Koh Santipheap Daily |
- សោកនាដកម្ម
- លីប៊ី ៖ ស្លាប់6.000នាក់តាំងពីចាប់ផ្តើមការបះបោរមក
- ឆ្កែហិតក្លិនរកគ្រឿងផ្ទុះមួយក្បាលគាំងបេះដូងងាប់ក្រោយពីម្ចាស់ស្លាប់
- ប្រេងឡើងថ្លៃដល់លើស100ដុល្លារមួយធុងនៅញូវយ៉ក
- រុស្ស៊ីនឹងដាក់ពង្រាយមីស៊ីលបណ្តែតលើប្រជុំកោះគូរីល
- សម្តេចតេជោ ៖ សង្គ្រាមឈ្លានពានរបស់ថៃថោកទាបបំផុត...កម្ពុជាត្រៀមលក្ខណៈ រួចរាល់សម្រាប់អ្នកសង្កេតការណ៍...ចុងក្រោយនឹងទៅតុលាការអន្តរជាតិ
- រ៉េត រ៉ាដា ល្បីតាមរយៈបទ«មនុស្សប្រុសហេងស៊យ»និងបទ «ប្តីខ្ញុំទេនាង»
- អគ្គីភ័យបានឆាបឆេះសន្ធោសន្ធៅផ្ទះ២ល្វែងនៅសង្កាត់ផ្សារកណ្តាល១ទាំងស្រុង
- អ្នកកាសែតម្នាក់ត្រូវក្មេងស្ទាវស្រវឹងវាយបែកក្បាល ខណៈដេកចាំប្រមាញ់អ្នកដឹកឈើ
- ទិវាស្លៀកតែសម្លៀកបំពាក់ក្នុងរៀបចំឡើងនៅប្រទេសប្រេស៊ីល
- លីប៊ី ៖ ស្លាប់៦.០០០នាក់តាំងពីចាប់ផ្តើមការបះបោរមក
- រថយន្តក្រុងដឹកអ្នកដំណើរកៀរដៃចង្កូចម៉ូតូរបួសធ្ងន់មនុស្ស៣នាក់
- លោកកាដាហ្វីធ្វើការវាយបក ហើយសន្យាធ្វើសង្គ្រាមក្នុងករណីមានអន្តរាគមន៍របស់បរទេស
- ម៉ោងប្រមាណជាង១០ព្រឹកនេះ លោកនាយឧត្តមសេនីយ៍នាង ផាត នឹងដឹកនាំប្រតិភូអនុព័ន្ធយោធាទៅដល់តំបន់ប្រាសាទព្រះវិហារ
- ខណៈពេលកីឡាករប្រវត្តិសាស្ត្រ Barcelonaរិះគន់ Real Madrid ថាខ្សោយ គ្រូបង្វឹកក្លឹប Palermo ត្រូវបណ្តេញចេញពីតំណែងក្រោយចាញ់ក្លឹបUdinese៧-០
- បាញ់ប្រហារលើទាហានអាមេរិកនៅទីក្រុងហ្វ្រង់ហ្វើតអាល្លឺម៉ង់ស្លាប់2នាក់
- ប្រជាជនចិនអាចមានចំនួនសរុបនៅទូទាំងប្រទេស1.341លាននាក់
- សេវាផ្តល់ព័ត៌មានប្រកបដោយគុណភាព និងត្រឹមត្រូវចាំបាច់សម្រាប់កិច្ចអភិវឌ្ឍន៍
- ប្លន់រថយន្តឆ្លាមទៅប្លុងចោលនៅកំពតត្រូវជាប់ខ្នោះ៣នាក់
- កញ្ញាមាស សុខសោភា ចូលរួមអបអរពិធីតាំងបង្ហាញផលិតផល Samsung ស៊េរីថ្មី
| Posted: 02 Mar 2011 11:26 PM PST ស្ថាប័នអធិការកិច្ចបឋមសិក្សាបញ្ជូនមន្ត្រីឈ្មោះវិនសុន ភីថឺ ឱ្យចុះត្រួតពិនិត្យការបង្រៀន និងការរៀនសូត្ររបស់សិស្សនៅតាមសាលាបឋមសិក្សា ។ ពេលមកដល់សាលាបឋមសិក្សានៅចុងកាត់មាត់ញក លោកវិនសុន ភីថឺ ជ្រើសរើសយកថ្នាក់ដំបូងមួយសម្រាប់ធ្វើការសាកល្បងសមត្ថភាពសិស្ស ។ គាត់សួរខ្លាំងៗ ៖ -ចំណោមក្មួយៗរាល់គ្នា មានក្មួយណាអាចឱ្យឧទាហរណ៍អ្វីដែលល្មមចាត់ទុកជាសោកនាដកម្មបាន ទេ? ក្មួយណាក្លាហានក្រោកឆ្លើយមុនគេឱ្យលោកគ្រូស្គាល់មុខផង ។ -ឧទាហរណ៍របស់ខ្ញុំ គឺមិត្តខ្ញុំម្នាក់ពេលកំពុងលេងជាមួយខ្ញុំលើចិញ្ចើមថ្នល់ ស្រាប់តែមានរថយន្តមួយគ្រឿងភ្លាវចង្កូតឡើងមកកិនវាស្លាប់ តើនេះហៅថា សោកនាដកម្មបានទេ? កុមារទីពីរក្រោកឡើងទៀត ៖ -ចុះប្រសិនបើរថយន្តបឺសមួយគ្រឿងដឹកសិស្សតូចៗ៥០នាក់ ទៅកម្សាន្តទេសភាពតាមជនបទ ស្រាប់តែរអិលធ្លាក់ជ្រោះជ្រៅ សិស្សតូចៗស្លាប់អស់គ្មានសល់ម្នាក់ ។ តើនេះហៅថា សោកនាដកម្មទេ? -មិនដូចគ្នាទេ នេះគេហៅការបាត់បង់ជីវិតដ៏ធំ ។ ក្នុងថ្នាក់ស្ងាត់ច្រៀប បន្ទាប់ពីឧទាហរណ៍ដែលលើកឡើងត្រូវបានបដិសេធជាបន្តបន្ទាប់។ ឃើញដូច្នេះលោកមន្ត្រីអធិការកិច្ចបឋមសិក្សាសួរបន្ត ៖ -ម៉េចដែរ មានក្មួយណាអាចនិយាយបានពីឧទាហរណ៍សោកនាដកម្មទេ? ចុងក្រោយមានដៃស្គមតូចមួយលើកឡើងរបៀបស្ទាក់ស្ទើរញញើតញញើមគឺ ជាកុមារតូចម្នាក់អង្គុយចុងថ្នាក់ក្រោកឡើងនិយាយ ៖ -ឧទាហរណ៍របស់ខ្ញុំ គឺថ្ងៃមួយយន្តហោះផ្លូវឆ្ងាយមួយគ្រឿងដែលមានលោកអធិការវិន សុន ភីថឺ ជិះក្នុងនោះផង ត្រូវពួកភេរវករដាក់គ្រាប់បែក បណ្តាលឱ្យផ្ទុះឆេះកណ្តាលអាកាស តើនេះហៅថា សោកនាដកម្មបានទេ? -អស្ចារ្យ! នេះទើបពិតជាសោកនាដកម្មមែន។ ប៉ុន្តែក្មួយឯងត្រូវបកស្រាយឱ្យគ្រូស្តាប់ តើហេតុម៉េចនឹកឃើញពីដំបូងថា នេះជាសោកនាដកម្ម? -បាទ! ព្រោះខ្ញុំគិតថា វាមិនមែនជាឧប្បត្តិហេតុគ្រោះថ្នាក់ចរាចរណ៍ ហើយក៏មិនមែន... មិនមែនជាការបាត់បង់ជីវិតនរណាមួយ វាជាឧទាហរណ៍ដែលមានពាក់ព័ន្ធដល់ជីវិតលោកគ្រូជាង រឿងអីលោកគ្រូមិនចាត់ទុកជាសោកនាដកម្ម?  |
| លីប៊ី ៖ ស្លាប់6.000នាក់តាំងពីចាប់ផ្តើមការបះបោរមក Posted: 02 Mar 2011 11:05 PM PST  សហរដ្ឋអាមេរិកបានពិចារណាលើដំណោះស្រាយជាច្រើនដើម្បីធ្វើឱ្យលោកកាដាហ្វី សុខចិត្តចុះញ៉ម ។ ការហាមហោះហើរលើប្រទេសលីប៊ី នឹងជាលទ្ធភាពមួយ ។ សហភាពអឺរ៉ុបសម្រាប់ពេលនេះ នៅរារែកចំពោះអន្តរាគមន៍យោធាមួយ ។ ការប្រយុទ្ធគ្នាយ៉ាងសាហាវនានាកើតមាននៅទីក្រុង BREGA ដែលមានទីតាំងប្រេងកាតដ៏សំខាន់មួយស្ថិតនៅចម្ងាយ២០០គីឡូម៉ែត្រ ពីក្រុងបេនហ្គាហ្ស៊ី ។ សភាពការណ៍មនុស្សធម៌កាន់តែពិបាកខ្លាំងឡើងដោយយោងតាមប្រទេសអ៊ីតាលីថា ពួកអន្តោប្រវេសន៍ដល់ទៅ១,៥លាននាក់ ប៉ុនប៉ងរត់ភៀសខ្លួនចេញពីលីប៊ី។  |
| ឆ្កែហិតក្លិនរកគ្រឿងផ្ទុះមួយក្បាលគាំងបេះដូងងាប់ក្រោយពីម្ចាស់ស្លាប់ Posted: 02 Mar 2011 10:56 PM PST  ចាត់ទុកថា ជារឿងស្មានមិនដល់មួយនៅពេលឆ្កែហិតក្លិនរកគ្រឿងផ្ទុះមួយក្បាលបានងាប់ដោយសារគាំងបេះដូងក្រោយពីម្ចាស់របស់វាស្លាប់ ។ ឆ្កែមួយក្បាលនេះ និងម្ចាស់របស់វាជាទាហានអង់គ្លេសឈ្មោះ Liam Tasker បានបំពេញបេសកកម្មដោយមិនខ្លាចនឿយហត់ជួយសង្គ្រោះជីវិតមនុស្សរាប់មិនអស់នៅប្រទេសអាហ្វហ្គានីស្ថាន ហើយរកឃើញគ្រាប់បែកផលិតក្នុងស្រុក១៤គ្រាប់ និងអាវុធជាច្រើនក្នុងរយៈពេលតែ៥ខែប៉ុណ្ណោះ ។  |
| ប្រេងឡើងថ្លៃដល់លើស100ដុល្លារមួយធុងនៅញូវយ៉ក Posted: 02 Mar 2011 10:56 PM PST ប្រេងឆៅអាមេរិកបានឡើងថ្លៃជាង២,៥% ទៀតកាលពីថ្ងៃទី២ មីនា នៅទីផ្សារក្រុងញូវយ៉កគឺដល់លើសពី១០០ដុល្លារ ក្នុងមួយធុងជាលើកដំបូងពុំធ្លាប់មានចាប់តាំងពីខែកញ្ញា ឆ្នាំ២០០៨ មក ដោយសារតែមានការកើនឡើងនៃការប្រយុទ្ធគ្នានៅលីប៊ី ។ តម្លៃប្រេងឆៅពេលបិទទីផ្សារថ្ងៃទី២ មីនា បានឡើង២,៦០ដុល្លារ ឬ២,៦១% ដល់១០២,២៣ដុល្លារ ក្នុងមួយធុង ។ ទូរទស្សន៍អាល់ហ្សាហ្ស៊ីរ៉ារាយការណ៍ថា យន្តហោះប្រយុទ្ធរបស់លីប៊ី កាលពីថ្ងៃទី២ មីនា បានវាយប្រហារលើទីក្រុង AJDABIAH ដែលមានមូលដ្ឋានយោធាមួយ និងឃ្លាំងអាវុធមួយ ។ ក្រុង AJDABIAH គឺជាទីក្រុងធំមួយក្នុងចំណោមទីក្រុងធំៗនៅភាគខាងកើតលីប៊ី ដែលស្ថិតក្នុងកណ្តាប់ដៃពួកបះបោរ ។ ក្រុងនេះស្ថិតនៅចម្ងាយ១៦០គីឡូម៉ែត្រ ខាងត្បូងក្រុងបេនហ្គាហ្ស៊ី ។ ការវាយប្រហារតាមអាកាសដទៃៗទៀតកើតមាននៅក្រុង BREGA ជាក្រុងមួយស្ថិតនៅចម្ងាយតែ២គីឡូម៉ែត្រ ពីទីតាំងប្រេងកាតមួយរបស់លីប៊ី ។ គេមានការលំបាកព្យាករណ៍ដែលថា រដ្ឋាភិបាលលីប៊ីអាចវាយប្រហារទីតាំងប្រេងកាតទាំងឡាយនៅភាកខាងកើតប្រទេស ឬគ្រាន់តែវាយប្រហារលើតំបន់កាន់កាប់របស់ពួកឧទ្ទាម ហើយទីផ្សារប្រេងមានការព្រួយបារម្ភលើលទ្ធភាពនៃការវាយប្រហារទីតាំងប្រេង ទើបញ៉ាំងឱ្យប្រេងឡើងថ្លៃយ៉ាងខ្ពស់បែបនេះ ។  |
| រុស្ស៊ីនឹងដាក់ពង្រាយមីស៊ីលបណ្តែតលើប្រជុំកោះគូរីល Posted: 02 Mar 2011 10:49 PM PST ទីភ្នាក់ងារសារព័ត៌មានរុស្ស៊ី INTERFAX រាយការណ៍កាលពីថ្ងៃទី២ មីនា ថា ប្រទេសរុស្ស៊ី នឹងដាក់ពង្រាយមីស៊ីលបណ្តែតប្រឆាំងនាវាមុជទឹក និងប្រព័ន្ធការពារអាកាសទំនើបនៅលើប្រជុំកោះគូរីល ក្នុងនោះរួមទាំងកោះ៤ត្រួតត្រាដោយរុស្ស៊ី ហើយអធិបតេយ្យភាពលើកោះ៤នោះទាមទារដោយជប៉ុនដែរ ។ ដោយដកស្រង់សំដីអ្នកទទួលខុសត្រូវម្នាក់នៃសេនាធិការដ្ឋានកងទ័ពរុស្ស៊ី INTERFAX និយាយថា រុស្ស៊ីនឹងដាក់ពង្រាយមីស៊ីលប្រឆាំងនាវាមុជទឹកធុន YAKHONT ហើយតម្លើងប្រព័ន្ធការពារប្រឆាំងមីស៊ីលធុន TOR-M2 ។ មីស៊ីលបណ្តែតទាំងឡាយអាចដាក់ពង្រាយលើកោះ ITOUROUP និងកោះ KOUNACHIR ជាកោះ២ ក្នុងចំណោមកោះ៤ដែលមានជម្លោះហើយមានទីតាំងយោធារុស្ស៊ីដ៏សំខាន់ ។  |
| Posted: 02 Mar 2011 10:49 PM PST រាជធានីភ្នំពេញ ៖ ក្នុងឱកាសអញ្ជើញជាអធិបតីនៃទិវាវប្បធម៌ជាតិលើកទី១៣ នៅសាលសន្និសីទចតុមុខ កាលពីព្រឹកថ្ងៃទី៣ មីនា ២០១១ នេះ សម្តេចតេជោនាយករដ្ឋមន្ត្រីហ៊ុន សែន បានមានប្រតិកម្មខ្លាំងៗចំពោះមហិច្ឆតាអាក្រក់របស់ថៃថា ការបាញ់មកលើប្រាសាទព្រះវិហារពីសំណាក់ទាហានថៃជាង៤០០គ្រាប់កាំភ្លើងធំនោះ និងការបាញ់មកលើតំបន់ផ្សេងៗនៃប្រទេសកម្ពុជា មិនមែនជាការផ្ទុះអាវុធដោយគ្រាន់តែខ្វែងគំនិតគ្នានោះទេ...ការពិតនេះជាសង្គ្រាម...ហើយសង្គ្រាមនេះមិនមែនត្រឹមតែឈ្លានពានទឹកដីប៉ុណ្ណោះទេ គឺឈ្លានពានដណ្តើមសម្បត្តិវប្បធម៌ថែមទៀត ដែលនេះជាមហិច្ឆតាថោកទាបក្រៅតម្រា ប្រាសចាកច្បាប់ជាតិ និងអន្តរជាតិ ។  |
| រ៉េត រ៉ាដា ល្បីតាមរយៈបទ«មនុស្សប្រុសហេងស៊យ»និងបទ «ប្តីខ្ញុំទេនាង» Posted: 02 Mar 2011 10:38 PM PST    រាជធានីភ្នំពេញ ៖ កញ្ញារ៉េត រ៉ាដា ក្នុងវ័យ២៣ឆ្នាំដ៏ស្រស់សោភាបានក្លាយជាអ្នកចំរៀងតាមរយៈការប្រឡងក្នុងកម្មវិធីស្ពានតារានៃស្ថានីយទូរទស្សន៍ CTN ជាប់ចំណាត់ថ្នាក់លេខ១នាឆ្នាំ២០០៨ ហើយនៅឆ្នាំ២០០៩នាងបានថតសំលេងចូលស៊ីឌី និងសំដែងកាយវិការខារ៉ាអូខេឱ្យផលិតកម្មស្វាងតារា និងច្រៀងជាកិត្តិយសតាមកម្មវិធីប្រគំតន្ត្រីចុងសប្តាហ៍របស់ស្ថានីយទូរទស្សន៍នានាផងដែរ។ តាមរយៈទឹកដមសម្លេងពីរោះគួបផ្សំនឹងរូបសម្ផស្សស្រស់ស្អាតផងនោះនៅពេលកញ្ញារ៉ាដាឡើងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាម្តងៗគេសង្កេតឃើញមានអ្នកទស្សនាផ្ទាល់ទះដៃសំដែងការគាំទ្រយ៉ាងច្រើនកុះករ ជាពិសេសនោះយុវវ័យតែម្តង។ ជាក់ស្តែងកាលពីថ្ងៃទី២០ ខែកុម្ភៈ ឆ្នាំ២០១១ នៅពេលនាងច្រៀងនៅលើឆាកប្រគំតន្ត្រីថ្ងៃអាទិត្យក្នុងកម្មវិធីតន្ត្រីយុវវ័យរីករាយ របស់ស្ថានីយទូរទស្សន៍អប្សរាប៉ុស្តិ៍លេខ១១ តាមរយៈបទ«មនុស្សប្រុសហេងស៊យ» និង«បទប្តីខ្ញុំទេនាង» មានការគាំទ្រពីសំណាក់ប្រិយមិត្តអ្នកទស្សនាយ៉ាងច្រើនកុះករ។ កញ្ញារ៉េត រ៉ាដា តារាថ្មីទើបរះឡើងក្នុងរយៈពេល២ឆ្នាំមកនេះទទួលជោគជ័យជាបន្តបន្ទាប់ ហើយធ្លាប់បានយុវវ័យទទួលស្គាល់តាមរយៈបទខូចខ្លួនកុំខូចចិត្ត ហើយក្នុងឆ្នាំ២០១១នេះកំពុងត្រៀមចេញបទថ្មីៗជាច្រើនទៀតដូចជាបទ ហេតុផលចំលែក បទឆូតកាតទៅលេងស្រុក ជាដើម។  |
| អគ្គីភ័យបានឆាបឆេះសន្ធោសន្ធៅផ្ទះ២ល្វែងនៅសង្កាត់ផ្សារកណ្តាល១ទាំងស្រុង Posted: 02 Mar 2011 10:27 PM PST  រាជធានីភ្នំពេញ ៖ ផ្ទះប្រជាពលរដ្ឋ២ល្វែងធ្វើអំពីថ្មក្រោម ឈើខាងលើ លេខ៧១និង៧៣Eo ត្រូវបានអគ្គីភ័យឆាបឆេះយ៉ាងសន្ធោសន្ធៅខ្ជាក់ផ្សែងខ្មៅអាប់ ហុយឡើងទៅលើអកាសវេហាស៍បង្កឱ្យមានការភ្ញាក់ផ្អើល និងតក់ស្លុតយ៉ាងខ្លាំងពីសំណាក់អ្នករងគ្រោះ និងអ្នករស់នៅក្បែរនោះ កាលពីវេលាម៉ោង៩និង៣០នាទីព្រឹកថ្ងៃទី៣ មីនា ២០១១ លើកំណាត់ផ្លូវលេខ១៣៦ សង្កាត់ផ្សារកណ្តាល១ ខណ្ឌដូនពេញ...ចំណែកមនុស្សម្នាជាច្រើនបានទៅចោមរោមមើលហេតុការណ៍វិនាសកម្មនេះយ៉ាងកកកុញ បណ្តាលឱ្យកកស្ទះចរាចរណ៍ផងដែរ ខណៈឡានទឹកពន្លត់អគ្គីភ័យរបស់សមត្ថកិច្ចពី៦ទៅ៧គ្រឿង កំពុងចេញ-ចូលបង្ក្រាបភ្លើងឥតដាច់រយៈ ។ បុរសម្ចាស់ផ្ទះលេខ៧១Eo ឈ្មោះសែស រិទ្ធ អាយុ៤៨ឆ្នាំ ជាមន្ត្រីយោធាម្នាក់ ពេលអគ្គីភ័យកំពុងឆាបឆេះប្រពន្ធរបស់គាត់បានតក់ស្លុតរហូតដល់សន្លប់បាត់ស្មារតី...ចំណែកបុរសម្ចាស់ផ្ទះលេខ៧៣Eo ឈ្មោះឡោ វ៉ាន់ថា អាយុ៤៦ឆ្នាំ ជាអ្នកលក់ដូរ មុនពេលភ្លើងឆេះ គាត់បានចាក់សោផ្ទះចោល ដោយទុកកូនស្រីអាយុ៤ឆ្នាំ គ-ថ្លង់ឱ្យនៅក្នុងផ្ទះម្នាក់ឯង ប៉ុន្តែនាងមានវាសនាខ្ពស់បានរួចផុតពីសេចក្តីស្លាប់ដោយសារតែអ្នកជិតខាងទម្លាយសោយកនាងចេញមកក្រៅទាន់ពេលវេលា ។ តាមប្រភពព័ត៌មានជំហានដំបូងបានឱ្យដឹងថា មូលហេតុនៃការឆាបឆេះនេះគឺបណ្តាលមកពីផ្ទះសង់ថ្មីជាប់នោះ (កម្ពស់ច្រើនជាន់) ជាងផ្សារដែកធ្វើឱ្យធ្លាក់កម្ទេចផ្កាភ្លើងមកលើដំបូលស័ង្កសី និងប៉ះចំឈើ ឬប៉ះចំវត្ថុស្ងួតណាមួយងាយស្រួលឆាបឆេះ ទើបកើតជាអណ្តាតភ្លើងតែម្តងទៅ ។ មកដល់វេលាម៉ោង១១ព្រឹកថ្ងៃដដែល អគ្គីភ័យនេះត្រូវបានសមត្ថកិច្ចបាញ់ទឹកពន្លត់ឱ្យក្រាបរាបសូន្យសុងហើយ បន្សល់តែផ្សែងពណ៌សហុយរសាត់យឺតៗតែប៉ុណ្ណោះ និងគំនរផេះផង់លាយឡំជាមួយកំណាត់ធ្យូង...លំនៅឋាន២ល្វែងជាប់គ្នានេះត្រូវបានអគ្គីភ័យឆាបឆេះលេបត្របាក់អស់ទាំងស្រុង ចំណែកទ្រព្យសម្បត្តិក៏ត្រូវបានជញ្ជូនចេញរួចតិចតួចផងដែរ...តែទោះជាយ៉ាងណា សមត្ថកិច្ចបានប្រឹងប្រែងបាញ់ទឹកពន្លត់យ៉ាងសកម្ម មិនឱ្យឆេះរាលដាលទៅដល់ផ្ទះល្វែងជាប់នេះទៀតទេ ដោយគ្រាន់ជះអណ្តាតភ្លើងរោលខ្មៅជុំវិញផ្ទះជិតខាងខ្លះៗតែប៉ុណ្ណោះ៕  |
| អ្នកកាសែតម្នាក់ត្រូវក្មេងស្ទាវស្រវឹងវាយបែកក្បាល ខណៈដេកចាំប្រមាញ់អ្នកដឹកឈើ Posted: 02 Mar 2011 07:58 PM PST  ខេត្តសៀមរាប ៖ ភ្នាក់ងារកាសែតក្រុងកម្ពុជាម្នាក់ប្រចាំនៅស្រុកសូទ្រនិគម ត្រូវបានយុវជន២នាក់ ស្ថិតក្នុងសភាពស្រវឹងជោកជាំ កាប់ក្បាលនឹងពូថៅបណ្តាលឱ្យរយះដេរ៥ថ្នេរ កាលពីវេលាម៉ោង១១និង១៥នាទីយប់ ថ្ងៃទី២៧ កុម្ភៈ នៅក្នុងភូមិត្រពាំងថុង ឃុំពពេល ស្រុកសូទ្រនិគម ខណៈពេលកំពុងដេកលង់លក់នៅក្នុងអង្រឹងចាំឃ្លាំមើលបទល្មើសដឹកជញ្ជូនឈើខុសច្បាប់។ កាលពីព្រឹកថ្ងៃទី២ មីនា ជនសង្ស័យ២នាក់ក្នុងនោះម្នាក់ជាក្មេងទំនើងប្រចាំភូមិ និងម្នាក់ទៀតជាមន្ត្រីបំរើការក្នុងឧទ្យានជាតិភ្នំគូលែន ត្រូវបានសមត្ថកិច្ចប៉ូលិសចាប់ខ្លួនបញ្ជូនទៅកាន់អធិការដ្ឋាននគរបាលស្រុកសូទ្រនិគម ប៉ុន្តែជនដៃដល់ទាំង២នាក់នោះមិនត្រូវបានគេបញ្ជូនទៅតុលាការដើម្បីធ្វើការចោទប្រកាន់ទេ គឺត្រូវដោះលែងវិញ ក្រោយពីសំរួលដោះស្រាយគ្នាក្រៅប្រព័ន្ធច្បាប់រួចហើយ។ លោកអនុសេនីយ៍ឯក ហេង សំណាង អធិការរងនគរបាលស្រុកសូទ្រនិគម ទទួលបន្ទុកព្រហ្មទណ្ឌបានថ្លែងឱ្យដឹងថា ជនរងគ្រោះនៅក្នុងហេតុការណ៍នោះឈ្មោះទុំ មោង ភេទប្រុស អាយុ៣៧ឆ្នាំ រស់នៅក្នុងភូមិបុស្ស ឃុំដំដែក ស្រុកសូទ្រនិគម ជាអ្នកយកព័ត៌មានឱ្យកាសែតក្រុងកម្ពុជា បានរងរបួសបែកថ្ងាសរយះដេរ៥ថ្នេរ។ ចំណែកជនសង្ស័យបង្កអំពើហិង្សាទាំង២នាក់ដែលត្រូវបានចាប់ខ្លួននោះម្នាក់ឈ្មោះសាំ ហាក់ ភេទប្រុស អាយុ២៥ឆ្នាំ រស់នៅភូមិកើតហេតុ និងម្នាក់ទៀតឈ្មោះហៀន ហង់ រស់នៅភូមិតាពេញ ឃុំខ្នងភ្នំ ស្រុកស្វាយលើ ជាមន្ត្រីឧទ្យានុរក្សនៃឧទ្យានជាតិភ្នំគូលែន ប៉ុន្តែត្រូវបានលោកហង្ស សាវុធ នាយកឧទ្យានជាតិភ្នំគូលែន បញ្ជូនមកយាមដីរបស់គាត់នៅភូមិកើតហេតុ។ លោកអនុសេនីយ៍ឯក ហេង សំណាង បានបញ្ជាក់ថា នៅយប់កើតហេតុជនរងគ្រោះដែលជាអ្នកកាសែតរបស់អង្គភាពក្រុងកម្ពុជា រួមជាមួយអ្នកកាសែតម្នាក់ទៀតបានទៅចងអង្រឹងដេកនៅតាមផ្លូវក្នុងភូមិកើតហេតុ ដើម្បីចាំឃ្លាំមើលបទល្មើសព្រៃឈើ ហើយបក្សពួកជនដៃដល់បានផឹកស្រាសនៅក្បែរនោះដែរ លុះដល់ពេលស្រវឹងជោកជាំមិនដឹងជាមានគំនុំតាំងពីពេលណាមក ក៏យកពូថៅកាប់ទៅលើជនរងគ្រោះត្រូវចំថ្ងាសបណ្តាលឱ្យបែកហូរឈាមដេរ៥ថ្នេរ។ ចាងហ្វាងកាសែតក្រុងកម្ពុជា លោកសំ វិចិត្រ កាលពីព្រឹកថ្ងៃទី២ មីនា បានថ្លែងថា លោកកំពុងតែជំរុញឱ្យសមត្ថកិច្ចជួយអន្តរាគមន៍ចាត់ការទៅតាមច្បាប់ ដើម្បីទាមទាររកយុត្តិធម៌ឱ្យកូនចៅរបស់លោកចំពោះករណីកាប់ឱ្យរងរបួសយ៉ាងដំណំបែបនេះ។ លោកទុំ មោង ដែលត្រូវគេកាប់បានរៀបរាប់ឱ្យដឹងថា កាលពីវេលាយប់កើតហេតុខ្លួនបានទៅសុំរោងរបស់ឈ្មោះសាំ ដែលត្រូវជាឪពុកឈ្មោះសាំ ហាក់ ដើម្បីចងអង្រឹងដេកចាំឃ្លាំមើលសកម្មភាពដឹកជញ្ជូនឈើខុសច្បាប់ឆ្លងកាត់ផ្លូវនេះ ។ លោកទុំមោង បានបន្តថា នៅវេលាម៉ោងជាង១០យប់ ខណៈខ្លួនកំពុងដេកក្នុងអង្រឹង ស្រាប់តែមានមនុស្សពីរនាក់ម្នាក់កាន់ពូថៅ និងម្នាក់ទៀតកាន់ដំបងដើរសំដៅចូលមក ដោយអ្នកកាន់ដំបងបានវាយបំបែកអំពូលភ្លើងដើម្បីឱ្យងងឹត ចំណែកអ្នកកាន់ពូថៅស្ទុះចូលមកកាប់ក្បាលរបស់ខ្លួនដែលកំពុងតែដេកក្នុងអង្រឹងបណ្តាលឱ្យរងរបួសជាទម្ងន់ ហើយបន្ទាប់ពីធ្វើសកម្មភាពរួចពួកគេបានរត់គេចខ្លួនបាត់ ។ លោកអនុសេនីយ៍ឯក ហេង សំណាង នៅរសៀលថ្ងៃដដែលប្រាប់ថា ជនសង្ស័យទាំងពីរនេះអាចត្រូវបានបញ្ជូនទៅកាន់តុលាការច្រើនជាង បន្ទាប់ពីពួកគេបានយល់ព្រមធ្វើការសម្របសម្រួលដោយព្រមបង់លុយចំនួន៥ពាន់ដុល្លារទៅឱ្យជនរងគ្រោះតែគ្មានលុយបង់ទាន់ពេល ។ ទាក់ទិនទៅនឹងករណីដែលសមត្ថកិច្ចគ្រោងធ្វើការបញ្ចប់រឿងនោះ លោកទី សុវិនថាល់ ព្រះរាជអាជ្ញាសាលាដំបូងខេត្តសៀមរាបបានមានប្រសាសន៍ថា រាល់បទល្មើសព្រហ្មទណ្ឌសមត្ថកិច្ចមន្ត្រីនគរបាលយុត្តិធម៌មិនមានសិទ្ធិដោះលែងបានទេ ត្រូវតែបញ្ជូនសំណុំរឿងទៅតុលាការ ហើយការឃុំខ្លួន ឬមិនឃុំវាជាឆន្ទានុសិទ្ធិរបស់តុលាការ៕  |
| ទិវាស្លៀកតែសម្លៀកបំពាក់ក្នុងរៀបចំឡើងនៅប្រទេសប្រេស៊ីល Posted: 02 Mar 2011 07:49 PM PST  តារាម៉ូដែលប្រុស-ស្រីប្រេស៊ីលជាច្រើននាក់ កាលពីថ្ងៃទី២ មីនា កន្លងមក បានប្រមូលផ្តុំគ្នានៅស្ថានីយចំណតរថយន្តក្រុងមួយក្នុងទីក្រុងប្រេស៊ីលីយ៉ា ដើម្បីចាប់ផ្តើមព្រឹត្តិការណ៍ប្រចាំឆ្នាំមានឈ្មោះថា «ទិវាស្លៀកតែសម្លៀកបំពាក់ក្នុងប្រចាំឆ្នាំរបស់ប្រេស៊ីល» ។ ក្នុងការប្រមូលផ្តុំគ្នានេះតារាម៉ូដែលទាំងអស់ស្លៀកតែសម្លៀកបំពាក់ក្នុង ហើយឈរតំរៀបគ្នានៅតាមកាំជណ្តើរឱ្យគេថតទាក់ទាញឱ្យមានការចាប់អារម្មណ៍បំផុតពីមនុស្សផងទាំងឡាយ ។  |
| លីប៊ី ៖ ស្លាប់៦.០០០នាក់តាំងពីចាប់ផ្តើមការបះបោរមក Posted: 02 Mar 2011 07:42 PM PST  សហរដ្ឋអាមេរិកបានពិចារណាលើដំណោះស្រាយជាច្រើនដើម្បីធ្វើឱ្យលោកកាដាហ្វី សុខចិត្តចុះញ៉ម ។ ការហាមហោះហើរលើប្រទេសលីប៊ី នឹងជាលទ្ធភាពមួយ ។ សហភាពអឺរ៉ុបសម្រាប់ពេលនេះ នៅរារែកចំពោះអន្តរាគមន៍យោធាមួយ ។ ការប្រយុទ្ធគ្នាយ៉ាងសាហាវនានាកើតមាននៅទីក្រុង BREGA ដែលមានទីតាំងប្រេងកាតដ៏សំខាន់មួយស្ថិតនៅចម្ងាយ២០០គីឡូម៉ែត្រ ពីក្រុងបេនហ្គាហ្ស៊ី ។ សភាពការណ៍មនុស្សធម៌កាន់តែពិបាកខ្លាំងឡើងដោយយោងតាមប្រទេសអ៊ីតាលីថា ពួកអន្តោប្រវេសន៍ដល់ទៅ១,៥លាននាក់ ប៉ុនប៉ងរត់ភៀសខ្លួនចេញពីលីប៊ី។ យោងតាមអ្នកនាំពាក្យម្នាក់របស់សម្ព័ន្ធសិទ្ធិមនុស្សលីប៊ី លោក ALI ZEIDAN ថា អំពើហិង្សាតាំងពីចាប់ផ្តើមការបះបោរនៅលីប៊ីមក បណ្តាលឱ្យមនុស្សស្លាប់៦.០០០នាក់ ហើយក្នុងនោះ៣.០០០នាក់ក្នុងទីក្រុងទ្រីប៉ូលីតែមួយគត់។ នាវាចម្បាំងអាមេរិក២គ្រឿងក្នុងនោះមាននាវាផ្ទុកឧទ្ធម្ភាគចក្រ USS KEARSARGE បានឆ្លងកាត់ព្រែកជីកស៊ុយអេ ទៅកាន់សមុទ្រមេឌីទែរ៉ាណេ ដើម្បីទៅបោះទីតាំងនៅក្នុងដែនទឹកលីប៊ី ។ ប្រទេសបារាំងបានបញ្ជូននាវាផ្ទុកឧទ្ធម្ភាគចក្រមួយគ្រឿងធុន MISTRAL ដើម្បីចូលរួមក្នុងការជម្លៀសពលករអេហ្ស៊ីបទាំងឡាយ ដែលជាប់គាំងឱ្យមកកាន់អេហ្ស៊ីបក្នុងក្របខណ្ឌនៃវិធានការដែលសម្រេចដោយសហភាពអឺរ៉ុប ។ ចំណែកតុលាការឧក្រិដ្ឋកម្មអន្តរជាតិប្រកាសពីការបើកការស៊ើបអង្កេតផ្លូវការមួយលើលទ្ធ ភាពនៃឧក្រិដ្ឋកម្មប្រឆាំងមនុស្សជាតិនៅលីប៊ី ។ រដ្ឋអាជ្ញា លោក LUIS MORENO OCAMPO នឹងប្រកាសនាថ្ងៃទី៤ មីនា ពីឈ្មោះរបស់មនុស្សទាំងឡាយដែលជាប់ក្នុងការស៊ើបអង្កេតនេះ ៕  |
| រថយន្តក្រុងដឹកអ្នកដំណើរកៀរដៃចង្កូចម៉ូតូរបួសធ្ងន់មនុស្ស៣នាក់ Posted: 02 Mar 2011 07:21 PM PST   ខេត្តស្វាយរៀង ៖ គ្រោះថ្នាក់ចរាចរណ៍ដែលបង្កឡើងដោយរថយន្តទេសចរណ៍មួយគ្រឿងកៀរដៃម៉ូតូបណ្តាលឱ្យដួលរងរបួសយ៉ាងធ្ងន់ធ្ងរដល់មនុស្ស៣នាក់ ក្នុងនោះមានស្ត្រី២នាក់ កាលពីថ្ងៃទី២៨ កុម្ភៈ វេលាម៉ោង១១និង៣០នាទីព្រឹក នៅលើកណាត់ផ្លូវជាតិលេខ១ ចំណុចទល់មុខវិទ្យាល័យហ៊ុន សែន ចេក ស្ថិតក្នុងភូមិទទា សង្កាត់ចេក ក្រុងស្វាយរៀង ។ អ្នករងគ្រោះទាំង៣នាក់ ១-ឈ្មោះឃួន វណ្ណី អាយុ៤៤ឆ្នាំ ភេទស្រី របួសបាក់ដៃឆ្វេង និងបែកក្បាល ផុងលលាដ៍សន្លប់ ២-ឈ្មោះគង់ សារិន ភេទស្រី អាយុ២៨ឆ្នាំ បាក់ដៃឆ្វេង និងបែកក្បាលធ្ងន់ធ្ងរ ស្ត្រីទាំងពីរនាក់មានទីលំនៅភូមិដូនទង់ ឃុំប្រាសាទ ស្រុក កំពង់ត្របែក ខេត្តព្រៃវែង និង៣-ឈ្មោះនួន ពុទ្ធីដា ភេទប្រុស អាយុ២៣ឆ្នាំ រងរបួសដៃខាងឆ្វេង និងដាច់ស្បែកក្បាលដល់លលាដ៍សន្លប់ ។ បុរសរងគ្រោះរស់នៅភូមិកៀនសាំង សង្កាត់ស្វាយរៀង ក្រុងស្វាយរៀង ជាអ្នករត់ម៉ូតូឌុប។ ឈ្មោះនួន ពុទ្ធីដា បានប្រាប់កោះសន្តិភាពថា រូបគេបានឌុបស្ត្រីរងគ្រោះពីរង្វង់មូលមុខសាលាដំបូងខេត្តគោលបំណងទៅកាន់ផ្សារកអណ្តើកខេត្តព្រៃវែង ។ ពេលកំពុងធ្វើដំណើរនោះស្រាប់តែមានរថយន្តទេសចរណ៍មួយគ្រឿងបើកវ៉ាម៉ូតូហើយបត់អែបខាងស្តាំធ្វើឱ្យកន្ទុយរថយន្តកៀរដៃម៉ូតូបណ្តាលឱ្យដួលនៅលើថ្នល់បង្កការគ្រោះថ្នាក់បែបនេះតែម្តង។ រីឯរថយន្តទេសចរណ៍បានបន្ថែមល្បឿនបើករត់ តែដោយអ្នកស្រុកបានស្គាល់ស្លាកលេខរថយន្ត ក៏ប្តឹងសមត្ថកិច្ចប៉ូលិសចរាចរណ៍ដេញតាមចាប់បាននៅកំពង់ចម្លងអ្នកលឿង ។ រថយន្តទេសចរណ៍ម៉ាកគា ពណ៌ខៀវ ពាក់ស្លាកលេខភ្នំពេញ 3B-9993 របស់ក្រុមហ៊ុនវ៉ានវ៉ិចធ្វើដំណើរស្របគ្នាក្នុងទិសដៅពីកើតទៅលិច ៕  |
| លោកកាដាហ្វីធ្វើការវាយបក ហើយសន្យាធ្វើសង្គ្រាមក្នុងករណីមានអន្តរាគមន៍របស់បរទេស Posted: 02 Mar 2011 07:16 PM PST  ខណៈដែលការបះបោររបស់ប្រជាជនលីប៊ី ចូលដល់សបា្តហ៍ទី៣ លោកមូអាម៉ា កាដាហ្វី បានធ្វើការវាយតបវិញកាលពីថ្ងៃទី២ មីនា ដោយសន្យាថា មនុស្សជាច្រើនពាន់នាក់នឹងត្រូវស្លាប់ក្នុងករណីមានអន្តរាគមន៍របស់លោកខាងលិចចូលលីប៊ី ។ លោកកាដាហ្វីបានបញ្ជូនកងទ័ព និងយន្តហោះប្រដេញវាយប្រហារលើភាគខាងកើតប្រទេសត្រួតត្រាដោយពួកបះបោរ ។ នៅទៅក្រុងទ្រីប៉ូលី លោកកាដាហ្វី បានបង្ហាញខ្លួននៅមុខពួកអ្នកគាំទ្រលោក ក្នុងឱកាសនៃពិធីមួយដែលកំណត់ខួបលើកទី៣៤ នៃការបង្កើតអំណាចមហាជនក្នុងប្រទេស ។ ក្នុងសុន្ទរកថាយ៉ាងវែងមួយមានរយៈពេលជាង២ម៉ោងកន្លះ លោកកាដាហ្វីថ្លែងថា យើងមិនអាចអនុញ្ញាតឱ្យពួកអាមេរិក ឬលោកខាងលិចធ្វើអន្តរាគមន៍ចូលលីប៊ីឡើយ ។ ប្រសិនបើពួកគេធ្វើនោះពួកគេត្រូវដឹងថា ពួកគេនឹងធ្លាក់ក្នុងឋាននរក និងក្នុងសមុទ្រឈាមយ៉ាងអាក្រក់ជាងនៅអ៊ីរ៉ាក់ ឬអាហ្វហ្គានីស្ថានទៅទៀត ។ យើងនឹងចែកអាវុធដល់មនុស្សច្រើនលាននាក់ ហើយនោះនឹងជាវៀតណាមថ្មីមួយ ។ ដោយអះអាងថា លោកនឹងមិនចាកចេញពីប្រទេសដាច់ខាត និងថាលោកនឹងមិនបោះបង់ចោលអំណាច លោកកាដាហ្វីបានចោទប្រកាន់ជាថ្មីដល់បណ្តាញអាល់កៃដាថា ជាប្រភពនៃការបះបោរនេះ ហើយសន្យាលើកលែងទោសឱ្យចំពោះពួកអ្នកដែលប្រគល់អាវុធ ហើយលោកអះអាងទៀតថា ពុំមានបាតុកម្មនៅលីប៊ីឡើយ។ ការប្រយុទ្ធគ្នាមានការកើនឡើងនៅភាគខាងកើតលីប៊ី ។ នៅក្រុងបេនហ្គាហ្ស៊ីជាចំណុចកណ្តាលនៃការបះបោរក្រុមប្រឹក្សាជាតិលីប៊ី បង្កើតឡើងកាលពីថ្ងៃទី២៧ កុម្ភៈ កន្លងមកនេះ ដែលមានអតីតរដ្ឋមន្ត្រីក្រសួងយុត្តិធម៌លោក MOUSTAFA ABDELDJEIL ជាប្រមុខបានស្នើសុំជំនួយដោយសុំឱ្យអ.ស.ប បញ្ជូនយន្តហោះវាយប្រហារទីតាំងបង្អែកទាំងឡាយរបស់ពួកទាហានស៊ីឈ្នួលអាហ្វ្រិកដែលលោកកាដាហ្វី ប្រើប្រាស់ប្រឆាំងនឹងប្រជាជនខ្លួនឯង ៕  |
| Posted: 02 Mar 2011 07:15 PM PST ខេត្តព្រះវិហារ ៖ បើតាមគម្រោង វេលាម៉ោងប្រមាណជាង១០ព្រឹកនេះ ទី៣ មីនា ២០១១ លោកនាយឧត្តមសេនីយ៍ផ្កាយមាស៤ នាង ផាត រដ្ឋលេខាធិការក្រសួងការពារជាតិ នឹងដឹកនាំប្រតិភូអនុព័ន្ធយោធា ដែលតាមគម្រោង១៩ប្រទេសប្រចាំស្ថានទូតនានាក្នុងប្រទេសកម្ពុជាទៅធ្វើទស្សនកិច្ចលើប្រាសាទព្រះវិហារ និងត្រួតពិនិត្យការខូចខាតសំណង់ប្រាសាទដ៏ល្បីល្បាញជាបេតិកភណ្ឌពិភពលោក ដែលទទួលរងមហន្តរាយធ្ងន់ធ្ងរពីសំណាក់ទាហានសៀមឈ្លានពានបាញ់ផ្លោងអាវុធធន់ធ្ងន់ដាក់កាលពីថ្ងៃទី៤ ដល់ទី៧ កុម្ភៈ ២០១១ កន្លងទៅថ្មីៗនេះ ។ តាមប្រភពពីមន្ត្រីយោធាជាន់ខ្ពស់នៃក្រសួងការពារជាតិកម្ពុជាបានឱ្យដឹងថា ដំណើរទស្សនកិច្ចរបស់អនុព័ន្ធយោធាតាមគម្រោងចំនួន១៩ប្រទេសនាថ្ងៃទី៣ មីនា២០១១ នេះ នឹងធ្វើដំណើរទៅដល់បរិវេណកងពលអន្តរាគមន៍លេខ៨ ដោយរថយន្តពិសេស រួចហើយបន្តដំណើរប្រមាណ១៥គីឡូម៉ែត្រ ទៅជួបជុំពិធីធ្វើបដិសណ្ឋារកិច្ចនៅទីបញ្ជាការដ្ឋានអង្គរក្សត្រង់ចំណុចទួល៩៥ចម្ងាយប្រមាណ១០គីឡូម៉ែត្រពីប្រាសាទព្រះវិហារ ហើយបន្ទាប់មកនឹងធ្វើដំណើរឡើងទៅកាន់ប្រាសាទព្រះវិហារ ដើម្បីពិនិត្យមើលការខូចខាតតែម្តង ។ សូមបញ្ជាក់ផងដែរថា យោងតាមបណ្តាញផ្សាយព័ត៌មានផ្សេងៗរបស់ថៃបានលើកឡើងពីថ្នាក់ដឹកនាំរបស់ថៃនិយាយកាលពីថ្ងៃពុធ ម្សិលមិញនេះថា ការប៉ុនប៉ងរបស់កម្ពុជាដើម្បីនាំអនុព័ន្ធយោធាមួយក្រុមទៅកាន់ផ្នែកនៃតំបន់ដីទំហំ៤,៦គីឡូម៉ែត្រការ៉េ ជុំវិញប្រាសាទព្រះវិហារនេះ បានបង្កភាពតានតឹងនៅតាមព្រំដែនជាថ្មីទៀត ហើយទាហានថៃបានប្រែប្រួលមកស្ថិតក្នុងភាពប្រុងជើងការ ជាពិសេសតំបន់ជុំវិញប្រាសាទព្រះវិហារ គឺពួកគេ (សៀម) បានប្រុងជើងការចាប់តាំងពីយប់ថ្ងៃអង្គារមកម៉្លេះ ដោយគេចាត់ទុកថា តំបន់នោះជាទឹកដីរបស់គេ ។ ជាការពិតណាស់ កម្ពុជាជាអ្នករងគ្រោះគឺ ត្រូវតែចង់ឱ្យអនុព័ន្ធយោធាមើលឃើញពីកន្លែងសំខាន់ៗ រួមមានការខូចខាតវត្តកែវសិក្ខាគិរីស្វារៈ និងតំបន់ជុំវិញប្រាសាទព្រះវិហារ ហើយដោយសារតែមានការជំទាស់ពីថៃនេះហើយ ទើបកម្ពុជាបានពន្យារដំណើរនាំអនុពន្ធយោធានេះរហូតដល់ថ្ងៃព្រហស្បតិ៍ ទី៣ មីនា ២០១១ ពីព្រោះទាហានស្ថិតក្នុងស្ថានភាពប្រុងប្រៀបប្រយុទ្ធ ដោយភាគីមួយមានបំណងឈ្លានពាន (សៀម) និងភាគីមួយ (កម្ពុជា) មានបំណងការពារទឹកដីឯករាជ្យរបស់ខ្លួន ។ ទោះជាយ៉ាងណាក៏ដោយ យោងតាមលោកឧត្តមសេនីយ៍ឯកឈុំ សុជាតិ អ្នកនាំពាក្យក្រសួងការពារជាតិកម្ពុជាបានថ្លែងថា ក្រសួងការពារជាតិនឹងដឹកនាំមន្ត្រីអនុព័ន្ធយោធាបរទេសចំនួន១៩ប្រទេស ទៅត្រួតពិនិត្យមើលតំបន់សមរភូមិ ព្រំដែនប្រាសាទព្រះវិហារនៅថ្ងៃទី៣ មីនា គឺ កម្ពុជាធ្វើឡើងនៅក្នុងទឹកដីកម្ពុជាប៉ុណ្ណោះ ហើយវាជាសិទ្ធិរបស់កម្ពុជា ៕  |
| Posted: 02 Mar 2011 07:06 PM PST *អតីតកីឡាករប្រវត្តិសាស្ត្រក្លឹប Barce lona បញ្ជាក់ថា Real Madrid មិនអាចប្រៀបផ្ទឹម Barcelona បានឡើយ លោកយ៉ូហាន ក្រាហ្វ កីឡាករប្រវត្តិសាស្ត្រក្លឹប Barcelona បញ្ជាក់ថា ក្លឹប Real Madrid មិនអាចតស៊ូជាមួយក្លឹប Barcelona បានឡើយពីព្រោះគ្មានចំណាត់ការគ្រប់គ្រងបាល់បាន ក្រោយពីក្លឹប Barcelona ស្ថិតនៅកំពូលតារាងនាំមុខក្លឹប Real Madrid ដល់ទៅ៧ពិន្ទុក្នុងពេលបច្ចុប្បន្ន ។ លោកយ៉ូហាន ក្រាហ្វ កីឡាករប្រវត្តិសាស្ត្រក្លឹបអ្នកមានបុណ្យ Barcelona បានថ្លែងកាលពីថ្ងៃទី២៨ កុម្ភៈ កន្លងមកថា គេមានជំនឿថា ក្លឹបស្តេចស Real Madrid ដែលជាក្លឹបប្រជែងមិនអាចតស៊ូជាមួយនឹងក្លឹបBarcelona ដែលស្ថិតនៅលំដាប់កំពូលនៃការប្រកួតក្របខណ្ឌ La Liga អេស្ប៉ាញបានឡើយ ។ លោកក្រាហ្វ បានបន្តទៀតថា អ្វីដែលធ្វើឱ្យក្លឹប Barcelona គ្រប់គ្រងស្ថានការណ៍បានល្អគឺការគ្រប់គ្រងបាល់ និងការបញ្ជូនបាល់ដល់កីឡាកររបស់ក្លឹបមានភាពច្បាស់លាស់ អាចធ្វើឱ្យពួកគេមានឱកាសស៊ុតបញ្ចូលទីបានច្រើន ។ រីឯក្លឹប Real Madrid ការបញ្ជូនបាល់មានលក្ខណៈឆ្ងាយ ធ្វើឱ្យកម្លាំងរត់របស់កីឡាករធ្លាក់ចុះ ៕ *ក្លឹប Palermo បណ្តេញគ្រូបង្វឹកក្រោយពីដឹកនាំក្លឹបប្រកួតចាញ់ក្លឹប Udinese 7-0 លោកដេលីយូ រ៉ូសស៊ី ត្រូវបានបណ្តេញចេញពីតំណែងជាគ្រូបង្វឹកបន្ទាប់ពីដឹកនាំក្លឹប Palermo ប្រកួតចាញ់ក្លឹប Udinese ក្នុងលទ្ធផល៧-០ ហើយលោកស៊ែរ៍សេ កូស្មី អតីតគ្រូបង្វឹកក្លឹប Livorno ចូលកាន់តំណែងជំនួស ។ ក្លឹបល្បីក្នុងក្របខណ្ឌបាល់ទាត់ Calcio Serie A អ៊ីតាលី បានបង្ហើបឱ្យដឹងតាមគេហទំព័ររបស់ក្លឹបថា « Palermo សូមប្រកាសថា លោកស៊េរ៍សេ កូស្មី បានទទួលការតែងតាំងជាគ្រូបង្វឹកជំនួសលោកដេលីយូរ៉ូសស៊ី ដែលដឹកនាំក្លឹបប្រកួតចាញ់ក្លឹប Udinese ក្នុងលទ្ធផល៧-០ កាលពីថ្ងៃទី២៧ កុម្ភៈ កន្លងមក ។ លោកម៉ាវរីស៊ីយ៉ូ សាំប៉ារីនី ម្ចាស់ក្លឹប Palermo បានបង្ហើបឱ្យដឹងពីមូលហេតុបណ្តេញលោករ៉ូសស៊ីនៅក្រោយពេលចប់ការប្រកួតកាលពីថ្ងៃទី២៧ កុម្ភៈថា «គេ(រ៉ូសស៊ី) បានបំផ្លិចបំផ្លាញក្លឹប Palermo របស់ខ្ញុំ និងបានបំផ្លាញកិត្តិយសរបស់ក្លឹបអស់ហើយ» ។
 |
| បាញ់ប្រហារលើទាហានអាមេរិកនៅទីក្រុងហ្វ្រង់ហ្វើតអាល្លឺម៉ង់ស្លាប់2នាក់ Posted: 02 Mar 2011 07:00 PM PST  ប៉ូលិសនិយាយថា ខ្មាន់កាំភ្លើងម្នាក់បានបាញ់ប្រហារទៅលើរថយន្តបឺសមួយគ្រឿងដែលដឹកទាហានអាមេរិកនៅព្រលានយន្តហោះហ្វ្រង់ហ្វើត ប្រទេសអាល្លឺម៉ង់ កាលពីល្ងាចថ្ងៃទី២ មីនា កន្លងមក បណ្តាលឱ្យស្លាប់ទាហានអាមេរិក២នាក់ និង២នាក់ទៀតរងរបួស ។ អ្នកនាំពាក្យប៉ូលិស លោក Jurgen Linker និយាយថា ហេតុការណ៍បាញ់ប្រហារនេះកើតឡើងនៅទល់មុខចំណតសម្រាប់អ្នកមកដល់ ។ ទីភ្នាក់ងារព័ត៌មានក្នុងស្រុករាយការណ៍ថា អ្នកដែលស្លាប់ក្នុងអំពើបាញ់ប្រហារនេះជាទាហានអាមេរិក ប៉ុន្តែគេមិនទាន់ដឹងពីអត្តសញ្ញាណច្បាស់លាស់នៅឡើយទេ ។ គេមិនបានដឹងថា រថយន្តបឺសនោះដឹកមនុស្សប៉ុន្មាននាក់ឡើយ ហើយគេក៏មិនដឹងថា តើហេតុអ្វីបានជាបុរសនោះបាញ់ប្រហារលើរថយន្តបឺសនេះ។ ការបាញ់ប្រហារលើទាហានអាមេរិកនេះបានធ្វើឱ្យលោកប្រធានាធិបតីបារ៉ាក់ អូបាម៉ា មានការខឹងសម្បាយ៉ាងខ្លាំង។ លោកអូបាម៉ា ថ្លែងថា រូបលោកមានការក្រៀមក្រំ និងខឹងសម្បាយ៉ាងខ្លាំងចំពោះការបាញ់ប្រហារលើទាហាននៃកងទ័ពជើងគោកអាេមរិកនៅក្នុងទីក្រុងហ្វ្រង់ហ្វើត ។ តាមសេចក្តីរាយការណ៍ថា ខ្មាន់កាំភ្លើងនោះមកពីកូសូវូ ហើយក្រោយពីបាញ់ប្រហារលើទាហានអាមេរិកត្រូវប៉ូលិសចាប់ខ្លួន ។  |
| ប្រជាជនចិនអាចមានចំនួនសរុបនៅទូទាំងប្រទេស1.341លាននាក់ Posted: 02 Mar 2011 06:58 PM PST  AFP ផ្សាយឱ្យដឹងថា ប្រទេសចិនបានបង្ហើបឱ្យដឹងពីទិន្នន័យកាលពីថ្ងៃទី២៨ កុម្ភៈ ថា ប្រជាជនចិនដែលគេរំពឹងថា មានចំនួនច្រើនបំផុតលើពិភពលោកនោះបច្ចុប្បន្នបានកើនលើសកាលពីឆ្នាំ២០១០ ចំនួន ៦,៣លាននាក់ទៀតធ្វើឱ្យចំនួនសរុបក្នុងដំណាច់ឆ្នាំ២០១០ចិនមានប្រជាជន១.៣៤១លាននាក់។ វិទ្យាស្ថានស្ថិតិជាតិប្រទេសចិនបានបង្ហើប តាមទិន្នន័យតួលេខនៃការធ្វើជំរឿនក្នុងឆ្នាំ២០០០ប្រជាជនចិនមានប្រហែល១.២៩៥លាននាក់ ។ ចាប់តាំងពីចិនប្រើប្រាស់នយោបាយកូនតែមួយក្នុងឆ្នាំ១៩៨០ ដែលកំណត់ឱ្យប្រជាជនអាចមានកូនម្នាក់ជាហេតុធ្វើឱ្យចិនការពារការកើនឡើងនៃចំនួនប្រជាជនដោយរំពឹងថា មានប្រជាជនកើនឡើងប្រហែល៤០០លាននាក់ ។ ប្រទេសចិនបានធ្វើជំរឿនប្រជាជនជាលើកដំបូងនៅទូទាំងប្រទេស ក្នុងឆ្នាំ១៩៥៣ ដោយកាលណោះចិនមានប្រជាជនចំនួន៥៩៤លាននាក់ គឺតិចជាងតួលេខបច្ចុប្បន្នដល់ទៅជាងពាក់កណ្តាល ៕  |
| សេវាផ្តល់ព័ត៌មានប្រកបដោយគុណភាព និងត្រឹមត្រូវចាំបាច់សម្រាប់កិច្ចអភិវឌ្ឍន៍ Posted: 02 Mar 2011 06:58 PM PST   រាជធានីភ្នំពេញ ៖ មន្ត្រីជាន់ខ្ពស់ក្រសួងព័ត៌មានបានថ្លែងថា សេវាផ្តល់ព័ត៌មានប្រកបដោយគុណភាពខ្ពស់ និងត្រឹមត្រូវ ហើយទទួលមកវិញនូវមតិយោបល់ជាក់ស្តែងរបស់ប្រជាពលរដ្ឋគឺជាប្រការចាំបាច់ក្នុងការចូលរួមចំណែកអភិវឌ្ឍន៍ប្រទេស។ ការថ្លែងដូច្នេះក្នុងពិធីជួបជុំអ្នកសារព័ត៌មាន និងអ្នកនាំពាក្យតាមស្ថាប័ន ក្រសួង រដ្ឋាភិបាលដើម្បីពង្រឹងទំនាក់ទំនងការងារជាមួយវិទ្យុជាតិកម្ពុជាដែលរៀបចំឡើងកាលពីថ្ងៃទី១ ខែមីនា ឆ្នាំ២០១១ នៅអគ្គនាយកដ្ឋានវិទ្យុជាតិកម្ពុជា។ លោកថាច់ ផែន រដ្ឋលេខាធិការក្រសួងព័ត៌មានមានប្រសាសន៍ថា បច្ចុប្បន្ននេះដោយទទួលបានកិច្ចសហប្រតិបត្តិការពីដៃគូអភិវឌ្ឍន៍ និងការកែទម្រង់កម្មវិធីផ្សាយវិទ្យុជាតិកម្ពុជាបាននិងកំពុងក្លាយជាវេទិកាសម្តែងមតិយ៉ាងទូលំទូលាយរបស់ប្រជាពលរដ្ឋដែលជាសិទ្ធិមូលដ្ឋានសម្រាប់ទាំងការបញ្ចេញមតិ និងការទទួលបានព័ត៌មានទាន់ពេលវេលា និងមានប្រសិទ្ធភាពនូវព័ត៌មានប្រកបដោយគុណភាពខ្ពស់ និងត្រឹមត្រូវដែលគ្រប់គ្រងដោយរាជរដ្ឋាភិបាល និងអាជ្ញាធរសាធារណៈផ្សេងទៀត។ លោកបន្តថា កម្ពស់ការផ្តល់ព័ត៌មានជូនប្រជាពលរដ្ឋក៏ជាការចូលរួមចំណែកសម្រេចគោលដៅអភិបាលកិច្ចល្អក្រោមយុទ្ធសាស្ត្រចតុកោណស្របជាមួយច្បាប់ប្រឆាំងអំពើពុករលួយដែលទើបចូលជាធរមានលើកទឹកចិត្តឱ្យប្រជាពលរដ្ឋចូលរួមយ៉ាងសកម្មក្នុងដំណើរការនយោបាយ និងធ្វើសេចក្តីសម្រេចចិត្តលើកកម្ពស់លទ្ធិប្រជាធិបតេយ្យ និងនីតិរដ្ឋជម្រុញឱ្យមានការគោរពសិទ្ធិមនុស្សដល់ប្រជាពលរដ្ឋគ្រប់រូបនៅកម្ពុជា។ ដូច្នេះបង្ហាញឱ្យឃើញថា ការផ្តល់សេវាប្រកបដោយគុណភាពខ្ពស់ត្រឹមត្រូវ ហើយនិងការទទួលបានមកវិញនូវយោបល់ជាក់ស្តែងពីប្រជាពលរដ្ឋក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌ គឺជាប្រការសំខាន់ចូលរួមក្នុងការអភិវឌ្ឍប្រទេស។ លោកតន់ យ៉ាន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកវិទ្យុជាតិកម្ពុជា និងជានាយកគម្រោងអភិបាលកិច្ចល្អមូលដ្ឋានបានលើកឡើងថា ដោយមានការចូលរួមពីស្ថាប័នសំខាន់ៗដូចជាគណបក្សនយោបាយប្រជាពលរដ្ឋ សង្គមស៊ីវិល និងស្ថាប័នមិនមែនរដ្ឋ វិទ្យុជាតិមានកម្មវិធីសន្ទនាមតិជាមួយប្រជាពលរដ្ឋ៥ដងក្នុងមួយសប្តាហ៍ពីម៉ោង១១ដល់១២ថ្ងៃត្រង់។ អ្វីដែលវិទ្យុជាតិបានរៀបចំ គឺកែលំអការផ្សាយកម្មវិធីព័ត៌មានដើម្បីធានាឱ្យបានព័ត៌មានពិតត្រឹមត្រូវ ទាន់ពេលវេលា និងឯករាជ្យសម្រាប់អ្នកស្តាប់។ រៀបចំខ្លឹមសារជួយឱ្យប្រជាពលរដ្ឋជាអ្នកស្តាប់ចេះសិក្សាស្រាវជ្រាវសីុជម្រៅ ចេះវិភាគ និងចេះលើកហេតុផលត្រឹមត្រូវដែលនឹងធ្វើឱ្យគាត់អាចធ្វើការសម្រេចចិត្តបានយ៉ាងច្បាស់លាស់។ បង្កើតឱ្យមានការគោរពប្រតិបត្តិតាមគោលនយោបាយ និងក្រមសីលធម៌ក្នុងការរៀបចំកម្មវិធីទាំងឡាយដើម្បីធានាថា ព័ត៌មានទាំងអស់ពិតជាត្រឹមត្រូវមិនលំអៀង និងអាចមានផលប្រយោជន៍ក្នុងកំរិតណាមួយនោះដល់អ្នកស្តាប់វិទ្យុជាតិ។ បង្កើតទំនាក់ទំនង និងដៃគូជាមួយសង្គមស៊ីវិល ស្ថាប័នរដ្ឋផ្សេងទៀត និងក្រុមហ៊ុននានាដើម្បីផ្សព្វផ្សាយសម្លេងរបស់ប្រជាពលរដ្ឋ។ រាល់កម្មវិធីទាំងអស់នេះ គឺខ្លឹមសារផ្តោតជាសំខាន់ទៅលើដំណើរការកែទម្រង់វិស័យ៤ជាអាទិភាព គឺវិមជ្ឈការ និងសហមជ្ឈការ ការគ្រប់គ្រងធនធានធម្មជាតិ ការពង្រីកវិស័យឯកជន និងការគ្រប់គ្រងហិរញ្ញវត្ថុសាធារណៈ។ ក្រៅពីនោះក៏នឹងមានការយកចិត្តទុកដាក់ដល់សេចក្តីត្រូវការរបស់ក្រុមជនជាតិភាគតិចស្ត្រី និងយុវជនផងដែរ ៕  |
| ប្លន់រថយន្តឆ្លាមទៅប្លុងចោលនៅកំពតត្រូវជាប់ខ្នោះ៣នាក់ Posted: 02 Mar 2011 06:47 PM PST  រាជធានីភ្នំពេញ ៖ ជនសង្ស័យប្លន់ប្រដាប់អាវុធចំនួន៣នាក់ត្រូវប៉ូលិសការិយាល័យព្រហ្មទណ្ឌកំរិតធ្ងន់នៃស្នងការដ្ឋានរាជធានីចាប់ខ្លួនជាបន្តបន្ទាប់នៅថ្ងៃទី២៨ ខែកុម្ភៈ ក្រោយពីពួកគេប្លន់យករថយន្តម៉ាកតូយ៉ូតាកាមរីឆ្លាម ស៊េរី១៩៩៨ ពណ៌ស្ករ កាលពីថ្ងៃទី២២ កុម្ភៈ នៅផ្លូវជាតិលេខ៥ ម្តុំស្ពានស្រះអង្កាម ខេត្តកំពង់ឆ្នាំង ពីជនរងគ្រោះឈ្មោះលឹម សុម៉ាល័យ ប្រកបរបររត់រថយន្តឈ្នួល ។ នៅព្រឹកថ្ងៃទី២ មីនា ប៉ូលិសការិយាល័យព្រហ្មទណ្ឌកំរិតធ្ងន់នៃស្នងការដ្ឋានរាជធានីធ្វើសន្និសីទកាសែតមួយដើម្បីបង្ហាញមុខជនសង្ស័យប្លន់ប្រដាប់អាវុធទាំង៣នាក់នោះ។ លោកជួន ណារិន នាយការិយាល័យព្រហ្មទណ្ឌកំរិតធ្ងន់ដែលជាអ្នកដឹកនាំក្នុងការបង្ក្រាបករណីនោះឱ្យដឹងថា នៅថ្ងៃទី២២ កុម្ភៈ វេលាម៉ោង១៦ ឈ្មោះលឹម សុម៉ាល័យ ដែលជាអ្នករត់តាក់ស៊ីពីភ្នំពេញ ទៅបាត់ដំបង និងពីបាត់ដំបងមកភ្នំពេញ ត្រូវជនសង្ស័យ៤នាក់ជួលឱ្យដឹកទៅភ្នំពេញ ដោយឯកភាពក្នុងតម្លៃ៤៥ដុល្លារ ។ឈ្មោះលឹម សុម៉ាល័យ បានយករថយន្តម៉ាកតូយ៉ូតាឆ្លាម ពណ៌ស្ករ ស៊េរី១៩៩៨ ពាក់ស្លាកលេខភ្នំពេញ 2H-9054 ដឹកជនសង្ស័យទាំង៤នាក់នោះ គឺដឹកពីខេត្តបាត់ដំបងមកភ្នំពេញ ។ ពេលដឹកមកដល់ចំណុចស្ពានស្រះអង្កាម ខេត្តកំពង់ឆ្នាំង ម៉ោងប្រហែល១៩ ជនសង្ស័យទាំង៤នាក់នោះប្រាប់ឱ្យឈ្មោះលឹម សុម៉ាល័យ ឈប់រថយន្ត ដើម្បីបត់ជើងតូច។ ពេលនោះឈ្មោះលឹម សុម៉ាល័យ បានឈប់រថយន្ត ហើយជនសង្ស័យទាំង៤នាក់បានចុះពីលើរថយន្តដើរទៅឈរទន្ទឹមគ្នាបត់ជើងតូច។ បានប្រហែល២នាទីពួកគេដើរចូលរថយន្តវិញ ហើយភ្លាមនោះជនសង្ស័យដែលអង្គុយទន្ទឹមឈ្មោះលឹម សុម៉ាល័យ បានដកអាវុធខ្លីមិនស្គាល់ម៉ាកភ្ជង់ក្បាលខាងស្តាំរបស់លឹម សុម៉ាល័យ ចំណែកជនសង្ស័យ២នាក់ទៀតអង្គុយខាងក្រោយ ដកអាវុធខ្លីភ្ជង់ចង្កេះខាងក្រោយ គំរាមមិនឱ្យស្រែក និងម្នាក់ទៀតដកអាវុធខ្លីភ្ជង់ពីខាងក្រៅរថយន្ត ។ ប្រភពដដែលបន្តថា ជនសង្ស័យ២នាក់ដែលអង្គុយខាងក្រោយបានទាញឈ្មោះលឹម សុម៉ាល័យ ឱ្យមកក្រោយ រួចយកខ្សែកៅស៊ូយឺតរាងមូលមានទម្ពក់សងខាងចងដៃទាំង២មកក្រោយ និងយកស្កុតពណ៌ស មករុំមុខ និងមាត់ជិត និងយកខ្សែចង.កជើងថែមទៀត ។ ពួកគេបានបើករថយន្តយកឈ្មោះលឹម សុម៉ាល័យ ទៅទម្លាក់ចោលនៅផ្លូវទំនប់កប់ស្រូវ ស្ថិតនៅក្នុងខណ្ឌសែនសុខ រាជធានីភ្នំពេញ ។ រថយន្តនោះត្រូវជនសង្ស័យទាំង៤នាក់ យកទៅ ព្រមទាំងសំភាររបស់ឈ្មោះលឹម សុម៉ាល័យ មានដូចជា ទូរស័ព្ទ២គ្រឿង ម៉ាកណូគា១គ្រឿង និងម៉ាកសាំសុង១គ្រឿង ប័ណ្ណសំគាល់រថយន្ត (ថតចំលង) ចំនួន១សន្លឹក អត្តសញ្ញាណប័ណ្ណសញ្ជាតិខ្មែរ១សន្លឹក (ថតចំលង) ប្រាក់៣០ដុល្លារ និង១០ម៉ឺនរៀល។ ក្រុមជនសង្ស័យទាំង៤នាក់បានជិះរថយន្តរបស់ឈ្មោះលឹម សុម៉ាល័យ គេចខ្លួនបាត់ ។ នៅថ្ងៃទី២៨ កុម្ភៈ ២០១១ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះអ៊ុក ណុច អាយុ៣០ឆ្នាំ មានទីលំនៅក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត។ ឆ្លងតាមចំលើយសារភាពសមត្ថកិច្ចបានបន្តសហការជាមួយសមត្ថកិច្ចអធិការដ្ឋាននគរបាលស្រុកបន្ទាយមាសឃាត់ខ្លួនជនសង្ស័យ២នាក់ទៀត គឺម្នាក់ឈ្មោះឡាំ សុភ័ក្រ អាយុ២៨ឆ្នាំ និងម្នាក់ទៀតឈ្មោះឡាំ វីរៈ អាយុ២៣ឆ្នាំ។  |
| កញ្ញាមាស សុខសោភា ចូលរួមអបអរពិធីតាំងបង្ហាញផលិតផល Samsung ស៊េរីថ្មី Posted: 02 Mar 2011 06:42 PM PST   រាជធានីភ្នំពេញ ៖ ក្រុមហ៊ុន Samsung Electronics Co.,Ltd ជាក្រុមហ៊ុនឈានមុខគេលើទីផ្សារ និងទទួលបានរង្វាន់ច្នៃប្រឌិតលើផ្នែកសំភារអេឡិចត្រូនិក នាពេលថ្មីៗនេះ បានប្រារព្ធពិធីសន្និសីទ និងការជួបជុំលៀងសាយភោជនពាណិជ្ជកម្ម២០១១ នៅសណ្ឋាគារភ្នំពេញ ។ ក្រោមការដឹកនាំដោយលោកហ្គីហាន់ លី នាយកគ្រប់គ្រង Samsung ប្រចាំតំបន់ឥណ្ឌូចិន ពិធីតាំងបង្ហាញផលិតផលអេឡិចត្រូនិក Samsung ក៏ មានការចូលរួមសម្តែងដោយកញ្ញា មាស សុខសោភា ផងដែរ ។ លោកហ្គីហាន់ លី នាយកគ្រប់គ្រង Samsung ប្រចាំតំបន់ឥណ្ឌូចិន បានចែករំលែកនូវភាពរីករាយជាមួយការបង្ហាញវិធីប្រើផលិតផលប្រើប្រាស់ក្នុងផ្ទះ ដោយថ្លែងទៅកាន់ពិធីសន្និសីទពាណិជ្ជកម្មថា «Samsung បានក្លាយជាអ្នកនាំមុខក្នុងការរចនាម៉ូដ និងបច្ចេកវិជ្ជាអស់រយៈពេលជាច្រើនឆ្នាំមកហើយ ហើយយើងក៏ពេញចិត្តចំពោះការបង្កើតផលិតផលដែលមានការរចនាយ៉ាងស្រស់ស្អាត ដែលធ្វើឱ្យជីវិតអតិថិជនជុំវិញពិភពលោកកាន់តែប្រសើរឡើង ។ ជាការពិត Samsung មានមជ្ឈមណ្ឌលរចនាម៉ូដ៧កន្លែងទូទាំងពិភពលោកដូចជា Corporate Design Center នៅទីក្រុង Seoul សហការជាមួយមជ្ឈមណ្ឌលនៅទីក្រុង London, Milan, Los Angeles, Shanghai, Tokyo និង Delhi។ អ្នកជំនាញទាំងអស់ដែលនៅតាមតំបន់ខុសៗគ្នាចំនួន៦កន្លែង អាចធ្វើការវិភាគទៅលើវប្បធម៌ជីវិតរស់នៅ និងការនិយម ដើម្បីប្រមូលយកនូវចំណុចសំខាន់ៗទៅកាន់មជ្ឈមណ្ឌល Corporate Design Center ។ លទ្ធផលនៃកិច្ចប្រឹងប្រែង ភាពច្នៃប្រឌិត និងការយកចិត្តទុកដាក់ បានផ្តល់នូវអត្ថប្រយោជន៍ដល់ប្រជាជនរាប់លាននាក់ជុំវិញពិភពលោក ហើយបច្ចុប្បន្ននេះ អតិថិជនកម្ពុជារបស់យើងក៏អាចទទួលបាននូវភាពរីករាយជាមួយអត្ថប្រយោជន៍ដូចគ្នានេះផងដែរ» ។ ដៃគូពាណិជ្ជកម្ម និងអ្នកចែកចាយ Samsung ត្រូវបានបង្ហាញនូវផលិតផលជាច្រើនប្រភេទសម្រាប់ឆ្នាំ២០១១ ទាំងរូបភាព និងសំឡេង រួចបន្ទាប់មកកម្សាន្តជាមួយការសម្តែងរបស់កញ្ញាមាស សុខសោភា ដោយផ្តល់ការថតរូបជាមួយភ្ញៀវផងដែរ ។ កញ្ញា មាស សុខសោភា បានបញ្ចេញនូវទស្សនៈថា «វាជាកិត្តិយសបំផុតសម្រាប់ខ្ញុំ ដែលមានឱកាសចូលរួមក្នុងពិធីសន្និសីទពាណិជ្ជកម្ម Samsung 2011 នេះ ។ Samsung ពិតជាម៉ាកសញ្ញាដ៏ពេញនិយម និងមានការច្នៃប្រឌិតខ្ពស់ ហើយនេះជាភាពអស្ចារ្យមួយដែលក្រុមហ៊ុននេះមានវត្តមានក្នុងប្រទេសកម្ពុជា ខណៈដែលប្រជាជនជាច្រើនកំពុងពេញនិយមនឹងភាពស៊ីវិល័យ ដោយផ្តោតលើស្ទីលម៉ូដ ការរចនា និងបច្ចេកវិជ្ជា ។ សម្រាប់គេហដ្ឋាន យើងតែងតែចង់បាននូវផលិតផលល្អ ស្អាត ទំនើប មានគុណភាពខ្ពស់ ហើយ Samsung គឺជាម៉ាកសញ្ញាដែលស័ក្តិសមនឹងតម្រូវការនេះបំផុត» ។ សន្និសីទពាណិជ្ជកម្ម Samsung កើតចេញព្រមគ្នាជាមួយការបើកសម្ពោធហាង Samsung Green Air Store លើកដំបូងក្នុងរាជធានីភ្នំពេញ ផងដែរ ។ ហាងជំនាញខាងម៉ាស៊ីនត្រជាក់បានដាក់តាំងបង្ហាញនូវម៉ាស៊ីនត្រជាក់ Samsung ជាច្រើនប្រភេទ ដែលសុទ្ធតែផ្តល់នូវមធ្យោបាយល្អ បំផុត ដើម្បីបង្កើតបរិស្ថានប្រកបដោយផាសុកភាពសម្រាប់ការិយាល័យ កន្លែងពាណិជ្ជកម្ម ឬគេហដ្ឋាន ។ ក្រុមហ៊ុន Samsung Electronics Co.,Ltd គឺជាក្រុមហ៊ុនឈានមុខគេក្នុងផ្នែកបន្ទះអេឡិចត្រូនិកទូរគមនាគមន៍ ឧបករណ៍ឌីជីថល និងបច្ចេកវិជ្ជាឌីជីថល ជាមួយការលក់ចេញសរុបចំនួន១១៧ពាន់លានដុល្លារក្នុងឆ្នាំ២០០៩ ។ មានបុគ្គលិកប្រមាណជា១៨៨.០០០នាក់ កំពុងបម្រើការក្នុងការិយាល័យ១៨៥កន្លែងក្នុង៦៥ប្រទេស ហើយក្រុមហ៊ុនមានមុខជំនួញដំណើរការដាច់ដោយឡែកចំនួនប្រាំបីផ្នែកដូចជា ការបង្ហាញរូបភាព ការទំនាក់ទំនងចល័ត ប្រព័ន្ធទូរគមនាគមន៍ ឧបករណ៍ឌីជីថល ដំណោះស្រាយព័ត៌មានវិទ្យា ការបង្កើតរូបភាពឌីជីថល បន្ទះអេឡិចត្រូនិក និង LCD ។ ក្រុមហ៊ុនអេឡិចត្រូនិក Samsung ជាម៉ាកសញ្ញាដែលមានការរីកចម្រើនឆាប់រហ័ស និងជាអ្នកផលិតឈានមុខគេលើផលិតផលដូចជា ទូរទស្សន៍ឌីជីថល បន្ទះអង្គចងចាំ ទូរស័ព្ទចល័ត និងអេក្រង់ TFT-LCDs ។ សម្រាប់ព័ត៌មានបន្ថែម សូមចូលទៅកាន់ www.samsung.com ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
