Koh Santipheap Daily |
- អ្នកវិនិយោគចិននិងម៉ាឡេស៊ីស្វែងយល់ឱកាសវិនិយោគនៅកម្ពុជា
- សៀមគ្រោងធ្វើស្នាក់ការគយនិងតម្រួតត្រូវភាគីកម្ពុជាបដិសេធ
- ប៉ូលិសខេត្តកណ្តាលនិងស្រុកស្នួលឆ្មក់ចូលចាប់មុខសញ្ញាជួញដូរថ្នាំញៀន
- ដណ្តើមផ្ទះមួយខ្នងក្លាយជាជម្លោះស៊ីសាច់ហុតឈាមរវាងឪពុកក្មេកនិងកូនប្រសា
- កាប់ចាក់គ្នារបួសចូលពេទ្យ សមត្ថកិច្ចត្រៀមចាប់បញ្ជូនទៅតុលាការទាំង២នាក់
- ជនជាតិចិនម្នាក់ទ្រមខ្លួនដោយសារចោរប្លន់យកទូរស័ព្ទដៃ
- ពេទ្យយោធាកម្ពុជា-អាមេរិកសហការព្យាបាលជម្ងឺប្រជាពលរដ្ឋមិនគិតថ្លៃ
- ពេទ្យយោធាកម្ពុជា-អាមេរិកសហការព្យាបាលជម្ងឺប្រជាពលរដ្ឋមិនគិតថ្លៃ
- ប្រេងសាំងគេចពន្ធត្រូវបានគេដឹកជញ្ជូនឆ្លងដែនតាមផ្លូវទឹក
- ចំនួនអ្នកអត់ការងារធ្វើនៅជប៉ុនមាន៤,៩ភាគរយក្នុងខែមករា
- ព្រូដេកក្រោមឡានតៃកុងបើកកិនស្លាប់ដឹកសពយកទៅប្លុងចោលក្នុងវត្តសង្កែ
- គ.ជ.ប កំណត់យកថ្ងៃទី២៩ មករា ២០១២ បោះឆ្នោតជ្រើសតាំងសមាជិកព្រឹទ្ធសភានីតិកាលទី៣
- នគរបាលខណ្ឌដូនពេញឃាត់ខ្លួនស្រ្តីពីរនាក់ជួញដូរថ្នាំញៀន
- រថយន្តមែរសឺដេសអត់ការងារធ្វើបើកបុករបាំងថ្មក្រឡាប់ផ្ងារកងទ្រមេឃ
- ចោរ២នាក់ចូលប្លន់ផ្ទះលក់កាហ្វេប្រមូលយកគ្រឿងអលង្ការវាយម្ចាស់ផ្ទះបែកក្បាលដេរជាង៥០ថ្នេរ
- ទទួលព័ត៌មានពីកូនធ្វើការនៅម៉ាឡេស៊ីឱ្យម្តាយជួយស្វះស្វែងរកអន្តរាគមន៍
- សពពលរដ្ឋខ្មែរដែលទាហានឡាវបាញ់ស្លាប់ក្នុងព្រៃស្រោង មិនទាន់ចរចាយកចេញបានទេ
- ជាលើកដំបូងលោកអូបាម៉ាអំពាវនាវឱ្យលោកកាដាហ្វីចាកចេញពីអំណាច
- នារីសកម្មជនការពារសិទ្ធិស្ត្រីនាំគ្នាដោះអាវចេញប្រឆាំងការប្រកួតមួយ
- នាយករដ្ឋមន្ត្រីអេហ្ស៊ីបលាលែងចេញពីតំណែង
| អ្នកវិនិយោគចិននិងម៉ាឡេស៊ីស្វែងយល់ឱកាសវិនិយោគនៅកម្ពុជា Posted: 03 Mar 2011 11:33 PM PST  រាជធានីភ្នំពេញ ៖ អាចជាលើកទី១ហើយ ដែលក្រុមអ្នកវិនិយោគចិននិងម៉ាឡេស៊ីបានមកស្វែងយល់ឱកាសវិនិយោគនៅកម្ពុជា បន្ទាប់ពីទំហំទុនវិនិយោគម៉ាឡេស៊ីបានធ្លាក់ចុះយ៉ាងខ្លាំងពីលំដាប់លេខ៣ នៃការបណ្តាក់ទុនវិនិយោគនៅកម្ពុជា ។ ថ្លែងនៅក្នុងសន្និសីទសារព័ត៌មាននាល្ងាចថ្ងៃទី២ ខែមីនា ឆ្នាំ២០១១ លោក Tan Sri Dato’ Soong Sieu Hoong ទីប្រឹក្សាប្រតិបត្តិសមាគមសភាពាណិជ្ជកម្មចិន និងឧស្សាហកម្មម៉ាឡេស៊ី (ACCCIM) បានឱ្យដឹងថា ក្រុមអ្នកវិនិយោគចិន ដែលជាសមាជិក ACCCIM មកបំពេញទស្សនកិច្ចជាលើកដំបូងនៅកម្ពុជា នាពេលនេះ គឺដើម្បីស្វែងយល់អំពីសក្តានុពល និងឱកាសវិនិយោគនៅប្រទេសកម្ពុជា ដែលពួកគេសុទ្ធសឹងជាអ្នកជំនួញធំៗនៅម៉ាឡេស៊ី ដែលពួកគេសុទ្ធសឹងជាអ្នកជំនួញធំៗនៅម៉ាឡេស៊ី ។ ក្នុងឱកាសស្នាក់នៅរាជធានីភ្នំពេញ វិនិយោគិនទាំងអស់នោះនឹងផ្សព្វផ្សាយតាមរយៈសារព័ត៌មានស្វែងរកដៃគូវិនិយោគក្នុងស្រុកដែលមានសក្តានុពលលើផ្នែកកសិកម្ម អចលនទ្រព្យ ឧស្សាហកម្មខ្នាតតូច និងផលិតផលគ្រឿងចក្រជាដើម ។ លោកបានបញ្ជាក់ថា ក្នុងចំណោមវិនិយោគិនទាំង២៨នាក់ ដែលមកទស្សនកិច្ចនៅកម្ពុជា នាពេលនេះ គឺមានផ្នែកកសិកម្មដែលពួកគេត្រូវការផ្ទៃដីប្រមាណ១៦.០០០ហិកតា សម្រាប់ដំណាំដូងប្រេង ទីតាំងសាងសង់ទីក្រុងខ្នាតតូចនិងសំណង់អគារធំ និងការសាងសង់ផ្ទះសម្រាប់អ្នកដែលមានជីវភាពធូរធារ និងផ្ទះសម្រាប់អ្នកក្រីក្រដោយប្រើប្រាស់គោលនយោបាយឱ្យខ្ចីក្នុងរយៈពេលយូរឆ្នាំ ។ ទន្ទឹមនោះ ក៏មានវិនិយោគិនដែលស្វែងរកដៃគូ ជាមួយផ្នែកឧស្សាហកម្មខ្នាតតូចដែលមានកម្មករក្នុងរង្វង់១០០ទៅ១៥០នាក់ ដើម្បីពង្រីកទំហំផលិតកម្មឱ្យទៅជាឧស្សាហកម្មខ្នាតធំជាដើម ។ ទាំងអស់នេះគឺជាការទាក់ទាញមួយយ៉ាងសំខាន់សម្រាប់អ្នកវិនិយោគក្នុងស្រុក ដែលចង់ស្វែងរកដៃគូវិនិយោគក្រៅប្រទេស ។ លោកសង្ឃឹមថា តាមរយៈនៃដំណើរទស្សនកិច្ច របស់ក្រុមសមាជិកសភាពាណិជ្ជកម្មនិងឧស្សាហកម្មម៉ាឡេស៊ី នាពេលនេះ ទំហំនៃទុនវិនិយោគម៉ាឡេស៊ីនៅកម្ពុជានឹងមានការកើនឡើងខ្ពស់ដូចជាប៉ុន្មានឆ្នាំមុនដែលម៉ាឡេស៊ីមានចំណាត់ថ្នាក់លេខ៣ ក្នុងបណ្តាប្រទេសដែលមានទុនវិនិយោគច្រើនជាងគេនៅកម្ពុជា ។ លោក Datuk Pengiran’Hj ឯកអគ្គរាជទូតម៉ាឡេស៊ីប្រចាំកម្ពុជា មានប្រសាសន៍ថា ទាំងកម្ពុជានិងម៉ាឡេស៊ីមានដំណើរអភិឌ្ឍន៍ ប្រទេសប្រហាក់ប្រហែលគ្នា ។ ក្រោយពីទទួលបានឯករាជ្យនាឆ្នាំ១៩៥៨ ម៉ាឡេស៊ីបានចាប់យកវិស័យកសិកម្មជាផ្នែកអាទិភាពក្នុងការអភិវឌ្ឍប្រទេស ។ រហូតមកដល់ឆ្នាំ១៩៦០ ម៉ាឡេស៊ីបានប្តូរពីកសិកម្មមកឧស្សាហកម្មវិញ ដែលធ្វើឱ្យម៉ាឡេស៊ីមានការរីកចម្រើនយ៉ាងឆាប់រហ័ស ។ លោកបញ្ជាក់ថា ទំហំវិនិយោគម៉ាឡេស៊ីនៅកម្ពុជាក្នុងឆ្នាំ២០១០ មានប្រមាណ៣.៣៣៩ពាន់លានដុល្លារ ដោយគ្របដណ្តប់លើផ្នែកសណ្ឋាគារ ធនាគារ រោងចក្រកាត់ដេរ ថាមពល និងវិស័យផ្សេងៗជាច្រើនទៀត ។ លោករំពឹងថា នាប៉ុន្មានឆ្នាំខាងមុខនេះទំហំនៃទុនវិនិយោគនឹងកើនឡើងខ្ពស់ ព្រោះវិនិយោគិនម៉ាឡេស៊ី ជាច្រើនកំពុងចាប់អារម្មណ៍ និងស្វែងរកឱកាសវិនិយោគនៅកម្ពុជា ៕  |
| សៀមគ្រោងធ្វើស្នាក់ការគយនិងតម្រួតត្រូវភាគីកម្ពុជាបដិសេធ Posted: 03 Mar 2011 11:24 PM PST ខេត្តបន្ទាយមានជ័យ ៖ កម្ពុជាបានបដិសេធភ្លាមៗខណៈភាគីសៀមគ្រោងសាងសង់ស្នាក់ការគយនិងប៉ុស្តិ៍តម្រួតនៅច្រកស្រុកតាប្យា ខេត្តស្រះកែវ ឈមនឹងច្រកបឹងត្រកួន ស្ថិតក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ ។ ការបដិសេធរបស់កម្ពុជាបានបង្ហាញយ៉ាងច្បាស់ថា ចំណុចព្រំដែនមិនទាន់ច្បាស់លាស់ គឺមិនអាចឱ្យមានការសាងសង់ ដោយទុកឱ្យជំនាញបច្ចេកទេសរបស់គណៈកម្មការព្រំដែនចុះសិក្សាពិនិត្យមើលសិន ។ ភាគីសៀមបានអញ្ជើញអាជ្ញាធរនិងសមត្ថកិច្ចកម្ពុជាពិនិត្យមើលទីតាំងដែលពួកគេមានគម្រោងសាងសង់។ នៅព្រឹកថ្ងៃទី៣ មីនា គណៈកម្មការមួយក្រុមរបស់កម្ពុជាដឹកនាំដោយលោកអ៊ឹម ភ័ណសុផល អភិបាលរងខេត្ត ក្នុងនោះមានវត្តមានលោកឧត្តមសេនីយ៍ត្រីឌី ផេន នាយករងទីចាត់ការការងារព្រំដែននៃអគ្គបញ្ជាការនិងជាប្រធានការិយាល័យទំនាក់ទំនងព្រំដែនកម្ពុជា-ថៃ ព្រមទាំងសមត្ថកិច្ចជាច្រើននាក់បានចូលទៅទឹកដីសៀមតាមការអញ្ជើញពីភាគីសៀមដើម្បីទៅពិនិត្យមើលទីតាំងដែលភាគីសៀមគ្រោងសាងសង់ស្នាក់ការគយ និងរដ្ឋាករ ព្រមទាំងប៉ុស្តិ៍តម្រួត។ ក្រោយការវិលត្រឡប់មកដល់ទឹកដីកម្ពុជាវិញ លោកអ៊ឹម ភ័ណសុផល អភិបាលរងខេត្តបានប្រាប់ថា ដោយមានសំណូមពរពីអភិបាលខេត្តស្រះកែវសុំសាងសង់ស្នាក់ការគយនិងរដ្ឋាករ ព្រមទាំងប៉ុស្តិ៍តម្រួតរបស់គេនៅក្នុងស្រុកតាប្យា ដែលនៅទល់មុខច្រកតំបន់បឹងត្រកួនរបស់កម្ពុជា ខាងភាគីសៀមក៏បានអញ្ជើញអាជ្ញាធរនិងសមត្ថកិច្ចកម្ពុជាទៅពិនិត្យមើលទីតាំងដែលគ្រោងសាងសង់នោះ ។ ប៉ុន្តែក្រុមការងាររបស់លោកបានប្រាប់ទៅភាគីសៀមវិញថា មិនមានសិទ្ធិសម្រេចទេ និងបានសុំពេលមួយរយៈសិនដើម្បីធ្វើរបាយការណ៍ដាក់ជូនគណៈកម្មការព្រំដែនថ្នាក់ជាតិនិងឱ្យជំនាញបច្ចេកទេសមកពិនិត្យមើលសិន។ ចំណុចដែលភាគីសៀមគ្រោងសាងសង់នោះ ត្រូវបានអភិបាលរងខេត្តប្រាប់ថា មានចម្ងាយប្រហែល២២០ម៉ែត្រពីបង្គោលឡាក់លេខ៣៦ ។ លោកអភិបាលរងខេត្តបន្តទៀតថា ខាងលោកបានប្រាប់ភាគីសៀមថា លោកគ្មានសិទ្ធិសម្រេចទេ ហើយខាងអាជ្ញាធរសៀមគឺលោកអភិបាលខេត្តស្រះកែវបានអះអាងថា កន្លែងដែលត្រូវសាងសង់នោះមិនប៉ះពាល់ចំណុចដែលមានការប្រទាំងប្រទើសគ្នាឡើយ ។ ចំណែកលោកឧត្តមសេនីយ៍ត្រីឌី ផេន បានប្រាប់តាមទូរស័ព្ទថា ការអញ្ជើញទៅចូលរួមពិនិត្យទីតាំងដែលខាងភាគីសៀមគ្រោងសាងសង់នោះ មិនមែនជាការអញ្ជើញផ្លូវការទេ ហើយលោកប្រាប់ថា ក្រោយការពិនិត្យទីតាំងក៏មានការជួបប្រជុំគ្នាមួយផងដែរ និងក្រោយកិច្ចប្រជុំបានទទួលទានអាហាររួមគ្នាក្នុងទឹកដីសៀម ។ បើគេចាំមិនភ្លេចទេ កាលពីឆ្នាំទៅមិញ ភាគីសៀមបានយកគ្រឿងចក្រមកធ្វើការឈូសឆាយនៅចំណុចនោះម្តងហើយ ដោយមិនបានប្រាប់ភាគីកម្ពុជាទេ ហើយក៏មានការរារាំងសកម្មភាពនោះម្តងហើយដែរព្រោះតែចំណុចនោះជាតំបន់ប្រទាញប្រទង់មិនទាន់ច្បាស់លាស់ពីបន្ទាត់ព្រំដែន ៕  |
| ប៉ូលិសខេត្តកណ្តាលនិងស្រុកស្នួលឆ្មក់ចូលចាប់មុខសញ្ញាជួញដូរថ្នាំញៀន Posted: 03 Mar 2011 11:23 PM PST  ខេត្តកណ្តាល ៖ ជនសង្ស័យមុខសញ្ញាចែកចាយគ្រឿងញៀនពីរនាក់ត្រូវបានកម្លាំងនគរបាលព្រហ្មទណ្ឌស្រុកអង្គស្នួល សហការជាមួយនគរបាលការិយាល័យប្រឆាំងការជួញដូរគ្រឿងញៀននៃស្នងការដ្ឋាននគរបាលខេត្តចាប់ខ្លួន ព្រមទាំងដកហូតបានថ្នាំញៀនប្រភេទម៉ាទឹកកក និងសំភារពាក់ព័ន្ធមួយចំនួនផងដែរ ។ ហេតុការណ៍នោះបានកើតឡើងកាលពីវេលាម៉ោង៤និង១៥នាទីរសៀលថ្ងៃទី២ ខែមីនា ឆ្នាំ២០១១ នៅក្នុងភូមិត្រពាំងក្រសាំង ឃុំបែកចាន ស្រុកអង្គស្នួល ។ ជនសង្ស័យដែលត្រូវប៉ូលិសឃាត់ខ្លួននោះម្នាក់ឈ្មោះសុខ សំបូរ អាយុ២៤ឆ្នាំ មុខរបរចិញ្ចឹមមាន់ មានស្រុកកំណើតភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ និងម្នាក់ទៀតឈ្មោះសៅ គង់ អាយុ៣៧ឆ្នាំ ជាជាងជួសជុលម៉ូតូ មានទីលំនៅក្នុងភូមិកើតហេតុខាងលើ ។ តាមប្រភពព័ត៌មានបានឱ្យដឹងថា ក្រៅពីមុខរបរចិញ្ចឹមមាន់ និងធ្វើជាងជួសជុលម៉ូតូ ជនទាំងពីរនាក់នោះគឺជាមុខសញ្ញាជួញដូរនិងចែកចាយគ្រឿងញៀនយ៉ាងសកម្មបំផុត ហើយពួកគេរកស៊ីរបរនេះតាំងពីយូរមកហើយ រហូតមកដល់ពេលនេះ ទើបប៉ូលិសស្រាវជ្រាវរកឃើញនិងធ្វើការចាប់ខ្លួនតែម្តង ។ ប្រភពដដែលបានបន្តទៀតថា សមត្ថកិច្ចបានឆ្មក់ចូលចាប់ខ្លួនជនទាំងពីរនាក់នោះក្នុងខណៈពេលពួកគេកំពុងលក់ថ្នាំញៀននៅក្នុងផ្ទះ ហើយសមត្ថកិច្ចបានដកហូតបានថ្នាំញៀនប្រភេទម៉ាទឹកកកចំនួន៥កញ្ចប់តូចឧបករណ៍សម្រាប់សេពគ្រឿងញៀនមួយកំប្លេ ទូរស័ព្ទដៃ១គ្រឿង និងលុយបានមកពីការលក់ថ្នាំញៀនចំនួន៤៥ម៉ឺនរៀល ព្រមទាំងថង់សម្រាប់វេចខ្ចប់ថ្នាំញៀនមួយចំនួនទៀត ។ ប្រភពដដែលបានបន្តទៀតថា ក្រោយពេលចាប់ខ្លួនសមត្ថកិច្ចបានធ្វើការសាកសួរកសាងសំណុំរឿងបញ្ជូនទៅកាន់ការិយាល័យប្រឆាំងការជួញដូរគ្រឿងញៀននៃស្នងការដ្ឋាននគរបាលខេត្តកណ្តាលដើម្បីចាត់ការបន្តតាមនីតិវិធី៕  |
| ដណ្តើមផ្ទះមួយខ្នងក្លាយជាជម្លោះស៊ីសាច់ហុតឈាមរវាងឪពុកក្មេកនិងកូនប្រសា Posted: 03 Mar 2011 11:15 PM PST  ខេត្តស្ទឹងត្រែង ៖ ជម្លោះស៊ីសាច់ហុតឈាមមួយបានកើតចេញពីផ្ទះមួយខ្នង រវាងឪពុកក្មេក និងកូនប្រសាប្រុសអត់ខាន់ស្លាដែលករណីជម្លោះនោះបានឈានដល់ការប្រើអំពើហិង្សា ទាញយកកាំបិតបន្ទោះ និងកាំបិតប៉័ងតោកាប់ចាក់ប្រហារគ្នាយ៉ាងសាហាវបំផុតបណ្តាលឱ្យឪពុកក្មេកត្រូវ៧កាំបិតបន្ទោះ ឯកូនប្រសាចិត្តភ្លើងត្រូវ១កាំបិតប៉័ងតោរងរបួសធ្ងន់ត្រូវបញ្ជូនទៅកាន់មន្ទីរពេទ្យខេត្តដើម្បីសង្គ្រោះបន្ទាន់ ។ លោកតា សាន សូត្រ វ័យ៦២ឆ្នាំ ដែលត្រូវកូនប្រសាចាក់ត្រូវ៧កាំបិត បានរៀបរាប់ថា មូលហេតុបង្កឱ្យមានជម្លោះរហូតឈានដល់ការចាក់កាប់បង្ហូរឈាមគ្នានេះ ដោយសារកូនប្រសាអត់ខាន់ស្លារូបនោះ ក្រោយពីរត់ឡើងមកយកកូនស្រីគាត់ឈ្មោះសាន ចាន់ណង អាយុជាង២០ឆ្នាំ ដោយពុំបានរៀបការឬសែនព្រេនអ្វីបន្តិចសោះ រួចមក រយៈពេល១ឆ្នាំក្រោយកូនស្រីគាត់ក៏បានកើតកូនប្រុសមួយ ។ ចាប់តាំងពីបុរសរូបនោះឡើងមករស់នៅជាមួយកូនស្រីគាត់ ដោយមិនចាំបាច់ចំណាយលុយអស់១សេននោះ ពួកគេទាំងពីរនាក់ប្តីប្រពន្ធចេះតែមានការរកាំរកូសឈ្លោះប្រកែកគ្នាជានិច្ច ពុំសូវបានសុខនឹងគ្នាទេ ។ ដោយឃើញសភាពបែបនេះ ក្នុងនាមគាត់ជាឪពុក-ម្តាយ មិនសប្បាយចិត្តសោះ ហើយក៏បាននិយាយទៅកាន់កូនថា បើពួកឯងនៅតែយ៉ាងនេះសូមចែកផ្លូវគ្នាទៅ ។ ចាប់តាំងពីពេលនោះមក កូនប្រសារូបនោះ ក៏បានចុះចេញពីផ្ទះចោលប្រពន្ធកូនខ្ចីអស់រយៈពេល៥ទៅ៦ខែ យូរៗលបចូលផ្ទះម្តង ហើយមកដៀលត្មះពួកគាត់ជាឪពុក-ម្តាយក្មេកយ៉ាងចាស់ដៃ ដោយគ្មានស្គាល់បាបបុណ្យអ្វីឡើយ ។ លុះមកដល់ល្ងាចថ្ងៃទី៣ មីនា កូនប្រសានេះបានមករករឿងគាត់ម្តងទៀត ខណៈដែលគាត់កំពុងអង្គុយបិតឫស្សីនៅមុខផ្ទះ ។ នៅពេលនោះដោយសារទ្រាំមិនបាននឹងទង្វើរបស់កូនប្រសា គាត់ក៏បានយកកាំបិតប័ុងតោជន្លគេពីចម្ងាយ កុំឱ្យមកជិតគ្រួសារគាត់ទៀត ស្រាប់តែកូនប្រសាអត់ខាន់ស្លានោះយកដំបងស្ទុះមករងកាំបិតដែលគាត់ជន្លនោះ ហើយបានវាសកាំបិតចេញពីដៃគាត់ ទើបបណ្តាលឱ្យកាំបិតប៉័ងតោនោះមុតរូបគេត្រូវឆ្អឹងជំនីរផ្នែកខាងស្តាំ១កាំបិតទៅ ។ បន្ទាប់មកកូនប្រសាគាត់បានយកកាំបិតបន្ទោះនោះមកចាក់រូបគាត់ផ្ទួនៗគ្នាចំនួន៧កាំបិត ចំក្បាល ដៃ និងខ្លួន បណ្តាលឱ្យរងរបួសជាទម្ងន់។ លោកវរសេនីយ៍ត្រីហែល វ៉ា នាយរងការិយាល័យព្រហ្មទណ្ឌកំរិតស្រាល បានឱ្យដឹងថា ជុំវិញករណីនេះមិនទាន់ដឹងថា អ្នកណាខុស អ្នកណាត្រូវនៅឡើយទេ តែតាមព័ត៌មានរបស់អ្នកភូមិបានឱ្យដឹងថា ឈ្មោះអ៊ុំ សុខុម ជាកូនប្រសានេះ គឺមិនដែលចុះសម្រុងនឹងអ្នកក្នុងភូមិទេ ហើយសំណុំរឿងនេះលោកបានបញ្ជូនទៅឱ្យការិយាល័យប្រឆាំងការជួញដូរមនុស្សនិងការពារអនីតិជនដោះស្រាយហើយ ៕  |
| កាប់ចាក់គ្នារបួសចូលពេទ្យ សមត្ថកិច្ចត្រៀមចាប់បញ្ជូនទៅតុលាការទាំង២នាក់ Posted: 03 Mar 2011 11:10 PM PST  ខេត្តបាត់ដំបង ៖ សមត្ថកិច្ចបានចាប់ខ្លួនបុរសម្នាក់កាលពីរសៀលថ្ងៃទី១ មីនា ក្រោយពីចេញពីមន្ទីរពេទ្យ ខណៈគូបដិបក្សរបស់គេកំពុងស្ថិតក្នុងមន្ទីរពេទ្យនៅឡើយ។ ជននេះត្រូវបានចាប់ខ្លួនពីបទប្រើដាវកាប់ចាក់គ្នាជាមួយសត្រូវរបស់ខ្លួនបណ្តាលឱ្យរបួសដេកដួលរៀងៗខ្លួននៅក្នុងភូមិបាសែត ឃុំតាប៉ុន ស្រុកសង្កែ កាលពីរសៀលថ្ងៃទី២២ កុម្ភៈ ។ ជនដែលសមត្ថកិច្ចចាប់ខ្លួនមុនគូប្រយុទ្ធរបស់ខ្លួននេះឈ្មោះយ៉េប អះម៉ាត់ហៀត ហៅម៉ាប់ ឬម៉ាត់ អាយុ២៧ឆ្នាំ ជាជនជាតិខ្មែរអ៊ិស្លាម រស់នៅភូមិបាសែត ឃុំតាប៉ុន ស្រុកសង្កែរីឯគូបក្ខដិបក្ខដែលរបួសធ្ងន់កំពុងព្យាបាលនៅមន្ទីរពេទ្យនៅឡើយឈ្មោះទុំ លៀង អាយុ២៣ឆ្នាំ រស់នៅភូមិឈុងត្រដក់ ឃុំរកា ស្រុកសង្កែ។ សមត្ថកិច្ចស្រុកសង្កែបាននិយាយថា ជន២នាក់នេះបានប្រើដាវកាប់ចាក់បង្ហូរឈាមគ្នាដើម្បីសងសឹកគំនុំចាស់។ ពួកគេច្បាំងគ្នារហូតរបួសឈាមដាបដេកដួលរៀងខ្លួននៅកន្លែងកើតហេតុ ហើយត្រូវគេជួយបញ្ជូនទៅកាន់មន្ទីរពេទ្យទាំងអស់គ្នា ។ ឈ្មោះយ៉េប អះម៉ាត់ហៀត របួសដៃទាំង២ រីឯឈ្មោះទុំ លៀង របួសក្បាល ដៃ និងពោះធ្ងន់ធ្ងរ។ តាមចំលើយរបស់ឈ្មោះយ៉េប អះម៉ាត់ហៀត ថា គេគ្មានគំនុំជាមួយឈ្មោះទុំ លៀង ទេ ប៉ុន្តែមានគំនុំជាមួយបក្សពួករបស់ជននោះ។ ឈ្មោះទុំ លៀង តែងណាត់កាប់ចាក់គ្នាជាមួយរូបគេមិនឈប់ លុះនៅរសៀលថ្ងៃទី២២ កុម្ភៈ ក៏ប៉ះទង្គិចគ្នាតែម្តង ដោយគេប្រើកាំបិត រីឯឈ្មោះទុំ លៀង ប្រើដាវសាមូរ៉ៃ។ លោកជេត វណ្ណនី ស្នងការរង និងជាប្រធានការិយាល័យកណ្តាលយុត្តិធម៌មានប្រសាសន៍ថា សំណុំរឿងនេះគ្មានដើមបណ្តឹងទេ។ ពួកគេជាជនល្មើសផងជាជនរងគ្រោះផង ព្រោះក្រោយពេលច្បាំងគ្នាពួកគេរបួសទាំង២នាក់ដេកដួលក្នុងថ្លុកឈាមរៀងៗខ្លួន។ លោកបញ្ជាក់ថា សមត្ថកិច្ចរបស់លោក ត្រៀមឃាត់ខ្លួនពួកគេទាំង២នាក់បញ្ជូនទៅតុលាការ ។ ឈ្មោះអះម៉ាត់ហៀត ធូរស្រាលចេញពីមន្ទីរពេទ្យមុនទើបចាត់ការមុន រីឯឈ្មោះលៀង ត្រៀមចាប់បញ្ជូនទៅតុលាការតាមក្រោយ បន្ទាប់ពីគេចេញពីមន្ទីរពេទ្យ ៕  |
| ជនជាតិចិនម្នាក់ទ្រមខ្លួនដោយសារចោរប្លន់យកទូរស័ព្ទដៃ Posted: 03 Mar 2011 11:08 PM PST រាជធានីភ្នំពេញ ៖ ជនសង្ស័យ១ក្រុមមានគ្នាចំនួន៦នាក់ ត្រូវបានប្រភពឱ្យដឹងថា បានធ្វើការវាយដំទៅលើជនជាតិចិនម្នាក់ប្លន់យកទូរស័ព្ទដៃ២គ្រឿង កាលពីថ្ងៃទី១ មីនា វេលាម៉ោង១២ និង៥០នាទីរំលងអធ្រាត្រនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ប៉ុន្តែភ្លាមៗនោះប៉ូលិសចាប់ខ្លួនបាន២នាក់ ។ លោកម៉ក់ ហុង អធិការប៉ូលិសខណ្ឌសែនសុខឱ្យដឹងថា ជនជាតិចិនដែលរងការវាយទ្រមខ្លួនពីក្រុមជនសង្ស័យដើម្បីប្លន់យកទូរស័ព្ទដៃចំនួន២ គ្រឿងនេះ ឈ្មោះលាវ ស៊ានសាន់ ភេទប្រុស អាយុ៣១ឆ្នាំ ស្នាក់នៅផ្ទះជួលនៅកន្លែងកើតហេតុ ។ រីឯជនល្មើសចំនួន២នាក់ដែលប៉ូលិសចាប់បានឈ្មោះសួន សេដ្ឋីបុត្រ ភេទប្រុស អាយុ២១ឆ្នាំ នៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ និងឈ្មោះផយ ប៊ុនធឿន ភេទប្រុស អាយុ២១ឆ្នាំ ជាកម្មកររោងចក្រ ស្នាក់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ចំណែកឯ៤នាក់ទៀតដែលសមត្ថកិច្ចស្គាល់អត្តសញ្ញាណនោះកំពុងតាមចាប់ខ្លួន។ លោកអធិការប្រាប់ថា នៅវេលាម៉ោង១២ និង៣០នាទីរំលងអធ្រាត្រ ថ្ងៃទី១ មីនា ឆ្នាំ២០១១ ជនជាតិចិនបានជិះម៉ូតូឌុបចេញពីអាកាសយានដ្ឋានអន្តរជាតិភ្នំពេញ ហើយពេលទៅដល់ផ្ទះជួលស្រាប់តែត្រូវចោរប្លន់ចំនួន២នាក់ជិះម៉ូតូ២គ្រឿងម៉ាកវ៉េវ និងគុបជ្រុងតាមទៅវាយទ្រមខ្លួនប្លន់យកទូរស័ព្ទចំនួន២គ្រឿង។ ទោះជាយ៉ាងណាក្តីពេលនោះកំលាំងប៉ូលិសល្បាតប្រទះឃើញចាប់បានចោរ២នាក់ ចំណែក៤នាក់ទៀតរត់គេចបាត់ ។ លោកអធិការបញ្ជាក់ថា ប៉ូលិសរឹបអូសបានម៉ូតូចំនួន២គ្រឿងដែលជនសង្ស័យជិះធ្វើសកម្មភាព ចំណែកឯទូរស័ព្ទរបស់ជនរងគ្រោះត្រូវជន៤នាក់នោះយកទៅបាត់ ៕  |
| ពេទ្យយោធាកម្ពុជា-អាមេរិកសហការព្យាបាលជម្ងឺប្រជាពលរដ្ឋមិនគិតថ្លៃ Posted: 03 Mar 2011 11:00 PM PST  រាជធានីភ្នំពេញ ៖ ប្រជាពលរដ្ឋខ្មែរអ៊ិស្លាមស្ថិតក្នុងភូមិអូរជ្រៅ ឃុំអូរជ្រៅ ស្រុកព្រៃនប់ ប្រមាណជិត៣.០០០នាក់ ទទួលបានការព្យាបាលជម្ងឺដោយឥតគិតថ្លៃពីក្រុមគ្រូពេទ្យយោធាស្ម័គ្រចិត្តអាមេរិកសហការជាមួយគ្រូពេទ្យយោធាកម្ពុជា។ សកម្មភាពព្យាបាលនោះកាលពីថ្ងៃទី២៧ ខែកុម្ភៈ ឆ្នាំ២០១១។ លោក GEN BIRD SONG មន្ត្រីយោធាផ្នែកពេទ្យនៃកងម៉ារីននាវាអាមេរិកបានថ្លែងថា នេះជាកិច្ចសហការប្រកបដោយមនុស្សធម៌របស់កងទ័ពអាមេរិកដែលតែងតែធ្វើជាប្រចាំ ។ តាមគម្រោង គឺរយៈពេលមួយថ្ងៃនៃបេសកកម្មជួយព្យាបាលជម្ងឺជូនប្រជាពលរដ្ឋដោយឥតគិតថ្លៃនេះសម្រេចឱ្យបាននូវការព្យាបាលប្រមាណពី៧០០ទៅ១.០០០នាក់។ ប្រតិបត្តិការនេះមានរយៈពេលប្រមាណ៣ថ្ងៃ។ ដូច្នេះលោកគិតថា មានប្រជាពលរដ្ឋប្រមាណជាង៣.០០០នាក់ទទួលបានការព្យាបាល។ លោក GEN BIRDSONG ឱ្យដឹងថា ក្រុមគ្រូពេទ្យរបស់លោកផ្តោតការយកចិត្តទុកដាក់ព្យាបាលចំពោះមនុស្សចាស់លើជម្ងឺភ្នែក ដោយមានការវះកាត់តូច និងផ្តល់វ៉ែនតាសម្រាប់ពួកគាត់។ ទន្ទឹមនោះយកចិត្តទុកដាក់លើការព្យាបាលជម្ងឺក្រពះ ថ្លើម ពោះវៀន រួមទាំងជម្ងឺផ្នែកសរីរាង្គខាងក្នុង និងជម្ងឺគ្រុនក្តៅសម្រាប់កុមារ។ ចំណែកបងប្អូនប្រជាពលរដ្ឋដែលមានជម្ងឺរ៉ាំរ៉ៃ គឺពេទ្យយោធាអាមេរិកមិនអាចព្យាបាលបានទេ ប៉ុន្តែក្រុមលោកនឹងពិភាក្សាជាមួយក្រុមគ្រូពេទ្យយោធាកម្ពុជាដើម្បីស្វែងរកគ្រូពេទ្យជំនាញជួយព្យាបាលពួកគាត់។ លោកកោតសរសើេរចំពោះរាជរដ្ឋាភិបាលកម្ពុជា មន្ត្រីយោធាកម្ពុជាដែលបានគាំទ្រ និងសហការល្អជាមួយក្រុមគ្រូពេទ្យស្ម័គ្រចិត្តអាមេរិក ។ លោកអរគុណផងដែរចំពោះប្រជាពលរដ្ឋដែលបង្ហាញមនោសញ្ចេតនារាក់ទាក់ជាមួយក្រុមលោក។ លោកយន់ ឆេង មេឃុំអូរជ្រៅបានប្រាប់អ្នកកាសែតថា ឃុំអូរជ្រៅស្ថិតនៅទីដាច់ស្រយាល ហើយកំពុងជួបការលំបាកលើការព្យាបាលជម្ងឺ។ ដូច្នេះអ្វីដែលក្រុមគ្រូពេទ្យស្ម័គ្រចិត្តអាមេរិក និងក្រុមគ្រូពេទ្យយោធាកម្ពុជាមកជួយព្យាបាលនេះ គឺជាសកម្មភាពមនុស្សធម៌ដ៏ថ្លៃថ្លាបំផុតសម្រាប់ប្រជាពលរដ្ឋ។ តាងនាមប្រជាពលរដ្ឋក្នុងឃុំលោកថ្លែងអំណរគុណយ៉ាងជ្រាលជ្រៅចំពោះគ្រូពេទ្យទាំងអស់ជាមួយនឹងទឹកចិត្តសប្បាយរីករាយផងដែរ៕  |
| ពេទ្យយោធាកម្ពុជា-អាមេរិកសហការព្យាបាលជម្ងឺប្រជាពលរដ្ឋមិនគិតថ្លៃ Posted: 03 Mar 2011 11:00 PM PST រាជធានីភ្នំពេញ ៖ ប្រជាពលរដ្ឋខ្មែរអ៊ិស្លាមស្ថិតក្នុងភូមិអូរជ្រៅ ឃុំអូរជ្រៅ ស្រុកព្រៃនប់ ប្រមាណជិត៣.០០០នាក់ ទទួលបានការព្យាបាលជម្ងឺដោយឥតគិតថ្លៃពីក្រុមគ្រូពេទ្យយោធាស្ម័គ្រចិត្តអាមេរិកសហការជាមួយគ្រូពេទ្យយោធាកម្ពុជា។ សកម្មភាពព្យាបាលនោះកាលពីថ្ងៃទី២៧ ខែកុម្ភៈ ឆ្នាំ២០១១។ លោក GEN BIRD SONG មន្ត្រីយោធាផ្នែកពេទ្យនៃកងម៉ារីននាវាអាមេរិកបានថ្លែងថា នេះជាកិច្ចសហការប្រកបដោយមនុស្សធម៌របស់កងទ័ពអាមេរិកដែលតែងតែធ្វើជាប្រចាំ ។ តាមគម្រោង គឺរយៈពេលមួយថ្ងៃនៃបេសកកម្មជួយព្យាបាលជម្ងឺជូនប្រជាពលរដ្ឋដោយឥតគិតថ្លៃនេះសម្រេចឱ្យបាននូវការព្យាបាលប្រមាណពី៧០០ទៅ១.០០០នាក់។ ប្រតិបត្តិការនេះមានរយៈពេលប្រមាណ៣ថ្ងៃ។ ដូច្នេះលោកគិតថា មានប្រជាពលរដ្ឋប្រមាណជាង៣.០០០នាក់ទទួលបានការព្យាបាល។ លោក GEN BIRDSONG ឱ្យដឹងថា ក្រុមគ្រូពេទ្យរបស់លោកផ្តោតការយកចិត្តទុកដាក់ព្យាបាលចំពោះមនុស្សចាស់លើជម្ងឺភ្នែក ដោយមានការវះកាត់តូច និងផ្តល់វ៉ែនតាសម្រាប់ពួកគាត់។ ទន្ទឹមនោះយកចិត្តទុកដាក់លើការព្យាបាលជម្ងឺក្រពះ ថ្លើម ពោះវៀន រួមទាំងជម្ងឺផ្នែកសរីរាង្គខាងក្នុង និងជម្ងឺគ្រុនក្តៅសម្រាប់កុមារ។ ចំណែកបងប្អូនប្រជាពលរដ្ឋដែលមានជម្ងឺរ៉ាំរ៉ៃ គឺពេទ្យយោធាអាមេរិកមិនអាចព្យាបាលបានទេ ប៉ុន្តែក្រុមលោកនឹងពិភាក្សាជាមួយក្រុមគ្រូពេទ្យយោធាកម្ពុជាដើម្បីស្វែងរកគ្រូពេទ្យជំនាញជួយព្យាបាលពួកគាត់។ លោកកោតសរសើេរចំពោះរាជរដ្ឋាភិបាលកម្ពុជា មន្ត្រីយោធាកម្ពុជាដែលបានគាំទ្រ និងសហការល្អជាមួយក្រុមគ្រូពេទ្យស្ម័គ្រចិត្តអាមេរិក ។ លោកអរគុណផងដែរចំពោះប្រជាពលរដ្ឋដែលបង្ហាញមនោសញ្ចេតនារាក់ទាក់ជាមួយក្រុមលោក។ លោកយន់ ឆេង មេឃុំអូរជ្រៅបានប្រាប់អ្នកកាសែតថា ឃុំអូរជ្រៅស្ថិតនៅទីដាច់ស្រយាល ហើយកំពុងជួបការលំបាកលើការព្យាបាលជម្ងឺ។ ដូច្នេះអ្វីដែលក្រុមគ្រូពេទ្យស្ម័គ្រចិត្តអាមេរិក និងក្រុមគ្រូពេទ្យយោធាកម្ពុជាមកជួយព្យាបាលនេះ គឺជាសកម្មភាពមនុស្សធម៌ដ៏ថ្លៃថ្លាបំផុតសម្រាប់ប្រជាពលរដ្ឋ។ តាងនាមប្រជាពលរដ្ឋក្នុងឃុំលោកថ្លែងអំណរគុណយ៉ាងជ្រាលជ្រៅចំពោះគ្រូពេទ្យទាំងអស់ជាមួយនឹងទឹកចិត្តសប្បាយរីករាយផងដែរ៕  |
| ប្រេងសាំងគេចពន្ធត្រូវបានគេដឹកជញ្ជូនឆ្លងដែនតាមផ្លូវទឹក Posted: 03 Mar 2011 10:53 PM PST  ខេត្តកំពត ៖ ដើមឆ្នាំ២០១១នេះ នៅតាមច្រករបៀងព្រំដែននានាជាពិសេសច្រករបៀងនៅសងខាងច្រកទ្វារអន្តរជាតិព្រែកចាកគេសង្កេតឃើញសកម្មភាពក្រុមឈ្មួញរត់ពន្ធប្រេងសាំងកំរើកឡើងវិញទាំងផ្លូវទឹក និងតាមផ្លូវគោក។ យោងតាមប្រភពព័ត៌មានពីប្រជាពលរដ្ឋដែលមានលំនៅឋានជិតខ្សែបន្ទាត់ព្រំដែនជាប់ច្រករបៀងបាននិយាយថា ជំនួញប្រេងសាំងត្រូវបានគេផ្អាកសកម្មភាពដឹកជញ្ជូនពីប្រទេសវៀតណាមរយៈពេល២ឆ្នាំហើយ ទើបតែនៅដើមឆ្នាំ២០១១នេះប្រេងសាំងត្រូវបានគេដឹកជញ្ជូនឡើងវិញឆ្លងកាត់មកចូលខេត្តកំពត។ ជាក់ស្តែងនៅខាងកើតច្រកទ្វារអន្តរជាតិព្រែកចាក គឺមានសកម្មភាពដឹកជញ្ជូនជាប្រចាំតាមផ្លូវទឹក។ ពេលខ្លះក្រុមឈ្មួញបានគេជួលប្រជាពលរដ្ឋឱ្យចងខ្សែអូសប៊ីដុងប្រេងតាមទឹក ឬដឹកតាមទូក ហើយបើអ្នកខំក្នុងមួយថ្ងៃគេដឹកតាមទូកបានទៅដល់១០ជើង ដែលក្នុងមួយជើងគេដឹកបានពី៣០ទៅ៤០ប៊ីដុង។ អ្នករកស៊ីដឹកប្រេងសាំងគេចពន្ធទាំងនេះមិនខ្លាចសមត្ថកិច្ចទេ ព្រោះមានអ្នកអង្គុយចាំយកលុយ។ មន្ត្រីនគរបាលច្រកទ្វារអន្តរជាតិព្រែកចាកមួយរូបនិយាយថា កម្លាំងនគរបាលអាចចល័តចេញពីប៉ុស្តិ៍ចំងាយ១.៥០០ម៉ែត្រ ប៉ុន្តែការអង្គុយចាំយកលុយនោះបានត្រឹមតែរួចថ្លៃម្ហូបប៉ុណ្ណោះ ។ ចំណែកឯមន្ត្រីគយវិញមិនអាចរកការបំភ្លឺបានទេ តែកន្លងមកគេក៏ធ្លាប់ឃើញខាងគយទៅបង្អើលម្តងម្កាលដែរ ៕  |
| ចំនួនអ្នកអត់ការងារធ្វើនៅជប៉ុនមាន៤,៩ភាគរយក្នុងខែមករា Posted: 03 Mar 2011 10:50 PM PST យល់ដឹង ៖ អត្រាអត់ការងារធ្វើក្នុងប្រទេសជប៉ុននាខែមករា ស្ថិតនៅលើតួលេខដដែលគ្មានការប្រែប្រួលខុសពីខែមុនទេ គឺនៅត្រឹម៤,៩ភាគរយ។ នេះបើតាមរបាយការណ៍រដ្ឋាភិបាលប្រាប់ឲ្យដឹងនៅថ្ងៃអង្គារ និងបញ្ជាក់ថា វាស្ថិតនៅក្នុងលំដាប់ខ្ពស់ដដែល។ តាមរបាយការណ៍ ចំនួនអ្នកអត់ការងារធ្វើមានការថយចុះរាល់ខែចំនួន១៤០.០០០នាក់ បើគិតពីឆ្នាំកន្លងទៅ៣,០១លាននាក់ ក្នុងរយៈពេល៨ខែចុងក្រោយ នេះបើតាមរបាយការណ៍ដំបូងរបស់ក្រសួងការបរទេស និងទូរគមនាគមន៍។ ចំនួនធ្លាក់ចុះនៃអ្នកអត់ការងារធ្វើនាពេលថ្មីៗនឹងអាចជាទុនក្នុងការស្តារសេដ្ឋកិច្ច ប៉ុន្តែអត្រាអ្នកអត់ការងារស្ថិតក្នុងចំនួនច្រើននៅឡើយ ហើយយើងត្រូវខិតខំបន្តទៀត នេះបើតាមសម្តីរបស់លោករដ្ឋមន្ត្រីក្រសួងការបរទេស និងទូរគមនាគមន៍។ ចំនួនបុរសអត់ការងារធ្វើធ្លាក់៥,៣ភាគរយក្នុងខែមករា ខុសពីខែធ្នូ ធ្លាក់៥,៤ភាគរយ ដែលនេះជាចំនួនធ្លាក់ចុះនៃអត្រាអត់ការងារធ្វើពីរខែជាប់គ្នា។ ចំណែកស្ត្រីវិញ ចំនួនអ្នកអត់ការងារធ្វើមាន៤,២ភាគរយ ធ្លាក់ពីចំនួន៤,៣ភាគរយក្នុងរយៈពេលពីរខែនេះ។ ចំនួនមនុស្សដែលបាត់បង់ការងារមានការធ្លាក់ចុះពីចំនួន៨៣០.០០០នាក់ មកត្រឹម ២០០.០០០នាក់ ដែលនេះជាសញ្ញាវិជ្ជមានមួយរបស់រដ្ឋាភិបាល។ មានរបាយការណ៍មួយរបស់ក្រសួងសុខាភិបាល ការងារ និងសុខុមាលភាពទៀតថា ចំនួនអត្រាអ្នករកការងារធ្វើ១០០នាក់ មានការងារសំរាប់ពួកគេ៦១នាក់៕  |
| ព្រូដេកក្រោមឡានតៃកុងបើកកិនស្លាប់ដឹកសពយកទៅប្លុងចោលក្នុងវត្តសង្កែ Posted: 03 Mar 2011 10:28 PM PST  ខេត្តបាត់ដំបង ៖ សពបុរសម្នាក់ដែលមានស្នាមរបួសបែកក្បាលខ្ទេចផ្នែកខាងក្រោយ ត្រូវគេប្រទះឃើញមនុស្ស៤នាក់ ដឹកតាមម៉ូតូយកទៅប្លុងចោលក្បែរចេតិយក្នុងវត្តសង្កែ កាលពីវេលាម៉ោង៦ព្រឹកថ្ងៃទី៤ មីនា ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ។ ស្ត្រីឈ្មោះសិន សារ៉ូន អាយុ៥៨ឆ្នាំ ធ្វើចុងភៅនៅក្នុងវត្តសង្កែ បាននិយាយថា ក្រោយពីពួកគេទម្លាក់សពទុកក្បែរចេតិយមួយមានបុរសម្នាក់ក្នុងចំណោម៤នាក់ និងមានស្ត្រីម្នាក់ផង បានមកសួរគាត់ដើម្បីរកអាចារ្យបូជាសពនោះ ។ ក្រុមនោះអះអាងប្រាប់គាត់ថា សពនេះស្លាប់ដោយសារគ្រោះថ្នាក់ចរាចរណ៍ជិះម៉ូតូចូលរថយន្តពេលស្រវឹង ប៉ុន្តែក្រោយពីនិយាយបានប៉ុន្មាននាទី ក្រុមនេះជិះម៉ូតូចាកចេញទៅបាត់ ទើបមានគេរាយការណ៍ទៅសមត្ថកិច្ចតែម្តង ។  |
| គ.ជ.ប កំណត់យកថ្ងៃទី២៩ មករា ២០១២ បោះឆ្នោតជ្រើសតាំងសមាជិកព្រឹទ្ធសភានីតិកាលទី៣ Posted: 03 Mar 2011 10:28 PM PST រាជធានីភ្នំពេញ ៖ យោងតាមសេចក្តីប្រកាសរបស់គណៈកម្មាធិការជាតិរៀបចំការបោះឆ្នោតកាលពីថ្ងៃទី១ មីនា ២០១១ ដែលកោះសន្តិភាពបានទទួលចុះហត្ថលេខាដោយលោកអ៊ឹម សួស្តី ប្រធាន គ.ជ.ប ឱ្យដឹងថា ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ នឹងត្រូវប្រព្រឹត្តទៅនៅថ្ងៃអាទិត្យ ទី២៩ មករា ឆ្នាំ២០១២ ។  |
| នគរបាលខណ្ឌដូនពេញឃាត់ខ្លួនស្រ្តីពីរនាក់ជួញដូរថ្នាំញៀន Posted: 03 Mar 2011 08:15 PM PST  រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញបានឃាត់ខ្លួនស្ត្រីសង្ស័យជួញដូរថ្នាំញៀន២នាក់ នៅចំណុចជាប់របងវិហារចាមប្លុកបឹងកក់ ស្ថិតក្នុងភូមិទី២២ សង្កាត់ស្រះចក ខណ្ឌដូនពេញ កាលពីវេលាម៉ោង៥និង៣០នាទីល្ងាចថ្ងៃទី៣ មីនា ២០១១ ក្រោយពីសមត្ថកិច្ចរកឃើញថ្នាំញៀន ហើយការបង្ក្រាបជួញដូរថ្នាំញៀនដ៏ក្តៅគគុកនេះមិនរំខានដល់នគរបាលប៉ុស្តិ៍រដ្ឋបាលស្រះចកនោះទេ ។ ស្ត្រីសង្ស័យជួញដូរថ្នាំញៀនដែលនគរបាលឃាត់ខ្លួនមាន ១-ឈ្មោះប៊ូ ណេត អាយុ៤៨ឆ្នាំ ស្នាក់នៅក្នុងវិហារចាម សង្កាត់ស្រះចក ខណ្ឌដូនពេញ ២-ឈ្មោះរឿន ធី អាយុ២៥ឆ្នាំ ស្នាក់នៅជាមួយស្ត្រីខាងលើ ។ ប៉ូលិសខណ្ឌដូនពេញបានឱ្យដឹងថា យោងតាមការចង្អុលបង្ហាញពីលោកអធិការនគរបាលខណ្ឌដូនពេញត្រូវតែអនុវត្តបង្ក្រាបជាប្រចាំបទល្មើសជួញដូរថ្នាំញៀន ជាក់ស្តែងនៅថ្ងៃទី៣ មីនា វេលាម៉ោង៥និង៣០នាទីល្ងាច កម្លាំងនគរបាលផ្នែកព្រហ្មទណ្ឌអធិការដ្ឋាននគរបានខណ្ឌដូនពេញបានឃាត់ខ្លួនស្ត្រីចំនួន២នាក់ជាប់របងវិហារចាម ស្ថិតក្នុងភូមិទី២២ សង្កាត់ស្រះចក បន្ទាប់ពីរកឃើញថ្នាំញៀនប្រភេទយ៉ាម៉ាចំនួន២គ្រាប់ ។ ប្រជាពលរដ្ឋរស់នៅក្បែរវិហារចាម (ប្លុកបឹងកក់) បាននិយាយថា មិនថា ពេលយប់ ឬពេលថ្ងៃនោះទេ សកម្មភាពជួញដូរថ្នាំញៀនពួកគេតែងតែឈរលក់ដូចលក់ស្ករគ្រាប់ មិនរំខានដល់នគរបាលប៉ុស្តិ៍រដ្ឋបាលស្រះចកនោះ ទេ បើទោះបីជាសាលាខណ្ឌដូនពេញ បានយកសង្កាត់ស្រះចក ជាសង្កាត់ដកពិសោធន៍ក៏ដោយ គេសង្កេតឃើញ ក្រុមជួញដូរថ្នាំញៀន នៅតែបន្តសកម្មភាពដដែល៕  |
| រថយន្តមែរសឺដេសអត់ការងារធ្វើបើកបុករបាំងថ្មក្រឡាប់ផ្ងារកងទ្រមេឃ Posted: 03 Mar 2011 08:09 PM PST  រាជធានីភ្នំពេញ ៖ រថយន្តម៉ាកមែរសឺដេស ពណ៌ខ្មៅ មួយគ្រឿង ដែលគេអះអាងថា ម្ចាស់ស្រវឹងបានបើកបោះពួយបុកក្បាលរបាំងថ្មពេញទំហឹង ហើយក្រឡាប់ផ្ងារកង់ ពោះទ្រមេឃកាលពីវេលាម៉ោង៩និង៣០នាទីយប់ថ្ងៃទី៣ មីនា លើមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១ ខណ្ឌទួលគោក បណ្តាលឱ្យក្បាលរបាំងថ្ម២កំណាត់បានបាក់របេះចេញពីជួរ...ចំណែកម្ចាស់រថយន្តមិនមានរងរបួសអ្វីធ្ងន់ធ្ងរទេ ។ រថយន្តបង្កគ្រោះថ្នាក់នេះត្រូវសមត្ថកិច្ចឱ្យដឹងថា ម៉ាកមែរសឺដេស ពណ៌ខ្មៅ ពាក់ស្លាកលេខ ភ្នំពេញ 2E-3168 ហើយពុំត្រូវគេស្គាល់អ្នកបើកបរឡើយ ពេលរថយន្តក្រឡាប់បានបើកទ្វារចុះពីលើរថយន្តគេចខ្លួនបាត់ ។ តាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តម៉ាកមែរសឺដេសខាងលើបានធ្វើដំណើរតាមមហាវិថីសហព័ន្ធរុស្ស៊ី ក្នុងទិសដៅពីលិចទៅកើត ។ ពេលធ្វើដំណើរហួសវិទ្យាស្ថានបច្ចេកវិទ្យាកម្ពុជា (តិចណូ) បានបន្តិច រថយន្តក៏ជ្រុលចង្កូតទៅបុកក្បាលរបាំងថ្ម ពេញទំហឹង បណ្តាលឱ្យក្រឡាប់ទៅខាងស្តាំ ដេកផ្ងារកង់ឡើងលើ ពោះទ្រមេឃ។ ភ្លាមៗនោះអ្នកបើកបរបានលូនចេញពីក្នុងរថយន្តរួចហើយគេចខ្លួនបាត់ ដោយពុំមានរងរបួសអ្វីធ្ងន់ធ្ងរឡើយ ។ រថយន្តត្រូវបានសមត្ថកិច្ចចុះទៅស្ទូចបញ្ជូនទៅកាន់សាលារាជធានីភ្នំពេញដោះស្រាយតាមច្បាប់ ៕  |
| Posted: 03 Mar 2011 08:05 PM PST ស្រុកអង្គស្នួល, ខេត្តកណ្តាល ៖ ផ្ទះលក់កាហ្វេធំគ្រាន់បើមួយត្រូវចោរ២នាក់គាស់បង្អួចចូលចាប់មនុស្សចង និងប្លន់យកគ្រឿងអលង្ការលុយកាក់ចេញទៅបាត់ដោយសុវត្ថិភាពបន្សល់ទុកឱ្យជនរងគ្រោះរងរបួសបែកក្បាលពីរនាក់ម្តាយកូនដេរអស់រាប់សិបថ្នេរ កាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី៤ មីនា ២០១១ នៅភូមិអង្គស្នួលទី៣ ឃុំពើក ស្រុកអង្គស្នួល ។ ស្ត្រីម្ចាស់ផ្ទះលក់កាហ្វេឈ្មោះសុខ ភឿន អាយុ៤៩ឆ្នាំ រងរបួសបែកក្បាលដោយសារតែចោរវាយនឹងដែកស្បែងដេរអស់៥០ថ្នេរ...ស្ត្រីរូបនេះមានប្តីជាមន្ត្រីប៉ូលិសនៅព្រំដែន...ចំណែកកូនស្រីរបស់ម្ចាស់ផ្ទះឈ្មោះលឹម សុខា អាយុ២៨ឆ្នាំ ត្រូវចោរវាយនឹងដែកស្បែងបែកក្បាលដេរអស់៥ថ្នេរផងដែរ ។ ទ្រព្យសម្បត្តិដែលចោរប្រមូលយកទៅមានខ្សែដៃប្លាទីន២តម្លឹង៣ជី ខ្សែ.កប្លាទីន៨ជី ខ្សែដៃដាំត្បូង១ខ្សែក្រវិលពេជ្រ១គូ តម្លៃប្រហែល១.០០០ដុល្លារ ប្រាក់៥០០ដុល្លារ បន្តោងមាស២ជី និងទូរស័ព្ទដៃ១គ្រឿង ។ ចំណែកចោរប្លន់មានគ្នា២នាក់ ប្រដាប់ដោយកាំភ្លើងខ្លី១ដើម ដែកស្បែង១ និងឧបករណ៍ដូយរថយន្ត១សម្រាប់គាស់ និងលើកទ្វារ...ពេលពួកចោរគាស់បង្អួចចូលផ្ទះលក់កាហ្វេខាងលើនេះ គឺពួកគេបានចាប់កូនម្ចាស់ផ្ទះចងដៃចងជើង និងគំរាមមិនឱ្យស្រែក បើហ៊ានស្រែកបាញ់សម្លាប់ចោល...ដោយសារតែម្ចាស់ផ្ទះប្រកែកមិនព្រមប្រគល់ទ្រព្យសម្បត្តិឱ្យពួកចោរនោះ ទើបពួកចោរទាញដែកស្បែងវាយបែកក្បាលដេរច្រើនថ្នេរបែបនេះ ហើយគេចខ្លួនតាមផ្លូវក្រោយបាត់ទៅ ៕  |
| ទទួលព័ត៌មានពីកូនធ្វើការនៅម៉ាឡេស៊ីឱ្យម្តាយជួយស្វះស្វែងរកអន្តរាគមន៍ Posted: 03 Mar 2011 07:49 PM PST  ក្រុងប៉ោយប៉ែត ៖ កាលពីរសៀលថ្ងៃទី២៦ កុម្ភៈ ស្ត្រីឈ្មោះឆន ចាន់ខុម អាយុ៤៩ឆ្នាំ និងបុរសជាប្តីឈ្មោះយឹម យ៉េន អាយុ២៩ឆ្នាំ រស់នៅចំណុចព្រៃព្រិច ស្ថិតក្នុងភូមិក្បាលស្ពាន សង្កាត់ប៉ោយប៉ែត បានមកស្រែកទ្រហោយំចំពោះមុខអ្នកសារព័ត៌មានឱ្យជួយអន្តរាគមន៍ដល់កូនរបស់គាត់ផង ។ ស្ត្រីឈ្មោះឆន ចាន់ខុម ជាម្តាយបានរៀបរាប់ប្រាប់កោះសន្តិភាពថា កូនរបស់គាត់ឈ្មោះរឿន អ៊ីសាប៊េល ភេទស្រី អាយុ២៨ឆ្នាំ បានចេញពីប្រទេសកម្ពុជាទៅធ្វើការនៅប្រទេសម៉ាឡេស៊ីអស់រយៈពេល៧ខែមកហើយ គឺចាប់ពីថ្ងៃទី៨ សីហា ឆ្នាំ២០១០ តាមរយៈក្រុមហ៊ុនអ៊ឹងរិទ្ធីគ្រុប ។ ស្ត្រីជាម្តាយបានបន្តថា នៅវេលាម៉ោង៥ល្ងាច ថ្ងៃទី១៥ កុម្ភៈ ឆ្នាំ២០១១ កូនស្រីរបស់គាត់ដែលធ្វើការនៅប្រទេសម៉ាឡេស៊ី នោះបានជួបជនជាតិខ្មែរម្នាក់ជាកម្មករធ្វើការនៅប្រទេសម៉ាឡេស៊ី ដូចគ្នា ហើយបានខ្ចីទូរស័ព្ទដៃទាក់ទងមកលេខទូរស័ព្ទរបស់គាត់ ដោយប្រាប់ឱ្យជួយផង បើមិនជួយទេ ប្រាកដជាស្លាប់នៅស្រុកគេហើយ ។ បន្ទាប់មកទូរស័ព្ទនោះដាច់លែងទំនាក់ទំនងគ្នាបាន។ ស្ត្រីជាម្តាយបានបញ្ជាក់ថា លេខទូរស័ព្ទដែលទាក់ទងចូលមកទូរស័ព្ទរបស់គាត់នោះមានលេខ +៦០១៦៤៨៦៤១២០ ។ ក្រោយពេលទទួលដំណឹងពីកូនស្រីរបស់គាត់ហើយរូបគាត់បានព្យាយាមទូរស័ព្ទទៅក្រុមហ៊ុនអ៊ឹងរិទ្ធីគ្រុប ជាច្រើនលើក ប៉ុន្តែគ្មានអ្នកលើកសោះ ទើបរូបគាត់ទាំងពីរនាក់ប្តីប្រពន្ធបាននាំគ្នាទៅប្តឹងដល់ក្រសួងមហាផ្ទៃឱ្យជួយអន្តរាគមន៍នាំកូនគាត់មកស្រុកវិញ ។ ស្ត្រីជាម្តាយបាននិយាយថា នៅថ្ងៃទី១៧ កុម្ភៈ ឆ្នាំ២០១១ ខាងអង្គការបានហៅរូបគាត់ឱ្យទៅជួបក្រុមហ៊ុនអ៊ឹងរិទ្ធីគ្រុប ប៉ុន្តែខាងក្រុមហ៊ុនមិនបានឱ្យគាត់ជួបកូនស្រីតាមទូរស័ព្ទដោយផ្ទាល់នោះទេ គឺគេបានយកខ្សែអាត់សំឡេងកូនរបស់គាត់មកឱ្យស្តាប់ ។ នៅពេលដែលពួកគាត់ស្តាប់សំឡេងកូននិយាយក្នុងខ្សែអាត់នោះ គឺរូបគាត់សន្និដ្ឋានថា កូនស្ត្រីនិយាយលែងដឹងខុសត្រូវអស់ហើយ ។ បន្ទាប់មកពួកគាត់សំណូមពរដល់ស្ថាប័នមានសមត្ថកិច្ចជំនាញឱ្យជួយអន្តរាគមន៍យកកូនស្រីរបស់គាត់មកស្រុកវិញផង ។ ពេលនេះ ពួកគាត់លែងចង់បានលុយទៀតហើយ ឱ្យតែបានកូនរបស់គាត់វិលត្រឡប់មកស្រុកជួបជុំគ្រួសារវិញ ។ ចំពោះការអង្វរករសុំរបស់អាណាព្យាបាលឱ្យស្ថាប័នមានសមត្ថកិច្ចជួយអន្តរាគមន៍នាំយកកូនស្រីរបស់គាត់វិលត្រឡប់មកស្រុកវិញនោះ រហូតមកដល់ព្រឹកថ្ងៃទី១ មីនា ពុំទាន់មានដំណឹងពីនរណាមួយដែលបានធ្វើឱ្យពួកគាត់ទាំងពីរនាក់ទទួលនូវភាពកក់ក្តៅនៅឡើយទេ ។ លោកស្រីអ៊ឹង ស៊ាងរិទ្ធី អគ្គនាយកក្រុមហ៊ុនអ៊ឹង រិទ្ធីគ្រុប បានប្រាប់កោះសន្តិភាពតាមទូរស័ព្ទនៅវេលាម៉ោង២និង៣៥នាទីរសៀល ថ្ងៃទី១ មីនា ថា ចំពោះស្ត្រីជាម្តាយឈ្មោះឆន ចាន់ខុម និងបុរសឈ្មោះយឹម យ៉េន រស់នៅក្រុងប៉ោយប៉ែត ដែលបានឱ្យកូនស្រីឈ្មោះរឿន អ៊ីសាប៊េល ទៅធ្វើការនៅប្រទេសម៉ាឡេស៊ីតាមរយៈក្រុមហ៊ុនស្របច្បាប់របស់គាត់ពិតមែន ។ លោកស្រីបន្តថា បន្ទាប់មកទាំង២នាក់ប្តីប្រពន្ធបានប្តឹងក្រុមហ៊ុនរបស់គាត់នៅការិយាល័យប្រឆាំងការជួញដូរមនុស្ស និងការពារអនីតិជននៅក្រសួងមហាផ្ទៃពិតមែន ។ រូបគាត់តំណាងក្រុមហ៊ុនក៏បានជួបជាមួយឪពុកម្តាយស្ត្រីដែលមានឈ្មោះទៅធ្វើការនៅប្រទេសម៉ាឡេស៊ី រួចហើយដែរ ហើយក៏បានទូរស័ព្ទឱ្យរូបគាត់ជួបគ្នានិយាយសួរសុខទុក្ខជាមួយកូនស្រីរបស់គាត់ដែលធ្វើការនៅក្រៅប្រទេសនោះទៀតផង ដោយកូនស្រីបាននិយាយថា នាងសុខសប្បាយជាធម្មតាទេ ។ ប៉ុន្តែតំណាងបានបញ្ជាក់ទៅម្តាយឪពុកស្ត្រីនោះថា កូនស្រីរបស់ពួកគាត់មិនចេះធ្វើការទើបទាមទារត្រឡប់មកវិញ ។ លោកស្រីអគ្គនាយកក្រុមហ៊ុនបានបញ្ជាក់បន្ថែមថា បើឪពុកម្តាយនៅតែទទូចសុំឱ្យកូនស្រីរបស់គាត់វិលត្រឡប់មកស្រុកវិញនោះ ដរាបណាមានប្រាក់រត់ការបែបបទច្បាប់ និងថ្លៃយន្តហោះ ម្យ៉ាងទៀតលោកស្រីប្រាប់ថា ដរាបណារកមនុស្សថ្មីទៅផ្លាស់ប្តូរ ទើបអាចវិលត្រឡប់មកបានបើពុំដូច្នោះទេ ខាងក្រុមហ៊ុននៅឯប្រទេសម៉ាឡេស៊ីនោះ នឹងប្តឹងក្រុមហ៊ុនរបស់គាត់ ៕  |
| សពពលរដ្ឋខ្មែរដែលទាហានឡាវបាញ់ស្លាប់ក្នុងព្រៃស្រោង មិនទាន់ចរចាយកចេញបានទេ Posted: 03 Mar 2011 07:41 PM PST សពប្រជាពលរដ្ឋខ្មែរម្នាក់ដែលទាហានព្រំដែនឡាវបាញ់ស្លាប់កាលពីថ្ងៃទី៣ មីនា ម្សិលមិញនេះ ខាងភាគីឡាវនៅមិនទាន់បានប្រគល់មកឱ្យកម្ពុជាវិញនៅឡើយទេ ។ នេះបើតាមលោកស៊ុន បាន មេបញ្ជាការវរការពារព្រំដែនលេខ៧០១ ថ្លែងប្រាប់កោះសន្តិភាពតាមទូរស័ព្ទនៅព្រឹកថ្ងៃសុក្រ ទី៤ មីនា ២០១១ នេះ ។ ទោះជាយ៉ាងណា លោកមេបញ្ជាការវរការពារព្រំដែនលេខ៧០១ ស៊ុន បាន បានបញ្ជាក់ដែរថា នៅថ្ងៃនេះអាជ្ញាធរកម្ពុជានឹងទៅចរចាជាមួយភាគីឡាវជាថ្មីទៀត ដើម្បីនាំយកសពប្រគល់ទៅឱ្យក្រុមគ្រួសារ ធ្វើបុណ្យតាមប្រពៃណី បន្ទាប់ពីជួបគ្នាកាលពីថ្ងៃម្សិលមិញមិនទាន់ទទួលបានលទ្ធផលនោះ ។ ទាក់ទងទៅនឹងបញ្ហានេះ អ្នកនាំពាក្យក្រសួងការបរទេសកម្ពុជា លោកកុយ គួង បានថ្លែងប្រាប់កោះសន្តិភាពតាមទូរស័ព្ទនៅព្រឹកថ្ងៃទី៤ មីនា នេះដែរថា ក្រសួងការបរទេសកម្ពុជាកំពុងធ្វើការជាមួយអាជ្ញាធរមូលដ្ឋាន ដើម្បីឱ្យរាយការណ៍លម្អិតអំពីការស្លាប់របស់ប្រជាពលរដ្ឋខ្មែរនោះមុននឹងក្រសួងការបរទេសអាចធ្វើកំណត់ទូតជូនក្រសួងការបរទេសឡាវ ពីព្រោះ ក្រសួងការបរទេសកម្ពុជាទើបទទួលបានព័ត៌មាននេះតាមការចុះផ្សាយរបស់សារព័ត៌មានមួយចំនួននាថ្ងៃសុក្រនេះប៉ុណ្ណោះ ។ គួរបញ្ជាក់ថា បុរសកម្ពុជាម្នាក់នេះត្រូវបានទាហានការពារព្រំដែនឡាវបាញ់បណ្តាលឱ្យស្លាប់ចោលសពក្នុងព្រៃស្រោង ស្ថិតក្នុងស្រុកមឿងខូង ខេត្តចំប៉ាសាក់ ប្រទេសឡាវ ទល់មុខព្រំប្រទល់ ភូមិកំភោគ ឃុំព្រែកមាស ស្រុកសៀមប៉ាង ប្រទេសកម្ពុជា កាលពីវេលាម៉ោងជាង១២រំលងអធ្រាត្រឈានចូលថ្ងៃទី៣ មីនា ម្សិលមិញ ហើយនៅរសៀលថ្ងៃដដែលនេះអាជ្ញាធរកម្ពុជាបានចរចាជាមួយអាជ្ញាធរឡាវសុំយកសពបុរសមកជូនសាច់ញាតិ ដើម្បីធ្វើបុណ្យតាមប្រពៃណី ប៉ុន្តែពុំទាន់ត្រូវបានអនុញ្ញាត និងយកចេញបាននៅឡើយទេ ។ បុរសរងគ្រោះឈ្មោះទេព សុខ ហៅង៉ែត អាយុ៣០ឆ្នាំ មានស្រុកកំណើតនៅខេត្តកំពត បានចូលទៅក្នុងព្រៃស្រោងទឹកដីឡាវចម្ងាយរាប់សិបគីឡូម៉ែត្រ ពីបន្ទាត់ព្រំដែនទឹកដីកម្ពុជា ដើម្បីទៅដឹកឈើគ្រញូងឱ្យឈ្មួញ និងនាំចេញទៅលក់នៅប្រទេសផ្សេងៗដូចជាប្រទេសវៀតណាមជាដើម ។ គួររំលឹកផងដែរថា គិតចាប់តាំងពីឆ្នាំ២០១០ រហូតមកដល់ថ្ងៃព្រហស្បតិ៍ ទី៣ មីនា ឆ្នាំ២០១១ ម្សិលមិញនេះ មានប្រជាពលរដ្ឋខ្មែរចំនួន២៤នាក់ បានចូូលក្នុងទឹកដីឡាវដោយមិនស្របច្បាប់ចំនួន៨លើក ហើយក្នុងចំណោមប្រជាពលរដ្ឋខ្មែរទាំង២៤នាក់នោះ ត្រូវបានទាហានការពារព្រំដែនឡាវបាញ់ស្លាប់២នាក់ និងម្នាក់ទៀតរងរបួសធ្ងន់ ។ រីឯប្រជាពលរដ្ឋខ្មែរដែលត្រូវចាប់ខ្លួនក្រៅពីរបួស និងស្លាប់ ត្រូវបានភាគីឡាវប្រគល់មកឱ្យកម្ពុជាវិញ ។ ជាមួយគ្នានេះដែរ ក្រសួងការបរទេសកម្ពុជា ក៏បានធ្វើកំណត់ទូតថ្កោលទោសអាជ្ញាធរឡាវ ដោយចាត់ទុកការបាញ់សម្លាប់ប្រជាពលរដ្ឋខ្មែរថា ជាអំពើឃោរឃៅអមនុស្សធម៌រំលោភលើសិទ្ធិមនុស្សជាសាកល និងភាពជាប្រទេសជិតខាងល្អនោះថែមទៀត ៕  |
| ជាលើកដំបូងលោកអូបាម៉ាអំពាវនាវឱ្យលោកកាដាហ្វីចាកចេញពីអំណាច Posted: 03 Mar 2011 07:37 PM PST  កាលពីថ្ងៃទី៣ មីនា ជាលើកដំបូង និងជាសាធារណៈប្រធានាធិបតីអាមេរិកលោកបារ៉ាក់ អូបាម៉ា ថ្លែងថា មេដឹកនាំលីប៊ីលោកមូអាម៉ា កាដាហ្វី បានបាត់បង់រាល់ភាពស្របច្បាប់ ហើយត្រូវចាកចេញពីអំណាច។ លោកក៏ប្រកាសផងដែរថា លោកនឹងបញ្ជូនយន្តហោះយោធា និងជនស៊ីវិលទៅចូលរួមក្នុងការជម្លៀសពួកជនភៀសខ្លួនអេហ្ស៊ីបដែលជាប់គាំងនៅតាមព្រំដែនរវាងលីប៊ី និងទុយនីស៊ី ។ ក្នុងសន្នីសីទសារព័ត៌មានមួយនៅសេតវិមាន ជាមួយសមភាគីម៉ិចស៊ិកលោកហ្វឺលីប កាល់ដឺរ៉ូន លោកអូបាម៉ាមានប្រសាសន៍ថា យើងនឹងបន្តបញ្ជូនសារយ៉ាងច្បាស់ថា អំពើហិង្សាត្រូវបញ្ឈប់។ លោកកាដាហ្វីបាត់បង់រាល់ភាពស្របច្បាប់សម្រាប់ជាមេដឹកនាំ ហើយត្រូវចាកចេញ។ លោកបារ៉ាក់ អូបាម៉ា ក្នុងសេចក្តីប្រកាសជាច្រើនធ្លាប់បានទាមទាររួចហើយឱ្យជនលេខមួយលីប៊ីចាកចេញ ហើយនេះជាលើកដំបូងដែលលោកធ្វើសំណើនេះជាសាធារណៈ ។ លោកបន្តថា បណ្តាទីប្រឹក្សារបស់លោកកាដាហ្វី ក៏នឹងជាអ្នកត្រូវទទួលខុសត្រូវផងដែរ ចំពោះអំពើហិង្សាទាំងឡាយប្រឆាំងជនស៊ីវិល ។ ប្រមុខសេតវិមានបន្តទៀតថា សហរដ្ឋអាេមរិកចង់ចាត់ការឱ្យបានឆាប់ជាទីបំផុតក្នុងករណីមានវិបត្តិមនុស្សធម៌នៅលីប៊ី ហើយនឹង ពិនិត្យិពីវិធានការទាំងឡាយមានទាំងវិធានការយោធា ឬវិធានការឯទៀត ដើម្បីជួយដល់ប្រជាជន ។ លោកប្រកាសរួចហើយថា លោកបានអនុញ្ញាតឱ្យបញ្ជូនយន្តហោះយោធា និងស៊ីវិលអាមេរិក ដើម្បីចូលរួមក្នុងការជម្លៀសជនស៊ីវិលអេហ្ស៊ីបដែលជាប់គាំងនៅព្រំដែនលីប៊ី-ទុយនីស៊ី។ ក្រោយភាពច្របូកច្របល់រយៈពេល៣ខែសភាពការណ៍នៅតំបន់ព្រំដែននោះមានការកែលំអដោយសារសហគមន៍អន្តរជាតិធ្វើការប្តូរវេនគ្នាបញ្ជូនយន្តហោះជួយជម្លៀសមនុស្សចេញ។ បារាំងនឹងធានាការហោះហើរប្រចាំថ្ងៃដល់ទៅ៦ជើងក្នុងប៉ុន្មានថ្ងៃខាងមុខនេះហើយអង់គ្លេស ក៏នឹងចាប់ផ្តើមដែរ បញ្ជូនយន្តហោះមកសហការជាមួយអេហ្ស៊ីប ។ ចូលដល់ថ្ងៃទី១៧ នៃការបះបោររបស់ ប្រជាជនលីប៊ីលោកកាដាហ្វី បានវាយប្រហារកាលពីថ្ងៃទី៣ មីនា លើទីតាំងទាំងឡាយនៅភាគខាងកើតប្រទេសត្រួតត្រាដោយពួកបះបោរ។ ពួកឧទ្ទាមបានទទួលរងការវាយប្រហារ តាមអាកាសរបស់កងទ័ពនៅទីក្រុង BREGA ដែលមានទីតាំងប្រេងកាត ហើយក៏ជាច្រកយុទ្ធសាស្ត្រសម្រាប់ចូលទៅកាន់ទីក្រុងបេនហ្គាហ្ស៊ីដែលជាទីតាំងបង្អែករបស់ពួកប្រឆាំងដែរ។ យោងតាមប្រជាជនទីក្រុងនេះថា មនុស្សយ៉ាងតិច៥នាក់ ត្រូវបានកងទ័ពស្និទ្ធលោកកាដាហ្វីចាប់ខ្លួនពេលមានការវាយលុកគាំទ្រដោយកងយន្តហោះ និងកាំភ្លើងធំធុនធ្ងន់ ហើយមនុស្សយ៉ាងតិច១២នាក់ត្រូវស្លាប់ ។ ពួកប្រឆាំងអះអាងថា នៅកាន់កាប់ទីក្រុងនេះជានិច្ច ហើយបានចាប់ខ្លួនមនុស្សយ៉ាងតិច១០០នាក់ក្នុងចំណោមពួកយុទ្ធជនដែលស្មោះត្រង់នឹងលោកកាដាហ្វី ។ អ្នកនាំពាក្យរបស់ពួកប្រឆាំងក៏លើកឡើងដែរ ពីការពង្រឹងកងទ័ពលើកសំដៅទីក្រុង RAS LANOUF ចម្ងាយ១០០គ.ម ខាងលិចក្រុង BREGA ។ កងទ័ពគាំទ្រដោយពួកទាហានស៊ីឈ្នួលមកពីឆាដ និងនីហ្ស័រ ៕  |
| នារីសកម្មជនការពារសិទ្ធិស្ត្រីនាំគ្នាដោះអាវចេញប្រឆាំងការប្រកួតមួយ Posted: 03 Mar 2011 07:30 PM PST  នារីជាសកម្មជនការពារសិទ្ធិស្ត្រីនៅក្នុងប្រទេសអ៊ុយក្រែនជាច្រើននាក់ កាលពីពេលថ្មីៗកន្លងមក បានប្រមូលផ្តុំគ្នានៅកន្លែងមួយ ហើយបង្កើតព្រឹត្តិការណ៍គួរឱ្យចាប់អារម្មណ៍មួយដោយនាំគ្នាដោះអាវចេញអស់ រួចលើកផ្ទាំងបដាធ្វើបាតុកម្ម ។ ពួកនាងបានធ្វើដូច្នេះដើម្បីធ្វើបាតុកម្មប្រឆាំងការប្រកួតមួយ ដែលអ្នកឈ្នះទទួលបាននារីម្នាក់ធ្វើជាប្រពន្ធ រៀបចំឡើងដោយស្ថានីយវិទ្យុមួយរបស់ប្រទេសនូវែលសេឡង់។ តាមប្រភពព័ត៌មានថា ស្ថានីយវិទ្យុ The Rock FM របស់ប្រទេសនូវែលសេឡង់ បានរៀបចំការប្រកួតមួយសម្រាប់អ្នកស្តាប់របស់ខ្លួន ដែលក្នុងការប្រកួតនេះអ្នកឈ្នះទទួលបានសិទ្ធិដើរលេងក្នុងប្រទេសអ៊ុយក្រែនរយៈពេល១២ថ្ងៃ និងទទួលបាននារីម្នាក់ធ្វើជាប្រពន្ធផងដែរ ប៉ុន្តែការប្រកួតនេះរងការប្រឆាំងយ៉ាងខ្លាំងពីនារីជាសកម្មជនការពារសិទ្ធិស្ត្រីដោយពួកគេនិយាយថា ការប្រកួតនេះមិនអាចទទួលយកបានឡើយ៕  |
| នាយករដ្ឋមន្ត្រីអេហ្ស៊ីបលាលែងចេញពីតំណែង Posted: 03 Mar 2011 07:28 PM PST  នាយករដ្ឋមន្ត្រីអេហ្ស៊ីប លោក Ahmed Shafiq បានលាលែងចេញពីតំណែងដោយមិនបានគ្រោងទុកជាមុន កាលពីថ្ងៃទី៣ មីនា កន្លងមក ខណៈពួកបាតុករទាមទារឱ្យលោកដែលជាសម្ព័ន្ធមិត្តរបស់លោកហូស្នី មូបារ៉ាក់ អតីតប្រធានាធិបតីអេហ្ស៊ីប ដែលត្រូវផ្តួលរំលំចុះចេញពីតំណែង ។ មេដឹកនាំយោធាអេហ្ស៊ីបនិយាយថា លោក Ahmed Shafiq នឹងត្រូវជំនួសដោយលោក Essan Sharaf អតីតរដ្ឋមន្ត្រីក្រសួងដឹកជញ្ជូនដែលចូលរួមធ្វើបាតុកម្មនៅទីលាន Tahrir នៃទីក្រុងគែរ បង្ខំឱ្យលោកមូបារ៉ាក់ ចុះចេញពីតំណែងនៅថ្ងៃទី១១ កុម្ភៈ ។ លោក Ahmed Shafiq ត្រូវបានតែងតាំងជានាយករដ្ឋមន្ត្រីដោយលោកមូបារ៉ាក់ ក្នុងអំឡុងពេលលោកមូបារ៉ាក់ នៅកាន់តំណែងប្រធានាធិបតី ដើម្បីបង្ក្រាបបាតុករប្រឆាំងលោក ។ ក្រុមប្រឹក្សាជាន់ខ្ពស់របស់កងទ័ពអេហ្ស៊ីបបានប្រកាសថា ខ្លួនបានទទួលយកការសុំលាលែងចេញពីតំណែងរបស់លោក Shafiq ហើយ ។ តាមសេចក្តីរាយការណ៍ថា បាតុករដែលនៅប្រមូលផ្តុំគ្នាក្នុងទីលាន Tahrir នៅឡើយ មានក្តីរីករាយយ៉ាងខ្លាំងនៅពេលលោក Ahmed Shafiq ប្រកាសពីការលាលែងនេះ ។ ទោះបីជារបបរបស់លោកហូស្នី មូបារ៉ាក់ ត្រូវបានផ្តួលរំលំហើយក៏ដោយ ក៏ពលរដ្ឋអេហ្ស៊ីបក្នុងចំនួនដ៏ច្រើននៅបន្តធ្វើបាតុកម្មទាមទារឱ្យមានការផ្លាស់ប្តូររដ្ឋាភិបាលបច្ចុប្បន្ន ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
