VOA News: ព័ត៌មាន: “មរតកដែលតុលាការខ្មែរក្រហមនឹងបន្សល់ទុកនៅស្រពិចស្រពិលនៅឡើយក្រោយពីចៅក្រមលាឈប់” plus 2 more |
- មរតកដែលតុលាការខ្មែរក្រហមនឹងបន្សល់ទុកនៅស្រពិចស្រពិលនៅឡើយក្រោយពីចៅក្រមលាឈប់
- មន្ត្រីជាន់ខ្ពស់អ.ស.ប.ព្រមានមិនឲ្យមន្ត្រីរដ្ឋាភិបាលជ្រៀតជ្រែកកិច្ចការតុលាការខ្មែរក្រហម
- ព័ត៌មានអន្តរជាតិ៖ ២១ តុលា
| មរតកដែលតុលាការខ្មែរក្រហមនឹងបន្សល់ទុកនៅស្រពិចស្រពិលនៅឡើយក្រោយពីចៅក្រមលាឈប់ Posted: 21 Oct 2011 02:25 PM PDT តុលាការខ្មែរក្រហមដែលគាំទ្រដោយអង្គការសហប្រជាជាតិកំពុងធ្វើការជាបណ្តើរៗឆ្ពោះទៅ ការកាត់ទោសដ៏លំបាកនិងធំបំផុតមួយ។ ប៉ុន្តែការកាត់ទោសនោះបានគ្របដណ្តប់ដោយការដោះស្រាយសំណុំរឿងពីរថែមទៀតក្នុងរយៈពេលប៉ុន្មានខែចុងក្រោយនេះ។ អ្នកសង្កេតការណ៍តុលាការនេះកាន់តែច្រើនឡើងៗនិយាយថា ដំណោះស្រាយដែលតុលាការប្រើក្នុងសំណុំរឿង០០៣និង០០៤កំពុងធ្វើឱ្យខូចកិត្តិនាមតុលាការនេះ បើទោះបីជាតុលាការនេះកំពុងតែរៀបចំកាត់ទោសមេដឹកនាំខ្មែរក្រហមបួននាក់ទៀតចំពោះឧក្រិដ្ឋកម្ម ដែលអាក្រក់ជាងគេបំផុតក្នុងសតវត្សរ៍ទី២០ក៏ដោយ។ <!--IMAGE-RIGHT--> តុលាការខ្មែរក្រហមប្រឈមមុខនឹងការកាត់ទោសដ៏លំបាកជាងគេបំផុតនៅឆ្នាំក្រោយ។ ខណៈពេលដែលចៅក្រមនិងព្រះរាជអាជ្ញានិងបុគ្គលិកខិតខំធ្វើការឆ្ពោះទៅការកាត់ទោសនួន ជា ខៀវ សំផន អៀង សារី និងអៀង ធីរិទ្ធនេះ ពួកគេក៏កំពុងប្រឈមមុខនឹងការទិតៀនកាន់តែច្រើនឡើងៗ។ ក្រុមអ្នកសង្កេតការណ៍និយាយថា ភាពជឿជាក់ជាទូទៅលើតុលាការនេះកំពុងទទួលការប៉ះពាល់។ លោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាបានបញ្ជាក់ថា៖ «តុលាការនេះ ប្រសិនបើយើងចង់វាស់ពីជោគជ័យគឺមានពីរចំណុចដែលតុលាការនេះចង់បំពេញ គឺទីមួយកាត់ទោសអ្នកដែលមានតួនាទីខ្ពស់នៅចំពោះការសម្លាប់រង្គាលនៃរបបខ្មែរក្រហម ហើយទីពីរគឺត្រូវតែបន្សល់នូវប្រព័ន្ធតុលាការមួយដែលជាគម្រូសម្រាប់ប្រព័ន្ធតុលាការនៅក្នុងប្រទេសកម្ពុជា»។ យោងតាមបទសម្ភាសន៍ជាមួយអ្នកសង្កេតការណ៍ទាំងជាតិ និងអន្តរជាតិបានឱ្យដឹងថា តុលាការនេះកំពុងតស៊ូនឹងបញ្ហាពីរគឺការដោះស្រាយសំណុំរឿង០០៣និង០០៤ដែលបង្កជាការព្រួយបារម្ភខ្លាំងជាងគេបំផុត ហើយសំណុំរឿងទាំងពីរនេះនឹងត្រូវដោះស្រាយបន្ទាប់ពីការកាត់ក្តីនៅឆ្នាំក្រោយ។ ប៉ុន្តែទន្ទឹមគ្នានោះដែរតុលាការនេះត្រូវបង្ហាញគម្រូជាទូទៅ។ ក្រុមអ្នកសង្កេតការណ៍តុលាការ ក្រុមការពារជនរងគ្រោះ និងជនរងគ្រោះនិយាយថា ពួកគេចង់ឱ្យសំណុំរឿងទាំងពីរនោះដំណើរការទៅមុខដែលជាការដើរផ្ទុយគ្នាទៅនឹងជំហរជំទាស់ជាសាធារណៈដែលលោកនាយករដ្ឋមន្រ្តីហ៊ុន សែនធ្លាប់សម្តែងឱ្យដឹង។ <!--IMAGE-LEFT--> ទោះបីយ៉ាងណាក៏ដោយ ចៅក្រមស៊ើបអង្កេតលើសំណុំរឿងទាំងពីរនោះហាក់បានបញ្ចេញសញ្ញាឱ្យដឹងថា ពួកគេចង់បញ្ចប់ ឬច្រានចោលសំណុំរឿងនោះឱ្យបានឆាប់ៗ។ លោកចៅក្រម Siegfried Blunk និងលោកចៅក្រមយូ ប៊ុនឡេងនិយាយកាលពីដើមឆ្នាំនេះថា ពួកគេមានការមន្ទិលសង្ស័យយ៉ាងខ្លាំងថា តើជនសង្ស័យប្រាំនាក់ក្នុងករណីទាំងពីរនេះអាចចាត់ទុកថា ជាអ្នកដែលមានការទទួលខុសត្រូវខ្ពស់បំផុត ឬយ៉ាងណានៅឡើយទេ ចំពោះឧក្រិដ្ឋកម្មក្នុងសម័យខ្មែរក្រហម។ ការឱ្យនិយមន័យ ការកំណត់និយមន័យនៃពាក្យ«អ្នកទទួលខុសត្រូវខ្ពស់បំផុត»បានធ្វើឱ្យប៉ះពាល់កិត្តិយសរបស់តុលាការនេះទៅហើយ។ លោក John Ciorciari សាស្រ្តាចារ្យខាងគោលនយោបាយសាធារណៈនៃសាកលវិទ្យាល័យ Michigan បានបញ្ជាក់ថា៖ «ការប្រកែកគ្នាលើសំណុំរឿង០០៣និង០០៤បានធ្វើឱ្យខូចកេរ្តិ៍ឈ្មោះតុលាការនេះ ហើយបានបង្ហាញពីទំនាស់ផ្ទៃក្នុង និងការជ្រៀតជ្រែកផ្នែកនយោបាយ។ វាជាការពិបាកក្នុងការលុបលាងការខូចខាតនេះណាស់។ ប្រសិនបើសំណុំរឿង០០៣និង០០៤ដំណើរការទៅមុខ ក៏វានឹងនាំឱ្យមានការមិនយល់ស្របគ្នា និងការចូលជ្រៀតជ្រែក និងការពន្យារពេលបន្ថែមទៀតដល់ការចាប់ផ្តើមសវនាការដ៏សំខាន់បំផុតគឺសំណុំរឿងលេខ០០២ ដែលជាបន្តបន្ទាប់ នឹងអាចបរាជ័យ ដោយសារជនជាប់ចោទទាំងនោះមានវ័យចំណាស់ និងមានសុខភាពខ្សោយ»។ <!--IMAGE-RIGHT--> ជាទូទៅសាធារណជនចង់ឱ្យតុលាការបញ្ចប់សំណុំរឿងលេខ០០២ឱ្យបានឆាប់។ បំណងនេះបានបង្ហាញរូបរាងយ៉ាងច្បាស់កាលពីដើមខែនេះ នៅពេលដែលសាក្សីសំខាន់ម្នាក់ដែលជាអ្នករស់រានមានជីវិតពីការកាប់សម្លាប់ក្នុងគុកទួលស្លែងគឺលោកវ៉ាន់ ណាតបានស្លាប់ដោយសារជំងឺខូចក្រលៀន។ ស្របពេលជាមួយគ្នានេះដែរ មេដឹកនាំដែលត្រូវយកមកកាត់ទោសក៏ត្រូវពិនិត្យសុខភាពថា តើពួកគេមានសុខភាពល្អគ្រប់គ្រាន់ដែលអាចប្រឈមមុខនឹងការកាត់ទោសឬទេ។ ប្រសិនបើតុលាការមិនអាចកាត់ទោសមេដឹកនាំទាំងបួនបានគឺមានន័យថា ពួកតុលាការបានចំណាយប្រាក់រាប់លានដុល្លារ តែធ្វើការជំនុំជម្រះតែកាំង ហ្កេកអ៊ាវម្នាក់ប៉ុណ្ណោះ។ កាំង ហ្កេកអ៊ាវហៅ ឌុចគឺជាមេគុកទួលស្លែង។ សំណុំរឿងរបស់គាត់មានលក្ខណៈសាមញ្ញ ប៉ុន្តែការកាត់ក្តីរបស់គាត់ដែលចាប់ផ្តើមកាលពីឆ្នាំ២០០៩នៅកំពុងរង់ចាំការសម្រេចចុងក្រោយនៅឡើយ។ ក្រុមអ្នករិះគន់តុលាការជាច្រើនគិតថា បញ្ហាសំខាន់សម្រាប់ការជឿជាក់លើតុលាការនេះគឺស្ថិតលើចៅក្រមស៊ើបអង្កេត។ កាលពីថ្ងៃច័ន្ទ ចៅក្រមស៊ើបអង្កេតអន្តរជាតិគឺលោក Siegfried Blunk បានលាឈប់ពីតំណែងដោយលើកហេតុផលថា មានការចូលជ្រៀតជ្រែកពីខាងរដ្ឋាភិបាលកម្ពុជា។ ការលាឈប់នេះបាននាំឱ្យអ្នកតាមដានសាលាក្តី ដូចជាលោកសាស្រ្តាចារ្យ ចន ហលនៃមហាវិទ្យាល័យច្បាប់នៃសាកលវិទ្យាល័យ Chapman ក្នុងរដ្ឋកាលីហ្វញ៉ា យល់ថា នេះជាឱកាសថ្មីមួយក្នុងការចាប់ផ្តើមការស៊ើបអង្កេតប្រកបដោយការជឿជាក់ឡើងវិញលើសំណុំរឿង០០៣និង០០៤។ «ប្រសិនបើការស៊ើបអង្កេតត្រូវបានធ្វើឡើងដោយចៅក្រមស៊ើបអង្កេតប្រកបដោយតម្លាភាព ស្មោះត្រង់ និងល្អិតល្អន់ វានឹងជួយស្តារកិត្តិយសរបស់សាលាក្តីខ្មែរក្រហម។ បើមិនបានធ្វើដូច្នេះទេ គឺចៅក្រមស៊ើបអង្កេតហាក់ដូចជាអង្គុយនៅស្ងៀម ហើយមិនធ្វើការស៊ើបអង្កេតឱ្យបានពេញលេញ។ អញ្ចឹងខ្ញុំគិតថា មានហេតុផលរឹងមាំដែលនាំឲ្យមានការសង្ស័យលើភាពស្របច្បាប់នៃតុលាការនេះ ហើយក្នុងករណីនេះខ្ញុំគិតថា វាជាការសមស្របសម្រាប់អង្គការសហប្រជាជាតិដកខ្លួនចេញពីសាលាក្តីនេះ»។ ប៉ុន្តែលោកហ៊ុយ វណ្ណៈ មន្ត្រីព័ត៌មានរបស់តុលាការខ្មែរក្រហមបាននិយាយការពារកិច្ចការរបស់តុលាការថា៖ «រហូតមកដល់ពេលនេះគឺតុលាការនេះបានបន្តទៅមុខដោយជោគជ័យ។ យើងឃើញថា សំណុំរឿងលេខ០០១ យើងជិតបញ្ចប់ហើយ។ នៅពេលខាងមុខនឹងប្រកាសសាលក្រមស្ថាពរ ហើយក៏គ្រោងចាប់ផ្តើមនីតិវិធី០០២ដែរដែលថ្មីៗនេះតុលាការបានធ្វើការប្រកាសអំពីការបំបែកនីតិវិធីដើម្បីធ្វើឱ្យដំណើរការនេះបានកាន់តែលឿនដើម្បីប្រយោជន៍យុត្តិធម៌។ ហើយយើងត្រឡប់ទៅមើលអំពីការរីកចម្រើននិងការវិវត្តដែលត្រូវបានស្វាគមន៍ដោយអ្នកឃ្លាំមើលសាលាក្តីភាគច្រើនក៏ដូចជាប្រទេសម្ចាស់ជំនួយ»។ កាលពីខែមេសា ចៅក្រមស៊ើបអង្កេតបានបិទបញ្ចប់ការស៊ើបអង្កេតករណី០០៣យ៉ាងប្រញ៉ាប់ប្រញ៉ាល់ដោយមិនទាំងបានសម្ភាសជនសង្ស័យសំខាន់ៗពីរនាក់គឺមេបញ្ជាការយោធា លោកមាស មុត និងលោកស៊ូ ម៉េត ដែលអ្នកទាំងពីរត្រូវអតីតព្រះរាជអាជ្ញារបស់អង្គការសហប្រជាជាតិនិយាយក្នុងឆ្នាំ២០០៨ថា ស្ថិតក្នុងចំណោមក្រុមថ្នាក់លើក្នុងជួរអ្នកដឹកនាំ។
លោកអាន់ឌ្រូ ខេលី ព្រះរាជអាជ្ញាអន្តរជាតិនាពេលបច្ចុប្បន្ននេះ បានប្តឹងឧទ្ធរណ៍ភ្លាមៗឱ្យចៅក្រមបើកការស៊ើបអង្កេតឡើងវិញ ដោយស្នើឱ្យពួកគេទៅសម្ភាសជនសង្ស័យនិងទៅមើលទីតាំងឧក្រិដ្ឋកម្មសំខាន់ៗ។ លោក Ciorciari ឱ្យដឹងដែរថា ចៅក្រមមិនបានធ្វើការឱ្យដិតដល់ទេ។ «ព័ត៌មានដែលយើងទទួលបានគឺបញ្ជាក់ថា សហចៅក្រមស៊ើបអង្កេតនៃសាលាក្តីខ្មែរក្រហមធ្វើការសម្រេចចិត្តរួចជាមុនលើសំណុំរឿង០០៣និង០០៤ ហើយបានធ្វើការស៊ើបអង្កេតដោយមិនអស់ចិត្តអស់ថ្លើមទេ»។ កាលពីខែមិថុនា អង្គការគម្រោងសង្គមយុត្តិធម៌បើកចំហដែលមានមូលដ្ឋាននៅសហរដ្ឋអាមេរិកបានអំពាវនាវឱ្យតុលាការធ្វើការស៊ើបអង្កេតលើការចោទប្រកាន់ធ្ងន់ធ្ងរថា ចៅក្រមស៊ើបអង្កេតមានចេតនាធ្វើឱ្យរាំងស្ទះការស៊ើបអង្កេត។ លោកម៉ាទីន ណេសឺគី (Martin Nesirky) អ្នកនាំពាក្យរបស់លោកអគ្គលេខាធិការអង្គការសហប្រជាជាតិ បានបញ្ជាក់ពីជំហររបស់អង្គការសហប្រជាជាតិក្នុងការគាំទ្រតុលាការមួយដែលឯករាជ្យ។ លោកក៏បានស្នើសុំទុកពេលឱ្យតុលាការនេះធ្វើការក្នុងស្ថានភាពរួចផុតពីសម្ពាធនានា។ «ចៅក្រមនៅអង្គជំនុំជម្រះក្នុងតុលាការកម្ពុជាត្រូវតែមានលទ្ធភាពធ្វើការដោយមិនមានការជ្រៀតជ្រែកពីខាងក្រៅ ទោះបីជាមកពីរាជរដ្ឋាភិបាលកម្ពុជា អង្គការសហប្រជាជាតិ ប្រទេសម្ចាស់ជំនួយនិងអង្គការសង្គមស៊ីវិល»។ <!--IMAGE-LEFT--> ក្រុមតាមដានកិច្ចការតុលាការបានអំពាវនាវជាថ្មីកាលពីខែមុន ក្រោយពីចៅក្រមស៊ើបអង្កេតធ្វើការសម្រេចចិត្តដែលអាចរារាំងមិនឲ្យជនរងគ្រោះជាច្រើនមានលទ្ធភាពចូលរួមក្នុងសំណុំរឿង០០២។ ក្នុងបទសម្ភាសន៍មួយលោក James Goldston នាយកប្រតិបត្តិនៃអង្គការ OSJI និយាយថា តុលាការនោះមិនឈានដល់កម្រិតស្តង់ដារអន្តរជាតិទេ ជាពិសេសខាងផ្នែកស៊ើបអង្កេត។ «មន្ត្រីយុត្តិធម៌របស់តុលាការគួរតែធ្វើការដូចតុលាការដទៃទៀត ដែលដោះស្រាយឧក្រិដ្ឋកម្មអន្តរជាតិ។ ទាំងនេះជាការចាំបាច់ក្នុងការធ្វើការស៊ើបអង្កេតក្នុងស្ថានភាពដែលនឹងមានប្រសិទ្ធិភាព ហើយមានសមត្ថភាពឈានទៅវែកមុខ និងដាក់ទោសជនទាំងឡាយណាដែលទទួលខុសត្រូវ ហើយនៅឯករាជ្យពីសម្ពាធពីខាងក្រៅ និងបើកចំហឱ្យសាធារណជនបានដឹង»។ បញ្ហាទាក់ទឹននឹងការតាមមើលពីសាធារណជន និងតម្លាភាពបានតាមលងតុលាការនេះតាំងពីមុនពេលតុលាការនេះចាប់ផ្តើមដំណើរការម៉្លេះ។ តាំងពីពេលបង្កើតឡើង ក្រោយពីមានការប្រទាំងប្រទើសគ្នារវាងអង្គការសហប្រជាជាតិ និងកម្ពុជាក្នុងឆ្នាំ២០០៦នោះ តុលាការនេះបានប្រឡាក់ប្រឡូសនឹងការចោទប្រកាន់អំពីអំពើពុករលួយដែលនៅមិនទាន់បានដោះស្រាយឱ្យបានពេញលេញជាសាធារណៈនៅឡើយ។ ឥឡូវការសម្ងាត់ដូចគ្នានេះកំពុងធ្វើឱ្យស្មុគស្មាញដល់ការស៊ើបអង្កេតសំណុំរឿង០០៣និង០០៤។ នេះបើតាមប្រសាសន៍របស់លោកហ្កោលស្តុន។ «គឺមានដូចជាការរារាំងមិនឱ្យជនរងគ្រោះក្នុងឧក្រិដ្ឋកម្មរបស់ពួកខ្មែរក្រហម ហើយដែលអាចជាដើមបណ្តឹងរដ្ឋប្បវេណី មានឱកាសត្រឹមត្រូវចូលរួមក្នុងដំណើរការរបស់តុលាការ។ របៀបនៃការស៊ើបអង្កេតក្នុងសំណុំរឿង០០៣និង០០៤ត្រូវបានធ្វើឡើងផ្ទុយគ្នាខ្លាំងពីព័ត៌មានដ៏សម្បូរបែបដែលតុលាការបានផ្តល់ឱ្យសាធារណជនទាក់ទងនឹងការស៊ើបអង្កេតក្នុងសំណុំរឿង០០១និង០០២»។ លោកហ្កោលស្តុនបានបញ្ជាក់ដែរថា ការដោះស្រាយសំណុំរឿងទាំងពីរនេះមិនបានត្រឹមត្រូវនឹងជះផលអាក្រក់លើសពីចៅក្រមស៊ើបអង្កេតទៅទៀត។ «ផលវិជ្ជមានដែលបានមកពីការកាត់ក្តីមេដឹកនាំកំពូលៗក្នុងសំណុំរឿង០០២ប្រកបដោយជោគជ័យនឹងរលាយបាត់ទៅវិញ ប្រសិនបើការព្រួយបារម្ភទាំងនេះមិនត្រូវបានដោះស្រាយប្រកប ដែលគួរឱ្យទុកចិត្តបានទេ»។ លោកប្រែដ អាដាម នាយកអង្គការ Human Rights Watch នៅតំបន់អាស៊ី និយាយថា ក្រោយពី ចំណាយប្រាក់អស់២០០លានដុល្លារ តុលាការនេះគួរតែអាចពង្រីកទំហំការងាររបស់ខ្លួនឱ្យហួសពីការជំនុំជម្រះមេដឹកនាំទាំងប្រាំនាក់ ដែលកំពុងជាប់ឃុំឃាំងនៅក្នុងតុលាការ។ «អ្នកទាំងប្រាំនាក់នោះត្រូវបានគេចោទ ថាមានជាប់ពាក់ព័ន្ធនឹងបទឧក្រិដ្ឋធ្ងន់ធ្ងរបំផុត ប៉ុន្តែពួកគេទាំងនោះមិនមែនជាអ្នកបាញ់សម្លាប់មនុស្សទេ»។ លោកអាដាមបញ្ជាក់ថា ការសមគំនិតសម្លាប់មនុស្សក្នុងរបបខ្មែរក្រហមចេញពីជម្រៅផ្ទៃក្នុងរបស់ជួរមេដឹកនាំក្រុមខ្មែរក្រហមគឺហួសពីអ្នកធ្វើការសម្រេចចិត្តទៅទៀត។ លោកបន្ថែមថា ការកាត់ទោសសំណុំរឿង០០៣និង០០៤នឹងនាំឱ្យមានការយកមកកាត់ទោសមនុស្សដែលមានទោសធ្ងន់ៗខ្លះដែលទទួលខុសត្រូវការសម្លាប់មនុស្សរាប់ពាន់ និងរាប់ម៉ឺននាក់។ «នៅក្នុងតុលាការដទៃទៀត អ្វីដែលគេធ្វើគឺថា នៅពេលដែលពួកគេទទួលបានភស្តុតាង ពួកគេនឹងបន្តការស៊ើបអង្កេត។ ពួកគេស៊ើបអង្កេត ដោយទៅសាកសួរចុងចោទ ប្រសិនបើគេអាចធ្វើបាន ដោយទៅសាកសួរសាក្សី ពិនិត្យមើលឯកសារ ពិភាក្សាជាមួយអ្នកជំនាញ។ ហើយតាមមើលទៅសម្រាប់សំណុំរឿង០០៣និង០០៤ ពួកគេហាក់មិនបានធ្វើកិច្ចការដូចលើកឡើងនេះទេ»។ លោកនិយាយថា ចៅក្រមស៊ើបអង្កេតមិនបានធ្វើការគ្រប់គ្រាន់ទេ។ «ហេតុអ្វីបានជាពួកគេមិនចុះទៅមូលដ្ឋានឱ្យបានរាល់ថ្ងៃ រាល់សប្តាហ៍ រាល់ខែ ដើម្បីទៅសម្ភាសអ្នកទាំងនោះ ដោយព្យាយាមរកឱ្យឃើញថា មានអ្វីកើតឡើងនៅកន្លែងឧក្រិដ្ឋកម្មទាំងនោះ? នោះគឺជាអ្វីដែលចៅក្រមស៊ើបអង្កេតអាជីពត្រូវធ្វើ។ ដូច្នេះរឿងនេះហាក់ដូចជាមិនធម្មតាសោះ។ វាជាការបំពេញការងារដ៏អន់បំផុតរបស់តុលាការមួយដែលអង្គការសហប្រជាជាតិចូលរួម ដោយហេតុនេះហើយបានជាមានជំនឿយ៉ាងទូលំទូលាយ និងការទទួលយកជាសាកលថា តុលាការនៅប្រទេសកម្ពុជាគឺជាតុលាការមួយដែលអន់ជាងគេបំផុត»។ លោកភីធឺ ម៉ាក្វាយ សាស្រ្តាចារ្យច្បាប់អាមេរិកាំង និងជាអ្នកនិពន្ធសៀវភៅស្តីពីរបបខ្មែរក្រហមនិយាយថា ចៅក្រមស៊ើបអង្កេតបានទោរទន់ទៅតាមសម្ពាធនយោបាយ។ លោកបានព្យាករណ៍ថា សំណុំរឿង០០២គឺជាសំណុំរឿងចុងក្រោយរបស់តុលាការនេះ មុនពេលពួកគេត្រឡប់ទៅស្រុកវិញ។ របៀបដោះស្រាយសំណុំរឿង០០៣និង០០៤ដោយចៅក្រមស៊ើបអង្កេតនេះក៏បានបង្កឲ្យមានចម្ងល់ក្នុងចំណោមអ្នកសង្កេតការណ៍កម្ពុជា ដូចជាលោកហង្ស ឆាយា នាយកប្រតិបត្តិនៃវិទ្យាស្ថានខ្មែរដើម្បីលទ្ធិប្រជាធិបតេយ្យ។ «ចៅក្រមស៊ើបអង្កេតក៏គួរមានការពិចារណាអំពីរឿងហ្នឹងដែរ។ ប្រសិនបើគាត់អសកម្ម មិនព្រមធ្វើការងារហ្នឹងឱ្យបានដិតដល់ ខ្ញុំជឿថា វាក្លាយជាប្រវត្តិសាស្រ្តមួយ ហើយចៅក្រមគឺនឹងពាក់ព័ន្ធនឹងប្រវត្តិសាស្រ្តហើយ។ ហើយខ្ញុំជឿថា នឹងមានការសោកស្តាយទៅអនាគត»។ លោកស្រីពុង ឈីវកេក ស្ថាបនិកអង្គការសិទ្ធិមនុស្សលីកាដូ និយាយថា តុលាការនៅមានឱកាសក្នុងការធ្វើឱ្យប្រសើរឡើងនូវកេរដំណែលរបស់ខ្លួនដោយឱ្យក្រុមរាជអាជ្ញា និងចៅក្រមស៊ើបអង្កេតសហការបន្តសំណុំរឿងក្តីទាំងអស់នេះ។ «អញ្ចឹង បើមិនបានស្រុះស្រួលគ្នា ខ្ញុំជឿថា បងប្អូនប្រហែលជាមានការខកចិត្តជាច្រើន ហើយឈ្មោះខ្ញុំក៏មិនធានាទៀត ព្រោះពីដើមមក ដោយសារយើងឃើញថា ពេលចាប់ផ្តើមមក ឃើញតុលាការនេះធ្វើការល្អ។ អញ្ចឹងទៅយើងទាំងអស់គ្នាសង្ឃឹមថា នឹងបានឃើញយុត្តិធម៌ផង ហើយឃើញការពិតផង។ យើងនឹកឃើញអញ្ចេះទៀតគឺថា តុលាការនេះអាចទៅជាគម្រូមួយ»។ សកម្មភាពរបស់ចៅក្រមស៊ើបអង្កេតក្នុងសំណុំរឿង០០៣និង០០៤បានលើកឡើងជាសំណួរជាបន្តបន្ទាប់អំពីការជ្រៀតជ្រែកខាងនយោបាយពីលោកហ៊ុន សែន និងមន្ត្រីរដ្ឋាភិបាលជាន់ខ្ពស់ ដែលអ្នកខ្លះក៏ជាអតីតកម្មាភិបាលខ្មែរក្រហមដែរ។ លោកជាម យៀប តំណាងរាស្រ្តនៃគណបក្សប្រជាជនកម្ពុជា និយាយថា មេដឹកនាំទាំងបីនាក់របស់គណបក្សប្រជាជនកម្ពុជាគឺលោកនាយករដ្ឋមន្ត្រីហ៊ុន សែន លោកហេង សំរិន ប្រធានសភាជាតិ និងលោកជា ស៊ីម ប្រធានព្រឹទ្ធសភា មិនដែលបញ្ជាឱ្យតុលាការ ឬព្រះរាជអាជ្ញាពន្យារ ឬពន្យឺតដំណើរការកាត់ទោសនេះទេ។ លោកជាម យៀបបានបញ្ជាក់ឡើងវិញពីការព្រួយបារម្ភខ្លះរបស់រដ្ឋាភិបាលដែលថា ការចោទប្រកាន់ជាបន្តទៀតអាចធ្វើឱ្យប្រទេសជាតិមានអស្ថិរភាព។ «កត្តាដ៏សំខាន់គឺថា កុំឱ្យបែកបាក់គ្នាតទៅទៀត គឺកុំឱ្យប្រេះឆាតទៅទៀត។ អ្នកចូលរួចមកហើយយើងសូមឱ្យកាត់ដើម្បីឱ្យរាងចាល ហើយដើម្បីឱ្យព្រលឹងជនជាតិខ្មែរ ដែលបាត់បង់នៅជំនាន់ប៉ុល ពត បាននឹងនរចិត្តខ្លះ។ ហើយកាលណាអ្នកដែលបានដឹង ហើយចូលមកជួយប្រទេសជាតិជាបន្តមកគឺយើងឃើញណាស់ទៅហើយ គឺយើងត្រូវធ្វើយ៉ាងម៉េចទុកជាខ្មែរហ្នឹងតទៅទៀតចុះ ទម្រាំគេងាប់ទៅចុះ។ នេះគឺជាគោលការណ៍រកសន្តិភាព គោលការណ៍ដើម្បីរកសន្តិភាព គោលការណ៍ដើម្បី បំបាត់ភាពក្រីក្រ និងធ្វើម៉េចឲ្យជីវភាពប្រជាជនកម្ពុជាមានការអភិវឌ្ឍ។ នេះជាគោលការណ៍គណបក្សប្រជាជនកម្ពុជា ដែលរាជរដ្ឋាភិបាលកម្ពុជាយកមកអនុវត្តនាពេលបច្ចុប្បន្ននេះ»។ ទោះបីជាយ៉ាងណាក៏ដោយ ក្រុមអ្នករិះគន់និយាយថា សេចក្តីថ្លែងការណ៍ជាសាធារណៈរបស់លោកហ៊ុន សែន នាយករដ្ឋមន្រ្តីកម្ពុជា និងការបដិសេធពីមេដឹកនាំជាន់ខ្ពស់ មិនទៅឆ្លើយបំភ្លឺតាមការស្នើសុំរបស់មន្ត្រីតុលាការបង្ហាញពីការចូលជ្រៀតជ្រែក។ លោក Ciociari នៃសាកលវិទ្យាល័យមីឈីហ្កេន និយាយថា ប្រសិនបើករណី០០៣និង០០៤មិនដំណើរការទៅមុខទេនោះ អ្នកដែលតាមដានមើលតុលាការនេះភាគច្រើននឹងសន្និដ្ឋានបញ្ចប់ថា ករណីទាំងពីរនោះត្រូវបានទាត់ចោលដោយសារតែហេតុផលនយោបាយ ដែលក្នុងនោះ រួមមានការខឹងសម្បារ និងការនឿយណាយពីម្ចាស់ជំនួយ ក៏ដូចជាក្រុមប្រឆាំងនឹងរដ្ឋាភិបាល។ លោកបានបញ្ជាក់បន្ថែមថា៖ «ជម្រើសដ៏ល្អបំផុតរបស់តុលាការនេះគឺបន្តរឿងក្តីនេះដោយម៉ឺងម៉ាត់ ចេញសាលក្រម ដែលអាចទុកចិត្តបាន ឬក៏បង្ហាញហេតុផលផ្លូវច្បាប់ដែលមានឯកសារត្រឹមត្រូវនិងមានហេតុផលច្បាស់លាស់ក្នុងការច្រានករណីនេះចោល។ ប៉ុន្តែតាមមើលទៅប្រហែលជាតុលាការនេះមិនព្រមធ្វើដូច្នេះទេ»។ <!--IMAGE-RIGHT--> ការចោទប្រកាន់អំពីការចូលជ្រៀតជ្រែកខាងផ្នែកនយោបាយក៏បានធ្វើឱ្យខូចដល់តួនាទីរបស់តុលាការដែលនឹងធ្វើជាគម្រូសម្រាប់ប្រព័ន្ធយុត្តិធម៌កម្ពុជាដែលគេដឹងច្បាស់ថា ពុករលួយ និងអសមត្ថភាព។ លោកអ៊ូ វីរៈ នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា និយាយថា តុលាការនេះនៅមិនទាន់ជម្រះបានទាំងស្រុងនូវការចោទប្រកាន់អំពីការប្រព្រឹត្តិអំពើពុករលួយ ដោយរួមទាំងការទទួលសំណូកពីបុគ្គលិក និងការជ្រៀតជ្រែកចូលខាងផ្នែកនយោបាយ។ «ការបន្សល់នូវប្រព័ន្ធតុលាការ ឬមួយក៏តុលាការមួយដែលជាគម្រូបានគឺជាគម្រូសម្រាប់តុលាការក្នុងស្រុក គឺជារឿងមួយដែលខ្ញុំមើលទៅថា តុលាការនេះបានធ្វើរឿងហ្នឹងបានខ្លះ។ ក៏ប៉ុន្តែមិនបានគ្រប់ជ្រុងជ្រោយទេ ព្រោះអីបញ្ហាក្នុងប្រព័ន្ធតុលាការយើង គឺអំពើពុករលួយ បញ្ហាទីពីរគឺការលូកដៃពីនយោបាយ ហើយតុលាការខ្មែរក្រហមនេះក៏អត់បានគេចរួចពីការចោទប្រកាន់អំពីអំពើពុករលួយហើយនឹងការលូកដៃពីរឿងនយោបាយដែរ។ ដូច្នេះការអត់គេចរួចពីបញ្ហាទាំងពីរនេះមិនបានឆ្លុះបញ្ជាំងថា តុលាការនេះជាគម្រូល្អទាំងស្រុងនៅឡើយទេ»។ លោកហ៊ុយ វណ្ណៈ មន្រ្តីព័ត៌មាននៃសាលាក្តីបានឆ្លើយការពារកេរ្តិ៍ឈ្មោះរបស់តុលាការ និងគម្រូដែលគេគិតថា តុលាការនេះនឹងបន្សល់ទុក។ «ខ្ញុំចូលមកខ្លួនឯងផ្ទាល់ ចូលមកដល់តុលាការ ធ្វើការនៅសាលាក្តីខ្មែរក្រហមនេះ គឺខាងក្នុងនេះតែម្តងគឺចៅក្រមគ្រប់គ្នា មន្ត្រីច្បាប់គ្រប់គ្នា គឺបានលះបង់ដើម្បីធ្វើកិច្ចការក្នុងសាលាក្តីមួយនេះដែលរំពឹងថា នឹងផ្តល់មរតកយ៉ាងសំខាន់នៅក្នុងការធ្វើការកែទម្រង់ប្រព័ន្ធច្បាប់ក្នុងប្រទេសកម្ពុជា។ រឿងមរតកសំខាន់ក្នុងសាលាក្តីនេះ យើងនឹងបានមើលឃើញនៅពេលដែលតុលាការនេះកំពុងដំណើរការរហូតដល់ពេលសាលាក្តីនេះបញ្ចប់ផងដែរ។ ប៉ុន្តែអ្វីមួយដែលខ្ញុំចង់បញ្ជាក់ជូនអំពីការផ្លាស់ប្តូរដ៏ធំដោយសារតែមានវត្តមានតុលាការខ្មែរក្រហមនេះគឺការផ្លាស់ប្តូរឥរិយាបទរបស់ប្រជាពលរដ្ឋ។ យើងស្រមៃមើលពីមុន ប្រសិនបើយើងប្រមូលប្រជាពលរដ្ឋទៅតុលាការគឺគ្មាននរណាម្នាក់ចង់ទៅតុលាការទេ។ ក៏ប៉ុន្តែរហូតមកដល់ពេលនេះ យើងឃើញប្រជាពលរដ្ឋជិត១០ម៉ឺននាក់បានធ្វើដំណើរបានដល់សាលាក្តីខ្មែរក្រហម ដោយចាត់ទុកថា តុលាការជាកន្លែងមួយបើកចំហ ដែលផ្តល់ឱកាសក្នុងការស្វែងយល់អំពីនីតិវិធី ដូចជាការប្រព្រឹត្តិទៅរបស់តុលាការ ដែលការវិវត្តន៍ដ៏ធំនេះជាការរួមចំណែកដ៏សំខាន់នៅក្នុងឥរិយាបទសង្គម នៅក្នុងការយល់ឃើញរបស់ប្រជាពលរដ្ឋ ចំពោះវត្តមាននិងដំណើរការរបស់សាលាក្តី»។ ចំណែកឯលោកអាដាមវិញ និយាយថា ក្រៅពីដើរតួជាគម្រូសម្រាប់តុលាការកម្ពុជា តុលាការខ្មែរក្រហមអាចធ្វើជាគម្រូមួយផ្នែកសម្រាប់សង្គមទាំងមូល ដែលជារឿយៗ ជនប្រព្រឹត្តល្មើសតែងតែរួចខ្លួន។ «នៅពេលដែលយើងនិយាយអំពីប្រទេសកម្ពុជានាពេលបច្ចុប្បន្ននេះគឺនៅមាននិទណ្ឌភាពសម្រាប់ក្រុមមេដឹកនាំ នៅមាននិទណ្ឌភាពសម្រាប់មេទាហានធំៗ និងមន្ត្រីនៅក្នុងក្រសួងមហាផ្ទៃ»។ លោកបានលើកអំពីករណីសម្លាប់មនុស្សដែលនៅមិនទាន់ដោះស្រាយនៅឡើយ។ ក្រោយប្រតិបត្តិការរបស់អ៊ុនតាក់ ការវាយប្រហារដោយគ្រាប់បែកលើបាតុករប្រឆាំងរដ្ឋាភិបាលក្នុងឆ្នាំ១៩៩៧ និងរដ្ឋប្រហារដែលកើតមានឡើងនាពេលក្រោយមកក្នុងឆ្នាំនោះ អំពើហិង្សាលើបាតុករក្នុងឆ្នាំ១៩៩៨ និងអំពើហិង្សាដែលបន្តមានក្នុងការចាប់រំលោភយកដីគឺជាឧទាហរណ៍ដែលកើតឡើងដោយមិនមានការដាក់ទោស។ លោកអាដាមបានបញ្ជាក់ថា៖ «ការកាត់ទោសក្រុមខ្មែរក្រហមជាផ្នែកមួយនៃការផ្តល់ចម្លើយដល់បញ្ហានោះ។ ប៉ុន្តែសូម្បីតែតុលាការខ្មែរក្រហមដំណើរការទៅដោយល្អឥតខ្ចោះក៏វានៅមិនទាន់ដោះស្រាយបានអ្វីដែលកំពុងកើតមានឡើងក្នុងប្រទេសកម្ពុជាក្នុងរយៈពេល២០ឆ្នាំចុងក្រោយនេះដែរ»។ ទោះបីជាយ៉ាងណាក៏ដោយ លោកស៊ុយ ម៉ុងលាង អគ្គលេខាធិការនៃក្រុមប្រឹក្សាកំណែទម្រង់ប្រព័ន្ធតុលាការរបស់ទីស្តីការគណៈរដ្ឋមន្រ្តី បានប្រាប់វីអូអេថា ទោះបីជាយ៉ាងណាក៏ដោយ តុលាការខ្មែរក្រហមនឹងជួយដល់តុលាការជាតិដែរ។ លោកមានប្រសាសន៍ថា មេរៀនមួយគឺថា គេត្រូវការថវិកាច្រើនទៀតសម្រាប់តុលាការជាតិដើម្បីជួយឱ្យប្រព័ន្ធតុលាការដំណើរការបាន ហើយបញ្ហាមួយទៀតគឺការសម្របទៅតាមបច្ចេកវិទ្យាព័ត៌មានវិទ្យា។ «ដើម្បីជាកេរដំណែលរបស់តុលាការខ្មែរក្រហម គេមើលទៅឃើញថា តុលាការខ្មែរក្រហមធ្វើទៅបានល្អ។ ដូច្នេះគេយកមកដើម្បីនឹងផ្ទេរបច្ចេកវិទ្យា និងចំណេះដឹងទៅតុលាការធម្មតារបស់យើង»។ ខណៈពេលដែលនៅមិនទាន់មានការយល់ស្របគ្នាថា សំណុំរឿង០០៣និង០០៤មានសារៈសំខាន់យ៉ាងណាដល់កេរដំណែលរបស់តុលាការនោះ វាច្បាស់ណាស់ថា សំណុំរឿង០០២នឹងត្រូវការការយកចិត្តទុកដាក់ឱ្យបានពេញលេញ។ បុរសទាំងបីនាក់ និងស្រ្តីម្នាក់ដែលនឹងត្រូវយកមកកាត់ទោសក្នុងសំណុំរឿង០០២នោះគឺជាមេដឹកនាំខ្មែរក្រហមជាន់ខ្ពស់បំផុតដែលនៅរស់រានមានជីវិត។ របបខ្មែរក្រហមបានបង្កឱ្យស្លាប់បាត់បង់ជីវិតមនុស្សយ៉ាងហោចណាស់១លាន៧សែននាក់។ ជនជាប់សង្ស័យទាំងបួននាក់នេះមានវ័យកាន់តែចាស់ឡើងៗ ហើយតុលាការនេះដំណើរការមកដល់ឆ្នាំទី៥ហើយ៕ This posting includes an audio/video/photo media file: Download Now |
| មន្ត្រីជាន់ខ្ពស់អ.ស.ប.ព្រមានមិនឲ្យមន្ត្រីរដ្ឋាភិបាលជ្រៀតជ្រែកកិច្ចការតុលាការខ្មែរក្រហម Posted: 21 Oct 2011 10:23 AM PDT អ្នកតំណាងច្បាប់ជាន់ខ្ពស់របស់អង្គការសហប្រជាជាតិ បានព្រមានក្រុមមន្ត្រីរដ្ឋាភិបាលកម្ពុជាឱ្យឈប់ធ្វើសេចក្តីថ្លែងការណ៍ជាសាធារណៈ ប្រឆាំងនឹងសំណុំរឿងចំនួនពីររបស់សាលាក្តីខ្មែរក្រហម។ លោកស្រី Patricia O'Brien អគ្គលេខាធិការរងអង្គការសហប្រជាជាតិទទួលបន្ទុកកិច្ចការច្បាប់ បានជួបពិភាក្សាការងារជាមួយលោកឧបនាយករដ្ឋមន្ត្រី សុខ អានកាលពីយប់ព្រហស្បតិ៍ ដើម្បីពិភាក្សាកង្វល់របស់អង្គការសហប្រជាជាតិអំពីការវិវឌ្ឍថ្មីៗនៅសាលាក្តីខ្មែរក្រហម បន្ទាប់ពីការលាឈប់របស់លោក Siegfried Blunk សហចៅក្រមស៊ើបអង្កេតខាងភាគីអង្គការសហប្រជាជាតិកាលពីសប្តាហ៍មុន។ លោក Blunk បាននិយាយថា សេចក្តីថ្លែងការណ៍សាធារណៈជាបន្តបន្ទាប់របស់លោកនាយករដ្ឋមន្ត្រីហ៊ុន សែន លោករដ្ឋមន្ត្រីការបរទេសហោ ណាំហុង និងលោកខៀវ កាញារិទ្ធ រដ្ឋមន្ត្រីក្រសួងព័ត៌មាន បានបង្ហាញពីការប្រឆាំងរបស់រដ្ឋាភិបាលទៅលើសំណុំរឿងលេខ០០៣ និងលេខ០០៤ ដែលបង្កើតឱ្យមានបរិយាកាសមួយដែលលោក Blunk បានទទួលអារម្មណ៍ដឹងថា ជាការលំអៀង។ ការលាឈប់នេះមានការសង្ស័យថា តុលាការស្ថិតនៅក្រោមការគាបសង្កត់នយោបាយ ដើម្បីកុំឱ្យធ្វើការស៊ើបអង្កេតសំណុំរឿងទាំងនេះដោយពេញលេញដែលទាមទារឱ្យមានការចោទប្រកាន់អតីតមេដឹកនាំខ្មែរក្រហមប្រាំនាក់បន្ថែមទៀតដែលក្រុមមន្ត្រីរដ្ឋាភិបាល បានព្រមានថា អាចធ្វើឱ្យប្រទេសមានអស្ថិរភាព។ លោកស្រី Patricia O'Brien បានបញ្ជាក់ក្នុងសេចក្តីថ្លែងការណ៍ថា លោកស្រីបានជំរុញយ៉ាងខ្លាំងឲ្យរាជរដ្ឋាភិបាលកម្ពុជាឈប់ចេញសេចក្តីថ្លែងការណ៍ទាំងឡាយដែលប្រឆាំងនឹងការរីកចម្រើននៃសំណុំរឿងលេខ០០៣ និងលេខ០០៤ ហើយឱ្យឈប់ជ្រៀតជ្រែក តាមវិធីយ៉ាងម៉េចក៏ដោយ ក្នុងដំណើរការវិនិច្ឆ័យ។ លោកស្រីបានគូសបញ្ជាក់នូវកាតព្វកិច្ចរបស់រាជរដ្ឋាភិបាលកម្ពុជា ដើម្បីសហប្រតិបត្តិការយ៉ាងពេញលេញជាមួយនឹងសាលាក្តីខ្មែរក្រហម។ សេចក្តីថ្លែងការណ៍នេះបានបញ្ជាក់ថា លោកស្រីបានសម្តែងកង្វល់ចំពោះការវិវឌ្ឍថ្មីៗនេះនៅសាលាក្តីខ្មែរក្រហម ហើយលោកស្រីបានអះអាងថា អង្គការសហប្រជាជាតិអំពាវនាវយ៉ាងម៉ឹងម៉ាត់ឲ្យគ្រប់ភាគីគោរព និងគាំទ្រសេចក្តីសុចរឹត និងឯករាជ្យភាពនៃដំណើរការវិនិច្ឆ័យរបស់សាលាក្តីខ្មែរក្រហម។ លោកស្រីបាននិយាយសំដៅទៅរកការគាំទ្រយ៉ាងរឹងមាំរបស់លោកបាន់ គីមូន អគ្គលេខាធិការអង្គការសហប្រជាជាតិចំពោះការងាររបស់សាលាក្តីខ្មែរក្រហម។ គណៈរដ្ឋមន្ត្រីកម្ពុជាបានចេញផ្សាយសេចក្តីថ្លែងការណ៍ស្តីពីកិច្ចប្រជុំកាលពីយប់ថ្ងៃព្រហស្បតិ៍ ដោយមិនបាននិយាយអំពីសំណុំរឿងលេខ០០៣ និងលេខ០០៤ ការលាឈប់របស់លោកចៅក្រម Siegfried Blunk ឬការជ្រៀតជ្រែកខាងនយោបាយចូលទៅក្នុងសាលាក្តីខ្មែរក្រហមទេ។ ប៉ុន្តែសេចក្តីថ្លែងការណ៍នេះ បានបញ្ជាក់ថា ភាគីទាំងពីរបានផ្តោតជាសំខាន់លើសំណុំរឿងលេខ០០២ដែលនឹងបើកសវនាការនៅថ្ងៃទី២១ ខែវិច្ឆិកា ហើយភាគីទាំងពីរមានឆន្ទៈចូលរួមជំរុញឱ្យដំណើរការសាលាក្តីខ្មែរក្រហមបន្តទៅមុខយ៉ាងឆាប់រហ័ស និងដោយរលូន។ លោកឯក ថា អ្នកនាំពាក្យប្រចាំទីស្តីការគណៈរដ្ឋមន្ត្រី បានថ្លែងប្រាប់ក្រុមអ្នករាយការណ៍ព័ត៌មាន ក្រោយពីជំនួបរវាងលោកស្រី Patricia O'Brien និងលោកឧបនាយករដ្ឋមន្ត្រីសុខ អាននៅទីស្តីការគណៈរដ្ឋមន្ត្រីយ៉ាងដូច្នេះថា «រាជរដ្ឋាភិបាលកម្ពុជាទាំងមូលមិនបានជ្រៀតជ្រែកនៅក្នុងកិច្ចការរបស់អង្គជំនុំជម្រះវិសាមញនៅក្នុងតុលាការកម្ពុជាដែលកំពុងតែទទួលបន្ទុកក្នុងការកាត់ក្តីមេដឹកនាំកំពូលៗរបស់របបកម្ពុជាប្រជាធិបតេយ្យកន្លងមកនេះទេ។ យើងទុកឱ្យតុលាការនេះធ្វើទៅតាមនីតិវិធីច្បាប់ និងការងាររបស់តុលាការ ស្របតាមកិច្ចព្រមព្រៀងដែលរាជរដ្ឋាភិបាលកម្ពុជា និងអង្គការសហប្រជាជាតិបានចុះហត្ថលេខាជាមួយគ្នានៅក្នុងឆ្នាំ២០០៣កន្លងមកនេះ»។ លោកផៃ ស៊ីផាន អ្នកនាំពាក្យប្រចាំទីស្តីការគណៈរដ្ឋមន្ត្រី បានថ្លែងថា ភាគីទាំងពីររួមគ្នាការពារសាលាក្តីខ្មែរក្រហមឱ្យបានសម្រេចជោគជ័យ ហើយភាគីទាំងពីរមិនបានពិភាក្សាស៊ីជម្រៅនៅក្នុងសំណុំរឿងលេខ០០៣ និងលេខ០០៤ទេ។ លោកផៃ ស៊ីផានបានបញ្ជាក់ថា លោក Laurent Kasper-Anermet នឹងត្រូវជំនួសលោក Siegfried Blunk ដែលបានលាឈប់៕ This posting includes an audio/video/photo media file: Download Now |
| Posted: 20 Oct 2011 08:16 PM PDT ព័ត៌មានចុងក្រោយបំផុត៖ លីប៊ី៖ នៅថ្ងៃសុក្រនេះ ក្រុមមន្ត្រីរដ្ឋាភិបាលបណ្តោះអាសន្នលីប៊ីបានពន្យាពេលផែនការបញ្ចុះសពអតីតមេដឹកនាំម៉ូអាម៉ារ ហ្កាដាហ្វី (Moammar Gadhafi) មួយថ្ងៃក្រោយមកបន្ទាប់ពីគាត់ត្រូវបានសម្លាប់នៅពេលដែលក្រុមយុទ្ធជនប្រឆាំងបានវាយលុកចូលទៅក្នុងទីក្រុងសឺត (Sirte) ដែលជាក្រុងកំណើតរបស់គាត់។ លីប៊ី៖ លោកស្រីរដ្ឋមន្ត្រីការបរទេសសហរដ្ឋអាមេរិក ហ៊ីលឡារី គ្លីនតុន (Hillary Clinton) បានមានប្រសាសន៍ថា ការស្លាប់របស់លោកម៉ូអាម៉ារ ហ្កាដាហ្វី (Moammar Gadhafi) នៃប្រទេសលីប៊ីបានបញ្ចប់ «ផ្នែកដ៏អភ័ព្វខ្លាំង» មួយនៅក្នុងប្រវត្តិសាស្ត្ររបស់ប្រទេសនេះ ក៏ប៉ុន្តែបានកំណត់ «ការចាប់ផ្តើមសម័យថ្មីមួយ» ផងដែរ។ អាស៊ីខាងត្បូង៖ លោកស្រីរដ្ឋមន្ត្រីក្រសួងការបរទេសសហរដ្ឋអាមេរិកហ៊ីលឡារី គ្លីនតុន (Hillary Clinton) បានស្នើប្រទេសប៉ាគីស្ថានឲ្យបដិសេធមិនផ្តល់កន្លែងជ្រកកោនសុខសាន្តដល់ពួកបះបោរនិងស្នើឲ្យលើកទឹកចិត្តពួកតាលីបង់ក្នុងប្រទេសអាហ្វហ្គានីស្ថានចូលធ្វើការចរចាសន្តិភាពក្រោយពីមានការប្រយុទ្ធគ្នាអស់រយៈពេល១០ឆ្នាំមក។ ថៃ៖ នៅថ្ងៃសុក្រនេះ ក្រុមមន្ត្រីថៃបានជំរុញឲ្យអ្នកស្រុករាប់លាននាក់ក្នុងទីក្រុងបាងកកឲ្យដឹកជញ្ជូនទ្រព្យសម្បត្តិរបស់ខ្លួនទៅកាន់កន្លែងមានទីទួលខ្ពស់ ពីព្រោះទឹកជំនន់បានចាប់ផ្តើមលិចផ្នែកខ្លះនៅតាមតំបន់ជាយក្រុងរួចហើយ។ ចិន៖ កុមារីចិនម្នាក់អាយុ២ឆ្នាំដែលត្រូវរថយន្ត២គ្រឿងបុក ហើយដែលពួកអ្នកនៅជិតកន្លែងកើតហេតុមិនអើពើនឹងនាងនៅពេលនាងដួលទៅលើដីក្នុងអាការៈរបួសធ្ងន់ធ្ងរ បានស្លាប់ហើយក្នុងរយៈពេលមួយសប្តាហ៍ក្រោយមក បន្ទាប់ពីឧប្បតិហេតុនេះបានកើតឡើង។ ករណីនេះបានធ្វើឲ្យមានការខឹងសំបារយ៉ាងខ្លាំង និងមានការជជែកដេញដោលគ្នាជាសាធារណៈអំពីសីលធម៌ក្នុងវប្បធម៌របស់ប្រទេសចិន។ <!--AV--> ព័ត៌មាននៅពេលមុននេះ៖ <!--IMAGE-RIGHT--> លីប៊ី៖ ប្រធានាធិបតី បារ៉ាក់ អូបាម៉ា ថ្លែងថាអតីតមេដឹកនាំលីប៊ី មូមារ កាដាហ្វី ដែលស្លាប់បង្ហាញជាភ័ស្ដុតាងជាក់លាក់ថា របបគ្រប់គ្រង៤ទសវត្សរ៍របស់គាត់ បានចូលដល់ទីបញ្ចប់។ លីប៊ី៖ អតីតមេដឹកនាំប្រទេសលីប៊ី មូមារ កាដាហ្វី បានស្លាប់ទៅហើយ ក្នុងការវាយលុកមួយធ្វើឡើងដោយកងកម្លាំងរបស់រដ្ឋាភិបាលបណ្ដោះអាសន្ន នៅក្នុងស្រុកកំណើតរបស់គាត់ គឺទីក្រុងស៊ឺត។ ម៉ូអាម៉ារ កាដាហ្វី បានត្រូវគេស្គាល់ថា ជាអ្នកធ្វើនយោបាយចម្រូងចម្រះ ហើយជាអ្នកហ៊ឺហាដ៏ចម្លែក ក្នុងអំឡុងពេល៤២ឆ្នាំនៃការគ្រប់គ្រងប្រទេសលីប៊ី។ ថៃ៖ នាយករដ្ឋមន្ដ្រីថៃ លោកស្រី យីងឡាក់ ស៊្ហីនណាវ៉ាត់ ព្រមានរាជធានីបាងកកឲ្យប្រុងប្រៀបទប់ទល់នឹងទឹកជំនន់ដែលហូរចូលមកក្នុងរាជធានីក្រោយពីលោកស្រីបានចេញបញ្ជាឲ្យបើកទ្វារទំនប់។ អាហ្វ្រិក៖ ជនភៀសខ្លួនអាហ្វ្រិកជាង១២០០នាក់បានធ្វើដំណើរមកដល់ប្រទេសឆាដ ក្រោយពីបានត្រូវជម្លៀសឲ្យដើរលើផ្លូវមានគ្រោះថ្នាក់ចេញពីតំបន់ភាគខាងត្បូងប្រទេសលីប៊ី។ សូម៉ាលី៖ សាក្សីឃើញផ្ទាល់ភ្នែកនៅសូម៉ាលី និយាយថា ក្រុមអាល ហ្សាបាប ពាក់ពាន់នឹងបណ្ដាញភេរវកម្ម អាល់កៃដាបានវាយដណ្ដើមយកមកវិញនូវ ទីតាំងយោធារបស់ខ្លួន នៅក្នុងមណ្ឌលមួយនៃទីក្រុងមូហ្គាដីហ្សូ ក្រោយពីបានបើកកិច្ចប្រតិបត្ដិការវាយបក ដោយបានសម្លាប់ទាហានជាង១២នាក់នៃកងកម្លាំងការពារសន្ដិភាពរបស់សហភាពអាហ្វ្រិក នៅពេលល្ងាចថ្ងៃព្រហស្បតិ៍។ ម៉ាលី៖ ប្រទេសមូរីតានី និយាយថាយោធារបស់ខ្លួនបានបើកកិច្ចប្រតិបត្ដិការយោធា ដោយប្រើយន្ដហោះទម្លាក់គ្រាប់បែកមកលើទីកន្លែងសង្ស័យជាមូលដ្ឋានរបស់បណ្ដាញភេរវកម្ម អាល កៃ ដានៅតំបន់ខាងលិច ប្រទេស ម៉ាលី។ ប៉ាគីស្ថាន៖ រដ្ឋមន្ដ្រីការបរទេសអាមេរិក ហ៊ីលឡារី គ្លីនតុន បានធ្វើដំណើរមកដល់ ក្រុងអ៊ីស្លាមាបាដ កាលពីយប់ថ្ងៃព្រហស្បតិ៍ ដែលនៅទីនោះគេរំពឹងថាលោកស្រីនឹងថ្លែងពាក្យព្រមានតឹងរឹងប្រាប់ រដ្ឋាភិបាលប៉ាគីស្ថាន ឲ្យបំផ្លាញចោលជំរុំសុខសានរបស់ជនសកម្មប្រយុទ្ធ ហើយដើរតួនាទីធំធេងក្នុងកិច្ចការនាំសន្ដិភាព ដល់ប្រទេសជិតខាងអាហ្វហ្គានិស្ថាន៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
