VOA News: ព័ត៌មាន: “វេទិកានៃអង្គការមិនមែនរដ្ឋាភិបាលចេញផ្សាយរបាយការណ៍អំពីជម្លោះដីធ្លី” plus 3 more |
- វេទិកានៃអង្គការមិនមែនរដ្ឋាភិបាលចេញផ្សាយរបាយការណ៍អំពីជម្លោះដីធ្លី
- ព្រះរាជអាជ្ញា និងមេធាវីខ្វែងគំនិតគ្នាអំពីសុខភាពអ្នកស្រីអៀង ធីរិទ្ធក្នុងដំណើរការកាត់ទោស
- ព័ត៌មានអន្តរជាតិ៖ ២០ តុលា
- បន្លែនិងផ្លែឈើពីកសិដ្ឋានសរីរាង្គទទួលការគាំទ្របណ្តើរៗ
| វេទិកានៃអង្គការមិនមែនរដ្ឋាភិបាលចេញផ្សាយរបាយការណ៍អំពីជម្លោះដីធ្លី Posted: 20 Oct 2011 11:05 AM PDT វេទិកានៃអង្គការមិនមែនរដ្ឋាភិបាលស្តីពីកម្ពុជាបានចេញផ្សាយរបាយការណ៍ប្រចាំឆ្នាំ២០១០នៅថ្ងៃព្រហស្បតិ៍នេះថា ករណីជម្លោះដីធ្លីភាគច្រើនបានកើតឡើងជាប់ពាក់ព័ន្ធជាមួយនឹងមន្ត្រីរដ្ឋាភិបាលមានអំណាច អ្នកជំនួញមានប្រាក់ និងមន្ត្រីអាជ្ញាធរមូលដ្ឋាន។ អ្នកចូលរួមប្រមាណ២០០នាក់ពីតំណាងជនរងគ្រោះដោយការរំលោភដីធ្លីទូទាំងប្រទេសតំណាងអង្គការសង្គមស៊ីវិល និងតំណាងអង្គការសហប្រជាជាតិផ្នែកសិទ្ធិមនុស្សប្រចាំកម្ពុជា បានចូលរួមក្នុងការផ្សព្វផ្សាយរបាយការណ៍ស្តីពីការវិភាគទិន្នន័យករណីវិវាទដីធ្លីនៅកម្ពុជាឆ្នាំ២០១០នៅសណ្ឋាគារអ៊ីមភើរៀល ក្នុងទីក្រុងភ្នំពេញ។ លោកឈិត សំអាត នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា បានថ្លែងនៅក្នុងពិធីផ្សព្វផ្សាយរបាយការណ៍ស្តីពីការវិភាគទិន្នន័យករណីវិវាទដីធ្លីនៅកម្ពុជាឆ្នាំ២០១០នេះថា នៅឆ្នាំ២០១០ អង្គការមិនមែនរដ្ឋាភិបាលបានកត់ត្រា២៨២ករណីវិវាទដីធ្លី ដែលកំពុងតែកើតមានឡើងពាក់ព័ន្ធជាមួយ៥គ្រួសារឡើងទៅ។ ចំនួនទំនាស់ដីធ្លីនៅតែបន្តកើនឡើងថែមទៀតនៅឆ្នាំ២០១០នេះ។ លោកឈិត សំអាតបានបញ្ជាក់ថា មានកត្តាផ្សេងៗជាច្រើន ដែលនាំឱ្យមានករណីទំនាស់ដីធ្លីទាំងនេះ ដូចជាគម្រោងអភិវឌ្ឍន៍ហេដ្ឋារចនាសម្ព័ន្ធទាំងទីក្រុង និងជនបទ ក៏ដូចជាការផ្តល់ដីសម្បទានសេដ្ឋកិច្ច ដែលមានទ្រង់ទ្រាយធំ។ «ការអង្កេតរបស់អង្គការមិនមែនរដ្ឋាភិបាលឲ្យដឹងថា មាន២០ភាគរយនៃករណីវិវាទដីធ្លីបានដោះស្រាយ ហើយ ចំណែកឯ៦០ភាគរយនៃវិវាទផ្សេងទៀតមិនទាន់បានដោះស្រាយនៅឡើយទេ។ ទំនាស់នេះបានធ្វើឱ្យមានផលប៉ះពាល់ទៅដល់ជីវភាពរស់នៅរបស់ប្រជាពលរដ្ឋ»។ វេទិកានៃអង្គការមិនមែនរដ្ឋាភិបាលស្តីពីកម្ពុជាបានរកឃើញថា ចំនួន១៥៧លើ២៨២ករណីជម្លោះដីធ្លីបានបង្ហាញថា មានការជាប់ពាក់ព័ន្ធរបស់អ្នកមានអំណាច ឬ អ្នកមានប្រាក់ និងចំនួន១៥១ករណីជាប់ពាក់ព័ន្ធនឹងអាជ្ញាធរមូលដ្ឋាន។ របាយការណ៍នេះបានបញ្ជាក់ថា ករណីជម្លោះដីធ្លីមួយចំនួនទៀតបាននាំទៅដល់ការប្រើប្រាស់ការគំរាមកំហែង ឬ អំពើហិង្សា និងការចាប់ខ្លួនដោយដីការបស់តុលាការ និងមួយចំនួនឈានដល់ការឃុំខ្លួនដែលមានចំនួន៥៥ករណី។ របាយការណ៍នេះបានសរសេរថា ករណីជម្លោះដីធ្លីចំនួន១០៥ករណីស្មើនឹង៣៧ភាគរយមានជាប់ពាក់ព័ន្ធនឹងចំនួនគ្រួសារពី៥ទៅ៥០។ ចំនួន២៣ភាគរយបានកើតឡើងដោយមានជាប់ពាក់ព័ន្ធនឹងចំនួនគ្រួសារចាប់ពី២០០គ្រួសារឡើងទៅ។ របាយការណ៍នេះបានបន្ថែមថា ជម្លោះដីធ្លីចំនួន១៥១ករណី ស្មើនឹង៥៣ភាគរយ បានកើតឡើងលើប្រភេទដីសម្រាប់វិស័យកសិកម្ម ចំនួន៦៧ករណី ស្មើនឹង២៨ភាគរយ បានកើតឡើងលើប្រភេទដីលំនៅដ្ឋាន និងចំនួន២៨ករណី ស្មើនឹង១០ភាគរយបានកើតឡើងលើប្រភេទដីព្រៃ។ របាយការណ៍នេះបានបន្តថា ចំនួន២២ភាគរយស្មើនឹង៦៣លើ២៨២ករណីត្រូវបានដោះស្រាយមួយផ្នែក ឬទាំងស្រុង។ ចំនួន៦២ភាគរយស្មើនឹង១៧៧លើ២៨២ករណីមិនទាន់ត្រូវបានដោះស្រាយ។ ចំនួន១២មិនត្រូវបានអើពើដោះស្រាយ និង២៥ករណីត្រូវបានរាយការណ៍ថា មិនមានព័ត៌មាន។ លោក James Heenan តំណាងស្តីទីរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានថ្លែងនៅក្នុងពិធីផ្សព្វផ្សាយរបាយការណ៍នេះថា បញ្ហាសិទ្ធិដីធ្លី និងសិទ្ធិលំនៅដ្ឋាន គឺជាអាទិភាពយុទ្ធសាស្ត្រមួយរបស់ឧត្តមស្នងការអង្គការសហប្រជាជាតិនៅកម្ពុជា។ ជម្លោះដីធ្លីតែងតែបញ្ចប់ដោយការបណ្តេញប្រជាពលរដ្ឋចេញ។ លោកយិន ជាវ អាយុ៣៤ឆ្នាំ នៅឃុំជីខលើ ស្រុកស្រែអំបិល ខេត្តកោះកុង ដែលបានចូលរួមនៅក្នុងការផ្សព្វផ្សាយរបាយការណ៍នេះ បាននិយាយយ៉ាងដូច្នេះថា «ប្រជាពលរដ្ឋចំនួន២២០គ្រួសាររងផលប៉ះពាល់ដីកសិកម្មផង និងដីលំនៅដ្ឋានផង។ ក្រុមហ៊ុនឈូសឆាយយកអស់។ សព្វថ្ងៃនេះគឺមិន ទាន់បានដោះស្រាយនៅឡើយទេ»។ លោក ផៃ ស៊ីផាន អ្នកនាំពាក្យប្រចាំទីស្តីការគណៈរដ្ឋមន្ត្រី មិនអាចធ្វើការទំនាក់ទំនងដើម្បីសេចក្តីអត្ថាធិប្បាយបានទេ៕ This posting includes an audio/video/photo media file: Download Now |
| ព្រះរាជអាជ្ញា និងមេធាវីខ្វែងគំនិតគ្នាអំពីសុខភាពអ្នកស្រីអៀង ធីរិទ្ធក្នុងដំណើរការកាត់ទោស Posted: 20 Oct 2011 11:03 AM PDT សហមេធាវីអន្ដរជាតិលោកស្រី ដាយអាណា អាលីស បានស្នើសុំនៅថ្ងៃព្រហស្បតិ៍នេះឲ្យអង្គជំនុំជម្រះសាលាដំបូងនៃសាលាក្ដីខ្មែរក្រហមដោះលែងកូនក្ដីរបស់ខ្លួនគឺអ្នកស្រីអៀង ធីរិទ្ធ ដោយសារតែបញ្ហាសុខភាព។ ក្រុមគ្រូពេទ្យជំនាញខាងមនុស្សចាស់ និងខាងវិកលវិទ្យាបានបង្ហាញនៅក្នុងសវនាការស្ដីពីបញ្ហា សុខភាពរបស់អ្នកស្រីអៀង ធីរិទ្ធ កាលពីថ្ងៃពុធ និងនៅថ្ងៃព្រហស្បតិ៍នេះថា អតីតរដ្ឋមន្រ្ដីក្រសួងសង្គមកិច្ចរបស់ខ្មែរក្រហមអាយុ៧៩ឆ្នាំរូបនេះ មានរោគសញ្ញានៃការចុះខ្សោយសតិបញ្ញា និងបាត់បង់ការចងចាំ។ លោកស្រីដាយអាណា អាលីសមានប្រសាសន៍ដោយយោងដល់របាយការណ៍របស់គ្រូពេទ្យថា៖ «ការចុះខ្សោយក្នុងការផ្ចង់អារម្មណ៍ និងការចុះខ្សោយនៃការចងចាំ គឺជាការបង្ហាញយ៉ាងរឹងមាំពីអសមត្ថភាពរបស់អៀង ធីរិទ្ធ នៅក្នុងការតស៊ូក្នុងដំណើរការកាត់ទោសលើរូបគាត់»។ លោកស្រីមេធាវីសញ្ជាតិអង់គ្លេសដដែលនេះបានសំអាងថា នឹងមិនមានយុត្តិធម៌សម្រាប់កូនក្ដីរបស់គាត់ទេ ល្គឹកណាកូនក្ដីមិនមានលទ្ធភាពយល់ដឹងពីដំណើរនីតិវិធីកាត់ទោស និងប្រាស្រ័យទាក់ទងជាមួយមេធាវីនោះ។ ហើយលោកស្រីបានស្នើឲ្យអង្គជំនុំជម្រះសាលាដំបូងសម្រេចបញ្ឈប់នីតិវិធីប្រឆាំងនឹងកូនក្ដីរបស់ខ្លួន។ «មិនមានអ្វីជាការសង្ស័យទេថា អៀង ធីរិទ្ធមិនមានលទ្ធភាពនឹកឃើញពីអ្វី ដែលបានកើតឡើងក្នុងជីវិតរបស់គាត់ សម្រាប់ការចូលរួមការកាត់ទោសនៅចំពោះមុខអង្គជំនុំជម្រះ។ ជនជាប់ចោទគួរត្រូវរកឃើញថា មិនមានលទ្ធភាពចូលរួមការកាត់ទោស»។ យ៉ាងណាក៏ដោយ សហព្រះរាជអាជ្ញារងបានជំទាស់ទៅនឹងសំណើរនោះ ហើយបានអះអាងថា អៀង ធីរិទ្ធនៅមានលទ្ធភាពគ្រប់គ្រាន់ក្នុងការចូលរួមសវនាការ ដោយសាររបាយការណ៍គ្រូពេទ្យបញ្ជាក់ថា គាត់មានជំងឺបាត់បង់ការចងចាំក្នុងកម្រិតមធ្យមនៅឡើយ រួមទាំងមានលទ្ធភាពអង្គុយក្នុងសវនាការបាន។ ម្យ៉ាងវិញទៀត ជនជាប់ចោទទាំងបួននាក់ក្នុងសំណុំរឿង០០២នេះមានស្ថានភាពសុខភាពមិនខុសគ្នាប៉ុន្មានទេ។ លោកច័ន្ទ តារារស្មី សហព្រះរាជអាជ្ញារងជាតិកម្ពុជានិយាយថា៖ «វត្តមានរបស់គាត់ពិតជាមានសារៈសំខាន់ណាស់ មិនត្រូវគប្បីឲ្យជនជាប់ចោទ អៀង ធីរិទ្ធ នៅក្រៅឃុំនោះទេ ពីព្រោះការឃុំខ្លួនគាត់នៅទីនេះសមស្របទៅនឹងលក្ខខណ្ឌសុខភាពរបស់គាត់ដែលត្រូវការការតាមដានជាចាំបាច់ក្នុងការត្រួតពិនិត្យសុខភាពរបស់គាត់»។ មេធាវីនាំមុខដែលតំណាងឲ្យខាងភាគីជនរងគ្រោះយល់ស្របនឹងសហព្រះរាជអាជ្ញាដែរ។ ហើយបានគាំទ្រឲ្យមានការបំបែកនីតិវិធី ខណៈដែលមេធាវីរបស់នួន ជា មេធាវីរបស់អៀង សារី និងមេធាវីរបស់អៀង ធីរិទ្ធទាមទារឲ្យមានការបំបែកនីតិវិធី ដើម្បីធ្វើការកាត់ទោសជនជាប់ចោទដាច់ដោយឡែកពីគ្នា។ សាលាក្ដីខ្មែរក្រហមគ្រោងនឹងបើកសវនាការកាត់ទោសពេញអង្គសេចក្ដីលើជនជាប់ចោទទាំងបួននាក់ក្នុងសំណុំរឿង០០២ ដែលរួមមានមាននួន ជា អៀង សារី អៀង ធីរិទ្ធ និងខៀវ សំផន ចាប់ពីថ្ងៃទី២១ ខែវិច្ឆិកា ឆ្នាំ២០១១នេះតទៅ។ លោកខៀវ សំផន និងមេធាវីរបស់ខ្លួនមិនបានចូលរួមក្នុងសវនាការស្ដីពីបញ្ហាសុខភាពរបស់អៀង ធីរិទ្ធ ក្នុងរយៈពេលពីរថ្ងៃនេះទេ៕ This posting includes an audio/video/photo media file: Download Now |
| Posted: 19 Oct 2011 08:18 PM PDT ព័ត៌មានចុងក្រោយបំផុត៖ លីប៊ី៖ មន្រ្តីរដ្ឋាភិបាលបណ្តោះអាសន្នក្នុងប្រទេសលីប៊ីនិយាយថា អតីតមេដឹកនាំគឺលោកម៉ូអាម៉ា ហ្កាដាហ្វី បានស្លាប់បន្ទាប់ពីរងរបួសខណៈពេលដែលលោកបានព្យាយាមរត់គេចខ្លួនពីទីក្រុងសឺត។ អាហ្វហ្គានីស្ថាន៖ លោកស្រីហ៊ីលឡារី គ្លីនតុន រដ្ឋមន្រ្តីក្រសួងការបរទេសសហរដ្ឋអាមេរិកនិយាយថាពួកតាលីបង់អាចចូលរួមក្នុងការចរចាស្វែងរកសន្តិភាពឬក៏ប្រឈមមុខនឹងការវាយប្រហារជាបន្តទៀត។ លីប៊ី៖ ក្រុមអ្នកប្រយុទ្ធបដិវត្តន៍របស់ប្រទេសលីប៊ីនិយាយថាពួកគេបានកាន់កាប់ទីក្រុងសឺត ដែលជាការផ្លាស់ប្តូរមួយអាចនាំឲ្យរដ្ឋាភិបាលបណ្តោះអាសន្នប្រកាសថាប្រទេសនេះត្រូវបានរំដោះហើយ។ អាស៊ី៖ ទីផ្សារធំៗក្នុងទ្វីបអាស៊ីបានបិទទ្វារក្នុងតម្លៃទាបជាងមុននៅ ថ្ងៃព្រហស្បតិ៍នេះ។ ទីផ្សារភាគហ៊ុន នីកេ ក្នុងទីក្រុងតូក្យូបានធ្លាក់ចុះបន្តិចបន្តួចអស់ជាងមួយភាគរយ គឺអស់៩០ពិន្ទុមកនៅ ត្រឹម៨.៦៨២ពិន្ទុ។ ទីផ្សារហ៊ុន ហាងសេង ក្នុងទីក្រុងហុងកុងធ្លាក់ចុះបន្តិចអស់៣២៦ពិន្ទុដោយបញ្ចប់នៅ ត្រឹម ១៧.៩៨៣ ពិន្ទុ។ តម្លៃភាគហ៊ុនក៏ធ្លាក់ចុះក្នុងទីក្រុងបាងកក គូឡាឡាំពួ ម៉ានីល ម៉ុមបៃ សេអ៊ូល សិង្ហបូរី និងតៃប៉ិ។ ថៃ៖ មន្ត្រីថៃនិយាយថាពួកគេមិនអាចទប់ទឹកជំនន់ដែលកំពុងហូរចូលក្នុង រដ្ឋធានីបាងកកបានទៀតទេ។ លោកស្រី យីងឡាក់ ស៊ីណាវ៉ាត ដែលកំពុងប្រឈមមុខនឹងវិបត្តិដំបូងបំផុតក្នុងអាណត្តិរបស់លោកស្រី បាននិយាយនៅថ្ងៃព្រហស្បតិ៍នេះថា លោកស្រីបានបញ្ជាឲ្យមន្រ្តីនានាបើកទ្វារទឹកជំនន់ហើយឲ្យទឹកហូរ កាត់តាមព្រែកនានាក្នុងទីក្រុងបាងកកនាំទឹកទៅសមុទ្រ។ អឺរ៉ុប៖ បាតុករក្រិកបន្តចេញមកតវ៉ាតាមដងផ្លូវនានាក្នុងទីក្រុងអាថែន នៅថ្ងៃទីពីរនាថ្ងៃព្រហស្បតិ៍នេះស្របពេលដែលសមាជិកសភាជាតិរៀបចំ បោះឆ្នោតចុងក្រោយលើវិធានការរឹតត្បិតថវិកាថ្មី ទៀតដែលចាំបាច់ដើម្បីទទួលបានមូលនិធិជួយសង្គ្រោះបន្ថែម។ កេនយ៉ា/សូម៉ាលី៖ ការវាយប្រយុទ្ធគ្នាដ៏ខ្លាំងមួយបានផ្ទុះឡើងរវាងកងទ័ពរដ្ឋាភិបាលសូម៉ាលីនិងពួកឧទ្ទាមអាល់សាបាប់ក្នុងរដ្ឋធានីម៉ូហ្គាឌីស្យូ ខណៈពេលដែលកងកម្លាំងកេនយ៉ាបន្តជំរុលទៅមុខនៅតំបន់ភាគខាងជើងប្រទេសសូម៉ាលីក្នុងកិច្ចខិតខំប្រឹងប្រែងតាមប្រម៉ាញ់សមាជិកក្រុមបះបោរសូម៉ាលី។ អ៊ីរ៉ង់៖ ប្រទេសអ៊ីរ៉ង់បានវាយប្រហារលើរបាយការណ៍មួយរបស់អ្នកស៊ើបអង្កេតអង្គការសហប្រជាជាតិដែលបានភ្ជាប់ការសម្លាប់ដែលកាន់តែមានការកើនឡើងក្នុងទីក្រុងតេអេរ៉ង់ទៅនឹងការចោទប្រកាន់ពីការរំលោភសិទ្ធិមនុស្សផ្សេងៗទៀត។ សហរដ្ឋអាមេរិក/កូរ៉េខាងជើង៖ សហរដ្ឋអាមេរិកនិយាយថាខ្លួនបានតែងតាំងបេសកជនជាន់ខ្ពស់ថ្មីម្នាក់ទៀតសម្រាប់ប្រទេសកូរ៉េខាងជើង នៅមុនពេលកិច្ចប្រជុំដ៏កម្រមួយជាមួយនឹងក្រុមអ្នកចរចាអាវុធបរិមាណូរបស់ប្រទេសនេះនៅសប្តាហ៍ក្រោយ។ អាហ្វ្រិកកណ្តាល៖ ក្រុមអង្គការសិទ្ធិមនុស្សនាំមុខមួយកំពុងទទូចឲ្យសហភាពអាហ្រ្វិកដឹកនាំកិច្ចខិតខំប្រឹងប្រែងរួមមួយដើម្បីបញ្ចប់ការរំលោភសិទ្ធិមនុស្សដែលមានជាច្រើនទសវត្សរ៍មកហើយក្នុងសហភាពអាហ្រ្វិកកណ្តាល។ សហរដ្ឋអាមេរិក៖ មន្រ្តីនានានិយាយថាពួកគេបានចាត់ការអស់ហើយលើសត្វដែលបានដោះលែងចេញពីសួនសត្វចម្លែកៗដែលជាកម្មសិទ្ធិផ្ទាល់ខ្លួនរបស់បុរសម្នាក់ក្នុងរដ្ឋអូហៃយូនាភាគកណ្តាលសហរដ្ឋអាមេរិក។ សហរដ្ឋអាមេរិក/ប៉ាគីស្ថាន៖ មន្ត្រីជាន់ខ្ពស់សហរដ្ឋអាមេរិករួមទាំងលោកស្រីហ៊ីលឡារី គ្លីនតុន និងនាយកទីភ្នាក់ងារស៊ើបការសម្ងាត់ David Petraeus គ្រោងនឹងទៅទស្សនកិច្ចប្រទេសប៉ាគីស្ថានដើម្បី ជំរុញមេដឹកនាំទីនោះឲ្យតទល់នឹងក្រុមសកម្មប្រយុទ្ធក្នុងតំបន់កុលសម្ព័ន្ធភាគពាយ័ព្យប្រទេស។ <!--AV--> ព័ត៌មាននៅពេលមុននេះ៖ <!--IMAGE-RIGHT--> សហរដ្ឋអាមេរិក៖ ហាងលក់ផលិតផលអេឡិចត្រូនិចនៃក្រុមហ៊ុន Apple បានបិទទ្វារជាច្រើនម៉ោង កាលពីថ្ងៃពុធនៅទូទាំងសហរដ្ឋអាមេរិក ដើម្បីអនុញ្ញាតឲ្យបុគ្គលិករបស់ក្រុមហ៊ុនអាចមើលការផ្សាយនៃពិធីបុណ្យគោរពវិញ្ញាណក្ខ័ណ្ឌសហស្ថាបនិកក្រុមហ៊ុន Apple លោក Steve Jobs ។ ក្រិក៖ ហ្វូងបាតុករប្រឆាំងរដ្ឋាភិបាលក្រិកអំពីវិធានការរឹតត្បិតបានប៉ះទង្គិចជាមួយប៉ូលីសកុបកម្ម កាលពីថ្ងៃពុធនៅក្នុងរដ្ឋធានី អាថែន ចំពេលដែលពលកររាប់ពាន់ម៉ឺននាក់ប្រមូលផ្ដុំគ្នានៅលើផ្លូវដើម្បីធ្វើកូដកម្មទូទៅពីរថ្ងៃ។ អាហ្វហ្គានីស្ថាន៖ ស្រ្ដីអ្នកនយោបាយអាហ្វហ្គានីស្ថានម្នាក់ដែលបានត្រូវបណ្ដេញចេញពីរដ្ឋសភាតាមបទចោទប្រកាន់អំពីការបន្លំសន្លឹកឆ្នោតបានបញ្ឈប់កូដកម្មឥតអាហារ១៨ថ្ងៃ។ ប៉ាគីស្ថាន៖ អគ្គមេបញ្ជាការយោធារបស់ប្រទេសប៉ាគីស្ថានថ្លែងថាសហរដ្ឋអាមេរិកសមនឹងផ្ដោតមកលើកិច្ចការដែលនាំឲ្យមានស្ថិរភាពដល់ប្រទេសនេះ ជាជាងធ្វើការកៀបសង្កត់ឲ្យប្រឈមមុខនឹងជនសកម្មប្រយុទ្ធនៅតំបន់កុលសម្ពន្ធនៃតំបន់ឥសានប្រទេស។ ស៊ីរី៖ ជនជាតិស៊ីរីច្រើនពាន់ម៉ឺននាក់បានប្រមូលផ្ដុំគ្នាដើម្បីគំាទ្ររដ្ឋាភិបាលក្នុងទីក្រុងភាគខាងជើងអាឡេប៉ូដែលនៅទីនោះសកម្មជនស៊ីរីនិយាយថា មនុស្ស យ៉ាងតិច២០នាក់បានស្លាប់ក្នុងការបះបោរក្នុងតំបន់ផ្សេងៗនៃប្រទេស។ ប៉ាឡេស្ទីន៖ ក្រុមប៉ាឡេស្ទីន ហាមាស នឹងផ្កល់រង្វាន់២ពាន់ដុល្លារ ដល់អតីតអ្នកជាប់ឃុំម្នាក់ៗដែលមកដល់តំបន់ ហ្គាសា ក្រោយពីបានត្រូវដោះលែងពីគុក អ៊ីស្រាអែល តាមការដូរដាលឈ្លើយសង្រ្គាម។ កែនយ៉ា៖ យោធាកែនយ៉ានិយាយថាបានសម្លាប់ជនសកម្មប្រយុទ្ធ អាល ហ្សាបាបជាង១២នាក់ ចាប់តំាងពីខ្លួនបានបើកកិច្ចប្រតិបត្ដិការយោធានៅសូម៉ាលីជាច្រើនថ្ងៃមកហើយ។ ម៉ារ៉ុក៖ ប៉ូលីសនិយាយថាមនុស្ស៥នាក់ដែលបានត្រូវចាប់ឃុំ ពាក់ព័ន្ធ និងការលួចចូលក្នុងអាគារប្រវត្ដិសាស្រ្ដ នៅក្នុងរដ្ឋ តិចសាស មានដើមកំណើតជាជនជាតិ ម៉ារ៉ុក។ ឥណ្ឌា៖ រដ្ឋមន្ដ្រីការបរទេសឥណ្ឌានិយាយថាល្បឿននៃការលូតលាស់សេដ្ឋកិច្ច ឥណ្ឌានឹងមានសភាពយឺតយ៉ាវ ខុសពីការរំពឹង ដោយសារតែវិបត្ដិហិរញ្ញវត្ថុសកលនិងអត្រាការប្រាក់ឡើងខ្ពស់មួយចំនួន។ សហរដ្ឋអាមេរិក៖ និយាយថា អ្នកការទូតរបស់ខ្លួនទទួលបន្ទុកអំពីនយោបាយអាមេរិកចំពោះប្រទេសកូរេខាងជើងបានចុះចេញពីដំណែង ក្រោយពីមានការចរចាគ្នាដ៏កម្រមួយនៅសប្ដាហ៍ក្រោយ ជាមួយក្រុមប្រតិភូកូរ៉េខាងជើង ដែលមានគោលដៅនឹងចាប់ផ្ដើមឡើងវិញនូវការចរចាអំពីកម្មវិធីនុយក្លេអ៊ែរកូរ៉េខាងជើង។ តួកគី៖ បានបើកកិច្ចប្រតិបត្ដិការយោធាប្រឆំាងក្រុមបះបោរគួរឌនៅតំបន់ភាគខាងជើងអ៊ីរ៉ាកជាច្រើនម៉ោង ហើយបានសម្លាប់ជនសកម្មប្រយុទ្ធ២៤ នាក់និងធ្វើឲ្យរបួស១៨នាក់ក្នុងការវាយប្រហារ នៅតំបន់អគ្នេយ៍ប្រទេសជិតព្រុំដែនជាមូយប្រទេសអ៊ីរ៉ាក៕ This posting includes an audio/video/photo media file: Download Now |
| បន្លែនិងផ្លែឈើពីកសិដ្ឋានសរីរាង្គទទួលការគាំទ្របណ្តើរៗ Posted: 20 Oct 2011 07:28 AM PDT [កំណត់សម្គាល់អ្នកកែសម្រួល៖ បញ្ហាជាច្រើនកើតចេញពីការប្រើបា្រស់ជីគីមីសម្រាប់ផលិតកម្មកសិកម្ម។ អ្នកជំនាញកសិកម្មលើកទឹកចិត្តដល់កសិករខ្មែរ ឲ្យងាកមករកការដាំដំណាំសរីរាង្គដើម្បីកាត់បន្ថយការប្រើប្រាស់ជីគីមី ដែលបង្កឲ្យមានភាពរិចរិលដល់ស្រែចម្ការ និងបំពុលបរិដ្ឋាន។ ខាងក្រោមនេះ គឺជាបទសម្ភាសរបស់ធីតា វីន នៃវីអូអេសំឡេងសហរដ្ឋអាមេរិក និងលោកសម សុធារិទ្ធ អ្នកគ្រប់គ្រងកសិដ្ឋាននៃដំណាំសរីរាង្គនៅឃុំកោះក្របី ខេត្តកណ្តាលដែលមានខ្លឹមសារដូចតទៅ៖] <!--AV--> ស៖ សូមឲ្យលោកជួយពន្យល់ថាអ្វីទៅជាកសិដ្ឋានសរីរាង្គ? ច៖ កសិដ្ឋានសរីរាង្គគឺគោលដៅអ្វីម៉េច ដើម្បីកាត់បន្ថយគីមី ប្រើជីធម្មជាតិ។ ជីដែលផលិតដោយខ្លួនឯងខ្លះ ជីធម្មជាតិដែលយើងទិញខ្លះ។ ស៖ ហេតុអ្វីបានជាលោក មានគំនិតបង្កើតកសិដ្ឋានសរីរាង្គនេះឡើង? ច៖ ម្ចាស់កសិដ្ឋាននោះកន្លងមក គាត់ដាំបន្លែទូទៅ ដូចជាចេក ល្ហុង។ ដល់ពេលកូនគាត់ដូចថា គាត់បានទៅលេងស្រុកក្រៅមើលឃើញកសិដ្ឋានគេអញ្ចឹងទៅក៏មានគំនិតចង់ដាំបន្លែនៅស្រុកយើង។ កសិដ្ឋាននេះទាំងអស់គឺមានផ្ទៃដី២ហិកតា។ ប៉ុន្តែផ្ទៃក្រឡាដែលយើងដាំសុទ្ធ បានតែមួយហិកតាកន្លះទេ។ ទើបតែចាប់ផ្តើមបានមួយកន្លែងហ្នឹងទេ ប៉ុន្តែគម្រោងរបស់ម្ចាស់កសិដ្ឋានហ្នឹង គាត់ចង់បង្កើតពីរកន្លែងទៀត ប៉ុន្តែជាសមាគម និងមួយកន្លែងទៀតនៅមណ្ឌលគីរី។ ប៉ុន្តែប្រហែលជាគាត់ដាំជាផ្លែឈើ នៅមណ្ឌលគីរី នៅកំពង់ស្ពឺដាំប្រភេទសាឡាត់ដូចខាងនោះអញ្ចឹងដែរ។ ស៖ តើមុនដំបូងបន្លែផ្លែឈើសរីរាង្គនេះ មានការទទួលគាំទ្របែបម៉េចចំពោះអតិជនដែរ? ច៖ បន្លែសរីរាង្គនេះភាគច្រើនអតិថិជនដែលគាំទ្រផ្នែកបរទេសភាគច្រើនអាចប្រហែលដល់៨០ភាគរយ។ ប៉ុន្តែខ្ញុំសង្កេតមើលតែក្នុងទីផ្សារហ្នឹង ភាគច្រើនហ្នឹងគឺគាត់អ្នកមានធនធាន។ ឥឡូវនេះខុសពីមុន វាមានអតិថិជនគាំទ្រច្រើនជាងមុន។ គាត់ចាប់ផ្តើមដំបូងប្រហែលជា៣០ភាគរយទេ ដែលចូលទៅទិញ តែបច្ចុប្បន្ននេះ គាត់មានការគាំទ្រច្រើនជាងមុន មានន័យថាកាលពីមុន ខ្ញុំយកទៅលក់ដប់គីឡូអញ្ចឹង។ លក់នៅសល់ប្រាំគីឡូ ឬបីគីឡូមកវិញ។ ប៉ុន្តែសព្វថ្ងៃនេះ ខ្ញុំយកទៅម្ភៃគីឡូ គឺលក់ឥតគ្រាន់ទេ។ បានន័យថា គាត់គាំទ្របន្លែដែលយើងយកទៅដាំច្រើនជាងមុន។ ស៖ ការដាំបន្លែនេះ តើលោកបាននាំគ្រាប់ពូជពីខាងណាដែរ? ច៖ ភាគច្រើនគឺគាត់យកគ្រាប់ពូជមកពីស្រុកក្រៅ សឹងតែគ្រប់ប្រទេសដែលផលិតគ្រាប់ពូជហ្នឹង ហើយមានក្រុមហ៊ុនវៀតណាមមួយ។ គាត់ទទួលយកមកទុកនៅក្រុមហ៊ុនហ្នឹង។ ខ្ញុំមើលទៅច្រើនកញ្ចប់ មានតាំងពីជប៉ុន កូរ៉េ ម៉ាឡេស៊ី សាំងហ្គាពួរ មានចិនអីនៅក្នុងហ្នឹង។ នៅកសិដ្ឋាននេះ ផ្តោតទៅលើបន្លែប្រភេទបន្លែអ៊ឺរ៉ុប។ ខ្ញុំដាំទាំងអស់។ វាមាន១២មុខ។ វាមានប៉ាតារីយ៉ា រ៉ូម៉ែន រ៉េត ក្លូរ៉ូ អ៊ុកលីរ៉េត អ៊ុកលីការ៉ីន អាយស្បើត ដូចជារ៉ូកែត កាតូត កាធំ ព្យីស្សេរ។ ប្រភេទជី វាមានបីទៀត ជីហ្នឹង វាមានឌៀល ហ៊ាស្លី ប៉ាស៊ីន។ ផ្លែឈើដាំទៅមិនអាចពេញមួយឆ្នាំ តាមរបៀប តាមរដូវ ជាប៉េងប៉ោះ ជាត្រសក់។ ស៖ ហេតុអ្វីបានជាលោកជ្រើសរើសយកបន្លែប្រភេទនេះមកដាំក្នុងនៅកសិដ្ឋាន ហើយដែលលក់នៅក្នុងទីផ្សារនៅក្នុងប្រទេសកម្ពុជា? ច៖ ខ្ញុំជ្រើសរើសយកបន្លែនេះ ទី១សំដៅទៅលើការដាំមិនបាន។ ទី២ សំដៅទៅលើទីផ្សារ។ ខ្ញុំយកទៅមានផ្សារតែមួយទេ ដែលគេហៅថាសួនផ្សារធម្មជាតិនៅផ្លូវ៦៣គឺផ្លូរត្រសក់ផ្អែម។ នៅទល់មុខពេទ្យមេគង្គ ប៉ុន្តែផ្សារហ្នឹងគេបែងចែក គេបំបែក។ គេដើរដាក់តាមហាង ឬក៏តាមអូតែល។ ស៖ សុំឲ្យលោកជួយបញ្ជាក់ថា ក្នុងលក់មួយថ្ងៃ តើការលក់បន្លែសរីរាង្គហ្នឹងអស់ប៉ុន្មានគីឡួក្រាម? អាចចំណូលជាទឹកប្រាក់បានប៉ុន្មាន? ហើយចង់ឲ្យលោកបញ្ជាក់ដែរ តើក្នុងមួយខែ ឬមួយឆ្នាំខាងលោកអាចរកចំណូលពីបន្លែសរីរាង្គបានប៉ុន្មានដែរ បើសិនជាយើងផាត់ថ្លៃកម្មករ ផាត់ថ្លៃចំណាយទាំងអស់? ច៖ គឺបន្លែហ្នឹង ខ្ញុំយកទៅលក់វាបានតម្លែមួយដូល្លារ។ ប្រភេទជីបានតម្លែជាងមួយដូល្លារ។ ក្នុងខែ១០ ខែ១១ ខែ១២ ខែ១ ខែ២ និងខែ៣ ប្រាំមួយខែហ្នឹង គឺយើងអាចលក់បានរហូតដល់ជាង៨០គីឡូ ទៅ១០០គីឡូក្នុងមួយថ្ងៃ។ ប៉ុន្តែចន្លោះពីប្រាំមួយខែហ្នឹងទៅ ធ្លាក់ចុះរហូតបានមួយថ្ងៃបានតែ១០គីឡូក៏មាន។ អញ្ចឹងបើយើងគិតមួយឆ្នាំពេញ គឺវាបានត្រឹមតែរួចខ្លួន។ យើងគិតពីខែ វាអាចមានខែឡើង ខែចុះ។ តាំងពីចាប់ឆ្នាំ២០០៩ រហូតមកដល់សព្វថ្ងៃនេះ វាពីរឆ្នាំ។ តាមខ្ញុំគិតមើលទៅ ការចំណាយ និងចំណូល គឺស្មើនៅឡើយ។ យើងបានមកចំណាយទៅវិញ។ វាមិនខាត ហើយក៏មិនបានចំណេញដែរ។ ការធ្វើកសិកម្មគឺរយៈពេលបីថ្ងៃឡើង បានជាគិតមើលឃើញចំណេញបាន។ អញ្ចឹងឆ្នាំទីបីនឹងគិតថាអាចរកផលចំណេញ។ ប៉ុន្តែមិនដឹងថា វាច្រើនឬក៏តិចទេ។ ស៖ តើបានស្គាល់ពីខាងក្រសួង ឬខាងសមាគមណា ដែលថាកសិដ្ឋានរបស់លោកមិនប្រើជាតិគីមីមែន? ច៖ ខ្ញុំសព្វថ្ងៃ ខ្ញុំឥតទាន់ដឹងខាងណា គេចេញឡាយសេន៍ ព្រោះម្ចាស់គាត់។ គាត់លាក់ទំនាក់ទំនង។ អីញ្ចឹង បើតាមខ្ញុំដឹងខ្លះៗគឺមានពីរដែលចេញឡាយសេន៍ឲ្យហ្នឹងគាត់ គឺខាងសមាគមកសិកម្មសរីរាង្គហ្នឹង។ មួយទៀតគឺអង្កការការ៉ូ ដែលចេញឡាយសេន៍ឲ្យ ហើយបញ្ជាក់ថាគ្មានជាតិគីមី ជាដំណាំសរីរាង្គពិតប្រាកដ ប៉ុន្តែខាងក្រសួងគាត់អត់ទាន់ចេញឲ្យ។ ប៉ុន្តែគាត់មានទំនាក់ទំនងថា ឲ្យក្រសួងហ្នឹងផ្តល់ជាអាញ្ញាបណ្ណការដាំជាបន្លែ ដែលគ្មានជាតិគីមីហ្នឹង។ ស៖ ចង់ឲ្យលោកបញ្ជាក់ថា ការដាំបន្លែសរីរាង្គនេះ តើវាខុសពីការដាំបន្លែគីមីយ៉ាងម៉េចដែរ? ច៖ ការប្រៀបធៀបបន្លែធម្មជាតិនេះនឹងបន្លែគីមីវាខុសគ្នា។ ការប្រើធម្មជាតិគឺយើងប្រើជីកំប៉ុស្តិ៍ ដើម្បីជំនួយដីឲ្យកាន់តែប្រសើរល្អ ហើយដីដែលយើងចាប់ផ្តើមធ្វើហ្នឹង ដែលល្អស្រាប់ ប៉ុន្តែយើងប្រើជីបន្ថែមទៀត គឺយើងប្រើជីកំប៉ុស្តិ៍។ ប្រើជីធម្មជាតិបាញ់ ដើម្បីឲ្យមានលំនឹងធម្មជាតិ។ ស៖ តើការដាំដុះបន្លែសរីរាង្គរបស់លោក អាចផ្គត់ផ្គង់ទីផ្សារបានហើយ ឬនៅ ឬមួយក៏នៅមានការខ្វះខាត? ច៖ សព្វថ្ងៃនេះ មានការខ្វះខាត ដោយសារការមានភ្លៀងច្រើន។ អញ្ចឹង យើងមានការអាក់ខានដោយការដាំ។ បើសិនមានប្រជាពលរដ្ឋគាត់មានបំណង ចង់ដាំបន្លែអ៊ឺរ៉ុបនេះ គាត់អាចនឹងដាំនៅខែហ្នឹង គាត់នឹងអាចរកទីផ្សារបានស្រួល។ ស៖ តើលោកគិតថា គួរតែមានកសិដ្ឋានដាំបន្លែសរីរាង្គហ្នឹងឲ្យបានច្រើន ឬយ៉ាងណាដែរ? ច៖ ខ្ញុំគិតថា បើបានច្រើនកាន់តែល្អ ដើម្បីឲ្យប្រជាពលរដ្ឋយើង គាត់ហូបបន្លែដែលដាំនៅស្រុកយើងដែលគ្មានជាតិគីមី គឺបានច្រើនទូលំទូលាយទៅ ហើយការហូបក៏កាន់តែច្រើនទៅ។ វាធ្វើឲ្យសុខភាពប្រជាជនយើងទាំងអស់គ្នាកាន់តែល្អ។ ស៖ តើកសិដ្ឋានសរីរាង្គមានការប្រកួតប្រជែងបែបណាដែរ នៅលើទីផ្សារ? ច៖ កសិដ្ឋានសរីរាង្គ ប្រកួតប្រជែងទី១គឺគុណភាព។ ទី២គឺប្រកួតប្រជែង។ រឿងតម្លៃពេលដែលយើងធ្វើបាន គេក៏ធ្វើបាន។ ពេលធ្វើបាន វាក៏មានច្រើន អញ្ចឹងអាតម្លៃវាក៏ធ្លាក់ចុះ។ ស៖ តើនៅពេលអនាគត តើលោកគិតថា ទីផ្សារសរីរាង្គហ្នឹងនេះ អាចនឹងមានការរីចម្រើន ឬយ៉ាងណាដែរ? ច៖ ការផ្សព្វផ្សាយទូលំទូលាយទៅប្រជាពលរដ្ឋយើងក៏ដឹងច្រើនអំពីការមានជាតិគីមី និងការគ្មានជាតិគីមីហ្នឹងជាច្រើន។ អញ្ចឹងវាធ្វើឲ្យគាត់ងាកមករកការគ្មានជាតិគីមី ចំពោះសុខភាពរបស់គាត់ដើម្បីអនាគតរបស់គាត់។ អញ្ចឹងលើសតម្លៃតិចតួច គាត់នឹងឈានមករកបន្លែធម្មជាតិភាគច្រើន។អញ្ចឹងកាលណាគាត់ងាកមករកបន្លែធម្មជាតិជារឿយៗ គេគ្រប់គ្នាអញ្ចឹងមក។ អ្នកគ្រប់គ្នាដែលផលិតបន្លែបានកាន់តែច្រើនទៅអាចផ្គត់ផ្គង់បានគ្រប់គ្រាន់។ ស៖ តើបន្លែសរីរាង្គនេះ មានផលប្រយោជន៍អ្វីខ្លះចំពោះសុខភាពរាង្គកាយ អ្នកប្រើប្រាស់? ច៖ ធ្វើឲ្យយើងគ្មានជម្ងឺបៀតបែនដូចជាជំងឺប្លែកៗ។ ស្រុកយើងសព្វថ្ងៃស្អី ក៏គីមីដែរ។ ភាគច្រើនសឹងថា៩០ភាគរយហើយ ដែលមានសារធាតុគីមី។ អញ្ចឹងយើងសង្កេតមើលសុខភាព ប្រជាជនយើងមានជម្ងឺប្លែកៗច្រើនណាស់។ បន្លែឬក៏អ្វីដែលពាក់ព័ន្ធនឹងធម្មជាតិ អញ្ចឹងវាអត់មានប្រើអ្វីដែលពាក់ព័ន្ធនឹងគីមី។ ធម្មជាតិហ្នឹងវាធ្វើឲ្យសុខភាពយើងមាំមួន រឹងមាំល្អ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
