VOA News: ព័ត៌មាន: “ទឹកជំនន់ ដីបាក់សម្លាប់មនុស្សជាង២០០នាក់នៅកម្ពុជា” plus 5 more |
- ទឹកជំនន់ ដីបាក់សម្លាប់មនុស្សជាង២០០នាក់នៅកម្ពុជា
- ឧក្រិដ្ឋកម្មកើនឡើងពេលមានគ្រោះទឹកជំនន់
- រដ្ឋាភិបាលកម្ពុជាលុបចោលពិធីបុណ្យអុំទូកឆ្នាំនេះ
- តុលាការក្រុងភ្នំពេញតម្កល់ទោសជាប់គុកពីរឆ្នាំដល់មេគណបក្សប្រឆាំង
- ជួបគ្នាវិញបន្ទាប់ពីបែក៣៦ឆ្នាំ
- ព័ត៌មានអន្តរជាតិ៖ ១៣ តុលា
| ទឹកជំនន់ ដីបាក់សម្លាប់មនុស្សជាង២០០នាក់នៅកម្ពុជា Posted: 13 Oct 2011 02:17 PM PDT មន្ត្រីអាជ្ញាធរជាតិគ្រប់គ្រងគ្រោះមហន្តរាយឲ្យដឹងថា មកត្រឹមថ្ងៃ១៣តុលានេះ ទឹកជំនន់ និងការបាក់ដីបានសម្លាប់មនុស្ស២០៧នាក់នៅកម្ពុជា។ មានខេត្តក្រុងចំនួន១៧ត្រូវលិចទឹកជំនន់ ហើយខេត្តកំពង់ធំដែលជាចំណុចកណ្តាលប្រទេសកម្ពុជារងគ្រោះធ្ងន់ធ្ងរជាងគេ។ ទឹកជំនន់លិចស្រែ និងភូមិករនានា ហើយប្រជាជនធ្វើដំណើរទៅណាមកណាដោយជិះទូក។ នៅភូមិ អាទ ស៊ូ នេះ លោកញឹម វណ្ណដា អនុប្រធានអាជ្ញាធរជាតិគ្រប់គ្រងគ្រោះមហន្តរាយ និងឯកអគ្គរាជទូតជប៉ុនបានដឹកនាំការចែកអំណោយ និងថវិកាដល់ជនរងគ្រោះជាង១៨០០គ្រួសារ។ ភូមិនេះយកឈ្មោះតាមបុគ្គលិកជាតិជប៉ុនឈ្មោះAtsuhito Nakata ដែលស្លាប់ក្នុងឆ្នាំ១៩៩៣ ពេលអ៊ុនតាក់រៀបចំការបោះឆ្នោតតាមប្រជាធិបតេយ្យជាលើកដំបូងនៅកម្ពុជា។ មន្ត្រីជប៉ុននិយាយ អំណោយនេះគឺជាកិត្តិយសសម្រាប់ Atsuhito Nakata។ <!--AV--> លោកញឹម វណ្ណដានិយាយថា អំណោយនេះចែកជូនជនរងគ្រោះ១៨០០គ្រួសារ។ «ថ្ងៃនេះ១៨០០គ្រួសារទទួលអំណោយរាជរដ្ឋាភិបាលជប៉ុន។ បើគិតជាលុយស្មើនឹង៣៣០០០០ដុល្លារអាមេរិក»។ អំណោយនេះរួមមានមី៦៩កេស ភួយ មុង គ្រឿងបន្សុតទឹក និងតង់សម្រាប់សង់ជម្រក។អ្នកស្រុកខេត្តកំពង់ធំនិយាយថា គ្រោះទឹកជំនន់ឆ្នាំនេះធ្ងន់ធ្ថរណាស់។ ហេង សុឃាងនិយាយថា «ទឹកហូរឡើងពួយ។ ធ្លាក់អស់ ប៉ើងអស់។ មាន់អីគ្មានសល់ទេ ប៉ើងអស់ ព្រោះវាហូរណាស់ពេកនោះ»។ លោកឌួង ភៀតបន្ថែមថា «ត្រូវការស្បឿងអាហារ។ ដូចថា ជាពិសេសគោ ក្របី... ជម្រកគោ ក្របី ព្រោះវាហាលភ្លៀង»។ អាជ្ញាធរជាតិគ្រប់គ្រងគ្រោះមហន្តរាយឲ្យដឹងថា ទឹកជំនន់បានបង្ខំឲ្យប្រជាជន៣០ម៉ឺនគ្រួសារចាកចោលផ្ទះសម្បែង។ ប្រែសម្រួលដោយ ពិន ស៊ីសុវណ្ណ This posting includes an audio/video/photo media file: Download Now |
| ឧក្រិដ្ឋកម្មកើនឡើងពេលមានគ្រោះទឹកជំនន់ Posted: 13 Oct 2011 01:20 PM PDT បញ្ហាអសន្ដិសុខក្នុងរយៈពេលប៉ុន្មានសប្ដាហ៍ចុងក្រោយបាននាំឲ្យមានកង្វល់មួយបន្ថែមទៀតក្នុងសង្គម ពេលកម្ពុជាកំពុងរងគ្រោះដោយទឹកជំនន់។ ប្រជាពលរដ្ឋ និងមន្ដ្រីសិទ្ធិមនុស្សហាក់ដូចជាយល់ស្របថា បទល្មើសឧក្រិដ្ឋហាក់ដូចជា មានការកក្រើកឡើងគួរឲ្យព្រួយបារម្ភក្នុងទីក្រុងភ្នំពេញ ហើយលក្ខណៈសាហាវទៀតផង។ អំពើឧក្រិដ្ឋទាំងនេះត្រូវបានមន្ដ្រីសមត្ថកិច្ចអះអាងថា អាចជាការឆ្លៀតឱកាសនៃជនពាលក្នុងវិបត្តិគ្រោះធម្មជាតិសព្វថ្ងៃនេះ។ កាលពីល្លាចថ្ងៃច័ន្ទសប្តាហ៍នេះស្រ្តីមួយរូបត្រូវបានជនមិនស្គាល់មុខស្ទាក់ចាប់នៅពេលដែលនាងកំពុងធ្វើដំណើរតាមរថយន្ដលើមហាវិថីសហព័ន្ឋរស្ស៊ីជិតសាកលវិទ្យាល័យភូមិន្ទភ្នំពេញ។ ជនមិនស្គាល់មុខបានចុះពីថយន្ដទំនើបធុនLexus ៥៧០ហើយវាយបំបែកកញ្ចក់រថយន្ដរបស់ស្ដ្រីរងគ្រោះ និងអូសរូបនាងចូលក្នុងរថយន្ដរបស់ខ្លួន។ នេះបើតាមសក្សីដែលបានឃើញហេតុការណ៍ផ្ទាល់ភ្នែកដែលស្នើសុំរក្សាភាពអនាមិក។ ក៏ប៉ុន្ដែលោកឧត្តមសេនីយឯក គៀត ច័ន្ទថារិទ្ឋ អ្នកនាំពាក្យអគ្គស្នងការនគរបាលជាតិបាននិយាយថា លោកមិនទាន់ទទួលព័ត៌មាននេះនៅឡើយ។ «ខ្ញុំអត់បានទទួលរបាយការណ៍ផង។ អត់ដឹងផង»។ ភាពស្ងាត់ស្ងៀមនៃបញ្ហាខាងលើកើតឡើងបន្ទាប់ពីមានឧក្រិដ្ឋកម្មផ្ទួនៗនៅក្នុងទីក្រុង។ កាលពីថ្ងៃសុក្រសប្ដាហ៍មុន ដែលកូនប្រុសលោកឧត្តមសេនីយឯក សូរ ផន អនុរដ្ឋលេខាធិការក្រសួងមហាផ្ទៃ គឺលោក សូរ អាត់ណូ អាយុ៤២ឆ្នាំត្រូវបានជនមិនស្គាល់មុខចាប់ជំរិតក្នុងខណៈដែលលោកបានធ្វើដំណើរតាមរថយន្តទៅគេហដ្ឋានដែលមានទីតាំងនៅសង្កាត់ជ្រោយចង្វារខ័ណ្ឌ ឬស្សីកែវ។ សមត្ថកិច្ចអះអាងថា មានជនសង្ស័យចំនួនបួននាក់ប្រដាប់ដោយអាវុធAK47 និងអាវុធខ្លី។ បន្ទាប់មកជនប្រដាប់អាវុធទាំងនោះបានទូរស័ព្ទមកក្រុមគ្រួសារជនរងគ្រោះដោយទាមទារទឹកប្រាក់ចំនួន១លានដុល្លាជាថ្នូរនឹងការដោះលែង។ រយៈពេលជិតមួយសប្តាហ៍មកហើយដំណឹង និងសុវត្តិភាពជនរងគ្រោះនៅមិនទាន់ដឹងថានឹងទៅជាយ៉ាងណានៅឡើយទេ។ លោកឧត្តមសេនីយឯកសូរ ផន អនុរដ្ឋលេខាធិការក្រសួងមហាផ្ទៃបានប្រាប់វីអូអេសំឡេងសហរដ្ឋអាមេរិកជាភាសាខ្មែរកាលពីថ្ងៃពុធថា លោកមិនមានដំណឹងអំពីកូនប្រុសរបស់លោកទេ។ លោកសូរ ផន មិនបានធ្វើអត្ថាធិប្បាយបន្ថែមទេដោយលោកនិយាយយ៉ាងខ្លីថាសម្ថកិច្ចកំពុងធ្វើការ។ «អត់មានទេ បាទអត់។ ខ្ញុំថាថ្ងៃក្រោយសុំទោសណាអូន ថ្ងៃក្រោយ»។ ស្ត្រីវ័យ២៣ឆ្នាំមួយរូបទៀតត្រូវបានជនមិនស្គាល់មុខបាញ់សម្លាប់កាលពីខែសីហានៅក្នុងខណៈដែលស្រ្តីរូបនោះបានបីកូនប្រុសរបស់ខ្លួនអាយុ២ខែទៅចាក់ថ្នាំការពារនៅមណ្ឌលសុខភាពចំការដូងក្នុងសង្កាត់ដង្កោ ខ័ណ្ឌសង្កោ ក្រុងភ្នំពេញ។ នៅក្នុងខែសីហាដដែលនោះ ស្រ្តីរកស៊ីដូរប្រាក់មួយរូបនៅសង្កាត់ចោមចៅ ជាយទីក្រុងភ្នំពេញត្រូវក្រុមចោរប្លន់បាញ់សម្លាប់យ៉ាងស្រស់ៗ ហើយរូបភាពនោះត្រូវបានផ្សព្វផ្សាយតាមរយៈបណ្ដាញសង្គម Facebook។ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសនិយាយថា ការកម្រើកនៃបទល្មើសទាំងនេះជាការឆ្លៀតឱកាសរបស់ជនឧក្រិដ្ឋក្នុងបរិបទនៃទឹកជំនន់។ «គួបផ្សំនឹងយើងរវល់ការងារដូចជាគ្រោះទឹកជំនន់ គ្រោះធម្មជាតិ អញ្ចឹងពួកជនល្មើសឆ្លៀតឱកាសពេលហ្នឹងទៅ។ ក៏ប៉ុន្តែខ្ញុំគិតថា បើប្រៀបធៀបវាតិចទេ ភាគច្រើនតែករណីចោរឆក់ ចោរលួច និងបង្ករបួសស្នាមអីទេ»។ ប៉ុន្តែទាំងលោក ទីតូ ទាំងអ្នកនាំពាក្យអគ្គស្នងការនគរបាលជាតិឧត្តមសេនីយឯក គៀត ច័ន្ទថារិទ្ឋ សុទ្ធតែបានអះអាងថា បទល្មើសឧក្រិដ្ឋមានការថយចុះក្នុងរយៈពេលប្រាំបួនខែរាប់ពីដើមឆ្នាំនេះ បើធៀបទៅនឹងរយៈពេលដូចគ្នាកាលពីឆ្នាំកន្លងទៅ។ របាយការណ៍របស់កងរាជអាវុធហត្ថបង្ហាញថា ក្នុងរយៈពេល៩ខែដើមឆ្នាំ២០១១មានបទល្មើសកើតឡើងចំនួន១៦ករណីស្មើនឹង៣.១៧៥លើក។ តួលេខនេះបង្ហាញពីការចុះថយនៃបទល្មើសចំនួន១៦៣លើកធៀបនឹងឆ្នាំ២០១០។ ក្នុងនោះបទឧក្រិដ្ឋមានចំនួន៧ករណី ស្មើនឹង៤៧៣លើកដែលបណ្ដាលឲ្យមនុស្ស២១៤នាក់បានស្លាប់ និងរងរបួស២២៦នាក់ ពោលគឺជនរងគ្រោះស្លាប់កើនឡើងចំនួន១៣នាក់ក្នុងបទឧក្រិដ្ឋនេះ។ លោកឧត្តមសេនីយត្រី ទូច ណារុថស្នងការប៉ូលីសក្រុងភ្នំពេញមិនអាចសុំសេចក្តីអត្ថាធិប្បាយបានទេ។ លោកចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ឋិមនុស្សអាដហុកបាននិយាយថា ក្នុងរយៈពេល៦ខែដើមឆ្នាំ បញ្ហាសន្តិសុខសង្គមមានភាពល្អប្រសើរ ហើយបានធ្លាក់ចុះក្នុងរយៈពេល៦ខែចុងឆ្នាំនេះដោយសារមានករណីបាញ់សម្លាប់មនុស្ស និងសកម្មភាពចាប់ជំរិតក៏ប៉ុន្តែ អាជ្ញាធរបានទទួលជោគជ័យច្រើនក្នុងការបង្ក្រាបគ្រឿងញៀន។ «ខាងសង្គមស៊ីវិលយើងមើលឃើញថា ភ្នាក់ងារខាងប៉ូលីសហាក់បីដូចជាមានការណ៍ធ្វេសប្រហែសដោយសារវិធានការណ៍របស់ខ្លួនក្នុងការចាត់វិធានការហ្នឹងអត់ទាន់ពេលវេលា ហើយការទប់ស្កាត់បទល្មើសកុំឲ្យវាកើតបាននោះហាក់បីដូចជានៅមានកម្រិតដែរ»។ ប្រជាពលរដ្ឋមួយរូបរស់នៅក្នុងទីក្រុងភ្នំពេញដែលមិនបញ្ចេញឈ្មោះ បាននិយាយថា អំពើបាញ់សម្លាប់នៅក្នុងទីក្រុងភ្នំពេញវាហាក់បីដូចជារឿងបាញ់សម្លាប់សត្វដោយមិនមានអ្នកណារកខុសត្រូវ។ «ប្រជាជនជាទូទៅគឺមិនដែលមានការសប្បាយចិត្តទេចំពោះការកាប់សម្លាប់ អំពើមនុស្សឃាតបែបនេះនោះ។ មានតែការភ័យខា្លច មានតែការប្រុងប្រយ័ត្នខ្លួនក្នុងការធ្វើការងារអ្វីមួយ»។ ដោយឡែកបើទោះជាលោកអះអាងថា បទល្មើសឧក្រិដ្ឋមានការថយចុះក្នុងរយៈពេលប៉ុន្មានខែមកនេះ លោកឧត្តមសេនីយកៀត ច័ន្ទថារិទ្ឋ ក៏បានទទួលស្គាល់ថា មានកើនឡើងបទល្មើសមជ្ឃឹមដែលរួមមានអំពើហឹង្សាក្នុងគ្រួសារ ចាប់រំលោភសេពសន្ទវៈ និងអំពើចោរកម្ម។ «ដោយសារកម្រិតយល់ដឹងរបស់ប្រជាពលរដ្ឋយើងនៅមានកម្រិតនៅឡើយ អញ្ចឹងគាត់ធ្វើអ្វីៗទៅ ជួនកាលគាត់ធ្វើហើយស្តាយក្រោយក៏មាន។ បញ្ហាមួយទៀតមានចំណុចខ្លះការសេពគប់ក្នុងសង្គមមិនត្រឹមត្រូវក៏ជះឥទ្ឋិពលក្នុងហ្នឹងដែរ»។ ក៏ប៉ុន្តែទោះជាយ៉ាងណាក៏ដោយ ក៏លោកគៀត ច័ន្ទថារិទ្ឋបានបញ្ជាក់ថា គ្រប់ឃាតកម្ម និងបទល្មើសធំៗសម្ថកិច្ចកំពុងស្រាវជ្រាវនៅឡើយ៕ This posting includes an audio/video/photo media file: Download Now |
| រដ្ឋាភិបាលកម្ពុជាលុបចោលពិធីបុណ្យអុំទូកឆ្នាំនេះ Posted: 13 Oct 2011 01:07 PM PDT នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានប្រកាសលុបចោលព្រះរាជពិធីបុណ្យអុំទូកឆ្នាំនេះ ខណៈដែលកម្ពុជាកំពុងប្រឈមនឹងគ្រោះមហន្តរាយទឹកជំនន់ដែលសម្លាប់មនុស្សជាង២០០នាក់។ ព្រះរាជពិធីបុណ្យអុំទូកដែលត្រូវបានធ្វើឡើងតាមទំនៀមទម្លាប់ប្រពៃណីខ្មែរជារៀងរាល់ឆ្នាំនោះត្រូវបានលុបចោលសម្រាប់ឆ្នាំនេះ ដោយសាររដ្ឋាភិបាលត្រូវការថវិកាសម្រាប់ការរៀបចំការប្រារព្ធព្រះរាជពិធីបុណ្យអុំទូកនេះ ទៅជួយជនរងគ្រោះដោយទឹកជំនន់ច្រើនរាប់ម៉ឺននាក់។ លោកនាយករដ្ឋមន្ត្រី ហ៊ុន សែន បានប្រកាសនៅក្នុងការបើកកិច្ចប្រជុំពិសេសគណៈរដ្ឋមន្ត្រីនៅល្ងាចនេះថា លោកសុំលើកពេលប្រារព្ធព្រះរាជាពិធីបុណ្យអុំទូកថ្នាក់ជាតិនៅឆ្នាំនេះទៅធ្វើនៅឆ្នាំក្រោយវិញដោយសារគ្រោះទឹកជំនន់ធ្ងន់ធ្ងរពេក ប៉ុន្តែពិធីបុណ្យផ្សេងៗត្រូវបានប្រារព្ធធ្វើជាធម្មតា។ លោកនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជាកំពុងតែទទួលរងគ្រោះទឹកជំនន់។ កម្លាំងសកម្មត្រូវជួយស្តារការខូចខាត ហើយទូកប្រណាំងភាគច្រើនបំផុតមកពីតំបន់រងគ្រោះដោយទឹកជំនន់ ហើយរដ្ឋាភិបាលត្រូវការចំណាយសម្រាប់ការប្រារព្វពិធី បុណ្យនេះ។ លោកនាយករដ្ឋមន្ត្រី ហ៊ុន សែន បានបន្ថែមថា ទូកប្រណាំងនីមួយៗត្រូវចំណាយយ៉ាងតិចជាង១០លានរៀល ស្មើនឹង២.៥០០ដុល្លារអាមេរិក ហើយប្រជាពលរដ្ឋអាចប្រារព្ធព្រះរាជពិធីបុណ្យអុំទូកនេះនៅតាមវត្តអារាម ឬ តាមស្រុកភូមិ។ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងប្រាប់អ្នករាយការណ៍ព័ត៌មាន ក្រោយពីកិច្ចប្រជុំគណៈរដ្ឋមន្ត្រីពិសេសថា ការប្រារព្ធព្រះរាជពិធីបុណ្យអុំទូកត្រូវបានលុបចោល ប៉ុន្តែការអនុញ្ញាតឱ្យមានការឈប់សម្រាកជាធម្មតា និងការសម្តែងតន្ត្រីតាមទីសាធារណៈសម្រាប់កំសាន្តលេងដូចឆ្នាំមុនៗ។ លោកនាយករដ្ឋមន្ត្រី ហ៊ុន សែន បានថ្លែងថា ការប្រារព្វពិធីបុណ្យអុំទូកនៅទីក្រុងភ្នំពេញ ដែលមានមនុស្សច្រើនរាប់លាននាក់ចូលរួមនោះ គឺជាការខាតបង់ឱកាសមួយសម្រាប់ប្រជាពលរដ្ឋ ព្រោះស្រុកភូមិនីមួយៗចាំបាច់ត្រូវបញ្ជូនទូក និងកម្លាំងអ្នកអុំទូកមកចូលរួមពីធី ដែលត្រូវមានសម្លៀកបំពាក់សមរម្យ និងការចំណាយ។ ជារៀងរាល់ឆ្នាំ មានទូកប្រណាំងជាងមាណ៤០០គ្រឿងមកពីទូទាំងប្រទេសមកចូលរួមនៅក្នុងព្រះរាជពិធីបុណ្យអុំទូកនេះ ដែលត្រូវចំណាយសរុបជាង១ លានដុល្លារអាមេរិក។ លោក ខៀវ កាញារីទ្ធ បានបញ្ជាក់ថា រដ្ឋាភិបាលនឹងយកថវិកាសម្រាប់ចំណាយលើការរៀបចំព្រះរាជពិធីបុណ្យអុំទូកនេះទៅជួយជនរងគ្រោះដោយទឹកជំនន់។ លោក សុន ឆ័យ តំណាងរាស្ត្រគណបក្ស សម រង្សី បានថ្លែងថា ការសម្រេចលុបចោលព្រះរាជពិធីបុណ្យអុំទូកនេះដោយសារតែគ្រោះទឹកជំនន់នេះគឺជាការសម្រេចចិត្តខុសធ្ងន់ធ្ងរណាស់។ «ខ្ញុំថា វាជាប្រពៃណីរបស់ជាតិ ហើយការប្រព្រឹត្តិទៅនៃពិធីបុណ្យរបស់យើង គួរប្រព្រឹត្តិទៅជាធម្មតា ពីព្រោះ វាមិនគ្រាន់តែជាប្រពៃណី វាគឺជាមូលហេតុទាក់ទាញភ្ញៀវទេសចរណ៍ដែលមកធ្វើទស្សនកិច្ចប្រទេសកម្ពុជាផងដែរ។ ការចំណាយធនធានបន្តិចបន្តួចដើម្បីប្រារព្ធពិធីនេះ យើងបានទទួលផលច្រើនទ្វេដងអំពីការមកចូលទស្សនាកម្ពុជានៃភ្ញៀវបរទេសផងដែរ»។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានបង្ហាញថា ទឹកជំនន់នៅកម្ពុជា ដែលបានចាប់ផ្តើមពីខែកញ្ញាមកបានសម្លាប់ប្រជាពលរដ្ឋខ្មែរជាង២០០នាក់ ប្រជាពលរដ្ឋជាង៣២.០០០គ្រួសារគ្មានទីជម្រក ស្រូវសន្ទូងជាង៤៤៥.៥៣១ហិកតា ត្រូវលិចលង់ហើយផ្លូវជាតិ និងផ្លូវក្រាលគ្រួសក្រហមប្រវែងជាង១.០០០គីឡូម៉ែតនៅតាមខេត្តមួយចំនួនត្រូវបានខូចខាត៕ This posting includes an audio/video/photo media file: Download Now |
| តុលាការក្រុងភ្នំពេញតម្កល់ទោសជាប់គុកពីរឆ្នាំដល់មេគណបក្សប្រឆាំង Posted: 13 Oct 2011 12:38 PM PDT សាលាដំបូងរាជធានីភ្នំពេញ នៅថ្ងៃព្រហស្បតិ៍នេះ បានសម្រេចតម្កល់ការផ្តន្ទាទោសមេដឹកនាំគណបក្សប្រឆាំងលោក សម រង្ស៊ី ឲ្យជាប់ពន្ធនាគារចំនួនពីរឆ្នាំ ពីបទបរិហារកេរ្តិ៍លោក ហោ ណាំហុង រដ្ឋមន្ដ្រីការបរទេសខ្មែរ។ ការសម្រេចក្ដីនេះធ្វើឲ្យមេដឹកនាំគណបក្សសម រង្ស៊ី ដែលកំពុងនិរទេសនៅក្រៅប្រទេសទទួលរងការផ្តន្ទាទោជាប់ពន្ធគារសរុបចំនួនប្រាំបួនឆ្នាំ ក្នុងបទចោទប្រកាន់ចំនួនបីករណី។ លោក ហោ ណាំហុង បានប្តឹងប្រឆាំងលោក សម រង្ស៊ី នៅតុលាការកម្ពុជា និងបារាំង បន្ទាប់ពីលោកសម រង្ស៊ី បានអត្ថាធិប្បាយនៅថ្ងៃទី១៧ ខែមេសា ឆ្នាំ២០០៨ នៅសារមន្ទីរជើងឯកថា លោក ហោ ណាំហុង គឺជាអតីតមេគុកបឹងត្របែកនៅក្នុងរបបខ្មែរក្រហម។ កាលពីខែមេសា ឆ្នាំ២០១១ នេះតុលាការក្រុងភ្នំពេញបានកាត់ទោសលោក សម រង្ស៊ីឲ្យជាប់ពន្ធនាគារចំនួនពីរឆ្នាំ។ ដោយឡែកតុលាការកំពូលប្រទេសបារាំងបានសម្រេចឲ្យលោក សម រង្ស៊ី ឈ្នះក្ដីលោកប្រមុខការទូតខ្មែរកាលពីដើមឆ្នាំ ២០១១ក្នុងសំណុំរឿងដូចគ្នានេះ ដែលធ្វើឲ្យលោក សម រង្ស៊ី ប្ដឹងឲ្យសាលាដំបូងរាជធានីភ្នំពេញកាត់ក្ដីលើករណីរបស់លោកឡើងវិញ។ លោក ជួង ជូងី មេធាវីការពារក្តីរបស់លោក សម រង្ស៊ី បានថ្លែងថា ចៅក្រមសាលារាជធានីភ្នំពេញបានតម្កល់សេចក្ដីសម្រេចប្រកបដោយអយុត្តិធម៌ ដោយមិនពិចារណាលើសេចក្ដីសំអាងរបស់លោកក្នុងសវនាការ និងមិនពិចារណាលើគោលការណ៍សកលនៃការសម្រេចលើសំណុំក្ដីតែមួយ។ «ការដែលតុលាការក្រុងរក្សាការសម្រេចដូចមុនដដែលអត់ត្រឹមត្រូវទេ គឺបានន័យថា គាត់មិនបានពិចារណាទៅលើសាលដីកាតុលាការកំពូលប្រទេសបារាំង។ បើសិនណាតុលាការប្រទេសបារាំងកាត់ចប់សព្វគ្រប់អស់ហើយគោលការណ៍សកលមិនអាចតុលាការផ្សេងទៀតយកទៅកាត់ឡើងវិញទេ»។ លោក កា សាវុធ មេធាវីការពារក្តីរបស់លោក ហោ ណាំហុង ចាត់ទុកថា ការសម្រេចក្ដីនេះជាការសម្រេចត្រឹមត្រូវ។ «ខ្ញុំពេញចិត្តពីព្រោះគាត់អនុវត្តត្រឹមត្រូវតាមច្បាប់»។ លោកមេធាវី កា សាវុធ ធ្លាប់ពន្យល់ថា ច្បាប់មិនតម្រូវឲ្យតុលាការពិចារណាទៅលើសាលក្រមប្រទេសបារាំងទេ ខណៈដែលលោកសម រង្ស៊ី ដែលជាជនត្រូវចោទអវត្តមាននៅពេលសវនាការ ។ លោកមេធាវី ជួង ជូងី បានបញ្ជាក់ថា លោកនឹងប្ដឹងឧទ្ធរណ៍ប្រឆាំងនឹងសាលក្រមរបស់សាលាដំបូងរាជធានីភ្នំពេញនេះ៕ This posting includes an audio/video/photo media file: Download Now |
| ជួបគ្នាវិញបន្ទាប់ពីបែក៣៦ឆ្នាំ Posted: 13 Oct 2011 07:54 AM PDT ក្រុមគ្រួសារអនិកជនខ្មែរកាដាណាមួយ បានជួបជុំគ្នាវិញបន្ទាប់ពីបានបែកគ្នាអស់រយៈពេលជាង៣០ឆ្នាំ ចាប់តាំងពីក្រុមខ្មែរក្រហមឡើងកាន់អំណាចមក។ ការជួបជុំក្រុមគ្រួសារឡើងវិញនេះ ហាក់ដូចជាសុបិនក្លាយជាការណ៍ពិតសម្រាប់ពួកគេ។ មិនដែលឡើយ ដែលអ្នកស្រី ឈា វ៉ាត ធ្លាប់គិតថា អ្នកស្រីនឹងមានឱកាសបែបនេះម្តងទៀតក្នុងជីវិតរបស់អ្នកស្រី។ អ្នកស្រីទើបនឹងបានជួបប្តីជាទីស្រឡាញ់របស់អ្នកស្រីវិញ បន្ទាប់ពីបែកគ្នាតាំងពីឆ្នាំ១៩៧៥ ក្នុងរបបខ្មែរក្រហមមកម៉្លេះ។ ជាអនិកជនខ្មែរមកពីប្រទេសកាណាដា អ្នកស្រី ឈា វ៉ាតបានគិតថា ប្តីរបស់អ្នកស្រី គឺលោក ពៅ ណាំ បានស្លាប់បាត់ទៅហើយ ក្រោយពីក្រុមខ្មែរក្រហមបាននាំខ្លួនគាត់យកទៅបាត់ កាលពី៣៦ឆ្នាំមុននោះ។ «ពីមុន ខ្ញុំអត់ស្រម៉ៃទេ ទើបនឹងមកជួបប្រទះនេះបណ្តោយ ព្រោះអីនឹកឃើញថា ខ្មែរក្រហមយកទៅ គេមិនដែលទុកជីវិតយើងទេ»។ <!--AV--> លោក ពៅ ណាំធ្វើការជាគិញក្នុងរបបលន់ នល់។ លោកមានកូនប្រុសស្រីចំនួន៧នាក់ ជាមួយលោកស្រី ឈា វ៉ាត។ «ដូចដែលខ្ញុំរស់នៅជាមួយគាត់ពីសង្គមចាស់អញ្ចឹងដែរ ខ្ញុំនៅតែគិតអញ្ចឹងដដែល»។ លោកស្រី ឈា វ៉ាត និងកូនទាំង៧នាក់បានភៀសខ្លួនពីប្រទេសកម្ពុជាក្នុងឆ្នាំ១៩៧៥ ហើយបានទៅរស់នៅក្នុងប្រទេសកាណាដានៅដើមទសវត្ស១៩៨០។ ទើបតែប៉ុន្មានខែចុងក្រោយនេះ លោកស្រីនិងកូនៗក៏បានសម្រេចចិត្តតាមស្វែងរកលោក ពៅ ណាំ បន្ទាប់ពីជឿគ្រូទាយប្រាប់ថា ប្តីនិងឪពុករបស់ពួកគេនៅមានជីវិតនៅឡើយ។ លោក ពៅ ភារុណគឺជាកូនប្រុសម្នាក់ក្នុងចំណោមកូនប្រុស៥នាក់ ដែលបានព្យាយាមតាមស្វែងរកឪពុករបស់លោកក្នុងប្រទេសកម្ពុជាចាប់តាំងពីខែមីនា ឆ្នាំមុនមកម៉្លេះ។ ឪពុក និងកូនបានជួបគ្នាវិញដោយចៃដន្យនៅក្នុងផ្សារមួយក្នុងខេត្តបន្ទាយមានជ័យជាប់ព្រំដែនខ្មែរ ថៃ។ «ពេលខ្លះ នៅពេលយប់ ដែលខ្ញុំងើបឡើង ខ្ញុំចេះតែគិតថាតើរឿងនេះពិតឬមិនពិត ដូចជារឿងយល់សប្តិ។ ប៉ុន្តែវាជារឿងពិតដែលខ្ញុំបានជួបឪពុកម្តងទៀត ព្រោះខ្ញុំដឹងថា ពេលខ្ញុំទៅកាណាដា បួនប្រាំឆ្នាំមុនដំបូង ពេលដែលខ្ញុំនឹកឃើញឪពុកខ្ញុំ ពេលយប់ខ្ញុំតែងស្រក់ទឹកភ្នែក»។ លោក ពៅ ណាំ ត្រូវបានក្រុមខ្មែរក្រហមនាំយកទៅវាយសម្លាប់ចោលក្នុងរណ្តៅចំនួនពីរលើក ប៉ុន្តែជាភ័ព្វសំណាងដ៏កម្រមួយ លោកនៅតែមានជីវិត និងខំប្រឹងរស់តទៅទៀត។ ក្រោយរបបខ្មែរក្រហម លោកបានព្យាយាមស្វែងរកប្រពន្ធនិងកូនៗរបស់លោកវិញ ប៉ុន្តែបានជួបត្រឹមតែក្តីអស់សង្ឃឹម ប៉ុណ្ណោះ ដោយសារលោកបានគិតថា ប្រពន្ធនិងកូនៗជាទីស្រឡាញ់របស់លោក ប្រហែលជាបានស្លាប់បាត់អស់ទៅហើយ។ លោក ពៅ សម្បូរ គឺជាកូនប្រុសពៅក្នុងគ្រួសារដែលបានបែកពីឪពុកតាំងពីអាយុបាន៥ឆ្នាំ។ «អ្វីដែលខ្ញុំប៉ងតាំងពីតូចមកគឺថា នៅពេលនោះ ខ្ញុំស្រក់ទឹកភ្នែក។ ពេលខ្ញុំឱបគាត់ ខ្ញុំស្រក់ភ្នែក។ ខ្ញុំយំជាមួយគាត់ ពីព្រោះខ្ញុំតាំងពីដើមមក ខ្ញុំមិនដែលបានស្គាល់ឪពុក ទើបតែលើកទី១ ដែលខ្ញុំដឹងក្តី ហើយចាំ៤១ឆ្នាំហ្នឹង»។ លោកស្រី ឈា វ៉ាត បានរក្សាទុកជាប់នឹងខ្លួនជានិច្ចនូវរូបថតមួយសន្លឹករបស់ប្តីអ្នកស្រី និងព្រះពុទ្ធរូបមួយអង្គ ដែលប្តីរបស់លោកស្រីបានបន្សល់ទុកឲ្យ មុនពេលក្រុមខ្មែរក្រហមបានចាប់ខ្លួនគាត់យកទៅ។ លោកស្រីជឿថា គឺរបស់ទាំងពីរនេះហើយដែលបានជួយឲ្យអ្នកស្រីជួបជុំជាមួយប្តីដ៏ជាទីស្រឡាញ់របស់អ្នកស្រីវិញនោះ។ «ខ្ញុំនឹកឃើញថា គាត់ស្រឡាញ់ព្រះអង្គណាស់។ ខ្ញុំថែរក្សាមករហូត ដើម្បីទុកជាអនុស្សាវរីយ៍។ដល់ពេលនេះ ខ្ញុំរកគាត់ឃើញ ខ្ញុំត្រូវជូនគាត់វិញ របស់គាត់»។ ថ្វីត្បិតតែការជួបជុំក្រុមគ្រួសារជាថ្មីឡើងវិញនេះ ហាក់រាងជ្រុលពេលបន្តិចទៅហើយក៏ដោយ ក៏សម្រាប់លោកស្រី ឈា វ៉ាត វាហាក់ដូចជាសុបិន ដែលក្លាយជាការណ៍ពិតដូច្នោះដែរ ពោលគឺសុបិនចង់នៅក្បែរស្វាមីជាទីស្រឡាញ់របស់លោកស្រីម្តងទៀតដូចគ្រាមុន៕ This posting includes an audio/video/photo media file: Download Now |
| Posted: 12 Oct 2011 08:46 PM PDT ព័ត៌មានចុងក្រោយបំផុត៖ អាស៊ី៖ អាជ្ញាធរនៅប្រទេសវៀតណាមរាយការណ៍ថា មានមនុស្ស៩នាក់ទៀតបានស្លាប់នៅក្នុងទឹកជំនន់ដែលកើតមាននៅទូទាំងតំបន់ជលសីមាទន្លេមេគង្គ។ ទឹកជំនន់នេះធ្វើឲ្យមនុស្សស្លាប់សរុបនៅក្នុងប្រទេសនេះមានចំនួន៤៣នាក់ ដែលភាគច្រើនជាកុមារ។ សហរដ្ឋអាមេរិក/អារ៉ាប៊ីសាអូឌីត/អ៊ីរ៉ង់៖ លោកប្រធានាធីបតីសហរដ្ឋអាមេរិកបារ៉ាក់ អូបាម៉ា និងព្រះមហាក្សត្រប្រទេសអារ៉ាប៊ីសាអូឌីតអាប់ឌូឡាហ៍ (Abdullah) ប្ដេជ្ញាចិត្ដបន្តនូវការឆ្លើយតបរបស់អន្ដរជាតិយ៉ាងខ្លាំងនិងឯកភាពមួយចំពោះគម្រោងការណ៍សម្ងាត់របស់អង្គភាពរដ្ឋាភិបាលអ៊ីរ៉ង់ ដែលចង់ធ្វើឃាតឯកអគ្គរដ្ឋទូតនៃប្រទេសអារ៉ាប៊ីសាអូឌីតប្រចាំសហរដ្ឋអាមេរិក។ លីប៊ី៖ អង្គការសិទ្ធិមនុស្សមួយបានជំរុញឲ្យអាជ្ញាធរបណ្ដោះអាសន្ន បញ្ចប់ការឃុំឃាំងនិងការរំលោភបំពានជាទូទៅតាមអំពើចិត្ដចំពោះអ្នកជាប់ឃុំ ដោយនិយាយថា ករណីនេះមានគ្រោះថ្នាក់ដូចទៅនឹងទំរង់នៃការគ្រប់គ្រងរបស់អតីតមេដឹកនាំម៉ូអាម៉ារ ហ្កាដាហ្វី។ ប៉ាគីស្ថាន៖ ក្រុមមន្ដ្រីស៊ើបការណ៍សម្ងាត់ប៉ាគីស្ថាននិយាយថា ការទម្លាក់គ្រាប់បែករបស់យន្ដហោះដែលគេសង្ស័យថាជាយន្ដហោះគ្មានអ្នកបើកបររបស់សហរដ្ឋអាមេរិក បានសម្លាប់ជនសកម្មប្រយុទ្ធយ៉ាងតិច ៣ នាក់នៅក្នុងតំបន់កុលសម្ព័ន្ធ Waziristan នៅភាគខាងជើងប្រទេស។ ស៊ីរី៖ ក្រុមសកម្មជនសិទ្ធិមនុស្សនៃប្រទេសស៊ីរីនិយាយថា ការប្រយុទ្ធគ្នារវាងកងកម្លាំងសន្ដិសុខរបស់រដ្ឋាភិបាលនិងជនប្រដាប់អាវុធ ដែលគេជឿថាជាជនរត់ចោលជួរកងទ័ពបានសម្លាប់មនុស្ស ៣នាក់នៅជិតព្រំដែនជាមួយប្រទេសទួគី។ កូរ៉េខាងត្បូង/សហរដ្ឋអាមេរិក៖ ក្រុមមេដឹកនាំកូរ៉េខាងត្បូងសរសើរដល់ការអនុម័តរបស់សភាជាតិសហរដ្ឋអាមេរិកលើកិច្ចព្រមព្រៀងពាណិជ្ជកម្មសេរីទ្វេភាគី និងអំពាវនាវឲ្យអង្គនីតិបញ្ញត្ដិរបស់ខ្លួនផ្តល់សច្ចានុម័តឲ្យបានលឿនលើកិច្ចព្រមព្រៀងនេះ។ ចិន៖ ពាណិជ្ជកម្មដែលលើសចំនួនពាក់ព័ន្ធបញ្ហានយោបាយរបស់ប្រទេសចិនបានធ្លាក់ចុះនៅខែកញ្ញាចូលដល់ខែទីពីរជាប់ៗគ្នា ដែលបង្ហាញឲ្យឃើញពីភាពចុះខ្សោយនៃសេដ្ឋកិច្ចសាកលដែលមានជាបន្ដ។ ជប៉ុន៖ គេបានរកឃើញភាពគំរាមកំហែងវិទ្យុសកម្មថ្មីទៀតនៅទីក្រុងតូក្យូ និងទីក្រុងក្បែរខាងយូកូហាម៉ា ដោយស្នើថាវិទ្យុសកម្មចេញពីរោងចក្រនុយក្លេអ៊ែរ Fukushima ដែលខូចខាតនៅតែចោទជាបញ្ហានៅទូទាំងប្រទេសជប៉ុននៅឡើយ។ លីបេរីយ៉ា៖ នៅថ្ងៃព្រហស្បតិ៍នេះ គេរំពឹងថាក្រុមមន្ដ្រីប្រទេសលីប៊ីរីយ៉ានឹងប្រកាសលទ្ធផលដំបូងៗនៃការបោះឆ្នោតជ្រើសរើសប្រធានាធិបតីដែលមានការប្រកួតប្រជែងយ៉ាងក្តៅគគុក។ សហរដ្ឋអាមេរិក៖ បុរសប្រដាប់អាវុធម្នាក់បានសម្លាប់មនុស្ស៨នាក់ និងធ្វើឲ្យមនុស្សម្នាក់រងរបួសជាទម្ងន់នៅក្នុងការបាញ់ប្រហារជាបន្ដបន្ទាប់នៅក្នុងហាងកាត់សក់និងអ៊ុតសក់មួយនៅក្នុងរដ្ឋកាលីហ្វ័រញ៉ាភាគខាងលិចសហរដ្ឋអាមេរិក។ ប៊ូតង់៖ នាថ្ងៃព្រហស្បតិ៍នេះ ព្រះមហាក្សត្រ Jigme Khesar Namgyel Wangchuck ដែលមានព្រះជនក្មេងជាងគេនៃព្រះរាជាណាចក្រ Bhutan ដ៏តូចមួយស្ថិតនៅតំបន់ភ្នំហេមពាន្ដ បានរៀបអាពាហ៍ពិពាហ៍ជាមួយនាង Jetsun Pema ដែលជារាស្ដ្រសាមញ្ញ អាយុ២១ឆ្នាំ នៅក្នុងពិធីមួយតាមជំនឿព្រះពុទ្ធសាសនានៅវត្ដមួយក្នុងរាជធានី Punakha។ ព្រះមហាក្សត្របានសិក្សានៅបស្ចិមប្រទេស។ សហរដ្ឋអាមេរិក/កូរ៉េខាងត្បូង៖ នាថ្ងៃព្រហស្បតិ៍នេះ លោកប្រធានាធិបតីប្រទេសកូរ៉េខាងត្បូង លីម្យុងបាក់ ធ្វើទស្សនកិច្ចនៅសេតវិមានសហរដ្ឋអាមេរិក ដែលជាទស្សនកិច្ចឆ្លើយតបទៅនឹងការអនុម័តរបស់សហរដ្ឋអាមេរិកលើកិច្ចព្រមព្រៀងពាណិជ្ជកម្មសេរី ដែលគេរំពឹងថានឹងនាំយកប្រាក់រាប់ពាន់លានដុល្លារទៅឲ្យប្រទេសទាំងពីរ។ <!--AV--> ព័ត៌មាននៅពេលមុននេះ៖ <!--IMAGE-RIGHT--> ថៃ៖ អ្នកស្រុកភូមិ ក្នុងរាជធានីបាងកកប្រទេសថៃ បានប្រមូលចេញនូវទំនិញម្ហូបអាហារចេញពីទីផ្សារលក់ដូរនៅពេលដែលទឹកជំនន់គំរាមនឹងធ្វើឲ្យលេចដល់ទីកន្លែងនោះក្នុងប៉ុន្មានថ្ងៃខាងមុខនេះ។ ឥណ្ឌានិងវៀតណាម៖ បានប្រកាសអំពីផែនការរុករកប្រេងនិងឧស្ម័ននៅតំបន់សមុទ្រចិនខាងត្បូង។ ប្រទេសទាំងពីរបានចុះហត្ថលេខាលើកិច្ចព្រមព្រៀងមួយកាលពីថ្ងៃពុធ ក្នុងអំឡុងទស្សនកិច្ចរបស់ប្រធានាធិបតី ទ្រៀង តាន់ សាង នៅក្នុងរដ្ឋធានី នូ ដែលី។ ចិនបានទិតៀនមកលើការចរចា អំពីការផ្សងព្រេងរុករកប្រេង និង ឧស្ម័ន នៅក្នុងសមុទ្រចិនខាងត្បូង ជាពិសេស ជិតជួរកោះដែលចិនទាមទារថា ជាកម្មសិទ្ធិរបស់ខ្លួន។ ចិននិងរុស្ស៊ី៖ នាយករដ្ឋមន្ដ្រីរុស្ស៊ីវ៉្លាឌីមៀរ ពូទីន ថ្លែងថា រដ្ឋាភិបាលម៉ូស្គូនិងប៉េកាំងខិតជិតមកដល់ការដោះស្រាយជម្លោះយូរអង្វែងអំពីតម្លៃឧស្ម័នធម្មជាតិ ដែលនឹងត្រូវបញ្ជូនលក់ទៅឲ្យប្រទេសចិន ដែលមានសេដ្ឋកិច្ចស្រែកឃ្លានថាមពល។ ភូមា៖ គណបក្សប្រឆាំងធំមួយនៃប្រទេសភូមា និយាយថារដ្ឋាភិបាលបានដោះលែងសកម្មជន អ្នកទោសជាប់គុក ១៨៣ នាក់ ឲ្យមានសេរីភាព ដែលជាកាយវិកាបង្ហាញការកែទម្រង់នយោបាយ កាលពីពេលថ្មីៗនេះ តែ ក្រុមការពារសិទ្ធិមនុស្ស ទិតៀនថាវិធានការនោះនៅពុំទាន់គ្រាប់គ្រាន់ទេ។ អ៊ីរ៉ង់៖ រដ្ឋមន្ដ្រីការបរទេសអាមេរិក ហ៊ីឡារី គ្លីនតុន ថា ការប៉ុនប៉ងធ្វើឃាតមូយគាំទ្រដោយរដ្ឋាភិបាលអ៊ីរ៉ងមកលើរូបឯកអគ្គរដ្ឋទូតអារ៉ាប៊ី សាអ៊ូឌីតប្រចាំ ជាការបង្ករឿង ដ៏គ្រោះថ្នាក់បំផុត ដោយសារអ៊ីរ៉ង់គាំទ្រ ភេរវកម្ម។ ក្រុងតេហេរ៉ងបដិសេធថាមិនបានពាក់ព័ន្ទនឹងរឿងនោះទេ។ នីហ្សេរីយ៉ា៖ ជនជាតិនីហ្សេរីយ៉ាម្នាក់ បានត្រូវចោទប្រកាន់ពីបទព្យាយាមបំផ្ទុះយន្ដហោះពាណិជ្ជកម្មអាមេរិកាំងមូយគ្រឿង ដោយប្រើគ្រាប់បែកញាត់ចូលក្នុងខោទ្រនាប់ហើយបានសារភាពកំហុសរបស់ខ្លួនទៅលើការចោទប្រកាន់ទាំងអស់។ អាហ្វហ្គានីស្ថាន៖ ក្រុមប្រិក្សាសន្ដិសុខអង្គការសហប្រជាជាតិបានបន្ដអាណត្ដិមួយឆ្នាំទៀតដល់កងកម្លាំងជំនួយសន្ដិសុខអន្ដរជាតិដឹកនាំដោយអង្គការអូតង់នៅ អាហ្វហ្គានីស្ថាន។ សហរដ្ឋអាមេរិក៖ អាមេរិកបានចោទប្រកាន់ពលរដ្ឋអាមេរិកាំងដើមកំណើតស៊ីរីម្នាក់ ពីបទចារកម្មមកលើក្រុមបាតុករប្រឆាំងរដ្ឋាភិបាលស៊ីរីនៅក្នុងសហរដ្ឋអាមេរិក។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
