VOA News: ព័ត៌មាន: “ប្រាំមួយនាក់ស្លាប់ក្នុងការប្រយុទ្ធគ្នានៅព្រំដែនកម្ពុជាថៃ” plus 2 more |
- ប្រាំមួយនាក់ស្លាប់ក្នុងការប្រយុទ្ធគ្នានៅព្រំដែនកម្ពុជាថៃ
- ទាហានថៃនិងទាហានខ្មែរប្រយុទ្ធគ្នា មានស្លាប់និងរបួសទាំងសងខាង
- តម្លៃម្ហូបឡើងថ្លៃប៉ះពាល់ដល់ជីវភាពអ្នកក្រ តែជួយកសិករ
| ប្រាំមួយនាក់ស្លាប់ក្នុងការប្រយុទ្ធគ្នានៅព្រំដែនកម្ពុជាថៃ Posted: 22 Apr 2011 02:08 PM PDT យ៉ាងហោចណាស់មានកងទ័ពកម្ពុជាចំនួនបីនាក់បានស្លាប់បាត់បង់ជីវិត និងប្រាំមួយនាក់ផ្សេងទៀតរងរបួស។ រីឯកងទ័ពថៃយ៉ាងតិចចំនួនបីនាក់បានស្លាប់ និងប្រាំបីនាក់រងរបួសនៅក្នុងឆាកប្រយុទ្ធគ្នាតាមបណ្តោយព្រំដែនរវាងខេត្តឧត្តមានជ័យរបស់ខ្មែរ និងខេត្តសុរិន្ទរបស់ថៃ ។ ការប្រយុទ្ធគ្នា ដែលបានចាប់ផ្តើមកាលពីម៉ោង៦ព្រឹកមិញ ហើយបានបញ្ជប់ទៅវិញនៅម៉ោង ប្រមាណ១២:២០នាទី។ នេះបើយោងទៅតាមប្រភពពីមន្រ្តីយោធានៃប្រទេសទាំងពីរ។ ការប៉ះទង្គិចគ្នា បានចាប់ផ្តើមនៅចំណុចប្រាសាទតាក្របីរបស់ខ្មែរ ហើយបានរីករាលដាលដល់ ចំណុចប្រចាំការរបស់យោធានៅចំណុចប្រាសាទតាមាន់។ ប្រាសាទទាំងពីរជាចំណុចប្រទាញប្រទង់នៃប្រទេសជិតខាងគ្នាទាំងពីរ ។ មន្រ្តីយោធានៃប្រទេសទាំងពីរ បានចោទប្រកាន់គ្នាទៅវិញទៅមកពីការបង្កជម្លោះប្រដាប់អាវុធ។ លោកឧត្តមសេនីយ៍ឯក ឈុំ សុជាតិ បានថ្លែងនៅក្នុងសន្និសីទកាសែតនៅក្នុងទីក្រុងភ្នំពេញថាកងទ័ពថៃ បានលួចវាយប្រហារនៅចំណុចប្រចាំការរបស់កងទ័ពខ្មែរនៅក្នុងទឹកដីកម្ពុជា។ លោកថ្លែងដូច្នេះថា៖ «ការពិតនៃការចាប់ផ្តើមនៃការផ្ទុះអាវុធនេះ គឺទាហានថៃបានឆ្លងដែនចូលមកវាយឆ្មក់យើងពី ក្រោយខ្នងនៅប្រាសាទតាក្របី។ នៅពេលដែលកងយោធពលខេមរៈភូមិន្ទយើងកំពុងតែធ្វើការយាម ល្បាតព្រំដែន គឺទាហានថៃឆ្លងចូលមកខាងក្រោយទីតាំងរបស់យើងពីក្រោយ។ គេវាយឆ្មក់យើងពី ក្រោយដោយថ្មើជើង។ ហើយទន្ទឹមវាក៏បាញ់ផ្លោងកាំភ្លើងធំមកលើទីតាំងរបស់យើងចម្ងាយជា២០ គីឡូម៉ែត្រមកក្នុងទឹកដីដ៏ជ្រៅលើប្រជាជនទៀតដូចជម្រាប់ជូនខាងលើ»។ មន្រ្តីអ្នកនាំពាក្យយោធាខ្មែរ ដដែលបញ្ជាក់ថា កងទ័ពថៃ បានប្រើអាវុធធន់ធ្ងន់ជាច្រើន បាញ់ផ្តក់ ចូលជ្រៅនៅក្នុងទឹកដីកម្ពុជា។ ដោយឡែកលោកឧត្តមសេនីយ៍ វីរៈជន សុខុថាធិផាក (Verachon Sukondhaptipak) អ្នកនាំពាក្យរងនៃក្រសួងការពាជាតិថៃ បានថ្លែងប្រាប់អ្នកឆ្លើយឆ្លងព័ត៌មានរបស់វីអូអេ សំឡេងសហរដ្ឋអាមេរិកក្នុងទីក្រុងបាងកកថា កងទ័ពកម្ពុជា បានចូលក្នុងតំបន់ហាមឃាត់។ លោក វិរៈជនថ្លែងដូច្នេះថា៖ «យើងបានរកឃើញថា កម្ពុជាបានបញ្ជូនកងទ័ពរបស់ខ្លួនទៅកាន់តំបន់ដែលមិនត្រូវទៅនោះ។ ហើយយើងបានបញ្ជូនកងទព័របស់យើងទៅប្រាប់ដំណឹងដើម្បីឲ្យពួកគេដកចេញពីតំបន់នោះ ប៉ុន្ដែពួក គេបានបើកការបាញ់ប្រហារមកលើកងទព័ថៃជាមុន»។ ប្រជាពលរដ្ឋជាច្រើនពាន់គ្រួសារ នៅតាមតំបន់ព្រំដែននៃប្រទេសដែលកំពុងមានជម្លោះនេះត្រូវ បានជម្លៀសចេញ។ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្រ្តី បានហៅការប្រយុទ្ធ គ្នានេះ ថា គឺជាការឈ្លានពានពីសំណាក់កងទ័ពថៃ។ កម្ពុជា និងថៃ មានជម្លោះព្រំដែនជាមួយគ្នាចាប់តាំងពីខែកក្កដា ឆ្នាំ២០០៨មក ម្ល៉េះបន្ទាប់ពីថៃជំទាស់មិនបានសម្រេចនៅក្នុងការដាក់ប្រាសាទព្រះវិហាររបស់ខ្មែរចូលជាសម្បត្តិបេតិកភណ្ឌពិភពលោក ។ ការប្រយុទ្ធគ្នានៅតំបន់ប្រសាទព្រះវិហារ បានកើតឡើងយ៉ាងស្វិតស្វាញ កាលពីដើមខែកុម្ភៈឆ្នាំ ២០១១នេះ។ ភាគីកម្ពុជា បានស្នើឲ្យមានការដាក់ពង្រាយកងទ័ពអព្យាក្រឹត្យមួយនៅតំបន់ជម្លោះ ក៏ប៉ុន្តែ ថៃ មិនទាន់យល់ព្រមនៅឡើយ ។ លោកឧត្តមសេនីយ៍ឈុំ សុជាតិ អ្នកនាំពាក្យក្រសួងការពារជាតិមានប្រសាសន៍ថា កងទ័ពកម្ពុជា នៅតែបន្តត្រៀមប្រយុទ្ធនៅឡើយមកទល់ និងល្ងាចនេះ។ ជាមួយគ្នានេះដែរ លោកហោ ណាំហុង រដ្ឋមន្រ្តីការបរទេសកម្ពុជា បានផ្ញើលិខិតមួយច្បាប់ទៅកាន់សហសេវិករបស់ខ្លួននៅឥណ្ឌូនេស៊ី ដើម្បីជាការជូនដំណឹងពីការវាយប្រហារគ្នា។ ឥណ្ឌូនេស៊ី ដែលបច្ចុប្បន្នជាប្រធានប្តូរវេណនៃសមាគមអាស៊ាន ដែលមាន១០ប្រទេស។ នៅថ្ងៃដដែលនេះដែរ លោក ហោ ណាំហុង ក៏បានផ្ញើលិខិតមួយច្បាប់ផ្សេងទៀត ដើម្បីជូនដំណឹងទៅក្រុមប្រឹក្សាសន្តិសុខអង្គការសហប្រជាជាតិអំពីការប៉ះទង្គិចគ្នាដោយប្រដាប់អាវុធរវាងកងទ័ពកម្ពុជា និងកងទ័ពថៃ ។ រដ្ឋមន្រ្តីក្រសួងការបរទេសឥណ្ឌូនេស៊ី លោក ម៉ាទី ណាតាលេហ្កាវ៉ា (Marty Natalegawa) ក៏បានអំពាវនាវឲ្យភាគីជម្លោះឈប់ធ្វើការបាញ់គ្នាតទៅទៀតដែរ៕ This posting includes an audio/video/photo media file: Download Now |
| ទាហានថៃនិងទាហានខ្មែរប្រយុទ្ធគ្នា មានស្លាប់និងរបួសទាំងសងខាង Posted: 22 Apr 2011 02:42 PM PDT ទាហានថៃនិងទាហានកម្ពុជាបានប្រយុទ្ធគ្នានៅក្បែរតំបន់ព្រំដែនមានជម្លោះ ដោយធ្វើឲ្យខូចដល់បទឈប់បាញ់គ្នាមិនផ្លូវការ។ ទាហានថៃនិងទាហានកម្ពុជាបានប្រយុទ្ធមួយរយៈនៅព្រឹកថ្ងៃសុក្រ ដោយភាគីទាំងពីរមានស្លាប់និងរបួសទាំងសងខាង។ មិនមានរបាយការណ៍អំពីជនស៊ីវិលរងរបួសទេ ក្រោយពីកងទ័ពទាំងពីរបានបាញ់គ្នា ដោយប្រើកាំភ្លើងធុនធ្ងន់ និងកាំភ្លើងធំនៅតាមព្រំដែនមានជម្លោះ។ លោក Werachon Sukondhapatipak អ្នកនាំពាក្យកងទ័ពថៃនិយាយថា អ្នក ភូមិចំនួន៧.៥០០នាក់ត្រូវជម្លៀសខ្លួនចេញពីតំបន់ព្រំដែនក្នុងប្រទេសថៃ ហើយនឹងមិនវិលទៅផ្ទះវិញទេ លុះត្រាសភាពការណ៍ស្ងប់ស្ងាត់វិញ។ លោកនិយាយថា ការប្រយុទ្ធគ្នា ដែលបានរំខានភាពស្ងប់ស្ងាត់រយៈពេល២ខែនេះ បានស្ងប់ទៅវិញនៅ ពេលព្រឹកប្រហែលម៉ោង៩ ហើយមេបញ្ជាការកងទ័ពទាំងសងខាងបានធ្វើការទាក់ទងគ្នា ដើម្បីទប់ស្កាត់ការប៉ះទង្គិចគ្នាទៀត។ «ខាងកងទ័ពរាជាណាចក្រថៃ យើងមិនបានបន្ថែមកម្លាំង ឬសម្ភារៈទេ។ យើងឲ្យទាហាន ឬអង្គភាពឈរជើងក្នុងតំបន់នេះមានការប្រុងប្រយ័ត្ន ពីព្រោះយើងមិនដឹងថា អាចនឹងមានរឿងអ្វីទេក្នុងពេលអនាគត»។ ភាគីទាំងពីរបន្ទោសគ្នាទៅវិញទៅមកថា ចាប់ផ្តើមបាញ់មុន។ លោក Werachonមានប្រសាសន៍ថា ទាហានកម្ពុជារំលោភកិច្ចព្រមព្រៀង ដែលឲ្យនៅក្រៅតំបន់មានជម្លោះ ហើយបានបាញ់លើទាហានថៃ ដែលធ្វើការព្រមានដោយពាក្យសម្តី។ ភាគីកម្ពុជានិយាយថា ទាហានថៃបានរុលចូលមកក្នុងទឹកដីកម្ពុជា ហើយបាញ់មុន។ លោកឧត្តមសេនីយ៍ជុំ សុជាតិជាអ្នកនាំពាក្យក្រសួងការពារជាតិខ្មែរ។ លោកនិយាយថា ទាហានថៃបានចូលទឹកដីកម្ពុជា ហើយបានស្ទាក់បាញ់មកលើទាហានខ្មែរនៅប្រាសាទមួយ នៅពេលទាហានខ្មែរកំពុងល្បាត។ លោកនិយាយថា ក្នុងពេលជាមួយគ្នានេះដែរ ទាហានថៃបានបាញ់កាំភ្លើងធំចូលប្រទេសកម្ពុជាជម្រៅជាង២០គ.ម. មកលើមូលដ្ឋានរបស់ទាហានខ្មែរ និងភូមិអ្នកស្រុក។ «ការណ៍ពិតនៃការចាប់ផ្តើមផ្ទុះអាវុធនេះគឺទាហានថៃឆ្លងព្រំដែនចូលមកវាយឆ្មក់យើងពីក្រោយខ្នង នៅប្រាសាទតាក្របី។ នៅពេលកងយោធពលខេមរភូមិន្ទយើងកំពុងយាមល្បាតគឺទាហានថៃឆ្លងចូលមកនៅក្រោយទីតាំងទាហានយើង ហើយវាយឆ្មក់យើងពីក្រោយ ដោយថ្មើរជើង ហើយទន្នឹមនឹងនេះ វាក៏បាញ់កាំភ្លើងធំមកលើទីតាំងរបស់យើងចម្ងាយជាង២០គម និងលើប្រជាជនទៀត»។ ការអះអាងអំពីការបាញ់លើភូមិអ្នកស្រុកនេះមិនមានការបញ្ជាក់ពីប្រភពឯករាជ្យទេ។ សភាពតានតឹងបានឡើងដល់កម្រិតខ្ពស់ ក្រោយការប្រយុទ្ធគ្នាកាលពីខែកុម្ភៈ នៅតំបន់មានជម្លោះក្បែរប្រាសាទព្រះវិហាររបស់ខ្មែរចំណាស់៩០០ឆ្នាំ។ កងទ័ពថៃ និងកងទ័ពកម្ពុជាបានបាញ់តគ្នាដោយប្រើកាំភ្លើងធំ និងកាំភ្លើងយន្ត ហើយមានស្លាប់មនុស្សមួយចំនួន និងបង្ខំឲ្យមនុស្សជាច្រើនភៀសខ្លួនចោលផ្ទះសម្បែងនៅតំបន់ព្រំដែន។ ប្រទេសកម្ពុជាចង់មានការគាំទ្រជាអន្តរជាតិដើម្បីបញ្ចប់ជម្លោះនេះ រីឯប្រទេសថៃនិយាយថា ជម្លោះនេះត្រូវដោះស្រាយដោយទ្វេភាគី។ ប្រទេសឥណ្ឌូនេស៊ីបានសម្រួលឲ្យមានកិច្ចព្រមព្រៀងបញ្ជូនអ្នកសង្កេតការណ៍ទៅតំបន់ព្រំដែនដើម្បីស្តារសន្តិភាពឡើងវិញ ប៉ុន្តែដំណើរការនេះបានជាប់គាំង ដោយមិនមានការព្រមព្រៀងថា តើតំបន់ណាដែលអ្នកសង្កេតការណ៍អាចចូលទៅបាន៕ ប្រែសម្រួលដោយ ពិន ស៊ីសុវណ្ណ This posting includes an audio/video/photo media file: Download Now |
| តម្លៃម្ហូបឡើងថ្លៃប៉ះពាល់ដល់ជីវភាពអ្នកក្រ តែជួយកសិករ Posted: 22 Apr 2011 02:58 PM PDT ការឡើងថ្លៃម្ហូបអាហារបច្ចុប្បន្ននេះ បានផ្តល់ផលចម្រុះសម្រាប់ប្រជាពលរដ្ឋខ្មែរ។ វាមានន័យថា កសិករបានទទួលកម្រៃពីការលក់ផលិតផលកសិកម្មរបស់ខ្លួន ដែលឡើងថ្លៃ។ ប៉ុន្តែបុគ្គលិករាជការ និងបុគ្គលិកក្រុមហ៊ុនឯកជនត្រូវទទួលរងផលប៉ះពាល់ដល់ជីវភាពរស់នៅប្រចាំថ្ងៃ។ ក្រុមមន្ត្រីបាននិយាយនៅថ្ងៃសុក្រនេះថា ការឡើងថ្លៃម្ហូបអាហារបច្ចុប្បន្ននេះបានប៉ះពាល់ដល់ជីវភាពរស់នៅរបស់ជនក្រីក្រ។ លោក រ៉ប៊ត ហ្ស៊ូល្លីក (Robert Zoellick) ប្រធានធនាគារពិភពលោកបានថ្លែងក្នុងសប្តាហ៍នេះថា ការឡើងថ្លៃម្ហូប អាហារជាការគំរាមគំហែងដ៏សំខាន់ដល់បណ្តាប្រទេសក្រីក្រ។ អ្នកស្រីខាន់ តូច អាយុ៣៦ឆ្នាំ កម្មករោងចក្រកាត់ដេរចៀនហ្វីញបាននិយាយថា អ្នកស្រីទទួលបានប្រាក់ឈ្នួល៩០ដុល្លារអាមេរិកក្នុងមួយខែ ដោយគិតទាំងប្រាក់ថែមម៉ោង ប៉ុន្តែអ្នកស្រីត្រូវបង់ថ្លៃជួលផ្ទះ ៣៥ដុល្លារអាមេរិក និងថ្លៃទឹកភ្លើង១៥ដុល្លារ។ អ្នកស្រីនិយាយថា៖ «កម្មកររោងចក្រកាត់ដេរច្រើនតែស្រែកត្អូញថា មានផលវិបាកអំពីរឿងប្រាក់ខែរបស់យើង និងទំនិញឡើងរហូតនៅទីផ្សារ។ ទំនិញឡើងអត់ចុះទេ។ កាលពីមុន ខ្ញុំមានប្រាក់តែ៥០០០រៀលហូបបានមួយ ពេលតែឥឡូវនេះ ៥០០០រៀលហូបមិនគ្រប់គ្រាន់ទេ។ ជួនកាល ខ្ញុំខ្វះខាត។ ខ្ញុំចងការគេនៅក្នុងរោងចក្រក្នុងមួយ ១៥ដុល្លារទៅ២០ដុល្លារ ហើយអត់ហ៊ានហូបអ្វីទេ ហើយអង្ករយកមកពីស្រុកផង។ ផលវិបាករឿងប្រាក់ខែរបស់យើងសព្វថ្ងៃយកទៅទិញទំនិញនៅទីផ្សារ និងថ្លៃផ្ទះជួលអត់គ្រប់គ្រាន់»។ អ្នកស្រីម៉ា ឡៃ អាយុ៤៨ឆ្នាំ គ្រូបង្រៀនសាលាបឋមសិក្សាបឹងត្របែកខាងជើង បានថ្លែងថា ការឡើងថ្លៃ ម្ហូបអាហារនេះ កំពុងតែគ្របសង្កត់មកលើជីវិភាពរបស់អ្នកស្រី ពីព្រោះប្រាក់ខែរបស់អ្នកស្រីគឺប្រមាណ៧០ដុល្លារដែលមិនមានតុល្យភាពទៅនឹងការឡើងថ្លៃម្ហូបអាហារនៅទីផ្សារទេ។ អ្នកគ្រូម៉ា ឡៃបា្រប់វីអូអេខ្មែរថា៖ «ការឡើងថ្លៃទំនិញទីផ្សារតាំងពីសាច់គោ សាច់ជ្រូក សាច់ត្រី បន្លែនេះបានធ្វើឱ្យប៉ះពាល់ដល់ជីវភាពរបស់ខ្ញុំជាគ្រូបង្រៀន។ ខ្ញុំមិនដែលហ៊ានទិញអង្គរមានគុណភាពល្អសម្រាប់បរិភោគទេ។ ពីមុនខ្ញុំធ្លាប់ទិញត្រីកន្លះគីឡូក្រាម តែឥឡូវ ខ្ញុំទិញត្រីតែបីខាំ ហើយពីមុន ខ្ញុំទិញសាច់ជ្រូកបួនខាំ តែឥឡូវខ្ញុំទិញតែពីរខាំសម្រាប់មួយថ្ងៃ។ ប្រាក់ខែរបស់ខ្ញុំនៅដដែល ហើយទំនិញចេះតែឡើងថ្លៃ»។ លោក ហា សាអាន អាយុ៣៦ឆ្នាំ អ្នករត់ម៉ូតូទុកទុក បាននិយាយថា មុខរបររបស់លោកកំពុងតែទទួលរងផលប៉ះពាល់ពីការឡើងថ្លៃម្ហូបអាហារ និងប្រេងសាំង ហើយឥឡូវនេះ លោករកប្រាក់បានតែ១០.០០០ រៀលប៉ុណ្ណោះក្នុងមួយថ្ងៃ ប៉ុន្តែកាលពីប្រាំមួយខែមុន លោករកប្រាក់បាន៣០.០០០រៀលក្នុងមួយថ្ងៃ។ លោក សាអាន និយាយាថា៖ «ម្ហូបនិងប្រេងសាំងឡើងថ្លៃ ហើយពេលឥឡូវខ្ញុំរកប្រាក់ក្នុងមួយថ្ងៃជួនកាលអត់បាន១០.០០០រៀលផង ហើយយូរៗទៅ ខ្ញុំរកប្រាក់ចាក់ប្រេងសាំងលែងបានហើយ។ ប្រេងសាំង និងចំណីអាហារឡើងថ្លៃឥតព្រំដែន។ វាប៉ះពាល់ដល់ជីវិភាពធ្ងន់ធ្ងរមែនទែនរហូតដល់៩៥ភាគរយឥឡូវនេះ។ វានៅសល់តែ៥ភាគរយ។ ខ្ញុំនឹងដាច់ខ្យល់ ដោយសារទី១ ទំនិញឡើងថ្លៃ និងទីពីរប្រេងសាំងឥឡូវឡើងដល់៥.៤០០រៀលហើយក្នុងមួយលីត្រ។ រដ្ឋាភិបាលជួយគិតគូរផង»។ លោកគាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថាការឡើងថ្លៃម្ហូបអាហារនេះ បានប៉ះពាល់ដល់អ្នកមិនផលិត ប៉ុន្តែវាបានជួយផ្តល់ផលប្រយោជន៏ដល់អ្នកផលិតផ្នែកកសិកម្ម ឬ កសិករ។ លោកច័ន្ទ សុផល ប្រធានសមាគមសេដ្ឋកិច្ចកម្ពុជាបានថ្លែងថា ការឡើងថ្លៃផលិតផលកសិកម្មគឺប្រសើរជាងការចុះថ្លៃសម្រាប់កសិករជាអ្នកផលិត។ លោកបានប្រាប់វីអូអេខ្មែរថា៖ «ជារួមយើងឃើញថា មានអ្នកទទួលបានប្រយោជន៍ និងអ្នកខាតប្រយោជន៍ នៅពេលដែលទំនិញឡើងថ្លៃនោះ។ ថ្លៃដំឡូង ពោត សណ្តែក ស្រូវ កើនឡើងខ្ពស់ ប្រជាកសិករសម្បាយចិត្ត ហើយគាត់សល់ប្រាក់សន្សំច្រើនជាងមុន»។ លោកវ៉ា ខាន់ អាយុ៦២ឆ្នាំ កសិករដាំដំឡូងនៅស្រុកថ្មពួក ខេត្តបន្ទាយមានជ័យ បានថ្លែងថាការឡើងថ្លៃម្ហូបអាហារបច្ចុប្បន្ននេះមិនបានធ្វើឱ្យប៉ះពាល់ដល់ជីវិភាពគ្រួសាររបស់លោកទេ ដោយសារតែដំឡូងមីកំពុងតែឡើងថ្លៃពីពីរបាតក្នុងមួយគីឡូក្រាមកាលពីឆ្នាំ២០១០ឡើងដល់បីបាតក្នុងពេលបច្ចុប្បន្ន ហើយជីវភាពរបស់លោកពឹងអាស្រ័យនឹងកាដាំដំឡូងជាមុខរបរចិញ្ចឹមជីវិតគ្រួសាររបស់លោក។ លោកខាន់ បន្តទៀតថា លោកបានចំណេញប្រមាណ៣.០០០ដុល្លារក្នុងមួយហិចតា ហើយលោកមានការសប្បាយចិត្តចំពោះ ការលក់ដំឡូងបានថ្លៃ និងសម្បូរណ៍ទីផ្សារ»។ លោក ភីធ័រ ប្រ៊ីមបល (Peter Brimble) អ្នកសេដ្ឋកិច្ចជាន់ខ្ពស់ប្រចាំធនាគារអភិវឌ្ឍន៍អាស៊ីនៅកម្ពុជា បានបញ្ជាក់ថាការ ឡើងថ្លៃម្ហូបអាហារនេះ គឺជាការគំរាមគំហែងយ៉ាងធំដល់ការកាត់បន្ថយភាពក្រីក្រនៅកម្ពុជាប៉ុន្តែ កម្ពុជាមានសំណាងជាអ្នកនាំចេញម្ហូបអាហារជាពិសេសអង្ករ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
