Koh Santipheap Daily |
- សន្និសីទមហាអនុតំបន់ទន្លេមេគង្គគ្រោងបើកធ្វើនៅសប្តាហ៍ក្រោយ
- សមាសភាពប្រកួតនៅសង្វៀនបាយ័នថ្ងៃទី៦ មីនា ខាងមុខ
- ចោរប្រដាប់អាវុធចូលប្លន់ផ្ទះប្រជាពលរដ្ឋយកបានទ្រព្យជាង៦ពាន់ដុល្លារ
- ដុតកម្ទេចជ័រនិងកំណាត់ធ្វើឱ្យមានផ្សែងបំពុលបរិស្ថាន
- តូយ៉ូតា១បាំងកន្លះបុករះឡិចស៊ីសនិងម៉ូតូរួចចុះត្រាំទឹក
- លោករដ្ឋមន្ត្រីស៊ុយ សែម ពិនិត្យការបោសសំអាតមីនក្នុងអាងវារីអគ្គិសនីស្ទឹងអាតៃ
- សមត្ថកិច្ចក្រុងខេមរភូមិន្ទឃាត់ខ្លួនជនជាប់ចោទប្រើអំពើហិង្សា
- ស្ត្រី២នាក់ និងបុរស២នាក់ត្រូវសមត្ថកិច្ចឃាត់ខ្លួន
- ដាណឺម៉ាកសរសើរពីកិច្ចទំនាក់ទំនងល្អជាមួយប្រទេសកម្ពុជា
- សង្កាត់ព្រែកលៀបនាំអំណោយឧបត្ថម្ភដល់គ្រួសាររងគ្រោះដោយអគ្គីភ័យ
- សមត្ថកិច្ចប៉ូលិសឃាត់រថយន្តដឹកតំណាប់ដូងចំនួន២០០កេស
- ក្រសួងព័ត៌មានផ្សព្វផ្សាយអនុក្រឹត្យហាមឃាត់ការផ្សាយពាណិជ្ជកម្មបារី
- កើតជំងឺហើមក្បាលជង្គង់រកគ្រូបុរាណផ្លុំស្តោះ៦ខែមិនស្រកទើបនាំមកពេទ្យ
- កងពលតូចថ្មើរជើងទី១ថៃបាត់អាវុធយ៉ាងច្រើន
- ក្រុមអាវក្រហមគ្រោងប្រមូលផ្តុំគ្នាជាថ្មីនៅថ្ងៃទី១២ មីនា
- ក្រុមអាវលឿងមានផែនការប្រមូលហត្ថលេខាប្តឹងទម្លាក់អាប់ភីស៊ីត ចេញពីតំណែង
- ទទួលទានផ្លែប៉េងប៉ោះជួយកាត់បន្ថយអត្រាជំងឺបេះដូងនិងពុកឆ្អឹង
- ដេក១ស្រឡេតវេលាថ្ងៃត្រង់ជួយកាត់បន្ថយភាពតានតឹង
- ដើរហាត់ប្រាណ៣០នាទីរាល់ថ្ងៃជួយការពារមហារីកពោះវៀន
- ប៉ូលិសសេដ្ឋកិច្ចជួបកំណប់ឈើគ្រញូង
| សន្និសីទមហាអនុតំបន់ទន្លេមេគង្គគ្រោងបើកធ្វើនៅសប្តាហ៍ក្រោយ Posted: 04 Mar 2011 06:02 PM PST រាជធានីភ្នំពេញ ៖ នៅថ្ងៃទី៩ មីនា ខាងមុខ នៅសណ្ឋាគារសូហ្វីតែលភ្នំពេញ ផូកីត្រា នឹងប្រារព្ធពិធីបើកសន្និសីទមហាអនុតំបន់ទន្លេមេគង្គ (GMS) សម្រាប់ការអភិវឌ្ឍច្រករបៀងសេដ្ឋកិច្ចភាគខាងត្បូង (SEC) ក្រោមអធិបតីភាពលោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងរដ្ឋមន្ត្រី GMS ប្រចាំប្រទេសកម្ពុជា ។ សន្និសីទនេះរៀបចំឡើងក្នុងរយៈពេលពីរថ្ងៃ ។ លោក Thomas Crouch អគ្គនាយករងនៃនាយកដ្ឋានអាស៊ីអាគ្នេយ៍ របស់ធនាគារអភិវឌ្ឍន៍អាស៊ី (ADB) និងលោកស្រី Megan Anderson ប្រធានទីភ្នាក់ងារអូស្ត្រាលីដើម្បីការអភិវឌ្ឍអន្តរជាតិ (AusAID) ប្រចាំកម្ពុជា នឹងផ្តល់ទស្សនវិស័យរបស់ដៃគូអភិវឌ្ឍសំខាន់ៗទាំងពីរ (ADB និង AusAID) ដែលសកម្មក្នុងការអភិវឌ្ឍមហាអនុតំបន់ទន្លេមេគង្គ ។ លោក Oudet Souvannavong អគ្គលេខាធិការនៃវេទិកាពាណិជ្ជកម្ម GMS នឹងបង្ហាញពីទស្សនៈរបស់វិស័យឯកជនទៅលើច្រករបៀងសេដ្ឋកិច្ចភាគខាងត្បូងផងដែរ ។ សន្និសីទដែលរៀបចំដោយ ADB និងឧបត្ថម្ភថវិកាដោយ AusAID នេះ មានបំណងកំណត់ និងផ្សព្វផ្សាយផែនការវិនិយោគសាធារណៈដែលកំពុងអនុវត្តដោយរដ្ឋាភិបាលថ្នាក់ជាតិ និងអាជ្ញាធរក្នុងតំបន់ ចែករំលែកព័ត៌មានអំពីឱកាសវិនិយោគ និងសហប្រតិបត្តិការបង្ហាញពីទស្សនៈរបស់វិស័យឯកជនទៅលើឱកាស និងបញ្ហានៅក្នុងការអភិវឌ្ឍច្រករបៀងសេដ្ឋកិច្ចភាគខាងត្បូង ផ្តល់ព័ត៌មានពីគោលនយោបាយបរិស្ថាន ដែលប៉ះពាល់ដល់ការធ្វើពាណិជ្ជកម្ម ការវិនិយោគនៅតាមច្រករបៀង និងពិនិត្យមើលឡើងវិញ នូវកិច្ចសម្របសម្រួលពាណិជ្ជកម្ម ពាណិជ្ជកម្មទ្វេភាគី និងបញ្ហាដឹកជញ្ជូនដែលប៉ះពាល់ដល់ការអភិវឌ្ឍច្រករបៀងសេដ្ឋកិច្ចភាគខាងត្បូង ។ សន្និសីទនេះ មានការចូលរួមពីតំណាងអាជ្ញាធរខេត្ត និងមូលដ្ឋាន អ្នកបង្កើតគោលនយោបាយថ្នាក់ជាតិ មកពីក្រសួងពាក់ព័ន្ធដូចជា ក្រសួងសាធារណការ និងដឹកជញ្ជូន ពាណិជ្ជកម្ម ផែនការ និងក្រសួងការបរទេស និងមានតំណាងវិស័យឯកជនដែលមកពីសមាគមពាណិជ្ជកម្ម និងសភាពាណិជ្ជកម្ម នៃបណ្តាខេត្តចំនួន៤៣ ដែលមានព្រំដែនជាប់នឹងរបៀងសេដ្ឋកិច្ចភាគខាងត្បូង ។ តំណាងដៃគូអភិវឌ្ឍន៍ក៏ត្រូវបានអញ្ជើញឱ្យចូលរួមផងដែរ ។ អភិបាលខេត្តមួយចំនួនមកពីខេត្តនៅជាប់ព្រំដែននៃច្រករបៀងនេះ នឹងធ្វើបទបង្ហាញអំពីការផ្តួចផ្តើមរបស់អាជ្ញាធរមូលដ្ឋានក្នុងការផ្សព្វផ្សាយ និងសម្របសម្រួលការអភិវឌ្ឍច្រករបៀងសេដ្ឋកិច្ចភាគខាងត្បូង ផលលំបាកដែលប្រឈមក្នុងការពង្រីក វិនិយោគ និងពាណិជ្ជកម្ម និងលក្ខខណ្ឌនានាដើម្បីជម្រុញផ្សព្វផ្សាយ និងសម្របសម្រួលការអភិវឌ្ឍរវាងអាជ្ញាធរក្នុងតំបន់ និងតំណាងវិស័យពាណិជ្ជកម្ម ៕  |
| សមាសភាពប្រកួតនៅសង្វៀនបាយ័នថ្ងៃទី៦ មីនា ខាងមុខ Posted: 04 Mar 2011 04:20 PM PST រាជធានីភ្នំពេញ ៖ នៅលើសង្វៀនប្រដាល់ស្ថានីយទូរទស្សន៍បាយ័នសម្រាប់រសៀលថ្ងៃអាទិត្យ ទី៦ មីនា ខាងមុខនេះ ឯម វិចិត្រ មកពីក្លឹបគ្រុឌមានជ័យ ត្រូវបានផ្គូផ្គងឱ្យជួបប្រកួតជាមួយសំរិត សុភាព មកពីក្លឹបក្រសួងកសិកម្ម ។ រវាងគូនេះធ្លាប់មានប្រវត្តិប្រកួតគ្នាជាញឹកញាប់ដែរ នាពេលកន្លងមក ក្នុងនោះសុភាព មិនសូវមានឱកាសឈ្នះវិចិត្រទេ ។ សុភាព មានស្នៀតកណ្តាប់ដៃល្អ និងលឿនទៀតផង រីឯវិចិត្រ ក្រៅពីជង្គង់គេមានស្នៀងកែង និងរន្ទះជើងដែលមិនអាចប្រហែសបានឡើយ ប៉ុន្តែពេលខ្លះមុខរបស់វិចិត្រ ក៏ជ្រាយដែរ ។ ទោះបីជាយ៉ាងណារវាងវិចិត្រ និងសុភាព អាចប្រកួតបាន៥ទឹកពេញ ហើយអ្នកណាឈ្នះក៏មិនស្រួលខ្លួនប៉ុន្មានដែរ ។ ភុន សោភ័ណ្ឌ មកពីក្លឹបយុវកីឡាខេត្តកណ្តាល ត្រូវប្រកួតងជាមួយយឹម ឌៀប មកពីក្លឹបក្រសួងការពារជាតិ ។ គូនេះក៏ធ្លាប់ជួបគ្នាជាច្រើនលើកច្រើនសាមកដែរ ដែលមានឈ្នះ-ចាញ់ជាធម្មតា ។ មួយរយៈចុងក្រោយនេះពួកគេហាក់បីដូចជាឃ្លាតឆ្ងាយពីសង្វៀនមិនសូវបានបង្ហាញមុខញឹកញាប់ឡើយ ។ សោភ័ណ្ឌ មានរន្ទះជើងល្អ តែពេលចូលកៀកចាញ់ស្នៀតជង្គង់របស់យឹម ឌៀប ។ កណ្តាប់ដៃរបស់សោភ័ណ្ឌ លឿនតែស្រាល រីឯកណ្តាប់ដៃយឹម ឌៀប យឺតតែធ្ងន់ ។ ការជួបគ្នាលើកនេះទំនងយឹម ឌៀប ជាអ្នកឈ្នះ។ អាំង សំអាត មកពីក្លឹបតាព្រហ្មមានជ័យ ត្រូវប្រកួតជាមួយឯម ចាន់រស្មី មកពីក្លឹបគ្រុឌ មានជ័យ ។ សំអាត និងរស្មី ទោះបីជាមានមាឌល្អិតទម្ងន់ស្រាល តែពួកគេមានប្រវត្តិឡើងសង្វៀនចាស់វស្សា និងមានបទពិសោធន៍ពេញខ្លួនដូចគ្នា ។ អាន មុន្នី មកពីក្លឹបនិរោធមានជ័យ ត្រូវប្រកួតជាមួយជា សុផានិត មកពីក្លឹបវីអាយភីចំការមន ។ សុខ វិរៈ មកពីក្លឹបប៉េអឹមខេត្តកំពង់ស្ពឺ ត្រូវប្រកួតជាមួយស៊ឹម សល់ មកពីក្លឹបប៉េអឹមរាជធានីភ្នំពេញ ។ រីឯនាង ស៊ីណាត មកពីក្លឹបប្រដាល់ខេត្តរតនគិរី ត្រូវប្រកួតជាមួយឈៀង សំអូន មកពីក្លឹបកងទ័ពជើងគោក ។ ប៉ុន្មានគូចុងក្រោយនេះសុទ្ធតែជាអ្នកប្រដាល់រលកក្រោយដែលមិនទាន់មានបទពិសោធន៍ច្រើននៅឡើយ៕  |
| ចោរប្រដាប់អាវុធចូលប្លន់ផ្ទះប្រជាពលរដ្ឋយកបានទ្រព្យជាង៦ពាន់ដុល្លារ Posted: 04 Mar 2011 02:52 AM PST   ខេត្តកណ្តាល ៖ ចោរប្លន់ប្រដាប់អាវុធ១ក្រុមបានគាស់បង្អួចផ្ទះលក់កាហ្វេមួយរួចលូនចូលទៅចាប់កូនម្ចាស់ផ្ទះចងស្លាបសេក ព្រមទាំងវាយស្ត្រីម្ចាស់ផ្ទះ និងកូនស្រីបណ្តាលឱ្យរងរបួស ហើយប្រមូលយកទ្រព្យសម្បត្តិមានតម្លៃ រួចគេចខ្លួនទៅបាត់។ ហេតុការណ៍នេះបានកើតឡើងកាលពីវេលាម៉ោង២ និង៣០នាទីរំលងអធ្រាត្រឈានចូលថ្ងៃទី៤ ខែមីនា ឆ្នាំ២០១១ នៅតាមបណ្តោយផ្លូវជាតិលេខ៤ ក្នុងភូមិអង្គស្នួលទី៣ ឃុំពើក ស្រុកអង្គស្នួល ។ ក្រុមចោរប្លន់មានគ្នា២នាក់ស្លៀកពាក់ស៊ីវិលប្រដាប់ដោយកាំភ្លើងខ្លី១ដើម ដែកស្បែង១ និងដូយរថយន្ត១ ។ ចំណែកឯស្ត្រីម្ចាស់ផ្ទះឈ្មោះសុខ ខឿន អាយុ៤៩ឆ្នាំ រងរបួសបែកក្បាលដេរចំនួន៥០ថ្នេរ និងកូនស្រីឈ្មោះលឹម សុខា អាយុ២៨ឆ្នាំ រងរបួសបែកក្បាលដេរ៥ថ្នេរ។ ក្រុមចោរប្រមូលយកបានខ្សែដៃប្លាទីន២ខ្សែទម្ងន់២តម្លឹង៣ជី ខ្សែ.កប្លាទីន២ខ្សែទម្ងន់៨ជី ខ្សែដៃដាំត្បូង១ខ្សែ ក្រវិលពេជ្រ១គូតម្លៃប្រហែល១.០០០ដុល្លារ បន្តោងខ្សែ.ករូបព្រះធ្វើពីមាស២ជី លុយ៥០០ដុល្លារ និងទូរស័ព្ទដៃ១គ្រឿងតម្លៃជាង១០០ដុល្លារ ។ សរុបការបាត់បង់ទ្រព្យសម្បត្តិទាំងអស់ចំនួនជាង៦ពាន់ដុល្លារ។ តាមប្រភពព័ត៌មានឱ្យដឹងថា នៅពេលម្ចាស់ផ្ទះកំពុងលង់លក់ក្នុងដំណេក ក្រុមចោរប្លន់បានគាស់បង្អួចចំហៀងខាងលិច រួចកាត់ចំរឹងបង្អួចលូនចូលបន្ទប់ ក្រោមផ្ទះ។ ពួកគេបានចាប់កូនប្រុសម្នាក់របស់ស្ត្រីម្ចាស់ផ្ទះចងស្លាបសេកនឹងខ្សែភ្លើង ព្រមទាំងគំរាមមិនឱ្យស្រែក។ បន្ទាប់មកពួកចោរឡើងទៅលើផ្ទះតាមជណ្តើរខាងក្នុង រួចចាប់កូប្រសាប្រុសម្នាក់ទៀតចង និងគំរាមស្ត្រីម្ចាស់ផ្ទះ និងកូនស្រីឱ្យយកកូនសោចាក់ទូ និងក្បាលគ្រែប្រអប់រើយកទ្រព្យសម្បត្តិមានតម្លៃ។ ប្រភពដដែលបន្តទៀតថា ដោយសារស្ត្រីម្ចាស់ផ្ទះបដិសេធថា អត់មានលុយ ឬរបស់មានតម្លៃអ្វីទេ ធ្វើឱ្យចោរខឹងក៏ទាញយកដែកគាស់វាយគាត់ផង និងវាយកូនស្រីផងបណ្តាលឱ្យរងរបួសធ្ងន់ធ្ងរ។ ខណៈស្ត្រីម្ចាស់ផ្ទះរងរបួស ពួកចោរបានយកដែកគាស់ទៅគាស់ទូ និងក្បាលគ្រែប្រអប់ប្រមូលយកគ្រឿងអលង្ការ និងលុយនៅក្នុងនោះទាំងអស់ ។ ពេលនាំគ្នាគេចខ្លួនដោយសារតែទ្វារផ្ទះជាប់គន្លឹះចេញមិនបានលឿន ពួកចោរនាំគ្នាលូនចេញតាមប្រហោងបង្អួច ។ ក្រោយពេលកើតហេតុនោះ ប្រជាពលរដ្ឋ និងសមត្ថកិច្ចប៉ូលិសស្រុកអង្គស្នួលបានតាមរកចាប់ខ្លួនពួកចោរភ្លាមៗដែរ ប៉ុន្តែរកមិនឃើញ។ គេសង្ស័យថា ពួកចោរអាចជាអ្នករស់នៅជិតៗនោះ និងធ្លាប់ចេញចូលផឹកកាហ្វេទៀតផងទើបដឹងថា ជនរងគ្រោះមានទ្រព្យសម្បត្តិ និងលុយកាក់ ហើយចូលប្លន់បែបនោះ ៕  |
| ដុតកម្ទេចជ័រនិងកំណាត់ធ្វើឱ្យមានផ្សែងបំពុលបរិស្ថាន Posted: 04 Mar 2011 02:47 AM PST   រាជធានីភ្នំពេញ ៖ កម្លាំងចម្រុះរួមមានអាជ្ញាធរខណ្ឌដង្កោ លោកអភិបាលរងហែម ដារិទ្ធិ និងមន្ត្រីមន្ទីរបរិស្ថានរាជធានីភ្នំពេញ និងការិយាល័យបរិស្ថានខណ្ឌដង្កោ បានចុះទៅត្រួត ពិនិត្យទីតាំងឆេះកាកសំណល់បង្កជាផ្សែងពុល ធ្វើឱ្យប្រជាពលរដ្ឋប្តឹងចោទប្រកាន់ពីការដុតកម្ទេចកាកសំណល់ចោលឥតសណ្តាប់ធ្នាប់ ធ្វើឱ្យប្រជាលរដ្ឋដែលមានលំនៅឋានជិតនោះពិបាកទ្រាំនឹងក្លិនសាយភាយនេះរកកល់ចង់ពុលនិងថប់ដង្ហើម ។ ក្រោយពេលទទួលបានបណ្តឹងប្រជាពលរដ្ឋកម្លាំងចម្រុះបានចុះទៅពិនិត្យមើលកាលពីព្រឹកថ្ងៃទី៤ ខែមីនា ឆ្នាំ២០១១ ដល់ទីតាំងខាងលើនៅតាមបណ្តោយផ្លូវជាតិលេខ៣ ស្ថិតក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌដង្កោ ។ ពេលចុះទៅដល់ គឺឃើញមានការដុតចោលនូវកម្ទេចកាកសំណល់រោងចក្រមែន ហើយការដុតនោះធ្វើឱ្យផ្សែងហុយទ្រលោមនិងជះក្លិនអាក្រក់ស្ទើរទ្រាំមិនបានដូចការដែលប្រជាពលរដ្ឋប្តឹងមែន ។ មន្ត្រីអាជ្ញាធរនិយាយថា ម្ចាស់ទីតាំងស្តុកកម្ទេចកាកសំណល់រោងចក្រខាងលើឈ្មោះហេង ហ្វុត ប្រធានសេដ្ឋកិច្ចសមាគមនិគមជនវៀតណាមនៅកម្ពុជា ហើយពេលទៅដល់ស្ត្រីជាប្រពន្ធរបស់ម្ចាស់ទីតាំងខាងលើបានបដិសេធថាខ្លួនមិនបានដុតកាកសំណល់នេះទេ តែសារភាពថាបានចាក់ចោលកាកសំណល់នៅទីនោះមែន និងប្រហែលជាមានគេលួចដុត។ ទោះបីជាបែបណា សមត្ថកិច្ចមិនបានជឿថា ម្ចាស់ទីតាំងនោះអត់ដុតនោះឡើយព្រោះភ្លើងឆេះកាកសំណល់នៅក្នុងទីតាំងខាងលើ ។ មិនតែប៉ុណ្ណោះ ភ្លាមៗនោះអាជ្ញាធរបានហៅរថយន្តពន្លត់អគ្គីភ័យទៅបាញ់ទឹកពន្លត់អស់២ស៊ីទែន នៅតែមិនរលត់ទៀត ហើយបន្ទាប់មកម្ចាស់ទីតាំងបានប្រើកម្មកររបស់ខ្លួនឱ្យយកម៉ាស៊ីនបូមទឹកបាញ់ពន្លត់។ ភ្លើងឆេះកាកសំណល់ខាងលើមានរយៈពេល២ថ្ងៃហើយ ទើបនៅយប់ថ្ងៃទី៣ មីនា ប្រជាពលរដ្ឋបានប្តឹងលោកស្នងការរាជធានីភ្នំពេញ ទើបពេលនោះមានការបញ្ជាឱ្យកម្លាំងចេញដើររកទាំងយប់ ប៉ុន្តែពុំទាន់មានវិធានការភ្លាមៗទេ។ លុះដល់ព្រឹកឡើងទើបមានការប្តឹងទៅគណៈអភិបាលខណ្ឌដង្កោទៀត ទើបលោកអភិបាលខណ្ឌបញ្ជាឱ្យលោកអភិបាលរងហែម ដារិទ្ធិ សហការជាមួយមន្ត្រីមន្ទីរបរិស្ថានរាជធានីភ្នំពេញចុះទៅពិនិត្យមើល និងចាត់វិធានការពន្លត់ភ្លើងនេះ។ មន្ត្រីបរិស្ថានបានឱ្យដឹងថា ផ្សែង និងក្លិនអាក្រក់ខាងលើអាចនាំឱ្យមនុស្សថប់ដង្ហើមវិលមុខ ងងឹតមុខ បណ្តាលឱ្យមានគ្រោះថ្នាក់ដល់សុខភាពខ្លាំងណាស់ ជាពិសេសស្ត្រីមានផ្ទៃពោះ និងស្ត្រីទើបសំរាលកូនរួច ។ បន្ទាប់ពីចុះទៅដល់ក្រៅពីពន្លត់ភ្លើងនោះគឺបានធ្វើការណែនាំនិងផាកពិន័យម្ចាស់ទីតាំងទៅតាមច្បាប់ ហើយដោយមិនអាចប្រកែកបាន ម្ចាស់ទីតាំងក៏ទទួលស្គាល់ថាខ្លួនជាអ្នកបង្កផងដែរ ៕  |
| តូយ៉ូតា១បាំងកន្លះបុករះឡិចស៊ីសនិងម៉ូតូរួចចុះត្រាំទឹក Posted: 04 Mar 2011 02:32 AM PST   ខេត្តកណ្តាល ៖ រថយន្តតូយ៉ូតា១បាំងកន្លះ១គ្រឿង បានបើកបោះពួយយ៉ាងលឿន ជ្រុលទៅបុករថយន្តឡិចស៊ីស RX300 មួយគ្រឿងពេញទំហឹង រួចហើយអត់ឈប់ស្ងៀមទេ បានជ្រុលទៅមុខបុកម៉ូតូអ្នកដំណើរ១គ្រឿង ទៀតបណ្តាលឱ្យអ្នកជិះម៉ូតូ២នាក់រងរបួសស្រាល បន្ទាប់មកទើបរថយន្តនោះជ្រុលធ្លាក់ចូលទៅក្នុងប្រឡាយទឹក ហើយអ្នកបើកបរបានរត់គេចខ្លួនបាត់ ។ ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាល្ងាចថ្ងៃទី៣ មីនា ឆ្នាំ២០១១ នៅលើកំណាត់ផ្លូវជាតិលេខ៤ ភូមិចុងបង្គោល ឃុំបែកចាន ស្រុកអង្គស្នួលខេត្តកណ្តាល ។ រថយន្តបង្កហេតុម៉ាកតូយ៉ូតា១បាំងកន្លះពណ៌ទឹកប្រាក់ ពាក់ស្លាកលេខញ-៣៨៩៦ ភព២ ក្រោយពេលកើតហេតុ អ្នកបើកបរបានគេចខ្លួនបាត់ ។ ចំណែកឯរថយន្តរងគ្រោះម៉ាកតូយ៉ូតាឡិចស៊ីស RX 300 ពណ៌ស្ករ ពាក់ស្លាកលេខភ្នំពេញ 2M- 2433 បើកបរដោយបុរសឈ្មោះឡុង ប៊ុនឡាយ អាយុ៥៨ឆ្នាំ មានទីលំនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ រងរបួសស្រាលដោយបោកក្បាលទៅនឹងជញ្ជាំងរថយន្ត ។ រីឯម៉ូតូមួយគ្រឿងទៀតដែលរងគ្រោះដោយសារតែរថយន្តបុកដែរនោះម៉ាកហុងដាគុបជ្រុង ពណ៌ខៀវ បើកបរដោយបុរសឈ្មោះស៊ុន សុខកួន អាយុ២៤ឆ្នាំ មានទីលំនៅភូមិកោះ ទ្រេត ឃុំភ្នំតូច ស្រុកឧដុង្គ ខេត្តកំពង់ស្ពឺ រួមជាមួយអ្នកជិះពីក្រោយម្នាក់ទៀតរងរបួសស្រាល។ តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ រថយន្តទាំងពីរគ្រឿង និងម៉ូតូបើកបរធ្វើដំណើរបញ្ច្រាសទិសគ្នា ដោយរថយន្តម៉ាកតូយ៉ូតា១បាំងកន្លះ បើកបរក្នុងទិសដៅពីកើតទៅលិចក្នុងល្បឿនយ៉ាងលឿន ។ ចំណែកឯរថយន្តម៉ាកឡិចស៊ីស RX300 និងម៉ូតូម៉ាកគុបជ្រុង បើកបរស្របទិសគ្នាក្នុងទិសដៅ ពីលិចទៅកើត ។ លុះទៅដល់ត្រង់ចំណុចកើតហេតុរថយន្តម៉ាកតូយ៉ូតា១បាំងកន្លះ បានបន្ថែមល្បឿនវ៉ារថយន្តផ្សេងទៀត ហើយបានជ្រុលទៅបុករថយន្តឡិចស៊ីស RX 300 ពេញទំហឹងបណ្តាលឱ្យរងនូវការខូចខាតយ៉ាងដំណំ រួចហើយជ្រុលទៅបុកម៉ូតូ១គ្រឿងទៀតមុនពេលធ្លាក់ចូលទៅក្នុងប្រឡាយទឹក៕  |
| លោករដ្ឋមន្ត្រីស៊ុយ សែម ពិនិត្យការបោសសំអាតមីនក្នុងអាងវារីអគ្គិសនីស្ទឹងអាតៃ Posted: 04 Mar 2011 02:13 AM PST   ខេត្តពោធិ៍សាត់ ៖ កាលពីថ្ងៃទី៣ មីនា ឆ្នាំ២០១១ កន្លងទៅ លោកស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានអញ្ជើញពិនិត្យមើលការដោះមីននៅក្នុងអាងទំនប់វារីអគ្គិសនីស្ទឹងអាតៃ ស្ថិតក្នុងភូមិឆាយលូក ឃុំអូរសោម ស្រុកវាលវែង ដែលក្រុមស៊ីម៉ាក់កំពុងធ្វើសកម្មភាពបោសសំអាតសព្វថ្ងៃនេះ មុននឹងវារី អគ្គិសនីដំណើរការប្រើប្រាស់ ។ តាមរបាយការណ៍របស់លោកឧត្តមសេនីយ៍ទោ តូច ផេងទាន នាយកនាយកដ្ឋានផែនការប្រតិបត្តិការ និងហ្វឹកហ្វឺននៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាមឱ្យដឹងថា ការដ្ឋានបោសសំអាតមីន និងកាកសំណល់សង្គ្រាមនៅស្ថានីយវារីអគ្គិសនីស្ទឹងអាតៃ ស្រុកវាលវែង នេះ គឺជាតំបន់មានសង្គ្រាមនៅក្នុងទសវត្សឆ្នាំ១៩៧០ រហូតដល់១៩៩៨ ដែលនៅសេសសល់មីនអន្ទាក់ប្រឆាំងថ្មើរជើង និងគ្រាប់បាញ់ផ្លោងធ្លាក់មិនទាន់ផ្ទុះគ្រប់ប្រភេទនៅលើដី និងក្នុងដីយ៉ាងច្រើន ។ តំបន់នេះជាសមរភូមិចាស់កាន់កាប់ដោយភាគីខ្មែរក្រហម មានព្រៃក្រាស់ ព្រៃស្រោង ជ្រលងជ្រោះ ជម្រាលភ្នំ ចំណោតខ្លាំង ភ្នំខ្ពស់ៗ អាកាសធាតុពេលយប់ត្រជាក់ ពេលថ្ងៃក្តៅ មានភ្លៀងធ្លាក់ញឹកញាប់ សំបូរសត្វទាក និងសត្វមានពិសជាច្រើន ធ្វើឱ្យកម្លាំងរុករកភាគច្រើនទទួលរងជំងឺគ្រុនចាញ់ តែបានព្យាបាលទាន់ពេលវេលា ។ កម្លាំងសរុបមានចំនួន៨៣នាក់ ប្រើប្រាស់ម៉ាស៊ីនរាវមីន៣៣គ្រឿង រថយន្តដឹកជញ្ជូន៣គ្រឿង ម៉ូតូ២គ្រឿង និងម៉ាស៊ីនភ្លើង១គ្រឿង ។ គិតពីថ្ងៃទី២៨ សីហា ឆ្នាំ២០១០ ដល់ថ្ងៃទី៣ មីនា ឆ្នាំ២០១១ ជាលទ្ធផលយើងរកឃើញគ្រាប់មីនចំនួន៥១គ្រាប់ និងកាកសំណល់សង្គ្រាម៣៤គ្រាប់ លើផ្ទៃដី៥.៩២៦.៨០០ម៉ែត្រការ៉េ ។ លោករដ្ឋមន្ត្រីស៊ុយ សែម បានថ្លែងកោតសរសើរចំពោះមន្ត្រីស៊ីម៉ាក់ ដែលបានខិតខំបោសសំអាតមីនក្នុងអាងវារីអគ្គិសនីស្ទឹងអាតៃ ដើម្បីងាយស្រួលដល់ក្រុមហ៊ុនចិនដែលកំពុងកសាងវារីអគ្គិសនីសព្វថ្ងៃនេះចៀសផុតពីគ្រោះថ្នាក់ជាយថាហេតុ ។ នៅប្រទេសកម្ពុជាយើងមានសង្គ្រាមរ៉ាំរ៉ៃជាង២ទសវត្ស ដូច្នេះហើយទើបរាល់ការបង្កើតការដ្ឋានសាងសង់អ្វីមួយ គឺចាំបាច់ត្រូវតែដោះមីន ។ ជាក់ស្តែងដូចជាការកសាងវារីអគ្គិសនីគិរីរម្យ ស្ទឹងតាតៃ ឫស្សីជ្រំជាដើម សុទ្ធតែត្រូវបានដោះមីនជាមុន ហើយសូម្បីតែកាលបើកការដ្ឋានដំណើរការសាងសង់ស្ពានអ្នកលឿងប៉ុន្មានថ្ងៃមុននេះក៏ដោះមីនដែរ និងរកឃើញគ្រាប់មីនជាច្រើនគ្រាប់ទៀតផង ។ រាល់ការបោសសំអាតមីនកន្លងមក មិនដែលមានគ្រោះថ្នាក់អ្វីទេ នេះដោយសារមន្ត្រីស៊ីម៉ាក់ យើងមានចំណេះដឹង បច្ចេកទេស និងបទ ពិសោធន៍ច្បាស់លាស់ ។ លោកស៊ុយ សែម បានផ្តាំផ្ញើដល់កងកម្លាំងបោសសំអាតមីនសូមខិតខំបំពេញការងាររបស់ខ្លួនបន្តទៀត ដើម្បីសម្រេចផ្ទៃដីជូនដល់ក្រុមហ៊ុនចិនធ្វើអាងវារីអគ្គិសនីឆាប់បានដំណើរការប្រើប្រាស់ ។ នៅក្នុងឱកាសនោះ លោករដ្ឋមន្ត្រីស៊ុយ សែម បានឧបត្ថម្ភទឹកក្រូចចំនួន១០កេស និងថវិកាមួយចំនួនដល់ក្រុមបោសសំអាតមីននៅទីនោះ ព្រមទាំងបានពិនិត្យមើលផ្ទៃដីដោះរួច និងអញ្ជើញចុចបំផ្ទុះគ្រាប់មីនកំទេចចោលផងដែរ៕  |
| សមត្ថកិច្ចក្រុងខេមរភូមិន្ទឃាត់ខ្លួនជនជាប់ចោទប្រើអំពើហិង្សា Posted: 04 Mar 2011 01:57 AM PST   ខេត្តកោះកុង ៖ គ្រាន់តែទាស់ពាក្យសំដីគ្នារឿងទិញស្រាបន្តិចបន្តួចបានក្លាយជាអ្នកទោសដោយសារប្រើអំពើហិង្សាចាក់គេនឹងដែកបំពង់ទីបចុងស្រួចបណ្តាលឱ្យរងរបួសធ្ងន់ ហើយត្រូវនាំចូលសំរាកនៅក្នុងមន្ទីរពេទ្យបង្អែកខេត្តកោះកុង។ ករណីនេះកើតឡើងកាលពីវេលាម៉ោង៨យប់ ថ្ងៃទី២ មីនា នៅក្រោយអនុវិទ្យាល័យទីរួមខេត្ត ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ។ ជនរងគ្រោះឈ្មោះប៉ើ សៅលីញ ភេទប្រុស អាយុ១៩ឆ្នាំ ជាកម្មករស៊ីឈ្នួលកាប់ជ្រូក មានទីលំនៅក្នុងភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ត្រូវជនល្មើសឈ្មោះញឹក ទឹមផល្លី ហៅខៀវ ភេទប្រុស អាយុ២៤ឆ្នាំ ជាកម្មករសំណង់ មានទីលំនៅក្នុងភូមិ២ សង្កាត់ស្មាច់មានជ័យ ក្រុងខេមរភូមិន្ទ ចាក់នឹងដែកបំពង់ទីបត្រង់ក្បាល និងចង្កេះ។ សមត្ថកិច្ចឱ្យដឹងថា បន្ទាប់ពីបង្កហេតុរួចជនសង្ស័យរត់គេចខ្លួនបាត់ លុះព្រឹកឡើងថ្ងៃទី៣ មីនា ទើបសមត្ថកិច្ចនគរបាលក្រុងខេមរភូមិន្ទ ឃាត់ខ្លួនបាន ហើយបញ្ជូនទៅកាន់ស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅសាលាដំបូងខេត្ត។ ប្រភពដដែលបន្តទៀតថា ជនសង្ស័យ និងជនរងគ្រោះទាស់ពាក្យសំដីគ្នារឿងទិញស្រា។ ជនរងគ្រោះឈ្មោះប៉ើ សៅលីញ អង្គុយផឹកស្រានៅតូបអ្នកលក់ ហើយពេលជនសង្ស័យដើរទៅទិញស្រា ឌឺដងពាក្យសំដីដាក់គ្នាទៅវិញទៅមក ទើបកើតជាអំពើហិង្សាបែបនោះ៕  |
| ស្ត្រី២នាក់ និងបុរស២នាក់ត្រូវសមត្ថកិច្ចឃាត់ខ្លួន Posted: 04 Mar 2011 01:48 AM PST   រាជធានីភ្នំពេញ ៖ នគរបាលផ្នែកព្រហ្មទណ្ឌនៃអធិការដ្ឋានខណ្ឌដូនពេញបានឃាត់ ខ្លួនជនសង្ស័យជួញដូរថ្នាំញៀនពីរនាក់នៅជាប់របងវិហារអ៊ិស្លាមប្លុកបឹងកក់ ស្ថិតក្នុងភូមិទី ២២ សង្កាត់ស្រះចក ខណ្ឌដូនពេញ កាលពីវេលា ម៉ោង៥ និង៣០នាទីល្ងាច ថ្ងៃទី៣ មីនា ឆ្នាំ ២០១១ ក្រោយពីសមត្ថកិច្ចរកឃើញថ្នាំញៀន ។ ជនសង្ស័យដែលនគរបាលឃាត់ខ្លួនមាន ១-ឈ្មោះប៊ូ ណេត ភេទស្រី អាយុ៤៨ឆ្នាំ ស្នាក់ នៅសង្កាត់ស្រះចក ខណ្ឌដូពេញ និង២-ឈ្មោះរឿន ធី ភេទស្រី អាយុ២៥ឆ្នាំ ស្នាក់នៅសង្កាត់ ស្រះចកដែរ ។ នគរ បាលផ្នែកព្រហ្មទណ្ឌនៃអធិការដ្ឋានខណ្ឌដូនពេញ ឃាត់ខ្លួនស្រ្តីទាំង២នាក់ នោះបន្ទាប់ពីរកឃើញថ្នាំញៀនប្រភេទយ៉ាម៉ាចំនួនពីរគ្រាប់ ។ ដោយឡែកករណីមួយទៀត ជន២នាក់ត្រូវឃាត់ខ្លួនកាលពីរសៀលថ្ងៃទី៣ មីនា ដោយនគរបាលប៉ុសិ៍្តបឹងព្រលិត ខណ្ឌ៧មករា ក្នុងនោះម្នាក់ពាក់ព័ន្ធរឿងចែកចាយ និងម្នាក់ទៀត ប្រើប្រាស់គ្រឿងញៀន ព្រមទាំងដកហូតវត្ថុតាងមួយចំនួន ។ ជន២នាក់នោះម្នាក់ឈ្មោះមាស ឡេវីណា អាយុ២០ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ និងម្នាក់ទៀតឈ្មោះវ៉ាន់ ចន្ទសេង អាយុ២១ឆ្នាំ ជានិស្សិតឆ្នាំទី១ នៅសាកលវិទ្យាល័យជាតិគ្រប់គ្រងរស់នៅសង្កាត់ផ្សារថ្មីទី១ ខណ្ឌដូនពេញ ។ លោកអនុសេនីយ៍ទោ ប៉ាត សំណាត ប្រធាននគរបាលប៉ុសិ៍្តព្រលិតឱ្យដឹងថា នៅវេលាម៉ោង១ និង៣០នាទីរសៀលថ្ងៃទី៣ មីនា ប៉ុសិ៍្តរដ្ឋបាលសង្កាត់បឹងព្រលិតទទួលបានព័ត៌មានថា នៅច្រកជណ្តើរផ្ទះលេខ៣DEo ផ្លូវលេខ ១៩០ ភូមិ៦ សង្កាត់បឹងព្រលិត មាន ជនសង្ស័យ២នាក់ កំពុងធ្វើសកម្មភាពចែកចាយ និងប្រើប្រាស់គ្រឿងញៀន ។ លោកប៉ាត សំណាត ឱ្យដឹងទៀតថា ជនសង្ស័យបានសារភាពថា ថ្នាំញៀនដែលគេយកមកប្រើប្រាស់ និងចែកចាយបន្តនេះ គឺទិញពីមន្ត្រីកងរាជអាវុធហត្ថលើផ្ទៃប្រទេសម្នាក់ ។ ជនសង្ស័យត្រូវបានប្រគល់ជូនទៅផ្នែកព្រហ្មទណ្ឌ ដើម្បីស្រាវជ្រាវស្វែងរកចាប់ខ្លួនបក្សពួក និងកសាងសំណុំ រឿងបញ្ជូនទៅកាន់សាលាដំបូងរាជធានីភ្នំពេញ ៕  |
| ដាណឺម៉ាកសរសើរពីកិច្ចទំនាក់ទំនងល្អជាមួយប្រទេសកម្ពុជា Posted: 04 Mar 2011 01:42 AM PST  រាជធានីភ្នំពេញ ៖ នៅក្រសួងរៀបចំដែនដីនគរូបនីយកម្ម កាលពីថ្ងៃទី៣ មីនា បានរៀបចំពិធីប្រគល់-ទទួលអគារការិយាល័យយានយន្ត និងសំភារបរិក្ខារក្នុងក្របខណ្ឌនៃកម្មវិធីគ្រប់គ្រងធនធានធម្មជាតិ និងទ្រទ្រង់ជីវភាពរស់នៅពីឆ្នាំ២០០៦-២០១០ ក្រោមអធិបតីភាពលោកអ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក Tom Barthel Hansen អគ្គទីប្រឹក្សាស្ថានទូតដាណឺម៉ាកប្រចាំនៅកម្ពុជា ។ តាមរបាយការណ៍របស់លោកឌុច វនទីតូ អគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្មបានឱ្យដឹងថា ផ្អែកលើកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលនៃប្រទេសដាណឺម៉ាកចុះថ្ងៃទី៣១ កក្កដា ឆ្នាំ២០០៦ និងអនុស្សរណៈ នៃការយោគយល់គ្នារវាងក្រសួងរៀបចំដែនដី នគរូបនីយកម្ម និងសំណង់ និងស្ថានទូតដាណឺម៉ាកប្រចាំរាជធានីភ្នំពេញចុះថ្ងៃទី១២ តុលា ឆ្នាំ ២០០៦ សមាសភាពរៀបចំដែនដីនៃកម្មវិធីគ្រប់គ្រងធនធានធម្មជាតិ និងទ្រទ្រង់ជីវភាពរស់នៅគាំទ្រដោយ Dania /Dfid/NZAid បានចាប់ផ្តើមអនុវត្តការងារដោយអគ្គនាយកដ្ឋានរៀបចំដែនដី និងនគរូបនីយកម្មពីថ្ងៃទី១៩ មេសា ឆ្នាំ ២០០៧និងបញ្ចប់នៅថ្ងៃទី៣១ ធ្នូ ឆ្នាំ២០១០។ សមាសភាពរៀបចំដែនដី អនុវត្តការងារគ្របដណ្តប់លើខេត្តគោលដៅចំនួន១១ គឺខេត្តកំពត កែប ព្រះសីហនុ កោះកុង កំពង់ស្ពឺ កំពង់ចាម ក្រចេះ មណ្ឌលគិរី រតនគិរី សៀមរាប និងខេត្តពោធិ៍សាត់ ។ លោក Tom Barthel Hansen បានថ្លែងថា ពិធីប្រគល់-ទទួលនេះ ជានិមិត្តរូបនៃកិច្ចសហប្រតិបត្តិការប្រកបដោយជោគជ័យរវាងរដ្ឋាភិបាលរបស់ប្រទេសទាំងពីរ ក្នុងការជួយដល់វិស័យដីធ្លី ពិសេសគឺការខិតខំប្រឹងប្រែងរួមគ្នាក្នុងការពង្រឹងអន្តរាគមន៍របស់អគ្គនាយកដ្ឋានរៀបចំដែនដី និងនគរូបនីយកម្ម ទាំងនៅថ្នាក់ជាតិ និងថ្នាក់ក្រោមជាតិ ។ ចាប់តាំងពីឆ្នាំ២០០៧ ដល់ឆ្នាំ ២០១០ Danida គឺជាដៃគូដ៏សកម្មមួយក្នុងវិស័យដីធ្លី រួមជាមួយដៃគូផ្សេងទៀតមកពីប្រទេសអាល្លឺម៉ង់ កាណាដា ហ្វាំងឡង់ និងធនាគារពិភពលោក ។ ក្នុងអំឡុងពេលប៉ុន្មានឆ្នាំនេះ Danida បានចំណាយថវិកាច្រើនជាង៣,៥លានដុល្លារសហរដ្ឋអាមេរិក សម្រាប់គាំទ្រសកម្មភាពដែលពាក់ព័ន្ធនឹងការអភិវឌ្ឍស្ថាប័ន និងសមត្ថភាព ធនធានមនុស្ស និងការកសាងផែនការរៀបចំដែនដី ដែលរួមបញ្ចូលទាំងការរៀបចំផែនការប្រើប្រាស់ដីនៅក្នុងឃុំ-សង្កាត់ ។ ថវិកាដែលជាជំនួយទាំងនេះ បានផ្តល់ផលប្រយោជន៍ដល់ឃុំ-សង្កាត់លើសពី៧០០នៅក្នុងខេត្តគោលដៅចំនួន១៤ របស់កម្មវិធីទាំងមូល ។ មួយភាគធំនៃការគាំទ្រ នេះ បានចំណាយនៅថ្នាក់ក្រោមជាតិ ដើម្បីគាំទ្រដល់ការរៀបចំផែនការនៅថ្នាក់ឃុំ-សង្កាត់ និងការផ្តល់សេវាកម្មនៅថ្នាក់ខេត្ត ដើម្បីបង្កើនការទទួលបានព័ត៌មាន និងការកែលំអវិស័យរៀបចំដែនដី ។ ភាពស្មុគស្មាញនៃបញ្ហាដីធ្លី មិនមែនកើតមានតែក្នុងប្រទេសកម្ពុជាទេ តែវាកើតមានក្នុងប្រទេសជាច្រើនលើសាកលលោក ។ បញ្ហាទាំងនេះត្រូវការពេលវេលាគ្រប់គ្រាន់ ធនធានមនុស្ស និងហិរញ្ញវត្ថុ និងជំនាញច្បាស់លាស់ក្នុងការដោះស្រាយបញ្ហា ដើម្បីកំណត់ចក្ខុវិស័យជាយុទ្ធសាស្ត្ររយៈពេលវែង និងផែនការសម្រាប់ប្រើប្រាស់ដីទាំងនោះ ។ កម្ពុជាទើបតែចាប់ផ្តើមបោះជំហាននៅលើផ្លូវដ៏វែងឆ្ងាយនេះ ។ ការចាប់ផ្តើម អនុវត្តការកសាងផែនការប្រើប្រាស់ដីនៅក្នុងឃុំ-សង្កាត់ កន្លងមកថ្មីៗនេះ គឺជាជំហានបឋមនៃយុទ្ធសាស្ត្រដ៏វែងឆ្ងាយនេះ ។ ជាការចាំបាច់ ដែលយើងត្រូវទទួលស្គាល់ថា ដីធ្លីជាវិស័យចំរុះដែលទាមទារឱ្យមានការចូលរួមពីអ្នកពាក់ព័ន្ធជាច្រើន ហើយក៏ជាតំរូវការសម្រាប់ការអភិវឌ្ឍប្រកបដោយជោគជ័យនាពេលអនាគត ដែលពឹងផ្អែកទាំងស្រុងទៅលើការរៀបចំផែនការរៀបចំដែនដី និងការពង្រឹងប្រសិទ្ធភាពនៃការអនុវត្តគោលនយោបាយដីធ្លី ។ ទោះបីជាជួបប្រទះឧបសគ្គជាច្រើនក្នុងបញ្ហាដីធ្លីក៏ដោយ ក៏ការគាំទ្ររបស់កម្មវិធីដល់អគ្គនាយកដ្ឋានរៀបចំដែនដី និងនគរូបនីយកម្ម អាចអនុវត្តសម្រេចបានលទ្ធផលសំខាន់ៗមួយចំនួនគួរឱ្យកត់សំគាល់។ ជោគជ័យធំៗដែលសម្រេចបានមាន ១-អនុក្រឹត្យស្តីពីនីតិវិធីនៃការធ្វើផែនការប្រើប្រាស់ដីនៅក្នុងឃុំ-សង្កាត់ដែលត្រូវបានអនុម័តកាលពីថ្ងៃទី៥ ឧសភា ឆ្នាំ២០០៩ ២-ការផ្តល់ផែនទីគ្រប់ប្រភេទរួមទាំងផែនទីប្រើប្រាស់ដីលំអិត និងសាមញ្ញក្នុងចំនួនលើសពី៨.០០០ផ្ទាំង ដល់អ្នកប្រើប្រាស់ដី ៣-ការរៀបចំ និងចែកឯកសារបច្ចេកទេសស្តីពីការណែនាំអនុវត្តក្នុងការរៀបចំផែនការប្រើប្រាស់ដីនៅក្នុងឃុំ-សង្កាត់ចំនួន៦.៤០០ក្បាល ដល់ក្រសួងអង្គការក្រៅរដ្ឋាភិបាល និងសហគមន៍នានា ៤-ការផ្តល់ការគាំទ្របច្ចេកទេស ដល់ថ្នាក់ជាតិ និងថ្នាក់ក្រោមជាតិ តាមរយៈបណ្តាញសេវាទីប្រឹក្សាបច្ចេកទេសក្នុងប្រទេស ។ លោកអ៊ឹម ឈុនលឹម បានថ្លែងថា រាជរដ្ឋា ភិបាលក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់អាទិភាពខ្ពស់ដល់ការងារកំណែទំរង់កាន់តែស៊ីជម្រៅ និងគ្រប់ជ្រុងជ្រោយលើគ្រប់វិស័យ ដែលក្នុងនោះពាក់ព័ន្ធនឹងការរួមចំណែករបស់ក្រសួងរៀបចំដែនដី នគរូបនីយកម្ម និងសំណង់ គឺការងារកំណែទម្រង់ដីធ្លី ក្នុងគោលដៅរួមចំណែកកាត់បន្ថយភាពក្រីក្រ និងការអភិវឌ្ឍសេដ្ឋកិច្ច សង្គមប្រកបដោយចីរភាព។ បណ្តាកិច្ចការជាអាទិភាពនៃកំណែទម្រង់ដីធ្លីផ្តោត ១-លើការពង្រឹងសុវត្ថិភាពនៃការកាន់កាប់ដីធ្លី ទាំងដីឯកជន និងដីរដ្ឋ និងដីរបស់សហគមន៍ជនជាតិ ដើមភាគតិច តាមរយៈការចុះបញ្ជីដីធ្លីជាប្រព័ន្ធ និងដាច់ដោយដុំ ការផ្តល់ប័ណ្ណកម្មសិទ្ធិជូនប្រជាជន ស្ថាប័ន និងសហគមន៍ជនជាតិដើមភាគតិច ការដាក់ចេញនូវវិធានការសមស្រប ដើម្បីទប់ស្កាត់ការប្រមូលដីទុកដោយមិនបានប្រើប្រាស់ និងមិនផលិត ២-លើការចូលរួមលើក កម្ពស់ការបង្កើនផលិតភាព និងពិពិធភាវូបនីយកម្ម សំដៅធានាគារ គ្រប់គ្រង ការការពារ និងការប្រើប្រាស់ និងអភិវឌ្ឍន៍ដី និងធនធានធម្មជាតិក្នុងបរិបទនៃសេដ្ឋកិច្ចទីផ្សារឱ្យមានតម្លាភាព សមធម៌ ដោយមានការចូលរួមពីគ្រប់ភាគី និងសង្គមស៊ីវិលដែលពាក់ព័ន្ធមានចីរភាព និងប្រសិទ្ធភាព និង៣-លើការពង្រីក និងបែងចែកដីធ្លីក្នុងក្របខណ្ឌសម្បទានដីសង្គមកិច្ចសម្រាប់ការអភិវឌ្ឍមូលដ្ឋាន និងសម្រាប់គោលដៅកំណែទម្រង់កងកម្លាំងប្រដាប់អាវុធ៕  |
| សង្កាត់ព្រែកលៀបនាំអំណោយឧបត្ថម្ភដល់គ្រួសាររងគ្រោះដោយអគ្គីភ័យ Posted: 04 Mar 2011 01:37 AM PST  រាជធានីភ្នំពេញ ៖ មន្ត្រី រាជការសង្កាត់ព្រែកលៀបដឹកនាំដោយលោកព្រាប មុនី ជាចៅសង្កាត់កាលពីរសៀលថ្ងៃទី៣ ខែមីនា បាននាំអំណោយមួយចំនួនទៅឧបត្ថម្ភដល់ប្រជាពលរដ្ឋមួយគ្រួសាររស់នៅភូមិបាក់ខែង ដែលរងគ្រោះដោយអគ្គីភ័យកាលពីវេលាយប់ថ្ងៃទី២៧ ខែកុម្ភៈ ។ អំណោយរួមមានអង្ករចំនួន៥០គីឡូក្រាម កន្ទេល២ មុង២ ភួយ២ ធុងទឹក១ ទឹកត្រីចំនួន៤ដប ទឹកសីុអីុវ៤ដប ចានបាយចំនួន៦ កាធុនចំនួន៣ ឆ្នាំងបាយ២ ខ្ទះ១ ជ្រញ់១ វែកឆា វែកសម្ល ស្លាបព្រាមួយចំនួន និងប្រាក់ចំនួន១០ម៉ឺនរៀល។ លោកព្រាប មុនី ចៅសង្កាត់ព្រែកលៀបបានសំដែងការសោកស្តាយ និងចូលរួមរំលែកទុក្ខគ្រួសារជនរងគ្រោះដែលត្រូវភ្លើងឆាបឆេះលំនៅឋាន។ អំណោយទាំងនេះតិចតួចទេ តែអាចជួយសំរួលដល់ការលំបាកដល់គ្រួសារជនរងគ្រោះដែលគ្មាននៅសល់អ្វីឡើយ។ នេះជាអំណោយបន្ទាន់របស់សង្កាត់សំរាប់ជួយដល់ជនរងគ្រោះ។ លោកព្រាប មុន្នី បានផ្តាំផ្ញើដល់ប្រជាពលរដ្ឋថា រដូវនេះជារដូវប្រាំងត្រូវប្រុងប្រយ័ត្នកុំដុតភ្លើងទៀនធូបទុកចោលវាអាចបង្កឱ្យកើតមានអគ្គីភ័យ។ លោកបានធានាជួយធ្វើឯកសារអត្រានុកូលដ្ឋានជូនដល់គ្រួសារជនរងគ្រោះ ព្រមទាំងសន្យាជួយស៊ីម៉ង់ត៍ចំនួន១តោននៅពេលកសាងលំនៅឋានឡើងវិញ។ កាលពីវេលាម៉ោង១១យប់ ថ្ងៃទី២៧ ខែកុម្ភៈ ឆ្នាំ២០១១ លំនៅឋានប្រជាពលរដ្ឋ១ខ្នងធ្វើអំពីឈើប្រក់ស័ង្កសីមានទំហំ៥ម៉ែត្រគុណ៧ម៉ែត្រស្ថិតនៅភូមិបាក់ខែង សង្កាត់ព្រែកលៀប ត្រូវភ្លើងឆេះអស់គ្មានសល់នៅពេលម្ចាស់ឈ្មោះសុខ គឹមស៊ា ភេទប្រុស អាយុ៣៣ឆ្នាំ និងប្រពន្ធឈ្មោះចាន់ ឆវី អាយុ៣១ឆ្នាំ មានកូន៥នាក់ចាក់សោផ្ទះទុកចោលនាំគ្នាទៅលេងបុណ្យបញ្ចុះសីមានៅសង្កាត់កោះដាច់ ខណ្ឌឫស្សីកែវ។ អគ្គីភ័យនេះបណ្តាលមកពីទុស្សេខ្សែភ្លើង ៕  |
| សមត្ថកិច្ចប៉ូលិសឃាត់រថយន្តដឹកតំណាប់ដូងចំនួន២០០កេស Posted: 04 Mar 2011 01:31 AM PST   ខេត្តបន្ទាយមានជ័យ ៖ កាលពីវេលាម៉ោង១ និង២០នាទីរសៀល ថ្ងៃទី៣ មីនា កម្លាំងជំនាញការិយាល័យនគរបាលប្រឆាំងបទល្មើសសេដ្ឋកិច្ចខេត្តសហការជាមួយមន្ត្រីនគរបាលប្រឆាំងបទល្មើសសេដ្ឋកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានឃាត់រថយន្តមួយគ្រឿងម៉ាករ៉ៃណូ ពណ៌ស-ខៀវ ពាក់ស្លាកលេខកំពង់ចាម៣A១៦១៣ ចំណុះ៥តោន ផលិតនៅប្រទេសកូរ៉េ។ ការឃាត់រថយន្តនេះ នៅចំណុចផ្លូវបែកជាបួន(ភ្លើងស្តុប) លើផ្លូវជាតិលេខ៦ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ មន្ត្រីជំនាញឱ្យដឹងថា ក្រោយពេលឃាត់ និងត្រួតពិនិត្យ សមត្ថកិច្ចរកឃើញនៅលើរថយន្តមានដឹកតំណាប់ដូងម៉ាកញីប៊ិញផលិតនៅប្រទេសវៀតណាមចំនួន២០០កេសក្នុង១កេសស្មើនឹង៤០០ថង់តូច គ្មានកាលបរិច្ឆេទ និងគ្មានឯកសារអ្វីទាំងអស់ ដោយដាក់បង្កប់ជាមួយបន្លែចំនួន៥មុខទៀតមានមើមខ្ទឹមបារាំង មើមការ៉ុត ដំឡូងបារាំង ស្ពៃបូកគោ និងក្រូចឆ្មារសរុប៤០ការុង ទម្ងន់៣.០០០គីឡូក្រាម ។ បន្លែទាំងអស់នេះសុទ្ធសឹងនាំចូលពីប្រទេសវៀតណាម។ លោកឧត្តមសេនីយ៍ត្រីខេង ស៊ុម ស្នងការនគរបាលខេត្តមានប្រសាសន៍ថា ក្រោយពីរកឃើញតំណាប់ដូងចំនួន២០០កេសនេះ សមត្ថកិច្ចឃាត់រថយន្តនោះនាំទៅស្នងការដ្ឋាននគរបាលខេត្តដើម្បីបង្កើតក្រុមការងារត្រួតពិនិត្យរួមគ្នាមានមន្ត្រីកាំកុងត្រូលខេត្ត មន្ត្រីនគរបាលការិយាល័យប្រឆាំងបទល្មើសសេដ្ឋកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងមន្ត្រី នគរបាលប្រឆាំងបទល្មើសសេដ្ឋកិច្ចខេត្ត។ ជាមួយគ្នានេះ សមត្ថកិច្ចឃាត់ខ្លួនមនុស្សចំនួន២នាក់ ឈ្មោះកែវ សុវណ្ណៈ ភេទប្រុស អាយុ២៧ឆ្នាំ មានទីលំនៅក្នុងភូមិព្រែកមហាទេព សង្កាត់អូរចារ ក្រុងបាត់ដំបង ខេត្តបាត់ដំបងជាអ្នកទទួលខុសត្រូវលើការដឹកជញ្ជូនទំនិញ និងម្នាក់ទៀតជាអ្នកបើកបររថយន្តឈ្មោះស សឿ ភេទប្រុស អាយុ២៧ឆ្នាំ មានទីលំនៅក្នុងភូមិស្រងែ ឃុំបល្ល័ង្ក ស្រុកបារាយ ខេត្តកំពង់ធំ ដើម្បីសាកសួរ។ លោកស្នងការបន្តទៀតថា ចំពោះបន្លែទាំង៥មុខស្មើ៣.០០០គីឡូក្រាមត្រូវបានប្រគល់ជូនម្ចាស់ដើមវិញ ដោយឡែកតំណាប់ដូងទាំង២០០កេស និងរថយន្តរក្សាទុកនៅស្នងការដ្ឋាននគរបាលខេត្ត ៕  |
| ក្រសួងព័ត៌មានផ្សព្វផ្សាយអនុក្រឹត្យហាមឃាត់ការផ្សាយពាណិជ្ជកម្មបារី Posted: 04 Mar 2011 01:29 AM PST  រាជធានីភ្នំពេញ ៖ ក្រសួងព័ត៌មាន បានសហការជាមួយអង្គការសុខភាពពិភពលោក និងអង្គការចលនាដើម្បីសុខភាពកម្ពុជា រៀបចំបើកសិក្ខាសាលាផ្សព្វផ្សាយអនុក្រឹត្យស្តីពីវិធានការហាមឃាត់ចំពោះការផ្សាយពាណិជ្ជកម្មផលិតផលថ្នាំជក់នៅទីស្តីការក្រសួង កាលពីថ្ងៃទី៤ មីនា ក្រោមអធិបតីភាពលោកថាច់ ផែន រដ្ឋលេខាធិការក្រសួងព័ត៌មាន ។ អនុក្រឹត្យនេះមាន៦ជំពូក និង១៣មាត្រា ដែលមាត្រាទី៤ បានចែងថា ក្រសួងសុខាភិបាលជាស្ថាប័នមានសមត្ថកិច្ចក្នុងការណែនាំ និងត្រួតពិនិត្យការផ្សាយពាណិជ្ជកម្មផលិតផលថ្នាំជក់នៅក្នុងប្រទេសកម្ពុជា ក្នុងករណីចាំបាច់ក្រសួងនេះ ត្រូវសហការជាមួយស្ថាប័នពាក់ព័ន្ធ ដែលមានសមត្ថកិច្ច ។ លោកថាច់ ផែន បានថ្លែងថា ផលិតផលថ្នាំជក់បានធ្វើឱ្យមានអ្នកស្លាប់៥,៤លាននាក់ ក្នុងមួយឆ្នាំៗនៅលើពិភពលោក តាមរយៈជំងឺផ្សេងៗដែលកើតឡើងចំពោះអ្នកជក់បារី និងអ្នកដែលស្រូបផ្សែងបារីពីគេ ជាពិសេសស្ត្រី និងកុមារ ។ ថ្នាំជក់ មិនត្រឹមតែបង្កមហន្តរាយចំពោះសុខភាពតែប៉ុណ្ណោះទេ ប៉ុន្តែថែមទាំងបានធ្វើឱ្យខាតបង់សេដ្ឋកិច្ចជាតិ និងថវិកាគ្រួសារទៀតផង ។ ជាក់ស្តែង ក្នុង១ឆ្នាំៗប្រជាពលរដ្ឋកម្ពុជា បានចំណាយថវិកាគ្រួសារ៦៩,៥លានដុល្លារ ទៅលើការទិញបារីជក់ ។ ប្រឈមមុខនឹងមហន្តរាយនេះ ព្រះរាជាណាចក្រកម្ពុជា រួមជាមួយប្រទេសចំនួន១៦៨នៅលើសាកលលោក បានផ្តល់សច្ចាប័នចូលជាសមាជិកនៃអនុសញ្ញាស្តីពីការត្រួតពិនិត្យថ្នាំជក់ តាំងពីថ្ងៃទី១៥ វិច្ឆិកា ឆ្នាំ២០០៥ ។ ដោយការចូលជាសមាជិកនេះ ភាគីនីមួយៗត្រូវមានកាតព្វកិច្ចក្រោមមាត្រា១៣ ហាមឃាត់ទាំងស្រុងនូវរាល់ទំរង់នៃការផ្សាយពាណិជ្ជកម្ម ការផ្សព្វផ្សាយលក់ផលិតផលថ្នាំជក់ និងការឧបត្ថម្ភកម្មវិធីរបស់ក្រុមហ៊ុនថ្នាំជក់ ឱ្យបានក្នុងរយៈពេល៥ឆ្នាំ បន្ទាប់ពីប្រទេសនោះ ចូលជាសមាជិកអនុសញ្ញា។ ការអនុម័តឱ្យមានវិធានការហាមឃាត់ការផ្សាយពាណិជ្ជកម្មផលិតផលថ្នាំជក់គ្រប់រូបភាពរបស់ព្រះរាជាណាចក្រកម្ពុជា គឺជាការឆ្លើយតបទៅនឹងកាតព្វកិច្ចក្រោមមាត្រា១៣នៃអនុសញ្ញាស្តីពីការត្រួតពិនិត្យថ្នាំជក់ ដើម្បីបង្ហាញសាកលលោកទាំងមូលថា កម្ពុជារួមចំណែកការពារមនុស្សជំនាន់ក្រោយពីមហន្តរាយនៃការប្រើប្រាស់ថ្នាំជក់ ដោយឡែកការពារកុមារ យុវជន និងស្ត្រី ពីអន្ទាក់ទីផ្សារដែលទាក់ទាញឱ្យធ្លាក់ទៅក្នុងការញៀននីកូទីនក្នុងផលិតផលថ្នាំជក់អស់មួយជីវិត ។ អនុក្រឹត្យស្តីពីវិធានការហាមឃាត់ចំពោះការផ្សាយពាណិជ្ជកម្មផលិតផលថ្នាំជក់ បានហាមឃាត់គ្រប់រូបភាព និងគ្រប់មធ្យោបាយនៃការផ្សាយពាណិជ្ជកម្មផលិតផលថ្នាំជក់ និងទោសទណ្ឌក្នុងករណីបំពានបានដាក់បន្ទុកមិនត្រឹមតែចំពោះក្រុមហ៊ុនថ្នាក់ជក់ប៉ុណ្ណោះទេ ប៉ុន្តែចំពោះស្ថាប័នដែលពាក់ព័ន្ធទៀតផង ៕  |
| កើតជំងឺហើមក្បាលជង្គង់រកគ្រូបុរាណផ្លុំស្តោះ៦ខែមិនស្រកទើបនាំមកពេទ្យ Posted: 04 Mar 2011 01:22 AM PST   រាជធានីភ្នំពេញ ៖ ការហើមក្បាលជង្គង់បន្តិចបន្តួចគួរតែមកកាន់មន្ទីរពេទ្យ តែដោយសារតែជីវភាពខ្វះខាតគ្មានលទ្ធភាពមកព្យាបាលនៅមន្ទីរពេទ្យក៏រកគ្រូបុរាណមកផ្លុំស្តោះអស់រយៈពេល៦ខែ ស្រាប់តែហើមកាន់តែធំតាំងពីក្រលៀងរហូតដល់ចុងជើងដើរមិនរួច នៅដេកតែមួយកន្លែង សូម្បីផ្អៀងខ្លួន ឬងើបទាល់តែមានអ្នកជួយលើកជើងពីរនាក់ ទើបអាចងើបរួច ។ យុវជនកើតជំងឺចម្លែកនេះមានឈ្មោះជឺង កប អាយុ១៩ឆ្នាំ មានស្រុកកំណើតនៅភូមិបឹងសាឡាងខាងត្បូង ឃុំបឹងសាឡាងខាងត្បូង ស្រុកកំពង់ត្រាច ខេត្តកំពត ។ តាមការរៀបរាប់ពីស្ត្រីជាម្តាយឈ្មោះកង ពៅ អាយុ៤០ឆ្នាំ បានឱ្យដឹងថា គាត់មានកូន៥នាក់ ស្រី៣នាក់ ប្រុស២នាក់ ចំណែកប្តីរបស់គាត់ធ្វើស្រែពេលទំនេរទៅស៊ីឈ្នួលអូសត្រី អូសបង្គានៅខេត្តព្រះសីហនុ ។ ដោយសារតែជីវភាពក្រីក្រ គាត់ក៏សម្រេចចិត្តឱ្យកូនច្បងឈ្មោះជឺង កប ឈប់រៀនទៅស៊ីឈ្នួលអូសត្រី អូសបង្គាជាមួយឪពុកកាលពីឆ្នាំ២០០៩។ ទាក់ទិននឹងការហើមជើងនេះត្រូវស្ត្រីជាម្តាយនិយាយថា ពេលកូនទៅស៊ីឈ្នួលនេសាទនោះ ថ្ងៃមួយកូនគាត់ឈឺក្បាលជង្គង់ខាងឆ្វេង ក៏ទៅពេទ្យផ្សំថ្នាំលេប ហើយចុះទូកទៅអូសត្រីទាំងជើងឈឺ ។ ដោយសារជើងនៅតែឈឺមិនធូរស្រាល រយៈពេលជាងមួយខែធ្វើការមិនកើតក៏ត្រឡប់មកផ្ទះវិញ ។ ខណៈកូនមកដល់ផ្ទះ គាត់គ្មានប្រាក់សម្រាប់នាំកូនទៅមន្ទីរពេទ្យទេ ក៏ហៅគ្រូបុរាណមកមើលនៅផ្ទះហើយគ្រូនោះប្រាប់ថា កូនគាត់កើតជំងឺក្បាលដំរី ព្រោះជើងរបស់កូនគាត់ហើមរាងដូចដំរី ។ ស្ត្រីជាម្តាយឱ្យដឹងទៀតថា ក្នុងមួយថ្ងៃគ្រូនោះមកផ្លុំស្តោះព្រឹកម្តងល្ងាចម្តង និងឱ្យថ្នាំឫសឈើដាំទឹកផឹករាល់ថ្ងៃ ចំណែកស្ថានភាពជំងឺកូនគាត់ពីមួយថ្ងៃទៅមួយថ្ងៃចេះតែដុនដាបទៅ ដោយជើងកាន់តែហើមធំឡើងរហូតដើរមិនរួច សូម្បីតែកំរើកក៏មិនកើតដែរ ប៉ុន្តែបែរជាគ្រូបុរាណនេះប្រាប់ថា ជំងឺនេះមិនអីទេ កុំភ័យព្រួយអីពេលផឹកថ្នាំជាសះផ្នែកខាងក្នុងហើយជើងនឹងស្វិតតូចវិញធម្មតា ។ ក្នុងការព្យាបាលជើងកូន គាត់បានលក់គោអស់មួយនឹម តែមិនបានធូរស្រាលទេ រឹតតែហើមធំឡើងរហូតមានខ្ទុះរលួយសាច់ហូរទឹករងៃចេញមកនៅត្រង់កំភួនជើងទៀត ទើបគាត់និងប្តីសម្រេចចិត្តហៅបងប្អូនគិតគូរយកកូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២៨ កុម្ភៈ កន្លងមកនេះ ។ ស្ត្រីជាម្តាយបាននិយាយថា គាត់គ្មានលទ្ធ ភាពយកកូនទៅព្យាបាលនៅមន្ទីរពេទ្យទេ តែបានបងជីដូនមួយជួយចេញថ្លៃរថយន្តដឹកពីកំពតមកអស់២៤ម៉ឺនរៀល ហើយការហូបចុកនៅក្នុងមន្ទីរពេទ្យក៏គាត់គ្មានប្រាក់ដែរ បានបងប្អូននៅស្រុកមកជាមួយឱ្យបន្តិចបន្តួច និងអ្នកភូមិដែលមានកូនមកធ្វើការនៅភ្នំពេញ បានផ្តាំឱ្យកូនមកជួយមើល និងទិញបាយទឹកយកមកឱ្យ ហើយបានគ្រូពេទ្យម្នាក់ឱ្យប្រាក់១៥.០០០រៀល ដល់រូបគាត់ផងដែរ។ ខណៈមកដល់មន្ទីរពេទ្យគ្រូពេទ្យប្រាប់ថា ជើងរបស់កូនគាត់មានតែកាត់ចោលទេ ព្រោះហើមតាំងពីក្រលៀនរហូតដល់ចុងជើងហើយ ។ នៅថ្ងៃទី៤ មីនា កូនរបស់គាត់ត្រូវវះកាត់ជើង ប៉ុន្តែគ្រូពេទ្យឱ្យបញ្ចូលឈាម៥ប្លោក ឈាម១ប្លោក តម្លៃ៥៥ដុល្លារ គាត់គ្មានប្រាក់សម្រាប់ទិញឈាមបញ្ចូលទេ បងប្អូនគាត់បានរៃអង្គាសគ្នាទិញបាន២ប្លោកហើយនៅខ្វះ៣ប្លោកទៀត ។ ស្ត្រីជាម្តាយបានបញ្ជាក់ថា កាលពីមិនទាន់ធ្លាយខ្ទុះចេញមកនោះ ជើងរបស់កូនគាត់ធំជាងនេះទៅទៀត ។ ស្ត្រីជាម្តាយបានអំពាវនាវរកការជួយឧបត្ថម្ភពីសប្បុរសជន សូមជួយសង្គ្រោះជីវិតកូនគាត់ផង ព្រោះគ្រួសារគាត់ក្រីក្រគ្មានលទ្ធភាពទិញថ្នាំព្យាបាលនោះទេ ។ នេះជាមេរៀនមួយសម្រាប់ប្រជាពលរដ្ឋ មិនត្រូវផ្អែកទៅលើភាពក្រីក្ររបស់ខ្លួនរហូតខ្លាចពេទ្យ ហើយទុកឱ្យជំងឺធ្ងន់ធ្ងរទើបរត់មករកពេទ្យបែបនេះ មិនមែនជាការល្អឡើយ ៕  |
| កងពលតូចថ្មើរជើងទី១ថៃបាត់អាវុធយ៉ាងច្រើន Posted: 04 Mar 2011 01:18 AM PST កាសែតបាងកកប៉ុស្តិ៍នៅថ្ងៃទី៤ មីនា ផ្សាយឱ្យដឹងថា អាវុធក្នុងចំនួនដ៏ច្រើនមានដូចជាកាំ ភ្លើងប្រភេទ M16 ចំនួន១៣០ដើម និងកាំភ្លើងយន្តធុនស្រាលជាច្រើនដើមទៀត បានបាត់ពីកន្លែងផ្ទុកអាវុធនៃកងពលតូចថ្មើរជើងទី១ នៅក្នុងស្រុក Pran Buri ខេត្ត Prachuap Khiri Khan ប្រទេសថៃ ។ ការបាត់អាវុធក្នុងចំនួនដ៏ច្រើននេះត្រូវបានដឹងដោយមេបញ្ជាការកងពលតូចទ័ពថ្មើរជើងទី១ លោក Manorot Suthisam-deang ។ លោក Manorot ឱ្យដឹងថា កាំភ្លើងប្រភេទ M16 ចំនួន១៣០ដើម និងកាំភ្លើងផ្សេងៗទៀតជាង១០០ដើម ក្នុងនោះមានកាំភ្លើងយន្តធុនស្រាលផលិតនៅប្រទេសបែលហ្ស៊ិកបានបាត់ ។ ឧត្តមសេនីយ៍ប្រាយុទ្ធ ចាន់អូចា ប្រមុខយោធាថៃ ត្រូវបានជម្រាបអំពីការបាត់អាវុធដ៏ច្រើននេះ នៅព្រឹកថ្ងៃទី៤ មីនា ហើយលោកបានបញ្ជាឱ្យបើកការស៊ើបអង្កេតភ្លាមៗក្រោយពីទទួលបានព័ត៌មាននេះ ៕  |
| ក្រុមអាវក្រហមគ្រោងប្រមូលផ្តុំគ្នាជាថ្មីនៅថ្ងៃទី១២ មីនា Posted: 04 Mar 2011 01:12 AM PST  យោងតាមប្រភពព័ត៌មានពីកាសែតថៃឱ្យដឹងថា ក្រុមរណសិរ្សបង្រួបបង្រួមជាតិ ដើម្បីលទ្ធិប្រជាធិបតេយ្យប្រឆាំងភាពផ្តាច់ការហៅក្រុមអាវក្រហម ប្រកាសនៅថ្ងៃទី៤ មីនា ថា ពួកគេនឹងប្រមូលផ្តុំគ្នាធ្វើបាតុកម្មជាថ្មីទៀត នៅថ្ងៃទី១២ មីនា ខាងមុខនេះ ហើយការប្រមូលផ្តុំនេះនឹងចូលរួមដោយមេដឹកនាំរបស់ពួកគេ៧នាក់ ដែលទើបត្រូវដោះលែងពីការឃុំខ្លួនផងដែរ ។ លោកចាទុផន ព្រំផាន ជាមេដឹកនាំក្រុមអាវក្រហមសំខាន់មួយរូប ថ្លែងថា ការប្រមូលផ្តុំនេះនឹងធ្វើឡើងដោយសន្តិវិធីមិនមានការប្រើប្រាស់អាវុធឡើយ ។ ប្រភពព័ត៌មានដដែលឱ្យដឹងទៀតថា ការប្រមូលផ្តុំនេះនឹងធ្វើឡើងនៅវិមានប្រជាធិបតេយ្យដើម្បីទាមទារយុត្តិធម៌សម្រាប់ជនរងគ្រោះក្នុងការបង្ក្រាបយ៉ាងសាហាវរបស់រដ្ឋាភិបាលលើក្រុមបាតុករក្នុងអំឡុងពេលនៃការធ្វើបាតុកម្មប្រឆាំងរដ្ឋាភិបាលលោកអាប់ភីស៊ីត កាលពីខែមីនា និងខែមេសា ឆ្នាំ២០១០ កន្លងមក ។ ពុំមានប្រភពច្បាស់ការណ៍ណាមួយឱ្យដឹងថា ការប្រមូលផ្តុំនោះនឹងមានមនុស្សប៉ុន្មាននាក់ចូលរួមនោះទេ ។ ជាមួយគ្នានេះ ទាក់ទិនទៅនឹងការគ្រោងប្រមូលផ្តុំរបស់ក្រុមអាវក្រហមនោះ ប្រភពព័ត៌មានពីកាសែតបាងកកប៉ុស្តិ៍ឱ្យដឹងថា ប៉ូលិស៤.០៥០នាក់ នឹងត្រូវដាក់ពង្រាយដើម្បីធានាសន្តិសុខ សុវត្ថិភាព និងសណ្តាប់ធ្នាប់ក្នុងក្រុងបាងកក ក្នុងពេលនៃការប្រមូលផ្តុំរបស់ក្រុមអាវក្រហម ៕  |
| ក្រុមអាវលឿងមានផែនការប្រមូលហត្ថលេខាប្តឹងទម្លាក់អាប់ភីស៊ីត ចេញពីតំណែង Posted: 04 Mar 2011 01:09 AM PST  គេហទំព័រ MCOT របស់ថៃផ្សាយជាភាសាអង់គ្លេសនៅថ្ងៃទី៤ មីនា ឱ្យដឹងថា ក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យហៅក្រុមអាវលឿងពេលនេះមានផែនការប្រមូលហត្ថលេខាឱ្យបាន២០.០០០ ក្នុងកិច្ចខិតខំប្រឹងប្រែងរបស់ពួកគេ ដើម្បីប្តឹងទម្លាក់លោកនាយករដ្ឋមន្ត្រីអាប់ភីស៊ីត ចេញពីតំណែងដោយក្រុមនេះចោទប្រកាន់ថា លោកអាប់ភីស៊ីត មិនបានបំពេញកាតព្វកិច្ចរបស់ខ្លួនធ្វើឱ្យថៃបាត់បង់ទឹកដីទៅកម្ពុជា ។ លោក Prapan Koonmee ជាសមាជិកសំខាន់មួយរូបរបស់ក្រុមអាវលឿងនិយាយថា ក្រុមរបស់ខ្លួននឹងប្រើប្រាស់មធ្យោបាយស្របច្បាប់ដាក់សម្ពាធលើរដ្ឋាភិបាលលោកអាប់ភីស៊ីត ដោយប្រមូលហត្ថលេខាឱ្យបាន២០.០០០ដែលតម្រូវដោយរដ្ឋធម្មនុញ្ញ ។ Prapan និយាយថា លោកនាយករដ្ឋមន្ត្រីអាប់ភីស៊ីត នឹងត្រូវប្តឹងទម្លាក់ចេញពីតំណែងពីបទមិនបំពេញកាតព្វកិច្ចរបស់ខ្លួន ។ លោកចម្លងស្រ៊ីមឿង មេដឹកនាំចលនាអាវលឿងនិយាយថា ឥឡូវនេះក្រុមរបស់ខ្លួននឹងបង្កើនយុទ្ធនាការ ដើម្បីជូនដំណឹងដល់ពលរដ្ឋថៃថា ប្រសិនបើថៃបាត់បង់ទឹកដីមានជម្លោះ៤,៦គីឡូម៉ែត្រការ៉េ ទៅកម្ពុជា ថៃនឹងបាត់បង់ដីទំហំ១៨០.០០០រ៉ៃ ទៀតទៅកម្ពុជា ៕  |
| ទទួលទានផ្លែប៉េងប៉ោះជួយកាត់បន្ថយអត្រាជំងឺបេះដូងនិងពុកឆ្អឹង Posted: 04 Mar 2011 01:03 AM PST  យល់ដឹង ៖ បណ្តាអ្នកវិទ្យាសាស្រ្តបានអះអាងថាការទទួលទានផ្លែប៉េងប៉ោះអាចជួយកាត់បន្ថយអត្រាប្រឈមនឹងជំងឺមហារីក ជំងឺបេះដូងនិងការពុកឆ្អឹង។ មិនត្រឹមតែប៉ុណ្ណោះ ផ្លែប៉េងប៉ោះដែលចំអិនរួចឬក៏កែឆ្នៃទុកបានយូររឹតតែមានគុណប្រយោជន៍ល្អជាងទទួលទានឆៅទៅទៀត។ អ្នកស្រាវជ្រាវរបស់អាមេរិកបានរកឃើញថាបន្លែដែលសម្បូរទៅដោយទឹកដូចជាផ្លែប៉េងប៉ោះនេះជាប្រភពដ៏សំខាន់បំផុតរបស់របបអាហារព្រោះមានប្រឆាំងអុកស៊ីដកម្មដ៏ខ្លាំងបំផុតឈ្មោះលីកូប៉ែន(Lycopene)។ ក្រុមអ្នកវិទ្យាសាស្រ្តនៅមជ្ឈមណ្ឌលអាហារនិងសុវត្ថិភាពជាតិក្នុងរដ្ឋអុីលីណយសហរដ្ឋអាមេរិកបាននិយាយថា អាហារប៉េងប៉ោះផ្ទុកទៅដោយយន្តការការពារដែលអាចជួយទប់ស្កាត់ការរលាកនិងដុំឈាមកក។ វេជ្ជបណ្ឌិតប្រ៊ីដ បឺតុននិងវេជ្ជបណ្ឌិតគ្រីស្ទីន រេម័រដែលជាប្រភពដើមនៃការអះអាងបាននិយាយថា៖«ការលេចចេញឥទ្ធិពលវិទ្យាសាស្រ្តអំពីផ្លែប៉េងប៉ោះ និងផលិតផលកែច្នៃពីប៉េងប៉ោះអាចជាយុទ្ធសាស្រ្តដ៏សាមញ្ញ និងមានប្រសិទ្ធិភាពក្នុងការជួយជំរុញឲ្យមនុស្សបង្កើនការទទួលទានបន្លែ ដែលជាកត្តានាំទៅរកការកែលំអការទទួលទានដើម្បីសុខភាពល្អប្រសើរឡើង។ ការស្រាវជ្រាវលើកនេះបានគូសបញ្ជាក់ពីទំនាក់ទំនងរវាងការទទួលទានផ្លែប៉េងប៉ោះនិងការកាត់បន្ថយជំងឺមហារីក ជំងឺបេះដូង រួមនិងជំងឺដទៃទៀត» ។ វេជ្ជបណ្ឌិតទាំងពីររូបខាងលើយល់ថា លទ្ធផលនៃការរកឃើញលើកនេះ គឺជាភស្តុតាងដែលបានលើកឡើងពីលទ្ធភាពវិលមករកការទទួលទានប៉េងប៉ោះដើម្បីទទួលបានផលប្រយោជន៍អាហារបំប៉នរាងកាយ៕  |
| ដេក១ស្រឡេតវេលាថ្ងៃត្រង់ជួយកាត់បន្ថយភាពតានតឹង Posted: 04 Mar 2011 12:58 AM PST យល់ដឹង ៖ យោងតាមអ្នកស្រាវជ្រាវថា ការដេកលក់១ស្រឡេតនៅពេលថ្ងៃត្រង់អាចជួយឲ្យយើងមានអារម្មណ៍ស្រស់ថ្លាមួយកម្រិត កាត់បន្ថយបាននូវភាពតប់ប្រមល់នៅកន្លែងធ្វើការ ។ ការសិក្សាមួយបាននិយាយថា អ្នកធ្វើការដែលដេកបាន៤៥នាទីនៅពេលថ្ងៃ សម្ពាធឈាមចុះទាបជាងអ្នកដែលមិនបានដេកសោះ។ ម៉ោងធ្វើការយូរ ការងារផ្លាស់វេនបង្កើននូវភាពតប់ប្រមល់ ហើយការមើលទូរទស្សន៍ដល់យប់ជ្រៅក៏មានការប៉ះពាល់ដែរ ជាពិសេសដល់ដំណេកពេលយប់។ វេជ្ជបណ្ឌិតរីយ៉ាន ប្រ៊ីនដលនិងវេជ្ជបណ្ឌិតសារ៉ា ខុនឃ្លីន មកពីមហាវិទ្យាល័យAlleghenyរដ្ឋផេនស៊ីលវេនៀ សហរដ្ឋអាមេរិក បានធ្វើការពិសោធទៅលើក្រុមនិស្សិត៨៥នាក់ដោយបែងចែកជា២ក្រុម។ ១ក្រុមតម្រូវឲ្យដេកពេលថ្ងៃនិង១ក្រុមទៀតមិនដេកសោះ ។ ជាលទ្ធផលគេរកឃើញថា ក្រុមនិស្សិតដេកពេលថ្ងៃហាក់ទទួលបានលទ្ធផលនៃការផលិតសាជាថ្មីប្រៀបធៀបជាមួយក្រុមដែលមិនដេក។ បើទោះបីជាសម្ពាធឈាមនិងជីពចររបស់និស្សិតទាំងពីរក្រុមបានកើនឡើងខុសពីពេលមុននៅក្នុងអំឡុងការធ្វើពិសោធន៍ក៏ដោយ ប៉ុន្តែអ្នកដែលបានដេកពេលថ្ងៃមានសម្ពាធឈាមជាមធ្យមទាបជាងអ្នកដែលមិនបានដេក។ ដូចនេះតាមលទ្ធផលនៃការធ្វើពិសោធន៍ខាងដើមបានបង្ហាញថា ការដេកពេលថ្ងៃចន្លោះពី៤៥នាទីទៅ៦០នាទីពិតជាអាចជួយសម្រួលដល់សម្ពាធឈាម។ ទោះជាយ៉ាងនេះក្តី បណ្តាក្រុមស្រាវជ្រាវបានអះអាងថា ការស្រាវជ្រាវបន្ថែមទៀតចាំបាច់ត្រូវតែធ្វើគឺធ្វើដើម្បីរកឲ្យឃើញយន្តការនៃទំនាក់ទំនងគ្នារវាងការដេកពេលថ្ងៃនិងសុខភាពសរសៃឈាមបេះដូង ៕  |
| ដើរហាត់ប្រាណ៣០នាទីរាល់ថ្ងៃជួយការពារមហារីកពោះវៀន Posted: 04 Mar 2011 12:49 AM PST យល់ដឹង ៖ ការស្រាវជ្រាវបានបង្ហាញថា ការធ្វើលំហាត់ប្រាណទៀតទាត់អាចជួយកាត់បន្ថយជាសំខាន់នូវអត្រាប្រឈមនឹងជំងឺមហារីកពោះវៀន ។ គ្រាន់តែធ្វើសកម្មភាពដូចជាការដើរឲ្យបាន៣០នាទីក្នុង១ថ្ងៃ នឹងកាត់បន្ថយនូវឱកាសនៃការលូតលាស់របស់Polyps(ការដុះសាច់ខុសពីប្រក្រតីដែលក្រោយមកអាចក្លាយជាមហារីក)បាន១/៣។ បណ្តាក្រុមអ្នកវិទ្យាសាស្រ្តមកពីមហាវិទ្យាល័យវេជ្ជសាស្រ្តរបស់សាកលវិទ្យាល័យវ៉ាស៊ីនតោនសហរដ្ឋអាមេរិក បានរកឃើញថា អ្នកដែលហាត់ប្រាណជាប្រចាំនិងទៀងទាត់ពេល ប្រឈមនឹងការរីកធំរបស់Polyps(ការដុះសាច់ខុសពីប្រក្រតី)មិនដល់៣០%។ អ្នកហាត់ប្រាណទៀងទាត់ អត្រានៃការលូតលាស់Polypsមានមិនដល់១៦%នោះទេ ។ ការសិក្សាលើកនេះផងដែរដែលចុះផ្សាយនៅក្នុងព្រឹត្តិបត្រBritish Journal of Cancerក៏បានពិនិត្យមើលទិន្នន័យនៃការបោះពុម្ពផ្សាយពីលើកមុនចំនួន២០ផងដែរ។ វេជ្ជបណ្ឌិតខាលីន វ៉ូលីនអ្នកដឹកនាំការស្រាវជ្រាវបាននិយាយថា៖«ការធ្វើលំហាត់ប្រាណផ្តល់អត្ថប្រយោជន៍ជាច្រើនយ៉ាងរួមមានជួយបង្កើនកម្លាំងប្រព័ន្ធភាពស៊ាំ បន្ថយការរលាកនៅក្នុងពោះវៀន ព្រមទាំងបន្ថយកម្រិតអាំងស៊ុយលីនផងដែរ។ ជំងឺមហារីកពោះវៀនជាប្រភេទជំងឺសាមញ្ញលំដាប់ទី៣ តែក្នុងចំណោមស្រ្តីវិញគឺស្ថិតនៅលំដាប់ទី២ ។ វេជ្ជបណ្ឌិតខាលីន វ៉ូលីន បានបញ្ជាក់ថា៖«យើងបានដឹងជាយូរមកហើយថា បែបបទនៃការរស់នៅដែលពោរពេញទៅដោយសកម្មភាពពិតជាអាចប្រឆាំងនឹងជំងឺមហារីកបាន តែការសិក្សានេះគ្រាន់តែជាលើកដំបូងប៉ុណ្ណោះ ។ យើងសង្ឃឹមថា លទ្ធផលទាំងនេះនឹងលើកទឹកចិត្តមនុស្សកាន់តែច្រើនឡើងចូលរួមទទួលយកអត្ថប្រយោជន៍ពីការហាត់ប្រាណជាប្រចាំ»៕  |
| ប៉ូលិសសេដ្ឋកិច្ចជួបកំណប់ឈើគ្រញូង Posted: 04 Mar 2011 12:47 AM PST  ខេត្តស្វាយរៀង ៖ ឈើគ្រញូងប្រមាណជាង៣ម៉ែត្រគូប ដែលក្រុមជនល្មើសយកទៅកប់ក្នុងទឹកស្រះ និងក្នុងពំនូកលាមកក្របីលាក់ទុកដើម្បីងាយស្រួលឆក់ឱកាសយកទៅលក់នៅប្រទេសវៀតណាម ត្រូវបានប៉ូលិសសេដ្ឋកិច្ចខេត្តប្រទះឃើញ ។ ទាក់ទិនករណីខាងលើលោកវរសេនីយ៍ត្រី ចាន់ សូត្រ នាយការិយាល័យនគរបាលសេដ្ឋកិច្ចនៃស្នងការដ្ឋាននគរបាលខេត្ត បានប្រាប់កោះសន្តិភាពថា កាលពីថ្ងៃទី៣ មីនា ឆ្នាំ២០១១ វេលាម៉ោង៨ព្រឹក លោកវរសេនីយ៍ឯក ហែម សាបាន ស្នងការរងនគរបាលខេត្តបានដឹកនាំកម្លាំងចុះទៅស្រាវជ្រាវរកបទល្មើសនៅភូមិមនោរម្យ ឃុំមនោរម្យ ស្រុកស្វាយទាប បន្ទាប់ពីប្រជាពលរដ្ឋបានរាយការណ៍ថា មានក្រុមឈ្មួញទុច្ចរិតលួចនាំឈើគ្រញូងចេញទៅប្រទេសវៀតណាម ខុសច្បាប់។ ប៉ុន្តែដោយសារក្រុមសមត្ថកិច្ចនៅច្រករបៀងមានការយាមល្បាតតឹងរ៉ឹង ទើបក្រុមឈ្មួញបានយកឈើទាំងនោះទៅលាក់ទុកនៅក្នុងស្រះទឹកក្នុងភូមិដាច់ស្រយាលជិតព្រំដែន ។ ក្រោយពីទទួលបានព័ត៌មានភ្លាម លោកស្នងការបានដាក់បញ្ជាឱ្យចុះស្រាវជ្រាវ ក៏ប្រទះឃើញឈើគ្រញូងកប់ក្នុងទឹកស្រះ និងកប់ក្នុងពំនូកលាមកក្របីសរុបប្រមាណជាង៣ម៉ែត្រគូប គឺដុំឈើគ្រញូងមុខកាត់៤តឹក ៣តឹក ប្រវែង១,៥០ម៉ែត្រ ទៅ៣ម៉ែត្រ ចំនួន១៥កំណាត់ និងឈើខ្លីៗចំនួន២៤០កំណាត់។ ចំពោះម្ចាស់ផ្ទះដែលមានការលាក់ឈើគ្រញូងនេះពុំបានរស់នៅទីនោះទេ ហើយពួកគេមិនហ៊ានចេញមុខ ឬតវ៉ាឡើយ ។ ក្រុមសមត្ថកិច្ចក៏បានកសាងសំណុំរឿងបញ្ជូនឈើគ្រញូងទាំងអស់មករក្សាទុកនៅការិយាល័យនគរបាលសេដ្ឋកិច្ចនៃស្នងការដ្ឋាននគរបាលខេត្ត រួចឱ្យជំនាញមកពិនិត្យវាស់វែងឱ្យបានត្រឹមត្រូវជាក់លាក់ ដើម្បីចាត់ការបន្តតាមផ្លូវច្បាប់ ។ បើតាមប្រភពប្រជាពលរដ្ឋបានឱ្យដឹងដែរថា ឈ្មួញទុច្ចរិតបានដឹកឈើគ្រញូយកទៅលក់ឱ្យឈ្មួញវៀតណាមជាហូរហែស្ទើររាល់យប់ ពុំដែលមានសមត្ថកិច្ចណាបង្ក្រាប ឬចាប់បានឡើយ។ ហើយឈើទាំងនេះពួកឈ្មួញបានយកមកលាក់ស្តុកទុកឱ្យបានច្រើនទើបដឹកចេញ ដូច្នេះនៅមានកំណប់ឈើគ្រញូងច្រើនកន្លែងទៀតដែលឈ្មួញកំពុងកប់ទុករង់ចាំឱកាសល្អន្អាលនឹងដឹកចេញទៅលក់ឱ្យឈ្មួញនៅប្រទេសវៀតណាម៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
