាចពីរបីនាក់អង្គុយក្នុងបន្ទប់ម៉ាស៊ីនត្រជាក់ទេ»។ លោក ជីម វ៉េប សមាជិកព្រឹទ្ធសភាសហរដ្ឋអាមេរិកបានសម្តែងការព្រួយបារម្ភចំពោះសេចក្តីរាយការណ៍ថារដ្ឋាភិបាលឡាវបានត្រៀមខ្លួននឹងចាប់ផ្តើមដំណើរការទំនប់សាយ៉ាប៊ូរីនេះ។ នៅក្នុងសេចក្តីថ្លែងការណ៍លោក វ៉េប បានបញ្ជាក់ថាការសម្រេចចិត្តនេះជាគំរូអាក្រក់មួយដែលមានគ្រោះថ្នាក់ដល់បរិស្ថានក្នុងតំបន់។ មានទំនប់វារីអគ្គិសនីរហូតដល់១០ត្រូវបានស្នើសាងសង់នៅតំបន់ទន្លេមេគង្គខាងក្រោម ដោយក្រុមអ្នកបរិស្ថានបានព្រមានថាមានប្រជាពលរដ្ឋរហូតដល់៤០លាននាក់នឹងទទួលរងការប៉ះពាល់ប្រសិនបើគេសាងសង់ទំនប់នោះមែន ហើយក៏ នឹងមានផលប៉ះពាល់ដល់ប្រព័ន្ធអេកូឡូស៊ីក្នុងតំបន់ផងដែរ៕ ប្រែសម្រួលដោយ ម៉ែន គឹមសេង This posting includes an audio/video/photo media file: Download Now |
| កិច្ចព្រមព្រៀងអំពីទន្លេមេគង្គមានចម្លោះប្រហោង Posted: 18 Apr 2011 01:50 PM PDT មន្ត្រីនៃគណៈកម្មការទន្លេមេគង្គ ក្នុងទីក្រុងវៀងច័ន្ទ ប្រទេសឡាវ បានលើកឡើងថា កិច្ចព្រមព្រៀងរបស់ប្រទេសជាសមាជិកនៃគណៈកម្មការនេះនៅមានចម្លោះប្រហោងនៅឡើយទាក់ទងនឹងការសាងសង់ទំនប់វារីអគ្គិសនីលើដងទន្លេមេគង្គ។ ការលើកឡើងនេះធ្វើឡើងនៅខណៈពេលដែលបណ្តាប្រទេសទន្លេមេគង្គផ្នែកខាងក្រោមចំនួន៤កំពុងត្រៀមរៀបចំកិច្ចប្រជុំចុងក្រោយមួយស្តីអំពីទំនប់វារីអគ្គិសនីសាយ៉ាបូរីដ៏ចម្រូងចម្រាស់របស់ឡាវ។ បើទោះជាបណ្តាប្រទេសទន្លេមេគង្គផ្នែកក្រោមចំនួន៣ទៀតគឺថៃ កម្ពុជា និងវៀតណាម ជំទាស់ទៅនឹងគម្រោងសាងសង់ទំនប់វារីអគ្គិសនីសាយ៉ាបូរីរបស់ឡាវក៏ដោយ ក៏ប្រទេសឡាវ នៅតែអាចអនុវត្តគម្រោងសាងសង់ទំនប់របស់ខ្លួនបានដែរ ប្រសិនបើខ្លួនចង់នោះ។ ឡាវអាចអនុវត្តបាន ដោយសារតែនីតិវិធីនៃកិច្ចព្រមព្រៀងរវាងប្រទេសជាសមាជិកទាំង៤នៃគណៈកម្មការទន្លេមេគង្គទាក់ទងនឹងការសាងសង់ទំនប់វារីអគ្គិសនីលើដងទន្លេមេគង្គនេះ មិនបានតម្រូវឲ្យមានការយល់ព្រមគ្នាជាឯកច្ឆ័ន្ធរវាងប្រទេសជាសមាជិកទាំងអស់នោះទេ នេះបើយោងតាមមន្ត្រីជំនាញនៃគណៈកម្មការទន្លេមេគង្គ។ លោកជា សុភារិន មន្ត្រីកម្មវិធីទទួលបន្ទុកផ្នែកនីតិវិធីនិងកិច្ចការនយោបាយនៃគណៈកម្មការទន្លេមេគង្គប្រចាំនៅទីក្រុងវៀងច័ន្ទ មានប្រសាសន៍នៅក្នុងបទសម្ភាសន៍ជាមួយVOA Khmer នៅល្ងាចថ្ងៃច័ន្ទនេះថា នីតិវិធីសម្រាប់ការជូនដំណឹង ការពិគ្រោះយោបល់ជាមុននិងការព្រមព្រៀងគ្នា ដែលហៅកាត់ជាភាសាអង់គ្លេសថា PNPCAនោះ មិនបានតម្រូវឲ្យប្រទេសជាសមាជិកនីមួយៗយល់ព្រមទាំងអស់គ្នា ដើម្បីឲ្យប្រទេសណាមួយអាចអនុវត្តគម្រោងសាងសង់ទំនប់វារីអគ្គិសនីរបស់ខ្លួននោះទេ។ «នៅក្នុងPNPCA ហ្នឹងគឺគេមិនកំណត់ថា ប្រទេសឡាវ ឧទាហរណ៍ទាក់ទងនឹងសាយ៉ាបូរីនេះ ប្រទេសឡាវជាប្រទេសដែលលើកសំណើ មានន័យថា គេគ្មានសិទ្ធិ Veto ហើយប្រទេសផ្សេងៗក៏គ្មានសិទ្ធិ Veto ប្រឆាំងមិនឲ្យធ្វើដែរ»។ ការលើកឡើងនេះធ្វើឡើង នៅមុនពេលដែលបណ្តាប្រទេសទន្លេមេគង្គផ្នែកខាងក្រោមទាំង៤ គឺ កម្ពុជា វៀតណាម ថៃ និងឡាវ ត្រៀមជួបប្រជុំគ្នានៅថ្ងៃអង្គារទី១៩ ខែមេសាក្នុងទីក្រុងវៀងច័ន្ទនេះ ដើម្បីសម្រេចចិត្តជាចុងក្រោយថា តើត្រូវអនុញ្ញាតឲ្យមានការសាងសង់ទំនប់វារីអគ្គិសនីសាយ៉ាបូរីរបស់ឡាវនោះឬយ៉ាងណា។ លោកជា សុភារិនមានប្រសាសន៍ថា បើផ្អែកតាមនីតិវិធី PNPCA និងកិច្ចព្រមព្រៀងមេគង្គឆ្នាំ១៩៩៥រវាងប្រទេសទាំងបួន ហាក់ដូចជាគ្មាននីតិវិធីណាមួយដែលអាចរារាំងប្រទេសឡាវមិនឲ្យសាងសង់ទំនប់របស់ខ្លួនបានទេ ប្រសិនបើប្រទេសនេះពិតជាចង់បន្តគម្រោងទំនប់វារីអគ្គិសនីរបស់ខ្លួននោះ។ «ដូចជាយើងមិនមានអ្វីដែលត្រូវ របៀបដូចជានីតិវិធី ឬក៏ស្អីដែលអាចហាមឃាត់គេបានទេ»។ ទំនប់សាយ៉ាបូរី ដែលស្ថិតនៅភាគខាងជើងប្រទេសឡាវគឺជាទំនប់មួយក្នុងចំណោមទំនប់វារីអគ្គិសនីធំៗយ៉ាងតិចចំនួន១១ដែលគេគ្រោងនឹងសាងសង់លើដងទន្លេមេគង្គផ្នែកខាងក្រោម ជាពិសេសគឺនៅក្នុងប្រទេសឡាវនិងកម្ពុជា។ បើតាមគម្រោង ទំបន់នោះនឹងត្រូវសាងសង់ដោយក្រុមហ៊ុនថៃមួយឈ្មោះCh Karnchang ដោយគ្រោងផលិតថាមពលអគ្គិសនីកម្រិត១២៦០មេហ្គាវ៉ាត់។ ៩៥%នៃថាមពលអគ្គិសនីដែលទំនប់របស់ឡាវផលិតបាននេះ នឹងត្រូវលក់ទៅឲ្យប្រទេសថៃ នេះបើយោងតាមរបាយការណ៍របស់អង្គការទន្លេអន្តរជាតិ (International Rivers)។ របាយការណ៍ក៏បង្ហាញផងដែរថា ប្រសិនបើត្រូវបានសាងសង់មែននោះ ទំនប់សាយ៉ាបូរី នឹងធ្វើឲ្យខូចខាតប្រព័ន្ធអេកូឡូស៊ីនិងជីវចម្រុះនៅក្នុងទន្លេមេគង្គជារៀងរហូត ហើយនឹងធ្វើឲ្យបាត់បង់ពពួកពូជមច្ឆាយ៉ាងតិចចំនួន៤១ប្រភេទ ដូចជាពូជត្រីរាជជាដើម។ ការបាត់បង់នេះ នឹងធ្វើប៉ះពាល់ធ្ងន់ធ្ងរដល់ជីវភាពរស់នៅរបស់ប្រជាជនរាប់លាននាក់ជាពិសេសប្រជាជនកម្ពុជាដែលរស់នៅពឹងអាស្រ័យទៅលើទន្លេមេគង្គនេះ។ តែទោះជាយ៉ាងនេះក្តី កាសែតBangkok Post របស់ថៃបានរាយការណ៍កាលពីថ្ងៃអាទិត្យថា គម្រោងសាងសង់ទំនប់វារីអគ្គិសនីសាយ៉ាបូរីរបស់ប្រទេសឡាវនេះបានចាប់ផ្តើមរួចទៅហើយ។ នៅថ្ងៃច័ន្ទនេះ អង្គការទន្លេអន្តរជាតិ International River ក៏បានចេញសេចក្តីថ្លែងការណ៍មួយថ្កោលទោសការចាប់ផ្តើមសាងសង់ទំនប់សាយ៉ាបូរីនោះ ហើយក៏អំពាវនាវឲ្យប្រទេសទន្លេមេគង្គក្រោមផ្សេងទៀតបដិសេធគម្រោងសាងសង់ទំនប់នោះនៅក្នុងកិច្ចប្រជុំរបស់ខ្លួននៅថ្ងៃអង្គារនេះ។ ព្រឹទ្ធសមាជិកសហរដ្ឋអាមេរិក លោកJim Webbក៏បានព្រមានផងដែរអំពីផលវិបាកធ្ងន់ធ្ងរនៅក្នុងតំបន់ដែលអាចកើតមានឡើងដោយសារកង្វះការសហការគ្នារវាងបណ្តាប្រទេសទន្លេមេគង្គផ្នែកខាងក្រោមទាក់ទងនឹងគម្រោងសាងសង់ទំនប់នោះ។ មន្ត្រីពាក់ព័ន្ធរបស់រដ្ឋាភិបាលឡាវមិនអាចទាក់ទងដើម្បីស្នើសុំការបញ្ជាក់ណាមួយបានទេនៅថ្ងៃច័ន្ទនេះ។ ចំណែកមន្ត្រីនៃគណៈកម្មការទន្លេមេគង្គក៏មិនអាចផ្តល់ការបញ្ជាក់បានដែរចំពោះរបាយការណ៍ព័ត៌មានអំពីការចាប់ផ្តើមសាងសង់ទំនប់សាយ៉ាបូរីនោះ។ ទោះជាយ៉ាងនេះក្តី លោកជា សុភារិនមានប្រសាសន៍ថា លោកជឿថា ប្រទេសឡាវនឹងធ្វើការពិចារណាអំពីការព្រួយបារម្ភនិងការអំពាវនាវនានារបស់បណ្តាប្រទេសជាសមាជិកនៃគណៈកម្មការទន្លេមេគង្គ មុននឹងសម្រេចចិត្តទៅលើគម្រោងសាង់សង់ទំនប់នោះ។ ប៉ុន្តែរហូតទាល់តែនៅក្រោយកិច្ចប្រជុំរបស់បណ្តាប្រទេសទាំងបួននៅថ្ងៃអង្គារ ទី១៩ ខែមេសានេះសិន ទើបគេអាចដឹងបានពិតប្រាកដ ថាតើទំនប់សាយ៉ាបូរីរបស់ប្រទេសឡាវនោះ នឹងអាចលេចចេញជារូបរាង ឬក៏យ៉ាងណានោះ៕ This posting includes an audio/video/photo media file: Download Now |
| គ្រោះថ្នាក់ចរាចរណ៍អំឡុងពេលចូលឆ្នាំថ្មី២០១១សម្លាប់អ្នកដំណើរច្រើនជាងមុន Posted: 18 Apr 2011 01:31 PM PDT ចំនួនមនុស្សស្លាប់ដោយគ្រោះថ្នាក់ចរាចរណ៍ក្នុងឱកាសបុណ្យចូលឆ្នាំថ្មីប្រពៃណីខ្មែរ២០១១នេះបានកើនឡើងលើសឆ្នាំ២០១០ ដោយការមិនគោរពច្បាប់ចរាចរណ៍ ការបើកបរលឿន ការបើកបរធ្វេសប្រហែស និងការបើកបរក្នុងពេលស្រវឹង។ ក្រុមមន្ត្រីរដ្ឋាភិបាលបានសម្តែងការព្រួយបារម្ភអំពីគ្រោះថ្នាក់ចរាចរណ៍ ដោយសន្យាខំប្រឹងពង្រឹងការអនុវត្តច្បាប់ និងការអប់រំ ដើម្បីកាត់បន្ថយគ្រោះថ្នាក់ចរាចរណ៍នេះ។ ក្រុមមន្ត្រីរដ្ឋាភិបាល បាននិយាយនៅថ្ងៃច័ន្ទនេះថា ចំនួនមនុស្សស្លាប់ក្នុងគ្រោះថ្នាក់ចរាចរណ៍ក្នុងឱកាសបុណ្យចូល ឆ្នាំថ្មីប្រពៃណីខ្មែររយៈពេលបីថ្ងៃនេះបានកើនឡើងដល់៥៥នាក់ពីចំនួនមនុស្សស្លាប់៤៩នាក់ក្នុងរយៈពេលដូចគ្នាកាលពីឆ្នាំទៅ។ លោកហ៊ឹម យ៉ាន ប្រធាននាយកដ្ឋានចរាចណ៍ផ្លូវគោកនៃក្រសួងមហាផ្ទៃ បានថ្លែងថា មនុស្ស៥៥នាក់បានស្លាប់ និងជាង២០០នាក់ផ្សេងទៀតបានរងរបួសធ្ងន់ក្នុងគ្រោះថ្នាក់ចរាចរណ៍ផ្លូវគោកចាប់ពីថ្ងៃព្រហស្បតិ៍ដែលជាថ្ងៃចាប់ផ្តើមការប្រារព្ធពិធីបុណ្យចូលឆ្នាំថ្មីប្រពៃណីខ្មែររយៈពេលបីថ្ងៃ។ លោកហ៊ឹម យ៉ានបានបញ្ជាក់ថា ចំនួនមនុស្សស្លាប់បានកើនឡើង៦នាក់ និងចំនួនអ្នករងរបួសធ្ងន់បានថយចុះជាង៤០នាក់ក្នុងឱកាសបុណ្យចូលឆ្នាំប្រពៃណីខ្មែរឆ្នាំ២០១១ បើប្រៀបធៀបនឹងរយៈពេលដូចគ្នាក្នុងឆ្នាំ២០១០។ ក្នុងឱកាសបុណ្យចូលឆ្នាំថ្មីប្រពៃណីខ្មែររយៈពេលបីថ្ងៃនេះ មនុស្ស៩នាក់ត្រូវបានរាយការណ៍ថា បានស្លាប់នៅក្នុងខេត្តបាត់ដំបង ៥នាក់នៅក្នុងខេត្តកំពង់ចាម ៦នាក់នៅក្នុងទីក្រុងភ្នំពេញ ៥នាក់នៅក្នុងខេត្តកំពង់ឆ្នាំង ៤នាក់នៅក្នុងខេត្តសៀមរាប និង២នាក់នៅក្នុងខេត្តតាកែវ។ លោកហ៊ឹម យ៉ានបានថ្លែងថា គ្រោះថ្នាក់ចរាចរណ៍នេះបានកើតឡើងដោយការបើកបរលើសល្បឿនកំណត់ចំនួន៣៣ភាគរយ ការបើកបរធ្វេសប្រហែសចំនួន២៦ភាគរយ និងការបើកបរក្នុងពេលស្រវឹងចំនួន២០ភាគ។ លោកនួន សាមិន ស្នងការប៉ូលិសខេត្តកំពង់ចាម បានថ្លែងថា មនុស្ស៥នាក់បានស្លាប់ និង៣៧នាក់បានរងរបួសក្នុងរយៈពេលបីថ្ងៃនៃពិធីបុណ្យចូលឆ្នាំថ្មីប្រពៃណីខ្មែរនេះ។ លោកនួន សាមិនបានបញ្ជាក់ថា ជនរងគ្រោះដោយគ្រោះថ្នាក់ចរាចរណ៍ភាគច្រើនមានអាយុរវាងពី១៨ឆ្នាំទៅ២៥ឆ្នាំ ដោយសារការបើកបរក្នុងពេលស្រវឹង។ លោកឡាច សារិន ស្នងការរងប៉ូលិសខេត្តសៀមរាប បានបញ្ជាក់ថា មនុស្ស៤នាក់បានស្លាប់ និងរងរបួស១៣នាក់ ដោយសារការបើកបរក្នុងពេលស្រវឹង និងការធ្វេសប្រហែស។ លោកឡាច សារិនបានថ្លែងថា លោកនៅតែមានការព្រួយបារម្ភអំពីគ្រោះថ្នាក់ចរាចរណ៍។ គណៈកម្មាធិការជាតិសុវត្ថិភាពចរាចរណ៍ផ្លូវគោកបានរំឭកថា ក្នុងឱកាសចូលឆ្នាំប្រពៃណីខ្មែរឆ្នាំ២០១០ មនុស្ស៤៩នាក់បានសម្លាប់ដោយគ្រោះថ្នាក់ចរាចរណ៍ និងមានអ្នករបួសធ្ងន់ចំនួន២៩៦នាក់ផ្សេងទៀត ដោយសារអ្នកបើកបរមានការធ្វេសប្រហែស មិនគោរពច្បាប់ចរាចរណ៍ អ្នកបើកម៉ូតូមិនពាក់មួកសុវត្ថិភាព បើកបរមិនប្រកាន់ខ្ជាប់តាមគន្លងផ្លូវ បើកក្នុងល្បឿនលឿនហួសកំណត់ និងបើកបរក្រោមឥទ្ធិពលជាតិស្រវឹងជាដើម ហើយអ្នកថ្មើរជើងក៏មានការធ្វេសប្រហែស មិនបានដើរអែបចិញ្ចើមថ្នល់ ហើយអ្នកឆ្លងកាត់ថ្នល់មិនបានប្រុងប្រយ័ត្ន៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
