Koh Santipheap Daily |
- ឈប់កាប់អុសលក់ដោយសារមេព្រៃពូកែចាប់ពេក ឡើងត្នោតធ្លាក់សន្លប់
- បេសកជនពិសេសអង្គការយូណេស្កូនឹងមកដល់កម្ពុជានារសៀលថ្ងៃនេះពិភាក្សាជាមួយក្រុមមន្ត្រី
- ក្រុមក្មេងស្ទាវប្រើប្រាស់ថ្នាំញៀនត្រូវនគរបាលប៉ុស្តិ៍ផ្សារថ្មីទី២ឃាត់ខ្លួន
- អំពើហិង្សាថ្មីៗនៅទុយនីស៊ីស្លាប់4នាក់និងរបួស12នាក់
- លោកអូបាម៉ា អំពាវនាវឱ្យលោកកាដាហ្វី ចុះចេញពីតំណែង
- ក្រុមប្រឹក្សាសន្តិសុខ អ.ស.ប អនុម័តទណ្ឌកម្មប្រឆាំងលីប៊ី
- ចិននឹងបញ្ជូនយន្តហោះ15គ្រឿង1ថ្ងៃទៅដឹកជនជាតិចិនចេញពីលីប៊ី
- ស្ត្រីជួញដូរគ្រឿងញៀន២នាក់ជាប់អន្ទាក់សមត្ថកិច្ចខេត្តកំពត
- យករថយន្តទៅចាក់ហ្គាស ឆ្លៀតជក់បារីសង្ហាមិនដឹងខ្យល់អី ផ្ទុះឆេះគេឯង
- បាញ់១គ្រាប់ប្លន់យកម៉ូតូម៉ាកស្កុបភីស៊េរីថ្មីមួយគ្រឿងវេលាម៉ោងរំលងអធ្រាត្រ
- សមយុទ្ធយោធារួមគ្នាកម្ពុជា-អាមេរិកនៅលើទីតាំង៣កន្លែងចាប់ផ្តើមថ្ងៃនេះក្រោមប្រធានបទសង្គ្រោះបន្ទាន់
- កម្ពុជាគោរពបទឈប់បាញ់ តំណាងយូណេស្កូនឹងមកដល់កម្ពុជាថ្ងៃ២៧កុម្ភៈបន្ទាប់ពីជួបអាប់ភីស៊ីតនៅបាងកក
- សមត្ថកិច្ចចាប់ធុងដាក់ត្រីរបស់អាជីវករកណ្តាលយប់ដាក់សាលាខណ្ឌឫស្សីកែវ
- វត្តកែវសិក្ខាគិរីស្វារៈក្រោយការបំផ្លាញពីភាគីសៀម
| ឈប់កាប់អុសលក់ដោយសារមេព្រៃពូកែចាប់ពេក ឡើងត្នោតធ្លាក់សន្លប់ Posted: 26 Feb 2011 08:17 PM PST  រាជធានីភ្នំពេញ ៖ មុខរបរឡើងត្នោតប្រឈមមុខនឹងគ្រោះថ្នាក់បំផុត ប៉ុន្តែដោយសារជីវភាពក្រីក្រគ្មានជម្រើសអ្វីផ្សេងៗ បុរសម្នាក់បានបង្ខំចិត្តឈប់ដើរកាប់អុសលក់ប្តូរមកឡើងត្នោតវិញម្តង ស្រាប់តែឡើងត្នោតបាន៣ឆ្នាំក៏ធ្លាក់ពីលើដើមត្នោតរងរបួសសន្លប់ កាលពីវេលាម៉ោង៩និង៣០នាទីព្រឹកថ្ងៃទី២៥ កុម្ភៈ កន្លងមកនេះ ។ បុរសធ្លាក់ពីលើដើមត្នោតនេះឈ្មោះជ័យ នាក់ អាយុ៥៤ឆ្នាំ មានស្រុកកំណើតនៅភូមិបឹង ឃុំព្រះខែ ស្រុកបសេដ្ឋ ខេត្តកំពង់ស្ពឺ មានប្រពន្ធឈ្មោះពៅ ម៉ុន អាយុ៤៥ឆ្នាំ មានកូន៣នាក់។ តាមការរៀបរាប់ពីប្រពន្ធជនរងគ្រោះឈ្មោះពៅ ម៉ុន បានឱ្យដឹងថា កាលពីដើមឡើយក្រុមគ្រួសាររបស់គាត់ប្រកបរបរចូលព្រៃដើរកាប់អុសលក់ទេ ប៉ុន្តែដោយសារការកាប់អុសនោះត្រូវខាងរដ្ឋបាលព្រៃឈើចាប់មិនឱ្យកាប់ព្រៃ ហើយគ្មានមុខរបរអ្វីចិញ្ចឹមកូន ក៏សម្រេចចិត្តឡើងត្នោតកាលពីឆ្នាំ២០០៨កន្លងមកនេះ ។ នៅថ្ងៃកើតហេតុនេះ រូបគាត់ជាប្រពន្ធនៅផ្ទះដុតភ្លើងរំងាស់ធ្វើស្ករត្នោត ចំណែកប្តីចេញទៅចងបង្អោងតាមដើមត្នោតនៅខាងជើងផ្ទះចម្ងាយប្រមាណ៥០ម៉ែត្រប៉ុណ្ណោះ លុះចងបង្អោងបានមួយកំណាត់ក៏តបង្អោងមួយទៀត ពេលកំពុងចងតនោះ ស្រាប់តែគាត់ឮសូរប្រាវ ក៏ក្រឡេកមើលទៅប្តីនៅលើដើមត្នោតឃើញធ្លាក់ស្ទាកមកដី...គាត់ខំប្រឹងរត់ទៅកន្លែងដែលប្តីធ្លាក់ក៏ឃើញបញ្ឈរភ្នែកសន្លប់ទៅហើយ រូបគាត់ក៏លើកទ្រក្បាលប្តី ហើយស្រែកហៅអ្នកជិតខាងឱ្យមកជួយសែងយកទៅសង្គ្រោះ ។ គួរបញ្ជាក់ផងដែរថា បង្អោងដែលយកទៅចងនោះជាបង្អោងចាស់ដែលចងបានមួយឆ្នាំហើយដោះយកមកទុក រួចក៏យកទៅចងដើមត្នោតថ្មីនេះតែម្តង ។ ប្រពន្ធបានបន្តថា ពេលយកប្តីមកដល់ផ្ទះអ្នកជិតខាងជួយធ្វើចលនាទៅប្រមាណ១០នាទីទើបប្តីគាត់ដឹងខ្លួនវិញ ប៉ុន្តែត្រឹមចង្កេះចុះក្រោយស្ពឹកមិនដឹងអ្វីទាំងអស់ សូម្បីជើងក៏មិនដឹងថាជើងដែរ រីឯ.កដៃខាងឆ្វេងបាក់ ។ ដោយឃើញស្ថានភាពធ្ងន់ធ្ងរក៏នាំប្តីទៅព្យាបាលនៅមន្ទីរពេទ្យខេត្តតាកែវ បន្ទាប់មកមន្ទីរពេទ្យបានបញ្ជូនបន្តទៅព្យាបាលនៅមន្ទីរពេទ្យព្រះកុសុមៈ វេលាម៉ោង៣និង៣០នាទីរសៀលថ្ងៃទី២៥ កុម្ភៈ ។រហូតមកដល់ថ្ងៃទី២៧ កុម្ភៈ ស្ថានភាពរបស់ជនរងគ្រោះបន្ទាប់ពីយកទៅស្គែនចង្កេះរួច គ្រូពេទ្យប្រាប់ថា បាក់ឆ្អឹងចង្កេះ និងបានធ្វើការវះកាត់រួចហើយ ៕  |
| បេសកជនពិសេសអង្គការយូណេស្កូនឹងមកដល់កម្ពុជានារសៀលថ្ងៃនេះពិភាក្សាជាមួយក្រុមមន្ត្រី Posted: 26 Feb 2011 08:04 PM PST រាជធានីភ្នំពេញ ៖ បេសកជនពិសេសរបស់អង្គការយូណេស្កូ លោកកូអ៊ីជិរ៉ូ ម៉ាត់ស៊ូរ៉ា និងជាអតីតអគ្គនាយកអង្គការយូណេស្កូផងនោះ នឹងមកដល់ប្រទេសកម្ពុជានៅវេលារសៀលថ្ងៃអាទិត្យ ទី២៧ កុម្ភៈ ២០១១ នេះ ហើយ បន្ទាប់ពីលោកបានបញ្ចប់ដំណើរទស្សនកិច្ចនៅប្រទេសថៃនោះរួចមក ។ នេះបើយោងតាមលោកផៃស៊ីផាន អ្នកនាំពាក្យទីស្តីការគណៈរដ្ឋមន្ត្រីដែលបានថ្លែងប្រាប់កោះសន្តិភាពតាមទូរស័ព្ទកាលពីថ្ងៃសៅរ៍ម្សិលមិញនេះ ។ គួរបញ្ជាក់ថា ដំណើរទស្សនកិច្ចផ្លូវការរបស់បេសកជនពិសេសរបស់អង្គការយូណេស្កូ លោកកូអ៊ីជិរ៉ូ ម៉ាត់ស៊ូរ៉ា នៅព្រះរាជាណាចក្រកម្ពុជា នាពេលនេះ ធ្វើឡើងបន្ទាប់ពីប្រាសាទព្រះវិហាររបស់កម្ពុជាបានទទួលរងនូវការខូចខាតយ៉ាងធ្ងន់ធ្ងរ ដោយសារត្រូវគ្រាប់កាំភ្លើងរបស់ទាហានសៀមនៅក្នុងការប្រយុទ្ធគ្នារវាងទាហានកម្ពុជា-ថៃ៤លើក ក្នុងរយៈពេល៤ថ្ងៃជាប់ៗគ្នាកាលពីថ្ងៃទី៤ ដល់ថ្ងៃទី៧ កុម្ភៈ កន្លងមកនេះ ដោយទាហានសៀមបានឈ្លានពានបូរណភាពទឹកដីកម្ពុជានៅព្រំដែនប្រាសាទព្រះវិហារនោះរួចមក ។ ពីប្រទេសថៃឯណោះវិញ ជាថ្មីម្តងទៀត លោកនាយករដ្ឋមន្ត្រីថៃ អាប់ភីស៊ីត វ៉េចាជីវ៉ា បាននិយាយថា ការវាយប្រយុទ្ធគ្នារវាងកងទ័ពកម្ពុជា និងថៃនៅតំបន់ប្រាសាទព្រះវិហារនាពេលកន្លងមកនេះ គឺដោយសារតែការដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក ។ ការនិយាយរបស់លោកអាប់ភីស៊ីត យ៉ាងដូច្នេះ គឺបានធ្វើឡើងនៅក្នុងជំនួបជាមួយបេសកជនពិសេសរបស់អង្គការយូណេស្កូ លោកកូអ៊ីជិរ៉ូ ម៉ាត់ស៊ូរ៉ា នៅក្នុងទីក្រុងបាងកក កាលពីថ្ងៃសុក្រ ទី២៥ កុម្ភៈ កន្លងមកនេះ ។ នេះបើយោងតាមកាសែតឌឹណេស្សិន របស់ថៃចេញផ្សាយកាលពីថ្ងៃសៅរ៍ម្សិលមិញនេះ និងបានសរសេរបញ្ជាក់ដែរថា ក្រុមអង្គការយូណេស្កូបានស្តាប់នាយករដ្ឋមន្ត្រីថៃ លោកអាប់ភីស៊ីត វ៉េចាជីវ៉ា និយាយអំពីទំនាស់កម្ពុជា-ថៃ ដែលនាំឱ្យមានការវាយប្រហារគ្នាកន្លងមកនេះ ប៉ុន្តែមិនបានបញ្ចេញយោបល់ថាតើយូណេស្កូ នឹងសម្រេចធ្វើយ៉ាងណានោះទេ ។ កាសែតឌឹណេស្សិនរបស់ថៃបានបញ្ជាក់ទៀតថា ក្រោយពីស្តាប់នាយករដ្ឋមន្ត្រីថៃបកស្រាយកាលពីថ្ងៃសុក្រនោះរួចមក មន្ត្រីបេសកជនយូណេស្កូ លោកកូអ៊ីជិរ៉ូ ម៉ាត់ស៊ូរ៉ា មិនបានបញ្ជាក់ច្បាស់ថាតើ យូណេស្កូ នឹងយល់ព្រមជាមួយនឹងសំណើរបស់ថៃ ដែលចង់ឱ្យផ្អាកការគិតគូរអំពីផែនការអភិវឌ្ឍប្រាសាទព្រះវិហាររបស់កម្ពុជា ឬក៏យ៉ាងណានោះទេ ។ សូមបញ្ជាក់ថា អគ្គនាយកអង្គការយូណេស្កូ លោកស្រីអ៊ីរីណា បូកូវ៉ា ធ្លាប់បានថ្លែងព្រមានកាលពីពេលថ្មីៗនេះថា ប្រាសាទព្រះវិហារដែលជាមរតកវប្បធម៌ពិភពលោកមួយនេះ មិនគួរយកបញ្ហានៃការបង្កទំនាស់មកបន្ទុចបង្អាក់នោះទេ ៕  |
| ក្រុមក្មេងស្ទាវប្រើប្រាស់ថ្នាំញៀនត្រូវនគរបាលប៉ុស្តិ៍ផ្សារថ្មីទី២ឃាត់ខ្លួន Posted: 26 Feb 2011 07:41 PM PST  រាជធានីភ្នំពេញ ៖ កាលពីថ្ងៃទី២៦ កុម្ភៈ ២០១១ វេលាម៉ោង៧និង៣០នាទីយប់ កម្លាំងនគរបាលប៉ុស្តិ៍រដ្ឋបាលផ្សារថ្មីទី២ បានចុះបង្ក្រាបក្រុមក្មេងស្ទាវប្រើប្រាស់ថ្នាំញៀនចំនួន៣នាក់ ដែលកំពុងធ្វើសកម្មភាពជក់ប្រើប្រាស់ ជាក់ស្តែងនៅក្នុងបន្ទប់លេខ៣២៣ ជាន់ទី៣ ផ្ទះសំណាក់សូរិយាផ្កាយ៩ ទីតាំងអគារលេខ១៧-១៩ ផ្លូវលេខ៨១ ភូមិទី៧ សង្កាត់ផ្សារថ្មីទី២ ខណ្ឌដូនពេញ ។ មន្ត្រីនគរបាលប៉ុស្តិ៍ផ្សារថ្មីទី២ បាននិយាយថា យោងតាមបទបញ្ជាអធិការនគរបាលខណ្ឌដូនពេញ និងផែនការអនុវត្តន៍ភូមិ-សង្កាត់មានសវុត្ថិភាព នគរបាលប៉ុស្តិ៍រដ្ឋបាលផ្សារថ្មីទី២ បានចុះបង្ក្រាបក្រុមក្មេងស្ទាវប្រើប្រាស់ថ្នាំញៀនក្នុងបន្ទប់លេខ៣២៣ ផ្ទះសំណាក់សូរិយាផ្កាយ៩ ដែលមានទីតាំងអគារលេខ១៧-១៩ ផ្លូវលេខ៨១ ភូមិទី៧ សង្កាត់ផ្សារថ្មីទី២ ខណ្ឌដូនពេញ ខណៈពួកគេធ្វើសកម្មភាពជក់ជាក់ស្តែង ។ ក្រុមក្មេងស្ទាវដែលឃាត់ខ្លួនមាន ១-ឈ្មោះម៉ង់ សុភីរុណ ហៅ ម៉ាប់ ភេទប្រុស អាយុ២០ឆ្នាំ មានទីលំនៅផ្ទះលេខ៣០ ផ្លូវលេខ២៣២ សង្កាត់បឹងព្រលឹត ខណ្ឌ៧មករា ២-ឈ្មោះហ៊ង ប៊ិសម៉ារក៍ ភេទប្រុស អាយុ២១ឆ្នាំ ស្នាក់នៅផ្ទះលេខ២៧BE2 ផ្លូវលេខ១៩ សង្កាត់ផ្សារចាស់ ខណ្ឌដូនពេញ និង៣-ឈ្មោះសែម កក្កដា ភេទប្រុស អាយុ១៩ឆ្នាំ ទីលំនៅផ្ទះលេខ៣៩ZE2 ផ្លូវលេខ១៣៤ សង្កាត់ផ្សារដេប៉ូទី៣ ខណ្ឌទួលគោក ជនទាំងពីរនេះជានិស្សិតឆ្នាំទី២ សាលាបៀលប្រាយ ។ នគរបាលបានដកហូតវត្ថុតាងមាន១-ថ្នាំញៀនប្រភេទក្រាម ពណ៌ស (ម៉ាទឹកកក) ចំនួន១ កញ្ចប់តូច ២-សំបកថង់គ្មានថ្នាំញៀនចំនួន១ និងសម្ភារមួយចំនួនសម្រាប់ប្រើប្រាស់ថ្នាំញៀន។ គេសង្កេតឃើញថា បើទោះបីជាសាលារាជធានីភ្នំពេញ ក៏ដូចជាសាលាខណ្ឌដូនពេញ បានធ្វើការផ្សព្វផ្សាយស្តីពីក្រុមក្មេងស្ទាវចូលស្នាក់នៅផ្ទះសំណាក់ និងសណ្ឋាគារត្រូវរាយការណ៍ដល់អាជ្ញាធរ និងនគរបាលមូលដ្ឋានដើម្បីចុះរដ្ឋបាលយ៉ាងណាក៏ដោយ ក៏នៅតែមានក្រុមក្មេងទំនើងប្រមូលផ្តុំនៅផ្ទះសំណាក់ និងសណ្ឋាគារដែរ ៕  |
| អំពើហិង្សាថ្មីៗនៅទុយនីស៊ីស្លាប់4នាក់និងរបួស12នាក់ Posted: 26 Feb 2011 07:40 PM PST ប្រភពព័ត៌មានផ្លូវការរាយការណ៍ថា អំពើហិង្សាថ្មីៗកើតមានទៀតកាលពីថ្ងៃទី២៥ និង២៦ កុម្ភៈនៅទីក្រុងទុយនីស៊ី រដ្ឋធានីទុយនីស៊ី បណ្តាលឱ្យមនុស្សស្លាប់៤នាក់ និងរបួស១២នាក់ ។  |
| លោកអូបាម៉ា អំពាវនាវឱ្យលោកកាដាហ្វី ចុះចេញពីតំណែង Posted: 26 Feb 2011 07:32 PM PST  ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា កាលពីថ្ងៃទី២៦ កុម្ភៈ បានបង្កើនសម្ពាធលើមេដឹកនាំលីប៊ី លោកមូអាម៉ា កាដាហ្វី ដោយលោកថ្លែងថា ឥឡូវនេះវាដល់ពេលសម្រាប់លោកកាដាហ្វី ចុះចេញពីតំណែងហើយ។ ក្នុងការពិភាក្សាគ្នាតាមទូរស័ព្ទជាមួយអធិការបតីអាល្លឺម៉ង់ លោកស្រីអេនចឺឡា ម័រកែល ស្តីអំពីស្ថានការណ៍នៅប្រទេសលីប៊ី លោកអូបាម៉ា ថ្លែងថា មេដឹកនាំលីប៊ីពេលនេះត្រូវតែធ្វើអ្វីដែលជារឿងត្រឹមត្រូវសម្រាប់ប្រទេសដោយចុះចេញពីតំណែង ។  |
| ក្រុមប្រឹក្សាសន្តិសុខ អ.ស.ប អនុម័តទណ្ឌកម្មប្រឆាំងលីប៊ី Posted: 26 Feb 2011 07:32 PM PST  ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី២៦ កុម្ភៈ កន្លងមក បានសម្រេចអនុម័តជាឯកច្ឆន្ទលើពង្រាងសេចក្តីសម្រេចចិត្តមួយដាក់ទណ្ឌកម្មប្រឆាំងប្រទេសលីប៊ីចំពេលការបង្ក្រាបក្រុមបាតុកររបស់មេដឹកនាំប្រទេសនេះ លោកមូអាម៉ា កាដាហ្វី មានការកើនឡើង។ ទណ្ឌកម្មនោះមានដូចជាការហ៊ុមព័ទ្ធអាវុធ ការផ្អិបទុកទ្រព្យសម្បត្តិ និងការហាមប្រាមលើការធ្វើដំណើរជាដើមសម្រាប់លោកកាដាហ្វី និងមនុស្សរបស់លោកជាច្រើននាក់ទៀត ។  |
| ចិននឹងបញ្ជូនយន្តហោះ15គ្រឿង1ថ្ងៃទៅដឹកជនជាតិចិនចេញពីលីប៊ី Posted: 26 Feb 2011 07:32 PM PST ប្រទេសចិនបានសំរេចកាលពីថ្ងៃទី២៦ កុម្ភៈ ជំរុញការជម្លៀសជនជាតិខ្លួនចេញពីលីប៊ី ហើយអាជ្ញាធរអាកាសចរណ៍ចិនគ្រោងបញ្ជូនយន្តហោះ១៥គ្រឿងក្នុងមួយថ្ងៃទៅកាន់លីប៊ី ឬប្រទេសជិតខាងរយៈពេល២សប្តាហ៍ខាងមុខនេះដើម្បីធ្វើមាតុភូមិនិវត្តន៍ជនជាតិចិនទាំងឡាយដែលជាប់នៅលីប៊ី។ រដ្ឋបាលអាកាសចរណ៍ស៊ីវិលចិន AACC បានរៀបចំធ្វើកាលពីថ្ងៃទី២៦ កុម្ភៈ ក្នុងក្រុងប៉េកាំងនូវកិច្ចប្រជុំបន្ទាន់មួយ ហើយបានសំរេចបញ្ជូនយន្តហោះបន្ថែមទៀតរៀងរាល់ថ្ងៃសំរាប់ដំណាក់កាលរវាងថ្ងៃទី២៨ កុម្ភៈដល់ថ្ងៃទី១០ មីនា ឆ្ពោះទៅកាន់បណ្តាប្រទេសជិតខាងលីប៊ីដើម្បីធានាដល់ការជម្លៀសមនុស្សចេញយ៉ាងច្រើន ។ ដោយព្រមព្រៀងជាមួយនឹង AACC ក្រុមហ៊ុនអាកាសចរណ៍ចិនសំខាន់ៗនឹងអនុវត្តប្រិតបត្តិការធ្វើមាតុភូមិនិវត្តន៍ជនជាតិចិនទាំងឡាយឱ្យបានឆាប់រហ័សបំផុត។ ក្នុងដំណាក់កាលនេះក្រុមហ៊ុនអាកាសចរណ៍ AIR CHINA នឹងបញ្ជូនយន្តហោះទេសចរណ៍៥គ្រឿងក្នុងមួយថ្ងៃទៅកាន់កោះក្រែត ប្រទេសក្រិក ចំណែកក្រុមហ៊ុន HAINAN AIRLINES នឹងបញ្ជូនយន្តហោះ២គ្រឿង ក្រុមហ៊ុន CHINA EASTERN AIRLINES នឹងបញ្ជូនយន្តហោះ៤គ្រឿងក្នុងមួយថ្ងៃទៅកាន់កោះម៉ាល់ ហើយក្រុមហ៊ុន CHINA SOUTHERN AIRLINES នឹងបញ្ជូនយន្តហោះ៤គ្រឿងទៅកាន់កោះ DJERBA ប្រទេសទុយនីសីុ។ កាលពីថ្ងៃទី២៦ កុម្ភៈ នាវេលារសៀលជនជាតិចិនជិត១៦.០០០នាក់ត្រូវបានជម្លៀសចេញពីលីប៊ី ៕  |
| ស្ត្រីជួញដូរគ្រឿងញៀន២នាក់ជាប់អន្ទាក់សមត្ថកិច្ចខេត្តកំពត Posted: 26 Feb 2011 07:26 PM PST   ខេត្តកំពត ៖ ស្ត្រីជួញដូរគ្រឿងញៀន២នាក់ ព្រមទាំងរថយន្តកូរ៉ូឡា មួយគ្រឿង ត្រូវបានប៉ូលិសការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពតចាប់ខ្លួន និងប្រមូលវត្ថុតាងមកកាន់ស្នងការដ្ឋាននគរបាលខេត្ត រួមមានម៉ាទឹកកក និងរថយន្តកូរ៉ូឡាមួយគ្រឿង កាលពីវេលាម៉ោង៤និង៤៥នាទីរសៀលថ្ងៃទី២៦ កុម្ភៈ ២០១១ នៅចំណុចស្ថានីយប្រេងឥន្ធនៈកំពត ស្ថិតនៅចម្ងាយប្រហែល៣០០ម៉ែត្រ ខាងលិចក្បាលស្ពានព្រែកកំពត ភូមិទ្វីខាងជើង សង្កាត់អណ្តូងខ្មែរ ។ លោកទៀង សុផាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបានឱ្យដឹងថា ក្រោយពីទទួលបទបញ្ជាពីលោកនាយស្នងការ និងស្នងការរង លោកអ៊ិន ជីវ៉ា ទទួលបន្ទុកប្រធានការិយាល័យកណ្តាលនគរបាលយុត្តិធម៌ បានដាក់បទបញ្ជា ឱ្យកម្លាំងសមត្ថកិច្ចការិយាល័យបង្ក្រាបការជួញដូរគ្រឿងញៀនសហការជាមួយកម្លាំងនគរបាលសេដ្ឋកិច្ច ចុះប្រតិបត្តិការបង្ក្រាបឃាត់ខ្លួនស្ត្រីជួញដូរគ្រឿងញៀន២នាក់ ព្រមទាំងរថយន្តកូរ៉ូឡា ស៊េរី៩៥ ពណ៌ទឹកប៊ិចមួយគ្រឿង ពាក់ស្លាកលេខ ភ្នំពេញ 2G-7205 បើកបរដោយស្ត្រីឈ្មោះគឹម ហុង អាយុ៤៧ឆ្នាំ ជាម្ចាស់រថយន្តមានទីលំនៅក្នុងភូមិជម្ពូវ័ន្ត សង្កាត់ចោមចៅ ខណ្ឌដង្កោ រាជធានីភ្នំពេញ និងស្ត្រីម្ចាស់ថ្នាំញៀនម្នាក់ទៀតឈ្មោះមិន ម៉ារី អាយុ៤៣ឆ្នាំ ជាស្ត្រីមេម៉ាយ មានកូនប្រុសតូចៗមកជាមួយ២នាក់ផង ស្ត្រីទាំង២មានទីលំនៅក្នុងភូមិ-សង្កាត់ជាមួយគ្នាខាងលើ ។ សមត្ថកិច្ចជំនាញឆែកឆេររកឃើញថ្នាំញៀន៧កញ្ចប់តូចៗ ជាប្រភេទម៉ាទឹកកក ។ ទាំងវត្ថុតាងថ្នាំញៀន និងឧបករណ៍យានជំនិះ ព្រមទាំងជនជាប់សង្ស័យត្រូវប៉ូលិសកសាងសំណុំរឿងបញ្ជូនទៅសាលាដំបូងខេត្ត ដើម្បីផ្តន្ទាទោសតាមច្បាប់ ។ គួររំលឹកថា ប្រតិបត្តិការបង្ក្រាបគ្រឿងញៀនយ៉ាងក្តៅគគុកនេះ ២ថ្ងៃជាប់គ្នាបន្តបន្ទាប់សមត្ថកិច្ចការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត បង្ក្រាបបាន២ករណី (ថ្ងៃទី២៥ និង២៦ កុម្ភៈ) ៕  |
| យករថយន្តទៅចាក់ហ្គាស ឆ្លៀតជក់បារីសង្ហាមិនដឹងខ្យល់អី ផ្ទុះឆេះគេឯង Posted: 26 Feb 2011 07:17 PM PST  រាជធានីភ្នំពេញ ៖ ស្ត្រីម្នាក់ដែលគេស្គាល់ជាម្ចាស់ស្ថានីយបញ្ចូលហ្គាសរថយន្តមួយកន្លែងដែលមានទីតាំងលើកំណាត់ផ្លូវលេខ៤ ស្ថិតក្នុងភូមិព្រៃបឹង សង្កាត់កន្ទោក ខណ្ឌដង្កោ ត្រូវសាច់ញាតិដឹកតាមរថយន្តពេទ្យឯកជនមកកាន់មន្ទីរពេទ្យកាល់ម៉ែត ដើម្បីសង្គ្រោះជីវិត បន្ទាប់ពីរងគ្រោះ ខណៈពេលកំពុងបញ្ចូលហ្គាសរថយន្ត ហើយម្ចាស់រថយន្តជក់បារីបណ្តាលឱ្យឆាបឆេះរលាកពេញខ្លួនកាលពីវេលាម៉ោង៧និង៣០នាទីយប់ថ្ងៃទី២៥ កុម្ភៈ ២០១១ ។ ម្ចាស់ស្ថានីយបញ្ចូលហ្គាសរថយន្តជួបគ្រោះចង្រៃត្រូវគេស្គាល់ឈ្មោះម៉ម ម៉ានី ភេទស្រី អាយុ៣៣ឆ្នាំ មានទីលំនៅភូមិព្រៃបឹង សង្កាត់កន្ទោក ខណ្ឌដង្កោ ។ ប្រភពព័ត៌មានទាក់ទិននឹងការផ្ទុះហ្គាសនេះ ត្រូវគេនិយាយឱ្យដឹងថា មុនពេលកើតហេតុ មានរថយន្តមួយគ្រឿងបានធ្វើដំណើរតាមបណ្តោយផ្លូវជាតិលេខ៤ ចូលចាក់ហ្គាសនៅស្ថានីយលក់ហ្គាសខាងលើ ខណៈពេលដែលស្ត្រីជាម្ចាស់ស្ថានីយកំពុងបញ្ចូលហ្គាសរថយន្តនោះ ស្រាប់តែបុរសជាម្ចាស់រថយន្តក៏ទាញបារីមកជក់យ៉ាងសង្ហា ហាក់ដូចជាមិនដឹងថា ហ្កាស និងភ្លើងវាយ៉ាងម៉េច? បណ្តាលឱ្យឆាបឆេះបង្កភាពភ្ញាក់ផ្អើល និងធ្វើឱ្យស្ត្រីរូបនោះរលាកពេញផ្ទៃមុខ ព្រមទាំងដៃជើង ហើយត្រូវសាច់ញាតិដឹកទៅពេទ្យឯកជន ដើម្បីសង្គ្រោះជីវិត ប៉ុន្តែដោយសារមុខរបួសធ្ងន់ធ្ងរ ទើបបញ្ជូនបន្តទៅមន្ទីរពេទ្យកាល់ម៉ែត ។ ដោយឡែកម្ចាស់រថយន្តបង្កឱ្យមានការឆាបឆេះនោះ លុះពេលឃើញហេតុព្រលឹងចុងសក់បែបនេះក៏បានបើករថយន្តគេចខ្លួនតាមផ្លូវជាតិលេខ៤ ឆ្ពោះទៅទិសខាងលិចបាត់ស្រមោល ហើយក្នុងហេតុនោះដែរ ត្រូវបានប្រជាពលរដ្ឋរិះគន់ថា មូលហេតុដោយសារការធ្វេសប្រហែសរបស់ម្ចាស់ស្ថានីយបញ្ចូលហ្គាសតែម្តង ដែលបណ្តែតបណ្តោយឱ្យអតិថិជនចូលចាក់ហ្គាស ហើយជក់បារី...ចំណែកម្ចាស់រថយន្តក៏អញ្ចឹងដែរ គួរតែយល់ដឹងអំពីភ្លើង និងប្រេងឥន្ទនៈ ហើយថាតើវាមានចំហេះបែបណា? មិនចាំបាច់ឱ្យគេទៅឃ្វាលប្រាប់ដូចសត្វគោក្របីនោះទេ គួរតែតាមរកឱ្យឃើញ និងដាក់ទោសតាមច្បាប់ ៕  |
| បាញ់១គ្រាប់ប្លន់យកម៉ូតូម៉ាកស្កុបភីស៊េរីថ្មីមួយគ្រឿងវេលាម៉ោងរំលងអធ្រាត្រ Posted: 26 Feb 2011 07:03 PM PST រាជធានីភ្នំពេញ ៖ យុវសិស្សម្នាក់បានរងរបួសធ្ងន់ធ្ងរដោយសារការបាញ់ប្រហារប្លន់យកម៉ូតូម៉ាកស្កុបភីស៊េរីថ្មីមួយគ្រឿងពីសំណាក់ជនប្រដាប់អាវុធមានគ្នាពីរនាក់ នៅលើកំណាត់ផ្លូវលេខ២០៥ មុខផ្ទះលេខ៣២ សង្កាត់ទួលស្វាយព្រៃទី២ ខណ្ឌចំការមន កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៧ កុម្ភៈ ២០១១ ។ យុវសិស្សរងគ្រោះក្នុងអំពើបាញ់ប្រហារខាងលើនេះ ឈ្មោះខូវ គឹមពី ភេទប្រុស អាយុ២០ឆ្នាំ បានរងរបួសពីសំណាក់ក្រុមចោរប្លន់បាញ់ត្រូវចំស្មាខាងស្តាំ១គ្រាប់ធ្លាយពីម្ខាងទៅម្ខាង ។ តាមប្រភពព័ត៌មានទាក់ទិននឹងអំពើប្លន់ប្រដាប់អាវុធខាងលើនេះបានឱ្យដឹងថា មុនពេលកើតហេតុ ឈ្មោះខូវ គឹមពី បានជិះម៉ូតូរបស់ខ្លួនម៉ាកស្កុបភីធ្វើដំណើរលើកំណាត់ផ្លូវលេខ២០៥ ក្នុងទិសដៅពីត្បូងទៅជើង លុះដល់ចំណុចមុខផ្ទះលេខ៣២ខាងលើ ក៏ជួបក្រុមចោរប្លន់២នាក់ ជិះម៉ូតូម៉ាកស្កុបភីពណ៌ខ្មៅតាមកៀរភ្ជង់បាញ់ប្លន់យកម៉ូតូពីឈ្មោះខូវ គឹមពី បណ្តាលឱ្យរងរបួសហើយដណ្តើមយកម៉ូតូជិះទៅបាត់ភ្លាមៗដោយសុវត្ថិភាព ។ ក្រោយពេលកើតហេតុ ភ្លាមៗ ឈ្មោះខូវ គីមពី បានហៅម៉ូតូឌុបជិះទៅព្យាបាលរបួសនៅគ្លីនិកវិសាលសុខ ហើយក៏ត្រឡប់ចេញពីមន្ទីរពេទ្យភ្លាមៗតែម្តង ៕  |
| Posted: 26 Feb 2011 06:21 PM PST      រាជធានីភ្នំពេញ ៖ អ្នកនាំពាក្យក្រសួងការពារជាតិ លោកឧត្តមសេនីយ៍ឈុំ សុជាតិ បានប្រាប់កោះសន្តិភាពនៅវេលាព្រឹកថ្ងៃអាទិត្យ ទី២៧ កុម្ភៈ ២០១១ នេះថា នាវាសហរដ្ឋអាមេរិកដែលដឹកកងនាវឹករួមជាមួយគ្រឿងសព្វាវុធគ្រប់ប្រភេទ យន្តហោះ និងគ្រឿងបរិក្ខារពេទ្យ បានចូលចតនៅកំពង់ផែខេត្តព្រះសីហនុ កាលពីវេលាថ្ងៃសៅរ៍ម្សិលមិញដោយមានការអញ្ជើញចូលរួមស្វាគមន៍ពីលោកឧត្តមនាវីទៀ វិន ។ លោកឈុំ សុជាតិ បានបញ្ជាក់ឱ្យដឹងដែរថា សមយុទ្ធនៅថ្ងៃអាទិត្យ ទី២៧ កុម្ភៈ ២០១១ នេះគឺនឹងធ្វើពី របៀបសង្គ្រោះអ្នករងរបួស និងប្រជាពលរដ្ឋក្នុងពេលមានសង្គ្រាម ដោយប្រើប្រាស់យន្តហោះ។ អ្នកនាំពាក្យក្រសួងការពារជាតិបានបន្តថា ទីតាំងធ្វើសមយុទ្ធនឹងផ្តើមពីមូលដ្ឋានកងទ័ពជើងទឹករាម ខេត្តព្រះសីហនុ ទៅកាន់ទីបញ្ជាការដ្ឋានកងរថក្រោះក្នុងខេត្តកំពង់ស្ពឺ ។ គួរបញ្ជាក់ដែរថា សមយុទ្ធរវាងកងទ័ពកម្ពុជា និងកងទ័ពជើងទឹកសហរដ្ឋអាមេរិកដែលចាប់ផ្តើមឡើងពីថ្ងៃនេះគឺនឹងត្រូវបញ្ចប់នៅថ្ងៃទី២ មីនា ២០១១ ខាងមុខ ។ បើតាមលោកឈុំ សុជាតិ អ្នកនាំពាក្យក្រសួងការពារជាតិបានបញ្ជាក់ថា សមយុទ្ធនេះគឺធ្វើឡើងក្នុងគោលបំណងដើម្បីផ្លាស់ប្តូរបទពិសោធន៍រវាងកងទ័ពនៃប្រទេសទាំង២នៅក្នុងការថែរក្សាសន្តិភាពតែប៉ុណ្ណោះ ។ សមយុទ្ធនេះផងដែរ នឹងមានទាហានកម្ពុជា និងសហរដ្ឋអាេមរិកចូលរួមចំនួន៥០០នាក់ ដោយប្រារព្ធធ្វើនៅលើទីតាំងចំនួន៣កន្លែងគឺនៅមូលដ្ឋានកងទ័ពជើងទឹកខេត្តព្រះសីហនុ ទីបញ្ជាការដ្ឋានកងរងក្រោះក្នុងខេត្តកំពង់ស្ពឺ និងនៅមូលដ្ឋានកងទ័ពពេជ្រនិល ។ លោកឈុំ សុជាតិ អ្នកនាំពាក្យក្រសួងការពារជាតិកម្ពុជា បានបន្ថែមថា សមយុទ្ធនេះនឹងផ្តោតសំខាន់ទៅលើការជួយសង្គ្រោះជនរងគ្រោះនៅក្នុងសង្គ្រាមរបៀបសង្គ្រោះអ្នករងរបួស និងការដឹកស្បៀងអាហារបន្ទាន់ ៕  |
| Posted: 26 Feb 2011 05:42 PM PST រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានក្រើនរំលឹកសាជាថ្មីដល់នាយទាហាន ពលទាហានដែលឈរជើងនៅសមរភូមិមុខព្រំដែនកម្ពុជា-ថៃ ពិសេសតំបន់ប្រាសាទព្រះវិហារ ឱ្យបង្កើនការប្រុងប្រយ័ត្ននៅតាមទីតាំងឈរជើងរៀងៗខ្លួន និងអត់ធ្មត់ឱ្យអស់លទ្ធភាព ដើម្បីអនុវត្តឱ្យបាននូវបទឈប់បាញ់ជាអចិន្ត្រៃយ៍ ដែលភាគីទាំង២ឯកភាពនាថ្ងៃទី២២ កុម្ភៈ ២០១១ នៅក្នុងកិច្ចប្រជុំរដ្ឋមន្ត្រីការបរទេសអាស៊ាន នៅទីក្រុងហ្សាការតា ហើយជាមួយគ្នានោះត្រូវការពារសុវត្ថិភាព និងបង្កលក្ខណៈងាយស្រួលដល់ការបំពេញភារកិច្ចនៅក្នុងទឹកដីកម្ពុជាឱ្យបានល្អជូនចំពោះក្រុមអ្នកសង្កេតការណ៍មកពីប្រទេសឥណ្ឌូណេស៊ីផងដែរ។ ជាមួយគ្នានេះ សម្តេចតេជោបានណែនាំឱ្យអាជ្ញាធរមូលដ្ឋាន និងស្ថាប័នពាក់ព័ន្ធជួយសំរួលការដឹកជញ្ជូនបងប្អូនជនភៀសសឹកដោយសារសង្គ្រាមបង្កឡើងដោយភាគីថៃ នាពេលថ្មីៗកន្លងមកនេះបានវិលត្រឡប់ទៅកាន់លំនៅឋានវិញដោយសុវត្ថិភាព ដើម្បីបន្តការងារបង្កបង្កើនផលរបស់ខ្លួនវិញ។ វិធានការនានានេះត្រូវបានធ្វើឡើងនៅក្នុងសម័យប្រជុំពេញអង្គគណៈរដ្ឋមន្ត្រីនាព្រឹកថ្ងៃទី២៥ កុម្ភៈ ទាក់ទិនទៅនឹងការដាក់បទបញ្ជាឱ្យមានការប្រុងប្រយ័ត្ននៅតាមទីតាំងឈរជើងក្នុងសមរភូមិជួរមុខនេះមិនមានន័យថា ជាការបង្កើនកំដៅនៅតំបន់ប្រឈមមុខនោះទេ តែជាការពង្រឹងកម្លាំងការពារត្រឹមបូរណភាពទឹកដីរបស់ខ្លួនតែប៉ុណ្ណោះ។ ទោះបីជាកម្ពុជាបានបង្ហាញពីជំហរគោរពបទឈប់បាញ់គ្នាក្តី ក៏ឥរិយាបថរបស់នាយករដ្ឋមន្ត្រីថៃ ក៏ដូចជាមេទ័ពថៃនៅតែប្រើពាក្យបែប «ទូងស្គរសង្គ្រាម» ។ បើយោងតាមសេចក្តីរាយការណ៍តាមកាសែតបាងកកប៉ុស្តិ៍កាលពីថ្ងៃទី២៤ កុម្ភៈ កន្លងមក ដែលមានចំណងជើងថា «នាយករដ្ឋមន្ត្រី ៖ ថៃត្រៀមខ្លួនជាស្រេចដើម្បីវាយបក» គឺជាការពិតនោះសង្គ្រាមឈ្លានពានជាមួយនឹងចេតនាឈ្លានពាន និងកាន់កាប់ទឹកដីក្រោមអធិបតេយ្យកម្ពុជា ដោយទាហានថៃហាក់បីដូចជានឹងកើតឡើងយា៉ងពិតប្រាកដក្នុងពេលឆាប់ៗខាងមុខនេះ ។ តែមួយថ្ងៃប៉ុណ្ណោះ បន្ទាប់ពីថៃបានប្រកាសពីជោគជ័យការទូតរបស់ខ្លួននៅឯកិច្ចប្រជុំរដ្ឋមន្ត្រីការបរទេសអាស៊ាន កាលពីថ្ងៃទី២២ កុម្ភៈ ២០១១ក្នុងទីក្រុងហ្សាការតា ឥណ្ឌូណេស៊ី និងតែមួយសប្តាហ៍ បន្ទាប់ពីថៃប្រកាសពីជោគជ័យខាងនយោបាយរបស់ខ្លួននៅឯកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី១៤ កុម្ភៈ ឆ្នាំ២០១១ក្នុងបុរីញូវយ៉ក សហរដ្ឋអាមេរិកនោះមក ឥឡូវនេះនាយករដ្ឋមន្ត្រីថៃ អាប់ភីស៊ីត វេចាជីវ៉ា បែរជាកំពុងទូងស្គរប្រកាសសង្គ្រាមយ៉ាងវក់វី និងកំពុងបង្ហាញដោយអំនួតនូវសកម្មភាពយោធារបស់ខ្លួននៅក្នុងតំបន់ទល់មុខតំបន់ព្រំដែនប្រាសាទព្រះវិហារ ដោយបាននិយាយថា «ថៃត្រៀមខ្លួនជាស្រេចធ្វើការវាយប្រហារពេញទំហឹងប្រឆាំងនឹងកម្ពុជា ប្រសិនបើកម្ពុជានៅបន្តរំលោភអធិបតេយ្យថៃ» ។ ចូរយើងទាំងអស់គ្នាធ្វើការវិភាគលើសេចក្តីថ្លែងការណ៍បែបក្រអឺតក្រទមនេះ និងពិនិត្យមើលថា តើការនិយាយបែបនេះមានន័យយ៉ាងដូចម្តេច? ហើយថា តើវាមានផលប៉ះពាល់បែបណាចំពោះបណ្តា ប្រទេសស៊ីវិល័យក្នុងអាស៊ាន និងសហគមន៍ពិភពលោក។
ប្រភពព័ត៌មានផ្លូវការរាយការណ៍កាលពីថ្ងៃទី២៤ កុម្ភៈ ថា អតីតអគ្គនាយកអង្គការយូណេស្កូ លោកកូអ៊ីជីរ៉ូ ម៉ាតស៊ូអ៊ូរ៉ា នឹងអញ្ជើញមកបំពេញទស្សនកិច្ចរយៈពេល៣ថ្ងៃមួយនៅកម្ពុជាក្នុងឋានៈជាបេសកជនពិសេសរបស់អង្គការនេះចាប់ពីថ្ងៃទី២៧ កុម្ភៈ ទៅ។ លោកផៃស៊ីផាន អ្នកនាំពាក្យរបស់ទីស្តីការគណៈរដ្ឋមន្ត្រីឱ្យដឹងថា លោកម៉ាតស៊ូអ៊ូរ៉ា អញ្ជើញមកដល់កម្ពុជានាថ្ងៃទី២៧ កុម្ភៈ ហើយលោកនឹងស្ថិតនៅកម្ពុជារហូតដល់ថ្ងៃទី ១ មីនា។ មុនពេលមកកាន់ទីក្រុងភ្នំពេញលោកម៉ាតស៊ូអ៊ូរ៉ាបានមកកាន់ទីក្រុងបាងកកកាលពីថ្ងៃទី២៥ កុម្ភៈ។ ដំណើរទស្សនកិច្ចនេះរបស់លោកមានទិសដៅថែរក្សាប្រាសាទព្រះវិហារដែលរងការបំផ្លាញដោយគ្រាប់កាំភ្លើង និងគ្រាប់ផ្លោងរបស់កងទាហានថៃក្នុងពេលមានការប្រយុទ្ធគ្នាពីថ្ងៃទី៤ដល់ទី៧ កុម្ភៈ រវាងកងទ័ពនៃប្រទេសទាំង២។ កម្ពុជា និងថៃសុទ្ធតែបានផ្តល់សច្ចាប័នលើអនុសញ្ញាបេតិកភណ្ឌពិភពលោកឆ្នាំ១៩៧២។ យោងតាមប្រភពព័ត៌មានពីកាសែតបាងកកប៉ុស្តិ៍ឱ្យដឹងថា បេសកជនពិសេសរបស់អង្គការយូណេស្កូ លោក Koichiro Matsuura បានអញ្ជើញមកដល់ទីក្រុងបាងកក ប្រទេសថៃ កាលពីយប់ថ្ងៃទី២៤ កុម្ភៈ កន្លងមក ហើយលោកនឹងជួបពិភាក្សាការងារជាមួយលោកកាស៊ីត ភីរម្យ រដ្ឋមន្ត្រីក្រសួងការបរទេសថៃ និងលោក Suwit Kunkitti រដ្ឋមន្ត្រីក្រសួងធនធានធម្មជាតិ និងបរិស្ថាន ប៉ុន្តែប្រភពព័ត៌មាននេះមិនបានឱ្យដឹងពីប្រធានបទនៃការពិភាក្សាទាំងនោះទេ ។ លោក Thani ឱ្យដឹងថា លោក Koichiro Matsuura បេសកជនពិសេសទទួលបន្ទុកប្រាសាទព្រះវិហារនឹងមិនត្រូវអនុញ្ញាតឱ្យអញ្ជើញទៅកាន់តំបន់មានជម្លោះឡើយ ពីព្រោះវាជាពេលមិនសមរម្យសម្រាប់លោកទេ ។
យោងតាមកាសែតថៃបានផ្សាយឱ្យដឹងថា លោកប៉ានថេប ពង្សពួព័ន្ធ អ្នកនាំពាក្យក្រុមអាវលឿងបាននិយាយមុនពេលជួបគ្នារវាងតំណាងយូណេស្កូ និងនាយករដ្ឋមន្ត្រីថៃ កាលពីល្ងាចថ្ងៃទី២៥ កុម្ភៈ នៅទីស្តីការគណៈរដ្ឋមន្ត្រីថា ក្រុមអាវលឿងនឹងមិនមានឥរិយាបថណាមួយបញ្ជូនតំណាងទៅចូលរួមស្តាប់ការសន្ទនានោះទេ ព្រោះយល់ថា គ្មានប្រយោជន៍។ កាលពីពេលមុននេះ អ្នកជំនាញមួយចំនួនបានប្រឆាំងដោយផ្ញើសារលិខិតមិនព្រមឱ្យតំណាងយូណេស្កូចូលទៅប្រទេសថៃ ព្រោះមានរបាយការណ៍ថា ការជួបពិភាក្សាគ្នាជាមួយតំណាងយូណេស្កូច្បាស់ជាស្នើសុំឱ្យថៃសងការខូចខាតប្រាសាទព្រះវិហារ បន្ទាប់ពីមានការប៉ះទង្គិចគ្នា ហើយប្រសិនបើជាការពិតក្រុមអាវលឿងនឹងបណ្តេញទូតយូណេស្កូប្រចាំនៅប្រទេសថៃចេញ។ លោកប៉ានថេប ពង្សពួព័ន្ធ ឱ្យដឹងទៀតថា មានភស្តុតាងជារូបថត និងរបាយការណ៍របស់ JBC បញ្ជាក់ឱ្យដឹងថា វត្តកែវសិក្ខាគិរីស្វារៈ បានសាងសង់ឡើងនៅឆ្នាំ២០០៣ មិនមែននៅឆ្នាំ១៩៩៨ ដូចដែលកម្ពុជាអះអាងទេ។ ការសង់វត្តនេះជាការល្មើសលើកិច្ចព្រមព្រៀង (MOU) ឆ្នាំ២០០០ ដែលមិនឱ្យមានការសាងសង់ ឬសង់បន្ថែមនៅក្នុងតំបន់ជម្លោះ ដូច្នេះហើយទើបស្នើសុំឱ្យនាយករដ្ឋមន្ត្រីធ្វើការត្រួតពិនិត្យ។ រាល់ការអះអាងរបស់ពួកអាវលឿងនេះ គឺជាគំនិតលេលាមួយ និងពិសពុលបំផុត ដោយធ្វើមិនដឹងមិនឮថា រដ្ឋាភិបាលរបស់ខ្លួនតាំងពីដើមមកមានភ្នែកអត់ប្រស្រីឬក្នុងការចុះហត្ថលេខាលើ MOU នោះ? ការទាមទាររបស់ក្រុមអាវលឿងជ្រុលនិយមរបស់សៀមនេះ ប្រៀបដូចជាការដុតកំឡោចសម្ព័ន្ធភាពរវាងកម្ពុជា-ថៃ ខណៈពេលបច្ចុប្បន្នស្ថានការណ៍នៅតាមព្រំដែនកំពុងមានភាពតានតឹង ដោយថៃកំពុងបន្ថែមគ្រឿងសព្វាវុធ និងកម្លាំងទ័ពកំញើញកម្ពុជា។ ទោះបីជាបែបណា ក្រុមអាវលឿងសៀមគ្រាន់តែជាក្រុមមួយប៉ុណ្ណោះ មិនមែនតំណាងឱ្យប្រជាជាតិថៃទាំងមូលទេ។ ចំពោះការទាមទាររបស់ក្រុមអាវលឿងនោះមិនបានធ្វើឱ្យកម្ពុជាកោតក្រែងទេ និងត្រៀមតបតវិញប្រសិនបើមានការឈ្លានពានពីទាហានសៀម។ ចំពោះការទាមទាររបស់ពួកអាវលឿងសៀម ដែលប្រឆាំងនឹងតំណាងយូណេស្កូ ក៏ជាហេតុផលមួយនឹងធ្វើឱ្យបណ្តាប្រទេសនៅទូទាំងពិភពលោកបានយល់កាន់តែច្បាស់ពីគំនិតដ៏អាក្រក់របស់ពួកអាវលឿងជ្រុលនិយមដែលចង់បានទឹកដីកម្ពុជា និងរារាំងការសំរបសំរួលរបស់អង្គការយូណេស្កូ ដែលការពារបេតិកភណ្ឌពិភពលោក ។
លោកស ធារឹទ្ធ បានផ្តល់អត្ថបទមួយរបស់លោកឆ្លុះបញ្ចាំងពីពួកអាវលឿងថា ប្រទេសសៀមកើតភាពវឹកវរ និងចលាចលពាសពេញផ្ទៃប្រទេស ក៏ដោយសារតែការប្រកាន់ភាពជាតិនិយមជ្រុលហួសហេតុ រហូតដល់លាបពណ៌ដាក់គ្នារវាងជាតិសាសន៍ឯង ដើម្បីបំពេញមហិច្ឆតានៃផលប្រយោជន៍ផ្ទាល់ខ្លួន និងការល្មោភអំណាចនៃក្រុមរបស់ខ្លួន រហូតដល់ជម្លោះផ្ទៃក្នុងនេះមិនអាចបញ្ឈប់បាន ក៏ចេះតែយកលេសរករឿងគ្នាពីបញ្ហានេះបញ្ហានោះ មិនចេះចប់មិនចេះហើយ។ ពិសេសពួកក្រុមអាវលឿងនេះឯង ចេះតែធ្វើការប្រឆាំងរដ្ឋាភិបាលសៀមខ្លួនឯងគ្រប់រឿង មិនថាខុស ឬត្រូវគិតតែពីប្រឆាំងគ្រប់រឿង ដោយបញ្ឆេះឱ្យជាតិសាសន៍របស់ខ្លួនមកបង្កជម្លោះជាមួយប្រទេសជិតខាង ។ ពួកក្រុមអាវលឿង ជាក្រុមមនុស្សពាលដែលធ្វើមិនយល់ប្រវតិ្តសាស្រ្តប្រទេសជាតិរបស់ខ្លួន ហើយចេះតែនិយាយផ្តេសផ្តាសក្នុងគោលបំណងបោកប្រាស់ និងពង្វក់ស្មារតីជាតិសាសន៍ខ្លួន ហើយនាំប្រទេសធ្លាក់ចូលក្នុងជម្លោះរ៉ាំរ៉ៃ ពិសេសចូលចិត្តបង្កើតទស្សនៈឆ្កួតៗរបស់ក្រុមខ្លួនមកលើកម្ពុជា ដោយយកបញ្ហាប្រាសាទព្រះវិហារ បញ្ហាដីជុំវិញតំបន់ប្រាសាទនោះ មកធ្វើជាលេសបង្កទំនាស់ជាមួយកម្ពុជា។ ហេតុផលទាំងនេះសរបញ្ជាក់ពីអំពើឆ្កួតលេលា និងមិនដឹងខុសត្រូវដែលក្រុមជនជាតិសៀមនេះបង្កើតឡើងជារៀងរាល់ថ្ងៃ ដើម្បីបង្កសង្គ្រាមនៅតាមបណ្តោយពំ្រដែនកម្ពុជា-សៀម។ យើងមិនយល់ថា តើពួកក្រុមអាវលឿងនេះ មានខួរក្បាលជាមនុស្សធម្មតា ឬមិនមានលក្ខណៈធម្មតាយ៉ាងណានោះទេ? ប៉ុន្តែបើយើងស្តាប់ទស្សនៈ និងមតិដែលពួកក្រុមនេះលើកឡើងជារឿយៗ ហាក់បីដូចជាទស្សនៈមនុស្សគ្មានការចេះដឹងអ្វីបន្តិចសោះ ឬជាមនុស្សខ្វះការអប់រំយ៉ាងពិតប្រាកដ ពីព្រោះទស្សនៈរបស់ពួកក្រុមនេះ តែងតែលើកឡើងដោយគ្រាន់ជាទស្សនៈឡប់ៗតែប៉ុណ្ណោះ បើនិយាយឱ្យស្រួលស្តាប់បន្តិចទៅយើងអាចចាត់ទុកបានថា ពួកក្រុមអាវលឿងនេះ គឺជាពពួកក្រុមមនុស្សមិនគ្រប់ទឹក ៕  |
| សមត្ថកិច្ចចាប់ធុងដាក់ត្រីរបស់អាជីវករកណ្តាលយប់ដាក់សាលាខណ្ឌឫស្សីកែវ Posted: 26 Feb 2011 05:30 PM PST រាជធានីភ្នំពេញ ៖ កាលពីវេលាម៉ោង១១យប់ថ្ងៃទី២៣ កុម្ភៈ កន្លងមក កម្លាំងប៉ូលិសដឹកនាំដោយលោកអធិការរងយឹម សាវុទ្ធ និងអនុប្រធានសណ្តាប់ធ្នាប់ខណ្ឌឫស្សីកែវ បាននាំ កម្លាំងប្រមាណជា១០នាក់ ចុះទៅចាប់យកធុងត្រីចំនួន៨ធុង ក្នុងនោះមានធុងត្រីអណ្តែង៤ធុង ក្នុង១ធុង ទម្ងន់ត្រី១០០គីឡូក្រាម ត្រីរ៉ស់៣ធុង ចំនួន១០០គីឡូក្រាម ជញ្ជីងប៉ុង១ ខេង១ ធុងទទេ១ ដែលសរុបជាទឹកប្រាក់ចំនួន៤លានរៀល ។ អ្នកស្រីចាន់ ផល្លី ដែលជាម្ចាស់ត្រីមានទីតាំងផ្ទះលេខ៤B ផ្លូវទំនប់កប់ស្រូវ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ បានមានប្រតិកម្មជុំវិញការចាប់រឹបអូសនេះ ដោយបានចោទថា សកម្មភាពបែបនេះ មិនអាចទទួលយកបានទេ ព្រោះគាត់មានមុខរបរលក់ និងទិញផលជលផល នៅមុខផ្ទះរបស់គាត់ ។ អ្នកស្រីចាន់ ផល្លី បានបន្តថា ការលក់ និងទិញផលនេសាទនេះគឺគាត់មានច្បាប់ចេញពីលោកងិន ឌី នាយខណ្ឌរដ្ឋបាលជលផលភ្នំពេញ ឱ្យបង្កើតទីតាំងលក់ត្រឹមត្រូវនិងមានលិខិតអនុញ្ញាតឱ្យដឹកជញ្ជូនផលជលផលចេញពីភ្នំដិន ស្រុកគិរីវង់ ខេត្តតាកែវ មកភ្នំពេញ ដែលចុះហត្ថលេខាដោយលោកប្រតិភូរាជរដ្ឋាភិបាលកម្ពុជាទទួលបន្ទុកប្រធានរដ្ឋបាលជលផលត្រឹមត្រូវ ។ បើសិនក្រុមនោះជាសមត្ថកិច្ចពេញច្បាប់មែននោះគួរតែមានសេចក្តីប្រកាស ឬសេចក្តីណែ នាំពីជំនាញដែលពាក់ព័ន្ធ ឬមួយមានលិខិតកោះហៅអ្នកលក់មកសាកសួរពីច្បាប់ ឬផលប៉ះពាល់ ទើបគួរ ។ នៅព្រឹកថ្ងៃទី២៤ កុម្ភៈ ម្ចាស់ត្រីបានរកឃើញធុង និងត្រី ជញ្ជីង ខេង នៅក្នុងសាលាខណ្ឌឫស្សីកែវ ទើបដឹងថា កម្លាំងប៉ូលិស និងសណ្តាប់ធ្នាប់ទាំងនេះជារបស់ខណ្ឌឫស្សីកែវ ។ មន្ត្រីនៅក្នុងសាលាខណ្ឌម្នាក់បានប្រាប់ម្ចាស់ត្រីថា ការចុះទៅចាប់យកធុងត្រីយប់មិញនេះ គឺធ្វើតាមបញ្ជារបស់លោកអភិបាលខណ្ឌ ឫស្សីកែវ និងធ្វើតាមពាក្យបណ្តឹងរបស់ថៅកែយឿត្រីគីឡូម៉ែត្រលេខ៩ ដោយចោទថា កន្លែងលក់របស់ស្ត្រីឈ្មោះចាន់ ផល្លី នោះគឺជាកន្លែងលក់អនាធិបតេយ្យ ។ អ្នកស្រីចាន់ ផល្លី បានបញ្ជាក់ថា បើអាជ្ញាធរធ្វើតាមពាក្យបណ្តឹងនោះ គួរតែធ្វើសេចក្តីប្រកាសណាមួយ ឬក៏ហៅគាត់ទៅសាកសួររកច្បាប់ទម្លាប់ជាមុនសិន មិនមែនទៅចាប់រឹបអូសទាំងកណ្តាលយប់បែបនេះ ឡើយ ។ ប្រតិកម្មខាងលើនេះមិនអាចរកការបំភ្លឺណាមួយពីសមត្ថកិច្ចខណ្ឌឫស្សីកែវបាននៅឡើយទេជុំវិញការរឹបអូសនេះ ៕  |
| វត្តកែវសិក្ខាគិរីស្វារៈក្រោយការបំផ្លាញពីភាគីសៀម Posted: 26 Feb 2011 05:15 PM PST     ខេត្តព្រះវិហារ ៖ វត្តកែវសិក្ខាគិរីស្វារៈដែលសង់ឡើងនៅលើអធិបតេយ្យភាពរបស់កម្ពុជានាអំឡុងឆ្នាំ១៩៩៨ បានរងការខូចខាតដោយការបាញ់ផ្លោងអាវុធគាំទ្រធុនធ្ងន់ជាច្រើនរយគ្រាប់ពីសំណាក់ទាហានសៀមឈ្លានពានកាលពីដើមខែកុម្ភៈ កន្លងទៅនេះ បណ្តាលឱ្យខូចខាតយ៉ាងទម្ងន់ ។ មកដល់ពេលនេះមិនទាន់មានការជួសជុលនឹងរៀបចំតម្កល់ព្រះពុទ្ធរូបដែលសេសសល់ពីការបាក់បែកឡើងវិញនៅឡើយទេ ។ នៅក្នុងបរិវេណវត្ត ពេលនេះបើចង់ចូលទៅអុជធូបគោរពបូជារំលឹកដល់បារមីនៃកំពូលភ្នំប្រាសាទព្រះវិហារ គឺមិនមានអ្វីដែលមានសភាពស្រស់បស់នឹងស្អាតបាតដូចជាពេលមុននោះទេ គឺដោយសារតែដំបូលព្រះវិហារប្រក់មេឃជញ្ជាំងបាក់ធ្លុះធ្លាយ និងព្រះពុទ្ធបដិមាក៏ត្រូវបែកបាក់អស់មួយចំនួនធំទៅហើយដែរមើលឃើញគួរឱ្យអាណោចអាធមណាស់ ។ ចំណែកទីធ្លានៅជុំវិញវត្តក៏ដូចគ្នាដែរ ។ នៅលើផ្ទៃដីគេក្រឡេកមើលទៅឃើញតែស្នាមរណ្តៅ និងអំបែងគ្រាប់នៅរាយប៉ាយ ហើយរណ្តៅខ្លះ មានក្បាលគ្រាប់លិចនៅក្នុងដីមិនទាន់ផ្ទុះក៏មានដែរ។ បច្ចុប្បន្នមានព្រះសង្ឃគង់នៅចំនួន៦អង្គ គឺភិក្ខុ៣អង្គ សាមណេ៣អង្គ និងសិស្សចំនួន៦នាក់ ។ ក្នុងវត្តពុំមានតាជីយាយជីទេ ដោយសារមានការភ័យខ្លាចពីសុវត្ថិភាព និងត្រូវបានចាកចេញពីទីអារាមទៅស្នាក់នៅទីកន្លែងឆ្ងាយៗអស់ហើយ ។ ព្រះតេជគុណព្រះនាម ស៊ុន ស័ង្ហ ចៅអធិការវត្តកែវសិក្ខាគិរីស្វារៈ បានមានថេរដីកាឱ្យដឹងថា ព្រះសង្ឃនិងសិស្សដែលកំពុងគង់នៅ និងរស់នៅក្នុងវត្តនេះ គឺត្រូវចំអិនចង្ហាន់ឆាន់ដោយខ្លួនឯង ។ ចំពោះគ្រឿងចង្ហាន់សម្រាប់ផ្គត់ផ្គង់លោកនឹងកូនសិស្សនៅក្នុងវត្តសព្វថ្ងៃ បានមកពីសប្បុរសជនប្រគេនពីទីជិតឆ្ងាយ និងពីកងទ័ពដែលកំពុងប្រចាំការនៅទីនោះ ។ ដោយឡែកចំពោះទីអារាមដែលត្រូវខ្ទេចខ្ទាំដោយសារពួកទមិឡឥតសាសនាសៀមឈ្លានពានបានបាញ់ផ្លោងដាក់ប៉ុនប៉ងកំទេចទីអារាមឱ្យទៅជាផេះ គឺព្រះអង្គនៅមិនទាន់បានបោសសំអាតនៅឡើយទេ ដោយសារខ្លាចបំណែកគ្រាប់ និងគ្រាប់មួយចំនួនដែលមិនទាន់ផ្ទុះនៅជុំវិញបរិវេណវត្ត ។ ព្រះចៅអធិការវត្តបានបញ្ជាក់ឱ្យដឹងថា កន្លងទៅថ្មីៗនេះអាជ្ញាធរជាតិប្រាសាទព្រះវិហារបានធ្វើការត្រួតពិនិត្យ និងវាស់វែងទៅលើការខូចខាតរួចម្តងហើយដែរ ក៏ប៉ុន្តែការដែលត្រូវជួសជុលនៅពេលណា គឺព្រះតេជគុណចៅអធិការវត្តពុំបានដឹងទេ ។ ជុំវិញវិនាសសកម្មនៅវត្តកែវសិក្ខាគិរីស្វារៈ គឺមិនទាន់អាចធ្វើការជួសជុលឡើងវិញបានទេ ដោយសារទី១-ស្ថានការណ៍ផ្នែកយោធាក្នុងតំបន់នោះនៅមិនទាន់មានស្ថិរភាពនៅឡើយ ទី២-គឺពេលនេះគេត្រូវរក្សាទុកភស្តុតាងនៃការខូចខាតទាំងនោះទុកឱ្យភ្ញៀវជាតិ និងអន្តរជាតិដែលបានឡើងទៅទស្សនាប្រាសាទព្រះវិហារបានឃើញនូវមហន្តរាយដែលបង្កឡើងដោយសារកងទ័ពសៀមឈ្លានពានមកលើទឹកដីកម្ពុជាយើង ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
