VOA News: ព័ត៌មាន: “អាជ្ញាធរដាក់ឱសានវាទបណ្តេញអ្នកបឹងកក់ចេញ” plus 2 more |
- អាជ្ញាធរដាក់ឱសានវាទបណ្តេញអ្នកបឹងកក់ចេញ
- ក្រុម The Like Me's អង្រួនបេះដូងទស្សនិកជនកម្ពុជា
- អ្នកសេដ្ឋកិច្ចពិនិត្យមើលគោលនយោបាយដុល្លារូបនីយកម្មនៅកម្ពុជា
| អាជ្ញាធរដាក់ឱសានវាទបណ្តេញអ្នកបឹងកក់ចេញ Posted: 04 Mar 2011 01:28 PM PST ភ្នំពេញ៖ ប្រជាពលរដ្ឋបឹងកក់ជាង២០០នាក់ បានប្រមូលផ្តុំគ្នានៅមុខទីស្នាក់ការគណៈកម្មការអភិវឌ្ឍន៍បឹងកក់នៅថ្ងៃសុក្រនេះដើម្បីប្រឆាំងតវ៉ានឹងការកំណត់រយៈពេលប្រាំពីរថ្ងៃសម្រាប់ការបណ្តេញចេញ។ សាលាខណ្ឌដូនពេញកាលពីថ្ងៃពុធ បានស្នើសុំឱ្យប្រជាពលរដ្ឋនៅតំបន់បឹងដែលមិនទាន់ទំនាក់ទំនង ទទួលយកគោលនយោបាយរួសរាន់ទៅទំនាក់ទំនងដោះស្រាយគោលនយោបាយនៅទីស្នាក់ការ គណៈកម្មការអភិវឌ្ឍន៍បឹងកក់ក្នុងរយៈពេលប្រាំពីរថ្ងៃចាប់ពីថ្ងៃពុធកន្លងមកនេះ។ លោកសុខ សម្បត្តិ អភិបាលខណ្ឌដូនពេញ បានបញ្ជាក់នៅក្នុងលិខិតជូនដំណឹងចុះថ្ងៃទី២ ខែមិនាថា ក្នុងករណីប្រជាពលរដ្ឋមិនអនុវត្តតាមសេចក្តីជូនដំណឹងនេះ សាលាខណ្ឌដូនពេញនឹងចាត់វិធានការ តាមផ្លូវច្បាប់យ៉ាងតឹងរឹងបំផុត ពិសេសមិនទទួលខុសត្រូវលើការបាត់បង់ឬការខូចខាតសម្ភារៈរបស់ ប្រជាពលរដ្ឋឡើយ។ អ្នកស្រីខៀវ ច័ន្ទតារា អាយុ៥២ឆ្នាំ អ្នកតវ៉ាម្នាក់នៅតំបន់បឹងកក់ បានបញ្ជាក់ថាអ្នកស្រីមានការភ័យខ្លាច ចំពោះការបណ្តេញចេញដោយអាជ្ញាធររដ្ឋាភិបាលនៅសប្តាហ៍ក្រោយនេះ។ «ខ្ញុំភ័យខ្លាចការបណ្តេញចេញ ព្រោះគាត់ដាក់កំណត់នៅក្នុងលិខិតនេះឱ្យរុះរើជាបន្ទាន់។ អញ្ចឹង ខ្ញុំតវ៉ា ឱ្យរាជរដ្ឋាភិបាលសម្តេចតេជោដោះស្រាយឱ្យលឿនជាទីបំផុតដើម្បីកុំឱ្យបណ្តេញប្រជាពលរដ្ឋនៅទីកន្លែងបឹងកក់នេះ និងសូមអភិវឌ្ឍន៍នៅនឹងកន្លែង»។ អ្នកស្រីព្រំ មុន្នី អាយុ៥០ឆ្នាំ អ្នកតវ៉ាបឹងកក់ម្នាក់ បាននិយាយថាអាជ្ញាធរបានដាក់ការបង្ខិតបង្ខំលើអ្នកភូមិបឹងកក់ឱ្យរុះរើផ្ទះសម្បែងក្នុងរយៈពេលប្រាំពីរថ្ងៃនិងមិនធានាការខូចខាតទ្រព្យសម្បត្តិផ្ទះសម្បែង របស់ប្រជាពលរដ្ឋទេ បន្ទាប់ពីការផុតពេលកំណត់។ «ខ្ញុំមកទាមទារនៅថ្ងៃនេះ ដើម្បីឱ្យក្រុមហ៊ុនឆ្លើយតបនឹងពួកខ្ញុំ កុំឱ្យដាក់វិធានការថាក្នុងមួយសប្តាហ៍នេះ អាជ្ញាធរមិនធានាទ្រព្យសម្បត្តិនិងផ្ទះសម្បែងរបស់ពួកយើងខ្ញុំ។ អញ្ចឹងខ្ញុំនឹងរស់នៅដោយការភ័យខ្លាច។ អញ្ចឹងខ្ញុំសូមឱ្យសម្តេចហ៊ុន សែន និងលោកជំទាវ ជួយធ្វើអន្តរាគមន៍ឱ្យពួកខ្ញុំបានរស់នៅក្នុងតំបន់បឹងកក់ផង»។ លោកចាន់ សូវ៉េត ប្រធានផ្នែកឃ្លាំមើលស្ថានភាពសិទ្ធិមនុស្សនៃសមាគមសិទ្ធិមនុស្សអាដហុកបានថ្លែង ថា ការដាក់ឱសានវាទនេះ គឺជាការដាក់សម្ពាធទៅលើប្រជាពលរដ្ឋ ខណៈដែលភាគីជម្លោះមិនទាន់ ឈានដល់ការព្រមព្រៀងគ្នានៅឡើយនោះ។ «ចំណុចនេះ ដែលយើងមើលឃើញថា វាជារឿងអយុត្តិធម៌ចំពោះប្រជាពលរដ្ឋ ហើយអ្នកស្រុកអ្នកភូមិ ដែលទទួលរងនោះមានតែទឹកភ្នែកជារឿយៗ ហើយអាជ្ញាធរអួតក្តែងៗថា ពួកគេកំពុងអភិវឌ្ឍ។ ថ្ងៃឱសានវាទរបស់សាលារាជធានីភ្នំពេញនិងសាលាខណ្ឌដូនពេញនេះ ខ្ញុំគិតថានេះជាសម្ពាធមួយធ្ងន់ធ្ងរ គំរាមកំហែងដល់ប្រជាពលរដ្ឋមិនអាចឱ្យគាត់ចេញមុខតវ៉ាដើម្បីទាមទាររកយុត្តិធម៌សមស្របដែលគាត់ អាចទទួលយកបាននោះ»។ លោកសុខ ពេញវុធ អភិបាលរងខណ្ឌដូនពេញ និងតំណាងគណៈកម្មការអភិវឌ្ឍន៍បឹងកក់ដែលរួមមាន ភាគីរដ្ឋាភិបាល និងភាគីក្រុមហ៊ុនអភិវឌ្ឍន៍ Shukaku Inc បានថ្លែងប្រាប់ក្រុមអ្នកតវ៉ាយ៉ាងដូច្នេះថា៖ «យើងទុករយៈពេលប្រាំពីរថ្ងៃសម្រាប់ការរុះរើនេះ។ វាមិនមែនមានន័យថាវាផុតរយៈពេលប្រាំពីរថ្ងៃនេះ។ យើង ដេញប្រជាពលរដ្ឋនោះទេ។ យើងទុកឱ្យបងប្អូនចូលមកចរចាដោះស្រាយគោលនយោបាយជាមួយគណៈកម្មការអភិវឌ្ឍន៍បឹងកក់ដែលមានតំណាងសាលារាជធានីភ្នំពេញ ឬ សាលាខណ្ឌ ឬ ក្រុមហ៊ុនអភិវឌ្ឍន៍បឹងកក់ សម្របសម្រួលមួយគ្រួសារម្តងៗតាមតម្រូវការរៀងខ្លួនៗពីព្រោះបងប្អូនមានស្ថានភាពរស់នៅផ្សេងគ្នានិងតម្រូវការផ្សេងគ្នា។ អ្នកខ្លះនិយាយថាខ្លួនមានផ្ទះធំផ្ទះតូចនិងមានផ្ទះសំណាក់។ អញ្ចឹង តម្រូវការ និងសំណូមពរមិនដូចគ្នាទេ»។ គោលនយោបាយសម្រាប់អ្នកភូមិបឹងកក់ មានជម្រើសបី ៖ សំណងជាប្រាក់៨.៥០០ដុល្លារអាមេរិក សម្រាប់គ្រួសារនីមួយៗ ដើម្បីចាកចេញ ការតាំងទីលំនៅជាថ្មីនៅជាយទីក្រុងភ្នំពេញ និងការអភិវឌ្ឍនៅ នឹងកន្លែង។ លោកសុខ ពេញវុធ បានពន្យល់ថាចំពោះការអភិវឌ្ឍនៅនឹងកន្លែង ប្រជាពលរដ្ឋត្រូវតែរុះរើផ្ទះសម្បែង និងប្រគល់ទីតាំងឱ្យរដ្ឋាភិបាលធ្វើការអភិវឌ្ឍ។ ប៉ុន្តែប្រជាពលរដ្ឋ បានទាមទារដីទំហំ១៥ហិកតានៃផ្ទៃដីសរុប ១៣៣ហិចតាសម្រាប់ធ្វើការអភិវឌ្ឍដោយខ្លួនឯង។ លោកសុខ ពេញវុធ បានបញ្ជាក់ថាសំណើដីទំហំ១៥ហិកតានេះទំនងជាមិនអាចទៅរួចទេ។ លោកសុខ ពេញវុធ បានថ្លែងថាលោកនឹងយកសំណើនេះទៅជូនរដ្ឋាភិបាលដើម្បីសម្រេច។ ក្រុមអ្នក តវ៉ាបានយល់ព្រមរំសាយការតវ៉ានិងបានវិលត្រឡប់ទៅផ្ទះវិញដើម្បីរង់ចាំលទ្ធផលបន្ទាប់ទៀត៕ This posting includes an audio/video/photo media file: Download Now |
| ក្រុម The Like Me's អង្រួនបេះដូងទស្សនិកជនកម្ពុជា Posted: 04 Mar 2011 01:01 PM PST ភ្នំពេញ៖ ម៉ម ឡូរ៉ាទេវរី និងក្រុមភ្លេងរបស់នាងឈ្មោះថា The Like Me's គឺជាក្រុមថ្មីមួយដែលទទួលបានប្រជាប្រិយ៍ភាពយ៉ាងលឿននៅក្នុងសហរដ្ឋអាមេរិក។ ក្រុមនេះកំពុងធ្វើទស្សនកិច្ចរយៈពេលខ្លីមួយនៅក្នុងប្រទេសកម្ពុជា។ ពួកគេសង្ឃឹមថាបទភ្លេងរបស់ពួកគេនឹងបានទៅដល់ប្រជាជនកាន់តែច្រើននៅក្នុងទឹកដីកំណើតរបស់ឪពុក-ម្តាយពួកគេ។ ក្រុមភ្លេងក្នុងស្រុកនៃក្រុងSan Jose រដ្ឋកាលីហ្វ័រញ៉ា លេងបទភ្លេងដែលនិពន្ធដោយខ្លួនឯងឥតយកលំនាំតាមគេហើយក៏លេងបទដែលពេញនិយមខ្លាំងនៅក្នុងអំឡុងទសវត្សរ៍១៩៦០មួយនេះដែរគឺ«បទស្វារាំម៉ាន់ឃីស»។ ម៉ម ឡូរ៉ាទេវរី ដែលមានអាយុ២៤ឆ្នាំ លេងហ្គីតាផងនិងច្រៀងផង។ ចំណែកឯបងស្រីជីដូនមួយរបស់នាងដែលជាជនជាតិអាមេរិកកាំងដើមកំណើតខ្មែរ ឈ្មោះ ហុង ហេលីណា ដួងច័ន្ទ អាយុ៣១ឆ្នាំ ជាអ្នកលេងបាស។ ម៉ម ឡូរ៉ាទេវរី និយាយថា បទចម្រៀងនេះបានទៅដល់ប្រជាជនកម្ពុជាពីរជំនាន់។ វាបាននិយាយទៅដល់ជនអន្តោប្រវេសន៍ដែលបានភៀសខ្លួនពីរបបខ្មែរក្រហមនិងទៅដល់កូនរបស់ពួកគេ ហើយក៏ជំរុញឲ្យមានការជជែកគ្នារវាងមនុស្សទាំងពីរជំនាន់អំពីភាពស្រដៀងគ្នារបស់ពួកគេ។ បទចម្រៀងដើមរបស់ក្រុមនេះទទួលបានការពេញនិយមពីសំណាក់ប្រជាពលរដ្ឋអាមេរិកាំង ដើមកំណើតខ្មែរវ័យក្មេងជាច្រើនដែលស្វះស្វែងរកសំឡេងមួយរបស់ខ្លួន។ ម៉ម ឡូរ៉ាទេវរី និយាយថានាងសង្ឃឹមថាបទចម្រៀងរបស់នាងនឹងបានទៅដល់ប្រជាជនកាន់តែច្រើនក្នុងដំណើររបស់នាងនៅក្នុងប្រទេសកម្ពុជាប៉ុន្តែនាងមិនដែលរំពឹងទេថានឹងរកបានអ្នកគាំទ្រយ៉ាងច្រើនរួចទៅហើយនៅទីនេះ។ «ពីមុនខ្ញុំស្មានថា ប្រជាពលរដ្ឋខ្មែរអត់ស្គាល់យើងសោះ ដូច្នេះពេលមកស្រុកខ្មែរយើងមានFans (អ្នកគាំទ្រ) ហើយគេមកលើstage(ឆាក) ហ្នឹងហើយគេសួរយើងហើយមានអ្នកព័ត៌មានសួរយើងសំណួរច្រើនមែនទែន។ ដូច្នេះ ខ្ញុំអរមែនទែនហើយគិតថាដូចជាRock Stars ហ្នឹង»។ កើតនៅក្នុងសហរដ្ឋអាមេរិក ម៉ម ឡូរ៉ាទេវរី និពន្ធបទចម្រៀងក្នុងនាមជាជនជាតិខ្មែរផងនិងជាជនជាតិអាមេរិកាំងផង។ «ពីដំបូង ខ្ញុំតែងបទឲ្យខ្លួនឯងពីព្រោះ បើខ្ញុំមានអារម្មណ៍អ្វី ខ្ញុំដាក់អារម្មណ៍ហ្នឹងនៅក្នុងបទហ្នឹង ហើយពេលខ្ញុំចូលរួមជាមួយក្រុមភ្លេងខ្ញុំ យើងទាំងអស់គ្នាចូលរួមហើយយើងមានអារម្មណ៍ហើយដាក់អារម្មណ៍ក្នុងបទទៅ»។ សោកនាដកម្មនៅលើស្ពានពេជ្រនៅតំបន់កោះពេជ្រកាលពីថ្ងៃទី២២ ខែវិច្ឆិកា ឆ្នាំមុន ក៏បានជំរុញឲ្យនាងតែងបទចម្រៀងមួយបទដែលឧទ្ទិសទៅដល់ជនរងគ្រោះនៅក្នុងឧបទ្ទវហេតុដ៏គួរឲ្យរន្ធត់នោះដែរ។ បទនេះមានចំណងជើងថា «ពេជ្រ»។ «យើងចង់ឲ្យប្រជាពលរដ្ឋដែលមានគ្រួសារស្លាប់នៅកោះពេជ្រហ្នឹង ខ្ញុំចង់ឲ្យគេស្តាប់ភ្លេងយើងហើយមានអារម្មណ៍ជាប់បេះដូងបន្តិចព្រោះបទហ្នឹងគេហៅថា ពេជ្រ ហើយយើងចង់និយាយថា អ្នករងគ្រោះហ្នឹងជាពេជ្រ យើងនឹងចាំគេ ព្រោះគេមានតម្លៃល្អណាស់»។ ក្រុមអ្នកគាំទ្រនិងអ្នកស្តាប់ថ្មីៗអាចទស្សនា ម៉ម ឡូរ៉ាទេវរីនិងក្រុមThe Like Me'sរបស់នាងសម្តែងនៅយប់ថ្ងៃសៅរ៍ចុងសប្តាហ៍នេះនៅក្នុងការប្រគុំតន្ត្រីដោយឥតគិតថ្លៃមួយចាប់ពីម៉ោង៦ល្ងាចនៅឯមណ្ឌលកំសាន្តកោះពេជ្រក្នុងទីក្រុងភ្នំពេញ។ ការប្រគុំតន្ត្រីនោះនឹងជាការសម្តែងចុងក្រោយរបស់ក្រុមនេះនៅក្នុងប្រទេសកម្ពុជាយ៉ាងហោចណាស់ក៏សម្រាប់ពេលនេះដែរ៕ This posting includes an audio/video/photo media file: Download Now |
| អ្នកសេដ្ឋកិច្ចពិនិត្យមើលគោលនយោបាយដុល្លារូបនីយកម្មនៅកម្ពុជា Posted: 04 Mar 2011 12:41 PM PST ភ្នំពេញ៖ កុ្រមអ្នកជំនាញផ្នែកសេដ្ឋកិច្ចជាតិ និងអន្ដរជាតិបានពិភាក្សាគ្នាអំពីការចរាចរប្រាក់រៀលនិងប្រាក់ដុល្លារអាមេរិកដ៏ប្រទាញប្រទង់នៅក្នុងប្រទេសកម្ពុជាស្របពេលដែលប្រាក់ដុល្លារបានគ្របដណ្ដប់ ការចរាចរក្នុងទីផ្សារក្នុងស្រុកស្ទើរតែទាំងស្រុង។ កិច្ចពិភាក្សារយៈពេលពីរថ្ងៃដែលគាំទ្រដោយធនាគារជាតិនិងស្ថានទូតបារាំងបានបញ្ចប់នៅល្ងាចថ្ងៃសុក្រនេះក្នុងទីក្រុងភ្នំពេញ។ លោកហង់ ជួនណារ៉ុន រដ្ឋលេខាធិការក្រសួងសេដ្ឋកិច្ចបានថ្លែងថាប្រាក់ដុល្លារតំណាងឲ្យ៩០ភាគរយក្នុងចំណោមការចរាចរសាច់ប្រាក់នៅប្រទេសកម្ពុជា។ លោក ហួត ពុំ អគ្គនាយករងនៃគណៈកម្មការមូលប័ត្រកម្ពុជាបានកត់សម្គាល់ថា ប្រាក់រៀលកម្ពុជាត្រូវ គេនិយមប្រើសម្រាប់តែក្នុងការទូទាត់នូវទំហំទឹកប្រាក់កម្រិតតូចតែប៉ុណ្ណោះ។ «អត្រានៃការប្រើប្រាស់ប្រាក់រៀលនៅក្នុងប្រទេសកម្ពុជា គឺថាចាប់ពីមួយម៉ឺនឬពីរម៉ឺនរៀលឡើងទៅ ប្រជាពលរដ្ឋកម្ពុជា ឬក៏ជនបរទេសផងដែរមាននិន្នាការចាយវាយលុយដុល្លារ។ មានន័យថាបើទោះជាប្រាក់រៀលអាចប្រើជាមធ្យោបាយសម្រាប់ការចាយវាយក៏ប៉ុន្ដែវាត្រូវប្រើសម្រាប់ការទូទាត់ក្នុងទំហំទឹក លុយតូចៗ»។ ទោះជាយ៉ាងណាលោក ហួត ពុំ បានលើកឡើងថា ការប្រើប្រាស់ប្រាក់ដុល្លារអាចនឹងនាំឲ្យមានភាពងាយស្រួលសម្រាប់អ្នកវិនិយោគផ្ទុយទៅវិញការពឹងផ្អែកលើការចរាចរប្រាក់ដុល្លារអាមេរិកខ្លាំងពេកនឹងធ្វើឲ្យបាត់បង់អធិបតេយ្យភាពនៃប្រាក់រៀលរបស់ខ្មែរដែរ។ ប្រទេសកម្ពុជាកំពុងប្រឈមនឹងការប្រើប្រាស់សាច់ប្រាក់ជាច្រើនប្រភេទក្នុងពេលបច្ចុប្បន្ននេះ។ គេសង្កេតឃើញបា្រក់ដុល្លារមានឥទ្ធិពលក្នុងទីផ្សារកម្ពុជា ប្រាក់បាតថៃ ប្រាក់គីបរបស់ឡាវនិងប្រាក់ដុង របស់វៀតណាមក៏មានឥទ្ធិពលក្នុងការទូទាត់ថ្លៃទំនិញនៅតាមតំបន់ព្រំដែនជាប់ប្រទេសទាំងនោះដែរ។ ក៏ប៉ុន្ដែក្រុមអ្នកសេដ្ឋកិច្ចបានផ្ដោតកង្វល់លើការប្រើប្រាស់និងចរាចរណ៍ប្រាក់ដុល្លារអាមេរិកក្នុងទីផ្សារ ប្រទេសកម្ពុជាច្រើនជាងគេ។ ការប្រើប្រាស់ប្រាក់ដុល្លារអាមេរិកយ៉ាងច្រើនសន្ធឹកសន្ធាប់ក្នុងទីផ្សាររបស់ប្រទេសកម្ពុជាបានធ្វើឲ្យប្រទេសនេះទទួលខាតបង់ចន្លោះពី២០ ទៅ ៩០លានដុល្លារជារៀងរាល់ឆ្នាំពីការបោះពុម្ពប្រាក់រៀលថ្មីៗសម្រាប់ចរាចរបន្ថែមទៀត។ នេះបើយោងតាមក្រុមអ្នកសេដ្ឋកិច្ច។ លោក Jayant Menon អ្នកសេដ្ឋកិច្ចជាន់ខ្ពស់របស់ធនាគារអភិវឌ្ឍន៍អាស៊ី លើកឡើងថារដ្ឋាភិបាលកម្ពុជាគួរតែទប់ទល់នឹងសម្ពាធរបស់ប្រាក់ដុល្លារអាមេរិក និងបន្ដការប៉ុនប៉ងបដិដុល្លារូបនីយកម្ម។ ជាមួយគ្នានេះដែរ លោក Michel Dabadie អគ្គត្រួតពិនិត្យរបស់ធនាគារកណ្ដាលប្រទេសបារាំងឲ្យយោបល់ថា ដើម្បីធ្វើបដិដុល្លារូបនីយកម្មបានប្រទេសកម្ពុជាត្រូវតែធ្វើឲ្យប្រាក់រៀលរបស់ខ្លួនមានស្ថេរភាព ហើយ ប្រព័ន្ធធនាគារក្នុងស្រុកត្រូវតែលើកដម្កើងដល់ប្រាក់រៀលជាដើម។ សូមបញ្ជាក់ថា ការចរាចរប្រាក់ដុល្លារអាមេរិកត្រូវបានពេញនិយមចាប់តាំងពីអំឡុងមានវត្តមានអង្គការសហប្រជាជាតិចូលមកជួយរៀបចំការបោះឆ្នោតដោយសេរីនៅកម្ពុជាជាលើកដំបូងនៅឆ្នាំ ១៩៩៣។ លោកស្រីនាវ ចន្ថាណា ទេសាភិបាលរងធនាគារជាតិកម្ពុជា ហាក់ដូចជាយល់ស្របជាមួយលោក Michel Dabadie ដែរថា នៅពេលដែលប្រទេសកម្ពុជាពង្រឹងទំនុកចិត្តលើប្រាក់រៀលក្នុងចំណោមប្រជា ពលរដ្ឋ នៅពេលនោះឥទ្ធិពលរបស់ប្រាក់ដុល្លារនឹងថយចុះជាបណ្ដើរៗជាស្វ័យប្រវត្តិ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
