VOA News: ព័ត៌មាន: “គណៈរដ្ឋមន្ត្រីអនុម័តសេចក្តីព្រៀងច្បាប់ថវិកាឆ្នាំ២០១២” plus 7 more |
- គណៈរដ្ឋមន្ត្រីអនុម័តសេចក្តីព្រៀងច្បាប់ថវិកាឆ្នាំ២០១២
- ពលការិនី២.៥០០នាក់អាចទៅធ្វើការនៅម៉ាឡេស៊ីទោះបីមានបម្រាម
- តុលាការខ្មែរក្រហមបើកសវនាការជុំវិញជំងឺផ្លូវចិត្តអៀង ធីរិទ្ធ
- សវនាការសំណុំរឿង០០២នឹងចាប់ផ្តើមចុងសប្តាហ៍នេះ
- តុលាការខ្មែរក្រហមបើកសវនាការអំពីសុខភាពអ្នកស្រីអៀង ធីរិទ្ធក្នុងដំណើរការកាត់ទោស
- ព័ត៌មានអន្តរជាតិ៖ ១៩ តុលា
- ប្រទេសម្ចាស់ជំនួយរំពឹងឲ្យមានការត្រួតពិនិត្យបន្ថែមលើសារពើពន្ធ
- ទោះបីមានបម្រាម ក៏អាចមានពលការនីរាប់ពាន់នាក់នឹងទៅធ្វើការនៅម៉ាឡេស៊ី
| គណៈរដ្ឋមន្ត្រីអនុម័តសេចក្តីព្រៀងច្បាប់ថវិកាឆ្នាំ២០១២ Posted: 19 Oct 2011 01:14 PM PDT ទីស្តីការគណៈរដ្ឋមន្រ្តីនៅថ្ងៃពុធនេះបានអនុម័តសេចក្តីព្រាងច្បាប់ស្តីពីសេដ្ឋកិច្ច និងហិរញ្ញវត្ថុសម្រាប់ឆ្នាំ២០១២ ចំនួនជាង១០លានលានរៀល គឺស្មើនឹងប្រមាណជាង ២.៦២៦លានដុល្លារអាមេរិក។ ការអនុម័តថវិកាសម្រាប់ឆ្នាំ២០១២នេះគឺបានកើនឡើងប្រមាណជាង៦០០លានដុល្លារបើប្រៀបធៀបទៅនឹងថវិកាឆ្នាំ២០១១។ លោក ជាម យៀប ប្រធានគណៈកម្មធិការហរិញ្ញវត្ថុ និងធានាគាររបស់រដ្ឋសភាបានមានប្រសាសន៍ ថា ការកើនឡើងថវិកាក្នុងឆ្នាំ២០១២នេះ ដោយសារតែកម្ពុជាជួបប្រទះនឹងទឹកជំនន់ ហើយកម្ពុជាត្រូវការថវិកាបន្ថែមទៀតសម្រាប់វិស័យការពារជាតិ។ «ដោយឈរលើមូលដ្ឋានទី១ យើងកំពុងទទួលនូវគ្រោះទឹកជំនន់នេះផង ហើយមួយរយៈធ្ងន់ធ្ងរដែលអាចរហូតដល់មានការខូចខាតរាប់រយលានដុល្លារសហរដ្ឋអាមេរិក។ ហើយទី២ ដោយសារការការពារជាតិ ក៏យើងត្រូវគិតគូរពិចារណាដែរ នៃការការពារបូរណភាពទឹកដី»។ សេចក្តីប្រកាសរបស់ទីស្តីការគណរដ្ឋមន្រ្តីឲ្យដឹងថា សេចក្តីព្រាងច្បាប់ស្តីពីហិរញ្ញវត្ថុនេះ គឺដើម្បីធានាឲ្យកំណើនសេដ្ឋកិច្ចជាតិ ប្រកបដោយចីរភាពនៅក្នុងអត្រាប្រមាណប្រាំពីរភាគរយនៅក្នុងមួយឆ្នាំ និងការធានាសម្រេចឲ្យមានការកាត់បន្ថយអត្រានៃភាពក្រីក្រឲ្យបានលើសពីមួយភាគរយក្នុងមួយឆ្នាំ។ លោក ជាម យៀប បានមានប្រសាសន៍ថា ថវិកាក្នុងឆ្នាំ២០១២ខាងមុខនេះ ផ្តល់ជូនក្រសួងចំនួន ប្រាំពីរជាអតិភាពចំបងគឺក្រសួងអប់រំ ក្រសួងសុខាភិបាល ក្រសួងអភិវឌ្ឍន៍ជនបទ ក្រសួងកសិកម្ម ក្រសួងសង្គមកិច្ច ក្រសួងកិច្ចការនារី និងក្រសួងនគរដែនដីរូបនីយកម្ម និងសំណង់។ លោក ជាម យៀប មិនបានបញ្ជាក់ថា តើក្រសួងអទិភាពទាំងប្រាំពីរនេះនឹងមានទឹកប្រាក់ចំនួនប៉ុន្មានទេ ក៏ប៉ុន្តែលោកបានមានប្រសាសន៍ថា ក្រសួងសុខាភិបាល និងក្រសួងអប់រំ អាចកើនឡើងប្រមាណពី១៨ ភាគរយ ទៅ២០ភាគរយ និងក្រសួងកសិកម្មអាចឡើងដល់ប្រមាណសាមសិបភាពរយ។ «ការកើនឡើងនេះគឺថាផែនកាជាតិសហសវត្សន៍ថ្មី ២០០៨-២០១៣ របស់រាជរដ្ឋាភិបាល។ លោក បានបង្កើនរាល់ការងារទាំងឡាយ ពីសេសយកចិត្តទុកដាក់សុខមាលភាពរបស់ប្រជាពលរដ្ឋទូទាំងប្រទេស»។ លោក យឹម សុវណ្ណ តំណាងរាស្រ្តគណបក្សប្រឆាំងមិនបានធ្វើអត្ថាធិប្បាយទេ ដោយលោកបាន មានប្រសាសន៍ថា លោកមិនទាន់ឃើញសេចក្តីព្រាងច្បាប់នេះនៅឡើយទេ។ «សេចក្តីព្រាងច្បាប់មកដល់ដៃសិន បានយើងធ្វើអត្ថាធិប្បាយលំអិតតែម្តង»។ សេចក្តីប្រកាសព័ត៌មានរបស់ទីស្តីការគណៈរដ្ឋមន្រ្តីបានឲ្យដឹងទៀតថា សេចក្តីព្រាងច្បាប់ស្តីពីសេចក្តីព្រាងច្បាប់ថ្មីនេះ រដ្ឋាភិបាលបានបន្តអនុវត្តផលិកម្មស្រូវ ការនាំចេញអង្ករ ការកែលម្អហេដ្ឋារចនាសម្ព័ន្ធ ដែលខូចខាតដោយទឹកជំនន់ បន្តពង្រីក និងពង្រឹងឧស្សាហកម្មកាត់ដេរ និងផ្នែកសេវាកម្មទេសចរណ៍៕ This posting includes an audio/video/photo media file: Download Now |
| ពលការិនី២.៥០០នាក់អាចទៅធ្វើការនៅម៉ាឡេស៊ីទោះបីមានបម្រាម Posted: 19 Oct 2011 01:36 PM PDT ក្រុមមន្ត្រីបាននិយាយនៅថ្ងៃពុធនេះថា រដ្ឋាភិបាលបានអនុញ្ញាតឲ្យទីភ្នាក់ងារជ្រើសរើសឯកជនបញ្ជូនពលការិនីជំនួយការមេផ្ទះ ដែលទទួលបានលិខិតឆ្លងដែន និងទិដ្ឋាកាការងារត្រឹមត្រូវមុនបម្រាមរបស់លោកនាយករដ្ឋមន្ត្រី ហ៊ុន សែន ទៅបម្រើការងារនៅម៉ាឡេស៊ី។ លោក សេង សក្តា អគ្គនាយកនៃក្រសួងការងារ បានបញ្ជាក់យ៉ាងដូច្នេះថា៖ «ចាប់ពីពេលនេះទៅ យើងអត់មានអនុញ្ញាតឲ្យក្រុមហ៊ុនធ្វើការជ្រើសរើសពលការិនីជាជំនួយការមេផ្ទះទៅធ្វើការនៅប្រទេសម៉ាឡេស៊ីជាបន្តទៀតទេ។ ដោយឡែក ពលការិនីដែលបានទទួលទិដ្ឋាកា និងបានវីសា (Visa) ការងារពីស្ថានទូតម៉ាឡេស៊ីប្រចាំនៅភ្នំពេញរួចហើយ។ អាហ្នឹង យើងអនុញ្ញាតឲ្យពលការិនីទាំងអស់ហ្នឹងចេញទៅបម្រើការងារនៅប្រទេសម៉ាឡេស៊ីបាន ព្រោះថា ពលការិនីហ្នឹងបាន ទទួលទិដ្ឋាកា ការងារពីប្រទេសម៉ាឡេស៊ី និងមានថៅកែរួចហើយ។ លោក សេង សក្តា មិនបានលម្អិតអំពីចំនួនពលការិនីជំនួយការមេផ្ទះ ដែលនឹងត្រូវបញ្ជូនទៅធ្វើការនៅម៉ាឡេស៊ីនេះទេ ប៉ុន្តែលោកបានស្នើសុំដល់ទីភ្នាក់ងារជ្រើសរើសពលករទាំងអស់ឲ្យបញ្ជូនបញ្ជីឈ្មោះពលការិនីជំនួយការមេផ្ទះមកអគ្គនាយកដ្ឋានការងាររបស់លោក។ លោក អាន ប៊ុនហាក់ ប្រធានសមាគមនៃទីភ្នាក់ងារជ្រើសរើសពលករកម្ពុជា បានថ្លែងថា លោកស្វាគមន៍ដល់ការធ្វើសេចក្តីសម្រេចនេះ ដោយបញ្ជាក់ថា ពលការិនីជំនួយការមេផ្ទះប្រមាណ២.៥០០នាក់ ដែលជ្រើសរើសមុនបម្រាមថ្ងៃទី១៥ ខែតុលា ត្រូវបានអនុញ្ញាតឲ្យបញ្ជូនចេញទៅបម្រើការនៅប្រទេសម៉ាឡេស៊ី។ «ពលករ ដែលបានជ្រើសរើសមុនថ្ងៃទី១៥ មានកិច្ចសន្យា និងមានថៅកែហើយ អាចចេញទៅធ្វើការនៅប្រទេសម៉ាឡេស៊ីបាន។ ដូច្នេះ ទំហំនៃការខាតបង់របស់ទីភ្នាក់ងារជ្រើសរើស គឺតិចបំផុត និងសឹងតែគ្មានការខាតបង់តែម្តង»។ លោកនាយករដ្ឋមន្ត្រី ហ៊ុន សែន បានថ្លែងនៅក្នុងសារាចរចុះថ្ងៃទី១៥ ខែតុលាថា រដ្ឋាភិបាលសូមជូនដំណឹងដល់ក្រសួង ស្ថាប័ន អាជ្ញាធរមានសមត្ថកិច្ច និងទីភ្នាក់ងារជ្រើសរើសឯកជនឲ្យបានជ្រាបថា ចាប់ពីពេលនេះតទៅ ការជ្រើសរើសបណ្តុះបណ្តាល និងបញ្ជូនពលការិនីជំនួយការមេផ្ទះទៅកាន់ប្រទេសម៉ាឡេស៊ីត្រូវផ្អាកជាបណ្តោះអាសន្ន។ លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាបានថ្លែងថា រដ្ឋាភិបាលត្រូវរឹតបន្តឹងយន្តការលើកកម្ពស់លក្ខខណ្ឌការងារ ការគោរពច្បាប់ការងារ និងការតម្លើងប្រាក់ឈ្នួលដល់កម្មករសមរម្យ ដើម្បីលុបបំបាត់ការបញ្ជូនពលករជាស្ត្រីជំនួយការមេផ្ទះនៅប្រទេសម៉ាឡេស៊ីប្រកបដោយគ្រោះថ្នាក់។ «បើសិនជារដ្ឋាភិបាលឲ្យមានការអនុវត្តច្បាប់ការងារឲ្យបានល្អ កុំថៅកែធ្វើបាបកម្មករ កម្មការិនីខ្មែរ ហើយតម្លើងប្រាក់បៀរវត្សរ៍ដល់កម្មករ កម្មការិនីធ្វើការនៅក្នុងវិស័យកាត់ដេរនេះឲ្យបានសមរម្យ ដែលអាចរស់បាន។ ការធ្វើចំណាកស្រុកនឹងធ្លាក់ចុះ»។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានបញ្ជាក់ថា រដ្ឋាភិបាលត្រូវបង្កើតការងារឲ្យបានច្រើនសម្រាប់ជួយកាត់បន្ថយការបញ្ជូនពលការិនីជំនួយការមេផ្ទះទៅប្រទេសម៉ាឡេស៊ី៕ This posting includes an audio/video/photo media file: Download Now |
| តុលាការខ្មែរក្រហមបើកសវនាការជុំវិញជំងឺផ្លូវចិត្តអៀង ធីរិទ្ធ Posted: 19 Oct 2011 12:00 PM PDT ក្រុមគ្រូពេទ្យជំនាញខាងជំងឺមនុស្សចាស់បានរកឃើញស្របគ្នានឹងរបាយការណ៍កាលពីលើកមុនថា អៀង ធីរិទ្ធ មានជំងឺផ្លូវចិត្តធ្ងន់ធ្ងរហើយពិបាកនឹងចូលរួមសវនាការកាត់ទោសរូបគាត់។ ការរកឃើញបែបនេះត្រូវបានបកស្រាយជាសាធារណៈនៅក្នុងសវនាការរយៈពេលពីរថ្ងៃរបស់អង្គជំនុំជម្រះសាលាដំបូងនៃសាលាក្ដីខ្មែរក្រហមស្ដីពីបញ្ហាសុខភាពរបស់អតីតរដ្ឋមន្ដ្រីក្រសួងសង្គមកិច្ចខ្មែរក្រហមរូបនេះ។ សវនាការបានចាប់ផ្ដើមនៅថ្ងៃពុធនេះ។ លោកវេជ្ជបណ្ឌិត ស៊ីណា ហ្វាហ្ស៊ែល (Seena Fazel) ជនជាតិអង់គ្លេសបានថ្លែងក្នុងសវនាការនោះថា ជនជាប់ចោទអាយុ៧៩ ឆ្នាំរូបនេះបាត់បង់ការចងចាំ ហើយអាចក្លាយជាឧបសគ្គក្នុងការកាត់ក្ដីពេញលេញលើរូបគាត់។ លោកបានមានប្រសាសន៍តាមរយៈអ្នកបកប្រែថា៖ «ខ្ញុំគិតថា ស្ថានភាពបញ្ញារបស់គាត់អាចជាការរារាំងសវនាការ។ វាមានការពិបាកក្នុងការជួយជ្រោមជ្រែងដល់មេធាវីក្នុងការរៀបចំការពារក្ដីរបស់គាត់ដោយសារតែគាត់ចុះខ្សោយសតិបញ្ញា»។ កាលពីខែសីហា លោកសាស្ដ្រាចារ្យ ចន ខាំបែល អ្នកជំនាញផ្នែកជំងឺមនុស្សចាស់ បានលើកឡើងក្នុងសវនាការស្ដីពីបញ្ហាសុខភាពជនជាប់ចោទថា អៀង ធីរិទ្ធ មានបញ្ហាច្របូកច្របល់ក្នុងខួរក្បាល បាត់ការចងចាំ ព្រមទាំងពិបាកក្នុងការចោទជាសំណួរលើរូបគាត់នៅក្នុងសវនាការ ហើយគាត់ថែមទាំងមិនអាចចូលរួមសវនាការតាមរយៈវីដេអូភ្ជាប់ចូលទៅកាន់បន្ទប់គាត់បានទៀតផង។ ក្នុងសវនាការនៅថ្ងៃនេះលោកវេជ្ជបណ្ឌិតកម្ពុជា ហួត លីណា បានគូសបញ្ជាក់ថា អៀង ធីរិទ្ធ មិនដឹងថា គាត់កំពុងស្ថិតក្នុងមន្ទីរឃុំឃាំងទេ។ «រកឃើញថា គាត់មិនអាចដឹងអគារដែលកំពុងស្នាក់នៅនោះជាអគារអ្វី និងជាអគារដែលមានមុខងារអ្វីនោះទេ»។ អៀង ធីរិទ្ធ រួមជាមួយនឹងជនជាប់ចោទបីនាក់ផ្សេងទៀតក្នុងសំណុំរឿង០០២ ត្រូវចោទប្រកាន់ពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ ដែលនាំឲ្យស្លាប់ប្រជាពលរដ្ឋកម្ពុជាអស់ជិតពីរលាននាក់ចន្លោះពីឆ្នាំ១៩៧៥ ដល់ឆ្នាំ១៩៧៩។ លោកចៅក្រម និល ណុន ប្រធានអង្គជំនុំជម្រះសាលាដំបូងរបស់សាលាក្ដីខ្មែរក្រហម បានបង្ហាញថា សវនាការស្ដីពីបញ្ហាសុខភាព អៀង ធីរិទ្ធ នៅថ្ងៃនេះនឹងពិនិត្យមើលថា តើត្រូវបញ្ចប់នីតិវិធីច្បាប់លើជនជាប់ចោទរូបនេះ ឬយ៉ាងណាដោយសារតែបញ្ហាសុខភាពធ្ងន់ធ្ងរនោះ។ យ៉ាងណាក៏ដោយ ក្រុមវេជ្ជបណ្ឌិតចុងក្រោយបានលើកឡើងថា អាចមានលទ្ធភាពធ្វើឲ្យសុខភាពរបស់ អៀង ធីរិទ្ធ មានលក្ខណៈប្រសើរឡើង ហើយប្រសិនបើសាលាក្ដីខ្មែរក្រហមយល់ថា គាត់មានលទ្ធភាពគ្រប់គ្រាន់ក្នុងការចូលរួមការកាត់ទោសរបស់គាត់នោះ គួរតែមានការពិនិត្យឡើងវិញលើស្ថានភាពជំងឺរបស់គាត់រាល់បីខែម្ដង ហើយគួរតែមានគ្រូពេទ្យជំនាញផ្នែកការធ្វើចលនាមនុស្សចាស់ផងដែរសម្រាប់ថែរក្សាគាត់៕ This posting includes an audio/video/photo media file: Download Now |
| សវនាការសំណុំរឿង០០២នឹងចាប់ផ្តើមចុងសប្តាហ៍នេះ Posted: 19 Oct 2011 11:36 AM PDT អង្គជំនុំជម្រះរបស់សាលាក្តីខ្មែរក្រហមបានប្រកាសថា ខ្លួននឹងចាប់ផ្តើមធ្វើការកាត់ទោសជនជាប់ចោទ ចាប់ពីថ្ងៃទី២១ ខែវិច្ឆិកា ឆ្នាំ២០១១នេះតទៅ។ នេះបើយោងតាមសេចក្តីប្រកាសព័ត៌មានរបស់សាលាក្តីខ្មែរក្រហមកាលពីល្ងាចថ្ងៃអង្គារ។ សំណុំរឿងទី២នេះដែលសហគមន៍អន្តរជាតិ និងជនរួមជាតិកម្ពុជារងចាំបំផុត ដោយសារតែជនជាប់ចោទនៅក្នុងសំណុំរឿងនេះ គឺជាអតីតមេដឹកនាំកំពូលខ្មែរក្រហមតែបួននាក់គត់ ដែលនៅរស់រានមានជីវិត។ លោក ឡាស អលសិន មន្ត្រីទំនាក់ទំនងផ្នែកកិច្ចការច្បាប់ ខាងអង្កការសហប្រជាតិនៃសាលាក្តីខ្មែរក្រហមមានប្រសាសន៍ថា ការកាត់ទោសចាប់ផ្តើមហើយដែលនេះគឺជាអ្វីដែលមនុស្សគ្រប់រូបរងចាំ។ ដោយឡែកលោក នេត្រ ភត្រា អ្នកនាំពាក្យសាលាក្តីខ្មែរក្រហមខាងភាគីកម្ពុជា លើកឡើងដូចគ្នានេះដែរ។ «ជាការឆ្លើយតបទៅនឹង ជាធម្មតាទេ ការទន្ទឹងរងចាំជាយូរមកហើយរបស់ជនរងគ្រោះ ដូចជាការគោរពសិទ្ធរបស់ជនជាប់ចោទដែលគាត់មានវ័យចាស់ហើយ»។ ជនជាប់ចោទវ័យចំណាស់ទាំងបួននាក់រួមមាន នួន ជា អតីតប្រធានសភាខ្មែរក្រហម ខៀវ សំផន អតីតប្រមុខរដ្ឋ អៀង សារី អតីតរដ្ឋមន្ត្រីការបរទេស និងប្រពន្ធរបស់គាត់ អៀង ធីរិទ្ធ អតីតរដ្ឋមន្រ្តី ក្រសួងសង្គមកិច្ច។ ពួកគេត្រូវបានចោទពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងរល័យពូជសាសន៍។ អង្គជំនុំជម្រះសាលាដំបូងបានបញ្ជាក់នៅក្នុងសេចក្តីប្រកាសព័ត៌មានថា សវនាការដើម្បីពិនិត្យភ័ស្តុតាងនឹងប្រព្រឹត្តិទៅនៅថ្ងៃទី២៨ ខែវិច្ឆិកា។ ដោយឡែកសវនាការ ថ្ងៃទី២១ ខែកក្កដា គឺផ្តោតសំខាន់ទៅលើការចោទប្រកាន់ លើជនជាប់ចោទម្នាក់ៗ។ កិច្ចជំនុំជម្រះនឹងបន្តរហូតទៅដល់ថ្ងៃទី១៦ ខែធ្នូ ឆ្នាំ២០១១ មុននឹងត្រូវបន្តឡើងវិញនៅថ្ងៃទី៩ ខែមករា ឆ្នាំ២០១២។ លោក ឆាំង យុ នាយកមជ្ឈមណ្ឌលឯកសារកម្ពុជា បានអបអរសាទរចំពោះសវនាការនេះ។ «ខ្ញុំគិតថា បង្ហាញពីការដោះស្រាយរបស់តុលាការ ក្នុងការធ្វើឲ្យ០០២អាចចេញ នៅពេលដែលភាពស្របច្បាប់របស់តុលាការនេះ កំពុងត្រូវបានចោទសួរពីសង្គមស៊ីវិល និងមជ្ឈដ្ឋានទូទៅ»។ លោក លឹម ម៉េងឃី មេធាវីមួយរូបតំណាងឲ្យដើមបណ្តឹងរដ្ឋប្បវេណី មានប្រតិកម្មដូចគ្នានេះដែរ។ «នេះជាថ្ងៃប្រវតិ្តសាស្ត្រទី១ ដែលឈានទៅពន្លឺនៃយុត្តិធម៌សម្រាប់ជនរងគ្រោះ»។ សហគមអន្តរជាតិ ឆ្លាប់បានសម្តែងការព្រួយបារម្ភ ពីការយឺតយ៉ាវរបស់សាលាក្តីខ្មែរក្រហម ពីការកាត់ក្តីសំណុំរឿង០០២នេះ ក៏ប៉ុន្តែនៅមិនទាន់មានប្រតិ្តកម្មពីសហគមអន្តរជាតិ ទាក់ទងនឹងការកំណត់កាលបរិច្ឆេទ នៃសវនាការនេះនៅឡើយទេ៕ This posting includes an audio/video/photo media file: Download Now |
| តុលាការខ្មែរក្រហមបើកសវនាការអំពីសុខភាពអ្នកស្រីអៀង ធីរិទ្ធក្នុងដំណើរការកាត់ទោស Posted: 19 Oct 2011 10:21 AM PDT កាលពីថ្ងៃពុធទី១៩តុលានេះ តុលាការកាត់ទោសខ្មែរក្រហមបានបើកសវនាការបឋមអំពីសមត្ថភាពសុខភាពរបស់អ្នកស្រីអៀង ធីរិទ្ធអតីតរដ្ឋមន្ត្រីសង្គមកិច្ចខ្មែរក្រហម ក្នុងដំណើរការកាត់ទោសមេដឹកនាំរបបកម្ពុជាប្រជាធិបតេយ្យ។ មេដឹកនាំជាន់ខ្ពស់បួននាក់របស់ខ្មែរក្រហមត្រូវឡើងសវនាការជំនុំជម្រះថ្ងៃទី២១ វិច្ឆិកាគឺ៣ទសវត្សក្រោយពីបដិវត្តន៍បាតដៃទទេដ៏ខ្មៅងងឹតបំផុតក្នុងសតវត្សទី២០នេះបានផុតរលត់។ តុលាការតែងតាំងអ្នកជំនាញខាងសុខភាព៤នាក់ធ្វើការវាយតម្លៃថា តើអ្នកស្រីអៀង ធីរិទ្ធមានសុខភាពល្អដែលអាចចូលរួមសវនាការបានយ៉ាងណា។ <!--AV--> លោកJohn Campbell ត្រូវតុលាការចាត់តាំងឲ្យវាយតម្លៃសុខភាពចុងចោទនេះសម្រាប់សវនាការពីថ្ងៃ២៩ដល់ថ្ងៃ៣១សីហា។ ចៅក្រម Silvia Cartwright បានឲ្យលោកCampbell ឡើងបំភ្លឺ។ «សូមលោកបកស្រាយអំពីកិច្ចសម្ភាសន៍របស់លោកជាមួយអ្នកស្រីអៀង ធីរិទ្ធបីលើកក្នុងពេល២ថ្ងៃមកនេះ។ ការសាកល្បង និងការពន្យល់របស់លោកមានសារៈសំខាន់សម្រាប់សវនាការ»។ លោកហួត លិណា អ្នកជំនាញម្នាក់និយាយថា អ្នកស្រីអៀង ធីរិទ្ធមានសុខភាពមធ្យម។ «អ្នកស្រីអៀង ធីរិទ្ធគាត់បានពិន្ទុ១៥នៅថ្ងៃទី១ និង១៨នៅថ្ងៃទី២។ គាត់នៅចន្លោះពី១០ទៅ២០នេះគឺគាត់មានកម្រិតមធ្យមបាទ»។ អ្នករួចជីវិតពីរបបខ្មែរក្រហមនៅខេត្តកំពង់ស្ពឺ និយាយថា គេមានជំនឿលើអង្គចៅក្រម។ លោកស៊ុំ រិទ្ធីដើមបណ្តឹងរដ្ឋប្បវេណីនិយាយថា៖ «ពួកខ្ញុំមកជាដើមបណ្តឹងហ្នឹងគឺពឹងទៅលើច្បាប់។ បើច្បាប់គេថា គាត់មិនអាចចូលរួមការកាត់ទោសបាន អាហ្នឹងស្រេចលើតុលាការសម្រេច»។ ភាគីដើមបណ្តឹងរដ្ឋប្បវេណីមានសិទ្ធិតាមផ្លូវច្បាប់ផ្តល់សក្ខីកម្ម សួរជនសង្ស័យ និងទាមទារសំណងផ្លូវចិត្ត។ អ្នកផ្សេងទៀតនិយាយថា គេមិនចង់បង្ខំកាត់ទោសមេដឹកនាំខ្មែរក្រហមទេ បើអ្នកទាំងនេះមានបញ្ហាសុខភាព។ អ្នកស្រីលឹម សារឿនមកពីខេត្តកំពង់ស្ពឺនិយាយថា៖ «បើយើងអត់ដឹងគាត់ឈឺ អាហ្នឹងមានចិត្តនឹកខឹង។ អត់ចិត្តខ្លួនឯង ខឹង។ ប៉ុន្តែបើដឹងគាត់ឈឺអញ្ចឹង យើងអនុគ្រោះឲ្យគាត់ទៅ»។ ជនជាតិខ្មែរជិត២លាននាក់បានស្លាប់ក្នុងរបបខ្មែរក្រហមដោយសារទារុណកម្ម ការប្រហារជីវិត ទុរ្ភិក្ស និងធ្វើការហួសកម្លាំង។ ចុងចោទទាំង៤សុទ្ធតែចាស់ជរា។ ពួកគេនៅក្នុងមជ្ឈដ្ឋានផ្ទៃក្នុងរបស់ប៉ុល ពត ស្ថាបនិកវាលពិឃាដរបស់ខ្មែរក្រហម ក្រុមម៉ៅនិយម ដែលទទួលខុសត្រូវការបាត់បង់ជីវិតជនជាតិខ្មែរ១លាន៧សែននាក់ពីឆ្នាំ១៩៧៦ដល់១៩៧៩។ តុលាការនេះកំពុងស្វែងរកយុត្តិធម៌សម្រាប់ជនរងគ្រោះទាំងនេះ៕ ប្រែសម្រួលដោយ ពិន ស៊ីសុវណ្ណ This posting includes an audio/video/photo media file: Download Now |
| Posted: 18 Oct 2011 07:53 PM PDT ព័ត៌មានចុងក្រោយបំផុត៖ ថៃ៖ នាយករដ្ឋមន្រ្តីថៃ Yingluck Shinawatra កំពុងអំពាវនាវឲ្យគណបក្សនយោបាយទាំងអស់រួបរួមគ្នានៅពេលដែលទាហាននិងក្រុមកម្មករកំពុងតស៊ូទប់ទំនប់ទឹកការពារទីក្រុងបាងកកពីទឹកជំនន់។ ទួរគី៖ ពួកឧទ្ទាម Kurds បានសម្លាប់ទាហានតួកគី២៦នាក់ និងធ្វើឲ្យទាហាន១៦នាក់ទៀតរងរបួសនៅជិតព្រំដែនជាមួយប្រទេសអ៊ីរ៉ាក់ ដែលនេះជាការស្លាប់ដ៏ច្រើនបំផុតនៅក្នុងការវាយប្រហារបែបនេះក្នុងរយៈពេលប៉ុន្មានឆ្នាំនេះ។ អ៊ីស្រាអែល/ប៉ាឡេស្ទីន៖ ជនប៉ាឡេស្ទីនមួយក្រុមដែលគេចាត់ទុកថាជាជននិរទេសខ្លួននៅក្រោមកិច្ចព្រមព្រៀងដោះដូរអ្នកទោសជាមួយប្រទេសអ៊ីស្រាអែលបានទៅដល់ប្រទេសកំណើតរបស់ខ្លួនហើយ។ កេនយ៉ា/សូម៉ាលី៖ កងទ័ពប្រទេសកេនយ៉ាកំពុងប្រឈមនឹងការធ្លាក់ភ្លៀងយ៉ាងខ្លាំង និងភក់នៅពេលដែលពួកគេចូលក្នុងតំបន់ពីរនៅក្នុងប្រទេសសូម៉ាលីដែលជាប្រទេសជិតខាងរបស់ខ្លួននៅក្នុងកិច្ចខិតខំប្រឹងប្រែងមួយដើម្បីតាមប្រមាញ់សមាជិកកងជីវពលអ៊ីស្លាម (al – Shabab)។ អឺរ៉ុប៖ កូដកម្មទូទៅមួយដែលមានរយៈពេល៤៨ម៉ោងបានធ្វើឡើងនៅក្នុងប្រទេសក្រិកមុនពេលការបោះឆ្នោតនៅក្នុងសភាលើវិធានការដ៏សោះកក្រោះមួយដើម្បីបញ្ចៀសការក្ស័យធន។ ជប៉ុន/កូរ៉េខាងត្បូង៖ មេដឹកនាំប្រទេសកូរ៉េខាងត្បូងនិងប្រទេសជប៉ុន បានព្រមព្រៀងគ្នាធ្វើឲ្យចំណងទាក់ទងការទូត និងសេដ្ឋកិច្ចបានប្រសើរឡើង ទោះបីមានភាពល្វីងជូរចត់ពីការត្រួតត្រារបស់ប្រទេសជប៉ុនក្នុងឧបទ្វីបកូរ៉េ និងជម្លោះដែនដីក៏ដោយ។ សហរដ្ឋអាមេរិក/កូរ៉េខាងត្បូង៖ មេបញ្ជាការថ្មីរបស់កងទ័ពសហរដ្ឋអាមេរិកក្នុងឧបទ្វីបកូរ៉េបានបំពេញទស្សនកិច្ចនៅដែនកោះជាប់ព្រំប្រទល់ប្រទេសកូរ៉េខាងត្បូងដែលជាកន្លែងវាយប្រហារផ្តាច់ជីវិតដោយកាំភ្លើងធំរបស់កងទ័ពកូរ៉េខាងជើងកាលពីចុងឆ្នាំទៅ។ បារាំង៖ អ្នកនិពន្ធបារាំងមួយរូបបានសម្រេចចិត្តទម្លាក់ចោលការចោទប្រកាន់ការចាប់រំលោភប្រឆាំងអតីតនាយកអង្គការរូបីយវត្ថុអន្តរជាតិ( IMF) លោក Dominique Strauss – Kanh ។ <!--AV--> ព័ត៌មាននៅពេលមុននេះ៖ <!--IMAGE-RIGHT--> អាស៊ីអាគ្នេយ៍៖ អង្គការ សហប្រជាជាតិឲ្យដឹងថាមនុស្សជាង៧រយនាក់បានត្រូវសម្លាប់ ហើយ៨លាននាក់ទៀតបានប៉ះពាល់ដោយសារទឹកជំនន់នៅពាសពេញតំបន់អាស៊ី អាគ្នេយ៍។ ហើយអង្គការនោះប្រាប់ទៀតថាខ្លួនបានប្រុងប្រៀបជាស្រេចហើយដើម្បី ផ្តល់ជំនួយមនុស្សធម៌។ ចិន៖ អង្គការសិទ្ធិមនុស្សកំពូលមួយឲ្យដឹងថា ព័ត៌មានដែលបានរាយការណ៍ថាដូនជីព្រះពុទ្ធសាសនាជាតិទីបេដែលបានដុត ខ្លួនហើយបានស្លាប់ បង្ហាញពីកម្រិតនៃការប្រឆាំងតវ៉ាដ៏ខ្លាំងថ្មីមួយប្រឆាំងនយោបាយ ចិននៅក្នុងតំបន់នោះ។ សហរដ្ឋអាមេរិក៖ ភ្នាក់ងារសហព័ន្ធបាននិរទេសចំនួនមនុស្សចេញពីសហរដ្ឋអាមេរិកឡើងដល់កម្រិតមួយគួរឲ្យកត់សម្គាល់។ អ៊ីស្រាអែល៖ ទាហានអ៊ីស្រាអែលម្នាក់ ដែលត្រូវបានដោះលែងដោយពួកកងជីវពលហាម៉ាសដែលបានចាប់ខ្លួនលោកកាល ពី៥ឆ្នាំមុន បានទទួលការស្វាគមន៍ប្រកបដោយការរីករាយនៅក្នុងទីក្រុងកំណើតរបស់ លោក នៅខណៈនោះដែរជនជាតិប៉ាឡេស្ទីនរាប់ម៉ឺននាក់នៅក្នុងតំបន់ Gaza Strip បានអបអរ ពួកអ្នកទោសប៉ាឡេស្ទីនរាប់រយនាក់ដែលអ៊ីស្រាអែលបានដោះលែង ដែលជាការដោះដូរជាមួយទាហានអ៊ីស្រាអែលម្នាក់នោះ។ លីប៊ី៖ លោកស្រីរដ្ឋមន្រ្តីក្រសួងការបរទេសសហរដ្ឋអាមេរិកហ៊ីលឡារី គ្លីនតុនបានទៅបំពេញទស្សនៈកិច្ចប្រទេសលីប៊ីកាលពីថ្ងៃអង្គារ ដើម្បីជួបជាមួយមេដឹកនាំថ្មីរបស់ប្រទេសនោះ ខណៈដែលពួកអ្នកប្រយុទ្ធរដ្ឋាភិបាលបណ្តោះអាសន្នលីប៊ីបានចាប់ផ្តើម វាយប្រហារទីតាំងដ៍រឹងមាំនានាដែលនៅសេសសល់ចុងក្រោយរបស់អតីត មេដឹកនាំ Moammar Gadhafi។ កែនយ៉ា៖ កងកម្លាំងកែនយ៉ាបានចូលផ្នែកទី២នៃប្រទេសសូម៉ាលីខាងត្បូងដែល ជាផ្នែកមួយនៃកិច្ចប្រតិបត្តិការប្រឆាំងក្រុមកងជីវពល al – Shabab។ សកលលោក៖ អង្គការសុខភាពពិភពលោក រាយការណ៍ថា ចំនួនមនុស្សស្លាប់ដោយសារជំងឺគ្រុនចាញ់ជុំវិញពិភពលោក បានធ្លាក់ចុះជាង២០ភាគរយចាប់តាំងពីឆ្នាំ ២០០០មក។ ហ្វីលីពីន៖ អាជ្ញាធរក្នុងតំបន់ខាងត្បូងប្រទេសហ្វីលីពីន ប្រាប់ឲ្យដឹងថាទាហានយ៉ាងហោចណាស់ក៏១២នាក់បានស្លាប់ហើយ១០នាក់ ទៀតកំពុងបាត់ខ្លួនបន្ទាប់ពីការប្រយុទ្ធជាមួយពួកអ្នកប្រយុទ្ធ រាប់រយនាក់មកពីក្រុមឧទ្ទាមអ៊ីស្លាមដ៏ធំបង្អស់នៅក្នុងតំបន់៕ This posting includes an audio/video/photo media file: Download Now |
| ប្រទេសម្ចាស់ជំនួយរំពឹងឲ្យមានការត្រួតពិនិត្យបន្ថែមលើសារពើពន្ធ Posted: 19 Oct 2011 08:21 AM PDT [កំណត់សម្គាល់អ្នកកែសម្រួល៖ ថ្មីៗនេះ រដ្ឋាភិបាលចក្រភពអង់គ្លេសបានប្រកាសថា ខ្លួនមានផែនការផ្តាច់ជំនួយដល់ប្រទេសទាំងឡាយណាដែលមិនមានតម្លាភាពក្នុងការប្រើប្រាស់ប្រាក់ចំណូល និងមិនមានអភិបាលកិច្ចល្អ។ ក្នុងកិច្ចប្រឹងប្រែងដូចគ្នានេះ កាលពីឆ្នាំកន្លងទៅ សហរដ្ឋអាមេរិកបានអនុម័តច្បាប់ស្តីអំពីកំណែទម្រង់ហិរញ្ញវត្ថុមួយឈ្មោះថា Dodd-Frank Financial Reform Act ដែលតម្រូវឲ្យក្រុមហ៊ុនទាំងអស់ដែលចុះបញ្ជីនៅផ្សារហ៊ុននាទីក្រុងញូវយ៉ក បោះពុម្ពផ្សាយជាសាធារណៈអំពីការចំណាយរបស់ខ្លួនទៅឲ្យរដ្ឋាភិបាលបរទេស។ សហភាពអឺរ៉ុបអាចនឹងអនុម័តច្បាប់ស្រដៀងគ្នានេះ។ ខាងក្រោមនេះគឺជាបទសម្ពាសរវាងលោកអ៊ឹម សុធារិទ្ធនៃវីអូអេខ្មែរជាមួយលោកចច បូដិន (George Boden) អ្នកយុទ្ធនាការក្លូបលវិតណេស]។ <!--AV--> ស៖ ថ្មីៗនេះចក្រភពអង់គ្លេសឲ្យដឹងថា ខ្លួនអាចនឹងផ្អាកជំនួយដល់ប្រទេសមួយចំនួនដែលមិនបានផ្តល់ព័ត៌មានលម្អិតអំពីរបៀបដែលគេចំណាយមូលនិធិ។ លោក ហ្វ្រ៊ែនស៊ិស ម៉ូដ (Francis Maude) រដ្ឋមន្ត្រីទីស្តីការគណៈរដ្ឋមន្ត្រីនៃចក្រភពអង់គ្លេស បានមានប្រសាសន៍ថា លក្ខខណ្ឌថ្មីទាំងនោះនឹងភ្ជាប់ទៅនឹងគម្រោងថវិកាប្រចាំឆ្នាំដែលមានទឹកបា្រក់ចំនួន១៣ពាន់លាន២សែនដុល្លារអាមេរិក។ បើតាមការគិតរបស់លោក តើរដ្ឋាភិបាលចក្រភពអង់គ្លេសមាន គោលបំណងអ្វីដែលធ្វើយ៉ាងដូច្នេះ? ច៖ យើងស្វាគមន៍សេចក្តីប្រកាសរបស់រដ្ឋាភិបាលចក្រភពអង់គ្លេស ហើយយើងជឿថា មានគោលបំណងពីរចំពោះលក្ខខណ្ឌដែលគេបានដាក់លើជំនួយរបស់គេ។ ទី១គឺថា គម្រោងថវិការបស់ចក្រភពអង់គ្លេសកើនឡើងក្នុងប៉ុន្មានឆ្នាំខាងមុខ។ ជាថ្មីម្តងទៀតយើងស្វាគមន៍គម្រោងថវិកានេះ។ ប៉ុន្តែរដ្ឋាភិបាលត្រូវការបង្ហាញថា ជំនួយនេះត្រូវបានចំណាយបានយ៉ាងល្អ ហើយអាចពន្យល់ការបង្កើនចំណាយនោះដល់ប្រជារាស្រ្តនៃចក្រភពអង់គ្លេស។ ទី២ ហើយជាចំណុចសំខាន់បំផុតសម្រាប់យើង គឺថា វាជាការសំខាន់ណាស់ដែលជំនួយត្រូវបានផ្តល់ក្នុងលក្ខណៈមួយដែលលើកកម្ពស់ការគ្រប់គ្រងហិរញ្ញវត្ថុ និងអភិបាលកិច្ចល្អ។ យើងជឿថា ការធានាបែបបនេះចំពោះតម្លាភាពជំនួយ និងការធានាថា ជំនួយ និងចំណូលត្រូវបានចំណាយយ៉ាងល្អនោះ មិនគួរអនុវត្តតែលើជំនួយប៉ុណ្ណោះទេ ប៉ុន្តែវាគួរតែត្រូវបានអនុវត្តចំពោះលុយដែលបានមកពីប្រភពផ្សេងៗជាពិសេសលុយដែលបានមកពីធនធានធម្មជាតិ។ យើងគិតថា នេះជាលក្ខខណ្ឌដែលគេត្រូវធានាថា រដ្ឋាភិបាលប្រើប្រាស់គ្រប់ចំណូលទាំងអស់ឲ្យបានត្រឹមត្រូវដើម្បីជាប្រយោជន៍ដល់ប្រជាពលរដ្ឋរបស់ខ្លួនគឺមិនគ្រាន់តែលុយជំនួយប៉ុណ្ណោះទេ។ ស៖ តើវិធានការនេះមានផលប៉ះពាល់យ៉ាងដូចម្តេចចំពោះកម្ពុជា? ច៖ កាលពីឆ្នាំកន្លងទៅ រដ្ឋាភិបាលចក្រភពអង់គ្លេសបានសម្រេចបញ្ចប់ជំនួយអភិវឌ្ឍន៍ទ្វេភាគីរបស់ខ្លួនដល់កម្ពុជា។ ដូច្នេះវាមិនច្បាស់ទេថា សេចក្តីប្រកាសនេះនឹងមានផលប៉ះពាល់យ៉ាងដូចម្តេចចំពោះជំនួយអភិវឌ្ឍន៍ដល់កម្ពុជា។ ក៏ប៉ុន្តែខ្ញុំអាចនិយាយបានថា ចក្រភពអង់គ្លេសនៅតែជាប្រទេសផ្តល់ជំនួយពហុភាគីដ៏ធំមួយតាមរយៈទីភ្នាក់ងារផ្សេងៗមួយចំនួនដែលរូមទាំងសហភាពអឺរ៉ុបផងដែរ។ ដូច្នេះ វាអាចជាលទ្ធភាពមួយដែលគំនិតនេះ និងឆន្ទៈដើម្បីធានាថាលុយជំនួយដល់រដ្ឋាភិបាលគឺត្រូវបានប្រើប្រាស់យ៉ាងល្អនោះ នឹងត្រូវបានអនុវត្តក្នុងវិស័យផ្សេងៗទៀតដែលពេលនេះយើងមិនទាន់ដឹងនៅឡើយ។ គោលនយោបាយទាំងនោះមិនច្បាស់។ បញ្ហាផ្សេងទៀតដែលត្រូវចាំគឺថា សេចក្តីប្រកាសនេះគឺជាផ្នែកមួយនៃការផ្តួចផ្តើមគំនិតពីរដ្ឋាភិបាលមួយចំនួន និងការផ្តួចផ្តើមគំនិតនៃរដ្ឋាភិបាលបើកចំហ។ ហើយរដ្ឋាភិបាលទាំងឡាយដែលបានចូលរួមក្នុងវិធានការនេះ ចង់ផ្សព្វផ្សាយការគ្រប់គ្រងសារពើពន្ធហិរញ្ញវត្ថុល្អ ដើម្បីធានាដល់លុយដែលបានចូលក្នុងប្រព័ន្ធរដ្ឋាភិបាលត្រូវបានចំណាយបានល្អ។ ជាថ្មីម្តងទៀត ខ្ញុំសូមសង្កត់ធ្ងន់អំពីការព្រួយបារម្ភរបស់យើងដែលថា វាមិនត្រឹមតែត្រូវបានអនុវត្តលើលុយជំនួយនោះទេ ប៉ុន្តែគេគួតែពិនិត្យមើលរាល់ចំណូលទាំងអស់ដើម្បីធានាថា រដ្ឋាភិបាលបើកចំហ និងមានតម្លាភាពចំពោះលុយដែលគេបានទទួល ហើយថាតើគេប្រើប្រាស់លុយនោះដោយរបៀបណា។ យើងនឹងមិនអំពាវនាវដល់ម្ចាស់ជំនួយឲ្យចាប់ផ្តើមបង្ហាញអំពីរបៀបដែលរដ្ឋាភិបាលចំណាយលុយនោះទេ។ គោលនយោបាយនោះ គឺស្រេចតែទៅលើពួកគេ ប៉ុន្តែបើសិនជាគេធ្វើឡើងប្រកបដោយប្រសិទ្ធភាព និងតម្លាភាព នោះគឺជាអ្វីដែលយើងអំពាវនាវឲ្យមាន។ ដូច្នេះប្រហែលជាអ្នកជំនួយខ្លះនៃកម្ពុជា ក៏នឹងពិនិត្យមើលគោលនយោបាយស្រដៀងគ្នានេះដែលពិតជាអាចនឹងមានផលប៉ះពាល់ដល់កម្ពុជា។ ស៖ តើអ្វីខ្លះទៅដែលជាតម្លៃនៃគោលនយោបាយនេះក្នុងបរិបទសកលលោក? ច៖ តម្លៃនៃគោលនយោបាយនេះ ខ្ញុំគិតថា ខ្ញុំបានបញ្ជាក់បន្តិចមកហើយថា វាជាការព្រួយបារម្ភមួយដែលមាននៅក្នុងករណីមួយចំនួនក្នុងប្រទេសមួយចំនួនដែលយើងបានធ្វើការនៅទីនោះ ឬដែលយើងបានធ្វើការសិក្សា ហើយកម្ពុជាជាប្រទេសមួយក្នុងចំណោមនោះ។ អ្វីដែលយើងបានឃើញនោះគឺម្ចាស់ជំនួយបន្តផ្តល់លុយរាប់ឆ្នាំដោយគ្មានកំណែទម្រង់ និងឥរិយាបទប្រកបដោយភាពទុកចិត្តរបស់រដ្ឋាភិបាល។ ជាឧទាហរណ៍នៅកម្ពុជា អ្វីដែលយើងបានឃើញ ជាង១០ឆ្នាំមក ហើយរដ្ឋាភិបាលទទួលបានលុយ និងជំនួយកាន់តែច្រើនរាប់ឆ្នាំ ខណៈដែលរដ្ឋាភិបាលមិនបានគ្រប់គ្រងចំណូលពីធនធានធម្មជាតិ និងប្រភពផ្សេងទៀតបានល្អ។ លុយទាំងនោះមិនត្រូវបានឃើញមាននៅក្នុងគណនីរដ្ឋាភិបាល យើងមិនដឹងថា គេចំណាយលុយនោះដោយរបៀបណា ហើយច្បាស់ណាស់ថា យើងកត់ទុកជាឯកសារនៅក្នុងរបាយការណ៍របស់យើងស្តីពីអំពើពុករលួយកម្រិតខ្ពស់ក្នុងការគ្រប់គ្រងចំណូលពីគ្រប់វិស័យ។ យើងមានអារម្មណ៍ថា វាដូចជាបន្សល់នូវចន្លោះប្រហោងនៃការទទួលខុសត្រូវមួយដែលរដ្ឋាភិបាលនៅក្នុងប្រទេសដែលសម្បូរធនធានធម្មជាតិមិនបានធ្វើឲ្យមានការរីកចម្រើនឆ្ពោះទៅរកតម្លាភាព និងការទទួលខុសត្រូវក្នុងរដ្ឋាភិបាល។ ដូច្នេះតម្លៃនៃគោលនយោបាយនេះគឺថា យើងចង់ឃើញថា វាត្រូវបានធ្វើឡើងដើម្បីអនុវត្តលើចំណូលទាំងឡាយរបស់រដ្ឋាភិបាល ជាពិសេសចំណូលដែលបានមកពីធនធានធម្មជាតិ។ ប្រសិនបើយើងមើលទៅទ្វីបអាហ្រ្វិកជាឧទាហរណ៍ ចំនួនលុយពីធនធានធម្មជាតិ ដែលក្រុមហ៊ុនចំណាយលើធនធានធម្មជាតិចូលទៅក្នុងទ្វីបនេះគឺមានចំនួនប្រាំបួនដងលើសតម្លៃនៃជំនួយ។ ដូច្នេះការដែលធ្វើឲ្យបា្រកដថា ចំណូលដែលចូលទៅក្នុងគណនីរដ្ឋាភិបាល ហើយត្រូវបានចំណាយបានត្រឹមត្រូវនោះ គឺសំខាន់ជាងជំនួយទៅទៀត។ ដូច្នេះយើងយល់ថា គោលនយោបាយនេះពិតជាអាចធ្វើឲ្យអភិបាលកិច្ច និងការគ្រប់គ្រងចំណូលមានភាពប្រសើរឡើង ហើយវាអាចលើកកម្ពស់ និងធ្វើឲ្យប្រទេសធ្វើដំណើរទៅរកស្ថានភាពមួយដែលគេអាចទៅហួសពីការពឹងផ្អែកលើជំនួយ ហើយពឹងផ្អែកលើចំណូលរបស់ខ្លួន មានរដ្ឋាភិបាលដែលមានដំណើរការល្អ ដើម្បីប្រយោជន៍ប្រជាពលរដ្ឋរបស់ខ្លួន។ ស៖ ច្បាប់ស្តីអំពីកំណែទម្រង់ហិរញ្ញវត្ថុរបស់សហរដ្ឋអាមេរិកមួយឈ្មោះថា Dodd-Frank Financial Reform Act ត្រូវបានអនុម័តកាលពីឆ្នាំកន្លងទៅ។ តើច្បាប់នេះ រួមជាមួយនឹងលក្ខខណ្ឌថ្មីរបស់រដ្ឋាភិបាលចក្រភពអង់គ្លេស និងបទបញ្ញត្តិថ្មីស្រដៀងគ្នានេះដែលសហភាពអឺរ៉ុបនឹងអនុម័ត ផ្តល់វិភាគទានអ្វីខ្លះដល់ការលើកម្ពស់តម្លាភាព និងអភិបាលកិច្ចល្អនៅក្នុងពិភពលោក? ច៖ សហរដ្ឋអាមេរិកបានអនុម័តច្បាប់ស្តីអំពីកំណែទម្រង់ហិរញ្ញវត្ថុកាលពីឆ្នាំកន្លងទៅ ហើយមាត្រាទី១៥០៤ កំណត់ថា រាល់ក្រុមហ៊ុនប្រេងកាត ឧស្ម័ន និងរ៉ែ ទាំងអស់ដែលចុះបញ្ជីនៅទីក្រុងញូវយ៉កត្រូវតែបោះពុម្ពផ្សាយការចំណាយរបស់ខ្លួនទៅឲ្យរដ្ឋាភិបាលបរទេស។ ដូច្នេះនៅក្នុងប្រទេសទាំងឡាយនៅជុំវិញពិភពលោកដែលរួមមានកម្ពុជាផងនោះ ហើយក្រុមហ៊ុនដូចជា ឈែវរ៉ន (Chevron) និងក្រុមហ៊ុនប្រេងកាតធំៗមួយចំនួនទៀតនឹងត្រូវតែចាប់ផ្តើមបោះពុម្ពរាល់ការចំណាយរបស់គេទៅឲ្យរដ្ឋាភិបាលដែលក្នុងនោះមានរដ្ឋាភិបាលកម្ពុជាផងដែរ។ ដូច្នេះ នេះជាលើកទី១ហើយសម្រាប់ប្រជារាស្ត្រកម្ពុជា និងប្រជាពលរដ្ឋនៅក្នុងប្រទេសសម្បូរធនធានទាំងឡាយនៅជុំវិញពិភពលោកនឹងអាចដឹងយ៉ាងពិតប្រាកដថាតើរដ្ឋាភិបាលរបស់ខ្លួនទទួលលុយបានប៉ុន្មានពីធនធានធម្មជាតិរបស់ប្រទេស ហើយគេនឹងមានលទ្ធភាពដាក់ឲ្យរដ្ឋាភិបាលទទួលខុសត្រូវ និងសួរអំពីថាតើលុយទាំងនោះនឹងត្រូវចំណាយយ៉ាងដូចម្តេច និងត្រូវប្រើប្រាស់ទៅលើអ្វី។ សហភាពអឺរ៉ុបថ្មីៗនេះកំពុងពិចារណាបទបញ្ញត្តិស្រដៀងគ្នានេះ ដែលកំណត់ឲ្យក្រុមហ៊ុនទាំងឡាយដែលចុះបញ្ជីផ្សារហ៊ុននៅទ្វីបអឺរ៉ុបនឹងត្រូវតែធ្វើដូចគ្នានេះ ដែលអាចរួមបញ្ចូលក្រុមហ៊ុនធំៗមួយចំនួនដែលមិនចុះបញ្ជីនៅទីក្រុងញូវយ៉ក ដូចជា ក្រុមហ៊ុន ហ្គាហ្សប្រូម (Gazprom) និងរ៉ូស្ន៊ែហ្វត៍ (Rosneft) ក្រុមហ៊ុនរុស្ស៊ីធំៗពីរដែលមិនបានចុះបញ្ជីនៅទីក្រុងឡុងដ៍ ។ យើងឃើញមានវិធីពីរ។ ដូច្នេះប្រសិនបើអ្នកដឹង គឺថាប្រទេសមួយចំនួនដែលមានក្រុមហ៊ុនប្រេងកាត ឧស្ម័ន និងរ៉ែអន្តរជាតិធំៗត្រូវធ្វើកិច្ចការបន្ថែមទៀតដើម្បីធ្វើឲ្យប្រាកដថា ក្រុមហ៊ុនទាំងនោះមិនបង្កឲ្យមានអំពើពុករលួយនៅបរទេស ដែលនោះរួមមានទ្រឹស្តីដូចគ្នាទៅនឹងការធ្វើឲ្យប្រាកដថា ពួកគេត្រូវបានកាត់ទោសខណៈគេសូកប៉ាន់មន្រ្តីសាធារណៈបរទេស ដែលរួមទាំងការធ្វើឲ្យប្រាកដថា មានតម្លាភាពក្នុងធ្វើកិច្ចការជាមួយនឹងរដ្ឋាភិបាលបរទេស ដើម្បីធ្វើឲ្យមានការលំបាកដល់អំពើពុករលួយនឹងកើតមានឡើង ដែលក្រុមហ៊ុនទាំងនោះមិនចូលរួមចំណែកក្នុងអំពើពុករលួយ។ ទីពីរគឺថា យើងគិតថា វាជាតួនាទីរបស់ប្រទេសផ្តល់ជំនួយក្នុងការធ្វើការជាមួយទាំងរដ្ឋាភិបាល និងប្រជាពលរដ្ឋ ដើម្បីបង្កើនសមត្ថភាពក្នុងការចាត់ចែងចំណូល និងគ្រប់គ្រង់ធនធានធម្មជាតិរបស់ខ្លួន ហើយចែករំលែកជំនាញដល់ប្រទេសទាំងនោះ ប៉ុន្តែយើងក៏គិតដែរថា រដ្ឋាភិបាលមិនធ្វើដើម្បីប្រយោជន៍ប្រជាពលរដ្ឋទេនៅពេលដែលគេពុករលួយនោះ ហើយគេលួចធនធានធម្មជាតិ និងចំណូលរបស់ប្រទេស។ ហើយពេលនោះពួកគេគួរដាក់ឲ្យរដ្ឋាភិបាលទាំងនោះទទួលខុសត្រូវ ហើយពួកគេគួរដកមូលនិធិដែលផ្តល់ពីរដ្ឋាភិបាលទៅរដ្ឋាភិបាលដែលពុករលួយ និងដែលមិនប្រតិបត្តិដើម្បីប្រយោជន៍ប្រជាពលរដ្ឋរបស់ខ្លួន។ វាពិតជាមានវិធីពីរក្នុងការធ្វើឲ្យប្រាកដថា គេអាចឃើញថា លុយចំនួនប៉ុន្មានចរាចរណ៍ទៅកន្លែងទី៣ ដែលនោះគឺជាអ្វីដែលច្បាប់កំណែទម្រង់ហិរញ្ញវត្ថុកំណត់ ហើយជាអ្វីដែលបញ្ញត្តិនៃសហភាពអឺរ៉ុបនឹងកំណត់ ប៉ុន្តែនៅពេលដែលលុយទៅដល់ប្រទេស អ្នកនឹងដឹងមានចំនួនប៉ុន្មាន។ វាធានាថា វាបង្ហាញនៅក្នុងគណនីបានត្រឹមត្រូវ ហើយត្រូវបានគ្រប់គ្រងប្រកបដោយតម្លាភាព ហើយថាអ្នកអាចឃើញថា ប្រជាពលរដ្ឋនៃប្រទេសនោះអាចឃើញថាលុយនោះត្រូវបានប្រើសម្រាប់ធ្វើអ្វីជាក់លាក់។ នោះគឺជាចំណែកនៃការទទួលខុសត្រូវរបស់អាជ្ញាធរ និងប្រជាពលនៃប្រទេសនោះ ដែលដាក់ឲ្យរដ្ឋាភិបាលទទួលខុសត្រូវ ហើយធ្វើឲ្យប្រាកដថា លុយនោះត្រូវបានចំណាយបានល្អត្រឹមត្រូវ៕ This posting includes an audio/video/photo media file: Download Now |
| ទោះបីមានបម្រាម ក៏អាចមានពលការនីរាប់ពាន់នាក់នឹងទៅធ្វើការនៅម៉ាឡេស៊ី Posted: 19 Oct 2011 06:53 AM PDT លោកនាយករដ្ឋមន្ត្រី ហ៊ុន សែនបានបញ្ជាឲ្យផ្អាកការបញ្ជូនពលការនីជំនួយការមេផ្ទះ ទៅធ្វើការនៅម៉ាឡេស៊ីបណ្តោះអាសន្ន បន្ទាប់ពីមានរឿងអាស្រូវ ប៉ុន្តែមន្ត្រីផ្លូវការកំពុងពិចារណាលទ្ធភាពនៃការបញ្ជូនពលករជាស្ត្រីបម្រើការតាមផ្ទះយ៉ាងតិច ២.៥០០នាក់ទៅធ្វើការនៅម៉ាឡេស៊ី។ លោក សេង សក្តា អគ្គនាយកនៃក្រសួងការងារ បានមានប្រសាសន៍នៅថ្ងៃអង្គារនេះថា លោកកំពុងតែសិក្សាលទ្ធភាពរបស់ពលករ ដែលក្រុមហ៊ុនមួយចំនួនបានជ្រើសរើស និងបានបណ្តុះបណ្តាលរួចហើយតាំងពីមុនបម្រាមថ្ងៃទី១៥ ខែតុលារបស់លោកនាយករដ្ឋមន្ត្រី ហ៊ុន សែន។ «ខ្ញុំសិក្សាមើលថា តើក្រុមហ៊ុនដែលបានទទួលជ្រើសរើស និងបណ្តុះបណ្តាល ហើយបានទទួលបណ្ណការងារពីក្រសួងការងារមុនថ្ងៃទី១៥ មានចំនួនប៉ុន្មាន ហើយយើងនឹងស្នើសុំគោលការណ៍ទៅរដ្ឋាភិបាល»។ លោកនាយករដ្ឋមន្ត្រី ហ៊ុន សែន បានថ្លែងនៅក្នុងសារាចរចុះថ្ងៃទី១៥ ខែតុលាថា រដ្ឋាភិបាលសូមជូនដំណឹងដល់ក្រសួង ស្ថាប័ន អាជ្ញាធរមានសមត្ថកិច្ច និងទីភ្នាក់ងារជ្រើសរើសពលករឯកជនឲ្យបានជ្រាបថា ចាប់ពីពេលនេះតទៅ ការជ្រើសរើស បណ្តុះបណ្តាល និងបញ្ជូនពលករ ជាស្ត្រីជំនួយការមេផ្ទះទៅកាន់ប្រទេសម៉ាឡេស៊ីត្រូវផ្អាកជាបណ្តោះអាសន្ន។ បម្រាមនេះត្រូវបានធ្វើឡើង បន្ទាប់ពីនគរបាលបានឆ្មក់ចូលទៅក្នុងក្រុមហ៊ុន ធី&ភី ខូអិលធីឌី នៅក្នុងខេត្តកំពង់ឆ្នាំងកាលពីសប្តាហ៍មុន ដើម្បីសង្គ្រោះក្មេងស្រីក្រោមអាយុ ១៨ឆ្នាំចំនួន ៣០នាក់ ដែលកំពុងទទួលការបណ្តុះបណ្តាលដើម្បីបម្រើការតាមផ្ទះនៅម៉ាឡេស៊ី និងពាក្យបណ្តឹងអំពីមរណៈភាព ការរំលោភសេពសន្ទវៈ និងការធ្វើទារុណកម្ម ក្នុងម៉ាឡេស៊ី។ លោកនាយករដ្ឋមន្ត្រី ហ៊ុន សែន បានបញ្ជាក់ថា ដំណើរការនៃការជ្រើសរើស បណ្តុះបណ្តាល និងបញ្ជូនពលករជាស្ត្រីជំនួយការមេផ្ទះទៅធ្វើការនៅម៉ាឡេស៊ីនឹងអាចប្រព្រឹត្តទៅបានជាធម្មតាឡើងវិញ លុះត្រាតែទទួលបានការជូនដំណឹងជាថ្មីរបស់រាជរដ្ឋាភិបាលអំពីបញ្ហានេះ។ តាមតួលេខរបស់ក្រសួងការងារ ប្រទេសកម្ពុជាមានទីភ្នាក់ងារជ្រើសរើសពលករចំនួន៣៤។ លោក ចាន់ សាវ៉េត ប្រធានផ្នែកឃ្លាំមើលសិទ្ធិមនុស្ស នៃសមាគមសិទ្ធិមនុស្សអាដហុក បានថ្លែងថា អង្គការសង្គមស៊ីវិលគាំទ្រវិធានការចាំបាច់នេះ ដើម្បីធ្វើការស៊ើបអង្កេតករណីរំលោភសិទ្ធិពលករកម្ពុជានៅម៉ាឡេស៊ី និងការជ្រើសរើសពលករមិនទាន់គ្រប់អាយុឲ្យទៅធ្វើការនៅម៉ាឡេស៊ី។ «ក្នុងនាមខ្ញុំជាអ្នកសិទ្ធិមនុស្ស ខ្ញុំត្រូវគិតពិចារណាថា បើសិនជារាជរដ្ឋាភិបាលមើលឃើញប្រទេសមួយ ដែលពោរពេញទៅដោយការរំលោភសិទ្ធិមនុស្ស មិនគួប្បីរួមចំណែកក្នុងការបញ្ជូនពលកររបស់ខ្លួនឲ្យទៅចូលរួមធ្វើកិច្ចការងារនៅក្នុងប្រទេសនោះទេ ហើយខ្វះអ្វីប្រទេសនៅក្នុងពិភពលោក ដែលត្រូវការពលករកម្លាំងពលកម្មនេះ។ យើងខ្ញុំសូមជំទាស់ជាដាច់ខាតក្នុងការយកអនីតិជនពីប្រទេសខ្មែរទៅបម្រើការឲ្យប្រទេសដទៃ។ វាប៉ះពាល់ដល់សេរីភាពកុមារ»។ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា សារាចរនេះ គ្រាន់តែជាដំណោះស្រាយបណ្តោះអាសន្ន និងមិនមានឥទ្ធិពលធំដុំសម្រាប់ការបញ្ជូនពលករ នៅពេលមានភស្តុតាង នៃការរំលោភច្បាប់នានាត្រូវបានរកឃើញ ទើបមានការផ្អាក ប៉ុន្តែគ្មានអ្នកទទួលខុសត្រូវទេ។ «មេភូមិ ឬមេឃុំ ឬចៅហ្វាយស្រុកត្រូវទទួលខុសត្រូវចំពោះមុខច្បាប់នូវការកែអត្តសញ្ញាណបណ្ណបែបហ្នឹង។ យើងឃើញថា និទណ្ទភាពគឺជាមូលហេតុចម្បងជាងគេបង្អស់ បើសិនជាយើងអត់មានការកាត់ទោសអ្នកកែអត្តសញ្ញាណបណ្ណបែបហ្នឹង គាត់អត់មានអ្នកណាគេពិន័យ អត់មានអ្នកណាគេធ្វើបាប អត់មានអ្នកណាគេដាក់ទោសគាត់សោះ។ ពួកគាត់នឹងរកផ្លូវផ្សេងទៀត ដើម្បីប្រព្រឹត្តអំពើរំលោភសិទ្ធិមនុស្សដដែល»។ លោក អាន ប៊ុនហាក់ ប្រធានសមាគម នៃទីភ្នាក់ងារជ្រើសរើសពលករកម្ពុជា បានថ្លែងថា សមាគមត្រូវតែអនុវត្តឲ្យបាន១០០ភាគរយតាមសារាចរណែនាំរបស់លោកនាយករដ្ឋមន្ត្រី ហ៊ុន សែននេះ។ «យើងឃើញថា ឱកាសនេះគឺជាឱកាសសម្រាប់យើងសម្រាកក្នុងការជ្រើសរើស ហើយយើងងាកមកអង្គុយដើម្បីរកយន្តការនៃការការពារសិទ្ធិជាមូលដ្ឋានរបស់ពលការនីយើង។ យើងពង្រឹងយន្តការនៃការការពារនេះ ដោយធ្វើការសហការជាមួយដៃគូរបស់យើងប្រទេសម៉ាឡេស៊ី ក៏ដូចជារដ្ឋាភិបាលម៉ាឡេស៊ី និងអង្គការជាដៃគូមួយចំនួន»។ លោក រ៉ាចា សៃហ្វ៊ល រីដាវ៉ាន (Raja Saiful Ridawan) អនុប្រធានបេសកកម្មនៃស្ថានទូតម៉ាឡេស៊ីប្រចាំកម្ពុជាបានបដិសេធការអត្ថាធិប្បាយអំពីបម្រាមនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
