Koh Santipheap Daily |
- រថយន្តដឹកកងទាហានបុកគ្នា និងក្រឡាប់ស្លាប់៣នាក់ និង៣៨នាក់ទៀតរងរបួសធ្ងន់ និងស្រាល នៅឧត្តរប្រទេស
- ស្ទាក់ចាប់បុរសជួញដូរថ្នាំញៀនប្រហែល៣ម៉ឺនគ្រាប់ចេញពីប្រទេសឡាវចូលខេត្តស្ទឹងត្រែង
- មួយថ្ងៃផ្ទុះមីនចំនួន២លើក របួសធ្ងន់មនុស្ស២នាក់នៅស្រុកសំឡូង និងស្រុកភ្នំព្រឹក
- បុរសមួយក្រុមសម្ងំផឹកស៊ីប្រើប្រាស់ថ្នាំញៀនបង្កភាពអនាធិបតេយ្យត្រូវប៉ូលិសវេចខ្ចប់
- លោកកាដាហ្វីអះអាងថា ប្រទេសរបស់លោកស្ងប់ស្ងាត់ តែពួកប្រឆាំងប្រកាសរៀបចំរំដោះក្រុងទ្រីប៉ូលី
- គ្រាន់តែរាំជាន់ជើងគ្នាបន្តិចបន្តួចទាញកាំបិតបុ័ងតោដេញកាប់រំខានការសប្បាយ
- ប៉ូលិសប៉ុស្តិ៍ទន្លេបាសាក់ប្រមូលអ្នកប្រើប្រាស់ និងចែកចាយថ្នាំញៀនបាន២នាក់ទៀត
- បេសកជនពិសេស UNESCO ជួបពិភាក្សាជាមួយលោកសុខ អាន ម៉ោងជាង៨ព្រឹក និងសម្តែងការគួរសមជាមួយសម្តេចតេជោម៉ោង១០ព្រឹកនេះ
- ចិនឈានមុខក្នុងការវិនិយោគវារីអគ្គិសនីនៅប្រទេសភូមា
- បាតុកម្មនៅក្រុងបៃរូតប្រឆាំងប្រព័ន្ធនយោបាយបច្ចុប្បន្ន
- លោកអាមរ៍ មូសា គ្រោងឈរឈ្មោះជាបេក្ខជនប្រធានាធិបតីអេហ្ស៊ីប
- សៀមខ្លាចម៉ាត់ស៊ូរ៉ាទៅព្រះវិហារ ការព្យាយាមយកបញ្ហាព្រំដែនមកឡូកឡំការងារវប្បធម៌គ្មានតំលៃជាអន្ដរជាតិ
- កូរ៉ូឡាបុករបាំងថ្មចែកផ្លូវខ្ទេចមុខ សាក្សីថា ប្រណាំងគ្នា
- រថយន្តដឹកកងទាហានបុកគ្នា និងក្រឡាប់ស្លាប់៣នាក់ និង៣៨នាក់ទៀតរងរបួសធ្ងន់ និងស្រាល នៅឧត្តរប្រទេស
- អាជ្ញាធរខណ្ឌសែនសុខបិទផ្ទះសំណាក់ចំនួន២នៅខណ្ឌសែនសុខ
- ត្រាក់ទ័រភ្ជួរស្រែកិនមីនតោន ផ្ទុះញ័រដីខូចស្ទើរតែទាំងស្រុង សំណាងអ្នកបើកបររបួសស្រាល
- កម្មការិនីដួលសន្លប់៧នាក់នៅបន្ទប់ជួលផ្អើលទាំងយប់អាចបណ្តាលមកពីហូបចុកមិនគ្រប់គ្រាន់
- ចោរប្រដាប់អាវុធសម្រុកចូលប្លន់ផ្ទះអ្នកលក់មាសនិងប្តូរប្រាក់បាញ់រះ១៨គ្រាប់
- កម្មករសំណង់បង្កជម្លោះជាមួយប៉ូលិសរហូតផ្ទុះអាវុធ
- នាងប្រពន្ធនិងកូនតាមអង្វរលោកប្តីមានស្រីថ្មីវង្វេងផ្ទះ
| Posted: 27 Feb 2011 11:21 PM PST ខេត្តឧត្តរមានជ័យ ៖ ទាហានកម្ពុជា៣នាក់ បានស្លាប់បាត់បង់ជីវិត និង៣៨នាក់ទៀតរងរបួសធ្ងន់ និងស្រាលដេកដួលរដូករណែល ខ្លះលើផ្លូវ ខ្លះលើចិញ្ចើមផ្លូវ ខណៈរថយន្តដឹកជញ្ជូនក្រឡាប់ចាក់មនុស្សចោលកាលពីវេលាម៉ោង៩និង៣០នាទីយប់ថ្ងៃទី២៧ កុម្ភៈ ២០១១ លើកំណាត់ផ្លូវជាតិលេខ៦៩B ស្ថិតក្នុងភូមិពាមក្នុង ឃុំអូរស្វាយ ស្រុកត្រពាំងប្រាសាទ បង្កឱ្យមានការតក់ស្លុត ហើយភ្លាមៗនោះត្រូវបានសមត្ថកិច្ចពាក់ព័ន្ធ និងអាជ្ញាធរខេត្តចុះទៅជួយធ្វើអន្តរាគមន៍ចាត់ចែងស្ទូចលើករថយន្តបញ្ឈរឡើងវិញ និងបញ្ជូនអ្នករបួសទៅព្យាបាលនៅមន្ទីរពេទ្យ ។ តាមប្រភពព័ត៌មានពីកន្លែងកើតហេតុបានឱ្យដឹងថា រថយន្តដឹកកងទាហាននេះម៉ាក GMC ផ្ទុកមនុស្ស (ទាហាន) ជាង៤០នាក់ ធ្វើដំណើរចេញពីតំបន់ភ្នំស្រួច ក្រុងសំរោង ឆ្ពោះទៅកាន់បន្ទាយទាហានមួយកន្លែងក្នុងស្រុកត្រពាំងប្រាសាទ តែអកុសលទៅដល់ចំណុចកើតហេតុបានជួបរថយន្តមួយគ្រឿងទៀតមកពីមុខបើកភ្លើងហ្វាភ្លឺចាំងភ្នែក ធ្វើឱ្យរថយន្តខាងកងទាហាន ពិបាកមើលផ្លូវក៏កាច់ចង្កូតគេច រួចហើយបណ្តាលឱ្យធ្លាក់ផ្លូវទៅខាងឆ្វេងដៃតែម្តង ៕  |
| ស្ទាក់ចាប់បុរសជួញដូរថ្នាំញៀនប្រហែល៣ម៉ឺនគ្រាប់ចេញពីប្រទេសឡាវចូលខេត្តស្ទឹងត្រែង Posted: 27 Feb 2011 10:45 PM PST  ខេត្តស្ទឹងត្រែង ៖ បុរស២នាក់លាក់ទុកថ្នាំញៀន និងជាប់សង្ស័យជួញដូរឆ្លងដែនយ៉ាងសកម្ម និងជាឈ្មួញធំផងនោះត្រូវសមត្ថកិច្ចចម្រុះតាមប្រមាញ់ស្ទាក់ចាប់នៅតាមផ្លូវកាលពីវេលាម៉ោង១១និង៣០នាទីថ្ងៃត្រង់ទី២៨ កុម្ភៈ ២០១១ ស្ថិតក្នុងភូមិសអាង ឃុំសំអាង ស្រុកថាឡាបរិវ៉ាត់ ខណៈពួកគេធ្វើដំណើរចេញពីភូមិព្រះរំកិល ឃុំព្រះរំកិល ស្រុកថាឡាបរិវ៉ាត់ ។  |
| មួយថ្ងៃផ្ទុះមីនចំនួន២លើក របួសធ្ងន់មនុស្ស២នាក់នៅស្រុកសំឡូង និងស្រុកភ្នំព្រឹក Posted: 27 Feb 2011 10:44 PM PST ខេត្តបាត់ដំបង ៖ យោងតាមរបាយការណ៍របស់ស្នងការដ្ឋាននគរបាលខេត្តបាត់ដំបងបាននិយាយឱ្យដឹងថា មានការផ្ទុះគ្រាប់មីន២លើក ផ្ទួនៗគ្នា កាលពីថ្ងៃទី២៧ កុម្ភៈ ២០១១ កើតឡើងនៅស្រុកសំឡូត និងស្រុកភ្នំព្រឹក បណ្តាលឱ្យមនុស្ស២នាក់រងរបួសធ្ងន់ និងត្រាក់ទ័រមួយគ្រឿងត្រូវខូចខាត បង្កឱ្យមានការភ្ញាក់ផ្អើល និងភ័យតក់ស្លុតយ៉ាងខ្លាំង។  |
| បុរសមួយក្រុមសម្ងំផឹកស៊ីប្រើប្រាស់ថ្នាំញៀនបង្កភាពអនាធិបតេយ្យត្រូវប៉ូលិសវេចខ្ចប់ Posted: 27 Feb 2011 10:44 PM PST រាជធានីភ្នំពេញ ៖ បុរសជាប់សង្ស័យចែកចាយ និងប្រើប្រាស់ថ្នាំញៀន៦នាក់ត្រូវបានប៉ូលិសខណ្ឌសែនសុខឆ្មក់ចូលបង្ក្រាបឃាត់ខ្លួន ខណៈពួកគេកំពុងជួបជុំគ្នាផឹកស៊ី និងប្រើប្រាស់ថ្នាំញៀនជាក់ស្តែងនៅឯផ្ទះមួយស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង១១យប់ថ្ងៃទី២៧ កុម្ភៈ ២០១១ ។ ការឆ្មក់ចូលបង្ក្រាបរបស់ប៉ូលិសនៃអធិការដ្ឋានខណ្ឌសែនសុខទៅលើអ្នកប្រើប្រាស់គ្រឿងញៀនក៏ដូចជាអ្នកចែកចាយនេះ ដឹកនាំដោយលោកជាវ វិបុល អធិការរងទទួលបន្ទុកកិច្ចការព្រហ្មទណ្ឌគឺធ្វើឡើងក្រោយពេលសមត្ថកិច្ចរបស់លោកបានឃ្លាំមើលទៅលើទីតាំងនោះអស់រយៈពេលច្រើនថ្ងៃរួចមកហើយ។  |
| Posted: 27 Feb 2011 08:16 PM PST  ក្នុងសេចក្តីថ្លែងការណ៍មួយតាមទូរស័ព្ទផ្តល់ឱ្យទូរទស្សន៍ស៊ែប៊ី PINK TV លោកកាដាហ្វីអះអាងថា ប្រទេសរបស់លោកមានភាពស្ងប់ស្ងាត់ទាំងស្រុង។ លោកចោទប្រកាន់ពួកអាល់កៃដាថា ជាប្រភពនៃពួកបនភេរវកម្មដែលបណ្តាលឱ្យមានជនរងគ្រោះច្រើននាក់។ លោកមានប្រសាសន៍ថា នាពេលនេះពុំមានឧប្បតិ្តហេតុនានាឡើយ ហើយលីប៊ីមានភាពស្ងប់ស្ងាត់ទាំងស្រុង។ គ្មានអ្វីខុសពីធម្មតាឡើយ និងពុំមានចលាចលទៀតទេ។ មនុស្សទាំងឡាយត្រូវសម្លាប់ ដោយពួកបនភេរវកម្មដែលពិតណាស់ស្ថិតក្នុងក្រុមអាល់កៃដា។ មេដឹកនាំលីប៊ីរូបនេះថ្លែងទៀតថា ក្រុមប្រឆាំងតូចមួយបច្ចុប្បន្នកំពុងត្រូវឡោមព័ទ្ធ។ យើងនឹងដោះស្រាយរឿងនេះ។ លោកអះអាងថា ប្រជាជនលីប៊ីស្ថិតនៅ ពីក្រោយលោកទាំងស្រុង។ លោកបន្តថា ដំណោះស្រាយរបស់ក្រុមប្រឹក្សាសន្តិសុខអ.ស.បដែលដាក់ទណ្ឌកម្មប្រឆាំងក្រុងទ្រីប៉ូលីពុំមានតម្លៃឡើយ។ នៅទីក្រុងណាលូតចម្ងាយ៦០គីឡូម៉ែត្រពីព្រំដែនជាមួយទុយនីស៊ីសមាជិកម្នាក់នៃគណៈកម្មាធិការបដិវត្តន៍ទីក្រុងនេះអះអាងថា ទីក្រុងជាច្រើននៅភាគខាងលិចលីប៊ីធ្លាក់ក្នុងដៃពួកបះបោរចាប់តាំងពី ច្រើនថ្ងៃមកហើយ រួចកំពុងរៀបចំក្បួនដើម្បីរំដោះទីក្រុងទ្រីប៉ូលី។ ចំណែកសហរដ្ឋអាមេរិកវិញប្រកាសត្រៀមផ្តល់រាល់ជំនួយដល់ពួកប្រឆាំងនឹងរបបលោកកាដាហ្វី។ នេះជាការអះអាងកាលពីថ្ងៃទី២៧ កុម្ភៈ របស់រដ្ឋមន្ត្រីការបរទេសអាមេរិក លោកស្រីហ៊ីលឡារី គ្លីនតុន។ លោកស្រីមានប្រសាសន៍ថា ដំបូងយើងត្រូវឃើញការបញ្ចប់របបលោកកាដាហ្វី ហើយលែងមានថ្លុកឈាម។ រីឯបណ្តាមេដឹកនាំតវ៉ាវិញបានបង្កើតក្រុមប្រឹក្សាបណ្តោះអាសន្នជាតិមួយដែលតំណាងឱ្យបណ្តាទីក្រុងធ្លាក់ក្នុងកណ្តាប់ដៃរបស់ពួកបះបោរលីប៊ី។ នេះជាការប្រកាសរបស់អ្នកនាំពាក្យពួកប្រឆាំងម្នាក់លោក ABDELHAFEZ GHOQAក្នុងឱកាសនៃសន្និសីទសារព័ត៌មានមួយនៅទីក្រុងបេនហ្គាហ្សី ជាទីក្រុងធំទី២របស់ប្រទេសមូលដ្ឋានធំនៃការបះបោរ ៕  |
| គ្រាន់តែរាំជាន់ជើងគ្នាបន្តិចបន្តួចទាញកាំបិតបុ័ងតោដេញកាប់រំខានការសប្បាយ Posted: 27 Feb 2011 08:02 PM PST  រាជធានីភ្នំពេញ ៖ យុវជនម្នាក់ដោយគ្រាន់តែរាំជាន់ជើងគ្នាបន្តិចបន្តួចក្នុងពិធីចាក់ធុងបាស់រាំកំសាន្តមួយក៏ទាញកាំបិតបុ័ងតោ ដេញកាប់យុវជនម្នាក់ទៀត បណ្តាលឱ្យរយះក្បាលហូរឈាមស្រោចខ្លួន និងដេរច្រើនថ្នេរ បង្កឱ្យមានការភ្ញាក់ផ្អើល ហើយបន្តិចក្រោយមកប៉ូលិសបានមកដល់ឃាត់ខ្លួនយុវជនដៃដល់យកទៅសាកសួរកាលពីវេលាម៉ោង១០និង១៥នាទីយប់ ថ្ងៃទី២៧ កុម្ភៈ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ ជនដៃដល់ឈ្មោះរឿន រ៉េត អាយុ២០ឆ្នាំ មានស្រុកកំណើតនៅភូមិស្ពានក្រោម ស្រុកស្ទោង ខេត្តកំពង់ធំ ត្រូវបានប៉ូលិសប៉ុស្តិ៍ភ្នំពេញថ្មី ឃាត់ខ្លួន ក្រោយពេលកាប់យុវជនម្នាក់ទៀត បណ្តាលឱ្យរបួសរយះក្បាលធ្ងន់ធ្ងរ ។ ចំណែកជនរងគ្រោះឈ្មោះផឿង សុផាត អាយុ១៩ឆ្នាំ ជាកម្មកររោងចក្រកាត់ដេរ ស្នាក់នៅក្រុមទី៤ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ត្រូវគេកាប់១បុ័ងតោចំក្បាលខាងក្រោយ ។ ឥឡូវកំពុងសម្រាកព្យាបាលនៅមន្ទីរពេទ្យព្រះកុសុមៈ ក្រោយពេលគ្រូពេទ្យព្យាបាល និងដេររួចមក ។ សូមបញ្ជាក់ថា កាលពីរាត្រីមុនកើតហេតុបន្តិច នៅភូមិភ្នំពេញថ្មី មានពិធីចាក់ធុងបាស់រាំកំសាន្តលេង ដោយមានមនុស្សម្នាជិតឆ្ងាយជាច្រើនមកមើល និងចូលរាំកំសាន្ត ប៉ុន្តែខណៈកំពុងសប្បាយ ស្រាប់តែមានរាំជាន់ជើងគ្នាបន្តិចបន្តួចក៏ផ្អើលកាប់គ្នាតែម្តង រំខានគេឯងលេងសប្បាយអស់ ៕  |
| ប៉ូលិសប៉ុស្តិ៍ទន្លេបាសាក់ប្រមូលអ្នកប្រើប្រាស់ និងចែកចាយថ្នាំញៀនបាន២នាក់ទៀត Posted: 27 Feb 2011 07:57 PM PST  រាជធានីភ្នំពេញ ៖ ស្ត្រី២នាក់ត្រូវបានសមត្ថកិច្ចនគរបាលទន្លេបាសាក់ ខណ្ឌចំការមន ឃាត់ខ្លួនកាលពីយប់ថ្ងៃទី២៦ និង២៧ កុម្ភៈ ២០១១ នៅលើវិថីព្រះសុធារស សង្កាត់ទន្លេបាសាក់ ខណ្ឌចំការមន ពីបទជាប់ពាក់ព័ន្ធសង្ស័យបានប្រើប្រាស់ និងចែកចាយថ្នាំញៀន ។ ស្ត្រីទាំង២នាក់នេះ ឈ្មោះតាំង សុខពៅ អាយុ៣៣ឆ្នាំ មុខរបរកោសជប់ និងម៉ាស្សា នៅផ្ទះលេខ១១៨ វិថីព្រះសុធារស សង្កាត់ទន្លេបាសាក់ និងម្នាក់ទៀតឈ្មោះអែម ពិសី អាយុ២១ឆ្នាំ ស្នាក់នៅ និងមុខរបរពុំពិតប្រាកដ ។ តាមប្រភពព័ត៌មានពីក្រុមសមត្ថកិច្ចដែលចាប់ខ្លួនស្ត្រីទាំង២នាក់ខាងលើបានឱ្យដឹងថា ដំបូងឡើយ នៅយប់ថ្ងៃទី២៦ កុម្ភៈ សមត្ថកិច្ចបានឃាត់ខ្លួនឈ្មោះអែម ពិសី ឆែកឆេរឃើញមានថ្នាំញៀនប្រភេទម៉ាទឹកកក ចំនួន៤កញ្ចប់នៅជាប់ខ្លួន ។ ក្រោយពេលសមត្ថកិច្ចសាកសួរឈ្មោះអែម ពិសី ឆ្លើយថា ទិញពីឈ្មោះតាំង សុខពៅ ។ យោងតាមចម្លើយសារភាពរបស់ឈ្មោះអែម ពិសី សមត្ថកិច្ចឈានទៅចាប់ខ្លួនឈ្មោះតាំង សុខពៅ យកមកសាកសួរបន្ថែមទៀត ។ បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចកសាងសំណុំរឿងបញ្ជូនទៅតុលាការរួចហើយដើម្បីផ្តន្ទាទោសតាមច្បាប់ ៕  |
| Posted: 27 Feb 2011 07:45 PM PST រាជធានីភ្នំពេញ ៖ មន្ត្រីអាជ្ញាធរជាតិប្រាសាទព្រះវិហារបានបញ្ជាក់ឱ្យដឹងថា ក្នុងការប្រយុទ្ធគ្នារវាងកងទ័ពកម្ពុជា-ថៃ កាលពីថ្ងៃទី៤ ដល់ថ្ងៃទី៧ កុម្ភៈ កន្លងមកនេះ ប្រាសាទព្រះវិហារបានទទួលរងនូវគ្រាប់កាំភ្លើងធំរបស់ទាហានសៀមចំនួន៤គ្រាប់ ហើយថាប្រាសាទព្រះវិហារបានខូចខាតប្រមាណពី៧០ទៅ៨០ភាគរយ ។ ថ្លែងប្រាប់ក្រុមអ្នកកាសែតនៅព្រលានយន្តហោះអន្តរជាតិភ្នំពេញ ក្នុងឱកាសទៅទទួលបេសកជនពិសេសអង្គការ UNESCO កាលពីរសៀលថ្ងៃអាទិត្យ ទី២៧ កុម្ភៈ ម្សិលមិញ លោកជុច ភឿន ប្រធានអាជ្ញាធរជាតិប្រាសាទព្រះវិហារ បានបញ្ជាក់ឱ្យដឹងថា នៅពេលនេះទាំងកម្ពុជា ក៏ដូចជាអង្គការ UNESCO អត់ទាន់និយាយពីការដែលតម្រូវឱ្យថៃសងការខូចខាតប្រាសាទព្រះវិហារនោះនៅឡើយទេ ប៉ុន្តែថា អ្នកបំផ្លាញត្រូវប្រឈមមុខនឹងផ្លូវច្បាប់អន្តរជាតិ ។ លោកជុច ភឿន បានបន្តថា បេសកជនពិសេសរបស់អង្គការ UNESCO លោកកូអ៊ីជីរ៉ូ ម៉ាត់ស៊ូរ៉ា បានសុំពន្យារពេលទៅកាន់ប្រាសាទព្រះវិហាររយៈពេល២សប្តាហ៍ ដោយទុកឱ្យក្រុមអ្នកសង្កេតការណ៍របស់ប្រទេសឥណ្ឌូណេស៊ីទៅកាន់តំបន់ជម្លោះជាមុនសិន ។ ទោះជាយ៉ាងណា លោកប្រធានអាជ្ញាធរជាតិប្រាសាទព្រះវិហារបានបញ្ជាក់ថា នៅពេលដ៏ខ្លីខាងមុខនេះ ក្រុមអ្នកសង្កេតការណ៍ឥណ្ឌូណេស៊ីនឹងទៅកាន់តំបន់ព្រំដែនប្រាសាទព្រះវិហារ ពីព្រោះកាលពីថ្ងៃសៅរ៍ ទី២៥ កុម្ភៈ កន្លងមកនេះ ទាហានឥណ្ឌូណេស៊ីមួយក្រុមបានទៅកាន់តំបន់នោះ ហើយពួកគេនឹងធ្វើរបាយការណ៍ជូនប្រធានអាស៊ាន នៅមុនពេលការបញ្ជូនអ្នកសង្កេតការណ៍មកកាន់តំបន់ព្រំដែនប្រាសាទព្រះវិហារ ។ លោកជុច ភឿន បានបញ្ជាក់ដែរថា នៅវេលាម៉ោងជាង៨ព្រឹកថ្ងៃចន្ទ ទី២៨ កុម្ភៈ នេះ បេសកជនពិសេសអង្គការ UNESCO នឹងចូលជួបពិភាក្សាការងារ និងស្តាប់របាយការណ៍ស្តីពីការប្រយុទ្ធគ្នារវាងកងទ័ពកម្ពុជា-ថៃ របស់លោកឧបនាយករដ្ឋមន្ត្រីសុខ អាន ហើយនៅវេលាម៉ោង១០ព្រឹកថ្ងៃដដែលនេះ លោកកូអ៊ីជីរ៉ូ ម៉ាត់ស៊ូរ៉ា នឹងចូលជួបសម្តែងការគួរសម និងសវនាការជាមួយសម្តេចតេជោនាយករដ្ឋមន្ត្រី ហ៊ុន សែន ផងដែរ ៕  |
| ចិនឈានមុខក្នុងការវិនិយោគវារីអគ្គិសនីនៅប្រទេសភូមា Posted: 27 Feb 2011 07:31 PM PST  ទស្សនាវដ្តីវិកលីអ៊ីឡឺវ៉េន នៅក្នុងប្រទេសភូមាបានឱ្យដឹងពីរបាយការណ៍ផ្នែកវិនិយោគនៅក្នុងប្រទេសភូមា ដោយយោងតាមមន្ត្រីក្រសួងពាណិជ្ជកម្មរបស់ភូមាសុំមិនបង្ហើបឱ្យដឹងឈ្មោះបញ្ជាក់ថា លទ្ធផលធ្វើអង្កេតគំរោងការមុខជំនួញ និងការវិនិយោគបរទេសដែលរៀបចំឡើងកាលពីខែមករាកន្លងមកឃើញថា រដ្ឋាភិបាលចិន គឺជាអ្នកវិនិយោគទុនផ្នែកមុខជំនួញដ៏ធំបំផុតនៅប្រទេសភូមា ដោយមានថវិកាវិនិយោគក្នុងគំរោងផ្សេងៗខ្ពស់ដល់ទៅ៩.៦០០លានដុល្លារ។ នៅក្នុងរបាយការណ៍បញ្ជាក់ឱ្យដឹងថា ចិនក្លាយជាប្រទេសមានការវិនិយោគដ៏ធំបំផុតនៅ ប្រទេសភូមាជាលើកដំបូងក្នុងអំឡុងពេល៧ឆ្នាំ ដោយនាំមុខក្រុមអ្នកវិនិយោគទុនមកពីប្រទេសថៃដែលចំណាយប្រាក់វិនិយោគក្នុងភូមាស្ថិតនៅលំដាប់ទី១ ចាប់តាំងពីឆ្នាំ១៩៨៨ ឬមានថវិកាវិនិយោគប្រហែល៩.៥៦០លានដុល្លារ។ ការវិនិយោគពីប្រទេសចិនភាគច្រើនជាគំរោងការសាងសង់រោងចក្រផលិតវារីអគ្គិសនី និងសាងសង់បំពង់បង្ហូរឧស្ម័នធម្មជាតិឆ្ពោះទៅប្រទេសចិន ដោយស្របតាមបណ្តោយផ្លូវនៅរដ្ឋរ៉ាឃិន ភាគខាងលិចប្រទេសភូមាដែលមានព្រំដែនជាប់ប្រទេសចិន ខណៈពេលរដ្ឋាភិបាល និងក្រុមអ្នកជំនួញឯកជនមកពីតៃវ៉ាន់ជាប់លំដាប់ថ្នាក់អ្នកវិនិយោគទុននៅភូមាលំដាប់ទី៣។  |
| បាតុកម្មនៅក្រុងបៃរូតប្រឆាំងប្រព័ន្ធនយោបាយបច្ចុប្បន្ន Posted: 27 Feb 2011 07:26 PM PST ពលរដ្ឋលីបង់ជាច្រើនរយនាក់បាននាំគ្នាធ្វើបាតុកម្មកាលពីថ្ងៃទី២៧ កុម្ភៈ នៅទីក្រុងបៃរូត ប្រឆាំងនឹងប្រព័ន្ធនយោបាយបច្ចុប្បន្នដែលផ្អែកលើលក្ខណៈវិនិច្ឆ័យសាសនា និងសហគមន៍ ។  |
| លោកអាមរ៍ មូសា គ្រោងឈរឈ្មោះជាបេក្ខជនប្រធានាធិបតីអេហ្ស៊ីប Posted: 27 Feb 2011 07:23 PM PST លោកអាមរ៍ មូសា ថ្លែងកាលពីថ្ងៃទី២៧ កុម្ភៈ ថា លោកនៅពុំទាន់សម្រេចចិត្តឈរឈ្មោះជាបេក្ខជនប្រធានាធិបតីអេហ្ស៊ីបនៅឡើយ ដោយលោកបដិសេធព័ត៌មានទាំងឡាយរបស់ទីភ្នាក់ងារព័ត៌មានអេហ្ស៊ីប MENA ដែលថា លោកបានប្រកាសពីបេក្ខភាពរបស់លោក ។ អាយុ៧៤ឆ្នាំអគ្គលេខាធិការរបស់សម្ព័ន្ធអារ៉ាប់រូបនេះ ពិតជាមានចេតនាឈរឈ្មោះសម្រាប់ការបោះឆ្នោតប្រធានាធិបតី ក៏ប៉ុន្តែលោករង់ចាំការអនុម័តលើវិសោធនកម្មរដ្ឋធម្មនុញ្ញដែលកំពុងតែតែងតាំងដើម្បីធ្វើការសម្រេចចិត្ត ។  |
| Posted: 27 Feb 2011 07:12 PM PST អំពើជាបន្ដបន្ទាប់របស់ថៃចាប់តាំងពីឆ្នាំ ២០០៧រហូតមកដល់បច្ចុប្បន្នបានបង្ហាញឱ្យមជ្ឈដ្ឋានជាតិ និងអន្ដរជាតិបានមើលឃើញកាន់តែច្បាស់នូវមហិច្ឆតាយូរអង្វែងរបស់ថៃ ដែលមិនត្រឹមតែជាការទាមទារយកតំបន់ក្បែរប្រាសាទព្រះវិហារប៉ុណ្ណោះទេ តែក៏ត្រូវទាមទារយកប្រាសាទព្រះវិហារខ្មែរទាំងមូលថែមទៀតផង។ កន្លងមកថ្មីៗនេះ ថៃបានប្រើប្រាស់យុទ្ធ នាការអុកឡុកលើវេទិកាអន្ដរជាតិ ដូចជានៅក្នុងឆ្នាំ២០០៨នាទីក្រុងកេបិច ប្រទេសកាណាដា នៅក្នុងឆ្នាំ២០០៩នាទីក្រុងសេវីលប្រទេសអេស្ប៉ាញ និងនៅឆ្នាំ២០១០នាទីក្រុងប្រេស៊ីលលីយ៉ាប្រទេសប្រេហ្ស៊ីល ពិសេសថៃនឹងបន្ដអុកឡុកក្នុងសម័យប្រជុំលើកទី៣៥ នៃគណៈកម្មាធិការបេតិកភណ្ឌពិភពលោកដែលនឹងធ្វើនៅឆ្នាំ២០១១ ក្នុងប្រទេសបារេន នាពេលខាងមុខនេះជាក់ជាមិនខាន ។ នៅពេលដែលការបាះឆ្នោតរបស់ថៃជិតមកដល់ ហើយផែនការគ្រប់គ្រងប្រាសាទនឹងត្រូវលើកឡើងក្នុងសម័យប្រជុំលើក ទី៣៥នៃគណៈកម្មាធិការបេតិកភណ្ឌពិភពលោកដែលនឹងត្រូវធ្វើនៅប្រទេសបារេនក្នុងខែមិថុនាខាងមុខនេះកាន់ តែជិតមកដល់ រដ្ឋាភិបាលអាប់ភីស៊ីតកាន់តែអស់សង្ឍឹមលើនយោបាយការទូតបានសម្រេចប្រកាសធ្វើសង្គ្រាមដែលជាជម្រើសចុងក្រោយ ដើម្បីបើកការវាយលុកដណ្ដើមកាន់កាប់យកប្រាសាទព្រះវិហារ និងតំបន់ជុំវិញ ប្រាសាទដោយកំលាំងតែម្ដង ។ ក៏ប៉ុន្ដែការប្រើ ប្រាស់កំលាំងរបស់អាប់ភីស៊ីតមិនបានសម្រេចដូចបំណងឡើយ។ ផ្ទុយទៅវិញកងទ័ពថៃបានបាញ់គ្រាប់កាំភ្លើងធុនធ្ងន់ដាក់ប្រាសាទបានបណ្ដាលឱ្យប្រាសាទត្រូវទទួលរងនូវការខូច ខាតយ៉ាងដំណំ ។ បួនថ្ងៃបន្ទាប់ពីមានលិខិតមួយច្បាប់របស់ប្រទេសកម្ពុជាផ្ញើជូនលោកជំទាវអេរីណា បូគូវ៉ា អគ្គនាយិការអង្គការយូណេស្កូ ដើម្បីស្នើសុំឱ្យលោកជំទាវចាត់វិធានការការពារប្រាសាទព្រះវិហារ ស្របតាមអនុសញ្ញាឆ្នាំ១៩៥៤ និងស្នើសុំលោកជំទាវចាត់តាំងក្រុមវាយតំលៃការខូចខាតនៃប្រាសាទ គឺអាប់ភីស៊ីតបានយល់ដឹងយ៉ាងច្បាស់អំពីការខូចខាតនៃប្រាសាទ និងការបាក់មុខរបស់ខ្លួនលើឆាកអន្ដរជាតិដោយអំពើឈ្លានពានសារជាថ្មីម្ដងទៀតរបស់ខ្លួនមកលើកម្ពុជា បានចាត់បញ្ជូនលោកអាស្ដា ចាយ៉ាណាម៉ា ប្រធានគណៈកម្មការចម្រុះទទួលបន្ទុកកិច្ចការព្រំដែនគោករបស់ថៃ ដើម្បីធ្វើដំណើជាបន្ទាន់ទៅកាន់ទីក្រុងប៉ារីស ដើម្បីធ្វើការរារាំង គំរាមគំហែង និងព្រមានដល់លោកជំទាវអេរីណា បូគូវ៉ា និងលោកម៉ាត់ស៊ូរ៉ា អតីតអគ្គនាយិកានៃអង្គការយូណេស្កូថា កុំឱ្យមកពិនិត្យមើលការខូចខាតនៃប្រាសាទព្រះវិហារ បើពុំដូច្នោះទេស្ថានការណ៍រឹតតែធ្ងន់ធ្ងរឡើងថែមទៀត។ នៅថ្ងៃទី២៥ កុម្ភៈ ឆ្នាំ២០១១ គេហទំព័របាងកកប៉ុស្ដដោយដកស្រង់សំដីរបស់លោកថានី ថុងផាក់ឌី អគ្គនាយកដ្ឋ្កានព័ត៌មាននៃក្រសួងការបរទេសថៃថា បេសកជនពិសេសរបស់អង្គការយូណេស្កូលើប្រាសាទព្រះវិហារនឹងមិនត្រូវបានអនុញ្ញាតទៅទស្សនាប្រាសាទព្រះវិហារឡើយ ។ ប៉ុន្ដែលោកម៉ាត់ស៊ូរ៉ា នឹងទៅកាន់ក្រុងភ្នំពេញ ហើយនិងមិនធ្វើដំណើទៅកាន់តំបន់ព្រំដែនដែលមានជម្លោះឡើយ។ តើនេះមិនមែនជាចេតនាដ៏អាក្រក់ក្នុងនយោបាយការទូតក្រអឺតក្រទមរបស់ថៃទេឬ ដែលថៃប្រញាប់ទៅគំរាមកំហែងអង្គការយូណេស្កូ ? តើអ្វីទៅជាហេតុការពិតសំរាប់អាប់ភីស៊ីតពន្យល់លោកម៉ាត់ស៊ូរ៉ា ? វាប្រាកដណាស់ ក្នុងដំណើទស្សនៈកិច្ចរបស់លោក ម៉ាត់ស៊ូរ៉ា ទៅកាន់ទីក្រុងបាងកកគ្មានអ្វីដែលជាហេតុការពិត និងតថភាពជាក់ស្ដែងដែលអាប់ភីស៊ីតយកទៅពន្យល់លោកម៉ាត់ស៊ូរ៉ាបានឡើយ ក្រៅតែពីគំនរផេះបាក់បែក និងគ្រាប់អំបែងកាំភ្លើងរបស់អាប់ភីស៊ីតបន្សល់ទុកលើប្រាសាទព្រះវិហារ ដែលជារមណីយដ្ឋានបេតិកភណ្ឌពិភពលោកប៉ុណ្ណោះ។ ត្រង់ចំណុចនេះថៃត្រូវយល់ដឹងថា ខ្លួនគ្មានចំណែកណាមួយលើប្រាសាទព្រះវិហារខ្មែរឡើយ។ ដូច្នេះហើយថៃគ្មានមូលដ្ឋានដើម្បីជំទាស់ ឬរារាំងដោយគឃ្លើននូវបេសកកម្មរបស់លោកម៉ាត់ស៊ូរ៉ា ដើម្បីធ្វើការពិនិត្យ និងវាយតំលៃការខូចខាតនៃប្រាសាទ ព្រះវិហារបានឡើយ ។ ហើយថៃក៏គ្មានមូលដ្ឋានអះអាងយ៉ាងក្រអឹតក្រទមថា អង្គការយូណេស្កូត្រូវសុំការអនុញ្ញាតថៃ ក្នុងបេសកកម្មទៅកាន់ប្រាសាទព្រះវិហារបានឡើយដែរ។ នៅថ្ងៃទី២៥ កុម្ភៈ ដដែល គេហទំព័របាងកកបានសរសេរថា... ដែលត្រូវបានផ្ដល់សច្ចាប័នដោយប្រទេសកម្ពុជា និងថៃ ។ តើនេះមិនមែនជាអំពើឈ្លានពាន និងការំលោភអធិបតេយ្យរបស់កម្ពុជាឬទេ ? កម្ពុជាជាម្ចាស់ប្រាសាទព្រះវិហារ ហើយកម្ពុជាជារដ្ឋអធិបតេយ្យមានសទ្ធិអំណាចក្នុងការគ្រប់គ្រង និងចាត់ចែងប្រាសាទនេះ ។ ថៃគ្មានចំណែកណាមួយលើប្រាសាទព្រះវិហារខ្មែរបានឡើយ ។ ថៃត្រូវរៀនសូត្រគោរពសាលដីកាតុលាការយុត្ដិធម៌អន្ដរជាតិឆ្នាំ១៩៦២ ពិសេសថៃត្រូវគោរពតាមសេចក្ដីសម្រេចលេខ32 COM 8B.102របស់គណៈកម្មាធិការបេតិកភណ្ឌពិភព លោកដែលបានដាក់ប្រាសាទព្រះវិហារជាសម្បត្ដិបេតិកភណ្ឌពិភពលោកក្នុងឆ្នាំ២០០៨នាទីក្រុងកេបិច ប្រទេសកាណាដា តាមសំណើរបស់កម្ពុជា ។ វាជាការចម្លែកខ្លាំងណាស់ថា តើហេតុអ្វីអាប់ភីស៊ីត និងគូកនខ្លាចដំណើរទស្សនកិច្ចរបស់លោកម៉ាត់ស៊ូរ៉ា ទៅកាន់ប្រាសាទព្រះវិហារ ? លោកម៉ាត់ស៊ូរ៉ា ជាបេសកកជនពិសេស ត្រូវបានចាត់តាំងដោយលោកជំទាវអេរីណា បូគូវ៉ា អគ្គនាយិកានៃអង្គការយូណេស្កូ គឺជាតំណាងរបស់អង្គការយូណេស្កូបំពេញការងារដ៏ពិសិដ្ឋរបស់អង្គការនេះ ដើម្បីការពារ និងសង្គ្រោះប្រាសាទនេះ ដែលស្ថិតក្នុងការគំរាមគំហែង និងការបំផ្លាញដោយសារអំពើឈ្លានពានរបស់ថៃទៅអនាគត ។ វាច្បាស់ណាស់ កម្ពុជាមានគ្រប់ហេតុផលជឿថា ថៃនឹងមិនស្ទាក់ស្ទើរបំផ្លាញប្រាសាទតាមរយៈការបាញ់កាំភ្លើងធំឡើយ។ ហើយការពិតយ៉ាងណានោះ លោកម៉ាត់ស៊ូរ៉ា នឹងបានមើលឃើញនូវហេតុការពិតជាក់ស្ដែងនៅនឹងកន្លែងដែលកម្ពុជាគ្មានការលាក់បាំងដូចពាក្យចាស់ថា មាសសុទ្ធមិនខ្លាចភ្លើង ។ តើថៃជាមាសក្លែងក្លាយឬបានជាខ្លាចភ្លើង ? ប្រសិនបើថៃជាមាសក្លែងក្លាយមែននោះថៃច្បាស់ណាស់មិនចង់ឱ្យពិភពលោកមើលឃើញនូវការពិតឡើយ។ ហើយអ្វីដែលថៃខ្លាចនោះ គឺស្លាកស្នាម ឬរូបភាពនៃអំពើឈ្លាពានរបស់ខ្លួនកំពុងដិតដាមលើប្រាសាទព្រះវិហារនៅឡើយដែលទាំងអស់នោះ គឺជាគំនផេះបាក់បែក និងគ្រាប់អំបែងកាំភ្លើងរបស់ថៃនោះឯងដែលលោកម៉ាត់ស៊ូរ៉ា និងសហគមន៍អន្ដរជាតិបានមើលឃើញ។ ដូច្នេះហើយបេសកកម្មរបស់លោកម៉ាត់ស៊ូរ៉ាមានតំលៃខ្លាំងណាស់ក្នុងការទទួលខុសត្រូវរួមក្នុងកិច្ចការពារ និងសង្គ្រោះដែលលោកនឹងត្រូវទៅកាន់ប្រាសាទព្រះវិហារ ហើយនិងបានមើលឃើញនូវការហេតុជាក់ស្ដែង និងការពិតទាំងឡាយនៅនឹងកន្លែង ដែលថៃបាននិងកំពុងបិទបាំងសហគមន៍អន្ដរជាតិ និងប្រជាជនខ្លួនឯង។ សំរាប់កម្ពុជាជាម្ចាស់ប្រាសាទមានកាតព្វកិច្ចអនុវត្ដតាមអនុសញាឆ្នាំ១៩៥៤ និងអនុសញាឆ្នាំ១៩៧២ ដែលក្នុងនោះកម្ពុជាមានភ័ស្ដុតាងគ្រប់គ្រាន់ និងជាក់ស្ដែងនៅនឹងកន្លែងដើម្បីជំរាបជូនលោកម៉ាត់ស៊ូរ៉ាអំពីការខូចខាតនៃប្រាសាទដោយសារអំពើឈ្លានពានរបស់ថៃមកលើកម្ពុជា ហើយលោកម៉ាត់ស៊ូរ៉ា នឹងបានយល់យ៉ាងច្បាស់អំពីការពិតទាំងឡាយ ហើយការពិតទាំងនោះនឹងឈ្នះលើការភូតកុហក កាឡៃការពិត និងការបំភាន់មតិមជ្ឈដ្ឋានជាតិ និងអន្ដរជាតិ ។ ចំពោះផែនការគ្រប់គ្រងប្រាសាទព្រះវិហារត្រូវបានគណៈកម្មាធិការបេតិកភណ្ឌពិភពលោកនៃអង្គការយូណេស្កូបានព្រមទទួលយកតាមសេចក្ដីសម្រេចរបស់ខ្លួនលេខ 34 COM 7B.66 នាទីក្រុងប្រេស៊ីលីយ៉ាក្នុងសម័យប្រជុំលើកទី៣៤ ឆ្នាំ២០១០កន្លងទៅនេះ។ ក្នុងន័យនេះ កម្ពុជាបានបំពេញកាតព្វកិច្ចរបស់ខ្លួន និងបានអនុវត្ដតាមសំណើ ក្នុងសេចក្ដីសម្រេចលេខ 33 COM 7B.65 ដែលត្រូវបានអនុម័តនៅសេវីលឆ្នាំ២០០៩ ដោយកម្ពុជាបានដាក់ជូននូវឯកសារ របាយការណ៍ និងផែនការគ្រប់គ្រងដល់គណៈកម្មាធិការ ។ ហើយសេចក្ដីសម្រេច Decision 34 COM.7B.66 ចែងយ៉ាងច្បាស់ដូចខាង ក្រោមនេះ គឺ នេះពិតជាជ័យជំនៈរបស់កម្ពុជាក្នុងជំហានទៅមុខ ។ ហើយក្នុងខ្សែភ្នែកអ្នកច្បាប់អន្ដរជាតិបានបង្ហាញឱ្យឃើញនូវចំណុចដ៏សំខាន់ និងរឹងមាំសម្រាប់អនាគត គឺហត្ថលេខារបស់រដ្ឋមន្ដ្រីថៃ ស៊ូវីត ឃុនគិទី លើសេចក្ដីសម្រេច Decision 34 COM.7B.66 ដែលត្រូវបានអនុម័តដោយគណៈកម្មាធិការ។ នេះជាឯកសារអន្ដរជាតិ ដែលមានសេចក្ដីសម្រេចរបស់ក្រៃឆឺច កេបិច និងសេវីល ព្រមទាំងការចុះបញ្ជីប្រាសាទព្រះវិហារក្នុងបញ្ជីបេតិកភណ្ឌពិភពលោក និងឯកសារដែលកម្ពុជាបានដាក់ជូនរាប់ទាំងរបាយការណ៍បច្ចេកទេសផែនទី ប្លង់ហ្គ្រាហ្វីក និងកម្មវិធីកំណត់តំបន់ និងបច្ចេកទេស ។ ដូច្នេះហើយវាមិនអាចឱ្យថៃប្រកាន់យកជំហប្រឆាំងនឹងការចុះបញ្ជី និងប្រឆាំងនឹងផែនការគ្រប់គ្រងប្រាសាទបានឡើយ បើទោះបីថៃព្យាយាមយកបញ្ហាព្រំដែនមកលាយឡំជាមួយនឹងកិច្ចការវប្បធម៌ដោយគ្រាន់តែសំអាងលើផែនទីឯកតោភាគីដែលជាផែនទីសម្ងាត់របស់ខ្លួន និងជាផែនទីដែលគ្មានតំលៃជាអន្ដរជាតិនោះបានឡើយ ៕ ( ដោយ ៖ ឡុង សុគុណ )  |
| កូរ៉ូឡាបុករបាំងថ្មចែកផ្លូវខ្ទេចមុខ សាក្សីថា ប្រណាំងគ្នា Posted: 27 Feb 2011 07:09 PM PST   រាជធានីភ្នំពេញ ៖ រថយន្តកូរ៉ូឡាមួយគ្រឿង ពាក់ស្លាកលេខ 2C-1241 បើកបរដោយយុវជនស្ទាវ មានប្រុស-ស្រីច្រើននាក់បានបោះពួយបុករបាំងថ្មចែកផ្លូវលើកំណាត់មហាវិថីសហព័ន្ធរុស្ស៊ី ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង៤និង១០នាទីជិតភ្លឺថ្ងៃទី២៨ កុម្ភៈ ២០១១ បណ្តាលឱ្យរថយន្តខូចខាតផ្នែកខាងមុខធ្ងន់ធ្ងរក្រពឹតរួចក្រញង់ ប៉ុន្តែអ្នកបើកបរ និងអ្នកអង្គុយខាងមុខរបួសបែកមាត់តិចតួចប៉ុណ្ណោះ ។ ស្ត្រីម្នាក់ជាអ្នកហាត់ប្រាណដែលឃើញហេតុការណ៍បាននិយាយឱ្យសមត្ថកិច្ចដឹងថា មុនពេលកើតហេតុឃើញរថយន្តមួយគ្រឿងបានបើកបោះពួយក្នុងល្បឿនលឿនទំនងដូចជាប្រណាំង ជាមួយនឹងរថយន្តមួយផ្សេងទៀត តែមិនចាំម៉ាកបើកលើកំណាត់មហាវិថីសហព័ន្ធរុស្ស៊ី ឆ្ពោះទៅទិសខាងលិច លុះដល់ចំណុចក្បាលរបាំងថ្មចែកផ្លូវ ស្ថិតក្នុងសង្កាត់ស្រះចក ខណ្ឌដូនពេញ រថយន្តទាំង២គ្រឿងនោះ បានបើកប្រជែងគ្នា បណ្តាលឱ្យរថយន្តម៉ាកកូរ៉ូឡា ពាក់ស្លាកលេខ ភ្នំពេញ 2C-1241 ជ្រុលចង្កូតទៅបុកក្បាលរបាំងថ្មពេញទំហឹងហុយផ្សែងទ្រលោម និងធ្វើឱ្យរថយន្តនោះ ឡើងលើចិញ្ចឹមផ្លូវបែរមុខទៅទិសខាងត្បូងវិញ ។ ក្រោយពីរថយន្តចងកំហឹងជាមួយនឹងក្បាលរបាំងថ្មទៅមុខលែងរួចហើយ គេឃើញយុវជនស្ទាវម្នាក់ជាអ្នកបើកបរ និងនារីរូបស្រស់ពីរនាក់ទៀត បានបើកទ្វាររថយន្តចេញមកក្រៅឃើញមានឈាមហូរតាមមាត់ តែមិនធ្ងន់ធ្ងរនោះទេ បន្តិចក្រោយមកក៏នាំគ្នាគេចខ្លួនបាត់អស់ទៅ ។មន្ត្រីនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បាននិយាយថា រថយន្តបង្កការខូចខាតផ្នែកខាងមុខធ្ងន់ និងផ្ទុះពោងការពារសុវត្ថិភាពទាំង២ ព្រមទាំងស្រាំកញ្ចក់ខាងមុខទៀតផង ក៏ប៉ុន្តែនគរបាលរូបនោះមិនបានអះអាងថា ក្នុងហេតុការណ៍រថយន្តកូរ៉ូឡាបុកក្បាលរបាំងថ្មចែកផ្លូវនេះដោយសារតែការបើកប្រណាំងគ្នា ឬកើតឡើងដោយមូលហេតុអ្វីផ្សេងឡើយ ។ គួរបញ្ជាក់ផងដែរថា កាលពីវេលាម៉ោង៩និង៣០នាទីយប់ថ្ងៃទី២៦ កុម្ភៈ ២០១១ មានរថយន្តមួយគ្រឿងម៉ាកកូរ៉ូឡា ពាក់ស្លាកលេខ ភ្នំពេញ 2L-6760 បើកបរដោយជនជាតិចិនស្រវឹងធ្លាក់ភ្នែកបានបោះពួយបុកក្បាលរបាំងថ្មចែកផ្លូវនៅលើកំណាត់វិថីហ្សាលដឺហ្គោល (មុខអតីតរោងភាពយន្តសព្រហ្មមាស) ស្ថិតក្នុងសង្កាត់អូរឫស្សីទី៣ ខណ្ឌ៧មករា បណ្តាលឱ្យរលំក្បាលនាគ(ក្បាលរបាំង) ហើយរថយន្តបង្កបានព្យាយាមបើករត់រហូតដល់ចំណុចរូបសំណាកនាងគង្ហីង ទើបសមត្ថកិច្ចឃាត់រថយន្តនោះបាន យកទៅរក្សាទុកនៅសាលារាជធានីភ្នំពេញ ៕  |
| Posted: 27 Feb 2011 06:49 PM PST ខេត្តឧត្តរមានជ័យ ៖ ទាហានកម្ពុជា៣នាក់ បានស្លាប់បាត់បង់ជីវិត និង៣៨នាក់ទៀតរងរបួសធ្ងន់ និងស្រាលដេកដួលរដូករណែល ខ្លះលើផ្លូវ ខ្លះលើចិញ្ចើមផ្លូវ ខណៈរថយន្តដឹកជញ្ជូនក្រឡាប់ចាក់មនុស្សចោលកាលពីវេលាម៉ោង៩និង៣០នាទីយប់ថ្ងៃទី២៧ កុម្ភៈ ២០១១ លើកំណាត់ផ្លូវជាតិលេខ៦៩B ស្ថិតក្នុងភូមិពាមក្នុង ឃុំអូរស្វាយ ស្រុកត្រពាំងប្រាសាទ បង្កឱ្យមានការតក់ស្លុត ហើយភ្លាមៗនោះត្រូវបានសមត្ថកិច្ចពាក់ព័ន្ធ និងអាជ្ញាធរខេត្តចុះទៅជួយធ្វើអន្តរាគមន៍ចាត់ចែងស្ទូចលើករថយន្តបញ្ឈរឡើងវិញ និងបញ្ជូនអ្នករបួសទៅព្យាបាលនៅមន្ទីរពេទ្យ ។ តាមប្រភពព័ត៌មានពីកន្លែងកើតហេតុបានឱ្យដឹងថា រថយន្តដឹកកងទាហាននេះម៉ាក GMC ផ្ទុកមនុស្ស (ទាហាន) ជាង៤០នាក់ ធ្វើដំណើរចេញពីតំបន់ភ្នំស្រួច ក្រុងសំរោង ឆ្ពោះទៅកាន់បន្ទាយទាហានមួយកន្លែងក្នុងស្រុកត្រពាំងប្រាសាទ តែអកុសលទៅដល់ចំណុចកើតហេតុបានជួបរថយន្តមួយគ្រឿងទៀតមកពីមុខបើកភ្លើងហ្វាភ្លឺចាំងភ្នែក ធ្វើឱ្យរថយន្តខាងកងទាហាន ពិបាកមើលផ្លូវក៏កាច់ចង្កូតគេច រួចហើយបណ្តាលឱ្យធ្លាក់ផ្លូវទៅខាងឆ្វេងដៃតែម្តង ៕  |
| អាជ្ញាធរខណ្ឌសែនសុខបិទផ្ទះសំណាក់ចំនួន២នៅខណ្ឌសែនសុខ Posted: 27 Feb 2011 06:42 PM PST   រាជធានីភ្នំពេញ ៖ អាជ្ញាធរបានបិទផ្ទះសំណាក់ចំនួន២ក្នុងខណ្ឌសែនសុខកាលពីថ្ងៃទី២៦ កុម្ភៈ ដោយសារផ្ទះនេះផ្តល់ទីតាំងឱ្យក្រុមជនប្រើប្រាស់ និងចែកចាយគ្រឿងញៀន ហើយការបិទមិនឱ្យធ្វើអាជីវកម្មនេះមានរយៈពេល៦ខែ ។ នេះជាការព្រមានចំពោះអ្នកប្រកបមុខរបរបើកផ្ទះសំណាក់ដទៃទៀតដែរ កុំឱ្យប្រព្រិត្តតាមដូចករណីខាងលើជាហេតុធ្វើឱ្យប៉ះពាល់ដល់អាជីវកម្មរបស់ខ្លួនសន្តិសុខសង្គម ។ ផ្ទះសំណាក់ទាំង២ដែលរង ការបិទធ្វើអាជីវកម្មខាងលើយីហោជេម និងសំណាង ដែលមានទីតាំងស្ថិតនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ លោកចេង មុន្នីរ៉ា និងលោកជា ខេមា អភិបាលរងខណ្ឌសែនសុខ និងក្រឡាបញ្ជីនៃសាលាដំបូងរាជធានីបានដឹកនាំកំលាំងមានសមត្ថកិច្ច និងមានការចូលរួមដោយលោកចៅសង្កាត់ទឹកថ្លា តាមអំណាចដីកាលេខ២២៨៧ កក្រ ចុះថ្ងៃទី២៥ កុម្ភៈ ដោយចៅក្រមយូ ប៊ុណ្ណា ។ យោងតាមប្រភពព័ត៌មានពីអាជ្ញាធរបានឱ្យដឹងថា ផ្ទះសំណាក់ទាំងពីរខាងលើ ត្រូវបានបិទធ្វើអាជីវកម្មរហូតដល់តុលាការមានការអនុញ្ញាតឱ្យធ្វើអាជីវកម្មឡើងវិញ ហើយក៏ត្រូវសុំច្បាប់អនុញ្ញាតធ្វើអាជីវកម្មឡើងវិញពីអាជ្ញាធរខណ្ឌផងដែរ ។ គួរបញ្ជាក់ថា ផ្ទះសំណាក់ជេម និងផ្ទះសំណាក់សំណាងត្រូវបានសមត្ថកិច្ចឆ្មក់ចូល និងចាប់បានជនប្រើប្រាស់គ្រឿងញៀនចំនួន១២នាក់ ហើយក៏ធ្វើការឃាត់ខ្លួនម្ចាស់ផ្ទះសំណាក់នោះដែរ ដែលមកដល់ពេលនេះ តុលាការបានចេញដីកាឱ្យឃុំខ្លួននៅពន្ធនាគារព្រៃស ។ នេះជាមេរៀនដល់អ្នកដទៃដែលមានអាជីវកម្មបើកផ្ទះសំណាក់គួរចៀសឱ្យផុត គេចឱ្យឆ្ងាយពីសកម្មភាពអសន្តិសុខសង្គមនេះ ទើបបានសុខ ៕  |
| ត្រាក់ទ័រភ្ជួរស្រែកិនមីនតោន ផ្ទុះញ័រដីខូចស្ទើរតែទាំងស្រុង សំណាងអ្នកបើកបររបួសស្រាល Posted: 27 Feb 2011 06:31 PM PST ខេត្តបន្ទាយមានជ័យ ៖ ត្រាក់ទ័រមួយគ្រឿងបានជាន់មីនតោនផ្ទុះបណ្តាលឱ្យដាច់កង់ក្រោយម្ខាង ចំណែកម៉ាស៊ីនរងការប្រេះស្រាំខូចខ្ទេចខ្ទី ខណៈពេលកំពុងភ្ជួរស្រែ ចំណែកឯអ្នកបើកបរគ្រាន់តែរងរបួសស្រាលប៉ុណ្ណោះ។ ហេតុការណ៍នេះកើតឡើងនៅវេលាម៉ោង១រសៀល ថ្ងៃទី២៤ ខែកុម្ភៈ ឆ្នាំ២០១១ នៅចំណុចវាលស្រែប៉ោយស្នាលខាងត្បូង ឃុំសំរោង ស្រុកអូរជ្រៅ ខេត្តបន្ទាយមានជ័យ។ តាមរបាយការណ៍របស់លោកវរសេនីយ៍ត្រីស ឆុង អធិការនគរបាលស្រុកអូរជ្រៅឱ្យដឹងថា ម្ចាស់ត្រាក់ទ័រឈ្មោះខាត់ សារ៉ាន់ ភេទប្រុស អាយុ៤៩ឆ្នាំ នៅភូមិគោដាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ ចំណែកឯអ្នកបើកបរត្រាក់ទ័រឈ្មោះលឿយ ពន្លក ភេទប្រុស អាយុ២៣ឆ្នាំ រស់នៅ ភូមិកណ្តាល ឃុំសំរោង ស្រុកអូរជ្រៅ ។ របាយការណ៍បញ្ជាក់ទៀតថា អ្នកបើកបរត្រាក់ទ័របានទៅភ្ជួរស្រែរបស់ឈ្មោះរី សារ៉េត ភេទប្រុស អាយុ៤៣ឆ្នាំ នៅភូមិកណ្តាល ហើយបានជាន់មីនតោនបណ្តាលឱ្យផ្ទុះខូចកង់ត្រាក់ទ័រខាងក្រោយផ្នែកខាងឆ្វេង និងអំបែងត្រូវម៉ាស៊ីនប្រេះចំនួន៣កន្លែង ។ ចំណែកអ្នកបើកបរនោះមិនរងគ្រោះដល់ជីវិតទេ គ្រាន់តែរបួសស្រាលប៉ុណ្ណោះ។ លោកស ឆុង បន្តទៀតថា បើតាមម្ចាស់ស្រែប្រាប់សមត្ថកិច្ចថា ស្រែនេះគឺបានធ្វើតាំងតែពីឆ្នាំ១៩៩៧មកម្ល៉េះ មានរយៈពេល១៤ឆ្នាំមកហើយពុំដែលមានបញ្ហាអ្វីទេ ទើបតែឆ្នាំនេះពេលភ្ជួរស្រាប់តែប៉ះមីនតោនតែម្តង។  |
| កម្មការិនីដួលសន្លប់៧នាក់នៅបន្ទប់ជួលផ្អើលទាំងយប់អាចបណ្តាលមកពីហូបចុកមិនគ្រប់គ្រាន់ Posted: 27 Feb 2011 06:29 PM PST  រាជធានីភ្នំពេញ ៖ កម្មការិនីរោងចក្រកាត់ដេរ៧នាក់ ក្រោយសម្រាកពីការងារហៀបចូលដេកទៅហើយ ក៏កើតអាការខ្សោយដួលសន្លប់ជាបន្តបន្ទាប់ បង្កឱ្យមានការភ្ញាក់ផ្អើល ហើយត្រូវបានបញ្ជូនទៅកាន់មន្ទីរព្យាបាលឯកជន ដើម្បីសង្គ្រោះពួកគេកាលពីវេលាម៉ោង៩និង១០នាទីថ្ងៃទី២៧ កុម្ភៈ ២០១១ នៅភូមិត្រពាំងគល់ សង្កាត់កន្ទោក ខណ្ឌដង្កោ ។ កម្មការិនីទាំង៧នាក់នេះ រួមមាន ១-ឈ្មោះប៊ុន សុខគា អាយុ២៥ឆ្នាំ ២-ឈ្មោះគឹម លក្ខិណា អាយុ២០ឆ្នាំ ៣-ឈ្មោះអៀង ផាន្នី អាយុ២០ឆ្នាំ ៤-ឈ្មោះអៀង ផាន់ណា អាយុ១៨ឆ្នាំ ៥-ឈ្មោះជឹម ធានី អាយុ១៨ឆ្នាំ ៦-ឈ្មោះយៀក ម៉ៃ អាយុ១៨ឆ្នាំ និង៧-ឈ្មោះហួ ចានីនី អាយុ១៨ឆ្នាំ...អ្នកទាំងនេះជួលបន្ទប់ស្នាក់នៅក្បែរៗគ្នាក្នុងប្លុកតែមួយ ហើយភ្លាមៗនោះត្រូវបានគេបញ្ជូនទៅកាន់មន្ទីរពហុព្យាបាល និងសម្ភពចោមចៅដើម្បីសង្គ្រោះ ។ តាមព័ត៌មានពីកន្លែងកើតហេតុបានឱ្យដឹងថា ក្រុមកម្មការិនីទាំងនេះ មានអាការវិលមុខ ងងឹតមុខ និងតឹងទ្រូងអាចថា ពួកគេហូបចុកមិនគ្រប់គ្រាន់បណ្តាលឱ្យខ្សោយ...មុនដំបូងមាននារីតែម្នាក់ប៉ុណ្ណោះដួលសន្លប់ ហើយអ្នកនៅក្បែរនោះបានមកជួយធ្វើចលនា ស្រាប់តែពួកគេដួលបន្តបន្ទាប់រហូតដល់៧នាក់តែម្តង ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.  |
| ចោរប្រដាប់អាវុធសម្រុកចូលប្លន់ផ្ទះអ្នកលក់មាសនិងប្តូរប្រាក់បាញ់រះ១៨គ្រាប់ Posted: 27 Feb 2011 06:20 PM PST     ខេត្តកំពង់ឆ្នាំង ៖ ចោរប្លន់មួយក្រុមដែលមានគ្នាប្រហែល៨នាក់ប្រដាប់ដោយអាវុធវែងខ្លីស្ទើរគ្រប់ដៃ បានសម្រុកចូលប្លន់ផ្ទះលក់មាស និងប្តូរប្រាក់មួយកន្លែងស្ថិតនៅបរិវេណផ្សារពង្រក្នុងភូមិថ្មី ឃុំពង្រ ស្រុកបរិបូរណ៍ ដោយយកបានមាស និងប្រាក់ជាច្រើនពាន់ដុល្លារ រួចហើយគេចខ្លួនដោយសុវត្ថិភាព។ ហេតុការណ៍ដែលមិនធ្លាប់កើតមាននាដើមឆ្នាំ២០១១នេះបានកើតឡើងនៅវេលាម៉ោង៦ និង៥០នាទីយប់ ថ្ងៃទី២៥ ខែកុម្ភៈ នៅខេត្តកំពង់ឆ្នាំង។ ក្នុងអំពើប្លន់ប្រដាប់អាវុធនោះមនុស្ស៤នាក់បានរងរបួសធ្ងន់ និងស្រាលផងដែរដែលម្ចាស់ផ្ទះខាងលើមានឈ្មោះឈួ លាង ភេទប្រុស អាយុ៣៥ឆ្នាំ និងប្រពន្ធឈ្មោះគា មួយគា អាយុ៣២ឆ្នាំ ។ ទាំងពីរនាក់បានរងរបួសដោយចោរយកកៅអីវាយក្បាលបណ្តាលឱ្យបែកយ៉ាងដំណំ។ ចំណែកយុវជនពីរនាក់ផ្សេងទៀត មិនមែនជាសាច់ញាតិជាមួយជនរងគ្រោះខាងលើទេ តែជាអ្នកធ្វើដំណើរ ក៏បានរងរបួសដោយគ្រាប់កាំភ្លើងចោរផងដែរ ក្នុងនោះម្នាក់ឈ្មោះឱ គឹមសួ អាយុ២៤ឆ្នាំ បានរងរបួសស្មាខាងស្តាំធ្លាយទៅក្រោយ និងត្រូវក្រោមកំភួនជើងខាងស្តាំ និងម្នាក់ទៀតឈ្មោះស៊ីវ វាសនា អាយុ២២ឆ្នាំ បានរងរបួសត្រូវប្រអប់ដៃស្តាំ និងចំភ្លៅស្តាំមួយគ្រាប់។ ទាំងពីរនាក់ត្រូវបានដឹកទៅ សង្គ្រោះនៅមន្ទីរពេទ្យខេត្តភ្លាមៗដែរ ។ យោងតាមរបាយការណ៍របស់ប៉ូលិសនៅព្រឹកថ្ងៃទី២៦ កុម្ភៈ បានឱ្យដឹងថា ទ្រព្យសម្បត្តិដែលចោរប្លន់បាននោះមានមាសចំនួន១០តម្លឹង លុយ១០លានរៀល កាតទូរស័ព្ទចំនួន១.០០០ដុល្លារ និងទូរស័ព្ទដៃចំនួន២គ្រឿង។ តាមប្រភពព័ត៌មានឱ្យដឹងថា ព្រៃដែលចោររត់ឆ្លងកាត់ទៅ នោះធំណាស់ ឈ្មោះព្រៃស្តុកកប្បាស។ សមត្ថកិច្ចប៉ូលិសខេត្តនិយាយឱ្យដឹងថា គិតត្រឹមព្រឹកថ្ងៃទី២៧ កុម្ភៈ ប៉ូលិសកំពុងតាមមុខសញ្ញាក្រុមចោរនេះយ៉ាងសកម្ម ដោយតាមដានមុខសញ្ញារយៈពេល២យប់២ថ្ងៃ ហើយនិយាយថា បានកំណត់មុខសញ្ញាបានខ្លះហើយ តាមរយៈម៉ូតូដែលបន្សល់ទុកនេះអាចនឹងរកអត្តសញ្ញាណក្រុមចោរឃើញ ៕  |
| កម្មករសំណង់បង្កជម្លោះជាមួយប៉ូលិសរហូតផ្ទុះអាវុធ Posted: 27 Feb 2011 06:13 PM PST    ក្រុងប៉ោយប៉ែត ៖ ជម្លោះ២បានផ្ទុះឡើងផ្ទួនៗគ្នា ក្នុងភូមិតែមួយកាលពីវេលាម៉ោង១១និង៣០នាទីយប់ ថ្ងៃទី២៦ កុម្ភៈ នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ដោយភាគីបង្កជាក្រុមកម្មករសំណង់ ។ តាមប្រភពព័ត៌មានឱ្យដឹងថា ជម្លោះដំបូងគឺការវាយទៅលើអ្នកអង្គុយហូបបង្អែមដែលពុំដឹងពីមូលហេតុ រីឯជម្លោះលើកទី២គឺក្រុមដដែលនេះបានលើកគ្នាទៅវាយ និងគប់សមត្ថកិច្ចប៉ូលិស ថែមទាំងយកម៉ូតូទៀត។ ដោយសារស្ថានការណ៍មិនអាចទប់ទល់បាន សមត្ថកិច្ចក៏បាញ់ឡើងលើ២គ្រាប់ដើម្បីការពារខ្លួន ព្រោះតែការទៅសួរនាំរកហេតុផលរឿងវាយអ្នកហូបបង្អែម បែរជាក្រុមនេះបង្កជម្លោះជាមួយប៉ូលិស។ ទោះបីជាបែបណាក្តី កម្មករម្នាក់ផ្សេងទៀតត្រូវប៉ូលិសវាយខ្នោះទាំងយប់ ព្រោះតែយកកាម៉េរ៉ាថតប៉ូលិសក្នុងពេលបំពេញការងារ។ ខណៈសមត្ថកិច្ចប៉ូលិសក្រុងប៉ោយប៉ែតទៅបំពេញការងារ ឃើញកម្មករម្នាក់ក្នុងចំណោមកម្មករសំណង់ជាច្រើននាក់នៅកន្លែងកើតហេតុយកកាមេរ៉ាតាមថតប៉ូលិស។ ពេលប៉ូលិសសួរនាំជននោះបែរជាធ្វើចរិតក្រអឺតក្រទមរហូតប៉ូលិសចាប់ដាក់រថយន្តតែម្តង។ ក្រុមកម្មករសំណង់ទាំងនេះជាអ្នកសាងសង់លំនៅឋានដ៏ធំមួយឱ្យគ្រួសារលោកប្រធានមន្ទីរពេទ្យបង្អែកប៉ោយប៉ែត។ បើតាមការឱ្យដឹងពីសមត្ថកិច្ចប៉ូលិសថា ពេលប៉ូលិស២នាក់ជិះម៉ូតូបានប្រទះឃើញជនរងគ្រោះ៣នាក់ត្រូវគេចោមរោមសួរនាំ និងនិយាយថា ពួកគេត្រូវជនមួយក្រុមព្រួតវាយពេលកំពុងហូបបង្អែម ដោយគ្មានមូលហេតុ។ ក្រោយស្តាប់ហេតុផលពីជនរងគ្រោះរួច ប៉ូលិសជិះម៉ូតូទៅស្នាក់ការ ហើយពេលទៅដល់ជិតស្នាក់ការឃើញក្រុមកម្មករដែលសង្ស័យជាអ្នកបង្កហេតុក៏សួរនាំ។ គ្រាន់តែសួរនាំភ្លាមស្រាប់តែពួកគេស្ទុះវាយ និងយកដុំឥដ្ឋគប់ធ្វើឱ្យប៉ូលិសម្នាក់របួសខ្នងរហូតរហែកអាវ។ ដោយក្រុមជនបង្កនៅតែបន្តព្រួតគ្នាតាមវាយ និងគប់មកលើ ពួកលោកជាប៉ូលិសក៏ផ្ទុះអាវុធ២គ្រាប់ឡើងលើដើម្បីការពារខ្លួន។ ពេលនោះហើយទើបក្រុមកម្មករដឹងថា ពួកលោកជាសមត្ថកិច្ច។ ក្នុងហេតុការណ៍ជម្លោះនោះម៉ូតូម៉ាកស្មាស់ របស់ប៉ូលិសក្រសួងដែលប្រចាំការនៅប៉ោយប៉ែតត្រូវក្រុមកម្មករទំនើងមួយក្រុមនោះដណ្តើមយកទៅទុកនៅក្នុងការដ្ឋានដែលពួកគេធ្វើការ។ ក្រោយជម្លោះស្ងប់ស្ងាត់ និងក្រោយពីកម្មករម្នាក់ដែលមានកាមេរ៉ាដើរថតប៉ូលិសត្រូវបានឃាត់ខ្លួននោះ ក្រុមកម្មករផ្សេងទៀតចំនួន៥នាក់ក៏ត្រូវប៉ូលិសហៅឱ្យឡើងរថយន្តនាំទៅអធិការដ្ឋាននគរបាលក្រុងដែរ។ មន្ត្រីប៉ូលិសនិយាយថា កម្មករមួយក្រុមនេះនៅពេលសមត្ថកិច្ចបំពេញ ការងារពួកគេមានចរិតក្រអឺតក្រទមចង់ដំឡើងសាច់ដុំដាក់ប៉ូលិសទៀតផង ទំនងជាគេអាងបុគ្គលណានៅពីក្រោយខ្នងហើយមើលទៅ។ នៅព្រឹកថ្ងៃទី២៧ កុម្ភៈ ជនរងគ្រោះដែលត្រូវក្រុមកម្មករទំនើងព្រួតវាយពុំដឹងមូលហេតុនោះត្រូវសមត្ថកិច្ចក្រសួងស្រាវជ្រាវរកឃើញហើយពេលនាំទៅដល់អធិការដ្ឋានក្រុង បានចង្អុលបង្ហាញពីក្រុមកម្មករទំនើងដែលវាយពួកគេ។ ភាគីរងគ្រោះក្នុងជម្លោះទី១ មានចំនួន៣នាក់ ១-ឈ្មោះយឹម ហើម ភេទប្រុស អាយុ២៤ឆ្នាំ, ២-ឈ្មោះរ័ក្ស អ៊ុនតាក់ ភេទប្រុស អាយុ២១ឆ្នាំ និង៣-ឈ្មោះជួន ខ្លឹង ភេទប្រុស អាយុ២៤ឆ្នាំ អ្នកទាំង៣នាក់នេះរស់នៅភូមិគីឡូម៉ែត្រលេខ៤ និង២នាក់ទៀតរស់នៅភូមិក្បាលស្ពាន ចំណុចក្បាលកោះ។ ដោយឡែកឈ្មោះខ្លឹង នៅព្រឹកថ្ងៃទី២៧ កុម្ភៈ សមត្ថកិច្ចពុំទាន់រកឃើញទេ ព្រោះគេរវល់ទៅផ្សាររុងក្លឿ។ ទោះបីជាបែបណាក្តី ភាគីកម្មករទំនើងពុំទាន់ស្គាល់អត្តសញ្ញាណនោះទេ ដោយប៉ូលិសប្រាប់ថា កំពុងសួរនាំ៕  |
| នាងប្រពន្ធនិងកូនតាមអង្វរលោកប្តីមានស្រីថ្មីវង្វេងផ្ទះ Posted: 27 Feb 2011 06:08 PM PST   រាជធានីភ្នំពេញ ៖ ដោយសារតែខឹងប្ដីចុះចោលផ្ទះទៅមានស្រីថ្មីមិនអើពើជួយចិញ្ចឹមកូននៅតូចៗ ស្ដ្រីជាប្រពន្ធបានសំរេចចិត្ដនាំកូនស្រីទាំងបីនាក់ទៅដល់ផ្ទះស្រីថ្មីរបស់ប្ដី ដើម្បីទាមទារឱ្យប្ដីជួយចិញ្ចឹមកូនផង ។ ហេតុការណ៍នេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី២៥ កុម្ភៈ នៅជិតផ្សារសឡា ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។ ទាក់ទិននឹងរឿងរ៉ាវនេះ ត្រូវបានប្រភពព័ត៌មានឱ្យដឹងថា កាលពីថ្ងៃទី២៤ កុម្ភៈ ស្ដ្រីម្នាក់បាននាំកូនស្រី៣នាក់រួមជាមួយប្អូនស្រីជិះម៉ូតូមកឈប់នៅមុខផ្ទះជួលមួយជិតផ្សារសឡា ដោយស្រែកខ្លាំងៗថា បងប្អូនអើយជួយមើលចុះ ខ្ញុំជាប្រពន្ធបុរសនៅផ្ទះនេះម្នាក់ដែរ ថែមទាំងមានកូនស្រី៣នាក់ជាសាក្សី តែបុរសម្នាក់នេះមិនដែលទៅផ្ទះនិងផ្ដល់ប្រាក់ជួយចិញ្ចឹមកូនទេ» ។ បន្ទាប់ពីឮសម្លេងស្រែកដូច្នេះ អ្នកនៅជិតខាង ក៏ផ្អើលមកមើលស្ដ្រីរូបនោះ ចំណែកផ្ទះដែលនាងចោទថា ប្ដីរបស់នាងនៅក្នុងនោះមានស្ដ្រីវ័យចំណាស់ពីរនាក់ចេញមកជេរប្រទេច និងកាន់កាំបិតប៉័ងតោគំរាមរកកាប់ ។ នាងបានប្រាប់ថា នាងជាប្រពន្ធបុរសនៅផ្ទះនេះ រំពេចនោះស្ដ្រីម្នាក់បានស្រែក ហៅបុរសជាប្ដីឱ្យចេញមក ពេលប្ដីចេញមកបានរករឿងស្ដ្រីដែលប្រកាសថា ខ្លួនជាប្រពន្ធហើយលើកដៃប្រុងវាយ តែត្រូវប្អូនស្រីរបស់ស្ដ្រីដែលអះអាងថា ជាប្រពន្ធលើកទូរស័ព្ទថតរូប ទើបបុរសជាប្ដីដាក់ដៃចុះវិញ ។ បន្ទាប់មកស្ដ្រីចំណាស់ជាម្ចាស់ផ្ទះបានស្រែកដេញបុរសដែលនាងអះអាងថា ជាប្ដីឱ្យចេញពីផ្ទះហើយឈប់ឱ្យត្រឡប់មកទៀត ។ បុរសនោះក៏បើករថយន្ដកូរ៉ូឡា ពណ៌ស្លែ ពាក់ស្លាកលេខ២D៦០៨៤ ចេញពីផ្ទះនោះទៅបាត់ ឯនាងដែលអះអាងជាប្រពន្ធនោះក៏ត្រឡប់ទៅវិញដែរ ។ លុះថ្ងៃទី២៥ កុម្ភៈ នាងដែលអះអាងថា ខ្លួនជាប្រពន្ធនោះបាននាំកូនពីរនាក់ទៅមើលផ្ទះនោះទៀត ពេលទៅដល់ឃើញរថយន្ដរបស់ប្ដីចតនៅផ្ទះនោះដដែល ។ ពេលនោះនាងជិះម៉ូតូមកឈប់មុខផ្ទះ ហើយមិនទាន់ចុះពីលើម៉ូតូផង ស្រាប់តែស្ដ្រីចំណាស់ពីរនាក់ដដែលនោះបានចោលពែងតែនិងប៉ាន់តែមកលើក្បាលនាងត្រូវមួកការពារសុវត្ថិភាព តែមិនបង្កឱ្យមានគ្រោះថ្នាក់ឡើយ ។ រំពេចនោះក៏មានអ្នកយកព័ត៌មានពីររូបបំរុងចូលទៅថតរូបភាព ក៏ត្រូវស្ដ្រីទាំងពីរនាក់នោះកាន់ព្រនង់រកវាយរួចដេញចេញរត់បាតជើងសព្រាតមិនឱ្យថតរូបទេ ។ តាមការរៀបរាប់ពីស្ដ្រីដែលអះអាងថា ជាប្រពន្ធនោះបានឱ្យដឹងថា នាងឈ្មោះហេង ប៊ុនណា អាយុ៣៥ឆ្នាំ មុខរបរលក់ដូរ មានកូនបីនាក់សុទ្ធតែស្រី ទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ចំណែកបុរសជាប្ដីឈ្មោះអ៊ុន សុខជា អាយុ៣៧ឆ្នាំ ជាបុគ្គលិកទស្សនាវដ្តីមួយ ហើយលួចមកមានស្រីស្នេហ៍ថ្មីនៅជិតផ្សារសឡា សង្កាត់ស្ទឹងមានជ័យ ។ ស្ដ្រីជាប្រពន្ធដើមបានរៀបរាប់ថា នាងមានស្រុកកំណើតនៅភូមិជប់ ឃុំជប់ ស្រុកត្បូងឃ្មុំ បានរៀបការជាមួយឈ្មោះអ៊ុន សុខជា តាំងពីថ្ងៃទី១៧ មករា ឆ្នាំ១៩៩៧ មកម្ល៉េះ ដោយកាលណោះនាងជាបុគ្គលិកក្រុមហ៊ុនចំការកៅស៊ូ ចំណែកប្ដីរបស់នាងគ្មានការងារធ្វើទេ ។ ក្រោយមកនាងធ្វើការបានប្រាក់ខែសន្សំទិញម៉ូតូឱ្យប្ដី ការមករស់នៅភ្នំពេញជុំគ្នា នាងទៅលក់អីវ៉ាន់នៅផ្សារ ចំណែកប្ដីគ្មានការងារធ្វើទេ នាងក៏ចេះតែស៊ើបសួរមិត្ដភក្ដិជួយរកការងារឱ្យប្ដីធ្វើ ប៉ុន្ដែចៃដន្យសៀវភៅមហាសំណើចចេញលក់មុនគេត្រូវការអ្នកដើរលក់ស៊ីភាគរយពេលនោះនាងក៏សួរប្ដីថាទៅលក់ទេ ប្ដីក៏ព្រមទៅលក់សៀវភៅនោះ ហើយក្រោយមកទៀតបានចូលធ្វើការនៅទស្សនាវដ្តីមួយផ្នែកចែកចាយវិញម្ដង ។ ស្ដ្រីជាប្រពន្ធបានបន្ដថា ដោយសារការខំប្រឹងរកស៊ីទាំងពីរនាក់ប្ដីប្រពន្ធក៏ទិញបានផ្ទះមួយនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ ហើយបន្ទាប់ពីទិញផ្ទះបានមកប្ដីនាងប្រែជាមនុស្សថ្មីដោយដើរមានស្រីខាងក្រៅរាប់មិនអស់ ។ ជាក់ស្ដែងកាលនាងទំងន់កូនទីបីខ្វះតែពីរថ្ងៃមុនសំរាលនាងដឹងថា ប្ដីមានស្រី លុះសំរាលកូនបាន៤ថ្ងៃនាងក៏ចេញពីមន្ទីរពេទ្យ ហើយទៅដល់ផ្ទះស្រីនោះនិយាយអង្វរឱ្យឈប់ទាក់ទងប្ដីនាងទៀតទៅ ខណៈនោះប្ដីនាងឈប់ចូលផ្ទះ តែក្រោយមកដោយសារនាងចេះតែលួងលោមអង្វរប្ដីក៏ត្រឡប់មកផ្ទះវិញ ។ លុះក្រោយមកប្ដីទៅមានស្រីម្នាក់ទៀត នាងអង្វរប្ដីឱ្យត្រឡប់មកផ្ទះវិញ ប្ដីនិយាយថាដាច់ខាតមិនមកវិញទេ នាងនៅតែអង្វរដល់ថ្នាក់ដាក់វេនគ្នាមួយយប់ដេកនៅជាមួយនាងមួយយប់នៅជាមួយស្រីថ្មីនោះឱ្យតែត្រូវវេនទៅនៅជាមួយស្រីនោះចុះទោះបីកូនឈឺអង្វរឱ្យប្ដីនៅមួយយប់ក៏គាត់មិននៅដែរ ។ ស្ដ្រីជាប្រពន្ធបានឱ្យដឹងទៀតថា សារជាតិរបស់ប្ដីមានស្រីដូរពីម្នាក់ទៅម្នាក់ទៀត គឺដូររហូត ហើយនាងក៏មិនសូវគិតគូរដែរ ពីព្រោះអង្វរលួងលោមប្ដីអស់ចិត្ដហើយ ទើបតែខែឧសភា ឆ្នាំ២០១០ នាងបានឃើញរូបថតស្រីថ្មីម្នាក់ទៀត ក៏មានរឿងឈ្លោះប្រកែកគ្នាឃាត់មិនឱ្យប្ដីចុះចេញពីផ្ទះដោយនាងយកដែកទៅចាក់កង់រថយន្ដឱ្យធ្លាយកង់អស់ពីរ តែប្ដីនៅតែទៅ ដដែល ។ ស្អែកឡើងប្ដីត្រឡប់មកផ្ទះរើយកអីវ៉ាន់ចេញ ទោះបីនាងអង្វរយ៉ាងណាក៏នៅតែចេញទៅបាត់រហូតមិនដែលត្រឡប់មកផ្ទះវិញទេ សូម្បីលុយកាក់ចិញ្ចឹមកូនក៏មិនជួយដែរ ដោយគ្រាន់តែជួយបង់ថ្លៃសាលារៀនអង់គ្លេសឱ្យកូន គឺ៣ខែបង់ម្ដងចំនួន៣០ដុល្លារអាមេរិកប៉ុណ្ណោះ ។ នាងបានរៀបរាប់ទៀតថា នាងបានដាក់ពាក្យប្ដឹងទៅសាលាសង្កាត់ទួលសង្កែឱ្យប្ដីជួយចិញ្ចឹមកូន ហើយប្ដីបានសន្យាថា ឱ្យមួយខែ២៥ម៉ឺនរៀល តែមិនដែលឱ្យទាល់តែសោះ ហេតុនេះហើយបានជានាងសំរេចចិត្ដយកកូនទាំងបីនាក់មកឱ្យអ្នកជិតខាងជួយមើល កាលពីថ្ងៃទី២៤ កុម្ភៈកន្លងមកនេះ ។ ប៉ុន្ដែនៅពេលមកដល់ផ្ទះស្រីថ្មីរបស់ប្ដីនោះ ប្ដីនិងស្រីស្នេហ៍ថ្មីបានរត់គេចទាល់តែស្ដ្រីជាបងស្រីរបស់ស្រីស្នេហ៍ថ្មីហៅឱ្យប្ដីនាងចេញមក ទើបប្ដីនាងចេញមកគំរាមថាដាច់ខាតមិនត្រឡប់ទៅវិញទេ ហើយគេនឹងប្ដឹងលែងលះពីនាងរួចទាមទារចែកទ្រព្យសម្បត្ដិពាក់កណ្ដាលជាមួយនាងទៀត រួចប្ដីក៏ជិះរថយន្ដចេញពីផ្ទះស្រីនោះទៅបាត់ ។ ដោយសារតែមិនអស់ចិត្ដទើបនៅថ្ងៃទី២៥ កុម្ភៈ នាងយកកូនមកមើលផ្ទះនេះម្ដងទៀត ស្រាប់តែឃើញរថយន្ដប្តីចតនៅផ្ទះនេះដដែល តែស្រីថ្មីនិងប្ដីរបស់នាងបានភៀសខ្លួនទៅជួលផ្ទះថ្មីទៀតហើយនៅតែបងស្រី និងម្ដាយរបស់ស្រីនោះប៉ុណ្ណោះ។ ស្ដ្រីជាប្រពន្ធដើមបានសុំអំពាវនាវជួយរកយុត្ដិធម៌ឱ្យនាងផង ព្រោះនាងគ្មានប្រាក់សំរាប់ប្ដឹងប្ដល់ទេ រកស៊ីតែម្នាក់ឯងចិញ្ចឹមកូនមិនគ្រប់ផង ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
